✹ ✹ ✹ ✹ ✹ ✹ ✹ ✹ ✹ ✹ ✹
#قوة_أيسـون
البارت الثلاثين
بقلـم:زهـراء لـؤي
ولـدي الحلوين لتنسون تصويت ، ومُتابعة للحساب، وتعليق بين الفقرات💅🏻⛓️❤️🔥
حسابـي الأنستا : wa5bad
خذلوكَ يا قلبي وأنتَ ملاذهُم
ولهُم ودادكَ قد وهبتَ سفينا
سلمتَهم مجدافَ عمركَ لم تخفْ
أن يغرقوكَ فأهلكوكَ حنينا
✹ ✹ ✹ ✹ ✹ ✹ ✹ ✹ ✹ ✹ ✹ ✹ ✹ ✹
ميـار ...
ركزت بكلامة عدل ! ضليت أرجف اريد استوعب ماكو حجيت بصوت ناصي
-ميـار : سُلطان منو ديار !
-سُلطـان : ديار أتأذيتي ديار
دموعي نزلت مسحتهن
-ميـار : شبيها ديار زين منو هيّ؟
-سُلطـان : رادت تموت ديار وينج
رجعت دموعي تنزل اريد استوعب ماگدرت أتحمل بجيت كل قوتي وضليت اضرب بي واصيح
-ميـار : منوووو هاي ديار منوو سُلطان منوووو
فز مرعوب وخايف يباوعلي
-سُلطـان : أسم الله شبيج ميار
-ميـار : منووو دياررر منو سُلطان
-سُلطـان : الطفلة الي نقذتهااا شبيها ميار صارلها شيء
-ميـار : لاا تجذب لاا تجذب انتَ تصيح ديار حبيبتي وينج ليش تجذب
-سُلطـان : ولج وداعة أمي ديار الطفلة شبيج
-ميار : وانتَ نايم تتحملم بيهاا مثلاً سُلطان
مسح وجه وحجة بهدوء
-سُلطـان : وداعتج ميار گوة نمت وانا أفكر بيها گلبي مكسور عليها لو صاير الها شيء منظرها ميروح من بالي ميار
-ميـار : شنو الي يثبتت كلامك شنوو
راح جاب مبايلة طلع رقم مسمي أبو ديار
-سُلطـان : هذا رقم أبوها حتى من أجو اخذوها انطاني رقمة وتشركني ويريد يعزمني
گعدت أبجي حاطة أيدي على وجهي تقرب من يمي أتصل على أبوها وفتح أسبيكر شوية وأجانة صوت أبوها
-سُلطـان : السلام عليكم شلونك أبو ديار
-وعليكم السلام حبيبي سُلطان شلونك
-سُلطـان : أعتذر أتصلت بهيج وقت عليك بس بالي يم ديار شلونها خو مابيها شيء او خايفة
-هههههه حبيبي سُلطان لا الحمدالله زينة ونايمة الحمدالله
-سُلطـان : الحمدالله بوسليها واسفة على الأزعاج مرة الثانية
-يوصل حبيبي ماكو اي ازعاج
ودعاة وسداة شهگت بصوت عالي تقرب يحضن بية
-سُلطـان : مو گتلج مو أحد شتتوقعين أحب غيرج انا
-ميـار : انتَ شايف شلون تهذي بأسمها شايف والله ردت أموت بس ماموت والله على مودك
ضحك بصوت عالي
-سُلطـان : تربية ايسون اخ منجن اخ ماخذت عقول ولد ليلى بهاي قوتجن
رحت نمت على الجرباية وغطيت وجهي
-ميار : عود بعد لا تحجي وياي يالله باي
أجة شمر نفسة على الجرباية ونام
-سُلطـان : متأكدة
ضحكت بصوت عالي وانا واخر بي
-ميـار : وخرر ولك وخرر خنگتنيييي شنو ثور خو مو ثور
-سُلطـان : هسة أشوفج الثور على أصورلة
جرني لحضنة وحضني كل قوتة بحيث حسيت ضلوعي تكسرت
-ميـار : سُلطان
-سُلطـان : نفس ريتة
-ميـار : شوكت حسيت نفسك حبيتني؟
-سُلطـان : أول ماجينة من السفر وأجت عيوني بعيونج الناعسة متت بيهن بحيث گوة گدرت اشيل عيوني عنج گلت عادي يجوز عجبني شكلها البنية بس يومية أگعد واصبح على وجهج واشوف سوالفج وي البنات تعلقت بيج ولمن أشاقيج وانتِ تصديني
-سُلطـان : بيوم ماجانت تحجي وياج نبأ گالت صديقتي تحب سُلطان جنتن گاعدات برا وانا أسمعج تگليلها أخوج صراحة صاك بيومها انا واگف برا أسمع كلامجن ضحكت لان حجيتي هيج رحت الـ غرفتي فرحان وگفت اباوع الـ نفسي بالمراية حسيت نفسي فعلاً حلو ، بيومها اتأكدت انا ميت بيج وعليج عاشگج
تقرب باس عيوني
-سُلطـان : روحي ترتاح بشوفة عيونج وأيدج من تلزم أيدي
أبتسمت وضميت راسي بصدرة
-ميـار : أحبك سُلطاني حيل أحبك
-سُلطـان : يموت بدونج سُلطان وحق علي
حضنتة كل قوتي وحسيت روحي طايرة وانا بين أدية غمضت عيوني ونمت ...
