شمس وليل

البارت الاخير

عزيز بعد ما خلص رجع البيت و قبل ما يطلع اتصل بباسم و انتظر يرد عليه.....اي يا عزيز

عزيز :عامل ايه

باسم :كويس انت خلصت

عزيز: اه خلصت و لسه واصل المهم بس انا عايز اقولك حاجه بس

باسم :في ايه

عزيز:بلاش تقول لابتسام ان نور اخو ليالي

باسم :اشمعنا

عزيز : الموضوع دا ماثر علي ابتسام اوي و هي بتحاول انها تتخطاه يا باسم ف لو عرفت ان ليالي اخته مش هتقدر تنسي ولا هتقدر اصلا تتعامل معاها هتحمل ليالي الذنب و هي ملهاش دعوه

باسم ابتسم:حاضر يا عزيز اطمن

باسم قفل و ليالي قعدت جنبه

ليالي :  فيه ايه

باسم :عزيز مش عايزك تجيبي سيره لابتسام ان نور يكون اخوكي عشان مش تفضل فاكره اللي حصل معاها دايماو علاقتكم بارده ماتبقاش فيها حزازيه و انتي مالكيش دعوة

ليالي :من غير ما تقول انا مش عايزه حد يكرهني

باسم ابتسم ليها و سكت

عزيز قفل معاه و طلع علي شقته كانت ابتسام قاعده و ضامه رجليها و سانده راسها عليها و دموعها نازله

عزيز راح قعد جنبها و حاوطها بايديه.... اللي بتعمليه دا غلط علي فكره

ابتسام : انا  عملت ايه

عزيز : عشان عماله تعيطي و دموعك دي غاليه قوي ف ينفع اهدار المال العام دا والله ما ينفع انتي يرضيكي كدا

ابتسام ضحكت و مسحت دموعها.....انت بتقول ايه

عزيز :يعني بذمتك حد يبقي عنده ضحكه الحلوه دي و يفضل يعيط

ابتسام ابتسمت و سكتت

عزيز مسح دموعها ..... هل دموع دي بقي وراها انك مش عملتي اكل صح

ابتسام ضحكت :كان عندي مذاكره كتير والله حقك عليا

عزيز :ماشي يا ست البنات فداكي الجميل ياكل ايه

ابتسام :اختار انت

عزيز :كتر خيرك والله بس يا بسبوسه عايز ادوق اكلك يعني احنا بقالنا شويه حلوين متجوزين مادوقتش من ايديكي حاجه

ابتسام : اقولك علي بصراحه يعني انا كان نفسي اتجوز عشان اكل من باره

عزيز ضحك:و انا بحقق ليكي احلامك ماشي يا اخره صبري

ابتسام بصتله و دموع ماليه عنيها :و انت مش كنت بتتمني نهايه صبرك يبقي انا مش كدا انت اكيد تستاهل واحده احسن مني

عزيز :اولا انا مش قصدي اللي انتي بتقوليه دا و بعدين انتي يا ابتسام البنت اللي عشت طول عمري اتمناها  ولا انتي بتقلبيها نكد عشان تداري انك مش عامله اكل خلاص يا حبيبتي انا كدا كدا هنزل اشتري اكل مش محتاجه

ابتسام بصتله و ضحكت و عزيز ابتسم و باس دماغها و قام وقف

صباح يوم جديد 🌤️

شمس نزلت قعدت مع ثريا و اطمنت كمان علي حاله ليالي و فضلو قاعدين سوا يتكلمو

ابتسام :اي تجمع دا بقي ان شاءالله بتعملو اااايه و راحت قعدت في نص ما بينهم بتقولو ايه

