#الخَـازوق الأسـود
ذكرى.
لا تنسون التصويت والتعليق بين الفقرات 🤎.
استمتعوا....
____________________
____________
هَرم
وگفنة ثنينة بمكانة بصدمة من شفنة سجينة عليهة دم محطوطة على القبر وشي اسود مذبوب بالگاع داير مداير القبر ، لطمت على وجهي وصحت.
-شنو هذا مُعقب شنو هذا !!!!
باوع عليهة مصدوم وانا لطمت على وجهي اقوى.
-مُعقب شنو هذااا احجي !!!
ردت اروح يمهة بس هو كمشني راساً: انتظري لا تحركين أي شي من مكانة انتظري..
وانا جنت منهارة واريد بس اروح احضن قبرهة واحط راسي عليه بس هو كامشني وميقبل، لحد ما گعدني بالگاع وانا تربعت اضرب على رجلي وابجي بنفس الوقت.
حتى بقبرهة مدا يخلوهة ترتاح !
رفع مُعقب تلفونة واسمعة يكول: اي سيد اريدك تجيب الضابط وتجي..اي كوللهم وخلي يجون وياك بس برهان خليه يبقى يم عمي ودير بالكم توصلولة السالفة ترة حالتة تعبانة !
طفة التلفون وگعد يمي وكل: گومي حبيبتي خلي اوصلج.
باوعت عليه وانا الطم على رجلي وكلت وانا ارجف.
-ليش هيج وياهة شنو مسوية هي علمود يأذوهة هلگد شنو مسوية ؟ راحيل بحياتهة ممسوية شي تأذي بيه أحد وهي لا تسمع ولا تحجي يعني حتى الكلمة المحلوة متطلع منهة، ليش وياهة هيج ليش والله لو ماخذيني ومخلصيني انا من هذا العذاب ليش بقوني اناا !!!
نهيت كلامي وگمت ابجي بصوت عالي وهو حضني يهدئ بية ويريدني اگوم منا بس انا ماقبل اريد بس احضنهة وهو كامشني ميقبل لان حسب كلامة يجون الشرطة وهمة يشوفوهة اخاف عليهة شي متعلق بالي قتلهة واذا احنة نطخة يخرب كلشي..
گام من يمي وكل: انا رايح اجيب السيارة هنا، لا تتحركين من مكانج !!
هزيت راسي بدون كلام وهو راح وانا ماخذتني صفنة على قبرهة وأسمهة، شنو سوت علمود هيج يصير بيهة ! شنو سوت هاي الطفلة علمود تنقتل بأبشع الطرق ويصير هيج بقبرهة ! حتى وهي ميتة مدا ترتاح !
طبگ مُعقب السيارة واجة يمي كمش أيدي وگومني من الگاع ونكت عبايتي وهو يكول.
-خلي الحگ ارجعج للبيت يلا.
طلعني من بين القبور ومشاني للسيارة الي جانت گدامنة تقريباً وفتحلي الباب، وانا داصعد شفت سيارتين وحدة سودة عالية والثانية جانت مال شرطة طبگن گدامنة بالضبط.
تنهد مُعقب بانزعاج: وهاي اجوي.
سد الباب بسرعة وراح صعد من جهتة وساق شوية على كيف لحد ما وصل يم سيارة السيد الي نزل منهة ووياه نزلو ولد مسلم، نزل مُعقب شوية من الجامة وكل.
-انا راجع للبيت سيد هاشم ماوصيكم هنا !!
كل واحد منهم: لا تتأخر بالرجعة ترة يريدك حسين.
مُعقب: اي اي ماتأخر جرح ليش مو وياكم ؟
هاشم: بالطريق هسة جاي ورانة.
هز راسة مُعقب وداس بانزين بسرعة وطلع من المقبرة وهو يسوق سريع وحاط جگارة بحلگة يدخن، وانا جنت اباوع من الجامة على الطريق، أي شي داسويه ديخرب علية وميمشي عدل لو تطلع مصيبة صفح لو يصير عركة، حرفياً من اليوم الي انا ومُعقب خطبنة حياتي مگلوبة مصايب ومشاكل ومدا اشوف ولا نص يوم راحة..
طبگ يم البيت وانا نزلت من السيارة بدون كلام وبس دخلت للصالة انهاريت گعدت بالگاع ابجي والطم على راسي وجسمي كلة يرجف، وأمي بس شافتني هيج گابلتني وانا سولفتلهة والكلمة بگوات تطلع مني ومن خلصت گعدت تلطم وياية.
وبقينة هيج گاعدين لليل وماكو أي خبر وولا واحد من الولد رجع للبيت يطمنة بس جرح اجة ثواني وصعد فوگ ياخذ شي وبگوات اخذنة منة كلمتين وكللنة منخابر على أبوية أبد لان ميدري بالسالفة ومنريدة يدري هو تعبان اذا عرف يصيرلة شي..
تأخر الوقت كلش يلا سمعنة صوت السيارة برة وانا حطيت حجاب على راسي وطلعت بسرعة للكراج وجان مُعقب دينزع حذائة.
رحت يمة وأمي اجتي وراية وراساً كلت.
-طمني عليك الله شنو صار !!
مُعقب: اخذو الاشياء وراحو يسوولهة فحص يشوفوهة، ماكو شي ان شاء الله.
رفعت أمي أيدهة وگامت تدعي على الي سوة هيج ومُعقب يباوع علية، دخلت جوة واشرتلي بعينهة افوت وراهة، باوعت على مُعقب وهمست.
