تُراهُ يدري بأنَّ القلبَ مَسكنهُ
ولستُ أُبصرُ بالعينينِ إلا هو
القلبُ يسألُ عيني حينَ أذكرهُ
يا عينُ قولي متى باللهِ نلقاهُ ؟
يا عين قولي لنا : هل بات يذكرنا؟
وهل ستخبر عن أحزانه الآهُ
إن كان غاب لأنّ الحزن يسكنهُ
يا ليتني الحزن كي أحظى بسكناهُ
♡♡♡⚖️
خيـالـي الأسود 11:11
فاطمـة عبـد
التصـويـت، متابعـة الحـساب MM16fofo، التعليـق بيـن الفقـرات فكـتوريـاتـي ♡
♡♡♡
سيلفــا
::- دماء مُتناثرة هُنا وهُناك..
يـداي قد تلطختا بالدمِ أيضاً، أنفي امتلئ برائحة الموت أكادُ أجزم إني رأيتُ عزرائيل وهو متوشح بالسواد،
مُتهيءٌ ليقبض ذاك الشيء الذي يُسمى بالروح، إذ إنهُ
بدأ يقتربُ منها، خطوةُ خطوة وكل خطوة منهُ أشعرُ
بثقلِ جسـدي، تزاحِمُ الدمو؏ في محاجر عيني، أنفاسي هي الأخرى بدأت تتصادمُ مابينها، قلبي أخذ يخفقُ
ويضطرب، أحسستُ بشيءٍ صار ينسلخ من جسمِها
ويسحب أجفانها، أطبَقت على عينيها وأنطفئ النور فيهما..
::- صـوت صرخاتها، وصوت أنينها من شده الالم وصوت ضحكاتهم تعالت في المكان صوت شهكاتها
الأخيرة مكاعد تفارغ مسامعي، صوت همساتها وهي تهمس بأسمـي كان كفيل أنو يحطم شتات أخر شيء
في قلبـي..
::- اطلقوا النار عليها گدام عيني وانا أشوفها واكعة بالصالة غرگانه بدمها، أحسس عيوني غوشت من الصدمه ورعُب المشهـد يللي صار كدام عيني وهمه
يضحكون بقرف ويتوعدون بأسم أبوي، سياسـة أموال، مناصـب، خطط، أكاذيب، أكل حقوق الناس، كلها وصخ
دنيا وقتلووا روح شخص بريێ من أجل هذه الاشياء!
- كاعده ؏ عتبة الدرج من فوك ومطلعة بس عيونه وانا أدحگ عليهم شلون واكفين فوك راسها وهي غركانة بدمها، سمعت شخص منهم يكول:
... حذرنا وكلنه أذا ماتنضم لحزبنه وتشتغل ويانة ودخلنا لسياسـة راح تندم أستاذ محمد بس هو ماسمع منه ولا وافق ؏ شروطنه.
- سيـدي ليش قتلتها هسه شيخلصنه من المُهيع؟
::- بعده مراد علية دخل شخص عليهم سكتم ونطق هذا الشخص بكلام اشبة بالهمس مافهمت شيء منه
- سيدي المُهيع، الشايب يللي قتلها!
::- التفت ؏ الولد واردف:
المُهيع: أطلعوا برا كواو.. أنه اعرف شلون أتصرف وياكم بسيطة.
::- جان يتوعدلهم بس صوته جان مو واضح حيل بالنسبة ألي لأن اذاني صار بيهن صفير من ورا صوت
الطلق وهو مخلـي لثام ؏ وجهه ومطلع بس عيونـة!
- طلعوا من البيت بقى هو واكف فوك جثة مامة حنان مادري بشنو يهمس ورفع عينة علية، أجتـي عيني بعينة
سرهه رجيف بكـل جسمـي واطرافـي تجمدو طال بالنظر علية وهو يدحگ بعيوني، احس خدوده أرتفعوا
من ورا الثام نتيجة للابتسامة مستهزأه رفع كف ايده بطريقة التحية وطلع من البيت!
