Chapter 23
ကျိမြန်က သူကို ပြောမပြတတ်လောက်အောင် အလိုလိုက်ပေးလိုမှုတို့ ပြည့်လျှံစွာဖြင့် ပြန်ကြည့်လိုက်သည်။
အခြားသရုပ်ဆောင်များက အဆက်အသွယ်များ ချဲ့ထွင်နေကြသော်ငြား ရှောင်ကျားရှုကမူ ဗိုက်ပြည့်သည်နှင့်တစ်ပြိုင်နက် အိမ်ပြန်သွားတော့သည်။ ဤအသိုင်းအဝိုင်းထဲသို့ ရောနှောလိုခြင်း အလျဉ်းမရှိပေ။ သူ့အနေဖြင့် အဆက်အသွယ်ရှိခြင်း မရှိခြင်းမှာလည်း များစွာ အရေးမပါလှချေ။
...
နောက်တစ်နေ့တွင် "တမန်တော်" ရိုက်ကူးရေးကို တရားဝင် စတင်လိုက်တော့သည်။ NG scene များ အများအပြား ရိုက်ကူးမိပြီး ကံဆိုးမိုးမှောင်ကျခြင်းကို မကြုံနိုင်စေရန် အလို့ငှာ ဒါရိုက်တာက လွယ်ကူသည့် အခန်းများဖြင့်သာ စတင်ရန် ဆုံးဖြတ်လိုက်သည်။
ကော်ဖီတစ်ခွက်ကို ကိုင်ကာ အပြင်ဘက်တွင် ရပ်နေသော ရှောင်ကျားရှု၏ မျက်နှာ၌ မရေရာမှုတို့ကို အခန့်သား တွေ့နေရသည်။ ဟွမ်ကျိကျင်းက သူ့ကို ရိုက်ကွင်းနေရာအကြောင်း ညွှန်ပြနေသည်။
"ကြည့် အဲဒါက အဓိက ကင်မရာ ဒါက ရှုခင်းအကုန်လုံးကို ခြုံပြီး ရိုက်တဲ့နေရာမှာ သုံးတာ ပြီးတော့ ဒီကင်မရာတွေ ဒါတွေကကျ အနီးကပ်ရိုက်ချက်အတွက် မင်းက ဒီနားကို လျှောက်လာပြီး နံရံကို မှီနေလိုက်ရင် ကင်မရာတွေက မင်းရဲ့ အမူအယာကို ရိုက်ကူးထားလိမ့်မယ် ဒါကိုသာ ကောင်းကောင်းမလုပ်နိုင်ရင် မင်းရဲ့ သရုပ်ဆောင်တဲ့ စွမ်းရည် ဘယ်လောက်ကောင်းကောင်း အလကားပဲ စခရင်ပေါ်ကို ရောက်လာတော့မှာ မဟုတ်၊ ပရိတသတ်ကလည်း သတိထားမိတော့မှာ မဟုတ်ဘူး ပြီးတော့ မတ်တပ်ရပ်တဲ့နေရာမှာလည်း အလင်းရောင် ဘယ်နေရာကနေ ထွက်လာသလဲဆိုတာ အာရုံစိုက်ထား အလင်းရောင်မကောင်းတဲ့နေရာမှာ မနေမိစေနဲ့ ..."
အဆုံးတွင်မူ ဟွမ်ကျိကျင်းက သူ့ကို နှစ်သိမ့်ပေးလိုက်သည်။
"အရမ်းကြီး စိတ်လှုပ်ရှားနေဖို့ မလိုဘူး ဒီအပိုင်းက အရမ်း ရိုးရှင်းတော့ သေချာပေါက်ကို ကောင်းကောင်း ရိုက်နိုင်မှာပါ ..."
ရှောင်ကျားရှု၏ ဉာဏ်ရည်မှာ ကောင်းမွန်လှသည့်အတွက် နေရာတွင် လက်ထပ်သင်ကြားပေးသည့်တိုင် သဘောပေါက်နားလည်ပေသည်။ သူက ခေါင်းငြိမ့်ပြလိုက်သည်။
"ကျိကျင်းကော စိတ်ချပါ ကျွန်တော် နားလည်ပါတယ် ..."
အိမ်ကို ပြန်ရောက်တာနဲ့ တစ်ပြိုင်နက် အစ်ကိုကြီးနဲ့ မိသားစုစီးပွားရေးအကြောင်း ပြောတာလေးပဲ မဟုတ်လား ဒီလောက်ကတော့ သေချာပေါက်ကို ပိုင်ပိုင်နိုင်နိုင်ကြီး သရုပ်ဆောင်နိုင်ပါတယ် ...
မနီးမဝေးရှိ ဖန်ခွင်းက ခေါင်းကိုယမ်းကာ ရေရွတ်လိုက်သည်။
"ရိုက်ကွင်းထဲရောက်မှ ဆရာကို သင်ပေးဖို့ တောင်းဆိုတဲ့ ကျောင်းသားမျိုး တစ်ခါမှ မတွေ့ဖူးဘူး သခင်လေးရှောင်ကတော့ တကယ်ကို ထူးခြားတာပဲ ..."
ကျိမြန်ကမူ ပြုံးရုံသာ ပြုံးနေပြီး ဘာမှ မပြောချေ။
ရှောင်ကျားရှုကို ကြည့်နေသည့် လင်းလဲ့ယန်၏ နှလုံးသားထဲတွင်မူ မနာလိုအားကျမှုတို့ဖြင့် ပြည့်နှက်လာတော့သည်။
သူက တူညီတဲ့နောက်ခံကနေ လာတာ မဟုတ်ပေမယ့် ရိုက်ကွင်းမှာ သင်ယူနေရတုန်းပဲ ဒါပေမယ့် သူ့မှာ ရှောင်ကျားရှုလိုမျိုး ကြယ်ပွင့်ဖန်တီးတဲ့နေရာမှာ ဆရာကျတဲ့ နည်းပြတစ်ယောက်ရဲ့ လမ်းညွှန်ပေးတာမျိုး မရှိဘဲ ကိုယ့်ခွန်ကိုယ့်အားကိုပဲ မှီခိုနေရတယ် အနာဂတ်ကျရင်တော့ ဒါရိုက်တာတွေ၊ လက်ထောက်ဒါရိုက်တာတွေနဲ့ ဆက်ဆံရေးကောင်းတစ်ခုကို တည်ဆောက်ထားရမယ် အဲဒါမှ မသိတာရှိရင် သူတို့ကို မေးရင်းနဲ့ အများကြီး လေ့လာနိုင်မှာ ...
ဤသို့ တွေးကာမှ သူ၏ မကျေလည်မှုများလည်း ပျောက်ကွယ်သွားလေတော့သည်။
ကျိမြန်က သူ့ပုခုံးကိုပုတ်ကာ ပြောလိုက်သည်။
"ဟွမ်ကျိကျင်းက သရုပ်ဆောင်ကောင်းတယ်လို့ထင်လား ကိုယ်က ကောင်းတယ်လို့ ထင်လား ..."
"သေချာပေါက်ကို ကျိကောပေါ့ ..."
လင်းလဲ့ယန်၏ အကြည့်တို့မှာ လေးစားအားကျမှုများဖြင့် ပြည့်နှက်နေသည်။
"ရှောင်ကျားရှုမှာ သူ့ကို သင်ပေးဖို့ လင်းလဲ့ယန်ရှိသလို မင်းမှာလည်း ကိုယ်ရှိတယ်လေ ဘာမှ အားကျနေစရာ မလိုဘူး ..."
