#إِنتقام_السَدّيم
بقلمي أنا
الڪاتبة نون آل ؏ـــلي .
روُايـةَ
تِتحدث عن فِـتاة تِتميز بعـيُون نِرجسية
مزاجٌ حاد ٬ ونيـرانُ الأنتِقام .
فـِتاة لم ترى بِـعُمرها سوا الخـِراب
خليدة الكِبرياء والغرور
تحيـكُها اشواك الحيـِاة
لتِـخلق فِتاة بِغاية القوة والتجَبر
لـِعنة وِلدت بِسبب أبيـها
تُحارب الكُـل لأجل إستعادة ما سُرق منها .
لم تِـستطع أيقاف النار التَـي حلت
عند قدميها ، صَـغيرة الجسّـد داهيةُ الذكاء
- سؤالها الدائم لما أنا؟
لا الصُبحَ في أفقها يلوحُ ويعتلي .
ولا الماء يُـبرد نيـِران ذويها .
عيناها منها القـُوة تنبعُ
خُلقت من نرجسة الوردِ والغرورِ
إنا مُتعبةَ والاعصارُ بداخلي
تأبى السِـكون وليلها لا ينجلي
سَـئمتُ إن أبقى بصدرٍ مُمتلئٍ .
اخِذت من هاروت بابل كُلها
وورِثت من نَسْل الفراعِنة الحُلي .
قِـد تَتصلبُ الـدِماءُ في شرايينِي
ويتَـُوقف النَبضُ في قِلبي
تـَجُفُ عينايَ ماءٍ
ولا أنحـني الا لـَنفسي
جـِرحي عنيدُاً بِـ لهيـب النارِ يلتئمُ .
مـِن قد أخبَـرك بـِرجالِ الديّن المعصّـُومين؟
ومن قالَ عن الخطأ هُم ممنوعين؟
فـَكم مِن رجلاً خاتِـم لكتابِ الله قد لُعن
وكـِم من رجلاً ثابتٌ فيَ نافلةِ الليل قد حُرق ،
لا يُـمسس نعيّـم الجنةٍ من لا يأتي الله بقلبٍ مُسالم .
رجالٌ تتنعم فَـي صِـدقاتِ الناس
ترتدي الأبَيض إخفاءٍ لـِسوادها .
من يَـُقرب ولدهُ قُـربانِ الشّـيطان
لا يختلف كفاعِـل الفحشِـاء والجزاؤه أولادهِ
بـَعدُ مِـُنتصف الليل قـَد بدأ 12:00
عادةٍ ما يكون هدوء وسكينة
ويستمتع القاتل بِقتيله لشخصة المُفضل
لكـَن ...
بأكثـر الأحيان تتـُوهج نيـرانُ الأنتقامِ والثأر وتكبـرُ روح التِمـرد بداخل تِلك الفِتاة الباردهَ لتَصنع حـَريق لا يُمكن لرياح او ماءٍ بأخمادهَ ،
حـَيث تَتعطش روح الأنتِـقام بداخلها وتـُولد نيران كافية لأن تُحرق مدينة كاملة وهـَي بأتم هدوئها .
تَـجذُبني الأوقات المُميزة ⁰⁰'¹²
لا تـَعجلي يا حـَلوتي قد يكون موعد لُقانا هذا .
الإبنة المُميزة فِتاةُ الـَريف .
زواج الأقارب .
مُغامِـرة مليئة بالشِـقاء .