-اسويلك شي تاكلة ؟
نفة براسة وكل: لا ماريد شي روحي دخلي جوة الدنيا برد هسة تتمرضين.
هَرم: تصبح على خير.
هز راسة ودخل جوة وانا هم دخلت وسديت الباب وراية ورحت غسلت لأخواني ونومتهم ثنينهم ورجعت للصالة گاعدة وحدي واحس بعد تعبت، اريد بس يوم راحة لنفسي ويكون بالي صافي ماكو !!
الأكـبر
بقينة لليل احنة وية الضابط وهو وية الي وياه فتشو المكان كامل وسألو منا ومناك والسجينة هي والدم اخذوهة للفحص بعد لان مجان أكو أي شي ثاني.
بقينة واگفين انا وأخوي وهاشم، وجرح ومُعقب يحجون وية ضابط واسمعهم يكلولة نريد هاي القضية تبقى مكتومة ومنريد أي أحد يعرف بيهة وأي اخبار تجي مباشر لـ جرح مو لأبوه لان تعبان.
راحو وبقينة بس احنة والكـابر كل: مثل ما شفنة السجينة تشبه السجينة الي ماتت بيهة راحيل، يعني هذا الشخص بنفسة حاطة هنا.
هزيت راسي: والدم الي عليهة لو تكون لحيوان معين لو..
سكتت ومُعقب كل مستغرب: لو شنو كمل ليش سكتت !!!
الأكـبر: لو يكون دم راحيل عليه.
حجيت وانا اباوع على جرح على سند نفسة على السيارة وتجتف واشوفة لام شفتة ويجر نفس بسرعة يحاول يتحكم باعصابة.
اقترب الكـابر منة وحط أيدة على جتفة: وروحة لأبوية دم أختك ميروح بالهوى وحقهة ينأخذ من عين كتالهة انتَ بس اصبر شوية ولا تتسرع بالتفكير والتصرف لان كلشي دنحسبلة حساب علمود لا نغلط بسالفة ويضيع علينة الاول والتالي.
هز راسة بدون كلام وانا عفتهم وتقربت من قبرهة، ورحت يم الشي الاسود المذبوب حولة.
قريت آية من القرأن وأذنت بصوت ناصي ومديت أيدي وطخيتة.
جان سائل بس ملمسة غريب والي استغربتة مناشف يعني من وقت جايين تقريباً جان مغرب وهسة الدنيا ليل يعني من الطبيعي الگاع تسحبة بس لا باقي بمكانة.
نكتت أيدي وطلعت كلينسة مسحتة ودرت بعيوني حول القبر، جانت ريحة طيبة كلش بحيث سكنت بمكاني وغمضت عيوني وانا اخذ نفس هلگد ما طيبة حسيتة مسك.
فتحت عيوني وگمت من مكاني ورحت يمهم وهاشم كل.
-يلا خلي نرجع احنة بعد راح يتأخر الوقت.
الكـابر: احنة نرجع للبيت روح انتَ.
هز راسة وصعد بالسيارة وراح ومُعقب هم اخذ جرح وراحو ثنينهم وانا والكـابر تمشينة بين القبور علمود نطلع.
الأكـبر: صارلنة فترة مدا نجي هنا !
الكـابر: نرجعلة نرجعلة بس خلي يصير عدنة وقت لان مثل ما دتشوف من الشغل للمزرعة ومن المزرعة للأثول نوح.
ضحكت: اي صحيح محجة وياك اليوم ؟
نفة براسة: لا مخابرني ولا حجالي شي، تلگاه ديلعب وية واحد من عفاريتة.
ضحك بنهاية كلامة وانا هم ضحكت: والعباس مقهور عليه انا.
الكـابر: احس ظلمناه من انطينة الرفض وتسرعنة بيه !
نفيت براسي: لا متسرعنة ولا ظلمناه، طبيعي راح يكون ردنة لواحد يطلب أيد أختنة الرفض واحنة دنشوفة يشتغل وية ساحر !
الكـابر: المهم هسة گلبنة الوضع ودنمشيه مثل ما احنة نريد.
هزيت راسي: بس والله خوش خطة انطيت وراح تفيدنة كلش.
رفع حاجبة: چا شعبالك بابا انا من ا..
قاطعتة: اي دسكت اسكت وكافي تمدح نفسك هلگد، وبعدين على طاري الزواج شوكت ناوي تحرك نفسك بعد حتى شيب راح اطلع وانتَ كبرت، خلينة نفرح بيك !
باوع علية ورفع حاجبة: خوب انتَ تزوج وافرح بنفسك !
الأكـبر: انا متناسبني هاي السوالف، انتَ حتى العروسة موجودة يعني حتى ميحتاج تباوع منا ومناك !
الكـابر: بعدهة صغيرة خاتون اريدهة تكمل دراستهة.
ضحكت وحطيت أيدي على جتفة: ديلا كـابر عوف سالفة جبيرة وصغيرة وفرحنة بعد اريد اشوف أبن أخوي !
الكـابر: أبني ؟
هزيت راسي: اي أبنك !
انرسمت ابتسامة على وجهة وسكت وانا اخذتهة فرصة كلت اقنعة بيهة بلكت يتزوج ويستقر بحياتة، بس هو مقتنع يكول مو هسة وآخر شي ختمهة بـ..
-خلي يستقر حالنة اكثر وبلكت نگدر نشتري بيت اكبر من هذا.
مر يومين على الحادثة..
