Chapter 77
တိုက်ရိုက်ထုတ်လွှင့်မှုကို မကြာခင် စတင်တော့မည်ဖြစ်သည်။ တင်ဆက်သူက မိတ်ဆက်ပေးနေစဉ်အတွင်း လောကျန်းဝေ့က ဦးဆောင်လျက် ကျိမြန်၊ ရှစ်ထင်းဟန်၊ မြောင်မူချင်၊ ရှောင်ကျားရှုနှင့် လင်းလဲ့ယန်တို့ အစဉ်လိုက် စင်ပေါ် တက်လာခဲ့ကြသည်။ ကျိမြန်၏ အဝတ်အစားတို့ကို တွေ့လိုက်ရသည့်အခါ ရှောင်ကျားရှု၏ မျက်လုံးအစုံ ပြူးကျယ်သွားတော့သည်။ သူတို့နှစ်ဦး ဝတ်ဆင်ထားသည်မှာ တံဆိပ်တစ်ခုတည်း ဖြစ်ရုံသာမက တစ်ယောက်က အဖြူနှင့် အပြာကို ဝတ်ထားပြီး ကျန်တစ်ယောက်က အမဲနှင့် ခဲရောင်ကို ဝတ်ဆင်ထားသည်။ ချစ်သူစုံတွဲဝတ်စုံကဲ့သို့ပင်။ ထို့ပြင် L ကုမ္ပဏီမှ ထုတ်ထားသည့် ဆင်တူခါးပတ်သာမက Richard Mille ၏ နာရီကိုပါ ဝတ်ဆင်ထားသေးသည်။ ထိုနာရီမှာလည်း နိုင်ငံတစ်နိုင်ငံတည်းကို ဖြန့်ချီသည့် ဆင်တူ limited edition ဖြစ်သည်။
ကျိမြန်ကလည်း အနည်းငယ် ကြောင်အသွားပြီးကာမှ မသိမသာ ပြုံးလိုက်သည်။ အမျိုးသားသရုပ်ဆောင်များမှာ အမျိုးသမီးသရုပ်ဆောင်များကဲ့သို့ မဟုတ်။ အဝတ်ဆင်တူ ဝတ်မိသည့်တိုင် ပြဿနာ မဖြစ်နိုင်ပေ။ ဆင်တူဝတ်ထားသည့်တိုင် တစ်ဦးက ချောမောကာ တစ်ဦးက ရုပ်ဆိုးနေပါလျှင်မူ အခြေအနေမှာ တစ်မျိုးပြောင်းသွားမည်ဖြစ်သည်။ ကျိမြန်နှင့် ရှောင်ကျားရှုမှာမူ နှစ်ယောက်ယှဉ်ရပ်နေသည့်တိုင် ရုပ်ရည်အရာတွင် မည်သူကမှ မနိမ့်ကျ။ အလွန်အမင်းပင် ကြည့်ကောင်းတင့်တယ်လှပေသည်။ တစ်ယောက်က သက်ဝင်လှုပ်ရှားကာ ကျန်တစ်ယောက်ကမူ လွှမ်းမိုးနိုင်သည့် အရိပ်အယောင်တို့ ဖုံးလွှမ်းထားသည်။
အစီအစဉ် တင်ဆက်သူက ဘေးပတ်လည်ကို လှည့်ပတ်ကြည့်လျက် စနောက်လိုက်သည်။
"ဟေး မင်းတို့နှစ်ယောက်က ဒီလိုဝတ်ဖို့ စီစဉ်ထားကြတာလား ..."
ရှောင်ကျားရှု၏ ပါးနှစ်ဖက် ရုတ်ချည်း နီမြန်းသွားတော့သည်။ သူက လက်ကို အလျင်အမြန် ခါယမ်းလျက် ပြောလိုက်၏။
"မဟုတ်တာ မဟုတ်တာ ကျိကောလည်း ဒီလိုဝတ်လာလိမ့်မယ်လို့ တကယ်ကို မသိထားပါဘူး ဒီလိုဝတ်ထားတာတောင် ကျိကောက ကျွန်တော့်ထက် အရပ်ပိုရှည်ပြီး အများကြီး ကြည့်ကောင်းတယ် ..."
ကျိမြန်ကို တိတ်တိတ်လေး ခိုးကြည့်ပြီးနောက် သူလည်ပင်းတစ်ခုလုံး နီမြန်းလာတော့သည်။
ဒီဝတ်စုံက ဘယ်သူဝတ်ဝတ် ခြေတံရှည်တယ်လို့ ခံစားရတယ် ဆိုပေမယ့် ကျိမြန်က ၁၉၀ စင်တီမီတာတောင် ရှိတာလေ သူ့ခြေထောက်နှစ်ဖက် ပေါင်းလိုက်ရင် မိုးထိတောင် မြင့်သွားလိမ့်ဦးမယ် ကျိကောက ဘာလို့ ဆိုဖာသေးသေးလေးမှာ ထိုင်နေရတာလဲ သူ့ခြေတံရှည်ကြီးတွေအတွက် နေရာမရှိတော့ဘူးလေ ဟုတ်တယ်မဟုတ်လား ...
ရှောင်ကျားရှုက ထိုသို့တွေးနေရင်း ဘယ်ပြန်ညာပြန် ကြည့်လိုက်သည်။ သူ့ပုံစံမှာ တစ်နေရာရာသို့ ပြေးထွက်သွားတော့မည့်ဟန်ပင်။ ကျိမြန်မှာ ရယ်ရမည်လား ငိုရမည်လားပင် မသိတော့။ သူ့အနားသို့သွားကာ ခေါင်းကို ပွတ်ပေးလျက် တိုက်ရိုက်ထုတ်လွှင့်နေခြင်းဖြစ်ကြောင်း ပြောလိုစိတ်ပင် ဖြစ်ပေါ်လာတော့သည်။
"ဒါက ညီအစ်ကိုဝတ်စုံလေ ..."
ကျိမြန်က အကျဉ်းချုပ် ရှင်းပြလိုက်သည်။ ထို့နောက် သဘာဝကျကျပင် ရှောင်ကျားရှု၏ နောက်ကျောကိုပါ ပုတ်ပေးလိုက်သေးသည်။
ထိုအခါမှ ရှောင်ကျားရှုလည်း အသိစိတ်ပြန်ကပ်လာပြီး ကျိကော၏ဘေးတွင် ဝင်ထိုင်လိုက်သည်။ ရင့်ကျက်တည်ငြိမ်သူနှင့် ငယ်ရွယ်ချောမောသူနှစ်ဦး ဘေးချင်းယှဉ်လျက် စခရင်တွင် ပေါ်လာသည့် ပုံရိပ်မှာ အလွန် လိုက်လျောညီထွေစွာဖြင့် မျက်စိဖမ်းစားနိုင်နေပေသည်။ ကြည့်ရှုသူတို့၏ အကြည့်အားလုံးမှာ စခရင်ကိုသာ မခွဲနိုင်မခွါနိုင် ကပ်ငြိတွယ်နေတော့သည်။
"ဟေး CP အနံ့တွေ ပြင်းပြင်းထန်ထန်ကြီးကို ရနေတယ်နော် ဒါက စုံတွဲဝတ်စုံ မဟုတ်လား ..."
