ما عارفه وصلت البيت كيف اول ما دخلت شفت فياض بقوم من الوضايه وهو بنفض كم الجلابيه وقفت وانا بعاين ليهو لمن شافني قال لي لينه؟.. اتقدم علي وهو بسألني مالك الحاصل شنو؟... فجأة وبدون مقدمات لقيت نفسي برتمي في حضنو وببكي من اول وجديد... مسكني من اكتافي وحاول يزحني مسكتو قوي وقلت ليهو فياض انا خايفه خايفه شديد خليني هنا بس... قال لي طيب اهدي وتعالي جوا.. حركت راسي بالنفي وقلت ليهو هأ هأ... تميت بكيتي ونحن في نص الحوش بعد مساافه حتى زحيت منو مسحت دموعي وخشيت جوا طوالي ما قدرت اعاين ليهو.. امي قابلتني في وهي طالعه من الصاله قالت لي بسم الله جيتي متي.. لينه مالك يا بت.. قلت ليها مافي شي يا امي نعسانه بس خلوني انوم وماف زول يخش علي.. دخلت الغرفه لقيت لمى ماسكه تلفون امي وراقده قلت ليها لمى اقعدي برا.. قالت لي ليه ما جبتي فطومه.. نهرتها وقلت ليها قلت ليك اطلعي ما بتفهمي انتي؟.. سكتت وطلعت قفلت الباب وراي ورقدت ختيت المخده فوق راسي وغمضت عيوني بشده،بقيت بضرب راسي بفوق المخده واقول لنفسي دا شنو العملتو دا الله ياخدني الله ياخدني ياخ... الباب بقى بضرب وجاني صوت امي بتقول لي يا بت افتحي الباب دا ورينا الحاصل عليك شنو.. عرفتها ما حتسكت كان ما عرفت قمت فتحتو جات خاشه قالت لي مالك في شنو.. قلت ليها مافي شي بس سكاني كلب في الشارع.. قالت لي دا كلو عشان كلب؟.. قلت ليها انتي عارفاني بخاف منمم كيف... قالت لي خوفتيني قلت الموضوع اكبر من كدا....
بعد طلعت رقدت وبقيت بتقلب كل ما يجيني نوم بتذكر العمله الغبيه العملتها والنوم بطير بصعوبه حتى قدرت انوم....
ناس عمتي روعه جو تاني يوم، باقي الاسبوع دا ما قابلت فياض نهائي كنت بتعمد ما اطلع لمن يجي و مرات من ارجع من المدرسه بمشي بيت ناس عمي جلال بقعد معاهم لحدي المساء حتى برجع، سامي كان بجينا جمب المدرسه وبعد نطلع بنمشي مساافه برجولنا عشان يتونسوا هو وهبه بعدها بنركب.. كنت كل شويه بتذكر الحصل يوم الجمعه وبحاول اشغل نفسي بأي شي عشان ما يجي في بالي، حتى في القرايه كنت فجأة بتذكر لدرجة بقيت بقرا الدروس الجديده عشان اركز وما براجع القديمه القريتها....
