بارت _15_
ضاعن درابين العمر
ماندري نمشي بيا درب
جا ليش من دون الخلك
عشنا ويا اهلينا غرب!.
#العنود.
••••••••••••••••••••••••••••••••••••••••••••
عنود.
الخوف ملئ كلبـي ليش محد موجود
فتحت الجنطه ادور ع المفتاح وايدي
ترجف لكيتها اريد بس ايدي ثتبت
وافتح الباب ماكدر دفرت الباب
بقهر فتحت الباب بعد معاناة ماكو احد
دخلت للغرفه الكنتور مفتوح
والملابس بالكاع
فزيت على صوت موبايلي باوعت اشهم
ركضت عليها بس فتحتها انهديت علي بالغلط
عنود:- وينك وينك تريد تموتني حقيررر.
اجاني صوته مبحوح وكوه يطلع صوته
يبين باجي
اشهم:- عنود تعاي للمستشفى محتاجج.
بلعت ريك والخوف ذب بجسمي اريد احجي
ماكدر كلت اكيد متيم صارله شي
عنود:- اشهم شصاير ليش بالمستشفى.
اشهم:- تعااي فدوه تعاي.
حجه وكام يشهك اتخبلت كلت جايه
وسديت الخط خليت السلاح بالبيت
وقفلت الباب وطلعت شفت واحد
يراقب البيت عرفت هذا عسكري
مااهتميت اخذت تكسي للمستشفى
والف فكرة اجت ببالي
وصلت المستشفى خابرته كال اوكفي
اني اطلعلج وكفت انتظره
لمحته طلع يمشي بثكل وحالته مخربطه
بس لمحني وكف يباوعلي وعيونه مدمعه
ركضت حضنته دفن راسه بركبتي
وشهك يبجي واني متت اريد بس يحجي
ابتعد ومسح دموعه سحبته على طرف
وركضت اشتريت مي رجعت يمه
انطيته كعدت كدامه اريد اسئله
بس خايفه من جوابه تنهدت ومديت ايدي
الترجف لزمت ايديه رفع عيونه عليه
عنود:- شصاير اشهم كلبي وكع؟
::- ماتت عنود حتى هي عافتني.
::- منو هي؟
::- خالتي الي ربتنـي من بعد امي الي
عوضتني حنانها تعبت وانه اخسر كل
الي احبهم تعبت وحق هو ابو الحسنين تعبت.
::- اشهم باوعلي باوع انه يمك مااعوفك
والله مااعوفك.
مدنك راسه مايريد اشوف حالته يهز
برجله شكد حاولت اخفف عنه ماكدرت
صعبه فكد انسان غالي عليك
وخاصه الي ماعدهم احد من يموت عزيزهم
تخلص الدنيا بعينهم والحياة تصير
بدون لون فكدهم يوجع
شفت شاهين طلع من المستشفى شايل
متيم بحضنه يدور بعينه بس شافنه
أشر هو رايح هزيت راسي اله
بقيت كاعده بصف اشهم وامسد على
ايده حط راسه بحضني وغمض
دك موبايله شفته الادهم مااهتم
اخذته ورديت
::- الو اشهم شكوو شاهين خابرني هسه.
::- انه عنود.
::- وينه اشهم شبـي ليش ما هو يردد؟ صايرله شي احجي؟
::- بس اهدى شبيك، اشهم هنا يمي تعبان
شويه.
::- وينكم هسه؟
::- بالمستشفى.
::- جاي بالطريق.
رجعت الموبايل لجيبه ومسحت على شعره
بست كصته وهو فاصل دقايق وشفت ادهم اجه يركض بس وصل يمنه شاف اشهم
متمدد عبالك انسطر صاح اشهم
واشهم فز وكف ركض ادهم حضنه
ويحاول يواسي بس اشهم فاصل مايحجي
وخره يباوع لوجه ويحجي وياه ويمسح
على وجه
ادهم:- اشهم ابويه انت ليش ماتحجي
لاتحرك كلبي كووول شي اخابر ديسق
يجي ها؟ لاتسكت فدوه اروحلك.
يحجي ويهز براسه واشهم مايرد ولاعبالك
ويانه عطتت بخوف من شفت اشهم
وكع بالكاع وادهم حضنه يحاول يكعده
اخذت المي ورشيت وجه فتح عينه
ادهم:- كوم اسند روحك كوم خلي يفحصوك يلا.
اشهم:- مابيه شي.
عنود:- معليك بي ادهم كومه خلي ناخذه
شوف حالته شون.
اشهم:- ادهم راح ادفن امي مرة ثانيه.
ادهم:- مااعرفك هيج ضعيف شد روحك
شبيك هذا يومها لاتسوي هيج .
عافنه وكام كال اكمل الاجراءات حتى
ياخذوها للدفن بقينه اني وادهم واحد
يباوع للثاني ردت اروح وراه ادهم ماقبل
هو راح واني بقيت كاعده اجاني اتصال من
شاهين
شاهين:- عنود ادهم وصل؟
::- اي وصل.
::- تعاي انتِ يم متيم مايسكت يريد ابوه.
::- مكدر اعوف اشهم بهاي الحاله.
::- ادهم يمه وانه هم راح اروح وياه لاتخافين عليه تعاي انتِ هنا.
::- ادهم منو؟ شاهين جاوبني بصراحه.
::- شريك اشهم بالشغل.
::- شااهين احجي الصدك.
::- شبيج عنود مو وكتها هسه.
سديته بوجهه ادري يجذب اكو شي اكبر
رغم مايثقون بي ولا يأمنون بس هو
قريب عليهم ويخافون علي وهو كذلك
مشيت داخل المستشفى حتى اكللهم راح اطلع شفت ادهم واكف بالباب وايده
على راسه تقربت سمعت صوت اشهم
باوعت شفته كاعد بصف الجثه وحاضن ايدها ويبجي
اشهم:- ضايع يمه والله ضايع ليش
تعوفوني كلكم ليش ليش عايش انه هاا
امي عافتنـي ابوي عافني هسه انتِ
ماتحسوون بيه والله الهوى يحرك بصدري
مخنووك حيلل مخنووووك.
صار يضرب بصدره بقوة ركض ادهم
سحبـه يهدي بي اول مرة اشوف اشهم
بهاي الحاله منكسر، شهكت ابجي
رفع عينه المليانه دموع عليه
::- تعااي يمي عنود بس انتِ بقيتـي لاتعوفيني .
مشيت يمه كام ادهم طلع من الغرفه
حضنتـه ابجي عشر دقايق بقى حاضني ويشهك ابتعدت عنه اشوف عيونه دم حمر
مااريد اعوفه بهاي الحاله
اشهم:- عنود متيم.
::- اجيت اكلك راح اروح يمه.
::- لاتعوفي وحده.
