الرقطاء وكراتها الثلاث
اللـدغه السابعه
بقلم كهرمانه
______🖤______
كُل ما نظرت في مآقينا سَتتجلى وَترى كمية الرُعب بِهُما ..🐍
_بقلم أُميمة الجنابي
_______🐍_______
مسك
مر اليوم عادي بَــس اللي زعجبني بهذا اليوم إنو امي خلتنا نشتغل وياها بتنضيف البيت ومتقبل رفيف تلزم شـيي واذا وحده من يمنه رفضت تهددها بالضرب
نمت وثاني يوم حسيت بـ طبطبات خفيفه على خدي فتحت عيوني شفته جدو يحجي بصوت ناصي
-يـله كعدي خواتچ وتعاي على اتفاقنا
مسك:-بس جدو أنـي نعسانه
رياض:-انتضرجن بره
مسك:-عافني وطلع هذا شبي يريد بَــس كلمته تمشي ولو هـيَ كلمته ماشيه ،كعدت خواتي غسلنا وجوهنا وطلعنا يمه بالحديقه أشرلنا ع الخشب باوعت لناحيته خشبات كبار ومانگدر أنـي وخواتي نشيلهن كل وحده وحده
-جدووو كبارر خلي كلنا نتعاون ونشيل الخشب
رياض:-ممنوع كل وحده خشبه تودنها هناااك
هرم:-بَــس جدو ثگيلات ذني
رياض:-أنـي اريدهن ثكيلات علمود عضمچن يصير قوي يـله
مسك:-حاولت اقنعه بَــس عاط بينا فزيت من صوت صياحه وگمت اشيل الخشب بصعوووبه تامه واباوع لخواتي شـلون بالگوه يشيلن الخشب وهرم ايدها انجرحت بطرف خشبه وضلت تذب دم
راحت ديالا تساعدها بَــس جدو غلط عليها انصدمت من عنده وخافت ، رجعت تلم بالخشب الباقي هرم وصلت الخشبه للمكان المطلوب وراحت لجدو گلتله
-جدو تعبــت بعد ماگدر اشيل خشب
رياض:-ولججج الصفيره صوت ماريـد اسمع كملن اللي گلتلچن عليه وبعدين تعالن ناقشن ييييله
ضلينا ساعه كامله تقريبًا احنا ننقل بالخشب كملناه ورحنا يم جدو اللي يراقبنا بحذر وتركيز حچت هرم بتعب
-جدو تعبنا شوف ايدي كامت تطلع دمم
رياض:-اي عَـفيه عليچن من نقلتن الخشب كله
هرم:-اريد كوووباب "گرصتها وجد"
هرم:-جوعاااانه ، جدو وين رايح
رياض:-ثواني
مسك:-راح جدو شويه ورجع بيده علاگه شمرها عليه لزمتها باوعتله بإستفسار
رياض:-هــاي ملابس الچن رياضيه من اكوللچن عليهن تلبسنهن
مسك:-بَــس جدو لــيش تدريب تريدنا نصير نلعب طوبه
رياض:-بعديـن تعرفن
هرم:-هوه شنوه كله بعديـن ومو هسه ومعليچن
رياض:-راح اشغل السياره البسن وتعالن وراي هرم صيري مثل ديالا ووجد شـلون حبابات ويسمعن الكلمه
هرم:-وتجيبلي كووباااب
رياض:-اجيبلج كباب من تسمعين كلمتي
مسك:-اخذنا الملابس لبسناهن ملابس رياضيه واحذيه وشفقات طلعنا وراه لگينا مشغل السياره صعدت أني بصفه وخواتي بالمقاعد الوره ومشه السياره مبتعدين عن المجمع العايشين بيه وصلنا لمكان مثل المخزن ماعرفته شِــنو بَــس الباب مالته من چينكو فتحه جدو ودخل واحنا وراه
انصدمت من اللي شفته اسلحه حاده سچاچين من اصغر سچينه لاكبر وحده وبيها انواع ضعيفه وسميكه واكو مزرفه واكو مخططه يَـعنـي من هذا المكان اليجرح مفتوحه اكثر من فتحه
باوعت للمكان بتدقيق اكثر شفت كيس مال ملاكمه وشغلات مال تمرين واسلحه معلگه تذكرت مقر الجاسوسات وجدي جيري لزمت هرم السچينه وجدو گاللها
-لاتلزمين السچاچين
مسك:-غبيييه لاتلزمين شـيي عمه وفاء تكول ميصير الصغار يلزمون السچاچين تكص الايدددد
هرم"متجاهله مسك":-جدو كلشش احب السچاچين اطيني وحده
رياض:-من يصير عمرچ ١٥ هــاي السچاچين كلهن الچ
مسك:-شيصير من ندخل ال١٥ ونصير چبيرات
رياض:-هْوايَــه شغلات تصير خلوها لوقتها
مسك:-اكو باب نهاية القاعه الأحنه بيها مشى وتبعناه فتح الباب وشفت ساحه فارغه مصبوبه دخلنا لهاي الساحه وگف گبالنا وگال