لحي يوم الخميس كان بيتنا وبيت اعمامي اتملى بي ناس البلد والاجواء بقت اجواء عرس، ليلى جات يوم الخميس العصر قالت لي اشتغلتي كيف قلت ليها شنو؟؟. قالت لي مش قلتي نازله امتحانات؟.. قلت ليها اجلوها.. قالت لي جات كويسه معاك، مع العرس دا ولا كنتي بتلقي ليك طريقة قرايه.. ابتسمت ليها بس، زعلانه من نفسي شديد على كل المرات الكذبت فيها بسبب الاسمو شادي دا.. بالمساء هبه كانت معانا وياهو خاشين مارقين نوزع الشاي والخبيز، لمن الساعه ١١ جات هبه قالت لي ارح بيتو معاي الليله.. قلت ليها ماف طريقه.. قالت لي اها حتنومي وين؟ ما شايفه بيتكم مليان كيف ما شاء الله.. قلت ليها اصلا ما حانوم بنساهر كدا للصباح.. قالت لي انا دايره اسوق معاي سميره وسلسبيل بنات عمتك معاي لو ما مشيتي ما حيمشو ونسوق معانا لمى برضو.. قلت ليها قولي كدا من البدايه انتي ... سلسبيل اكبر من لمى بشويه وسميره كان مفروض تكون في اولى ثانوي لكن خطبوها ووقفت القرايه اصلا هناك في بلدنا بخطبو للبت من تخلص الاساس ومرات قبل كدا المهم مشينا بيتنا معاهم وما اظن هبه وسميره نامو عدو الليل دا كلو ونسه وقطيعه في سامي، سميره كانت عارفه بعلاقتهم.. الصباح بعد الصبح طوالي مشينا خلينا سلسبيل ولمى نايمين، بقينا مع شاي الصباح بعدها النظافه والقهوه، المناسبه كانت فطور لمن زمنو قرب امي قالت لينا امشو البسو كنت خاته فستاني الاشتريتو قبل يومين من السوق عند ناس هبه مشينا انا وهبه وسميره لبسنا عندهم وهبه ظبطت لينا المكياج حتى طلعنا، الشارع كان مليان رجال قلت ليهم ارحكم بالشارع التاني.. هبه وسميره اعترضو قالو ما بنقطع المسافه دي كلها هدا البيت قريب قبل نتحرك شفنا محمد جاي من بعيد هبه قالت لي واااي دا لو شاف وشوشنا دي بمسخ علينا العرس ارح ارح بالشارع التاني.. ضحكنا قلت ليهم في النهايه مشيتو بكلامي... مشينا بيت عمي جلال لقيناهو اتملى ما شاء الله وبدو يختو الفطور جبنا الذيادات بقينا حايمين بيها وبنوري الاولاد محل الناس الما فطروا وهم بختو الصواني لحدي الظهر كنا واقفين على حيلنا كدا بعد اتأكدنا الناس كلها فطرت حتى قعدنا كنا انا وهبه وسميره ورواح وبنات اهل مرت عمي اتنين.. طبعاً اغلب اهلنا بعرفو هبه بقو بتونسوا وانا ساكته وبسمع فيهم، وحده من البتين قالت يخوانا في ولد كدا ما عرفتو شكلو من اهلنا ما من الحله دي قمحاوي كدا حايم بي برا مع الشباب دا منو ياربي.. رواح قالت ليها حنعرفو ليك كيف بين الرجال ديل كلهم.. البت قالت ليها في واحد كان بناديهو ما سمعت اسمو كويس فواز فياز حاجه كدا.. رواح قالت ليها قصدك فياض؟.. رفعت راسي وبقيت مركزه في كلامهم ،البت قالت ليها ايوااااا فياض.. رواح قالت ليها مالو.. قالت ليها مافي حاجه عجبني بس دا منو هو من اهلنا؟.. رواح قالت ليها ولد خال لينه.. عاينت لي وقالت لي جد؟؟.. وطت صوتها وقالت لي خاطب؟.. قلت ليها لا.. قالت الحمدلله.. البت التانيه ضحكت وقالت ليها حتمشي تقولي ليهو تعال اخطبني ولا شنو.. قالت ليها لالا لكن بعرف اجيبو.. رواح قالت ليها انتي غايتو ما بستبعدها منك قااادره.. هبه قالت ليها ما تتعبي نفسك يختي مرتبط.. البت قالت ليها الارتباط دا لعب ساي لكن العمل رابط شرعي دا معناها جادي ما بنهبشو.. رواح قالت ليها يعني شلب بما يرضي الله.. قعدو يضحكو الا هبه ما ضحكت معاهم قمت من الاكل وانا العبره خانقاني صراحه البت جميله شديد وجذابه وسمعت كم وحده من حريم اهلنا سألت منها في اليومين الفاتو ديل ، هبه جات لاحقاني في الوضايه قالت لي ما تشتغلي بيها اصلا فياض ما بعاين للزي ديل.. قلت ليها ليه ما يعاين وحده فيها كل مقومات الجمال ما يعاين ليها شنو؟.. قالت لي خلاص خلي العواره وامسحي دموعك ديل قبل يجو لأنو حركتك كانت ظاهره...
