Zee
🌼pann
Part (30)
ရက်လတွေပြောင်း ရာသီတွေပြောင်းလာပေမယ့် သားငယ်နဲ့ရတီကတော့ ထူးထူးခြားခြားပြောင်းလဲတာမျိုး မရှိခဲ့.. ။
သားငယ်က ပွေ့ဖက်နမ်းရှိုက်တတ်ပေမယ့်လည်း အဲ့ထက်သူမပိုခဲ့.. ။
နှစ်ယောက်ကြား ဆက်ဆံရေးက သူငယ်ချင်းလည်းမဟုတ်.. ဇနီးမောင်နှံလည်း မကျ.. ။
ရင်းနှီးကြပေမယ့် မရင်းနှီးတဲ့သူတွေ.. ။
ဒီလိုနေလာကြတာကိုလည်း နေသားကျနေခဲ့တာ..။
နှစ်ယောက်ကြား ရန်ဖြစ်စကားများတာမျိုး မရှိခဲ့ပေမယ့် တစ်ရက်တော့သူနဲ့အတိုက်ခံလုပ်ရတယ်..။
အကြောင်းက အဓိက major ရွေးချယ်ကြတဲ့အချိန်.. ရတီ OG ဋ္ဌာန ရွေးလို့ပါသတဲ့.. ။
" OG မရွေးရဘူး.. တခြား ဋ္ဌာန ယူ.. OG ကလွဲရင် ကြိုက်တဲ့ ဋ္ဌာနယူ.. ငါ ဘာမှမပြောဘူး.. "
" OG ရွေးလည်း ဘာဖြစ်လို့လဲ.. ငါ OG ပိုင်းကိုပဲယူချင်တာ.. "
" ရွေးစရာ အများကြီးထဲမှာမှ OG ဖြစ်မှလား.."
" ဘာလို့ ငါ့က OG ရွေးလို့မရရမှာလဲ.. "
" နင်ကရော OG မဖြစ်ရင် မရဘူးလား.. "
ကျောင်းမှာကတည်းက OG ရွေးလို့ မျက်နှာစူပုတ်ပြီး စကားကောင်းမပြော.. ။
ခု အိမ်ပြန်လမ်း ကားပေါ်မှာ ဒီအကြောင်းပဲ ပြောလာပြန်တယ်.. ။
OG ရွေးချင်လို့ OG အပိုင်းပဲ ရွေးခဲ့ပြီးပြီ.. ။
OG ရွေးတာကိုပဲ သူဘာလို့အဲ့လောက်ဖြစ်နေမှန်း နားကိုမလည်ဘူး.. ။
" ငါ နင် GS ရွေးတာတောင်ဘာမှမပြောဘူး.. နင်ကဘာလို့ ငါ OG ရွေးတာကို တားနေရတာလဲ.. "
" ......... "
ကားမောင်းနေရင်းက မျက်လုံးစိမ်းစိမ်းနဲ့လှည့်ကြည့်လာပြန်တယ်.. ။
" OG ပိုင်းကို ဘာလို့ယူချင်တာလဲ.. "
" နင်ကရော GS ပိုင်းကို ဘာလို့လိုချင်တာလဲ.. "
မဖြေချင်တော့.. ။
လူကို လိုက်ကတ်နေတာကို အမြင်မကြည်လာတော့ စကားလည်းကောင်းကောင်းမပြောချင်..။
သူကတ်သလို ကိုယ်လည်းလိုက်ကတ်ချင်လာတယ်.. ။
" ငါမေးတာမဖြေချင်တိုင်း ငါ့ကိုလွှဲချသလိုနဲ့ စကားလမ်းကြောင်း မပြောင်းနဲ့.. "
" စကားလမ်းကြောင်း ပြောင်းနေတာမဟုတ်ဘူး.."
" ဒါဖြင့် ဖြေလေ.. "
" OG ကိုစိတ်ဝင်စားလို့.. ရပြီမလား.. "
" အဟက်.. သေချာလို့လား "
သားငယ် တမင်တကာ မဲ့ရွဲ့ပြီး ခြောက်ကပ်ကပ်ရယ်လိုက်သည်.. ။
ဒီလောက် ရွေးစရာရှိနေတဲ့ထဲကိုမှ OG ကိုပဲလိုချင်တာတဲ့.. ။
အကြောင်းရင်းက စိတ်ဝင်စားလို့ဆိုတိုင်း လွယ်လွယ်ယုံရမှာလားတဲ့.. ။
ဒဲ့ပဲမေးချလိုက်ချင်တယ်.. ။
နင့်ကိုကိုက OG မလို့ OG လိုက်ယူတာမလား..။
ဆရာဝန်တောင် နင့်ကိုကို ဖြစ်စေချင်လို့ ဆရာဝန်ဖြစ်အောင်လုပ်ခဲ့တာပဲလေ.. ။
ဒါတောင် ထပ်ပြီး OG တဲ့လေ.. ။
ဒီကောင် ဒေါသမထွက်ရဘူးလား.. ။
အရာရာတိုင်းကို သူလွှမ်းမိုးနေမှဖြစ်မှာလား..။
ဘဝ တစ်ဆစ်ချိုးမှာ အရေးကြီးတဲ့ဆုံးဖြတ်ချက် လုပ်ရတိုင်း.. သူနဲ့လွတ်ကင်းပေးလို့မရဘူးလား..။
နှစ်တွေကူးခဲ့ပြီ ရတီ.. ။
ခုထိ နင့်ရင်ထဲကနေ အဲ့ကိုကိုဆိုတာကြီးကို ထုတ်မပစ်နိုင်သေးဘူးလား.. ။
ငါက ခု နွားဆိုတဲ့ကောင်နဲ့ ဘာထူးတော့လို့လဲ..။
ဒီလောက် ပေးဆပ်ထားပြီးချစ်နေတာတောင် မလုံလောက်သေးဘူးလား.. ။
" သားငယ်.. နင် ဘာရယ်တာလဲ "
ဟက်ခနဲ သူ့ရယ်သံက လှောင်နေမှန်းခံစားမိတာ မှားနေသလားပဲ.. ။
" OG ကိုမှ စိတ်ဝင်စားတာကို ရယ်မိတာ.. "
" ငါ စိတ်ဝင်စားလို့မရတဲ့ ဘာသာရပ်မလို့လား.."
