العقاب المتناقض

بارت 3

لتنسون التصويت + متابعه لحسابي✨

#الكاتبه_اماني_المحنه✨

ركضت فتاة 19 عاما خائفه  لتختبأ خلف اضلاع فتى ال 16 عاما تحتمي به من سلطان لا يعرف الرحمه، اختبأت خلف تلك الاضلاع الصغيره الهشه لانها رات فيها الامان فطريا منذ نضرتها الاولى!
_•-_•-_•-_•-_•-_•-_•-_•-_

زمرد اخذت سمير لغرفته ساعدته حتى يمدد على جربايته ونزعته جواريبه وبعدها غطته ودارت وجه حتى تطلع فسمعت سمير يكلها وهوه سكران ويتمايع بكلامه

:انتي هم راح تعوفيني وترحين؟

انقبض قلب زمرد لمن سمعت هل كلمه، ضلت واكفه بمكانه دايره وجه عنه واردفت

: مجبوره

علت نبرة صوته واردف

: شنوو مجبورره تره الزواج يتم بموافقة الطرفين، ليش جذبين عليه.. كولي كولي اريد اهج واخلص منك لان تعبتي من تحمل هل مسؤوليه..

عصبت زمرد ولفت وجه علي واردفت

: اكلك انته شنو نسيت انو ابونه ماياخذ شورنه ابد، انته عندك علم انو ابويه ما سألني حتى عن رأيي بهل شي، ابوك مباشر وافق وهم بدون كلشي والمن لزعطوط ازغر مني ب 4 سنوات مافكر شلون راح اكمل بقية عمري ويا، بس تدري والله هل زعطوط الي احجي عنه طلع افهم من ابوي ، على الاقل يعرف معنى احترام المرأه مو هنا ابوي يعاملنه مثل الحيوانات.. بس حقك انته تحجي هل كلام لانك ماتدري بدنياك وين طشت وين رشت اهم شي عندك تشرب وتجي تنام خلص هاي حياتك..

عصب سمير واردف

: اخخخ هذاااا يوم عن يوم يزداد كرهي اله

زمرد اقتربت منه وحطت ايده على حلكه تخفض صوته وتهدءه لانه مو بوعيه

: اشش اسكت شنو هل حجي حرام تره مهما يكون يضل هوه ابونه، خليها على ربك هوه الي ياخذ حق كل مضلوم لتنسه هل شي..

وخر ايدها سمير وكلها بنتره

: هذا مو اب مستحيلللل ولج هذا مايستحق حتى يشم الهوه لان دمرنه كلنه دمر امي ودمر عبير وو اخذ  علياء
هنا لمعت عيونه بالدموع واحتصر قلبه لمن ذكر اسم علياء بجه واردف

: ودمرنييي بأخذها نوب اجه الدور عليج.. بعد ماكدر اتحمل بطشه وضلمه ولج اني كرهته من هذيج الليله كرهتتتته.. بسببه صرت ما ارتاح اذا ما اشرب حتى بس انسه هذاك اليوم!.. اني تعباااان زمردد تعبااان

زمرد دمعت عيونها وحضنته تخفف عنه واردفت

: بس يا خويه المشروب عمره ما حل مشكله ولا يساعد على النسيان بالعكس يزود الامر سوء، متشوف نفسك شلون صاير وانته يادوب عمرك 22 سنه
ارحم نفسك ارحم شبابك وانسه الماضيي،

احتركت روح سمير واردف بحركت اعصاب ودموعه تنزل على خده

: ولج شنسه هاااا شنسه!! ليش هيه هذيج الليله سهل واحد ينساهاااا فهمينييي!!!

استجمعت قوتها زمرد واردفت

:سمير تره مو بس انته متأذي بسبب هذيج الليله شنو نسيت انو اني جنت وياك بيومها وشفنه هل شي سوه،
بس الفرق بينه هوه انو اني شلتها بأيماني وصلاتي واذكاري وانته قررت تلجأ للطريق الغلط ونسيت انه اختبار من ربك..

سمير غافله النوم وهوه ينطق كلماته الاخيره ويتمتم

: ماكدرر ماكدرر صعب..

