#الخَـازوق الأسـود
ذكرى.
لا تنسون التصويت والتعليق بين الفقرات 🤎.
استمتعوا....
____________________
____________
الأكـبر
خلص كلامة وحط رجلة على ظهري حيل وانا صحت.
-هاي الرجل اذا مكسرتهة فلا اطلع أبن مسلم.
ضحك وضربني برجلة على وجهي وكل: دروح لك، اليوم دفنكم يصير على أيدي انتَ ونسختك.
ضحكت: نشوف منو يدفن منو.
اشر للولد الي وياه: هذا ليش بعدة يحوص ؟؟؟
شفت بعيني الولد كمش أيد الكـابر ولواهة وطگهة حيل والكـابر فتح عينة وصاح بعلو صوتة من الوجع الي اجاه.
فتحت عيني وصحت على الولد: اذا توگع بأيدي والله والله مابقي عظمة صاحية بجسمك.
اشر الولد الي يمي للثاني وكل: روح صيح جرح، هذا بعد ميگدر يتحرك.
عاف الولد الكـابر وراح، باوعت عليه جان شايل مسدس وموجهة علينة، دفعت رجلة حيل من عندي ورحت يم الكـابر، والولد كل.
-أخوان، وتوأم هم ! حلوة هاي عجبتني.
ساعدت الكـابر يگعد وهو جان ميت وجع من ورة أيدة.
باوعت على الولد وكلت وانا اضحك.
-اذا مخليتك تندم.
اشر علينة ثنينة بالمسدس وكل: أنتو شنو أسمكم ؟
ضحك الكـابر وهو متوجع كل: وانتَ مصدگ نفسك لهاي الدرجة ؟
اجة الولد ووياه واحد ثاني باوع علينة وهو عاقد حاجبة وكل.
-هذول همَ ؟
هز الولد الي يمنة راسة وهو رجع كل: جيبوهم للمغيسل أبوية راح يجي.
بهاي الاثناء الكـابر همسلي بصوت ناصي.
-لا تقاوم ولا تسوي أي شي.
هزيت راسي بهدوء والولد اجة كمشني حيل وگومني وحط المسدس على ظهري وكل.
-اذا تشرد لو تحاول بس تتحرك الطلقة تصير براس أخوك وكيفك بعد.
ابتسمت بدون كلام وهو دفعني والولد الثاني گوم الكـابر من مكانة وسمعت الكـابر يكول.
-لوية أيدي راح يكون ردهة كسرة راسك، وكول حسن مكل.
ضحك الولد وكل: اهاااا أسمك حسن !
ضحكنة انا والكـابر ثنينة ومشينة والولد واحد گدامنة وثنين ورانة ونسمعهم يحجون علينة وانا والكـابر جنة ساكتين.
من وصلنة لمغيسل مال أموات دخلونة جوة وسدو الباب علينة والكـابر راساً كل.
-لا تسوي أي شيء، وحتى حجي لا تحجي اريدك تبقى ساكت.
الأكـبر: ديكولون علينة نباشين يعني...
قاطعني: هاهية خلي ياخذون علينة هاي الفكرة، منريد مشاكل فوگ مشاكلنة هسة.
الأكـبر: عوف هذا الموضوع هسة، أيدك ؟؟؟
مدهة لي وكل: طگهة.
نزعت بسرعة اللثام الي جان على رقبتي وحطيتهة بحلگة، گعدنة بالگاع ثنينة وانا كمشت أيدة باوعت عليه وهو غمض عيونة، تحسست أيدة وبحركة سريعة طگيتهة له وهو وجهة صار أحمر وراد يعيط بس اللثام جان مغطي على الصوت.
طلعتة من حلگة ومسحت بيه وجهة وهو متوجع، سند ظهرة على الحايط وبقينة هيج ثنينة.
هو مغمض عينة ومرجع راسة ليورة وكامش أيدة، وانا جنت اباوع على المكان، جان تقريباً مغلق بس بيه شباك واحد وبيه حدايد يعني من المستحيل نطلع من عندة.
اقتربت من الكـابر وكمشت أيدة الزينة وكلت.
-الكـابر تحمل شوية ونطلع منا.
باوع علية وكل: وانتَ ظهرك تأذة هواية، اكيد هسة ديوجعك !
الأكـبر: انا مو مهم...
قاطعنة صوت الباب ينفتح، رفعنة راسنة ثنينة ودخلو الولد ثلاثتهم.
باوعنة انا والكـابر على بعض وهو رمشلي ثلاث مرات بعينة وانا فهمت شنو يقصد، رجعت عيني على واحد من الولد الي گعد على كرسي وكل.
-منو أنتو ؟
مردينة عليه ثنينة بقينة ساكتين، جنة منگدر نسوي شي لان واحد منهم جان واگف وشايل مسدس بأيدة واحتمال أي واحد من عدنة يتحرك ينضرب طلقة برجلة عود علمود منشرد هاي الافكار نعرفهة كلش زين.
رفع الولد حاجبة وكل: يعني راح تاخذ السكوت علامة للأجابة ؟
ابتسمت وكلت: انتَ بسلو عبالك راح نگعد ونتناقش وية كومة زعاطيط ؟ أبني روح جيب واحد جبير نتفاهم وياه.
ضحك الولد وگام من مكانة وهو يحك طرف خشمة، وگف گدامي وكل.
-مؤكد انتَ عقلك مو براسك.
الأكـبر: اي مو العقول عفناه لك ولأمثالك.
ابتسمت الولد وبنفس اللحظة رفع رجلة وضرب بطني حيل.
بعدني حتى ممستوعب گعد على بطني وكمش ياختي حيل وكل.
-هو انتَ اساساً بالمغيسل اكتلك وراساً نغسلك وندفنك، شغلة نص ساعة.