جانـت عيونه مُميزات لدرجة مراح أنساهم بيوم جانن عيونة بالون الأزرق الفاتح بس مو بريئات حادات وعقدة حواجبة يللي تخوف شكلة أنطبع بعقلي مراح ينحذف أبداً.
::- نزلت بخطوات ثقيلة وانا متوجهه لجثة مامة حنان يللي واكعة ؏ الارض بالصالة وغركانة بدمها جنت أتمنى أن اشوفها تتنفس بس خابت كل ضنوني وأنا اشوف نفسها مقطو؏..
- عيوني يحرگني لان حابسة بيهن الدمو؏ تقدمت كعدت يم راسها رفعتة خليتة بحضني وانا أنادي باسمها لعل تكعد جان كل تفكيري هي بس متصاوبة مو ميتة
كعدت اقنع بروحي انو هي جاي تتنفس بس نفسها مقطو؏ وجسمها كاعد تقل درجة حرارتة
صرت احجي بلا وعي مني واهز بيها قوي اريدهاا تصحى..
::- كوميي كوميي مامة لاتروحين وتعوفيني لاتروحينن وتيتميني مرتيييين كومييي عفيةةةة بنتج راح تنكسر وراج وانتِ ماتقبلين بكسرتيي كوميي عفيةة كومييي
ماريد اعيش اليتم مرتين ماريد تعوفيني بهل دنيا وحدي بدون ام تحن عليه؟
يمةة ليشش ماتردين علية كومي وانا انطيج روحي ليشش طلعتي ليش ماخليتيهم يقتلونيي اني ليششش.؟؟
صرت اعيط واملخ بشعري واهز بيها اريدها تكوم بس لاحياة لمن تنادي راحت قره عيني راحت جنتي.
::- أحس بواحد شالني من الكا؏ وحضني ؏ صدره حيلل، رفعت راسـي شفتة عمو خيال!
:- يمامتي أنتِ وياية عاينيلي يروحي لاتغمضين عيونج.
::- يحجي وياية واني أحس عيوني ينسلبن مني صرت أفتح واغلق بيهم احس الهوى شح مني صرت أشاهگ كل قوتي اريد هوى بس مجاي أكدر اتنفس عدل.
اسمعة يحجي وياية بس بالي مو وياه بالي وية مامه يللي جاي يشيلونها المسعفين اريد انزل من حضنه
اروح اركض عليها احضنها اشم ريحة المسك يللي تفوح منها بس مااكدر احس اطرافي كلهن متشنجات
اريد احرك ايدي ماكاعد اكدر احس جسمي نص منه خدران ومنمل بس فاتحة عيوني واسمع العمو خيال
وهو يحجي وياي
:- شبيج سيلفـا؟ ليش مداتحركين أيدج؟
- سكت شوية صافن بوجهيي ورجع صاح بصوت عالي ؏ الطبيب يللي وية المسعفين صار يحجي وياه
سمعت الطبيب يكول لاتتجمعون عليها افتحووا الشبابيك صابتها جلطة خفيفة فرغووا المكان
صح حسيت صابتني جلطة لان نصف من جسمي ما احس بية بس ادحگ عليهم وخيال حاضن راسي ؏ قلبة بكـل قوتة ولسانة مابطل يلهج ايات قرآنية.
اجه الطبيب والمسعفين يللي وياه حتى ياخذوني ماقبل هو شالني وانا لا احرك ايد ولارجل بس فاتحة
عيوني دموعي تجري وعيوني بدتت تنسد من كيفها
وبعد ماحسيت ؏ شيء غير الضلام داهمني..
::- استيقظت كأنما جنت في حلم مُزعج ومخيف، ادحگ ؏ الكـل جمـي أمجاد وسـدره وهيلينا وسجاد
وخيال، روينه، ردوينه، والمكان غريب بارد اغلبيتة بالون الأبيض ادركت بهذه اللحظة انو اني بالمستشفى
رفعت نضري عليهم يحجون وياية بس ما افهم أي شي
من كلامهم حولت نضري من بين الزحام وتجمعهم إلى
طيف أمـي جانـت واكفة بيناتهم مبتسمة ابتسامتها الحنونه، صرخت بصوت مخنوگ ومكتوم من الصراخ.
