#الخَـازوق الأسـود
ذكرى.
لا تنسون التصويت والتعليق بين الفقرات 🤎.
استمتعوا....
____________________
____________
هَرم
بلعت ريگي وانداريت على كيف وشفتهة گاعدة على جربايتي وتباوع علية بهدوء وبنظرات جامدة.
ركزت بملامحهة واحس النفس بگوات داجرة، جان وجهة ابيض بشكل يخوف وعيونهة جانت باهتة وهي ميلة راسة وتباوع علية بدون أي حراك، وحتى مجانت تتنفس !
جنت واگفة واباوع عليهة خايفة اتحرك من مكاني، حسيت اطرافي جمدن بمكانهن بحيث لا گدرت اعيط ولا اتحرك !!!
گامت من مكانهة وتقربت مني شوية شوية لحد ما وصلت گدامي وصارت قريبة علية كلش، ميلت راسهة وفتحت حلگهة تريد تحجي بس جان لسانهة مقطوع.
مادري منين فجئة اجتني القوة، اخذت نفس بخوف وصيحت بصوت عالي وهي راساً حطت أيدهة على حلگي وانا دفعتهة حيل عني..
هاي مو راحيل مستحيل !!!!!
فتحت الباب وأول ما طلعت صار جرح بوجهي طالع من غرفتة ومبين عليه گعد من ورة صياحي وهو بس شافني هيج خايفة اجة ودخل للغرفة وانا گعدت بالگاع ارجف.
طلع وباوع علية مستغرب: شكو هَرم ليش تعيطين !!!
اشرتلة على الغرفة واحس لساني انعقد ماگد احجي وهو فتح الباب واشرلي.
-ماكو أحد !!
نفيت براسي وبگوات طلع من الحجي.
-را..راحيل...جرح راحـ..راحيل بالغرفة !!
عقد حاجبة مستغرب من حجي ورجع فتح باب الغرفة يباوع، اجة يمي وكمش أيدي وگومني من مكاني وكل.
-حلمانة اكيد !
نفست براسي وكلت وانا ارجف.
-لا جرح والله جوة شفتهة بعيني !!
حضني ومسح على راسي يحاول يهدئني بس انا جنت ارجف بخوف من المنظر المرعب الي شفتة بعيني.
حتى حسيت بأيدهة علية، جانت گدامي !!!
سمعنة صوت أبوية يصيح بأسم جرح، ابتعد عني وكل.
-وهاي گعدتي أبوج، خلي انزل أطمنة.
راد يروح بس انا راساً كمشت أيدة وچلبت بيه.
-لا تعوفني وحدي، والله اموت جرح عليك الله لا تعوفني !!!
جرح: ولج هَرم دتتخيلين انتِ شبيج هلگد خايفة ؟؟؟
نفيت براسي ودموعي تنزل وهو من رجفتي عرف شگد خايفة، كمش أيدي ونزلنة ثنينة جوة ومقبل ادخل يم أبوية كل هسة تقلقينة عليج.
طمنة علية وطلع من الغرفة وسد الباب وراه وكل بصوت ناصي.
-يلا روحي لغرفتج نامي !
همست: مستحيل مادخل لغرفتي جرح، شفتهة بعيني والله گعدتني من النوم وبعدين اجتي يمي..
قاطعني من شاف توتري وخوفي وانا احجي.
-تمام تعالي نامي بغرفتي.
هَرم: خلي اصلي بالاول.
عقد حاجبة مستغرب وكل: صلاه شنو ؟
هَرم: الفجر !!
جرح: يا فجر يمعودة ترة الساعة بـ 2 بعد للأذان ساعتين واكثر !
فتحت عيني واخذتني صفنة عليه وهو بقة واگف يرمش مستغرب مني.
مسحت وجهي وكلت.
-مستحيل جرح سمعت الأذان بأذني بغرفتي من گعدتني راحيل !!!!
جرح: راحيل ماتت شنو گعدتج !! وصلاه الفجر بعدلهة فوگ الساعتين وهاي الساعة گدامج شوفيهة !! علمود من اكلج تتخيلين تصدگين !!!
باوعت على الساعة وكلامة جان صدگ، بس مستحيل كلشي انا شفت بعيني وسمعت بأذني !! صعدنة فوگ ورحت وراه لغرفتة وكلت.
-عليك الله بس اليوم ماگدر انام وحدي !!
جرح: هسة انا شكايل ؟ روحي نامي على الجرباية انا افرش بالگاع.
نفيت براسي: لا انا انام بالگاع بس تعال وياية اجيب فراش.
رفع حاجبة وانا عبست والدموع بعدهة بعيني والرجفة بية وهو تفهم خوفي راح بنفسة جاب فراش وبطانية بس مقبل انا انام عليه.
تمددت على الجرباية مثل ما كلي وهو راح لفراشة وتمدد وتغطى بالكامل، هو هيج من ينام يغطي حتى وجهة.
بقيت اتگلب على الجرباية وانا ارجف من الخوف والي صار بية ينعاد بالي لحد ما مگدرت ابقى على الجرباية، گمت من مكاني ورحت يم جرح وهزيتة على كيف وهو راساً باوع علية.
نزلت دموعي مگدر اسيطر عليهة وكلت.
-جرح خايفة !!
فتح البطانية وكل: تعاي نامي يمي لعد تعاي..