" ဘာသာရပ်ကို စိတ်ဝင်စားတာလား.. ဒါမှမဟုတ် လူကိုလား.. "
" ဟမ်.. လူ.. ဘယ်ကလူလဲ "
မသိချင်ယောင်ဆောင်ပြီး မေးတဲ့ပုံစံလေးက တကယ်ပီသပါပေတယ်.. ။
ဒါပေမယ့် ရတီ.. မင်းဟန်ဆောင်ရင် တစ်ဖက်လူက ဟန်ဆောင်နေမှန်းမသိတဲ့သူကိုမှ.. ဟန်ဆောင်ပြလို့ကောင်းတာ.. မနာကျင်ရဘူးလေ.. ။
ငါ့ရှေ့ကိုကျ ဟန်ဆောင်ပြနေတာကိုက ငါ့အတွက်နာကျင်ရတယ်.. ။
" OG ကလွဲ ကြိုက်တာရွေး.. "
" ငါ OG ပဲရွေးမှာ.. "
မေးတာကို မဖြေဘူး.. ။
သူပြောချင်တာ သူလုပ်ချင်တာပဲ သူပြောတယ်..။
သူ့ဘက်က ကျေးဇူးရှင်ပဲမို့ ဒီလိုလေသံမာနိုင်တာပေါ့.. ။
ရတီလည်း အမြဲသူ့ကိုအလျှော့ပေးပါတယ်.. အနိုင်ယူချင်တဲ့စိတ် မရှိဘူး.. ။
ကိုယ့်ခံစားချက် ကိုယ့်အတွေး.. ဘာတစ်ခုမှ မချပြရဲဘူး.. ။
ချလည်း မချပြခဲ့ဘူး.. ။
အားလုံးရေလှုံနှုတ်ပိတ်ပဲ နေပေးတယ်.. ။
ချိုတယ်ခါးတယ်လို့ ရောင့်မတက်ဖူးဘူး.. ။
ဒါပေမယ့် ဒါတော့မဟုတ်သေးဘူး.. ။
ကိုယ်ဖြစ်ချင်တာကိုပါအစ သူ့လိုရာပုံသွင်းနေတာ.. ။
ဒီကလူပါ.. ပုံစံခွက်ထဲ ဇွတ်ထည့်ရအောင် သက်မဲ့ပစ္စည်းလေးမဟုတ်ဘူး.. ။
ဒီလို အလျှော့ပေးနေမှန်းသိလို့ သူကပိုအနိုင်ယူချင်နေတာ.. ။
ပိုပိုပြီး လူကို ထိန်းချုပ်ချင်နေတာ.. ။
သူ့ဇနီးတစ်ယောက် ဖြစ်နေဦးတော့.. သူအရာရာကို ကိုယ့်အတွက် စီမံချပေးစရာမလိုဘူး..။
ဘယ်လမ်းကိုပဲသွား ဘယ်လမ်းတော့မသွားရဘူးလို့.. လက်ညိုးလေး တစ်ချက်ညွှန်တိုင်း အသက်မဲ့နေတဲ့ စေတံရုပ်လေးလို ခိုင်းစေလို့မရဘူး..။
နေရာတကာ သူဝင်ပါဖို့မလိုဘူး.. ။
ကိုယ့်ကိစ္စတွေကို ဒီလိုပဲလုပ်ဆိုပြီး ကြားထဲကနေ သူဆုံးဖြတ်ပေးဖို့မလိုဘူး.. ။
ကိုယ့်မှာ ဆုံးဖြတ်နိုင်စွမ်းရှိတယ်.. ။
ရွေးချယ်ပိုင်ခွင့်တွေရှိတယ်.. ။
ကိုယ့်အသိဉာဏ်နဲ့ ပိုင်းခြားခွဲခြမ်းနိုင်တယ်..။
ပညာဂုဏ်မောက်နေတာတော့ မဟုတ်ပေမယ့် ကိုယ်လည်းပညာတတ်နေတဲ့ ပညာတတ်မိန်းမတစ်ယောက်ပါ.. ။
အမှားအမှန်တော့ ဝေဖန်ပိုင်းခြားနိုင်တဲ့မိန်းမပါ..။
အသိဉာဏ်မဲ့နေတဲ့ မိန်းမ မဟုတ်ဘူး.. ။
ဘာမဆို ယောကျ်ားကိုပဲ အားကိုးနိုင်နေတဲ့ အားနွဲ့တဲ့မိန်းမ မဟုတ်ဘူး.. ။
ဒီလိုမိန်းမ တစ်ယောက်ကို သူဘာလို့ယုံကြည်မပေးနိုင်ရတာလဲ.. ။
ဘာကြောင့် ကိုယ့်ရွေးချယ်မှုတွေကို အားမပေးနိုင်ရတာလဲ.. ။
သူ ဖေးမ မပေးနိုင်ရတာလဲ.. ။
သူရွေးချယ်တဲ့သူ့လမ်းကို ဆိုးတယ်ကောင်းတယ် တစ်ခွန်းမပြောဘူး.. ။
သူကျ လူကိုဘာလို့ရန်လိုနေရတာလဲ.. ။
ဒီအတွေးက အတွင်းကနေငုပ်လျှိုးထွက်လာတော့.. ကိုယ့်ဆုံးဖြတ်ချက်ကို ပြန်မပြင်နိုင်တာက ပိုသေချာသွားပြီ.. ။
" ငါ့ ဆုံးဖြတ်ချက်ကို ပြန်မပြင်နိုင်ဘူး.. "
" ကျစ်.. ဘုတ်.. "
သူက ဒေါသထွက်ပြပြီး စီယာတိုင်ကို လက်ဖနောင့်နဲ့ ရိုက်တယ်တဲ့လေ.. ။
