نـبدأ بذكر الله ﷽🤎✨
عرش الروليت
بارت 29
بقلـمي ميان أل مالكي
قـراءة ممتعة
🚫لا تنسون التصويت والتعليق بين الفقرات
حبايبي..
❢ ═──── · · • • • ❂ • • • · · ────═༻❢
الزواج ممن تُـحب هو أعظم حدث ممكن
أن يغير حـياتك إلى سعادة أبدية
و لكن ليس كل الأقدار متشابهه !......
بعـد مرور اسبوعين على الزواج
اخذت على أهل البيت حبيتهم كأنما
أهلي
كأنما عايشة وياهم قبل وأعرفهم من زمان
ناس بسطاء يجمعهم الحُب والأبتسامة
عائلة اقل ما يُقال عنها دافئة !!
مجتمعين كُلنا على السفرة واحلى شي
بيهم ما يكعدون على طاولة برغم
عدهم يفرشون سفرة بالكاع وكلنا نلتهم عليها
ناكـل بصمت و لكن قاطع الصمت
سيد عباس من كال بصوت هادء بينما
نظراتة على طاهر
-: شنو صار بخصوص قطعة الأرض؟؟
تنهد طاهر تارك أكله
-: حجي الوادم تسودنــت حتى كلام
ما يفيد وياهـم يردون الأرض كلها ألهم
يكولون كاع اجدادنا وأنتم ماخذينها
-: خير ان شاءالله انتَ بس لا تحجي
وياهم وتعاندهم محلولة ان شاءالله
-: شلون تحلها حجي اذا همه ناوين
على الشر أسلحتهم وياهم لا يخافون الله
ولا يهابون دولة
-: ميخـالف أبني نحـلها بيناتنا واذا
اضطرينا ننطيها الهم ما نريد نأذي الناس
بسبب قطعة أرض شنو قيمتها باجر من
نصير جوه التراب
-: حـجي الناس كلها تعرف قطعة
الأرض هاي النا ليش ننطي حكنا الهم
-: يا أبني انه خايف عليك الضربوك
وطلعو دمك يكدرون يعيدونها مرة ثانية
ويأذوك اكثر
-: لا تخـاف عليه حجي انه مو جاهل
أعرف ادافع عن نفسي لا تنطيهم مجال
انتَ همه يشوفونك متساهل وياهم شي أكيد
يتمادون
حجت عمة ما قابلة على كلامهم
-: هسه وقت عشة مو وقـت سوالف
من تـخلصون سولفو براحتكم
سكتو بس طاهر مبين عليه ضاج كلش
طاهر -: الحمدلله
سفرة دايمة
اردف هل كلمات وكام بقى سيد عباس
ساكت بس عمة نرجس كلتله
-: بعدك ما كليت شي
هز راسه
-: الحمدلله شبعت عاشت أيدج على
الأكل
دنك يريد يبوس راسها وخرت بسرعة
تحجي
-: اول شي غسل
ضحك
-: شنو نرجس خانم تلعب روحج
مني
-: لااا مو تلعب روحي بس ما يصير
النضافة من الأيمان
هز راسه سوه نفسة راح رجعت تاكل
رجع بهدوء يسويلي اشش بصبعة
دنكت مبتسمة
بسرعة دنك باسها وركض للمطبخ بقت تصيح
وراه وأحنا نضحك عليها أعرف حب يلطف
الجو لأن ما يريد يبين هو تكدر خاطرة او ضاج
من كلام ابو
غسل وراح للغرفة انسحبت رحت غسلت
ورحت للغرفة دخلت لكيته كاعد على
مكتبه الصغير الغرفة شبه ضلمة بس مشغل
ضوة شمعة
سحبت كرسي كعدت يمة خليت ايدي
على ايده فز باوع عليه عاقد حاجبة
كتله
مُرجان -: بيك شي؟؟
طاهر -: لا ما بيه
مُرجان :- مو من عوايدي اتدخل بهاي
الأمور بس انتَ ضايج من كلام عمي؟؟
طاهر -: مُـرجان حبيبتي لا تشغلين
بالج بهل أمور
مُـرجان -: كتلك هاي أول مرة اتدخل
لئن شفتك تكدر خاطرك
طاهر -: لا غلط ما تكدر خاطري
انه بس ضايج شوية من الحجي لان هو
گلبة طيب والناس ما ترحم
حتى لو ينطيهم ذهب يطمعون بي
مُـرجان :- ترة عمي يعرف شنو يسوي
بعدين هو خايف عليك لا تتأذى وهل شي
حقة
طاهر :- شنو يخاف عليه تحسسوني
انه جاهل تخافون لا اضيع
مُـرجان -: مو قصدي و.....