هزيت راسي طلعت كلت لـ ادهم يفوت يمه
واني اخذت تكسي ورحت لبيت شاهين
استقبلتني رهف تبجي دخلت شفت متيم
مفرفح من البجي وشاهين يحاول يسكته
ماكو، يبجي ويصيح اريد بيبي اريد بابا
عنود:- حبيبي متيم ابوك راح يجي لاتبجي.
متيم:- ارريد بابا ارريد بابا.
::- راح يجي بس راح يزعل منك لان تبجي.
::- مايزعل مني بابا مايزعل.
::- اذا يشوفك تبجي يزعل.
::- بيبي ماتت؟!
سكتت محتارة شجاوبه طفل هو واني
بحياتي مامتعامله ويه طفل شاهين
عافنه وراح، بالساعه واني احاول اقنعه
ماكو بالاخير تعب ونام طفيت الضوء
وطلعت بهدوء
كعدت بالصاله لازمه راسي احس راح ينفجر
اجت رهف كعدت بصفي
رهف:- اشهم شلونه؟
::- كلش تعبان رهف ابد ماشفته هيج
منكسر حيل متأذي .
::- الله يساعده حقه شاهين حجالي شكد
جان متعلق بيها ويحبها.
نزلت دموعي واني اتذكر حالته يم كبر امه
وهسه شيصير بي احس روحي تنمرد
سحبتني رهف لحضنها بجيت لحد مانمت
فزيت على صوت الباب من انسد
ركضت للاستقبال اشوف متيم بعده نايم
كعدت يم راسه مديت ايدي الترجف
امسد على شعره اتذكرت ادم شكد
مشتاقتله واريده يمي
ردت اكوم فز يريد مي انطيته ورجعت غطيته
بلكت يرجع ينام كالي اريد بابا
::- متيم حبيبي ابوك مشغول هسه.
::- خلي يجي اريده.
::- تعال ننام من نكعد هو يجي ياخذنه للبيت.
::- صدك؟!
::- اي صدك.
تمددت وسحبته لحضني ماحسيت ايمته
غفيت، فزيت على واحد يسحب ايدي
فتحت عيني شفته اشهم حالته مبهذله
ووجه ذبلان سحب ايدي واخذ متيم
من حضني باسه وشمه واجه تمدد يمي
مخلي ايده على عيونه اباوعله مااعرف
شنو احجي اباوع الساعه بـ 4 الفجر
::- دفنتها بصف امي ووصيت ابوي عليهن.
يحجي بغصه فتحت ايدي وكلته
::- تعال.
رفع ايده من عيونه باوعلي تقرب حط راسه
على صدري بقيت العب بشعره حسيت نفسه ثكل ونام مااريد اتحرك حتى لا يفز
بس هو راسه كلش ثكيل بقيت جامده
تقريب الساعه اتحرك متيم وهو يهلوس
اريد بابا
فزز اشهم بسرعه كعد يمه يحركه كعد
متيم بس شاف ابوه ابتسم وحضنه
وهو يعاتبه ليش مااجيت البارحه
كمت حتى اسويلهم شي ياكلو طلعت للصاله
شفت ادهم نايم وهو كاعد رحت للمطبخ
سويت چاي واخذت الاجبان وسويت بيض
مديت راسي للصاله من سمعت صوت شفت ادهم يدخن اخذت الصينيه وطلعت
رفع عينه باوعلي ودنك رحت للاستقبال
حطيت الصينيه بالكاع
::- اشهم يلا تعال اكل.
::- ماجوعان اكلو انتو.
::- ماناكل احنا هم اذا ماتاكل مو هيج متيم؟
متيم:- اي يلا بابا كوم.
::- خوش تتفقون عليه.
::- اصيح ادهم واجي.
::- ادهم بعده هنا؟
::- اي بالصاله.
اباوعله اتوتر ماافتهمت ليش طلعت للصاله
ادهم يجمع بااغراضه رفع عينه عليه من حاجيته
عنود:- تعال اكل ويانه.
::- طالع عندي شغل عنود اذا صار اي شي
خابري عليه تمام؟
هزيت راسي مستغربه ليش هيج يتصرف
طلع سديت الباب وراه ورجعت للاستقبال
اشهم يسوي لفه لـ متيم ونوب يسوي
لفه لروحه لان متيم ماياكل اذا ماهو ياكل
كعدت يمهم ناكل ساكتين بس متيم
يحجي
اشهم:- ادهم راح؟
::- اي كال عندي شغل.
::- ماسئلج شي؟
::- لا شكو ليش؟
::- بابا متيم كوم غسل وتعال حتى نروح.
كام متيم ركض هو باوع بعيوني يحجي
بصوت ناصي
اشهم:- ادهم مايعرف متيم ولا يعرف
عندي ولد لهذا لاتجيبن طاري يمه.
::- تخاف يسويله شي؟
::- لا مايسويله شي بس ماريد يعرف.
::- اشهم اعرف مو وكتها بس هلسالفه
دوختني اريد اسئلك كون تجاوبني.
::- اسئلي؟
::- ادهم منو ليش ماتأمنون بي وتخافون عليه وهو هم يعني شفته شون جان خايف عليك وماعافك لحظه.
صفن بالفراغ ماعرفت ليش مايجاوبوني
باوعلي وكال
اشهم:- عنود مايهم هو منو بس ابتعدي
عنه.
سكتت ماحبيت الح عليه وهو بهاي الحاله
اجه متيم اخذه اشهم لحضنه وطلعنا
رهف وشاهين جانوا نايمين ماكعدناهم
متيم كاعد بحضن ابوه وهو يسوق
ومتيم يفر بالستيرن علساس هو يسوق
واشهم يكله عفيه وليدي السبع بطل ابني
رغم هو يبين عليه التعب بس مايخلي ابنه
يحس
صفنت عليه واني افكر باابوي انتبه عليه
باوعلي ورجع دار عينه للطريق وكال
اشهم:- شو صافنه بيه؟
عنود:- زوجي وبكيفي عندك شي وياي.
رغم ملامحه الذبلانه ابتسم يهز براسه
ابتسمت ودرت وجهي للشارع
احس بفراغ جبير بداخلي احس اكو شي نقص بس مااعرف شنو وصلنه للبيت
متيم كعد ع التلفزيون واشهم راح للغرفه
رحت للمطبخ اخذت صحن فواكه
وحطيته كدام متيم
عنود:- متيم حبيبي لاتعلي الصوت ابوك تعبان يريد ينام تمام؟
::- تمام.