ثريا ضحكت:يا بت سلمي الاول و بعدين اتحشري في كلام

ابتسام:صباح الخير جمعاء انا جعانه عندكم اكل

ثريا : و مش كالتي  في بيتك ليه

ابتسام : وحشني فطارك الحلو يا سوسو ف قولت أعزم نفسي عندك و أفطر معاكم

ثريا :و جوزك يا منيله

ابتسام:جبته معايا طبعا يفطر معانا

ثريا :عوض عليا عوض صابرين يارب بت قوليلي بتاكلي جوزك و تعمليله اكل عدل ولا بتاكليه اكل معجن و شايط منا عرفاكي ماسكه المحروق دا علي طول و دماغك مش فيكي

ابتسام كتمت ضحكتها :عيييييب طبعا دا انتي مخلفه شيف شربيني يا ماما انتي مش واثقه في بنتك ولا ايه

باسم خرج من الاوضه :و شيف شربيني كانت مخليه جوزها ينزل يجيب ليهم امبارح كشري  ليه

ابتسام بصتله بتفجئ:انت عرفت اذاي

باسم ضحك:يابت بطلي حوارات و اعترفي

ابتسام :كان نفسي فيه اي اجرمت يا خلق يا ناس محدش نفسه تروح ياكل كشري

باسم :كدابه يا امي والله مش بتعمل اكل خالص كل يوم اقابل عزيز رايح جاي و معاه شنطه الاكل

ثريا :يا نهارك مش فايت انتي مش بتعملي اكل لجوزك

ابتسام بهمس :الله يخربيتك يا بعيد هتفتحلي محضر دلوقتي ما تلمي جوزك يا ليالي و خليه يروح ينام شويه او يشوف حاجه يعملها

ليالي بصتلها و ضحكت .....هو حالف تقريباً ينكد عليكي انا اسفه
ثريا :ردي عليا يا زفته اللي بيقوله  اخودكي  دا بحق و انتي مخليه الواد يقضيها اكل من شارع

ابتسام :انا ابدا انتي تعرفي عني كدا يا سوسو باردو

ثريا :اه اعرف يا قلب سوسو يا قلب امه رضي بالهم و الهم مش راضي بيه جاب لنفسه بلوه تانيه

ابتسام بصت ليها باحراج و وطت رأسها و عنيها دمعت

شمس حست ان ابتسام اضايقت من كلام ثرياا :طيب قومي معايا يا بسبوسه و نشوف شيف شربيني و اخدتها و دخلت المطبخ

شمس لفت ايديها حوالين كتفها ....ماتزعليش منها هي بتهزر معاكي و كلمه عاديه مش الي في دماغك خالص

ابتسام هزت راسها و سكتت

شمس :قوليلي بقي المهم انتي مبسوطه

ابتسام ابتسمت :اوي يا شمس اوووي عزيز طيب اوي و بيحبني اوووي و بيعمل اي حاجه عشان يشوفني مبسوطه و مش بيحب يزعلني ابدا

عزيز دخل الشقه و كان ليل نازل ف دخلو سوا

عزيز : بقولك يا باسم خلي حد يجبلي مايه

باسم :انت بقيت من اهل البيت

عزيز :ايوه من عارف

باسم :خلاص قوم هات لنفسك بقي ماتقرفنيش و بعدين مراتك اللي في المطبخ

عزيز ضحك :ماشي 

شمس :ربنا يسعدكم يا حبيبتي

ابتسام :عارفه يا شمس انا بعد اللي حصلي دا شوفت دنيا وحشه اووي و عمري ما كنت اتخيل اني ممكن اتجوز واحد يتقبل ظروفي عمري ماتخيلت ان انا يحصل معايا كدا و عزيز مش بس تقبل الموقف لا دا بيساعدني اني اتخطي الموقف و دايما بيطمني و بيحاول انه يخرجني من المحنه اللي انا فيها انا بجد مبسوطه اووي معاه يا شمس و بصراحه انا محظوظه بيه اوي

