#طوبى "جنة طوبى"
#جمان_فريد
#الجزء_الخامس_والتسعين"مراد قلبي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الأذكار
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أتُراهُ يدري بأنَّ القلبَ مَسكنهُ
ولستُ أُبصر بالعينين إلاهُ؟ 🍃
________________________________________
27مايو...سنة 2019..
اليوم الثاني والعشرين من شهر رمضان..
وبسرعه دار مختار اجراءات السفر للسعوديه لأخته ومرت عمه..واللي حيرافقهم من محارمهم يوسف مختار مش حيمشي..وتحدد موعد سفرهم يوم 30مايو...
🍃في هاليوم..
خلال الايام اللي فاتت كانت سدرة بحال أحسن ومختار سلم الشغل كله لرضا بش يقعد معاها لين تسافر..
..في نفس الوقت طلع صابرين وامينه من الفيلا متاعه وسكنهم في عمارة موجوده في نفس المنطقه اللي هو فيها وهالشي ريح صابرين هلبه وخلاها تبعد عن كل شي يضايقها ويوجعها...
..لكن هالبعد زاد في عذاب رضا أكثر من قبل..
ولى معاش عنده قابليه لاي شي غير الخدمه اللي يهرب بيها من واقعه..
واقعه المر اللي ياسمين اهم جزء فيه..اهملها وهي حست بتهربه منها...لكن كانت تبررله وتعذر فيه...
عكس أيهم اللي بدي يشك في تصرفات رضا وبدي يحس ان في شي غلط وصارح صابرين بشكوكه...
🍃قدام نهر الدانوب في العاصمه فيينا...
كانوا مقعمزين يتفرجوا عليه في لحظه هدوء نهاها ايهم لما سألها..
/كان في شي بينك وبين رضا؟!
صدمها السؤال بقوة لكن حاولت تبين العكس لما ردت بإبتسامة استغراب..
/شي بيني وبينه زي شني يعني!؟
ايهم؛يعني..انكم كنتوا تحبوا بعض مثلا!؟
ضحكت صابرين بتعجب مصطنع وهي تقول..
/اني ورضا!! نحبوا بعض!!..
ضحكت تاني وهي تقول..ضحكتني وماخاطري في الضحك..
ايهم بإبتسامه:هكي حسيت وهكي بانلي من اول مرة فتحت فيها موضوعك مع مختار رد بطريقه وكأنه يقولي..ماتحلمش بيها..
تفكرت صابرين اللي قاله مختار ع لسان رضا عن نفس الموقف..قلبها انغم...
رجعت ضحكت مرة تانيه وقالت..
/فاهم غلط..شوف اني ورضا مانتحابوش تمام وف بينا غيره..
هو بإستغراب:غيره!؟
صابرين:ايه كل فينا يبي الاقرب لمختار..
هو بعدم اقتناع:كيف مافهمتش انتي قريبته طبيعي تكوني الاقرب ..
حطت شعرها ورا وذنها وقالت..
/مش شرط يعني..هو يعني رضا مرافقه من سنين وعاش معاه اكثر مااني ماعشت معاه مرات هكي نحسهم زي الولد وبوه..
رفع حاجبه وقال:غريب!..
عقدت حواجبها وقالت..
/وكأنك مشكك في كلامي!
ايهم؛مش شك استغراب بس..
هزت راسها وناضت..
هو شافها كيف ناضت..ناض بعدها وقال..
/خيرك!؟
مررت نظرها ع النهر وهي تقول..
/شوف العلاقه بين اتنين اتفقوا ع الزواج لو خش فيها الشك تنتهي من البدايه احسن..وشافلته بإبتسامة اسف..
ايهم بضحكه صدمه..
/لاعاد شن تقولي انتي! مافيش شك ولاشي..اني بس في حاجات شفتها وماكنتش فاهمها وطلبت منك توضحيلي..
صابرين:ووضحت لكن مازال مش مقتنع..
ايهم؛اني مستغرب بس..
صابرين بإبتسامه:ومع هدا زيد فكر في الموضوع قاعدين ع البر..
ايهم؛صابرين خيرك مش هكي راهو!؟
صابرين؛اني مريت بتجربه طلاق مانبيش نعاودها مرة تانيه ماعنديش جهد..فلو زي فكر كويس وخود قرارك بعدين.
ايهم:صابرين..
قاطعاته وقالت..
/لوسمحت نبي نروح..
تمعن فيها بالنظر للحظات بعدين قال..
/تمام مانبيش نضغط عليك..
مشت من قدامه بدون ماتقول كلمه وكامت في قمة التوتر واللي كان مستاء من نفسه لحقها...
🍃🍃🍃🍃
وفي فيلا مختار..
كانوا مقعمزين في حديقة..
وسدرة وصفيه يهدرزوا ومختاربعيد عنهم شويه يقرا في كتاب..
☘سدرة بضيق:اني بس..نبي نعرف من دار فيا هكي وعلاش؟
صفيه بحزن؛الحسد ياما يدير يابنتي..
سدرة؛على شن بيحسدوني بس!؟ شن عندي زايد ع الناس..
صفيه:الناس يابنتي يحسدوك ع دم وجهك..
سدره:مانتفكرش في روحي كنت عايشه خير من حد الناس كلها كان حالها خير من حالي..
صفيه قعدت ساكته مالقتش رد مناسب ع كلامها..
تنهدت سدرة بقلق وقالت..
/اني خايفه لو اللي دارها يكون ناوي حد تاني وجت فيا اني!؟ انتي قلتي اني تعبت بعد عرس غرفه..زعما حد من عيلة راجلها !؟
صفيه بتوتر؛مش هدا المهم توا..
