ألرقطاء وكراتها الثلاث
اللـدغه الرابعه
بقلم كهرمانه
___________
ضحك نذير عافها وراح يتمشى لبيتهم بقت هـيَ عينها وراه وبعقلها الف فكره وفكره وأهمها تلگه كتالة اخوها
مستعده لهذا الزواج في سبيل توصل للي قتل اخوها وتشرب من دمه ، من وافقت على شرط نذير چانت كلها ثقه بروحها ومتأكده من نفسها لمن انطت كلمه لأن مو بسهوله خيزران تنغلب
ماتفكر بقلبها وهذا الشي زادها قوه تفكيرها بعقلها ومتخلي قلبها يتحكم بيها بأختصار هـيَ شبه خاليه من المشاعر العاطفيه والعلاقات والحب ، عدها الحب هــوَ حب العائله وبس
دفعت باب بيتهم ودخلت تمشي بلا وعي بدلت ملابسها ونامت وسط تخيلاتها شـلون راح تاخذ بثار اخوها
بعد مرور اسبوع
اللي صــار بهذا الاسبوع هــوَ انو نذير راح كال لابوه اريد اتزوج وحده من بــَنات رياض واريد بنته الچبيره
وضاحي جان مخلي عينه على خيزران يريد يخطبها مايعرف بيها هـيَ بنته الجبيره عباله الوسطانيه فـ فرح من ابنه راد يتزوج وحده من بنات اعز اصدقائه
وراح ثاني يوم لـ صديقه رياض يطلب ايد بنته الكبيره لابنه نذير رياض تردد لأنو يعرف ماضي نذير بَــس ضاحي ضل يتوسل بيه وماگدر يكله لا بَــس گال خل اشوف بـِـنتي يجوز تريده
من راح يسألها گالتله بكيفك انت شتفصل أنـي البس ضحك وحس انو بنته تحب نذير وعافها لان شافها انحرجت اول مره يحاجيها بخصوص هــيچ موضوع وهو يعرف بنته بصوب والعاطفه بصوب
بعد اسبوع صارت الخطوبه بَــس ماسوو هوسه بَــس عقدوا عقد شيخ و ورى كم يوم عقدوا محكمه اهلها محد يكدر يحجي رغم رافضين هذا الزواج خواتها اخوانها امها بس يخافون من رياض
ماحست بنفسها الا بيوم العرس راحت للصالون ومن الصالون صارت الزفه وصلوا للبيت الكل فرحان وناس كِلِّـشْ هواايه موجودين بالعرس كعدت بالصاله وبالها ابد مو يمهم ابدد كل اللي يدور بتفكيرها شـلون راح تنتقم من اللي قتلوا اخوها وشتسوي
خلص العرس واجت أم نذير وگفت گبالها وحاچتها ببرود
-يـله عيني امشي وياي للغرفه مالتچ
خيزران وگفت بشموخ وتبعت أم نذير للغرفه دخلت عجبها الأثاث والترتيب مال الغرفه باوعت لأمه فتحت الكنتور وطلعت منها دشداشه وشمرتها عليها
-هــاي تلبسينها وره مايطلع منچ سكتت وبعدين رجعت باوعت لخيزران وگالتلها
-إنتِ كِلِّـشْ حِـلوه شعجب اهلچ شمروج هيچ شمره يَـعنـي وافقوا على واحد متزوج
خيزران:-متزوووووججج ؟؟؟؟؟
أم نذير:-اي وعنده بنيه
خيزران:-لزمتها من اكتافها وحچت بفحيح وعصبيه
-شدتحچيييين شنوووو متزووووج وعندددده بنيييييه
دفعتها أم نذير بأرتباك من انفعالها وگالتلها
-أني امه احترمييي نفسچ وراح اسكتلج لأن هستوچ عروس لاتتجاوزين حدودچ وياي ، إبتسمت بوجهها وحچت تزيد غيضها وعصبيتها اكثر واكثر
-لازم انتِ ثگيله على اهلچ حتى ينطوچ لواحد متزوج
باوعت بعيون أم نذير وهيَ عيونها إنملت بالدموع صاحت بأم نذير
-مستحيل هذا الشي أبويه ميشمرني هالشمره