تمددت على أيدة وهو غطاني وگام يمسح على راسي ويكول.
-كافي ترجفين انا يمج ومراح اعوفج.
ابتسم واخذ نفس وباوع بعيد وكل.
-تردين اسولفلج علمود تگدرين تنامين ؟
هَرم: شنو تسولفلي ؟
جرح: من جنة صغار..
هزيت راسي: اي عليك الله سولف..
هز راسة ورجع باوع علية وبدة يسولفلي...
.
.
.
جنت داتمشى بالفرع وشايل بيدي علاگة مال جباسة وحلويات وشايل الجنطة على جتفي.
انداريت على صوت مُعقب وراية.
-جرح اوگف شوية ليش تركض هيج !!
جرح: وعدت البنات اشتريلهن وهسة اكيد منتظراتني.
ركض واجة وگف يمي وكل.
-اشتريت لهَرم هم ؟
باوعت عليه وانا عاقد حاجبي وهو يباوع برود ويعلج.
ضربتة على صدرة حيل وصحت.
-هاي الميانة اكسر راسك اذا تاخذهة !
رفع حاجبة ببرود وانا كملت
-لك شو هواي مصدگ نفسك انتَ !! راسك اكسرة ترة !!
مُعقب: أبوك وراح اكولة كافي لواگة وعود ماخذ وضع الأخ الغيور !
دخلنة للفرع مالنة وشفنة برهان من بعيد ديتمشى هو هم للبيت ولابس جنطتة على الجتفين وملابسة مرتبة ونظيفة.
باوعنة انا ومُعقب على بعض، ثنينة بناطيرنة مطينة من فوگ ليجوة عبالك راجعين من مجزرة والقميص مفتوح ولابسين جواه تيشرتات ملونة والجنطة على جتف واحد والوصخ جان كاتلنة.
ضحكنة ثنينة وبرهان على صوتنة اندار وباوع علينة جان من بعيد يلمع لمع.
وگف بمكانة وبس وصلنة يمة ضربتة على الجنطة.
-ها ز***.
برهان: شتريد مني ؟
وگفنة يم باب بيتنة وردنة نسحب الباب بس جانت الحديدة نازلة.
باوعت على برهان وكلت.
-يلا اطفر.
فتح عينة وكل: لا والله !!!، انتَ لو مُعقب واحد منكم خلي يطفر لان اساساً الوصخ كاتلكم !
باوعنة انا ومُعقب على بعض وهزينة راسنة، وانا راساً سحبت الجنطة من جتفة ومُعقب شالة وذباه من فوگ الباب وهو يعيط.
شمرت الجنطة هم من فوگ وضحكت.
-يلا ابو الوصخ افتح الباب !!
فتحلنة الباب وهو معبس والدمعة بعينة، دفعناه ودخلنة جوة وجان باب المطبخ مفتوح.
دخلت انا جوة وجان البيت فارغ كالعادة أمي طالعة وعايفة البيت، ذبيت جنطتي وصحت.
-هَرم وينج ؟؟؟
اجاني صوتهة من فوگ: هاا جرح دابدل اوگف.
صعدت فوگ لغرفتي وذبيت الجنطة بالگاع وسمعت صوت رجلينات صغيرة وراية.
انداريت وجانت راحيل رفعت أيدهة الي وشلتهة بستهة من خدهة ورحت طلعتلهة من العلاگة جبس وانطيتهيا وهي ابتسمت فرحانة.
حطيتهة بالگاع واجتي هَرم ركض لابسة البلوز مالتهة بالمگلوب.
حطيت راحيل بالگاع ونزعتهة البلوز ولبستة الهة عدل وكلت.
-بلا راحيل طفلة متعرف، انتِ بعد كبرتي ولحد الان متعرفين تلبسينة عدل !!!
هَرم: جبتلي حلويات ؟؟
جرح: بالبداية كوليلي وين أمج ؟
هَرم: ماعرف أول ما فتت للبيت جان الباب مفتوح !!
هزيت راسي وانطيتهة حلوياتهة وثنينهن نزلن جوة وانا غسلت وبدلت ونزلت جوة جوعان بس ملگيت شي، رحت للصالة وجانن هَرم وراحيل يتعاركن على جبس.
رحت اخذتة من هَرم وانطيتة لراحيل وكلت.
-هسة شبيج وياهة هَرم مالتهة هذا !!
هَرم: مالتييييي انااا !!
باوعت على أيد راحيل وجان صدگ مال هَرم، ضحكت ورحت شلت هَرم وهي الدمعة بعينهة.
-ميخالف باجر اشتريلج ثنين، وعد مني الج.
هَرم: ماريد منك شي، انتَ تحب بس راحيل.
جرح: انا احبج بس انتِ راحيل منو ؟
بقيت گاعد يمهن وعيني عليهن ومُعقب وبرهان هم أجوي ثنينهم واحنة ميتين جوع منتظرين أمي ترجع بس تسويلنة شي ناكلة !
على هذا الوضع لحد ساعة 3 الظهر رجعت أمي وبالبداية حجت علينة لان موصخين البيت وراحت سوتلنة باذنجان بالدهن واحنة سويناهن لفات واكلناهة، جنة جوعانين كلش يعني لو مسويتلنة نعال هم جان حطيناه بصمونة واكلناه.
ورجع أبوية من الشغل وهو يعرف بأمي لهذا ياكلة لفة من برة ويريح راسة من المشاكل.
