Chapter 119
ဓာတ်လှေကားထဲမှ ထွက်လာပြီးနောက် ဖန်ခွင်းက သိလိုစိတ်အပြည့်ဖြင့် မေးလိုက်သည်။
"မင်းနဲ့ ရှောင်ကျားရှု ဘာတွေ ဖြစ်ထားကြတာလဲ ..."
သူ့စကားပင် မဆုံးသေး။ ဖိုင်တစ်ဖိုင်ကို ကိုင်လျက် ကော်ရစ်ဒါအဆုံးမှ ထွက်လာသော ဟွမ်မိန်ရွှမ်ကို တွေ့လိုက်ရတော့သည်။ သူမက သူတို့ကို နှုတ်ဆက်ကာ အပေါ်ထပ်သို့ တက်သွားလိုက်၏။
ဖြစ်ပျက်သည်များကို အတည်ပြုနိုင်လိုက်သည့် ဖန်ခွင်းက အပိုင်အနိုင် ပြောလိုက်သည်။
"ရှောင်ကျားရှုက မင်းကို ရှောင်နေတာ မဟုတ်လား ဟွမ်မိန်ရွှမ်က ကားပါကင် ထိုးနေတာ လုံးဝ မဟုတ်ဘူး မင်းနဲ့ ဓာတ်လှေကား အတူတူ မစီးချင်လို့ ပြောတာ ဟုတ်တယ် မဟုတ်လား မင်းကတော့ သူ့ကိုတောင် အကြာကြီး စောင့်နေပေးလိုက်သေးတယ် ဟားဟားဟားဟား ..."
ကျိမြန်၏ နေကာမျက်မှန်က မျက်နှာတစ်ခုလုံး နီးပါးကို ဖုံးအုပ်ထားနိုင်သည့်တိုင် ခပ်တင်းတင်းကြိတ်ထားသည့် မေးရိုးကိုတော့ မြင်နိုင်နေရာ အတော်လေး စိတ်အနှောင့်အယှက် ဖြစ်နေမှန်း ခန့်မှန်းနိုင်ပေသည်။ ရုံးခန်းထဲသို့ ရောက်လာပြီးနောက် အပေါ်ဝတ်အင်္ကျီကို ချွတ်ကာ လည်စည်းကို ဖြည်လျက် ကြယ်သီးအနည်းငယ်ကိုပါ ဖြုတ်ရင်း ညွှန်ကြားလိုက်သည်။
"ရှောင်ကျားရှု ဘယ်ဇာတ်လမ်းကို ရိုက်ဖို့ ပြင်ဆင်နေလဲဆိုတာ သွားပြီး မေးပေး ..."
"ဘာဖြစ်လို့လဲ သူများတွေ ဘယ်ဇာတ်ကားရိုက်ရိုက် မင်းနဲ့ ဘာဆိုင်လို့လဲ ..."
ဖန်ခွင်းက ဆိုဖာပေါ်တွင် ခြေချိတ်လျက် ထိုင်လိုက်သည်။
"သွားမှာသွားပါ ဘာလို့ ပြန်မေးနေတာလဲ ..."
ကျိမြန်က ဖုန်းကို ထုတ်ကာ အကျင့်အတိုင်း WeChat နှင့် Weibo တို့ကို ဖွင့်ကြည့်လိုက်သည်။ ပြန်စာဟူ၍ တစ်စောင်မှ ရောက်မလာသေးသည့်တိုင် စာပို့ချင်စိတ်က ထိန်းချုပ်၍ မရနိုင်။ ထို့ကြောင့် ရှောင်ကျားရှုထံ စာအသစ်တစ်စောင် ထပ်ပို့လိုက်ပြန်သည်။
"မင်းကို ကြည့်ရတာ မျက်ကွင်းညိုနေသလိုပဲ ညပိုင်းတွေ ကောင်းကောင်း မအိပ်ဘူးလား"
စက္ကန့်အနည်းငယ် ကြာသည့်တိုင် စာပြန်မလာ။ ထို့ကြောင့် နောက်တစ်စောင် ထပ်ပို့လိုက်သည်။
"ညပိုင်းတွေ ဂိမ်းဆော့တာ လျော့ဦး နောက်ကျတဲ့အထိ မနေနဲ့ "
"ငါ့မှာ ကောင်းတဲ့ စာအုပ်လေးတွေ ရှိတယ် ကြည့်ကြည့်ချင်လား "
"ထုတ်လုပ်ရေးအဖွဲ့က အရမ်းကို ကောင်းတာ မင်း စိတ်ဝင်စားမှာ သေချာတယ်"
"ရှောင်ရှု ဒီမှာ ရှိနေလား"
"အလုပ်များနေတာလား ဒါဆိုလည်း အားမှ ကိုယ့်ရုံးခန်းကို လာခဲ့နော်"
သူပို့ခဲ့သည့် စာအားလုံးမှာ ပင်လယ်ထဲ ပစ်ချခံလိုက်ရသည့် ကျောက်တုံးသဖွယ် တုန့်ပြန်ချက်ဟူ၍ မရှိတော့ချေ။ တစ်ခါတစ်လေတော့လည်း ဤသို့ပင် တွေးမိသေးသည်။
ဒီကလေးက သူ့ခြေထောက်နဲ့သူ ထွက်သွားတဲ့ဟာ မင်းအနေနဲ့ သူ့ကို လက်လွှတ်ပေးလိုက်သင့်တာပေါ့ သူ့အတွက် ဘယ်လောက် ကောင်းနိုင်မှာလဲ သူ့အတွေးတွေကို ထောက်လှမ်းမနေနိုင်တဲ့ လူသာမန်နဲ့ပဲ လက်တွဲသွားသင့်တာလေ သူသာ မင်းလျှို့ဝှက်ချက်ကို သိသွားရင် ဘယ်လောက်အထိ လန့်ဖျပ်ပြီး ထွက်ပြေးချင်မလဲဆိုတာကို သိရဲ့လား ...
ဤကဲ့သို့ သူ့ကိုယ်သူ နားချလိုက်သော်ငြား တစ်ခဏအကြာတွင် ဖုန်းကို ကောက်ကိုင်လျက် ရှောင်ကျားရှုထံမှ ပြန်စာရလိုစိတ်တို့ တိုးပွားလာပြန်သည်။
သူ့ကို အဝေးကနေ ကြည့်ပြီး ကာကွယ်ပေးချင်ရုံလေးတင်ပါ ဒါတောင် လုပ်လို့ မရဘူးလား ရှောင်ကျားရှုအနေနဲ့ ဒီလောက်အထိ စေ့စပ်မှကို ရမှာလား ...
ခေါင်းကိုက်ဝေဒနာကို တိတ်တဆိတ် ခံစားလိုက်ရစဉ်မှာပင် ဖန်ခွင်းက ရုံးခန်းထဲသို့ ဝမ်းနည်းပက်လက် ရောက်ချလာ၏။
"မစ္စတာကျိ ကျေးဇူးပြုပြီး လင်းလဲ့ယန်ကို အခွင့်အရေးလေး ထပ်ပေးပေးပါ သူလည်း မှားမှန်း သိနေပါပြီ အခု သူ အရမ်းကို ဖျားနေတာ ဆေးရုံကို လိုက်ကြည့်ပေးလို့ ရမလားဟင် ..."