قاطعني بعصبية
طاهر -: كافي مُـرجان ماريد اسمع
أي حرف خلـيني وحدي
ما كدرت ارد علي كمت طلعت برة
ساعدت عمتي بنقل المواعين هيه بالعادة
ما تقبل بس انه غصب عليها اشتغل
نـرجس -: روحـي يم طاهر شوفي
ترة اعرفة ضاج من كلام ابو
مُـرجان -: توني جنت احجي وياه بهل
خصوص طردني من الغرفة تخيلي
ضحكت
نرجس -: طاهر اذا عصب ما يريد يحجي
حتى لا يتندم على كلامه بعدين يُفضل
يبقى وحدة لحد ما يبرد
مُـرجان -: يعني ما ارجع للغرفة ألا
هو يناديني ؟؟
نرجس -: مو بالضرورة بس انه أعرف
طاهر هسه شوية تلكينا يدور عليج
زمـيت شفتـي طلعت للحديقة كعدت
على الكرسي صافنة بالورد سيد عباس
حياتة الورد يحبه كلـش بحيث مسوي حديقة
خاصة بالورد أصناف
كاعـدة صافنة حسيت بضل
وراي عرفته منو من ريحته سويت نفسي
ما انتبهت ضربني خفيف على راسي
كتله بعصبية
-: سيييد طاااهر
ضحك
-: شلـون عـرفتيني ؟؟
:- من ريـحتك
صار كدامي مبتسم كعد مقابيلي
-: زعـلتي علية؟
-: لا من شنو ازعل قابل
-: ههههه واضح مو زعـلانة من عصبيتج
:- سيد طاهر جاي تراضيني
تضحك علية
-: ليش اراضيج غير ما زعلانة
:- لااا زعلانة
هستوه يريد يحجي اندك الباب
كال بينما وكف ينكث بملابسة
-: دخلـي جوه
راح يفتح الباب من فضولي بقيت
واكفه شفتها زينب بت عمه هو دنك راسه
يسلم عليها بس ما اعرف شنو كلتله
خلته يرفع راسه يباوع عليها تقدمت
كم خطوة شافتني ضحكت
و حجت
زينب -: مرتك تتصنط علينا الظاهر
يرادلها حزمة أخلاق
رفعـت حـاجبي صرت يمهـم كتلها
ابرود
-: شنو عبالج انه مثلج؟؟
طاهر -: شنو تردين بت عمي؟؟
باوعـت علي
-: سلامـتك بس انطيك نصيحة مني
ترة المثل زوجتك لازمها مراقبة
حتى لا تجيبلكم العار انه اعرفها كلش زين
طاهر خزرها ما يكدر يسوي شي بس
انه أكدر تقدمت كتله حبيبي بس شوية
مجال همس
-: مُـرجان لا تسوين مشاكل بداعتي عندج
خليها تروح
ابتسمت كتله
-: حبيبي انه مُـرجان انتَ تعرفني
كُلش زين ما اسوي مشاكل
چلبت براسها جريتها من شعرها صرخت كتمت
صوتها بيدي كتلها بتحذير
مُـرجان :- سمعي لج لا تندكين بيه وعلي
اسويج بالكاع ودوس عليج بحذائي
لا تغلطين وياي بالكلام افتهمتي؟.
بقت تهز براسها تريد تاخذ نفس
لزمني طاهر من اكتافي وخرني وانه مبتسمه
اباوع عليها تجر بالنفس جر
طاهر :- كلامج چبير كلش تعرفين لو
حجيته لـ عمي شنو ممكن يسوي بيج؟؟
بس انه أحتراماً لصلة القرابة
راح اسكت أخر مرة الج تحجين على
مُـرجان كدامي او من وراي أحترامها
من أحترامي
يلة روحي على بيتكم الوقت متأخر
صارت ما تعرف تحجي والوجه أحمرر
طلعت طلع وراهـا كـتلة
:- ويين؟؟
:- بس اتأكد تدخل بيتهم مو أمان
اخليها تمشي وحدها
غمضت عيونـي متنهدة رجعت للغرفة
دقائق رجع اخـذ مـلابسة دخـل للحمام
يسبح شوية صاح علية
-: مُرجانـي وين المناشف
:- غسلتهم هسه اجيبلك لحظة
طلعت جبت المناشف لكيته طالع شعرة
ينكط ماي انطيته المنشفة اخذها ابتسم
بوجهي وكال
-: عـاشت ايــدج
رجعـت لمكـاني ساكته نشف شعرة ومشط
رجع كعد يمي اخذ اديه قـبلهم بحنية
سحبتهم منه بسرعـة
مُـرجان :- لا تـبوسني بهل طـريقة
طاهر -: ليش؟؟
مُـرجان :- ما أحب تبوس اديه
بهل طريقة
طاهر :- بس انه أحب
سكتت وهو كذالك دقائق تحمحم
كعد يمي
طاهر :- اريد منج تقوين گلبج وتطولين
خلكج وما اريدج تحجين وي زينب