وجانت الدنيا الصبح والدنيا باردة تثلج ثلج وواگفين انا والكـابر ثنينة دنحط الخضروات بالصندوق مال سيارة لازم نوصلهن لبغداد وخالتي عود تساعدة ملفلفة نفسهة بالسترة مالهة وتكول شيلو هذا راح يطين وشيلو هذاك هسة يخرب.
كملنة وصعدنة بالسيارة وهي راساً حطت ترمس بحضني وعلاگة بيهة لفات.
-أكلوهة بالطريق يمة اخاف تجوعون، وهذا چاي اخافن هذا الحمار تاخذة غفوة بالطريق وترحون من أيدنة.
الكـابر: رحمة الله والديج حمدوش لا تنسين ترجعين البنات من المدرسة بالوقت لا تخليهن ينتظرن ودير بالج على جموح تعبانة خطية.
ضربت السيارة بأيدهة: دروح روح.
بدة يسوق وانا اضحك: هاي راح تصير عمتك ؟
باوع علية وهو عاقد حاجبة: انتَ شو كامشني بسيرة الزواج هاي الفترة شبيك ؟؟
الأكـبر: شبيك نريد نفرح بيك !
الكـابر: شنو كتلك بارحة انا ؟
ضحكت: كلتلي احب خاتون وأموت علـ..
ضربني بوكس على جتفي وصاح: سد حلگك لا ادفرك برة السيارة ابن الزفرة !
الأكـبر: بهاي عصبيتك انتَ هم أبد مو مال زواج انا اغير رأيي، لا تتزوج.
باوع علية بطرف عينة وكمل طريقة...
جموح
خلصنة دوام وخالتي رجعتنة للبيت لان الولد طالعين لـ بغداد ياخذون بضاعة، والي استغربتة اليوم نوح جان مموجود، هو يعني صحيح انا اريدة يبتعد بس استغربت عدم وجودة لان مستحيل يفوت، من اليوم الي انطيناه الرفض لحد البارحة هو بس يجي واشوفة بس اليوم جان ماكو..
رحت غسلت وبدلت ملابسي وگعدت اساعد خالتي بالبيت وهي شوية وطلعت لبيت أهل زوجهة أبن عم خاتون مسوي عملية وهي راحت يمة وعافتنة وحدنة بالبيت.
واحنة ثنينة طلعنة للمزرعة نلم بالزرع لان الولد من البارحة موصينة بس يرجعون من بغداد لازم الوجبة الثانية مخلصة ياخذوهة للمحلات الي هنا..
خاتون: اكلج جموح..
رفعت راسي الهة: كولي ؟
خاتون: اذا نوح تقدملج مرة ثانية توافقين عليه ؟
باوعت عليه بدون كلام وهي اخذت نفس واقترب مني.
-باعي انا من احجي هيج لان احبج والله واعتبرج.. وروح أبوية حتى ماعتبرج انتِ صدگ أختي وصديقتي واتمنى الج كل الخير، وداشوف نوح صدگ يحبج ومبين عليه رايدج !
جموح: شنو اسوي خاتون اذا انا الرفض جاي من أخواني، يعني اكسر كلمتهم والله يكسرون راسي !
خاتون: وانتِ ليش متخيلة أخوانج همج !! ومو كلتيلي بيومهة كلولي هاي حياتج وانتِ براحتج الي تردينة يجرالج ؟
نفيت براسي وكلت: اي خاتون صحيح كلولي هيج بس بدون ما يكلولي هم انطو الرفض لان اكيد شافو شي معجبهم وشافوه يضرني انا !!
ضيگت عيونهة: وشنو هذا الشي الي شافوه ومعجبهم ؟
بلعت ريگي وكلت بتوتر: ها..لا ماعرف مكلولي.
گرصتني حيل وكلت: ماريد احلف بس والعباس تعرفين.
جموح: لا تحلفين خاتونة لا تحلفين !!!!
خاتون: لا احلف ونص لان تعرفين، كوليلي بلا شنو !
نفيت براسي: ماكول عوفيني.
عبست: يعني انا صديقتج وحافظة اسرارج، أي شي يصيرلي اجي ركض ركض اسولفلج متكوليلي ليش أخوانج رفضو ؟
اندارت ورادت تگوم بس انا راساً كمشت أيدهة وگعدتهة.
-گعدي اسولفلج گعدي يبووو اذا عرفو التوأم يعلگوني بدال اسماعيل خراع الخضرة.
گرصتني حيل: بس لو اعرف ليش متخيلة أخوانج همجية وعلى ابسط شي ممكن يحطوج ويبسطوج وهمة حياتهم ممادين أيدهم عليج ولا مسمعيج كلمة محلوة !
جموح: مو انا ماريد اوگع بغلط يحطني بموقف يخليهم غصب يتعاملون بوجهم الثاني وياي، ترة على كولتج أخواني وانا اعرفهم كلش زين واعرف اذا وجهم الثاني طلع شنو يصير ؟
خاتون: دسكتي هسة سكتي وكوليلي..
هزيت راسي وگعدت اسولفلهة وانا ألم حولي وهي صافنة علية وفاتحة حلگهة على الي كلتة.
ضربت خدهة وكلت: يا يا وانا داسوي طريق واحاول اقنعج بيه تالي يطلع يشتغل وية دجال !! يبووو الله يبعدنة غيرت رأي لا توافقين، والعباس راسج اكسرة اذا وافقتي، الله يبعدنة الله يبعدنة يمة.
متحملت ضحكت على حجيهة وهي كملت.
-امداني اي والله عمي همزين أخوانج رفضوه جان هسة كل وحدة تمشي وعفريتهة وراهة.
