Chapter 5
အနုပညာရှင်တို့၏ လက်ထောက်များကို အကြမ်းအားဖြင့် သုံးမျိုး ခွဲခြားနိုင်ပေသည်။
နံပါတ် ၁။ အတွင်းရေးမှူးလိုမျိုး အချိန်ဇယားကိုပဲ စီစဉ်ပေးရတဲ့ သာမန်လက်ထောက်
နံပါတ် ၂။ ပရိုမိုးရှင်းဆင်းဖို့၊ ကြေငြာဖို့၊ လူထုဆက်ဆံရေးနဲ့ တစ်ခြားကိစ္စတွေအတွက် မားကတ်တင်းဆင်းပေးဖို့အပြင် မန်နေဂျာအဖြစ်ပါ တာဝန်ယူပေးရမယ့် လက်ထောက်
နံပါတ် ၃။ အစားအသောက်၊ အဝတ်အစား စတဲ့ နေ့စဉ်ဘဝတွေကိုပါ လိုက်ပြီး ဂရုစိုက်ပေးရမယ့် နာနီပုံစံ လက်ထောက် ...
စီမံကိန်း ရေးဆွဲခြင်းနှင့် မားကတ်တင်းဆင်းပေးရမည့် လက်ထောက်အတွက် လိုအပ်ချက်မှာ ပိုမိုများပြားလှသော်ငြား တစ်ချိန်တည်းတွင်ပင် ၎င်းကသာ နောင်ရေးအတွက် အကောင်းဆုံးအလုပ်ဖြစ်သည်။ ထိုအလုပ်မှတစ်ဆင့် များစွာ လေ့လာသင်ယူနိုင်ကာ ရှောင်ကျားရှုကိုယ်တိုင်ကလည်း စီမံခြင်းနှင့် မားကတ်တင်းဆင်းခြင်းကို ပိုမိုစိတ်ဝင်စားလှသော်ငြား လိုအပ်ချက်များကို ဖတ်လိုက်ရချိန်တွင်မူ အနည်းငယ် တုန့်ဆိုင်းသွားမိတော့သည်။
စီမံကိန်းနှင့် မားကတ်တင်းဆင်းခြင်းဆိုင်ရာ လက်ထောက်တစ်ဦး ဖြစ်လိုပါလျှင် ဦးစွာပထမ ပွဲစဉ်ပွဲရပ်များနှင့် အထိအတွေ့ ရှိနေရမည့်အပြင် ပရောဂျက်ရေးဆွဲရေးနှင့် လူထုစည်းရုံးရေးတို့လည်း အရည်အချင်း ပြည့်ဝရမည်ဖြစ်သည်။ ထို့အပြင် ပုံနှိပ်ထုတ်ဝေသော မီဒီယာများနှင့် အင်တာနက်အရင်းအမြစ်များစွာကိုလည်း ထိန်းချုပ်နိုင်ရမည့်အပြင် ထက်မြက်သန်မာကာ ယုတ္တိကျသည့် အတွေးအခေါ်ကိုလည်း ပိုင်ဆိုင်ထားရန် လိုအပ်သေးသည်။ ထိုမျှသာမက လူမှုဆက်ဆံရေးအရည်အချင်း ကောင်းမွန်ရန် လိုအပ်ကာ လုပ်ငန်းခွင်သုံး ဆော့ဖ်ဝဲလ်အမျိုးမျိုးနှင့် အင်တာနက်ကိုလည်း ကျွမ်းကျွမ်းကျင်ကျင် အသုံးပြုတတ်ရမည့်အပြင် တရုတ်စာအရေးအသားတွင်လည်း အခြေခံ ခိုင်မာကာ သတင်းဆောင်းပါးနှင့် မှတ်တမ်းမှတ်ရာများ ရေးသားရာ၌လည်း အလွန်အားကောင်းသည့် အရည်အချင်းကို ပိုင်ဆိုင်ထားရဦးမည်ဖြစ်သည်။ နောက်ဆုံးအနေဖြင့် သတင်းတစ်ပုဒ် ဖြစ်လာစေရန် စီမံခြင်းနှင့် စီးပွားရေးနှင့် ပတ်သက်ပြီး ဆက်ဆံပြောဆိုရမည့် ကိစ္စရပ်တို့တွက်လည်း ထူးထူးကဲကဲ ညှိုနှိုင်းတတ်သူ ဖြစ်ရဦးမည်ဖြစ်သည်။