مُـرجان :- سيد طاهر بت عمك غثيثة
ولا تنحب بعدين هيه طولت لسانها
وصارت تحجي عليه لو وحدة غيري جانت دفنتها
بمكانها على هذا كلامها
طاهر :- كلامج مو صحيح اذا هيه جاهل
وما تعرف تحجي لا تتصرفين مثلها
خـليج أعقل اضحكي بوجهه هذا اكثر أنتقام
ممكن توجهي الها
مُـرجان -: يا جاهل هاي عجوز أكبر مني
بخمس سنوات
عض شفته ما قابل
-: لا تحجين على الناس
مُـرجان :- ع الجايات ان شاءالله
طاهر -: ان شاءالله ماكـو جايات
مُـرجان -: انتَ رحت توصلها لبيتها
هيج تكبر راسها اكثر
طاهر :- هيه ما تـعرف بس مشيت وراها
تأكدت دخلت بيتهم ورجعت بنهاية
هاي عرضي ماكدر اخليها
مُـرجان :- ما مرتاحتلها سيد مو بيدي
الله الـ يستر من وراها
طاهر :- تفكيرج الزايد ما يخليج
تغيرين كلامج المهم عوفينا منها أهلج
اليوم ما اجونه؟؟
مُـرجان :- خابرت ماما تكول دا يحضرون
لسفرة يردون يسافرون بما انُ عطلة
وما عدهم شغل
طاهر -: الحمدلله أهم شي زينين
مُـرجان :- الحمدلله
جان سيد طاهر شخص على نياته مثل
ابو مرن يومين ما بيهن أي أحداث
ثالث يوم الساعة بالـ 9 و دقيقتين استأذنت
من عمة حتى ازور أهلي
بما انُ طاهر ما موجود بالبيت
وافقت لبست ملابسي وطلعت جانت سيارتي
بوقتها عند أهلي ما محتاجتها هسه فـ اضطريت
أخذ تكـسي
وكفت ع الطريق بسرعة وكفت كدامي
سيارة بس جانت مو تكسي لا سيارة
فخمة تركتها ومشيت خطوات ابتعد بس السيارة
تمشي وراي
اللتفتت حجيت بعصبية
:- شكووو لاحكنيي
نزلت الجامة سمعت صوت شاب
يحجي بهدوء
:- هذا انه يـزن
وكفـت بمكـاني متصنمة من شدة خوفي
وتوتري بهل لحظة بقيت واكفه
نزل من السيارة يحجي وعيونه تباوع على
الناس
:- صعدي عندي حجي وياج مهم
لا تخافين ما سويلج شي
هزيت راسي بلا دموعي تنزل
كال بصوت شبه عصبي
:- صعدددي لا افضحج بالشارع
:- شتريد منييي عوفني اعيش حياتي
ممو كافي بسببك وصلت للموت
:- نتناقش بالموضوع بعدين اذا ما تصعدين
التصوير يوصل لزوجج السيد
و انتِ بعد بكيفج
بلعت ريكِ مسحت وجهي
:- أحلف بالقرآن ما تسويلي شي
ابتسم باستهزاء
-: ما سوي شي مجرد نحجي شدعوه
خوافة هل كد وينها مُـرجان ام لسان
غـمضت عيونـي صعدت ورة ما عـندي
غير هـذا الحـل تحركت السيارة
سألته بخوف
:- ويين ماخذني؟؟؟
-: مكان ما بي ناس
:- ليششش
-: حتى نـحجي على راحتنه
سكتت ادعي بكلبي يخلصني من هل ورطة
بأسرع وقت عبالي انسدت السالفة
ونسيت كلشي بس طلعت غلطانة
وكف السيارة وصار يحجي
يزن :- أول شي مبـروك الـزواج
مُـرجان -: ادخل بصلب الموضوع
ما اريد اتأخر
يزن :- ماشي
عندي شغلة اريدج تخلصينها ألي
شغلة مهمة هواية بنسبة الي وأي غلط صغير
يكلفج سمعتج
مُـرجان :- واذا ما وافقت؟؟
يزن -: ساعتها راح تعضين اصابعج ندم
مُـرجان :- شنو هل شغلة؟؟
يزن -: اي هذا السؤال المهم
ركزي ويـاي كلش سهلة الشغلة
مُـرجان :- خلصنييي كول
يزن -: صوتج
كلبت عيوني بقلة صبر
يزن :- ما أريد منج غير ترحين وياي
للجامعة تحجين للمدير كل الصار وياج
مو وكعتي بالحمام لااا فعلاً اكو بنية ضربتج
اريدج تكولين اسمها الثلاثي
رديت مستغربة من كلامه
مُـرجان :- ليش تريدني احجي الحقيقة
شنو فلمك انتَ ؟؟
يزن :- بدت هاي البنت تلعب بذيلها
لهذا السبب ما أريد اشوفها بالكُلية
وأنتِ قادرة بكل سهولة تطلعينها مجرد ما
تحجين كلشي صار
