Chapter 81
လီကျားအာသည် ဟဲရီ၏ ညီညီမများဖြင့် တရားရင်ဆိုင်နေရဆဲဖြစ်သည်။ ထိုအချိန်က အမျိုးမျိုးသော သတင်းများ ပျံ့နှံ့လာကာ သူမ၏ မိဘများပါ အဖော်ထုတ်ခံလိုက်ရတော့သည်။ လူတိုင်းက ထိုမိသားစုတစ်ခုလုံး၏ အကျည်းတန်မှုကို မျက်ဝါးထင်ထင် တွေ့ကြုံပြီးဖြစ်၍ ရှောင်ကျားရှု၏ စကားများကို တစ်ဖက်စောင်းနင်းဆန်လွန်းသည်ဟု မမြင်ကြ။
နင်က စာချုပ်ကို ဖျက်လိုက်တယ် ဟုတ်လား ဒါဆို ငါယူရိုက်မယ် နာမည်ကြီးလာမှ နောင်တမရနဲ့ ...
လီကျားအာ၏ အနုပညာလမ်းကြောင်းမှာ အစောကြီးကတည်းကပင် ဖျက်ဆီးခံလိုက်ရပြီဖြစ်သည်။
သူမ ငြင်းခဲ့တဲ့ ရိုက်ကွင်းက အခု နာမည်ကြီးနေပြီးတော့ ဒီဇာတ်ကားမှာ သရုပ်ဆောင်တဲ့ မင်းသမီးကလည်း အဆင့် ၁၈ ကနေ B အဆင့်အထိ ခုန်တက်သွားနိုင်တာ ဘယ်လိုလုပ် နောင်တမရဘဲ နေမလဲ နောင်တရလွန်းလို့ သွားဖုံးတွေတောင် ညိုမဲနေလောက်ပြီ သူမသာ ကျိမြန်ရဲ့ ကြင်နာမှုကို ပြန်ပြီး ကျေးဇူးတုန့်ပြန်တဲ့ အနေနဲ့ ဒီဇာတ်ကားကို ရိုက်ဖို့ သဘောတူလိုက်ရင် အခုအချိန်လောက်ဆို အခြေအနေက တစ်မျိုးဖြစ်ချင် ဖြစ်နေဦးမှာ အခုတော့ အားလုံး နောက်ကျသွားပြီ ...
လီကျားအာ၏ သနားစဖွယ် အခြေအနေကို သတိရသွားသည့် ပရိသတ်များက စိတ်သက်သာရာ ရဟန်ဖြင့် အားရပါးရ အော်ဟစ်အားပေးလိုက်ကြတော့သည်။
တင်ဆက်သူက စနောက်လိုက်သည်။
"ရှောင်ရှုမြောင်မှာလည်း ဒီလိုမျိုး လွှမ်းမိုးနိုင်တဲ့ ဥက္ကဌပုံရိပ်မျိုး ရှိနေတာပဲ ဒီဟာက မင်းအစ်ကိုရဲ့ ဝိသေသလက္ခဏာလို့ပဲ ထင်ထားခဲ့တာကို ကြည့်ရတာ "ဒီနေ့ ငါ့ကို လျစ်လျူရှုထားတဲ့သူတွေ မနက်ဖြန် နေထွက်တာကို မမြင်ရအောင် လုပ်ပစ်မယ်" ဆိုတာလိုပေါ့ ဒီလောကထဲမှာ ကျင်လည်မယ်ဆို လမ်းကြောင်းမှန်ကို ရွေး၊ ကောင်းတာတွေ လုပ်ပြီးတော့ ကိုယ့်ရှေ့မှာ ရှိတဲ့ အခွင့်အရေးကို ကောင်းကောင်း တန်ဖိုးထားမှ ရမှာ ..."
ရှောင်ကျားရှုက ထပ်ကာထပ်ကာ ခေါင်းငြိမ့်ပြလိုက်သည်။ သူ့မျက်နှာမှာ ခံစားချက်တို့ဖြင့် ပြည့်နှက်နေ၏။
တစ်ချိန်တည်းမှာပင် သွေးရောင်ပြန်လွှမ်းလာကာစ လင်းလဲ့ယန်၏ မျက်နှာမှာ တစ်ဖန် ဖြူလျော်သွားပြန်တော့သည်။ "နှစ်ရာရှည်ကြာ အိပ်မက်ကမ္ဘာ" နှင့် "သွေးအေးမင်းသား၏ မိန်းမပျို" မှာ အလွန် နာမည်ကြီးလွန်း၍ သူ့အနေဖြင့် မမြင်ချင်ယောင် ဆောင်ထား၍ပင် မရချေ။
သူ ကြားထဲကနေ ဝင်ဖျက်လိုက်လို့ ကျိကောက မရင်းနှီးခဲ့တော့တာ အခု ရှောင်ကျားရှုက ဝင်ငွေတွေ အများကြီး ရသွားပြီ ကျိကောကရော ဘာရလိုက်လဲ ဘာတစ်ခုမှ မရလိုက်ဘူး ပြီးတော့ စတူဒီယိုကလည်း ဒီရင်းနှီးမြှုပ်နှံမှုက သေချာပေါက် ဆုံးရှုံးရမှာလို့ တစ်ဆင့်ပြန်အကြံပေးခဲ့တဲ့ ဖန်ခွင်းကိုပါ မကျေမနပ် ဖြစ်နေပြီ ...
ထိုအကြောင်းကို တွေးမိလေတိုင်း သို့မဟုတ် နာမည်ကျော်ကြား အကျိုးအမြတ်များသည့် ထိုဇာတ်ကားနှစ်ခုအကြောင်း သတင်းကြားရလေတိုင်း လင်းလဲ့ယန်မှာ အချိန်ခရီးသွားကာ သူ့ခေါင်းကို ရိုက်ခွဲ၍ အထဲတွင် ရွှံ့များ ပိတ်ဆို့နေသလားဟု ကြည့်လိုက်ချင်စိတ်များ တဖွားဖွား ထွက်ပေါ်လာတော့သည်။
မင်းက သူ့ရဲ့ ရင်းနှီးမြှုပ်နှံမှုကို ဝင်ဖျက်ပစ်မှတော့ ကျိကောက သေချာပေါက် စိတ်ပျက်သွားရောပေါ့ ဒီ့ထက်ပိုပြီး စိတ်အနှောင့်အယှက် ဖြစ်စရာ ရှိဦးမှာတဲ့လား အခုဆို မင်းက သူ့နှလုံးသားထဲမှာ ဟာသတစ်ခုထက် မပိုတော့ဘူး တစ်ခါတစ်လေဆို ဒီလိုတောင် တွေးချင်တွေးနေဦးမှာ "တော်သေးတယ် လင်းလဲ့ယန်နဲ့ လမ်းခွဲလိုက်မိလို့ မဟုတ်ရင် သေချာပေါက် ချောက်ထဲ ကျတော့မှာ" ဆိုပြီးတော့ ...