•••
ايسـون ...
كل عادة أجة حيدرة يگعدني حتى أروح للدوام شمر المخدة عليّ
-ايـسون : هسة دگعدني برقة وحنان مثل العالم شبيك همجي
گام وهو يحجي
-حـيدرة : ايسون للـ٣ الگاج مزروعة جوة خوش لو لا
-ايـسون : گمت گمتتتت
رحت غسلت وبدلت لگيت تولين گاعدة وحيدرة بس أمي ماگاعدة
-ايـسون : شعجب أمي ماگعدت
-حـيدرة : مادري رحت الها بستها فزت گلتلي نعسانة يمة
-تولين : ميار تداوم اليوم؟
-ايـسون : صدك ذكرتيني خلي أتصل عليها وأشوف
أخذت مبايلي أتصل ماجاوبت عرفتها نايمة الة واحد يسحلها من فراشها كملنا ريوگ وطلعنا
-حـيدرة : ايسون مو تطلعين خاف اتأخر بس راح أمر على تولين بالرجعة وبعدين نجيج
-ايـسون : خوش عيوني أنتظركم
هز راسة وصلت للجامعة ، كملنا محاضرتنا أجتني رفيف أبتسمت من شافتني ابتسم الها
-رفـيف : مادري شلون أشكرج ايسون بس اليوم بسام ماكو فاصلي
ضحكت وحضنتها
-ايـسون : شفتي مو گتلج ثقي بية ومعليج
-رفـيف : اريد أشكر دكتور الأكبر تعالي وياي حبابة أستحي اروح وحدي
-ايـسون : ماشي تعالي
مارفضت لان أعرفها خجولة رحنا طلعنا لگينا بالكافتريا ويا البنية الي نفسها شفتها ! امس صديقتة باوعتلي رفيف وگالت
-رفـيف : أذا تحبين عادي نرجع غير مره أتشكرة
أبتسمت وگتلها
-ايـسون : لا حبيبتي تعالي قابل شنو وأذا
هز راسها رحنا لگيناهم يتكهكهون وكل واحد مشرع حلكة مترين باوع النا الأكبر وگال
-الأكبـر : صباح الخير
ثنينة جاوبنة
-صباح النور دكتور
-رفـيف : دكتور أجيت حتى أشكرك على الي سويتة ما انساة والله نقذتني منة
أبتسم وگلها
-الأكبـر : مايحتاج رفيف مثل أختي انتِ وهذا أخذ جزاتة الحقير
-رفـيف : تسلم أستاذ ، هسة صار لازم نروح من رخصتك
باوعلي وگال
- الأكبـر : تفضلوا أگعدوا ويانة
-رفـيف : لا أستاذ من رخصتك انا لازم اروح ، ايسون اذا تحبين تفضلي
-الأكبـر : أخذي راحتج رفيف ، اي ايسون أگعدي خلي اعرفج على ليالي صديقتي
شطت روحي طلعت شبت نار بين ضلوعي بس مابينت الهم ابتسمت جريت الكرسي وگعدت
-ايـسون : انا ايسون بت عم الأكبر تشرفت بيج
أبتسمت وگالت
-لـيـالـي : ألي الشرف عيني ايسون
-الأكبـر : شتحبون تشربون
-لـيـالـي : كلشي منك طيب گاردشم
ضحك الأكبر وگلها
- الأكبـر : ماتغيرتي
-لـيـالـي : أكو واحد يتغير عن عيونة الأثنين
رفعت حاجبي فعلاً الوضع صار لا يُطاق
- ايـسون : أريد جاي
باوعتلي مستغربة وگالت
-لـيـالـي : جاي !