أم نذير خافت من عدها ومن عصبيتها البينت على عيونها تحسها تريـد تهجم عليها التفتت رادت تطلع ودخلوا نذير وأبوه وعاتكه جدته يشوفون شــكوو لــيش خيزران تصيح
-إنت شلووون تضم عليه هــيچ شـيي متزوج وعلى ذمة مررره چذااااب الله ينتقم منك حقيررر
نذير باوع لأمه ورجع باوع لعاتكه جدته دخلت جدته لزمت امه من ثوبها وسحلتها وهـيَ متحلفه بيها أما أبو نذير ضل واگف يباوع ومصدوم ماعباله خيزران هـيَ العروس عباله اختها الوسطانيه وچان ناوي يخطبها وره العرس
نذير تقدم وحضن خيزران يحاول يهدئها وأبوه يباوع عليهم والغيره ماكلته اكل نذير شافه گله يابه بلا زحمه سد الباب عافهم وطلع بره البيت
نذير:-أبوي شبيه قفل الباب ورجع وگف گبالها
خيزران:-احچي يـله خلصني متزووج وماگايل والله والله اذا على ذمتك مره هسه ارجع ببدلة العرس لأهلي وورقة طلاگي توصل ورايه ، أنـي خيزران تعرف يَـعنـي شِــنو خيزران يَـعنـي مارضى ولا اقبل اخذ على شرك شِــنو ناقصني علمود وحده تشاركني برجال؟!
حضنها وخله راسها ع گلبه وگاللها
-صح چنت متزوج بَــس وحده نصابه وقليلة اصل وصح عندي بنيه اخذتها وياها واني نسيتها وقررت ابدي صفحه جديده وياچ وهذا كل اللي صــار اصلًا أنـي مطلگها
خلاها تبرد وتلين إله گدر يقنعها بأسلوبه لحد ما قضوا ليلتهم الأولى سويه
ثاني يوم گعدت خيزران من النوم فتحت عيونها شافته صافن عليها فزت وگالتله
-شــكوو شبيك صافن
نذير:-أباوع على حلالي
خزرته ورادت تگوم لزمها قوي وسحبها لحضنه وهمس يم اذانها
-أحبچ باسها بخدها بـكل رقه وهـيَ ضربته على بطنه بعكسها ، ضحك وگاللها
-راح تشيبيني بوكاحتچ
خيزران:-ع اساس هسه انتَ مامشيب باع راسك كله شيب ، صدگ احنه بيناتنا فرق ١٣ سنه شايب
نذير بإبتسامه ماكره:-نسيتي الشايب شسوه البارحه؟؟
گدر يخجلها شمرت عليه المخده وگامت اخذت الها ملابس وطلعت من الغرفه راحت للحمام باوعت على روحها بالمرايه شافت الأثار اللي على رقبتها ضلت تسب وتلعن بيه
طلعت من الحمام مخليه الخاول على راسها شافت ضاحي كاعد عالكرويته ويشرب چاي سلمت عليه وهو صافن عليها حتى مارد السلام
فززه صوت امه عاتكه ابتسمت من شافت خيزران وگالتلها
-هلا هلا ياصباح الخير هلا بچنة البيت ومرت النشمي
خيزران باوعتلها بلامبالاة وواگفه استعداد تريـد بَــس تتعارك دخلت لغرفتها وشافت نذير ينضف بالغرفه تكتفت وضحكت على منضره وهو ينضف
-شدتسوي
نذير:-انضفلچ الغرفه بربچ وين لاگيه هيچ واحد مدللچ
خيزران:-زين الگالك شغله تلتهي بيها احسن من ماملتهي تبوس وتشمر حچي
جذب نضره فتحة الملابس مالاتها من عند الصدر تول دگمة ممدگمتها رفع حاجبه وسألها
-منو بره ، طلعتي هيچ؟؟
خيزران:-اي چنت هــيچ وبس ابوك گاعد بره عالقنفه
نذير:-بعدد ممنوع تطلعين هيچ بره لغرفه وانتبهي للبسچ والحجاب تلبسينه مينزل من راسچ افضل وامي وجدتي تحترمين ومعليچ بخواتي وفاء وساميه ذني يدورن مشاكل اصلًا يتشرنها شرايه ومن يجينا خطار ماريـد ألمح خيالچ مفهموم
