اللهم صلِ على محمد وآله محمد
#"طلاسم" السلاطين ☠️🔥
بقلمي: اسراء بني عباد 🤍
لا تنسون التصويت + التعاليق بين الفقرات + متابعة للحساب 🦋
"غَشيم اليِحَسب الوَادم مِثل گلبه"
><><><><><><><><><><><
ليال::- ولياام هُمام شبيي شوفه شبي
هُمام::- اهدي اهدي ليال ما بي شي فقد توازنه وليام انتَ وياي
وليام يفتح عيونه بتثاقل وعاصر بطنه كومه هُمام كعده على السرير وأردف..
هُمام::- ليال جيبيلي شي يدفي من كنتوره خليني البسه وناخذه للمستشفى صاير تنور من كثر حرارته
وليام::- هيه حرارة هُمام ما يحتاجلها مستشفى
هُمام::- سدد حلكك ما طلبت رأيك يلاا ليال استعجلي
فتحت كنتوره وطلعتله جاكيت طويل ودافي لبسه اله وجاي يكومه ويا بس وليام رفض..
وليام::- عوفني اني انزل مو اله تسندني
هُمام::- ااخخ يلعناد ربي
وليام مشى واحنه نزلنا ورا اخذنا للمستشفى الدكتور اول ما قاس حرارته وصفله ابرتين فولتارين وطلعنا من يمه حته يضربهن دخلنا عند ممرضة طلبت منه ينام على السديه حته تضربهن اله بالوريد..
هُمام ساعده حته ينزع الجاكيت من صفحة ايده والممرضة خلطت الابر واخذت ايده تتلمس بعروقهن نرفزتني تقربت يمها اخذت ايده وأشرتلها..
ليال::- شبيج حبيبتي على شنو تتلمسين ترا هذا وريد وهذا وهذا ايده متروسه اورده تعالي وضربي ليش هل تأخير بعد
بقت صافنه بوجهي وهُمام سحبني من ايدي وهمس..
هُمام::- شبيج لياال خليها تشتغل شغلها تعلميها يعني وياريت فهمت كلامج
ما جاوبته بس بقيت انافخ وهيه رجعت تتلمس وتدقق بيده ما ادري شجاي تدور وهوه هم تضايق منها سحب ايده بهدوء وأردف..
وليام::- ?Excuse me, is there a nurse
(عفوا، هل هناك ممرض؟)
هزت راسها بـ لا ورجعت اخذت ايده وضربته الابرة وطلعت استغربت شسالفة المستشفى متروسة ممرضين..
هُمام::- ليال.. لياال وين صافنه
ليال::- ها.. ها ماكو شي
وليام::- خلونا نرجع
هُمام::- وليام لازم تبقى شوي لان حرارتك كلش صاعده خليها تنزل ولو بشوي ونرجعك
بقى ينافخ بانزعاج واني هم ضجت كمت وأردفت..
ليال::- اني طالعة لحديقة المستشفى من تطلعون تلكوني هناك
جاي اطلع ورن تلفون هُمام حمحم وأردف..
هُمام::- ليال ابقي شوي هنا لبين ما اخلص مكالمتي وارجع
هزيت راسي وطلع اباوع لوليام يباوعلي وطبطب على السرير بمعنى "تعالي كعدي هنا" رحت كعدت يمه على طرف السرير اخذ ايدي بين ايده يتلمس اصابعي باوعت الايده وعروقهن الجانت تتلمس بيهن وسحبت ايدي منه..
وليام::- أميرة بيج شي بوية
هزيت راسي بـ لا ورجع أردف..
وليام::- تعلميني بيج برتقاله اكو شي مضايقج احجيلي!
ليال::- ما ادري هيج وحدي ضايجه
-افا ضايجه بنية روحي واني موجود
صفنت بعيونه وهوه يحجي ومبين متألم من فد شي لان يعض بشفته بألم ويعوج وجهة كضيت كف ايده عصرته وأردفت بخوف..
ليال::- وليام بيك شي من شنو جاي تتوجع شيوجعك وليام
بلع ريگه بصعوبه وعيونه صارت حمر فجأة حته كف ايده الجنت كاضته وهوه جمرة صارت ثلج كضيت وجهة نفس الحالة صار بارد كلش وشفايفه تحول لونهن ازرك وبقى يرافس بالسرير واني گلبي حسيته راح يطلع من الخوف..
كبل ركضت برا صحت اول دكتورة طلعت بوجهي اجت ودخلت وياي شافته ونخطف لونها كبل هم طلعت تركض صاحت للممرضين ودخلوا للغرفة بس ما قبلت ادخل ، دموعي نزلت بخوف وبقيت ادور على هُمام بهستيريا شفته من بعيد جاي يخابر ورحتله احجي من بين شهكاتي..
ليال::- هُمام وليام ما اعرف شبي الدكاترة كلهم دخلوا عنده
هُمام هم انخطف لونه وركضنا كبال غرفته شوي وطلع ممرض وهُمام حاول يفهم منه شصاير بس كال الدكتورة تفهمنه وراح..
ليال::- لككك شهل خباثة العدهممم يعني اذا حجه شكو شراح يصير يطير نصه مثلًا
هُمام::- ليال اهدي يجوز ارتفعت حرارته ازيد ما راح يصيرله شي
ليال::- يا حرارة ياااا حرارة لا تخبلني لكك شفته شفته بعيني جسمه كله تحول قطعة ثلج ووجهة وشفايفه صاروا زرك بقى يرافس وكوة يجر النفس شنو تفسيرك لهذن بلا
هُمام صفن بيه وارتبك مسح عرق جبينه وأردف..
هُمام::- ليال صدك تحجين انتِ
ليال::- شنوو برأيك جاي اشاقيك
بقى يفتر يروح ويجي ويفرك بيده بتوتر وكل شوي يمسح عرق جبينه واني مو اقل منه بالتوتر والخوف وانتظرناهم ومحد طلع منهم شسالفة..
شوي واجه الممرض جايب ويا الدكتور الوصف الابر لوليام هم دخلوا للغرفة وناموا كلش حيل تأخروا نرفزوني ، هناك وألتفتت على صوت فرح جايين كلهم من دون استثناء..
سيف::- شبيي هُمام ولياام شبي على المكالمة وسمعت ليال تحاجيك وتبجي شصايرر احد يفهمنه
فرح::- ولكم يمه ابنيي كلوليي شبي ابنيي فهمونيي
الولد وعمي علي وجوهم مخطوفة وبس يتسائلون وفرح بس تبجي هيه ورُبى وسمار كاضتها تحاول تهديها واني رحت كعدت فرح وأردفت..
ليال::- حبيبتي ما بي شي هوه حرارته مرتفعة وجبنه للمستشفى ضرب ابرتين خلط وجان يرتاح عساس نرجع للبيت بس ما اعرف فجأة شصار
سيف::- ليال.. لياال ابرتين مال شنو شنو انطو هُمام شنو نوع الإبرة
هُمام::- والله ما اذكر شوفوا ايدي تنكت من التوتر اني ما اريد اخوفكم بس ليال جانت يمه وتكول جسمه صار ثلج وازرك وبقى يحاول يسحب أنفاسه
فرح صاحت بصوت وبقت تون وتبجي..
فرح::- ولكمم ابننيي شمسووويله طلعوليي ابنيي اريد ابنيي
علي::- فرح فرح اهدي جاي تخوفين ولدج وياج شبييج شوفي رُبى شصار بحالها بابا سلطان طلع اختك للحديقة
اجه سلطان يريد يكومها بس رفضت ورجعت تدعي بهمس وسمار تكرط بأظافرها بتوتر وعمي علي كاعد يم فرح يحاول يهديها وسيف وسند واكفين يم هُمام وهم يرحون ويجون بتوتر وكلنا خايفين..
سند::- ليال انتِ ما تتذكرين شنو نوع الإبرة اذكرريي حبابة
ليال::- اءء اظن الدكتور وصفله ابرتين فولتارين يي هذا نوعها يمكن
سند فتح عيونه وسيف كذالك ضرب الحايط وفرح تضرب على رجلها وتنوح..
سند::- لكممم هذا يا طلييي يوصفله فولتارييننن يردوون يموتوونه لككك هُمام انتَ مو تعررف عنده حساسية منهااا
هُمام::- ما اعرفف لك شمعرفني لو اعرف اخليهم يوصفوله شي يضره يعنيي
فرح::- يمممه وليديي ولكمم اشم بي ريحة الأكبر بسس لا همم اله نيه يعوفنيي ويرووح علي اتخبل والله ما يبقاليي حيل كم ابن بعدد تردونيي اخسرر
تشهك وتحجي وتضرب على رجلها عمي علي اخذها لحضنه وأردف..