"မင်းတို့ကို အခွင့်အရေး ပေးခဲ့ပြီးသား မင်းတို့ဘာသာ မထိန်းသိမ်းတာ "The Lover" ကိုပဲ ကောင်းကောင်းမွန်မွန်ရိုက် ကိုယ့်ဘဝကိုယ် ဖျက်ဆီးနေတာတွေ ရပ်လိုက်တော့ ..."
ကျိမြန်က ဖုန်းကို စားပွဲပေါ် ပစ်တင်လျက် စိတ်မရှည်လေဟန်ဖြင့် ပြောလိုက်သည်။
"အိုကေ ထွက်သွားတော့ ကလေးတွေလို မပြီးနိုင်မစီးနိုင် ငိုတတ်တာမျိုးပဲ သင်မနေနဲ့လို့ ..."
ချိန်ဖမ်းရှင်းက ရွဲ့တဲ့တဲ့ ပြုံးနေသော ဖန်ခွင်းကို တစ်လှည့်၊ အေးစက်တင်းမာနေသည့် မစ္စတာကျိကိုတစ်လှည့် စိုက်ကြည့်ပြီးနောက်တွင်တော့ စိတ်ပျက်လက်ပျက်ဖြင့်သာ ရုံးခန်းထဲမှ ထွက်လာလိုက်ရတော့သည်။
ဘယ်လိုဖြစ်ပြီး ဒီလိုအခြေအနေအထိ ရောက်သွားရတာလဲ အစောပိုင်းတုန်းကဆို လက်ထဲမှာလည်း အရင်းအမြစ်တွေ အများကြီး မစ္စတာကျိကလည်း နောက်ခံ ဖြစ်နေသေးတော့ ဘယ်သူမှ ဘာမှ မလုပ်နိုင်ဘူး ဒါပေမယ့် အခု ကြော်ငြာတွေရော၊ ရသစုံရှိုးမှာ ပါဝင်ခွင့်ရော ဆုံးရှူံးသွားပြီ "The Lover" ဇာတ်ကောင်တစ်ခုပဲ ကျန်တော့တယ် နောက်ပြန်ဆုတ်ဖို့ကလွဲလို့ ဘာမှ ရွေးချယ်စရာ မရှိတော့ဘူး ..."
ရုံးခန်းတစ်ခုလုံး ငြိမ်သက်နေစဉ် ဖန်ခွင်းက မရဲတရဲ မေးလိုက်သည်။
"ဘာလို့ လင်းလဲ့ယန်အပေါ် ရုတ်တရက်ကြီး ခက်ထန်သွားရတာလဲ သူက မင်းကို ရန်စလိုက်မိလို့လား ..."
ကျိမြန်က တစ်ခွန်းမှ ပြန်မဖြေ။ အရန် account တစ်ခု ပြုလုပ်ကာ ရှောင်ကျားရှု၏ account နှစ်ခုလုံးကို follow လုပ်လိုက်သည်။ ရှောင်ကျားရှုနှင့် နီးကပ်နိုင်မည့် အခွင့်အရေးတစ်ခု ရှာဖွေမှ ရပေတော့မည်။ သို့မဟုတ်ပါလျှင် ဘာဆက်လုပ်ရမည်မှန်းပင် သိတော့မည် မဟုတ်ချေ။
ဓာတိပုံတစ်ပုံကို ဖျက်လိုက်ခြင်းမှာ ကျိမြန်အတွက် ကိစ္စကြီး မဟုတ်ချေ။ Weibo post များကို မကြာခဏ ရှင်းခင်းတတ်သူများ ရှိနေသော်လည်း ပြဿနာမှာ ထိုပုံ တင်ခဲ့သည့် အချိန်နှင့် ရေးသားထားသည့် စာသားများ ဖြစ်နေပေသည်။ ထိုသည်မှာ လင်းလဲ့ယန်၏ ပထမဆုံး ပွဲဦးထွက်သည့်နေ့ရက် ဖြစ်ကာ စာသားမှာလည်း ကျိမြန်၏ သူ့အပေါ် မျှော်လင့်မှု၊ ဂရုစိုက်ပေးမှုတို့ ပြည့်နှက်နေသည်။ လင်းလဲ့ယန်ကို အားပေးရန် သူ့ပရိသတ်များကိုပင် တောင်းဆိုထားရာ ကာကွယ်ပေးသည့် အပြုအမူဟု ယူဆ၍ပင် ရပေသည်။
အခု အဲဒီ့ဓာတ်ပုံကို ဖျက်ပစ်လိုက်တော့ လင်းလဲ့ယန်ကို ဂရုစိုက်ဖို့ မပြောနဲ့ မျှော်လင့်ချက်ကို မရှိတော့ဘူးလို့ ပြောချင်တာလား မင်းတို့လည်း သိတဲ့အတိုင်းပဲ လင်းလဲ့ယန်က သူ့လက်အောက်က အနုပညာရှင်လေ သူသာ ဒီလိုမျိုး မကြိုက်တဲ့ ပုံစံမျိုး ပြလိုက်ရင် သူ(လင်းလဲ့ယန်) တော့ သေချာပေါက်ကို အေးစက်စက် အဆက်ဆံခံရတော့မှာပဲ ...
ရလဒ်အနေဖြင့် လင်းလဲ့ယန်မှာ ညတွင်းချင်းပင် ကြော်ငြာပိုင်ရှင်များနှင့် ရိုက်ကူးရေးသမားတို့ထံမှ အေးစက်သည့် သဘောထားကို ခံစားလိုက်ရတော့သည်။ ညှ်ိနှိုင်းနေဆဲ စာချုပ်အားလုံး ရပ်စဲသွားကာ "The Lover" တစ်ခုတည်းသာ ကျန်ရစ်ခဲ့တော့သည်။ ဒါရိုက်တာဟူမင်က နောင်တမရဟု ပြောလျှင် မှားပေလိမ့်မည်။ လင်းလဲ့ယန်မှာ ကျိုးကြောင်းဆီလျော်စွာ ငြင်းခုန်တတ်ပြီး စကားပြောကောင်းသူတစ်ဦး ဖြစ်သည့်အတွက် သူနှင့်သာ ဆက်ရိုက်ရန် ဆုံးဖြတ်လိုက်တော့သည်။ မည်သို့ပင်ဖြစ်စေ လင်းလဲ့ယန်မှာ သူ မြင်မြင်ချင်း သဘောကျမိသည့် သရုပ်ဆောင် ဖြစ်သည့်အတွက် သူမလိုချင်တော့သည့်တိုင် ငြင်းပယ်လိုက်၍ မသင့်တော်တော့ချေ။
ချိန်ဖမ်းရှင်းမှာ အတွေ့အကြုံ နည်းပါးကာ အရည်အချင်းလည်း မပြည့်မီသည့်အတွက် မြောက်များစွာသော စာချုပ်ရပ်စဲခြင်းများကို ရင်ဆိုင်လိုက်ရသည့်အခါ ကောင်းစွာ မကိုင်တွယ်နိုင်တော့။ ထို့ကြောင့် ညှိနှိုင်းခြင်းကိစ္စ အဝဝကို ဖန်ခွင်းထံသာ ပုံအပ်ထားလိုက်ရတော့သည်။ မူလကမူ ဖန်ခွင်းမှတစ်ဆင့် လင်းလဲ့ယန်၏ သနားစဖွယ် အနေအထားအကြောင်း ကျိမြန်၏ နားထဲသို့ ပေါက်ကြားစေခြင်းဖြင့် သနားစိတ်တို့ကို နှိုးဆွကာ အနည်းနှင့် အများ ဆုံးရှုံးမှု နည်းပါးအောင် လုပ်မည်ဟု ကြံရွယ်ထားသော်လည်း ဖန်ခွင်းက ကျိမြန်ကို ဖုန်းဆက်ကာ စာချုပ်ရပ်စဲသည့် ကိစ္စအားလုံးကို အနှောင့်အနှေးမရှိ ကိုင်တွယ်သွားတော့သည်။
"ငါတို့ဘက်က ပေးစရာရှိတဲ့ လျော်ကြေးတွေအားလုံး ပေးပြီးပြီ ဒါ မင်းတို့အတွက် လုပ်ပေးနိုင်တာ အကုန်ပဲ ..."