-يـله تركضن لحد ماتسمعن صوت الصافره توگفن
مسك:-بدينا نركض وهرم چانت كلشش سريعه رغم هي مدبدبه شويه بَــس تركض سريع بسبب لعب الطوبه
تعبنا كِلِّـشْ هلكنا نخاف نوگف جدو صارم ومتغيررر اليوم ، اخر شـيي سمعنا صوت الصافره أنـي من سمعتها رخيت رجليه وكعدت بالكاع
-ارتاحن خمس دقايق علمود نرجع للبيت ، وباچر الصبح هَـم هيچ واريد تتغذن زين وخل اشوف وحده متاكل
مسك:-شويه وصاحنا جدو گال خلصت الخمس دقايق مشيت بكسل وصعدت بالسياره راجعين للبيت ، وصلنا اول مافتحت الباب شفت امي بوجهي ابتسمت الها وهيه باوعتلي بغضب ضربتني على خدي وجرتني من اذاني
-حقييييره تطلعين بدون ما ادري ماتگليلي نفس عماتچ وبيبيتج الحاقده طلعتيلي علييييهنن
مسك:-رجف كل جسمي وخفت من امي نزلوا دموعي بضعف سمعت صوت جدو يصيح عليها انداريت شفته واگف وخواتي وراه
-شلووووون تضربيهاااا وانيي موجووود وخريي ايدج من اذانها
خيزران:-بابا تقبلها مدري وين رايحات يفرفرن بــَنات نذير من الصبح شيردن يصير بيه
رياض:-چانن وياي وبعد يوميه يطلعن وياي الصبح ويرجعن هيچ وقت
خيزران:-وين چنت ماخذهن لــيش مانطيتني خبر مو يبس ريگي من الخوف هم اذا صار عليهن هسه يكولون من وره امهن ضيعتهن
رياض باوع للبنات وأمرهن يدخلن للبيت يغسلن ويرتاحن
-وانتِ سويلهن لگمه ياكلنها وينامن والماتاكل زين كوليلي عليها . يقصد نقاء ، هزت راسها بالموافقه ومشت للمطبخ والبنات راحن يغسلن وياكلن
مسك:-گعدت بالغرفه وخواتي يمي ضجت بسبب تصرف امي وحز بخاطري ضربها ااي ضليت صافنه الدموع متحجره بعيني اريد ابجي ماكـو احس شـيي يخنگني ويفرغ بالبچي حسيت ايد ناعمه تمسح على خدي الانضربت بيه باوعت شفتها اختي ديالا ابتسمتلي وگالت
-لاتضوچين هـيَ شويونه عصبيه
مسك:-باست مكان الضربه وإجت هرم ووجد إحتضنني ابتسمت لتصرفهن كُـلش افرح من اشوف حنية خواتي وحده تحن عالثانيه
وجد:-مسك
مسك:-همم
وجد:-لــيش جدو هيچ سوه بينا
مسك:-ماعرف لأنو گال لاتسألين اخاف يضربني اذا حچيت شـيي
وجد:-هــوَ گال علمودچن ماتشوفينه يخاف علينا اذا مناكل ويصير عصبي علمود لانتمرض
هرم:-اي اي صح لازم الواحد يصير قوي من هــوَ صغير أنـي قويه
مسك:-سبحت خواتي وبدلت الهن بالحمام وطلعنا مانگدر نگول لخاله نقاء تمشط النا لأن ملتهيه تسويلنا اكل وضلينا نتناقش أنـي ماعرف امشط الهن دخلت خاله وبيدها صينيه مال اكل خلتها بالكاع وسامعه حچينه طلعت گالتلنا نوگف بالسره تمشط النا واللي تكمل تكعد تاكل
جدو ضل يوميه يدربنا ويتعبنا كلشش بالتدريب ويوميه لازم ناكل ماعون تمن كامل وخضروات وفواكه
كل فتره ينخبصون يجيهم خبر عن خالو ياسين وبعدين يطلع چذب الجوارين يضحكون عليهم امي مخلصتها يم الجوارين
چانب المنطقه اكثر شـيي ولد مو بــَنات ويطلعون ويلعبون طوبه وهرم عشقها الطوبه تلعب وياهم وصاروا اصدقائها حتى تقلدهم بالتصرفات والكلام
سجلني جدو بالمدرسه اللي قريبه عليهم وبديت الدوام وچنت كِلِّـشْ شاطره جدو وخاله نقاء يدرسوني واجباتي
كعدني جدو أنـي وفارس ومحمد ورفيف دوامنا صباحي خاله نقاء سوتلي لفه وباكيت مال حليب باوعت لأمي لــيش خاله نقاء تسوي كل هذا معقوله الأمهات كلهن هــيچ يسون ويه اطفالهن باوعت لخالتي بضجر
-خاله لــيش خواتي ميسجلن ويايه
نقاء:-لأن خواتچ اصغر منچ سنة التجي يجن وياج وتنخبصين بيهن
مسك:-هزيت رأسي والجهال صاحولي علمود نروح للمدرسه گمت لزمت ايد رفيف وطلعنا
.
