منطقة 13
البارت الثاني
,,,,,,❤️,,,,,,
سلمان : صبح صباح الله وطلعت ويه راجح ومحمد وراي يمشي ويمسح خشمه بطرف ردانه ويون عباله راح اكله ارجع انداريت عليه نترت
سلمان: الزم المالج زين لتصير مايععع
محمد: اييي
سلمان: وجعيي
رفعت تك حاجب خزرته والتفتت لراجح
سلمان: اليوم اطلع السبوع الماضي من خشمك
باوعتله وباوعت لراجح ابتسم راجح وكال
راجح: مو تدلل اليوم ولا طابوكه تضل جوه بيت الحسناوي كلهن يصعدن
جاوب بأستهزاء
محمد: اصعدهن قابل شنو فد نمونه يعني
سلمان:هههههه تدري كم بايه عدهم مثل درجنه عبالك شبخه وتوصل للسطح درجهم ١٣ بايه روح اكلها بالعافيه عليك خل اشوفك شلون بعد تتكلب بحضن امك واخخ يمهه واخخ راسي و.... يوجعني خنثه
كلتها ودرت وجهي علا راجح
سلمان: راجح الكبان نسينا بيت الصايغ اروح اجيبه واجي عينك علا هذه اذا سخت من اجي اني اعرف شلون اشتغله زين
راجح : صار يأبه صار
سلمان: باوعت لمحمد يباوع بأستهزاء مال افكس عينه دار وجهه يبتسم ويفر بأيده صلف حيل وميحترم
دلال امي سكطه حيل احساس ماعنده
ميهتم خلص ألمي الحار وكت جيه ابوي عادي عنده اكل الخبزه الزينه قبل كعده ابوي عادي عنده المهم هوه قبل الكل وهل شي جان غاثني حيل اني وراجح
ولأن ابوي بالبيت ماكدر أحاجي بس بالشغل مشي علا صراط المستقيم
فزيت من صفنتي علا سياره التصريف تسحب ألمي مالت التصريفه لان ماعدنه مجاري بمنطقتنا والريحه تذبح صعدت بالتاته طريقي غير طريق الولد اجيب الكبان وارجع
صعدت وانطيت كروه السياره الراجح وصعدت وصلني للمنطقه مالت الصايغ وفتت بالفروع امشي
وقميصي مطكع والف بقمصله ابوي مال جيش علا جسمي بردان حدما وصلت للبيت طبيت ركض لان ادري البيت فارغ شفت ألمي مفتوح واسمع صوت صدى بالبيت يحجون
طبيت ساكت واحجي ويه روحي اخذ الكبان بالحمام بره البيت عالرازونه واطلع شلي دخل شغلنا وكملنا طبيت للحمام وهم سمعت صوت نسوان ورجال يصيح
الرجال : اجلفي منا الملاعين ذوله منكطين صبغ عل كاشي يابههه منا تعاي امسحي الجام
فتت للحمام الخارجي وعيوني عل داخل شفت رجال لابس بلوز زيتوني صوف مزورف وسروال وشاد غتره علا رأسه ولحيته طويله مشيبه وشفت مره مدنجه تجلف وهوه يضرب الكاشي كاغد جام يوخر الجص المطفر
طبيت للبيت عرفتهم منضفين فتت للحمام الخارجي توني افتح الباب لكيت بنيه ضهرها عليه وتجلف بالتواليت الفرنجيه ( الغربيه) وتدردم
البنيه: هذه شلون يغضون( يكضون) حاجتهم بي يكرم الله لون كعدت عليه اكع بنص منه وماعاد اكدر اطلع
ضحكت اباوعلها وكصيبتها شطولها اخذت الكبان وصوت خشونه الرازونه ويه الاسمنت الباقي صار صوت التفتت فازه وارتدت لوره
البنيه: يايومممم انت منووو
