اثار اقدام

الاثـر الـ2 الجزء الثاني

الكاتبة : فـجر سجاد
رواية اثار اقدام

الحمدلله
استغفرالله
لا تنسون متابعتي انستا

..

قبل أيام

: ول تعبتيني يمصكوعة جنج امج تشلعينو للگلب

نصدمت كلش من الرسالة
منو هذا ؟
معقولة نفسه الشخص الغامض ؟ خالي ؟
جاوبته بسرعة

: منو انتَ ؟

شافها ومارد دزيت أكثر من رسالة وماكو
يشوفها ومايرد حسيت نار شتعلت بگلبي
اريد بس اعرف منووو هذا وين يعرف امي
خلص اليوم واني بس افكر بي

..

كعدت الصبح على صوت حركة بلغرفة
رفعت راسي اقدام جاي يمشط

اردفت بنزعاج

: ماتعرف ناس نايمة

باوعلي بلمراية وبتسم

: اعرف بس الناس راحت خاست من النوم

: خالييي

رد علي بنبرة طيحت حضي

: روحهههه

: لا تحجيي هيججج

: ليش تحبينييي ؟

: اهووو ماخلصت تمشيط اطلع يلا

: ماطلع

جان يمي مخدة زغيرة شمرتها عليه وخربت شعره

: ههههههههه راحت تسريحة العريس

دنك شال المخدة وشمرها حيل علي الدرجة رجع راسي
ليورة

: الي ساعة اسرح بت الحلوة

: حيللل

: ثرثر يحكج جلدج ؟

: لا جلدك يحكك

اجى يمي عل ميز عبالي راح يطكني بس اخذ باكيت
الجكاير وطلع وحدة يدخن

: ايعع جكارة منن الصبح صدك تحجي

باوعلي ابرود وقدمها يم شفايفي

: اخذي نفس

الصراحة تحمست اعرف طعمها
ضحكت وتقربت بس خليتها بحلكي سحبها

: ها مو توا ايععع ؟

: اي ايعع بس اريد اعرف طعمها

: ججج مايصير موزين على صحتج خالو

اردفت ابرائة

: شويونة عفيةة

بتسم ورد خلها يم شفتي
تقربت اخذت نفس وذبيته طلع دخان قليل
بس مو حلو طعمها

: مو حلوة

: ياهو كلج حلوة ؟

: محد بس اشوفك هواي تشرب جكاير كلت هسه طعمه
ينافس الدولمة

ضحك مستهزئ وهز ايده

: والله عدج سوالف المُهم عطلتيني على شغلي كومي يلا

: لا اليوم ماروح الاهلك اضل هنا وحدي كافي مليت
من الخوف

باوعلي ورفع حاجب

: متاكدة؟

: اي اي اريد ارجع نفس قبل ماخاف

مسح على راسي بحنان ودنك باس خدي

: عفية بنيتي الشاطرة

ضليت مدنكة راسي بخجل هوا يتصرف بعفوية
مايعرف شيصير بية  احس گلبي دكاته ألف

: يلا اروح انا عينج على نفسج اذا ضجتي
خابري سجى تجي يمج

هزيت راسي

: اي تمام

تمشيت للحمام وهوا مشى وصل يم الباب ورجع علي حاوط خصري بيديه
واردف

: احسج غريبة هل ايام

: هههههههههههه مو مستعجل وكت هل سوالف هسه؟

: انعل ابو الصيدلية اهم شي انتِ كليلي شبيج ؟

: مابيةةة

رد سأل وجاوبت نفس الجواب عض صبعه بنفعال
ورد بحركة گلب مادري يحجي صدك لو يشاقة

: والله والحسين والعباس بيجج بيجج بس اخخخخ
ماترضين تحجين اذا ماطلعتي تنتضرين فرصة مناسبة
تخدريني وتاخذين اعضائي اطلعين اتاجرين أعضاء

: والله عليك خيال واسع

اردف بطريقة رومنسية

: حبيبتي اثاريي وممتلكاتي سولفيلي شبيج

باوعتله بحُب اخخ كلبي شهل كلام الحلو عضيت
شفتي اخفي بتسامتي عنه وجاوبت بنفس طريقته واني
اعدل قميصه

: حبيبي قدقد ماكو شي لا يضل بالككك

حجيت اخر كلمة بدلع وهوا صافن علي
يريد ياكلني

: ايبااااا عيديها كولي حبيبي

ضربته على صدره بخفة

: هههههههههههه خذاك الواهس يلا روححح
كافييي

دفعته للباب وهوا يضحك ويكول

: بس عيديها لا تصيرين چلبة

اثار بدلع : حبيبي

دفعته برا الغرفة التفت علي وذبلي بووسة بلهوا

: يروحلج فدوه حبيبج

: هههههههههههه تحبنييييييييييييييييييييي والله

: طبعاً حُب اخوي

غمز نهاية كلامه
تنفرزت منه سديت الباب بوجهه الخبيث
اردفت بصوت اقلد عليه واعوج حلكي

: طبعاً حوب اخويي ويروحلج فدوه حبيبج المن العمتي
من امدا حضي اي والله

بقيت بلغرفة مارحت تريكت ولا طلعت من الغرفة لا
قفلتها علي ونجبيت وكعدت وعدي اكل بثلاجة
تذكرت الرسالة دخلت على الرقم ماكو رد