بوست خدوده وعفته رحت للغرفه
شفته نايم على بطنه تمشيت بهدوء وكعدت
بالكاع سانده ظهري للكنتور واباوع عليه
تذكرت امي من ماتت والدم الي صار
ع الصاله مكدر انسى هلموقف
مثل الفيديو ينعاد كدامي واحس روحي
تموت والوجع الي بكلبي يذبحني غمضت عيني ونبتت اظافري
بيدي اريد احس بوجع اكبر من وجع كلبي
اريد اطفي نار كلبي
مدري شكد بقيت على هاي الحاله مااحس
بروحي فتحت عيني ونزلت دموعي باوعت
الايدي كلها دم طلعت غسلتها وعقمتها
رجعت فرشت بالكاع ونمت حسيت على متيم يكعدني فزيت يحجي بصوت ناصي
يخاف يكعد ابوه
عنود:- شبيك متيم تريد شي؟
متيم:- اريد انام يم بابا بس خاف يكعد.
::- تعال نام يمي هسه خلي ابوك يرتاح
بعدين تنام يمه.
ماكال لا تمدد يمي غطيته ورجعت نمت
حسيت من اشهم تمدد يمي وصار يلعب
بشعري وخشمي دفعت ايده منزعجه
سحب ايدي مااعرف شنو يسوي
قشعر جسمي من باس مكان الجرح
وهمس
اشهم:- ريت اليوجعج يوجعني حتى احس
بيج وبعذابج ، شنو الي خلاج توصلين
لهاي المرحله؟!
ماافتهمت شنو يقصد رجع باس ايدي وخلاها على خده رجعت نمت.
.........
رسن .
كاعدين اني وامي وترف نلف دولمه للغده
ونسولف اندارينه كلنا على الدرج من نزل
ديسق ركض ووجه مايطمن حجت امي بخوف
شموخ:- شكوو يمه خيرر شصااير؟
ديسق:- يمه اشهم خالته ميته وهو بالمستشفى.
لطمت امي على صدره وكامت على ديسق
شموخ:- شبي ليش بالمستشفى اوكف خلي البس عباتي واجي.
ديسق:- يمه وين جايه ماكو داعي ادهم هناك انا هم راح اروح.
عافها وطلع بقت امي تخابر على ادهم
مايرد بالساعتين محد يرد فات اوس
يهوس وخابص الدنيا مايدري بشي
توه راجع من الدوام من شاف حالتنه
سكت مستغرب وكف بباب الصاله بلع ريك ركض كعد يم رجلين امي
والخوف ترس وجه وحجه بتردد
اوس:- يمه ضررغام مابي شي موو؟؟
شموخ:- لا يمه لا.
::- چا شبيج يمه شكوو شصاير ادهم وين؟
::- يم اشهم بالمستشفى.
::- شبي اشهم يمه احجي مو كلبي مات.
::- مدري يمه مدري خالته ميته وهو مدري شبي.
وكف اخذ موبايله يخابر على ادهم مايرد
رجع خابر ديسق هم مايرد شمر تلفونه
علقنفه يحجي عليهم ويغلط
اوس:- ليش مايردون مايبطلون سوالفهم
مايكولون اكو عالم خايفه عليهم شنو من بشر ذوله.
فز من دك الموبايل ركض عليه واحنا كمنه
وياه نشوف منو كال ضرغام يخابر
ضرغام:- وينك اوس؟
::- بالبيت شكو؟
::- ذوله الزوج وين مولين صار ساعه اخابرهم مايردون.
::- راحوا على اشهم بس مااعرف ليش مايردون.
::- شنو ليش راحوا لـ اشهم صاير شي؟
::- اي خالت اشهم متوفيه واشهم متخربط يمكن مااعرف انا هم هسه طبيت للبيت.
::- اوس ديربالك تعوف البيت مااوصيك
هاا وليدي؟
::- تمام تمام لايضل بالك.
سد الاتصال رجع يخابر على ديسق وادهم
محد يرد واحنا الخوف اكل كلوبنه وامي
ضلت تنوح لليل لا احد خابر ولا احد
اجه اوس من التعب غفى علقنفه
وترف اخذت امي وراحت نامت وياها
واني بقيت كاعده اقره ادعيه وقران
كمزت من سمعت صوت بالكرج كعدت
اوس فز بخرعه
اوس:- شكوو؟
رسن:- مدري سمعت صوت بالكراج يجوز اجوا.
وكفنه دقايق محد فات اذا جانوا ادهم او ديسق يفوتون لان عدهم مفتاح ركض
طلع اوس للكراج يشوف شكو واني واكفه
بباب المطبخ انصدمنه من شفناه ديسق
كاعد بباب الكراج ومدنك يدخن حسيت
رجليه مايشيلني تقرب اوس بخطوات
ثكليه كعد كدامه وسئله بصوت يرجف
اوس:- شكو ديسق اشهم مابي شي؟
هاا؟؟ ديسسق جااوووب لاتسكت.
بسرعه رفع ايده ديسق وسد حلك اوس
يكله
ديسق:- اششش مابيه شي لاتخاف.
::- احلف مابي شي.
::- وروح ابويه مابيه شي اهدى حبيبي.
كعدت بباب المطبخ راحت حيلي وكف
ديسق سحب اوس من ايده يمشي وصل
لباب المطبخ شافني كاعده ودموعي على خدي عاف اوس وكعد كبالي حضن وجهي
بيده
ديسق:- ليش البجي بويه ها؟ اشهم زين
مابي شي.
رسن:- خفنا حيل محد يرد علينه من الصبح لهسه واحنا بنار.
::- موبايلي نسيته بالسيارة كومي رسونه.
سحبني لحضنه باس راسي واخذني للصاله
كعد وهو حاضني اجه اوس كعد وكال
اوس:- وين ادهم؟
::- ماراد يرجع يكول عندي شغل.
::- اشهم شنو وضعه؟
::- رسونه حبيبتي جوعان بلا زحمه عليج سويلي اكل.
هزيت راسي وكمت للمطبخ عرفته مايريد يحجي يمي خليت الاكل ع الطباخ رجعت
ورى الباب اسمعلهم يحجون بصوت ناصي
ديسق:- اول مرة اشوف اشهم بهذا الضعف
مايكدر يعين نفسه ويوكف انهاار بالكوه طلعنه من المكبرة مرتين اتخربط .
اوس:- ليش عفته وحده تعرف ادهم
مايطيق يشوفه ولا راح يسئل عليه جان بقيت يمه انت.
::- كتله ابقى يمك ماقبل كال اروح لشاهين
مرتي هناك.
::- مرته رجعتله؟؟؟
::- مادري انا هم استغربت بس ماحبيت اسئل الوكت ما مناسب جان.
رجعت يم الطباخ وكلبي ينمرد على اشهم
ايمته يرتاح هلولد جاب عمره بتعب
صبيت الاكل واخذتها ديسق اكل لكمتين
وكام وكملها اوس عيوني صارت تحركني
اباوع الساعه ب 3
اوس:- كومي رسونه نامي انا اعزل الصحون.
رسن:- لا اوس عفيه مااريد اترزل الصبح من امي ادري تعوفها وماتغسلهن.