ကျိမြန်က သူ့ချစ်သူကောင်လေး၏ နဖူးကို ခပ်ဖွဖွ ပုတ်လိုက်သည်။
လင်းလဲ့ယန်မှာ ကျိမြန်က သူ့စိတ်ကို လွယ်လင့်တကူ ဖတ်ရှုနိုင်လိမ့်မည်ဟု ထင်မှတ်မထားပေ။ သူ့ပါးနှစ်ဖက်လုံး ရဲရဲနီလာကာ မပီမသ ရေရွတ်လိုက်သည်။
"ကျေးဇူးတင်ပါတယ် ကျိကော အနာဂတ်မှာ ကျွန်တော် နားမလည်တာရှိရင် ကျေးဇူးပြုပြီး သင်ပြပေးပါဦး ..."
သူ့ဘေးနားတွင် မည်သူတစ်ဦးတစ်ယောက်မှ မရှိသည့်တိုင် ကျိမြန်အပေါ် မထိခိုက်နိုင်စေရန် အလို့ငှာ သူ့အချစ်များကို ဖော်ထုတ်မပြရဲချေ။
ကျိမြန်က ဘာလို့ ဒီလောက်တောင် ကောင်းပေးရတာလဲ တကယ်ကို နားမလည်နိုင်တော့ဘူး ...
"အိုကေ ဒီတစ်ခုက ပြီးသွားပြီ ရှောင်ကျားရှုနဲ့ ကျိမြန် နောက်တစ်ပိုင်းက မင်းတို့အလှည့်နော် ..."
ဒါရိုက်တာလော၏ ကျယ်လောင်သော အသံက ထိုအခိုက်အတန့်လေးကို ကြားဖြတ်နှောင့်ယှက်လိုက်သည်။ ထိုအခါမှ ဖန်ခွင်းလည်း စိတ်သက်သာရာ ရသွားတော့၏။
သူတို့နှစ်ယောက်က ရင်းရင်းနှီးနှီး မနေမှန်း သိသာနေတာကို ဘာလို့ မကူညီနိုင်ရမှာလဲ ...
သူက ကျိမြန်ကို တွန်းပို့ရင်း လောဆော်လိုက်သည်။
"သွား သွားပြီးတော့ သခင်လေးရှောင်ရဲ့ သရုပ်ဆောင်တဲ့ အရည်အချင်းက ဘယ်လိုရှိလဲဆိုတာ အကဲဖြတ်ခဲ့ ..."
သူ့မှာ အရည်အချင်းရှိတယ်ဆိုရင်ပေါ့ ...
ရှောင်ကျားရှု သရုပ်ဆောင်ရမည့် ဇာတ်ကောင်မှာ စီးပွားရေးနှင့် စီမံခန့်ခွဲရေးဘာသာရပ်ကို သင်ကြားပြီး နိုင်ငံသို့ ပြန်ရောက်လာသည့် လင်ဖုန်းဖြစ်ကာ သူ့အစ်ကို လင်ထောင်မှာမူ ဇာတ်လမ်းထဲတွင် အကြီးဆုံးဗီလိန်ဇာတ်ကောင်ဖြစ်သည်။
လင်ညီအစ်ကိုနှစ်ယောက်မှာ မာဖီးယားမိသားစုတွင် မွေးဖဖွားလာခဲ့သူများ ဖြစ်သည်။ သူတို့အဖေသည် ပြည်တွင်းအခြေစိုက် မူးယစ်ဆေးဝါး ရောင်းဝယ်ဖောက်ကားသည့် ဂိုဏ်းတစ်ခု၏ ခေါင်းဆောင်ဖြစ်ကာ အညှိုးအတေးတစ်ခုကြောင့် သတ်ဖြတ်ခြင်းကို ခံခဲ့ရပြီး သူတို့၏ အမေမှာမူ အဓမ္မကျင့်ခြင်း ခံရကာ သူတို့နှင့် လူစုကွဲသွားခဲ့သည်။ ထိုထက်ပိုဆိုးသည့်အချက်မှာ ညီအစ်ကိုနှစ်ယောက်သည် သူတို့အဖေ တိတ်တဆိတ် ဆောက်လုပ်ပေးထားခဲ့သည့် လျှို့ဝှက်အခန်းထဲတွင် ပုန်းနေရင်း ထိုဖြစ်ရပ်အားလုံးကို မော်နီတာမှတစ်ဆင့် မျက်ဝါးထင်ထင် တွေ့မြင်ခဲ့ရပေသည်။
ထိုဖြစ်ရပ်ကြောင့် သူတို့၏ စိတ်ထဲတွင် ပယ်ဖျက်၍ မရတော့သည့် အရိပ်ဆိုးကြီးတစ်ခု ကပ်ငြိတွယ်နေတော့သည်။ ကယ်ဆယ်ခြင်း ခံရပြီးနောက် ညီအစ်ကိုနှစ်ဦးလုံးသည် မြေအောက်လောကနှင့် လုံးဝ မပတ်သက်တော့ရန် ဆုံးဖြတ်လိုက်ကြသည်။ အန်ကယ်ဟောဝါ့ဒ်က သူတို့ကို မွေးစားကာ ပိုင်ဆိုင်မှုများ ပြန်ယူပေးနိုင်ရန်လည်း ကူညီပေးခဲ့၏။
သို့သော် ဟော့ဝါ့ဒ်မှာလည်း ဂိုဏ်းသားတစ်ဦးပင် ဖြစ်ကြောင်းကိုတော့ သူတို့ညီအစ်ကိုနှစ်ယောက်လုံး မသိကြသေးချေ။ လင်ထောင် အရွယ်မရောက်ခင်မှာပင် လင်ရှစ်အုပ်စုသည် မူးယစ်ဆေးရောင်းချသူများအဖို့ ငွေမဲခဝါချရာနေရာတစ်ခုအဖြစ် တစ်ဖြည်းဖြည်း ပြောင်းလဲနှင့်နေပြီဖြစ်သည်။
အသက် ၁၈ နှစ်ပြည့်သည်နှင့်တစ်ပြိုင်နက် ကုမ္ပဏီကို အမွေဆက်ခံခဲ့ရသည့် လင်ထောင်မှာ သူသာ မြေအောက်လောကသို့ မဝင်ရောက်ပါလျှင် သူ့ညီမှာ အခြား ရောင်းချသူများ၏ လက်တုန့်ပြန်ခြင်းကို ခံရမည်ဖြစ်ကြောင်း သိရှိသွားတော့သည်။
