سلاسل الماضي

السلسـلة الرابعـة عشـر 🔗🖤.

بسـمهِ تعـالى ...

- صِرت للمالَة أَي موضوع عِنوان ،
- الچان يحِبني لا يمكِن و لا چان ،
- اليحِضن روحَة يشبه وَرد ذَبلان ،
- يَا روحِي عَليچ هِواي زَعلان ،
- رَماد بِـ نارَة صِرتيلَة و تِغَنين ،
- تِغَطيت و بَعدني الليلة بَردان ،
- بَعد گلبي اشتِعل بَلگت يشوفوك ،
- ينشاف الهَوى مِن يصير دَخان .

سلاسل الماضي بقلمي انـا الكاتبـة زهراء الشمـري 🤍🤍.
______________________________________

"محمد"

ـ رجعت حياتنـا هادئـة نوعاً ما ورجعت انـي لدوامـي لَكـن الي ما عجبني برجوعي ، الامر مالتنـا مغيري واعصاب ورافع نفسه علينـا عبالك مالك الدنيـا مع العلم رتبتـة اقل من رتبتي بهواي وماكو شي يخلي يرفع خشمة علينـا ويتمادة بـ افعالـة عكس الامر الي جان كُلش مُحترم وخلوق

ـ مشيت الامور تمام وكل دوام الي هادئ ويا رغم اسلوبـه ما يستحق احترمة كل هذا الأحترام الى ان وصلت ويا بده يخلق مشاكـل وياي عمدًا ويغلط ويسب بخواتي وانـي يسبوني ويشتموني ولا شي يمس خواتي بوكتهـا اني جنت اعصاب وهوَ تمادة اكثر من الازم جان كلامـه عبارة عن سب وطعن بالعَرض

عاد انـي ما اتحمـلت لزمتـه من ياخـة البدلـة ورگعـته بوكس ببطنـه گام يتلوه بمكانـه رجعت عليَّ رفعته من الكاع ورجعت اضرب بي بكل قوة بدون وعـي تدخلو الجنود يفاككونـه اني ما حاس ع نفسي غير اندفعت عنـه ولازميني اربعة من الجنود والامر منتهي بمكانـه ويتلوه من بطنة

ـ اباوع الـه بحقد وعيوني متشخصه علي بحركة سريعة طفرت علي ركعته بوكس بـ فكة ومشيـت سريع للـ مقـر سحبت الجنطة والسويج وطلعت راجع للبيت اليوم نزولي طلعت قبل موعد النزول بـ 4 ساعات المفروض اطلع بـ 5 طلعت بـ 2 الظـهر شمرت الجنطة بالسيـارة واسمع صوت الجندي وراي يصيح

::ـ سيدي بعد وقت لـنزولك لا يسجلك غياب وتتعاقب

ـ ما اهتميت لـكل حرف كاله هزيت ايدي ودخلت للسيارة بعدني ما محرك رجع حجـه وياي

::ـ زين سيدي بس اهدء لا يصير بيك شي خلي انـي اسوق بمكانك

ـ جاوبتـه واني گوة مركز بـ الكلام
::ـ مالـه داعي ارجع لمكانك هسه اسوق واروح

ـ بعده يريد يحجي سديت الباب وحركت السيارة وطرت بيهـا للبيت اسوق وبالي مو وياي افكر بـ الامـر واسلوبـه بس وياي هيج بعيداً عن غلطـة اليوم وطعنـه بـخواتي واهلـي هوَ دائماً يخلق وياي مشاكل واتغاضـه عنـه او اشغل نفسي بشي واسوي نفسي ما مهتم بـس من شافني ساكت وما اتجاوز مثل ما يتجاوز عليه زاد ما نقص الى درجة وصلت بي يطعن بـ خواتـي الـ اشرف منـه ومن الي خلا يصير بهل مكان

ـ نفضت هل سالفه من بالي ع صوت السيارات الي يردن يعبرن واني ساد الطريق سرعت بالسيارة ومشيتت حاولت انسـه او اتناسـى الموضوع وما اخلي يأثر عليَّ كملت طريقي للبيت هادئ الى ان وصـلت ما لكيت احد منتضرني لان ميدرون راجع قبل بوقت بالعاده رجعاتي لو الفجر لو المغرب