::- مامـة؟
- ماردت علية ولا لاحظت وجودي... مامة.. يمةةة
أصرخ ولاتجيب كأني فقدت صوتي أو هي ماتسمعني
رفعت ايدي حتى تنتبة علية بس ماكو فائدة...
وخرت نظري عنها ودورت نظراتي بالمكان شفت جسداً
غُطي بقماشة بيضاء عرفت حينها انو هي ماتت، اقتربت مِنهم وما لقربي فائدة فهي روح لاترى بدات
المشاهد تتوالى على ناظري وانا اشوف المكان يللي واكفة بي، تبين عندي انهُ ثلاجة الموتى والمُغتسل
صار يقلب جسدها يمينًا ويسارا دون حوله ولاقوة أخذوا جسدها وأنا اتبعهم...
بقيت اناظرهم وهم شايلينها الى ان غطى جثتها الثرى (التُّراب النَّدِيّ)...
- "فهذي هـي النهاية وهذه هـي البداية"
وَجَاءَتْ سَكْرَةُ الْمَوْتِ بِالْحَقِّ ذَلِكَ مَا كُنْتَ مِنْهُ تَحِيدُ [ق: 19].
::- كعدت وانا اشهك بصوت عالي وفاتحةة عيوني بكل وسعهن جان حلم اشبة بالحقيقة أجانـي صوته وهو يكول:
:- أسم الله عليج بنيتي شبيج ليش هل شهگه؟
::- رفعت نضري علية لكيته بجانب راسي ولازم القرآن
اردفت وانا اعرف الجواب السؤالي بس حاولت اجذب نفسي..
- عمـو خيال وين مامة حنان؟
تنهد بحزن ورفع نضرة ألي وجاوبني جواب احسة كسر شيء بداخلي بعد مايتصلح:
:- إنا لله وإنا إليه راجعون، توفت وقبل يومين دفناها وهسه أمجاد والبقية بالفاتحة ماكدرو يضلون اهنا أكثر وانه كتلهم ابقى يمج وهمه يضلون بالفاتحة
::- هو حجة كل هذا الكلام وانا ركزت بس ؏ كلمة "إنا لله وإنا إليه راجعون" وتوفت!
توفت؟ يعنـي بعد ماكوو صوت اميي بالبيت ماكوو حنانها وايدها الدافية يللي تلامس شعري؟ عمووو خيالل انت واعييي شنوو كاعد تكول؟؟؟
:- سيلفـا اهدي عيوني انتِ كلنا ؏ هذا الطريق ترحميلها كاعد تأذينها ببجيج وصراخج هذا يابة.
::- عموو افهمنيي افهمنيي الخاطر الله ول هيي ماتت مقتولة وانا شفت القاتل بعيونيي بعيونيي هذولي يللي راح ياكلهمم الدود!
- شفتهم وهمه يضحكون فوك راسها وهي غركانه بدمها شفتهم شلون كتلوها وهي بريئة في سبيل
ينتقمون من ابوية سمعتها وهي توصيني ؏ نفسي قبل لا تموت تعرف نفسها راح يقتلوهااا تعرف لك كالتلي لا
تطلعين من المخزن حتى مايشوفوني ويقتلوني!