بالليل جنت گاعد يم الولد بالحديقة وعود دنقرة بس بالحقيقة برهان الوحيد الي جان حاط كتبة وديكتب، وانا ومُعقب متمددين ودنسولف.
انفتح باب البرة ودخل أبوية وبس شافنة صاح.
-گومووو يلا عندي شغل بيكم.
همس مُعقب: اهووو لو گاعدين وقارين احسللنة.
گمنة ثلاثتنة ورحنة يم أبوية وهو كل.
-وراية يلا..
مُعقب: وين ماخذنة عمي ؟؟
شيث: معليك.
طلعنة وراه وهو صعد بسيارتة وبدة يسوق بينة واحنة صافنين منعرف وين ماخذنة وبس وصلنة للمقبرة عرفنة شنو يريد منة.
طبگ يم المغيسل وكل: يلا نزلو، برهان انتَ اوگف براس الفرع كلت لأهل الميت موگف زعطوط على الشارع وأنتو ثنينكم وياية..
نزلنة انا ومُعقب وبگوات حابسين الضحكة ودخلنة وية أبوية جوة للمغيسل.
واحنة جوة دخل علينة برهان يرجف، باوع عليه أبوية وكل.
-ها راح تسويهة على روحك ؟
برهان: عمي محد اجة خلي نرجع !
شيث: انجب لك صير زلمة، ترة رجعتك هناااا تكمل دراستك وتاكل خـ** وتنجب وتشتغل وياي.
طلع برهان ومُعقب كل.
-عمي بعدة صغير اكيد يخاف، اروح انا بدالة ؟
شيث: لا انتَ راح توگف يم أبو مهدي تغسلون الميت وجرح يجي وياية.
باوعنة انا ومُعقب على بعض وأبوية مينطي مجال للواحد سحبني من بلوزتي وراه وتمشة بية وهو شايل على جتفة كرك ويدور بعينة لحد ما وصلنة لمساحة فارغة.
وبدينة ثنينة نحفر وانا متعود عليه دائماً يجيبني وياه بس اگوم ارجف من يجيبني بالليل لان المقبرة صدگ تخوف بهاي الاوقات وخصوصاُ من ماكو أحد بس احنة...
بقينة گاعدين بمكانة انا وأبوية وهو جان صافن ويباوع على الحفرة كل.
-دتشوف هاي الحفرة أبني ؟
هزيت راسي وهو كمل: اذبك بيهة واذب عليك تراب وادفنك اذا فد يوم عفت أيد أخوانك مُعقب وبرهان.
باوعت عليه بدون كلام وهو هز راسة وكل.
-عبالك اشاقة ؟
جرح: لا بوية اعرفك تسويهة، بس انا اسمعلك اريدك تكمل !!
شيث: اي داكلك انا، شو تأخرو !!
جرح: شلون اندليت مكان القبر بدون ما واحد منهم يجي وياك ؟ وليش حافرة بسرعة وهمة مموجودين بعدهم !!
باوع علية.
-انتَ ذكي وتعرف تسأل، الميت هذا خابروني وكلولي ماعندة أحد لا أهل ولا عمام ولا خوال ولا أخوان، مات گدام بيتة لهذا انا تكفلت بيه وبجنارتة كاملة، وهذا الگاع هو گاعنة احنة وراح يندفن بيه.
جرح: يعني اذا انا متت تدفني هنا ؟
شيث: انتَ موت ومعليك بالباقي !
ضحكت وهو ضربني على ظهري وهو هم جان يضحك.
-اشاقة وياك بابا، انتَ اذا تموت اموتن وراك.
جرح: اووح هاي هلگد تحبني ؟
شيث: لا بس علمود العالم متحجي.
ضحكنة ثنينة وشفناهم من بعيد اجوي الولد وشايلين التابوت.
كملنة كل اجراءات الدفن وبقينة يم القبر، وبرهان هذا مچلب بأبوية، كلش يخاف من سالفة القبور.
باوع أبوية عليهم ثنينهم وكل: شايفين هاي الحفرة الصغيرة ؟
هزو راسهم ثنينهم وانا گمت اضحك، وأبوية أشر عليهة وكل.
-ادفنكم بيهة وأنتو عايشين اذا فد يوم عفتو أيد أخوكم.
باوعو ثنينهم وهمة فاتحين عيونهم على أبوية وهو هز راسة.
-اي مدا اشاقة وياكم، فهمتو لو لا ؟؟؟؟
مردو عليه وهو صاح: داحجي !!!!
برهان: اي عمي اي تدلل..
شلنة الاغراض وية أبوية وتمشينة وياه نريد نطلع من المقبرة وهو ماشي قبلنة.
بس توقفنة واندارينة راساً على صياح برهان الي وگع بحفرة.
رحنة يمة ثلاثتنة وجانت حفرة عميقة يعني عبالك محفورة لجنازة بس عايفيهة.
باوعنة انا ومُعقب عليه وضحكنة متحملنة وهو يرجف من الخوف جوة.
منحس الا بدفعة قوية وگعدتنة انا ومُعقب هم جوة على برهان، رفعت راسي وشفت أبوية گعد يم الحفرة وكل.
-هذا الي جنت اقصدة من كلتلكم لا تعوفون أيد أخوكم.
مُعقب: صدگ تحجي عمي !!