ديك جو يغسلو يدينهم بي ورانا مسحت دموعي سريع بعدها سكتنا.. العرسان جو بعد الظهر دقو ليهم دلوكه بعدها شغلو المسجل لحدي العصر جرتقوهم وطلعو... بعد الناس خفو نادو الاولاد عشان يرفعو الصيوان ونبدا نظافه.. كنت قاعده في سرير في الحوش معاي كم بت وناس هبه مشو يجيبو المكانس.. من بعيد شفتو خاشي مع الاولاد طوالي قمت خشيت جوا.. ابتسمت وانا بعاين ليهو بالشباك وهو بنزل الصيوان معاهم وبتونس وبضحك، بعد خلصو قسمنا النظافه جزء مسك جوا واصلا كان جزء في بيتنا وجزء بيت عمي فيصل....
رجعت البيت بعد المغرب استحميت وشلت ملابس المدرسه، دخلت جدول الاحد في الشنطه ومشيت لي هبه لأني كنت منتهيه، فتحت معاي سيرة موضوع قبيل قلت ليها هبه انا نعسانه وما دايره اوجع راسي.. قامت سكتت، ما كان في زول غيرنا في البيت ف اتصلت لي سامي وبقت تتونس معاهو.. لمن العشاء اذن صليت وجيت رقدت
يوم الاتنين اهلنا كان كلهم رجعو، اليوم دا المغرب لمن اذن كنت بقرا، طلعت لقيت عمتي قاعده مع امي ومعاهم شاديه سلمت عليهم ومشيت اتوضى جاتني شاديه قعدت قصاد الماسوره التانيه وقالت لي اها ماف وحده سألتك في العرس دا انتي بت منو ولا كدا؟.. ما رديت قالت لي غايتو عمتك شكلها كدا جايبه ليك عريس لأنو خارجتني من جمبهم ما دايراني اسمع الكلام.. قفلت الماسوره وعاينت ليها قالت لي وحيات الله جد امس كانت بتتكلم مع عمك فيصل وسمعت كلمة عريس دي غايتو، عايني يا بت اوعك تتحججي بالقرايه ولا غيرو كان زول كويس طوالي وافقي قراية شنو وسجم شنو شوفي بتي رواح دي من تالته وقفت واشتغلت شغل احسن من الناس القرو جامعه، الجامعه دي كلام فاضي ساي والله... قامت طلعت وانا دخلت وفي راسي الف سؤال ياربي كلامها صح ولا دايره تجنني بس؟؟... صليت وقعدت مع ناس امي، عمتي سألتني كيف مع المدرسه.. قلت ليها تمام الحمدلله.. امي براحه قالت لي قومي سوي الشاي.. مشيت عشان اعملو وكنت سامعه ونستهم، عمتي قالت لي امي فكري في كلامي دا كويس، جامعة شنو كمان البت مهما قرت في النهايه مصيرها تعرس وتمسك بيتها وراجلها وماف راجل ضكران برضى مرتو تشتغل في الزمن البقى صعب دا، اها ضياع الوقت لشنو، والرجال الزمن دا دايرين البراعم الفي عمرها دا.. الواحده فينا يا هنادي دايره شنو غير تشوف بناتها متسترات في بيوتهم وبالزااات في وضعك دا، البت في الدنيا دي ما بسندها غير ابوها يا راجلها يا اخوها.. لا تقولي لي عم لا خال والله ماف عم بحل مكان واحد فيهم بالزاات اعمامهم ديل مش اخواني؟ لكن انا عارفااهم وبقول الحق ...اها بنياتك ابوهن بقى في رحمة ربو وما عندهن اخو اها ما فضل غير الراجل، بتك قرت وكلمت الثانوي كفااااياها لحدي هنا دا غير انو الجامعه قروشها كتيرة شي قروش التسجيل شي مصاريف كتب ومواصلات وعيييك انتو بتقدروا على دا كلو؟ ولد اخوك ما مقصر معاكم لكن لمتين حيصرف عليكم هو زاتو حيجي يوم يعرس ويعمل ليهو بيت يبقى راجل بيتين وحات الله ماف مرا بترضى بالحاجه دي، هسي نجي للمهم بتك ما بتلقي ليها احسن من عامر ولد خباب ما شاء الله اراضي البلد دي نصها حقتهم وبيتهم اكبر بيت في الحله واي زول بتكلم بي التزامهم واخلاقهم لكن شنو ما برضو قراية البت، هنادي انتي مرا واعيه ومفروض الكلام دا يكون في راسك قبل ما انا اقولو ليك لكن ما مشكله هسي انا فتحت ليك اضانك ووعيتك وتاني بقولها ليك فكري في كلامي دا كويس وختي عقلك في راسك تعرفي خلاصك يلا فتك بي عافيه...... امي قالت ليها اقعدي اشربي الشاي.. عمتي روعه قالت ليها لالا شربت هسي بعد اتغديت... امي نادتني ختيت السكريه والمعلقه بسرعه وطلعت عمتي قالت لي حياا سويتهو خلاص ما مشكله كبي لي نص... كبيتو ليها ودخلت جوا بقيت بفكر في كلامها وخايفه امي تتأثر بيهو، اكتر حاجه وجعتني في كلامها دا كلو حتة انو حيجي يوم وفياض يعرس ويبقى عندو بيت ما زعلت عشان الصرف الزعلني قصة انو يعرس وحده غيري.. اتنهدت بضيق انا تعبت من العايشاهو دا وما عارفه حدو وين، من وعيت وعرفت في حاجه اسمها حب وسمعت قصصو كنت بشوف نفسي فيها مع فياض، اي نص اقراهو اي وحده في المدرسه تحكي عن علاقتها، اي اتنين اشوفهم في الشارع اي ابطال مسلسل، ما كنت بتخيل غير انا وفياض مكانهم ومرات بعد انتهي من خيالي دا بضحك في نفسي.. بتجي لحظات بتمنى انو ربنا ينزع حبو من قلبي بعدها بستغفر وبدعي عكس كدا، مره هبه قالت لي انتي لو ما لحقتي نفسك وشفتي حل لحبك دا ممكن بعد شويه تجني بيهو.. ضحكت لمن قالت كدا لأني استنكرت الموضوع تماماً بس هسي استوعبت انو ممكن يحصل كدا، ياربي اصارحو واليحصل يحصل؟ بس انا ما عندي القوه دي ولو طلع ما ببادلني نفس الشعور هنا ياداب الجنيت، احسن اكتمها جواي بس لحدي ما يعترف او اشوفو مع وحده غيري....
امي جاتني شايله بستله سكتت شويه وهي بتعاين لي قبل تقول ودي المديده دي لي ناس سميه.. قلت ليها امي ما يكون كلام عمتي خشا ليك راسك.. سكتت ومشت قمت بي وراها قلت ليها اوعى اوووعى تقولي لي حتعرسي لي قبل اخش الجامعه والله يا امي اقتل روحي واخليك تعيشي باقي حياتك كلها ندمانه هدا وريتك.. قبلت علي وعاينت لي بحده قلت ليها امييي ما تعايني لي كدا عليك الله قولي حاجه حتسمعي كلامها؟.. مشت خلتني واقفه زفرت بقوة رجعت شلت البستله لقيت فيها مديده لبست التوب وطلعت على ناس سميه، بيتهم بعدينا بكم بيت اقرب لي ناس هبه، جات حلتنا وهي عروس ما تمت السنه وليها سنتين من سكنت المهم مشيت دقيت الباب ماف زول فتح كان في سلك في الباب لكن ما بحب اخش بيت زول قبل كان ما افتحو لي هم.. واقفه كدا جات هبه طالعه من بيتهم كوركت لي عشان اجيها رفعت البستله وقلت ليها ما شايفاني مرسله؟.. جاتني هي قالت لي ارح معاي دكان عمر قلت ليها ماشه دكان عمر ليه، ما تمشي الفوراوي.. قالت لي دايره لي جبنه واندومي هنا ما بلقى الجبنه، قلت ليها خلاص ارح خشي معاي اديهم دي ونمشي.. رجعت دقيت الباب هبه طوالي جرت السلك قالت لي دا عاملنو زينه؟.. خشينا قلنا السلام عليكم بصوت عالي ماف زول رد، فجأة سمعنا كواريك مرا كبيره كانت بتقول قلت ليك زح من خلقتي دي ما دايره اشوفك سميه اتكلمي مع الولد دا عشان لو ما مشى انا البطلع بخلي البيت دا.. في واحد تاني كورك بزهج: طالع يا امي طالع خلاص ما تكوركي... المرا قالت تكورك فيني انا؟ اطلع تطلع روحك بركة الله