အကျဉ်းချုပ်ရပါလျှင် စီမံရေးနှင့် မားကတ်တင်းဆင်းခြင်းဆိုင်ရာ လက်ထောက်အလုပ်မှာ မလွယ်ကူလှချေ။ အခြားသူများအကြား ထင်းထွက်နေစေရန် နယ်ပယ်တိုင်း၌ ထူးချွန်ပြောင်မြောက်နေရမည်ဖြစ်သည်။ သူ့အခြေအနေနှင့် လိုအပ်ချက်များကို တိုက်ကြည့်နေသော ရှောင်ကျားရှုမှာလည်း စိတ်ဓာတ်များပင် ကျဆင်းလာတော့၏။
လိုအပ်တဲ့အတွေ့အကြုံ : မရှိ။
သတင်းအရင်းအမြစ် : တစ်ခုမှမရှိ။
တရုတ်စာ အရေးအသား အခြေခံလိုအပ်ချက် : အစောကြီးကတည်းက နိုင်ငံခြားကို ထွက်လာခဲ့ရတော့ ဒါလည်း မရှိ။
သူ့မှာ ရှိတာဆိုလို့ ညှိုနှိုင်းဆွေးနွေးနိုင်စွမ်းနဲ့ စည်းရုံးနိုင်စွမ်းပဲ ရှိတယ် ဒါပေမယ့် ဒီနှစ်ခုကိုလည်း သိပ်ပြီး ယုံကြည်ချက် မရှိဘူး ...
သူသည် ဤနယ်ပယ်တွင် တစ်ခါမှ အလုပ်လုပ်ကိုင်ဖူးသူ မဟုတ်သည့်အတွက် ထိုအရည်အချင်းများ တိုးတက်လာနိုင်စွမ်း ရှိမရှိကိုလည်း မခန့်မှန်းတတ်သေးချေ။
ဆိုတော့ လက်ထောက်အလုပ်ကလေးကတောင် ဒီလိုမျိုး စိန်ခေါ်မှုတွေ များပြားတာလား ဒီလိုအပ်ချက်တွေပေါ် အခြေခံပြီး စဉ်းစားကြည့်လိုက်မှ ဘွဲ့ရပြီးပြီးချင်း ရှောင်အုပ်စုထဲကို အရေးပါတဲ့ ရာထူးတစ်ခုနဲ့ ဝင်နိုင်လိမ့်မယ်လို့ ဘယ်လိုများ တွေးခဲ့မိပါလိမ့် သူက အဲဒီ့ ရာထူးအတွက် အရည်အချင်းရော ရှိလို့လား လုပ်နိုင်စွမ်းရော ရှိပါ့မလား ...
ကွန်ပျုတာစခရင်ကို ငေးကြည့်နေရင်း ကုန်လွန်ခဲ့သော အချိန်ကောင်းတို့တွင်သာ နစ်မြှုပ်နေသည့် ရှောင်ကျားရှု၏ အတွေးစအားလုံး ပျောက်ကွယ်သွားတော့သည်။ "အောင်ပွဲခံပြီး အိမ်ကိုပြန်လာ၊ အံ့ဩလောက်စရာ အရည်အချင်းတွေ၊ ပါရမီတွေကို ထုတ်ပြပြီးတော့ အဖေ၊ အစ်ကိုကြီးနဲ့ အဘိုးတို့ကို ဂုဏ်ယူစေရမယ်" ဟူသည့် ရည်မှန်းချက်မှာလည်း လှောင်ရယ်သံတစ်ချက်နှင့်အတူ လွင့်မျောပျောက်ကွယ်သွားတော့သည်။
လူတစ်ယောက်က အလွန်အကျူး ရည်မှန်းချက်ကြီးနေလို့ မရဘူး လက်တွေ့ကျလေလေ ပိုပြီး ကောင်းလေပဲတဲ့ ...