ردت اسند نفسي واطلع من الحفرة بس أبوية دفرني برجلة ووگعني مرة ثانية جوة ووگعت على مُعقب لان اساساً الحفرة صغيرة.
مد أيدة وطلع برهان ومُعقب هم مد أيدة بس أبوية رفع حاجبة وكل.
-هواي مصدگ نفسك انتَ !!
اخذ الكرك وصار يشمر علينة التراب وانا ضميت وجهي راساً اخاف يوگع بعيوني واسمع أبوية يكول.
-أخوكم جان واگع بشدة وأنتو واگفين تضحكون عليه مو ؟ انا كلتلكم ادفنكم وأنتو عايشين وانا الدفان شيث كلمتي مترجع.
وانا ومُعقب نصيح جوة وهو شوية يلا بعد وقف وطلعنة ثنينة واحنة الدمعة بعينة، نكتنة ملابسنة وبرهان وگف ورة أبوية راساً ومُعقب هز راسة بدون كلام.
شيث: وهذا درس تعلمتوه، يلا گدامي ثلاثتكم.
مشينة ثنينة انا ومُعقب ليگدام منزلين راسنة وهو ورانة يمشي وحاط أيدة على جتف برهان ونسمعة يكول.
-بس انتَ الزلمة بيهم، هم شاطر بالدراسة وهم شاطر بالشغل انتَ راح تصيرلي سند.
برهان: اي عمي انا من اكبر راح اعينك واصيرلك حزام تشد بيه ظهرك وماخليك حتى تاكل بأيدك انا أوكلك.
ضحك أبوية: هاي الزلم الزينة، مو هذول..
باوعت على مُعقب رافع حاجبة معاجبة وانا بگوات حابس ضحكتي..
.
.
.
ضحكت بنهاية كلامة وهو كمل.
-اي والله أبوية جان كل يوم يكمش واحد بينة ويكولة انتَ سندي البقية بنعال أبدلهم.
هَرم: بس تريد الصدگ ؟ برهان احسن واحد بيكم.
جرح: برهان هذا تاج على روسنة كلنة، صدگ جان گد كلامة من كل حتى اللگمة انا احطهة بحلگك.
هَرم: زين سولفلي بعد..
باوع علية ورفع حاجبة: ولج نامي بعد الصبح لازم اطلع عندي شغل !
باوعت عليه وانرسمت ابتسامة على وجهي: يعني راح ترجعون للشغل ؟
نفة براسة: لا شغل ثاني عندي، يلا هَرم حبيبتي نامي بعد، شوفي حتى بعد گمتي مترجفين.
هَرم: اي غير اندمجت وياك والله سوالفكم حلوة من جنتو صغار.
جرح: وعد اسولفلج بعد هسة نامي يلا.
هزيت راسي وهو تمدد على ظهرة وباوع على السگف وضل صافن عليه وساد حلگة، هاي النظرات أبد ممتعودة عليهة بجرح.
لان دائماً هو روحة مرحة والابتسامة مالية وجهة وبشوش، بس هسة حتى نظراتة اختلفت، واللمعة الي بعينة اختفت ووجهة بهت كلش، وهذا يدل على شگد هو تعبان بموت راحيل.
جرح هواي متعلق بيهة ويحبهة، ودائماً جان يفضلهة على الكل، بحيث الشغلة ياخذهة من أيدي وينطيه الهة وهو الي علمهة الاشارات، بحيث شغلة شغلة جان يأشرلهة عليه ويعلمهة حركة معينة وهي هلگد ما كررتهن علينة حفظناهن احنة هم ولحد ما عرفنة شلون نحجي وياهة...
اخذت نفس وغمضت عيني، من جان يسولفلي نسيت الي صار هلگد ما جنت مندمجة...
إرَم
بمرور الايام لاحظت على نوح حركات أول مرة اشوفهة !
ومو بس بالبيت حتى بالجامعة انتبه عليه، وحتى صاير قلق ومتوتر اربع وعشرين ساعة وعبالك خايف من شي..
وهاي غير عن السوالف الي نسمعهة منة كل يوم جايب سالفة ويحلف بالائمة كلهم ويكول شفتهم بعيوني وأبوية يكولة انتَ مو جاهل دتتخيل بس هو مصر على حجية، وانا بعد الليل منمتة من سوالفة هاي.
ابسط مثال احنة ورايحين للجامعة كلي واحد جر البطانية مني وية صلاه الفجر وانا ارجف من يحجي هيج والليل كلة مانامة من وراه ومن ورة سوالفة الي يجيبهة مادري منين.
ومن اروح اكول لأبوية خايفة يكولي أخوج صاير زعطوط وهيج يسوي علمود يخوفج، بس نوح مستحيل يشاقة بهيج موضوع وحتى من يحجي ملامحة تبين حجية صدگ !
خلصت ترتيب المطبخ ورحت گعدت بالصالة يم أمي وأبوية، وأمي جانت تحاول تقنع أبوية تروح هسة تحاجيهم علمود يطلبون أيد خاتون وأبوية يكول بعد وقت وهي لا مصرة تكولة أبنك آخر مرحلة جامعة ومباقي شي ويتخرج والابنية شاطرة ياخذوهة من أيدنة.
باوع عليهة أبوية: وهاج اصلاً بعدة صغير نوح، عمرة 25 سنة بعد للزواج !
وهاج: رحمة الله والديك انتَ تزوجت وعمرك 20 سنة !!