.
ديالا:-گعدت على صوت طگطگه مال مواعين وبالغرفه صوت مال كنتور ينفتح فتحت عيني شفت خاله نقاء تحضر ملابس من كنتور بيبي شافتني ضحكت وگالت
-ياصباح الخيرات حـبـيبتـي يـله گومي غسلي وروحي تريگي امچ بالمطبخ دتحضر ريوگ وگعدي خواتچ وياچ راح أروحح هسه اجي مو الكاچن نايمااات
ديالا:-يـله هسه راح اكعدهن لميت فراشي گعدت خواتي وراحن يغسلن بديت الم بفراشاتهن بصعوبه اجت خاله ساعدتني وكالتلي
-ديالا منو تحبين بخواتج اكثر وحده
ديالا:-خاله كلهن احبهن نفس الشي خواتي ذني حبيباتي
نقاء:-حـبـيبتـي الله يخليهن الج
ديالا:-راحت خاله واني رحت اغسل شويه وسمعت صرخه رحت للمطبخ اركض شفت هرم واكعه بالسطل مال الشكر واكفه عليه تريـد تاخذ مي ووكعت وأمي لازمتها من اذانها وتصيح عليها وشفتها اخذت شيش وفتحت النار وخلت الشيش عالنار
-حيووااانه أنـي اربيييچ ولچ بت نذيررررر
نقاء:-تَـره متسوه كل هالعصبيه خيزران تخبلتي عالبنيه هــاي مكان ماتگومينها وتنطيها مي عطشانه
ديالا:-امي دفعت خاله اخذت الشيش من النار ونومت هرم واخذت رجليها ولزكت الشيش على رجلها فرفحت روحها چانت تباوعلي تريدني اسوي شـيي بَــس أنـي خوفي من امي چان اكبر وجد واگفه بصفها وتبچي على بيچيها واني هَـم بَــس أنـي بعيده يم الباب
خاله گامت تگمز وتدگ على خدودها دفعت امي وشالت هرم وطلعت وهي تحسب وتغلط على امي وجد مشت وراهن بَــس من طلعت خاله بره بقت واكفه بالباب تباوع
اندارت امي شافتني ابتسمت بخبث خوفتني نضرتها صاحتلي گالتلي تعاي
-للا ماما اخاف ما اجي
خيزران"بـ شر":-تعاي حـبـيبتـي ماسويلچ شـيي
ديالا:-اخاف تسويلي مثل هرم
خيزران:-گلتلججج تعاااااي
ديالا:-تمشيت بخطوات متردده وصلت يمها لزمتني وخلت ضهري گدامها رفعت التيشيرت مالتي وحسيت بوجع مثل السچينه تجرح بيه بَــس بقوه وتشخط بضهري حسيت بالدم شـلون ينزل سمعت ضحكاتها العاليه ماعرفت شـلون ابچي من الخرعه
اي
-ضحكت عليه ومتت ، وعفتلي بناتك عبالك راح اعيشهم احسن عيششه لااااا الله لاينطيك ولايرحمككك حتى وانت بگبرك عبالك مراح انتقم لأخوييه ، ضيعتت شبابي من ورااااك شبااابييييي رااااح من ورااااااكككك
وإجن بناتك هنه راح يتحملن شِــنو اسوي بيهن
ديالا:-بچيت بقوه وصوت مرتفع دفعت ايدها وهيَ مثل الفاقده تضحك دفعتني عالگاع ووگعت على ضهري شاغت روحي ، وجهي انملى بالدموع گمت وگفت شفت الدم اللي صــار بالگاع ضهري بعده مكشوف
باوعت لأمي بعيون باكيه شمرت السچينه يم رجليه وشالت الصينيه ببرود وصاحت على وجد تجي تاكل وياها وجد چانت واگفه بالباب ومغطيه اذاناتها وتبچي ماسمعتها خلت الصينيه بالكاع وراحت ندستها
-تعاي وجد اتزقنبي مو بعديـن تجين تگولين جوعانه
وجد باوعت عليها بخوف وراحت وراها وكعدت تاكل
ديالا:-مشيت بخطوات سريعه تزحلگت ووگعت على ضهري مره ثانيه ضهري مكشوف والگاع كلها شكر بسبب هرم حسيت بحبات الشكر تدخل بضهري
بچيت بعلو صوتي تخيلتها راح تجي تشوفني شبيه بَــس ضليت اصرخ وحدي محد يفزعلي گمت اسحل بروحي سحل واحس نار مشتعله بضهري دخلت للغرفه شفت بيبي گاعده وتبچي حسيتها تبچي لأن متگدر تساعدني وفعلًا احساسي بمحله شافتني زادت بالبچي