فكيت عيني وانصدمت ساكت هي نفسها وآلله هيه هاي بلعت ريكي
سلمان: اني البنه لتخافين راح اطلع
البنيه: مانه خايفه عشتو عليمن اخاف هسه أصيح ابوي يجنزك
سلمان: مايحتاج
ابتسمت وتأشر وكحهه وعيونها مزرزره وسود والفرك مالت شعرها ابيض رغم سمارها اليخبل وهاي خدودها تنكرط
البنيه:شبيك تعاين هيج انفكست عينك
غابت ابتسامتي ضجت من لسانها
سلمان: مايحتاج هل مسبه ترى بس داكولج الشسمهه
خفت لحضتها من شفتها تطلع كلت تروح تصيح لأبوها وتصيرلي سالفه طلعت وهيه تمشي وتتلفت عليه وتشمر بكصيبتها صاحت
البنيه : يابهه
واني طلعت لباب البيت شبه انهزم دااطلع والتفتت لداخل البيت اباوعلها وصار بوجهي صاحب البيت
صاحب البيت: هلا سلمان هلا عيني
سلمان: هلا بيك عمي عالخير عل بيتك
صاحب البيت: عاشت اديكم ولله همزين اجيت علمود الكبان مو
سلمان: اي ولله نسيناه ورجعت علموده
صاحب البيت: زين ردت منك شغله بس ماريد الولد اريد وحدك
سلمان: كول عمي تدلل
صاحب البيت: يأبه رايد منك تبني غرفه لخ وحدك تكدر
سلمان: اي شكو منها واخوتي وياي بس خاف الخلفه ميقبل
صاحب البيت: محد يدري لان هوه يدك بالعالي ويجر ويعر يسويها طويله وهيه شكدوتها
سلمان: خوش عمي بس انته هم لتوصله خبر
احجي واباوع جوه البيت بالي يم السميره وارجف وكلبي يدك سريع
صاحب البيت: تعال يأبه فوت
سلمان : عمي مو اكو نسوان جوه
صاحب البيت : تعال ذوله غجر ينضفون وره العمال فوت
سلمان: يالله
بلعت ريكي مدري شصار بيه شفت رجال كال
الرجال: هله هله يأبه ساعتين والبيت يغده ليه ولوز
صاحب البيت: كمل كمل مالكم دخل بينه دنصعد السطح
سلمان: صعدت وعيوني جوه شفتها طلعت تشلهت ورفعت راسها ليفوك تباوع بأتهام وعبست حلكها
غمتني ودارت عينها بغرور صرت اعصاب بقيت صافن شنو هل تربيه المخربطه وليش بالذات هي اجتني بالنوم بحياتي مصايره عندي حاسه سادسه لو حلم يتصدك ساعه السوده من صدك بيها
صعدنا واشرلي وين يريد الغرفه فتريت واباوع واحسب وهوه يوصفلي رادها بالسطح وكتله صار تفاهمنا ونزلت
سلمان:باجر اجيب الولد واجيك
صاحب البيت: تمام
فاتت من يمي بنيه وتعدل بدشداشتها شعجب مامحجبه هيه
امها شامره الفوطه شمر واختها اللخ مطلعه نص كذلتها والاب واكف مو يمه
الرجال: يلا بويه صبي لعمج جاي وضحه
وضحه:صار بويه
سلمان: التفتت للصايغ باوع لوضحه وابتسم وهيه تتمضحك اجه الرجال خله أيده جوه كتف بنته وكال
الرجال: هاي وضحه سباعيه وججها جنه صباح العيد
ابو البيت ابتسم وضل يبصبص عليها والاب واكف قشعر جسمي جن يعرضها عليه ابتعدت ليوره اريد احجي ولله خفت باوعت ابو البيت يكصها كص ويشرب بالجاي علا وكفته
صاحب البيت: ورده ضحاوي
وهيه تبتسم وتهز بجسمها مثل المصرع ولازمه أيدها اليمنه بأصبع أيدها اليسره