حطيت أيدي على حلگي وانا اضحك وهي بعدهة تحجي عليه، لحد ما انا دغيتهة وكلت.
-يلا مادام مالتي مصارت ان شاء الله مالتج تصير !
خاتون: انا ؟ ومنو المحظوظ ؟؟
ابتسمت: على اساس متعرفين منو ؟
نزلت راسهة وگعدت تاخذ جزر وتحط بالمصفي المسوينة بالخوص وتكول
-ماعرف جموح هذا أخوج مدا اعرف شلون اشوفة !
عقدت حاجبي مستغربة: مفهمت ؟
خاتون: ماعرف شلون اتصرف وياه، مرة يعاملني بطريقة حلوة ويبين حبه ومرة يعاملني مثلج لو مرات يگلب يعاملني معاملة طفلة كلشي متفهم !!
رفعت عيني وزفرت بملل: يا خاتونة انتِ تفهمين الحركات الي تصير وياي بس مشكلتج ثولة متركزين بحركات الكـابر وياج انتِ، هو ميريد يحط هاي الافكار بالج وانتِ بهذا العمر بس ميدري الگدامة الشيطان يخاف منهة.
عقدت حاجبهة بغضب وكلت: لعد ليش مرات يبين حبه يمي ويطلع نفسة هاييييممم.
جموح: لان الكـابر يحبج كلش وميتحمل يشوفج گدامة وميبين حبه يمج، بس مرات يسيطر على نفسة ويحاول يبعد، وهو اكثر من مرة اسمعة يكول بعدهة صغيرة خلي شوية لاخ تكبر يلا اخذهة !
خاتون: اي بس انا ماحبة وماريدة !
ضحكت ودفعتهة: من تلگين واحد يوصل لشعرة من
الكـابر عود كولي ماريدة.
ابتسمت وكلت خلي اسوي مثل ما هي تسوي وياية.
-وانتِ شايفة من الأكـبر يشاقة وياه ويكولة من خاتون تتزوج شنو يسوي ؟ يحبج بابا ورايدج انتِ بس صبري !!
باوعت عليهة صار وجهة احمر وعضت شفتهة ونزلت راسهة خجلانة وانا رفعت حاجبي وضحكت على منظرهة، هذا الخجل نادراً ما ينشاف من خاتون.
حطت اظفرهة بحلگهة وكلت: يعني يحبني صدگ ؟
هزيت راسي: اي يحبج يحبج..
خاتون: اروحلة فد..
سكتت ورفعت راسهة كأنو استوعبت الي ديصير، باوعت علية ودفعتني وگامت وهي تشيل المصفي.
-دوخري وخري انتِ وأخوج مالت عليكم.
سمعنة صوت سيارة طبگت، رفعنة راسنة وشفنة من بعيد يم الباب سيارة بيضة نزل منهة ثنين ولد، عقدت حاجبي مستغربة من عرفتهم، جانو نفسهم الي يجون يم التوأم..
منتبهو علينة راساً راح ودگو الباب وجانو مستغربين الباب مفتوح وممقفول.
گمت من مكاني بسرعة وعدلت حجاب ورحت يمهم وخاتون اجتي وراية.
وگفت شوية قريب منهم وهمة انتبهو علينة وواحد منهم كل.
-سلام عليكم !
جموح: وعليكم السلام تفضل ؟
باوعت عليهم اعرفهم الولد كايليلنة عليهم، الي حجة نفسة أختة توفت اسمه جرح والثاني هم عرفتة الي باوع علية بأول يوم اجوي بيه، برهان..
جرح: وين الولد ؟
خاتون: طالعين لـ بغداد العفو بس محتاجين شي ؟
عقد حاجبة: شعدهم ببغداد ؟
خاتون: طلعو عدهم شغل أخوية، صاير شي ؟؟
جرح: لا مصاير اذا رجعو كوليلهم ضروري يدگون علينة اذا متصير زحمة يلا برهان امشي..
راح للسيارة وبرهان هذا جانت ماخذتة صفنة علية وانا خفت من نظراتة كلش جنت بس منزلة راسي بدون ما احجي كلمة.
راح هو هم وانا بقيت واگفة بمكاني وخاتون دغتني.
-هذا الثاني شبيه هيج يباوع عليج !
باوعت عليهة وانا عاقدة حاجبي بانزعاج.
-وانا شعرفني، ديلا خلي نكمل شغلنة هسة ترجع أمج تعلگنة ثنينة.
رجعنة ثنينة نشتغل لحد ما رجعت خالتي وكلنالهة الي صار وهي متحملت راحت خابرت هاشم وكم اتصال ورد عليهة جرح وهي سألتة وهو سولفلهة الي صاير..
إرَم
جنت بالمطبخ واگفة يم الكونتر وداسوي كيكة مثل العادة، كلما اضوج اطلع البيض والطحين واگعد اسويلي كيكة واجرب طرق جديدة على أهلي.
انا وداسوي فات نوح مستعجل وانا باوعت عليه مستغربة، الايام الي مرت تغيرت تصرفاتة كلش، قبل جان يگعد يمنة ويسولف ويحجي هسة حتى گعدة ويانة ميگعد مگضي الوقت جامعة وشغل وغرفتة وأمي شگد حاصت حوله على هذا تغيرة.
والغريب بالموضوع اكثر أبوية الي اساساً ممهتم، وحتى موضوع الخطبة أجلهة وگام يتحجج ونأجلهة لورة المحرم، وكل هذا التغير بعد ما نوح راح وية التوأم والسيد..
رجعت باوعت عليه مرة ثانية طلع ركض وبيدة علاگة، اخذت نفس وصحت.