يشوف الرسأل ويغلس اثناء تصفحي
بلتليفون اجاني اتصال من صلاح ستغربت مو من
عوايده يتصل رديت عليه

: الو

صلاح : هلا بلضلع الماينشلع

: امممم بيها مصلحة لازم

: لو ماعدي مصلحة جان حضرتك

: لا تحاجيني بصيغة ولد الخايس

: نجبي بلا هم معتبرة روحج اونثئ رقيقة

: احجي عدل بل اول متعلم فنون الرد من كوكل

: ولج صرصر اذا اكضج حضج اطيحه

: ولك صلاح ليش ماتحل عني هسه اتصلت سلم
كول شلونج شبيك مچلوب

: ولج صرصرةةةةةةة ياهووووو مچلوبببب هااااااا

: شبيك نكرصت مو وياك قصدي على واحد ابالي

: والزهرة كون اطيحين بيدي اذا طلعتي عدلة ازين
شاربي

: شلون شارب عبالك دود مكوم كل جانب بي شكل
حتى ما يستاهل ينحلف بي

رد علي ودمه يفور هههه

: سهلةةةة سهلةةة الزمج لو لا سهلة

: هسه شتريد تعارك من. الصبح شتريددد

: اريد اختج الچلبة

: سبحان الله الطيور على اشكالها تقع
خير أن شاء الله شتريد منها

: قنعيها نخطب زعلانة مني

: هنا السالفة بلا ستاذ صلاح غرد شمسوي
الاختي

: هية خل اسولفلج مابية احجي

: اشوف خل اراسلها تجي يمي ونسوالف

: عفية صرصر اذا تقنعيها كل النقط النحسبت ضدج
انساها

: حجي يفيدك يلا باي احاجيها واردلك خبر

سديته منه
وتصلت عليها

سچى : صباح الخير

: هلا حبيبتي صباح النور

: شلونج

: الحمدلله بخير اكلج اذا فارغة تعاي يمي خالج بلدوام

: اي ادللي هسه اجي

: هلا بيج انتضرج

سدته ودقايق وسمعت احد دك الباب كمت فتحته الها
دخلت ورجعت قفلته

سجى : شعجب ماهو خالي كل مرا اجي انا الا يروح

كعدت وهية كعدت بصفي

: اني كتله اريد اتغلب على خوفي

: عفية ردي اثار القوية

: اكلج شصاير بينج وبين صلاح

هزت ايدها وردت بقهر

: اخخ شحجي خية شحجي مچلوب مو صلاح

: يا يا يا شبي هوا صدك مچلوب بس ليش يعني شمسوي

: انتِ نايمة ورجليج بلشمس ماتدرين غير احمد
فصخ خطوبته من زهراء

: مانصدمت من الاول شفتهم مو مناسبين ابدأ
بس شنو صار حتى فصخو

: خية اخوج طكت مرارته يريد يعرس اله شكد
يجمع فلوس حتى يسويلها عرس تحلم بيه وهية
تتنعوص عليه ها ماريد ها مو هسه ها وها من وجعا
حتى وجعا

: يا يا شبيج اخذي نفس

: شاخذ نفس المُهم اجو النه وصار نقاش واخوج
فصخ كلت هسه تكعد ادك واتنوح لأن بينهم حُب
سنين تالي لابعينها ولاحاجبها تكله ماتلكة مثلي
ماجنها النعال الفلين ابو الف

: هههههههه جيد وصلاح دخله

: المچلوب شلون اخوي فصخها اخذ على نفسه
اراسلها مايرد يشوف ويغلس طحت بي وحضرته من
جميع المواقع

: جيد جيد

طلعت تليفوني وتصلت عليه هية مانتبهت
على منو اتصلت شوي وجاوب فتحت الصوت
واردفت

: احجي يمي هية

باوعتلي وخزرتني

صلاح : حُب حياتـي تسمعيني ؟

سحبت التليفون مني وردت عليه بعصبية
تحسها نار مشتعلة

: صلاححححح وقران اذا اشوفك اكلك بسنوني

: اخخ عنيفة سجوى ألف عافية حبيبتي كليني بس مالح
حسبي حسابج يصير عدج ضغط

: ايعععع لحمك مر وبعدين شتريددددد ؟

: احم اريد اسوي خطوبة اذا متصير زحمة يعني

سجى : هههههه وبعد ماتريد نعرس فد مرا

صلاح : والله تسوين فضل انا شخص مفلفل على زواج
حتى امي تكول انتَ يريدلك مرا تضبطك دايح تعاي ضبيني

: شكلولك عني درنفيس وانتَ برقي ؟
صلاح شوف مادام بعدنه مامتورطين خل نفلت احسن
انتَ عصبي وانا هم مانتراهم وانا ماحب احد يتجاهلني
انتَ سلوبك التجاهل