ကြည့်ရှုသူတစ်ဦးက မှတ်ချက်ရေးလိုက်လျှင် သဘောတူထောက်ခံသူများ အများအပြား ထွက်ပေါ်လာတော့သည်။
သူတို့ရောက်နေသည့် ရသစုံရှိုးမှာ စကားပြောရသည့် ရှိုးအမျိုးအစား ဖြစ်သည့်အပြင် တင်ဆက်သူမှာလည်း အတော်ပင် စကားပြောကောင်းသူတစ်ဦး ဖြစ်သည့်အတွက် လေထုမှာ အလျင်အမြန်ပင် လှုပ်ရှားသက်ဝင်လာတော့သည်။ သူက ဒါရိုက်တာလောကျန်းဝေ့အတွက် ဦးစွာ တွင်းတူးပေးလိုက်သည်။
"အဓိကဇာတ်ကောင်တွေ အကုန်လုံး ရောက်နေပြီဆိုတော့ ဒါရိုက်တာကြီးအနေနဲ့ ဒီထဲက ဘယ်သူ့ရဲ့ သရုပ်ဆောင်ချက်ကို စိတ်တိုင်းအကျဆုံးလဲ ..."
လောကျန်းဝေ့၏ အကျင့်စရိုက်မှာ လွန်စွာ စိတ်ဝင်စားဖွယ် ကောင်းလှသည်။ ပုံမှန်အားဖြင့် သူ့အတွက် တွင်းတစ်ခု တူးပေးထားလျှင်ပင် မုချ ခုန်ချမည်ဖြစ်သည်။ သူက မတုန့်မဆိုင်း ပြန်ဖြေလိုက်သည်။
"သေချာပေါက်ကို ရှောင်ကျားရှုပဲပေါ့ ..."
"ဘာလို့လဲ ..."
"ဘာလို့လဲဆိုတော့ သူက ခရီးအပေါက်ဆုံးသူ ဖြစ်လို့ အစောပိုင်းတုန်းကတော့ သရုပ်ဆောင်တယ်ဆိုတာ ဘာမှန်းတောင် သူမသိဘူး ဒါပေမယ့် နောက်ပိုင်းကျ ကျိမြန်နဲ့တောင် အပြိုင် သရုပ်ဆောင်လာနိုင်တယ် ဒီဓာတ်ပုံတွေကို ကြည့်ကြည့်လိုက်ရင် နားလည်လာမှာပါ ..."
လောကျန်းဝေ့က စခရင်ကို ညွှန်ပြရင်း ကြိုတင်တည်းဖြတ်ထားပြီးသော ဓာတ်ပုံများကို ထုတ်ပြလိုက်သည်။ ထိုင်ခုံပေါ်တွင် ပုံစံမျိုးစုံဖြင့် ပျင်းတိပျင်းရွဲ ထိုင်နေရင်း ဂိမ်းဆော့နေသည့် ရှောင်ကျားရှုမှာ အလွန်အမင်း သတိလက်လွတ် ဖြစ်နေဟန်ပင်။ နောက်တစ်ပုံမှာမူ နောက်ခံသီချင်းပင် ပါဝင်လိုက်သေးသည်။ "wash scrub scrub; wash scrub scrub..."
ထို့နောက် ဓာတ်ပုံက ၃၆၀ ဒီကရီ လှည့်သွားကာ ရှောင်ကျားရှု၏ ဖုန်းကြည့်နေသော ပုံ ဘက်ပေါင်းစုံမှ ထွက်ပေါ်လာတော့သည်။
စင်အောက်ရှိ ပရိသတ်အားလုံး ဝါးခနဲ ရယ်မောလိုက်ကြသည်။ ကျိမြန်၊ ရှစ်ထင်းဟန်နှင့် အခြားသူများပင် ဟန်မဆောင်နိုင်အောင် ပြုံးလိုက်မိကြတော့သည်။ လင်းလဲ့ယန်တစ်ဦးတည်သာ မရယ်နိုင်မပြုံးနိုင် ဖြစ်နေသည့်အတွက် မျက်နှာအောက်ပိုင်းကို လက်ဖြင့်ဖုံးလျက်သာ မျက်လုံးအစုံတို့ကို ကွေးညွတ်လျက် ရယ်ချင်ဟန် ဆောင်နေလိုက်တော့သည်။
ရှောင်ကျားရှုမှာ ဤသို့ ဖြစ်လာလိမ့်မည်ဟု မျှော်လင့်မထားသည့်အတွက် မျက်နှာတစ်ခုလုံး ရှက်သွေးတို့ဖြင့် ရဲရဲနီလာတော့သည်။
"ဒါက ရိုက်ကွင်းကို ရောက်ကာစ ပုံစံပေါ့နော် အဲဒီ့တုန်းကဆို ဂိမ်းဆော့ဖို့လောက်ပဲ သိခဲ့တော့ ကျွန်တော်လေ သံမဏိဖြစ်မလာတဲ့ သံတုံးကို မုန်းလိုက်တာကို ..."
လောကျန်းဝေ့က နှစ်နှစ်ကာကာ ပြုံးပြလိုက်သည်။
"ဒါကတော့ သူ့ရဲ့ နောက်ပိုင်းပုံစံပေါ့ ဘယ်လိုလဲ အများကြီး ပြောင်းလဲမသွားဘူးလား ..."
ဖုန်းကြည့်နေသော လူငယ်လေး၏ ဓာတ်ပုံ ပျောက်ကွယ်သွားကာ ခွေးခြေတစ်လုံးကို သယ်လျက် မှတ်စုစာအုပ်ကို လက်က ကိုင်ထားပြီး ဘောပင်ကို နားရွက်ကြား ညှပ်ထားသော ရှောင်ကျားရှု၏ ပုံရိပ်က အစားထိုး ဝင်ရောက်လာတော့သည်။ သူက ရံဖန်ရံခါတွင် ဒါရိုက်တာလောအနား ထိုင်လျက်၊ တစ်ခါတစ်ရံ ကင်မရာသမားဘေး ထိုင်ကာ အချို့အချိန်များတွင် လက်ထောက်ဒါရိုက်တာဘေး သွားလျက် သိလိုသည်များကို မှတ်သားနေသည်။ အတိုချုပ် ပြောရပါလျှင် ရိုက်ကူးရေး လုပ်ချိန်တိုင်း ဘေးနားတွင် ခွေးခြေတစ်လုံးပေါ် ထိုင်နေသည့် ရှောင်ကျားရှုကို တွေ့ရမည်ဖြစ်သည်။
အစောပိုင်းက အလေးအနက် မထားသည့် ပုံစံနှင့် နောက်ပိုင်း အလေးအနက်ထားလာသည့် ပုံစံ နှစ်ခုလုံးကို ထိုဓာတ်ပုံများမှတစ်ဆင့် တွေ့နိုင်ကာ သူ့အရည်အချင်းမှာလည်း အလျင်အမြန်ပင် တိုးတက်လာတော့သည်။
အစောပိုင်းက ရယ်မောနေသည့် ပရိသတ်များကလည်း စိတ်ပါလက်ပါ ဩဘာပေးလိုက်ကြတော့သည်။
ရှောင်ကျားရှုအဖို့လည်း သူ့ကိုယ်ပိုင်ပြောင်းလဲမှုကို ပထမဆုံးအကြိမ် မျက်မြင်ကြုံဖူးခြင်းဖြစ်သည်။ ရှက်ရွံ့နေသော အမူအယာကို လေးနက်မှုတို့က အစားထိုး ဝင်ရောက်လာပြီး လက်နှစ်ဖက်ကို စုစည်းလျက် လောကျန်းဝေ့ကို ရိုးရိုးသားသား ပြောလိုက်သည်။
"ဒါရိုက်တာလော ကျွန်တော် ဆက်ပြီးတော့ ကြိုးစားပါ့မယ် အဆက်မပြတ် ကူညီလေ့ကျင့်ပေးတဲ့အတွက်လည်း ကျေးဇူးတင်ပါတယ် ..."