လင်းလဲ့ယန်မှာ တွေးလေလေ ပိုပြီး ထိတ်လန့်လာမိတော့သည်။ ခေါင်းပင် မဖော်ရဲတော့သည့်အတွက် ထိုအကြောင်းအရာကို အမြန်ဆုံး စကားစဖြတ်နိုင်ရန်သာ တိတ်တဆိတ် ဆုတောင်းနေလိုက်တော့သည်။
သို့သော် Murphy ၏ ဥပဒေသက အချိန်ကိုက် ဖြစ်ပေါ်လာပြန်သည်။ တစ်စုံတစ်ခုကို သတိရသွားသည့် ရှစ်ထင်းဟန်က ချက်ခြင်း ဝင်ပြောလိုက်သည်။
"ဟေး ငါမှတ်မိသလောက်ဆို အဲဒီ့အချိန်တုန်းက ကျိလောင်ရှီးပါ ဒီဇာတ်ကားနှစ်ကားမှာ ရင်းနှီးမြှုပ်နှံမလို့ မဟုတ်ဘူးလား ချက်လက်မှတ်တောင် ထုတ်ပေးတော့မလို့ကို ဘာလို့ ဆက်မလုပ်ခဲ့တာလဲ ..."
ရှောင်ကျားရှုက ရှင်းပြမည် ပြင်စဉ်မှာပင် ကျိမြန်၏ ခပ်ဖျော့ဖျော့အပြုံးကို တွေ့လိုက်ရသည်။
"နည်းနည်းလောက် တုန့်ဆိုင်းသွားမိတာ ရှေ့ဆက်ပြီးလည်း မတိုးရဲခဲ့ဘူးလေ အခုတော့ တုန့်ဆိုင်းခဲ့မိတဲ့ ငါ့လက်တွေကိုတောင် နုတ်နုတ်စင်းပစ်ချင်နေပြီ ..."
ကြည့်ရှုသူများက အံ့ဩတကြီး ရယ်မောလိုက်ကြပြန်သည်။
"ရွှေလက်ပိုင်ရှင် နတ်ဘုရားကျိကလည်း ဒီလိုမျိုး အတွက်အချက် မှားသွားလိမ့်မယ်လို့ ထင်ကို ထင်မထားခဲ့ဖူးဘူး သူ့အတွက် ဝမ်းနည်းသင့်တယ်ဆိုပေမယ့် ဘာလို့ တအားအူမြူးနေမိတာလဲ မသိဘူး နိုး နိုး နိုး ငါ ပီတိတဖွားဖွား ဖြစ်နေလို့ မရဘူးလေ "
ထိုသို့ မှတ်ချက်ပြုလိုက်သည့် အင်တာနက်သုံးစွဲသူတစ်ဦးကြောင့် ကြည့်ရှုသူအားလုံး မပြုံးဘဲ ဝါးလုံးကွဲ ရယ်လိုက်ကြရပြန်သည်။
ကျိမြန်ကလည်း စခရင်ကို လှမ်းကြည့်ရင်း အလွန်ဝမ်းနည်းနေဟန်ဖြင့် နဖူးကို ကိုင်လျက် သက်ပြင်းချလိုက်သည်။ ယနေ့ ကင်မရာရှေ့ရှိ သူ့ပုံစံမှာ အလွန်နှစ်လိုဖွယ် ကောင်းလှသည့်အပြင် စကားများမှာလည်း အခြေအမြစ် ရှိလှသည့်အတွက် ဖြတ်လျှောက်များပင်လျှင် သူ့ပရိသတ် ဖြစ်ကုန်ကြတော့သည်။ နတ်ဘုရားကျိမှာ သူတို့ ထင်ထားသလို မြင့်မားအေးစက်ခြင်း မရှိ၊ သာမန်သူများကဲ့သို့ပင် ဆုံးရှုံးမှုနှင့် ရှက်ရွံ့မှုများ ရှိနေဆဲဖြစ်သည်ဟု အမြင်ပြောင်းလဲသွားကြတော့သည်။
ကျိမြန်က အားလုံး ရယ်မောပြီးသည်အထိ စောင့်ပြီးကာမှ ရှောင်ကျားရှု၏ ပုခုံးကို ခပ်ဖွဖွ ပုတ်လိုက်သည်။
"နောက်တစ်ခေါက် ရင်းနှီးမြှုပ်နှံမယ်ဆိုရင် ဒီအစ်ကိုကြီးကို ဂရုစိုက်ပေးဖို့ သတိရဦး ..."
ရှောင်ကျားရှုက အလေးအနက် ခေါင်းငြိမ့်ပြလိုက်သည်။
"ကျိကော မပူပါနဲ့ ကျွန်တော် စွတ်ပြုတ်သောက်တဲ့အချိန်မှာ ကော အသားစားနိုင်အောင် လုပ်ပေးပါ့မယ် ..."
အစီအစဉ် တင်ဆက်သူက သူ့အမှားကို ချက်ခြင်း ထောက်ပြလိုက်သည်။
"ဟေး မင်း အသားစားနေတဲ့အချိန်မှာ ကျိကောက စွတ်ပြုတ်သောက်ရမှာ မဟုတ်ဘူးလား လျှာလိပ်သွားတာလား ဒါမှမဟုတ် ဦးနှောက်သေနေတဲ့ ပရိသတ်ဖြစ်နေလို့ မတော်တဆ ပြောလိုက်မိတာလား ..."
ရှောင်ကျားရှုမှာ ပါးနှစ်ဖက်လုံး နီရဲလာပြီး အတော်ကြာသည်အထိ စကားမပြောနိုင်တော့။ သူ့ဘဝတစ်လျှောက်လုံး ဤကဲ့သို့ တစ်ခါမှ ဖော်ထုတ်မခံရဖူးချေ။
ပရိသတ်များက တသောသော ရယ်မောလိုက်ကြပြန်သည်။
နတ်ဘုရားကျိရဲ့ အသားတုံးကို လုစားရမယ့်အစား အသေပဲ ခံလိုက်မယ်ဆိုတာကမှ ဦးနှောက်သေနေတဲ့ ပရိသတ်တွေရဲ့ ခံယူချက် အစစ်အမှန်ပဲ ...
စခရင်တစ်ခုလုံး "hahahaha" ဟူသည့် မှတ်ချက်များက ဖုံးလွှမ်းသွားကာ ကျိမြန်၏ တစ်နိုင်ငံလုံးဆိုင်ရာ ဖန်ကလပ်ကပါ သွေးနီရောင် စာလုံးကြီးများပါ စာတန်းတစ်ခု ပေးပို့လိုက်သည်။
"အိုကေ အိုကေ ရှောင်ရှုမြောင်ရဲ့ စိတ်အားထက်သန်မှုတွေကြောင့် သူ့ကို ဧကရီအဖြစ် သရဖူဆောင်းပေးလိုက်ပြီ ဘယ်သူမှ သူ့ဆီကနေ မခိုးကြနဲ့နော် "
"မခိုးရဲပါဘူး လုံးဝ လုံးဝကို မခိုးရဲပါဘူး"
"ခိုးချင်ရင်တောင် ခိုးလို့ မရပါဘူးနော် ဧကရီလေးက သရုပ်လည်းဆောင်နိုင်တယ် ငွေလည်း ရှာနိုင်တယ် ရုပ်ကလေးကလည်း ကြည့်လို့ကောင်းနေသေးတယ်"
"..."