သူက လက်ဆွဲအိတ်ကို သိမ်းနေရင်း ရှင်းပြလိုက်သည်။
"မစ္စတာကျိက ပြောတယ် ရှေ့လျှောက် လင်းလဲ့ယန်ရဲ့ ကိစ္စအားလုံးကို မင်းလက်ထဲ လွှဲပေးလိုက်ပြီတဲ့ ဇာတ်လမ်းပဲ ရိုက်မလား ကြော်ငြာတွေ လက်ခံမလား ဒါမှမဟုတ် ရသစုံရှိုးထဲ ပါမလား စိတ်ကြိုက်သာလုပ် အရင်းအမြစ်တွေလည်း မင်းတို့ စိတ်တိုင်းကျ ရှာဖွေလို့ရတယ် ကုမ္ပဏီက မင်းတို့ကို လိုအပ်တဲ့ လက်ထောက်တွေတော့ ပေးနေဦးမှာပါ ဒါပေမယ့် ဘယ်နေရာအထိ သွားနိုင်မလဲ ဆိုတာကတော့ မင်းတို့ရဲ့ အရည်အချင်းပေါ်မှာပဲ မူတည်တယ် အတိတ်မှာတုန်းက မစ္စတာကျိက မင်းတို့ကိူ အရမ်းကြင်နာပြီးတော့ အခြေအနေဆိုးတွေ အများကြီးကနေ ကူညီပြီး ဆွဲထုတ်ပေးခဲ့တယ် ပြီးတော့ ထိပ်တန်းအရင်းအမြစ်တွေလည်း ပေးခဲ့သေးတယ် ဒါပေမယ့် ကြည့်လိုက်ပါဦး မင်းတို့တွေ ဘယ်လောက်အထိ ပျက်စီးလာသလဲဆိုတာကို ..."
"ဒီမှာ ..."
သူက စာရွက်စာတမ်းဖိုင်တစ်ခုကို ကမ်းပေးလိုက်သည်။
"ဒါက မင်းနဲ့ မင်းညီမရဲ့ IOU ယူပြီး မီးရှို့လိုက် ဟိုဓာတ်ပုံတွေကို ထုတ်ရောင်းမလား မရောင်းဘူးလား ဆိုတာကတော့ မင်းတို့ သဘောပဲ ဘာပဲဖြစ်ဖြစ် နစ်နာမယ့်သူက မစ္စတာကျိမှ မဟုတ်တာ ..."
ချိန်ဖမ်းရှင်းက ထိုစာရွက်နှစ်ရွက်ကို ပြန်ယူရန် အိပ်မက်မက်ခဲ့ဖူးသော်ငြား အမှန်တကယ် ပြန်ရလာသည့်အခါတွင်မူ အိပ်မက်တို့ တစ်စစီ ပျက်စီးသွားသည့်နှယ်ပင်။ ဖိုင်အိတ်ကို ခပ်တင်းတင်း ဆုပ်ကိုင်ထားလျက် မေးလိုက်သည်။
"မစ္စတာကျိက လဲ့ယန်ကို ဖွက်ထားချင်နေတာလား ..."
"မင်းကို ကြည့်ရတာ နားလည်မှု လွဲနေတယ်ထင်တယ် ..."
ဖန်ခွင်းက လှောင်ရယ်လိုက်သည်။
"လင်းလဲ့ယန်က A အဆင့် စာချုပ်ကို ချုပ်ထားတာ အဲဒါကြောင့် သူ့ကို ကုမ္ပဏီရဲ့ ထိန်းချုပ်ပိုင်ခွင့်က တော်တော်လေး နည်းတယ် ကုမ္ပဏီက သူရတဲ့ ဝင်ငွေရဲ့ ၁၅ ရာခိုင်နှုန်းကိုပဲ ကော်မရှင်ခအနေနဲ့ ယူတယ် ကျန်တာအားလုံး သူ့အပိုင် ပြီးတော့ ကုမ္ပဏီအနေနဲ့ သူ့ကို ဇာတ်လမ်းရိုက်ဖို့ ရုပ်ရှင်ရိုက်ဖို့ လုံးဝ ဖိအားပေးနေမှာ မဟုတ်ဘူး ဆုံးဖြတ်ပိုင်ခွင့်က သူ့လက်ထဲမှာပဲ အပြည့်အဝ ရှိတယ် ဒါပေမယ့် ကုမ္ပဏီမှာလည်း သူ့ကို အရင်းအမြစ်တွေ ထောက်ပံ့ပေးရမယ့်တာဝန် မရှိဘူး ..."