عرضت نفسها للخطر وماتت في سبيل تخليني
عايشة، شلييي بروحيي اذا هي مو بهلل الدنياا؟
شلييي بالهوى يللي يدخل رئتي وهي تتنفس التراب؟
ولك عمووو تيتمتتت مرتتينن مرتيننن! منو بعد يستقبلني من ارجع من المدرسة منو بعد يراجعلي الماده؟
تعرف عموو مع العلم جان عدها دوام بالجامعة وهي دكتورة جامعية وعدها مسؤوليات بس جانت وياية
بكل خطوة بدراستي صارتلي ام مافد يوم حسستني انو هيي مره اب! ولا فد يوم جرحتني بحجاية
جانت إلي صديقة واخت مو بس أم جانت بير اسراري
جنت أي شيء يصير وياية احجيلها الها بدون تردد
ماجانت من الامهات يللي ماعدهن ثقة ببناتهن ولاجانت من الامهات يللي يكسرن ببناتهن كدام خواتهن
جانت دائما تدعمني وتوكف وياية ضد الناس كلها
تدري جنت قبل سنة مامتحجبة والكل صار يحجي
ليش مامحجبيه وهي صارت جبيرة! بس جانت ترد عليهم دائماً
::- معليكم ببنيتي هي حرة تريد تلبس الحجاب لو لا واكيد بنوتي واعية وتعرف الحلال من الحرام!
- بحجيها هذا خلتني اعرف انو عندي ام نعمة ولازم ماانزل راسها ولا اجيبلها حجايه من ناس ماتسوه
فقررت اتحجب من نفسي ولربي ولماما، تخيل فرحتها من شافتني بالحجاب! انت متخيل كمية الدمو؏ يللي
بجتهن بهذاك الوقت؟ جانـت فرحانة لدرجة سوت حفلة لان تحجبت وعزمت كل معارفها..
كلامها اخخخخ ياكلامها كسرني وهي تكول بريني الذمة ول شبري الذمةة شبريييي؟؟؟
انا حقـي لازم اكوللها تبريني الذمه مو هيي انا يللي لازم اعتذر انا يللي لازم ابوس راسها واحضنها لگلبيي
راحت عزيزة روحي وگلبي بعد ياهوو يللي يداويي علتيي عمووو؟؟
:- انه اداويها انه اخليي كل جروحج يتشافن وياج خطوة خطوة مراح اعوفج لو ادري الدنيا كلها توكف
ضدي بعد مااعوفج وحدج جربت عفتج مرة ونكسر ضهري ؏ فركاج هاي المره ؏ كص اركبتي..
::- عموو وگلبييي وتأنيبب الضميرر شلوون بييي شلون احسس روحي تريد تطلع من جسدييي عمووو!
- حضن راسيي لگلبة حيللل وهوو يهمس:
:- شيبـة گلبي وشهگة صباي، أنه اداويهن جرح جرح
بس عاينيلي ولاتعوفين نفسج للضلام لاتعوفينها.
::- ضليت فترة بحضنه وهو يمسد ؏ شعري ويهمس بادعية وأيات قرآنية.
بعدها ابتعدت عنه واردفت:
عموو اريد اروح لقبرها أخذني يمها مشتاقة لريحتها مشتاقة لحنيتها حتى لو وهي بالقبر بس حنيتها
مختلطة بالتراب، عمتتت عيني عليج يمةة مالازم ينرد عليج التراب وانتِ أحن بشر بهل دنيا راحت دنيتي بعدج ينور عيني وصارت ظلمة بفركاج ..
:- كومـي اخذج الها واطفين نار گلبج بشوفتها.