-نوح متعشيت !!
مرد علية طلع برة وسد الباب حيل، رجعت لشغلي بدون اهتمام وكملت الكيكة وحطيتهة بالفرن على نار هادئة ورحت گعدت يم أمي الي دتحجي وية أم أبوية وتحاول تقنعهة مثل كل مرة تحجي وية أبوية وتقنعة بسالفة خطوبة نوح، ماعرف ليش أمي هيج مستعجلة !
مرت عشر دقايق وانا گاعدة واباوع تلفزيون سمعت صوت الباب مال مطبخ ونوح يصيح.
-إرَم تعاي..
گمت من مكاني ورحت للمطبخ وباوعت باستغراب على نوح الي جان شايل بنية صغيرة بحلگهة ملهي وواگف بالباب مال مطبخ، رحت يمة وفتحت عيوني بصدمة ولطمت على خدي.
-صخام الصخمك هاي بنتك مو ؟
عقد حاجبة مستغرب وانا رجعت كلت: عزا العزاك يعني متزوج !! وانا اكول ليـ..
قاطعني: هوب انتِ شبيج اخذتيني حاصل فاصل مثل أمج دوگفي خلي افهمج !
إرَم: انتَ بس كولي هاي مو بنتك وخليني ارتاح وماروح افضحك يم أمي !
ضربني على راسي: مو بنتي مو بنتي بس سكتي وخلي افهمج !
هزيت راسي وباوعت عليهة وهو كل: هاي بنت صديقي اريدج تحطيهة يمج بس شوية وارجع اخذهة أبوهة حطهة يمي لان عندة شغل مهم.
عقدت حاجبي مستغربة: وليش حاطهة يمك انتَ أمهة وين ؟
نوح: إرَم انا أأمن بس يمج انتِ عليج الله لا تكثرين اسألة واخذيهة يمج !
إرَم: نوح غير افهم أمهة وين ؟
نوح: لعد هاهية روحي اوديهة..
قاطعتة راساً: ماشي راح احطهة يمي، شنو أسمهة ؟
نوح: اسمهة وردة.
ابتسمت وكلت: اسمهة حلوو !
رفع عينة: اي أبوهة مسميهة هيج عود علمود يصيحولهة وردتة، يلا مستعجل اخذيهة.
اخذتهة من أيدة وبنفس اللحظة دخلت أمي للمطبخ ونفس السيناريو انعاد لطمت على وجهة وكلت هاي بنتك وهو كللهة أبن صديقي وراح راساً وأمي گعدت تسأل الابنية منو أبوج ومنو أمج وهي مترد مستغربة من أمي.
رحت طلعت الكيكة وحطيت قطهة الهة وحطيت عليهة كاكاو سائل وية ياسميري وگعدت بالگاع يمهة أوكلهة وهي حبت الطعم گعدت بحضني تريد بعد وأمي تلعب وياهة وبنفس الوقت تسألهة لحد ما كلتلهة شنو أسم بابا وهي كلت.
-هاتم.
باوعت عليهة مستغربة وكلت: هاتم منو ؟
وهاج: قصدج هاشم ؟
هزت الابنية راسهة واشرتلي على الكيك وانا باوعت على أمي وكلت.
-وهاي طلعت بنت السيد وانتِ خبصتي الدنيا بنت نوح وبنت نوح، واصلاً الابنية حلوة وشگرا نوح اجلح واملح منين لگيتيهة بنتة !!!
وهاج: اي تلگين مثله !!!
همست بصوت ناصي وانا احط بحلگ الصغيرة قطعة كيك.
-واحلى منة هم !
صاحت: شنو شنوووو !!!
إرَم: مراح الگة بجمال نوح فدوة لله شگد حلو أبنج.
باوعت علية وغمتني وگامت راحت للصالة وانا رجعت للابنية اسألهة عن أمهة وهي صغيرة متفهم شنو داحجي بس كلما اسألهة شنو اسمج تكولي تيد هاتم (سيد هاشم) مبين تحب أبوهة كلش وبس هاي الكلمة تعرفهة وستذكرت كلام نوح من كل سماهة وردة علمود يكون ربط بين اسمائهم، وردة هاشم.
خلصنة ووديتهة للصالة وشغلتلهة تلفزيون بس هي جانت تحوص بالبيت تباوع منا ومناك وتروح للغرف وشوية شوية ضاجت وبدة العبوس بوجهة وتهمس بـ بابا وماما.
حطت أمي حجاب وعباية على راسهة وطلعتهة برة كلت افرهة شوية بين ما يرجع نوح وانا بقيت وحدي بالبيت، شوية واجة أبوية وكل.
-وين وردة ؟
استغرب لان عرف بيهة وانا حتى مسولفت واستغرب اكثر من كلي اسمهة.
-أمي طلعتهة برة شوية لان رادت أهلهة !
أدريس: ماعتقد راح يجون عليهة اليوم.
إرِم: بابا شلون عرفت بيهة ؟
أدريس: نوح خابرني وكلي.
هزيت راسي وهو گعد يباوع تلفزيون وشوية وأمي اجتي مشترية للابنية بس هي بعدهة معبسة اخذتهة ورحت للمطبخ وگعدتهة بالگاع وشغلت الهة بالتلفون مقطع مال اطفال ورحت سويت الهة بتيتة.
بعد ما خلصت گعدت أوكلهة وهي جانت ملتهية بالتلفون ونست نفسهة هم، خلصت أكل ومقبلت تگوم بقت گاعدة تباوع بالتلفون لحد ما دخل نوح للمطبخ وشايل بيدة علاليگ بيهة حفاظات مال اطفال وحليب.