زمرد لمن شافته نام متحملت ونزلت دموعها الي كاتمتهن.. مسحت دموعها وطلعت وجان تشوف امها جايه لغرفة سمير فوكفت وسالتها

: ها زمرد نام اخوج لو بعده؟ شو تأخرتي بالغرفه يم اخوج؟

ردت عليها زمرد بقوه

: بس هذا الي تعرفو يمه! اجه اخوج؟ و نام اخوج؟ بس محد منكم لا انتي ولا ابوي الي فاهم الدلال بشكل غلط انو يساله تشوفون شنو بداخله او تنصحو يترك هل سمم، ماكو انتو وجودكم نفس عدمكم..

وتركت امها وراحت

كلماتها جانت مثل الصاعقه بالنسه للامها وبنفس الوقت نزلت راسها لان حست بتأنيب الضمير تجاه ابنها الوحيد، فتحت باب غرفة سمير دخلت اقتربت منه وشافته نايم وماحاس على نفس، ضاق صدرها لمن شافته بهل منضر وانهارت وصارت تضرب نفسها راجديات وتهمس بحركة اعصاب

: كله بسببي جهالي ادمرووو بسببي، اني ما استحق اكون اممم ما استحقققق.. اي كلام زمرد صحيح ماغلطت بشي ليش اضوج منها فعلا اني ام ضعيفة شخصيه وجبانه وماكدرت احب اطفالي واربيهم بالشكل الصحيح، كل همي هوه شلون ارضي زوجي الي مايصير بعينه كلشي.. هل شي خلا يتغطرس اكثر ويدمر اطفالي كدام عيني واني ساكته من خوفي منه، بس بعديش هل حجي بالنهايه فات الاوان وطشرو جهالي وهمه محطمين .. اخخخخخ مني اخخخخ

حضرت زمرد العشه وكعدو هيه وامها وابوها.. باوع الها ابوها واردف

ابو سمير: هيو انتي اريد اعلمج كم شغله على الزواج لان اكيد امج ما علمتج

باوعتله الام بنضرة حقد واردفت

: بمكان ما تعلمها اسألها هيه موافقه لو لا

زمرد تفاجأت من رد امها لان اول مره تقاطع ابوها وترد علي بهل قوه!

باوعلها ابو سمير وعيونه كلهن شرار واردف

: ماعليج انتي هيه موافقه مو موافقه راح تتزوج باجر غصبا عليها،

باوع لزمرد وهوه يمضغ الاكل بشكل مشمأز واردف

:شوفي الزواج يعني الخضوع للزوج وتنفيذ كل اوامره سواء عجبتج او لا انتي مجبوره تنفذين حتى زوجج يرضى عليج

قاطعته الام واردفت

: يعني قصده تكونين عبده لزوجج مثل ما سواني ابوج عبده اله..

باوعلها ابو سمير بطرف عينه ورجع كمل كلامه مع زمرد

: اذا صارت مشكله و زوجج ضربج لا تكرهي ولا تجين النه تتشكين لان هوه يضربج بدافع التربيه و التعليم يعني المفروض وره ما يضربج تروحين تبوسين راسه وايده فهمتي

زمرد وصلت اللقمه لحلكها نوب ذبتها على الطاوله ولعبت نفسها من كلام ابوها

اردفت الام وهيه تبتسم وتستهزء بكلامه

: هه يعني قصده تكونين حالج حال الحيوان بالبيت تكعدين بضربه وتنامين بضربه هيج لحد ما صيرين هشه من الداخل وقبيحه من الخارج، و مالج اي دور او كلام بالبيت ولمن يصير عندج جهال راح يستحقروج لان شافو ابوهم مستحقرج وبهل حاله راح تكرهين نفسج و زوجج واطفالج هم..

باوعلها ابو سمير واردف بعصبيه ونفور

: انتي سكتين لو افلش الماعون براسج

باوع لزمرد وكمل كلامه

: اذا صار وشفتي زوجج خانج فهذا يعني انج مقصره ويا والمفروض تتقبلين خيانته الج و ما تلومي و حاولي تعدلين على نفسج اكثر لان الرجال مهما يسوي ما يتعيب بس المره مفروض عليها كلشي تسوي فهمتي

باوعت الام لزمرد واردفت

: اي مامه لان المجتمع هيج يريد ونسو انو رب العالمين يعاقب الجنسين وما يفرق بينهم وانو الرجل يعاقب حاله حال المرأه على الخيانه..

ابو سمير ضاج من كلامها وضرب الطبله حيل وصاح

: انتي شنو تردين توصلين لبنتج بهل كلام هاااا....