: ولج والله وبل الله لو تزوجيني لو تموتين

: ههههههه شني عينوك عزرائيل ومادري دنجب

: اجي ؟

: تعال كونك زلمة

: ليش ماتحترمين ؟؟؟ لو نطيتج مجال

: شوفففف عزيزي واحد ثنين تلاثة

قاطعها بسخرية

: سعد شك الباسه

: بطل تفاهة اففففف اسمع انا ماريد نكمل

: الحجي بلتليفون مايفيد انا بلباب

: هم صدك

سدت الخط وكامت تفتح الباب
اردفت بخوف

: ولج هذا خاف يأذيج ؟

: شحده؟ غير اخله اليوم بلفتحة الخامسة

راحت فتحت الباب وطلعت هوا بلباب البرا
شوي ودخلو ثنينهم فتحت الهم باب الصالة

صلاح : تفضلي سجوى

دخلو اخذتلهم ماي اجيت اطلع حتى ياخذون راحتهم
وصاحت سجى

: تعاييي تعاي كعدي يمنه

باوعت الصلاح اشر بعيونه اجي
رحت كعدت كدامهم

صلاح : اي سجى شبيج وياي؟

ردت عليه بعصبيةةة

سجى : ليششش تشوف رسألي وتغلسسسس
شني كاتلة روحي عليك لو جبرتك علي
حتى تتجاهلني؟ اختك وأخوي انا شدخلني بلنص ؟؟؟

فرك وجهه حيل باوعلها وتنهد

: سجى تشوفين تصرف اخوج صح وي زهراء ؟

ردت عليه بثقة

: طبعاً

باوعلها مصدوم
وهية كملت كلامها

: اخووي فوك السنة ونص من خطب ويريد يفرح
بعرسه ماخلى شي ماجابه وماحضره واختك معاندة
والله شني من يطخ ابالي ازوج يضل معلك خل يفصخ
احسن هية تشوف طريقها وهوا نفس الشي العلمك
اخوي من الصبح راح البغداد ويطول وانا اذب الصوج
بختك

شفته عصب من كلامها

: اياججج تحجين على اختي

اثار : اهدو شبيكم بل اول حلو مشاكلكم وبعدين
دورو على مشاكل غيركم

: ماتشوفين اختج شتحجي

سجى : ماحجي غير الصح

اثار : سججى كافيي

صلاح : شوفي اختي غلطانة انا ادري بس السوا
اخوج هم غلط مافكر احنى عمامه

: صلاح جاي تحل مشكلتنه لو مشكلة احمد وزهراء؟

: مشكلتنه

: جا اتفضل احجي

: ستغفر الله ربيي شوفي يابة من شفت رسألج
ماصار عدي مجال ارد عليج لأن صارت مشكلة بلبيت
شفت كلشي دزيتي وگلت بعدين من افرغ ارد
اتفاجئ اجي ارد الكاج حاضرتني ؟!!

: ماجاي اقتنع

: انجبي عشتي دور الزعلانة والمضلومة

باوعتلي سجى وكالت

: اثار خلينه نحجي على انفراد عشر دقايق بس

: تمام بس العلمج بعد العشر دقايق بثانية مُداهمة

طلعت وسديت الباب وراي

سجى
_______________

طلعت اثار وسدت الباب باوعت الصلاح بحدة
واردفت

: انا وياك مو غربة ولد عم
وكلشي يصير بين اهلنه احنى راح نتأثر بي
مثل زهراء واحمد شفت احنى طحنة وياهم

باوع مركز علي

: اي وين تردين توصلين ؟؟

مسحت وجهي بتوتر
واردفت وانا مدنكة راسي

: يعني الاحسن النه نن

قبل لا اكمل
مد ايده سحب راسي حيل
خلاه على صدره

صلاح : اششش اششش نچبي ماتحجين شي بي خير
عمرج كله

سكتت وانا اسمع دكات كلبه شكد سريعة
وصلني الخوف الحس بي من فكرة انفصالنه

صلاح : سجى لا تضيعيني انتِ كولي وخلي شروطج
وانا اكلج شريد شروطي ونتفاهم كلشي ينحل

خليت ايدي على صدره وخرت راسي رفعت
عيوني اباوعله واردفت

: انا اريد بيت وحدي
شوف صلاح لا عبالك من اطلب هيج ماريد اهلك
بس والله ادري تصير مشاكل ادري ماراح ارتاح وياهم

حاوط وجهي بيديه

: افهمج لا تشرحين ادري بيج شتفكرين ماتعلمينني بيج
بس

: بس شني ؟

: تدرين بية ماعدي مكانية
بيت

: عادي احنى بعدنه مو كلنه نزوج من اخلص دراسة
يعني بعد أكثر من سنة ونص الله يفرجها

باس راسي بهدوء وبتعد مركز بعيوني
بحُب

: انتِ مثل النفس بريتي ماكدر بدونج لا تحرميني منج
سجى

: لا تصير مچلوب وانا ماعوفك

دمغني على راسي
حيل

: صدك اطيتج مجال

: صلاح انا ماعرف بالحُب ولا اعرف شلون اتصرف
بس اعرف اكون صادقة وصريحة وعلى طبيعتي
انا كلني ثقة بيك لا تكسر هل ثقة لا تخليني بيوم
اندم لأن ختاريتك

بتسم وتقرب باس خدي
بتعد وكام وكف واردف بثقة

: اياج تفكرين بس تفكير يجي هيج يوم لأن حتى
بلحلم مايجي انا اكسر ليفكر يأذيج مو اكسرج