مسح أبوية وجهة: هسة شبيج مستعجلة بس فهميني !
تجتفت أمي ورفعت خشمهة ضايجة: خلص لعد لا تزوجة ولا تخليني افرح بوحيدي.
باوع علية أبوية ورفع جتفة وهز راسة وانا حطيت أيدي على حلگي امنع ضحكتي.
وأمي ضلت گاعدة وأبوية يحاول يقنعهة نوح بعدة صغير وحتى زوجة خالي جديد خلصت الاربعينية وميصير بس أمي مصرة نخطبلة يعني نخطبلة هسة وبعدين عود يتفقون على العرس شوكت، لحد ما أبوية هز راسة.
-عمي شتسوين سوي روحي خطبيلة.
وهاج: هااا يعني طلعت أيدك منهة !!!
أدريس: والله لا ممطلع وكلشي علية انا بس كافي !!!
هزت أمي راسهة بأبتسامة وانا بعدني اضحك على السالفة، لحد الان متدري نوح عاجبتة جموح.
بقت أمي گاعدة وتكول لأبوية مخططاتة وهو بس يهز راسة ويباوع تلفزيون لحد ما اندمج وياهة وصار هو هم يخطط وياهة وشنو راح يسوون بالبيت ويا غرفة ينطوه وانا منتظرة الوقت الي يجي بيه نوح.
تقريباً ساعة وانفتح باب المطبخ ودخل نوح ريحة اللحم منة تكتل وملابسة صايرة دم، سلم على أهلي وراد يصعد فوگ بس أمي استوقفتة.
-اوگف نوح..
باوع عليهة: تعبان يـوم خلي اروح اسبح..
وهاج: يلا لعد روح بس بسرعة لان ضرورييييي.
هز راسة وصعد فوگ وبدل وانا رحت حطيتلة الأكل على النار بطلب من أمي.
صبيتلة على صينية ووديتة للصالة وهو شوية وأجة گعد ياكل وعيونة بگوات مفتحهن.
حول عيونة على أمي الي كلت: اي نوح قررنة نخطبلك !
نوح: ومنو سعيدة الحظ ؟؟
إرَم: غلطان خوية قصدك تعيسة الحظ !
خزرتني أمي: انجبي انتِ وصمي حلگج خلي نعرف نحجي !!
رجعت عينهة على نوح: اي أبني راح نخطبلك خاتون بت خالة الـ..
غص نوح باللگمة وگام يگح وانا متحملت گمت اضحك، باوع علية أبوية.
-انتِ شبيج من وقت گاعدة بس تضحكين !!!!
بگوات كمشت نفسي ماضحك اكثر وأمي كملت: اي أبني، خاتون بت خالة التوأم !!
نوح: يمة شبيج مستعجلة هيج !!
راد يحجي أبوية وشفت أمي گرصتة من خصرة وهو راساً عض شفتة ووجهة صار احمر.
-لا أبني ممستعجلين انتَ كبرت بعد !!
نوح: يـوم زورگتيه لأبوية دعوفين خاصرتة.
حمحمت أمي وعدلت گعدتهة ونوح كمل.
-وبعدين يمة انا ماريد بت خالتهم..
شهگت أمي: يمة باع الحجي وين تلگة احسن منهة !! وحتى ولد خوالهة زلم معدلة..
قاطعهة نوح: مو يـوم انا اريد جموح !!!
وهاج: جموح !
هز نوح راسة وأمي باوعت مستغربة: انتَ مو كلتلي من راحو من بيتنة خاتون !
نوح: لا يمة صار سوء فهم...
سولفلهة نوح وهي صافنة وهاي المرة أبوية يضحك وانا وياه ثنينة مگدرنة، وأمي تجتفت وعقدت حاجبهة.
-جموح خوش بنية بس انا اريد خاتون الك !
نوح: شگد عمرهة ؟
وهاج: ثنينهن ثالث متوسط يعني تطلع اعمارهن 15 سنة هيج شي !
أدريس: بس مو صغيرة !!
رفعت أمي حاجبهة: خلي نطلبهة والله كريم لبعدين، احنة هسة بس نريد نحط أيدنة على وحدة منهن..
تجتفت أمي ورفعت راسهة: والصراحة يعني انا ميعجبني بناتنة كلهن مينبلعن لا من جهتي ولا من جهة أدريس وهم ماريد وحدة وياه بالكلية لان الي تسولفلياه إرَم يشيب الراس، وهذن وگعن گدامي وماريد افوتهن لان خوش بنات !
نوح: خلص بعد براحتج يـوم انتِ الي تشوفينة مناسب سويه وانا اكلج حاضر، بس طلبيلي جموح الابنية من شفتهة وهمة طالعين دخلت بگلبي..
هزت أمي راسهة: هاهية لعد ناخذلك جموح دامك حاطهة بالك، وبعد السالفة عوفهة علية...
هز نوح راسة وگام من الأكل وصعد فوگ لغرفتة وأمي عدلت كعدتهة وكلت.
-باجر خميس يوم الجمعة تاخذنة انا وأمك يمهم نشوف الابنية ونفاتحهم بالموضوع شوية شوية...
أدريس: اي تدللون عمي شتردون انا حاضر.
نزلت أمي راسهة وهي مبتسمة وخجلانة وهو ضحك وهز راسة.