သရဖူလေးများက ရှောင်ကျားရှုကို အမျိုးမျိုးအဖုံဖုံ စနောက်ကျီစယ်လိုက်ကြသည့်အတွက် လေထုတစ်ခုလုံး တစ်ဖန် လှုပ်ရှားသက်ဝင်လာပြန်တော့သည်။
ရှောင်ကျားရှုမှာ အလွန် ရှက်ရွံ့သွားရတော့၏။
သူက တကယ်ကို လျှာလိပ်သွားတာပါနော် ဧကရီကရော ဘာကြီးလဲ တစ်နိုင်ငံလုံးရှေ့မှာ ဒီလို အခေါ်ခံလိုက်ရတာ တကယ်ကို မျက်နှာပူစရာကြီး ...
သူက မျက်နှာကို လက်နှစ်ဖက်ဖြင့် အုပ်လျက် ကျိကောကို လှမ်းဆွဲကာ တိုးလျှိုးတောင်းဆိုလိုက်သည်။
"ကျိကော တစ်ခုခု လုပ်ပါဦး ..."
ကျိမြန်က ပြန်ပြုံးပြကာ ပြောလိုက်သည်။
"ဟုတ်ပြီ ဟုတ်ပြီ စမနေကြနဲ့တော့ ရှောင်ရှုက ရှက်နေပြီ ..."
"Pfft! ဧကရာဇ်က ဧကရီကို တကယ်ကြီး တုန်နေအောင် ချစ်တာပဲဟ ငါတော့ သူမ နန်းစွန့်မယ့်အချိန်ကို မစောင့်နိုင်တော့ဘူး "
ကျိမြန်၏ ပရိသတ်များက တစ်ပြန်တစ်လှည့် ထပ်မံ စနောက်လိုက်ကြပြန်ရာ ကြည့်ရှုသူအားလုံး သောင်းသောင်းဖျဖျ ရယ်မောလိုက်ကြရပြန်တော့သည်။
ဒီနေ့ ကျိမြန်ရဲ့ လုပ်ရပ်တွေက တကယ် သူတို့ကို အမြင်သစ် ဖွင့်ပေးလိုက်တာပဲ သူက ဘယ်အကြောင်းအရာပဲလာလာ လာသမျှ အကြောင်းအရာနဲ့ ပတ်သက်ပြီး အကုန် အရွှန်းဖောက်နိုင်တယ် သူ့အပေါ် ထားရှိတဲ့ လူတိုင်းရဲ့ အမြင်တွေကို အလွယ်လေး ပြောင်းလဲပစ်နိုင်တာပဲ ဒီလိုပုံစံမျိုးက ပိုပြီး စစ်မှန်ပုံပေါ်တာကတော့ ငြင်းစရာကို မရှိဘူး ...
လင်းလဲ့ယန်က အယောင်ယောင် အမှားမှားဖြင့် မတ်တပ်ထရပ်လိုက်သည်။ ပျော်ပျော်ရွှင်ရွှင် စကားလက်ဆုံကျနေသူနှစ်ဦးကို တွေ့လိုက်ရသည့်အခါ သူ့နှလုံးသားတစ်ခုလုံး သွေးစိမ်းရှင်ရှင် ယိုစီးကျလာတော့သည်။
ချိန်ဖမ်းရှင်းက သူ့အနားသို့ စိုးရိမ်တကြီး ရောက်လာကာ ပြောလိုက်သည်။ ဤပရိုဂရမ်၏ ကြည့်ရှုနှုန်းမှာ အမျိုးမျိုးသော အကြောင်းပြချက်များကြောင့် စံချိန်တင်သွားခဲ့တော့သည်။ အကြောင်းရင်းကို ဆန်းစစ်ပြီးနောက် ဒါရိုက်တာက သူ့ကို ခေါ်ပြောလိုက်၏။ ရှောင်ကျားရှုနှင့် ကျိမြန်တို့ စကားပြောလေတိုင်း ကြည့်ရှုနှုန်း ထိုးတက်လာသည်။ ကြည့်ရှုသူများက သူတို့နှစ်ဦးကို သဘောကျဟန်ပင်။ သို့သော် လင်းလဲ့ယန်၏ လုပ်ဆောင်ချက်မှာမူ အလွန်အမင်း ဆိုးဝါးလှသည်။ စကားပြောသည့်နေရာတွင် ကို့ရို့ကားယား ဖြစ်လှသည့်အပြင် လုပ်ဖော်ကိုင်ဖက်များနှင့်လည်း ကောင်းစွာ မဆက်သွယ်နိုင်။ အမြင်အာရုံ ချို့တဲ့နေသူပင်လျှင် သူတစ်ယောက်တည်း ကွဲထွက်နေကြောင်း မြင်သာ နေရာ မြောင်မူချင်၊ ရှောင်ကျားရှုတို့နှင့် သဘောထားချင်း မတိုက်ဆိုင်ဟူသည့် ကောလဟာလကို ချေဖျက်ရန် မလွယ်ကူလှချေ။
"လာပါ ပြုံးပြုံးလေးနေ ကင်မရာက ရိုက်နေတုန်းပဲ ရှိသေးတယ် ..."
ချိန်ဖမ်းရှင်းက သူ့ပုခုံးကို နှိပ်ပေးလိုက်သည်။
"ငါ မရယ်နိုင်တော့ဘူး ..."
လင်းလဲ့ယန်မှာ ရင်ဘက်တစ်ခုလုံး မွန်းကြပ်နေသည့်တိုင် နှုတ်ခမ်းထောင့်စွန်းမှာမူ အပြုံးတစ်ပွင့်ကို ခပ်ယဲ့ယဲ့ ချိတ်ဆွဲထားဆဲဖြစ်သည်။
"အဝတ်လဲခန်းထဲကို အရင်သွားရအောင် ..."