رفع أيدة وضربني على وجهي والكـابر بس راد يدخل اجة يمة الولد الي كسرلة أيدة ودفعة حيل وگعد عليه وحط ركبتة حيل على ظهرة علمود ميتحرك.
وانا ساكن جوة أيد الولد لحد ما اجة الثالث وبعدة عني وكل.
-كافي جرح، خلي نخابر عمي شيث هو يتصرف وياهم.
جرح: اي مؤكد نخابرلهم أبوية.
طلع الولد الي أسمة جرح وطلعو البقية هم من المكان وانا راساً رحت يم الكـابر وسندتة علمود يگعد لان أيدة گام ميگدر يحركهة بعد جانت مورمة.
اخذ نفس وباوع علية وكل: عوفني انا هسة، واسمعني زين...
جموح
فتحت عيني على صوت أذان المسجد الي جان قريب علينة.
گمت من مكاني وباوعت على خالتي حمدية، وخاتون، ثنينهن غاطات بالنوم وجانن ثنينهن التعب مبين على وجوهن.
گمت من مكاني وطلعت من الغرفة بهدوء ورحت للحمام غسلت وجهي وتوضيت ورحت فرشت سجادتي وصليت صلاه الفجر.
خلصت صلاه وكلت اشوف أخواني، مع العلم متأكدة موجودين لان بهذا الوقت راجعين من المقبرة.
فتحت الباب على كيف وباوعت بأستغراب لان جانت الغرفة فارغة وحتى فراشهم ماكو يعني اساساً مراجعين للبيت !!!
سديت الباب وگمت اكل بأظافيري بقلق ماعرف شنو اسوي، وخصوصاً مرايحين لمكان عادي رايحين لمقبرة ولي يسوونة مو بسيط أبد !!!
لبست الجادر مال صلاه ورحت طلعت برة وشفت السيارة موجودة ويمهة سيارة بيت أبو نوح، بس الدراجة مموجودة !!
اخذت نفس وگعدت على عتبة الباب اباوع على المزرعة مالتنة وبنفس الوقت گلبي يدگ بخوف عليهم.
طلعت الشمس وخالتي حمدية وخاتون ثنينهن گمت اسمع اصواتهن جوة ولحد الان أخواني مراجعين للبيت، وانا نزلت دموعي من الخوف عليهم.
اجاني صوت خاتون وراية: ليش گاعدة هنا ؟؟
باوعت عليهة وهي بس شافتني دابجي لطمت على خدهة.
-شمالج تبجين ؟؟ بس لا ماتو أخوانج ؟
جموح: فال الله ولا فالج، شنو هذا الحجي !!!
خاتون: چا شعندج گاعدة هنا جنج شحادة ؟؟
رجعت عيوني على المزرعة وكلت: الكـابر والأكـبر لحد الان مراجعين.
هزت أيدهة ورفعت رداناتهة وراحت طلعت حطب وهي تكول.
-تحجين وكأنو هاي أول مرة يتأخرون هلگد !!
جموح: مو هاي المرة گلبي دينغزني.
خاتون: وغزرتهم، روحي جيبي القوري والچاي دنسوي ريوگ.
گمت من مكاني ورحت دخلت جوة والخوف بعدة بگلبي، انا وداطلع القوري اجتي خالتي وكلت.
-أخوانج وين شو ماكو بغرفتهم ؟
باوعت عليهة احاول مابين نفسي متوترة.
-كلولي البارحة نتأخر، ان شاء الله شوية ويجون.
بدون ما اسمع ردهة طلعت وانطيت لخاتون الي رادتة وگعدت انا اسوي بيض واطلع جبن واسمع خالتي تلم بالبيت وتحجي عليهم وعلى تأخيرهم.
حطينة الأكل وگعدن ثنينهن ياكلن وانا بس اشرب چاي بدون أكل لان القلق جان ملازمني عليهم.
گمت من مكاني وخالتي كلت: يلا خاتون انتِ هم گومي وروحي بدلي هسة تتأخرن على المدرسة.
خاتون: چا ياهو اليوصلنة، لا الأكـبر موجود ولا الكـابر !
حمدية: انا اوصلجن للمدرسة.
هزت راسهة وكملت: خلي يوگفولي هذول الأثنين.
رحت للغرفة وخاتون اجتي وراية وبدلنة ثنينة هدومنة وطلعنة وخالتي هي الي وصلتنة للمدرسة.
وانا گضيت اليوم كلة صافنة وتفكيري يم الولد، حاولت خاتون هواي تقنعني انو من نرجع راح نشوفهم بس انا مقتنعت جان گلبي ينغزني.
صار الظهر وانا بسرعة لبست جنطتي وطلعت برة في أمل اشوف الكـابر هو الي واگفلنة بس من شفت خالتي حمدية واگفتلنة عيوني دمعت بخوف اكثر.
رحت يمهة وكلت: أخواني وين خالة ؟؟؟
كلت والقلق جان واضح عليهة هي هم.
-ماعرف مرجعو لحد الان وحتى اتصالات حرگت الدنيا عليهم وماكو رد، خلي نرجع وانا احاجي أبو خليل جوارينة.
رجعنة للبيت وخالتي مباشراً راحت لجوارينة أبو خليل.
وانا بدلت بسرعة وطلعت برة الغرفة وبنفس الوقت دخلن خالتي وأم خليل.
گعدن وانا هم گعدت وتجيت ظهري على الحايط وأم خليل تحجي وية خالتي تحاول تهديئة وتكوللهة ماكو شي.
همة صحيح يتأخرون بس مو لهاي الدرجة !
وحتلو واحد منهم يتأخر الثاني يكون بالبيت مستحيل يعوفون البيت بدون واحد منهم لفترة طويلة !!!
بقينة على هذا وضعنة وحتى أكل مأكلنة گاعدين ومنتظرين أبو خليل يجيبلنة خبر عليهم.
