#الخَـازوق الأسـود
ذكرى.
لا تنسون التصويت والتعليق بين الفقرات 🤎.
استمتعوا....
____________________
____________
الكـابر
ماحس بنفسي الا اندفرت قوي بالگاع.
باوعت على الأبنية شالت المعول من الگاع ورفعتة تريد تضربني بيه.
بس الأكـبر كمشة من ورة وسحبة حيل من أيدهة، وهي حتى منطت مجال، اجتي ركض علية وخنگتني حيل وهي تصيح.
كمشت أيدهة والأكـبر صاح على أخو الابنية.
-لك خرب عرضك شگد فاهي دروح اكمش أختك.
أجة الولد بسرعة وبعد أختة بصعوبة من عندي وانا ماخذتني الصفنة، باوعت على الأكـبر الي طگهة ضحكة وكل.
-هااااا لك مدبرتهة ؟ زلمة ز***.
الكـابر: اكل نعل وتعال نكمل شغل، مو وقتك.
شلت المعول من الگاع وگمت من مكاني ورجعت احفر والابنية گطعت روحهة جوة أخوهة وأبوهة الي جانو مصدومين ثنينهم بحالتهة.
ذبيت المعول من أيدي وانا والأكـبر ثنينة صفنة على المنظر.
جانت الحفرة مليانة حشرات حرفياً، وكلهة ملتمة على مكان واحد، والحشرات جانت ضخمة بشكل خلة الأب والأخ يوسعون عينهم.
عدلت جفوفي واشرت للأكـبر وكلت: روح اللبس جف.
راح للدراجة وشوية ورجع وهو لابس جفوف، گعد گدامي وكل.
-بلا زحمة عليكم ثبتو الأبنية زين.
باوع علينة الولد مفهي وكل: ها ليش ؟؟
الأكـبر: لا خوية ماكو شي بس احتمال تاكلنة بسنونة وهي تشوف الي راح نسويه.
أشرت على الولد الصغير وكلت: خلي يدخل جوة يم أمة.
هز الحجي راسة ودخل أبنة جوة وسد البابا.
مديت انا أيدي ووخرت كل الحشرات وطلعتهن من الفتحة والأكـبر وياية، وكلما نطلع كلما يزداد عددها اكثر.
وانا بديت اردد سورة البقرة بصوت عالي والابنية گامت تگمز بمكانهة وتصيح وتكول.
-لا لا لا تعذبني اكثر، عوفففة.
مهتميت لحجيهة بقيت اردد بصوت اقوى وانا مديت أيدي وحسيت كمشت شي ثگيل كلش.
سحبتة حيل وجانت علاگة وبسبب سحبتي الهة انشگت ووگعت محتوياتهة بالگاع.
نكتت أيدي وكلت: انا راح افكة.
خزرني وكل: انجب واگعد، انتَ مال هذيج المرة بعدة مأثر عليك تريد تفتح هذا هم ؟
باوعت عليه بدون كلام وهو راح فتح العلاگة بشكل كامل ورش ملح جان جايبة وياه بالگاع وگعد يفكهن وحدة وحدة وهو يقرة دعاء وانا عيني على الابنية الي فقدت بين أيدين أخوهة وگامت تلطم على وجهة وتملخ روحهة.
گمت من مكاني وكلت: سويلي طريق حجي.
اشرلي وهو فاتح عينة ماخذتة صفنة: فوت فوت.
ماعرف شلون كمشت ضحكتي على شكلة بس والله خطية هو وعائلتة.
المنظر الي شفتة بالحفرة ممكن يكون عادي بالنسبة الي بس يمة شي صعب، كلش صعب.
فتحت باب المطبخ وبدون ما اباوع على الموجودين رحت للسنگ واخذت دولكة موجودة وترستهة مي وكلت.
-أختي انطيني ثلج اذا عدكم.
سديت البوري وانداريت وانا منزل راسي والمرية حطت الثلج بالدولكة.
وديتة يمهم وشفت الأكـبر بعدة على حالة ديقرة ويفتح.
رحت وگفت گدام الأبنية ونظرات الحقد الي انطتهة الي خلتني ابتسم، اشرت للولد وكلت.
-گعدهة على الكرسي.
هز الولد راسة وراد يگعدهة بس مگدر يسيطر عليهة وحدة لهذا اجة أبوه وكمشهة وگعدوهة وثنينهم كامشينهة وانا نزعت جفوفي وحطيت أيدي على راسهة وقريت عليهة جزء من سورة البقرة وهي بعدهة تتحرك وأخوهة كامشهة.
-وَاتّبَعُواْ مَا تَتْلُواْ الشّيَاطِينُ عَلَىَ مُلْكِ سُلَيْمَانَ وَمَا كَفَرَ سُلَيْمَانُ وَلَكِنّ الشّيْاطِينَ كَفَرُواْ يُعَلّمُونَ النّاسَ السّحْرَ وَمَآ أُنْزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلّمَانِ مِنْ أَحَدٍ حَتّىَ يَقُولاَ إِنّمَا نَحْنُ فِتْنَةٌ فَلاَ تَكْفُرْ فَيَتَعَلّمُونَ مِنْهُمَا مَا يُفَرّقُونَ بِهِ بَيْنَ الْمَرْءِ وَزَوْجِهِ وَمَا هُم بِضَآرّينَ بِهِ مِنْ أَحَدٍ إِلاّ بِإِذْنِ اللّهِ وَيَتَعَلّمُونَ مَا يَضُرّهُمْ وَلاَ يَنفَعُهُمْ وَلَقَدْ عَلِمُواْ لَمَنِ اشْتَرَاهُ مَا لَهُ فِي الاَخِرَةِ مِنْ خَلاَقٍ وَلَبِئْسَ مَا شَرَوْاْ بِهِ أَنْفُسَهُمْ لَوْ كَانُواْ يَعْلَمُونَ.