سدره؛لا مهم ياامي..وكان اللي فكرت فيه صح معناها حيقعدوا وراها لين يضروها..
صفيه؛اختك قريت تسكر تلاته سنين متزوجه عايشه متهنيه ومرتاحه مع راجلها وجابت منه الصغار وحامل تاني..معناها مش ليها هي..اللي داره قاصدك انتي بعينك..
سدرة بشي من الراحه:ان شاء الله يطلع هكي..
صفيه ابتسمت بحب وهي تشوفلها..
مش حتتغير لو مهما يصير فيها حتقعد تبدي في مصلحة الناس اللي تحبهم ع مصلحتها..
☘ومختار اللي كان واصله حديثهم..نزل الكتاب وشافلها وهو يقول في نفسه..
"وعلاش اني ما فكرتيش فيا وخفتي عليا هكي!؟ كل مالي نزيد نتأكد ان همك كله تكوني انتي المتريسه وانتي الكل في الكل..وزي مااني نعرفك كويس كلهم حيعرفوك وقت اللي تروحي وتلقي غيرك واخد مكانك في كل شي"
غير نظره للباب لما شافه انفتح وقال بإستغراب..
/مني!؟
سدره وصفيه شافولها لما تكلم بعدين غيروا نظرهم للباب..
بانوا عليهم راجل ومراة خاشين والحارس بعد ماخشوا سكر الباب..
مختار عرفهم لما شافهم وقال بضحكه..
/اوووو...
🍃"عزيز"
شافلها كيف شدت يده بقوة وهي تقول بفرح وعدم استيعاب.
/شوف خالتي..خالتي سدره..
هو ابتسم وقال..
/بريلها شن تراجي..
ضحكت ودموعها ينزلوا..وقدمتلها بسرعه..
🍃سدرة بدهشه:آلاء..هادي آلاء!
صفيه بضحكه ودموعها في عيونها..
/ايه آلاء واللي معاها راجلها..
مختار ناض من كرسي بيمشيلهم..بس وقف لما شاف آلاء جايه بسرعه لسدره..
🍃وصلت في الطاوله اللي مقعمزة وراها سدره وقالت..
/خالتي..
سدرة ودموعها ينزلوا..
/حي عليك سمنتي!؟
ضحكت آلاء من قلبها وقدمتلها بسرعه وضمتها وانهارت بالبكي..
وسدرة طبطت ع كتفها وهي تقول بدموع تنزل زي السيل..
/طرشتي وذني..
ضحكوا كلهم حتى مختار...
☘وهكي كان لقاء آلاء بخالتها كله شوق ودموع ووجع قلب
بعد السلام الحار دخلهم مختار للفيلا...
هو وعزيز قعمزوا في جهة بعيده عن النساوين بش ياخدوا راحتهم..
آلاء وهي شاده ايدين خالتها وتتأمل فيها بحب والدموع مابطلوش نزول كانت تقول..
/والله مامصدقه تقول نحلم..
سدرة:حسستيني كنت راقده السنين..
آلاء بألم:مروا علينا سنين ياخالتي ياما رينا فيهم..كل يوم كنا نراجوا في خبر يفرح عليك..وبعد وفاة جدي الله يرحمه زاد خوفنا..نديروا في رواحنا عايشين لكن من داخل كنا نموتوا بالعرق..رشفت ومسحت دموعها بيمنيها وهي تقول..لعند اليوم اللي فقتي فيه ..في اسبوع عرس صفاء بنت خالتي فايزة..كلنا كنا خاشين العرس بلانيه ع خاطر فايزة بس اللي عطت بنتها وهي متحسره عليك وتقول كيف بندير عرس بنتي الكبيره وسدره مش معاي فيه..ولاطوبى..طوبى كانت عايشه في الحزن من بعد ما فقدتكم انتي وجدي في حياتها..
..سدرة تسمع فيها وهي تبكي بصمت وقلبها موجوع ع الآخر..وصفيه حداها تشوفلها بقلق ودموعها تنزل..
كملت آلاء وهي تقول..
/اليوم اللي فقتي فيه كان زي العيد..كلنا حولنا الحزن كلنا غنينا وزغرطنا وطوبى رقصت رقيص..
سدره ابتسمت من وسط دموعها..
الاء ضحكت وقالت..
/وتوا كلهم يراجوا فيك تروحي بش تولي لمكانك اللي خلتيه..تهزبي تتسهوكي تهدرزي تتأمري وتغني بصوتك المبحوح هدا قداش استاحشناه..
سدرة شافت لصفيه وقالت بنبره باكيه..
/المراة المتغيره هلبه متأكدين اني قعدت في غيبوبه 9شهور بس!
ضحكوا آلاء وصفيه..
ردت سدره نظرها لآلاء وقالت بإبتسامه..
/هانت كلها كم شهر ونروح..
آلاء:الحمد لله..حالك متحسن هلبه..
سدرة:الحمد لله..طلقت ايدين آلاء ومسحت دموعها كويس بعدين قالت..ترا نادي راجلك..
طلعت آلاء تليفونها من الشنطه وهي مبتسمه واتصلت براجلها اللي رد عليها طول..
/عزيز خالتي تبي تشوفك..
"تمام حبيبي"..
نهت آلاء المكالمه وقالت..
/مافيش منه ياخالتي راجل محترم وراقي ع الآخر..
سدرة هزت راسها وقالت..
/الله يبارك..
شويه وسمعوا صوت عزيز وهو ينادي في مرته..
مختار:خش ياراجل خش هما اللي نادوك راهو..
ضحك عزيز وخش عليهم وهو يقول..