လောကျန်းဝေ့က ပြုံးလျက်သာ လက်ကို ယမ်းပြလိုက်သည်။
ကျိမြန်က စခရင်ကို ကြည့်လျက် ထပ်ပြောလိုက်သည်။
"ဒီခွေးခြေပေါက်စလေးက ရှောင်ကျားရှုရဲ့ သီးသန့်ပလ္လင်လေ သူက ဒါကို ယွမ်နှစ်ဆယ်ပေးပြီးတောင် ဝယ်ခဲ့တာ ရှေ့လျှောက် သွားလေရာ သယ်သွားချင်လည်း အဆင်ပြေတယ်တဲ့ ..."
ကြည့်ရှုနေသူများက တစ်ဖန် အူလှိုက်သည်းလှိုက် ရယ်မောလိုက်ကြပြန်သည်။
ရှောင်ကျားရှုက ကျိမြန်ကို ဒေါသမပါသည့် အကြည့်တို့ဖြင့် ကြည့်လျက် ပြုံးပြလိုက်သည်။ ကျိမြန်၏ လက်တို့မှာ ယားယံလာသည့်အတွက် အယောင်ယောင် အမှားမှားဖြင့် သူ့နဖူးကိုသာ ပွတ်သပ်လိုက်တော့သည်။
တိုက်ရိုက်ထုတ်လွှင့်မှုကို အင်တာနက်ပေါ်မှတစ်ဆင့် ကြည့်နေသူများမှာလည်း သူတို့နှစ်ဦးကြား တုန့်ပြန်ပုံကြောင့် အလွန့်အလွန် စိတ်လှုပ်ရှားသွားကြတော့သည်။ သူတို့က မှတ်ချက်ကဏ္ဍကို အလားတူမှတ်ချက်များစွာဖြင့် ဖုံးလွှမ်းလိုက်ကြသည်။
"ဘုရားရေ အကြည့်ချင်း စုံသွားတာလေးကို ကြည့်လိုက်ပါဦး အရမ်းကို နွေးထွေးပြီး ချစ်ဖို့ကောင်းတာပဲ ကျိမြန်က ရှောင်ကျားရှုကို ခဏခဏ ကြည့်ပြီး ပြုံးပြုံးနေတာ ရှောင်ကျားရှုကလည်း သူ့ကို ခိုးကြည့်ပြီး အကြည့်ချင်း ဆုံသွားတိုင်း ရယ်လိုက်တာများ အရူးလေးအတိုင်းပဲ ငါ့ကို အချိုပိတ်ပြီး သေအောင် လုပ်နေကြတာလား "
တင်ဆက်သူက အချိန်အတော်ကြာ ရယ်မောနေပြီးကာမှ မေးလိုက်သည်။
"အဲဒီ့ခွေးခြေလေးကို တကယ်ပဲ သွားလေရာ သယ်သွားတာလား ..."
"အာ အဲဒါက ကားနောက်ဖုံးထဲမှာ ထည့်ထားတာပါ ..."
ရှောင်ကျားရှုက ခေါင်းငြိမ့်ပြရင်း မျက်နှာကို လက်ဖြင့် ကာထားလိုက်သည်။ သူ့ပုံစံမှာ အလွန်အမင်း ရှက်ရွံ့နေဟန်ပင်။
အင်တာနက်သုံးစွဲသူများ၏ မှတ်ချက်က စခရင်တစ်ခုလုံးကို ဖုံးလွှမ်းသွားပြန်သည်။ အားလုံးက သူ၏ ချစ်ဖို့ကောင်းမှုကို အလုအယက် ချီးကျူးနေကြသည်။ သူ့ပုံစံမှာ အေးစက်စက်အလှလေး ပုံစံမျိုး ဖြစ်သည့်တိုင် ပြုံးလိုက်ချိန်တွင်မူ တောက်ပကာ အပြစ်ကင်းသည့်ဘက်သို့ တစ်ဖြည်းဖြည်း ပြောင်းလဲသွားတော့သည်။
တင်ဆက်သူက သူ့ကို ဆက်မေးလိုက်သည်။
"ကြားမိတာတော့ ဒါက မင်းရဲ့ ပထမဆုံး ရုပ်ရှင်ဆို ပြီးတော့ ကျိလောင်ရှီးက မင်းရဲ့ဆရာဆိုတော့ ဖိအားများတယ်လို့ မခံစားရဘူးလား ..."
ရှောင်ကျားရှုက ခေါင်းယမ်းပြလိုက်သည်။
"ဘာဖိအားမှ မရှိပါဘူး ..."
"အယ် မင်းရဲ့ စိတ်ပိုင်းဆိုင်ရာ ကြံ့ခိုင်မှုက ဒီလောက်အထိတောင် ကောင်းတာလား ..."
တင်ဆက်သူက မျက်ခုံးပင့်လျက် မေးလိုက်သည်။
"ကျွန်တော့်ရဲ့ စိတ်ပိုင်းဆိုင်ရာက ကြံ့ခိုင်လို့ မဟုတ်ဘဲ သရုပ်ဆောင်တာနဲ့ ပတ်သက်ပြီး ဘာမှ မသိလို့ပါ သရုပ်ဆောင်တာက ဘာလဲဆိုတာကို trailer ထဲက 2:56 အပိုင်းရောက်မှပဲ သေချာ ခံစားမိသွားတာ အဲဒီ့အခန်းမှာ ကျိကောရဲ့ ပြတ်သားနေတဲ့ အကြည့်တွေကြောင့် တုန်လှုပ်ပြီး ကြက်သေသေသွားတာ အဲဒီ့အခါကျမှ "အိုး သရုပ်ဆောင်တယ်ဆိုတာ ဒါမျိုးပါလား စိတ်ကူးယဉ်ဇာတ်ကောင်တွေကို လက်တွေ့လို့ ထင်ရလောက်အောင် ဖန်တီးတာမျိုးပေါ့" လို့ ချက်ခြင်း သဘောပေါက်သွားတော့တာ ..."