ماعجبها الحچي گلبت عيونها بملل وعافته وراحت كعدت عالچربايه هــوَ احذ ملابس وطلع من الغرفه عوجت حلگها وهـيَ تتمتم
-والله يــاا الله هــاي بدايتها وهيج ،
صاحولها ع الاكل بدلت ملابسها وطلعت تاكل وياهم بهدوء ، وهم طبيعتهم محد يحجي عالأكل وعاتكه بَــس تباوع عليها وتبتسم ، مر اليوم طبيعي وبالليل الساعه ب١١ونص رجع نذير للبيت اتلگته جدته
-وين چنت هسه يـله رجعت للبيت
نذير:-يم جماعتي
عاتكه:-ياجماعه ذولي انتَ عريس لازم تبقى يم عروستك مدة اسبوع يـله بعديـن تطول هــيچ بره البيت
نذير:-حجيه رحمه لاهلج يَـعنـي اذا طلعت شيصير مثلًا
عاتكه:-فال مو حــِلوو يَـعنـي متكمل السنه من زواجكم اذا ميصير قدر لاسامح الله
نذير:-يايوم شوكت تقتنعين هــاي كُـلها خرافات مالها وجود
عاتكه:-براحتك
باس جدته من راسها وراح لغرفته دخل وسد الباب وراه شافها گاعده وصافنه ضحك وگال
-الله بالخير والعافية شِــنو اخبارچ شلونهم اهلي وياچ خوما احد ضوجچ
مانتبهت لكلامه ولا لوجوده صافنه وشارده تفكر بأخوها وموتته المفاجأة والغامضه لزم إيدها وگاللها بحنيه
-خيزران حـبـيبتـي شبيج ؟
خيزران:-منو اللي قتل اخوي نذير لــيش متگول والله روحي مفرفحه اريد اعرف منو
نذير:-شوفي اخوچ انكتل بسبب مشكله عشائريه
خيزران:-شدتگوول اخوي ماعنده عداوه وأنسان مسالم وماله شغل بأحد
نذير:-اي صح لاا بيها ولا عليها انقتل ، بسبب صديقه فلاح
خيزران:-فلااااح!! اللي تصاوب وياه
نذير:-اي فلاح مغتصب طفله بعمر العشر سنوات بصوره كِلِّـشْ بشعه واهله دفعوا فلوس للعشيره اهل البنيه بَــس اخوتها ثاروا شِــنو يسكتون بفلوس وشرف بتهم اللي ضاع ، سوو كمين لفلاح وويه ماجاي ينفذون خطتهم لگوه هــوَ واخوچ سويه
واللي مبين صايــر بينهم كلام وصوبوا اخوج بالبدايه وضاربين فلاح طلقه وحده وسامعين أهل المنطقه وراكضين للصوت مال الطلق يردون يعرفون شــكوو من واصلين للمكان شايفين يونس وصديقه متمددين بالكاع وناقليهم بالمستشفى ملحگين بفلاح بَــس ماملحگين بيونس
نزلوا دموعها بقهر وگالتله
-اخخخ ياخويه سوده عليه متت هيچ موته لابيها ولاعليها راح دمك هدر مثل الأضحيه، نذير گُلي منو هذول اللي قتلوا ياعائله ياعشيره
نذير:-ياعائله هــاي بعديـن اگولها الچ بَــس واحد منهم چان خايف حيل نفسه هذا ويه اخويه مجيد صديقه وحاچيله كلشي وكل هذا الصاير ابوچ ميدري بيه كايلين اله انقتل بسبب واحد عنده عداوه ويه فلاح
ومنطين لعامل عدهم فلوس ومخلينه يعترف على نفسه والسلاح مالتهم هَـم ماسحين البصمات ومخلينه بيد العامل وأبوج سالگ لشته للعامل خطـيـه لاازمه مزوعه عافيته
بَــس انتِ شـلون وثقتي بيه بهالسرعه وقبلتي تتزوجيني مجرد ماكلتلچ اعرف كتالة اخوچ ماشكيتي ولا للحضه إنو اكون جاي استغلچ!