عزيز واقف بيسمعها و هو مبتسم و فرحان بكلامها عنه و عمل صوت ....احممممم

ابتسام و شمس اتلفتو

ابتسام :عايز حاجه يا عزيز

عزيز :اه كوبايه مايه بس

ابتسام :حاضر و راحت جابت الازازه و كوبايه و ادتها ليه

عزيز : تسلم ايدك يا ست البنات و بص شاف شمس مديه ضهرها ف قرب من ابتسام و همس ليها....انا اللي محظوظ بيكي و من بختي الحلو انك من نصيبي

ابتسام بصتله و ابتسمت بسعاده و هو خرج

و بعد وقت كانو حضرو الفطار و قعدو سوا مع بعض يفطرو و يهزرو

باسم :اعتقد انك اول مره تدوق اكل ابتسام يا عزيز انهارده

ليل :هو فين الاكل دا ،دا فطار فين الافتكاسه

عزيز ضحك:لا دوقته

باسم :ياض بطل  كدب انا عارف انها قادره بس مش لدرجه انها تخوفك كدا يعيني علي رجاله

ليل بصلهم باستغراب....هو في ايه

باسم :في ان البيه من وقت ما اتجوز الهانم و هي كل يوم اكل من باره خربت بيته

ابتسام :انا امتي دا

باسم :امتي يا بسبوسه اتعدلي و انت يا عم انشف عليها مش كدا

عزيز ضحك: لا خليها تدلع

ابتسام :قول تاني كدا يا زيزو سمعه تاني عشان في واحد مش سامع هناك و طلعت لباسم لسانها

باسم ضحك :و ربنا مجنونه ربنا يعينك عليها يا بني

ليل قام و سابهم كان بيكلم في الموبايل و ابتسام راحت وراه و فضلت واقفه مستنيه يخلص و اتلفت لقها و فضل باصص ليها

ابتسام بصتله برجاء و دموع ماليه عنيها....هتفضل زعلان مني و مش بتكلمني

ليل بص ناحيه تانيه و ماردش عليها

ابتسام :انا غلطانه سامحني يا ابيه انا تعبت من خصامك ليا و حياتي عندك

شمس متابعهم بتردد مش عارفه تروح ليهم ولا لاء

ليل بص قصاده شاف شمس و ابتسمت ليه انه يرد عليها

ليل مسح علي شعرها.....زعلي منك كان عليكي اكتر انك عملتي في نفسك كدا و اتنهد خلاص يا ابتسام الموضوع دا اتقفل و خلص خلاص

ابتسام حضانته بسعاده و ليل بيطبطب عليها

الايام بتمر و الحال كما هو عليه

شمس في يوم بتدور في ورق علي حاجه و شافت
ملف عليه اسم ليل ف فتحته بفضول و كان ورق تعليم ليل و اخواته و هي بتدور فيهم وقفت عند شهاده تخرج ليل من كليه تجاره فضلت باصه للورق بزهول و سابته اما سمعت ليل بينده عليها ف خرجت من المكتب

ليل باستغراب :انتي كنتي في المكتب ليه

شمس:بدور علي ورق عشان تراخيص المركز

ليل :اها طيب اقعدي امسكي

شمس:ايه

ليل :تصريح بزيارتك للهانم

شمس ابتسمت:شكرا

ليل بصلها و ماردش عليها

شمس:اي مالك

ليل:لاني رافض مرواحك ليها و انتي مصممه

شمس:هي هتعملي ايه يعني يا ليل هي هتبقي في سجن

ليل. :انا مش بقول هتعمل حاجه فيكي انتي محدش يقدر يقرب منك طول منا عايش انا بتكلم عن فكره
نفسها بس خلاص هنعمل ايه

شمس :هو انت بجد معاك بكالريوس تجاره

ليل بصلها باستغراب:انتي مين قالك

شمس :و انا بدور علي ورق المركز شوفت ملف عليه اسمك و اتفجئت بصراحه

ليل : ليه اتفجئتي

شمس :يعني ماتوقعتش دا بصراحه

ليل رفع حاجبه: ليه يعني

شمس ضحكت: اهدا بس هفهمك في الاول بصراحه كنت بقول اكيد الشخص دا مش متعلم بس اما عرفتك كويس و شوفت طريقتك لا غيرت فكرتي بس انت ليه مش شغال بشهادتك