စာချုပ်ကို ထုတ်ကြည့်လိုက်ပြီးနောက် ချိန်ဖမ်းရှင်း၏ မျက်နှာတစ်ခုလုံး စာရွက်ဖြူတစ်ရွက်နှယ် သွေးဆုတ်ဖြူလျော်သွားတော့သည်။ လင်းလဲ့ယန်၏ ဝင်ငွေအားလုံးကို ကုမ္ပဏီ၏ စီမံခန့်ခွဲမှုအောက်သို့ ထားရှိရန် မလို။ ကုမ္ပဏီက သူ့ကို ရုပ်ရှင်ရိုက်ရန် ဖိအားပေးလိမ့်မည်လည်း မဟုတ်ချေ။ အလားတူပင် ကုမ္ပဏီကလည်း သူ့အတွက် ရုပ်ရှင်အချိတ်အဆက်နှင့် ကြော်ငြာများကို ကူညီကာ ရှာဖွေပေးမည် မဟုတ်။ အရင်းအမြစ်ရှိခြင်း၊ မရှိခြင်းမှာ သူကိုယ်တိုင် သို့မဟုတ် အေးဂျင့်ဖြစ်သူ၏အဆက်အသွယ်ပေါ်တွင်သာ မူတည်ပေသည်။
ထိုစာချုပ်မှာ အတော်လေး အဆင်ပြေလှသည်ဟု ထင်ရနိုင်သော်ငြား လူသစ်များအတွက်မူ စက္ကူစုတ်တစ်ခုမျှသာ ဖြစ်ပေသည်။
အတိတ်တွင် အားထားရာ ကျိမြန်ရှိနေသည့်အတွက် လင်းလဲ့ယန်သည် လိုချင်သမျှ အားလုံးကို မလွဲမချော် ပိုင်ဆိုင်ခဲ့ရာ ယခု ကျိမြန်၏ အထောက်အပံ့ကို မရတော့သည့်အခါမှ ရုန်းကန်ရခြင်း၏ အဓိပ္ပါယ်ကို ကောင်းကောင်းကြီး သဘောပေါက်သွားတော့သည်။
ဖန်ခွင်းက သူ့ကို အသနားခံသည့် မျက်လုံးတို့ဖြင့် စိုက်ကြည့်နေသည့် ချိန်ဖမ်းရှင်းအား လက်ယမ်းပြလိုက်သည်။
"ငါ့ကို တောင်းပန်နေလည်း အသုံးမဝင်ဘူး ငါတို့က စာချုပ်အတိုင်းပဲ အလုပ်လုပ်တာ ဖြစ်တဲ့အတွက် သေချာပေါက် ကျိုးကြောင်းဆီလျော်ပြီး တရားဝင် ဖြစ်ပြီးသား ဒါကြောင့်လည်း ကုမ္ပဏီတွေက အနုပညာရှင်တွေအတွက် စာချုပ်တွေကို အမျိုးမျိုး ခွဲပေးထားတာပေါ့ လူသစ်လေးတွေက နာမည်မကြီးသေးလို့ များများ အလုပ်လုပ်ပြီး နည်းနည်းပဲ ယူတယ် ဒါပေမယ့် ကုမ္ပဏီကလည်း အရင်းအမြစ်တွေ ကူရှာပေးပြီး အကောင်းဆုံး ထောက်ပံ့ပေးတယ် နာမည်ကြီးလာတဲ့အခါ အရင်းအမြစ်ရှာဖို့ ကုမ္ပဏီရဲ့ အကူအညီကို မလိုတော့ဘူး ဒီတစ်ခါ အကျိုးအမြတ် ခံစားရမယ့်သူက ကုမ္ပဏီ ဖြစ်သွားပြီ ဒါကြောင့် စာချုပ်တွေကို အဆင့်အမျိုးမျိုး သတ်မှတ်ထားတာ အနုပညာရှင်တစ်ယောက် ကုမ္ပဏီကနေ ထွက်မသွားနိုင်အောင် သူတို့အကြိုက်တွေ့လောက်မယ့် အချက်တွေနဲ့ပေါ့ ဒါက ဈေးကွက်လိုအပ်ချက်အရရော တစ်ဦးချင်း ဖွံ့ဖြိုးမှုအရရော ကွက်တိကျနေတယ်လေ မင်းတို့ လူငယ်လေးတွေက အရမ်းကို စိတ်ကူးယဉ်ဆန်ဆန် တွေးလွန်းပြီး အရာတိုင်းက အကောင်းပေါ် အကောင်းဆင့်နေကြမယ်လို့ပဲ ထင်နေကြတယ်လေ မင်းတို့ကမှ တကယ့်ကို အရှုံးကြီး ရှုံးနေပြီဆိုတာကိုတော့ သဘောမပေါက်ကြဘဲနဲ့ ..."
သူက တံခါးကို တွန်းဖွင့်ကာ အိပ်ချင်ယောင်ဆောင်နေဆဲဖြစ်သည့် လင်းလဲ့ယန်အား ဖြတ်ခနဲ လှမ်းကြည့်လျက် အဓိပ္ပါယ်အပြည့်ဖြင့် ပြောလိုက်သည်။
"မင်းတို့က တစ်ဖက်သူ ပေးတဲ့အရာအပေါ်မှာ အရမ်း လိုချင်စိတ် မများလွန်းဘူးလား ကောင်းမှု မလုပ်ဘဲနဲ့ ကုသိုလ်မရဘူးဆိုတဲ့ စကားပုံတောင် ရှိသေးတယ်လေ တစ်ခုခုကို ရပြီဆိုရင် ဒါနဲ့ ပတ်သက်ပြီး ဘယ်လောက်အထိ ထောက်ပံ့ပေးနိုင်လဲ ဒါကို တတ်ရောတတ်နိုင်ရဲ့လား ဆိုတာမျိုးလောက်တော့ စဉ်းစားခဲ့ရမှာပေါ့ ဟုတ်တယ်မဟုတ်လား ..."
တံခါးပိတ်သွားသည့်တိုင် လင်းလဲ့ယန်၏ မျက်လုံးတို့ ပြန်ဖွင့်မလာ။ မျက်တောင်တို့သာ တဆတ်ဆတ် တုန်ရီနေပြီး မျက်ရည်စအနည်းငယ်ကိုပါ မပီဝိုးတဝါး တွေ့နေရပေသည်။
ဖန်ခွင်းက ကုမ္ပဏီသို့ ပြန်ရောက်သည့်အခါ လင်းလဲ့ယန်အကြောင်း အစီရင်ခံမည် ပြင်လိုက်သော်လည်း ကျိမြန်က လုံးဝ စိတ်ဝင်စားခြင်း ရှိမနေကြောင်း တွေ့လိုက်ရသည်။ မျက်မှန်တစ်လက်ကို တပ်လျက် ကွန်ပျူတာ စာရိုက်နေပြီး လက်ထဲတွင်လည်း အားကိုးအားထား ပြုရမည့် စာရွက်စာတမ်းတို့ ကိုင်ထားသည့် သူ့ပုံစံမှာ ပညာရှင်တစ်ဦးနှယ်ပင်။
"ရို့ ဘာအတွက်များ ဒီလောက်အထိ တလေးတနက်ကြီး လုပ်နေရတာလဲ ..."
ဖန်ခွင်းက ထိပ်ဆုံးရှိ စာအုပ်ကို ကောက်ယူကာ ဖတ်ကြည့်လိုက်သည်။ ၎င်းမှာ Stanislavski ၏ "My life in Art" အမည်ရ စာအုပ်ဖြစ်သည်။
"ငါ သရုပ်ဆောင်တာနဲ့ ပတ်သက်တဲ့ ဆောင်းပါး နည်းနည်းလောက် ရေးချင်လို့လေ ..."
ကျိမြန်က လက်ကို ယမ်းပြလိုက်သည်။
"အလုပ်များနေတယ် ပြောစရာမရှိရင် ထွက်သွားတော့ ..."
ဖန်ခွင်းက စခရင်ကို လှမ်းကြည့်ရင်း တစ်လုံးချင်း အသံထွက် ဖတ်လိုက်သည်။
"အတွေ့အကြုံကို အခြေခံကာ သရုပ်ဆောင်ခြင်းနှင့် ခံစားမှုရသကို ပေါ်လွင်အောင် တင်ဆက်ပြသခြင်း အကြားမှ အငြင်းပွားဖွယ်ရာ _ သရုပ်ဆောင်မှု အနုပညာ" ဘာလို့ ဒီလိုဆောင်းပါးမျိုး ရေးနေတာလဲ ပေကျင်း ရုပ်ရှင်အကယ်ဒမီကနေ ဧည့်ပါမောက္ခအဖြစ် လာရောက်ပို့ချပေးဖို့ တောင်းဆိုထားတာကို လက်ခံလိုက်တော့မလို့လား ..."
"မဟုတ်ဘူး ..."
ကျိမြန်က မျက်မှန်ကိုချွတ်ကာ ကူကယ်ရာမဲ့စွာဖြင့် ပြောလိုက်သည်။
"အရင်ဆုံး ထွက်သွားပေးပါလား မင်းက ငါ့အတွေးတွေကို အနှောင့်အယှက် ပေးနေတယ် ..."