နှစ်ဦးသား စင်နောက်သို့ အလျှိုလျှို ထွက်သွားလိုက်ကြသည်။
တစ်ချိန်တည်းမှာပင် ရှောင်ကျားရှုကလည်း အလွန် ပူပန်နေမိသည်။ သူက တစ်ခုခု ပြောစရာရှိနေသည့်နှယ် ကျိမြန်၏ အနောက်သို့ တကောက်ကောက် လိုက်နေသော်ငြား မည်သို့ ပြောသင့်မှန်းလည်း မသိ။ သူ့ဘဝထဲကို ဝင်ရောက်စွက်ဖက်ရန် မရည်ရွယ်၊ အလွန်အမင်း သဘောကျနေသောကြောင့်သာ အသေးအဖွဲလေးများမှအစ အာရုံစိုက်မိသွားခြင်းဖြစ်ကြောင်း ရှင်းပြလိုပေသည်။ သူ့အတွေးတို့ကို မထိန်းချုပ်နိုင်သည့်တိုင် အမူအယာကို ထိန်းချုပ်နိုင်သည့်အတွက် ကျိမြန်ကို မခွါစတမ်း ကပ်တွယ်နေမည် မဟုတ်သလို အရူးအမူး သဘောကျသည်ကို အကြောင်းပြု၍လည်း မည်သည်ကိုမှ တောင်းဆိုမည် မဟုတ်ချေ။ သူက ကျိမြန်ကို သူ့နှလုံးသားထဲတွင် သိမ်းထားရင်းသာ တိတ်တဆိတ် အားပေးနေမည်ဖြစ်သည်။
ဤသည်မှာ သူ့အတွေးများသာ ဖြစ်ပြီး လက်တွေ့တွင်မူ ကျိမြန်နောက်မှ တကောက်ကောက် လိုက်မိနေဆဲဖြစ်သည်။ သူသွားသည့်နောက် ဘယ်ညာလှည့်ပတ်လျက် လိုက်နေရာ လက်ထောက်နှင့် ဝင်တိုက်မိမှသာ သတိပြန်ကပ်သွားတော့သည်။
ဝင်အတိုက်ခံလိုက်ရသည့် လက်ထောက်လေး ထောင့်နားသို့ ရောက်သွားကာမှ ကျိမြန်က မေးလိုက်သည်။
"မိတ်ကပ်ဖျက် အဝတ်အစားလဲဖို့ မလုပ်သေးဘူးလား ..."
"အာ ..."
ရှောင်ကျားရှုက သူ့ကို မော့ကြည့်လိုက်ပြီးကာမှ ကျိမြန်၏ အဝတ်အစားလဲခန်းအထိ လိုက်လာမိကြောင်း သတိထားမိသွားသည့်အတွက် အလောတကြီး ပြန်ဖြေလိုက်သည်။
"ကျွန်တော်က ကောကို လိုက်ပြီး နှုတ်ဆက်ချင်လို့ပါ ဒါဆို အရင် သွားနှင့်တော့မယ်နော် ..."
သူ့အတွေးစများကို ထုတ်မပြောရဲသည့်တိုင် အပြုအမူနှင့်တော့ ဖော်ပြ၍ ရပေသည်။ သူက ကျိကောကို လုံးဝ ပြဿနာ ပေးမည်မဟုတ်၊ သူသည် ဦးနှောက်သေနေသည့် ပရိသတ်မဟုတ်၊ သစ္စာရှိကာ ဝေဖန်ပိုင်းခြားတတ်သည့် ပရိသတ်တစ်ဦးပင်ဖြစ်သည်။
"အိုကေ အိမ်ကို စောစောပြန်ပြီး အနားယူလိုက်တော့ ..."
သူ့ကို ငုံ့ကြည့်လိုက်သည့် ကျိမြန်၏ အကြည့်တို့မှာမှိန်ဖျော့ဖျော့အလင်းရောင်တစ်ခု ပျံ့လွင့်နေသည်။
ရှောင်ကျားရှုက လက်ကို ယမ်းပြလျက် ထွက်သွားလိုက်သည်။ ထောင့်ချိုးနားအရောက်တွင် ခပ်အုပ်အုပ် ရယ်သံတစ်ခုကို ကြားလိုက်ရသည့်အတွက် နောက်ပြန်လှည့်ကြည့်လိုက်သော်ငြား မောပန်းနွမ်းနယ်စွာဖြင့် မျက်ခုံးတို့ကို ကုတ်ခြစ်နေသည့် ကျိမြန်ကိုသာ တွေ့လိုက်ရသည်။ သူက ကျိမြန်ကို တစ်ဖန် တိုက်တွန်းလိုက်၏။
"ကောလည်း အိမ်ကို စောစောပြန်ပြီး ကောင်းကောင်း အနားယူလိုက်ပါ ..."
"Hmm ..."
ကျိမြန်က ခေါင်းငြိမ့်ပြပြီး သူ ထွက်သွားကာမှ အပြုံးခပ်သေးသေးတစ်ပွင့်ကို လှစ်ဟလိုက်သည်။
"မစ္စတာကျိ ရှောင်ကျားရှုက ဆရာ့ကို တကယ်လေးစားတာလို့ ထင်လား ဒါမှမဟုတ် ဆရာ့နာမည်ကို သုံးပြီး လူကြိုက်များအောင် လုပ်ချင်တာလား ..."
လက်ထောက်က စိုးရိမ်တကြီး မေးလိုက်သည်။
"သူ့အဆက်အသွယ်တွေနဲ့ဆို ငါ့ကို အသုံးချဖို့ လိုအပ်သေးလို့လား ..."
ကျိမြန်က တံခါးကို တွန်းဖွင့်ရင်း ခပ်တိုးတိုး ပြောလိုက်သည်။
"အနုပညာလောကကြီး တစ်ခုလုံးက ဗြောင်းဆန်နေတယ် ဆိုပေမယ့် တည့်မတ်တဲ့သူတွေလည်း ရှိနေပါသေးတယ် ..."
သူ့အမူအယာမှာ သိပ်ပြီး မူမမှန်လှသည့်အတွက် လက်ထောက်လည်း စကားတစ်ခွန်းမှပင် ဆက်မပြောရဲတော့။ ဖုန်းပြောရင်း အထဲသို့ ဝင်လာသည့် ဖန်ခွင်းက ဖုန်းကိုချလျက် ကျိန်ဆိုလိုက်သည်။
"ဖာ့ခ် "နှစ်ရာရှည်ကြာ အိပ်မက်ကမ္ဘာ" နဲ့ "သွေးအေးမင်းသားရဲ့ မိန်းမပျို" မှာ ရင်းနှီးမြှုပ်နှံမယ့် အစီအစဉ်ကို ကန့်ကွက်တဲ့အထဲမှာ စာရင်းစစ်ဌာနကအစ ပါနေတဲ့ဟာကို ဘယ်လိုဖြစ်လို့ ငါတစ်ယောက်တည်း အပြစ်ပြောခံနေရတာလဲ ဟိုကလေး လင်းလဲ့ယန်ကြောင့်သာ မဟုတ်ရင် ..."
သူက အချိန်မီ စကားလမ်းကြောင်းပြောင်းကာ ဖျော့တော့စွာ မေးလိုက်သည်။
"ကျိကော ကော ကိုယ့်နာမည်နဲ့ကိုယ် ရင်းနှီးမြှုပ်နှံမယ်လို့ ပြောခဲ့တယ် မဟုတ်လား ဘာလို့ မလုပ်ခဲ့တာလဲ ..."