مُـرجان :- ها هسه فهمت الظاهر هل البت
كاعد تسببلك مشاكل وتريد تتخلص منها؟؟
يزن :- نـوعاً ما عـموماً انه ماريد مشاكل
كل الأريـدة تخـلص السنة على خـير
فـ باجـر تعاي بنفس الوقت المدير موجود
وأنه كذالك انتظرج هنا على الطريق مو
تتأخرين كل دقيقة تمر حياتج تصبح على
المحك وممكن بأي لحظة تفقدين زوجج
وسمعتج
مُـرجان -: انه ما عدت ذيج اللبنية
الكئيبة الخوافة التسكت عن حقها كبرت
وتزوجت وفهمت كُلش زين الناس
انتَ شاب بعدك بمقتبل العمر ليش
تضيع مستقبلك بتصرفات مراهقة كبر عقلك
ما عدنه صغار حتى نسوي هل مشاكل
عوفني بحالي
يزن :- صح كلامج انه غطلت وأعترف بغلطي
بس هاي البت قررت تلعب من وراي
بس عرفت اريد اتركها صدكيني ما أريد
اشوه سمعتج
او حتى أذيج بس أريد تحجين شنو صار
وشلون صورتج وضربتج
مُـرجان -: انتَ شريك وياهن بالجريمة
ما تريدني احجي عليك هم؟؟
يزن :- كولي الحجي الكتلج علي بالحرف
الواحد المقطع ينحذف وبعد ما تشوفين
وجهي للأبد
مُـرجان :- خـليني أفكر
:- فكري براحتج منا لباجر
أعتقد ما عندج غير هذا الحل اصلآ
هيه تستاهل انتِ بهل طريقة تاخذين حقج
منها
مُـرجان :- وأنتَ شلون أخذه منك؟؟
:- راح أمسح المقطع حقج يرجعلج
مُـرجان :- وشنو عرفك هيه ما عدها نفس
المقطع؟
:- مسحته من مُبايلها بس عندي المقطع
بقيت ساكته محتارة كأنما عندي حل
ثاني نزلت من السيارة أحاول اسيطر
على أرتعـاش جسمي
رجـعت بخطوات ثقيلة للبيت حتى ما
زرت أهلـي دخلت لاكتني عمتي بالباب
سألتني مستغربة
-: هاي انتِ مُـرجان مو على أساس
رحتي لبيت أهلج؟؟
رديت عليها بينما وجهي بالأرض
مستحية اباوع بوجهه
-: عمة ما لكيت أحد بالبيت الظاهر طالعين
:- يا يمة ما تسوى روحتج
ابتسمت بذبول
-: ميخـالف عمة ميخـالف
دخلت للغرفة سديت الباب غمضت عيوني
حييل احس دا أخون هاي العائلة مجرد
ما صعدت بسيارة صخام
حتى ريحة سيارتة بقت بملابسي
رحت بسرعة سبحت دموعي تنزل ما اعرف
ليش كل جسمي يرتعش خوف
فتحت باب الحمام صار بوجهي طاهر
فزيت مختـرعة عقد حاجبة
طاهر :- اسم اللّه شبيج فـزيتي
مُـرجان -: لا ماكو شي بس صرت بوجهي
فجأه بعدين انتَ مو طالع؟؟
ابتسم انتجى على الحايط انشف
بشعري عقدت حاجبي
:- شكو شبيك سيد؟
-: أحبج مُرجـاني
ابتسمت
:- انه أكثر سيد بس شعجب
اليوم مو من عـوايدك شكو
رفع اكتافـة كال بهدوء
:- هيج حسيت اريد أكلج أحبج
عندج مانع؟؟
-: انه؟
لا بالـعكس أموت عليك سيد
:- كولي أسمي من دون سيد
:- سيد انه أحب اكلك بهل لقب يخبل
وهيج يلوك عليك كيوت
:- أحجي عدل شني جاهل كدامج
كيوت وميوت
:- سيد لا تخـرب المتعة
ضحك بعدهـا أخذ نفس صار وراي
اباوع علي من المرايا وهو كذالك لزم أكتافي
كال بنبرة حنونه
:- اتمنى نبقى للأبد سوية مثل الوالد
والوالدة نعيش كل العمر مع بعض وما يفرقنا
شي ألا المــوت
لزمت ايده كتله بهدوء
:- سيد لا تجيب طاري الـموت
اذا صار بيك شي لا سامح الله انه
أمــوت وراك
ابتسم يـربت على أيـدي
الأحساس شي مُـخيف خصوصاً من تكون
متأكد انُ أحساسك ما يخيب
وانه أحساسي يكول اكو شي راح
يصير يدمر حياتي بلكي عرف السيد
بموضوع التصوير
بالنسبة ألي لو كايلتله على الحقيقة
من الأول ما جان هسه انه بهل ورطة
و المصيبة أكـذب على عمتي و على كل أهل
بيتي
مر اليوم كله بخوف وتوتر وتفكير
شنو راح يصير باچــر !!