ရိုက်ပေါ့.. ။
ငါနာတာမဟုတ်ဘူး.. အဲ့တော့ နင့်ဟာနင် ဘာကိုပဲရိုက်ရိုက် ထုထု.. စိတ်မဝင်စားဘူး.. ။
" .......... "
ရတီ အပြင်ဘက်ကိုပဲ အကြည့်ပို့ကာ အတွေးတွေကို အပြင်ဘက်မှာပဲထားလိုက်သည်.. ။
သူကတော့ ဒေါသတွေနဲ့တရှူးရှူးတဒိုင်းဒိုင်းပဲ..။
.
ဋ္ဌာန ရွေးတဲ့နေ့ကတည်းက သားငယ်နဲ့ အဆင်မပြေနေတာ.. ။
သူကလည်း လူကိုမျက်နှာတင်းတင်းလုပ်ပြတော့.. ကိုယ်ကလည်းချိုပြမနေဘူး.. ။
ဋ္ဌာနတွေမတူတော့ တွေ့ချိန်တွေကနည်းသွားတယ်.. ။
တွေ့လို့ကတော့ရပေမယ့် တွေ့ရဖို့ကိုနှစ်ယောက်သားက အချိန်ပေးမနေတော့.. ပိုဝေးနေရတာ..။
တကယ်ဆို သူငယ်ချင်းတွေက ဋ္ဌာန အသီးသီးခွဲယူကုန်တာမို့ .. အရင်လိုတတွဲတွဲတော့မရှိတော့..။
" ငါ ဘာလို့ NS ကိုရွေးလိုက်မိပါလိမ့်.. ဒုတ်..ဒုတ်..ဒုတ်.. "
ဆန်းထွန်းက စားပွဲပေါ်မှာ မျက်နှာကြီးအပ်ပြီး နဖူးနဲ့ခုံကို ရိုက်နေတာ.. ။
" လုပ်မနေနဲ့.. မင်းမှ မဟုတ်ဘူး.. "
" အတူတူ လာမလုပ်စမ်းပါနဲ့.. မင်းတို့နှစ်ကောင်က ဉာဏ်ကောင်းပြီးသားကို.. "
ခေါင်းထောင်လာပြီး ရန်တွေ့သေးတာ.. ။
" ဘာမှထူးကဲပြီး မပါလာဘူး.. အတူတူပဲ.. "
" ဘာလို့ မထူးရမှာလဲ.. အမှတ်တွေက မင်းတို့နှစ်ယောက်ကပဲ ပိုကောင်းတာလေ.. "
နှစ်ယောက်သား ထိုင်ငြင်းနေတာကို သားငယ် ဆားငံသီးဖျော်ရည်ကို ပိုက်နဲ့စုပ်သောက်ရင်း.. ပွဲကြည့်သလိုထိုင်ကြည့်နေလိုက်သည်.. ။
" စာပိုကြည့်လို့ ရတာ.. မင်းလိုအအိပ်ပဲပိုအချိန်ပေးတာမျိုးမှ မဟုတ်တာ. "
" မသိရင် ငါကပဲအချိန်တိုင်း အိပ်နေသလိုလိုနဲ့.. လူအိပ်ချိန်ပဲ ငါအိပ်တာ.. "
" ငါတို့က အဲ့လူအိပ်ချိန်ကိုအချိန်ပိုလျှော့တာလေ.. မင်းကတော့အပြည့်မလား.. "
" လူဆိုတာ ကျန်းမာရေးဂရုစိုက်ရတယ်.. အိပ်သင့်သလောက်မအိပ်ဘဲနေရင် ကျန်းမာရေးချို့တဲ့တတ်တယ်.. "
" ဒါဆို အိပ်ချိန်နည်းနည်းပဲရနေတဲ့ သူတွေအကုန်ကျန်းမာရေးချို့တဲ့နေတာလား.. အပိုတွေပါကွာ..ခေတ်ကိုက သူတစ်ပြိုင်ငါတစ်ပြိုင်နဲ့ကြိုးစားနေကြတဲ့ ခေတ်.. တကယ့် အောင်မြင်နေသူတွေကြည့်.. အိပ်ချိန်က ၂၄ နာရီမှာ ဘယ်လောက်ပဲ အိပ်ကြတယ်ဆိုတာ စိတ်ဝင်စားရင်သွားလေ့လာကြည့်.. ဉာဏ်ကောင်းလို့ တော်လို့အထက်ရောက်နေတာမဟုတ်ဘူး.. လုံ့လဝီရိယထုတ်ပြီး သူများထက်ပိုကြိုးစားလို့ နေရာတွေရနေကြတာ.. "
" ငါပြောတာ နည်းနည်း.. မင်းဟလိုက်မှပဲ မဆံ့မပြဲတွေ ထွက်လာရော.. "
ဆန်းထွန်းက နှုတ်ခမ်းလေးမဲ့ရွဲ့ပြောပေမယ့် အောင်ပိုင်စိုးက ခပ်တည်တည်ပဲ.. ။
ကိုယ့်မှာတော့ ခပ်ပြုံးပြုံးလေးနဲ့ပဲ.. ။