صار العصر يلا اندگ الباب وانا مصدگت راساً گمت من مكاني ورحت فتحتة وقابلني منظر خلاني أحط أيدي على حلگي وابجي.
واحد أيدة مجبسة وراسة ملفوف بلفاف متروس دم والثاني وجهة ملعوب بيه لعب ووحدة من عيونهة سادهة وأيدة ملفوفة بشاش أبيض، بحيث من شفتهم بگوات گدرت افرق بينهم.
فتحت الباب اكثر وانا ابجي وسمعت صوت الكـابر.
-جموح ؟؟؟
مرديت عليه دخلو ثنينهم جوة ودخل وراهم أبو خليل وهو يكول.
-لگيناهم ثنينهم بالمستشفى.
لطمت خالتي على خدهة وكلت: صخام الصخمكم ثنينكم شنو من مصيبة صايرتلكم، انا كم مرة كايلة هذا...
قاطعهة الأكـبر: يمة مو وكتج هسة.
حجة أبو خليل وراهم: يلا أم خليل خلي أحنة نروح، عود بعدين ادز خليل يشوفكم شنو محتاجين.
حط الكـابر أيدة على راسة وكل: متقصر حجي.
راحو والأكـبر سد الباب وراد يجي يحضني بس انا مقبلت ابتعدت عنه وهو عقد حاجبة مستغرب من تصرفي.
تجتفت خالتي وكلت: بلا ماتكلولنة شنو صاير وياكم ؟
الكـابر: بعدين خالة بس خلي نرتاح شوية.
خاتون: لا مبين السالفة داچة كلش، من البارحة الفجر لحد هسة ساعة 5 العصر !!
الأكـبر: ارض الله واسعة خاتونة خانم.
رفعت تك حاجب وكلت: اي بس گلبنة مو واسع علمود نتحمل مصايبكم ثنينكم !!
حجة الكـابر والتعب جان مبين عليه: مو وكت الاسئلة هسة، يمة بس شوية نرتاح ووعد نسولفلج كلشي، وداعتج بگوات حاط رجلي بالگاع.
دخل للغرفة والأكـبر همس قريب مني: تعاي ورانة للغرفة وجيبي أكل ميتين جوع.
نفيت براسي وهو كل: اسحلج اذا متجين انتِ.
راح دخل للغرفة وانا باوعت على خالتي الي هزت أيدهة وكلت.
-روحي صبيلهم زقوم، وافتهمي منهم شصاير وتعاي سولفيلي.
هزيت راسي ورحت للمطبخ وحميت الأكل وخاتون اجتي وراية وكلت.
-عود ماوصيج اتفقو على سالفة وتعالو جذبوهة علينة.
جموح: انتِ شبيج اليوم ؟؟
خاتون: لا لان أخوانج كلش مزوديهة، من البارحة مختفين لحد هسة وخالينة بقلق مو طبيعي وأمي من الصبح تلوب وخايفة صاير عليهم شي، وهمة بكل برود دخلو لغرفتهم وراح هسة يتفقون على كلام ويجون يجذبون علينة.
حجت بصياح وبنهاية كلامة نزلت دموعهة.
مسحت عينهة وراحت طلعت من المطبخ وانا اخذتني صفنة على الي حجتة، كلامهة صحيح...
صبيت الأكل وحطيتة على الصينية وانا اسمع الكـابر يصيح من الغرفة بأسمي وخالتي حمدية تكولة وقزرقط مشاردة الأبنية منكم.
دخلت للغرفة وسديت الباب وراية وجانو ثنينهم متربعين بالگاع ويدخنون، حطيت الصينية بالگاع وكلت.
-تعالو أكلو يلا.
كمش أيدي الكـابر وگعدني غصب يمة والأكـبر لف أيدة على رقبتي وحضني لصدرة وكل.
-چنة الحلو زعلان ؟
مرديت عليه والكـابر كل: أكلي ويانة علمود تنفتح نفسنة يلا.
جموح: ماريد شي منكم.
باسني الأكـبر من خدي وكل: لا كلشي ولا زعلج انتِ.
باوعت عليه وكلت: وين جنتو كل هذا الوقت ؟ وحالتكم ليش هيج ؟ منووو مسوي بيكم هيج ؟، گلبي لا تحرگونة مو متت بعد، حياتي عايشتهة كلهة قلق بسببكم !!!!
بقو ثنينهم صافنين علية وانا حطيت أيدي على وجهي وگمت ابجي.
حضني الأكـبر وكل.
-حبيبتي انتِ ودعاتج مجنة نعرف هيج راح تخافين علينة.
ابتعدت عنه وباوعت بوجهة: وليش ماخاف عليكم بس فهموني ليش ؟ شوكت تستوعبون أنتو الوحيدين الباقـ..
شهگت مگدرت اكمل كلامي وهو رجع حضني وكل.
-خلص وداعتج كلشي اكلج بس لا تبجين.
الكـابر: كافي بجي بعد عيوني خلي ناكل، من البارحة محاطين لگمة بحلگة !!!
جموح: على اساس احنة الي خلينة.
رفع حاجبة وكل: شني هاي چا حمدية شلون تحملت كل هذا الوقت بلا أكل ؟
ضحكت وهو كمش حنچي وكل: اروح فدوة لليضحك، يلا أكلي علمود تتفتح شهيتنة.
باوعت عليه وكلت: مراح أكل لحد ما تكلولي وين جنتو ومنو هيج مسوي بيكم.
الكـابر: مو كلت وغلاتج عندي اكول !!
باوعت عليه بدون كلام والأكـبر ضربني خفيف على ظهري وكل.
-يلا مدي أيدج ست جموح.
ابتسمت وبديت أكل وياهم وهمة يشاقون وياية ثنينهم لحد ما تأكدو راحت الضوجة مني.