/السلام عليكم..
ردوا عليه السلام..
مشي قعمز جنب مرته...ومختار قعمز ع كرسي بروحه وحط رجل ع رجل.
سدرة؛شن دايرة معاك بنتنا ياعزيز..
مختار رفع حاجبه..
عزيز بإبتسامه..
/كل خير..عرفتوا تربوا..
سدرة؛بارك الله فيك..شوف ياولدي آلاء كان عندها وبي لو طلبت نجوم السمي يجيبهولها يعني واخده ع العز والدلال..العز قصدي المعامله وهادي عز العز اللي مايفناش..مش طالبه منك تكون زي بوها كون ربعه وبارك الله فيك..
آلاء:مدللني وحاطني في عيونه وانتي تعرفيني مانجاملش بكل..الحاجه اللي في خاطري تجيني قبل لنطلبها ويدير في كل شي بش يخليني مرتاحه ومانحسش بالوحشه واني في الغربه..
ابتسم عزيز بحب وهو يشوفلها كيف تحكي عنه بكل حماس ومن قلبها..
سدرة؛الحمد لله..الراجل اللي هكي يابنتي حطيه تاج ع راسك..
عزيز:بارك الله فيك..
آلاء؛وهادي مكانته عندي..
سدرة:ربي يهنيكم ويسخركم لبعض دوم..
أمنوا ورا دعائها لكن مختار قال..
/لو ماكانش يستحق آلاء ماخليتاش ياخدها..آلاء عندي بنتي مستحيل نفرط فيها ونعطيها لحد مايستاهلهاش..
شافوله آلاء وصفيه بنظرات ضيق..
اما سدره شافتله بإبتسامه..
عزيز؛إن شاء الله ديما نكون عند حسن ظنكم..
مختار بإبتسامة واسعه..
/إن شاء الله...
🍃🍃🍃🍃🍃
ومن فيينا افضل مكان للعيش في العالم..لطرابلس احد اكثر الدول الأسوأ للعيش في العالم...
مدينة الحرب والدمار والتشريد والموت..
في أواخر ايام شهر رمضان كانوا ناسها بين اللي لاحس برمضان ولاحيحس بعيد..
وبين اللي عايش في شي من الهدوء ومر عليه رمضان عادي زي ماحيمر العيد..
☘في حوش طوبى..
كانوا فردوس ومطيره وهاديه يتعاونوا ع تجهيز حلويات العيد لزباين المحل..
وكله من الحلو الزمني..المقروض..والغريبه والمعمول...
ومن جهة تانيه..
كانوا اريج وطوبى شادين المآزر صلاة وذكر وقراية قرآن..
🌼جنه وين تسمع امها تقرا القرآن تستكين وتحط راسها ع المخده وتتفرج عليها..كان صوت امها وهي تقرأ في القرآن مألوف ليها من زمان لأنها كانت تسمع فيها وفي تقرا فيه لما كانت حامل بيها..تأثيره عليها كان واضح..🌼
وتأثير كلام الله سبحانه وتعالى ع قلب عبده صغير كان ولا كبير ديما يكون قوي وحلو بالمرة..
☘هي الكلمة الطيبه ديما يكون ليها تأثير حلو في نفس الإنسان وقلبه..زي ماالكلام الجارح تأثيره يكون بشع في النفس والقلب مش بس يجرحهم ويكسرهم واللي انسكر عمره مايتصلح...
🍃المحجوب:شوف ياحاج اني ماكنتش نبي ندخل في الموضوع هدا..بس حسيت اني لازم نقول اللي عندي فيه..
الحاج علي ضم ايديه لبعض وهو شابك اصابعهم وحطهم تحت ذقنه وهو يقول للمحجوب..
/نسمع فيك..
المحجوب:اني هني مانبررش لعبد الرؤوف لكن نبيك تعرف انه نادم ومتحشم منك هلبه كلامه قاله في لحظة غضب كان مضغوط نفسيا من الحرب والمشاكل..
قاطعه علي وهو ينزل في ايديه ويقول..
/وانفجر وقال كلام ماكانش قاصده وغيره وغيره..هالكلام هدا سمعته من فردوس ومن طوبى قبلك ولاقدر يغير موقفي ناحيته..اني ياولدي كنت حاط عبد الرؤوف في مكانه كبيره..تصدق اني بيني وبين نفسي كنت مستخسره في غرفه ايه والله ع طباعها الزفته..نسمع فيه كيف يلذع فيها بالكلام وقدامي لكن مانزعلش منه نقول هي تبي هكي تبي من يشد عليها وفي نفس الوقت نشوف كيف مدللها ومريحها يعني موازن في معاملته ليها والحاجه هادي كانت عاجبتني هلبه..
شفته كيف كان يقدر في بوها..بوها اللي ع خاطره مشي كسر نفسه..وشفته كيف وقف معانا في كل شي صارلنا..اني قلت ربي عطي لطفي.ع قيس نيته..عطاه ولد مش نسيب يخدم في اهله مش اهل مرته..بعد موت لطفي الله يرحمه..امنته ع سرنا وعطيته من القدر فوق من اللي عطيته لولادي...عبد الرؤوف شاف دمعة العجز في عيني لما صار اللي صار لطوبى..هالدمعه خليته يشوفها لأني حاسبه ولدي يخي ولادي مابكيتش قدامهم...
خنقاته العبره وسكت شويه وقعد يتمالك في نفسه..
والمحجوب غير نظره عنه للأسفل وهو مضايق ع الآخر..
بلع علي ريقه وحمحم وكمل يقول..