" ငါ့ဋ္ဌာနက professor ကြီးကကွာ.. တစ်နေ့တစ်နေ့ မေးခွန်းတွေများ ထိုင်ထုတ်ထားသလားမှတ်ရတယ်.. မေးလိုက်တဲ့မေးခွန်း တရစပ်ပဲ.. သူပါးစပ်ဟမှာကိုတောင် လန့်နေရတယ်.. ငါ့မှာ free ရှူနေရတဲ့ အောက်ဆီဂျင်တောင် ဝဝလေးမရှူရဲဘူး.. ငါဆိုတဲ့သက်ရှိ သူ့အနားတစ်ဝိုက်ရှိနေတဲ့အဖြစ်ကို သူသိမှာစိုးနေရတဲ့ဘဝ.. "
ဆန်းထွန်း.. ဒီကောင် တော်တော်စိတ်ဘူနေတာနေမယ်.. ။
မျက်နှာက အီးမှန်နေတဲ့လူလို မရှုမလှ.. ။
သူက စိတ်ညစ်ပေမယ့် သူ့ကြည့်နေရတဲ့ကိုယ်တွေတော့ ပြုံးချင်ချင်.. ။
" မင်းလို နေ့တိုင်း စာမေးခံရတာမှ တော်သေးတယ်.. ငါတို့ကိုကျ သင်ခန်းစာချည်းလှိမ့်သင်ပေးသွားတာ.. စာအများကြီးနေမှ ရောလောက်ပြီ.. မေ့လောက်ပြီလို့ ထင်တဲ့အချိန်ကျ.. အကုန်ရောသမမွှေမေးတော့တာ.. အဲ့မှာလူက ပြာတာပဲ.. "
" ရောသမက ငါတို့ကိုလည်းမွှေပါတယ်.. "
" ခဏခဏဖြေနေရတာမို့ မင်းကကျမမေ့ဘူးလေ..ငါ့ကျ ဘာမေးခံရမယ်မှန်းမသိတော့.. စာကိုနောက်ကြည့် ရှေ့ကြည့်.. အလယ်ဖောက်ကြည့်.. ဖင်တစ်ပြန် ခေါင်းတစ်ပြန်ကြည့်နေရတဲ့ ဘဝကိုမင်းနားလည်မှာမဟုတ်ဘူး.. ကြာရင်ခေါင်းပါချောင်သွားမှာ ကိုယ့်ဟာကိုယ်စိုးရိမ်နေရတဲ့အဆင့်ဗျ.. နားလည်လား.."
" မင်းတို့လည်း ခက်တာပဲလား.. "
" လွယ်တဲ့ ဋ္ဌာန ဘယ်မှာရှိလဲ အရင်မေး.. "
" ဟျောင့်.. သားငယ်.. မင်းရော.. မင်းဋ္ဌာနမှာ ဘာမှအခက်မတွေ့ဘူးလား.. "
" အခက်ကြီးကြီးတော့ မတွေ့ဘူး.. ဒါပေမယ့် လူနာ round လှည့်ကြည့်တဲ့အချိန်ကျ တစ်ယောက်တစ်လှည့် သူ့ရှေ့မှာ patient ကို ကြည့်ပေးရတဲ့အချိန်.. မျက်စိဒေါက်ထောက်ကြည့်ခံနေရတော့ စိတ်ကျဥ်းကြပ်တာလေးတစ်ခုပဲ.. "
" ဟမ်.. မင်းတို့ကျ patient ကို ထိတွေ့ခိုင်းနေပြီပေါ့.. "
" အမြဲတမ်းတော့ မဟုတ်ဘူး.. ငါတို့နိုင်လောက်မယ်လို့ သူထင်ထားတဲ့ case ဆို ကိုင်ထားတယ်.. သူ့အတွေးထဲ နိုင်မယ်လို့ ထင်တဲ့ case နော်.. ငါတို့နိုင်မနိုင် ပြောတာမဟုတ်ဘူး.. မလုပ်နိုင်ရင် ရှေ့လည်းဆူ နောက်ကွယ်လည်းငေါက်တယ်.. တစ်ခါတစ်လေ patient အတွက် ဆုံးဖြတ်ခိုင်းတတ်တယ်.. "
" ဟ.. ဆုံးဖြတ်တာပါ လုပ်ရတယ်ပေါ့.. "
" အင်း.. အချိန်ပိုရရင် ထင်မြင်ချက်တွေ treatment တွေပါ ပေးခိုင်းတာ.. ငါတို့ house ဆင်းတဲ့ခါ ဆရာနဲ့ပဲထပ်တွေ့ရမှာမို့ ခုကတည်းက training လှလှပေးမှာတဲ့.. "
" မလေး.. မင်းဟာက ခုကတည်းက ခြောက်ခြားနေပြီ.. "
သုံးယောက်သား ပခုံးလေးပဲ တွန့်မိတယ်.. ။
ဘယ်သူမှ မလွယ်ပါဘူး.. ။
သူ့ဋ္ဌာန နဲ့ သူမို့.. သူ့အခက်ခဲနဲ့သူ.. ။
" သားငယ်.. ဟိုမှာ ရတီ မဟုတ်လား.. "
လှမ်းပြလို့ မျက်လုံးပင့်ကြည့်တော့ ရတီကို မြင်တယ်.. ရတီ့အပြင် ဘယ်သူမှန်းမသိတဲ့ ကောင်တစ်ကောင်ပါ အတူမြင်မိတော့.. အလိုလို မျက်ခုံးတွန့်မိပြီးသား.. ။
" .......... "