باوعت عليه بدون كلام وهو ابتسم: احم بس اليوم.
هزيت راسي: انا عادي عندي والله احطهة بعيوني بس غير افهم سالفتهة بالبداية !
نوح: من عيوني اسولفلج بس اخذي هاي الاغراض فوگ ونوميهة خطية مبين عليهة نعسانة.
إرَم: هاي اذا نامت لان تريد أبوهة وأمهة !
نوح: انطينياهة وانتِ روحي فرشيلهة وسويلهة حليب وغيريلهة ولبسيهة ملابسهة لحد ما انا اللعب وياهة شوية.
رفعت حاجبي وضحكت وهو هم ضحك: ديلا اعتبريهة تمارين لمستقبلج.
إرَم: جايبلهة ملابس ؟
هز راسة: اي جبتلهة لبستين ثنين.
اخذت منهة التلفون وطفيتة وانا اكول: مادام هيج مبين الابنية مطولة عدنة.
دخل أبوية للمطبخ: هاا نوح محد خابرك ؟
نفة براسة: محد خابرني.
أدريس: ليش مرحت يم هاشم وحاجيتة ؟
نوح: ماگدر اروح يمة حالياً وانتَ تعرف مراقب انا بگوات گدرت اطلعهة واجيبهة هنا وماخذهة للجامع، والتوأم دگيت عليهم وماكو أي رد منهم لان اساساً همة بـ بغداد رايحين وماعرف شوكت يرجعون !
هز راسة: لعد راح تبقى عدنة لحد ما يرجعون التوأم، لا تروح يم هاشم أبد.
نوح: مو بوية انتَ تعرف هاشم شگد يحب بنته..
قاطعة أبوية راساً: لا تخرب شغلك وية عمار علمود هذا الموضوع واكيد السيد هاشم من يعرف راح يتفهم موقفك.
نوح: يا يتفهم بوية الابنية بنتة خليني اخذهة وافضهة حتلو سوالي شي عمار انا قابل بس خلي اخذهة لأهلهة !
عافنة وراح برة بدون ما يجاوب نوح الي اخذ نفس واجة يشيلهة وانا راساً كلت.
-يعني أبوهة ميعرف هي هنا ؟
باوع على باب المطبخ وهمس: إرَم انا عندي ثقة بيج واگدر اسولفلج كلشي بس هسة ماگدر، بس وعد مني نگعد انا وياج سوية واكلج كلشي من البداية للنهاية.
اخذت نفس وهزيت راسي: تمام يلا جيبهة وراية علمود اجهزلهة فراشهة.
صعدنة ثنينة فوگ وانا فرشت الهة فراشهة ومعرفت شلون اسويلهة حليب لهذا أمي صعدت وسوتلهة وهي غسلت الهة وغيرتلهة وانا بدلت الهة ومددتهة على فراشهة وشغلت الهة مبايلي تلتهي بيه علمود متبجي ونوح بعد راح لغرفتة ينام.
خففت الاضاءة وتمددت انا هم بفراشي بصفهة وگمت اباوع عليهة، ملامحة طفولية ومحبوبة بشكل لا ينوصف وخدودهة هيج كبار مال عض، اخذت نفس وعبست من تذكرت أبوهة وأمهة ميعرفون هي يمنة اكيد هسة گالبين الدنيا عليهة، بس ليش نوح ميكوللهم هي يمنة رغم يعرف السيد هاشم ! ومنو ولد شيث الي جاب طاريهم !!
من شفتهة شوية شوية بدت تغمض اخذت تلفوني ووخرت الممية وحطيت الملهي بحلگهة وگمت اطبطب عليهة لحد ما نامت وتأكدت متغطية زين لان الدنيا باردة ونمت وياهة بعد.
بنص الليل فتحت عيوني على صوت شهگات خفيفة يمي، بسرعة گعدت وشفتهة گاعدة وتشهگ ودموعهة تنزل، اخذتهة ومددتهة بحضني وگمت اطبطب عليهة واكول.
-حبيبتي شنو تردين ؟
عبست بوجهي وكلت: بابا.
ابتسمت وگعدت أألف الهة قصة على أبوهة وسويتة ملك وبطل وهي شوية شوية هدئت واخذتهة صفنة علية وكلما اكول بابا بطل تضحك وتصفگ بأيدهة.
وگعدنة هيج لحد ما نعست مرة ثانية ونامت وانا راساً تمددت ونمت من النعاس والتعب.
لازم اخذ حق تعبي من نوح..
الصبح گعدت وهي جانت بعدهة نايمة وكركزت عليهة، جانت طالعة من فراشهة وصايرة بالمگلوب والملهية بحلگهة وشعرهة كفشة، شگد ردت اجعصهة واعضهة بس كلت خطية ابقيهة نايمة.
غطيتهة وعفت شوية من الباب مفتوح ورحت غسلت وجهي ونزلت جوة وجان اليوم جمعة ماعندي بيه دوام وأهلي كلهم بالبيت، ساعدت أمي شوية بالريوگ ورحت بسرعة فوگ لان أبوية كل وردة واگفة يم الدرج وتخاف تنزل.
رحت وهي بس شافتني مدلتي أيدهة، شلتهة ونزلتهة جوة ورحت غسلت وجهة وعدلت شعرهة وهي بدت تتنحس تريد أبوهة وأمهة گعدنة على الريوگ ونوح گعدهة يمهة يشاقة وياهة ويضحكهة وهي مبين تعرفة لان سكتت يمة راساً وگامت تاكل من أيدة.