သက်ပြင်းခိုးချကာ ခေါင်းကို ခါယမ်းရင်း "သစ်ပင်ပေါက်ကလေး" အမည်ဖြင့် ဝေ့ပေါ်အကောင့်တစ်ခု ဖွင့်ကာ ကျိမြန်ကို follow လုပ်လိုက်သည်။ ထို့နောက် ကွန်ပျူတာကို ပိတ်ကာ ပူပန်စိတ်လှုပ်ရှားမှုများစွာဖြင့် အိပ်မောကျသွားတော့၏။ နောက်နေ့မနက်တွင် ၇နာရီခွဲကတည်းက အိပ်ယာထကာ မနက်စာစား၊ အသစ်စက်စက် အနောက်တိုင်းဝတ်စုံကို လဲပြီး မှန်ရှေ့တွင် ခေါင်းဖြီးနေလိုက်တော့သည်။
"အမေ လက်ထောက်တစ်ယောက်က ရုပ်ရည်သွင်ပြင်ကို ဂရုစိုက်ရမယ်ဆိုပေမယ့် ကိုယ့်အနုအညာရှင်ထက်လည်း ကြည့်ကောင်းနေလို့ မရဘူးဆို ဟုတ်လား ကျွန်တော့်ဆံပင်အရောင်က အရမ်းများ ထင်းထွက်နေမလား မသိဘူးနော် အမည်းပြန်ဆိုးလိုက်သင့်လား ..."
သူက ဆံပင်ကို ဂျယ်လ်လိမ်းရင်း ခပ်ကြွားကြွား ပြောလိုက်သည်။
"အမေ ကျွန်တော်ကလေ ကျိမြန်ရဲ့ ကျော်ကြားမှုကို လုယူသလိုများ ဖြစ်သွားမလားပဲ သူနဲ့အတူတူ လျှောက်လာရင် သတင်းထောက်တွေအကုန်လုံးက သူ့ကိုကျော်ပြီး ကျွန်တော့်ကိုပဲ ဓာတ်ပုံဝိုင်းရိုက်နေကြရင် ဘယ့်နှယ့်လုပ်မလဲ ..."
ထိုသို့ ပြောပြီးနောက် အင်မတန် သဘောတွေ့သွားသည့်အတွက် နှမ်းဆီအနည်းငယ်ကို ခိုးတော့မည့် ကြွက်တစ်ကောင်နှယ် မျက်လုံးများ ပိတ်ကျသွားသည်အထိ အားရပါးရ ပြုံးလိုက်တော့သည်။
အပြင်လူများ၏အရှေ့တွင် သူမ၏သားသည် ဤကဲ့သို့ ရွှတ်နောက်နောက် ပြောဆိုရန်ဝေးစွ၊ အမြဲလိုလို အထက်စီးဆန်ကာ မောက်မာဟန်သာ ဖမ်းထားလေ့ရှိသည်။ ဤကဲ့သို့ ကလေးဆန်ကာ အရှက်မရှိလောက်အောင်ပင် ကိုယ့်ကိုယ်ကို ချစ်မြတ်နိုးတတ်သည့် အခြမ်းများကို သူမတစ်ဦးတည်း၏ အရှေ့တွင်သာ လှစ်ဟပြတတ်ပေသည်။သားဖြစ်သူ၏ ဝင်းလက်တောက်ပနေသော မျက်နှာကို ငေးကြည့်ရင်း ရွှယ်မြောင်၏ စိတ်ထဲရှိ လေးလံနေမှုအားလုံး လွင့်စင်သွားတော့သည်။
ဒီပုံစံအတိုင်းဆိုရင်တော့ သူ့အတွက် အလုပ်ရှာပေးလိုက်တာက တကယ်ကိုကောင်းတဲ့ ဆုံးဖြတ်ချက်ဖြစ်မယ်နဲ့ တူပါတယ် ...