سلمان: عمي اني رايح باجر الفجريه اجي
صاحب البيت: هاي هيه سلمان ماوصيك ١٤ يوم الغرفه خالصه
سلمان: اي نشالله اجي
احجي واتلفت الام مو يمها تباوع لبنتها وتبتسم وذيج اللخ شفتها طلعت للطارمه
طلعت من البيت وشفتها تذب الزبل مال الكلك بالرميل باوعتلي ودارت عينها بغضب رافعه تك حاجب مدري شصار بيه تخيلت هم تتحشك باابو البيت ولو هاي صغيره تطلع بت ال١٦ بس مربربه باوعتلي نترت
البنيه: ليش تبببباوع
نصيت راسي وطلعت شعر راسي وكف يبو عليك
من اب يبو يوم الاغبر الي مريت بي من يمك وشفتك روح زين شاربك احسلك خرب عرضك شكد بلا غيره
اوف يمه بوخت امشي واهفي نص الطريق عديته واني ماادري بروحي صعدت نفرات ورحت لأخواتي كملنه الشغل ورجعت تعذرت من ابو البيت الي يبنون بي اخوتي ومن الخلفه هم كتله عدي عمل بذني السبوعين وعذرني همزين ماسئل يابيت تبني بي اتفقت ويه اخوتي وكتلهم الصبح نروح رجعت للبيت بيومها ماكدرت انساها وانطي عذر لا هيه عصبيه ومتنطي مجال مامعقوله وارجع اكول ولك يالاغبر قابل انته صاحب البيت الملاج وتتمضحكلك وتشوفك وجهه
غمضت بس ردت تطلع من راسي خفت حته انام وتجيني بالنوم وتذكرت حجايه ابو البيت من يكول غجر ذوله عادي فوت عرض خاص ذوله جوه السوك ههههه
لزمت راسي اخوتي بصفي نايمين همزين ماعندي اخت وخرت برده الباب وكعدت بعتبه الباب وخليت راسي بحضني الهوه يكص كص من البرد واني بطرك الفانيله والسروال الساعه بالوحده بليل والجلاب تفوت من يمي عبالك متشوفني ولا توكف حته الحيوانات متشوفنه رفعت راسي للسما وجريت نفس
شكد جانت صافيه وتلمع النجمات بيها والكمر واضح هناك وانتبه غيمه بصف الكمر غطته ابتسمت وأتذكر اغانينه الي نغنيها
ياحوته يامحيوته
عوفي كمرنا العالي
اضربج بالسجينه واطلع مصارينج
ورجع وضح الكمر اول مره اصفن هيج صفنه
اول مره اكول
اريد مره
اريد مره الي ولراحتي
اريد مره لحضني
احبها وتحبني تبتسم الي وابتسم الها وتخجل غمضت ورجعت اجت علا بالي
حضي الاغبر بس هيه الحلمت بيها
شبيه اليوم جن من صدك صحيت وتذكرت إني رجال
ولله العظيم قبل كم سنه يلا حسيت بأمي وابويه مره ورجال عبالي اخوان لان ابد ممصادفهم بوضع شائب واحنا البيت كله غرفتين غرفه الهم والثانيه نكعد بيها مره وحده جان عمري٢٣ سنه وسمعت امي ضحكت بتوالي اليل
ضحكت وكلت هذوله هم مثل المتزوجين عبالي بطلو
واليوم حسيت اني اريد اتزوج
اريد مره
بس منو التقبل بيه
وشلون تكفي الكمه
لزمت راسي وافز فزه تسوه ٢٧ سنه من عمري
اباوع جان بزونه ميله رأسها تباوعلي صافنه جوه المبرده مال بيت علوان الي كبالنا
اشتعل ضميرج اي ولله
كشيتها انهمزت ورجعت وكفت بعيد صافنه عليه كل عقلي عطت بيها
شبيجج تباوعيييين