رحت يمها وگفت مسحت دموعها وگلتلها .
-لــيش دتبچين بيبي تذكرت هـيَ متگدر تحچي دنگت على عيونها وبستهن لزمتها من اطراف وجهها
-لاتبچين حـبـيبتـي عادي هــاي لأن صرت وكيحه ماما سوتلي عقاب أشرتلي على ضهري ودموعها ماوگفن أبد صوتها بالگوه طلع گالت ااااا سكتتها گلتلها
-هسه اغسل وابدل واصير زينه يروح الوجع اللي بضهري
گمت على كيف امشي التيشيرت مالتي لازگ على ضهري من الدم طلعت من الغرفه شفت امي ووجد گاعدات ياكلن امي ماهتمت بَــس وجد عينها عليه وتاكل غصب تخاف من امي
اخذت ملابس من الكنتور مال غرفة رفيف ورجعت رحت للحمام سديت الباب وسحبت السطل الموجود بصف الباب من جهة الحايط خليته جوه الحنفيه وفتحتها انتضرت السطل ينملي
باوعت على ضهري بالمرايه شفته شـلون مشرح تشرح غمضت عيوني بألم تذكرت مسك هـيَ چانت تسبحني اول مره احاول اسبح وحدي بچيت وكملت السبح بصعووبه .
.
.
نقاء:-أخذت هرم وطلعت اركض بيها شافوني الجوارين جابولي سياره ونقلوني للمستوصف القريب علينا ، الطريق كله هرم بسس تبچي ابد ماتت على صرخه وحده نزلت واني عباتي بالمگلوب ونعال تك وتك واني ادعي على اختي بعلو صووتي والناس يعرفوني ضلوا يباوعون عليه والنسوان احسهن يخافن يسألني
دخلت للمستوصف وخليتها عالسديه ولساني يدعي على خيزران الدكتور مادامه يضمد بـ هرم يتأفف بَــس أنـي مادرت بال كمل تضميد رجلينها واندار عليه حاچاني وهو متنرفز بَــس أنـي مانتبهت لكلامه التهيت امسح بدموعي وگلتله
-العفو ماسمعت
الدكتور:-الطفله حرگ رجلها متعمد متخافون الله انتوا أكدر هسه ارفع عليكم قضية تعنيف أسري بحق هــاي الطفله
نقاء"بعصبيه":-دكتوووور شوف شغلك تَـره روحي واصله لخشمي . ضل يحچي ويرزل بيه واني ماسكتلله ارد عليه اخر شـيي كتب الوصفه وانطاها الب علمود اجيبلها العلاج وگلي السستر تعلمچ شـلون تداوينها يوميه
اخذت الوصفه من عنده ورجعت لهرم وصيتها متتحرك علمود لاتتأذه وهي تسمع الكلام رحت جبت العلاج وعلمتني السستر على طريقه التضميد
رحت لهرم شفتها تباوع لبنيه وامها تبوس بيها حسيتها شگد هـيَ محتاجه لحنان امها مشيت بسرعه وشلتها وحضنتها كل قوتي
-يله هسه نرجع للبيت وناخذ علاج علمود تصيرين زينه وترحين المدرسه ويه مسك
هرم:-اي علمود ماما متكتلني
نقاء:-سوده بوجه امچ طلعنا من المستشفى اخذت تكسي ورجعت للبيت مالتنا دخلت شفت وجد وديالا وحده بيدها مكناسه ووحده بيدها وصله تمسح اخشاب وديالا شعرها ينگط مي ووجها اصففر تحسبت على امهن الطاغيه ودخلت هرم للغرفه مال رفيف نومتها ورحت لخواتها اخذت من عدهن ادوات التنضيف وركعتهن بالگاع وصيت البنات يرحن يم اختهن ويديرن بالهن عليها وليوصلن يم رجليها
باوعن الي بنضرات كأنو يشوفني الشخص المنقذ الهن ابتسمت بوجههن وهنه فدد حبابات ويسمعن الكلمه وأبد مافد يوم گالن لاا الي عمتهن وفاء خوش معلمتهن تعلوم وأدب
رحت وگفت گدام خيزران شفتها مامهتمه باوعتلي بعدم إهتمام وگالت