گمت من مكاني بسرعة وصعدت فوگ وراساً رحت لغرفة نوح وفتحت الباب وبدون مقدمات دخلت.
-اللعب راح يتزوج ويعقل وبعد ميباوع على بنات العالم..
نوح: انجبي لج !!
إرَم: يوم الجمعة نطلبهة عينيييي.
نوح: الله وياكم، بس انا اشوف الابنية صغيرة...
هزيت راسي: اي صحيح الابنية صغيرة بس حط بالك أبوية مراح يخليك تتزوج الا اذا كملت الكلية وصرت محامي ويصير عندك مكتبك الخاص يعني سالفتك مطولة.
نوح: وأمج مستعجلة تحسسني واحد راكض وراهة !
إرَم: حسب الي فهمتة منهة تكول هذول أهل الارياف بسرعة يتزوجن بناتهن وينطلبن.
ضحك بصوت عالي: هاي عود صدگ أمي هيج تفكر ! يمعودة مبين أخوانهن مو من النوع الي ينطونهن وهنة صغار، وراح يرفضوني انا هم متشوفين ليش كلت لأمج اي عادي روحي !
رفعت حاجبي: اهاااااا هسة فهمت ليش بسرعة كلت عادي روحي بدون نقاش !
هز راسة: هسة وصلتلج ؟ لعد شگد ثولة انتِ !
إرَم: زين واذا انطوك ؟
نوح: كتلج مينطون، واذاا صارت وانطو فهاي ورة اسابيع ينطون الموافقة بعد ما يدورون وراية ويشوفوني شنو اسوي ماسوي بحياتي، ترة التوأم مبين عليهم مو قليلين أبد.
صفنت على حجية لان صدگ جان منطقي، وانا مفكرت بيهة الصراحة لان كل بالي راح ينطون ويوافقون..
ونوح ذكي يعني مستحيل يحجي لو يسوي شي الا بعد ما يفكر زين بيهة، لهذا راساً كل لأمي عادي وبراحتج..
بس ليش نوح ممنع أمي من الروحة أو مثلاً يكوللهة راح يرفضوج وماريدج ترجعين وانتِ متفشلة منهم !
هاي الا اذا عندة أمل وبنسبة قليلة بأنو راح يوافقون !
يعني عندة أمل صغير وحاط بالة الفكرة !..
ابتسمت ورحت لغرفتي وانا اكول: والله وطلعتي انتِ هم ذكية إرَم وتفكرين !!!
رحت تمددت على فراشي وهنا بدت سلسلة الافكار الغريبة من ورة نوح تجيني وبگوات گدرت اغمض عيوني وانام بعد ما ختمت نص القرأن.
الصبح كالعادة خلصت تبديل ورحت للجامعة ونوح مداوم لان كل عندي محاضرة وحدة ومابية حيل بس انا جان عندي محاضرات وامتحان هم لهذا وصلني وراح.
وانا كملت المحاضرات الجانت متعبة ومزعجة بشكل لا ينوصف وطلعت برة الجامعة وصعدت وية نوح الي جان جاي علية.
بدة يسوق وهو مبتسم وانا رفعت حاجبي: ليش الابتسامة هيج واسعة ؟
ضحك واشرلي على الچكمچة: فتحيهة واخذي العلاگة السودة البيهة.
فتحتهة مثل ما كلي واخذت العلاگة وفتحتهة ووياهة فتحت عيوني بفرح من شفت علبة مال تلفون، طلعتهة وانا مبتسمة.
-عليك الله !! شوكت اشتريتة ؟؟؟
نوح: أبوج اشتراهة مو انا !
حضنتة لصدري بفرح: الله واخيراً تلفون خاص بية.
بگوات صبرت نفسي لحد ما وصلنة للبيت، وهو بس طبگ السيارة نزلت بسرعة ودخلت جوة.
نزعت عباتي وگعدت بالگاع افتح العلبة وأمي يمي تكول.
-ها وصلج ؟؟
هزيت راسي وفتحتهة طلعت منهة التلفون، جان تلفون سامسونغ جالكسي هذا أبو اللمس وانا طرت بيه حرفياً.
اخذة مني نوح وبدة يحطلي بيه شريحة وانا صعدت فوگ وبسرعة غسلت وبدلت ونزلت جوة وگعدت يمة اباوع وياه.
وهو خلص كلشي ودخل على الكاميرا: خلي نطگ أول صورة بأول تلفون اشتريتيه..
قربت نفسي منه واشرت لأمي هي هم اجتي وطگينة صورة ثلاثتنة، ونوح گعد يعلمني عليه وانا الابتسامة شاگة حلگي.
واليوم كلة بأيدي التلفون معفتة ثانية وحدة، حرفيا طبيت بكل البرامج وبحوشت بيهن حتى الاستفاد منهة والي ماستفاد منهة بس هيج ادخل اشوفة واطلع.
ويوم الثاني على اساس نروح نطلب جموح بس الي وگف گدامنة بيت جدي أهل أمي الي فجئة قررو يسوون عزيمة ثواب على روح زوجة خالي، وأمي اليوم كلة جانت مطنگرة..
جموح
هاي الايام مشت عادية، ومثل روتينة اليومي.
نرجع من المدرسة ونرتاح ونسوي واجباتنة ومن نخلص نساعد خالتي حمدية بالشغل بالگاع مالنة ونلم الزرع وهاي السوالف.
