بسـمهِ تعـالى ...
عَاتبْته بَس شعَاتبت؟
كَتله أنه عَنك طوَلت
المفرُوض أجيك بكُل وَكت
يَامَرهمْ أنتَ لكَل عِلل
أبالي عَايش وَنبي
كَتلك تعًال وَماتبي
حت لُو تعَاند ماتَجي
بالطَيف ألك جَا سيِرت🖤
سلاسل الماضي بقلمي انـا الكاتبـة زهراء الشمـري 🤍🤍.
______________________________________
" گمرة "
ـ هاي اخر ايام حَملي بعد كم يوم ولادتي ومحمـد لحد الان مسجون وما نعرف اخبارة شنو وهاي صار ايام واحنا نفس الحال !
ـ كاعدين بل هول اني وجواهر و الجهال يلعبون بل بيت و ام محمد شادة راسها بعصابة وتون على محمد لسة ما نعرف كلشي علية كاعدة كدامنة وتهمس وية روحها وهيَ تون بقهر :
::-سودة علية يمة محمد وليدي شحالك هسة ولك يمة وين انطي وجهي اذا صار بيك شي شلون بية
ولك يمة ليش تلوع كلبي عليك
شكد ردت يبطل من سالفة الجيش
ليش يمة تتعب كلبي ليش
مو كتلك النظام ما يرحم يمة
ولك وليدي شعندي غيرك
ولك يمة وحيدي شحالك هسة
سودة بوجهج صفية وليدج ما تدرين بي وين ما وين
ـ هيَ تحجي واحنـا كدامها دموعنة تسيل شنو بيدنا غير الصبر ..
هو عصبي ودائما يتعارك ياربي استر .. اخ منك محمد ما تفكر بينة عايف عائلتين و امك وابوك و كوم جهال منو الهم
ـ ضلينة على هذا حالنة بس قهر و دموع واخواتة كلهن اتجمعن لمن سمعن بالسجن لا النة واهس الاكل ولا الشرب
ضالين نطبخ علمود الجهال و اجبر عمتي وعمي ابو محمد ياكلون علمود العلاج لان اذا طلع محمد ولكة امة مريضة
ممكن يكلب البيت على روسنة كلشي ولا امة ينجن عليها هية واخواتة
ـ اخر شي عمتي كلش تخربطت وضلت تولول على محمد تبجي وتحلف عمي ابو محمد يروح يسأل عليَّ
لمـن راح عمي وولد عم محمد عرفنـا سبب السجن ..
بيومها كلنة كاعدين بلـ طارمة كدام الباب عمتي ما بيها تكعد كلتلها
گمريـة::ـ عمة اكعدي جوة ارتاحي مابيج حيل هو لمن يرجع عمي اخلي يجي يسولفلج شنو عرفو
ـ اشرتلي بيدها لا حاولنا وياها ردنة منها بس تكعد رفضت رفض قاطع
نصاعينة الطلبها و جبنالها سكملي حتى تكعد تنتظر كعدت كدام الباب وخالة ايدها على خدها وصافنة
كعدت على باب مال المطبخ وادعي بكلبي بلكي يطلع شي بسيط ويعوفونة ويرجع النا سالم كل شي ما بي
ـ طُفرنا على صوت فتحت الباب
صاحت عمتي بدون متشوف منو الداخل
::ـ بشرني ابو محمد وليدي بي شي
ـ هز راسه بأسف وكال
ـ ماملتزم بتعاليم الرأيس ومخلصهـا هروب !!
جانت بمثابة الصدمة النا كُلنا حرفياً
گمرية ::ـ عمو محمد كُلش مُخلص بعملة ومن المستحيل يغيب او يهرب!
ـ حجت عمتي وهيَ تدك على رجليها
::ـ شلون غياب شلوون
ابو محمد::ـ هاي بعد واصلا بـالكوة خلونة نفوت لو ما الولد لحو عليهم وكالولهم لخاطر شيبات ابو تبهذل عليَّ وامة اذا ما تسمع خبر عنـة تنجلط جان ما خلوني ادخل للمركز. نهائي
ـ بعد كلام عمي احس الوقت توقف بينا شلون بية وين اروح شلون اعيش بدونة جهالة شلون بيهم الطفل الي بطني شلون بي اني شلون اعيش بدون وجودة يمنـا؟
ـ خلصت الوقت اشتغل واني ساكتة حرف ما حجيت والجهال بدو يفتقدو و يسئلون علية خاصتاً الكبار لان متعودين على وجودة يمهم
كل ما يسئلوني احير شجاوبهم و جان الجواب الوحيد الهم هو دموعي يضلون يلحون عليه على جواب لحد ما جواهر تلمهم و تكعد تقنع بيهم انُ هوَ رايح بشغل و بس يرجع يجيبلهم ويا اشياء يحبوها يقتنعون يوم و ثاني يوم يرجعون على نفس الاسطوانة
ـ تدمرت نفسياتنة بغيابة خاصة بعد ما تكرر الموضوع الناس كامت بدل ما تجي تطمنة و تطمأن علينا تجي تخوفنة زيادة بكلامهم الي جان عبارة عن بنزين للنار الي بداخلنـا جان كلامهم بـ أستمرار
(مايرجع الي يندگ بالنظام يروح بالرجلين )
وهاي عايشين هيـج منتظري يطلع ونفتهم شنو الصار وليش؟
ـ مرة الايام وبقت ايام قليلـة عن ولادتي رحنـا انـي وام اميـر (جواهـر) للسجـن علمود ابلغ محمد انُ ولادتي قُربت
بلغنـا وطلعنـا للبيت ثاني يوم احتاجينـا اشياء ورحنـا للاسواق اني وجواهر اخذنا كم شغلـة للبيت وأثنـاء ما احنـا دنتسوك حسيـت بألم مو طبيعي عُرفت اليوم ولادتي توجهنا للقابلة
ـ وولدت بنتـي حبيبتي ودزينـا رسـالـة للسجن لمحمد مضمونهـا
::ـ گمرتك ولدت شنو تريـد اسم الطفلـة ؟
خليت اله مجموعة اسماء
وكتبت ::ـ خلي دائرة على الاسم الي تريدة
من
شيماء
هيفاء
هناء
سحر
سماح
(حوطلي على اسم الي يعجبك حتى نسمي بنتنـا)
ـ جانت هواي ناس يا رايحة يا راجعة من مقابلات اهلها انطيتها الهم حتى يوصلوها الة لان ماكدر اروح
رجعولي الرسالة محوطلي بشكل دائرة على اسم
" سماح "
-جنت مخلية سماح بحضني وصافنة عليها شلون نايمة بهدوء لزمت اطراف ايدها هاي رابع بنية الية من غير ولدي الاثنين و من غير جهال جواهر
يعني عائلتنا كلش كبيرة وحياتنا ما مستقرة
شلون تستقر اذا هوَ متعذب ومعذبنا ويا بل سجون والتعب
ـ فززني صوت أيهاب
أيهاب::ـ مامااا مو احجي وياج ؟..