-بــَنات نذير كملن شغلهن لو أگوملهن
نقاء:-خيزراااان بناتچ صغارررر لاا بالغات ولايفتهمن كااافي كاااااافيييي ظلم وطغيان وتمرررددد على هذني البنات تَـره دمرتيهن
خيزران:-وداعتچ بــَنات نذير بلا إحساس
نقاء:-خافي الله خيزرااان الناس كلها عرفت بيچ وبسوايتچ ببنتچ صرتي نسسخه رياااض نفس الظلم نفس الحقاره ونفسس النظرات المظلمه إنت وياه مو صاحيين ترره مخبلييين خوووش مخااابيييل مكانكم موووو هنااااا مكانكم بمستشفى المجانيييين ولچ خيزران ثقي بالله بعد اذا شفتچ مأذيه وحده من البنات لاجيب الشرطه هنا واخلي سيرة عائلتنا على كللل لسان
خيزران "ببرود":-علمود ذني الجهال هسه انتِ حارگه دمچ وفحطانه.
نقاء:-للأسف احنا حاليًا عايشين بماضيهم الديصير هذا كله يسببلهم عقد نفسيييه اذا ماطلعت وحده منهن نفسچ وتعامل اطفالها نفس ما انتِ تعاملينها ولو هنه أنـي متأكده راح ينطن الحنان اللي ماشبعن من عنده لأجياااالللل ياااا خـــيزراان الطاغــيه گعدت بالگاع ابچي واندب حظي وحظ هالبنات اللي طلعن عليه وراح يضوگن المر الضگته والتعب الأني بيه سكتت وباوعت لغرفة رفيف گاعدات ومادات راسهن يباوعن بخوف دخل ابوي وبيده علاليگ خلاهن بالگاع
-نقاء عزلي المسواگ يـله
خيزران:-هــا يابه الله يساعدك
رياض:-ويساعدچ بنيتي هاچ هــاي علاگه بيها اقلام والوان ودفاتر لمسك
خيزران:-شــكوو جايبلها مو عدها هْوايَــه طلاابه
رياض:-خليها حفيدتي الأولى هــاي بنت الغاليه، ترديني مادللها ناقصني ايد رجل حتى جدها ضاحي ماسأل عليهن دخل للصاله وراحت وراه
خيزران :-طلعت عيونهن ، لو عايفهن ببيت جدهن ذاك اليوم ع الأقل هُـم يصرفون عليهن ويربوهن عالأقل اهلهن يربوهن بَــس انتَ الله يسلمك خليت براسي فكره. باوعت للباب مال غرفه نقاء شافته مفتوح بَــس متكدر تسمع اليحچوه
والله يابه أنـي خايفه يكبرن ويخرطن الأول والتالي بالخصوص مسك حيل اخاف منها واحسها راح تودينه بتهلكه لاتأمن بيهن بــَنات نذير مايتأمنن او يشلعن گلبي من يكبرن ويشيخن عليه واتذكر كلامي گلتلك ثار اخوي أنـي اخذه واحرگلك عشيره القتله كلها بَــس انتَ مارضيت
رياض"بإبتسامه ":-لاتخافين أنـي اعرف شِــنو اسوي ما أمشيهن على قواعد بشريه
خيزران:-يَـعنـي مافهمت قصدك؟
رياض:-يَـعنـي القواعد الحيـوانيه أنجح من البشريه كل متكونين صارمه وياه كل ماتتقدمين وتنجحين عندچ مثلًا الكلب هــوَ وفي ومستحيل يغدر بالشخص اللي يتعب عليه وكليه وشربيه وكوني صارمه وياه بنفس الوقت شويه حنيه راح تشوفين نتيجه ترضي أما اذا بالعيني والأغاتي ودون محاسبه ودلال زايد راح تصعد عدها العاطفه واذا طلعت وحده منهن عاطفيه معناها اغسلي ايدج منها
خله ايده ع چتفها وطبطب بـخفـه وگال
-أصبري بعدهن حتى كتابه ميعرفن يكتبن خلي يكبرن اله اسويهن وحده أقوى من الثانيه مستعد ادفع دم گلبي وعمرري أفني الهن في سبيل نوصل للنقط الاريدهن ماخلي لغه ماعلمها الهن تدريس بأحسن المدارس مو مدارس عاديه ولا لبس عادي صدگيي ما أتسمه رياض إذا ماخليتهن يوصلنه للمريخ وشرررط شِــنو اللي أريده يصيررر
.