ငယ်စဉ်ဘဝက ကြုံတွေ့ခဲ့ရသည်များကြောင့် သူ့ခန္ဓာကိုယ်တစ်ခုလုံးတွင် ဝံပုလွေသွေးများ စီးဆင်းနေကာ မြေအောက်လောကနှင့် ပိုပြီး နက်နက်ရှိုင်းရှိုင်း ပတ်သက်မိလာလေ တစ်ဖြည်းဖြည်း ပိုမိုကောက်ကျစ်လာလေပင်ဖြစ်သည်။
အဆုံးတွင်တော့ ဟော့ဝါ့ဒ်ပင်လျှင် သူ့ကို မယှဉ်ပြိုင်နိုင်တော့သည့်အတွက် ထိပ်တိုက်ရင်ဆိုင်ရမည်ကို ရှောင်ရှားရန် လင်ရှစ်အုပ်စုမှ ထွက်လာခဲ့လိုက်တော့သည်။
ငါးနှစ်ပိုငယ်သည့် လင်ဖုန်းမှာမူ ထိုအရေးကိစ္စအားလုံးကို စိုးစဉ်းမှမသိ။ သူ့အစ်ကို၏ ကာကွယ်ပေးမှုအောက်တွင် နိုင်ငံရပ်ခြား၌ နှစ်ပေါင်းများစွာ ပညာသင်ကြားနေခဲ့သည်။ လင်ထောင်ကိုသာ ညသန်းခေါင်အဖြစ် တင်စားရပါလျှင် လင်ဖုန်းသည် နေ့အချိန်အဖြစ် သတ်မှတ်ရမည်ဖြစ်သည်။ သူနှင့် သက်ဆိုင်လေသမျှ အရာတိုင်းမှာ နေရောင်သဖွယ် ဝင်းလက်တောက်ပနေကာ အရာတိုင်းအပေါ် အကောင်းမြင်တတ်သည့် စိတ်ထားတစ်ခု ပိုင်ဆိုင်ထားပေသည်။ လင်ထောင်၏ လိုအင်ဆန္ဒနှင့် မျှော်လင့်ချက်အားလုံးကို သူ့ထံတွင် တွေ့မြင်နေရသည်။
ရှောင်ကျားရှုက ဇာတ်ညွှန်းကို အလေးအနက် ဖတ်ရှုပြီးနောက် ထိုဇာတ်ကောင်မှာ သူ့အတွက် မခဲယဉ်းလှကြောင်း တွေ့ရှိသွားတော့သည်။ ထို့ကြောင့် နောက်ထပ် ရိုက်ကူးမည့် ရိုက်ကွက်ကို ယုံကြည်မှုအပြည့်ဖြင့် စောင့်ဆိုင်းနေလိုက်တော့သည်။
သူ၏ တောက်ပသော ခဲရောင်ဆံပင်များကို လုံးဝဥသုံ အမဲပြန်ဆိုးထားကာ ပြီးပြည့်စုံသည့် မျက်နှာအချိုးအစားမှာလည်း ငယ်စဉ်တောင်ကျေး ကလေးဘဝကတည်းက လင်ထောင်၏ စောင့်ရှောက်ပျိုးထောင်မှုကို ခံလာရသည့် ကြင်နာတတ်သော လူငယ်လေးတစ်ဦးနှင့် လုံးဝ ကိုက်ညီနေပေသည်။
ထို့အပြင် သူ့မျက်ဝန်းတို့မှာလည်း အလွန်ကြည်လင်နေကာ ယခုမှ လူ့လောကကို မကြုံတွေ့ဖူးသူနှယ် ရိုးစင်းနေပေသည်။ လင်ထောင်အဖြစ် သရုပ်ဆောင်မည့် ကျိမြန်နှင့် ယှဉ်တွဲကာ ရပ်လိုက်ပါလျှင် တစ်ယောက်က နေရောင်ထဲတွင် ရပ်နေပြီး ကျန်တစ်ဦးက အရိပ်ထဲတွင် ပုန်းအောင်းနေသည့်နှယ် သန်မာသည့် လွန်ဆွဲမှုတစ်ရပ်ကို ပေးစွမ်းနေပေသည်။
ဒါရိုက်တာက "အက်ရှင်" ဟု အော်လိုက်လျှင် နှစ်ဦးသား ပွေ့ဖက်ကာ ကာလရှည်ကြာ ခွဲခွါထားရာမှ ပြန်တွေ့ရသည့်အတွက် ဝမ်းမြောက်ဝမ်းသာအပြုံးတစ်ပွင့်ကို ကိုယ်စီ ဆင်မြန်းထားလိုက်သည်။ ပန်းခြံထဲတွင် ထိုင်နေရင်း လက်ရှ်ိအခြေအနေများကို ကိုယ်စီ မျှဝေလိုက်ကြသည်။
စကားပြောနေစဉ်မှာပင် ဟော့ဝါ့ဒ်ဇာတ်ကောင်ကို ယူထားသည့် သရုပ်ဆောင်ကပါ ရောက်ရှိလာကာ သုံးဦးသား စကားတပြောပြောဖြင့် ဗီလာထဲသို့ ဝင်သွားရင်း ရိုက်ချက်ကို အပြီးသတ်လိုက်သည်။ ဤသည်မှာ ရုပ်ရှင်ထဲတွင် လင်ဖုန်း၏ ပထမဆုံး ပေါ်ထွက်လာမှုဖြစ်သည်။ စကားပြောနေစဉ်အတွင်း လင်ထောင်နှင့် ဟော့ဝါ့ဒ်ကသာ တီးတိုးပြောနေကြပြီး အစမှအဆုံးအထိ လင်ဖုန်းသည် သူ့အစ်ကိုနှင့် ဦးလေးမှာ အလွန်သဟဇာတဖြစ်လှသည်ဟု တွေးနေ၏။
အမှန်အတိုင်း ပြောရပါလျှင် ရှောင်ကျားရှုသည် သရုပ်ဆောင်အရည်အချင်းကိုပင် များများစားစား ထုတ်မသုံးခဲ့ရချေ။ ရှောင်တင်းပန်နှင့် ရှောင်ချီကျဲတို့ စကားပြောနေချိန်တိုင်း သူလုပ်လေ့ရှိသည်ကို ပုံမှန်အတိုင်း ပြသရန်သာ လိုအပ်ပေသည်။ သူသည်လည်း လင်ဖုန်းကဲ့သို့ပင် အပူအပန်ကင်းမဲ့ပြီး ဘာတစ်ခုကိုမှ မသိနားမလည်သည့် အရူးတစ်ယောက်ကဲ့သို့သာ သံယောင်လိုက်ကာ ရယ်မောခဲ့ရပေသည်။
"အိုကေ ဒီတစ်ခုတော့ ပြီးသွားပြီ ..."