::- لا لا كومي معليج شوفي عيونج شون صارن روحي نامي.
::- غسلهن عفيه اوس.
::- دروحي عاد شكد تلح.
دخلت للغرفه بس حطيت راسي ع المخده
نمت من التعب حسيت الصبح على صوت
ترف
ترف:- رسن البلوزة الحمرة وينها.
::- ترف كنتورج مليان ليش تلبسين مني.
::- رسن راح اتأخر حبابه.
::- انطيج هو بس انتِ تسوين العشا اتفقنا؟
::- اهوو رسن هو بلوزة شبيج.
::- بكيفج انتِ.
::- تمام اسوي بس كولي وينها.
::- بكنتور ماما.
طلعت ركض واني كعدت مااكدر انام بعد
طلعت للصاله شفت اوس كاعد مطنكر
رحت غسلت واتريكت اوس طلع للكراج يصيح
اوس:- خررب بالجامعه، ولجج تررف
اطلعي عاااد راح نتأخر.
ترف:- اجيت اجيت دقيقه بس.
طلعت ترف ركض وهو يرزلها ليش تتأخرين
بعد اعوفج واروح، اوس من يكعد من النوم
مزاجه ملخبط ومطنكر حضرت ريوك
لـ ديسق واخذتها فوك دكيت الباب بخفه
ودخلت شفته نايم مايحس من التعب
عفت الريوك ع الميز وكعدت على طرف
الجربايه
رسن:- ديسق حبيبي كوم راح تتأخر.
ديسق:-اممم.
::- يلا كوم.
::- ساعه شكد؟
::- ثمانية الا عشرة.
كعد كوه على روحه راح غسل وكعد ياكل
ساكت اباوعله يصفن فز على صوت الموبايل يدك بسرعه رد ولان قريبه عليه اسمع المقابيل شنو يحجي
ديسق:- هاا ادهم صااير شي اشهم زين؟
ادهم:- ولغسل لهلوجه لا سلام لا شي كبل اشهم طبعا عزيز كلبك هو انا منو فد جلب.
::- ادهم لاتمسلت.
::- نجب، حتى نسيت ليش خابرتك.
::- اي صدك شكو ليش مخابر من الصبح؟
::- سراي راح يجي انطي المفاتيح مال الشقه.
::- شيسوي بيها؟
::-ي*** ديسق شبيك ماعنده مكان يبقى بي.
سده بوجه ادهم واني من الفشله ماادري وين انطي وجهي هو باوعلي رجع دنك ياكل
حاولت اتناسه الفشله سئلته
::- اطلعلك ملابس؟
باوعلي رافع حاجبه
::- كايلج مايعجبني احد يطلعلي ملابس
انا اختار بكيفي.
::- صار عيني بس لاتباوعلي هيج.
ضحك بخفه وكام يغسل اخذت الصينيه
ونزلت عزلت البيت بين ماكعدت امي
حضرتلها الريوك طلعت للحديقه اندك الباب
وكفت ورى الباب
رسن:- منو؟
::- انا سراي صديق ادهم ديسق موجود.
::- لا طلع قبل شويه.
::- ها مشكورة خويه.
رجعت للبيت امي تحجي ويه خالتي نص
ساعه وانفتح الباب فات ضرغام كمت
ركض حضنته وهو يضحك ويكول
ضرغام:- ياايابه ياايمه بنيتي مشتاكتلي.
باس راسي وراح لامي يحضنها
::- شلونج الحنينه؟
شموخ:- يبعد روحي ياايمه بشوفتك صرت احسن انت شلونك؟
::- الحمدلله، وينهم البقيه؟
رسن:- كلهم بالدوام وادهم ببغداد.
كعد شويه يحجي ويه امي بعدين كام لغرفته
ينام للظهر اجو اوس وترف
فات اوس يصيح
اوس:- اجه الضابط اجه هاااا بووويه هاا خوويه هااا
من شاف ضرغام ماموجود بالصاله كال بصوت ناصي
::- وينه محبوب الفتيات.
ترف:- والله اكله اوس هيج يكلك.
::- نجبي الفاهيه معليج.
شموخ:- اووس يمه.
::- هاا يكلبي ها يروحي هاا يعافيتي.
ضحكت امي بخجل ترزل بي وهو يبوس خدودها وهي تدفعه تمدد ع القنفه يحجي
منفعل
اوس:- يمه لو تشوفين اليوم صارت مذبحه
بالجامعه علمود بنيه وعلي صارت بالجلاليق.
شموخ:- ياا صخام ولك بس لا انت هم وياهم.
::- لا يمه لا انا جنت حاط رجل على رجل
واكرز خوش فلم جان.
رسن:- ههههههه صدك تحجي؟
::- اي وداعتج شوفي واحد حجه ويه حبيبت
الثاني وهذاك ضربه نوب اجه واحد يفاككهم
هم انضرب صار هو هم يضرب وفزعوا اصدقاءه وصارت ممالخ وانا ضربتلج ركن
والحب بيدي اكرز واباوع مسرحيه.
شموخ:- والولد شعلي اذا البنيه خفيفه وتحجي ويه الكل.
::- قابل هو راح يضرب البنيه اكيد لا شوفي هو حتى مايغار عليها بس عود شوفوني اني قوي ومن هلحجي.
ترف:- اييعع تفكير جاهل.
اوس:- اسكتي الفاهيه شويه وتبجين.
::- خفت شسوي.
اجه يرد عليها طلع ضرغام من الغرفه
ركضت ترف تحضنه وتسولفه شصار
كام اوس سلم عليه وترف لزكت بي تحجليه
كلشي.
..............
عنود.
كلبي يوجعني على اشهم من اشوف حالته
والتعب ماخذ حيله والحزن مخيم على ملامحه يحاول مايبين بس ميكدر
يطلع بلليل مايرجع للصبح ينام واني مكابله متيم لو نلعب لو نرسم لو نطبخ
حاطين الكيك بالفرن ومكابلين الفرن وكاعدين متيم ايده على خده وكلساع
يسئل ماصارت
عنود:- متيم اسكت عاد هسه يطلع ابوك
يسئل شنو العشا نكله كيك شيسويلنه بالله؟
متيم:- بس اشتهيت كيك.
::- حبيبي انه مو عليك احجي على روحي
غير انه اكوم اسوي، او اكلك خلي هو يسوي.
::- اييي ايي بس الكيك؟
::- دقيقه اشوفها صارت يمكن.
طلعتها وكعدنه ناكل بالصينيه وهي حارة
ومتيم هرج البيت يحط لكمه بحلكه يكوم
يكمز ويصيح حارة طلع اشهم من الغرفه
عيونه مورمه من النوم باوعلنه وراح غسل
وكعد كبالي ساكت يباوع على متيم
بس يكمز سحبه من تيشرته
اشهم:- تعااال اكعد زماال احد جابرك
تاكلها ماتنتظر تبرد دودة.