::- كمـت واول ماوكفت لزمتني الدوخة حسيت الكا؏ فترت بية كوة سيطرت ؏ نفسي وعمو خيال اول مانتبة علية اجه بسرعة سندني لازمني من خصري
يمشيني ؏ كيفة طلعنه من المستشفى بكبرها متوجهيين للمقبرة متوجهين لحنينة گليبي يللي غطاها لتراب، وصلنة للمقبرة واحسس روحيي فرفحتت عليها
دخلنا واول ما وكعت عيني ؏ قبرها يللي بعده رطب وماناشف حسيت الدنيا ضاگت بية بعد شتاخذين مني
يدنيا؟ يتمتيني مرتينن مرتين بس المرة الاولى ماحسيت مثل هذا الشعور فقدت عزيزة گلبيي ودنيتي
وصلت يم قبرها وطال نظري الها احسها واكفة كبالي وتنضرلي بنظراتها الحنينة وابتسامتها المريحة يللي ترد
الروح بده عمو خيال يقرة قرآن بصوته وانا شكوو شيء كاتمتة طلعتة بوكفتي كدام قبر عزيزتي
ضل يقرة قرآن وصوتـة من كد مامريح دموعي تنزل بغزاره ؏ خدي وانا اعاتب بيها
::- ليش رحتي وخلتيني ليش؟ مو أنا بنتج وحيدج؟
مو انا عزيزه گلبج وروحج من هل دنيا ليش عفتيه وحدها لعد كومي مامة كومي، شوفي حالي شصار
بفراكج تعبت ونهد حيلي عليج وروحتيي فرفحت ؏ ملكاج وگلبيي ملجوم عليج ماعرف من وين ابدي اداوي ماعرف يمةةة كومييييي
ضليت اصرخ واعاتبب الى إن وصل عمو خيال الاية يللي تكول:
{وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ} [البقرة: 155-157].
::- من سمعـت هذه الأية مسحت دموعـي ونزلت راسي ؏ قبرها بستة وشلت بيدي تراب من قبرها واردفت:
::- وحق عيونج يللي غطاهن التراب وحرمني منهن مراح اخلي القتلج يعيش بسلام وحق كل رمش بيهن
وحق رجفت ايدج وكلامج الي وحنيتج يللي نحرمت منها نهايتهم راح تصير ؏ ايدي وبدا أنتقام سيلفـا بنت الدليم.
وكفت ؏ حيلي واخذت تراب من قبرها خليته بشالي وشديت علية حتى كل مااشتاقله ومااكدر اجيها اشم ريحتها بية.
كمل عمو خيال قراية القرآن وطلعنا وقرينالها الفاتحة وطلعنا من المقبرة.
تاركة بيها قطعة من روحي ونضر عيني يللي نعمت بعدها وصرت امشي بدون روح بعد روحتها من هل دنيا عسى مكانج هسه احسن من انا بيه
ربي يرحمج يايمةة وياقرة هل عين ونضرها عفتج بالمقبره بس ماراح يبقى قاتلج حر وانتِ جوه التراب
يجي يوم وعينة تنعمي من هل ضوة مثل ماعينج ترستها التراب هسه مودعه حبيبة سيلفـا.
وصلنـي عمو خيال للبيت ودخل وياية صار گبالي أمجاد وسجاد اول ماشافوني جمي سريع علية
وحضنوني وهمه يسألون عن حالي
امجاد: شلونج بنت اخوها شلون صرتي؟
::- شنو حالي بعد فراكها أمجاد؟
امجاد: الله يرحمها برحمته الواسعه عيون اخوها انتِ هسه هي بمكان احسن من مكانة ترحميلها.
- هزيت راسي لان ماعندي طاقة احجي وية احد ابدا
دخلت للبيت لكيت سـدرة وعمتي ميسون سلمن علية
وعزني وانا بس اهز براسي ماحجيت شيء هنه من شافني هيج خلني ؏ راحتي وانا دخلت اتمشى للصالة بخطوات ثگيلة وعقلي يسترجع كل شي صار وياية.
صرت ادحك ؏ المكان يللي كتلوها بي وصورتها تصير كدامي وهي غركانه بدمها وصوت صرختها ماكاعد
يطلع من راسي صرت اعيط بعلووا صوتي واملخ بشعري سمعت اصوات اهواي حولي يحجون وياية
بس اني فاقدة مااحس عليهم ولااسمع يللي يحجونه
وكل يللي اسمعه هو صرخة مامه حنان واصوات ضحكاتهم يللي تتعالى براسي.