သူ့စကားအဆုံး၌ စခရင်ပေါ်သို့ ထွက်ပေါ်လာသော trailer ကြောင့် ကြည့်ရှုသူအားလုံး အံ့အားသင့်သွားကြတော့သည်။ စခရင်ပေါ်ရှိ ကျိမြန်၏ အကြည့်တို့မှာ အမှန်တကယ်ပင် ကြောက်မက်ဖွယ်ကောင်းလှသည်။ ထိုကဲ့သို့ ပြင်းထန်လှသည့် ရုန်းကန်မှုနှင့် ဝမ်းနည်းမှုတို့က ကြည့်ရှုသူ၏ နှလုံးသားထဲသို့ ပြိုင်ဘက်မရှိ ထိရိုက်သွားစေတော့သည်။
trailer ကြည့်ရုံမျှဖြင့် ဇာတ်ကြောင်းတစ်ခုလုံးကို မခန့်မှန်းနိုင်သော်ငြား အဓိက သရုပ်ဆောင်များ၏ အရည်အချင်းကြောင့် ရုပ်ရှင်၏ ဂုဏ်သတင်းမှာ အခြေခိုင်မာသွားတော့သည်။ "ရုံတင်မယ့်ရက်ကို စောင့်နေပါမယ်" ဟူသည့် မှတ်ချက်များက တိုက်ရိုက်ထုတ်လွှင့်သည့် အခန်းတစ်ခုလုံးကို ဖုံးလွှမ်းသွားတော့သည်။
တင်ဆက်သူကို စကားစကို အပြတ်မခံဘဲ ဆက်မေးလိုက်သည်။
"ဆိုတော့ မင်းက ကျိလောင်ရှီးရဲ့ ပရိသတ်ပေါ့ ဟုတ်လား အိုး ဟုတ်သားပဲ လင်းလဲ့ယန်ကလည်း ကျိလောင်ရှီးရဲ့ ပရိသတ်ပဲနော် မင်းရဲ့ Weibo က ကျိလောင်ရှီးနဲ့ ပတ်သက်တာတွေ အပြည့်ပဲနော် လွန်ခဲ့တဲ့ လေးနှစ်လောက်ကတည်းက ဟုတ်တယ်မဟုတ်လား ..."
လင်းလဲ့ယန်က ပြုံးကာ ခေါင်းငြိမ့်ပြလိုက်သည်။
"ဟုတ်ကဲ့ ကျွန်တော်က ကျိကောရဲ့ အမာခံ ပရိသတ်ပါ ..."
"ကျွန်တော်ရောပဲ ..."
ရှောင်ကျားရှုမှာ ဘာကြောင့် ဤသို့ ပြောမိမှန်း သူ့ကိုယ်သူလည်း သတိမထားမိလိုက်ပေ။
ပရိသတ်ဖြစ်တာ မကြာသေးဘူး ဆိုပေမယ့် သူလည်း သံတုံးပဲလေ သံတုံးအဟောင်းတွေထက်တောင် ပိုပြီး သန်မာသေးတယ် ...
(အမာခံပရိသတ်ရဲ့ ရှေ့ဆုံးစကားလုံးက သံတုံးဆိုတဲ့ စကားလုံးနဲ့ အတူတူဖြစ်နေလို့ ဒီလိုပြောလိုက်တာပါ သူက ဟိုးအရင်ကတည်းက ပရိသတ်ဖြစ်လာတဲ့သူတွေထက်တောင် ပိုပြီး အမာခံဖြစ်သေးတယ်ဆိုတဲ့ သဘောပါ)
စိတ်ဓာတ်တက်ကြွနေသော ပရိသတ်က မှတ်ချက်ကဏ္ဍတစ်ခုလုံးကို ဖုံးလွှမ်းပစ်လိုက်သည်။
"Ah အပင်ပေါက်ကလေးကလည်း မျက်နှာရအောင် တိုက်ခိုက်နေတာ မဟုတ်လား ချစ်စရာကောင်းလိုက်တာ ..."
တင်ဆက်သူက လက်နှစ်ဖက်ကို ဖျစ်ညှစ်လျက် ပြောလိုက်သည်။
"နှစ်ယောက်စလုံးက ကျိလောင်ရှီးရဲ့ ပရိသတ်တွေလို့ ပြောနေကြမှတော့ စစ်ဆေးကြည့်လိုက်ကြရအောင် တစ်ယောက်လောက် မေးခွန်းဘုတ်ပြားတွေ ယူလာခဲ့ကြပါဦး ကျိလောင်ရှီးဖို့ရောနော် ..."
ထိုဖြစ်ရပ်မှာ ကြိုတင်စီစဉ်ထားခြင်း မဟုတ်သည့်အတွက် မေးခွန်းဘုတ်ပြားများ ရသည့်အခါ သုံးယောက်စလုံး အနည်းငယ် စိတ်ရှုပ်ထွေးသွားတော့သည်။ တင်ဆက်သူက ကျိမြန်ကို သူ့ဘေးထိုင်စေလျက် ခပ်ဟဟ ရယ်မောလိုက်သည်။
"ဒီလိုမှပဲ ကျိလောင်ရှီးနဲ့ ဆက်စပ်နေတဲ့ မေးခွန်းတွေကို မေးနိုင်မှာ ကျိလောင်ရှီးနဲ့ အဖြေတူတဲ့သူ ဘယ်သူမဆို တစ်မှတ်ရမယ်နော် ပရိသတ်အစစ်လား အတုလား အမှတ်ပေါင်းထွက်လာမှ ဆက်ပြောကြတာပေါ့ ..."
ရှောင်ကျားရှုက အလွန်အမင်း အားတက်သရော ဖြစ်နေသော်ငြား လင်းလဲ့ယန်မှာမူ ပထမဆုံးအကြိမ် သူ့ကိုယ်သူ သာလွန်သည်ဟု ခံစားလိုက်ရတော့သည်။
ကျိကောနဲ့ နှစ်တွေအကြာကြီးတောင် တွဲလာတာ သူ့အကြိုက်တွေကို ဘယ်လိုလုပ် မသိဘဲ နေမလဲ ...
Xxxxxxxx
Chapter 78
အင်တာနက်သုံးစွဲသူများ၏ အကြည့်မှာ လွန်စွာ စူးရှလာပေသည်။ လင်းလဲ့ယန်၏ အနိုင်ပိုင်းနိုင်ဟန် အမူအယာကို သတိထားမိလိုက်သူတစ်ဦးက ပို့စ်တင်လိုက်သည်။
"လင်းလဲ့ယန်က ဘာဖြစ်နေတာလဲ သူ့ပုံစံကြည့်ရတာ နတ်ဘုရားကျိအကြောင်း တကယ် သိထားသလိုပဲ သူက တကယ်ပဲ နတ်ဘုရားကျိရဲ့ အမာခံပရိသတ်လား ..."