ဆန်းထွန်းက လက်မြှောက်ပြီး လက်ရမ်းပြနေပေမယ့်.. ဟိုကမဒီက သူ့ဘေးကပါလာတဲ့ကောင်နဲ့ပဲ စားပွဲတစ်ခုမှာ ဝင်ထိုင်သွားတယ်.. ။
" ရတီ.. ငါတို့ကို မမြင်ဘူးထင်တယ်.. "
ဘယ်မြင်မလဲ.. ။
ဘေးက တစ်ယောက်နဲ့ပဲ အတွေးပြည့်နေတာနေမှာပေါ့.. ။
" သားငယ်.. ရတီ့ကို ဒီဝိုင်းလာဖို့ သွားခေါ်လိုက်မယ်.. "
" နေပါစေ.. ခေါ်မနေနဲ့.. "
သူတို့နှစ်ယောက်ကမ္ဘာလေး ဖျက်တယ်ထင်သွားဦးမယ်.. ။
" သားငယ်.. မင်းတို့ အဆင်ပြေရဲ့လား.. "
" အဆင်မပြေစရာ ဘာရှိလို့လဲ.. "
" မဟုတ်ပါဘူး.. မင်းတို့နှစ်ယောက် နည်းနည်းစိမ်းနေသလိုပဲ.. "
" ဟုတ်တယ် သားငယ်.. မင်းတို့ ဘာဖြစ်ထားကြတာလဲ.. "
" ဖြစ်ချင်ပေမယ့် ဖြစ်လို့မရတာ.. "
" ဘာလဲ မင်းဟာက.. "
" သူ ဘာလို့ OG ရွေးတယ်လို့ထင်လဲ.. "
" သူ ကလေးမွေးပေးချင်လို့ နေမှာပေါ့.. "
အောင်ပိုင်စိုး အရွှန်းနောက်တာကို မရယ်နိုင်နေ..။
ကိုယ်ခံစားနေရတာ ကိုယ်ပဲသိတယ်.. ။
" သူပြောတာ စိတ်ဝင်စားလို့တဲ့.. "
" ဪ.. အေးလေ.. အဲ့ဒါ ဘာဖြစ်လို့လဲ.. "
" သူစိတ်ဝင်စားတာ မင်းတို့ယုံလား.. "
" မင်းက မယုံလို့လား.. "
" ရွေးစရာ အများကြီး ရှိတဲ့ထဲ OG ရွေးသွားတာ.. သူ့ကိုကိုကို မမေ့နိုင်သေးလို့လေ.. "
" ဟာ.. ဘာဆိုင်လဲ သားငယ်ရာ.. "
" အေးလေ သားငယ်ရာ.. ဆရာ နေမျိုးရာဇာနဲ့ ဘာဆိုင်လို့လဲ.. "
" ဆိုင်တယ်.. ဟိုက OG မို့သူပါလိုက် OG တာ.."
" မဟုတ်လောက်ပါဘူး သားငယ်ရာ.. မင်း အတွေးလွန်နေတာ နေမှာပါ.. "
" အတွေးလွန်နေတာလို့ မင်းတို့ထင်ရင်ထင်လိမ့်မယ်.. ငါ အတွေးလွန်တာမဟုတ်တာကို ငါ့ကိုယ်ငါသိတယ်.. အဲ့မိန်းမကလေ.. သူလုပ်သမျှ သူ့ဆုံးဖြတ်ချက်နဲ့သူ လုပ်တယ်ထင်လို့လား.. သူကိုယ်တိုင် ရွေးချယ်လျှောက်တယ်လို့ ထင်နေလား.. မင်းတို့ မသိပါဘူး.. ငါပဲ သိနေတာ.. "
အရာအားလုံး ပိုသိနေတတ်တာက တစ်ခါတလေကျ မကောင်းတတ်ဘူး.. ။
ရတီနဲ့ ပတ်သက်ရင် အားလုံးငါပဲသိနေတော့ ငါပဲပင်ပန်းနေရတာ.. ။
" ရတီ ဆရာကိုကြိုက်နေသေးတယ်လို့ ထင်လို့လား.. "
" သားငယ်.. မင်းစိတ်ကိုယ်မင်း အပင်ပန်းခံမနေနဲ့.. အချိန်တစ်ခုလည်း ကြာနေပြီ.. ရတီ့မှာလည်း မင်းရှိနေသလို ဆရာ့ဘေးမှာလည်း သူ့ဇနီးရှိနေပြီ.. "
" ဒီမှာ ငါ... "
ပြောမယ့်စကားတွေ ရပ်ကျသွားရတာက.. ရတီက သူ့ဘေးကတစ်ယောက်နဲ့ ခေါင်းချင်းဆိုင်နေကြတာက.. သူ့ခေါင်းငါ့ခေါင်း နီးနေပြီ.. ။
ဘာစကားတွေပြောနေလို့ အဲ့လောက်နီးကပ်ဖို့လိုတာလဲ.. ။
မင်းမှာ ငါရှိနေသေးတာ မင်းမေ့နေရော့လား ရတီ..။
" တောက်.. "
" ဟမ်.. ဘာဖြစ်တာလဲ "
ပြောပြောဆိုဆိုနဲ့ တောက်တစ်ချက်ထခေါက်တော့ ကြောင်သွားရတာကဘေးကနှစ်ယောက်..။
" ဟျောင့်.. သားငယ်.. သားငယ်.. ဘယ်သွားမှာလဲ.."