"မလုပ်ချင်တော့လို့ မုန့်တစ်ခုကို လူတစ်ယောက်တည်းစားရင် ဗိုက်ဝပေမယ့် နှစ်ယောက်ခွဲစားရရင် တစ်ယောက်က သေချာပေါက် အငတ်ခံရမှာပဲလေ ငါမပါလည်း ဒီဇာတ်လမ်းနှစ်ခုက ဆက်ရိုက်နေဦးမှာပဲကို ပြီးတော့ ကောင်းကောင်းမွန်မွန် လုပ်နိုင်ခဲ့သားပဲ ..."
ကျိမြန်က ဆိုဖာပေါ်တွင် လှဲကာ အိပ်ချင်ယောင်ဆောင်နေလိုက်ပြီး မိတ်ကပ်ပြင်ဆရာက သူ့မိတ်ကပ်များကို ဖျက်ပေးလိုက်သည်။
Xxxxxx
Chapter 82
လက်ချိုးရေကာ တွက်ချက်လိုက်သည့် ဖန်ခွင်းမှာတော့ ဆို့နင့်မှုကြောင့် အသက်ပင် မရှူနိုင်တော့။
သိလား ကျိကောက အစောပိုင်းမှာ သန်းလေးဆယ် ရင်းနှီးမြှုပ်နှံဖို့ စီစဉ်ခဲ့တာကွ အချိုးကျကျသာ ပိုင်းခြားလိုက်ရင် အခုထက် သုံးလေးဆမက ပြန်ရနေပြီ နောင်တရလိုက်တာ ...
ထိုအကြောင်းနှင့် ပတ်သက်၍ ဆက်မပြောရဲတော့သည့်အတွက် ဖုန်းကိုထုတ်ကာ ရှိုးအကြောင်းသာ လိုက်ကြည့်နေလိုက်တော့သည်။ တစ်ခဏမျှအကြာ တံခါးခေါက်သံတစ်ချက်နှင့်အတူ လင်းလဲ့ယန်၏ အသံကို ကြားလိုက်ရတော့သည်။
"ကျိကော ဒီထဲမှာ ရှိနေလားဟင် ..."
"မရှိဘူး ..."
ဖန်ခွင်းက စိတ်မရှည်လက်မရှည်ဖြင့် အော်ဟစ်လိုက်သည်။
တစ်ခဏမျှ တိတ်ဆိတ်သွားပြီးနောက် ဇွဲမလျော့တမ်း တံခါးထပ်ခေါက်လိုက်ပြန်သည်။
"ကျိကော ကျွန်တော် စကားပြောချင်လို့ပါ ..."
ဖန်ခွင်းက သူ့ကို မောင်းထုတ်မည်ပြုစဉ် ကျိမြန်က အလေးမထားဟန်ဖြင့် ပြောလိုက်သည်။
"ဝင်ခိုင်းလိုက် မင်းတို့တွေ သွားနှင့်ကြတော့ ..."
အားလုံး ထွက်သွားကြပြီး သူတို့နှစ်ဦးကိုသာ ချန်ထားလိုက်တော့သည်။
"ဘာပြောချင်လို့လဲ ..."
ကျိမြန်က မျက်နှာသစ်ကာ ရေစက်များကို ပုဝါဖြင့် ခပ်ဖြည်းဖြည်း သုတ်ရင်း မေးလိုက်သည်။ သူ့ပုံစံမှာ အလွန်တည်ငြိမ်နေကာ ချစ်ခြင်းအငွေ့အသက်သာမက လမ်းခွဲလိုက်ရ၍ နာကျင်ခံစားနေရဟန်ကိုပါ မတွေ့ရချေ။
လင်းလဲ့ယန်က တံတွေးမျိုချရင်း တုန်ရီနေသော အသံဖြင့် ပြောလိုက်သည်။
"ကျိကော ရှောင်ကျားရှုနဲ့ တွဲနေတာ မဟုတ်လား မဟုတ်ရင် သူ ဒီလောက်အထိ ကောင်းကောင်းသိစရာအကြောင်း မရှိဘူး သူ့ကြောင့် ကျွန်တော်နဲ့ လမ်းခွဲလိုက်တာလား ..."
"သူနဲ့ငါက ရိုးရိုးအသိမိတ်ဆွေတွေ မင်းနဲ့ ဘာလို့ လမ်းခွဲလိုက်သလဲဆိုတာ အခုထိ နားမလည်သေးဘူးလား ..."
ကျိမြန်က ပုဝါကို ဘေးနားချရင်း အရယ်အပြုံးမရှိ မေးလိုက်သည်။
"ကျွန်တော် တကယ်ကို နားမလည်နိုင်ဘူး ကျွန်တော်တို့တွေ နှစ်အကြာကြီး ချစ်ကြိုက်ခဲ့ကြတာလေ တစ်ခါမှလည်း ရန်မဖြစ်ဖူး၊ စကားလည်း မများဖူးဘဲနဲ့ ဘာကြောင့် လမ်းခွဲချင်တာလဲဆိုတာကို ဘယ်လိုလုပ် ခန့်မှန်းနိုင်မှာလဲ ..."
လင်းလဲ့ယန်က ရှိရှိသမျှ သတ္တိအားလုံးကို ညှစ်ထုတ်ကာ မေးလိုက်သည်။ ကျိကောနှင့် ရှောင်ကျားရှုတို့ ရယ်ရယ်မောမော ပြောဆိုနေကြချိန်တိုင်း သူ့နှလုံးသားတစ်ခုလုံး ဓားထက်ထက်ဖြင့် ထိုးခွဲသည့်နှယ် အဆက်မပြတ် နာကျင်ခံစားနေရကြောင်း မည်သူမှ မသိနိုင်ချေ။
ကျိမြန်က သူ့ကို စိုက်ကြည့်နေပြီးနောက် သက်ပြင်းချလျက်သာ ပြောလိုက်တော့သည်။
"နားမလည်တာလား ဒါမှမဟုတ် မတွေးရဲတာလား ငါတို့နှစ်ယောက် အတူရှိနေဖို့အတွက် အကောင်းဆုံးနည်းလမ်းက ဘာလို့ မင်းထင်လဲ ..."
လင်းလဲ့ယန်က ကြက်သေသေနေကာ အတော်ကြာသည်အထိ ပြန်မဖြေနိုင်သေး။
"ကျွန်တော်တို့တွေ အမြဲတမ်း ပျော်ခဲ့တယ်လို့ပဲ ထင်ခဲ့တာ ..."