علي::- لا تحجين هيج فرح ما راح يصيرله شي مجرد تحسس وراح يعالجون الوضع لا تخافين اتفائلي بالخير
فرح::- ربيي ليش ليشش بس يختبرني بولديي ليش واحد ورا الثاني يدخل مستشفى
سلطان اجه ثنه رجله كدامها وحضنها وبقى يبجي وياها..
سلطان::- ماما حبيبتي وليام ما راح يصيرله شي لا تخافين ادعيله گلبي يلا ادعيله دعاء الام مستجاب ادعيله رفعي ايدج
يرفع بيدها يريدها تدعيله وهيه رجعت حضنته لصدرها وبقت تهمس..
سند::- الدكتور الوصفله الابر وياهم جوه!
هزيت راسي وهوه هم هز راسه بس عيونه متعلكه بكصته هُمام كضه من متونه وأردف..
هُمام::- شناوي تسوي انتَ سند إصحى
سند::- دوخرر شصحى تخييلل يصيرله شيي قسم بالله اكلبله حياته جحييمم حته مهنته تنسحبب منه
هُمام::- سندد الدكتور ما يدريي هوه شمعرفه بوليام عنده حساسية من الفولتارين اخوك شبي ما حجه ليش ما كال عندي حساسية
أستغربت صدك ليش وليام ما حجه اذا يدري بنفسه عنده حساسية ، سند فار دمه حته وجهة انطعن احمر وكعد يعصر براسه وسمار اجت يمه تمسح على شعره لحد ما طلع الدكتور وجهة اصفر ومثل الخايف كلهم كاموله حته يفتهمون شصاير..
علي::- Doctor, I am the patient's father. What's the matter?
(يا دكتور أنا والد المريض. ماذا جرى؟)
الدكتور::- Your kid has an allergy, but fear not, we've got it fixed
(ابنك يعاني من حساسية، لكن لا تخف، لقد أصلحنا الأمر)
سند فار دمه وراد يهجم على الدكتور والولد منعوا..
سند::- لككك بكل برودة دممم يحجيهااا ومرتخييي فوكهاا
سيف::- سند سندد هيه مو بالمشاكل اهدء اهم شي وليام ما بي شي
ويا كلامة طلعت الدكتورة هم والممرضين والدكتورة فهمتهم انو الحساسية كبت عنده من اخذ الابر وكالت زين هوه ما طلع من المستشفى جان ما لحك يرجع لان الحساسية عنده قوية من الفولتارين ولو متأخرين علي جان كتلته بمكانه بس الله كتبله عمر جديد..
وسمحتلنه بالدخول حته نشوفه اول ما دخلنا شفنا مخليله كانونات بثنين ايديناته وهم جان يهذي بأسم بتول اخوانه شفتهم استغربوا وتبادلوا النظرات ويا هُمام وهُمام همسلهم بشي وامه كعدت على طرف السرير تمسح بشعره وجبينه..
فرح::- يمه حبيبي والله راح نص عمري بهل كم دقيقة يمه شنو تريد تعوفني تدريني ما اكدر بدونك يبعد امك
عصر ايدها هوه ومغمض وهمس وشفته ترجف..
وليام::- بتول اجت بتول مو بتول موجودة
امه بجت بحركة واخذت راسه حضنته على صدرها وأردفت..
فرح::- يمه طلع بتول من راسك يا حبيبي ما عايزنا مشاكل امي انتَ طلعها من راسك بتول ما عاد موجودة
وليام::- لي..ليش عافتني ليش هيه كلتلي ما اعوفك يي هيه هيج كلتلي
كام من حضن امه وهوه يهذي مبين مو بوعيه وكوه فاتح عيونه حاوط وجهه امه بين ايده ويشهك بس بدون بجي بس يتلعثم بكلامة..
وليام::- يي بوكتها هيه هيه حضنتني بيومها نومتها بحضني بقت تبجي وتكلي لا تعوفني مثلهم تكلي لا تعوفننيي فرح هيه كلتلي لا تعوفني اني وعدتها ما اعوفها وفيت بوعدي ولحد هل لحظه ما عايفها بس كلتلها اني هم ما عندي غيرج وعديني ما تعوفيني بيوم ما راح ترحين محد راح ياخذج مني هيه هم وعدتني ليش راحت لييشش ما وفت ليشش فرح ليش اني ما راح اسامح احدد بيهمم كلهم تشاركو بجرحي ما راح اسامح احدد منهم اخذوا كل الاحبهم منيي
بنص كلامة وبقى يشهك ويبجي وفرح تبجي ويا اخذته رجعت راسه لحضنها تهدي بي وتمسح على راسه..
فرح::- يمه حبيبي كافيك يبعد امك والله مردت روحي
وليام::- فرح خليج يمي انتِ ما راح ترحين مو
فرح::- حبيب امك يبعد روحي واني يمك حبيبي اني يمك
وليام::- ما راح تعوفيني مثلهم انتِ ما راح تروحين مو ما راح تروحين
فرح::- شجاني حته اعوفك امي انتَ وليدي قطعة من روحي شلون اعوفك يمه
شدد حضنته الها ودافن وجهة كله بحضنها وخوانه محاوطيهم ورُبى كاعده بطرف السرير من الصفحة الثانيه وسلطان حاضنها خطيه راحت روحها هيه عدها كلشي ولا اخوانها كلش حيل تحبهم وسند واكف وسمار واكفه يمه وعمي علي وسيف واكفين من الصفحة الثانية وكلهم مقهورين على حالته بس محد فاهم شنو الموضوع ، اجه هُمام مسح على راسي وحضني وهمس..
هُمام::- حبيبة گلبي لا يضل بالج هوه جاي يهذي بسبب صخونته وما يدري بنفسه الدكاترة كالو الأمر طبيعي وهوه شوي ويصير احسن بس يحتاج يرتاح
هزيتله راسي ورجعت حضنته ونشوف وليام هدء وسكن بحضن امه وبعد ما طلعله صوت بعدت راسي عن هُمام ووكفت كبال السرير..
ليال::- فرح شبي ليش سكت
فرح::- لحد يخاف ماما نفسه ثكل يعني نام يحتاج يرتاح شوي سودة عليه
سيف::- يمه بتول منو؟
كلنا باوعنالها ننتظر جوابها وهيه صفنت على سيف وتالي نزلت راسها بدون ما تجاوب..
رُبى::- صح ماما بتول منو وليش بس يهذي بيها احنه ما صدكنه حالته تحسنت ونساها
سند::- انتِ كلتيله عوف بتول ما عايزنا مشاكل طلعها من راسك يمه بتول منيه حبيبته شي؟
رفعت راسها لسند وبلعت ريگها وهم ما حجت اخر شي عمي علي أردف..
علي::- سدو السالفة بابا هل شي يخص اخوكم مالكم دخل بي
سلطان::- شلون مالنا دخل بي ما جاي تشوفون حالته هوه من زمان هيج ليش وشنو السبب غير نفهم حته نعرف شلون نطلعه من هل حاله
علي::- محد يكدر عوفو ولحد يفتح ويا هل موضوع ترا وضعه تعبان ومو مال مجادلات وهوه ما راح يحجيلكم دربالكم تفتحون ويا هل سالفة لا هسه ولا بعدين مفهوم
سيف::- يي ليش احنه شنو ما محسوبين من العائلة
فرح::- لا ماما شهل حجي حبيبي اكيد احنه كلنا عائلة وحده بس كل واحد عنده خصوصيات ومواضيع ما يريد احد يعرف بيها لا تضغطون على اخوكم خوش امي
سكتوا وبعد ما حجوا بس كوه عليهم حقهم اني من يمي انزعجت وصار عندي فضول اعرف شبي وشكو وهاي بتول منو..
فرح رادت تعدل نومة وليام بس بقى مچلب بيها شلون الطفل من يچلب بأمه وما قبل تكوم وهيه بقت كاعده ومخليه راسه على صدرها وحاضنته وكل شوي تنزل تبوسه من راسه وتمسح على شعره..
لحد ما اجت الدكتورة حته تشوف وضعه وشالت الكانونات عن ايده وستكشفنه انو هذن ثاني كانونتين يخلوهن اله يعني قبلهن هم جانو مخليله ثنين لمن جانو يمه بالغرفة..