متيم:- بابا طيبه طيبه مو نونو.
هزيت راسي مبتسمه مد ايده اخذ الشوكه
من ايدي بدون مايباوعلي وصار ياكل
التفت للثلاجه طلع عصير واخذ كلاصين
صب وحده اله والثانيه لـ متيم مامعتبرني
موجودة اصلا حزت بخاطري الغصه
صارت ببلعومي واحس سجاجين تكص
بركبتي اريد ابجي بس لازمه نفسي باوع
متيم عليه ومد كلاصه وكال
متيم:- هاج مالتي انه مااشرب.
ابتسمت كوه وحجيت بصوت مخنوك
عنود:- لا حبيبي مااشرب شبعت انه.
كمت بسرعه غسلت ودخلت للغرفه كعدت
بين الكنتور والحايط واحس النار تاكل بيه
غمضت عيني وافكر
::-ليش هيج يعاملني ليش كلها ماتريدني
شمسويتلهم ههههه اذا انتِ ابوج مارادج
هذا غريب ماكو عتب عليه، وينج يمه
وينج محد يريدني محد كلبي يوجعني.
حسيت بيد تهزني من جتفي فتحت عيني
مخلي ايده ورا راسي سحب راسي يباوع
عليها واني مامفتهمه شكو حضن وجهي
بيده يباوعلي مقهور
اشهم:- لاتحركين بكلبي عنود لاتزيدين ناري
وداعتج وعيونج مااتحمل.
::- شبيك شسويت؟؟
باوعلي حاير التفت مغمض ورجع باوعلي
تحسر وحجه
::- ليش تأذين نفسج وتأذيني ليش؟
::- اشهم انه لايمك ولاحواليك شبيك وخرر.
وكفت رايده اطلع سحبني لحضنه حاضني بقوه واني احس كلش مشاعري تجمدت
دفعته برخاوة
::- شبيك انت؟
::- ضجتي مني؟
::- ليش اضوج اكو شي ؟
::- ليش أذيتي نفسج هاا؟
::- شبييك اشهم ايمته أذيت نفسي لاتخبلني.
بلع ريك محتار افتر بالغرفه لازم راسه
عفته مادري شبي كعدت ع الجربايه اجه
كعد كبالي بالكاع لزم ايديه بين ايدي
اشهم:- عنود ماتتذكرين شنو جنتِ تسوين؟
::- لاا شبيك اشهم شنو جنت اسوي؟
::- احم،اجيت لكيتج تضربين راسج بالحايط
قوي وضاغطه على اسنانج بقوه شون ماتتذكرين؟
باوعت لوجه ساكته فعلاً مااتذكر حتى مااحس بوجع راسي، سحبت ايدي منه بهدوء وطلعت للحمام اباوع بالمرايه
لروحي شنو جاي اسوي بروحي غسلت
وجهي وطلعت لكيته يوصي متيم
يدير باله وهو راح يطلع رفع راسه باوعلي بدون مايحجي شي طلع
كعدنه نتابع توم وجيري متيم نام على رجلي
واني ماحسيت ايمته غفيت حسيت
بـ اشهم من اجه بس مابيه افتح عيني يدردم ويه روحه
اشهم:- جنت بواحد صاروا ثنين ململم زعاطيط خررب بذيج الساعه تعال بويه تعال.
شال متيم من رجلي نوب رجع كعد يمي يهمس
::- عنود كومي نامي بمكانج عنود بويه.
فتحت عيني بثكل وهمهمت رجعت غمضت
تلمس خدي متحسر شالني واخذني للجربايه
غطاني وراح رجعت نمت.
كعدتت ريكي يابس باوعت الساعه بالخمسه
شفت اشهم فارش بالكاع ونايم طلعت شربت مي ورجعت فز على صوت الباب
::- عنود تريدين شي؟
::- شربت مي.
رجع غمض باوعت عليه اكو شي بداخلي دفعني اروح يمه رفعت الغطا فز يباوعلي مستغرب تمددت يمه هادئه وراسي على ايده سحبني لحضنه دفنت راسي بركبته ونمت.
كعدت على صوت اشهم ابتعد يحجي بهمس
::- تعال بابا دير بالك.
فات متيم بنص يحجي بهمس
::- بابا اكلك شي؟
::- كول حبيبي.
::- انت كلت امي راحت لبعيد من اكبر اشوفها مو.
::- اي صح شذكرك بيها هسه؟
::- مو اني كبرت هسه؟
::- صح كبرت بس بعدك ماتفتهم شحجي
ليش تسئل؟
::- نونو هي ماما؟
صار هدوء لحظات ودك موبايل اشهم
كام طلع فتحت عيني متيم صافن بالسكف
ويتمتم بااغنيه مال افلام كارتون
كعدت بوست خدوده وهو انزعج ضحكت
عنود:- ولي قشمر عود مايعجبه.
متيم:- مو بوسه هاي.
::- غير خدودك ينكرطون شسوي حلقوم.
ضحك مغطي وجهه عود خجلان دغدغته
وهو يضحك رفعت راسي من انفتح الباب
فات اشهم ابتسم وكال
اشهم:- هاا ولك عاجبك الوضع كووم من يم مرتي.
متيم:- ماااا نونو الي.
::- ولك سرسري شنو الك غير مرتي.
::- هي ماتحبك تحبني انه.
::- هاا؟؟ صدك عنود؟
عنود:- اي طبعا احب متيم غير جنه العافيه.
رفع حاجبه مبتسم كام متيم حضني يغور باابوه عود شوف تحبني واشهم هز ايده
وراح للكنتور يطلع ملابس كمت لازمه ايد متيم رحت غسلنه وحضرنه ريوك
طلع اشهم سوله لفه اكلها بسرعه كال
اشهم:- متيم محفظتي بالغرفه جيبها.
كام متيم للغرفه وهو تقرب عليه حط ايده على خصري وباس خدي بقوة وهمس
::- اغارر ترى البوس والحضن كله لـ متيم
مااقبل انتِ مالتي بس.
باوعت لوجه مقلصه عيوني
::- تغار من ابنك؟
::- صدك ماتحبيني؟
::- تؤ بس..
::- شنو بس كملي.
::- متقبلتك علمود شكلك حلو.
::- هههههههههه خررب بحضي يلا المهم
عاجبج حتى لو بس شكل.
ابتسمت طلع متيم يكول ماكو المحفظه
مد ايده اشهم على جيب البنطرون وكال
::- شووف شون طلعت بجيبي حبيبي تعبتك.
غمزلي وطلع هزيت ايدي اضحك عنده سوالف تريكنه وعزلت البيت بس كعدت دك موبايلي
عنود:- اهوو دعوف الواحد يرتاح، حبيبي متيم جيبلي موبايلي فدوه اروحلك.
