بين اجنحة المولى

بارت الـ١٩

بين اجنحة المَولى💙 ...
التصويت لا تنسوا .. مُتابعة الحِسااب

...........

الصَـدمة الي صابتنة من عَرفنـة الحرگ چان بفعل فاعل
منو يتجرأ يسوي هيج ، منو هل بَشـر الي يگدر يحرگ ادمي بدم بارد؟

مَفزوعة ،  اشوف محمد علي متمدد بالگاع و وجهه مَصخم باللون اسود ، فززني صوت بكر و هوَ يعيط بيه :- شااااااششش بسرررعةةة
ركضت ؏ الاسعاف الأوليـة ، انخبصت من الادوية اخيـراً
لگيتـه ، اخذها ابو بكر فتح حلگ محمد و هوَ  فاقد
دخلها لنهاية حلگـه !!
طلعها و ملزگ بيها جُغد جوزي ، اخترع من شافَ
عاط بـأعلى صوته ؏ وقاص غُرفةَ أقرب شي
نَزل كُل البيت ؏ صوته ، مَتجمدة بمكاني اول مرة اشوف هيج مَنظر مُفزع بواحد مـن وَلدنـه

شافـه وقاص شهگ بمكانـه :- شبييييييي ؟؟؟؟؟؟
:- بسرعة حضر السيارة ، ناخذة للمُستشفى
:- لك بس گلي شبي ليششش هيج
فقد ابو بكر عاط و حسيت بلاعيمـه تشخطتت:- بسسسرررررعععععةة

لا ارادياً و اني اشوفهم بهل منـظر جاوبتَ :- حَرگوا السيارة عليـه .
تصنموا بمكـانهم من سمعوني ، ادارك الامـر وقاص جاب السويج و طلع
رجع شالوا محمد علي بالگوة بُنية جسمة ضخمة و طَويل

لَطمت عمَة ابرار ؏ صدرها :- يمة يمة الولد شبي ولج شحرگ السيارة عليه

الاء :- اخاف هيَ السيارة احترگت بيها شي ، منو يسوي هيج قابل

عَفتهم ورحت لغُرفتي لزمت صدري حسيت الموقف مَعيود عليـه و اني اول مرة اشوف هيج شي !
هديت نفسي :- لا ما يصير شي راح يصير بخير
استحوذ دماغي بالتفكير منو يجرأ يسوي هيج و ليش و شلون !! ، أخـذني الوَقت

دخلت نمارق عليه ، و وجهة ابيض شاحب من الالوان
گمزت عليها عبالي خايفـة ؏ محمد علي
:- نمارق شبيج مَصفرة؟؟
:- ها  ، لا ماكو شي اليوم اول يوم دوام بس بس تعبانة

تحجي و عينها مو ثابتـة حسيت بيها شي مُريب
:- يعني ما خايفة ؏ محمد علي ؟
باوعتلي مستغربة :- ليش شبي؟
:- شنو شبي ما گالولج ؟ ,  يگولون حرگوا السيارة عليه ..
انصدمت :- شنو حرگوا السيارة وينَ و شلون ، بي شيي ؟؟

:- لا ما اعرف لحد الان ماكو خَبر منهم ، بس المنظر جان كُلش يخوف ، وجهة چان مصخم بالفحم

ابتعدت عني ، ذبت الجنطة و اخذت نفس متوترة
عافتني و دخلت للحمام .

استغربت من تصرفها ؟
مو مَعقولة بس تعبانة من الدوام متأكدة بيها شي

تركتها و نزلت جوا ، و ما شاء الله جان ما ينشاف شي بس الروس الرياجيل ..
يحجون بحـرّارة ، و اسمع يحجون عن الحادث
زين نمارق من صعدت ما شافتهم ؟ ، و تسألت ؟
ليش من سألتهـا نَكرت ؟

عبد الكَريم :- وعلي الا اكسر ظهرَ الي سوا هيج لو مختنگ و ميت لا سامح الله  چان شصار بينه ..
ولاء الدين :- يطلع ولو بعد حين ، ونشوف شنسوي ، الحمدلله ربك عَداها على خَيـر

هدئوا بعد ما حجو عن الفاعل و اثناء ما اني چنت فوگ
مطفين السيارة و معالجين الموضوع ، و منتظرين يكتشفون الفاعل ..

و ابو بكر ماخذ القضية و دا يتحرى نُسبة الى مَهنةَ ...

نوح :- اني متأكد لان بالمُكافحة و يجوز احد عندَ عداوة ويا و سوا هيج .
عبد الكريم :- ويا غبي يتجرأ بنص الشارع و بـوضح الصبح يحرگ سيارة على ضابط ! ، كلامك مو منطقي
نوح :- العفو استاذ عبد الكريم ، انتَ تشتغل ويا و اني ما ادري ؟
عبد الكريم :- لا عزيزي ، بس اني شَغلتي هاي و اعرف هيج نوعيات ، يعني حسب كلامك ، اذا كان المُنتقم من الشُغل فا راح ينتقم بالشُغل ، مو يحرگ السيارة عَلية و يُقتلَ .