بعد ما خلصو أكل گمت فرشتلهم، وثنينهم بس حطو راسهم نامو من التعب الي جانو بيه، باوعت عليهم وانا ألم الأكل.
جان ملامح التعب واضحة كلش عليهم وخصوصاً الكـابر، جانت أيدة مكسورة إما الأكـبر جانت أيدة مجروحة من الكف لحد الكوع ولافهة.
شلت الصينية وطلت من الغرفة وسديت الباب وراية برجلي وخالتي حمدية راساً كمشتني من الباب.
-احجي يلا وين جانو ؟؟؟
جموح: ماعرف محجو شي والله.
رفعت حاجبهة معاجبهة وكلت: اخخخ منهم، رجليناتهم أكسرهة اذا بعد خطيت للمقبرة.
اشرتلي براسهة وكلت: خلصي غسل مواعين وروحي اقري يلا.
جموح: مو على اساس اروح اغسل الخضرة الي جبتيهة ؟
حمدية: روحي أقري يا أمي، خاتون هم بالغرفة دتقرة، يلا دراستج أهم.
هزيت راسي ورحت غسلت المواعين وحطيتهن بمكانهن ورحت للغرفة أقرة بسرعة علمود بس اخلص وانتظر الكـابر والأكبر يگعدون...
هَرم
گاعدة يم جرح وكامشة كلينس وامسح الدم الي دينزل من راسة، ومُعقب من جهة ثانية گاعد يمة برهان يمسح حاجبة الي جان ينزف.
وأبوية من جهة جان واگف ومتجتف والاعصاب الي جان واصل له خلانة كلنة ساكتين وخايفين نحجي كلمة.
اخر شي مسح على وجهة وكل: ثنين ولد مراهقين مگدرتو عليهم ؟
جرح: بويـ...
شيث: بوية بعينك، ولكم مراهقين ثنين على ثلاث شباب كل واحد بطول باب مگدرتو عليهم ؟؟؟
مسح برهان حلگة بكلينس لان جان دينزف وكل.
-مجانو مراهقين عمي.
صاح بيه أبوية: أكل نعل انتَ، مگدرتو عليهم نص ساعة بين ما اوصل !!!
مسح على وجهة وراح گعد وكل: اريد اسمع شلون گدرو يفلتون من أيدكم ؟؟
باوع على مُعقب محجة شي، باوع على جرح هم محجة، صاح بصوت رج البيت رج.
-مو داكول احجووو ؟؟؟
برهان: أحم أحم، انا راح اسولفلك عمي انا.
أخذ برهان نفس وكل...
.
.
.
بعد ما طلعنة من المغيسل سد مُعقب الباب وقفلة، باوع على جرح وكل.
-أبوك اذا تأخر مصيبة.
جرح: ميتأخر فترة ربع ساعة ويوصل، بعدين الدنيا فجر وثنينهم تعبانين واحد أيدة مكسورة والثاني تعبان ميگدرون يسوون شي.
گعدت بالگاع وتجيت ظهري على الحايط وانا افكر، حكيت راسي احاول اتذكر لان الاسم مار علية بس مدا اتذكر شوكت وشلون !!
قاطع صفنتي مُعقب وهو يكول: شبيك برهان ؟
باوعت عليه وكلت: متحس أسم مسلم مو غريب !!!
مُعقب: شلون يعني ؟
برهان: يعني اقصد مار علينة هذا الأسم قبل، بس مدا اذكر !!
عقد حاجبة باستغراب وكل: ماذكر هيج أسم !!!
باوع علينة جرح وكل: انا هم احس سامع هذا الأسم قبل !
باوعنة ثنينة على بعض نحاول نذكر بس ماكو، ومُعقب كل.
-تأخر عمي شيث شنو السالفة !!
وية حجايتة سمعنة طبة كلش قوية جوة، باوعنة بوجه بعض بصدمة وراساً مُعقب راح فتح باب المغيسل وانا دخلت بسرعة وجان المكان فارغ مابيه أي أحد !!!
دخلت جوة اكثر وماشوف الا واحد منهم طلع من ورة السيراميك الي يحطون عليه ميت كامش خشبة.
رفعهة وضربهة على گصتي حيل وبنفس اللحظة سمعت صوت ضربة قوية وصوت جرح يصيح.
-ورة الباب مُعقب.
وگعت بالگاع دايخ وبس لمحات صارت گدامي.
جان جرح گاعد بالگاع هو هم دايخ والدم يطلع من راسة والولد ثنينهم ديضربون بمُعقب.
گدرت اسيطر على نفسي وگمت من مكاني بسرعة وضربت واحد منهم بوكس على وجهة ومُعقب استغل الفرصة وكمش أيد الثاني وگلبة خلاه جواه وگام يضرب بيه.
رحت للولد الي جان يضحك بصوت عالي، كمشت ياختة بأيد ورفعت أيدي الثانية على وجهة بس هو بسرعة كمش أيدي قبل ما توصلة ولواهة حيل ورفع وحدة من رجولة وضربني على بطني بقوة لدرجة مگدرت اوگف بعد.
گعدت بالگاع وانا حاط أيدي على بطني متوجع.
وشفت الولد الثاني گام من فوگ مُعقب بعد ما اخذ المسدس منه وسحب اقسام ووجهة عليه وكل وهو يضحك.
-مراح اسوي شيء، لأن حسابكم مو هسة.
باوعت على جرح الولد الثاني دفعة بالگاع وجرح جان منتهي اساساً لان ضاربينة قوي على راسة من ورة.
طلع الولد المخزن من السلاح وحطاه بجيبة وشمر المسدس على صدر مُعقب وباوع علية وكل وهو بعدة يضحك.
-وعلى كسرة أيد أخوية مراح ننساهة لك.