"မင်းရဲ့ ကိစ္စတွေမှာ တစ်ဖြည်းဖြည်း ဝင်စွက်ဖက်ရင်ရော ပျော်လား မဟုတ်ဘူး မင်း ဘယ်တုန်းကမှ မပျော်ခဲ့ဘူး မင်းက စိတ်ရှည်ခဲ့ရုံပဲရှိတာ စိတ်ကျေနပ်မှု ရဖို့အတွက် မင်း ငါ့ဆီကနေ ဘာလိုချင်လဲဆိုတာကို နားလည်လား ငါက မင်းကို အကြွင်းမဲ့ ကူညီပေးတာကို လိုချင်တယ် အကြွင်းမဲ့ သည်းခံနားလည်ပေးဆပ်တာမျိုး အဲဒါမှ မင်းရဲ့ လုံခြုံတယ်လို့ ခံစားရတဲ့စိတ်က အမြင့်ဆုံးအထိ ရောက်လာမှာ ငါသာ မင်းကို နည်းနည်းလေးများ တင်းကြပ်မိခဲ့ရင် မင်းကို လွတ်လပ်ခွင့် မပေးဘူး လူလို မဆက်ဆံဘူးဆိုပြီး အတွေးတွေ လွန်ရော ဒါပေမယ့် အဲဒါ တကယ်ရော ဟုတ်လို့လား ငါ မင်းကို အများကြီး ပေးဆပ်ခဲ့ပြီးပြီ မင်းသာ "ကျိကောကို ချစ်တယ်" ဆိုပြီး စိတ်အေးလက်အေးနဲ့ လက်ခံလိုက်ရင် မင်းရောက်နေတဲ့နေရာမှာပဲ နေလေ ဒါပေမယ့် မင်းက ဘယ်တုန်းကမှ ငါနဲ့ မနီးစပ်ချင်ခဲ့ဘူး ဘာလို့လဲသိလား မင်းက ယောကျာ်းတွေကို မကြိုက်လို့ ငါ့အတွက် မင်းရဲ့ လိင်စိတ်တိမ်းညွတ်မှုကို ပြောင်းလဲပေးထားရတာကိုက အကြီးမားဆုံး ပေးဆပ်မှုလို့ ထင်နေတာလေ ငါ့အတွက် တစ်ခုခု လုပ်ပေးသင့်တယ်လို့ မင်း ဘယ်တုန်းကမှ မတွေးခဲ့ဖူးဘူး ..."
လင်းလဲ့ယန်မှာ မိုးကြိုးပစ်ချခံလိုက်ရသည့်နှယ် ပြောစရာစကားပင် မရှိတော့။
ကျိမြန်က ဆေးလိပ်ကို မီးညှိလျက် ဆက်ပြောလိုက်သည်။
"မင်းပြောဖူးတဲ့စကားလေ ငါတို့က အဆင့်အတန်း မတူကြဘူးဆိုတာ တကယ်အဟုတ်ပဲ ဒါပေမယ့် အပေါ်စီးကနေတဲ့သူက ငါမဟုတ်ဘူး မင်းပဲ ဘာလို့လဲသိလား ငါ ဘယ်လောက်ပဲ ပေးဆပ်ပေးဆပ် မင်းအတွက် ဘယ်တော့မှ မလုံလောက်ဘူးလေ ငါ့အတွက်ကြောင့်နဲ့ မင်းလို အဖြောင့်ကောင်က ရွံစရာကောင်းတဲ့ လိင်တူချစ်သူအဖြစ်ကို ပြောင်းလဲပေးခဲ့ရတာ မင်းကို ကွေးသွားအောင် လုပ်ခဲ့မိတာကိုက ငါ့ဘဝရဲ့ အကြီးဆုံးပြစ်ချက် ဖြစ်နေပြီ ပြီးတော့ မင်းကို တစ်ဘဝလုံးစာအတွက် အကြွေးတင်နေပြီ ..."
"မဟုတ်ဘူး မဟုတ်ဘူးလို့ ဒီလိုမျိုး တစ်ခါမှ မတွေးခဲ့ဖူးဘူး ..."
လင်းလဲ့ယန်က ဖျော့တော့အားနည်းစွာဖြင့် ခေါင်းယမ်းပြလိုက်သည်။
"တွေးလားမတွေးလား မင်းစိတ်ထဲမှာတော့ ရှင်းလင်းချင်မှ ရှင်းလင်းလိမ့်မယ် ဒါပေမယ့် မင်းရဲ့ အပြုအမူတွေကတော့ ရှင်းရှင်းလင်းလင်းကို ပြထားပြီးသား ..."
ကျိမြန်က ဆေးလိပ်ငွေ့များကို မှုတ်ထုတ်လျက် ပြောလိုက်သည်။
"ချိန်ဖမ်းယွီနဲ့ ချိန်ဖမ်းရှင်းကို IOU ရေးခိုင်းတုန်းက မင်း ငါ့ကို မုန်းလား ..."
လင်းလဲ့ယန်က ခေါင်းယမ်းပြလိုသော်ငြား လုံးဝ လှုပ်ရှား၍ မရတော့။ ကျိမြန်၏ အကြည့်များအောက်တွင် ပုန်းစရာနေရာ ရှာမရတော့သည့်နှယ်ပင်။
"အဲဒီ့ ဓာတ်ပုံတွေ စာပို့ထားတဲ့ဟာတွေ ဖော်ထုတ်ခံရရင် အထိခိုက်ဆုံးဖြစ်မယ့်သူက ဘယ်သူလို့ထင်လဲ ငါလား မင်းလား ရှင်းရှင်းလင်းလင်း ပြောရရင် လက်ရှိ ငါ့အနေအထားနဲ့ဆို ဘယ်လိုအောက်ဖဲမျိုးကမှ ငါ့ကို ဆွဲမချနိုင်ဘူး ဆွဲချနိုင်တယ်ပဲထား ငါက အနုပညာလောကကနေ ထွက်သွားရရင်လည်း အသက်ဆက်ရှင်နိုင်သေးတယ် သူတို့နှစ်ယောက်ကို ပြင်းပြင်းထန်ထန် ကိုင်တွယ်ခဲ့တာ ငါ ဘယ်သူ့ကို ကာကွယ်ပေးချင်လို့လဲဆိုတာကိုရော မင်း တွေ့ကြည့်ဖူးလား ဘယ်သူက အကျိုးအမြတ်အများဆုံး ရမှာလဲ အခက်အခဲတွေ ကြုံတဲ့အချိန်တိုင်း မင်းကို ငါ့တောင်ပံအောက်ထားပြီး ကာကွယ်ပေးချင်ပေမယ့် မင်းကတော့ ဒီလိုမျိုး လုံးဝ မတွေးဘူး အမြဲတမ်း ငါနဲ့ ဆန့်ကျင်ဘက်ကိုပဲ ချက်ခြင်း ရပ်တည်ခဲ့တယ် မင်းနဲ့ ချိန်ဖမ်းယွီက တစ်မြို့တည်းသား ငါကတော့ မကောင်းတဲ့သူ သူ့ရဲ့ သစ္စာဖောက်မှုကို ခွင့်လွှတ်ပေးနိုင်ပေမယ့် ငါ့ခံစားချက်တွေကိုတော့ ဘယ်တော့မှ နားလည်မပေးဘူး ဒီလိုမျိုး ဆက်ဆံတာတွေက မျှတတယ်များ ထင်နေလား... ဘယ်သူမှ မင်းလောက် ငါ့ကို မစော်ကားဖူးဘူး တစ်လောကလုံးကို အပြစ်ပြုမိရင်တောင် မင်းကိုတော့ လုံးဝ အပြစ်မပြုဖူးဘူး တစ်ယောက်ကိုတစ်ယောက် ချစ်တယ်ဆိုတဲ့နေရာမှာ အချုပ်အနှောင် မရှိရဘူး အပြန်အလှန် ပေးကမ်းရမယ်လို့ ဖိအားပေးထားတာ မရှိသလို မင်းရဲ့ လိင်စိတ်တိမ်းညွတ်မှုကို ပြောင်းလဲပစ်စရာလည်း မလိုဘူး မင်းရဲ့ ကိုယ်ပိုင်ရွေးချယ်ခွင့်ပဲ မလုပ်ချင်ဘူးလား ပြောလေ မင်းက အဖြောင့်ပါလို့ ..."