ـ ضربت على راسي ضربات متتاليـه اريد الوجع يخف وفريت السيارة رحت لبيـت امـي دگيـت الباب اجانـي صوتهـا الحنين

::ـ اجيـت يمـه

ـ فتحت الباب باوعتلي بصدمة بعدين تغيرت ملاحهـا للفرح تقدمت عليه حضنتني بفرح

::ـ يايمـه وليدي حبيبي تعالي يبعد امك

ـ استمرت تبوس بيه فرحانـه

::ـ تعال يبعد امك ادخل جوا ارتاح خلي اسويلك غدة

ـ هزيت راسي برفض
::ـ لا يمـه رايـح اني ما باقي اغسل وارتاح

::ـ غسل هنـا وارتاح على ما اسويلك غدة

ـ لزمت راسي حسيت بعد شويـه وواكع من الدوخة
قنعت امـي ما اكدر ابقـى وكلتلهـا باجر راح اشوفهم اقتنعت شغلت السيارة ورجعت لبيتي حتى خواتـي ما رحت الهـم بس اريد اوصل للبيت اغسل واخذ علاج وانـام بعدين اروح وصلت للبيت نزلت دكيت الباب سمعت صوت امـير

::ـ منو

::ـ حبيبـك أبنـي

ـ سمعت صوت ضحكاتـه اجـه فتح الباب وباس راسي وايدي
::ـ شوكت رجعت هسـه الجهال يغسلون يردون يطلعون ينتضروك

::ـ طلعت من وقتت اليوم سويتهـا مفاجئة الكم

::ـ واحـله مفاجئة

ـ حاوطت اكتـافـة صاير بطولي كبر امير وصار رجال دخلت للصالة جانن شَدن وسَدن كاعدات بيدهن ملابسهن وشعرهن محلول منتضرات امهن تطلع من الحمام وتغسل الهـن

ـ باوعن لـ امير يسئلنـه منو ع الباب شافني بصفـه طفرن بفرح واجن راكضات لحضني يبوسن بيـه ويشرحلي شكد مشتاقاتلي ومنتظراتني اجـي ع اثـر صوتنـا وضحكاتي وياهن طلعت گمـرة من الحمام تريـد تعرف شكو باوعت الي مصدومة رجعت باوعت للجهـال واجت الي بطنهـا صايرة جنهـا بطريق

ـ اجت يمي بست راسهـا وكصتها اتحمدتلي بالسلامـة وانـي صافن بوجهـا مفهـي لزمت فكي بـ ايدها دارت راسي يمين ويسار وهمست

::ـ محمد جاي احجي وياك انتَ وياي؟

ـ هزيت راسي وابتسمت اضيع نضراتي
::ـ وياج وياج

ـ اشرت ع الغرفـة واردفت
::ـ ادخـل ارتاح بس اخلص ايهاب ومهاب وادخـل انتَ

ـ هزيت راسـي مشيت للغرفـه درت راسي لجهتهم وحجيت
::ـ اسمـر وجواهـر ماكو؟

::ـ جواهـر راحـت لـ اهلـها هسـه ترجع واخذت اسمر وياها

ـ هزيت راسي ما فاهم
::ـ اسمـر ليش وياهـا هوَ ما يحـب يطلع وياها ابد

::ـ ما اعرف هل مرة اقتنع وراح بـ ارادتـه

ـ عفتهم ورحت بس بالي بقـه يمـه هيَ اتعدلـت من ناحيتهم وكامت تهتم الهـم بـس بعدني ما مطمئن نفضت هل افكار من راسـي واتمددت ع الجُربايـة اول ما خليـت راسـي ع المخدة نمـت ما ادري بالدنيـا بعد ...