"အိုကေ အိုကေ အိုကေ အိုကေ ငါ သွားပြီ ..."
ဖန်ခွင်းက လက်နှစ်ဖက်လုံးကို မြှောက်ပြလိုက်သည်။
"ဒါနဲ့ လင်းလဲ့ယန်ရဲ့ ကိစ္စကို ကိုင်တွယ်ပြီးပြီနော် စိတ်အေးလက်အေးသာ နေလိုက်တော့ ..."
ကျိမြန်က ရှုပ်ထွေးနေဟန်ဖြင့် ခေါင်းငြိမ့်ပြကာ သူထွက်သွားသည်အထိ စောင့်ပြီးကာမှ သက်ပြင်းအရှည်ကြီး ချလိုက်တော့သည်။
Xxxxxxxx
Chapter 120
လတ်တလောတွင် ရှောင်ကျားရှုသည် သင်ယူလေ့လာမှုထဲ၌သာ နစ်မြောနေသည်။ သူ follow လုပ်ထားသူ အများစုမှာလည်း ရုပ်ရှင်အကယ်ဒမီမှ ပါမောက္ခများနှင့် အနုပညာလောကမှ ဝါရင့်ပုဂ္ဂိုလ်များ ဖြစ်ကာ ထိုသူတို့၏ ဆောင်းပါးများအား forward ပြန်လုပ်ရခြင်းကိုလည်း အင်မတန် သဘောတွေ့နေပေသည်။ ထိုသည်ကို တွေ့ကာ အကြံရသွားသော ကျိမြန်က "လီလောင်ရှီးက မိုက်မဲတယ်" ဟူသည့် အမည်ဖြင့် account သစ်တစ်ခုကို ဖွင့်ကာ ရှောင်ကျားရှု၏ Weibo account နှစ်ခုလုံးကို follow လုပ်လိုက်ပြီး သူ မျက်စိလည်သွားစေရန် ကျန်သူအချို့ကိုပါ add ထားလိုက်သေးသည်။ သူသာ အထောက်အထား ခိုင်မာပါသည့် ဆောင်းပါးအချို့ကို မရေးခဲ့ပါလျှင် ရှောင်ကျားရှုက သူ့ကို သတိထားမိမည်မဟုတ်သလို သူပို့ထားသည့် သီးသန့်စာတိုများကို စာပြန်ပို့လိမ့်မည် မဟုတ်ချေ။
သူ့ကို ဘာမှမလုပ်ဖို့ ဖိအားပေးထားတာမှ မဟုတ်တာ အဲဒါကြောင့် အခု ရှောင်ကျားရှုနဲ့ အဆက်အသွယ်ရဖို့ အရမ်းကို ကြိုးစားနေပြီ ...
စာနှစ်ကြောင်းခန့် ရေးပြီးနောက် အကျင့်ပါနေသည့်အတိုင်း ဖုန်းကို ကောက်ကိုင်ကာ ရှောင်ကျားရှုထံ WeChat မှတစ်ဆင့် စာပို့လိုက်သည်။ စက္ကန့်အနည်းငယ်အကြာတွင် တစ်ဖက်သူထံမှ စာရေးနေသည့် ပုံစံမျိုး ပေါ်လာသည့်အတွက် ချက်ခြင်းပင် စိတ်သက်သာရာရကာ ပြုံးမိသွားတော့သည်။
(Messanger မှာ တစ်ဖက်က စာရိုက်နေရင် အလုံးလေးသုံးလုံး ပေါ်နေသလိူမျိုးကို ပြောချင်တာပါ)
ထိုတစ်ခဏ၌ပင် ရှောင်ကျားရှုက သူ့ကို လုံးလုံးလျားလျား မေ့မထား၊ သူ့စာများကို ဝင်ဖတ်နေဆဲဖြစ်ကာ စာပြန်ပို့သင့် မပို့သင့် ဒွိဟဲဖြစ်နေဆဲဖြစ်ကြောင်း သိလိုက်ရတော့သည်။ နောက်ဆုံးတွင် ပြန်စာတစ်လုံးမှ ရောက်မလာသည့်တိုင် ကျိမြန်၏ နှလုံးသားမှာ နွေးထွေးမှုကို ခံစားရဆဲဖြစ်သည်။
စာရိုက်နေသည့် သင်္ကေတလေး ပျောက်ကွယ်သွားသည့်အခါ ကျိမြန်မှာ နောက်ထပ်စာတစ်စောင် ထပ်ပို့လိုက်မိပြန်တော့သည်။
"မင်းရဲ့ ဇာတ်လမ်းအသစ်အတွက် ဆွေးနွေးပြီးသွားပြီလား ကိုယ် အကြံပေးတာကို လိုချင်သေးလား"
တစ်ဖက်မှ စာရိုက်နေသည့်ပုံ တစ်ဖန် ထွက်ပေါ်လာပြန်သည်။ ကျိမြန်လည်း ၎င်းကို အချိန်အတော်ကြာ စိုက်ကြည့်ပြီးကာမှ ဖုန်းကိုချ၍ စာပြန်ရေးလိုက်တော့သည်။
ရှောင်ကျားရှုမှာ လတ်တလောတွင် "လီလောင်ရှီးက မိုက်မဲတယ်"အမည်ရ account ပိုင်ရှင်ဖြင့် မိတ်ဆွေဖြစ်နေပေသည်။ ထိုနာမည်မှာ သူ့နာမည်အစစ် မဟုတ်နိုင်။ ပေကျင်းရုပ်ရှင်အကယ်ဒမီ၏ ဧည့်ပါမောက္ခတစ်ဦးဖြစ်ကာ အတွေ့အကြုံ ကြွယ်ဝလှသူလည်း ဖြစ်သည်။ သူ့ဆောင်းပါးများကို ဖတ်ကြည့်ရန် ရှစ်ထင်းဟန်က ပြင်းပြင်းထန်ထန် တိုက်တွန်း၍သာ မဟုတ်ပါလျှင် ရုပ်ရှင်နှင့် အနုပညာနယ်ပယ်တွင် ဤကဲ့သို့ ပါရမီရှင်မျိုး ရှိလိမ့်ဦးမည်ဟုပင် သိမည်မဟုတ်ချေ။ လီလောင်ရှီး၏ ဆောင်းပါးများမှာ အလွန်နက်နဲသိမ်မွေ့ကာ ဂန္တဝင်ရုပ်ရှင်တိုင်းကို သူခွဲခြမ်းစိတ်ဖြာပြီးလေတိုင်း ရှောင်ကျားရှုအနေဖြင့် အလွန်ပြောင်မြောက်နက်ရှိုင်းလှသည့် အချက်အလက်များကို လေ့လာခွင့် ရနေပေသည်။ ထိုသည်သာမက သူ့ကို သရုပ်ဆောင်စွမ်းရည် တိုးတက်စေရန် မည်သို့ ကြိုးစားသင့်ကြောင်းနှင့် ဇာတ်ကောင်၏ စိတ်နေစိတ်ထားကို နားလည်နိုင်မည့် နည်းလမ်းတို့ကို ရှင်းပြခဲ့သည့်အပြင် တစ်နေကုန် online ပေါ် ရှိနေသဖြင့် သူ မေးသမျှတိုင်းကို ချက်ခြင်း ပြန်ဖြေနိုင်ပေသည်။