رفعت حاجبي وگتلها
-ايـسون : أي عيوني جاي
-لـيـالـي : ها عبالي تحبين القهوة
-ايـسون : أحبها بس مشتهية جاي
باوعتلي ورجعت باوعت للأكبر وگالتلة
-لـيـالـي : وانتَ شتشرب گاردشم
أستغفرت ربي وجاوبها
-الأكبـر : جاي
طلب جاي ، باوعتلة لگيت يباوعلي ومبتسم رجعت باوعتلي وگالت
-لـيـالـي : شنو عدكم وراثة شرب الجاي؟
-الأكبـر : ههههههه اي
-ايـسون : وانتِ شنو مشكلتج وي الجاي الناس اذواق مثل ما احنا محترمين ذوقج أحترمي ذوقج غيرج
الأكبر يحاول يضم ضحكتة وهيّ تباوعلي بصدمة
-لـيـالـي : شبيج أكلتيني وبلعتيني ترا سؤال هو !
-الأكبـر : گولو يالله بنات وصل الطلب هسة تتعاركون على مود الجاي أشربي ايسون
قدملي الجاي اباوعلها بـ أنتصار هزت راسها وشربت گهوتها
-لـيـالـي : شلونها خالتو ليلى والبنات تصدك مشتاقتلهن
باوعت للأكبر بصدمة كلهم تعرفهم يعني
-الأكبـر : الحمدالله زينين قبل فترة سألتني عنج أمي
-لـيـالـي : ياعمري خالتو بس نكمل نروح عليكم
باوعلي الأكبر وأبتسم عبالك متعمد يحرگ بروحي
-الأكبـر : شرط عشاج يمنة
حاولت ألزم اعصابي وانا اسمع حديثهم
-ايـسون : طلعت تعرفكم كلكم
-لـيـالـي : طبعاً حبيبتي أصدقاء صار سنين
-ايـسون : ها خوش
-ايسون : يالله من رخصتكم راح تبدي محاضرتي خليت وگمت النار شابة بية مايستاهل انا أعلمك تحرك بروحي مو !
رحت للقسم لگيت رفيف
-رفـيف : أنتِ بخير ايسون؟
-ايـسون : بخير حبيبتي بخير
-رفـيف : باع وجهج من العصبية شلون صاير
-ايـسون : هاي ليالي مادري منو تعرفهم من سنين!
-رفـيف : أي تعرفهم بس مو بس هيج
حجتها وسكتت باوعت الها وحجيت
-ايـسون : شنو كملي؟
-رفـيف : عليج الله لا تگولين انا گتلج
هزيت راسي
-رفـيف : تحب دكتور الأكبر بس هو امانة الله مايحبها ولا شيء فقط صديقة
-ايـسون : وانتِ شلون عرفتي؟
-رفـيف : اكو فد مرة أجت حتى تشوفة وگعدنا بالكافتريا واحنا وراهن صايرين فـ تسولف الـ صديقتها انُ تحبة وميتة وتتمنى يحبها
العصبية صعدت الـ راسي ضليت أرجف باوعت الـ حالي رفيف وگالت
-رفـيف : ايسون لا تخليني أندم لان سولفتلج شوفي حالج شصار بي
أنطتني مي شربت بس ماكو فائدة طك خشمي دم
-رفـيف : شوفييي ايسون شووفي شصار بسرعة گومي غسلي
اخذتني ماحجيت ولا كلمة غسلنة تونا طلعنا ردتنة نوصل للقسم لاگاني الأكبر يمشي سريع وحجهة أصفر تقرب حجة بخوف
-الأكبـر : شبيج ايسون شصار وياج هسة أجيت اشوفج وگلولي طك خشمها دم
أشرت الـ رفيف تدخل دخلت باوعتلة
-ايـسون : ما تدخل انتَ بية رجاءً عسى ما اموت ماتدخل
-الأكبـر : شييج ايسون تردين تخبليني انتِ أسم الله شجاج
-ايـسون : وهسة خليني أدخل منا الطلاب
-الأكبـر : تعالي وراي ايسون نحجي
-ايـسون : ماجي
-الأكبـر : تجين لو أشيلج گدام الطلاب
أستغفرت ورحت ويا للكافتريا
-الأكبـر : شبيج ليش طگ خشمج دم !