حسيت انشاليت من الكا؏ ونرش ؏ وجهي مي شهكت شهكة احسها شكت گلبي ودموعي صارت تنزل بغزارة
؏خدودي والشهكه ملازمة بلعومي حسيت ؏ شخص
حضني التفتت شفته امجاد حاضني لصدرة وهو يهمس
امجاد: اسم الله عليج عيون اخوها شبيج ليش هيج انتكست حالتج مرة ثانية اهدي يابة اهدي
::- انا اناشغ واشهك بالبجي احس يوم الحادث انعاد علية من جده وجديد كاعد اشوفها واكعة كدامي
وغركانة بدمها وعيون القاتل انطبعت براسي وبمخيلتي ماتقبل تطلع منه احس روحي تشتعل نار واني اتذكر
شلون جان مبتسم مستهزاء وشكولهم المقرفة صارت كبال عيني وصوتها وهي جانت تحجي وياهم بكل شموخ وماتوسلت الهم ولاتنازلت وماتت وهي صاحبة
عزه نفس وكرامة ماتت وكرامته فوك الكل وماكدرو ياخذونها منها ضليت غصة بنفسي انو احضنها لكلبي
الأخر مره شلون سمحت تموت وانا ماحاضنتها ولا كايلتلها شكثر انا احبها ولا معبرتلهة عن امتناني
لوجودها بحياتي بس شيفيد الندم هسه شيفيد بعد ماغطاها التراب؟
ابتعدت من حضن أمجاد وصعدت الغرفتي وانا اتصفن بالفراغ، مرت ايام وانا حابسه نفسي بالغرفة ماطلعت
حدي اسبح واصلي وارجع انام والاكل تجيبه المساعده بس اكل منه شوية وارجعة وياها، ماكدرت انزل ابداً
جوة وهي مو بالبيت واتذكر شلون جانت واكعة بالكا؏
ضليت ؏ هاي الحالة أيام الى اليوم يللي دخل علية امجاد بية وهو يكول:
امجاد: سيلفا ابوية مختفي من ايام الفاتحة ماكو صارلي سبو؏ ادورلة مالكيته
::- شنو مالكيتة أمجاد هو طفل حتى ماتلكاه؟
امجاد: جان حيل متأثر بوفاة حنان وتعرفين شكثر يحبها شفت هل شيء من توفت فقد لدرجه تخربط علينه اكثر من مرة وناخذه للمستشفى بجة اهواي عليها اول مرة اشوفه بهل حالة سيلفا.
::- يمكن اعرف مكانه وين.
امجاد: وين؟
::- كوم وياي نروح وبالطريق اكلك وين مكانه.
- طلعنه انا وياه وكتلة يروح للمقبرة لان جنت حاسة انو يروح عليها لان مايكدر يفاركة ابد
مرات انتبة عليه صافن عليها ومن تبتسم يبتسم ؏ بتسامتها او من تزعل يضل يحجي وياها ويشاقيها
حتى تضحك جان يحبها حب كلش جبير حتى انا مستغربة حبه الها الى ان عرفت انو هو وياها
جانوا زملاء بالجامعة من مرحلة الاولى هو يحبها وعارضتهم اهواي عوارض الى ان تزوجو
وصلنا المقبرة ونزلت انا وامجاد من السيارة متوجهين لقبر عزيزة روحي اول مااجتي عيني ؏ القبر لكيته
متمدد وحاضن قبرها ويحجي وياها كلام مو مفهوم
انا شفتة هيج دموعي صارت تنزل وحده وره وحده
تقرب أمجاد علية كعده ؏ حيلة وهو يحجي وياه ويقنع بية يرجع للبيت لان ميصير يبقى بالمقبرة
جان ردة النه:
محمد: شلون اعوف ضوه روحي و أحلى خطوة بـ عُمري وحدها هنا؟؟
::- هوو كال هيج وانا احس الدنيا ضاكت بية ماعرف شلون اجر النفس بعد عفتهم ورجعت للسيارة وكعدت
انوح وابجي عليهم وعلية شلون راح نعيش بلية ضحكتها وشقاها وحنيتها وهتمامها لأصغر تفاصيلنة؟.