ရှောင်ကျားရှုမှာ ထိုသူငယ်ချင်းအသစ်ကို အလွန်အမင်း သဘောကျသွားသည့်အတွက် သရုပ်ဆောင်ခြင်းမှအစ နေ့စဉ်ဓူဝကိစ္စများသာမက ဝါသနာတို့အကြောင်းကိုပါ အဆက်မပြတ် စကားဆက်စပ်မိသွားတော့သည်။ တစ်ဖက်သူက သူ့ကို သာမန်လိုပင် သဘောထားသည်ကပင်လျှင် စိတ်သက်သာဖွယ်ရာဖြစ်သည်။
"ကျွန်တော် ရိုက်ကူးရေးအဖွဲ့ထဲ ရောက်လာပြီ"
"နဂါးနှစ်ကောင်ရဲ့ရာဇဝင်" ရိုက်ကွင်းသို့ ရောက်သည့်အခါ လီလောင်ရှီးကို သီးသန့်စာပို့လိုက်၏။
"ရိုက်ကွင်းက ဘယ်လိုနေလဲ"
လီလောင်ရှီးက အလျင်အမြန်ပင် စာပြန်ပို့လာသည်။
"ဒါရိုက်တာက အရမ်းကို ကြင်နာတတ်တယ် ကျန်တဲ့ သရုပ်ဆောင်တွေကလည်း အရမ်းကောင်းကြပါတယ်"
"တော်သေးတာပေါ့ မင်းမှာ ပြဿနာရှိလာရင် အချိန်မရွေး ဆက်သွယ် အနုပညာလောကထဲမှာ ငါ့အဆက်အသွယ်တွေ ရှိနေသေးတယ်"
ရှောင်ကျားရှုက မလိုအပ်မှန်း သိသည့်တိုင် ကျိမြန်က အလေးအနက်ထားကာ ပြောမိဆဲဖြစ်သည်။
"ကျေးဇူးတင်ပါတယ် လီလောင်ရှီး ဒါပေမယ့် စိတ်ချပါ ကျွန်တော် ပြဿနာမဖြစ်စေရပါဘူး"
ထိုသို့ပြောပြီး မကြာမီမှာပင် ရှောင်ကျားရှုမှာ သူ့စကားနှင့်သူ ပြန်အရိုက်ခံလိုက်ရတော့သည်။ ဇာတ်လမ်းစရိုက်ပြီး နှစ်ရက်ပင်မကြာ၊ ဇာတ်လိုက်မင်းသမီးက ရိုက်ကွင်းမှ ထွက်သွားကာ သူနှင့် ရိုက်ကူးရမည့်အခန်းအားလုံးကို လူစားထိုးဖြင့်သာ ရိုက်ကူးစေတော့သည်။ သူမနေရာတွင် အစားဝင်ရသည့် လူစားထိုးမှာလည်း လူသစ်တစ်ဦးသာ ဖြစ်သည့်အပြင် ယနေ့ သူတို့ရိုက်ကူးရမည့် ဇာတ်ကွက်မှာ အရေးကြီးသည့်ဇာတ်ကွက် ဖြစ်နေပေသည်။ သူ သရုပ်ဆောင်ရမည့် အဓိကဇာတ်လိုက်သည် လက်စားချေရန်အတွက် မိစ္ဆာလမ်းကြောင်းသို့ ရောက်ရှိသွားပြီး ဇာတ်လိုက်မ၏ မိသားစုများကို အစုလိုက်အပြုံလိုက် သတ်ဖြတ်ခဲ့သည်။ ဇာတ်လိုက်မက သူ့ဗိုက်ကို ဓားဖြင့် ထိုးလိုက်မှသာ စိတ်ရူးဖောက်မှုတို့မှ နိုးထလာတော့၏။
မိစ္ဆာစိတ်တို့ ပျောက်ကွယ်ကာ သူမ၏ ဓားချက်ကြောင့် အသိစိတ် ပြန်လည် ဝင်ရောက်လာတော့သည်။ မူလကမူ ဇာတ်လိုက်မက သူ့ကို ချစ်ခဲ့သော်ငြား ကိစ္စအမျိုးမျိုး ဖြစ်ပွားခဲ့ပြီးနောက် သူမ၏ ခံစားချက်များအားလုံးကို စွန့်ပစ်ကာ သူနှင့် ရန်သူဖြစ်သွားခဲ့တော့သည်။ တစ်ဦးက မုန်းရာမှ ချစ်သွားပြီး ကျန်တစ်ဦး၏ အချစ်တို့မှာမူ အမုန်းအဖြစ်သို့ ပြောင်းလဲသွားချေပြီ။ စိတ်ခံစားချက် ပဋိပက္ခတို့မှာ လွန်စွာ ပြင်းထန်လှရာ အနုပညာလောကကို ရောက်လာကာစ အစားထိုးသရုပ်ဆောင်လေး မဆိုထားနှင့်၊ ဝါရင့်သရုပ်ဆောင်ဆိုသူများပင်လျှင် ကောင်းမွန်စွာ သရုပ်ဖော်ပြနိုင်ရန် မလွယ်လှချေ။
ထိုသို့ ဖြစ်သည့်တိုင် စိတ်ကို တင်းလျက်သာ ထိုလူစားထိုးဖြင့် ဆက်လက်ရိုက်ကူးရန် ကြိုးစားခဲ့သေးသည်။ သို့သော် သူမက သူ့ဗိုက်ကို ဓားဖြင့်ထိုးရုံမှ အပ မည်သည့်တာဝန်မှ မယူ၊ စာသားတစ်ကြောင်းပင် မဖတ်ခဲ့သည့်အပြင် ရယ်ပင်ရယ်နေသေးသည့်အတွက် တစ်စက္ကန့်အတွင်းမှာပင် ဈာန်ဝင်စားမှုအားလုံး ပျက်သုဉ်းသွားတော့သည်။
NG များ ခုနစ်ခါဆက်တိုက် ရရှိခဲ့ပြီးနောက် ရှောင်ကျားရှုမှာ သူ့အခက်အခဲကို ဒါရိုက်တာအား ထုတ်ပြောလိုက်ရတော့သည်။ သို့သော် ထိုသူက လက်ကိုယမ်းလျက် အလိုမကျဟန်ဖြင့် ပြောလာလိမ့်မည်ဟုတော့ မျှော်လင့်မထားချေ။
"ပင်းကျဲက ဟောလိဝုဒ်မှာ သရုပ်ဆောင်ဖို့ ရွေးချယ်ခံလိုက်ရတာ ဒါပေမယ့် ငါတို့ရဲ့ ရိုက်ကူးရေးနဲ့ အချိန်တိုက်နေတော့ အချိန်တိုအတွင်း ပြန်ရောက်လာနိုင်ဦးမှာ မဟုတ်ဘူး သူမရဲ့ အပိုင်းတွေကို ရိုက်ထားပြီး စာသားတွေကတော့ နောက်မှ အသံပြန်သွင်းလိုက်မယ် အစားထိုးရဲ့ မျက်နှာနေရာမှာ သူမရဲ့ မျက်နှာကို ကပ်လိုက်ရုံပါပဲ မင်းအနေနဲ့ ပင်းကျဲရဲ့ သရုပ်ဆောင်စွမ်းရည်ရယ် အထူးပြုလုပ်ချက် ဖန်တီးတဲ့သူတွေရဲ့ အရည်အချင်းကို ယုံကြည်သင့်တယ်နော် မင်းရိုက်ရမယ့် အပိုင်းကိုသာ အာရုံစိုက်ပြီးရိုက် သူများကို လိုက်ပြီး စိတ်ဝင်စားမနေနဲ့ ..."