::- ها ها شبيك يا امي مو تشوفني انيم ب اختك
أيهاب::ـ عود صدك بابا مسجون ؟!
ـ رفعت راسي بصدمة
::- منو كالك هذا الحجي
ايهاب ::ـ سمعت جدو يكول البيبي محمد شيطلعة بعد من السجن
گمرية ::ـ عيب تتسمع بابا اذا عرف بيك تتسمع على العالم يزعل منك بعد ابد لا تسويها زين؟
ـ هوَ رائساً لمن سمع ابو يزعل كال
::ـ لا لا بعد ما اسويها بس لا تكولين البابا
::ـ لا يلا روح العب
ـ خليت سماح بفراشها و كعدت ارتب بملابسها واجتي يمي جواهر
هيَ وبنتها بحضنها شافتني ضايجة
كالت
جواهر::ـ بعدج ضايجة لان ولدتي و محمد ما موجود
كمرة::ـ طبعا اضل ضايجة هاي صار عمرها يومين و ما شايفها صح هو ختار الاسم
بس حتة محد اذن باذنها ينتظرونـا
جواهر : يمعودة لا تضوجين ولله يطلع نوب اني مو ولدت وهوَ موجود تتذكرين شسوة بية
ـ ضحكت واني اتذكر شلون جانت ولادة بنتها
::ـ جواهر انتِ ما تكعدين راحة انتِ على موعد ولادة شعندج طالعة ؟
"رجعت ذاكرتنا لذاك اليوم"
ـ جان بيومها محمد كاعد بلبيت و جواهر تفتر بل بيت تطب من غرفة وتطلع من الاخ هوَ حاط كرسي بنص البيت و خال رجل على رجل و يدخن يباوع عليها يعرف بيها وراها سالفة اخر شي ملت جان تجي
جواهر ::ـ محمد
محمد: ماكو طلعة جواهر تكعدين وتسكتين اذا طلعتي اكسرج تكسر
جواهر: تريدني اعوف اخواتي تكطع صلة الرحم ؟
محمد: كلت الي عندي خلي الكفج طالعة
رايح انام ماريد اسمع نفس
ـ راح محمد نام واني سكتت الجهال و هيَ اخذت جهالها ودخلت الغرفتها اخذتلها نص ساعة وطلعت مبدلة و شايلة جنطتها
گمرية::ـ عزززة بعينج ولج جواهر ولله يكلب البيت علينة استري على نفسج
جواهر: وخري وخري شنو هو يحكمني
كمرية: طبعا يحكمج ترى رجلج !
جواهر : اي شو دوخري امشوا ماما
- ضليت فاتحة حلكي بصدمة عليها ولله اليوم يكعد يحرگنا والمشكلة هيَ طلعت ولا همها كل مرة تنكتل وعادي ترجع تطلع بلا ما يدري
صار العصر وكعد محمد اني من يمي صرت ارجف هو لمن يكعد ما يتحاچة بس اذا بناتـة اجن يمه شوية يخفف
وهسه جواهر كملتها
ـ كأن ما حس اكو شي اول ما طلع من الغرفة گال وهو يمشي بأتجاهي
::ـ وين جواهر؟
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
ح
سابي الانستـا للتواصل ..
zhraa_al_shmmeriy
ﺗﺬﻛﻴﺮ✨
- سُبحان الله .
- الحمدلله .
- لا إله إلا الله .
- اللهُ أكبر .
- سُبحان الله و بحمدهِ .
- سُبحان الله العظيم .
- استغفر الله و أتوبُ إليهِ .
- لا حول و لا قوة إلا بالله .
- اللهُم صل على نبينا محمد .
- لا اله الا انتَ سبحانك
اني كنت من الظالمينَ .
- حسبي الله لا اله الا هو عليه
توكلت وهو رب العرش العظيم .
-اللهم ارزقني من حيث لااحتسب .
-اللهم ثبت قلبي على دينك.
- يارب رضاك والجنه .
-اللهم احسن خاتمتي .
-اللهم اجرني من النار ."