.
ديالا:-بالصدفه تسمعت على جدو وماما شِــنو يحجون كلشي مافهمت من كلامهم بَــس الحجي انطبع بذاكرتي الصغيره ، رجعت للغرفه مال رفيف اللي نگعد بيها كل مره ويمنه بيبي وخاله نقاء باوعت على هرم ضايجه وتون من الوجع مدري تبچي مدري تعض المخده كِلِّـشْ متوجعه انقهرت عليها وعلى نفسي اجتي رفيف ومسك والبقيه من المدرسه
إجت رفيف شافت رجل هرم ملفوفه لزمتها وسألتها شبيچ بلا ماتقصد توجعها وهرم ترجعت كِلِّـشْ وگامت تصرخ بصوت عااالي اجه جدو رياض على صوتها ومسك وگفت بوجهه وحاچته حچي مثل الكبار
-جدوووو هــاي انتَ هيچ سويت موو اذا متردونه ودونا يم عمه وفاء لــيش هــيچ تسوون بينااا ،صيح عليه جدو وراح بسرعه لهرم لزم رجلها وباوع على خاله نقاء
-ووجع مسك لسانچ اذا يطول عليه مره ثانيه أكصه ، نقاء هــاي البنيه منو سوه بييها هيييج معقوله طفلله ماتگدرون تسيطرون عليها وتحمووونهاااا
نقاء"حچت وهي مدنگه راسها":-يابه هــاي أنـي چنت اشوي تكه وخليت الشيش بالگاع وهرم بدون لاا تنتبه داست عليه
ضربها على وجهها ودفرها وهو يحچي بصوت عاالي
-بنت الـ*** هسسسه شلوووون تمشيي هااا ولچچچ روحتي عليييه وقتتتت
رجع دفرها برجله على بطنها وهي ماصرخت ولابينت الوجع بَــس مدنگه راسها التفت لهرم وحچه بعصبيه
-وانتِ هرررم أي علااااچ تاخذينه بدون تعيقل زييين
هرم:-أأ أي جدو
طلع ورگع الباب وراه وراح گعد بالصاله فتح التلفزيون وضل يباوع ع الأخبار مسك عرفت أكو شـيي مو صح بالموضوع راحت يم اختها وگالتلها
-هرم منو اللي سوه بيچ هيچ
هرم:-ماما سوت هيچ بيه وضــ ماكملت كلامها إجاها كف من مسك ولزمت اذانها بقووه
مسك:-لــيش تچذبييين مو احنا نگول حرام الچذذب لــيش ماگلتي لجدو خاله تچذب وامي هـيَ اللي حرگتنيي هاااا شوفي بسبب غبائج خاله انضربت وتوجعت مو حرام عليچ
نقاء إجت وخرت ايد مسك من اذان اختها هرم
-لــيش هيچ يمه مسك خطـيـه اختچ مريضه
مسك:-لعد لــيش انتِ تنضربين بدون سبب
نقاء:-ميخالف أنـي متعوده
مسك:-ميصير وبعد اي وحده تغلط اضربها
نقاء:-لااااا لااااا ولچ لاتاخذين اطباعهمم مسككك بعدچ صغيرونه ماما لاتصيرين مثلهم ابوسچ ذني خواتچ تعلميهن علميهن بحنيه الضرب مابيه نتيچه ترى شوف شوف
مسك:-خاله أنـي علمتني عمه وفاء كلشي ولا الچذب والچذاب لازم يتعاقب أشد العقوبات
نقاء ضلت مصدومه من طريقة تفكيرها وعرفت هــاي البنيه تفكيرها اكبر من عقلها ، مشت الأيام هرم رجلها بدت تطيب بس الأثر اللي برجلها ميروح وبقه الأثر مالته ، ومسك كِلِّـشْ متفوقه بالدراسه مالتها وصار عدها صديقه إسمها أُمنيه الصديقه الوحيده وبيتها قريب على بيت رياض وين متروح مسك تروح أمنيه وراها لذلك أمنت بيها مسك