လောကျန်းဝေ့က စခရင်ကို ကြည့်ကာ လက်ကို ယမ်းပြလိုက်သည်။ မူလကမူ သူသည် ရှောင်ကျားရှုတစ်ယောက် ရိုက်ကူးရေးအဖွဲ့ထဲ ရောက်လာသည့်အပေါ် အလွန် မကျေမနပ်ဖြစ်ခဲ့မိသေးသည်။
ရှို့ချန်ယု၏ တောင်းဆိုမှုနှင့် များပြားလှစွာသော ရင်းနှီးမြှုပ်နှံမှုများကြောင့်သာ မဟုတ်ပါလျှင် သူ့ကို လက်ခံပေးခဲ့မည် မဟုတ်ချေ။ ပထမရိုက်ချက်ကို အောင်အောင်မြင်မြင် အပြီးသတ်နိုင်ခဲ့၍သာ တော်ပေသေးသည်။ မျက်လုံးပင် မလွှဲနိုင်လောက်အောင် ကောင်းမွန်သည်ဟု ပြောလျှင်ပင် လွန်ကျူးမည် မထင်ပေ။
အမျိုးသားငယ်နှစ်ဦး၊ လတ်ဆက်သည့် အလင်းရောင်၊ မည်းမှောင်တည်ငြိမ်နေသော လေနှင့် တစ်ဖြည်းဖြည်း သဘောထားကွဲလွဲလာသော အခြေအနေတို့မှာ ရုပ်ရှင်အတွက် လိုအပ်သည့် အားကောင်းသော လွန်ဆွဲမှုတစ်ရပ်ကို ပေးစွမ်းနေပေသည်။
လင်ဖုန်း၏ ဇာတ်ကွက်ဟူ၍ များများစားစား မပါရှိသည့်တိုင် ၎င်းမှာ လင်မိသားစုသာမက အရှေ့တောင်အာရှ မူးယစ်ဆေးဝါး ဖြန့်ဖြူးရောင်းချသည့် အသင်းကြီး ပျက်သုဉ်းခြင်း၏ စမှတ်ပင်ဖြစ်သည်။ ထိုသည်သာမက လင်ထောင်တစ်ယောက် စိတ်ရိုင်းဖောက်သွားခြင်း၏ အဓိကအကြောင်းအရင်းလည်း ဖြစ်နေကာ ရုပ်ရှင်တစ်ခုလုံး၏ အရည်အသွေးမှာလည်း ဤဇာတ်ကောင်၏ သရုပ်ဆောင်မှုအပေါ် မူတည်နေပေသည်။
လောကျန်းဝေ့က ဗီဒီယိုကို ထပ်ကာထပ်ကာ ကြည့်ပြီးကာမှ ပြောလိုက်သည်။
"ကောင်းတယ် နောက်ထပ် ဆက်ရိုက်မယ် ..."
ယခုလက်ရှိအခြေအနေအရမူ အခြားလူသစ်လေးများကို ကျော်လွန်၍ ရှောင်ကျားရှုကို ရွေးချယ်လိုက်ခြင်းသည် မှန်ကန်သည့် ဆုံးဖြတ်ချက်ပင်ဖြစ်သည်။ တောက်ပလင်းလက်ကာ အကောင်းမြင်တတ်သည့်စိတ်ကို သရုပ်ဖော်ရာတွင် အနုပညာလောက၌ ကျင်လည်ကျက်စားနေသည့် "လတ်လတ်ဆက်ဆက် အသားတုံးလေးများ" သည် ရိုးသားလှသည့် လူသစ်လေးကို မယှဉ်နိုင်ချေ။
ဟွမ်ကျိကျင်းနှင့် ကျိမြန်ကလည်း ရိုက်ချက်ကို ပြန်ကြည့်နေကာ ပက်လက်ကုလားထိုင်ပေါ် လှဲလျက် ပျင်းရိနေသော ရှောင်ကျားရှုကို တွေ့လိုက်လျှင် ဟွမ်ကျိကျင်းက လမ်းပျောက်နေဟန်ဖြင့် ပြောလိုက်သည်။
"ရှောင်ရှု မင်း သရုပ်ဆောင်ထားတာကို လာကြည့်ဦးလေ ..."
"ကြည့်လို့ရတယ်လား ..."
ရှောင်ကျားရှုက သူဆော့နေသည့်ဂိမ်းကို အလောတကြီး ပိတ်ကာ အနားသို့ လျှောက်လာသည်။
ဖာ့ခ် အဲဒါက ငါလား ဘာလို့ ဒီလောက်တောင် ချောမောနေရတာလဲ ...
သူက ရုပ်ရှင်ဧကရာဇ်ကိုတစ်လှည့်၊ စခရင်ပေါ်ရှိ သူ့ရုပ်ကိုတစ်လှည့် စိုက်ကြည့်ကာ ပြောလိုက်သည်။
"ကျိကောနဲ့ ယှဉ်ရပ်နေတာတောင် ရုပ်ဆိုးမသွားဘူး ..."
အရပ် နည်းနည်းလေး ကွာတာ တစ်ခုပဲ ပြောစရာရှိတာ နောက်တစ်ခေါက်ကျ ဒါရိုက်တာကို ငါ့ခြေထောက်အောက်မှာ ခဲခုပေးဖို့ ပြောရမယ် ...
ကျိမြန်က ပြုံးယောင်သမ်းနေသည့် အကြည့်တို့ဖြင့် သူ့ကို စိုက်ကြည့်လိုက်သည်။
"လုပ်တာ ကောင်းတယ် ဆက်ကြိုးစားထား ..."
"ဟုတ်ကဲ့ ..."
ရှောင်ကျားရှုက သူပင် သတိမထားမိလိုက်ဘဲ ခါးကို တည့်မတ်နေအောင် ဆန့်တန်းလိုက်သည်။
"ဟုတ်တယ် ခံစားချက်က ကွက်တိပဲ ပြီးတော့ ပြောသွားတာတွေလည်း ကောင်းတယ် ဒါပေမယ့် နောက်ပိုင်းဇာတ်ကွက်တွေက ပိုပြီး ခက်ခဲလာလိမ့်မယ် ပြန်ရောက်ရင် ဇာတ်ညွှန်းကို သေချာဖတ်ကြည့်ထား နားမလည်တာရှိရင်လည်း လာမေး ..."
လောကျန်းဝေ့ကလည်း အားပေးစကားအနည်းငယ် ပြောကြားလိုက်သည်။
"ကျေးဇူးတင်ပါတယ် ဒါရိုက်တာကြီး ..."
ရှောင်ကျားရှုမှာ ကျောင်းအုပ်ဆရာကြီးနှင့် တွေ့နေရသည့် မူလတန်းကျောင်းသားသဖွယ် ခါးကို ပို၍ပင် ဆန့်တန်းလိုက်တော့သည်။
ဟွမ်ကျိကျင်းက သူ၏ တင်းတောင့်နေသော ပုခုံးကို အသာပုတ်ကာ ပြေလျော့စေလိုက်သည်။
တစ်ခြားသူတွေရဲ့ အမြင်မှာတော့ သူက လူသစ်လေးရဲ့ လက်ထောက်လုပ်ဖို့ အတင်းအကြပ် ဖိအားပေးခံရတယ်နဲ့ နေမှာ ဘယ်သူကမှ အမှန်ကို မသိကြဘူး တကယ်တမ်းပြောရရင် ရှောင်ကျားရှုက တအားဉာဏ်ကောင်းပြီးတော့ ဘာပဲသင်ပေးသင်ပေး အကုန် သဘောပေါက်တယ် ဇာတ်ညွှန်းကို ဘယ်လိုဖတ်ရမလဲ ဆိုတာလဲ သူ့အလိုလိုကို သိနေပြီးသား ဒီရိုက်ချက်ဆိုလည်း ဘာမှ တည်းဖြတ်နေစရာတောင်မလိုဘဲ တစ်ခေါက်တည်း အပြီး ရိုက်သွားတာ အချိန်ကျလာရင် သူက အောင်မြင်မှာ သေချာတယ် ...
ဒါပေမယ့် ရုပ်ရှင်ရိုက်ဖို့ကို စိတ်မပါတာကတော့ တကယ်ကို နှမြောစရာပဲ သူက ရုပ်ရှင်ရိုက်တာကို မဖြစ်မနေ လုပ်ရမယ့် တာဝန်တစ်ခုလိုပဲ သတ်မှတ်နေတာ ...