/يعلم الله قداش كنت فرحان بيه متهني بيه مرتاح ع بناتنا في وجوده اكثر من ولدي وحفيدي..وخليته يدير اللي داره بش يحميهم رغم اني ماكنتش راضي من خوفي عليه..هو اللي ضرب ع صدره وقال بندير وبندير..عارضت اصر..خوفني عليه هلبه وفي نفس الوقت فرحني بيه هلبه..
ابتسم بحسرة بعدين كمل يقول...
/اخر هدا كله طلع مركبنا جميل يمنن علينا بيه..يقول لبنتنا اللي درته ليكم مادراه ولدكم ليكم..ويقوللها اني حميت سمعتكم واني اللي فعلت واني اللي درت ودرت ع خاطر سبب تافه مايسواش..تعرف علاش هو طلع الدوة هادي..كان يبي يكسر بنتنا بينا ويوجعها ويحسسها انه صاحب فضل عليها وعلينا وهي مجبورة تتحمل حتى الاهانه ع خاطره لأنه مفضل عليها..يعني يبي مقابل لكل شي داره..
اني لما عرفت هدا كله..ندمت ندم ع المكانه اللي عطيتهاله ندم عمره ماندمته في حياتي..اني لو جاني لطفي الله يرحمه فيوم من الايام ومن عليا باللي داره معاي نقاطعه لين نموت..يابال النسيب..لكن لخاطر بنتنا قاعد مخلي بينها وبينه قدر وقاعد نرد عليه في السلام والكلام ويحمد ربي اللي ماواجهتهاش باللي قاله...بناتنا حني عندهم قدر كبير..ماناش زي الناس اللي ينهانوا بناتهم يذلوهم ويقولولهم تحملوا غصب عنكم..لالا كل شي ممكن نقبلوه وناخدوا فيه ونعطوه الا كرامة بناتنا وعزة نفسهم..تجرأ ولد شنيبه وكمل عليه ولد بن موسى..الزوز خلوني نتعلم ان النسيب لازم يقعد نسيب فوق هكي لا...ابتسم بأسف وكمل يقول.
الله يرحم الشامس ركب روحه عيب اي راجل غيره مايتحملاش..وفوق من اللي داراته معاه مطيره بعد عرفت انه واخد عليها عمره لامن ولاعاير بالعكس جي وترجى وياما حاول فيها..لكن ولد بن موسى ماكلفش روحه يجي يتعذر من مرته وخلاها توليله بروحها وبعد اللي عرفه ان الدوة وصلتني دار روحه لاجي وضح ولاتأسف..لاتقولي متحشم ولاغيره..هو مش روحه غالط اصلا..ومانادم على شي الا حاجة وحده نظرتنا ليه بس...
وسكت وهو يشوف للمحجوب وهو يراجي في تعليقه بعد ماطلع كل اللي في قلبه..
تنهد المحجوب وقال..
/كلامك ماعندي مانقول فيه..وعندك حق مافيش لاعذر ولامبررات ينفعوا ينقالوا بعده..غير حاجه وحده بس..ان رؤوف يعزكم ويقدركم واللي داره معانا محبة فينا..
علي:بارك الله فيه ويرحم والديه ومش حننسهوله لأنه بصمه زين في عقولنا...
🍃🍃🍃
هي الموجعه لما تجي من شخص كان ليه قدر كبير عندنا يخليه اخر شخص نتوقعوا يجي منه مايوجعنا..حترده غريب زي ماكان حتى لو بالظاهر تعاملنا معاه بالعكس...
🍃علي الواعر قال...النسيب لازم يقعد نسيب فوق هكي لا..
وعبد القيوم صديق وجار وقريب بالعسره والمواقف وشهد ع كل شي صار مع عيلة الواعر خلال هالسنه ونص..هل بعد هدا كله ينفع يكون نسيب في نظر علي الواعر!!..
☘وهو يدير في الشاهي الاخضر التارقي بهدوء وذهن صافي لايمكن يخطر ع باله ان في عقبه كبيره فوق عقبات تانيه انحطت في طريقه لحبيبة العمر...
طلع بسفرة الشاهي ومشي لدار المعيشه اللي كانوا فيها عبد الرؤوف وربيع يهدرزوا..
عبد القيوم وهو يعطي لرؤوف الشاهي..
/ديما يقولوا فيها اي حرب تصير في العالم المحرض الاساسي عليها امريكا والمستفيد شركات الاسلحه الامريكيه..
ومشي بيعطي لربيع الشاهي..
عبد الرؤوف رشف من الشاهي وقال..
/تمام ماقلنا شي هما المستفيدين لكن هما ياصاحبي زي الشيطان امتى يلقى نفسك تبي دير حاجه غلط يساعده عليك لين طيح فيه..
ربيع :قوي التشبيه..معاك فيها..
قعمز عبد القيوم وحط السفره وهو يقول..
/انت مش من انصار نظرية المؤامره..
عبد الرؤوف:لأني مش مقتنع بيها مش كل شي صار من قبل لتوا مؤامرة..في اسباب ودوافع لكل شي..
ربيع؛مزبوط..لأن البل وصل لذقنهم ع قولة السوريين..
عبد القيوم:ويقولوا طباخ السم يذوقه..
عبد الرؤوف بضحكه..
/علي ماعلي مانك بلاش ياعبدو.
ضحك ربيع..
عبد القيوم شرب من الشاهي وتجاهل تلميحه.
عبد الرؤوف؛قاعدين يعزموا فيك!؟
عبد القيوم:ريحلي روحك احسنلك..
ربيع قعد يضحك..
عبد الرؤوف:تي خيرك ياراجل شن قلنا سؤال عادي! وبعدين علاش دس فيها كان ناوي الحلال وين المشكله!