ـ كعـدت ع صوت الأذان وصوت همس بالغرفـة ركزت اكثر هذا صوت ايهاب ومهاب واسمـر

اسمر::ـ هسه هوَ مو سئل عليـه ويريدني خلي اكعـده بس اكلـه اني هنـا وينام شبيكم انتم

ـ رد علي مهاب بضوجة
::ـ اهوو لا تخبـصنـا هوَ سئل علينـا كلنـا قابل هوَ بس ابوك

ـ اسمع ايهـاب يهدئهم عن لا اكعـد
::ـ كافـي خلي نطلع هسـه يكعد عوفو خطية تعبان

ـ رد علي اسمر
::ـ انتَ ما تشتاقـله اني مشتاقلـه اريد ابوسـه ونطلع للشارع

ـ حجـه مهاب بصوت عالي حتى لو نايم كعدت
::ـ اسكت انتَ تضوجني من تحجي تكول مشتاقـله وبعدين تريده يطلعك للشارع يعني ما مشتاقلـه مشتاق للشارع

ـ تعالت صوت ضحكاتـي ع كلامـه فزوو دارو وجههم الي مصدومين عبالهم نايم فتحت ايدي واشرت الهم بـ عيوني بمعنى تعالو اجو يمي حضنتهم وبوستهم

ـ حجـه مهاب بسرعة عبالك واحد يركض ورا
::ـ بابا احنـا مشتاقين الك وهذا اسمر ما مشتاقلك مشتاق للشارع يكول يكعد ابوي يطلعني للشارع

ـ ضحكت وهزيت راسي بـ ايجاب
::ـ عادي اني مشتاقلـه لا يشتاقـلي هوَ

ـ حجـه اسمـر وواضح ع صوتـه يريد يبجي
::ـ بابا والله اني مشتاقـلك هواي ما اريد اطلع اريد يمك

ـ ضحكت بقوة وحضنتـة حيل
::ـ ادري بيك بطل حبيبي روح ابوك انتَ

ـ انفتح الباب دخلـن مؤنساتـي الغاليات وصيـة الرسول ابتسـامتـهن كفيلـة تخليني ارتاح وابتسم عليـها نزلت من الجربايـه وكعدت متچي نفسي ع الجُربايـة اتقدمن يمي بيدهم مشـط اتقدمت سـَدن باست خدي وحجـت

::ـ بابا ماما تشتغـل وانتَ نايـم منتظرينك تكعـد وتمشط شعرنـا

::ـ روحـي انتـو ليش ما كعدتيني باباتي حبيبي؟

::ـ ماما كالت تعبان هسه اخلص شغل وامشـط الكم بـس انتَ هسه كعدت

ـ اخـذت المشط من ايدهـا وهيَ مستمرة تسولفلي عن الي صار واني ما موجود اسمعـلها واني مبتسم اتمنى ما يخلصـن حجي وابقى اسمعلهن عمري كُلـه ما راح امـل ولا لحضـة

كملـت شعـرهـا قربت ضفيـرتهـا شميتـها وبستـها كامـت كعدت كدامي يم اخوانـها اجت شَدن كعدت اضفر الهـا كملت سويت نفس الحركـة مهـاب ما تحمل حجـة بسرعة

::ـ اتمنـى اصيـر بنيـة حتى تمشـطلي

ـ اختنكت من الضحك واميـر واكف يباوع لـ مهاب ويضحك ايهاب اتقدم ضربه بكفة ايدة ع راسـة وكلـة

::ـ كوم جيب مشط وقراصات خلي يمشطلك  البنيـة

ـ رجعـت اضحك ع شقاهـم واصواتهـم الي اتمنى ما تغيـب عني لـحظة .. بـَس مو كُل الي نتمنـى يصيـر وللقـدر رئي اخـر ..

________________________________________

يتبـع ...

حسـابي الانسـتا للتواصـل ..
zhraa_al_shmmeriy

ﺗﺬﻛﻴﺮ✨
- سُبحان الله .
- الحمدلله .
- لا إله إلا الله .
- اللهُ أكبر .
- سُبحان الله و بحمدهِ .
- سُبحان الله العظيم .
- استغفر الله و أتوبُ إليهِ .
- لا حول و لا قوة إلا بالله .
- اللهُم صل على نبينا محمد .
- لا اله الا انتَ سبحانك
اني كنت من الظالمينَ .
- حسبي الله لا اله الا هو عليه
توكلت وهو رب العرش العظيم .
-اللهم ارزقني من حيث لااحتسب .
-اللهم ثبت قلبي على دينك.
- يارب رضاك والجنه .
-اللهم احسن خاتمتي .
-اللهم اجرني من النار ."