غمز وكمل كلامه

: شطلع الاثار هسه كلني ذنوب من عدج

: تستاهل الله يشويك شوي بلاخرة

: هههههههه خبيثة هسه شني شوكت انحدد الخطوبة ؟

: مادام عطلة خلها بعد سبوع ها ؟

: خل أبلغ الأهل وأن شاء الله خير

: خوش بس اذا مالحكت نأجل

: ادللي

بتسمتله وهوا طلع
طلعت شفت اثار تسد الباب وراه
التفتت علي وهية تركص حواجبها

: ها ها ها داشوف الاخ المچلوب طلع منتعش ؟
شنو انطيتي مشروب طاقة ؟

: هههههههههههه لا يا سافلة انطيته راجدي

: ضحكي على غيري

: المُهم والله خطوبتي بعد سبوع

: الف مبروك مقدماً الله يهنيكم

: بعد عمري حضري نفسج نفر السوك فر

: تمام

اثار
______________

شوي وطلعت سجى بقيت وحدي ورجعلي التفكير
بلرقم رجعت اراسل وهم ماكو اخر شي اتصلت على
عمي ادم شوي ورد

ادم : هلا الحلوة اليوم ذكرتني

: دائماً اذكرك بس انتَ كاطعع

: افاا هاي انا ؟

: لا حبيبي على غيرك شلونك عمو

: الحمدلله يعموو شلونج انتِ البغل زوجج شلونه

: الحمدلله والشكر زينين نسأل عنك

: حبيبتي شنو شكو ماكو

: صافية دافية كلشي ماكو

: فارغة بليل نطلع نتعشى برا انا وياج ؟

: اي ماعدي شي بس خل اكول الاقدام بل اول

: ياكل تبن شني بكيفه

: مايصير شرعاً اطلع بدون أذنه

بقينه نسوالف شوي
اتفقنا نتعشة برا بس طبعاً بعلم اقدام
شفت الوكت قريب على جية اقدام

كمت نضفت وسبحت
وكعدت على الميز انشفه بلشسوار
حبيت اسحبه لأن كلش متعبتني طبيعته
عكش

طلعت الساحب بعد ما نشف
وسويته صار يخبللل تمنيت يبقى هيج
بس مع الاسف بس يلوحه ماي يرجع

وكفت كدام المرأية افتر عاجبني شكله
طخت ابالي اخلي مكياج وتذكرت الحمرة
الجبتها من البسطية كدام المدرسة

رحت جبتها لونها يموت
خليت من عدها تخبل بس اكو نقص
طلعت فستان لونه ازرق مابي ردن بس خيوط ويوصل الحد الركبة من زمان عاجبني بس مالبسته هسه الا اجى وكته طلعت اشك شكك
رفعت اطراف شعري بماشة ولبست كعب

عجبني اصور التقى رحت جبت تليفوني
من الصالة ورجعت اخذت كم صورة
ودزيتهن الها بعدني واكفة وبيدي التليفون

سمت صوت الباب نفتح ويرجع ينسد
ضليت واكفة وضهري للباب ماريده يشوفني هيج
حمرتي ولبسي شهيرة وخزي  استحي

حسيت  تتقرب الي
عصرتت التليفون بيدي بتوتر
وبلعت ريكي هسه اول مرا يشوفني شبية هيج مستحية ؟

من حسيته صار وراي مباشراً قررت الهروب
تمشيت بخطوات سريعة للحمام بس ايده جانت اسرع
مني حاوط خصري وسحبني اله صار صدره على ضهري

احس اطرافي جمدت وكلبي مشتعلة بي نار مشاعر متناقضة
كلش اريد اروح أبدل مستحية من شكلي بس بنفس الوكت اريد اعرف شيكول حلوة لو مايهتم ؟؟

اسمع صوت تنفسه العالي بأذني
واني مخلوسة بحضنه اردفت بصعوبة

: خ خالي ببس

خله ايده على شفايفي يمنعني احجي

: اشششش التفتي شو

ثبت ايديه على خصري وحاول يخليني التفتت
بس عندت وثبتت رجلي بلكاع

: لا ا خاليي

ماسمع مني ولفني بقوة عليهه
التقت عيوني المرتبكة وخجولة
بعيونه الجريئة

دنكت راسي اتهرب من نضراته
واردفت بصوت شبه هامس

: ا اقدام

رفع ايده يمسح على خدي

: روح وگلب اقدام ؟

رجفة مشت بكل جسمي
خليت ايدي على صدره ودفعته
رجع ليورا بخطوات غير متوازنة

ركضت للحمام وقفلت الباب
سندت روحي بلباب اتنفس حيل خربطني
بنضراته كل ما حاول الم روحي كدامه يبعثرني
بنضراته

الحمدلله جان عدي ثوب بلحمام نضيف

لبسته وبقيت اشجع روحي حتى اطلع
فتحت الباب ومديت بس راسي
كاعد على طرف الجرباية وبيده جكارة
باوعلي وبتسم ابتسامة غريبة