ركض للغرفه جاب الموبايل استغربت من شفته ادهم رديت
ادهم:- عنود وينج؟
::- خير ياطير شكو؟
::- تحضري منتظرج برى.
::- ليش شكو وين رايحين؟
::- شكد تسئلين كومي هسه.
::- مااجي شنو بكيفك تأخدني ومااعرف وين.
::- احم اريد اشوف حوراء بس ماتقبل وحدنه كلت اخابرج تجين ويانه.
:: - لا والله.
::- وداعت عبدالله.
::-عبدالله منو، المهم مااجي سوالفكم تلعب النفس.
::- بداعت امج لاا اريد اشوفها تحملينه بس فترة علمود اخطبها.
::- اخر مرة هاي اذا كلش تريدها روح اخطبها.
::- اي اي بس تعاي.
::- ومتيم؟
::- متيم منو؟
::- ها لا هيج.
سديت الاتصال من التوتر خابرت رهف سولفتها كلشي كلت خلي شاهين يجيبج
وهي هم ماكالت لا
بدلت وكعدت انتظرهم
عنود:- متيم لاتضوجهم مااتاخر اني تمام.
::- اي تمام.
وصلت رهف واني طلعت باوعت لراس الفرع ماكو ادهم خابرت عليه كلي واكف بالشارع العام مشيت للشارع
دكلي هورون صعدت فر السيارة بسرعه وكال
ادهم:- بيتهم شويه بعيد.
::- ها خلي اخابر اشهم واكله لايضل باله.
صاح بسرعه::- لا لا اشهم مشغول قبل شويه جنت يمه انتظري شوي وخابري.
سكتت بس مامرتاحه وهو هم متوتر يدك بااصابيعه ع الستيرن ويباوع ع الساعه ماتحملت وسئلت
عنود:- شكو ليش هلكد متوتر وترتني ترى.
::- هاا لا بس متحمس.
ضحكت وبقيت مركزة ع الطريق نص ساعه
خابر اشهم هو التفت شاف الاسم زاد بالسرعه حسيت اكو شي غلط بس فتحت الموبايل صوت اشهم يصيح
::- وينج عنووود ارررجعي لاتطلعين وين ادهم.
::- شكوو اشهم شبيك؟
::- وووينج وينج؟
::- هنا ويه ادهم.
أشرلي ادهم افتح مايك فتحت وصوت اشهم يهرج هرج
اشهم:- انزززلي اشردي منه لاتبقين وياه عنووود.
ادهم:- هاكد خايف مني اشهم لاتخاف مرتك بأمانتي.
::- ادددهم رجعها مالها علاقه مالها علاقه هي.
::- هسه نفتهم.
::- ادددددهمممم اذبحك لو تأذيها.
سحب الموبايل من ايدي بقوة وسدها بقيت اصرخ واغلط عليه اريد بس يوكف السيارة
فات بمنطقه زراعيه وكف كدام بيت كلش جبير فتحت الباب نزلت اركض
ارزل بنفسي ليش ماتسمعين كلام اشهم
مو كلج مايتأمن اكرصي الدودة واكعدي
شهكت من سحبني من ايدي بقوة ودارني عليه اضرب بي احاول افلت نفسي
ضرب على رجلي وكعني لزم ايديه فوك بطني وثنى رجله عليها مثبتهن مد ايده لجيبه
طلع شريط حبوب بس شفتها تخبلت اصرخ
واريد افلت نفسي ضغط على ايدي بقوه حسيت بطني راح ينفجر
::- ادهم عليك الله عووفني شمسويتلك عوووفنييي لاااا لاااااا.
لزم فكي ودفع الحبايه لبلعومي لزم خشمي
يكطع نفسي حتى ابلعها حاولت اقاوم بس مكدرت بلعتها شوي شوي احس جسمي
بدء يخدر ومكدر اتحرك عافني ووكف
حجيت بثقل
::- الله يأخذك حيوان ماانساهن.
بعدها ماحسيت بشي، فزيت على صوت اغنيه عاليه كلش كعدت مسطورة
راسي يوجع وصوت الاغنيه باوعت للغرفه
بس جربايه وكنتور بابين وكفت دايخه
حاولت افتح الباب مقفول ادك الباب واصيح اني مااسمع صوتي بسبب الاغنيه
نص ساعه على هاي الحاله كاعده وايدي على أذاني طفت الاغنيه وانفتح الباب وكفت بسرعه فات وقفل الباب باوعت عيونه حمر
وايده تنزف بلعت ريك اجذب اذا كلت ماخفت تقدم واني ارجع لزكت بالحايط رفع ايده وكال
::- سؤال واحد اسئلج تجاوبين بدون جذب
، لا والخلقج ادفنج هنا.
بقيت جامده وهو الشر يطافر من عيونه
صيح بصووت عالي فززني
ادهم:- افتهمتتتييي.
::- لاتصيييح بووجهي ماتخوفني.
لزم فكي بقوة وضرب راسي بخفه ع الحايط
حجه من بين اسنانه
::- لاتراددين جااوبي احسلج.
دفعت ايده بقوه وحجيت
::- مرريض انت مررريض شتريد مني.
::- ليش انطيتي الملفات للجيش؟
استغربت اني مامنطيه شي فكرت خاف ناسيه شي حجيت
::- ملفات شنو مامنطيه شي انه.
::- لاااتجذبين لاااتجذبين بس انتِ وسراي
تعرفون بالسالفه شون وصلت للجيش.
::- ليشش تحاسبني روح اسئل سراااي انه ماانطيت شييي.
::- تردين اشك بصاحبي الي اعرفه من سنين
مااكو غيررج.
::- كتلك ماانطيت شي لاحد واصلا انت حركتهن شون انطيهن.
::- اخذتيلهن صوور.
::- دروووح انه عندي ملفات توديكم ورا الشمس ومامنطيتها لاحد نوب انطي ملفات لاتخصني ولا الي شغل بيها شكد فارغ.
فر وجهي براجدي أذاني صوفرت رفعت وجهي ورجعتله الراجدي بقوة
عيونه صارت بكصته دفر باب الكنتور فلشها
يصيح ويغلط على اشهم وعليه
فتح الباب وطلع ركعها بقوة حسيتها تكسرت فتحت الباب بهدوء اباوع ممر وبنهايتها باب حاولت افتح مقفول
رجعت للغرفه اباوع حتى شباك مابي مر ساعه وسمعت صوت كمت للباب واصيح
عنود:- ادهم افتح الباب معليه انه بشي والله مو انه الخبرتهم.
صار هدوء دقايق وفزيت من انضرب الباب بقوة رجعت ليورا خايفه ورجعت انضربت مرتين ثلاثه وانفتح الباب اباوع زلم ملثمين
حجيت بخوف
عنود:- منو انتوا شكو؟
::- صكارين ادهم، وين رايح!