-ايـسون : وحدة مادري
-الأكبـر : كتيلي وحدة مو
-ايـسون : اي وحدة وهسة شتريد ممكن أفهم !
-الأكبـر : أتصل حيدرة عليّ گال أتصال على ايسون متجاوب وأمي عازمتكم عدنا يعني انتِ وأهلج معزومين عدنا عشة فـ تجين وياي حيدرة مايگدر يجيبج عندة شغل وميار راح توصلها صديقتها
رفعت حاجبي وگتلة
-ايـسون : مانتبهة هسة أشوف
طلعت مبايلي فعلاً مكالمات هواية من حيدرة وأمي دزيت الهم مسج
-ايسـون : ميحتاج انا أجر تكسي واروح
-الأكبـر : مو هيّ بكيفج
-ايسون : جا بكيفك هيّ أكبر !
-الأكبـر : ياروحة انتِ طبعاً بكيفي قابل أخليج ترحين وحدج
-ايـسون : ميهم
-الأكبـر : ايسون لا تعاندين وياي ترحين يعني وياي
كزيت على اسناني وحجيت
-ايـسون : وتريدني اروح وي نعالي مدري ليالي
ضحك بصوت عالي
-الأكبـر : ايسون عيب لا ، قابل راح تاكلج!
-ايـسون : ماتاكلني بس ماتشرف هيج بشكولات وياي
خليت وگمت خلصت أخير محاضرة طلعت لگيتة منتظرني شفتة درت وجهي أستغفر ضحك هو
-الأكبـر : أصعدي يالنجرة
فتحت الباب ردت أصعد وگتلة
-ايـسون : ونعالي ماتجي
يحاول يضحك ضحكتة همس بصوت ناصي حتى محد يسمع
-الأكبـر : لا هسة تجي ورانة
اسغفرت ربي طول الطريق انا ساكتة وهو بس يحاول يكتم ضحكتة
-ايسـون : شبيك ؟
دار وجهه عليّ وضحك
-الأكبـر : شبية؟
-ايـسون : جا شنو ترديني أبجي
حجيت بصوت عالي منفعلة
-ايـسون : أكبررر
حجة وهو يضحك
-الأكبـر : براغي گلبة
-ايـسون : كافي بديت اتنرفز الصراحة
سكتت وصلنا للبيت لگيت كل أهلي هناك سلمت عليهم بوست أمي والبنات بس خالة ليلى ماكو رحت للمطبخ لگيتها باوعت الها
-ايـسون : شلونج خالة
باوعتلي مبتسمة تقربت باستني
-ليلى : شلونج بنيتي مشتاقتلج والله گلبي طاك عليج
-ايـسون : تشاقلج العافية خالة ربي يخليج
نزلت دمعتها وگالت
-ليلى : مو كافي بنيتي والله گلبي طك عليج مشتاقة اسولف وياج وأضحك
-ايـسون : الي سويتوا وياي خالة مو سهل صدگيني
حجت وضلت تبجي
-ليلى : والله مجبورين يابعد خالتج والله
تقربت حضنتها حضنتني هيّ همين
-ايـسون : تمام كافي الي صار صار لا تبجين
-ليلى : يمة بنيتي أشتاقيت تحضنيني وتسولفين وياي ولج مسربتة ليش هيج مسوية بية
ضحكت بستها
-ايـسون : جا شسوي ياخالة والله ضايجة من الي سويتوا سامحتج انتِ بس ماسامح أبنج
-ليلى : أدري بيج معاندة
تقربت تبوس بية وتحضني شوية وطلعنا نضحك كلهم يباوعون النا
-سُلطـان : يافتاح يارزاق شصاير أهنا
-ميـار : فرجت جنها ولك
الأكبر مصدوم وأمي مكيفة وتضحك
-ليلى : تصالحنا انا وبنيتي
فتح الأكبر عيونة بصدمة وگال
-الأكبـر : جا وانا يمة وانا
-ايـسون : وانتَ شنو؟
-الأكبـر : شوكت تصالحيني ترا والقران ضلم ايسون
گعدت خليت رجل على رجل وحجيت برود
-ايـسون : انا ماعندي شيء وياك انتَ أبن عمي بعد من يوم ورايح
-الأكبـر : عود صدك تحجين !