عبد القيوم بشي من الانفعال..
/انت شكلك تدوي من جدك!؟ مالا بالله العزيز الدايم مافي حاجه من اللي فبالك بكل..صفوا نواياكم يارا..
ويجي اتصال لعبد الرؤوف..خدي التليفون من جنبه وقال بضحكه..
/نبصروا يارا..
شاف للشاشه عقد حواجبه وقال..ايااه تو شن بنقوله هدا!؟
عبد القيوم وربيع يشربوا في الشاهي ويشوفوله..
هو فتح الخط ورد..
/ايوه السلام عليكم.......والله الحمد لله شن حالك انت شن امورك شن دايرين العويله..........دوم ان شاء الله دوم......والله الكل بخير والامور تمام.......حك جبهته وقال..شن بنقولك مافتحتش الموضوع....صعبه شويه الوضع قاعد معقد..مازال كيف ماقتلك مازال الوقت....ماعندكش مشكله حبيبي....تسلم بارك الله فيك....وعليكم السلام..نزل تليفونه ونهي المكالمه..
عبد القيوم؛ان شاء الله خير!..
تنهد وحط التليفون جنبه وقال...
/ربيع مش براني..ياسيدي تتفكره عدي اللي جي حضر عزومة نسيبتي قبل رمضان..
عبد القيوم؛ايه..كنه؟
عبد الرؤوف؛يبي يخطب..
ربيع نزل الطاسه قبل لتوصل في فمه وهو يشوف لعبد الرؤوف..
عبد القيوك عقد حواجبه وقال..
/يخطب منكم ؟
عبد الرؤوف:لا مش من عيلتي..يبي يخطب نسيبتي الصغيره..
غير ربيع نظره لصاحبه..
صاحبه اللي حس وكأن في حد دخل يده لصدره وجبدله قلبه..
حط طاسة الشاهي في السفرة وقال..
/يبيك تفتح الموضوع مع هلها؟!
عبد الرؤوف:يبي يمهد تمهيد قبل..
تبدلت ملامح وجه عبد القيوم للغضب والغيره وقال..
/انهيه من عندك..
عقد عبد الرؤوف حواجبه بإستغراب..
عبد القيوم:لاتماطل ولاتعطيه امل انهيه ياعبد الرؤوف وماتوصله لحد..
ربيع قعد يشوف لصاحبه بضيق كان يبان فوق غيرته خايف..
عبد الرؤوف بتساؤل وهو متعجب...
/شن في ياعبد القيوم؟
🍃إجابة هالسؤال ياعبد الرؤوف عمرها لليوم 12سنة..نص عمره بيحكيه في دقايق!!شن بيحكي وشن بيخلي!؟..هو توا معاش عنده وقت يضيعه..فقدها مرة ومستحيل يفقدها مرة تانيه..لازم يحكي كل شي من البدايه لعند اليوم..
🍃🍃🍃🍃🍃
طلعت اميمه من المصحه بعد ماقضت يوم كامل من العمل..
☘قاعده تجد وتجتهد وماضيعش في وقت..
خطت خطوات كبيره ومهمه ناحية حلمها وكل مالها تزيد اصرار ورغبه ع تحقيقه رغم كل المحبطات اللي حواليها☘
ركبت سيارتها وشغلتها وتحركت طول متوجهه لشارع القهوة..
بعد ماقطعت مسافه كملتها وهي تردد
"اللهم انك عفو تحب العفو فاعف عنا"..
وصلت لفتحة الشارع..ودرس قدامها في نفس الوقت سيارة تانيه..
ركزت ع اللي فيها لقاته عمر..ابتسملها ووخر شويه..
هي يدوب ابتسمت وتحركت بسيارتها وخشت للشارع..
كل ماتتكرر الصدف بينها وبين عمر..تشوفه شخص عادي..زيه زي باقي ولاد شارعهم ولاكأنه كان يعنيلها شي يوم من الايام..
تعافت منه تماما..مش بس من حبه..حتى من جروحه وذكرياته المؤلمه..
اما هو فكان ديما وين يشوفها يتحسر عليها لكن في نفس الوقت تقبل خسارته ليها ورضي بالنصيب..
🍃وصل في باب القراج اللي انفتح تلقائيا وخش بالسيارة..
نزل منها..ونزل شنطته..بعدين سكرها وقال..
/استعنا بالله ع الشقا..
..طلع من القراج وتوجه لباب الحوش..مرر نظره ع الجنان لاحظ فيه تغيير ضحك وقال..هو تغيير عتبه..
وصل في الباب..طلع من المفتاح من جيب سرواله وفتحه..
وقبل ليخش دقه وقال..
/يااهل الحوش...ياهوو..ياااهوو..
بانت عليه سدرة جايه تجري وهي تضحك وتقول..
/عمو..
رمي كندرته وخشلها وهو يقول بضحكه..
/سوسو..وطبس عليها وضمها..
ع جية حناها مغليه وهي تقول..
/وليدي..
تباعد عن سدرة وضم امه وباس راسها..
مغليه:شن المفاجأه هادي!؟
عمر:حلوة ولاشينه ياحلوة
مغليه بضحكه؛حلوة حلوة
لكن حني مانبوكش تروح خوف عليك من الوضع..
عمر؛اهو روحت ووصلت فيكم صاغ سليم..
مغليه؛الحمد لله الحمد لله..
🍃وفي دار المعيشه كانت سميره مقعمزة حدا جوري ومعاذ اللي كانوا راقدين..
تسمع في اصوات عمر ومغليه وهي تبكي بصمت..