كالت انو وضعه استقر وحرارته شوي نزلت يعني نكدر نطلعه للبيت وفعلًا خرجنا لان هوه تضايق من كعدة المستشفى ورادو ياخذونه لبيتهم بس عاند وما قبل اله يرجع يمنه اني وهُمام..
أخذنا لبيتنه واهله هم كلهم ويانه وطلب يصعد لغرفته يرتاح سيف وسند صعدوا وصعدت وراهم لكيتهم منزعينه جاكيته ومنومينه على سريره وجاي يغطون بي دخلتلهم ومنعتهم..
ليال::- لا تغطونه هوه بعده مصخن
سيف::- بس هوه يصيح بردان
ليال::- مو على كيفه بلا شوي انطيني مجال
أبتعدوا واني صرت كباله خليت ايدي على جبيته بعدها صخونته ما نازله كلش وشلت عنه الغطى بس عاند ورجع تغطى واني ارجع اشيله منه وهوه يرجع يتغطى اخر شي صحت بي..
ليال::- ابرررد حته تنزل حرارتكك لا تتغطى
وليام::- باردددة
ليال::- يي ميخالف حته حرارتك تنزل
وليام::- ما اريدهاا تنزل جيبي الغطى
ليال::- لاا تعاندد ما تتغطى
وليام::- لججج بارردةة
سيف::- ليال خلي يتغطى حته لو على النص ما تشوفينه بردان والجو بارد
ليال::- ييي هوه الأحسن حته الصخونه تفكه
وليام::- لو ميت ولاا باقي ويا وحده راسهاا يابسس مثلجج
ليال::- هم صحيح لو ميت احسن بس للأسف بعد رجعتلك روحك
اباوع للولد خزروني ولو بيدهم جان اكلوني هم..
ليال::- ييي شبيكم هوه اخوكم يريد يموت يووو هسه اني ليش حاركة دمي دهاك اتغطى موت عيش براحتك
انطيته الغطى وطلعت كعدت بالصالة واسمع سند يحاجي..
سند::- شبيها هاي ضاربه فيوزاتها وبعدين انتَ اذا تريد تخلص منها شعندك باقي هنا مو كلنالك امشي لبيتنا
وليام::- اريد ارتاح تكدرون تعوفوني وحدي
سيف::- يي حبيبي اكيد يلا كوم سند
طلعوا الولد من يمه وسدوا الباب واجو كعدو..
سند::- ليال تكدرين تديرين بالج علي تحملي شوي لان وليام شوي عنيد وحته ما جاي يرضى يرجع ويانه
سيف::- يي احنه راح نشوفله مساعدة بهل كم يوم وتكون جاهزة حته هيه تشيل مسؤليته بعد بس تحملي هل كم يوم لان انتِ الوحيدة البنية هنا وتلبين طلباتهم
سند::- لا لو اكلج اني راح احاجي رُبى تبقى عنده هنا لبين ما يصير شوي احسن والمساعدة تكون جاهزة
رُبى::- شكو سمعت اسمي
سيف::- يي رُبى اجيتي بوقتج تعالي كعدي شو
اجت كعدت يمنه وأردفت..
رُبى::- وليام شلونه نام مو خطيه سودة عليه
سند::- يي نام حبيبتي لا يضل بالج بس تكدرين تضلين عنده هنا هم ويا ليال وهم تبقى عينج على وليام وتشوفينه شيحتاج بعد انتِ اخته ويكدر يميل عليج
رُبى::- وابوي عاد اني أتمنى ابقى يمه لان ما اكدر اعوفه هنا خطيه خاف يحتاج شي اكل شرب غسل ملابس احتياجاته
ليال::- انتو شجاي تحجون صدك عيب عليكم حاسبيني غريبة شنو قابل اني عايفتهم بدون اكل لو شرب لو ما اغسل ملابسهم ترا جاي اسوي كلشي وهُمام راد يجيب مساعدة بس اني ما قبلت ما اريد وحده تفتر ويانه بالبيت اني ما اتعاجز من الشغل لو من الطبخ فہ كلشي اسوي بيدي
سيف::- ليال مو هيج قصدنا بس احنه كلنا نعرف طبع وليام شلون يشلع الگلب وما يعجبه العجب واخاف يعني من كثر طلباته وتشرطاته تملين منه وانتِ هم ما مجبورة تتحملينه
رُبى::- صح اني اخته واوقات اتنرفز وليام طبعه هواي يتشرط وطلباته ما تخلص واخاف يخجل يستحي يطلب منج بكثرة او يتقيد بهل شي
ليال::- براحتكم بعد بس تعذروني مساعدة ما ندخلها بيتنه وهوه يدري بهل شي
سند::- الله كريم هسه رايح احاجي ابوي بخصوص رُبى انو تبقى هنا ونشوف تاليتها شنسوي
هزيت راسي والولد نزلوا يحاجون عمي ورُبى بقت كاعده يمي..
رُبى::- كون يقبل اني هم عاجبني اضل هنا يمج لان هناك سمار وكاضيتها كله نوم وحملها متعبها واني باقية وجهي ووجه الحايط
ضحكت عليها وأردفت..
ليال::- معليج اذا ما قبل اني اكله معليه بأبنكم خلو اخته يمه تلبي طلباته
رُبى::- ههههههههه ما تسوينها
-طبعًا ما اسويها شهل فشله
جاي تحجي وسمعت وليام يصيحلي بصوت مخنوك كمت دخلت لغرفته ودخلت وراي رُبى..
ليال::- وليام.. وليام شبيك
قربني اله وهمس..
وليام::- ليال صار العصر علاجج ماخذته!
بلعت ريگي وأردفت..
ليال::- اءء وليام انتَ اكيد جوعان لان ما ماكل شي من الصبح اني نازله اجيبلك اكل حته ناكل اني وياك لان هم بدون فطور ولا غده
هز راسه ورُبى اجت حطت راسها على صدره وهوه كاعد نص كعده وحضنته وبقت تحجي ويا واني عفتهم ونزلت للمطبخ لكيت هُمام جايب اكل من برا رتبته بصينية واخذتله عصير برتقال هم لان السوائل تنزل الحرارة ، شلت الصينية وجاي اصعد بس وكفني عمي علي وطلب مني من اصعد اكول لرُبى ابوج يريدج هزيتله راسي وكملت صعودي..
ليال::- يلا وهذا الغده صار جاهز ورُبى ابوج يريدج جوه
رُبى::- يريدني؟
ليال::- يي حبيبتي كال كوليلها ابوج يريدج جوه
هزت راسها وطلعت خليت الصينية على الطبلة وقربتها يمنه وكعدت على طرف السرير..
ليال::- تاكل!
باوعلي وهز راسه بس هذا ما جاي ياكل بس صافن شكله منتظرني اني اوكله ، اخذت الخاشوكه بيدي وايدي الثانية جواها خاف يوكع الاكل وقربتها لحلكه اكلها ورجعت احطله واوكله وورا كل كم لكمة اشربه عصير حته يكدر يهضم الاكل بسهولة لان مريض ومعروف المريض يصير بالكوة اله خلك ياكل ويهضم..
وما قبل ياكل اله اكل ويا وبقيت اكل لكمة والثانية انطيها اله لحد ما كملنا وشلت الصينية على صفحة ونزل من السرير توجه للحمام ورا شوي طلع ينشف بشعره ووجهة ورجعته خليته يتمدد على السرير..
ليال::- غسلت يي زين تسوي واكلت زين هم حته تنزل حرارتك وما تضل ملوعتك
وليام::- يي غسلت وفرشت وبعدين اني بسبب منو وصلت لهل حاله
-بسبب نفسك شكد كتلك لا تطلع بالجو البارد وجاي تمطر
رفعلي حاجبه وكتله رايحه انزل الصينية نزلتها وصعدت لغرفتي فرشت وغسلت وغيرت ملابسي لان الجو بارد لبست شي ادفىء ورجعت لكيته كاعد نص كعده مدلي ايده بمعنى "تعالي" خليت ايدي بيده وكعدني يمه..
وليام::- ليال صدك ترديني اموت!
باوعتله وجريت حسرة وهزيت راسي بـ لا ورجع أردف..
وليام::- بس انتِ كلتي لو ميت احسن
باوعتله صافن عليه وعيونه بيها لمعة بحيث اشوف نفسي بيهن قربت ايدي مسحتهن بهدوء وأردفت..