خلصنة ريوگ وهو بقاهة يمهة يلعب وياهة وانا گعدت انظف البيت وية أمي وأبوية طلع راساً للشغل..
خلصت شغلي واخذت وردة وصعدتهة فوگ وياية وسبحتهة وبدلت الهة وانا بالي يم أهلهة، مقهورة كلش على أمهة اكيد هسة حالتهة حالة وأبوهة مبين يحبهة كلش وهي تحبة لدرجة كلساع تكول هاتم، وحقدت على نوح بشكل لا ينوصف ليش ميخابر أبوهة ويكوللهم الابنية يمي !!
خلصت وبدلت الهة ونزلتهة جوة وگعدت اللعب وياهة ختيلان واركض وراهة اريد بس اللهيهة وانا كلما افوت من يم نوح اصيح عليه واكولة تعزمني على الغدا وأمي تكول حقهة، ولليل بقينة هيج...
الأكـبر
وصلنة بغداد من وقت شوية لان طلعنة الصبح من وقت كلش وخلصنة تسليم البضاعة ورحنة لمطعم وأكلنة ووراهة رحنة لزيارة كلنة نستغل فرصة وجودنة لان زيارتنة لـ بغداد نادرة كلش وجنة حاطين تلفوناتنة بالامانات وبقت فترة طويلة هناك لان ضلينة بالإمام هواي..
بعد ما خلصنة وتأخر الوقت كلش طلعنة واخذنة التلفونات وفتحناهة وثنينة تفاجئنة من كمية الاتصالات الي جانت جايتنة من الولد وحتى ارقام غريبة متصلة علينة !
باوعت على الكـابر: اكيد صاير شي !!!
الكـابر: اتصل على واحد منهم خلي نفهم !!!
راساً دگيت على جرح وفتحت السبيكر وبقينة ثنينة واگفين بمكان شوية بعيد عن العالم، واجة الرد منه.
-وينكم من العصر نخابركم !!!!!
الأكـبر: شكو صاير شي ؟؟
صاح: بعدكم بـ بغداد ؟
عقدت حاجبي وكلت: شبيك تصيح لك، واي بعدنة بـ بغداد عدنة شغل !! احجي صاير شي ؟
جرح: بت هاشم مخطوفة من البارحة بالليل !!
فتحت عيوني بصدمة وكلت: شنوو ؟؟؟
الكـابر: وليش محد بلغنة من البارحة !!
جرح: مجنة نعرف احنة هم البارحة هاشم وشاهر طالعين يدورون عليهة بس اليوم العصر خابرني شاهر وكلي مدا احصل التوأم وسولفلي..
باوعت على الكـابر وانا اكول: هياتنة راجعين ساعة واحنة يمكم..
جرح: لا اوگف أكـبر الدنيا ليل ورطوبة لا يصيـ..
قاطعتة راساً: معليك جرح.
سديت التلفون وركضنة ثنينة بسرعة للسيارة وصعدنة وانا اسوق ودست بانزين حيل.
ضربت الستيرن وصحت: طفلة شلون تنخطف هيج !!!
الكـابر: خلي نوصل ونشوف هاشم، الله اعلم حالة شنو هسة !!
الأكـبر: مدمر اكيد يحب وردة كلش، هاي السالفة مو خالية أبد !
هز راسة وبان التوتر عليه، اخذ نفس وكل: انا خايف يكون مصيرهة مثل..
قاطعتة راساً: لا تحجي هذا الكلام يمة وتخليه يتخبل رسمي، خلي نوصل للبيت والله كريم.
هز راسة وثنينة بقينة ساكتين باقي الطريق وجنت ماگدر اسوق سريع اكثر لان الدنيا ضباب والليل كلشي ماشوف...
من دخلنة بغداد وشوية شوية اقتربنة من المنطقة اتصلنة على جرح وكللنة هو بالجامع واحنة برة دندور.
وصلنة للجامع وطبگنة السيارة وسيارة هاشم جانت موجودة، نزلنة ودخلنة جوة راساً وشفناه گاعد بالگاع ونازع البشت مالتة وحاط عمامتة يمة وبصفة گاعد أخوه شاهر.
رحنة وگعدنة يمة والكـابر حط أيدة على جتفة: هاشم خوية !
مرد علينة بقة منزل راسة وانا كلت: ولك هاشم قوي نفسك وگوم على حيلك !
باوع علية: حيلي راح وياهة، بنيتي ماعرف وينهة !!
الكـابر: وروح مسلم نلگاهة ومراح تنام اذا بنتك مو بحضنك ها ؟
نفة براسة: ماكو الابنية ماكو !
الأكـبر: لك هاشم شنو دنكول احنة !!!
باوعت على أخوه: شاهر رحمة لدينك متگومة ويانة !
باوع علينة هو هم بدون كلام وانا گمت من مكاني وطلعت برة وانا اتصل على جرح الي سد تلفونة، وماكو ثواني وشفت سيارتهم طبگت ونزل منهة هو ومُعقب.
اجة يمي وانا كلت: ها معرفتو شي عليهة ؟
جرح: ماكو دورت عليهة بكل مكان.
اخذت نفس وزفرتة: وين اختفت الأبنية، بس مسولفتو شلون صارت السالفة !
مُعقب: جانت گاعدة بالگراج تلعب وحدهة وواحد داخل على البيت اخذهة وراح.
عقدت حاجبي: معقولة محد بالبيت انتبه عليهة !