تخيلت لو كانت في حوشهم قبل وخوها روحلها بش يعيد معاها..من لما بدي يقرب العيد وجرح فراقه رجع يسطر فيها...
خشت عليها سدره هي طول مسحت دموعها..
سدرة بحزن:تبكي..
سميره ابتسمت وقالت..
/عمك عمر هدا ؟
سدرة مسحت اثار دموع سميره وقالت...
/ايه..
خدت سميره يدها وباستها بعدين قالت..
/حمد لله ع سلامته..
سدره:الله يسلمك..تنوضي تسلمي عليه؟
سميره:لاخليه يقعد مع امه توا بعدين نشوفه ونسلم عليه..
سدرة هزت راسها وقربت منها وخشت لحضنها..
وهي ابتسمت بحزن وضمتها...
🍃🍃🍃🍃🍃
"مش عارف كيف نوصفلك..مصدوم..متفاجئ..كأني نسمع في قصة خياليه.."
ربيع:اول مرة سمعتها هكي حسيت..
عبد الرؤوف بإبتسامه..
/نكون معاك صريح اني شكيت وبعدين كذبت روحي..واني نفكر فيها نحس فيها مش راكبه يعني انت مستحيل تحط عينك ع مراة متزوجه!..توا تأكدت من شكي وفهمت كل شي..
عبد القيوم وهو عاقد حواجبه وفي عيونه باينه لمعة الحب..
/مستحيل مازلت نضيعها ولا نخليها لغيري..انا واصل لمرحله مستعد نخرب فيها اي موضوع يجيها..
عبد الرؤوف بضحكه..
/روق ياغالي والله ماياخدها غيرك واني حي..ع العموم هي في الوقت الحالي ماتفكرش في الموضوع هدا بكل..
عبد القيوم بشي من الاحراج..
/لمحتولها؟!
عبد الرؤوف؛لا اني جسيت النبض من عيالي وفهمت ان الموضوع هدا مش في بالها نهائي لسبب واحد مافيش اقوى منه..بنتها والجالي..
ربيع شاف لعبد الرؤوف وهو يهز في راسه..
عبد القيوم:شوف الاسباب هذين مقدور عليهن..انا اللي كان رابط ايديا انها كانت ع ذمته..وتوا خلاص معاش في شي يجي بيني وبينها شن ماكان يكون..
عبد الرؤوف بإبتسامه..
/ياريت..مايستاهلها غيرك..
ابتسم ربيع وهو يشوف لصاحبه..
مسح ع عبدالقيوم ع ذقنه وقال..
/تسلم..المهم الكلام هذى يقعد هنا مايطلعش منك لأي حد فاهم علي!؟
عبد الرؤوف؛فاهم عليك وواثق فيك وعارفك راجل وتخاف ربي..
عبد القيوم:بارك الله فيك..
🍃وطول الحديث اللي دار بينهم وقلب عبد القيوم من قوة الدق حاسه بيطلع من مكانه..لوكان عدي قدامه وقتها كان شبعه ضرب...كسره تكسير...
🍃🍃🍃🍃🍃
قدام اللاب مقعمزين الزوز يراجو في اتصال سكايب..
وجي الاتصال وواحد فيهم فتح..
طلعت ع الشاشه بنوته حليوه ولابسه وشاح لما شافتهم قالت..
/هاي قايز..
يزن بضحكه:عشتي برا عام صدقتي روحك.
هي بدهشه..
"Oh nooo!..يزن امتى كبرت هكي ودرت شنابات"
يزن شاف لمحمد وقال..
/قاعده مهبوله هادي..
محمد؛يخي زادت لكن دقيقه..كيف صار وتحجبتي!
"اقتنعت"
يزن؛مش بالقناعه يااختي هدا فرض غصب عنك تلبسيه..
"علاش رديت عليا والنكدي هدا حداك"
يزن بضحكه؛متخلفه..
محمد ضحك وقال..
/شن جوكم شن حال بوي وحناي..
"خير من حالك اللي قعدت غادي في الهم والحرب"
محمد؛والله حالي خير من حالكم قاعد بين ناسي ناس تفهم عليا ونفهم عليها..
"وععع عليك مولي زي الليبين"
يزن:سكر عليها سكر..
ضحكت..
شويه شافوا وحده جت قعمزت جنبها قالت..
"هاي حموده...حي يزن شن جو.."
يزن :اوو سدره شن جو..
"تمام وين سدرة اختك ؟"
يزن؛في حوش جدي..
"خسارة!!"
ع خشة محمد المهدي مروح من القهوة..
طلق السلام..وجي وقف وراهم..
لما شافاته فرح شهقت وقالت..
"OMGانت محمد ولد خالي المهدي!!"
محمد المهدي:لا فوزي المزدواي..
ضحكوا الاولاد..
محمد؛تعبي روحك واتصلي بأمك انشدي عليها..
رمشت عيونها بملل..
محمد؛كان نوصل فيك نمدك بكف..سامحنا ولد عمتي..
محمد حامد قال بضحكه..
/نراجيلها فيها..
"خزوو بيوع..ايه حقه هديكا راما خيرها موليه رافعه خشمها ودره في الكبد..
التلاته بان عليهم الضيق لما جت سيرتها..
"هيي..الوو..تسمعوا فيا!!؟"
محمد خوها؛سكيب سكيب..
"اها..okتمام..تمام.."
محمد المهدي بإبتسامه؛سدره خيرك ساكته..
"نسمع فيكم"
"خليها ساكته حمود خيرلك كان فتحت معاش تسكت"
ضربتها اختها عيطت..
وهما يضحكوا عليهم..