Xxxxxxxx
Chapter 24
ဟွမ်ကျိကျင်းက ခေါင်းကို အသာယမ်းကာ ဤရုပ်ရှင် ရိုက်ကူးပြီးပါလျှင် ရွှယ်ကျဲ၏ စီစဉ်ပေးမှုကို မဖြုန်းတီးမိစေရန် အလို့ငှာ ရှောင်ကျားရှု၏ သရုပ်ဆောင်မှုအပေါ် ချစ်မြတ်နိုးစိတ်များ နိုးထလာစေရန် လှုံ့ဆော်ပေးရမည် ဆုံးဖြတ်ချက်ချလိုက်သည်။
ယနေ့ရိုက်ကွင်းမှာ ချောချောမွေ့မွေ့ဖြင့်ပင် ပြီးစီးသွားတော့သည်။ ရှေ့တစ်ပတ်အထိ ရှောင်ကျားရှု ရိုက်ကူးရမည့်ရက် မရှိသေးသော်ငြား ဟွမ်မိန်ရွှမ်က သူ့ကို အပျင်းထူနေခွင့် မပေးဘဲ အခြားသရုပ်ဆောင်များ မည်ကဲ့သို့ သရုပ်ဆောင်သည်ကို လေ့လာနိုင်ရန် စတူဒီယိုသို့ အစောကြီး လိုက်ပို့လိုက်တော့သည်။
"နိုးနိုးကြားကြား နေစမ်းပါ ..."
ဟွမ်မိန်ရွှမ်က စိတ်ပျက်လက်ပျက်ဖြစ်နေသည့် ရှောင်ကျားရှုကို အသာအယာခေါက်ကာ ပြောလိုက်သည်။
"ကြည့်ကြည့်လိုက် အနုပညာလောကမှာ ဘယ်လူသစ်ကမှ မင်းလို မလုပ်ဘူး ပြည်တွင်းက ရုပ်ရှင်ဧကရာဇ်နှစ်ယောက်နဲ့ အတူတူ ပွဲဦးထွက်ရတာတောင် တစ်ခြားသူတွေ မရနိုင်တဲ့ အခွင့်အရေးမျိုး ဘယ်လို ယူရမလဲဆိုတာ မသိသေးဘူးလား ယုံချင်ယုံ မယုံချင်နေ မင်းကတော့ မိုးကြိုးကို အပစ်ခံရဦးမှာ ကော်ဖီကို ပြီးအောင်သောက်ပြီး ကားထဲကထွက်တော့ ..."
ကော်ဖီကို ခပ်သွက်သွက်သောက်ရန် အတင်းအကြပ် ဖိအားပေးခံနေရသည့် ရှောင်ကျားရှုက အသနားခံလိုက်သည်။
"မိန်ရွှမ်ကျဲ ကျွန်တော်က မနက် ၄ နာရီအထိ အိပ်မပျော်လို့ ၄ နာရီနီးပါးပဲ အိပ်ခဲ့ရတယ်လေ ဘယ်လိုလုပ် အိပ်ရေးဝမှာလဲ ပြီးတော့ ရုပ်ရှင်ဧကရာဇ်တွေနဲ့ တွဲရိုက်ခွင့်ရတဲ့ လူသစ်က ကျွန်တော် တစ်ယောက်တည်းမှ မဟုတ်တာ လင်းလဲ့ယန်လည်း ပါသားပဲကို ..."
"တစ်ခြားသူတွေက မင်းနဲ့ ဘာဆိုင်လို့လဲ ဒီနေ့ ရိုက်ကူးရေးရှိမှန်း သိတာတောင် ညလုံးပေါက် ဂိမ်းဆော့ရဲသေးတယ်ပေါ့ သေချင်နေတာလား ..."
ဟွမ်မိန်ရွှမ်မှာ ပို၍ပင် ဒေါသထွက်လာတော့သည်။ ဒေါသပုန်ထတော့မည့်အချိန်တွင် ဟွမ်ကျိကျင်းက ရောက်လာကာ ရှောင်ကျားရှုကို ကားထဲမှ ဆွဲထုတ်ရင်း ပြောလိုက်သည်။
"သူ့ကို မငေါက်နဲ့တော့ ငေါက်လေလေ ပိုပြီး အားအင်ဆုတ်ယုတ်လေပဲ ဒီနေ့ရိုက်ရမှာက ခက်မှ မခက်တာ သူ့ကို သေချာစောင့်ကြည့်နေလိုက်ပါ့မယ် စိတ်မပူနဲ့ ..."
"သူ့ကို တစ်ချိန်လုံး သင်ပေးနေရမှာလား သူ့အစား နင်ပဲ သရုပ်ဆောင်လိုက်ပါတော့လား အလိုလိုက်ခံရတာတွေနဲ့ အသားကျသွားအောင် လုပ်မနေနဲ့ ..."
သူမက ကားပြတင်းပေါက်မှ ခေါင်းထွက်ကာ ဆူပူလိုက်သော်ငြား ထိုသူနှစ်ယောက်က သူမကို လက်ယမ်းပြရင်း ထွက်သွားကြသည့်အတွက် သူမလည်း မှုန်ကုပ်ကုပ်ဖြင့် ပြန်သွားလိုက်တော့သည်။
ရိုက်ကွင်းသို့ ရောက်လာသော ကျိမြန်မှာ ထိုကဲ့သို့ ဆူညံပွက်လောရိုက်နေသည်များကို မျက်မြင်ကြုံလိုက်ရသည့်အတွက် မျက်မှောင်ကြုတ်လိုက်မိတော့သည်။ ဖန်ခွင်းကလည်း ခေါင်းကိုယမ်းကာ ပြောလိုက်သည်။
"ဒီလိုစိတ်ထားမျိုးနဲ့တော့ နှစ်တစ်ရာကြာလို့တောင် ဘယ်လို သရုပ်ဆောင်ရမလဲ သိမှာ မဟုတ်ဘူး အခုခေတ်လူငယ်တွေက ပိုပိုပြီးကို စိတ်လိုက်မာန်ပါတွေ ဖြစ်ကုန်ကြတာပဲ ကျင့်ဝတ်တွေလည်း မသိကြတော့ဘူး ..."
"လဲ့ယန်ရော ..."
လူငယ်များအကြောင်း ပြောနေရင်း ကျိမြန်မှာ သူ့ချစ်သူလေးကို အမှတ်ရသွားတော့သည်။
"အိုး ... သူလား သူက မနက် ၇ နာရီကတည်းက ရောက်နှင့်နေပြီလေ ..."
လင်းလဲ့ယန်အပေါ် ဖန်ခွင်း၏ အကောင်းမြင်မှုတို့မှာ တစ်စထက်တစ်စ တိုးမြင့်လာသည့်အတွက် သူက ချီးကျူးလိုက်သည်။
"ဒါရိုက်တာလောဆီကနေ ကြားမိတာတော့ သူက မနက်အစောကြီးကတည်းက ရောက်ချလာပြီး ရိုက်ကွင်းနေရာချတာတွေ၊ ဝတ်စုံတွေ ပြန်စစ်တာတွေကို ကူပေးတယ်တဲ့ တစ်ခြားသူတွေ ရိုက်နေတဲ့အချိန်မှာဆိုလည်း ဘေးနားကနေ ရပ်ကြည့်ပြီး သင်ယူနေတာ အားသွားပြီဆိုမှ ထောင့်လေးမှာထိုင်ပြီး သူ့စာသားတွေကို မှတ်မိအောင် ဖတ်နေတယ်တဲ့ သူက တကယ်ကို ဝီရိယရှိတာပဲ ..."