من شفتهة بس شوية هدئت رفعت الدولكة مال مي وذبيتة كلة على راسهة وهي شهگت عبالك هسة ردت الهة الروح.
باوعت علية ورخة جسمهة ووگع راسهة بحضن أخوهة متخربطة.
باوعت عليه وكلت: هاهية أخوية دخلهة جوة وخلي تنام.
هز راسة وجان القلق واضح كلش على ملامحة، شالهة ودخلهة جوة وانا باوعت على الأكـبر الي نزع جفوفة وذبهن بالگاع وكل.
-والله العالم فارغة ماعدهة لا شغل ولا عمل تگعدن تسحر.
خزرتة وهو باوع على الحجي وكل: ها اعذرني حجينة بس لازم احجي ماتحمل.
گعد الرجال على كرسي وحط أيدة على راسي، وبس أبنة اجة اشرلة راساً.
-روح جيبلهم مي.
راح الولد ورجع جايبلنة بطلين مي، گعدت بالگاع واخذتة من أيدة وشربت نصة وحطيتة يمي والحجي كل.
-أبني اروحلك فدوة، بس فهمني شنو هذا الي صار ؟
الأكـبر: حجي بنتك مسويلهة سحر.
باوعت على الرجال ملامحة بهتت والولد مسح على وجهة وكل.
-زين شلون نعرف منو مسويلهة ؟
الكـابر: عدكم مشكلة وية أحد منا مناك ؟
نفة الحجي براسة وكل: ماعدنة مشاكل وية أي گرايب !
گام الأكـبر من مكانة وكل: المهم حجي احنة سوينة الي علينة يبقى يمكم أنتو بعد.
گمت انا هم من مكاني والرجال هم گام وكل: شنو نسوي احنة ؟
الكـابر: اول شي شغلو سورة البقرة هواي بالبيت ومن هي شوية شوية تصحصح خلوهة تقراهة بنفسهة، هي راح تواجه مشكلة بالبداية ومراح تگدرت بس صبرو عليهة شوية شوية تتعود وراح تتكوبس بالليل هاي هم شغلة عادية وخلي تكثر من المعوذات وبأذن الله ترجع أحسن من قبل.
اجة يمي الرجال وكمش أيدي وكل: شلون اجازيك أبني على الي سويتة شلون ؟؟
سحبت أيدي من عندة وحطيتة على راسي.
-حجي شنو السالفة هذا من واجبنة.
أبو محمد: شگد تأمرون أبني ؟؟
الأكـبر: صدگ جذب حجي يا فلوس، لوجه الله احنة شغلنة.
نفة براسة وكل: أبد والله ماقبل اطلعون فارغين منا، الي سويتوه مو قليل !!!
الكـابر: حجي اذا تريد تجازينة لا تنطي رقمنة لأحد ولا تسولف لأحد علينة.
أبو محمد: ليش أبني ترة الي دتسووه مو قليل أبد !!!
الأكـبر: حجي احنة مو شيوخ ولا النة بهاي السوالف احنة شغلنة بس نفك السحر، وجنة شاكين بنتك مسويلهة سحر كلنة نروح نفكة الهة ونرجع واذا مو مثل ما مفكرين يعني شي ثاني ندليك على شيخ يستحق مقامة يشوفلك حل.
حط أيدة على صدرة وكل: اخذو حقكم أبني بداعة أبوك.
باوعت على الأكـبر عاقد حاجبة وحاط أيدة على ظهرة، رجعت عيني على الرجال وكلت.
-لعد حجي اليوم عشانة عليكم.
حط أيدهة على عينة وكل: من عيوني، احطكم على راسي والله شيخنة.
الكـابر: حجي هسة شلون نقنعك احنة مو شيوخ ؟
اشرلنة الولد وهو يضحك: تعالو تفضلو تفضلو.
نزلنة راسنة ثنينة ودخلنة من باب الاستقبال مالهم وگعدنة وهمة ثنينهم راحو جوة.
كمش الأكـبر زندي وكل.
-هاي ليش هيج سويت، جان رجعنة للبيت !!!
مرديت عليه، وهو عصر أيدي وكل: اهووو كابر مو وقتك داحجي وياك !
باوعت عليه وكلت: خابرت نوح ؟
هز راسة وكل: اي خابرتة وكلتلة مثل ما وصيتني.
هزيت راسي وسحبت أيدي وكلت: لا تفتح موضوع هنا، واذا عبالك حجيت وياك كلمتين يعني هاهية مصار شي فأنتَ غلطان أخوية.
الأكـبر: انتَ صاير فد مزعج !!!
اجة الولد هو وأبوه وگعدو ثنينهم يسولفولنة على الشيوخ الي جانو جايبيهم قبل، وگامو يسولفون اشياء تشيب الراس من صدگ، وكلشي منرفزني غير هذا الي كايلة بقي بنتك وياية بالبيت وحدهة.
سمعت الأكـبر كل بعصبية: زين حجي عندك ارقامهم ؟؟
هز راسة وكل: اي كلهن موجودات يم أبني محمد.
الأكـبر: اريدك تكتب كل ارقامهم بورقة وتنطينياه.