اتفاجأت من دعاوي المرا لي ولدها واتفاجأ ت اكتر من الطريقه الرد بيها... انا وهبه بقينا نعاين لي بعض قلت ليها ارح نجي بعدين.. قبل نتحرك جا واحد طالع من جوا انا وهبه اتخلعنا وهو زاتو اتفاجأ قال السلام عليكم ومشا.. بعد ردينا السلام وطلع قلت ليها واي يا هبه حيقول كنا واقفين بنتصنت.. قالت لي بالله دا قاعد هنا شفتو قبل كم مره في الشارع ما عرفتو.. قلت انا بقول شنو وهي بتقول شنو.... سميه جاتنا سلمت وقالت لينا ديل انتو؟ خشو اتفضلو.. قلت ليها لالا مستعجلين هاك امي رسلتها ليكم.. قالت لي يا حليلها متعبها روحها ليه.. قلت ليها العفوو مافي تعب.. سميه قالت لينا خشو سلمو على الحجه.. هبه قالت لي ارح.. ما كنت عايزه اخش لكن هبه ما ادتني فرصه ارفض.. دخلنا لقينا معاها راجل سميه وهي بتقول يسافر قال، واحد امو عيانه راقده في السرير يقول داير يسافر؟؟ اصلو هو كدا من انا اعيى يطلع ليهو بي حجه عشان يشرد، عمايلو دي انا حافظاها حتى هناك في البيت كان بعملها لي.. سلمنا عليها وكفرنا ليها راجل سميه كان قايم هبه قالت ليهو خليك قاعد نحن مستعجلين يلا يا حجه الله يتم العافيه.. قالت ليها امين تسلمي يا بتي... سميه طلعت تقدمنا لحدي الباب قالت لينا غايتو عمتي ربيعه دي الله يديها العافيه بس بقت من اقل شي تنفعل وتكورك.. هبه قالت ليها هي مالها عندها شنو.. سميه قالت ليها والله ياهو السكري حقها ما كان منتظم وعشان هي وعبدالرحمن براهم في البيت عادل قال يجيبها هنا الفتره دي، غايتو انا فترت عديل وصدعت من الكواريك الكتيره.. سميه قالت ليها عبدالرحمن دا ياهو الطلع قبل شويه؟.. سميه قالت ليها اي اخو ناس عادل الصغير يا حليلو والله تعبان مع امو دي تعب شنو الما بسوي ليها لكن بعد دا كلو خاشي مارق تشاكل فيهو هسي قبل يومين قال ماشي الامارات يشوف ليهو شغل هناك وهي خلاااص من اليوم داك خشمها ما سكت دقيقه والعجب لو جا جمبها تدور تضبحو عديل.. هبه قالت ليها بري الله يجيرنا من النسايب الزي ديل.. قعدو يضحكوا بعدها طلعنا قالت لي عمتك لو بعدين عملت لي زي عمايل المرا دي بطردها من البيت.. قلت ليها عشان سامي يديك دقه كاااربه ويسلمك ورقتك ويجدعك في الشارع.. ضحكت وقالت لي ود امو عاد... مشينا الدكان لقينا نفس الولد القبيل قاعد في صندوق وبشرب في بارد وجمبو ولدين هبه عاينت لي ورفعت حواجبينها، هبه خشت جوا وانا وقفت جوا جمب الباب سمعت واحد بقول عبدالرحمن قوم وقت الأذان جا.. واحد تاني رد بـ: انت ما ماشي؟.. قال لا.. قال ليهو قوم يا زول .. قال ليهم بلحقكم بعدين.. قعدو يتشاكلو لحدي ما مشو كلهم....