"လဲ့ယန်က တကယ်ကို ကြိုးစားတာ ..."
ကျိမြန်က ဂုဏ်ယူစွာဖြင့် မသိမသာ ပြုံးလိုက်သည်။
နှစ်ဦးသား စကားတပြောပြောဖြင့် ရိုက်ကွင်းနေရာသို့ ရောက်လာသည့်အခါ ရှစ်ထင်းဟန်ကို ယှဉ်ပြိုင်တိုက်ခိုက်ရမည့် အခန်းအား သရုပ်ဆောင်နေသည့် လင်းလဲ့ယန်ကို တွေ့လိုက်ရသည်။ ရှစ်ထင်းဟန် သရုပ်ဆောင်ရမည့် ဇာတ်ကောင်မှာ မူးယစ်ဆေးရောင်းချသည့် အဖွဲ့ငယ်တစ်ခု၏ ခေါင်းဆောင် ဟဲကျင်းဖြစ်သည်။ အမှန်တွင် သူသည် လင်အုပ်စုကို စုံစမ်းရန် ရဲဘက်က စေလွှတ်လိုက်သည့် သူလျှိုဖြစ်သည်။ လင်ထောင်မှာလည်း ရဲစခန်းတွင် သူလျှိုထားထားသည့်အတွက် ထိုအကြောင်းကို သိနှင့်နေပြီးဖြစ်ရာ ဟဲကျင်ကို သတင်းအမှားများသာ သိစေသည့်အတွက် ရဲတပ်ဖွဲ့မှာ ချုံခိုတိုက်ခိုက်ခံရပြီး အကျအဆုံး များပြားသွားတော့သည်။
ထို့ကြောင့် ဟဲကျင်းကို ရဲတပ်ဖွဲ့မှ သစ္စာဖောက်အဖြစ် သတ်မှတ်ကာ အလုပ်ဖြုတ်လိုက်ရုံသာမက ဝရမ်းပြေးစာရင်းထဲကိုပါ ထည့်သွင်းလိုက်တော့သည်။ ဆေးရောင်းသည့် ဂိုဏ်းကလည်း သူ့ကို အသေသတ်ရန် လိုက်ရှာနေသည့်အတွက် အလင်းနှင့်အမှောင် နှစ်ဖွဲ့လုံး၏ လိုက်လံဖမ်းဆီးခြင်းကို ခံနေရသော ဟဲကျင်းမှာ ပြေးရင်းလွှားရင်းပင် သူ့နာမည်ကို ရှင်းလင်းရန် အသည်းအသန် ကြိုးပမ်းလိုက်ရပြန်သည်။ ရဲစခန်းထဲသို့ စွန့်စွန့်စားစား ခိုးဝင်ပြီးနောက်တွင်တော့ သစ္စာဖောက်အစစ်ကို ရှာတွေ့သွားတော့၏။
လင်းလဲ့ယန်၏ ဇာတ်ကောင်မှာ ဟဲကျင်း၏ ငယ်ဘဝ သူငယ်ချင်း၊ အလုပ်ဝင်ကာစ ရဲတပ်သား ရှစ်ယွီဖြစ်သည်။ ထိုသူနှစ်ဦးမှာ တစ်ဦးအပေါ်တစ်ဦး နက်နက်ရှိုင်းရှိုင်း ငြိတွယ်နေကြသည့်အပြင် ရှစ်ယွီအနေဖြင့် ဟဲကျင်းသည် သူ့လုပ်ဖော်ကိုင်ဖက်များကို သစ္စာဖောက်လိမ့်မည် မဟုတ်ဟု ယုံကြည်ထားသည့်အတွက် လိုက်လံဖမ်းဆီးချိန်တွင် ရှစ်ယွီကို တမင်သပ်သပ် လွတ်မြောက်စေခဲ့သည်။ ဤသည်မှာ လက်ရှိရိုက်ကူးမည့် ဇာတ်ကွက်ဖြစ်သည်။
ရှစ်ထင်းဟန်၏ မျက်နှာမှာ အညစ်အကြေးတို့ဖြင့် ပေကျံနေကာ အလွန်ညှင်းသိုးသိုးနိုင်လှသည်။ သူက သန့်ရှင်းရေးသမားဝတ်စုံကို ဝတ်ဆင်ကာ ဘေးနားတွင် ရပ်လျက် ရိုက်ကူးရေးစတင်မည်ကို စောင့်နေပေသည်။ ရဲဝတ်စုံကို ဝတ်ဆင်ထားသော လင်းလဲ့ယန်မှာမူ ဇာတ်ညွှန်းကိုသာ စဉ်ဆက်မပြတ် ငုံ့ဖတ်နေပြီး အလွန် စိတ်လှုပ်ရှားပူပန်နေဟန် ပေါ်ပေသည်။
ကျိမြန်က သူ့အနားသို့သွားကာ နှစ်သိမ့်ပေးရန် ပြင်လိုက်စဉ်မှာပင် ဒါရိုက်တာ၏အသံကို ကြားလိုက်ရတော့သည်။
"အက်ရှင် ..."
နှစ်ဦးသား အလျင်အမြန်ပင် သရုပ်ဆောင်ခြင်းကို စတင်လိုက်တော့သည်။ သို့သော် များမကြာမီမှာပင် ဒါရိုက်တာ၏ အော်ဟစ်သံ ထွက်ပေါ်လာတော့၏။
"Cut! လင်းလဲ့ယန် မင်းက ဘေးရောက်သွားပြန်ပြီ နံပါတ်နှစ်ကင်မရာက မင်းမျက်နှာကို မရိုက်မိတော့ဘူး နောက်တစ်ခေါက် ပြန်လုပ်မယ် ..."
"တောင်းပန်ပါတယ် ဒါရိုက်တာကြီး ..."
လင်းလဲ့ယန်က လက်ချင်းယှက်ကာ အလွန်အားတုံ့အားနာဖြစ်ဟန်ဖြင့် တောင်းပန်လိုက်သည်။
"ရပါတယ် အဆင်ပြေသွားမှာပါ ..."
ရှစ်ထင်းဟန်မှာ ကျိမြန်နှင့် ဆက်ဆံရေးကောင်းသည့်အတွက် လင်းလဲ့ယန်ကို အနည်းငယ် မျက်နှာသာ ပေးလိုက်သည်။
"တောင်းပန်ပါတယ် ဟန်ကော ကောကို ဒုက္ခပေးသလို ဖြစ်နေမှာကို စိတ်ပူနေလို့ပါ ..."
လင်းလဲ့ယန်က ထပ်ကာထပ်ကာ တောင်းပန်လိုက်သည်။ ထို့နောက် ဘေးနားတွင် ရပ်နေသော ကျိမြန်ကို တွေ့လိုက်ရသည့်အခါ သူ့မျက်နှာတစ်ခုလုံး သွေးဆုတ်သွားတော့၏။ ထိုအခါမှသာ ကျိမြန်နှင့် သရုပ်ဆောင်ခွင့်ရခြင်းမှာ အလွန်ကျေနပ်ဖွယ် ကောင်းလှသော်ငြား NG များကို မြင်စေခြင်းမှာမူ ထိတ်လန့်ဖွယ်ကောင်းလှခြင်း သဘောပေါက်သွားတော့သည်။ သူက ကျိမြန်၏ အကြည့်တို့ကို ရှောင်တိမ်းကာ နေရာပြန်ယူလိုက်တော့သည်။
(NG= not good ရိုက်ထားတာ အဆင်မပြေလို့ ပြန်ရိုက်ရမယ်လို့ ပြောတာပါ)
"အက်ရှင် ..."