လင်းလဲ့ယန်မှာ အလွန်နူးညံ့ကာ တင့်တယ်လှသည့် ရုပ်ရည်သွင်ပြင်ကိုသာမက နှစ်လိုဖွယ် အပြုံးတစ်ခုကိုပါ ပိုင်ဆိုင်ထားသည့်အပြင် ပွဲဦးထွက်ကာလ၌ ကျိမြန်၏ အားပေးမှုကိုပါ ရရှိထားသည့်အတွက် ပရိသတ်များ၏ အာရုံစူးစိုက်မှုကို ဆွဲဆောင်ထားနိုင်ခဲ့သည်။ သို့သော် နောက်ပိုင်းတွင် မြောင်မူချင်၊ ရှောင်ကျားရှုတို့နှင့် ပြဿနာ ဖြစ်ခဲ့သည့်အပြင် Love Chaser ၏ မဲပေးသည့်ကိစ္စပါ ဖြစ်ပွားခဲ့သည့်အတွက် ငှားရမ်းထားသော ရေတပ်များက သူ့ကို မဲအနိုင်ရစေရန် ဆောင်ရွက်ပေးနိုင်ခဲ့သည့်တိုင် ရှောင်ကျားရှု၏ ပရိသတ်များက သူ့ကို ဆူပူကြိမ်းမောင်းနေကြဆဲဖြစ်သည်။
ထိုကိစ္စများ ဖြစ်ပြီးကတည်းက မည်သည့်အကြံအစည်မှ မထုတ်တော့ဘဲ သူ့ဇာတ်ကောင်အသစ်အတွက်သာ တိတ်တဆိတ် ကြိုတင်ပြင်ဆင်နေခဲ့သည်။ သို့သော် ပရိသတ်တို့၏ အတွေးထဲတွင်မူ သူအတွက် ပုံရိပ်တစ်ခု တည်ရှိနေပြီးဖြစ်သည်။ သူ့နာမည်ကို ပြောလေတိုင်း အကြံအစည်များဖြင့် ပြည့်နေသူ၊ နောက်ကျောဓားနဲ့ထိုးတဲ့သူ အစရှိသော ယုတ်ညံ့သည့် စကားလုံးများသာ ဆက်တိုက် ထွက်ပေါ်လာတော့သည်။
ကြည့်ရှုနေသည့် ပရိသတ်တစ်ဦးက အထူးအဆန်း ပြန်ဖြေလိုက်သည်။
"သူက နတ်ဘုရားကျိရဲ့ လက်ထောက် ဖြစ်ခဲ့ဖူးတယ်လေ သူ့ Weibo မှာ နတ်ဘုရားကျိနဲ့ ပတ်သက်တဲ့ ပို့စ်တွေ ရှိနေတာ ထုံးစံပါပဲ ဒါပေမယ့် ဘယ်လိုဖြစ်လို့ အမာခံပရိသတ် ဖြစ်သွားရတာလဲ တက်ကြွလွန်းတယ်ဆိုလည်း အတိုင်းအတာတော့ ရှိရဦးမှာပေါ့ ..."
"သူက နတ်ဘုရားကျိရဲ့ လက်ထောက် ဖြစ်ခဲ့ဖူးတာလား သူနဲ့ ဘာလို့ စာချုပ်ချုပ်ခဲ့လဲ စဉ်းစားနေတာ အံ့ဩစရာ မရှိတော့ပါဘူး ..."
"နတ်ဘုရားကျိက သူ့ကို အရမ်း ထောက်ပံ့ပေးခဲ့တာနော် ပွဲဦးထွက်မှာတင် "တမန်တော်" မှာ သရုပ်ဆောင်ခွင့် ရသွားတာ ဒါတောင် တန်ဖိုးထားရကောင်းမှန်း မသိဘူး လူတိုင်းက နောက်ကျောလှည့်လိုက်ပြီ ဆိုတာနဲ့ ဟိုဟာဆိုလည်း အပုပ်ချ၊ ဒီဟာဆိုလည်း မကောင်းပြော ရှောင်ကျားရှုရဲ့ အခွင့်အရေးတွေကိုတောင် ဖြတ်ခုတ်လိုက်သေးတယ် ဟို အသုံးမကျတဲ့ မဲပေးတဲ့ဟာကြီးကြောင့်သာ မဟုတ်ရင် Love Chaser ရဲ့ ဇာတ်လိုက်နေရာက သေချာပေါက် ငါတို့အပင်ပေါက်လေးလက်ထဲ ရောက်မှာပဲ ..."
လင်းလဲ့ယန်မှာ မှားယွင်းစွပ်စွဲခံလိုက်ရတော့၏။
Love Chaser ရဲ့ ဇာတ်လိုက်နေရာက အစောကြီးကတည်းက သူ့ဟာပါနော် ဘယ်လိုဖြစ်လို့ ရှောင်ကျားရှုလက်ထဲကနေ ဖြတ်ခုတ်တာ ဖြစ်သွားရတာလဲ ပွဲဦးထွက်ကာစ အနုပညာလောကရဲ့ လှည့်ကွက်တွေအကြောင်း နားမလည်သေးလို့ မှားခဲ့မိတာပဲ ရှိတာ အဲဒါကြောင့်လည်း ဒီလိုမျိုး စိတ်ရူးပေါက်ချင်စရာ ဆုံးရှုံးမှုတွေကို ကြုံရတာပေါ့ အခုအချိန်မှာ သူတွေးမိနေတာ တစ်ခုပဲ ရှိတယ် ကျိကောပြောတာ မှန်တယ် ဆိုတာပဲ သူ့အနေနဲ့ တကယ်ကို ဘာမှ လုပ်စရာ မလိုခဲ့ဘူး ရုပ်ရှင်ကောင်းကောင်းရိုက် ကောင်းကောင်းနေ ကျန်တာအကုန် ကျိကောက စီစဉ်ပေးမှာကို ...
အခုတော့ အားလုံး နောက်ကျသွားပြီ ...
သူက ကျိကောကိုတစ်လှည့် မေးခွန်းကတ်ပြားကိုတစ်လှည့် ကြည့်နေလိုက်သည်။ နှလုံးသားတစ်ခုလုံး ခါးသီးလာသည့်တိုင် မျှော်လင့်ချက်တို့ ပြည့်နှက်နေဆဲဖြစ်သည်။ သူသည်သာ ကျိကောကို နားအလည်နိုင်ဆုံးသူဖြစ်ရာ ဤကိစ္စကြောင့် သူတို့နှစ်ဦးကြားရှိ အမှတ်တရလေးများ ပြန်လည် နိုးထလာနိုင်စေရန် မျှော်လင့်မိနေဆဲဖြစ်သည်။
တင်ဆက်သူက ကျိမြန်ကို အဖြေများအား မတော်တဆ မပြသမိစေရန် အလို့ငှာ ထိုင်နေသည့်ပုံစံကို ပြင်ပေးရန် ပြောပြီးကာမှ ခပ်ပြုံးပြုံးဖြင့် မေးလိုက်သည်။
"ပထမဆုံး မေးခွန်းကတော့ ကျိလောင်ရှီးရဲ့ အကြိုက်ဆုံးအရောင်က ဘာလဲ ..."