🍃🍃🍃🍃🍃
(اني مش يعجبني الجو هدا ياتكون ليا بروحي ياانساني)
هادي راما مقعمزة في جنان حوش جدها تكلم في صاحبها ع ماسنجر..
ع خشة عمها اشرف للحوش لما شافاته ارتبكت وطلعت من المحادثه وخشت طول ع الفيس..
هو لما شاف لاحظ انها مش ع بعضها بس بينلها انه مالاحظ شي..
كمل طريقه وفات من جنبها وهو يقول...
/خشي داخل.
هي قالت؛حاضر..
وطول ناضت ومشت بسرعه لدروج شقتهم..
🍃هو خش للحوش ومشي طول لجناحه...
بعد ماخش من الجناح اتصل بصفاء تجيه وبعد حوالي تلاته دقايق صفاء كانت عنده..
🍃صفاء:تبي تاكل؟
اشرف:مش توا..تعالي..
قعمز ع السرير وهي قعمزت جنبه..
صفاء بقلق:إن شاء الله خير!
اشرف:بنسألك سؤال ونبيك تجاوبيني عليه بصراحه..
صفاء بتوتر:حاضر..
اشرف:يوم المشكله قلتي كلام مر عليا مرور سريع لكن توا تفكرته ونبيك تعاوديه..لما قلتي ع راما تهدرز ع الولاد ومش عارف شني قلتيها من الغيظ ولاسمعتيها بوذنك!؟
سكتت صفاء وهي مضايقه ومتوتره
اشرف:صفاء..ردي بالك تطلعي كذابه..
..عارفها ماتفتريش ع بنت خوه لكن كان يبي يخوفها بش تقول اللي تعرفه..
تنهدت وقالت:مرة طالعه نلوح في الكناسه ريتها واقفه ورا الشجره تتكلم بالتليفون..
عقد حواجبه بغضب وقال..
/شن سمعتيها تقول..
صفاء؛مش عارفه تدوي بالتوشويش..
اشرف بحده:صفاء..
تنهدت بخوف وقالت..
/مش عارفه قالت..حمودي حاجه زي هكي..
سكت اشرف وهو يفكر بعدين قال..
/اكيد محمد ولد المهدي..
صفاء بقلق:مانعرفش هدا اللي سمعته..
هز راسه وهو ساكت بعدين ناض ومشي للحمام..
تأففت صفاء بخوف وقالت..
/ياربي سترك..
🍃🍃🍃🍃🍃
"انتي وحده مرخيه وسامحيني فيها ياإبتسام"
هادي خديجه تكلم في سلفتها ابتسام هاتفيا..
"شن بندير كان حظي اسود لما بدي يلين معاي جت هالحرب المتعسه"
خديجه:حتى توا تقدري ديري..ماليك مش ملزومين بيك وبصغارك وراجلك موجود..زي ماجاب سميره وولادها هني يجيبك حتى انتي وصغارك..
"مانبيش نقابل وجه نجمه"
خديجه:لا حبيبتي قابليها وخليها غصب عنها ترضى بيك..تصرفي قبل لطلعك سميره من حياة عبد الفتاح وايديك ع راسك..
سكتت وهي تفكر في كلامها بعدين قال..
"عندك حق"
ابتسمت بمكر وقالت..
/ديما عندي حق حبيبتي..
🍃🍃🍃🍃🍃
"الله يعاون"
ردوا ع فايزة وهما يشتغلوا..
/آمين.تسلمي..
فايزة:وين طوبى وروجه؟
فردوس:في الدار معتكفات...
فايزة؛ربي يكتب اجرهم..نعاون؟.
مطيره:هني روحك عمرك هالعمر ماتعرفي تنقشي مقروضه..
ضحكوا..
فايزة بضحكه:صعب المقروض يبي فنيات..
هاديه؛فنياتها في المكياج وبس..
فايزة بإبتسامه..
/ايوه..يقولك دع الخبز لخبازه..واني هادي الخبزة اللي
نفهم فيها..
مطيره؛ساد ودوده وحركي روحك انتي..
هاديه بضحكه قعدت تحرك في جسمها وهي تقول..
/هاه..
ضحكوا فردوس وفايزة..
مطيره بنفاد صبر:اللهم اني عبدك ابن عبدك..
ضحكوا عليها..
بعدين سكتوا شويه لين قالت فايزة.
/بنت خليفه بيانها يوم 27 قالت تبيني نمكيجها ونديرلها شعرها واني ماعنديش نيه الحق لكن مروة قعدت تزن عليا اخدمي ياماما بش ماينسوكش ويمشوا لغيرك..
مطيره؛هالبنيه الليه يبارك عليها..خودي كلامها..
هاديه:بتعطيها..
كلهم شافوا لهاديه..
هاديه بضحكه..
/وين جت سيرتها جاني احساس قوي انها بتلحق اختها قريب..
فايزة؛نهاري مازال صغيره!
مطيره؛ردي بالك خل البنت تقرا قرايتها..
فردوس:كان جي نصيب باهي علاش ترده!؟
فايزة بضيق؛صغيره مروة..
فردوس:بتخش الثانوي معاش صغيره..
هاديه؛وكان ربي كاتبلها نصيب صغيره ولاكبيره بيجيها وتمشي معاه..
قعدت فايزة ساكته وهي تفكر في كلامهم..
..فردوس تكلمت هكي لأنها عارفه فايزه في شن تفكر وبشن تحس الزوز ظروفهم متشابهه ويفهموا على بعض..وهي بعد ماعطت صفاء وشافتها كيف عايشه مرتاحه ومتفاهمه هي وراجلها تشجعت لفكرة زواج مروة وان كانت اصغر سنا المهم يكون راجل كويس وولد عيلة محترمه..