ဒါရိုက်တာ၏ စကားသံ ဆုံးသည်နှင့်တစ်ပြိုင်နက် နှစ်ဦးသား တစ်ယောက်ကော်လံ တစ်ယောက်ဆွဲကာ လူမရှိသည့် လှေကားအနားတွင် ပုန်းနေလိုက်သည်။ လင်းလဲ့ယန်က ရှစ်ထင်းဟန်၏ မျက်နှာဖုံးကို ဆွဲချွတ်ကာ တီးတိုးပြောလိုက်သည်။
"တကယ်ပဲ မင်းဖြစ်နေတာကိုး ..."
ရှစ်ထင်းဟန်က သူ့စာသားများကို ပြောမည်ပြုစဉ်မှာပင် ဒါရိုက်တာ၏ စကားသံကို ထပ်ကြားလိုက်ရပြန်သည်။
"Cut ! ..."
လင်းလဲ့ယန်မှာ ရုတ်ချည်း အေးခဲသွားတော့၏။
လောကျန်းဝေ့က အသံချဲ့စက်ကို ကောက်ကိုင်ကာ လင်းလဲ့ယန်ကို အော်ပြောလိုက်သည်။
"ဘယ်လိုဖြစ်လို့ ကင်မရာထဲကနေ ပျောက်သွားရပြန်တာလဲ ရှစ်ထင်းဟန်က မင်းကို သင်မပေးဘူးလား ဒီနားလာပြီး ကိုယ့်ဘာသာကိုယ် ကြည့်ကြည့် ..."
လင်းလဲ့ယန်မှာ ကျွင်းတူး၍ ပုန်းချင်လောက်အောင်ပင် ရှက်ရွံ့သွားရှာတော့သည်။ ခပ်သွက်သွက် လာကြည့်လိုက်လျှင် အစောပိုင်း၌ သူရပ်နေသည့် နေရာမှာ မှန်ကန်သော်ငြား ရှစ်ထင်းဟန်၏ အင်္ကျီစကို ဆောင့်ဆွဲကာ ခြေလှမ်းအနည်းငယ် နောက်ဆုတ်လိုက်ချိန်တွင်မူ ကင်မရာတွင် သူ့လက်မောင်းတစ်ဖက်သာ ပေါ်နေတော့သည်။ ရိုက်ခဲ့သမျှအားလုံး သဲထဲရေသွန် ဖြစ်သွားချေပြီ။
"တောင်းပန်ပါတယ် ဒါရိုက်တာကြီး နောက်တစ်ခါ သေချာ အာရုံစိုက်လိုက်ပါ့မယ် ..."
လှိုက်လှိုက်လှဲလှဲ တောင်းပန်ပြီးနောက် ကျိမြန်က သူ့အနားသို့ လျှောက်လာသည်ကို တွေ့လိုက်ရသည်။ သူ့ကို တစ်ခုခု ပြောလိုဟန် ပေါ်နေသည့်အတွက် ရှစ်ထင်းဟန်အနီးသို့ အမြန် ပြန်သွားကာ ရိုက်ကူးရေးကို ပြန်စရန် ပြင်ဆင်လိုက်တော့သည်။
ဘာမှ မတတ်တဲ့ ရှောင်ကျားရှုတောင် တစ်ခေါက်တည်းနဲ့ ပြီးသွားတာကို သူကကျ ဘာလို့ ခဏခဏ NG တွေ ပါနေရတာလဲ ကျိကောတော့ မျက်နှာပျက်ရတော့မှာပဲ ရိုက်ကူးရေးပြီးမှ သူနဲ့စကားပြောတာ ပိုကောင်းမယ်ထင်တယ် အဲဒါမှ ဖိအားနည်းမှာ ...
အချို့သူများသည် အခက်အခဲ ကြုံချိန်တွင် သူတို့ကို အားပေးမည့် ဆွေမျိုးမိတ်ဆွေ အပေါင်းအသင်းများကို လိုအပ်ပေသည်။ သို့သော် လင်းလဲ့ယန်မှာမူ ထိုသူများနှင့်မတူ။ အရှက်ရစရာ အခြေအနေမျိုးနှင့် ကြုံရလေ သူကိုယ်တိုင် ရင်ဆိုင်ချင်လေ ဖြစ်ကာ ဤသို့မှသာ အရှက်တကွဲအကျိုးနည်းဖြစ်မှု လျော့နည်းသွားမည်ဟု ခံယူထားပေသည်။
သူက ရှစ်ထင်းဟန်ကို တောင်းပန်ကာ ကျိမြန်တစ်ယောက် သူ့ကို လာနှစ်သိမ့်ပေးမည်ကို ကြောက်ရွံ့နေစိတ်အား မေ့ဖျောက်ထားလိုက်သည်။ မူလက သူ့အနားသို့သွားရန် ပြင်နေသော ကျိမြန်ကလည်း ကူကယ်ရာမဲ့နေဟန်ဖြင့် သူ့နေရာတွင်သာ ပြန်ထိုင်နေလိုက်တော့သည်။ ထိုအချိန်တွင် ရှောင်ကျားရှုက သူ့အနားသို့ ရောက်လာကာ ခြေဖျားထောက်ပြီး တီးတိုး စပ်စုလိုက်သည်။
"ဘာဖြစ်နေတာလဲ ဘယ်သူတွေများ NG စားလိုက်မိပြန်တာလဲ ..."
ရိုက်ကွင်း၌ တစ်ပတ်ခန့် အချိန်ဖြုန်းပြီးနောက် ရှောင်ကျားရှုမှာ သူသည် သရုပ်ဆောင်ရခြင်းကို စိတ်မဝင်စားသေးသည့်တိုင် သရုပ်ဆောင်များ NG စားနေရသည်ကို ကြည့်ရခြင်းအား အလွန်နှစ်မြို့ကြောင်း သိရှိသွားတော့သည်။ NG ဖြစ်ရခြင်းတွင် တစ်ယောက်နှင့်တစ်ယောက် အကြောင်းအရင်းအမျိုးမျိုး ကွဲပြားနေသည့်အပြင် နောက်ပိုင်းတုန့်ပြန်ပုံများမှာလည်း မတူညီကြပေ။ ဒါရိုက်တာ၏ ဆူပူမှုမှာလည်း သည်းမခံနိုင်လောက်အောင်ပင် ပြင်းထန်လှရာ အမျိုးမျိုးအဖုံဖုံ စိတ်ဝင်စားစရာ ကောင်းလှသည့်အတွက် သူ့အတွက် ပျင်းရိငြီးငွေ့ချိန်ပင် မရှိတော့ချေ။ ထိုဖြစ်ရပ်များကို ဗီဒီယိုရိုက်ထားကာ အပျင်းပြေ ပြန်ကြည့်၍ ရလေမလားဟူ၍ပင် တွေးမိတော့သည်။
ကျိမြန်က သူ့ကို လျစ်လျူရှုထားကြောင်း သိလိုက်ရသည့်အခါ တစ်ကိုယ်တည်း ရေရွတ်နေလိုက်တော့သည်။
"လင်းလဲ့ယန်ပဲ ဖြစ်ရမယ် သူနဲ့ကျွန်တော်က အခြေခံမရှိတာချင်း အတူတူပဲဟာကို ..."