أبو محمد: ليش أبني شنو تسوي بيه ؟
ضحكت وكلت: منسوي شي حجي بس نروح نلگالهم حل، لان العالم بعد من تفقد أملهة تگوم أي حل گدامهة تاخذة وحتلو جان هذا الحل يم انگس خلق الله، بس اذا متصير زحمة اريدك تحطلي خط جوة هذا الي يتفل بالمي.
هز راسة وبقينة گاعدين نسولف لحد ما جابو العشاء، اكلنة وشربنة چاي يلا رجعنة للبيت بعد ما انطونة ورقة بيهة الارقام.
وصلنة للمزرعة ومن بعيد قبل ما ندخل شفت خاتون وحدهة گاعدة وماعرف شنو دتسوي.
ضليت اباوع عليهة متأملهة لحد ما اجاني صوت الأكـبر.
-فهمنة تحبهة بس مو يعني تتصفن عليهة هيج !
عقدت حاجبي وكلت: شنو أحبهة ارگعك هسة ؟؟
رفع حاجبة وكل: كابر مو علية هاي السوالف !!!
نفيت براسي وهو كمل: اذا تقدملهة واحد انا انطي معلية بيك !!
وگف الدراجة وضربتة حيل بكوعي على ظهرة وكلت.
-اوكلك نعل اذا انطيت كلمة لأحد، والله انسى انتَ أخوي !!!
نزلت من الدراجة وهو ضل گاعد وكامش ظهرة متوجع من ضربتي.
إرَم
بعد مكالمة الأكـبر بمدة أبوية رجع للبيت ونوح سولفلة، وأبوية نفة براسة وكل.
-دگ عليهم وانطيني التلفون.
دگ عليهم نوح وانطة التلفون لأبوية وانا وأمي گاعدات ونباوع عليه، من شالة ضلو يتسالمون هو وأبوية.
وأبوية كلة اعذرنة هاي الايام عدنة فاتحة مانگدر نجي ناخذ السيارة عود من نتفرغ نتفاهم.
يوم الثاني جان ثلاثاء وانا مجان عندي اي شي بس محاضرتين لهذا مرحت للجامعة ورحنة من الصبح لبيت خالي علمود الفاتحة، ومثل العادة ابقة گاعدة يم أمي وحركة ماتحرك من مكاني.
گرصتني وكلت: روحي ساعدي بنات خوالج شنو گاعدة ولازگة بية ؟؟
همست: يمة عليج الله عوفيني هيج مرتاحة.
وهاج: گومي بلا كلام زايد يلا.
گمت من مكاني ورحت للمطبخ اريد اشوف شي اساعد بيه، ولگيت بت خالي گاعدة ودتخلي الستكاين على صواني.
رحت يمهة وكلت.
-اساعدج ؟
گامت من مكانهة وكلت: رتبيهم انتِ لحد ما اجيب الچاي اصب.
هزيت راسي وهي راحت وانا رتبت الستكيان وگعدت احط بيهم سكر.
اجتي وهي شايلة القوري الجبير وبدت تصب وانا بنفس الوقت بعدني احط سكر.
اني وداحط بوحدة من الستكاين بالغلط أيدي انضرب بالقوري وهي جانت دتصب بحيث خلاه يرجع ليورة وشوية ينذب على رجلهة، هيج شوية.
شو ماشوف الا هاي ذبت القوري كلة علية وانا گمت من مكاني بسرعة وذبيت العباية بس الحرارة وصلت لأيدي والبطني.
لا والحلو بالموضوع هي گامت تصارخ متوجعة، بحيث گعدت بالگاع كامشة رجلهة وگامت تلتوي وتصيح والنسوان كلهن التمن وانا واگفة بعدني مصدومة.
اجتي يمي أمي بسرعة وبس شافتني متبللة هيج كمشت أيدي وودتني للحمام بدون ما حتى تهتم للبقية.
دخلتني جوة وغسلت أيدي وانا دموعي نزلت وگمت ارجف لان الوجع شوية شوية بدة لحد ما صار أيدي كلة يوجعني وبطني نفس الحالة.
وأمي بس رفعت القميص مالي وشافت بطني شهگت راساً ولطمت على خدهة وكلت.
-صخاام هاي شصاير بيج !!!!
كمشت أيدي وطلعتني من الحمام وصارت گدامنة مرة خالي، اول ما شافتنة اشرت على رجل بتهة وكلت.
-شوفي بنتج شسوت برجل بنتي !!!!
فتحت أمي عينهة وكلت: بلا بلا شوفيني، دروحي بابا بنتج ذابة القوري كلة على إرَم !!!!
رفعت أيدي ووخرت كم القميص من عندة وكلت.
-هاي بس أيدهة، لعد تشوفين بطنهة شتسوين !
اشرت علية وصاحت: ترة بنتج الي بدت وتعمدت تدفع القوري من أيد رقية !!!
وهاج: لا بالله !! يلا راح انطيج على گد عقلج واكول بنتي متعمدة، تجي بنتج تذب القوري كلة عليهة !!!!
كملت أمي بصياح: حمدي الله العبايا خفف شوية جان والله كمشتج انتِ وبنتج وذبيت نار جهنم على راسكم.
صاحت هي هم: تنطيني على گد عقلي ؟؟ وهاج ترة هواي احترمتج !!!!
وهاج: دروحي بابا غصباً ما عليج تحترميني.
باوعت على أم أمي وصاحت: دتشوفين بنتج عمة دتشوفين ؟؟؟
اخذت نفس بيبيتي وكلت: مو وقتكم ثنينكم گاعدين بفاتحة ترة !!!