خيزران:-ملاحقتك الي وكل مره اشوفك بيها مبينه مو صدفه اهتمامك الزايد بيه وبحزني وهم لو على گولتك طلعت انتَ ماتعرف شـيي عن اللي قتلوا اخويه چان علمتك منو تكون خيزران ، محكمه موجوده وطلاق موجود
واني مستعده كلشي اسوي علمود ابرد جمرة گلبي وأوصل لكتالة اخوي احط روحي بالنار عندي استعداد و يكفي اذا انخاك لو احلفك بشاربك ماتخذلني مو
نذير:-لچ تحلمين اطلگج تحلمييين واني وياچ ناخذ بثار اخوچ
خيزران:-لازم تخطيط نذير لازم خطه دقيقه وهاي منگدرلها أنـي وانتَ لازم ابوي يتدخل
نذير:-تَـمام بَــس مو هسه بعدنا معاريس
خيزران:-شــوَكت ؟
نذير:-اصبري هالكم شهر خلي يبردون ويأمنون وقتها نرجع الهم
خيزران:-تَـمام
مشت الأيام خيزران تحسنت علاقتها ويه نذير والمفضله عند عاتكه ونذير وضاحي ميقبلون احد يضوجها لو يمسها بحچايه وهالشي ثار غيض وغيرة أم نذير وبناتها وفاء وساميه وأم ندير تحس روحها مالها كلمه فـ تريـد تسيطر بواسطة خيزران لان الكل يحبها وهي حيل متنرفزه من هالشي
وبيوم من الأيام خيزران چانت تغسل ملابس ومن ضمن الملابس التغسلهن ملابسها الداخليات وهمه ميغسلون الداخليات ويه الملابس الباقيه فـ شافتها أم نذير وأجت تحاچيها وهيَ معصبه
-هــاي شِــنو تغسلين ملابسچ الداخليات ويه ملابسنا ولچ بَــس لاا مسويتلنا سحر عن طريقهن
خيزران ببرود:-ياعيني ههههه ياخاله أنـي من تزوجت لليوم مطالعه حتى أروحح للسحاره بعديـن منين تعرفين يصير سحر عن طريقهم خاف مجربته
أم نذير:-شنووووو ولچ تتهميييينيييييي گعدت بالگاع وضلت تصرخ
-يبوووووويييي تعال الحگلييي يضاحيييي شوف چنتك تتهمني تگلي انتِ سحاااااررره تسووويييين سحررر
طلعت ساميه شافت امها تصيح لزمتها وساعدتها علمود تگوم
-يمه دگومي گومي منو تاهمچ تسوين سحررر
خيزران:-عمي الله يساعدكم رادت تدخل وگامتلها أم نذير وصاحت الها
-ولچچ عووبه شتقصدين بعدها ممكمله كلامها طلعوا أبو نذير وامه عاتكه
ضاحي:-عليييش هذااا الصيااااح شكوو
أم نذير:-ضااااحي هــاي چنتك تگول عليه أم السحوره تقبلهااااا واذا متصدگ هااااي ساميه واسألها شاهده على كلشي صــار
خيزران ضلت تباوع وهـيَ مصدووومه من كمية الچذب الچذبته أم زوجها وكملته اخته
ساميه:-اييي بوييييه تگول لامي طرشه ماتسمعين همم تقبل هذا الحچي على امييي
ضاحي عينه على خيزران وحچه وهو سرحان
-لاا ماقبل
عاتكه صاحت بصوت عالي:-خيزراااان ولچ أنـي بالگوات كاضه روحي عنچ تَـره مشاكلچ كثرت يوميه متعاركه ويه وحده واني ماتعجبني هيچ چنه مامحترمه وصلفه
خيزراان ضااااجت وصارت عصبيه وگفت بوجههم حچت وكلها ثقه بنفسها