ليل : عادي

شمس : لا مش عادي اتكلم انا عايزه بجد اعرف انت بقيت.كدا اذاي احكيلي عن نفسك

ليل ضحك:مالي فيا ايه هو اي اللي بقيت كدا اذاي

شمس :مش قصدي يعني انت اذاي اتحولت من شخص جامعي لواحد بلطجي

ليل بزهول :انا بلطجي يا شمس

شمس :يوووه بقولك ايه انت فهمت قصدي صح اتكلم انت بقي

ليل : دا احسن باردو عشان كل شويه انتي بتعكيها اكتر

شمس ضحكت :ايوه

ليل : ابويا الله يرحمه كان فاتح مغلق خشب اللي انتي شوفتيه دا و كان دايما يقولي انزل و اشتغل عشان تشيل شغل من بعدي لكن شهادتك لازم تاخدها و لو جرالي حاجه علم اخواتك و خليهم معاهم شهادتك عاليه و مات و انا في ٣كليه و كنت رافض اكمل عشان كان علي كتافي حمل امي و اخواتي بس  امي كانت دايما تفكرني برغبته ف حققتها ليه و كان لازم اكون كدا عشان احميهم يا شمس و انا كنت عايز اكبر و ناس للاسف مش بتخاف غير من القوي اللي متأكدين انه ممكن في اي لحظه يبلعهم و بعد كدا ركنتها في دولاب ذي مانتي شوفتيها  كدا و بقي كل همي اني اكبر تجاره و اعليها و بس 

شمس ابتسمت :المهم انك نجحت

ليل :صح انا جعان مش هناكل بقي ولا ايه

شمس بصتله و ضحكت

ليل:افهم انا ايه من ضحكه دي

شمس :اصل هو حصل حاجه غريبه اوي معايا

ليل ضم حاجبيه باستغراب:حاجه ايه

شمس :انا طلعت الحاجه و كنت هعمل مكرونه بشاميل تمام

ليل :تمام و بعدين

شمس :قرفت

ليل باستغراب:قرفتي من ايه مش فاهم

شمس :من شكل الاكل

ليل بتعجب :اذاي !!!!يعني مش فاهم

شمس :مش عارفه اهو ده اللي حصل

ليل :انا مش فاهم حاجه اي اللي قرفك من الأكل يعني مش فاهم

شمس ابتسمت :هعرف بكرا

ليل :تعرفي بكرا اللي هو اذاي يعني

شمس :سيبك من الاكل دلوقتي انا عايزه اتكلم معاك في موضوع كدا و مش عارفه ردت فعلك ايه

ليل :اسيبني من الأكل !!!! ماشي قولي

شمس:اي بفكر احضر  ماجستير

ليل بصلها و ماردش

شمس:اي سكت ليه

ليل : مستنيكي تكملي

شمس:اكمل ايه انا خلصت خلاص

ليل :طيب اي المشكله انا مش فاهم

شمس:انت رايك ايه

ليل :انا موافق على اي حاجه انتي تكوني حابه تعمليها طبعا حابه تحضري ماجستير دكتوراه انا موافق علي اي حاجه انتي عيزاها انا معاكي فيها في اي فلوس تحتاجيها

شمس ابتسمت بسعاده :بس هتدفع فلوس كتتتتير

ليل :فداكي ياست البنات

شمس : بجد مش هتندم انت لسه فاتحلي مركز

ليل :اي حاجه انتي تحتاجيها شاوري بس انتي و تكون بين ايديكي و ماتشغليش بالك بحاجه تانيه

شمس ضحكت :عيد النظر في جوازه دي انا جايه عليك بخساره كبيره

ليل ابتسم : قولتهالك و هعيدها تاني مال دنيا كله مايغلاش عليكي المهم تكوني مبسوطه روحي  و قدمي و انا معاكي