- سَترى العجَب ،
سَنُريك العَجب
- أقَـنعة كثيرة ٬ من يختبأ خِلفها؟
أعظم ما قَد تِـملكُه الفِتاة
وأثمآ ما قـِد تِلكهُ الفِـتاة
هو " شِـرفها "
ما قَد يـحصُل في مُجتمع عربي مُحافظ
عندما ينتهك أحد شّـرف أحدى بِنواتِهُم ؟
ما قـِد يحصِـُل لـِفتاة تِم التِلاعُب بـِها؟
- غسـِلُ عارِها
التَّخْبِيب ٬
ما قـد يـُبسط بأبسِـط صـُورة هو
الفـسّاد والخِـداع وَالخُبْث وَالغِشُّ
ما قـَد يُفسـد بيـُوت ويـَدمرها
ما قـِد يخلق العداوات بين الأُناس
ما قِد يُخلق الثارات والـدِماء الجارية
ما قد يخلق ملاحم الدِماء ومَجازِرها
يـُوم مُميز جدآ 12:12 .
تاريخ ويـُوم مُميز و مشوق .
روايـةٌ
تُثيرُ الجـّدل عن لـِعنة بِسبب فعّل قـُوم لوطٍ ،
ذَكُر القرآن الكريم العَـديد من اللعنات مُـتوجهة نُحو المُسّتهدفين من الشياطين والكفار والظالمين والكاذبين ومن شهد زوراً في أعراض الناس ومن قتل مؤمناً .
- اللعنة هـي الطّرد من رحمة الله فـَ ما كان ذالك الرجُل المؤمن التّـقي جزاؤه الا الطـِرد من رحمة الله بـِسبب عمل قوم لوطٍ .
- إن الحياةَ لا تِـحلو في أعُيننا إلا في الساعات الحالكة٬
حين نـُوشك على أن نَقع
فريسة خطر رهَيب و فوضى عارمة . فـَ يتملكنا الخـُوف من المصير المجهول الذي ينتظرنا، ونسّتجدي حين أذن رحمة الرَب خاضعين مُتبـاكين
قاطعين الـُوعود بِعدم تكرار ما فعلناه
ثُـمَ إذ تِخلصنا مِما كُنا نخشاه عُدنا إلى سَابق عهدنا ضاحكين غير مُكترثين .
-12:12 .
__________ .
مشهد :
- الدنيا ليل و الجو بارد ثلج و مطر خفيف و ما ينسمع غير صوت السيارة من تمشي الكُل صامت و مراقب الطريق بهدوء منتظرين نوصل لوجهتنا بسلام !
مسلبچية تارسة الطرق و ذاك من ذاك يطلع بليل الوادم تخاف ع روحها ، كل واحد برگبته عائلة و جهال و بيت و مسؤولية زين هذا اذا طلع بليل و ضاع بين ايدين المسلبچية هاي العايلة منو الها ؟؟
لذلك الناس راكدة ببيوتها و ساكته خوف و حرص ع أنفسهم
الا احنه ابد ما خايفين من شي و لا حاطين ببالنا الخوف ، رغم صُغر سني بس چنت استغرب شنو يعني خوف؟؟ ليش الواحد يخاف؟ و من شنو يخاف ؟؟
قاموسي خالي من الخوف و الجُبن ، قاموسي ميعرف شي غير الإنتقام الي انزرع بداخلي و كبر وياي يوم بعد يوم ،
چنت و لازلت ما اعرف شعور الخوف و لا جربته و لا راح اعيشه مُستقبلاً ،،
وصلنا منطقة يسمووها عفچ ، منطقة مهجورة ع طريق النجف ما بيها بيوت و لا بيها محلات فقط الشارع و احنا و اصوات الواوية و الذيابه ، ذيب !!! الللههههه اعشق صوته حيل احب الذِئاب بكل انواعها بالأخص الذئاب القطبية حيل أحبها ،
عبرنه منطقة عفچ و الكُل لازم كلبه من الخوف ألا انه احب هذه الاجواء صوت الرعد وي المطر و عواء الذيابه اتونس عليهن حيل ،