ရှောင်ကျားရှုနှင့် လင်းလဲ့ယန်တို့က ခေါင်းငုံ့လျက် အပြိုင်အဆိုင် ချရေးနေကြစဉ် ကြည့်ရှုသူများကလည်း တစ်ယောက်နှင့်တစ်ယောက် အလုအယက် အဖြေကို ရေးလိုက်ကြသည်။ ကြည့်ရှုနေသူများကို အနှောင့်အယှက် မဖြစ်စေရန် အလို့ငှာ ဒါရိုက်တာက ထိုမှတ်ချက်များကို ဧည့်သည်များ၏ နောက်ကျောဘက်ရှိ စခရင်အကြီးကြီးပေါ်သို့ ရွှေ့ပေးလိုက်သည်။
တင်ဆက်သူက ရှင်းပြလိုက်သည်။
"အာ ကြည့်ရှုသူတွေကပါ အဖြေတွေ ရေးလာကြတာပါလား ကျွန်တော့်ရဲ့ တွက်ချက်မှုအရဆိုရင်တော့ အများစုက အနက်ရောင်ကို ဖြေထားကြတာပဲ အဲဒီ့နောက်မှာမှ ခဲရောင် ပြီးတော့ အဖြူရောင် ကြည့်ရတာ မင်းတို့ အိုင်ဒေါအတွက်တော့ အားလုံးက... "
သူက ကျိမြန်၏ အဖြေကို လှည့်ကြည့်ပြီးနောက်တွင်တော့ ပါးစပ်ကို အုပ်လျက်သာ ရယ်မောလိုက်တော့သည်။
"အိုက်ယား ရှက်စရာကောင်းလိုက်တာ ..."
စာရေးပြီးသွားသော ကျိမြန်က ရှောင်ကျားရှုကို အထူးတဆန်း ကြည့်နေလိုက်သည်။
လင်းလဲ့ယန်ကမူ ယုံကြည်ချက်အပြည့်ဖြင့်သာ ကတ်ပြားကို တင်းတင်းကြပ်ကြပ် ဆုပ်ကိုင်ထားလိုက်သည်။
"အဖြေကတ်ပြားတွေကို လှန်လိုက်ကြပါ ပြီးမှ ကျိလောင်ရှီးဆီက အဖြေမှန်ကို ကြည့်ကြည့်ကြတာပေါ့ မင်းတို့ရဲ့ နားလည်နိုင်စွမ်းကို စစ်ဆေးရမယ့်အချိန် ရောက်လာပြီ ..."
တင်ဆက်သူ၏ စကားအဆုံးတွင် ရှောင်ကျားရှုနှင့် လင်းလဲ့ယန်တို့ နှစ်ဦးစလုံး အဖြေကို တစ်ပြိုင်တည်း ပြလိုက်ကြကာ တစ်ဦးကိုတစ်ဦး စိုက်ကြည့်လိုက်ကြသည်။
ရှောင်ကျားရှုက "royal blue" ဟု ရေးပြီး လင်းလဲ့ယန်က "အနက်၊ ခဲရောင်နှင့် အဖြူရောင်" ဟု ရေးထားသည်။ သူတို့နှစ်ဦး၏ အဖြေများမှာ မတူညီကြသည့်အပြင် အမူအယာများမှာလည်း ကွဲပြားကြပေသည်။ တစ်ဦးက ဆော့ကစားနေသည့်နှယ် ပေါ့ပါးပျော်ရွှင်နေပြီး ကျန်တစ်ဦးကမူ ယုံကြည်ချက်အပြည့် ဖြစ်နေသည်။
(Royal blue ကလေ နက်ပြာလိုမျိုး အမဲရောင်ဘက်ကို သွားတာလည်း မဟုတ်ဘူး နေဗီပြာထက်လည်း ရင့်တယ် အနီးစပ်ဆုံးပြောရရင် နီလာရဲ့ အရောင်လိုမျိုးပါ)
အင်တာနက်သုံးစွဲသူများ၏ မှတ်ချက်များကလည်း မိုးသီးမိုးပေါက်များနှယ် တရစပ် ထွက်ပေါ်လာတော့သည်။ သူတို့က ဖြစ်နိုင်ချေအရှိဆုံး အဖြေသုံးခုကို ရေးထားသည့် လင်းလဲ့ယန်ကသာ နိုင်နိုင်ချေ များသည်ဟု ခန့်မှန်းလာကြသည်။ သူ့ကို တိုက်ခိုက်ဆဲဆိုသည့် မှတ်ချက်များကိုမူ မလိုလားအပ်သည့် သက်ရောက်မှုတို့ ဖြစ်မလာစေရန် အလို့ငှာ ဒါရိုက်တာက ပိတ်ဆို့ထားလိုက်တော့သည်။
စင်အောက်တွင် ရှိနေသည့် ပရိသတ်များကလည်း သူတို့၏ မှန်းဆချက်များကို ဝမ်းသာအားရ အော်ဟစ်လိုက်ကြသည်။ နတ်ဘုရားကျိက အမဲရောင်အဝတ်အစားများကိုသာ အများဆုံး ဝတ်ဆင်လေ့ ရှိသည့်အတွက် အများစုက အနက်ရောင်ဟုသာ ထင်ကြေးပေးလိုက်ကြသည်။ တစ်ချိန်က သူပါဝင်ခဲ့ဖူးသည့် ဖက်ရှင်ရှိုးတစ်ခုတွင် တင်ဆက်သူက သူ့အဝတ်အစားလဲခန်းကို ရိုက်ကူးပြရာ အခန်းထဲရှိ အဝတ်အစားများကို အရောင်အလိုက် စီစဉ်ထားပြီး အနက်၊ အဖြူနှင့် ခဲရောင်တို့မှာ နံရံသုံးခုအပြည့် ရှိနေပြီး အရောင်တောက်တောက်ဟူ၍ အနည်းငယ်သာ ရှိပေသည်။ ထိုအချက်ကို အခြေခံရပါလျှင် သူအကြိုက်ဆုံးအရောင်မှာ အနက်၊ အဖြူနှင့် ခဲရောင် သုံးခုအနက် တစ်ခုခု ဖြစ်ပေလိမ့်မည်။
တင်ဆက်သူက ကျိမြန်ကို ကင်မရာတွင် ပေါ်မလာစေရန် အလို့ငှာ အဖြေအား အုပ်ထားရန် ပြောလိုက်သည်။ ထို့နောက် လူသစ်လေးနှစ်ဦးကို မေးလိုက်၏။
"ဘာလို့ ဒီအဖြေတွေကို ရေးလိုက်ရတာလဲ ပြောလို့ရမလား ..."