ကျိမြန်က စကားပြန်မပြောသော်ငြား စိတ်အနှောင့်အယှက်ဖြစ်ဟန်ဖြင့် မျက်မှောင်ကြုတ်ပြလိုက်သည်။
ရိုက်ကူးရေးကို တတိယအကြိမ် ပြန်လည်စတင်လိုက်တော့သည်။ လင်းလဲ့ယန်နှင့် ရှစ်ထင်းဟန်တို့နှစ်ဦးလုံး အဆင်သင့်ပြင်ကာ ကော်လံကိုဆွဲလျက် လှေကားနောက်တွင် ပုန်းလိုက်ကြသည်။ ဤတစ်ကြိမ်တွင်တော့ နေရာတကျ အောင်မြင်စွာဖြင့် အပြီးသတ်နိုင်သွားတော့သည်။ နှစ်ဦးလုံး၏ ပုံရိပ်များမှာ ကင်မရာထဲတွင် ပေါ်လွင်နေကာ စိတ်ခံစားချက်တို့မှာလည်း ဇာတ်ရုပ်နှင့် အံဝင်ခွင်ကျ ဖြစ်နေသည်။ လင်းလဲ့ယန်က ရှစ်ထင်းဟန်၏ မျက်နှာဖုံးကို ဆွဲချွတ်ကာ ပြောလိုက်သည်။
"တော်လောက်ပြီ အဲဒါက မင်းပဲ ..."
ရှစ်ထင်းဟန်က တစ်ခုခုကို ပြောလိုဟန်ဖြင့် ပါးစပ်ကို ဟလိုက်သော်ငြား ရုတ်ချည်း ရပ်တန့်ကာ လင်းလဲ့ယန်ကို မှောင်ရိပ်ကျနေသည့်နားသို့ တွန်းပို့လိုက်သည်။ အကြောင်းမှာ အပြင်ဘက်တွင် သူတို့ကို လိုက်လံရှာဖွေနေသည့် ရဲများ၏ ခြေသံများ ဆူညံလာ၍ဖြစ်သည်။
ထို ကျယ်လောင်လှသည့် ခြေသံများမှာ အမှန်တကယ် ထည့်သွင်းရိုက်ကူးထားခြင်း မဟုတ်ချေ။ တည်းဖြတ်ချိန်မှသာ ထည့်သွင်းမည် ဖြစ်သည့်အတွက် အာရုံတစူးတစိုက်ဖြင့် နားထောင်ကာ စိတ်တင်းကြပ်နေဟန်ကို ကိုယ်တိုင် မှန်းဆကာသာ သရုပ်ဆောင်ရမည်ဖြစ်သည်။
ရှစ်ထင်းဟန်က ချိန်သားတကျ သရုပ်ဆောင်လိုက်သော်ငြား လင်းလဲ့ယန်ကမူ စည်းချက်နှင့် လွဲချော်သွားချေသည်။ ရှစ်ထင်းဟန်က သူ့ကို ထောင့်စွန်းသို့ တွန်းမပို့ခင်အထိ ထိတ်လန့်နေသည့် အမူအယာမျိုး ပေါ်ထွက်မလာသေးချေ။ သူ့ပုံစံမှာ လိုက်လံဖမ်းဆီးမှုကို ပုန်းရှောင်နေသူနှင့် မတူဘဲ ကိုယ်ထိလက်ရောက် စော်ကားခံရ၍ ကြောက်ရွံ့နေသော မိန်းမငယ်လေးအသွင် ဖြစ်နေပေသည်။ ဇာတ်ညွှန်းထဲတွင် ခြေသံများကို တစ်ပြိုင်တည်း ကြားလိုက်ကြပြီး အမှောင်ထဲသို့ နှစ်ယောက်အတူတူ ပုန်းအောင်းလိုက်ကြသည်ဟု ဖော်ပြထားသည်။ ဤသည်မှာ ဟဲကျင်းနှင့် ရှစ်ယွီတို့ ကလေးဘဝကတည်းက ပိုင်ဆိုင်ထားခဲ့သည့် ထုတ်ပြောရန် မလိုအပ်သော နားလည်မှုပင်ဖြစ်သည်။
ရိုက်ကူးရေးကာလ ကြာရှည်လာလေလေ လောကျန်းဝေ့မှာ ပိုပြီး စည်းကမ်းတင်းကြပ်ကာ အပြစ်ရှာတတ်လာလေလေပင်ဖြစ်သည်။ ထိုသည်ကို မြင်လိုက်သည်နှင့်တစ်ပြိုင်နက် သူက "cut" ဟု အော်ကာ အသံချဲ့စက်ကို ကောက်ကိုင်လိုက်သည်။
"လင်းလဲ့ယန် မင်းပဲ ဖြစ်ပြန်ပြီလား မင်းကို ငါ ဘာပြောထားလဲ ဒီနေရာက ရဲစခန်းလို့ ရဲတွေက သူ့ကို ဖမ်းဖို့ စောင့်နေကြတာ သူ့ကို လှေကားနားလေး ဆွဲခေါ်သွားလိုက်ရုံနဲ့ အားလုံးပြီးသွားပြီလို့ ထင်နေတာလား မင်းက အာရုံတွေ ထွေပြားနေရမယ် ၊ နေရာတိုင်းကို ကျီးကန်းတောင်းမှောက် ကြည့်နေရမယ် အချိန်ပြည့် စိတ်အေးလက်အေး နေနေလို့ မရဘူးကွ ဒီအဆောက်အဦးကြီးတစ်ခုလုံးမှာ မင်းကို ဖမ်းဖို့ ကြိုးစားနေတဲ့သူတွေနဲ့ ပြည့်နေတယ်လို့ တွေးထားရမယ် နားလည်လား ..."
"တောင်းပန်ပါတယ် ဒါရိုက်တာကြီး ..."
လင်းလဲ့ယန်မှာ မျက်နှာတစ်ခုလုံး နီစွေးနေသည်အထိ ရှက်ရွံ့သွားရတော့သည်။ ပထမတစ်ပိုင်းကို ချောချောမွေ့မွေ့ ရိုက်ကူးနိုင်သွားသည့်အတွက် စိတ်သက်သာရာရမည်ပင် မကြံရသေး၊ စည်းချက် လွဲသွားပြန်ချေပြီ။
အခုထိ ကျိကောကို ဆွဲချမိနေတုန်းပဲ ...
"ထပ်ရိုက်တဲ့အခါ မင်းကိုယ်မင်း ဒီရိုက်ချက်ထဲမှာ အာရုံစူးစိုက်ထား ခဏနားပြီး စိတ်ကို ပြင်ဆင်လိုက် ..."
သူသည် အတွေ့အကြုံမရှိသေးသည့် လူသစ်လေးသာ ဖြစ်သည့်အတွက် လောကျန်းဝေ့လည်း ပြင်းပြင်းထန်ထန် ဆူပူကြိမ်းမောင်းမနေတော့ချေ။
Xxxxxxxx