-ايـسون : اي صدك
باوع للأكبر سُلطان وض يغني
-سُلطـان : راح وأيست منة غرگ بالماي
هز راسة الأكبر ودار وجهة على خالة وگلها
-الأكبـر : يمة راح تجي ليالي تشوفكم
الأنظار كلها صارت عليّ مابينت الهم شيء ضليت هادئة
-ليلى : شنو أجت من السفر
-الأكبـر : أي اجت وكلش مشتاقتلكم
ضلو يتناقشون، لاحضت مريم ونبأ ضاجن من موضوعها ...
•••
مريم ...
ضجت من سمعت ليالي تريد تجي ماحبها تتنعوص وتتفيك شايفة نفسها هيّ وبس وقلقت على ايسون ليالي ماتدري ايسون جانت خطيبة الأكبر لعبت نفسي من طاريها خليت وصعدت فوگ
لگيت مبايلي يدگ رحت شفتها شهم ! استغفرت ربي شيريد هذا الثاني فتحت خط
-مريـم : هلاو
ساكت ماجاني صوتة
-مريـم : الو ! شبيك متحجي !
حجة وصوتة عبالك باجي
-شـهم : شلونج مريم
-مريـم : الحمدالله زينة ليش ساكت اذا ماتحجي شكو متصل !
-شـهم : حتى أسمع صوتج الـ يخليني مرتاح بيومي
رجف گلبي من كلامة
-مريـم : شجاي تحجي شبيك شهم !
حجة بغصة
-شـهم : مريم انا أنسان ما أستاهل اعيش
أستغربت من كلامة
-مريـم : شبيك شهم شجاي تحجي صاير وياك شيء !
-شـهم : مريم گلبي يوجعني تعبت والله
-مريـم : بس أحجيلي شبيك
-شـهم : كل تعبي وجع گلبـي بس بصوتج أتعافة
دگات گلبي تتسارع ورجفة حاوطتني من كلامة
-مريـم : ليش جاي تحجي هيج شهم؟
-شـهم : لان عاشـگج
فتحت عيوني بصدمة من كلامة حطيت أيدي على حلگي أرجف صحيح بالفترة الي راحت يومية يراسلني ونسولف ويحجيلي يومة بس ماتوقعت يحبني !
حجيت وانا ارجف أطگ سن بسن
-مريـم : شجاي تحجييي انتَ شهم شجاي تحجيييي
-شـهم : حتى انتِ ماتحبيني؟
-مريـم : شهم !
-شـهم : انا هم ماحب نفسي والله
-مريـم : شهم لا تحجي هيج
-شـهم : ما أستاهل اعيش انا مريم ، كل دراستي وتعبي وفلوسي وكلشي بس انا انا مامرتاح بداخلي ميت
-مريـم : شموصلك لهل حالة گلي!
-شـهم : تخافين تحبيني؟
كلامة شوش عقلي مجاي افهم شنو يحجي
-مريـم : ليش أخاف فهمني لتخبلني شهم بيك شيء !
-شـهم : روحي مريم روحي أخاف أذيج مثل ما أذيتة روحي
-مريـم : لا لتحجي هيج شهم ! فهمني
-شـهم : أحبج وأريد ، بس ما أريد تتلوثين بية
سداة بوجهي ضليت متصنمة مكاني من كلامة ! نزلت دموعي ضليت أرجف يحبني بس ليش هيج يحجي! شبية وشصاير ويا؟
صار عندي فضول أعرف شصاير ويا شموصلة لهل حالة شمسوي !