လင်းလဲ့ယန်က ပြုံးကာ ပြောလိုက်သည်။
"ကျွန်တော်က ကျိကောရဲ့ ကိုယ်ရေးကိုယ်တာလက်ထောက် ဖြစ်ခဲ့ဖူးတယ်လေ သူ့ကို ရောင်စုံရှပ်အင်္ကျီနဲ့ အဖြူရောင် ဘယ်ဟာဝတ်မလဲမေးရင် အဖြူရောင်ကို သေချာပေါက်ရွေးမှာ အဖြူရောင်နဲ့ ခဲရောင်ဆိုရင် ကျိန်းသေကို ခဲရောင် ခဲရောင်နဲ့ အနက်ရောင်ဆိုရင်တော့ အနက်ရောင်ပဲ ရွေးမယ်ဆိုတာ ဗေဒင်မေးစရာကို မလိုဘူး အဲဒါကြောင့် သူအကြိုက်ဆုံး အရောင်က အနက်ရောင်၊ ခဲရောင်နဲ့ အဖြူရောင်လို့ ရေးလိုက်တာ အနက်ရောင်က အကြိုက်ဆုံး ပြီးရင် ခဲရောင် အဲဒီ့နောက်မှာမှ အဖြူရောင်ပေ့ါ ..."
တင်ဆက်သူက စကားတစ်ခွန်းမှ မပြော၊ ရယ်ရုံသာရယ်နေသော်ငြား လင်းလဲ့ယန်၏ အဖြေမှာ မှန်ကန်သည်ဟု ထင်ကြသည့် ပရိသတ်များကမူ သောင်းသောင်းဖျဖျ အားပေးလိုက်ကြသည်။
အွန်လိုင်းပေါ်မှတစ်ဆင့် ကြည့်နေသူများက တစ်ယောက်ပြီးတစ်ယောက် သက်ပြင်းချလျက် မှတ်ချက်ရေးလိုက်ကြသည်။
"ကျိကောရဲ့လက်ထောက် ဖြစ်ထိုက်ပါတယ် သူက နတ်ဘုရားကျိရဲ့ ဘဝကို အသေးစိတ်ကို နားလည်တာပဲ ငါလည်း ကျိကောအတွက် အဝတ်အစား ရွေးပေးချင်လိုက်တာနော် "
"ရှောင်ကျားရှုကရော ဘာလို့ royal blue လို့ ရေးတာလဲ ..."
တင်ဆက်သူက မေးလိုက်သည်။
ရှောင်ကျားရှုက လင်းလဲ့ယန်ကို အံ့ဩတကြီး ငေးကြည့်လိုက်သည်။ သူ့အမူအယာမှာ "တိုက်ဆိုင်လိုက်တာ" ဟု ပြောလိုဟန်ပင်။
"ပထမဆုံးအနေနဲ့ ပြောရရင် ကျွန်တော်လည်း ကျိကောရဲ့လက်ထောက် ဖြစ်ခဲ့ဖူးပါတယ် ..."
"ငါတကယ်ကို အောင့်မထားနိုင်တော့ဘူး ဒါက မျက်နှာသာရဖို့အရေး တိုက်ခိုက်နေတာပဲ မဟုတ်ဘူးလား သေချာပေါက် ဒီလိုပဲ ဖြစ်ရမယ် ..."
အွန်လိုင်းပေါ်မှ ကြည့်နေသူများက စခရင်တစ်ခုလုံးကို ရယ်မောနေသည့် မှတ်ချက်များဖြင့် ပြည့်နှက်စေလိုက်ကာ စင်အောက်ရှိ ကြည့်ရှုသူများကပါ သဘောတကျ ရယ်မောလိုက်ကြသည့်အတွက် လေထုတစ်ခုလုံး သက်ဝင်လှုပ်ရှားနေတော့သည်။
တင်ဆက်သူကပါ အကျယ်ကြီး အော်မရယ်မိစေရန် အလို့ငှာ မျက်နှာကို အုပ်ထားလိုက်ရတော့သည်။
ဟေး ဒါက ပြိုင်နေစရာ လိုလို့လား မင်းလိုမျိုး ဒုတိယမျိုးဆက် လူချမ်းသာလေးက သရုပ်ဆောင်တစ်ယောက်ရဲ့ လက်ထောက်ဖြစ်ရတာကို အရမ်းတွေ ဂုဏ်ယူနေတယ်ပေါ့ ဟုတ်လား ကြည့်ရတာ သူ့စိတ်ထဲမှာ ဒါကို ထုတ်ကြွားစရာကောင်းတယ်လို့ တွေးထားပုံပေါ်တယ် သူက တကယ့် အမာခံပရိသတ်အစစ်ပဲ ဖြစ်ရမယ် ...
ထိုင်ခုံကို မှီထိုင်လိုက်သည့် ကျိမြန်ကလည်း ကြည့်ရှုနေသူများရှေ့တွင် တောက်ပသည့် အပြုံးတစ်ပွင့်ကို ထူးထူးခြားခြား လှစ်ဟပြလိုက်သည်။
သူကတော့ ရှောင်ကျားရှုကို တကယ် ချီးကျူးချင်လာပြီ ဘာလို့ ဒီလောက်တောင် ရိုးအနေရတာလဲ ...
အတိတ်ကာလများ၌ ကျိမြန်သည် အလွန်အမင်း တည်ငြိမ်သည့် introvert တစ်ဦး ဖြစ်ခဲ့ရာ ပြုမူပြောဆိုပုံအားလုံး ညင်သာသိမ်မွေ့လှပြီး စစ်မှန်စွာ ပြုံးပြသည့် အကြိမ်ဟူ၍လည်း လက်ချိုး၍ ရေရလောက်အောင်ပင် ရှားပါးပေသည်။ သူ့တုန့်ပြန်မှုကို မြင်လိုက်ရသည့်အခါ ကြည့်ရှုနေသည့် ပရိသတ်အားလုံးက ရှောင်ကျားရှုအပေါ် အကောင်းမြင်စိတ် ပိုမိုတိုးပွားလာတော့သည်။
"ဒီသစ်ပင်ပေါက်ကလေးက တအားကို သန့်စင်တာပဲ ပြိုင်ဘက်ကင်း နောက်ခံကို ပိုင်ဆိုင်ထားတဲ့ ဒုတိယမျိုးဆက် သူဌေးသားလေး ဖြစ်တာတောင် ကျိကောရဲ့ လက်ထောက်အဖြစ် လိုလိုချင်ချင် လုပ်ခဲ့ရုံတင် မကဘူး ဒီလိုလုပ်ခဲ့တာကိုလည်း အများရှေ့မှာ ဂုဏ်ယူတကြီး ထုတ်ပြောနိုင်သေးတယ် ဒါကမှ အချစ်စစ်ပဲ ဖြစ်ရမယ် သူ့အဖြေက မှားသွားရင်တောင် သူ့ကို အပြစ်ပြောလို့ မရဘူး လင်းလဲ့ယန်က နှစ်ဝက်တောင် လက်ထောက်လုပ်ခဲ့တာ သူကရော ဘယ်လောက်ကြာအောင် လုပ်ခဲ့လဲ မသိဘူး ..."