လင်းလဲ့ယန်မှာ တစ်ခွန်းမှ ပြန်လည်မချေပနိုင်တော့။ မျက်ရည်စီးကြောင်းနှစ်ခုသာ တလိမ့်လိမ့်လကျဆင်းလာတော့သည်။
ကျိမြန်က ဆေးလိပ်ကို ဘေးချရင်း သက်ပြင်းချလိုက်သည်။
"ရှောင်ကျားရှုက ဘာလို့ မင်းထက်ပိုပြီး ငါ့အကြောင်းတွေ ပိုသိနေရတာလဲဆိုတာကို သိလား ဘာလို့လဲဆိုတော့ သူက နှလုံးသားကို အသုံးပြုလို့ မင်းက ငါ့ချစ်သူ၊ ငါနဲ့ နှစ်တွေအကြာကြီး အတူတူရှိခဲ့တာဆိုပေမယ့် ငါ့အတွက်ဆိုပြီး မင်းနှလုံးသားကို သုံးကြည့်ဖူးရဲ့လား အားမနာစတမ်း ဝန်ခံရရင် ငါလည်း မင်းဘာကြိုက်တတ်မှန်း မသိဘူး မင်းကို နားလည်ဖို့ မင်းအကြောင်းတွေ သိလာဖို့ ငါ ကြိမ်ဖန်များစွာ ကြိုးစားခဲ့ဖူးတယ် ဒါပေမယ့် မင်းကတော့ မင်းရဲ့ နှလုံးသားတံခါးကို တင်းတင်းကြပ်ကြပ် ပိတ်ထားပြီး အရာတိုင်းကို ဖုံးကွယ်ထားတယ် ငါသိတယ်ဆိုတာတွေက ငါသိအောင် မင်းတမင် ဖန်တီးထားတာတွေပဲ ငါ ဘာတွေကြိုက်တယ် ဘာတွေမကြိုက်ဘူး မင်းသာ သေချာ ဂရုတစိုက် အကဲခတ်မိရင် သိမှာပေါ့ မင်းကို ငါ့နှလုံးသားထဲ ဝင်လာခွင့် ပိတ်လိုက်တာ မဟုတ်ဘူး ငါက မင်းကို ဆွဲခေါ်နေပေမယ့် မင်းကိုယ်တိုင်ကိုက ခြေကန်ပြီး ရုန်းနေတာ ..."
"မင်းဘက်ကအရင် စိမ်းကားပြီးတော့မှ ဘာလို့ လမ်းခွဲချင်တာလဲတဲ့လား ဒီပုံစံအတိုင်းဆို ငါတို့တွေ ဘဝဆုံးတဲ့အထိ အတူတူနေနိုင်မယ်လို့ ထင်လား တစ်ယောက်က နီးစပ်ဖို့ ကြိုးစားနေတဲ့အချိန် နောက်တစ်ယောက်က အသည်းအသန် ပုန်းကွယ်နေတယ် ဒီလူနှစ်ယောက်ရဲ့ တွဲလက်က မြဲမယ်လို့ ထင်လား လင်းလဲ့ယန် မင်းက ငါ့ရဲ့ သည်းခံနိုင်စွမ်းကို အများကြီး တွေးနေတာပဲ ငါ့အနေနဲ့ နှစ်နှစ်ဆိုလည်း နေနိုင်သေးတယ် သုံးနှစ်ဆိုလည်း နေနိုင်သေးတယ် ဒါပေမယ့် တစ်ဘဝလုံးတော့ မနေနိုင်ဘူးကွ ..."
သူက ကုတ်အင်္ကျီကို ဝတ်ကာ တံခါးကို ဖွင့်လျက် အလေးအနက် ပြောလိုက်သည်။
"ငါ ပြန်လာတော့မှာ မဟုတ်လို့ မင်းလည်း စိတ်လျော့လိုက်တော့ ကိုယ့်လမ်းကိုယ်ပဲ လျှောက်ကြရအောင် ..."
တံခါးက အသာအယာ ပိတ်သွားခဲ့သည်။
မှန်ထဲသို့ ကြည့်လိုက်သည့်အခါ မျက်ရည်တို့ စီးကျနေသည့် သူ့ရုပ်ပုံကို ပြန်မြင်လိုက်ရသည်။ သူသာ ရောက်မလာခဲ့မိပါလျှင် ကျိမြန်က သူ့ကို ချစ်နေဆဲ၊ သူတို့နှစ်ဦး ယခင်အတိုင်း ပျော်ပျော်ရွှင်ရွှင် နေနိုင်ဦးမည်ဟုသာ မျက်စိစုံမှိတ်ပြီး ယုံကြည်ထားဦးမည် ဖြစ်သော်လည်း ယခုမူ အမှန်ကို မြင်သွားချေပြီ။ သူသည် လုံးဝ ပျော်ရွှင်ခဲ့ဖူးခြင်း မရှိ၊ စိတ်မသက်မသာ ဖြစ်မှုနှင့် ဝိရောဓိတို့အကြား ရုန်းကန်နေခဲ့ရပြီး ထိုကိစ္စရပ်များအားလုံးကို ကျိမြန်က ထိုးထွင်းမြင်နေခဲ့သည်။
..........
ပရိုမိုးရှင်းပွဲများကို အားသွန်ခွန်စိုက် ဆောင်ရွက်ပြီးနောက် စီစဉ်ထားသည့် နေ့မှာပင် "တမန်တော်" ကို ရုံတင်ပြသလိုက်တော့သည်။ ရုပ်ရှင်ရုံထဲရှိ မီးအလင်းရောင်တို့ မှိန်ဖျော့သွားပြီးနောက် ရှောင်ကျားရှုက ခြေဖျားလက်ဖျားတို့ အေးစက်တုန်ရီစွာဖြင့် ကျိမြန်၏ဘေးတွင် ဝင်ထိုင်လိုက်သည်။ သူသရုပ်ဆောင်ထားသည့် ဇာတ်ကားကို ပထမဆုံးအကြိမ် ပြန်ကြည့်ဖူးခြင်းဖြစ်ရာ မည်သို့မည်ပုံ ထွက်ပေါ်လာမည်နှင့် ပရိသတ်၏ အသိအမှတ်ပြုခြင်းကို ရနိုင်မရနိုင် မခန့်မှန်းနိုင်သေးချေ။
"စိတ်အေးအေးထား မင်း ကောင်းကောင်းလုပ်ခဲ့တာပဲကို ..."