: تعاييي

باوعتله بخجل وطلعت رحت وكفت كدامه
اردفت انسيه الموضوع

: متغدي خالي ؟

رفع راسه الي واردف

: ثرثر

: ها ؟

: اول مرا احب اللون الازرق

كالها وضحك

: يااااا اقداممم لا تصير ملطلط

: هسه شمسوي انا مجرد كتلج احببب اللون الازرق

يحجي ويغمز ادري بي يريد يخجلني

: يوم يومه حلو هل لون

: اي بس مرات يجي على شخص فيت يخليك تحس
انصنع هل لون خصيصًا اله  كد مايلوك عليه

بتسمت واردفت

: ياعيني دكافي حجي زايد واعترف هنه اربع احرف
ليش مصعبها

: اممم ثقة ثقة

: مو قصة ثقة بس كلشي بيك فاضحك

وكف راح يم باب الحمام
واردف

: الصراحة  يمكن صدك احبج

: تضحك علي انتَ ؟ شنو يمكن

: لا مو يمكن اكيد احبج بس

اردفت بنزعاج

: بس كاخت ؟

بتسم

: عفية

: جيد جيد جداً عفية قدقد احسن شي نبقى اخ واخته
حتى من ننفصل محد ينكسر كلبه

درت وجهي احاول اسيطر على مشاعري
اهدي اهدي اثار شنو وإذا مايحبج فد نمونة؟
انتِ هم لا تحبي يولي الثور على كولت عمي ادم

صدك عمي عزمني نتعشى سوا التفتت اريد احاجي
عل طلعة ماهو بلحمام
كعدت نتضرته يطلع

طلع مبدل اجى كعد يمي عل جرباية
ولزم تليفونه اردفت

: احم اقدام عمي ادم عزمني نتعشى برا اني وياه

رد وهوا مدنك

: وانا ؟

: انتَ مزاعلينك

رفع راسه

: ليش يابة شمسوي ؟

: كلشي مسوي

: ايباخخخخ

: اي والله ايباخخ

: ههههه هوا شنو اي والله شمسوي بلا

: كلش هواي لو اكعد اعد ماخلص الباجر

ذب تليفونه وقرب راسه علي

: اكابلج واكعد العكب باجر اذا صدك حجيج وطلعتي
شغلة وحدة مزعلج بيها

باوعتله بهدوء واني نار بكلبي ارد اكله
كلش مزعلني اريد تحبني مثل ما اني احبك
اي احبه اني تصرفاته خلتني احبه كلش احبه ومتعلقة بي
مادري شلون راح يجي يوم اعوفه

اثار : احم عوف هل موضوع هسه
اني حبيت اكلك حتى ماتزعل

: روحي وياه بس اعترض يجيب سيد ويجي يطلكنه

بتسمت بهدوء ورحت اخابر ادم
كتله يجي علي رحت للكنتور محتارة شلبس؟

: شبيج الج ساعة واكفة؟

التفتت عليه

: ماعرف شلبس ؟

بتسم بجانبية ورد

: لبسي الزرك يكتل

خزرته ورجعت ادور شي البسه
اخر شي ختاريت بنطرون عريض وقميص نفس اللون بيجي حلو وراح البس فوكه بشت

جهزت غراضي وخليتهن على صفحة
كعدت كدام المراية اباوع على شكلي شكد متغير
صدك ضعفت حيل مادري ليش شهيتي مسدودة اخر فترة
اردفت واني باوع الاقدام من المراية

: اقدام

: عيناه ؟

: اريد اسوي تحليل

باوعلي بقلق واردف

: ليش شبيج ؟

: مادري يمكن كلامك صدك وعدي فقر دم

: عفيية الحمدلله من قتنعتي باجر امشي وياي للصيدلة

: عدكم مختبر بيها؟

: لا بصفنه مختبر

: تمام اذا هيج

ملاك
_________________

كاعدة اخابر بصديقتي واجتني رسالة من ادم
سديت الخط ودخلت عل محادثة

ادم : شلون ناس ماتقلد

: هههه هلو

: هلوات عيني شلونج

: الحمدلله بخير

: احم اهلج شلونهم ؟

: زينين يسلمون عليك

: الله يسلمج

سكتنه ثنينه مانعرف شنحجي
اردفت اكسر الصمت

: محتاج شي ؟

: لا هيج حبيت اسأل

: ها

: اي

رجعنه سكتنه
تقريباً دقيقة واحنى ساكتين

: احم بعدك موجود

: اي

: اترخص اني

: أخذي راحتج

سديته منه واني كلش فرحانة باتصاله
بس ليش من بتعدت عنه صار هوا يتقرب ؟
شنو السبب معقولة يحب.. لا لا مستحيل

جا ليش ؟ اهووو ملاك لا تكبرين الموضوع
هوا كال مجرد اسأل وهوا أصلاً ليش يسأل
اكيد مهتم حكيت راسي بحيرة

وكمت اشوف امي شمسوية غدا
رحت الغرفتها دكيت الباب ودخلت
لكيتها كاعدة تقرى قران رحت كعدت يمها

شوي وخلصت صدقت والتفتت علي بابتسامة هادئة

سماهر : ها يمه

: شلونج گلبي

: الحمدلله يمه

: يمه خل نطلع اني وياج للسوك

: ليش محتاجة يمه

الصراحة اني مامحتاجة شي بس اريد اطلع وياها اغير
الها جو لأن ماتطلع كاعدة بهل بيت خطية
اردفت بكذب