ليال::- الموت حق علينا وبالأخر كلنا نموت بس اني ما اريدك تموت هسه مجرد حجي لسان ولان ضوجتني مساع وانتَ تعاند
وليام::- وليش ما ترديني اموت
ليال::- وليام اني ما أتمنى الموت لشخص واني ما شايفه منك شي حته اتمنالك الموت وبعدك بشبابك ولازم تكمل حياتك قبل لا تموت
وليام::- بشنو اكملها
ليال::- يعني انتَ بعدك ما متزوج ولا حته صاير عندك اطفال ومكون أسرة لازم تكمل حياتك وتعيشها وعود بعدين الله كريم ملحكين على الموت هوه ورانا ورانا ما نكدر نشرد منه
وليام::- بس اني ما اكدر اتزوج
ليال::- ليش شنو ناقصك اشو عمرك ومناسب للزواج وفلوس وبيوت وعندك وحالتك مستقرة وما عندك سوالف منه ومنه والف وحده تتمناك بعد ليش ما تكدر تتزوج
وليام::- شلون اتزوج واني مربوط بوحدة لا هيه الراضية تعوفني ولا هيه الراضية تتزوجني وما اعرفها شتريد
نزلت عيوني وبلعت ريگي اعرف بي يقصدني رجع رفع راسي بيده وأردف..
وليام::- ترديني اتزوج واني باقي عاقد عليج يمكن الاخذها يكون عدها عادي لان اكو بيهن يرضن بس انتِ عادي عندج؟
ليال::- بس.. بس انتَ ما تريد تتزوج
وليام::- يي ما اريد اتزوج بس انتِ جاي تقنعيني وتكليلي عمرك كلش مناسب للزواج واني بلشت اقتنع لان اهلي كذالك يتمنون اوافق واتزوج
ليال::- يي يي الله كريم هسه خلي اجيب علاجك حته تاخذه
ردت اكوم بس منعني ورجع أردف..
وليام::- ليال فهميني شتردين
ليال::- شريد؟
-اني جاي اسألج شتردين بالضبط ليال اني مال اتزوج هاي مستحيلة فكرة وشلعيها من راسج مو بس تشيليها بس بحاله وحدة اكدر اتزوج
-شلون
-اذا وافقتي نخبرهم بسالفة عقدنا ونتزوج
-بس انتَ ما تريد تتزوج وحته قبل شوي كلتها
-لا تحاولين تستغبين بنفسج ليلو اني الكل يدري بيه ما اتزوج وشايل الفكرة من بالي بس اذا السالفة وصلت يمج كلشي يتغير
-شلون يتغير وليش
صافن يوزع نظراته بين عيوني وشفتي وقرب وجهة ضربت أنفاسه بوجهي وأردف بصوت راخي..
وليام::- ليال لان اني ..
يريد يكمل وانفتح الباب كبل أبتعد وكعد عدل واني نزلت من السرير بس ما اكدر ادور للباب عضيت شفتي وفتحت عيوني وهوه يأشرلي برأسه بمعنى "شكو" رجعت خزرته وأردف..
وليام::- ها احم شكرا ليال علاجي هناك جيبي خلي اخذه
بلعت ريگي بتوتر وألتفتت شفت رُبى وسلطان واكفين وسلطان صافن على رُبى وأردف..
سلطان::- رُبى شبيج ما تدخلين شبيها هاي
تعداها ودخل كعد يم وليام يسأل عنه ويشوفه شلون صار واني رحت جبت علاجه وكلاص ماي وخليته بيده شربهن ورُبى أردفت..
رُبى::- ليال عادي تجين شوي
باوعت لوليام ورجعت باوعتلها وحمحمت بتوتر..
ليال::- احم يي اكيد
طلعت وطلعت وراها هيه توجهت لغرفتي فتحت الباب ودخلت وطلبت مني ادخل دخلت وياها وسدت الباب..
رُبى::- ليال عادي توضحيلي الجاي يصير
ليال::- ليش هوه شجاي يصير؟
-ليال ممكن ما تسوين روحج ما تدرين
-شبيج رُبى هوه شكو غير تفهميني
-لياال انتِ شفتي نفسج شلون جنتي كاعده وعبالك كاعده على سرير زوجج والقرب البيناتكم
بلعت ريگي وما عرفت شجاوبها..
رُبى::- ليال لا تصفنين اخوي كلش زين ادري بي لمسه ما يلمس بنية مو عاد بعد شويه ويكعدج بحضنه
ليال::- شقصدج يعني اني الاجيت وكعدت يمه وصرت قريبة منه اشو ما تعرفين تحجين
-لياال اني ما جان قصدي هيج بس داكلج شنو تبرير كعدتكم بهل طريقة وقربكم لبعض شديصير
-ماكو شي مجرد جان كتفه يأذي وما يكدر يحرك ايده بشكل طبيعي وتوجعه فہ دلكتها اله وانتو دخلتو بلحظتها لا تفسرين كلشي من يمج
-اها كتفه يوجعه
-اني ما مجبورة ابررلج رُبى تردين روحي حاجي اخوج
عفتها بالغرفة وطلعت وبوجهي طلع سلطان..
سلطان::- ليال وليام يريدج
هزيت راسي ودخلت لغرفته باوعلي وأردف..
وليام::- شتريد منج رُبى
ليال::- اختك مكعدتني تريدني ابررلها الشافته والله فشششله لك رُبى وسلطان شافونه بهل قرربب
-سلطان ما شاف لان رُبى فتحت الباب بالبداية وهوه دخل وراها وبعدين شبيج ترجفين يا قرب مجرد جنه كاعدين يم بعض
-ييي بس هيه تكلي عبالك كاعده على سرير زوجج وبعد شوي وتكعدين بحضنه لاا وفوكها تكلي اخوي ادري بي كلش زين لمسه ما يلمس بنية كلتلها شقصدج يعني اني الكاعده بحضنه غصب عنه
سحبني من ايدي طحت بحضنه وأردف بتلاعب..
وليام::- يي جان كلتيلها اني كاعده بحضن وبسرير زوجي
خليت ايدي على صدره ورفعت نفسي ضربته على كتفه وأردف..
ليال::- هيي شهل سوالف عود هذا مريض وبعدين اني كلتلها كتفه جان يوجعه وكعدت ادلكه اله
وليام::- وين ليش تجذبين كتفي كلشي ما بي وبعدين صح كلام رُبى انتِ صايرة مستهتره بعد شوي وتكعدين بحضني
خزرته وهوه بقى يضحك عليه وتذكرت شي ورجعت كعدت على السرير وأردفت..
ليال::- وليام
-همم
-احم وليام بتول منو
رفع انظاره الي وعيونه لمعت ورجع نزل راسه بدون ما يجاوبني..
ليال::- وليام جاوبني
وليام::- ميحتاج تعرفين ليال
-تمام
-ليال لا تضوجين بس هل شي يخصني مالها داعي تعرفين
-يي صح اسفه لان سألت
-ليال ما ضجتي صح
-لا على شنو اضوج صح هل شي يخصك
بقى ساكت واني كمت حته اطلع وأردف..
وليام::- ليال لا تجيبين سيرتها بعد
هزيت راسي وطلعت حسيت نفسي انهضمت ليش حته يرفض يحجيلي اكيد هاي حبيبته يي أصلًا هيه مبينه حبيبته وهوه لهسا ما ناسيها ولا متخلي عنها وكله علمودها ميريد يتزوج ويضوج من البنات واني شنو ليش قابله بهل ذل ليش رافضه نفسخ واني حاليًا عرفت بي عنده حبيبه ولحد هسه يحبها ويهذي بيها..
قررت انو خلاص بعد ما انطي وجه شنو مخليني عنده حته يتناسى بيه لو شوضعه هاهيه بعد قررت ادوس على الشعور البداخلي المخليني ارفض وبس يصير زين احاجي حته نفسخ وكلمن يروح بطريقة حته من هل بيت اخلي هُمام يطلعني ونكعد وحدنا وننهي هل سالفة..
رُبى::- ليال ابوي قبل ابقى هنا
ليال::- يي زين بعد احسن
بيت عمي علي بقو عدنه للعشى ونزلوا وليام هم تعشينه سويه وتطمنو علي وهم رجعوا يقنعوا يرجع وياهم بس ضل رافض وهمه ما ضغطوا علي اكثر وراحوا من بعد ما فرح وصت رُبى حته تبقي عينها علي وتشوفه شيحتاج وما تتذمر بوجهة وطلعوا واحنه رجعنا كعدنا بالصالة وهُمام أردف..