"ဟုတ်တယ် သူ့ကို အပြစ်ပြောလို့ မရဘူး ရှေ့လျှောက် နတ်ဘုရားကျိရဲ့ ကောင်းကွက်တွေကို ဆက်ပြီး လေ့လာနေလို့ ရသားပဲ ..."
"..."
ထိုမှတ်ချက်များကြောင့် အစီအစဉ်တင်ဆက်သူမှာ တစ်ဖန် ရယ်မောလိုက်ရပြန်တော့သည်။ ကျိမြန်က ကူညီကာ ရှင်းပြလိုက်၏။
"ရှောင်ကျားရှုက သုံးရက်လောက် လက်ထောက်လုပ်ဖူးတာပါ အချိန်ကတော့ သိပ်မကြာဘူး ..."
"ဟုတ်တယ် ဘာလို့လဲဆိုတော့ ကျွန်တော် ရုပ်ရှင်ရိုက်လိုက်ရလို့လေ ..."
ရှောင်ကျားရှုက နားလည်မှု လွဲသည်များကို ဖြေရှင်းကာ ဆက်ပြောလိုက်သည်။
" ကျိကော အကြိုက်ဆုံးအရောင်က Royal blue လို့ပဲ ထင်ပါတယ် သူ့အဝတ်အစားတွေက အနက်၊ အဖြူနဲ့ ခဲရောင်တွေ များတယ်ဆိုပေမယ့် ကျွန်တော် သတိထားမိသလောက်ဆို အသုံးအဆောင်တွေ အကုန်လုံးနီးပါးက royal blue တွေ လက်ကြယ်သီးတွေ၊ နက်ခ်တိုင်ကလစ်တွေကအစ လည်စည်း၊ခြေအိတ်၊ ခါးပတ်၊ နာရီ၊ လက်စွပ်၊ ဖုန်းနဲ့ ဖုန်းကာဗာကအစ ဒီအရောင်ပဲ ..."
သူပြောနေစဉ်အတွင်း တင်ဆက်သူက ကျိမြန်၏ အသုံးအဆောင်များကို တစ်ခုချင်း အကဲဖြတ်နေကာ ကင်မရာသမားကလည်း တစ်ခုချင်းစီကို အနီးကပ် ရိုက်ပြလိုက်သည်။
ကျိမြန်ကလည်း သူတို့နှင့်အတူ ပူးပေါင်းကာ လက်ကို မြှောက်လျက် တော်ဝင်ဆန်သည့် အပြာရောင် လက်ကြယ်သီး၊ ဖုန်းနှင့် နာရီတို့ကို ပြသလိုက်သည်။ ထိုအသုံးအဆောင်အားလုံး၏ အရောင်မှာ royal blue သာ ဖြစ်သော်ငြား သေးငယ်လွန်း၍ ဂရုတစိုက် မကြည့်ပါလျှင် မသိနိုင်လောက်ချေ။
စင်အောက်ရှိ ကြည့်ရှုသူများက အားတက်သရော အော်ဟစ်အားပေးလိုက်ကြသော်ငြား အင်တာနက်ပေါ်မှ ကြည့်ရှုသူများမှာမူ ကြက်ပေါက်များနှယ် အသံပင် မထွက်နိုင်တော့ချေ။
ကျိမြန်က ခပ်တိုးတိုး ရယ်လျက် သူ့အဖြေကို ဖွင့်ပြလိုက်သည်။ "royal blue"
"ဖာ့ခ် တကယ်ကြီးကို royal blue ဖြစ်နေတာဟ ဒီလောက်အထိ အသေးစိတ် သတိထားမိဖို့ဆို တော်တော်လေးကို အာရုံစိုက်ထားမှ ရမှာ ဒါက သေချာပေါက်ကို အချစ်စစ်ပဲ ..."
အင်တာနက်သုံးစွဲသူတို့၏ မှတ်ချက်က လှိုင်းတံပိုးနှယ် တလိမ့်လိမ့် တက်လာပြန်သည်။ အဖြေမှန်သည့်သူများလည်း ရှိသော်ငြား ထိုသူများမှာ အကြောင်းပြချက်ကို မပြောနိုင်၊ ကြက်ကန်းဆန်အိုးတိုးကာ မှန်သွားကြခြင်းဖြစ်သည်။
လင်းလဲ့ယန်၏ မျက်နှာမှာ ရုတ်ချည်း ဖြူလျော်သွားသော်ငြား ချက်ခြင်းပင် ပြန်လည်ပြင်ဆင်နိုင်လိုက်သည်။ သို့သော် သူ့အပြုံးမှာ တစ်ဖြည်းဖြည်း မသက်မသာ ဖြစ်လာကာ မျက်လုံးတို့မှာလည်း ငိုချတော့မည့်နှယ် ပြောင်းလဲသွားကြောင်းကိုတော့ အားလုံး ခန့်မှန်းနိုင်ပေသည်။
"နတ်ဘုရားကျိရဲ့ လက်ထောက်အဖြစ် နှစ်ဝက်လောက် လုပ်ခဲ့တယ်သာ ပြောတာ တကယ်ရော အာရုံစိုက်ခဲ့ရဲ့လား လေးစားပါတယ် အားကျပါတယ်လို့ ပြောတာတွေကလည်း အတုပဲ နေမှာပေါ့ ဒီလောက် မြင်သာနေတဲ့ အချက်တွေကိုတောင် သတိမထားမိဘူး "
အလားတူမှတ်ချက်မျိုး အများအပြား ထွက်ပေါ်လာသော်ငြား ဒါရိုက်တာက အကုန်လုံးကို ပိတ်ဆို့ပစ်လိုက်သည်။ ထိုသို့ အစဖျောက်ပစ်သည့်တိုင် လင်းလဲ့ယန်အနေဖြင့် အခြားသူများက သူ့ကို မည်သို့ တွေးနေကြကြောင်း ခန့်မှန်းနိုင်ရန် မခဲယဉ်းလှချေ။
ရှောင်ကျားရှုမှာမူ ရောင့်ရဲနိုင်သေးဟန်မတူ။ သူက ပြောလိုက်သည်။
"တကယ်ပဲ royal blue ဖြစ်နေတာကိုး ကျွန်တော် မှန်းတာ မှန်တယ်နော် ..."
နတ်ဘုရားကျိအကြောင်း ကျကျနန မလေ့လာထားရင် ဘယ်လိုလုပ် ဒီလိုမျိုး ခန့်မှန်းနိုင်မှာလဲ ...
ထိုအချက်တစ်ခုတည်းဖြင့်ပင် အင်တာနက်သုံးစွဲသူများ၏ သူ့အပေါ် အကောင်းမြင်စိတ်မှာ အံ့မခန်း မြင့်တက်လာတော့သည်။
Xxxxxxx