شمس حضنته ....ربنا ما يحرمني منك ابدا

صباح يوم جديد 🌤️

شمس جهزت هي و ليل و راحو سوا السجن و قعدو استنو ماجده و شمس ماسكه في ايد ليل تهدي من توترها

ماجده جت تقعد و بصت ليهم .... جايه تشمتي فيا انتي وجوزك

شمس :انا جايه اطمن عليكي

ماجده :تطمني عليا بعد ما جوزك ضيعلي مستقبلي

ليل :اي ظلمتك مش انتي اللي سرقتي الاجهزه و لا اتبليت عليكي 

ماجده:اه و كنت لو هي جابت تاني كنت هسرقها تاني

شمس بصت ليها بتفجئ كانت مستنيه منها انها تنكر كانت هتصدقها :طيب ليه انا مش اذيتك في حاجه انا طول عمري بحبك

ماجده: عشان طول عمرك احسن مني بتاخدي كل حاجه انا بتمناها حاولت كتير اذيكي في شغلك بس   بتيجي معاكي بفايده قولت لعفاف هانم ام سامر علي علاقتك بيه عشان تسبيه وتاذيكي في شغلك طلعت كنت بفيدك اني وقعتك في طريق ليل اللي من وقت ماتجوزك مش عارف يعملك ايه ولا ايه حتي سامر اه مش عايز يتجوز بس كان بيحبك بجد كان معايا بس اما تيجي سيرتك عنيه تلمع كرهني فيكي اكتر انا فعلا بكرهك و يمكن الكره دا حاجه قليله علي جوايا من واحنا في ثانويه العامه و انا وانتي بنحلم بكليه طب انا حلمي اتحطم و معرفتش ادخلها و انتي دخلتيها كنت كل ما اشوفك في كليه كنت بموت انتي دخلتي كليه اللي طول عمري بحلم بيها و انا دخلت كليه تمريض حتي سامر انا اما شوفته اعجبت بيه بس هو اما شافك انتي عجبتيه و اخدتيه مني و لو كنت فضلت شويه تاني معاكي كنت اخدت منك جوزك قصاد عنيكي

شمس بصلها بتفجئ مش مصدقه انها كانت مخدوعه فيها بالطريقه دي مش مصدقه كميه الكره اللي جواها ليها و هي عمرها ما شافتها اذاي كانت شايفها كدا

ماجده ضحكت :ايه مالك مصدومه كدا ليه كنتي فاكره اني همثل عليكي و اقولك لا انا بريئه و معملتش حاجه لا يا شمس انا تعبت تمثيل و مش عايزه امثل تاني عليكي كفايه لحد كدا و بصت لليل بانتقام ....انت مش هسيبك هخرج و هنفضي الحساب اللي مابينا

ليل مال بجسمه عليها ....مش لو خرجتي من هنا اصلا و ابتسم ليها و ماجده بصتله بقلق و ليل قوم شمس و اخدها و مشي

ليل فتح باب العربيه و اتصل بشخص...نفذ  و قفل المكالمه....كفايه عليها كدا و راح ركب عربيته و اتحرك بيها و لاحظ شرود شمس و دموع ماليه عنيها

شمس كانت شارده في ذكريتها مع ماجده من وقت ما اتعرفو علي بعض كانت هي كل حاجه ليها كانت بتعتبرها صاحبتها و اختها كان بينهم ذكريات كتير و غمضت عنيها و دموعها نزلت بحزن

ليل وقف العربيه و مسك ايديها.....انا قولتلك بلاش و انتي اللي صممتي

شمس:كنت عندي امل انها تكون مظلومه كان نفسي تكدب عليا و انا هصدقها يا ليل انا مش مصدقه ان ماجده صاحبه عمري يطلع منها كل دا طيب ليه يا ليل ليه تعمل فيا كدا ليه انا كنت بقول ماجده دي اختي كل يحزرني منها و انا اقول لا ماجده مستحيل ماجده دي اختي و طلعت انا المخدوعه فيها طلعت انا المغفله اللي فيكم