طلعت وهل مرة حتى عمة ماهي بالبيت
راحت على شغلها طلعت اجر بذيال الخيبة
والخـيانة وكفت بالشارع
نص دقيقة وكفت السيارة كبالي صعدت
وره بدون كلام وهو كذالك لحد ما وصلنا
كدام الجامعة كال
يزن :- تصعدين بوجهج للمدير تحجين
كلشي بعدها تطلعين انه أنتضرج بالسيارة
مُـرجان :- والتصوير؟؟
يزن -: من تصعدين انطيج مُبايلي تمسحينهن
بيدج وكلمن يروح على بيته ولا كأنو
صار شي
مُـرجان :- مـاشــي
نزلت من السيارة دخلت الجامعة
بيها قليل طلاب أعتقد يمتحنون دور ثاني
او هيج شي سألت على مكان المدير
لحد ما وكفت كبال غرفتة اخذت نفس
دكيت الباب
- تفضل
فتحت الباب دخلت رفع راسه شافني
عقد حاجبة بعدها فتح عيونه متفاجاء هو
يعرفني
مُـرجان :- السلام عليكم
:- وعليكم السلام أهلاً وسهلاً بنتي
مُـرجان مو؟؟؟
هزيت راسي كعدت على الكرويته
مقابيلة بلعت ريكي كال
:- تفضلي بنتي بشنو أخدمج
مُـرجان -: تسلم ما تقصر بصراحة انه
اجيت حتى أحجي الحقيقة وشنو
صار وياي بالحمامات بيوم الـ اغمى عليه
بقى ساكت منتظرني أكمل غمضت عيوني
اتنفس كتله
:- الحقيقة هيه اكو طالبة أسمها ******
هيه السبب بكلشي صار وياي وصلت للموت
بسببها ما اعرف ليش..
سكتت ماخذه نفس
ما اعرف ليش هيج سوت برغم
ما عندي شي وياها بس اعتقد لأن شفتها
تغش بالأمتحان فـ هددتني وكالت اذا تحجين
اموتج
كلتلها راح أحجي كلشي ما اكدر
اسكت صار بيناتنا مشادات فجاءة وبسرعة
ضربتني على راسي دخت بس ما طحت
هيه رجعت مرة ثانية ضربت راسي بالحايط
نزف راسي وما كدرت اسوي شي تركتني
أنزف وأواجه الموت بس الله ستر وبقيت
عايشة
عيونه صارن بكصته حجه بينما
يمسح على راسه
:- ليش ما حجيتي الحقيقة من البداية
يا بنتي ليش خليتيها تنفذ بعملتها
:- خفت لأن هيه هددتني خفت على حياتي
بس بعدين فكرت وكلت لازم احجي الحقيقة
حتى أخذ حقي وما ترجع تكررها وي غيري
-: حقج يرجعلج ان شاءالله ما يضيع
بس انتِ يا بنتي ما عندج دليل
يثبت صحة كلامج ممكن تگلب السالفة عليج
و تطلعين انتِ جذابة
-: لااا عندي دليل مقطع فيد......
قبل لا أكمل كلامي أنفتح الباب
بطريقة همجية رفعت راسي وأذا أشوف سيد
طاهر واكف بنص المكتب عيونه حمر شعره مخربط
يتنفس سريعع
فتحت عيوني بصدمة رعشة صابت
كل انحاء جسمي همست بعدم تصديق
-: س.. سيد طاهر !!!.
غمض عيونه كأنما يكذبهن كأنما يكول
يارب كل الأشوفه يطلع كذب بس من فتح
عيونه خابت أماله
المدير -: عفواً منو حضرتك؟؟
عيونه عليه ما تتحرك التمست بنضراتة
الخيبة النـدم هزيت راسي بلاا دموعي
نزلت وحـدها باوع للمدير همس
:- انه زوجــها
باوع المدير عليه
:- صح كلامه بنتي؟.
:- ايي
طاهر :- مُـرجان
رفعت راسي كال
:- تعالي يلة
هزيت راسي وكمت لزم أيدي بقوة
هو معصب هواي مو شوية لـدرجة احس
برجـفة أيـده
طلعنا برة الجامعة كلها حجيت
بألم
:- سيد طاهر أيـدي على كيفك
-: اشش مُـرجان اشش
فتح باب سيارته صعدني سد الباب
قوي فزيت دار صعد حرك سيارته يسوق
أنفاسة متثاقلة
-: شجابج هنا شعندج شلون كدرتي
تطلعين كل هاي المسافة منين اجتج
هاي الصلافة
مُـرجان :- سيد طاااهر خلي أفهمك
والله انه...