هزت زوجة خالي أيدهة وكلت: شترجة منج انتِ وبنتج أم الكليات !!
ماشوف الا أمي تكمش أيدهة وتلويهة حيل، ضربتهة على حلگهة وصاحت.
-هاي على منو هيج تحجي، ترحين فدوة لأظفرهة.
ضربتهة مرة ثانية واجتي مرة خالي الثانية وخالاتي وخرو أمي من عدهة وهذيج تصبح.
-أم الكلية بنتج...
قاطعتهة أمي: اذا متعرفين هذا وسام شرف لبنتي تكمل كليتهة وتتخرج وتتعين، وانتِ عود نشوف بتج العودة مال ماسحة، الناشفة الكاتليهة من الجوع وين يوصل بيهة الدهر وهي مبطلة.
هزت أيدهة وكملت: تتزوجلهة واحد عاطل باطل بمستواهة.
عافتهم أمي وكمشت أيدي وراحت گعدت على القنفة والراس مرفوع واني صافنة عليهة وعلى الي سوتة بيهة بحيث هذيج ضلت تعيط وتصيح وأمي گاعدة ومگعدتني يمهة.
اخر شي مرة خالي كلت لأم أمي: خلي تطلع منا !!!!
باوعت عليهة أمي ورفعت حاجبهة: اذا متعرفين ترة هذا بيت أخوية يعني انتِ الي اطلعين منا مو انا.
سحبت تلفونهة وبعد مهتمت ولا ردت على مرة خالي، وانا دموعي رجعت تنزل مرة ثانية من الألم.
سمعت كلت.
-الو أدريس دز مختار ضروري...بعدين اكلك بس هسة ضروري علمود إرَم.
سدت التلفون وبقت گاعدة بمكانهة ومتباوع على مرة خالي الي بعدهة تحجي وخالاتي يحجون عليهة ويكلولهة انتِ الي بديتي، وخالتي كلت شفت بعيني الصوج جان من رقية مو من إرَم لهذا بعد تفشلو.
شوية ورمش مختار على أمي.
كمشت أيدي ولبستني عبايتي وگومتني وطلعتني له برة وهو بس شافني أبجي وارجف راساً باوع على أمي وكل.
-شبيهة ؟
وهاج: اخذهة للصيدلية اذا متصير زحمة عليك ومناك وديهة للبيت.
مختار: أم نوح كوليلي شبيهة الأبنية ؟؟؟
وهاج: وگع عليهة قوري الچاي وهو حار، جان كلت لهذول ولد اخواني ياخذوهة بس غير اعرفهم واعرفك انتَ.
مختار: تمام يلا تعاي.
رحت صعدت ليورة وگمت ابجي بجي مو طبيعي، لان جان بطني يوجعني وأيدي هم كلهة توجعني، بس اكثر شي على أيدي لان الچاي كلة انذب عليه اما بطني ورجلي العباية جانت مغطية.
باوع عليه المختار من الجامة الي گدامة وكل.
-تردين نروح للمستشفى ؟؟
نفيت براسي وضليت ابجي وهو هم بعد محجة شي، شوية وطبگ يم صيدلية ونزل جابلي مرهم ورجع يسوق للبيت.
من وصلنة طبگ السيارة وانطاني المرهم وية مفاتيح البيت وكل.
-هاج انا منتظر هنا اذا محسيتي نفسج زينة رجعي اخذج للمستشفى.
نفيت براسي وانا امسح دموعي واخذت من عندة المرهم.
-لا ميحتاج.
مختار: يلا روحي لعد وقفلي الباب زين.
هزيت راسي ونزلت وبگوات فتحت الباب ورحت گعدت بالصالة ونزعت عباتي وحجابي ونزعت قميصي.
وجان اشوف بطني صايرة حمرة كلش، بس أيدي جان منظرة يخوف، جان صاير لونهة أبيض وتحرگني بشكل..
حطيت من المرهم وگعدت ابجي واضحك بنفس الوقت على الي سوتة أمي بمرة خالتي وشلون ضربتهة على حلگهة من حجت علية.
بقيت شوية منتظرة وسمعت صوت الباب ينفتح وأمي تصيح من الباب.
-هاي البـ**** تحجي على تاج راسهة، دخلي اروح باجر للفاتحة اذا مسحلتهة من شعفاتهة.
دخلت واجتي يمي وكلت: حطي شي على راسج ولبسي قميصج عدل مختار راح يدخل.
لبست قميصي عدل وحطيت حجاب على راسي، دخل مختار وأبوية ثنينهم ساندين نوح وخلوه يگعد.
ومختار اساساً موجود ويانة علمود يبقة يم نوح اذا احتاج شي.
باوع علية أبوية وكل: ها شلونهة أيدج ؟؟
مختار: اذا بعدهة تأذيج كوليلي اخذج للمستشفى !
نفيت براسي وكلت: لا الألم صار خفيف.
هز راسة وكل: يلا لعد انا رايح عمي اذا احتاجيت شي أمانة تخابرني.
أدريس: بعيوني أبني بعيوني.
طلع مختار وأبوية بقة يمي گاعد وأمي گاعدة وتحجي على مرة خالي وحالفة باجر تكمشهة تسحلهة البيت كلة وأبوية يكوللهة فاتحة ميصير، ونوح گاعد ويضحك وكلما أمي تكول هيج سويت بيهة نوح يشجعهة اكثر ويكوللهة كفووو.
صعدت فوگ وغيرت هدومي ورحت تمددت بمكاني بس مگدرت انام بسبب الوجع، وكلما اغمض عيني افز..