الساعة ب4 الفجر طبينه مقبرة وادي السلام ! الجو يكص كص من البرد بس ماكو مطر بس برد وصلنا الفتحة الي بيها اهالينه و نزلنه نتمشى و عيني ع القبور امشي و اتمعن بيهن هذا قبره جديد ذاك مفلش هذا اسمه حلو ذاك اسمه مدري شلونه و هيج استمريت لحدما وصلنه لقطعتنه ،
ع بعد مسافة عننا اكو قطعة بيها قبر واحد و الدفان يحفر بصفة و ناس داير مدايره و الميت بالتابوت يمه ، حفظت كل تحركاته حفر القبر و أنين الناس الي يمه خافت بسبب البعد الي بيننا ما اسمع بوضوح بس الرؤية واضحه عندي لأن مشغلين لايتات قوية
كمل الدفان حفر و نزل الميت للقبر و كمل كل المراسيم و بعدما نزل الميت و كعد يهل التراب عليه و كمل كل شي ع حسب الإصول و بعدها صار هدوء و بس صوت البجي يمي ينسمع ،
بقيت اعاين عليهم الى ان بدوا يروحون و بقى فقط القبر وحده ، صار عندي فضول اشوفه ماعرف ليش رحت يمه عاينتله و رديت لمكاني ،
بقت عيني عليه ما نزلتها و النسوان اليمي ينعن و ينحبن و انه ما نزلت عيني من القبر الجديد حطيت سولتي بي ،
درت وجهي ع صوت خالتي تصيح ع امي تحجي وياها ركزت بحجيهن شويه و رجعت التفتت ع القبر شفت شيء غريب !!
عگدت حاجبي شنو هذا؟؟ تملكني فضول و رحت كلما اتقرب منه تتوضح عندي الرؤيا اكثر الى ان وصلتله ، اندهشت من الي شفته الشخص الميت الي دفنوه قبل شويه هسه طالع من القبر و فوك التراب صاير !!!!
عبالي يتهيألي بالبداية بس شجعت نفسي و مديت اصبعي ندسته بايدي يلا ايقنت هذا فعلا طالع بره ،
زين ليش رفضت الگاع تتقبله؟ شمسوي بحياته هذا حتى التراب ما يريد يلفي؟
باوعتله بأسى و عفته و رجعت لمكاني و مشيت وي امي و خالاتي و ابوي كدامنه ويا رجل خالتي و عماتي طر خيط الفجر و صار الجو احمر و البرد يموت
ردينه صعدنه بالسيارة و توجهنه للإمام علي عليه السلام ، وصلنه الأمام اخذني ابوي يزورني ويا من طبينه حسيت بشعور ما ينوصف من الراحة و الخشوع و الطمأنينة ، حطيت راسي ع الشباك و غفيت ،
فزيت انه ع الكشن بالسيارة و راسي ع الجامة و رادين نمشي بالطريق للبيت ،
حطيت ايدي ع خدي اتأمل الطريق ،
كل ما نصل لمنطقة نشوف الجو مضبضب و البرد يكرص
وصلنه بيتنه اسمع صوت صياح و بجي ، و صوت اختي تتوسل بيهم يعوفوا لا يذبحونه ،
نزلنه نركض نريد نفهم الجاي يصير شنو ياهو الما يذبحونه؟
وي طبتي تصنمت بمكاني من شفته بإيد عمي رابطه و شاد عيونه يسحل بي للقطعة الوره البيت ،
ركضت عليه و صرخت بكل صوتي ما حسيت غير اندفرت و طحت ع وجهي
ركضلي ابوي شالني و صار صوت الصياح كلش قوي عيني ما نزلتها منه فرفحت روحي تفرفح اريد بس اجره منهم ماكو ، امي كامت تصرخ ع صريخي و اختي و اخواني يتصايحون وي عمامي يردون يجرونه من ايدهم ماكدروا
لحظات ما اعرف شلون مرت عليه ، بين الصياح و نظرات توسلي بعمامي بس حتى يعوفونه ما حست غير اجه ابن عمي ذب عليه جلكان بانزين و شعل عود كبريت و ذبه عليه و وجت النار بجسمه !!!!