" ပိုက်ဆံ ရှင်းလိုက်ဦး ဆန်းထွန်း.. ငါ လိုက်သွားမယ်.. "
ချက်ချင်း ဒေါသမကင်းတဲ့ပုံစံနဲ့ ထွက်သွားလို့ ကိုယ်တို့ပါလိုက်ဖို့ပြင်ရသည်.. ။
ဆန်းထွန်း ပိုက်ဆံထုတ်ရေနေရင်း သားငယ်တို့ကိုလှမ်းလှမ်းကြည့်နေရတယ်.. ။
သားငယ်ကတော့ ရတီတို့ထိုင်နေတဲ့ဝိုင်းဆီ တန်းတန်းသွားနေတာ.. ။
ဒီကောင်သားငယ် ဘာလုပ်မို့လဲမသိ.. ။
တောက်ခေါက်ပြီး ထသွားတာမို့ ကောင်းသောအရာတော့ဖြစ်မယ်မထင်.. ။
" ဂု.. ဟွတ်.. "
ရတီ စာရှင်းပြရင်း ရေဆာလို့ရေသောက်နေတာ နောက်ကနေ တွန်းခံရသလို ဖြစ်သွားတာမို့ရေတောင်သီးသွားရတယ်.. ။
ကိုယ့်ကိုယ်ကိုယ် ထိန်းနေတဲ့အချိန်..
" ဟာ.. ရတီ ရလား.. ဟေ့ တစ်ယောက်.. ဘယ်လိုလျှောက်နေတာလဲ.. ဒီမှာရေသီးတော့မလို့ဗျ.."
ပါးစပ်က လှမ်းဟောက်သေးတဲ့အပြင် ရတီ့ကိုတစ်သျှူးလေးနဲ့.. ပါးစပ်လေးလှမ်းသုတ်ပေးရတာနဲ့.. လည်ပင်းသုတ်ပေးရတာနဲ့.. ။
မျက်လုံးထဲ တစ်ကွက်မှအမြင်ကြည်စရာမရှိ..။
" ဖယ်.. "
အဲ့လက်တွေကို ခပ်ဆတ်ဆတ် ပုတ်ထုတ်ပစ်လိုက်သည်.. ။
" ဟ.. မင်း ရိုင်းလှချည်လား.. "
" ရိုင်းတော့ မင်းကဘာဖြစ်ချင်လဲ.. "
တစ်ဖက်က ဒေါသထွက်တဲ့ဆိုဒ်နဲ့ ထရပ်လာပြီး လူကိုအော်တာနဲ့.. ကိုယ်ကလည်း ပြန်ရင်ဆိုင်ပစ်လိုက်သည်.. ။
" ဟေ့.. ဟေ့.. သားငယ်.. သားငယ်.. "
အောင်ပိုင်စိုး ကြားထဲဝင်တားရသည်.. ။
သားငယ် လို့ခေါ်သံကြားမှ ခေါင်းမော့ကြည့်မိတယ်.. ။
တကယ်ကို သားငယ်ပါလား.. ။
ဒါဆို စောနက အနောက်ကနေ ခုံကိုတိုက်ပစ်တာက သားငယ်လား.. ။
" ဖယ်စမ်းပါ.. "
" သားငယ်.. သားငယ်.. စိတ်လျှော့စမ်းပါ.. "
သားငယ်က ရှေ့ကိုတကဲကဲနဲ့ တိုးနေလို့ ကြားထဲခြေရောလက်ပါကားပြီး ကန့်လန့်ဝင်ရပ်နေရတာကအောင်ပိုင်စိုး.. ။
" ဟ.. ဗလိုင်းကြီးပါလား.. လူကိုလည်းဝင်တိုက်သေးတယ်.. ရန်လည်းထောင်နေပါလား.. "
" မင်းကရော.. မင်းနဲ့ဘာဆိုင်လို့ နာနေတာလဲ.."