هَرم
وگفت يم الدرج انا وراحيل، بعد ما تأكدت جرح دخل لغرفتة وأبوية نام نزلنة جوة ثنينة.
رحت بهدوء لبست جادر الصلاه وراحيل حطت حجاب على راسهة ورحت فتحت باب المطبخ، اشرت لراحيل وكلت بصوت ناصي.
-بس تسمعين صوت باب تعاي بسرعة كوليلي، تمام ؟
هزت راسهة وهي بقت واگفة وانا رحت بكل هدوء للجهة الثانية من الكراج، وشفتة گاعد بالگاع وكامش جگارة بأيدة ويدخن.
بس حس علية رفع راسة وابتسم، اقتربت من عندة وگعدت يمة بس خليت مسافة بيناتنة، نزل راسة وانا كلت.
-مُعقب.
مُعقب: گلبة.
ابتسمت ونزلت راسي خجلانة وكلت: اجيتك بطلب ماريدك تردني.
مُعقب: كولي عيونك اكلج حاضر.
حطيت أيدي على خدي وكلت: اعرف مراح تردني، لهذا اجيتك انتَ ومرحت يم أبوي.
باوع علية وعقد حاجبة: احجي شنو تردين ؟
عضيت شفتي ماعرف شلون افاتحة بالموضوع، وهو محجة شي منتظرني انا احجي، اخذت نفس وباوعت عليه وكلت.
-مُعقب خلي نأجل الخطوبة.
باوع علية والصدمة جانت واضحة عليه وكل.
-شنو كلتي ؟؟
نزلت راسي وشفتي ترجف وبگوات حابسة دموعي وهو كمل مصدوم.
-ليش هَرم ؟، ترة مباقي شيء والخطوبة انا وياج حددناهة سوية ليش هسة تردين تأجلين كلشي ؟؟
اخذت نفس وكلت: ماگدر اسوي شي اذا أمي مموجودة، اريدهة يمي بهيج يوم.
مأجة ردة، رفعت راسي وشفتة ديباوع بالگاع وصافن، عصرت أيدي وكلت.
-مُعقب اتمنى تتفهمني، ماگدر اكون فرحانة بهيج يوم اذا أمي مو وياية.
مسح على لحيتة وهز راسة: تمام لعد، الخطوبة راح تبقى بنفس يومهة.
فتحت عيوني وردت احجي بس هو قاطعني راساً.
-وأمج راح تكون موجودة يمج.
هَرم: شنو راح تسوي ؟
مُعقب: راح احاجي أبوج يرجعهة، واذا موافق لو هي موافقت ترجع أأجل كلشي.
نزلت دمعة من عيني وكلت: انا اسفة، صحيح اتفقنة على كلشي بس مُعقب...
مكملت كلامي لان شفتة يباوع علية ورافع أيدة يريد يمسح دموعي، بس قبل ما توصل أيدة وقفهة وضل يباوع عليهة.
نزلهة ومسح على وجهة وكل: استغفر الله ربي، اسغفر الله ربي، روحي فوتي جوة هَرم.
هَرم: يعني مضايج مني ؟؟
مُعقب: ليش اضوج يا عيني ليش ؟
نزلت راسي وكلت: مو اتفقنة انا وياك على كلشي وفجئة انا غيرت.
ابتسم وكل: سواء جان هسة أو بعدين، بالنهاية تصيرين زوجتي وحلالي، لهذا مطمئن حتلو تأجلت منا لسنة.
ابتسمت وحطيت أيدي على خدي وكلت.
-يعني اذا نأجلهة منا لسنة راح تبقى رايـ...
قاطعني وهو عاقد حاجبة وضاغط على أسنانة.
-روحي فوتي جوة روحيييي، لا بارك الله بيج وبلسانج هذا الي صاير فرد مرة ميعرف شنو يكول.
گام من مكانة وهو ينكت أيدة: علچ المخبل ترس حلگة.
ابتسمت على حجية وگمت انا هم من مكاني وكلت.
-هسة شنو اروح باجر اشتري الاغراض ؟؟
هز راسة وكل: اي انتِ معليج ولا تدخلين بهاي الشغلة، ووعد مني الج مراح نسوي شيء اذا أمج مو وياج.
نزلت راسي خجلانة وكلت: أحبك مُعقب.
مُعقب: وانا مُغرم بيج هَرمي.
وانا بعدني منزلة راسي وخجلانة كلت: تريد اسويلك شي تاكلة، متعشيتو انتَ وبرهان.
مُتقب: لا ماكلين عيوني،يلا فوتي جوة اكيد موگفة راحيل بالباب.
هزيت راسي ورحت دخلت وراحيل جانت بعدهة واگفة والانزعاج مبين على ملامحهة، ضحكت ودغيتهة وهي اشرت بأيدهة، رفعت حاجبي وكلت وانا أأشر الهة.
-عود من تحبين انا هم اوگفلج هنا.
صار وجهة أحمر وضربتي على جتفي وراحت دخلت جوة وانا رحت وراهة وسديت الباب وتمددت على فراشي والابتسامة مالية وجهي.
يوم الثاني بعد ما خلصنة أكل صعدنة فوگ انا وراحيل وبدينة نبدل.
خلصت وباوعت عليهة جانت تلف حجابهة.
نزلت جوة ورحت للمطبخ وجان مُعقب وجرح ثنينهم واگفين ويحجون.
انتبه علية جرح وكل: راحيل وين ؟؟
هَرم: فوگ هسة تنزل.