مرت فترة واجه امجاد وهو وابوية ماعرف شلون قنعة بس المهم اقتنع ورجع ويانه للبيت دخلنه للبيت واول مادخلنا اردف ابوي:
محمد: لموو ملابسكم الانبار بعد مانبقى بيها واليوم نطلع منها
- محد اعترض لان جنه مقررين بعد قراية فاتحة امجاد نرجع لبغداد بدينا نجهز بغراضنه وسـدره وعمتي ميسون سون عزا ثاني لان راح نعوفهن وسـدره كضتها
بس تلطم وتبجي وتكول:
سـدره: يولي شلون راح تعوفيني وتروحين شلون اهون عليج تخليني؟.
::- مانكدر بعد نبقى بالانبار الوضع صار خطير ولازم نطلع منها، وانتو هم لازم تطلعون وانا بأي وقت تحتاجيني تلكيني موجوده كدامج اختي انتِ.
- ضلت تبجي وانا اقنع بيها بالشافعات قتنعت وصارت تضحك ساعدتني لميت انا وياها الغراض والملابس اخذنا شيء قليل وبعدين ودعنا سـدرة وعمتي
وراحن لبيتهم وانا رحت لغرفة سجاد لميت غراضه يللي يحتاجهم وطلعت من غرفتة صارت بوجهي غرفة
مامة حنان رحت اتمشى بخطوات ثكيلة لغرفتها واول مافتحت باب الغرفة كفخني عطرها ونزلت دموعي
...............
ردوينه
::- وفاة والدة سيلفـا كلش اثرت بـ خيال لان استرجع وفاة امي وخاصة ماعاف سيلفا ولا لحضة طوال الاسابيع يللي جانت بيها سيلفا تعاني من الفقد
جان حاضر وياها وماعافها ابدا بوقتها الصعب..
وفاه و الده سيلفـا رجعنـي لليـوم يللـي تـوفت بيـة أمـي و شلـون تعذبنه بعـدها.
رجعت ؏ واقعي ؏ صوت خيال يعيط بعلووا صوتة وصوت افاطم تبجي! طلعت أركض من البيت لكيت
الشايب واكف وخيال لازمة من ياختة ويصيح بوجهه بعلوا صوتة.
::- لك كوا.. شجابك اهنااااااا؟ وشلون تقرب من افاطم؟
الشايب: ههههههه شبيك استاذ خيال ع كيفك عيني لايطكلك عرج ليش تصيح، بس منين جايب هاي
الحلوة؟
- ماحسيت غير ؏ الشايب متكوم بالكا؏ ؏ اثر بوكس من خيال وعاط بوجهه
::- أياك ثم اياك تقرب من افاطم مرة ثانية والله ثم والله اذا شفتك ماس شعره من شعراتها ايدك تنكسر
- شمره خيال ؏ الحماية وهو يتوعد بالشايب وبالحماية لان دخلوو للبيت جر افاطم من ايدها حيل
احس ايدها انخلعت وهي روحة مفرفحة بالبجي دخلها للبيت وهو فاقد مابراسة اي ذرة عقل من مرحلة الاعصاب يللي وصللها!
دفعها قوي مدخلها للصالة الطخت قوي بالقنفة وعاطت بي بوجع.
افاطم: أييي، شبيكك عمووو
- ردت علية بعصبية وبدموع تقدم خيال عليها وضربها راشدي، شهكت بصدمة!
وعطتت بي خياااالل؟
:- شبيككك من يمتة تمد ايدك ؏ وحده بينةةة؟؟؟
- ضل ساكت، وتحولت نضراته الى خوف وهو يباو؏ ؏ أفاطم يللي ماانطت ردة فعل بس تباوعلة بغضب عافتنه ودخلت الغرفتها وقفلتها عليها
راح خيال وراها يدك بالباب ويحجي وياها بتوسل تفتح الباب لان وصل مرحلة بغضبة ماسيطر ؏ نفسه من رفع ايده عليها.
اسمعه يحجي وياها:
::- يُبا رمانتـي افتحيلي الباب، اسف يعيون عمج ماكان قصدي امد ايدي عليج افتحي الباب يروحي.