-باوعولي أنـي لاخاف ولا أستحي من اسوي شـيي غلط اكول أنـي مسويته واعترف ابوي مارباني عالچذب ماچذب مثل بعض الناس علمود اكسب اللي اريده علمني اذا ضاع حقي اخذه من عيون اللي يسيء الي
واني ممتهمه شخص ولاقاله احترام بَــس مجرد ما عمتي اجت وگالت تغسلين ملابسچ الداخليه ويه الملابس الباقيه بَــس لاتردين تسوين سحر واني گلتلها منين تعرفين يصير سحر بالملابس الداخليه خاف مجربته
وهذا كل اللي صــار وممجبوره اجذب گلت وارجع اگول
أم نذير:-يمممه منچ خايببه العوووبه
ضاحي :-اسكتييييييييي لتحچيييين ولاكلللمه ، الضاهر أنـي انطي خبز مانطي تربيه مو يابـت رياااض
خيزران:-ماگلت هــيچ بَــس ياريت لو تخليهم يفكون ياخه مني
عاتكه:-يَـعنـي هسه منو اللي يچذب
خيزران:-أنـي ماچذب وراح تتعودون على طبعي
ساميه:-بوويه يَـعنـي تچذبنا أنـي وامي وتصدگ بهاااي
ضاحي:-سااااااميه هااي الها إسم يـله اعتذررري منها گداااامييي
أم نذير خنست من الخوف وعاتكه لگفتها ساميه تچذب هـيَ وامها ضلت تخوزر بيهن ساميه حچت وهـيَ تبچي
-اسفه بويه صاح بيها خلاها تگمز من مكانها
ضاحي:-مووووو منيييي تعتذرررررين من خيزراااان
ساميه:-خيزران أني اسفه بالنيابه عني وعن امي
خيزران:-عَـفيه وبعد لاتچذبين الله يذبچ بالنار
ضاحي:-أم نذير گدامي روحي للغرفه بسررررعه
چان يفر بالسبحه وهو عصبي باوع على خيزران زفر بغضب وگاللها
-وانتِ بعد لاتطلعين تغسلين ملابس وتشرين بره
خيزران ابتسمت بإنتصار :-صــار عمي
ضاحي:-ولچمة گلب عمچ
مافهمت عليه عافها ودخل جوه رادت تدخل شافت ملابسها الداخليات اخذتهن وراحت لسطلة الزبل شمرتهن وهي تتمتم
-شافوهن بعد شسوي بيهن
مر أسبوع وخيزران بدأ يطلع عليها اعراض حمل اخذها نذير للمستوصف مال المجمع وچان تطلع حامل والكل فرح بهذا الخبرر خصوصًا اهل خيزران لأن اول حفيد الهم راح يجي
مرت اشهر الحمل وخيزران يوم عن يوم تكره الطفل اللي بداخلها زياده وتگول انو هذا الطفل اللي راح يجي ربطها بعائله آل ضاحي طول عمرها وراح يخرب عليها كل مخططاتها وثار اخوها ماراح ترجعه
كملت تنضيف وصعدت لغرفتها ترتاح بدلت ملابسها وباوعت البطنها الكبرانه وهـي تحس بالملل باوعت للساعه راح تصير منتصف الليل ونذير ماكـو بدت تقلق عليه من يتأخر
گعدت ومددت رجليها عالچربايه واخذها التفكير فتح باب الغرفه ودخل نذير باوعلها سلم عليها ماكـو مترد عليه تمدد بصفها حست بوجوده باوعتله وهو حس عليها بيها شـيي
-شبيچ
خيزران:-الطفل هذا توقيته غلط
نذير:-لاا لاا خيزران هذا الطفل اللي ببطنچ لازمم تدارينه وتحبينه لأن قطعه من گلبچ واذا تحبيني لاتضلمينه بيوم ولاتكسرين خاطره ولد او بنيه
خيزران:-وثار اخوي
نذير:-الزلم تاخذ الثار مو النسوان
خيزران:-وليش تقلل من قيمة النسوان!!!