هز راسة ورجع باوع على مُعقب: هو كما اتفقنة تنتظرني يم المغيسل اخلص البنات واجي نشوف حل لهاي المشكلة.
مُعقب: ماشي.
باوع علية للحظة ورجع نزل راسة وكل: محتاجة شي ؟
نفيت براسي وجرح صاح: زين العابدين ساجد، وينكم ؟؟
اجوي ثنينهم ركض وجرح كل: يلا ثنينكم روحو يم برهان.
كمش زين العابدين دشداشة جرح وكل: وين رايح ؟
جرح: رايح اودي خواتك يشترون فساتين، تريد انتَ هم فستان ؟؟؟
زين العابدين: انا أبن الدفان شيث تهيني هيج ؟؟
ضحك جرح وضربة جلاق: امشي لك أبن شيث، لسانك صاير اطول منك.
ضحك وركض راح برة يم برهان وجرح شال ساجد وباسة بخدة.
-ها لك، هم تريد تتكبر علينة عود انتَ أبن الدفان شيث ؟
نفة ساجد براسة وكل: انا اريد وياك.
جرح: تريد تجي وياي ؟
هز ساجد راسة وجرح باوع علية وانا كلت.
-اي خلي يجي خطية برهان ميگدر لثنينهم، همة ثنينهم وكحين.
حطاه بالگاع وكل: يلا لعد روح جيب دشداشتك خلي اللبس ونروح.
راح ساجد ركض وبهاي الاثناء اجتي راحيل، باوعت على مُعقب وضحكت ومُعقب ابتسم ونزل راسة.
اجة ساجد ومُعقب هو الي بدلة ملابسة وخلاه يلبس حذائة.
طلعنة برة وصعدنة بالسيارة وهو بدة يسوق وحاط ساجد بحضنة.
وصلنة للسوگ وطبگ السيارة بمكان بعيد ونزلنة، وهو بقة شايل ساجد.
رحنة يم محل مال فساتين ودخلنة جوة، وأجتي يمنة بنية وكلت بابتسامة.
-تفضلو.
سحب جرح كرسي جان موجود وكل: اخذيهن وبلا شنو يحتاجن، وهااا...
أشر علية وكل: هاي عروسة جايين علمود خطوبتهة، أوصيج عليهة.
ابتسمت الأبنية وهزت راسهة: تدلل عروستنة، تفضلن وياية.
رحنة وياهة ثنينة وبالبداية طلعت فستانين لراحيل وهي قاستهن وعجبهة الي لونة بيجي صاير قصير جوة الركبة والجتف مالة شفاف.
وانا دخلتني للغرفة مال تبديل وشكو فستان أبيض طلعتة الي أقيسة.
وبالنهاية عجبني واحد طويل وصاير بيه نفشة بسيطة، ومابيه ردن بس خيطين رفيعات على الاجتاف.
دفع جرح الحساب وطلعنة من المحل ورحنة لمحل أحذية وأشترينة الي نحتاجة وساجد من شافنة مشترين ملابس كل لازم انا هم اشتري وجرح اخذة واشترالة حذاء له ولزين العابدين واشترالهم اللعاب.
رجعنة للبيت ومن دخلنة جوة جان أبوية موجود ومُعقب وبرهان هم يمة وجان صوت أبوية طالع، ومُعقب منزل راسة، بلعت ريگي وباوعت عليهم بخوف، وجرح كل.
-شكو ؟
أشر عليه أبوية وصيح: گوم يلا روح من گدامي.
گعد جرح على القنفة بصف مُعقب واحنة بقينة واگفين بمكانة نباوع عليهم بقلق.
جرح: شمسوي مُعقب غير نفهم ؟
شيث: اكولة لگيتلك بيت وبسعر مناسب وبمكان قريب منا، يكولي لا انا لگيت بيت ومن رحت اشوفة البيت خرابة !!!
جرح: وليش عود معاجبة البيت الي انتَ مختارة ؟
شيث: لان سعرة رخيص.
مُعقب: لا لان مساحتة صغيرة !
شيث: اكل نعل واسكت، من انا احجي انتَ تسد حلگك وتنجب فهمت لو لا ؟؟
نزل مُتقب راسة بدون كلام وبرهان يمة هو هم منزل راسة، اخذ نفس جرح وكل.
-زين شتسوي انتَ بالمساحة الجبير ؟ هو أنتو ثلاث نفرات !!
شيث: لا جرح برهان راح يبقة هنا.
حجة أبوية باستهزاء وجرح عقد حاجبة وكل: شنو ؟؟؟
شيث: أي عيني ! الشيوخ متفقين بينهم وخلصانين !!
رفع جرح حاجبة وكل: هو مو الفلوس سوية مجمعيهة ومال ثنينكم ؟ بعد ليش هذا الحجي !!!
شيث: وحتى البيت الي انا اختاريتة الهم، بيه درج خارجي يعني حتى برهان ياخذ راحتة بالبيت !!!!
جرح: طاح حظكم ثنينكم، شتردون بعد شتردون ؟؟
محجة شي مُعقب ضل گاعد ويباوع على أبوية الي گام من مكانة وكل.
-كلمتي وحدة متصير ثنين مُعقب، تشتري هذا البيت وهاهية.
طلع أبوية من البيت ومُعقب گام من مكانة وصاح.
-استغفر الله ربي، انت اثول بس فهمني اثول ؟ انا مو كتلك لا تكولة مراح تگعد وياية بالبيت ؟؟؟؟؟
برهان: اي شسوي غير هو بس شافني گاعد حالي حال نفسي اجة دخلني وياك، وانا ماگدر اجذب عليه لو اضم عليه شيء !!!