فزت وعدلت وكفتها ورجعت كعدت تباوعلي
ركضت وراها انهزمت تشلهبت عل تيغه مالت بيت حميد عل سطح
بقيت واكف جوه ستارتهم اباوعلها وهيه منصيه تباوعلي
شلون اليوم شلت حجاره شمرتها عليها طفرت
يلا رتاحيت رجعت اتمشى حسيت بردد دخلت للبيت ورحت طبيت جوه فراشي ضحكت علا روحي ولله سوايتي عاقل مايسويها اله مفرور ويله
غمضت عبالك توني اغفه كعدتني امي تمسح بوجهي برأيه سيد محمد
الام: يمه سليمان
يمه كوم اشو صلاة الصبح حتصعدها الملائكه وانت نائم
فتحت عيني ابتسم
سلمان: اي يوم كمت روحي هسه اجي وراح
كامت امي واني تمددت ينعل يوم الاحلام غمضت ولزمت راسي
توني اغفه واجتني بالنوم تبتسم وملامحها كلها حنان عكس الشفته منها
فزيت علا نغه امي مره اللخ رجعت نمت
الام: سلمان يمه اول تالي شبيك اليوم اخاف مالك خلك
سلمان: لا يوم كمت صاح أبويه
الاب: مليكههه
مليكه(الام): ايي اي اجيت
سلمان: كمت توضيت وطلعت وكفت صليت
طبيعتنا من عمر ال ١٠ سنوات صلاتنا كل فرض بفرضها وصوتنا ممسموع وامي ماداخله سوك من أخذها ابوي اليوم محد شايف ضلها ومن أخذها من بيت ابوها السيد بت ال١٤ وهيه ماتخالفه ابد
وأبوي عصبي وقاسي بس من يشوفها تسمع كلامها وتخاف منه يسكت رغم يقسى علينا بس حنين وهاي احنه ماشين ضبط علا سراط المستقيم
ابوي دوم يحذر
ديرو بالكم من لكمة الحرام ابتعد منها شارعين
يأبه تضل بين الشحم واللحم لتكول بس هل نوبه وخلص
خليت هل شي بالي جان دوم يكول اموت تعب ولا لكمه بحلكم حرام
كبرنا يوم يوم ولا مره أبويه اكل شي بالحرام وإذا شك بي ينشمر
اتذكر مره كاعدين وامي طلعت دجاجه من الجدر ومحمد شهك دجااااج
مليكه ببتسامه : اي بعد تريد
باوعت لأبويه رافع تك عين ويدير بوجه ويرجع يباوع كال بنتر
الاب: انتي متأكده هاي مال ثواب موزعيها
مليكه: اي وروح ابوي همه كالولي
الاب: مليكه خاف هاي مال صدقات واحنه ماتجوزلنا الصدقات
سلمان: صفنت امي وتباوع الماعون وباوعتله
كام ابوي وشمره بالزبل وصاح
الاب:بعد لتاخذين شيي
بقينا صافنين ومحمد يبجي بخنيك صاح ابوي
بسسس اللصم باجر اجيبلك
صاح بأمي
الاب: الباب اذا انفتحت بعد اهدها علا راسج فاهمه
مليكه : صار صار
الاب: شيلو الغده محد ياكل
مليكه: ابو سلمان الولد جوعانين
ابو سلمان: وجوعههه بكورر ولا يطببب بحلكهم لكمه حرام طلعيي طماطه كليها
سلمان: محمد يعاونها يكشر بيذنجان ويملح وامي تكلي طماطه ابوي معصب وامي تدمع ومنصيه كاعده بالكاع يم الجوله عفناهم وكمنا رحت تمددت وراجح تمدد يمي
راجح: هوه شكو
سلمان :شوي اسكت
التفت اباوع لبوي بأس راس امي وابتسم وجر رأسها بحضنه وامي تبتسم