طلعو برة ثنينهم ركض وشفت مُعقب گام من مكانة وطلع وراهم بس ملحگ عليهم ثنينهم شردو، رجع دخل وضرب المسدس حيل برجلة وصاح بعصبية.
-شلون !!!!!!!
.
.
.
اباوع على أبوية صافن عليهم ثلاثتهم، ضحك باستهزاء وكل.
-صدگ تحجون ؟ ثلاثة وعدكم سلاح ومابيكم شي، وثنين ولد بدون سلاح وواحد أيدة مكسورة والثاني مكتول، هيج سوو بيكم ؟
جرح: قضاء الله وقدره.
صاح أبوية عليه: اكل خـ** لك ترة اگوم اكمل شغل الولد عليكم وابو فاضل.
گام أبوية من مكانة وكل: ترحون ادورولي عليهم اريد قبل يوم الجمعة ثنينهم يمي، فهمتووو ؟؟؟
صاح بنهاية كلامة والولد راساً هزو راسهم، طلع برة والولد باوعو بوجه لاخ.
برهان: شلون نلگاهم هسة ؟
جرح: يريدة قبل الجمعة قبل خطوبتك.
ذبيت الكلينس من أيدي ولميت حولية وانا منزلة راسي واسمع مُعقب يكول.
-هو هذا الاسبوع جان عبارة عن مشاكل، منا ليوم الجمعة الله اعلم شنو راح يصير.
باوع علية بنهاية كلامة وگام من مكانة وطلع برة ولحگوه جرح وبرهان ثنينهم.
باوعت على راحيل گاعدة صفح ودتلعب وية زين العابدين وساجد وهمة متونسين وياهة.
گمت من مكاني ورحت للمطبخ وذبيت الهوسة وانا اباوع من الجامة الي فوگ السنگ الولد ثلاثتهم گاعدين بالگاع ويحجون ومبين من ملامحهم ديتفقون على شي.
اخذت نفس وغسلت أيدي وانا افكر بمُعقب الي ماعرف حجة وية أبوية او لا على سالفة رجعة أمي.
لان صدگ كلشي مباقي للخطوبة مالتي غير بس يومين !!!
انداريت على شدة ثوبي من جوة، باوعت زين العابدين واگف ويباوع علية، كلت.
-ها عيونهة لأختك شتريد ؟
زين العابدين: جوعان كلش.
هَرم: مو أكلت قبل شوية ؟
نفة براسة وكل: جوعان بعد !!!
هزيت راسي وكلت: تمام اگعد هسة اجيبلك أكل.
مسمع مني راح طلع للكراج وانا اخذت ماعون ورحت صبيت له شوية تمن وحطيت عليه مرگة.
وگفت يم باب المطبخ وشفت بس هو ومُعقب گاعدين ويضحكون ثنينهم.
هَرم: عابد تعال يلا أكل.
گام من مكانة بس مُعقب كمش أيدة وشاورة وزين العابدين ضحك وگعد وصاح.
-جيبي الأكل هناااا.
تخصرت بأيد وكلت: لا انتَ تعال ولك !!
رفع مُعقب حاجبة وانا بگوات حابسة ضحكتي وزين العابدين صاح مرة ثانية.
-هسة دجيبيه يا مرة.
فتحت عيني ورحت يمة وكلت: ولك بعدك حتى شارب اخضر ممطلع وهيج تحاجيني !!
ضحك وانا مديت الماعون ومُعقب اخذة من أيدي وكل.
-انا أوكلة فوتي جوة انتِ.
نزلت راسي بدون كلام ودخلت جوة وسديت الباب وراية وشفتة عقد حاجبة باستغراب وهو يباوع على الماعون.
رجع عينة على زين العابدين وهو بعدة عاقد حاجبة وگعد يوكلة.
دخلت جوة وجانت راحيل گاعدة وبعدهة تلعب وية ساجد.
اشرتلهة أدير بالهة عليه وانا صعدت فوگ واخذت ملابس لنفسي ورحت دخلت للحمام اسبح.
بعد ما خلصت رحت للغرفة وبدلت وانا دامشط شعرط دخلت راحيل للغرفة بسرعة واشرتلي بأيدهة باستعجال وهي اتأتأة، عقدت حاجبي باستغراب وكلت.
-شوية شوية شبيج هيج مستعجلة ؟؟؟
اشرت بأيدهة وانا فهمت شنو تقصد، اخذت نفس وكلت.
-كوليلة متريد.
فتحت عينهة واشرت بأيدهة بمعنى ليش ؟؟؟
حطيت أيدي على أيدهة ونزلتهة وكلت وانا أأشر.
-انتِ بس كوليلة تعبانة ومابيهة حيل تشوف أو تحجي وية أحد، يلا راحيل حبابة لا تلحين وروحي كوليلة هيج !!
صفنت بوجهي ممفتهمة وانا اخذت نفس وزفرتة وأشرت الهة.
-تمام بالليل كوليلة مو هسة.
هزت راسهة فرحانة وراحت نزلت جوة بسرعة وانا ظفرت شعري.
راحيل تحب مُعقب كلش ومعزتة يمهة بمعزة جرح اذا مجانت اكثر.
نزلت جوة واخذت زين العابدين وساجد ثنينهم وسبحتهم وبدلت الهم وگعدت أللم البيت واحضر للعشاء.
من وقت أمي رايحة لبيت اهلهة وانا مسؤلية البيت ومسؤلية أخواني الصغار كلة علية، بحيث بالليل انام هلكاانة.
مدة وأجوي أبوية وجرح ووياهم جان بس برهان مُعقب جان مموجود.
حطيت الهم العشاء وهمة گعدو ياكلون وانا مجنت مشتهية أكل لهذا گعدت على كرسي بعيد عليهم.
باوع علية أبوية وكل: ليش ماتجين تاكلين ؟؟
ابتسمت وكلت: مشاتهي بوية، أنتو أكلو بالعافية عليكم.