جرح: هسة الولد شنو مسوي تجي حضرة جنابك تحاسبة ؟
مُعقب: جرح ترة هو الي كلي مراح اگعد وياك بالبيت، هو الي كلي اخذ الفلوس واشتري بيت الك وهم عود انا وياك نجمع سوية ونشتري بيت الي، هو كل وطلع هاي الفكرة !
بقيت واگفة بمكاني اباوع عليهم وعاضة شفتي، گام جرح من مكانة وكل.
-وثانياً انا مو دزيتك للمغيسل شعندك هنا !!!!
مُعقب: وانا شعرفني، غير بس طلعت من البيت صار گدامي وكلي تعال أبني عندي موضوع وياك !!!!
اشرلة جرح وكل: عود من يرجع نتفاهم، خلي نروح نشوف شغلنة والمصايب الي دتصير بالمقبرة.
هز مُعقب راسة وراح طلع برة ووراه طلع برهان، باوع علية جرح وكل.
-وانتِ ليش واگفة جنج خراعة خضرة ؟؟
عبست وكلت: ماكو شي.
هز أيدة وكل: دير بالج على الجهال، خلي اروح اشوف صخام المقابر شبيهة.
طلع برة وانا بقيت واگفة بمكاني وعابسة بگوات حابسة دموعي، وراحيل اجتي وگفت گدامي واشرتلي بمعنى لا تهتمين مراح يخرب شي.
اخذت نفس وهزيت راسي ورحت سديت الباب علمود الجهال ميطلعون ورحت صعدت فوگ لغرفتي.
وانا وراحيل جربنة الملابس الي اشتريناهة مرة ثانية وية بعض وهي ميتة من الفرح جانت، الگاع ما سايعتهة.
الأكـبر
متمدد على بطني ونازع تيشرتي وجموح ادلكلي ظهري بزيت زيتون، ابتسمت براحة وكلت.
-عمي الي عندة أخت مثلج المفروض ما يخاف على نفسة !!!
ضحكت وكلت: والي عندة أخ مثلك لو مثل الكـابر المفروض أيدة على گلبة من الصبح لليل.
الأكـبر: يلا كافي حبيبتي هسة يجي الكـابر ويشوفني هيج يحط رجلة بالنص.
سندت نفسي على أيدي وگمت من مكاني وانا اتنهد من الألم وهي كلت.
-خلي كابر ياخذك للدكتور !!
الأكـبر: عوفينة من هاي السيرة وكوليلي الكـابر وين ؟
جموح: برة ديزرع.
هزيت راسي ولبست التيشرت وطلعت برة الغرفة وجانت خالتي حمدية گاعدة وتنظف الخضرة ويمهة خاتون دتحيك ليف.
طلعت برة وشفتة گاعد ويزرع، وبنفس الوقت شايل على ظهرة سلة وأي شي مستوي يحطة بيه.
رحت يمة وكلت.
-نطلع اليوم لو لا ؟
الكـابر: بس انا طالع انتَ تبقى هنا وتنجب.
الأكـبر: متطلع وحدك، ترة مرايح لراس الفرع انتَ !!
باوع علية بطرف عين وكل: ودبرهة عود انتَ ؟؟
الأكـبر: ليش مادبرهة ياخوية !!!
مرد علية وانا گعدت يمة وردت اساعدة بس هو كمش أيدي وكل.
-گوم ادخل جوة ارتاح.
الأكـبر: ترة صارلي بالايام ممشتغل بالمزرعة، صرت زين بعد !!!
نفة براسة وكل: لا متشتغل، اسمع الكلام هاي المرة يلا.
الأكـبر: مو ظهرك انتَ ينكسر بعدين !!
الكـابر: لا تخاف، دامني ماسوي شي من كيفي ميصير بية شي.
عضيت اصبعي وانا اهز راسي: انتَ متجوز لحد ما اطلعهة من خشمي.
الكـابر: من عينك اسمهة مو من خشمك.
هزيت أيدي وگمت من مكاني ورحت دخلت جوة وانا ضايج، لا شغل يخليني اشتغل لا طلعة يخليني اطلع حابسني بالبيت.
سحبت كرسي وگعدت وخاتون كلت: مسوية چاي اصبلك ؟؟
هزيت راسي وهي راحت للمطبخ وشوية ورجعت جابتلي گلاص چاي وانا اخذتة من أيدهة وكلت.
-شو ماشوفجن تقرن انتِ وجموح ؟
هزت أيدهة وكلت: عيني مكملين قراية.
الأكـبر: وشوكت بلا كملتو !!
مردت علية طلعت برة وهي تكول: اروح اساعد الكـابر احسلي.
هزيت أيدي وباوعت على خالتي حاطة التلفون الطابوگة على أذنهة ومثبتة بالحجاب شلون ماعرف وتحجي بيه.
مرت من يمي جموح شايلة سلة الملابس وعابسة، عقدت حاجبي وكلت.
-وانتِ شبيج ؟
جموح: ثوبي انشگ.
الأكـبر: نخيطلج غيرة !
جموح: ماريد ماريد، انا احب هذا وبس.
راحت للغرفة وهي معبسة وانا مسحت وجهي واستغفرت الله.
وخالتي شافتني گاعد ذبت التلفون من أذنة وكلت.
-وانتَ يالمصخم ماناوي تسويلك شغلة بهالبيت ؟ لو بس گاعد وصافنلي على الرايح والجاي ؟؟
الأكـبر: صدگ الي كال گعدة الزلم بالبيت تسوي مشاكل، روحي سويلج شغلة يا خالة !!!