"အယ် ဒါရိုက်တာကြီး ကျွန်တော်ပြောချင်တာ ဒီလိုမဟုတ်ဘူးလေ ဒါက ခက်ခဲတဲ့ ရိုက်ချက်လည်း မဟုတ်ဘဲနဲ့ ဘာလို့ အထူးပြုလုပ်ချက်တွေ သုံးမှာလဲ ပြီးတော့ လူစားထိုးရောပဲ ဒီလိုကြီးလုပ်လို့ သင့်လျော်ပါ့မလား ကျွန်တော့်ကိုယ်ကျွန်တော် တစ်ကိုယ်တော်ပြပွဲ လုပ်နေသလိုကြီးပဲ ခံစားနေရတယ် ဘယ်လိုမှ သရုပ်မဆောင်နိုင်တော့ဘူး ..."
ရှောင်ကျားရှုအဖို့ ဤသို့သော အခြေအနေမျိုးနှင့် ပထမဆုံးအကြိမ် ကြုံတွေ့ဖူးခြင်းဖြစ်ရာ အလွန်ပင် မျက်စိပွင့် နားပွင့်သွားရတော့သည်။
"တစ်ယောက်တည်း ဘယ်လို သရုပ်ဆောင်ရမလဲတောင် မသိဘဲနဲ့ ဘယ်လိုဖြစ်ပြီး သရုပ်ဆောင် ဖြစ်လာတာလဲ သရုပ်ဆောင်ကောင်းတစ်ယောက်ဆိုတာ ဘယ်လိုအခြေအနေမျိုးမှာဖြစ်ဖြစ် ကိုယ်သရုပ်ဆောင်ရမယ့် အပိုင်းကို ကောင်းကောင်းမွန်မွန် သရုပ်ဆောင်နိုင်တယ် ကောင်းကောင်းမလုပ်နိုင်ရင် အဲဒါ မင်းကိစ္စ တစ်ခြားသူနဲ့ ဘာမှ မဆိုင်ဘူး ..."
သူ့စကားတို့ကြောင့် ရှောင်ကျားရှုမှာ တစ်ချက်တည်းဖြင့်ပင် ဆွံ့အသွားရတော့သည်။
သူက မျက်နှာကို ပွတ်သပ်လျက် ကူကယ်ရာမဲ့စွာဖြင့် ပြောလိုက်၏။
"ဒါဆိုလည်း ဒါရိုက်တာကြီး အရှိန်ယူလို့ရအောင် ကျွန်တော့်ကို အချိန်နည်းနည်းလောက် ပေးပါဦး ဇာတ်လိုက်မင်းသမီးအသစ်ကို တစ်ခါတည်းနဲ့ လိုက်လျောညီထွေဖြစ်ဖို့ မလွယ်လို့ ..."
"ကောင်းပြီ ဒါဆိုလည်း ခဏနားလိုက် ..."
ဒါရိုက်တာက သူ ဆက်မပြောတော့ကြောင်း တွေ့လိုက်ရသည့်အခါ လက်ကိုယမ်းလျက် သဘောတူလိုက်တော့သည်။
ရှောင်ကျားရှုမှာ နေရာတွင် ထိုင်ရင်း စဉ်းစားလေလေ သူ့ကို မှားယွင်းအပြစ်တင်သည်ဟု ခံစားရလေပင်ဖြစ်သည်။ ထို့ကြောင့် ဖုန်းကိုထုတ်လျက် "လီလောင်ရှီးက မိုက်မဲတယ်" account သို့ စာပို့လိုက်၏။
"... ဖြစ်ကြောင်းကုန်စဉ်ကတော့ ဒီလိုပဲ ဒါရိုက်တာရဲ့ စကားတွေက ထူးဆန်းသလိုပဲနော် ကျွန်တော်ဖြင့် သူ့ အတွေးတွေကို နားကိုမလည်တော့ဘူး ကျွန်တော်သာ ဒါကိူ ကောင်းကောင်း သရုပ်မဆောင်နိုင်ရင် သရုပ်ဆောင်ကောင်းတစ်ယောက် မဖြစ်နိုင်တော့ဘူးလား ..."
ကျိမြန်မှာ စာဝင်လာသည့်အသံ ကြားလိုက်ရသည်နှင့် တစ်ပြိုင်နက် ဖုန်းကို ကောက်ကိုင်ကာ စက္ကန့်ပိုင်းအတွင်း စာပြန်လေ့ရှိသည့် အကျင့်တစ်ခု တိုးလာပေသည်။ မူလက လမ်းမထက်တွင် ကားမောင်းနေခြင်း ဖြစ်သော်ငြား ရှောင်ရှုထံမှ စာရောက်လာကြောင်း တွေ့လိုက်ရသည်နှင့် တစ်ပြိုင်နက် ချက်ခြင်း ကားကို လမ်းဘေးချရပ်ကာအလေးအနက် စာပြန်ပို့လိုက်သည်။
"သေချာပေါက်ကို မင်းက သရုပ်ဆောင်ကောင်းတစ်ယောက်ပေါ့ ဒါရိုက်တာကမှ concept ကို တိတ်တိတ်လေး ပြောင်းပစ်လိုက်တာ လူနှစ်ယောက် မျက်နှာချင်းဆိုင်ပြီး ဒိုင်ယာလော့တွေ ပြောကြ သရုပ်ဆောင်ကြလို့ အပြိုင်ရိုက်ချက်လို့ ခေါ်တာလေ တစ်ယောက်တည်း ရိုက်ရတာနဲ့ သဘောတရားချင်းမှ မတူတာ နှစ်ယောက်ရိုက်ရမယ့် ဇာတ်ကွက်ကို မင်းတစ်ယောက်တည်း ရိုက်ခိုင်းတာ ဒါရိုက်တာက တာဝန်မဲ့တာပဲ ..."
ထိုအခါမှ ရှောင်ကျားရှု၏ စိတ်ခံစားချက်တို့ တစ်ဖြည်းဖြည်း အဆင်ပြေသွားတော့သည်။ သူက တွေးဆဆ မေးလိုက်၏။
"ဒါဆို အခု ကျွန်တော် ဘယ်လိုလုပ်သင့်လဲ နှစ်ယောက်ရိုက်ရမယ့် ဇာတ်ကွက်တွေမှာဆို ကျွန်တော်က တွဲဖက်ရဲ့ လွှမ်းမိုးတာကို အလွယ်တကူ ခံရတယ် တွဲဖက်က သရုပ်ဆောင်ကောင်းရင် ကျွန်တော်လည်း ကောင်းတယ် တွဲဖက်က ကောင်းကောင်း မလုပ်နိုင်ရင်တော့ ကျွန်တော်လည်း ဇာတ်ကောင်စရိုက်ထဲကို ဝင်မလာတော့ဘူး ခင်ဗျားကတော့ သိချင်မှ သိလိမ့်မယ် အဲဒီ့အစားထိုးကလေ ဘာစာသားမှလည်း မပြောဘဲနဲ့ ကျွန်တော့်ဗိုက်ကို ဓားနဲ့ ထိုးပြီး ရယ်ရုံပဲ ရယ်နေတာ တကယ် သူမနဲ့ဆို လုံးဝကို သရုပ်ဆောင်လို့ မရတော့ဘူး"
ထိုစာကို ဖတ်နေရင်း ကျိမြန်မှာ ရှောင်ကျားရှု၏ ဒေါသကြီးနေမည့် မျက်နှာလေးကိုပင် မြင်ယောင်မိလာတော့သည်။
အခုတော့ တွဲဖက်ကောင်းတစ်ယောက် ရှိရခြင်းရဲ့ ကောင်းကျိုးကို သိပြီမဟုတ်လား ...