باوع علية جرح بدون كلام وهو يهز راسة وانا ابتسمت بدون كلام.
بعد ما خلصو الأكل شلت المواعين وأشرت لراحيل وكلت.
-انا اغسل المواعين وانتي روحي غسلي لزين العابدين وساجد.
هزت راسهة وانا وگفت يم السنگ اغسل مواعين واباوع من الجامة، مُعقب ماكو بس برهان گاعد ويمسح حذائه بوصلة.
فزيت من صفنتي على صوت جرح يمي.
-مُعقب حجة وية أبوية.
باوعت عليه وعقدت حاجبي: بشنو ؟؟
جرح: على رجعة أمي للبيت وأبوج وافق، انا حجيت وياه بس كلي لا تفتح وياية سيرة، بس من مُعقب حجة وياه لا وافق راساً.
اخذ نفس وكمل كلامة: المهم تحملي التعب منا لباجر والله يحلهة ان شاء الله.
ابتسمت وكلت: تفكر بية مو ؟
جرح: هو مو صوجج، صوج الي يشوفج خطية شايلة كل هاي المسؤلية وحدج !!
طفيت المي وباوعت عليه وكلت: عادي خوية ماعندي شيء، وانا أحب اخدمكم ماريد اشوف أي نقص عدكم وانا موجودة.
ابتسم وباس راسي وكل: انتِ الأخت المثالية الي يكولون عليهة الأم الثانية.
ابتسمت ونزلت راسي وبنفس الوقت سمعنة صوت يمنة.
-احم احم، جرح تعال عندي سالفة وياك.
باوعت عليه اندار وطلع من المطبخ وجرح لحگة.
بنفس اللحظة اجة أبوية من الصالة وكل.
-وينهم الولد ؟؟
باوعت عليه وكلت: بالكراج ثلاثتهم.
هز راسة وطلع يمهم وانا بقيت واگفة اباوع عليهم من الجامة واسمعهم شنو يحجون لان الباب مفتوح والصوت واضح.
برهان: عمي أسم مسلم شعبان هواي فكرت بيه ومدا اعرف شي عنه !
مُعقب: وانا هم هواي دورت على الأسم وهم مدا الگة شيء عنه !!!
شفت أبوية عقد حاجبة وكل: مسلم شعبان ؟؟؟
هز مُعقب راسة وأبوية صفن شوية يفكر، بس بعدها فتح عيونة وصاح بصدمة.
-لا تكلولي الولد جانو توأم !!!!
هز جرح راسه بأستغراب وأبوية حط أيدة على راسة وصاح.
-اخخخ مسلم طلعو ولدك وانا صارلي سنين ادور عليهم !!!
مُعقب: شنو عمي تعرفهم ؟؟
شيث: هذول ولد مسلم شعبان الي دائماً جنت احجيلكم عليه، الكـابر والأكـبر !!!
برهان: والله كلتلكم أسم مسلم مو غريب علية !!!!
مُعقب: شلون منتبهت الهة !!!!!
عقد جرح حاجبه وكل: مفهمت الكـابر والأكـبر ؟ انا الي اعرفة واحد منهم كل انا أسمي حسن !!
هز أبوية راسة وكل: أي هذول مستحيل يكولون أسماءهم الحقيقية، وحتلو عرفت أسماءهم راح يگلبونهة !!
كل جرح بانزعاج: بوية فهمنة يعني شنو بگلبون أسماءهم وليش ؟
شيث: يعني الكـابر يكول انا الأكـبر وهذاك يكول انا الكـابر والعكس هم !، يعني لو تموت مراح تگدر تعرف ياهو الكـابر وياهو الأكـبر !!!
مادري شنو حجة جرح لان مگدرت اسمعه زين بس سمعت أبوية يكول.
-اذا شفتوهم مرة ثانية متسوون أي شيء غير بس تراقبوهم وتعرفون وين گاعدين وشنو يسوون.
مُعقب: هو راقبناهم اليوم بس حسو علينة ماعرف شلون !!
هز راسة وكل: هذا المتوقع من ولدك، نفس أبوهم.
عافهم أبوية ورجع دخل جوة وانا سويت نفسي عود دارتب المواعين.
مفهمت من حجيهم شي غير بس عرفو منو الولد الي صارت وياهم المشكلة.
بالليل وكالعادة بعد ما تأكدت من الكل نام طلعت من المطبخ على كيف وانا كامشة بيدي ماعون بيهة لفة وراحيل واگفة يم الباب تراقب.
رحت للحديقة وهو جان گاعد ومنتظرني، گعدت يمة وخليت گدامة الماعون وكلت.
-أكل اللفة، متعشيت.
مُعقب: شبيج ضايجة ؟
نزلت راسي وكلت: مابية شي.
مُعقب: بيج شيء هَرمي !!!!
ابتسمت وكلت: لا مابية شيء بس جنت ضايجة لان عبالي مراح تحجي وية أبوية بخصوص موضوع أمي وراح تتأجل الخطبة.
اخذ نفس وكل: انا مو كتلج الخطوبة مراح تتأجل لو على گص رقبتي ؟؟ وأبوج حاجيتة انا وقبل يرجع أمج وكل باجر اروحلهة.
هزيت راسي وكلت: اي اعرف جرح كلي.
قربت من عندة الماعون اكثر وكلت بأبتسامة.
-يلا أكل أكلك لان مراح يغمضلي جفن وانتَ نايم جوعان.
ابتسم واخذ اللفة وبدة ياكلهة وانا كلت.
-برهان جوة ؟
هز راسة وكل: اي نام جان تعبان.
هَرم: الله لا يوفق الي سوة بيكم هيج.
ضحك وانا سرحت بصوت ضحكتة، وهو من شافني صافنة عليه كل.