خلصت السنه الدراسيه ومسك طلعت الأولى ورفيف هَـم ناجحه نجاح حــِلوو ومحمد هَـم بَــس فارس درجاته بالخمسين بوقتها رياض لزمه بالسلسله يضرب بيه ويعذب لأن درجاته مو حِـلوه والكل يتوسل بيه علمود يعوفه ويرحمه وهو ماكـو
اخر شـيي سحل روحه سحل من ايد رياض وراح يلبس حذائه علمود يطلع وخواته يتوسلن بيه مايردن معاناة ومواقف ياسين تنعاد
-عوووفوووه هذاا الفاااشل لحد يحاچيه ماتصيرله چاره لاا والله باوع هــاي الجهال الوياااك كلهم درجاتهم عاليه إلا انتَ دومك طايح حظ
خيزران:-يابه عوفه كافي فدوه المهم ناجح مو المهم درجات عاليه
رياض:-مسك روحي جيبيلي مي اشرب
مسك:-ركضت للمطبخ ترستله گلاص مال مي ووديته إله اخذه من عندي وگال
-إذا ينزل مستواچ هيچ يصير بيچ
مسك:-لاا أني مو غبيه
رياض :-عَـفيه
مسك:-عطلنه وبدأت التدريبات المكثفه ، جدو علمنا على هوايه شغلات السباحه وعلمنا شـلون نلزم السچينه بَــس سچينه مو حقيقيه لاا چذبيه علمنا طرق الدفاع على النفس حز بخاطري لو متعلمه ادافع عن نفسي من قبل ماجان تأذيت هالأذيه
من نرجع من التدريب لازم نساعد بشغل البيت ونوگف نباوع عليهم من يطبخون وناكل كِلِّـشْ هْوايَــه وجدو ويانه يكعد بكل وجبه وعينه علينا من ناكل
مرت الاشهر بيبي رجعت تحجي بس فقدت المشي وايدها اليسره اله ايدها الثانيه تحركها كلنا فرحنا بهذااا الشي
ورجعت المدارس وخواتي سجلن ويانه يمكن احلى شـيي بحياتنا هـيَ المدرسه احلى ايام عشناها ، رجعنا اني وخواتي من المدرسه ديالا ووجد مرتبات بس هرم صدريتها كلها تراب وقميصها مفتوح اول دگمتين ماعرف خربانات وشعرها مكفش
دخلن للبيت ورفيف وياهن باوعت على امنيه هم دخلت لبيتهم رحت ركض وراها چان بيت أمنيه عدهم نخله وتذب تمر واني احبه شافتني أشرتلها عالنخله ابتسمت وگالت واگع هْوايَــه اليوم تعاي أنـي وياچ نلمه
رحت وياها ترست ايدي تمر فتحتلي الباب ودعتها ورجعت لبيت جدو اول مادخلت شفت خاله نقاء واگفه وبيدها چمچه تخوصرت وگالتلي
-حضرتچ وين چنتي
مسك:-چنت ببيت أمنيه اجيب تمر
نقاء:-هههههه نسخه من امچ
مسك:-ماما تحبه
نقاء:-اييي تموت عليه
مسك:-اييي همزين جبتلي علمود بعد كل ماروح اجيبلها اكثر
نقاء:-اووووف لو تعاملچن انتِ وخواتچ مثل ما انتن تعاملنها چان احنا بخيررر
مسك:-عفت خاله ورحت للغرفه احضر ملابس شافتني رفيف وگالتلي
-مسك صدك بابا وين ياخذچن من الصبح
مسك:-تذكرت جدو منبه عليه ما اگول لاحد وين نروح الصبح وشنو نتدرب وشنو يعلمنا واذا حچين يأذي وحده من خواتي وگلي مو كلشي ينحچي
رفيف:-وين صفنتي مو داحجي وياچ
مسك:-نروح عالنهر نفتر ونرجع وجدو يسولفلنا سوالف حِـلوه ونرجع
محمد:-مسك شو اليوم ماكـو ماجيتي