:- تفهميني لو تجذبين علية؟؟؟
منووو هذاااا الصاعدة وياه منوو
أحجييي
بـچيت صار يضرب الستيرن ويستغفر
كال
:- والله ثم والله اذا ما تكولين كلشي
وتفهميني شنو كاعد يصير والله تحرم عليه
شوفتج ليوم الدين
شهكت امسح دموعي أحاول اهدء
نفسي حتى اشرحله ما كدرت بالكاد
حجيت كلمتين
:- عندي أسباب والله مجبورة والله
-: مجبورةةة تجيننن تكليليي تحجيين
وياااي نلكى حلل نفهمم السالفةة مو ترحين
وحدددج بسيارةةة واااحد سااافل
مُـرجان :- شلون عرفت منو كلك
مراقبني انتَ؟
ضحك بقهر
:- ياريت مراقبج ياريت انه شفتج
-: ششقصدك يعني لعد منو شافني
منووو مراقبني
:- زينب مراقبتج ومصورتج صور
وفيديوهات ليششش تخلين الناااس تتشمت
بيه ليش انطيتيي فرصة لعدوج أستغلها بكل ذكاء
وهسه انتِ وسمعتج بخطر
كسرتي ضهري كسرتيني مُـرجان
جنت واثق بيج أكثر من روحي ليش خذلتيني
:- سيد طاهر والله ما عبالي هيج الأمور
تطــور ما خنت ثقتك انه ما سويت شي غلط
بس ردت أحل مشاكلي..
:- ههههه وشنو انه بنسبة الج بياع
خضرة هااا مو زوجج مو اتفقنا أسرارنا
سوه لو اتفاقج مجرد حجي ما أله معنى
:- سيد طاهر انه أحبك حاربت أهلي
بس حتى اتزوجك تتوقع أخونك بيوم
او حتى أقلل من قيمتك
بس الصار غصب عني أنجبرت اروح
والله مو قصدي أهينك
:- ما أريـد احد يعرف بالصار بس
نوصل تحجيلي كلشي ما تضمين شي
عليه ْ!
كتله بتوتر
:- وزينب؟؟
-: خــليها عليه انه اعرف احجي وياها
عضيت شـفايفي نزلت راسي
امسح بدموعي مشينه مسافة كال
:- لا تبچـين كافـي راح نـوصل للبيت
شي أكيد ما تردين الوالدة تشوفج !!؟
هزيت راسي مسحت دموعي
-: تلكين بطل ماي فتحي الجكمجة
غسلي وجهج
جسمي بعده كله يرجف من الصدمة
والخوف بعدني ما مستوعبة الصار
غسلت وجهي رجعت راسي على الكشن
تنهدت بصوت
:- طاهــر
ما رد عليه باوعت علي كتله
بصوت متحرش من البچي بينما الغصة مرة
ثانية اتجمعت ابلعومي
-: مستعـدة أحرك روحي اذا كتلي
بس لا تعاقبني من حرمان صوتك ونضراتك
تجاهـي
لا تعاقبني على خطأ مو خطأي صح
غلطت لأن ما كتلك جنت بداخلي أموت
الف موته مو سهلة علية بس والله الصار
كله مو بيدي
:- مو مشكلة نـوصل تحجيلي كلشي
من الألف للياء حتى افتهم وتصرف بعقلانية
-: الشي الوحيد الـ ندمانه علي هو
انِ ما كتلك شنو دا يصير وياي اما الباقي
مو اخطائي هاي اخطاء غيري
سكـت مـا رد
وانه كـذالك وصلنا للبيت أشرلي ادخل
للغرفة بسرعة دخلت وسديت الباب
اسمعه يحجي وي عمتي
دخلت الحمام فتحت الماي كعدت
بالكاع ادك على راسي غبية ضعيفة
ما عندج كرامة بأي وجه اقابله بعد
بأي وجه اباوع عليهم بأي وجه
اضحك وأحجي وياهم
عمتي
سيد عباس
طاهر
ما يستاهلون وحـدة مـثلي بيناتهم طول
عمرهم عايشين مرفوعين الراس تجي وحدة
مثلي تخلي سيرتهم على كل لسان !!