جرح: هاشم جان بالشغل كالعادة وأمهة جوة بالبيت ومجانت تعرف وردة طالعة.
هزيت راسي: هي هم خطية الله اعلم شنو حالهة..
دخلنة جوة يمة وهو على وضعة وحتى ماي ماقبل يشرب بس يون على بنتة وحالتة صايرة حالة وشاهر هم بس هذا يحاول شگد ما يگدر يقوي نفسة علمود أخوه هاشم.
وهو هم حقة بنته وردة صغيرة كلش يعني كلشي متعرف ولا تستوعب أي شي الله اعلم هسة وين وشنو دتسوي.
بقينة يمة فوگ الساعتين وخالتي حرگت التلفون علينة لحد ما طمنتهة احنة راجعين واستغربت بالبداية جانت تعرف بالي صاير بس كلتلي واحد من الولد جاي للبيت وسائل علينة وعرفو بالسالفة.
شوية وبعد طلعنة انا والكـابر وشاهر ثلاثتنة صعدنة بالسيارة ورحنة ندور عليهة حول بيتهم وسألنة جيرانهم اذا أكو واحد شاف شي او شخص غريب على المنطقة أول مرة يشوفونة فات بس محد شايف شي.
رجعنة للجامع وبس طبگت السيارة بالباب اجة اتصال لـ الكـابر، طلع تلفونة وكل.
-نوح شنو يريد بهذا الوقت !!!
سد التلفون ونزل من السيارة ونزلنة احنة هم وشاهر كل.
-رد عليه اخاف صايرلة شي وية عمار !
الكـابر: مو وقتة هسة بعدين التقي بيه وجهاً لوجه واحاجيه.
طلع جرح وكل: هاا ؟
نفيت براسي: ماكو أي شي هاشم جوة ؟
جرح: لا طلع للبيت.
شاهر: هسة جنة هناك ومشفناه شوكت طلع ؟
جرح: هسة طلع مصارلة هواي تگدر تلحگة.
طلع شاهر واحنة دخلنة جوة وجان مُعقب وبرهان موجودين، واستغربنة وجود برهان لان المفروض هو هسة يم شيث بالمستشفى !
گعدنة يمة وهو تقرب علية لزگ وكل: ياهو انتَ ؟؟
رفعت حاجبي وكلت: انا الكـابر ؟
كمش أيدي: اويلي يابة شگد احبك انا، لو تعرف معزتك بـ گلبي الا..
دفعت أيدة وكلت: دوخر شگد مزعج، وبعدين مو على اساس انتَ يم شيث ليش هنا !
برهان: اشتاقيتلك وكلت لازم لازم اشوفك هسـ..
عقد حاجبة وركز بوجهي زين وانا صفنت عليه، دفعني وكل.
-دوخر لعبتهة لنفسي عبالي الكـابر
مُعقب: عوفونة بعد من هاي السوالف وكلولنة شنو الحل لهذا الموضوع !!
برهان: الي صار تقريباً نفس الي صار وية المرحومة، وانا اتوقع نفس الشخص ديسوي هاي الاشياء ويانة.
الكـابر: مدا تلاحظون هذا الشخص هواي شايل حقد عليكم ؟
باوعت عليه وكلت: لا خوية قصدك علينة كلنة مادام دخل هاشم، واكيد شخص مراقبنة على طول وعرف هاشم عندة بنية.
احنة ودنحجي دگ تلفون جرح وهو بس شاف أسم المتصل راساً گام من مكانة ومُعقب كل.
-منو ؟
جرح: هذا الضابط الي حقق !
باوعت عليه ملامحة تغيرت وعيونة صارن حمر، فتح الاتصال وحطاه على أذنة وگعد يحجي وياه واحنة نباوع عليه ونراقب ملامحة الي شوية شوية تغيرت أكثر وصار يرجف وفاتح حلگة يريد يحجي بس ميگدر.
وگع التلفون من أيدة وبسرعة گمنة من مكانة وبرهان كمشة قبل ما يوگع بالگاع، وانا كمشتة من الجهة الثانية وكلت.
-شكو جرح شبيك ؟؟
برهان: جرح خوية احجي شنو كلك حسين !!!!
اخذ مُعقب التلفون من الگاع وحطاه على أذنه واسمعة يحجي وية الولد واحنة ذبينة ماي على وجه جرح علمود يهدء شوية من رجفتة.
عدلت گعدت بس بقيت ساندة ومُعقب سد التلفون وهو فاتح عيونة وملامح التوتر بدت عليه والكـابر كل.
-شكو مُعقب ؟؟
باوع علينة وكل والقلق جان واضح عليه: الدم الي جان على السجينة..
سكت بنهاية كلامة وبرهان صاح: كمل !!!!
مُعقب: مطابق لـ دم راحيل.
صار هدوء محد بينة حجة وملامح الصدمة جانت واضحة على برهان وانا وأخوي جنة متوقعين هذا الشي وكلناه هم..
حولنة عيونة على جرح الي حجة وهو فاتح عيونة وبنبرة مليانة حقد وغل على قاتل أختة..
جرح: ثار أختي ينأخذ لو اعرف حياتي هي الثمن، راح انطي روحي في سبيل احط السجينة بـ گلب قاتلهة، الا اگص لسانة مثل ما گص لسانهة، الا اشرب من دمه وروحهة العزيزة..
يتبع...
_____________
هلا هلا 🫢🤎.
انطوني رأيكم بالبارت، واريد اشوف توقعاتكم للبارت الجاي 🤎.
____________
.
.
.
.
.
.
.
.
.
.
في أمان الله 🖤.