بس ابتعدوا شويه ركضت اطلع من البيت
ركضوا وراي لزمني واحد مخلي السلاح بوجهي ويصيح
::- ادهم وووين؟
::- بشيب الخلفوك.
ضربني على وجهي بقوه حسيت خشمي اتكسر اباوع ايدي كلها دم
عنود:- يااجلب يااحيووان ليش تمد ايدك.
::- ادهم وينن كلت؟
::- مدري مدررري عوفووووني.
الثاني ضربني على رجلي من ورا بقوة وكعت بالكاع اصيح من الوجع خله السلاح بكصتي
يصيح
::- اذا ماتحجين تموتين ادهم وين؟
واني من حركت روحي والوجع الاحسها صرت اغلط عليهم
عنود:- الله ياخذكم يااجلااب حيووانات انتو
لا والله الحيوانات مو هيج خنازيررر.
ضربني برجله على بطني بقوة يصيح سكتي
حسيت روحي طلعت بقيت بالكاع اتلوه من وجع رجلي وبطني وخشمي راد يتقرب عليه
غمضت عيني من سمعت صوت طلقتين
وواحد منهم وكع عليه يابه روحي طلعت
فتحت عيني من انرفع مني باوعت ادهم يحجي بخوف
ادهم:- عنوود عنود بيج شي كوومي كومي
اخذج للمستشفى.
حجيت بثكل
::- كله منك حقير جاي اموت رجلي خشمي
كله منك.
::- اشش اشش ماتموتين ماتموتين اشش
مايصيرلج شي عنود مااكدر اباوع بوجه اشهم اذا صارلج شي سكتي مايصيرلج شي.
سحبني من ايدي صيحت موجوعه عافني محتار ثواني وطبكت سيارة اشهم
نزل ركض كعد يمي رفع راسي لحضنه
يحجي خايف
اشهم:- عنود بابا اجيتج اجيت.
ادهم:- كووم اشهم نأخذها للمستشفى كووم.
شالني وركض للسيارة صعد ليورا مخليني بحضنه وادهم يسوق بسرعه
ادهم:- اشهم ماجنت اريد أاذيها والله ماعرف شون عرفوا مكاني.
::- اسكت ادهم اسسسكت ادعي مايصيرلها شي اموتك والعباس اموتك.
::- مايصير مايصير وصلنه.
بس احس بيهم من يحجون بس مااكدر اتحرك ولا احس بجسمي معرف ايمته فقدت فتحت عيني ورجعت غمضت من صارت علي ضوء حسيت بايد تمسح على شعري فتحت عيني اباوع اشهم عيونه حمر
وملابسه دم حجه بصوت يرجف
اشهم:- عنود عنودي بويه شلونج؟
بلعت ريك ساكته رفعت ايدي على خشمي بيها قطن ولاصق غمضت عيني دقايق واندك الباب بخفه وانفتح الباب حجه اشهم بصوت ناصي
اشهم:- شعندك هناا روح مااريد اشوفك.
ادهم:- اشهم اسمعني.
::- شسمع هاا كتلك مرتي مالها علاقه
ليش هيج تسوي تريد تحرك روحي خاف مابردت كلبك من مااتت امي ومن مااتت خالتي
ردت تاخذ مرتي مني بلكت ترتاح من تشوفني متلوع ومتعذب.
::- لا لا اشهم لااا لا تحجي هيج وداعت امي الماكو اعز منها على كلبي مو هيج انا
مااريدك تتأذه بس.
::- بس شنو ليش دائما تحاول تضعفني وتضربني من نقاط ضعفي ليش هلكد تكرهني عبالي كبرنه ونسيت كرهك الي بس طلعت غلطان.
::- اشهم.
::- ادهم عوفني ماارايد اشوف وجهك روح
عوفني مااريد اتصرف شي بعدين اتندم عليه.
طلع ادهم واني نار بصدري ليش ماسواله
شي ليش هيج يحاجي اتاكدت وراهم شي
بقيت يوم بالمستشفى وطلعت .
...........
رسن.
البيت هادء والكل بغرفته طلعت للحديقه
شفت ديسق كاعد بالكاع ولازم البزونه
ينطيها اكل البزونه مالت جيرانه بس دوم يمنه لان ننطي اكل ونلعب وياه امي ترزلنه
تكول لاتلزموه نكس تتمرضون
ديسق يكول متلقح ترى بس مايفيد امي ماتحبه
كعدت على باب المطبخ اتصفح رفعت راسي من انفتح الباب وفات ادهم
راد يفوت للبيت شاف ديسق بالحديقه
راح كعد يمه ساكت
ديسق:- شبيك مبوز حتى سلام ماتسلم.
بقى ساكت مايرد عاف البزونه ديسق والتفت عليه يحاجي
::- ادهم شبيك؟ صاير شي؟
احجي زمال لاتخوفني.
::- ديسق عوفني وخر ضايج روحي واصله لخشمي.
::- غير انت جيت كعدت يمي.
راد يكوم لزمه ديسق ماقبل حجه وياه بجديه
::- شبيك خويه؟
::- ديسق انا صدك مو خوش ادامي؟
::- اي مرات تصير مو خوش ادامي بس ليش تسئل؟
::- مرت اشهم جانت راح تموت بسببي.
::- بسببك ليش؟
::- تدري كلي ادفنك بصف ابوك اذا مرتي ماطلعت سالمه.
::- اشهم كالك هيج؟!
::- ههه اي يكلي مابطلت تكرهني من انت وصغير.
::- مرت اشهم مو عافته سمعت حتى تزوجت ليش رجعت.
::- ماادري بس مو مرة مصيبه مادري شلون متحملها.
::- انت ليش تشوف اشهم هواي شنو علاقتك بي وانت شغلك بالمحكمه.
::- صدفه تصير.
::- اممم كلتلي صدفه حلو.
::- ديسق؟
::- ها حبيبي.
بقى ساكت يباوع بوجه ديسق ثواني سحبه
ديسق لحضنه وكال
ديسق:- لا ادهم لا خويه لا.
انصدمت من شفت ادهم ظهره يهتز ويبجي
بعمري مااتوقعت ادهم يبجي ويضعف هيج
دائما اشوفه من يضوج يروح يكعد ويه ديسق ويضلون يحجون ترابط بيناتهم قوي مااعرف لان يجوز تؤام بس ابدا ماباجي.
ادهم:- تعبت والله تعبت.
::- اخوك موجود اشيل تعبك بروحي بس انت ماتساعد روحك ليش ماتنسى او تتناسى
وتعيش حياتك.
::- حاولت بس مكدرت الاحلام ماتفاركني.