نزلت جوة يم البنات بس بالي مو يمهم شوية وأجة حيدرة سلم علينا وراه بشوية أجت ليالي دخلت تتمضحك تقربت سلمت على ماما
-لـيـالـي : حيل أشتاقيتلج خالتو
حيدرة همس بأذني
-حـيدرة : منو هاي؟
-مريـم : صديقة أكبر وصديقة العائلة
عوج حلگة باوع الـ ايسون الي گاعدة على الكرويتة تهز برجلها
-لـيـالـي : بيت أهل ايسون صح؟
-الأكبـر : أي بيت عمي
-لـيـالـي : اممم تشرفت بيكم انا ليالي صديقة الأكبر
-حـيدرة : تشرفنا بيج أختي
-لـيـالـي : ألي الشرف ، والدة ايسون صح؟
-ميـاسين : أي حبيبتي انا
-لـيـالـي : ماشاءالله تشبهين ايسون
- ميـاسين : اي بنيتي أشبها
ضلو يسلمون ايسون بس تخوزر بيها بالأكبر كمنا نجهز العشة أجت ايسون تصب العشة ويانة بس مافتحت حلگها ولا حجت
گعدنا على العشة وليالي بس تسولف منطلقة
-لـيـالـي : على الخير سُلطان ليش مگتولي خاطب
-سُلطـان : تعذريني والله ناسينج
خزرتة أمي الأكبر همين خزراة انا ونبأ ضحكنا وحيدرة وايسون همين
-لـيـالـي : صدك أكبر ناسيني
-الأكبـر : ها لا يابة شسالفة ناسينج شنو
ضلو يسولفون ويضحكون على ماكملنا عشة...
•••
ايسون ...
كملنا عشة ساعدنا البنات بغسل المواعين كملنا رحت للمطبخ اشرب ماي أجت تولين يمي
-تولين : أكلج ايسون هاي البنية تخوف
-ايـسون : مافهمت ليش تخوف؟
-تولين : ترا واضح عينها على الأكبر وعلى ما أعتقد ماتدري بي خاطب لو لا
-ايـسون : ميهمني بيها تولين شسويلها ختولي
-تولين : لا تنكرين ايسون ترا انتِ تحبي بس كرامتج ماتسمحلج ترجعيلة
-ايـسون : صح تولين مارجع الأكبر أذاني بمافية الكفاية
-تولين : مادري شكلج
-ايـسون : امشيي ولي اوي ياحب يابطيخ
عيبت وحجت
-تولين : ياحُب يابطيخ
طلعت تضحك درت وجهي أريد ارجع الكلاص وسمعت صوت ليالي وراي
-لـيـالـي : ايسون
درت وجهي الها كتفت أيدة وحجيت
-ايـسون : نعم
-لـيـالـي : اريد أسألج سؤال بس بينا ياحلوة
-ايـسون : أي أتفضلي أسألي ليش لا
گلبت شعرها بغرور وحجت وهيّ تتقرب من يمي
-لـيـالـي : سمعت انتِ خطيبة الأكبر جنتي صح لو لا؟
باوعت مستغربة منو گايل الها
-ايـسون : اي نعم ليش هالسؤال
ضحكت وگالت
-لـيـالـي : ليش فسختوا ؟
فتحت عيوني بصدمة على صلافتهل خزرتها ونترت بيها
-ايـسون : أعتقد هالشيء خاص بينا مو من حق أي احد يتدخل او يسأل
-لـيـالـي : امم زين من فسختوا مالكم قسمة سوية
حاولت ألزم نفسي وماالزمها وخبزها خبز
-ايـسون : ليش انتِ الي تقررين اكو قسمة لو لا
-لـيـالـي : لا بس هيج جاي اشوف انا
-ايـسون : أعمي عيونج ولا تشوفين هيج شيء بعد
-لـيـالـي : ليش شنو ناوية ترجعون سوية؟
أبتسمت ورفعت حاجبي
-ايـسون : امم ماعرُف بس يُمكن أكو قسمة بينا الله أعلم
أختفت أبتسامتها وگالت
-لـيـالـي : لا انتِ أبدً مالايگة للأكبر
فتحت عيوني بصدمة
-ايـسون : شنو عيدي مسمعت؟
-لـيـالـي : أي الصراحة الأكبر صديقي من زمان وانا أحبة صار سنين وماحجيت تالي تجين انتِ بليلة ويوم تاخذي أبدً مو لاگيلج شوفيلج غيرة ، على گد حالج
تقربت جريتها من شعرها وكزيت بين أسناني
-ايـسون : انا مالايگة للأكبر؟
ضلت تصرخ بعلوا صوتها
-لـيـالـي : أكبر تعال ألحگلي راح اموت
-ايـسون : طبجج مرض
-لـيـالـي : لج بت شوارع انتِ هديتي
الشياطين ضلت تتمركص براسي جريتها وضربتها كل قوتي راشدي
-ايـسون : محد غيرج بت شوارع حيوانة
دخل الأكبر يركض وحيدرة وأمي كلهم. اجو سحلني حيدرة والأكبر جر ليالي
-لـيـالـي : الحگولي بتكم كتلتني
-ايـسون : حتى أشوفج بت الشوارع على أصولهااا بررراا أطلعي يالله بررررا
-الأكبـر : ايسون تسودنتي انتِ شبيج انتِ !