هُمام::- شلون صرت هسه
وليام::- شوي احسن الحمدلله
هُمام::- الف الحمدلله صديقك كتله القلق من عرف
وليام::- حسن! ليش منو خبره
هُمام::- مو سند جان بالشركة وسيف متصل علي حته يجي وياهم للمستشفى وحسن سامع من سند ورايد يجي بس سند كلاله عينك على الشغل لان كلنا ما موجودين بيها وهسه هوه بالطريق يمكن
وليام::- يا طريق
هُمام::- جاي يشوفك بعد شيقنعه انو انتَ زين
ليال::- مبين هواي يحبه
هُمام::- يحبه شنو حسن عنده امه وابو ولا وليام مستعد يضحي بأحمد اخو علمود وليام
رُبى::- معقولة لهل درجة!
هُمام::- يي رُبى عساس انتِ ما تدرين علاقتهم شلون قوية
رُبى::- جنت ادري انو هوه الصديق الوحيد لوليام من بعدكم طبعًا بس ما جنت ادري حسن هل كد يحبه
هُمام::- يي لان وليام جان يوكف ويا بهواي شغلات وهواي امور ساعده بيهن فہ هوه يحسب وليام مثل اخو
أثناء كلامة وسمعنا جرس الباب وكام هُمام حته يفتح ورا شوي وسمعنا اصواتهم هوه واحمد دخلو وحسن كعد يبوس بوليام ويحضن بي لاحظت حته ايده صايره بيها رجفه خفيفة شنو سر هل علاقة القوية يا ترى ، ورُبى جابت الضيافة وقدمتلهم..
وليام::- ههههه شبيك ترجف لك زمال ترا ما متت
حسن::- يا اخي موتتنه خوف هوه هيج
وليام::- هيه صخونه لا تكبرونها
حسن::- لك يا صخونه غيغ اخوك الطلي يكلي وليام بين الحياة والموت وخلاني اشيل غوحي واغكعها بالاغض
وليام::- يا طلي منهم هذا
حسن::- لك سند من طلع من الشغكة متوتغ كتله شكو يكلي وليام بالمستشفى يغيد يموت
احمد::- يي اجيت لحسن لكيت وجهة اصفر وايده ترجف يابه شبيك ما يحجي حته بواجي بجه خبلني واني اريد افهم منه شكو ماكو
وليام::- الله عليك
حسن::- جذاب يخوي يولي هذا المهم انتَ شلونك هسه زين مو
وليام::- الحمدلله حبيبي لا يضل بالك شوي احسن اني
حسن::- الف الحمدلله والشكغ يي بنات انتن شلونجن
رُبى تلعثمت واني حاولت اطمطم السالفة وأردفت..
ليال::- احنه بخير خويه على الله انتو شلونكم امك سحر شلونهن
حسن::- زينات والله عاد غادن يجن ويانه بس اجينه مستعجلين هنه بغيغ مغه يغدن يزوغوكم علمود موضوع مهم
صفنا ببعض وحته هُمام ووليام صفنو..
وليام::- احم كل الهلا بيهن اكيد
حسن أبتسم ورجع باس وليام..
وليام::- ناوي تشفطني انتَ اليوم
هُمام::- خلي يشبع منك قبل لا تموت
حسن::- انتَ اسكت لا اطيح حظك اسم الله علي يومك قبل يومه
هُمام::- اني؟
حسن::- يي طبعًا انتَ بله هذا وليام انتَ نعاليش
هُمام::- اشكرك على احترامك
حسن::- تدلل حبيبي وشايف بعد اذا ضايقته او ضوجته ما تلوم اله نفسك البومة
هُمام::- ترا هوه ابن عمي وانتَ كلك خلك صديق
وليام::- كافي شبيكم زعاطيط
هُمام::- ليش ما تحجي من يحجي هوه لو بس هُمام من يفتح حلكه انتَ يطلعلك صووت
وليام::- هُمام!
وليام صاح بي بصوت خافت واشرله بعيونه وهُمام رجع كعد بس دمه فاير هذا شبي الولد عود من كل عقله يغار على وليام من حسن كوه ضميت ضحكتي وبقيت اعض بشفتي حته ما اضحك باوعت لرُبى نفس حالتي..
حسن::- اني اسف بس جنت اشاقه بكلامي ما فكغتك هيج تضوج
هُمام::- يي اضووج اقصد يعني ما ضجت بس هيج انسى اني صاعد انام تصبحون على خير عندي كعده الصبح من وكت
كام وصعد فوك حمحمت وهم ترخصت منهم وصعدت ورا لكيته كاعد بالصالة كعدت يمه بدون ما نحجي شي ورا شوي صعدوا وليام ورُبى وعرفت بالولد راحوا..
وليام::- انتَ شبيك تعادي الكل تخبلت هُمام
هُمام::- ولي لغرفتك
وليام::- احجي عدلل هُمام شبيكك ويا حسن كم مره كتلك لا تحجي ويا بهل طريقة وتحسسه هوه ما مرغوب بي
هُمام::- ما حجييت ويا شيي شدعوااك هوه يتحسس زيادة احسه لوكي وتصرفاته تصنع مال يخاف عليك بهيج خوف مبالغ ويسوي روحه زعل وضاج من كلامي حته يفرق بيناتنه
وليام::- هُمام لااا تصير زماال يا اخي شبييك ليش حاط دوبك بدوب حسن
هُمام::- كاافي حسن حسن حسن لعبت روحنه
وليام::- لااا تحجي عنه
هُمام::- شيصيير اذا حجيت تضربنييي يعني احجي تضربني ترا انيي ابنن عمكك يا ولدد ابن عمك يعني شوف الفرق البيناتنه
وليام::- انتَ ابن عمي بس لا تنسى هوه اخووي ارجع واكلك لا تنسى هل شيي
وليام عافه ودخل لغرفته ودخلت ورا رُبى كمزت من صفنتي لمن هُمام رفس الطلبة وانكسرت هذول شنو سالفتهن ويا الطبلات يوميه مشترين وحده جديده من وراهم..
اباوعله كام يفور حاولت اهدئه بس ماكو فايدة وهُمام دك رجل بالأرض وعاند اله باجر يطرد حسن واخو من الشركة..
ليال::- هُمام اهدء اتعوذ من الشيطان شجالك ترا جوا ما صار شي والولد كلشي ما حجه جان يشاقيك شبيك
هُمام::- موو بسس علمود هااي انتِ ما شفتيي هل زمال بعد شويه ويبيعني علموده حسن دخل لحياتنا بأقل فترة صار اقرب مني لولياام ليشش يعني لييش وما شفتيي شلون يتلوكله ويسوي روحه خايف علي حته يكسب گلبه اكثر
ليال::- هُمام شهل كلام ترا انتَ هم صديق حسن وانتَ هم تحبه وهوه يحبك بس ليش اوقات هيج تعادي شنو السبب
هُمام::- اني حذرته اكثر من مرة ما يحاوول يستفزني يدري هل شي اضوج منه يدرريي بيه اني شكدد اضوج اذا شفت احد اقرب مني لهل خرا
يحجي ويأشر على غرفة وليام هنا بعد ما كدرت صدك ضحكت وهوه خزرني..
ليال::- يعني هسه الافهمه منك انتَ تغار على وليام
هُمام::- انتِ شنايم براسجج يا غيرة سالمين اني بس اضوجج لان وليام صديقي واخوي الوحيد وكلشي جان الي من صغري لهذا عمرنا برأيج ترديني ما اضوج اذا شفت احد اقرب مني اله اكيدد السالفة تضوج وتقهر هم بس محد يحس بيها غير المجربها ومار بنفس السالفة
ما عرفت شجاوبه بقيت ساكته وطلعت رُبى من غرفة وليام وأردفت..
رُبى::- هُمام وليام يريدك بالغرفة بس الله يخليكم بدون صياح هُمام هوه تعبان وتدري بي مريض لا تضغط علي وتدوس ويا بالكلام
نفخ نفس بدون ما يجاوبها فتح الباب دخل وسده ورا..
ليال::- رُبى وليام زين
رُبى::- يي ما بي شي بس حيل جاي ينقهر من ورا سالفتهم حسن جاي يضوج من تصرفات هُمام ويا وهُمام ما يريده يتقرب لوليام واخوي يحبهم الاثنين ويعزهم وما يكدر يفرط بأحد بيهم علمود الثاني لان ثنينهم اصدقائه
ليال::- بلكي تنحل سالفتهم اني هم لعبت نفسي من مشاكلهم وبهل ايام هُمام كلش شادها ويا وليام ما ادري على شنو متعادين وهسه كملت
رُبى نفخت نفس بانزعاج وأردفت..