وانا مثل العادة جنت گاعدة بالمطبخ وداغسل بالخضرة سمعت صوت الكـابر بالصالة.
-وينكم ؟ ليش عايفين الباب مفتوح ؟؟؟
صحت: انا هنا بالمطبخ تعال..
دخل للمطبخ واجة باس راسي: وينهم البقية ؟
جموح: راحو للسوگ يشترون كم شغلة، اصبلك أكل ؟
هز راسة وگعد وانا رحت شغلت على الأكل وشوية انتظرت يلا صبيتلة أكل وحطيتة گدامة وانا اكول.
-چا والأكـبر وينة ؟
الكـابر: الأكـبر اليوم يتأخر، تعاي گعدي عندي حجي وياج.
گعدت بصفة كمل كلامة بعد ما بلع اللگمة: اليوم يجون ضيوف يمنة.
هزيت راسي: اي اهلاً وسهلاً نحط ضيوفك بعيونة !
الكـابر: سالمة عيونج، محتاجين شي بالبيت ؟
جموح: كلشي تمام بالبيت وماناقصنة شي، اكلك كـابر..
باوع علية وهمهم وهو ياكل وانا كملت: شنو رأيك نروح زيارة باجر جمعة واحنة بالبيت ضايجين، وحتى محرم اسبوع الجاي يعني بعد ماعدنة مجال !!
سكت شوية وانا اباوع عليه، ابتسم وهز راسة: تدللون بس انا ماگدر باجر عندي شغل بس الأكـبر لا لهذا هو ياخذكم..
نفيت براسي: لا شنووو والله بدونك محلووو !!
الكـابر: الأكـبر وياكم شبيج !!!
جموح: الا تكونون سوية يلا نحس بالطلعة اذا واحد منكم ماكو محلوو، يلا الكـابر حاول تحجي وية أبو المحل عليك الله !!
الكـابر: ماگدر خوية اعوف الشغل بس انا العامل بالمحل ماكو واحد ثاني ياخذ شغلي !!
عبست وحطيت راسي على جتفة وهو رجع ياكل وانا اقنع بيه لحد ما كل.
-اي تمام احاجي أبو الشغل والله كريم.
ابتسمت وهو ضحك وگام من الأكل: أكو چاي ؟
جموح: هسة انا اسويلك جديد من عيوني.
الكـابر: فدوة لعيونج بس عادي حميلي الموجود انا اشرب..
راح وانا شلت الصينية وحطيت الچاي على النار ولحد ما حمى غسلت المواعين.
الكـابر عادي عندة ياكل أكل بايت لو صارلة اسبوع هم بس نحميه ونحطة گدامة ياكلة وحتى الچاي هم عادي عندة الموجود ياكلة ويشربة بس أهم شي يكون حار يچوي چوي، اما الأكـبر لا لازم كلشي جديد أبد ميحب الأكل البايت لو الچاي الي يتسخن مرة ثانية، لازم يكون جديد..
رحت صبيت الچاي ووديتة الة وهو جان گاعد على العتبة مال الباب ويدخن..
حطيت حجاب على راسي ورحت انطيتة الچاي وهو اخذة من أيدي وجان يحجي بالتلفون واسمعة يكول.
-اي مُعقب بالليل، هسة الأكـبر بالشغل وانا ماگدر اتفق على شي وأخوي مو وياي...هاهية كما كتلك بالليل وسيد هاشم هم يجي لان گعدة وياكم تسوي مشاكل.
شرب من الچاي وهو رافع حاجبة وانا واگفة واستمعلة لان جذبني حجية، ذب الجگارة وطلع وحدة ثانية وهو يكول.
-هسة انا شكايل ليش تخليني اسبك انتَ وبرهان !..ديلا ولي.
سد التلفون وباوع علية وانا ابتسمت وكلت.
-عادي اسأل واكول شكو ؟
ضحك واشر بصفة: تعاي گعدي اسولفلج..
گعدت بصفة وهو بدة يسولفلي الي صاير وانا كلما يحجي كلما احس گلبي يتگطع !!
اتجمعت الدموع بعيوني وكمشت أيد الكـابر.
-احلفك بروح أبوية لا تعوفهم بهاي المصيبة...
قاطعني: اي جموح حبيبتي اعرف منعوفهم، هسة مسحي دموعج شغلة محلولة..
هزيت راسي ومسحت عيوني وهو گعد يشرب چاي ويباوع على الزرع وانا گاعدة يمة كلي ابقي يمي.
بقينة هيج لحد ما صار وقت الغروب وشفنة من بعيد الأكـبر يتمشى وحدة ومترب من فوگ ليجوة وجان وجهة عليه طحين وحتى لحيتة، وشعرة مخربط وهم بيه طحين، وهو حاط أيديناتة بجيوبة وحاط جگارة بحلگة ويدخن.
ضحكنة ثنينة انا والكـابر على شكلة وهو اقترب منة وهو رافع حاجبة.
-شكو ليش هذا الضحك ؟
الكـابر: ليش هيج صاير بيك ؟؟؟
الأكـبر: انشگت گونية مال طحين علية وهيج صار، جوعان كلش اكو أكل ؟؟
هزين راسي: اي روح اسبح يلا علمود احطلك..
هز راسة وراح دخل جوة وانا اضحك دخلت وراه وشفتة تمددت بالگاع من التعب، رحت للمطبخ وهم سخنت الأكل وبقيت واگفة يمة، واسمع صوت الكـابر يصيح..