هبه شالت الحاجات وطلعنا ونحن في الطريق قلت ليها اتخيلي الولد طلع بإذن.. قالت لي امام يعني؟.. قلت ليها ما عارفه يمكن بإذن بس.. قالت لي ظاره عليهو النوع الملتزم داك لمن يكون ماشي في الشارع ما برفع عينو .. قلت ليها عليك الله واحد بشاكل امو يأذن ليها شنو قالت لي عادي البأذن دا انسان زينا ما معصوم من الخطأ وبراك سمعتي سميه قبيل قالت امو مكراهو بكون زهج اللحظه دي.. قلت ليها اه ما علينا بيهم، ما وريتك حصل شنو قبيل.. قالت لي في شمار وساكته لحدي هسي لشنو؟؟.. حكيت ليها بكلام عمتي.. قالت لي المرا دي خرفانه ولا شنو، كيف يعني ما تقري الجامعه، هيي ما تقوم كمان بعدين تاباني سجمنا.. قلت ليها دا ولدها بطريقتها تعرس ليهو ولا تابى ليهو، هي مااالها وماالي.. قالت لي خوفتيني غايتو بعدين بتكلم مع سامي في الموضوع دا.. قلت ليها انا بحكي ليك عشان تشوفي لي حل لكن شكلي اخترت الزول الغلط.. ما ردت علي وسرحت قلت بنفسي ما كان احكي ليها هسي حتقعد تهم كدا لحدي ما تتكلم مع سامي... خشيت البيت مع اذان العشاء وركزت في الصوت فعلاً ما كان ياهو البإذن كل مره شكلو ليهو فتره بإذن لكن ما انتبهت الا هسي قلت صوتو سمح
امي جات طالعه من الحمام قالت بتتكلمي مع منو يابت؟.. قلت ليها ما بتكلم مع زول .. قالت لي مالك اتأخرتي كدا ..قلت ليها وانا بقلع في التوب: مشيت مع هبه الدكان.. قالت لي ما تقلعيهو فياض جوا... حسيت برعشة بتسري فيني لمن قالت كدا رجعت صلحتو واترددت مسافه قبل اخش.. دخلت ولقيتو مركز مع لمى في كراس وبشرح ليها في حاجه قلت السلام عليكم.. رفع راسو وقال لي المختفيه العامله فيها تقيله... سلمت وقلت ليهو انا؟.. قال لي اي انتي.. قلت ليهو عشان العرس بس .. قال لي الف مبروك لي صابر وعقبال عندك.. قلت ليهو تسلم الله يبارك فيك.. امي جات ختت صينية الشاي وقالت لي جيبي صحن البسكويت.. ما صدقت لمن لقيت لي سبب اقوم بيهو اصلا من قعدت ما عاينت في وشو قمت سرعه جبتو وخشيت جوا... قلبي كان بضرب سريع كالعاده، دي اول مره نتلاقى ونتكلم فيها من يوم الحصل ليه اتكلم وهظر معاي عادي كأنو ما حصل شي ياربي انا الكبرت الموضوع؟ ولا عمل كدا عشان عرف اني بتهرب منو... لمى جات خاشه بي كراسها وقالت لي اشرحي لي باقي المسائل دي.. قلت ليها مش هسي كان بشرحو ليك؟.. قالت لي فياض شرح لي واحده وتاني امي قالت لي خشي خلي لينه تشرح ليك الباقي.. انا اصلا ما بحب اقري الشفع ولمى كل ما تجيني برسلها لي امي قلت ليها خلي امي تشرحهم ليك بعدين.. قالت لي فاضل تلاته بس وانا نعسانه عايزه احلهم وانوم.. اتنهدت وقلت ليها تعالي بعد شرحتهم ليها طلعت حاجاتي وبديت اقرا وانا قاعده جات امي قالت لي تعالي.. لمن طلعنا الصاله قالت لي بي صوت واطي: عايني انا كلمتو بموضوع العريس لكن ما حكيت ليهو كلام عمتك كلو انتي لسانك ما يفلت وتجيبي ليهو سيره.. عاينت ليها مسافه وطلعت قعدت معاهم فياض قال لي سمعتي كلام عمتك قبيل صح؟.. قلت ليهو اي.. قال لي انتي رايك شنو؟.. قلت ليهو انا ما دايره عرس هسي.. عاين اي امي و قال ليها شفتي يا عمتي؟ كلمتك انا لكن ما اقتنعتي عرس شنو ولينه في العمر دا؟ هو العرس دا ساهل كدا؟ لينه لسه صغيره وقدامها قرايه ومستقبل وانا عارفها ما مفكره في الحاجه دي هسي.. قبل علي وقال لي ما تشغلي بالك بالموضوع دا وركزي في قرايتك انا بتكلم مع اعمامك.. امي شالت الكبابي ومشت وكان واضح انها زعلانه قال لي سمعتي كلامي؟ ركزي في قرايتك بس، فهمتيني قاصد شنو مش؟.. هزيت راسي بس قال لي لينه عايني لي.. رفعت راسي عاينت ليهو وزحيت عيوني بسرعه قال لي ما تدي الحصل اكبر من حجمو، انتي كنتي خايفه والزول لمن يخاف ما بكون واعي لنفسو بعمل في شنو، انسي وارجعي اتعاملي معاي عادي تمام؟.. قلت ليهو تمام.. امي جات قالت لينا بتتوسوا في شنو؟.. فياض قام وقال ليها كلام بين اخو واختو مالك يا عمتي.. ضحكو وامي قالت ليهو مالك قمت.. قال ليها ياداب راجع البيت تصبحو على خير.. قالت ليهو ما تبيت معانا.. قال ليها لالا ماف طريقه يلا مع السلامه....
بعد مشا امي قالت لي ابيتي ليه؟.. قلت ليها انتي لو متضايقه مني للدرجه دي بشيل شنطتي وبقعد مع ليلى اختي.. قالت لي دا كلام شنو البتقوليهو دا.. قلت ليها وحركاتك دي معاناها شنو؟.. قالت لي انتي هسي شفتي الزول الدايرك دا؟ عرفتيه وعرفتي اخلاقو لمن تابيهو؟.. قلت ليها كفايه عرفت مستوى فهمهم قال ما عندهم بت بتقرا، امي ناس زي ديل ما بقدروا المرا وما بتسوى عندهم شي دايراني اعيش معاهم؟.. قالت لي ومصاريف الجامعه دايرها يدبرها ليك منو بعدين؟.. قلت ليها بدبرها براااي في الاجازه ولو ما قدرت ما بنزل لي جامعه.. قالت لي تدبريها من وين؟.. قلت ليها بشتغل .. قالت لي تشتغلي شنو وانتي ما عندك شهاده.. قلت ليها الشغل البدون شهاده ما شويه بلقى ان شاء الله..... سكتت ما قالت حاجه، الليله دي رقدت وانا مبسوطه لأنو الحاجز الكان بيني وبين فياض اتشال، فجأة اتذكرت هم الجامعه الاتفتح لي دا، انا ما عارفه هل حاقدر اوفر القروش ولا لا لكن ما حاقعد ثانيه في الاجازه بدون ما اشتغل... عارفه فياض ما حيخليني اصرف جنيه من عندي لكن كلام عمتي صح، لمتين حيقعد يصرف علينا كدا؟؟ لو ما قدرت اوفر حق الرسوم والتسجيل على الاقل اوفر حق المصاريف...
بعد كم يوم بالليل كنت بقرا امي جات قالت لي ماجده دايراك.. عاينت ليها ورفعت كتفي يعني في شنو؟ .. مطت شفايفها بمعنى ما عارفه، شلت من امي التلفون ورديت صوتها ما كان طبيعي قالت لي لينه تعالي لي لو فاضيه.. عاينت لي امي وطلعت قلت ليها بصوت واطي خير يا خالتو ماجده؟؟.. قالت لي لمن تجي.... صوتها ما عجبني كانت بتتكلم بي حده وسمعت صوت زول ببكي جمبها قلت ليها طيب جايه، وقفلت...
يتبع...