ليل :انتي مش مغفله انتي بس اتعاملتي معاها بطيبه  و بمعدنك لكن هي اللي طبعها وحش و خلاص خدت الشر و راحت انسيها و كملي حياتك كانها لم تكن

شمس :بالسهوله دي

ليل :طبعا مش هتفضلي تبكي على حد ما يستهلش دموعك دي غاليه ماتنزلش علي حد مايستهلش احمدي ربنا انه انك كشفتيها علي حقيقتها بدل ما كنتي فضلتي مخدوعه فيها اكتر

شمس هزت راسها و بصت ناحيه تانيه و ليل اتحرك بالعربيه و كان متابعها بضيق علي حالتها و بعد وقت كانو وصلو و شمس نزلت اتفجئت ان شارع كله متزين بفروع النور و المزمار الصعيدي شغال و في يافطه كبيره متعلقه مكتوب عليها افتتاح المركز طبي "الشمس "

ولاء جت عليها و بقت تظغرط بسعاده و حضانتها ....ربنا يجعله فتحت خير عليكي يا حبيبتي يا رب انتي تستاهلي كل خير

شمس بصت لليل بعدم فهم ....هو اي اللي بيحصل دا انا مش فاهمه حاجه

ليل مسك ايديها و طلع بيها المركز و اتفجئت ان في دكاتره و موظفين ف بصتلهم و بصت لليل ....اي دا

ليل :دول مقدمين للشغل و انتي المفروض هتقعدي معاهم عشان تختاري منهم المناسب و ياريت تكوني مخلصه شغلك بادري عشان الافتتاح هيكون بليل

شمس :بس اذاي و الورق

ليل :كل حاجه خلصت اطمني

شمس :و ناس انا مش فاهمه حاجه انت عملت دا امتي

ليل اخدها و دخل مكتبها و قعدها :مش مهم اذاي المهم انه حصل شوفي الاحسن و اختاري منهم و المهم انا عايز المركز دا في اقرب وقت ممكن يوقف المستشفى اللي جمبنا دي و يغطي عليها مفهوم

شمس ابتسمت ليه.....حاضر

ليل جيه يمشي شمس مسكت ايديه و قامت حضنته و بصتله و هي بتبتسم .....انا حامل يا ليل

ليل بصلها بارتباك .....ااايه

شمس : حامل انا بقالي فتره شاكه ف عملت تحليل انهارده و اتاكدت و مش رضيت اقولك عشان تمنعني اروح

ليل حضن وجهها بايده الاتنين ...... مبروك يا حبيبتي

شمس :انت مش مبسوط

ليل :متلغبط بس شعور غريب عليا شويه او مش كنت اتوقعه

شمس بصتله بقلق ....انت مش عايز اولاد

ليل ضحك:بقولك متلغبط و دا امر طبيعي يعني بس دا مش معناه اني مش مبسوط او اني مش عايز اولاد بالعكس انا مبسوط عشان هيكون عندي حاجه تانيه تربطني بيكي المهم كملي شغلك انا همشي عشان مش اعطلك

ليل خرج و ولاء دخلت ليها و حضانتها .....مبروك يا شموسه ربنا يجعله فتحت خير عليكي يا حبيبتي

شمس ابتسمت بتوتر و سكتت

ولاء:مالك يا شمس في ايه

شمس بصت ليها و دموع ماليه عنيها حكت ليها اللي حصل كله من ماجده و ولاء بتسمعها بزهول

ولاء:بعد كل اللي جوزك حكاه ليكي قبل كدا صممتي تروحي ليها طيب ليه يا شمس ليه

شمس :كنت فاكره انها ممكن تكون مظلومه

ولاء بصدمه :مظلومه ايه انتي بتقولي جوزك مسمعك صوتها و هي معترفه علي نفسها

شمس : اهو اللي حصل بقي يا ولاء كنت متعشمه فيها و هي خزلتني انا مش قادره اوصفلك كم الحقد اللي كان في وشها انا عمري ما اذيتها