-ولك گووووم للحمام شنو متمدد بهذا حالك وصخت الدنيا !!
الأكـبر: خاب دوخر انتَ شدراك بتعبي !
الكـابر: محد كلك روح اشتغل بالمخازن انتَ ردت !!
صبيت الأكل وانا اضحك على صياح الكـابر: ولك گووووم غسل لعبتهة لنفسنة كاتلك الوصخ گووووم !!!
شلت الصينية ووديتهة للصالة وانا اكول: شبيه جنة العافية، خلي ياكل وهو يروح يسبح من يخلص !
ابتسم واخذ الخاشوگة وبدة ياكل حتى بدون ما يغسل أيدة والكـابر عاقج وجهة معاجبة والأكـبر ممهتم لحد ما خلص الأكل وراح للحمام..
وانا بقيت گاعدة يم الكـابر لحد ما طلع هو هم وگعد يمنة وجان يحجي وية الكـابر لحد ما خالتي وخاتون ثنينهن رجعن وهمة شوية وگامو طلعو برة لان سمعو الباب يندگ..
وگفت بالمطبخ ووخرت البردة اريد اشوفهم وخاتون اجتي وگفت بصفي وتسأل شكو ؟ وانا مرديت عليهة بس اباوع عليهم، جانو ثلاث ولد ووياهم سيد هاشم تسالمو وية التوأم وشفتهم اشرولهم يتفضلون جوة بس همة مبين عليهم مقبلو وراحو گعدو بنص الزرع على شكل دائرة...
باوعت على خاتون الي ضربتني وكلت: احجي شكو !!!
بديت اسولفلهة وانا اباوع عليهم لحد ما سكتت من شفت واحد منهم انتبه علينة، باوع علية بالبداية جان عاقد حاجبة وبعدين اخذتة الصفنة علينة وهو يرمش، وانا راساً وخرت من الشباك وسديت البردة وحاطة أيدي على خدي والرجفة احتلت جسمي كلة..
خاتون: هذا شگد حلو !!
جموح: اشش يا حلو والله لو شافونة التوأم جان ذبحونة ثنينة امشييي..
دفعتهة برة المطبخ وهي تريد ترجع تباوع عليهم، انتبهت علينة خالتي واشرتلنة.
-روحن صبن چاي وخلي الكـابر ياخذة يلاا..
هزيت راسي ورحنة ثنينة للمطبخ وانا احمي الچاي وخاتون واگفة يم الشباك تباوع عليهم وانا كل ساع احذرهة لحد ما سمعنة صوت الكـابر بالصالة..
-وين الچاي ؟؟؟
گمزنة ثنينة من مكانة وهو دخل للمطبخ وخاتون من التوتر مسدت البردة بس عافتهة، وهو عقد حاجبة وكل.
-ليش فاتحة البردة ؟؟
حمحمت خاتون وكلت بتوتر: هاا لا بس جنت حاطة الصينية وراهة وجنت داطلعهة..
هز راسة وهو بعدة عاقد حاجبة: سديهة يلا وممنوع تنفتح تبينون من برة، ويلا فضوهة مصار چاي !!!
طلع من المطبخ وانا مستغربة من عصبيتة، قبل شوية جان هادئ ويضحك ويشاقة يمنة.
صبيت الچاي وحطيتة على صينية وهو اخذهة وراح يمهم وانا وخاتون رحنة گعدنة بالصالة يم خالتي الي جانت گاعدة وتحجي بالتلفون..
وبقينة گاعدات والملل ماكلنة أكل، وخاتون كلساع تحوص تريد تعرف شنو يحجون برة وانا امنعهة لان اذا شافونة التوأم يعلگونة ثنينة..
بقينة على هاي الگعدة بالساعة يلا راحو الولد الي برة ودخلو التوأم وخالتي راساً كمشتهم.
-تعالو لكم، منو هذول وشيسوون هنا ؟؟
الأكـبر: اصدقائنة جايين هيج زيارة يمنة !
حمدية: اي واصدقائكم يجون بنصاص الليالي !!
ضحك الكـابر وكل: حمدوش عوفينة هسة رحمة لدينج، باجر جمعة وراح نروح نزور لهذا تجهزو من الصبح وحضرو اشيائكم..
صاحت خالتي: عليك الله !!
هز راسة وهي كلت بابتسامة: واخيراً هزيتو نفسكم وحسيتو عليهة ! صارلي فوگ الشهر مرايحة !!!
الأكـبر: اي وباجر نروح، هسة خلي اروح انام علمود نگعد من وقت.
راح دخل للغرفة ووراه دخل الكـابر راساً، ثنينهم گدرو يفرون السالفة على خالتي الي الحماس سيطر عليهة..
رحت لغرفتي وتمددت بفراشي ورجعتلي سلسلة افكاري الي صايرة متروح من بالي من اليوم الي طلعنة بيه من بيت أبو نوح.
نظراتة الي وصفنتة علية من يومهة حركت بداخلي مشاعر مدا اعرف اوصفهة...
يتبع...
_____________
هلا هلا 🫢🤎.
انطوني رأيكم بالبارت، واريد اشوف توقعاتكم للبارت الجاي 🤎.
____________
.
.
.
.
.
.
.
.
.
.
في أمان الله 🖤.