شالت المبايل وشمرتة علية وهي تصيح: ممتربي يرادلك تربية من جديد انتَ وأخوك الي وجهة تصخم من وراك، كامش شغلة وشغلك ومن الصبح لليل مگاعد.
دخل الكـابر وهو شايل السلة وصاح: الله أكبر هسة انا حاجي !!
اجتي خاتون ركض وراه وكلت: كابر اصبلك چاي ؟؟
الكـابر: سويلي شي بارد أشربة ترديني اشرب چاي بهذا الحر ؟؟
گعد بالگاع يم خالتي وكل: جاهزين بعد اوديهم للسوگ ؟؟
حمدية: اي ارتاح شوية وروح.
اجتي خاتون وانطتة عصير بارد وهو شربة بمرة وحدة وتمدد بمكانة وغمض عيونة وانا گاعد واشرب چاي.
مرت ساعة بيناتة گاعدين والكـابر نام ومگعدناهة بالبداية كلنة تعبان بس هو من صوتنة گعد وهو شال الاغراض وحطاهن بالسيارة ومقبل أبد اساعدة.
بدة يسوق، وهو مطلع أيد من الجامة ويدخن كل.
-كتلك لا تجي شگد عنيد رحمة لدينك.
الأكـبر: ليش متعوف العياط وتستقر بمكانك ؟
باوع علية باستغراب وكل: انتَ بسلو تقصد الهياط ؟؟؟
هزيت راسي وهو كل: صاير فرد مرة متعرف تحجي.
ضحكت ومرديت عليه، كملنة طريقنة ووصلنة للسوگ ورحنة يم المحل مال الرجال الي متفقين وياه.
دائماً كلما نجي هنا علمود نبيع الي عدنة لشخص، نتفق وية شخص ثاني بنفس الوقت وننطيه موعد وساعة معينة نجيبلة بيه الخضرة وهاي السوالف، وطبعاً احنة منبيع بس لأهل المحلات بالسوگ...
رجعنة للبيت وجانت الدنيا ليل، دخلنة جوة وتعشينة وية البنات وبعد ما تأكدنة الكل نام رحنة جهزنة غراضنة وصعدنة على الدراجة.
بديت اسوق انا والكـابر كل: شوكت نروح للشيوخ الي أخذنة ارقامهم ؟
الأكـبر: مو هسة لان ممتفرغين أبد، بس ان شاء الله قريب نگدر نحطلهم حد.
الكـابر: أبو نوح مخابرك ؟
هزيت راسي: أبو نوح عدهم فاتحة ملتهين هاي الايام كلي بعدين نتفق.
بقينة نحجي انا وياه لحد ما وصلنة، حطينة الدراجة بمكانهة المعتاد ولبسنة اللثام وجفوف وأخذنة اغراضنة وتمشينة والكـابر كل.
-تبقى يمي متروح بعيد.
الأكـبر: اكيد، بعدة مأثر عليك مال هذيج المرة.
اخذ نفس ومرد علية وراح تمشى وانا وراه ثنينة نضوي ونباوع على المكان.
لحد ما شفنة علاگة سودة مشمورة بالگاع.
گعد الكـابر بس مقبلت هو يفتحهة، اخذتهة من أيدة وخليتة هو يضوي وانا افتحهة.
باوعت بداخلهة صورة لولد ومزرفين الصورة زرف وبيهة اشياء ثانية، فتحتهن كلهن وتأكدت فتحت السحر يلا گمنة وگعدنة ندور.
انا وداباوع بالگاع حسيت بحركة وراية، راساً انداريت وضويت المكان بس مجان أكو أي أحد.
عقدت حاجبي باستغراب والكـابر كل.
-شكو ؟؟
همست: واحد ورانة.
عقد حاجبة من كلامي، واشرلي بحاجبة يعني كمل مشي، تمشينة ثنينة بهدوء وصدگ الكـابر هم حس أكو واحد...
لا اكثر من واحد ورانة...
وگفنة بمكانة والكـابر كل بصوت مسموع: خلي نرجع مادام ماكو شي.
جاوبتة: اي يلا امشي.
باوعنة على بعض وبمرة وحدة ثنينة حطينة رجلنة وگمنة نركض وسمعنة صوت واحد منهم يصيح.
-شردووو، بسرررعة بسرعة.
گمنة نركض ثنينة وذبينة كل الاغراض من أيدنة وانا الكـابر كامش أيدي ويحاول يخليني اركض اسرع بس مجنت اگدر، ظهري وجعة هج علية وكلش گام يأذيني.
لحد ما عثرت ووگعت بالگاع والكـابر بسرعة كمش أيدي وراد يكومني بس اندفع بشكل قوية ووگع بالگاع هو هم والولد الي دفعة راح گعد عليه وكمش أيديناتة ثنينهن يحاول يثبت الكـابر.
وانا ردت اسند نفسي واگوملة بس حسيت بضربة قوية على ظهري وگعتني بالگاع، درت وجهي عليه والولد حط الكشاف على وجهي وكل وهو يضحك ضحكة قبيحة.
مُعقب: برهان، روح كول لـ جرح النباشين صارو بيدنة...
يتبع...
_____________
هلا هلا 🫢🤎.
انطوني رأيكم بالبارت، واريد اشوف توقعاتكم للبارت الجاي 🤎.
____________
.
.
.
.
.
.
.
.
.
.
في أمان الله 🖤.