وكفت الام على حيلها واردفت بقوه

: جاي اوصل الها الرسائل المخفيه من نصايحك حتى لا تصير مثل اختها عبير الي سمعت نصايحك هاي وهسه هيه لاكرامه ولا حياة حلوه، كلشي ممحصله من زوجها الخاين الحقير...

عصب ابو سمير من كلامها وكلب الطبله واقترب منها حتى يضربها بس زمرد وكفت كدام امها واردفت بقوه

: تمامم هاي هيه الي تريده يصير بس لا تأذي امي خلص صارت مره جبيره كافي بعد خليلها احترام كدامنه على الاقل..

ابو سمير لمن سمع زمرد خجل من كلامها ونزل ايده وراح لغرفته

زمرد: غريب! هاي اول مره اسمعج هيج تحجين مع ابويه؟

مسحت الام بيدها على شعر زمرد واردفت بحنيه

: ماريدج تتأذين يا يمه ماريد يصير بيج نفس اختج عبير، نصائح ابوج كلها غلط ولا تنفذيها ابد، الحياة الزوجيه مو هيج يا يمه، الحياة الزوجيه تكون مبنيه على الحب والتفاهم والمشاركه بكلشي، الها هواي معاني جميله للي يفهم ،

زمرد: بس مامه شلون راح اعيش ويا شلوون؟

الام: لتخافين حبيبتي والصراحه اني فرحانه الج وشايفه ب ايار كل الخير صدكيني وراح يجي اليوم الي راح تحبي ويحبج بس انطو فرصه لبعض

زمرد: شلون عرفتي وضمنتي ايار؟

الام: طريقة كلامه ودفاعه عنج فرحتني من كل قلبي هذا الولد عنده مميزات هواي ولي تخلي كل بنت تحلم بي وصدكيني مع مرور الايام راح تكتشفي وماراح تندمين على هل زواج صدكيني وهذا وعد ام لبنتها..

حضنت زمرد امها لان هاي جانت الليله الاخيره الها وهيه بيت اهلها...

ايار جان طول الليل كاعد ومشغول باله بأول يوم يقضي مع زمرد، و زمرد كذلك مكدرت تنام من شدة التفكير والتوتر..

الى ان سمعو صوت اذان الصبح كامو ثنينهم توضو وصلو ورفعو اديهم يدعون انو يتوفقون بهل يوم وما يكون صعب عليهم..

لمت زمرد ملابسها و اوراق الرسم والاقلام دخلت عليها امها وشافتها لامه غراضها وجاهزه ما تحملت هل منضر ونزلت دموعها حضنتها زمرد..

*
ايار جان واكف باب غرفة امه ويباوع عليها وهيه تلم ملابسها وتتجهز لبيتها وحياتها الجديده وعيونه مليانه دموع لكن كاتم هل شعور بداخله لان يعرف مهما تكلم ماراح يفيد لذلك تقبل الامر الواقع وسكت..

صارت الساعه 7 صباحا

ام ايار: يله يمه خلي نروح ناخذ زمرد ونتوكل على المحكه مناك نزوجكم وتجيبها وتجي للبيت

ايار: زين زفه او حفله على الاقل سويلي لو ما استاهل

ام ايار: كتلك ماعندي هل امكانيه ما بيدي شي، يله امشي لا نتأخر

طلع ايار وروحه واصله لخشمه من الضوجه ومن تصرفات امه الانانيه..

وصلو لبيت ابو سمير طرقت ام ايار الباب فتحه ابو سمير وهوه منتضرهم وصاح ل زمرد، اجتي زمرد وبيدها جنطه بيها غراضها وامها واكفه يمها باستها من خدها وراسها تودعها واردفت والدموع تنزل

: لتخافين مامه توكلي على الله حبيبتي و ان شاء الله ربي يجبر بخاطرج يروحي انتي..

باست ايد امها زمرد واردفت وبعيونها حزن كبير

: انتبهي لنفسج يمه وخليج دوم هيج

نوب راحت وباست ايد ابوها وطلعت بدون ما تكلمه حتى، صارت عينها بعين ايار وهنا ثنينهم لاحضو الحزن على بعض لكن ما تكلمو ومشو واحد بصف الثاني..