قطع عليها تفكيرها صوت تيلفون فردوس وهو يرن بنغمة اتصال ماسنجر..كانت مكالمة فيديو...
مسحت ايديها بالكلينكس وخداته وهي تقول..
/آلاء..فتحت عليها..وتشوفها هي وسدرة مع بعض بدهشه قالت..حيي شوفوا..وجهتلهم الشاشه..
فايزة ضحكت بفرح..
ومطيره قالت بضحكه..
/الله يبارك الله يبارك..يابختك يافرخه آلاء..
"شن ديروا مقروض!؟"
فردوس:ايه ياسديره..
"من معاكم"
كلهم شافوا لهاديه اللي كانت مبتسمه..
لفت فردوس الشاشه ليها وقالت..
/هادي جارة جديده...
"وين سكنت!؟"
فايزة بصوت عالي..
/قصقصه..
"اسكتي ياشراده"..
ضحكت فايزة..
🍃"ياخواتي ياخواتي..ياخواتي بحبها دي حبيبة امها..هيا ماما قولي هالصيصان"
كلهم سكتوا وهما يسمعوا في طوبى كيف طالعه ببنتها من الدار للكوجينه وهي تغنيلها..
شويه تكلمت مطيره بربكه..
/امتى جتكم آلاء!؟
"غير دقيقه عمتي اللي كانت تغني توا طوبى ولا؟!"
🍃طوبى من الكوجينه سمعت صوت سدره طلعت بسرعه ببنتها وقبل لتخش الصاله رجعلها عقلها..
كلهم شافولها ماعدا فردوس اللي قاعده تكذب ع سدره..
/ايه طوبى،جارتنا هادي عندها بنيه واخده ع طوبى هلبه..
"وخيتي سلمها هالرتيله تموت في الصغويره"
قدمت طوبى لفايزة عطتها جنه..بعدين مشت قعمزت جنب فردوس..شافت سدره وآلاء جنبها باين في وجهها توتر..
طوبى:يابختك ياللوشه ياريتكم رفعتوني في الشنطه..
ضحكت آلاء..وسدرة قالت...
"تو نروحلكم اني حبيبتي.."
طوبى بإبتسامه..
/إن شاء الله في القريب العاجل..
🍃🍃🍃🍃
في الكوجينه مقعمزين يهدرزوا حداها وهي توتي في السحور..
يزن:عطاهم محمد ع رووسهم لاخر المكالمه وهو يهزب..
ضحكت سدره وقالت؛مرة تانيه نكلمهم معاكم..
سميره وهي تجهز في الصواني..
/قداش عمارهم!؟
يزن؛فرح في عمري واختها من عمر سدرة..
سميره:ربي يحفظهم..
سدرة بحزن؛مش عارفه علاش مايحبوش امهم عمتي نسرين طيبه هلبه حتى لو كان مش طيبه تقعد امهم كيف قادرين يعيشوا من غيرها وهي حيه!
يزن نزل عيونه للطاوله وقلبه موجوع..
التفتت عليهم سميره وقالت..
/كاستردا!!؟
سدرة نست حزنها في لحظه وقالت..
/اني..
يزن يدوب ابتسم وقال..
احسبينا اني ومحمد
سميره بإبتسامه؛حاضر..
ويدق باب الكوجينه..
خش عمر وقال بإبتسامه..
/السلام عليكم..
سميره ابتسمت وقالت.
/وعليكم السلام..
عمر:اول شي عظم الله اجرك..
سميره؛اجرنا واجرك على الله
عمر:تاني شي اني عمر اكيد سامعه عني..
سميره بإبتسامه؛مالا شنو..
عمر ابتسم وقال..
/باهي معليشي نخش ببرادتي ونقولك ديريلي قهوة؟
سميره؛خلينا ننفقوا اني هني امك التانيه ولا قول اختك الكبيره..تبي حاجه اطلبها مني زي ماتطلبها من امك وخواتك..المهدي ونضال وين يبوا حاجه يجوني طول يطلبوا بلامقدمات..
عمر بضحكه؛هو اني عارف غير زعميتني بنديرلك جو الحشم وكان هكي نبي صفره فيها كل شي درتوه اليوم..
سميره بضحكه؛اهو ندير فيها والقهوة بعدين..
عمر بإبتسامه؛مليح بكل..ايه خيره نضال ماروحش لتوا؟
يزن؛عني نضال معتكف في الجامع..
عمر بإبتسامه:الله يبارك..ملاحظ عليه التغيير من اللي ينزل فيه مرة مرة..تمام..اني في المربوعه..
ناض يزن وهو يقول..
/ماشي معاك..
عمر:تعالى..
ومشوا الزوز طلعوا للمربوعه..
سميره:تعرفي ياسيدا لتوا مش عارفه كيف حناك عندها هالوليدات اللي زي الورد..
ضحكت سدره وهي تفنص فيها..
سميره:حي! نسيت انها حناك.
ولفت تكمل في تجهيز السفره وسدره تهدرز عليها.
وصغار الطاهر في هالوقت مايقدروش يقعدوا فايقين التلاثه راحو في النوم من الساعه 11...
🍃وتسحروا..وشربوا القهوة..وراجو لين الفجر يأذن وطلعوا للجامع..
الشارع في الوقت وكأن فيه مسيره من عدد الرجال المتوجهين للصلاه..ومن بين اشرف اللي كان مركز بنظره ع محمد المهدي وهو ناوي ياخده حديث ع انفراد بعد الصلاة..
#مراد_قلبي
#طوبى
....يتبع....