خطاب :- صح ، اخوية و اعرفه ما يدخل نفسـه بالقال و القيل لو عنده شي جان عرفت ، كُلشي يحجيلي ، بس الشغلة مُبهمة مدا تنفهم  ، الي سوا هيج كُل البعد عن شُغل محمد علي .

تركتهم يَتناقشون ..
رحت للمطبخ لگيت بس رباب فاتحة الثلاجة و صافـنة
دلهم :- خيرچ ، انتِ و نمارق هاي الفترة عبالك مُطلقات .
:- رحمة الله والديج ترا انه صدگ مُطلقة .
:- تشربين چاي ؟

تنهدت بتعب :- دّلهم احس مُثنى اله ايد بحرگة السيارة .
انداريت عليهـا مَصدومة ، شنوو ؟!
انتبهت ؏ عينـها حمّرة و ذَبلانة ، جُفونها صاير لونهن اغمق من بشرتها بَهواي ، واضح عليها ملامح التعب ..

تّقربت عليهَـا و گعدتها ؏ الكرسي و راسها مَنحنّي
رَدت اسايسهـا حتى اسحب الكَلام بَوضوح ..
دّلهم :- شلون الا علاقة حبيبتي انتِ ؟ ، ليش دا احس ضامَة شي ؟.
دّمعت عينها ، و گامت تشهگ
:- اششش كافي لا تحچيلي ، لا يحسون الولد والله هسة يروحون يذبحوا ، بعدين نحجي هسة اهدئي .

قلقت عَليهـا كُلش جبتلها مَي ، شَـربت
حَسيتها شوية ارتاحت :- تعالي بالغرفة احجيلي

گامت لحيلها و أَبتسمت ومَسحت عينها :- لا اتركيها على غير مرة ،خلي نسويلهم چاي يريحون اعصابهم .
مَحبيت اضغط عليها بس عَرفت انطت بنج للموضوع
غَيرت نبرة صوتها و ابتسمت حتى لا الح عَليها ..

حطيت المي ؏ النار ..
رَباب :- لاحظتِ تصرفات نمارق من رجعت من الجامعة ؟
استغربت لأن عبالي بس وياي هيج :- ياااه عبالي بس اني لاحظت هذا الشي .
:- لا اني تحجي وياي و مَرتبكة حتى ما افتهمت منها شي .
:- مَرتبكة؟
:- اي بحيث حتى بعيني ما تَـباوع اسألها على شي تجاوب شي ثاني .
:- والله ما اعرف ، من تعدّي هل أزمـة بسلامة نَفتهم منهـا .
:- ان شاء الله .

صَبيّت الچاي و انطيت لرباب توزع ..
اخذت چايي و وگفت ورا الكرسي مال قَنفة الي گاعد علية عَبد الكريم ، و اكيد رجَعنة لحديثهم الحَـار

خطاب :- نوح ، نخلص ونروح للمُستشفى ، قبلها نمّر على بكر نشوف شصار .
ولاء الدين :- صدگ انتو ليش هنا ليش مو يم محمد علي او يم ابو بكر؟
نوح :- عّمي احنة الظهرية و العصرية كلها يمهم بس ماكو فايدة منه بس واگفين ، هسة بس نصلي المَغرب و نرجعلهم و حاطين حَراسة

خلصَوا من حديثهم ، بدو بحديثهَـم السياسي اللَفْحٌ
و عن ما يجري ببّـغداد المّسكينة ..

زَوجة استبرق و الاء ، ببيت اهلهم يعني ماكو ازعاج اطفال يعني راحة بال ..

أَجت عيني ؏ كتف عبد الكريم و تَفاصيـلهّ ...
القميص مَفصلّ تفصّال ..
رَاهم ويا اكتافـه العَريضة
وَ عضلات أَيّـدَ الضخمة ضَاق عليها القَميص ،
عضلات ظهرَ تتحرك مع حُرگتـة بالكلام بـَالحديث السيّاسي الشَيـق .

بَشرةَ البيضاء مائلـةَ للحُنطي ، يُليق معهـا جداً القميص بـَاللون الزيتوني الداكن الذي يَرتديه ..

خلصوا الچاي و گاموا و اني بَرد بـأَيدي الچاي !
اندار شافني ورا ، ارتبكت حَولت نظراتِ لأيدي ، حَسيتَ انتبـه ..

:- شبيـچ ؟
:- هاه
اخذ الكوت لِـبسَ  ..
أَبتسم وَ عينَـه بـعَيني :- مَـرة ثَـانية لا تَصفنين مَو زين عليچ .

.....
غَسـق السّيـد ♥️
" تَوضيح "
هذهِ أَول رِواية أَلـي ...
لذلك اذا كان هُناك اي تَقصير بَـسرد الحَدث ، او عدم إِيصال القُصة بصورة المَطلوبة ، اعذروني 💙
يا رَيت تَنبهوني عليـه ، أَكون مَمنونـة .
تَقصدت انزل هذا البارت القصير حتى اگول الكم هذا الكَلام .

المُشاهدات عاليـة لكن التصويت جداً قليل يمَكن ٢ أَو ٣
فا يا رَيت الي يَقـرأ يَصوت .

" مَحتاجة مُصممة غلاف للقُصة 💙"
شكراً