رُبى::- عوفينه من سالفتهم هسه واني راح اشاركج غرفتج هل كم يوم ما عندج مشكلة مو
ليال::- شهل حجي اكيد معندي مشكلة تعالي
اخذتها ودخلت لغرفتي طلبت منها تنام على السرير لان اني سريري ابو النفر وهيه رفضت كالت إنها عادي عدها تنام على الأرض فرشتلها فراش عالي ونامت علي واني اخذت علاجي وفرشت أسناني وطلعت قررت انام بس بقيت اتكلب هواي وما غفيت لحد ما شفت ضوه تلفوني يدل على وصول مسج فتحته ولكيتها من وليام..
"ليلو رُبى نامت يمج؟"
رديت علي بكلمة "يي" ورجع دز مسج..
"هممم هيه نايمة هسه؟"
هم رديت علي بكلمة "يي" ورجع دز مسج ثالث..
"زين تكدرين تجيني شوي"
رديت "ليش محتاج شي"
"يي ليال ما اكدر انام"
"ليش حرارتك بعدها لو متضايق من شي؟"
"أميرة تعالي كتلج مجاي اكدر انام"
"يي غير افهم ليش ما تكدر تنام محتاج شي"
"يي ليال محتاجج"
صفنت بالرسالة فكرته مكرر الحرف بدون قصد ورجعت دزيتله..
"يي شمحتاج!"
"جاي اكلج محتاجج الج ليال لا تشلعين گلبي فدوه"
ما ادري ليش گلبي تسارعت دكاته وطلعت من المحادثة طفيت التلفون وكمت توجهت للباب وقفلته حته خاف اله نيه يجي ميكدر يدخل ورجعت لسريري بقيت نايمة على ظهري وصافنه على السگف مر وقت هواي وفتحت تلفوني لكيته داز اكثر من رسالة ومتصل اكثر من مرة ومهدد انو راح يجي للغرفة وفعلًا اني واقرأ برسائله سمعت صوت يدة الباب تتحرك وطاحت عيني على رسالة من رسائله عناوانها..
"لتعبين نفسج وتقفلين الباب ترا عندي مفتاح نسخه"
كبل كمت بحركة سريعة خليت المفتاح بالباب حته ما يكدر يدخل مفتاح ثاني بقيت واكفه وگلبي يضرب بقوة واني اشوفه يحاول يدخل المفتاح لان مبين صوت الخرخشه هناك وسمعته يهمس..
وليام::- ليال ادري بيج واكفه يم الباب فتحي شوي حبابة شبيج لياال فتحي الباب
طفرت نمت على سريري وغطيت حته راسي من علت نبرة صوته كلت لا تفز رُبى وهوه صوته أختفى واني رجعت حاولت انام استوا جاي اغفى وفزيت على صوت رنه تلفون رفعت الغطى عن راسي وشفت رُبى كعدت تفرك بعيونها وردت..
رُبى::- ها وليام شبيك حبيبي محتاج شي
دك گلبي من سمعت اسمه ورجعت غطيت وجهي وهيه سكتت مبين جاي تستمعله ورجعت كالت..
رُبى::- ممم جوعان يي گلبي هسه انزل اسويلك شي واصعده الك
نهت ويا الحديث وگلبي ضل يوجعني يعني طلع جوعان ليش ما كال واني بقيت اتهرب منه امداني بس بأخر لحظه فتحت عقلي لمن طلعت رُبى وكمت وراها كبل هم قفلت الباب وسندت ظهري علي كلش بنفس الثانية اليدة تحركت الباب يريد ينفتحه رفسه برجله وصاح بهمس..
وليام::- ينعلل يوممجج لياال شلحكتي تقفليي ليال لا تجلطينيي فتحي البااب
ما جاوبته الحقير مكعد اخته ومنزلها جوه بحجة هوه جوعان حته يجي للغرفة غير لوتي بس ما تعبر عليه هل سوالف..
وليام::- ليال فتحيلي الباب ليال شبيج ويااي شسويتلج اني اذا على سالفتي ويا اخوج فہ احنه تصالحنا بعد شبييج فتحيلي الباب اشوفج ما اطول دقيقتين يلاا رُبى راح تجي
هم ما جاوبته بقى يحجي وما ارد علي لحد ما سمعت صوت رُبى يمه..
رُبى::- ها حبيبي شطلعك جان بقيت بغرفتك مرتاح
وليام::- لا حبيبتي شوي اختنكت وكلت اطلع للصالة وهنا اكل
رُبى::- يي زين تسوي لعد تعال اكعد
لحد ما تأكدت انو همه كعدو لان صار صوتهم شوي بعيد وفتحت قفل الباب خاف رُبى تدخل وتستغرب منه مقفول بس كمزت على صوتها وهيه تكول..
رُبى::- ليال انتِ كاعده؟
عضيت على شفتي وغميت كصتي اكيد سمعت صوت القفل هفيت على وجهي وفتحت الباب على النص وطلعت ابتسمت بوجهم ووليام بعدله شوي وينفجر وكوه كاعد..
ليال::- يي حبيبتي فزيت لكيتج ما موجودة
رُبى::- يي نزلت اصعد اكل لوليام
ليال::- يي هوه هيج جاي اشوف
رُبى::- تعالي ما تاكلين
ليال::- ها لا بالعافية اني راجعه انام تصبحون على خير
رُبى::- براحتج گلبي وانتِ بخير
ابتسمتلها ودخلت سديت الباب وصرت ورا لان ما كدرت اقفله خاف تسمع خليت أذني على الباب حته اسمعهم اذا رُبى نزلت الاكل علمود الحك اقفل الباب بس ما سمعتهم لان صوتهم حيل صار بعيد وعبالك جاي يتبسبسون ورا شوي انفتح الباب وسمعت صوت وليام..
وليام::- لياال انتِ مخبله لجج شلعتي گلبي حيوانه فتحي الباب اني اعلمجج
بقيت ادفع بالباب وهوه يدفع ولان هوه اقوة مني كدر يدخل بسهولة وحصرني بالزاوية بين الباب والحايط..
وليام::- ليش جاي تتهربيين مني ليال
ليال::- ولياام وخر هسه تجي رُبى اطللعع لك هيه راحت بس تنزل الصينية
وليام::- لياال من اراسلج واتصل عليج ليش ما تجاوبيني لاا تخبلينيي
دفعته من صدره لمن سمعت حركة على الدرج ودخلت رُبى..
رُبى::- وليام! شتسوي هنا
وليام::- اءء حبيبتي اجيت حته اخذ الشسمه الهودي مالتي
رُبى::- والهودي مالتك شيسوي هنا
وليام::- ليال من عزلت الملابس المغسولة يمكن تخربطت وصار ويا ملابسها فہ اجيت اشوفه اذا عدها وطلع فعلًا عدها راح اخذه واروح
فتح كنتوري يدور علي ولكه اخذه وطلع من الغرفة ورُبى طفت الضوه ورجعت نامت واني كذالك نمت وكعدنا الصبح غسلنا ونزلنا جوه لكيناهم كاعدين قبلنا صبحنا عليهم وكعدنا وياهم على طاولة الفطور..
رُبى::- حبيبي شلونك اليوم
وليام::- بخير
رُبى::- الحمدلله
هُمام::- وليام اليوم ميحتاج تجي للشركة ارتاح بالبيت
وليام::- هُمام بس عدنه شغل هواي واحنه جاي نتهاون بي
هُمام::- احنه نحل الأمر وليام بقيك مرتاح هل كم يوم اخوانك هم ما راح يرضون انك تشتغل وتعب نفسك وانتَ مريض
وليام::- اني مو مريض هيه مجرد صخونه شبيكم واليوم نزلت صخونتي صرت شوي احسن
هُمام::- ميخالف ارتاح على الأقل بس اليوم وهم ضل يم البنات قابل يبقن وحدهن
وليام::- ناخذهن لبيت اهلي
هُمام::- لا تعاند يا اخي دشوف عيونك حمر الليل كله ما نمت وهاي كعدتك من البارحة ابقى بالبيت ارتاح نام وعود باجر تجي للشركة
رُبى::- وليام ليش ما نايم بليل جان يوجعك شي
هُمام::- يي مريض وما يكدر ينام براحه وما نايم الليل كله ويريد يروحلي للشغل شتركز
ضل هُمام يقنع بي هواي وبالكوة اقتنع وانتبهت انو جان لابس الهودي الزيتوني الاخذه البارحة ، طلع هُمام للشركة ووليام راح كعد بالصالة يباوع بالتلفزيون واني ورُبى عزلنا المطبخ ورحنا كعدنه يمه..