" သားငယ်.. အေးဆေးပြော.. ရတီ.. လုပ်ပါဦး..ကူပြောဦးလေ.. "
ရတီ မတ်တပ်ထရပ်လာတော့ သားငယ်ရဲ့အကြည့်စူးစူးက ရတီဆီရောက်လာသည်.. ။
" အသက်နဲ့အဝေးကြီးပဲ တွေ့ပါလား.. အကြည့်တွေက စိမ်းသက်နေတာ.. လူတောင်သတ်မလားမသိဘူး.. "
ကြည့်.. လူကို မဲ့ရွဲ့ပြီးပြောနေပုံက ။
သူကလည်း အမှားလုပ်သေးတယ်.. လူကိုလည်း ပြန်ခနဲ့သေးတာ.. ။
" သားငယ်.. အေးဆေးပြောလို့.. သူများတွေကြည့်နေတယ်.. "
" ငါနဲ့ဆို ဘယ်တော့မှအဲ့မျက်လုံးတွေက အသက်မဝင်နေဘူးနော်.. အဟက်.. "
ရင်နာနာနဲ့ ပြောမိလိုက်တဲ့ စကားတစ်ခွန်းပါရတီ..။
လှိုက်ခနဲ တက်လာတဲ့ ရင်ထဲက စကားတစ်ခွန်းက မျက်ရည်တော့အတူ ခေါ်လာတတ်သား.. ။
နင့်ရှေ့ ငါမျက်ရည်မကျချင်ဘူး.. ။
ဒါကြောင့် ငါလှည့်ထွက်လာပေးခဲ့ပါတယ် ရတီ..။
" ဟ.. ဘာလဲ သူက.. "
" ဆောရီး bro.. သားငယ်က သူ့ဇနီးကို သဝန်တိုမိသွားလို့ပါ.. "
" ခင်ဗျာ.. "
" သူငယ်ချင်း ကိုယ်စား တောင်းပန်ပါတယ်.. ရတီ.. နင်ရောအဆင်ပြေလား.. "
" နင်တို့ သူငယ်ချင်း ခုတလော လူစိတ်မဝင်ဘဲ ဘာစိတ်ဖောက်နေလဲမသိဘူး.. ကြည့်ပြီး ထိန်းကူကြဦး.. "
တကယ် ပြောတာ.. ။
တစ်ချိန်လုံး လူကိုရန်လိုနေတော့တာ.. ။
" အဟက်.. "
" ဘာရယ်တာလဲ.. နင်တို့က.. "
" သားငယ်က သဝန်တိုတာပါဟာ.. "
" ငါတော့ မထင်ပါဘူး.. "
" ဒါက နင်တို့ကြားညှိယူကြရမှာမို့ ကြားဝင် မပြောတော့ဘူး.. ခုတော့ကောက်စိန်နောက် လိုက်သွားဦးမယ်.. "
" လိုက်သွား.. "
နှစ်ယောက်သား သူတို့သားငယ်ကျ ချစ်တတ်လိုက်တာ.. ။
သားငယ် ဘာလုပ်လုပ်အပြစ်မမြင်ကြဘူး.. ။
" ရတီ.. စောနက တစ်ယောက်က ရတီ့ခင်ပွန်းလား.. "
" အင်း.. ဟုတ်တယ်.. ဆောရီးနော်.. စောနက သူအပြောဆိုမတတ်တာတွေအတွက်.. "
" ဟာ.. မဟုတ်တာ.. ယောကျ်ားမှန်း မသိလို့လေ.. အိမ်ပြန်ရောက်ရင် ရန်ဖြစ်ကြတော့မယ်ထင်တယ်.. "
" မဖြစ်ပါဘူး.. စိတ်မပူပါနဲ့.. "
စကားတော့ မများကြပါဘူး.. ။
အချင်းချင်း စကားမပြောကြတာလေးပဲရှိတာ..။
အစကမှ အရင်နေ့ကတည်းက နှစ်ယောက်ကြားအဘုထစ်တွေရှိရတဲ့အထဲ.. ခုကျ တစ်ခုပိုလာတာပေါ့.. ။
.
နှစ်ယောက် စကားမပြောဘဲ နေမလို့ပေမယ့်.. မနက်ဖြန်မနက်ကျ သားငယ် တောရွာဘက် ကွင်းဆင်းသွားရမယ်တဲ့.. ။
သူ ကွင်းဆင်းလိုက်ရမယ့်အကြောင်း မမပြောမှသိရတယ်.. ။
တကယ်ဆို သူပြောသင့်တယ်မဟုတ်ဘူးလား..။
ဘယ်လောက်ပဲ လူကိုစကားမပြောချင်ဦးတော့.. အကျိုးကြောင်းတော့ သူပြောသင့်တယ်မဟုတ်ဘူးလား.. ။
စိတ်ဆိုးချင်လည်း ကောင်းကောင်းစိတ်ဆိုးလို့ကမရ.. ဒါကိုပဲ ဒေါသပိုထွက်ရတယ်.. ။
အမြင်ကတ်လို့ စကားစမပြောချင်ပေမယ့် ပြောရဦးမယ်.. ။
" သားငယ်.. မနက်ဖြန် ကွင်းဆင်းရမှာဆို.. "
ရေချိုးပြီး ထွက်လာတဲ့သားငယ်ကို ထုတ်မေးတော့.. အကြည့်က ကိုယ့်ဘက်ရောက်လာပေမယ့်မကြာ.. ။
" အင်း.. "
" ငါ့ကို စောစောမပြောဘူး.. "
" ပြောတော့ ဘာထူးမှာလဲ.. လိုက်လို့ ရတာလည်းမဟုတ်ဘဲနဲ့.. "
" လိုက်လို့မရပေမယ့် နင့်အတွက် ပြင်ပေးစရာရှိရင် ငါပြင်ပေးလို့ရတာပေါ့.. "
ကိုယ့်စကားကို မယုံသလို မျက်ခုံးပင့်ကြည့်လိုက်သေးတဲ့ သူ့ကို.. ပြေးပဲရိုက်ချင်မိတယ်.. ။
" ဘယ်နှရက် သွားရမှာလဲ.. "
" နှစ်ညအိပ် သုံးရက်ခရီး.. "
" ပစ္စည်းတွေ ထည့်ပြီးပြီလား.. "
" ခဏနေ ထည့်မလို့.. "
ရတီပဲ ဗီဒိုဆီသွားလိုက်တယ်.. ။
" သုံးစုံ ဆိုအဆင်ပြေတယ်မလား.. "
" အင်း.. "
" ညအိပ် ရော ထည့်သွားဦးမလား.. "
" တစ်စုံလောက် ထည့်ပေးလိုက်လေ.. "
သားငယ် ကုတင်မှာပဲ ထိုင်ချလိုက်ပြီး ရတီလုပ်သမျှကိုလိုက်ကြည့်နေလိုက်သည်.. ။
ရတီကတော့ သားငယ်ပစ္စည်းတွေစုထည့်မယ့် အနေတော်အိတ်တစ်လုံးလောက် ရှာကြည့်နေမိတယ်.. ။
" ဒီအိတ်ဆို အနေတော်ပဲနေမှာ.. "
အိတ်အကျယ်အနက်ကို ကြည့်ရင်း တစ်ယောက်ထဲ ပြောကာ.. အိတ်ထဲ အဝတ်စားစီထည့်ပေးမိတယ်.. ။
" ရေချိုးပုဆိုး တစ်ထည်လောက်တော့ ထည့်သွားနော်.. "
သူ့ကို ပြောပေမယ့် ကိုယ်ပဲ ပုဆိုးတစ်ထည်ထယူပြီး အိတ်ထဲထည့်လိုက်သည်.. ။
" ဪ.. တဘက်.. လိုသေးတယ်.. "
တဘက်အသစ်တစ်ထည် ပြေးယူလာရင်း..