: ها اي جم حاجة نروح اني وياج بليل ؟

: ياسوك فاتحلج بليل

: مو شرط سوك نروح مول

: ماحبهم يمه غالين

: الشغلة الزينة غالية يمه نروح 

: بكيفج يمه بكيفج

بستها وبقيت اسولف وياها
مشى الوكت بسرعة وصار الليل
حضرنه نفسنه واخذنه عبد الله

مجرد وصلنه ورجع لأن احنى نطول وهوا مشغول
دخلنه جوا شترينه كم حاجة ورحنى المطعم بنفس المول
كعدنه وطلبنه اكل

سماهر : بعد مامحتاجة شي غير

: اي يمه خلصت بس انتِ ماخذيتي شي ؟

: يمه مامحتاجة شي

: براحتج گلبي

شوي وصل الاكل بدينه ناكل
حسيت اكو احد واكف وراي التفتت وتفاجئ
بادم واثار

ادم بابتسامة : السلامُ عليكم

باوعت عليه امي وردت السلام بحُب

: هلا ابني هلا تفضل اكعد ويانه

ركز علي

ادم : لا مانريد نزعجكم

ملاك : احم لا بلعكس هلا بيكم تفضلو

كعد هوا مقابيلي واثار يمي
وامي بصف ادم

اثار: شنو هل صدفة الحلوة

: فعلاً شنو بس انتو جاين ؟

ادم : اي طلعة خاصة بس انا وثرثر

سماهر : الضاهر اكو من أخذ مكان سجى

ادم : خاب حتى مكان امي اخذته

ضحكت اثار وغطت وجها بيدها

ملاك بابتسامة : الله يخليكم البعض

سماهر : اي والله

: فدوه الگلبج خالة

سماهر: طلبو اكل ناكل سوا

ادم : اثار شني تردين ؟

: اريد بس بيتزا اذا اكو ..

راح هوا يطلب وعيوني وراه احسه متغير
اخر فترة شوي ورجع حس علي اباوعله
رفع راسه باوعلي واني الثولة ما نزلت عيني

امي مامنتبهة مستلمة اثار شلونها اختي وشلونه اقدام
ركز بعيوني غمز ورفع حاجبه بمعنى . اكو شي ؟

جان يمي المنيو مال المطعم غطيت بي وجهي متفشلة ومستحية بتسمت شلون شكله لطيف من غمز

صاحت امي

: ها ملوكة تردين شي بعد ؟

امي عبالها رافعة المنيو اريد اختار اكل ماتدري أضم روحي بي وخرته بس ابد ما باوعتله

: لا يمه بس اشوف شنو عدهم

شوي وجابو اكلهم اكلنه وخلصنه ردت اتصل بعبد الله
يجي علينه ماقبل ادم كال اني اوصلجن
وطول الطريق عينه علي واني اجنبه
وصلنه نزلت ودخلت للبيت قبل امي اريد بس
اتهرب منه

اثار
_____________________

رجعت للبيت بوكت شوي متأخر لأن ادم ماخلى
مكان ما اخذني اله كلشش تونست وياه
دخلت للغرفة ضلمة توقعت اقدام نايم

ماشغلت الضوء طلعت جهازي شغلت فلاشه
ماكو احد

: اقدام

مارد علي رجعت شغلت ضوء الغرفة
ماهو يمكن طالع دورت عليه ماله اثر
بس الوكت تأخر هسه وين يروح

خابرته مغلق بدت الأفكار السودة براسي
يمه وين راح بهل وقت وليش جهازه مغلق ؟
معقولة صاير وياه شي

گلبي مامرتاح رحت بدلت ملابسي وكعدت
عل جرباية اخابر بي بس هم نفس الشي ماكو
اخابر ادم اكله ؟

بس ادم جان وياي مايعرف عنه شي
وكفت اروح واجي بلغرفة خايفة عليه تقريباً نص ساعة وهوا ماكو

بادت رجلي من الخوف اخر شي طلعت من الغرفة
كعدت برا بلحديقة انتضره ماردت احجي الاحد من اهله
يمكن مجرد طالع ماصاير شي واخوفهم وياي

نعست كلش واني انتضره
الدرجة كعدت اغفي واني كاعدة
حسيت روحي راح اطيح من النعاس واسمع صوت باب البيت ينفتح وكفت بسرعة واني احاول اركز

دخل يمشي على كيف جكارته بحلكه وايد بيها علاكة سودة وايد بجيبه ماجان منتبه علي الحد ما تمشيت الجهته
التفتت مصدوم ماجان متوقع وجودي

: اثاررررر !!

رديت بنزعاج واضح واني اعوفه وراي وادخل الغرفة

: لا جني

دخل وراي ذب العلاكة على جهة واجى علي

: من شوكت انتِ هنا ؟

اخذت نفس قوي اهدي بي روحي وسحبت الجكارة
من شفايفه طفيتها عل ميز اول مرا انزعج منها
باوعلي مستغرب تصرفي

اثار : اقدام وينن جنتت

حاوط وجهي بيده و
تجاهل سؤال ورد ابرود

: ليش ما نايمة الوكت تأخر روحي نامي
وبعدين نحجي

: لا احجي هسه

: اثار بابا الوكت متأخر نامي

من حركت گلبي بسبب بروده سحبت ايده
وعضيته حيل سحبها متوجع وهوا يباوع علي بغضب

: تخبلتيييي ؟!