ايار: ليش ما اجه ابوج وياج؟

زمرد: كال اني جبيره وما يحتاج يجي وياي للمحكه

ايار: هممم، زين وامج ليش ما اجت وياج لان اول يوم زواجج المفروض امج تجي وياج على حسب معرفتي

زمرد: ما قبل ابو كال اني جبيره وما احتاج امي بعد

عصب ايار واردف بصوت عالي

: اي ليششششش

زمرد: مادرررري وبعد لا تسألني اسكتتت

وصلو للمحكمه ودخلو للقاضي

القاضي شافهم ممرتاحين و وجوهم معبسه

: انتو عرسان؟

ايار: اي

القاضي: لعد ليش ممبين على وجهكم؟

ايار: متوترين لان اول مره نزوج

ضحك القاضي على رد ايار وقره اعمارهم بالورقه باوع للايار واردف

: شنو ليش ماخذ بنيه اكبر منك؟

ايار: لان احبها

باوعتله زمرد بطرف عينها لان تعرف بي يجذب

باوع القاضي لزمرد ورجع سال ايار

: لعد شو هيه معاجبها الوضع؟

ايار: هيه هيج مخلوقه

زوجهم القاضي وطلعو، شافتهم امه واجت تبارك الهم وهيه فرحانه نوب باوعت للاريار واردفت بحماس

: يله يمه اجه زوجي بسيارته منتضرنه بره المحكه راح اوصلكم لبيتك واروح اني بعد..

ايار: لا روحي اني اعرف ارجع للبيت

: لا يمه زحمه لازم نروح ويا احسن لا تخجلني كدامه فدوه.. وها حاول تبتسم انته و زوجتك شويه..

صعدو بالسياره وشافهم زوج امه سلم عليهم واردف وهوه يسوق

: الف مبروك ان شاء الله تتهنون مع بعض

محد رد علي جانو يباوعون من جامة السياره وساكتين

الام من خجلها ابتسمت وردت على زوجها

: ههه هاي متوترين شويه اعذرهم، تعرف زواج وخبصه

اردف ايار: وينها الخبصه اشو حتى العزه مو هيج، الي يشوفنه يكول هذوله محكومين بالاعدام..

من فشلتها الام سكتت وما عرفت ترد

وصلو قريب بيتهم اردف ايار

: نزلنه هنا على راس الشارع وانتو روحو بعد منريد نأخركم،،

اردف زوج امه: لا اوصلكم لباب البيت ماعندي شي

اردف ايار: كتلك نزلنه هنا

نزلو من السياره

ام ايار: انتبه لنفسك يمه وان شاء الله ازوركم بأقرب وقت

ايار ما رد عليها و طبگ باب السياره حيل شال جنطة زمرد وراحو يمشون لبيتهم بسكوت..

الجيران كلها تباوع الهم ويهمسون بينهم

فتح ايار الباب واردف

: تفضلي منا ورايح البيت بيتج ادخلي برجلج اليمين

باوعتله زمرد واردفت: منو علمك هل سوالف؟

ايار: مو شغلج

زمرد: لا بله

ايار: وجعه من الله، ادخلي وفضيها العالم تباوع علينه وايدي انكسرت من جنطتج الي اثقل من دمج

زمرد: ايباااخ وعلى الاساس دمك الخفيف عيني

سمت زمرد بسم الله ودخلت برجلها اليمين تباوع للبيت وتتمشى بي، دخل وراها ايار وسد الباب واشر على غرفتهم و اردف

: هاي غرفتنه ادخلي ارتاحي بيها

دخلت زمرد واردف بضوجه وكسران خاطر

: بس هيج!!

ايار: مفهمت!

زمرد: يعني حتى ما كلفت نفسك وسويت فد ترتيب للبيت حتى يبين انو بي فد مناسبه وحتى الفرشه مو مال عرس

دخل ايار، الغرفه وكعد على الجربايه منطيها ضهره واردف

: هذا الموجود

عصبت زمرد واردفت بصوت عالي

: شنو هذا الموجود انته ابسط شي بدلة عرس ما شتريتلي وهذا حلم كل بنيه و اني نحرمت منه..

نزل راسه ايار وكسرت خاطره هل كلمه دمعت عيونه واردف بكلمه وحده

: اسف

وجان يسمعون صوت الباب يندك فجأه!

_________يتبع

ياترى شنو الي راح يصير ويه زمرد ويار ومنو الي اجاهم!!
انتضرونه بالبارت القادم
ولتنسون تعليقاتكم الحلوه وتفاعلكم 🔥

تابعوني على التليكرام ♡