ولاء طبطبت عليها.... ماتزعليش نفسك احمدي ربنا انه كشفها ليكي عشان مش تفضلي مخدوعه فيها كدا كتير و يالا بقي عشان نشوف شغلنا انا جبتلك دكاتره ايه علي فرازه هما ما صدقو يخلعو من المحروقه القديمه 

شمس:انتي بتجمعيهم من امتي

ولاء:كل دا جبته امبارح اما المعلم ليل قالي

شمس :هو ليل اللي قالك

ولاء:اه انا هخرج بقي و ابعتهملك واحد واحد

ولاء خرجت و بقت تبعت الموظفين لشمس و هي بتختار منهم اللي تحتاجه و اليوم كان طويل اوي عليها بس انشغالها خلاها تنسي اللي حصل معاها من ماجده

صباح يوم جديد

ليل صحي كانت شمس نايمه  بصلها ....عارف اني اتسببت ليكي في تعب امبارح بس انا كنت قاصد عشان خاطر مش تفكري و تزعلي و قام و دخل الحمام و بعد وقت خرج و موبايله رن و شمس صحيت علي صوته و انتبهت لكلامه.....لا هو مفيش علاقه ما بينهم كانت مجرد زميله مش اكتر و هي جت تتطمن عليها في ظرف دا تمام سلام

شمس بصت لليل باستغراب:هو في ايه يا ليل انت بتتكلم عن مين

ليل قعد قصدها و اتكلم بحزر ....دخلو انهارده علي ماجده لقوها  ميته

شمس بصتله بصدمه ؛ميته اذاي يعني مش فاهمه

ليل :ماتت يا شمس في ايه الغربب في كلامي عمرها خلص لحد كدا

شمس :اذاي دي كانت كويسه

ليل :المأمور بيقول سكته قلبيه

شمس بتبصله بعدم استيعاب و توهان هي كانت زعلانه منها بس دلوقتي هي خلاص بجد ماجده مشيت دموعها نزلت بحزن

ليل طبطب عليها و مسح دموعها.....هي ماتستهلش  تعيطي  عشانها لانها خانتك و وجعتك و دموعك اغلي منها هي راحت لحالها الله يرحمها خلاص

الايام بتمر و الحال كما هو عليه و كل واحد فيهم عايش حياته و ايام بتجيب شهور بتجيب سنين

ثريا كانت مجماعهم و كل واحد فيهم قاعد و جنبه ولاده و ثريا بتبص ليهم و تبتسم مبسوطه ان كلهم حواليها و ان عيلتها بقت كبيره
و كانت بتبص علي احفادها و هي مبتسمه و بصت في الاول علي ليل اللي بقي انسان تاني شمس قدرت تغيره و خلته الشخص اللي فضلت تتمناه و كان قاعد علي رجليه ولاده سليم و جميله

وبصت علي باسم كان بياكل بنته بايده كالعاده و بيلعب معاها لأنها مش بتاكل غير من ايده هو و ابتسمت ليه ربنا يباركلك في نيره يا حبيبي و يجعلها باره بيك انت و امها

و بصت في الاخر علي ابتسام و هي بتاكل و كانت بتحط اكل لابنها و لعزيز عشان ياكلو و ابتسمت علي ابنها اللي شكل ليل اكتر من ابنه نفسه و عشان كدا سموه على اسمه

تممممممممممممت💥💥💥💥❤️❤️❤️❤️

و تكون كدا خلصت قصه شمس.و ليل و اتمني تكون نهايه مرضيه 🤭😍❣️🌹
و فضلا يعني رايكم في البارت و في احداثه يعني ❤️❤️❤️💥

حطمتي حصوني نزل منها الجزء الثاني مستنايكم هناك بقي يا حلوين 💥🔥