منو يكول زينب تحفض السر منو يكول
ما تحجي و تشهر بسمعتي هيه بس تريد
مني أغلط وفعلاً غلطت وستغلت غلطي
:- مُـرجــان
غمضت عيوني كل حيلي ما ريد اسمع
صوته مستحية حيييل منه
-: مُـرجان وينج انتِ بالحمام؟
ليش ما تردين
تسمعيني بيج شي راح اكسر
الباب اذا ما تردين مُـرجان
فتحت الباب عيوني حمرر لزم وجهي
همس بينما عيونه تتجول على كامل وجهي
:- خفت عليج عبالي سويتي شي
لنفسج ليش عيونج حمرر هل كد
ليش ملابسج مبللة هسه تتمرضين
كتله بينما احس نار تحركني
:- انتم ما تستاهلون وحدة مثلي
خاصتاً انتَ سيد طاهر تستاهل الأحسن
مني
:- شهل حجي شبيج تخبلتي مجرد ما
صارت مشكلة صرتي تحجين حجي مو
يم السالفة ابدًا
:- خجلانةة منك ومن كلامك والله
-: اشش لا تبچين هسه يسمعون
صوتج ويتخبلون عبالهم انه السبب وجيب
الـ يقنعهم
ابتسمت بتعب
:- اول شي بـدلي ملابسج
بعدين نكمل يلة على سريع
هزيت راسي طلعتلي ملابس بدلت
وطلعت لكيته كاعد على السرير صافن
انتبه لوجودي طبطب على مُكان قريب منه
كعدت
-: شنو صاير وياج ليش طلعتي بدون علمنا
ومنو هذا الـ صعدتي وياه السيارة
وليش رحتي على جامعتج القديمة
أريد أجوبه لكل سؤال
بللت شفايفي بطرف لساني بديت اسرد
كل الحكاية من يوم ما شفت وسمعت شنو
يصير بحمامات الجامعة
وشلون صورني و ضربني إلى
هاي اللحظة وليش صعدت وي يزن
وليش رحت وياه للجامعة
ما زدت او نقصت حرف حجيت كلشي
بالتـفصيل الممل هو فقط يهز براسه
من كملت باوع عليه وبتسملي
:- انتِ ما غلطانة بشي ما طول
عرفت كلشي ها هيه اعتبري كلشي انحل
وماكو شي اسمه يزن او تصوير انسي كلشي صار
ماريد مرة ثانية تبچين
ما ريد زوجتي ضعيفة خليج قوية شرسة
لقني كل من يقترب منج بسوء درس
خليهم يهابون من طاري أسمج
لا تسمحين لأي كائن من يكون يهينج
او يقلل من قدرج هاي نصيحتي ألج
:- راح أحاول
-: لا ماكـو هيج كلام نفذي فقط
لا تحاولين
:- أشوف نفسي مو كد هاي القوة
الحجيت عنها
-: ليش بالعكس انتن النساء أصل القوة
والصبر اكبر مثال على ذالك أمرأة عاشت أميرة
قبل أن تكون أسيرة
سألته مستغربة
:- منو هاي ؟؟
-: السيدة زينب عليها أفضل الصلاة والسلام
ام المصائب جبل الصبر
اخذي من حياتها عبرة لحياتج تعلمي
الصبر منها الجهاد القوة زينب بطلة كربلاء
عندما قتل اخوها الأمام الحسين والأمام
العباس وصحبهم عليهم افضل السلام
تعرفين شنو كالت من شافت جسد
الحسين ممزق على التراب؟.
هزيت راسي بلا ما عندي معلومات
هواية عن واقعة الطف او حتى عن أهل
البيت
:- قالت اللهم تقبل منا هذا القربان
تعودي على الصبر والقوة ترة الحياة مو كلها
ضحك وسعادة
مرات تمر على الأنسان فترة يحس
بيها بتمزق داخله إلى أشلاء يحس
يريد يعتزل عن العالم هاي الفترة بس نكدر
نحاربها بالدعاء والتقرب إلى الله سبحانه وتعالى
ابتسمت كلام خلاني بحالة وعي
وي نفسي وتقبلها للمشاكل سيد طاهر شخص
واعي مثقف يعرف شلون يدير الأمور
رجعت مثل قبل وهو كلي حل المشكلة
بعد مرور يومين على الحادثة الصارت
رحنا زيارة لبيت أهلي
همه راح يطلعون سفرة على تركيا
قررو ياخذهم للمطار سيد طاهر بسيارته
اذا يروح بابا بسيارته منو يرجعها بعد فـ لازم
اكو أحد ياخذهم
وطبعاً سيد طاهر حاضر اتفقو باجر
على الساعة 9 بليل يطلعون برغم ليل
ويمكن يكون الطريق مخيف شوية
إلى أنه سيد طاهر ما سمع مني وأصر
عاد انه استسلمت بيوم الـ يسافرون أهلي
أصريت اروح وياهم رغم جنت احس بتعب
ووجع راس
بس طاهر ما قبل كال انتِ هل يومين
مدري شبيج من ارجع اخذج للمستشفى
ودعت أهلي وودعت سيد طاهر
شمرت وراهم كاسة ماي وسيد عباس
بقى يدعـي يوصلون بالسلامة
بليلتها ما نمت بقيت اتكلب هاي
اول مرة انام وحدي من بعد ما تزوجنا تعودت