عفته ورحت اخذت مخدتي من الجرباية
ودخلت الصالة سديت الباب حيل

اذا ابقى يمه واحد من الثنين يا اكتله يا اكتل روحي
سهرانة وكلبي بشيشه من وراه وهوا حتى ما يجاوب ويكول وين جان من طاح حض كلبي مايعرف شلون

يخمد اذا ما يتاكد انتَ مابيك شي
طفيت الضوء وخليت مخدتي بلكاع نمت عليها
واني اخذ شهيق وزفير اهدي اعصابي
يولي الثورر لا تفكرين بي

مادري شوكت دموعي بللت خدي
لا لا اثار لا تصيرين غبية على شنو تبجين ؟
يستاهل خوفج عليه شبيج صايرة تتنعوصين واذا
كلبج جان محترك عليه وهوا يحجي برود مثل الثلج
ماحاس بيج لا تبجين لا ما اسمحلج مسحت ادموعي
بقوة

وكمت للثلاجة طلعت بطل ماي شربته كله
وهوا ماله صوت حتى ما اجى وكال شبيج
خبيث رجعت تمددت وغفيت بسرعة لأن جنت حيل منعسة بس قاومت بس حتى اطمأن عنه

كعدت ثاني يوم حرفياً شابعة نوم 
رفعت راسي من المخدة وانصدمم الساعة 2:23 الضهر!!
كعدت مخترعة يا ماحاسة بروحي شكد نايمة
كمت فتحت الباب على كيف مديت بس راسي
اشوف اقدام موجود لو لا

والحمدلله ماهو طلعت اخذت ملابس ودخلت للحمام
سبحت وطلعت جهازي يرن فتحت خط بعد ماشفت
سجى متصلة

: ها سجىٰ ؟

: اثار حضري روحج العصر نروح للسوك

: منو ومنو ؟

: انا وياج

: بس انتِ تردين تجهزين الخطوبتج واني كلشي مافتهم
لو تاخذين امج

: ولج لا اول خل نشوف فستان حلو الج وجم شغلة
وبعدين نحضر الاغراض الأساسية انا وامي

: تمام گلبي مثل ما تردين ولو اني الاعرفه بلعكس يجهزون
الاشياء المُهمة وبعدين العادية

: يلا جا حضري نفسج العصر ياخذنه زوجج

: انطيتي خبر ؟

: لا انتِ كليله بلا باييييي

سدت الخط بوجهي الچلبة
اني ويني وين خالج حتى احجي وياه
رجعت على الرقم المجهول نفس الشي ما مجاوب علي
ستغفرت ورحت انشف شعري

كعدت كدام المراية وبديت انشف بي بخاولي ( منشفة )
شوي ومشطته سويته گصيبه

حسيت كلش جعت بس ماريد اطلع
بس تشوفني ام اقدام تستلمني نايمة للضهاري ومن هل حجي واني روحي لخشمي من ورا ابنها

مالي خلك اكعد وانجب
لا لا جوعانة كلش مو مال اكعد وانجب خل اطلب
من مطعم بس ماعرف ولا مطعم شلون ؟؟

اخابر اقدام اششش كلشي ولا اقدام ابداً
ولا احجي وياه الدايح اخابر صلاح
فعلاً صلاح قريب علي مجرد تصالت عليه دخل اقدام باوعلي وبتسم سويت روحي ما شايفته

صلاح : ها ضلعي ؟

تحمحمت واردفت

: صلاح طلب

بس كلت هيج تقرب علي اقدام
مستغرب اتصالي بصلاح حرك ايده بمعنى شتردين
بس غلست عليه

صلاح : عين الج وعين لختج أمري

: تسلم اريد تطلبلي اكل من مطعم

سكت مستغرب طلبي واقدام سحب التليفون مني قبل لا يجاوب

اقدام : ها عمي صلاح

اقدم : لا لا تشاقة وياك
يلا الله وياك

سد الخط ودار علي خازرني كتفت ادي بعدم هتمام
واردفت

: ليش تأخذ تلفوني ؟

: ايش ما خابرتيني اني اذا تردين شي

ركزت بعيونه واردفت

: بصفتك شنو ؟

بتسم تك خد بستهزئ
وتقرب علي جنت كاعدة على كرسي يصير كدام المراية
وكف يمي ودنك المستواي

: حلو حلو بصفتني شنو مو

ارتبكت من نضراته
درت وجهي عنه

اثار : اي

: حضرة الجميلة اثار ناسية يمكن انا زوجج ؟

: ماناسية مذكرة كلشي خاصتاً زواجنه المزيف

لزم فكي وادر وجهي عليه

: شني الزومه هل حجي ؟

: الزومه مايحقلك تسأل ليش ماطلبت منك
لأن ما راح اجاوب مثلك البارحة من رجعت بنص
الليل سألتك وماجاوبت هسه نفس الشي لا تسأل

: اثار ترا جبيرة انتِ بطلي
سوالف الجهال

كلامه خلاني اعصب يعني خوفي عليه صار سوالف جهال
وكفت ودفعته من صدره حيل بس بقى ثابت كدامي

: هوا هم م..