-ها ولج شو صفنتي، ترة مو الج !!
نزلت راسي خجلانة وحطيت أيدي على خدي، احس وجهي اشتعل نار.
گمت من مكاني بسرعة وهو كل.
-شنو وين ؟؟
هَرم: نعسانة اريد انام.
مدلي الماعون بأيد، والثاني جان ياكل بيهة اللفة وكل.
-اعرف تعبتي هاي الايام هواية.
اخذت الماعون من أيدة اخذ نفس ونزل اللفة من حلگة وكل.
-يا ريت التعب بية ولا بيج.
هَرم: أسم الله عليك شنو هذا الحجي !!!
مُعقب: تصبحين على خير هَرمي.
ابتسمت وكلت: وانتَ بخير مُعقب.
دخلت جوة وحطيت الماعون على الكونتر ورحت صعدت فوگ لغرفتي.
تمددت على فراشي وانا بالي مو وياي، جان كلة بالمستقبل.
ممرتاحة أبد، شعور ضيق جان محتل صدري، واحساسي جان يكول راح تصير مشكلة، شگد حاولت اوخر هذا الشعور وافكر بأيجابية بس مگدرت، جان قوي كلش.
وحتى بليلتهة مگدرت انام.
يوم الثاني گعدت من النوم وسويت ريوگ لأبوية وأخواني، ومُعقب وبرهان جانو هم وياهم، وراحو للشغل.
وبديت انا اشتغل البيت وحدي وراحيل راحت تسبح ساجد وزين العابدين.
بعد ما خلصت شغل البيت بديت بالطبخ واحس راح اوگع من التعب.
بعد ما خلصت أكل صبيت للجهال ووياهم راحيل وانا هم أكلت لگمتين وشلت الأكل بعد ما خلصنة.
وانا اغسل المواعين سمعت صوت الباب مال برة وراساً رحت حطيت شي على راسي.
دخلو أبوية والولد وراه ابتسمت وكلت.
-الله يساعدكم.
شيث: ويساعدج بابا.
هَرم: الأكل جاهز روحو غسلو علمود اصبلكم.
عفت الي بأيدي ورحت صبيتلهم الأكل.
عفتهم ياكلون ورحت يم ساجد الي وصخ نفسة بالكاكاو.
وديتة للحمام وغسلتلة ورجعت بدلتلة وهو جان تعبان راح تمدد ونام راساً.
رجعت للمطبخ وجانو بعدهم ياكلون، ومُعقب حاط على رجلة دفتر ويسجل ارقام واسماء جرح ينطيه له.
گعدت على كرسي وأبوية باوع علية وكل: راح ارجع أمج اليوم.
ابتسمت وكلت: اي زين تسوي، اشتاقيتلهة.
نزل راسة على الأكل وكل: ولو متستاهل بس شسوي بعد.
جرح: لا تحجي هيج بوية !!!
شيث: اي والله يعني شسوي، جايبة أهلهة لبيتي علمود يرزلوني ويحجون علية وعلى بنتي ويدخلون بمستقبلهة ! لا وبكل عين ينفون وجود أعز وحدة لگلبي !!!
جرح: انا وياك بهذا الشي بس بعد ميصير، عگبة هم عقد بتهة خوما بتهة تعقد وهي بيت أهلهة ! حتى عيب من العالم.
هز أبوية راسة بدون كلام وانا عيني تراقب مُعقب الي سد الدفتر وكل.
-يلا خلي نستعجل، هسة يخابرونة أهل الميت ويوصلون قبلنة.
ذب برهان من أيدة الخاشوگة وكل: لعد انا اسبقكم هناك.
شيث: كمل أكلك !!
برهان: لا عمي شبعت الحمد الله، عاشت أيدج هَرم.
هزيت راسي وكلت: بالعافية، الچاي ؟؟
طلع وهو يكول: مشكورة بس ماشرب.
باوع علية جرح وكل: سوي چاي علمود نلحگة بسرعة.
هزيت راسي ورحت سويت چاي وهمة خلصو أكل وراحو غسلو وگعدو ويحجون على الشغل.
انطيتهم الچاي ودخلت جوة راساً للصالة وگعدت بالگاع لان جنت تعبانة لدرجة اعرف اذا اروح لغرفتي مراح اوصل، وبس حطيت راسي محسيت بعد بأي شي.
التعب جان مسيطر علية وحتى نوم منايمة البارحة بسبب القلق الي جنت بيه، ولي لحد الان ملازمني بلا سبب...
فتحت عيني على ضربات خفيفة على خدي، صار گدامي جرح الي راساً كل.
-گعدت.
باوعت حولي احاول استوعب شنو صار وشفت أبوية ومُعقب وراحيل يمي، وحتى أخواني الصغار ملتمين علية والدمعة بعينهم.
عدل جرح گعدتي وكل: حرارتهة مرتفعة كلش.
گعد يمي أبوية من الجهة الثانية وحط أيدة على گصتي وكل.
-ناخذهة للمستشفى !
نفيت براسي وعيني وگعت على مُعقب الي ملامح القلق جانت كلش واضحة عليه لدرجة الدمعة جانت بعينة.
باوع جرح على راحيل واشرلهة وهي راحت ركض لغرفة أبوية حتى مفهمت شنو كللهة.
گومني من مكاني وانا احس رجلي دترجف مدا اگدر حتى اثبت عليهة.
وداني لغرفة أمي وهو نزعني حجابي وخلاني اتمدد وكل.
-اروح للصيدلية اجيبلج شي، وانتِ ابقي بالفراش ماقبل ترحين منا ومناك !!
هزيت راسي وغمضت عيوني اريد بس ارتاح لان جنت صدگ تعبانة.
شوية وحسيت بحركة على الجرباية، فتحت عيني وجانت راحيل تعدل حجاب على راسي.