" မနက်ကျ မျက်နှာသစ်ဆေးတွေ ဆပ်ပြာတွေထည့်သွားနော်.. မဟုတ်သေးဘူး.. မနက်ကျ နင်မေ့သွားဦးမယ်.. ငါပဲ အိတ်လေးတွေထဲအစုံထည့်ပေးလိုက်မယ်.. "
" သဘောလေ.. "
သူ ကိုယ့်အတွက် စီစဥ်ပေးနေတာကိုပဲ သဘောကျကျနဲ့လိုက်ကြည့်နေတာ.. ။
စိတ်ဆိုးချင်နေတဲ့စိတ်တွေတောင် ခုတော့အရည်ပျော်ကျသွားသလိုပဲ.. ။
" .............. "
ရတီက အိတ်ငယ်လေးတွေနဲ့ အစီရီထည့်လာပေးပြီး ဆော့ပင်နဲ့အိတ်အပေါ်မှာစာရေးနေတာ..။
" ဒီမှာနော်.. ဒီအိတ်ပေါ်မှာ စာတွေရေးပေးထားတယ်.. နင်သုံးရင်မှားစရာမလိုတော့ဘူး.. မသုံးခင် စာအရင်ဖတ်.. "
" အင်း.. "
" နင်တို့ဋ္ဌာနက ခုကတည်းက ကွင်းဆင်းလိုက်ရတယ်လား.. "
" တကယ်ဆို မလိုက်ရဘူး.. အတွေ့ကြုံလည်းရအောင်.. မနက်ဖြန်လိုက်နိုင်တဲ့သူတွေက နည်းနေတော့ ငါတို့ပါအားဖြည့်တဲ့အနေနဲ့ လိုက်ရတာ.."
" ရောက်ရင် ဖုန်းဆက်ဦး.. "
ဖုန်းဆက်ဖို့လေး ပြောတာကို လူကိုပေါက်ထွက်မတတ် စိုက်ကြည့်နေတာ.. ။
" မဆက်ချင်လည်း မဆက်နဲ့.. ရတယ် "
" မဟုတ်ပါဘူး.. ရောက်ရင် ငါဆက်လိုက်မယ်.."
" ပြီးရော.. "
ပြီးသွားပါပြီ.. ။
နှစ်ယောက်ကြား ဘာမှပြောစရာမရှိတော့ဘူး..။
ပြန်ပြီး ခပ်တန်းတန်းပြန်ဖြစ်ကာ.. ကုတင်မှာပဲ ကျောပေးပြီး အိပ်ရာဝင်ခဲ့လိုက်သည်.. ။
မနက်ကျမှပဲ သားငယ်ကို ပစ္စည်းတွေနဲ့လိုက်ပို့တော့.. သူက သူကားပေါ်မတက်ခင် နောက်ပြန်လှည့်လာပြီး ကိုယ့်နဖူးကို ဖွဖွလေး အနမ်းပေးသွားသေးသည်.. ။
ကောင်စုတ်လေး.. တတ်တယ် ဒါကျ.. ။
🌼pann
___________________________
pann စာပြန်မစစ်မိလို့ အမှားပါရင် နားလည်မှုနဲ့ ပြင်ဖတ်ပေးပါနော်.. ။
အရေးသားတွေ လစ်ဟနေပြီး.. စာဖတ်ရတာ အရသာမရှိခဲ့ရင် pann အားနာရပြီး တောင်းပန်ပါတယ်ရှင့်.. ။
pann ကြောင့်မျက်စိနောက်စေမိရင် ခွင့်လွှတ်ပါ..။
ဖတ်ရတာ ပျင်းစေမိရင် တောင်းပန်ပါတယ်နော်..။
အားလုံး ဘေးအန္တရာယ်ကနေ ကင်းဝေးကြပါစေရှင့်.. ။
အချိန်ပေးပြီး ဖတ်ပေးကြတဲ့ တစ်ဦးတစ်ယောက်ချင်းစီတိုင်းကို pann ကျေးဇူးအထူးတင်ပါတယ်ရှင့်.. ။
pann ပိုကြိုးစားပါ့မယ်နော်.. ။