သူ့နားရွက်နားကပ်ကာ နှစ်သိမ့်ပေးလိုက်သည့် ကျိမြန်၏ တီးတိုးစကားသံမှာ ဩရှအက်ကွဲနေသည်။
ရှောင်ကျားရှု၏ အတွေးတို့ ရုတ်ချည်း သွေဖယ်သွားတော့၏။
ကျိကောရဲ့အသံက တအားကို မိုက်တာပဲ သူ့ဇာတ်လမ်းတွေမှာ အသံသရုပ်ဆောင် မသုံးဘဲ ပင်ကိုယ်အသံကိုပဲသုံးတာ အံ့ဩစရာ မရှိတော့ပါဘူး အိုက်ယား အသံနဲ့တင် ဗိုက်ကြီးတော့မှာပဲ ...
စိတ်လှုပ်ရှားနေမှုကိုပင် မေ့လျော့သွားကာ နားရွက်ဖျားကိုသာ တိတ်တဆိတ် ပွတ်သပ်နေလိုက်တော့သည်။
ကျိမြန်က နက်နက်ရှိုင်းရှိုင်း ပြုံးလိုက်သည့်အတွက် နားရွက်ဖျားတို့ တဆတ်ဆတ် တုန်ရီသွားပြန်၏။ ဇာတ်ဝင်သီချင်းသံ ထွက်ပေါ်လာ၍သာ မဟုတ်ပါလျှင် အိုင်ဒေါဖြစ်သူ၏ ခပ်နိမ့်နိမ့်အသံထဲတွင်သာ ယစ်မြူးပျော်ဝင်နေဦးမည်ဖြစ်သည်။
ဇာတ်ကြောင်းမှာ ဖြည်းနှေးလှသည့်အတွက် ပရိသတ်က များစွာ မခံစားရ။ သို့သော် ရှောင်ကျားရှုကမူ သူ၏ သရုပ်ဆောင်မှုများ ကွဲပြားသွားကြောင်း အလွယ်တကူပင် သဘောပေါက်ပေသည်။ အစောပိုင်းကာလများတွင် သူသည် သရုပ်ဆောင်ခြင်း၏ အနှစ်သာရကို နားမလည်သေး။ သူ့ဘဝ၏ အခြားတစ်ဖက်ခြမ်းကို တင်ဆက်ပြသခြင်းမျှသာ ဖြစ်ပေသည်။ ၎င်းမှာ သဘာဝကျလှသည် ဆိုသော်ငြား များစွာ အထင်ကြီးဖွယ် မကောင်းလှ။နောက်ဆုံးတွင်တော့ "သရုပ်ဆောင်စွမ်းရည် မပါရှိသည့် ဖျော်ဖြေမှုမှာ ချည့်နဲ့ထိုင်းမှိုင်းကာ စွမ်းအင်ကင်းမဲ့လှသည်" ဟူသည့် စကားကို သဘောပေါက်သွားချေပြီ။
နောက်ပိုင်းအချိန်များတွင်တော့ ဇာတ်ကောင်စရိုက်ထဲ နစ်ဝင်လာကာ သရုပ်ဆောင်စွမ်းရည်မှာလည်း တစ်စထက်တစ်စ တိုးတက်လာတော့သည်။ သူ သရုပ်ဆောင်ရသည့် နေရာများကို ဝေဖန်ရေးဆရာတစ်ဦးကဲ့သို့ တိတ်တဆိတ် အကဲဖြတ်နေရင်း ထူးချွန်သည့်အချက် သို့မဟုတ် လိုအပ်သည့် အချက်များကို တိတ်တဆိတ် ချရေးထားလိုက်ပြီး ပရိသတ်များနည်းတူပင် ဇာတ်ကြောင်း၏ ဆွဲဆောင်မှုအောက်တွင် စီးမျောနေလိုက်သည်။ လင်ဖုန်း၏ သေဆုံးမှုအပိုင်းကို ရောက်သည့်အခါ သူ့စိတ်တစ်ခွင်လုံး ဗလာသပ်သပ် ဖြစ်သွားကာ ကျိမြန်၏ အသက်မပါသည့် မျက်ဝန်းတို့ကိုသာ မရေမတွက်နိုင်လောက်အောင် စိုက်ကြည့်နေလိုက်တော့သည်။
ထိုမျက်ဝန်းထဲရှိ အရဲစွန့်မှုနှင့် ဝမ်းနည်းကြေကွဲခြင်းတို့က သူ့နှလုံးသားကို လှိုင်းလုံးကြီးများနှယ် တဝုန်းဝုန်း တိုက်စားကာ အတွေးစတို့ကို မောင်းထုတ်လျက် နှလုံးသားတစ်ခုလုံး ဓားထက်ထက်ဖြင့် လှီးဖြတ်ခံနေရသည့်နှယ် ခံစားသွားရတော့သည်။ မျက်ရည်တို့ တလိမ့်လိမ့် ကျဆင်းလာသည်ကို သတိမပြုမိသေး။ လည်ပင်းနားအထိ ရောက်လာကာမှသာ မျက်နှာကို တစ်သျှူးဖြင့် အလျင်အမြန် သုတ်လိုက်ရတော့သည်။
ထို့နောက်တွင်လည်း အတွေးလွန်နေရန် အချိန်မရှိ။ တစ်လောကလုံးကို ဖျက်ဆီးရန် စိတ်ဆုံးဖြတ်ထားသည့် လင်ထောင်အပေါ် လုံးလုံးလျားလျား နစ်ဝင်နေရာ လင်ထောင် ထိခိုက်လျှင် သူလည်း နာကျင်၊ လင်ထောင် ရူးသွပ်သွားသည်ကို မြင်လိုက်ရလျှင် သူကိုယ်တိုင်လည်း လမ်းပျောက်သွားသည့်နှယ် ခံစားလိုက်ရတော့သည်။ ပျော်ရွှင်မှု၊ ဝမ်းနည်းမှုအားလုံး ရုပ်ရှင်ထဲရှိ ဇာတ်ကောင်တို့၏ ကြိုးကိုင်မှုအောက် ကျရောက်သွားတော့သည်။ ကျိမြန်၏ သရုပ်ဆောင်မှုမှာ အလွန်အမင်း သာလွန်ကောင်းမွန်လှသည့်အတွက် ခံစားချက်တို့ကို ရုန်းမထွက်နိုင်သေး။ လင်ထောင်၏ ညီအဖြစ် သရုပ်ဆောင်ခဲ့ရသည့်အတွက် ထိုခံစားချက်တို့မှာ အဆရာထောင်သောင်းမက ပိုမိုသန်မာကာ စိတ်ကူးယဉ်ကမ္ဘာကို လက်တွေ့ကမ္ဘာထဲသို့ ဆွဲခေါ်လာမိတော့သည်။
Xxxxxx