::- تتذكر من جنه نلعب طوبه وفشخت راس منتظر لان كالك انت ماتعرف تلعب؟
رفع راسه ادهم يباوع لـ ديسق وكال
::- ايي شذكرك بي؟
::- اجه ابوه يشكي لابوي ولدك التؤام هيج وهيج سووه بابني ابوي كاله ياهو هو مايفرق بيناتنه رغم مانتشابه كال ذاك ابو شعر
وانا من الصدمه حتى ماكدرت اشرد مدري ليش بقت براسي اجه ابوي يكلي ليش هيج سويت وانا مااريد انطي بيك وانت تترزل
ضليت ساكت وابوي ضاج لان مااحجي
ضربني طلعت للصاله تلكتني امي تسئل شبيك كلت مابيه ماردت اكول ابوي ضربني وامي تروح وتصير مشكله دخلت للغرفه
لكيتك متمدد والكتب كدامك كعدت اباوعلك بخزر اكول بنفسي هسه شورطني وصرت تؤم ويه هذا الخايس.
ادهم:- ههههههه لا ياخايس هذا شرف
الك.
::- اسمع ثاني يوم طلعنا نلعب اجه اخو منتظر الجبير يريد يضربنه وانا بعد اريد
اكلك ديربالك شو انت شمرت الطابوكه بنص كصته.
::- هههههه اي اذكر واحنا شردنه لعند حُر
يومين ابوي يكول بس يجون اربيهم من جديد.
::- اي المهم انكتلنه ثنينه وانا اصلا مالي شي بالمشكله بس طاحت براسي،
قصدي من هذا الحجي انت مو وحدك
من تتعب ذب حملك عليه ولاتخاف
من شي دووم يمك تلكاني.
::- تجايتي انت، صح مرات تجفص ببطني
بس يابه احبك وهاا كول ادهم ماعنده
مشاعر ميكدر يعبر شووف شون اعبر.
::-هههههه سرسري.
::- نعلعله خررب بيومك وطاح حظي.
::- هو طايح من ساسه ، بس شصار؟
::-اكول اتوب ومااجي يمك لان براغي حلكي يفلتن واضل امضرط بكيفي شني خويه انت تسويلي سحر.
::-سر هذا سر.
كام ادهم وكف يضحك مد ايده لـ ديسق
سحبه من ايده وكفه ركضت للغرفه اني حتى مايشوفوني
مرت ايام وادهم بالبيت مايطلع لمكان
واحنا مستغربين حالته بس بنفس الوكت
فرحانين بي لان مانشوفه هواي.
.............
عنود.
اسبوع واني نايمه بالفراش مليت مايقبلون اتحرك رهف بقت يمي تساعدني وشاهين
يوميه يجي يشوفها ويرجع لحد ما تمرض
اشهم اخذ رهف ورجع صار نص الليل
ومتيم كاعد يمي مطلع توم وجيري نباوع سوه فات اشهم وكال
اشهم:- متيم كافي لعب كوم غسل ونام.
متيم:- بس شويه بابا.
::- ماكو شويه يلا تأخر الوكت.
كام متيم يتأفاف غسل وراح تمدد بمكانه
ينامون بالكاع ماعرف شنو يهمس اشهم
بأذنه لحد ما ناموا ثنيهم حاولت انام مكدرت
كمت صح رجلي تأذيني من ادوس عليها
بس مااتحمل اضل كاعده طول اليوم
مشيت بهدوء فتحت باب وطلعت للصاله
فكرت بـ ادم شيسوي هسه خايفه عليه
هواي كلها تهددني بي اخذت الموبايل اكلب بصورنا وابتسم من اتذكر ذكرياتنه
اختفت ابتسامتي من طلعت صورة امي
بقيت أتأمل ملامحها وضحكتها شيصير لو هسه يمي انتِ مشتاقتلج حيل يمه
غفيت ع القنفه بدون مااحس،
فزيت مخروعه وصيحت بصوت متحجر
عنود:- ادددم.
كعدت عركانه طلع اشهم من الغرفه ركض
اجه يمي يحضن بوجهي ويمسح على شعري والخوف والقلق بعيونه
اشهم:- اسم الله اسم الله بويه اشش
ماكو شي يمج انه، عنود بابا عاينلي
شو بله ماكو شي.
بقيت ارجف احس ما جانت حلم جانت حقيقه جابلي مي شربت سحبني لحضنه
يقرالي ايات ويمسح ع راسي الحدما
هدئت
اشهم:- تعاي نامي بالغرفه.
::- مااريد انام خاف ارجع اشوف نفس الحلم.
::- لا هاي هي راحت تعاي.
اخذني للغرفه تمددت غطاني وكعد يم راسي
غمضت عيني رجعت فتحتها باوعتله وكلت
::- لاتعوفني لحتى انام.
::- يمج نامي لاتخافين.
غمضت عيني احاول انام بس الحلم مايروح من راسي ربع ساعه سمعته يهمس
اشهم:- شسويت انه بيج فوك همج صرتلج هم اخخخ بهذلتي احاولي.
كعدت الصبح على صوت اشهم يصيح ع متيم ويرزله وذاك يردله بهدوء
اشهم:- لك بابا لاتصير اثول مو عليت كلبي افتهمني.
::- بابا مااريد حباب.
::-خررب بحظي قلبا وقالبا طالع عليهم هو هذا هم حظي.
::- استشرف.
::-ههههههه ولك مو هيج اتشرف كول، هسه شنو ماتروح يعني؟
::- عيب بابا.
::- دنعل ابوك باابن الكلب كوم ولي منه.
فات متيم ركض للغرفه سد الباب وكف وراه مخلي ايده على حلكه يضحك ابتسمتله
ينكرط هلولد اجه يمي يباوعلي بطريقه
غريبه ابتسمت وكرصت خده
عنود:- شبيك؟
مخلي ايده بحضنه ويلعب بيها متوتر
عدلت كعدتي ورفعت وجه بااستغراب
::- شبيك متيم ها حبيبي؟
::- اكلج شي ماتكولين لـ بابا؟
::- لا مااكول شكو؟
::- كولي والله.
::- هههه والله مااكول.
::- باعي بابا كلي لا تحجي بهاي السالفه بعد
مو تكوليله يعصب.
::- مااكول يلا احجي.
::- انتِ ماما؟
استغربت سؤاله وبقيت ساكته معرفت شنو اجاوبه رجع كمل
::- بابا يكول ماما راحت لبعيد بس راح ترجع
وهسه انتِ اجيتي يعني انتِ هي لان تعيشين ويانه وكل الصغار امهم وابوهم يعيشون سوه، صحيح؟
ماعرفت شون احجي او شكول احس روحي تهت مااريد اجذب عليه
عنود:- شوف حبيبي هو المو....
انفتح الباب وفات اشهم باوعلي وكعد
كدام متيم كال وهو يأشر عليه
اشهم:- هاي امك .
••••••••••••••••••••••••••••
يتبع...