:- جان يحجي وياها بتوسل بس هي ماالها صوت خيال تخبل ضل يدك ؏ الباب وهي ماترد صاح
لـ ماري حتى تجيب مفتاح الغرفة الحتياطي جابتة واجتي تركض فتح الباب لكاها متمدده ونايمة بالكا؏
راح يركض عليها شالها من الكا؏ ويبوس براسة ويعتذر شكد راد منها تفتح عيونها وتحجي وياة وهي بقت سادتهن مافتحتهن عافها ؏ راحته وطلع من الغرفة
وانه وراه واردفت بعدم رضه:
:- خيال شلون تمد ايدك ؏ افاطم؟ شلون انطاك كلبك؟
::- جعل ايدي بالكسر قبل ماامدها، بس دمييي فااار وانه اشوف النذل شايلها ويحجيي وياهااا منوو سمحلة يدخلل للبيتت ولججج هذا كوا.. واكبر كلبب مازول عرف أفاطم عندي راح يسوي اهواي اشياء تضرني ماتعرفيننه عدلل!
:- بسس هذا موو مبرر تمد ايدك عليها هم!
::- ادري والله ادري وعرفها عنودية ماترضه بسرعة شلون افهمهها انو مايصير تتقرب من اي احد غريب وانه من خوفي رفعت ايدي عليها!
- كاعدين نحجي ودخلت ماري تحجي:
وماري: استاذ خيال اجه ابو افاطم عليك
- انتبهت ؏ خيال ملامح الصدمة احتلت وجهه واردف
::- دخلي بوية
- دخل ابو افاطم سلم ؏ خيال واردف: اجيت اليوم ؏ افاطم حتى اخذها وياي هاي هيه جزاك الله خير سويت العليك واكثر واني ممنون اهواي منك ع تحمل
مسؤوليتها ماعرف شلون اجازيك..
::- لا العفوو مابيناتنه هل حجي احنا اهل بس ليش تاخذها هسه؟
- لا هاي هيه طلعت جوازها ولازم تروح ويانه مكانها ببيت ابوها وامها مفرفحة عليه ولازم ترجع
::- ان شاءلله خير نسألها اذا وافقت تروح تاخذها اذا ماوافقت تعذرني ماانطي ابنيتي الك!
- هزز ابو افاطم راسة مبتسم وماري جابت افاطم اول مادخلت افاطم شهكت وراحت تركض ؏ ابوها شبكته
حيل هي وتبجي احسها تشكيله ببجيتها من خيال لان ضربها حولت نضري ؏ خيال يللي قابض ؏ ايده بقوة
وهو يباوعلهم احسه يريد ينفجر بس ؏ شنو مادري
ضل ابو افاطم يهديها ويحجي وياها بعدين فكتت
الحزن وصارت تضحك وهو يحجي وياها وهي منطلقة تحجيلة عن المدرسة وعن زميلاتها وهو يصغيلها بكل تركيز سالها ابوها:
بابة أجيت اخذج تروحين وياية ؏ اخوانج وامج؟
- حولت أفاطم نضراتها لخيال يللي جان يباوعلها بتوسل انو ترفض تروح واردف خيال من شاف طال صمتها.
::- شوف شكلت انه ماتريد تروح وياك تبقى يمي رمانتي
- بعده يريد يكمل وقاطعته افاطم صدمتنه بيلي كالته:
افاطم: اي بابا اروح وياك.
.
.
.
.
.
. للحـكاية بقيـة"⚗️"
ــــــــــــــــــــــــــــــــــــــــ
﴿وَإِذًا لَآتَيناهُم مِن لَدُنّا أَجرًا عَظيمًا﴾
ـــــــــــــــــــــــــــــــــــــــــ
▲التصويـت ياااقوم وعلقووا بين الفقرات🩶
▲التنزيل بين يوم ويوم زمُرديات.
▲حسابي الأنستا[fofo_i156]
▲قناه التلـي[fatmahAbdmoter]