رُبى::- شمشتهي على الغده حبيبي
وليام::- ها صايرة تعرفين تطبخين هاي لان اني طلعت منكم
رُبى::- لا ما اعرف بس انتَ كول شمشتهي وليال تسوي واني اساعدها ومنها هم اتعلم
باوعلي واني درت وجهي وأردف..
وليام::- مشتهي انام
رُبى::- شنو
وليام::- اريد انام رُبى
رُبى::- يي حبيبي اصعد لغرفتك نام شكلك تعبان
درت وجهي باوعتله صدك عيونه ذبلانة وصايرات حمر وبس يدمعن من كثر ما نعسان خرا بگلبي تالي وكت يصيرن نقطة ضعفي عيونه واضعف يمهن شهل خيسه ليال شبيج بقيت اعصر بيدي وهوه باقي كاعد..
رُبى::- ها حبيبي شو بقيت كاعد
وليام::- رُبى انتِ ليش عذبتي روحج وبقيتي هنا حبيبتي اني ما احتاج شي وصرت زين وتعرفيني كلشي احتاجه اسوي بيدي
رُبى::- تريدني اروح يعني
وليام::- يي رجعي لمكانج گلبي هناك غرفتج وسريرج لا تلوعين روحج وياي اني ما محتاج شي ومبينه انتِ هم ما مرتاحه بنومتج البارحة
رُبى::- شهل حجي وليام اني ما عندي مشكلة اخدمك بعيوني وما اتذمر من هل شي
ليال::- صح ماكو اخت تتذمر من اخوها وبعدين اني متونسه على وجودها يعني حته لو تصير زين هيه بقيها يمي
باوعلي وخزرني صح خزرته تخلسني بس جمال عيونه تخفي الخوفه شتت انظاري وبقيت اغلط على نفسي بداخلي اني شوكت اخلص من هل بيت ومنه اريد ارجع ليال القديمة..
وليام::- رايح انام رُبى اي شي تحتاجونه اني فوك
رُبى::- خوش حبيبي
راح صعد لغرفته واني ورُبى بقينه نسولف ورا نص ساعة تقريبًا ورجع نزل..
رُبى::- ها ما نمت
هز راسه وأردف..
وليام::- ليال بلا تعالي شوي
رُبى::- محتاج شي وليام
وليام::- لا حبيبتي كملي فلمج انتِ اني ممحتاج شي بس عندي شغله نسيت اكولها لليال البارحة وتذكرتها استوا فہ كلت انزل اكللها قبل لا ارجع انسى
هزت راسها وهوه يباوعلي منتظرني اكوم كمت ويا اول ما صعدنا فوك سحب ايدي ودخلني لغرفته وسد الباب وطبكني علي..
ليال::- شبيكك تخبلت
وليام::- ليال ينطيج گلبج لج مريض ومن البارحة ما ضايك النوم
-يي نام على ما اظن ما مانعتك
-ليال ما اكدر انام لج حته عطرج بالملابس ما فادني ما جاي ينفع وياي شي
-وليام الجاي تسوي غلط
-وين الغلط ليال انتِ حلالي وما جاي اسوي شي غلط
-ولياام وخر اريد اطلع
-ليال ليال بس فهميني شبييج
-شي ميخصك وليام
-شلوون ميخصني غير افهم شبيج ويااي
-ما بيه شي احجي العندك حته انزل رُبى بقت وحدها
-ليال انتِ ضايجه لان البارحة ما حجيتلج
-ارجع واكلك لا ما ضايجه من شي وبس تصير زين نفسخ انتَ وهُمام رايدين هل شي وهسه اني هم اريده فہ بعد ما عدنه شي يمنعنه من الفسخ
-ليال اني محتاجج يمي هل فترة لا تكسرين بيه
-تعذرني اني ما امشي على مزاجك شوكت ما تحتاجني تلكاني وشوكت ما تمل تريد تفسخ وگلبك متعلق بالماضي
-يا ماضييي ليال لا تمرديلي گلبي اروحلج فدوه ليال
-شنو المطلوب مني فهمني شمطلووب
-ليال اريد ارتاح بروح ابوج لا تمنعيني
كمل كلامة وشهكت من رفعني عن الأرض نومني على السرير ودفن وجهة بركبتي بقيت اضرب بظهره وصحت بي..
ليال::- لككك رُبى جوه هسه تصعدد لا تتخبل ولياام وخرر
كزبر جسمي من همس قريب أذني بصوت خافت..
وليام::- اهدي ليال ما اسوي شي اكثر من انو انام والباب مقفول لا تخافين
ليال::- وليام
-هممم روحه
رجف جسمي من أنفاسه التضرب ببشرتي ونبرة صوته الراخيه وجاي اسمع ضربات گلبي العالية بتوتر من القرب المبالغ بي البيناتنه واول مرة هيج يتجرأ لهل درجة هذا جاي يتمادى هواي ضربته على كتفه بقوة وصحت بي..
ليال::- راحت روحكك ان شاء الله وخرر اريد انزل انتَ شنوو منومنيي بغرفتكك جاي تتمادى هواايي
رفع راسه وقيد حركة أيديه ورفعهن ليفوك بيد وحده وفتحت عيوني على وسعها من قبلني بقوة وابتعد يجر نفس ويمشي اصابع ايده الثانية على وجهي بهدوء وهمس..
وليام::- اشش ليش تخلين الشيطان يلعب بعقلي سكتي خليني انام
عيوني غرغرت بدموع وهوه من شافني هيج مسحهن وباسهن بهدوء ورجع أردف..
وليام::- لا يحلوه لا أميرة دربالج تبجيهن لا تخافين اني كتلج ما اسويلج شي بس انام
هز راسه يريد يشوف ردي بس ما جاوبته ورجع دفن وجهة ومقيد أيديه ورجلي هم مقيدهن بين رجليناته وگلبي ابد ما هدء وايديه يرجفن بين ايده وهوه يسحب أنفاس بعمق ليشوفه يكول جان ممنوع عنه النفس وهسه يلا تنفس..
ورا شوي نفسه ثكل معناتها نام باوعت اريدلي طريقة اطلع بيها نفسي بدون ما يفز بس ماكو هوه نومة خفيف ومقيدني كلني يعني لو تطلع روحي ما اكدر اطلع..
مر الوقت وحسيت جسمي بقى يوجعني لان جسمه ثكيل واني جسمي ناعم وبقت تصدر منه حركات مبين هوه هم ما مرتاح بنومته ضل يتحرك بانزعاج لحد ما رفع راسه وعيونه بعدها حمر وأنفاسه صارت عالية انكلب نام على ظهرة وسحب الغطى واشوف رجله ترافس خفت من حالته عبالي حيصيرله شي خليت ايدي على جبيته وأردفت بخوف..
ليال::- ولياام شبيك
نتر ايدي وكوه أردف..
وليام::- ليال كومي طلعي برا
ليال::- وليام بس شوف وضعك شصاير يوجعك شي
وليام::- ااخخ ليال اخخ منج كتلك كومي طلعي
كبل نزلت من السرير وفتحت الباب وطلعت صارت بوجهي رُبى كاعده بالصالة الفوك شافتني متوترة واجت تتسائل..
رُبى::- شبيج ليال صاير شي شو طولتي
ليال::- ها لا لا ماكو شي خلينا ننزل نسوي الغده
نزلت قبل لا اسمع جوابها وهيه نزلت وراي سوينا الغده وكملنا ونزل وليام مبين سابح لان شعره يقطر ماي ومغير ملابسه..
رُبى::- اوخ حته وانتَ مريض هيج جمال وكاريزما ووسامة
ابتسملها وكرص خدها وراد يجاوب بس بقى يتلعثم..
رُبى::- ههههههه خجل خجل لكم وليام يخجل
وليام::- هههههههههههههه لا حبيبتي بس نغريت شوي لا تكبرين راسي
هيه ضحكت على ضحكته وأردفت..
رُبى::- شهل ضحكه وليام اول مرة اشوفك تضحك بهل طريقة
وليام::- لان مرتااااااااااح هلكدددد
فتح ايده وعيونه حته يوصفلها هوه شكد مرتاح هيه ضحكت وباسته بخده..