مسك:-ماگدرت اطلع
محمد:-بَــس مو تنسين مره ثانيه
مسك:-لاا ما انسى
فارس:-محمد عوف مسك تَـره اذا ابوي لگفك توكع براسي وانكتل
مسك:-لــيش هــوَ احنا مامسوين شـيي تنكتل عليه هـيَ بَــس الورقه گلي اوصلها وارجع
محمد عض شفته بقهر من تصرف مسك وأشرلها تسكت
مسك:-فارس لــيش جدو دائمًا يكتلك
تمدد عالچربايه بصيق حچه وهو عيونه ذبلانات
-لأن يحب هذا الشي
محمد:-بلا كلام زايد فارس يحبك بَــس انت سوالفك عوج
فارس:-أنـي سوالفي مو عوج بَــس ابوك دماغه أعوج
محمد"بعصبيه":-فارررس موووو گدااااام مسككك سيطررر على روحكك ولتحچي على ابوي گدام كل واحد تشوفه
فارس نهض بروحه وباوع على مسك بتركيز وگاللها
-شوفي مسك هذا البيت مو مثل باقي البيوت هنا الضحكه نتحاسب عليها والدمعه التنزل من عيوننا هَـم نتحاسب عليها ، ماكـو شـيي تسوي صح وحتى لو چنتي صح يطلعوچ غلط وانتِ الممنونه كل اللي يگولونه إلچ لازم ترمشين وتهزين راسچ بالموافقه وحتى صوتچ ميطلع وقت الجماب لأن صوتچ بالنسبه إلهم هــوَ مصدر إزعاااج
محمد:-لككك انت شجاي تعلم البنيه لاتحچي مثل ماچان ياسين يحچيلنا ، لاتقيس كلشي من وجهة نضرك
فارس:-ممچذب .
لبس جنطته وطلع من الغرفه مسك طلعت وراه صارت بوجههم نقاء وبيدها الچفچير وتطك بعلچها ووراها رفيف لازمه كتاب
-وييين ابو الفواررسسس تَـره هسه أبويه على جيه تَـره گلوبنا خلصانه ماريـد يضربك
فارس:-يبووو على راسي هسه أجي رايح يم حميد
نقاء:-مو تتأخر تَـره والله أكوله راح يم صاحبه وهو منا شـلون يحب صحبانك
فارس:-ماتأخر
نقاء:-كملي قرااايه ولچ انتِ باچر مصخمتها من هسه أگُـلچ
رفيف:-لو بَــس درجة نجاح كلشي ماريـد شوفي كله صعب
نقاء:-غبيييه شينرادله اقري يـله مو أنـي ماخذه من وقتي وادرس بيچ تالي متالي عقلچ حجاره
رفيف:-يـله راح اقره
نقاء:-بتركيزز
رفيف:-اييي
نقاء:-راح اشوف بــَنات خيزران واجيچ خلصن المي ، ولچـــن اطلـــعـــن خلصتن الميي
طلعن البنلت من الحمام ديالا ووجد سبحانات بَــس هرم مغسله وجهها وايديها شافتها نقاء عاطت بيها
-هااااااي شنوووو هررررم شهالوصاخه رجعي سبحي
هرم:-ما مااا اخاف من المي
نقاء:-قابل تضلين وصخه يــاا امي دتعاي اسبحچ عالسريع
أخذتها ودخلت للحمام شغلت المي وسبحتها وهررم بَــس تصرخخ خايفه من المي
مسك:-يلله اطلعنن اريد اسبححح نعساانه وتعباااانه
نقاء:-علكيفچ عيني ست الحسن والجمال طلعنه
مسك:-طلعت خالتي من الحمام هـيَ وهرم واني دخلت اسبح حسيت بلمسات مخيفه على رجليه واني مخليه شامبو والشامبو على وجهي فتحت عيوني وباوعت على رجليه ماكـو شـيي بَــس الشامبو دخل بعيني وضلت تحرگني گمت أكمز بالحمام ورجعتلي نفس اللمسات....
.
.
يتبع