-ايسون : شبيهة يعني شبيهة ماتگليي الـ ادبسزز جاية تشمت حضرتهاا بية لان فاسخين انا والأكبر فوگاها تگلي ملايگة للأكبر ههه هيّ تستاهلة أكثر
كلهم مصدومين من كلامي كلهم يباوعون ألي والـ ليالي الي تبجي وشعرها صاير كفشة وكحلتها سايلة تقربت من يمها صار بلنص حيدرة لزمني من بطني
-حـيدرة : ختولي ايسون معليج بيها وحدة رخيصة هاي
رفعت أصبعي بوجها وحجيت بتهديد
-ايـسون : شوفي وأسمعيني زين اياج وبالج تفكرين ولو مُجرد تقكير بالأكبر لانُ الأكبر صدگيني مراح يحبج ولا راح يگلبج أصلاً
-لـيـالـي : وانتِ شنو الي مضوجج الي حبيتة او حبني او گلبني لو لا اهتمي بنفسج ومعليج
-ايـسون : ماكو شيء مضوجني بس ديريي بالج تحاولين تعيدين سالفتج الخايسة
-الأكبـر : كاااافي اسكتن شنو أصغار انتن عيب عليجن هاي السوالف ! سُلطان تعال وصل ليالي للبيت وايسون تعالي وياي أحجي وياج موضوع بسرعة
باوعلة حيدرة وخزرة
-حـيدرة : أكبر انتَ معصب ماخليك تجرح أختي بكلامك
-ايـسون : مع الأسف عليك تتوقع يگدر شخص بالدنيا يجرحني!
-حـيدرة : بس حبيبتي
قاطعتها قبل ليكمل كلامة
-ايـسون : لا حيدرة خلي نشوف شيريد
صعدت وي الأكبر لغرفتة ويفور من العصيبة
-ايـسون : شتريدد
-الأكبـر : شنو هاي المسرحية الي سويتيها قبل شوية جوة شنو يهمج تريدني لو لا !
-ايـسون : أكبر متشوفها تتشمت بية
-الأكبـر : ختوليي معليج بيها حتى لو گالت الأكبر احبة شيهمج انتِ !
-ايـسون : شنو شيهمني أكبر !
رگع المزهرية بالگاع وضل يرجف
-الأكبـر: شترددددين بالضبط انتِ شتردين ! مو انتِ عفتيني وتعرفين مالي ذنب مو انتِ تهمتيني عندي علاقة وي وحدة وانتِ تعرفيننن كلشييي بس مغشمة نفسج ذليت نفسي ألج وحبيتج من گلبي وانتِ ! شسويتي بكل مرة تصديني تعبت ايسون تعبت !
مصدومة من عصبيتة وأول مرة أشوفة بهاي الحالة تقربت من يمة وحطيت عيني بعينة حجة بكل هدوء وعيونة تحجي كلشي
- الأكبـر : شتردين ايسون !
تقربت أكثر وأبتسمت
-ايـسون : أريدك أكبري ....
للحكاية بقية ⛓️...
___________________________
باقلم زهراء لؤي
شنو رأيكُم بالبارت ياقوم🌚🩶؟
توقعاتكُم الحلوة🔥🫶🏻🩶
لا تنسون تعلقون بين الفقرات وتصوتون
وتضيفون حسابي الأنستا وقناتي التلي نتواصل أهناك🫶🏻🩶
يوزري حسابي الأنستا :wa5bad
قناتي التلي أكتبو : لـ زهراء لؤي