ဤသို့ ပြောလိုက်ချင်သော်ငြား ပြောရဲသည့် သတ္တိလည်း မရှိသည့်အတွက် လေးနက်သည့် အကြံတစ်ခုကိုသာ ပေးလိုက်ရတော့သည်။
"ဒါဆိုလည်း အဲဒီ့အခန်းကို အကောင်အထည်မရှိတဲ့ ဇာတ်ကောင်အဖြစ်ပဲ သဘောထားလိုက်လေ မင်းရဲ့ စိတ်ကူးစိတ်သန်းကို သုံးပြီးတော့ တွဲဖက်တစ်ယောက်ကို ဖန်တီးလိုက် ပြီးမှ စကားပြောတွေ၊ အမူအယာတွေကို ထုတ်လိုက်ပေါ့ ပထမဆုံး စိတ်ပြေလျော့စေမယ့် လေ့ကျင့်ခန်းကိုလုပ်၊ ပြီးမှ အာရုံစူးစိုက်ရေး လေ့ကျင့်ခန်းကိုလုပ် နောက်ရိုက်မယ့် နှစ်ယောက်အခန်းကို စိတ်ကူးယဉ်ပြီး မင်းဘာသာမင်း သရုပ်ဆောင်ကြည့်နေ"
ထိုသို့ လုပ်ရန် နည်းလမ်းမရှိသည့်အတွက် ရှောင်ကျားရှုက မျက်နှာကို စူပုပ်လျက် ပြန်ပြောလိုက်သည်။
"ကောင်းပါပြီ ဒါပေမယ့် လီလောင်ရှီး ခင်ဗျား ကျွန်တော့်ကို လိမ်ထားတယ်နော် အတွေ့အကြုံကို အခြေခံတဲ့ သရုပ်ဆောင်ချက်ကို ထောက်ခံအားပေးသူ မဟုတ်ဘဲနဲ့ စိတ်ကူးယဉ် ဖော်ပြချက်အပိုင်းကို ပိုပြီး အားသန်နေတာ မဟုတ်လား"
"ဒီလိုပြောလို့လည်း ရပါတယ်"
ကျိမြန်က နူးညံ့စွာ ပြုံးလိုက်သည်။
"ဒါပေမယ့် မင်းလည်း ဝန်ခံရမယ်နော် အတွင်းနဲ့ အပြင် နှစ်ဖက်စလုံးရဲ့ တွန်းအား မရှိရင် အတွေ့အကြုံကို အခြေခံတဲ့ သရုပ်ဆောင်တစ်ယောက်က သရုပ်ဆောင်ဖို့ ခက်ခဲတယ်ဆိုတဲ့ အချက်ကို ခံစားချက်ကို အဓိကထား ဖော်ပြတဲ့သူကကျ ကန့်သတ်ချက်တွေ မရှိဘူး မင်းရဲ့ သရုပ်ဆောင်တဲ့ စတိုင်ကို ဆက်တိုက် တိုးတက်လာအောင် လေ့လာသင့်တယ် ပုံစံတစ်မျိုးတည်းကိုပဲ ဖက်တွယ်မနေနဲ့"
"လောင်ရှီးရဲ့ စကားတွေကို ရင်းနှီးနေသလိုပဲ"
ရှောင်ကျားရှုမှာ တစ်ခဏတာ ကြောင်အသွားပြီးကာမှ ဆက်ရေးလိုက်တော့သည်။
"ကျွန်တော် ကြိုးစားပါ့မယ်"
ရှောင်ကျားရှု၏ စကားများမှာလည်း လွန်စွာ အကျွမ်းတဝင် ရှိလှသည်။ U.S တွင် နှစ်ယောက်အတူတူ ရုပ်ရှင်ရိုက်ခဲ့သည့် အချိန်များသို့ ပြန်ရောက်သွားသည့်နှယ်။ တစ်ယောက်ကိုတစ်ယောက် အားပေးကာ၊ ဂရုစိုက်ရင်း တစ်ယောက်ထံမှ တစ်ယောက် သင်ယူကြရင်းဖြင့် အားလုံး အဆင်ပြေနေခဲ့ချိန် ဖြစ်ပေသည်။ ကျိမြန်မှာ ဟန်မဆောင်နိုင်လောက်အောင်ပင် ပြုံးမိသွားသည့်တိုင် သူ့အကြည့်တို့မှာမူ ခါးသီးမှုတို့ ပြည့်နှက်နေပေသည်။ သူက ပွေ့ဖက်အားပေးသည့် sticker တစ်ခု ပို့ပေးကာ ဖုန်းကိုသာ ငေးကြည့်နေလိုက်တော့သည်။
ရှောင်ကျားရှုမှာမူ ဆက်ပြီး စာပြန်ပို့မလာတော့။ ရိုက်ကူးရေး ပြန်လည်စတင်နေ၍ ဖြစ်ပေလိမ့်မည်။ သို့သော် ကျိမြန်၏ စိတ်တို့မှာမူ မအေးချမ်းနိုင်။ ကားကို "နဂါးနှစ်ကောင်ရဲ့ ရာဇဝင်" ရိုက်ကွင်းရှိရာသို့ ပြန်လှည့်ရင်း ဖန်ခွင်းကို ဆက်သွယ်လိုက်သည်။
"ကျန်းပင်းကျဲက အခုတလော ဘာတွေလုပ်နေတာလဲ သူမက ဘာလို့ "နဂါးနှစ်ကောင်ရဲ့ ရာဇဝင်" ရိုက်ကူးရေးကနေ ရုတ်တရက်ကြီး ထွက်သွားရတာလဲ ..."
ဖန်ခွင်းက အံကို တင်းတင်းကြိတ်လျက် ပြောလိုက်သည်။
"ကျွန်တော် ပြောပြမယ် ကျိကော ကော အခုတလော အရမ်းကို အချိန်ဖြုန်းနေတယ်နော် တစ်နေကုန် စာရေးရင်ရေး မရေးရင် သူများတကာတွေရဲ့ ကိစ္စကိုပဲ လိုက်စပ်စုနေတာ ပါပါရာဇီ ဖြစ်ချင်နေတာလား ..."
"ကျန်းပင်းကျဲ ဘာလုပ်နေတာလဲ ဆိုတာကိုသာ ပြောစမ်းပါ ..."
ကျိမြန်က ဆက်တိုက် မေးနေလိုက်သည်။
Xxxxx