صوت صياحه يرن بإذني ما طلع صوته من راسي لهذا اليوم ، صرخت صرخه من عمق روحي ، فلتت روحي من ادين ابوي و ركضت عليه ردت اشمر روحي فوكاه
ما اشوف غير ابن عمي ذبلي رجل و طحت ع وجهي انضرب راسي بطابوكه و اغمى عليه ..
***
اجيت من الدوام التعب ماخذ حصته من حيلي ، ذبيت روحي نمت بملابسي من التعب ماكدرت احس ع الوكت ،
گعدت بعدما اخذتلي قسط من الراحة حتى استعيد نشاطي ، گمت سفطت فراشي ع الميز و بدلت ملابسي سمعت يمنه صوت بالبيت ركزت بي اميزه
عرفته هذا اكثر صوت اكرهه و امقته ، صوت لمتهم و جمعتهم المتروسه نفاق و حقد و چذب ، هذه اللمه اذا صارت معناها اكو بيت راح ينهدم و عائله تتطشر و تصير مشاكل الها اول ما الها تالي
سلمت عليهم بدون نفس و طلعت صبيتلي چاي و كعظت تكترت ع صفحة استمع لحديثهم المتروس غيبة و حش بإعراض الناس ، حچه واحد من الموجودين يسألني و رد الثاني عود راد يفشلني
- شلونها الاوضاع بالدوام؟؟
- يمعود بزر البارحه ما يكدرون ع الشغل هذا صعب و ينرادله كون واحد حوك يشتغله مو ناس متختخه للظهاري تگعد ب4 العصر ، ههههييي .
ضحكوا كلهم مستهزءين بيه و مأيدينه بالكلام ابتسمت بثقة و رفعت حاجبي باوعتله بنظرة استصغار من فوك ليجوة و جليت صوتي سكتتهم كلهم ،
الصعايب ملعبي و ارتاح بالإزمات
و اتشايم بحملي شما ثگل حملي
و ابشرك صافية و ما عندي كل إشكال
بس اصلا وجودك صار يشكلي
صار هدوء و اشوفهم انبلع صوتهم و الوانهم انخطفت صاروا يبلعمون يردون يلوفوها ماكدروا گمت وگفت ع حيلي تمشيت وصلت للباب درت وجهي للنص و اردفت
مرة ثانية من تردون تحجون اعرفوا ويامن تحجون و حجايتكم اعدلوها حتى ما تتفشلون ، الگاعدين بي هذا بيتي اكلتوا و شربتوا من كد ذراعي و من تعبي و شگاي و الما يحترمني انزع اخلاقي و اتعامل ويا باليستاهله ، الشرب چايه خل يتوكل رحم الله من زار و خفف .
عفتهم بصدمتهم و اسمع ابوي يبرر الهم و امي الابتسامه شگت حلگها تباوعلي بفخر ، كملت طريقي و صعدت فوك اكمل البديته ..
و للحكاية بقية ..
.…...
شلونهم كيكاتي 💋✨؟؟
أول شي مبدئياً خل احجيلكم ع الغلاف و تصميمه المميز
الي شرح كل شي يدور حول الرواية
من كل النواحي ،،
الغلاف الجميل من تصميم ايادي المُبدعة ياسة حسابها ع الأنستا llil0l.l .
ثاني شي نجي ع التنزيل ، حبايب التنزيل راح يكون حسب تفاعلكم ، شلون يعني؟ يعني اذا صوتوا و تابعتوا الحساب و علقتوا بين الفقرات ، هنا التنزيل راح يكون ع كيف كيفكم بس اذا صار العكس لا هيج تختلف الخطه .
التقيكم بإذن الله في المستقبل القريب جداً و نبدي نطلع ع احداث رواية جديدة مميزة جداً غير مطروقة و مشوقة ، قريبة لحياة الأغلبية و من واقعنا الجميل المرير ..
بقلمي أنا الڪاتبة نون آل ؏ـــلي .