رُبى::- حبيبي عساك دوم بهل راحه بس شنو سبب راحتك هاي
وليام::- لان احس نفسي صرت زين وببالي شغله العصر اريد اروح اسويهاا وفرحان اني كلش فرحان
رُبى::- عادي اعرف شنو هيه الشغلة
وليام::- تؤ مو عادي
رُبى::- ليش
وليام::- معليج حبيبتي يلا يلا صبولي غده اني كلش جوعان ومبين ريحة الاكل تشهي
رُبى::- اني طبخته
وليام::- ااه وهسه اني المفروض اصدكج ام حلك
رُبى::- والله اني طبخت لان ليال جان مالها خلك شوي وكلتلها انتِ كعدي وعلميني واني اطبخ هيه بس كلتلي واني طبخت
وليام::- ليال ليش شبيها
ألتفتتلهم هيه رفعتله أكتافها بعدم معرفه وهوه باوعلي خليت الأكل كدامهم وصحني هم خليته وكعدت حته ناكل..
وليام::- أميرة
رفعتله راسي صرنا عين بعين وشتت انظاري ما اريد اضعف ما اريد اصير غبرة وثوله اريد اخلي للوضع حد بس ما جاي اكدر تعبت..
وليام::- ليال مو احاجيج
ليال::- احم يي عفوًا ما انتبهت
رُبى::- حبيبتي انتِ شبيج من مساع شنو حرارة وليام انتقلتلج
حطت ايدها على جبيني تتفحص حرارتي ورجعت أردفت..
رُبى::- ما بيج شي انتِ ما مصخنه ليلو
ليال::- لا حبيبتي لا يضل بالج اني ما بيه شي
وليام::- هممم دام ما بيج شي فہ حضري روحج اريد اخذج وياي العصر
ليال::- وين
وليام::- بعدين تعرفين واني اخذت أذن من اخوج وما عنده أعتراض
ليال::- اذا ارجع انخطف فہ ما اروح وياك لمكان
وليام::- ليال سويتلهم جرت أذن بعد أتحداهم يتقربولج
رُبى::- يي وليام يعني اني اكدر اجي وياكم لو حتبيعوني
وليام::- لا حبيبتي ما نبيعج بس هم ما تكدرين تجين ويانه لان ما طالعين نتونس نسوي شغله ونرجع فورًا
هزت راسها بتفهم وكملنا غدانا وشلت المواعين وعزلت المطبخ لان رُبى طبخت ، كملت تنظيف وصعدت لغرفتي لحد ما طلب مني وليام اتجهز وجهزت نفسي ونزلت بس ابد ما جنت أتوقع المكان الرايحيله او شرايحين نسوي..
**
سلطان::- ايييي سيف انتَ بس اريد افهم شنو براسك
سيف::- خير شكو
سلطان::- يعني الطفلة ليش انطيتهاا الاهله
سيف::- يا طفلة
سلطان::- شبييك يبرق هاي الجبتها من المستشفى لييش انطيتها الاقربائها همه مبينين ما يردونهاا
فرح::- شبيك ماما حبيبي انتَ بنفسك كلت اهلها يردونها او ما يردونها شعلينه بالناس المهم هيه محسوبة عليهم
سلطان::- بس جانت مونستنه وهاي البومه طولتها شوكت ناويه تطلع الطفل ما ادري
سمار::- ياااا قابل هيه الشغلة بيدي شبيك انتَ
علي::- بابا عوفي هذا يخرط وحده
سلطان::- اشكركم
علي::- اليوم وليام يجي مو
فرح::- يي بعد روحي صار شوي زين وكال راح يجي ويجن ويا رُبى وليال
سمار::- يي فروح وشصار على ام حسن مو عساس كالت تريد تزورنا اليوم
فرح::- يااا واني شلون نسيت زين ذكرتيني يمه
سمار::- ليش شناقصنه
فرح::- لا يمه شنو شناقصنه المساعدات وماكو والبيت يرادله تنظيف
سمار::- يخبل شبي البيت يلمع لمع ترا المساعدات جلفنه جلف قبل كم يوم خطيه تعبن بي
فرح::- ميخالف يمه هم يرادله تنظيف
سمار::- لعد خليني اني اشتغل عنج انتِ ابقي كاعده هوه منه تعبانه
فرح::- لا حبيبتي انتِ حامل وبطنج واصله لحلكج بحال شغل دكعدي هسه الولد ينظفون
اباوع للولد واحد بقى صافن بالثاني..
سلطان::- يا ولد تقصدين قصدج الحراس بس همه شغلهم حراسه مو جلف بيوت
فرح::- لا يمه قصدي عليكم لا تغشم بروحك
سلطان::- وشنووو نشتغل بالبيت سالميين
علي::- وشكو بيها المساعدة حلوة ليش يعني الولد ما يشتغل بالبيت عيب لو حرام مثلًا
سلطان::- خوش كوم قبلنا لعد
علي::- يا الله
كام عمي علي يدور على شي لحد ما صاح..
علي::- بسطالي وييينه
سلطان::- بحلكي
علي::- هاا لازم جعت واكلته قبل لا تنكتل بي
سلطان::- يُبااا عود صدك تردونه نشتغل بالبيت شهل قهررر ربي وفوكها علمودمن علمود ام حسن وهاي بنت عمه الحية يبووو
علي::- وسمم حته سم كومو اشتغلوا انتوا وساكتيين يلا
كامو الولد همه وينافخون بدون ما يحجون بس سلطان كضاها يدردم ويشتغل ويركع بالغراض لحد ما صاحت امه علي..
فرح::- اشتغلل مثل الأوادم لا اكسرك مثل ما جاي تكسرهن لا تصير زماال
سلطان::- لووو الله خالقني زمال ولا هل عيشه هاي ربيي جاي تشووف
علي::- يي والله جان ابرك على الأقل الزمال نكرب علي اله انتَ شمستفادين منك
سلطان::- كله صوجكم ما خليتوني اخلي البسمار بالكهرباء واني صغير جان هسه اني طير من طيور الجنه ولا عشت هل عيشه هاي
سيف::- كاافي عاد الصم حلكك واشتغل انتَ وساكت دخنه
الولد كوه خلو يسكت وكل ما يحجي ينطونه شي يسويها حته يعاقبونه وهوه ضل ما يحجي حته اليحجي ويا يأشرله لحد ما خلصوا وكعدو هلكانين ودخلوا سبحوا واجو وليام وهُمام والبنات وكعدنا نتغدى كلنا سويه كملنا واجتمعنا بالصالة نسلس حب ونسولف..
فرح::- سلطان ماما رتب الصالة من تخلص
سلطان::- يممه اني قبل شوي غسلت المواعين كولي لسند يرتبها
سند::- اني مساع رتبت الطابق الثاني
سيف::- واني سويت الغده لحد يباوعلي
سلطان::- يي بقى بس وليام ما حرك نفسه
وليام::- سلامااات اني شدخلني ترا خطار عدكم
سلطان::- لاا والله وحاسب نفسك خطار خاب كم
فرح::- وليام مريض سلطان من تخلص تنظفها بدون حرف زايد
سلطان::- والله فلا انظف مو حاله هاايي شنو كاربين عليه
ليال::- فروح عوفي اني ارتبها من نخلص
وليام::- يولي شنو ترتبيها عنه ليش هوه شنو شغله بالبيت
سلطان::- ييي وانتَ شنو شغلك بس مسوي نفسك مريض وتاكل وتنام حته شغلك هامله وبتول ما بتول ويصيح اني محد بحياتيي اني اضوج من البنات يعيارتك بس
وليام عيونه صارن براسه بس تماسك نفسه وسكت عنه بعد ما جادله..
ليال::- يي ما كالت ام حسن شنو سبب جيتها
فرح::- لا والله يمه بس كالت عندي فد موضوع وياج واريد اجي ازوركم للبيت
ليال هزت راسها وسكتت مشى الوقت لحد ما سمعنا جرس البيت وكام سلطان فتحه واستقبلنا ام حسن وسحر وياها كعدناهن بالصالة وبس احنه البنات وياهن نسلم ونسولف ، هناك وام حسن أردفت..
ام حسن::- والله يا ام وليام اني جايتكم بطلب واتمنى ما تردوني
فرح::- ياا ام حسن انتِ طلبي وتدللين حبيبتي
ام حسن::- عيوني ما يدلل عليكم ظالم بس اني متعنيه الكم حته اطلب ايد بنيتكم لابني احمد..
يتبع!!!
><><><><><><><><><><><
شلونكم 🫣🦋.