على طاهر اخر شي تأخر الوقت كلش
ما كدرت أنام قررت اتوضى وأصلي
صلاة الليل الي طاهر يحبها كلش وما يمر يوم
واحد ألا أفز واشوفه يصلي
علمني عليها بس ما صليت ولا مرة
قررت اصليها وادعي يرجع بأسرع وقت
لبست ثوب الصلاة هدية من عمة نرجس
فرشت سجادتي وبديت أصلي لنص
الصلاة سمعت صوت بالصالة ما انطيت
أهمية إلى أن خلصت الصلاة
سلمت بعدها رفعت راسي واذا اشوف
سيد طاهر كدامي ضحكت بفرح
:- الحمدلله على السلامة
ما رد عليه بلعت ريك هزيت راسي
بشنو
-: سيد طاهر ليش ما تحجي وياي
فقط يباوع عليه نزلن دموعي وجسمي
تصلب من سمعت صريخ عمة
باوعت على وجهه بچيت أشهك
:- جاووبنيي ليش ما تحجيي وياي
شنووو صاار
:- ديري بالج على نفسج وعلى
روحي الثانية
هزيت راسي متخبلة مثل السراب
مر طيفة عليه مديت أيدي الترجف
بينما صوت بكائي بدى يعلى
خليت ايدي على وجهه تعدت الصورة
وطلعت عادي تأكدت هذا مو طاهر هذا
طيفة هاي روحة اجت تودعني
كمت اتعثر بعباية الصلاة طلعت
واذا اشوف سيد عباس محني ضهرة وعمة
نرجس تصرخ وتخرمش بوجهه
الناس اللتمت صارت تصرخ وتبچي
هسمت بدون وعي
:- شنو شنو صار شبيكم ليش تبجووون
صرخت عمة من سمعت كلامي
صارت تحجي و تصرخ بنفس الوقت
:- رااااح أبنننني رااااح طاااهر
رااااح ودعنةةة للأببددد بعد ماااا نشوفةةة
راااح راحح ابني ولججج يمةةة
منار طبت للبيت صارت تملخ نفسها
و تصرخ كابلت أمها و النسوان بدت تكثر
ما كدرت اشوف اكثر هيج مناضر
دخلت للغرفة قفلت الباب ادك على راسي
صوتي ما يطلع صرت أبچي اشهك
دكيت على راسي بالساعة بس صوتي ما طلع
كعدت بالكاع فاتحة عيوني كل حيلي
ادورة بالغرفة بالحمام باوعت على مكتبة
ريحتة موجودة طيفة يحوم حواليني
ما كملنا خمس أشهر من زواجنا بعدنا
ما فـرحنا بعـدنا ما حققنا أحلامنا كلشي
صار بـلمح البـصر كلشي صار مثل الوهم
خليت ايدي على راسي
مددت رجلية
جسمي يرتعش كأنما ثلج ونزل عليه
دموعي وقفت عن البكاء
رفعت راسي للسما همست بصوت
مبحوح
:- يالله انه أحتـرك من جوه يا رب
يا رب أختبارك صعب يا الله دخيلك ربي
لا تعاقبني بهل طريقة ياربيييي
أنفاسي تثاقلت كتمةةة صارت على صدري
غواااش بعيوني تمنيت بهل لحظة أنام
بلكي اشوفه وفعلاً اغمى عليه
بس ما شفته شفت بابا وماما يباوعون
عليه مبتسمين كأنما فرحانين راحو وخذو وياهم
طاهر !
كلهم بيوم واحد
ماما
بابا
طاهر
كلهم بساعة بدقيقة او يمكن بثانية
تخلو عنا ودعناهم للأبد وكأنُ طاهر جان
حاسس ياريتك خليتني اروح وياك
جان هسه انه وياكم
كل شوية الباب يندك افز اسمع
صوت منار وبعض من النسوان بس ما ارد
عليهن اصلآ بالي مو يمهن
كال ما يفرقنا شي بس الموت
نفذ كلامه وفرقنا الموت راح و خلاني
وسط نار تاكل بية
اخخخ يا طاهر يا فـرحة ما تمـت
اخخ يا انقى وأجمل أحلامي
هنا حسيت تقطعت اعضائي إلى اشلاء
هنا حسيت بالموت ألف مرة وما حصلته
هنا حسيت لازم اعتزل عن العالم وبقا
انه وطيفة وريحتة بالغرفة حتى لا تختفي
حتى لا يزعل عليه طيفة
أبشرَك مِن وَراك الليل مَا نمتَه
ومَا خليت مُوقف مَا تذكرته
أجيت بَالي بـ العشرة
ورَحت من بَالي بـ ستة
ودَخت مَا ادري وين اني
لان مَا ادري وين انتَ
تَعال بداعت العِشرة الگضيناها
لان لو لحگت تلگاني فوك الگاع
إذا مَا لحگت تلگاني جواها
وحَك رب العبَاد وعزَته ودِينه
خَايف مِنك أول مَا تَلاگينه
واذا مَا طمنت گلبي اخلِي بگلبي سچينة
❢ ═──── · · • • • ❂ • • • · · ────═༻❢
يتبــــــــــــع
للقصة بقية 💔
صعب علي كتابة الكلمات ووصف الشعور
بالضبط خليت البارت قصير لأن ما كدرت
أكمل
اتمنى تكونو اللتمستو وياي صدق الكلمات
والشعور عند فقدان شخص عزيز علينا
التقيكم في البارت القادم بأذن الله
ميان أل مالكي