سلمان : جانت احلى لحضات حياتي وراها كمنا نتغده واكلنا القاسمه الله وأبوي رتاحح حيل رتاحح وعل وعد ثاني يوم جاب دجاجه وشواها بالتنور الطين عل سطح جان اليوم عدنه جنه العيد وراها يومين ابوي ضل ل٨ بليل بالشغل ويطب محدوب لان ديعوض الصرف الي صرفه
وضعنا صعب بس لكمه حلال وهل فتره فكت لان اشتغلنا اني والولد والشغل ماوكف الحمدلله
كمنا نعدل بالبيت كهربائياته والسطح الي يخر سويناه والفطور الي بالحائط يطب ويطلع منها الجريذي سديناها والحمام سوينه المقعد نايلون وصبينا بعد ما كان صبه مربعه ومكسره
وهاي اني اليوم الفجر اخذ اخوتي ونروح لبيت الصايغ والبيه خوف ولهفه ساعه يم الحلم اتلهف وساعه يم واقعها واقع صوره ابوها الضلت مطبوعه بمخي
وصلنا وصعدنا البيت فارغ بعدهم محد جاي بلشنا اني والولد واذني جوه حدما جهجر الوكت وسمعنا أصواتهم باوعلي راجح وكال
راجح: منو جوه اسمع صوت نسوان
سلمان: اشش مالنا دخل
راجح: شنو أهله جوه شلون ننزل ونصعد
سلمان: شعدك نازل وصاعد حمام وبصفك
راجح: وشبيك ترجف علا كيفك
سكتت ونصيت شوي وصاح الرجال
الرجال: يولددد سلماااان
باوعت لراجح ونصيت سلمان: بلي عمي
الرجال : تعال بويه ابو علي وصاني عليكم كال ريكهم
سلمان: لا تسلم متريكين
الرجال: واني شعلاي(شعليه) هوه دزاني
سلمان: نزلت ونصيت راسي شفتها تمسح بيبان البيت تجلفهن جانت نشطه حيل عيوني صارت عليها
درت وجهي مرتبك ليشوفني ابوها نزلت بايتين وأبوها انطاني الصينيه وراح اباوعلها رفعت راسها وصعدت الدرج وبيدها الوصله
كلبي وكف صعدت اريد انهزم عبالي جايه عليه وصلت يمي انطيتها مجال ونلزكت بالحايط باوعتلي وعاكده الحاجب هزت أيدها وكالت
البنيه: كبر كون
سلمان: بلعت ريكي لازم اردها
عافتني وصعدت لفوك تمسح بالباب بي قطرات مالت صبغ ضهرها عليه واني تحجرت ويه محجر الدرج صافن عليها وعلا كصيبتها شعرها محابس ومسويته ضفيره ودشداشتها عريضه
التفتت مرتين شافتني علا وكفتي عكدت الحاجب نصيت ورجعت رفعت راسي
كالت بصوت عالي
البنيه: شرايدد تباوع هيججج
سلمان: بقيت فاك حلكي صافن عليها حسيت روحي من وكاحتها اصغر منها تخوصرت وتقربت نصيت ردت أطب بنص القوري كالت
البنيه : اكل لبوي عليك
سلمان: بقيت منصي داأفوت
البنيه: ماعدك خوات ماعدك عرض تباري
سلمان: التفتت عليها بقيت اباوعلها مو بيدي تحجرت وأتذكرت منامي
البنيه: شبيكك جنك سطلل حته بالحلم ماخلصانه منك
نفضت أيدها وعافتني وراحت
سلمان: فكيت عيني حته هيه حلمت بيه ليش هيج ديصير ذبيت الصينيه ووكفت كلت احجيلها وخل اخلص ولا اضل اليل كله اكل بروحي باوعت من المحجر ابوها ماهو باوعت لباب السطح الولد يسون خبطه وملتهين
تقربت وهيه ضهرها عليها تفرك بالباب بيناتنه مسافه متر همست ورجف صوتي
سلمان: حلمت بيج قبل لا اشوفج.......
يتبع