نذير:-ولچ مامقلل من قيمتهم وين شطح عقلچ اقصد الجنس اللطيف ميگدر على مواجهه زلم لأنهن رقيقات
خيزران:-خليها ببالك اخوي اذا محد ياخذ ثاره أنـي اخذه والنار اللي بگلبي ماتبرد لو منا لخمسين سنه اخذ بثاره اخذه
نذير:-ديري بالج على روحچ ومن تجيبين النا حديث ثاني حـبـيبتـي واجيبلچ كتال اخوج يم رجليچ متفقين
خيزران:-اتمنى متاخذني على گد عقلي
نذير:-من عرفتيني لهذا اليوم كلتلچ شـيي وماسويته
خيزران:-لاا كلك افعال
نذير:-نامي هسه ارتاحي السهر مو زين عليچ
خيزران:-تصبح على خير
نذير:-وانتِ من أهل الخير
وأجه يوم اللي جابت بيه خيزران اهلها وزوجها خبصوا المستشفى خبص من الفرحه نذير شال الطفله ويباوع لخيزران ابتسم وگاللها
-هــاي البنيه كِلِّـشْ تشبهچ شِــنو نسميها
خيزران:-أني مقرره أسميها مسك
نذير:-الله شگد حــِلوو هذا الأسم ونادر
طلعوا من المستشفى ورياض راد بنته يمه بَــس نذير رفض گال لابوها أنـي اداريها وامي وخواتي يمها ميقصرن ان شاء الله خايف يفترگ مرته وبنته اللي تعلق بيها بشكل ملحوظ
عبرت الأربعين وورى كم اسبوع هَـم طلعت خيزران حامل وهنا هـيَ تخبلت متريد الطفل اللي بداخلها واصلًا بنتها مدتطيقها رادت تتخلص من هذا الحمل بكل وسيله ماگدرت الله كاتبلها تكمل ايامها
نذير تعلقه يوم عن يوم يزيد بمسك لدرجة حتى هــوَ يسهر وياها بالليل ويسويلها ممات وينومها
وچان متنرفز من تصرفات خيزران وعدم إهتمامها ببنتها واغلب اوقاتها سارحه عبالك بغير عالم
رجع من دوامه تعبان دخل سبح وبدل انفتح الباب ودخلت خيزران وهيَ معصبه انفجرت عليه
-أگلك أنـي مليت من هــاي العيشه تَـره انتَ تضحك عليه شــوَكت تگلي على كتالة اخووووي اريد اعرف اساميهم الضاهرررر انت مااااخذني على گد عقلي شوفني حامل مرة لخ واني ماصدگت اجيب واخلص من ذاك الحمل ترررره مووو وضعييييه هاااااي
مسك چانت تبچي وتصرخ وهيَ شايلتها وممهتمه الها ضاجت حيل من بچيها ومن برودة اعصاب نذير وعدم رده عليها وتجاهلها شمرت بنتها بالگاع والبنيه سكرت من البچي
فزع لبنته اخذها من الكاع يريد يسكتها بَــس ماكـو اجت الحجيه عاتكه فتحت الباب واقتحمت الغرفه اخذت البنيه من عدهم
-ولك يمه نذير بنتك شبيها
نذير:-امها الشفيييه شمرتها بالگاع حجيه شوفيها خاف طگلها عضم
عاتكه بيدها عوده ضربت بيها خيزران :- تمااديتي هوااااي ياخيزران وهالمره مراح نسكت الچ أنـي اكته البنااات بَــس لأن هــاي البنيه بنت الغالي لاا صارت ويه النفس اليصعد وينزل
خيزران:-اهوو بله لتدوخوني كلشي ميصيرلها
طفر عليها نذير يضرب بيها ويجر بشعرها إجت اخته وفاء وبعدته عنها
-عووفها نذيير دير بالك هـيَ حامل لاتنسى روحك عووفهااااا
نذير:-إله اندمج ياخيزران ولچ هيچ تشمرين البنيه كدامي بدووون خووف
-باوعتله بنضران تحدي عاف البيت بكبره وطلع ، اخذوا مسك للمستشفى شافها دكتور وطلع عدها خله بالكتف وسووه الها نذير بقه طول الليل بره البيت وعاتكه ضلت قلقه وحتى نوم مانامت وخيزران ولامهتمه مسك بقت يم عمتها وفاء
صــار الصبح ونذير مارجع للبيت ، فزت خيزران على صوت صرييخ طلعت من الغرفه والصريخ يقوه ويقوه شافتهن ملتمات خوات نذير وامه وجدته خلت ايديها على حلگها وهي تشوف اللي متمدد بالگاع وعباره عن دم مغطي على ملامحه .
.
.
يتبع