عقدت حاجبي باستغراب وهي ابتسمت ورفعت راسهة.
باوعت بنفس المكان الي جانت تباوع بيه وشفت مُعقب واگف يم الباب ومتجتف يباوع علية.
ابتسمت وهو اخذ نفس ونزل راسة وكل.
-منايمة البارحة مو ؟
مرديت عليه وهو كمل: واكيد بدون أكل مشتغلة البيت، ليش هذا الاهمال بنفسج ؟؟
هَرم: مجرد دوخة ليش مكبرهة ؟
باوع علية وهو عاقد حاجبة وانا ابتسمت احاول اغير جو بس هو اندار وطلع برة.
باوعت على راحيل جانت معبسة وهي تباوع على الباب.
رجعت غمضت عيوني لان جنت صدگ تعبانة ومابية حيل لأي شي، حسيتهة فرصة للراحة واجتني.
بس مدامت لان صوت جرح العالي گعدني، باوعت فتح باب الغرفة وهو صاير عصبي.
عقدت حاجبي باستغراب وباوعت عليه دخل للغرفة وجان من فوگ ليجوة تراب.
باوع علية وابتسم وكل: گومي جبتلج دواء يلا.
عدلت گعدتي وكلت: شبيك ليش مترب ؟
باوع على نفسة وكل: جنت داحفر قبر، المهم هسة..
صاح: عابد جيب مي لأختك.
اجة يمي وطلع الادوية من الجيس وكل: هذا تشربينة هسة، وهذا بعد ما تاكلين يلا تشربينة مو متاكلين !! والله اطيح حظج !!
باوعت عليه وكلت: وماما ؟
مسح على راسي وكل: أبوج راح لبيت جدج وهسة انا بس اغير هدومي اروح وراه.
هزيت راسي وهو طلع من الغرفة وزين العابدين اجة وجايب گلاص مي ونصة واگع بالگاع.
اخذتة من أيدة وانا اضحك وهو عقد حاجبة بطريقة تضحك وكل.
-تضحكين علية وانا أبن الدفان شيث !!!
ضحكت وكلت: والنعم وسبعة انعام منك ومن الدفان شيث.
زين العابدين: لعد كضي لسانج يا مرة ولا تضحكين.
رفعت حاجبي وهو طلع من الغرفة، ضحكت على حجية بعدة نتفة ويقلد أبوية بكلشي، وحتى طريقة الحجي والتصرفات نفسهة بالضبط.
شربت الدواء مالتي وتمددت وباوعت على السگف وبالي يم أمي.
أمي وأبوية تزوجو وهمة صغار وبالبداية مصار عدهم جهال فـ لهذا أبوية راد يتزوج عليهة لان السبب جان منهة وأهل أمي نوعاً ما عدهم وراثة بهذا الموضوع.
بس أبوية أجل موضوع زواجه لان أمي جانت رافضة رفض قاطع وصارت مشاكل هواي، وراهة بفترة مو كلش طويلة صارت حامل بجرح، ومن أجة للدنيا هم بقو بدون اطفال مدة طويلة وبهاي الفترة أبوية شال مسؤلية مُعقب وبرهان، ووراهة جابوني انا ووراية راحيل وانوب زين العابدين وساجد اصغرنة.
بس أمي من وقت أبوية كل اتزوج لان متجيبين اطفال هي تكرهة، ومو افعالهة وحدهة تبينلنة هي تكره أبوية لا وإنما هي تعترف بلسانهة وگدامنة هم تكول انا اكره أبوكم.
احنة بالنهاية منگدر ندخل ولا نحجي، جرح من واحنة صغارعلمنة هاي أمنة وهذا أبونة والمشاكل بيناتهم تصير وهم يحلونهة.
مر فترة طويلة يلا سمعت صوت أمي بالبيت، فتح الباب واجتي يمي والدمعة بعينة.
-يمة بنيتي هاي شصاير بيج !!! عرفت انا اذا اعوفج محد يهتم بيكم، دتشوف جرح دتشوف البيت بدوني شنو يصير بيه !!
جرح: هسة يمة لا تفتحين مشكلة جديدة مابينة حيل.
اجة صوت أبوية من الصالة: جرح يلا عدنة شغل مُعقب منتظرنة.
جرح: يلا انا طالع، هَرم اذا احتاجيتي شي اتصلي علية من تلفون أمج.
هزيت راسي وهو طلع برة الغرفة وأمي كلت.
-يعني هاهية بعد وافقتي على مُعقب !!!
باوعت عليهة بدون كلام وهي كلت: شفت فراس البارحة، مشتري بيت جديد وبأحسن منطقة هم، وشغلة عال العال، فكري عدل هَرم.
عدلت گعدتهة يمي وحجت بهمس: شايفة حياتي انا وية أبوج شلونهة ؟ كلهة مشاكل وانتِ تردين تزوجين واحد من تربيتة !!
هم مرديت عليهة وهي كملت: وهاي حياه طويلة ترة يعني تگضينهة بربع قطعة زين لو بيت سياح نياح ويلمع لمع !!
اخذت نفس ونزلت راسي وهي اقتربت مني اكثر وكلت.
-انا راح اعوفج هسة انتِ ارتاحي وفكري زين، وتعرفين بية انا أمج ربيتج وكبرتج يعني اعرف مصلحتج اكثر من أبوج الي يطلع من الصبح لحد فجر يوم الثاني وميجي بس علمود يملي بطنة.
گامت من مكانهة ونزعت حجابهة وحطت اغراضهة على الميز وطلعت برة الغرفة، وانا نزلت راسي افكر بكلامهة...
يتبع...
_____________
هلا هلا 🫢🤎.
انطوني رأيكم بالبارت، واريد اشوف توقعاتكم للبارت الجاي 🤎.
____________
.
.
.
.
.
.
.
.
.
.
في أمان الله 🖤.