قاطعني

: هوا هم مو صوجك صوجي حفظتها شوفي غيرها

: اقدامممم لا تستفزني وحق الله اخذ غراضي واروح الادم
ماخليك تلمح ضلي

: شبيج مچلوبة اليوم ؟

خزرته ورجعت ضربته على صدره

: تدري فعلاً سوي خير شر مايجيك

: دكعدي هسه وخل نتفاهم

: ماكعدددد احجييي العندك

: شني الشي المخليج تصيرين هيج عصبية ؟
كعدت على طرف الجرباية وكعدت اعد

: اني اكلك الشي وبساطة يا عزيزي
اجي للبيت ما الكاك واخابرك مغلق كعدت انتضرك
برا خايفة عليك ساعات مرت وانتَ ماهو الف فكرة
سودة اجت براسي شي اكول اخابر ادم واخله يدوره
وشي اكول الاهلك بس ما ردت يخافون عليك وتالي

ترجع ماكو شي ترجعلي بنص الليل بوقت حتى *****
نايمة يابة وين جنت تجاهل سؤالي اقدام وين رحت تغلس
برودك يكتلي من كلبي صاير جمرة مشتعلة بسببك لا تعاملني هيجججججج

سكتت بعد ماحجيت كلشي بكلبي
وهوا واكف فوك راسي اقل شي يمكن يوصفه مصدوم
جان فاتح عيونه بدهشة اعتقد رحت زايد بلحجي
لأن كلت كلمة مو حلوة بحقه

حتدت ملامحه واجى ثنه ركبته وكعد كدامي
لزم فكي بس هل مرا بأذية خليت ايدي على ايده

اقدام بحدة : تفشريننن؟

: ما فشر بس حترك گلبي منك

عصر فكي بيده صرخت متوجعة

: لاااا خالييييي

حس على روحه ورخى ايده شوي

: اثار منطيج مجال زايد انا

اردفت واني
عيوني  مدمعة

: بس لان خفت عليك هيج تحجي وياي ؟

: ليش تفشرين

: عفت سبع تالاف كلمة وركزت بس على وحدة ت..

بحركة سريعة منه سحبني الحضنه صرنه ثنينه بلكاع

: اشششش  هاي هية بوية

دفعته واردفت

: ريح گلبي وگلي وين جنت ؟

باوعلي بتردد وحك نهاية حاجبه

: احم جنت يم صديق بلمستشفى

باوعتله بشك

: منو هل صديق

: ما تعرفينه

: شسمه ؟

: اسمه و اقصد عمر

: شكد عمره

: شني تحقيق فاتحة

: تحقيق ونص جاوب

: بلعشرينات

: صديق مقرب ؟

: لا مو كلش

رفعت حاجبي

: مو كلش وكضيت الليل يمه بلمستشفى ؟؟

حسيته رتبك كام وكف واردف

: انا راح اوصيلج لا اكل

وكفت صرت مقابله تقربت كلش عليه ورفعت رجلي
خليت عيني بعينه واردفت

: اقدام راح اثق بكلامك بس اذا طلعت تضحك علي
وماجنت عد صديق وداعت عيونك نخرب

بتسم بستهزئ واردف

: شتردين تسوين مثلاً ؟ جاي تحسسيني
احنى صدك زوج وزوجة

: اسوي كلشي ماتتخيل اسوي
بعدين مثل ما اني محترمة الاتفاق البينه انتَ مجبور هم تحترمه

دار ضهره ومشى برا
بكل هدوء خلاني اريد اركعه بلحايط اموت من
التجاهل هنا سديت الموضوع هذا وقررت انسى

تقريباً نص ساعة ودخل بيده علاكة مال مطعم
اخذتها منه وكعدت بلكاع اكل بهدوء

وهوا كعد عل جرباية يباوع علي
رفعت راسي اجت عيني بعينه

اثار : احم سجى تريد تروح العصر للسوك وتريدني
وياها

: روحي

: انتَ توصلنه

: ميخالف اوصلجن بس تخلصن بسرعة

هزيت راسي وكملت اكل غسلت ونضفت المكان
خابرت سجى كتلها تتجهز واني هم بدلت بسرعة
طلعت شفته مبدل وكفت يمه واردفت

: يلا اذا خلصت نطلع

دار علي وطلع فلوس من جيبه
خلاهن بيدي

اقدام : هاي اذا تردين تشترين

اخذتهن خليتهن بلجنطة وطلعنه
اجت سجى واخذنه السوك جان قريب عليهم نزلنه يمه
وهوا نزل ويانه

اقدام : عدي صديق هنا يشتغل راح اكعد يمه على ماتخلصن خوش ؟

اني وسجى : خوش

راح دخل المحل صديقه مال ملابس رجالية
واحنى بقينه نفتر بلسوك اي فستان يعجبني مايعجب
سجى واي فستان يعجبها مايعجبني شترينه جم شغلة
بقن بس الفساتين واحنى نمشي حسيت أحد يمشي وراي

وصدك حساسي وين منروح ورانه اخر شي طكت
روحي التفتت وقبل لا المحه اردفت

: شتريددد

الرجوع للحاضر
....................

كشمشات لاتنسن التعليق والتصويت يعمـري