"ဆံပင်ကို အမည်းရောင် ပြန်ဆိုးလိုက်ရင်လည်း အမေ့သားရဲ့ ချောမောခန့်ညားမှုတွေကတော့ ဖုံးမနိုင် ဖိမနိုင်လောက်အောင်ကို ထွက်နေဦးမှာပဲ ..."
သူမက ပြောလိုက်သည်။ ပို၍ပင် ဘဝင်မြှောက်လာဟန်ရှိသည့် သားဖြစ်သူ၏ အမူအယာကို တွေ့လိုက်ရချိန်တွင်တော့ ဟန်မဆောင်နိုင်လောက်အောင်ပင် ရယ်ချလိုက်တော့၏။ တစ်ခဏအကြာတွင်မှ ရယ်မောခြင်းကို လက်စသတ်ကာ မေးလိုက်သည်။
"သား တစ်ခြားတစ်ယောက်ရဲ့ လက်ထောက်လုပ်ရတာ ခံပြင်းစရာကောင်းတယ်လို့ မထင်ဘူးလား ကုမ္ပဏီတစ်ခုထောင်ဖို့ အမေ အရင်းအနှီး ထုတ်ပေးရမလား ..."
အဖေရှောင်ထံမှ ရင်းနှီးငွေတောင်းခံရန်ကိုမူ စိတ်ပင် မကူးဖူးချေ။
ပြီးခဲ့သည့်နှစ်အနည်းငယ်ခန့်က ရှောင်ချီကျဲ၏ ဒုတိယအစ်ကိုမှ မွေးထားသော တရားမဝင်သားတစ်ဦးသည် ပြင်ပတွင် ကုမ္ပဏီတစ်ခု တည်ထောင်ကာ အမြတ်အစွန်း များစွာ ရရှိခဲ့ဖူးသည်။ သို့သော် မိသားစုဝင်များက "ရှောင်မိသားစုက ရင်းနှီးပေးထားသည်" ဟူသည့် အကြောင်းပြချက်ဖြင့် ကုမ္ပဏီ၏ ရှယ်ယာများကို ခွဲဝေယူခဲ့ရုံသာမက သူ့လက်ထဲရှိ အုပ်ချုပ်ခွင့်ကိုပင် လုယူခဲ့ကြသည်။ "ဘိုးဘေးများနှင့် ပျိုးထောင်ပေးခဲ့သူများကို ကျေးဇူးဆပ်သည်" ဟူသည့် ဂုဏ်ပုဒ်မှအပ ထိုတရားမဝင်သားမှာ မည်သည့်အကျိုးအမြတ်မှ မခံစားနိုင်ခဲ့ချေ။
ဒီလိုအခြေအနေမျိုးနဲ့ ကြုံထားရမှတော့ ရွှယ်မြောင်က ဘယ်လိုစိတ်ကူးနဲ့ အဖေရှောင်ဆီကနေ အရင်းတောင်းရဲတော့မှာလဲ သူမရဲ့သားက ဘယ်လောက် နှလုံးသားနူးညံ့သလဲဆိုတာ သူမအသိဆုံးလေ လူအိုကြီးကသာ သူ့ကို အသိအမှတ်ပြုပေးရင်၊ အဖေရှောင် ဒါမှမဟုတ် ရှောင်တင်းပန်ကသာ သူ့ကို တစ်ချက်လောက် နွေးနွေးထွေးထွေး ဆက်ဆံခဲ့ဖူးရင် သူက အဲဒီ့လူတွေအတွက် ဘာမဆို လုပ်ပေးမယ့်လူမျိူးလေ ... သီးသန့်ကုမ္ပဏီ ထောင်တာကလား ... သူမရဲ့သား သေလုနီးပါး ကြိုးစားရင်တောင် နောက်ဆုံးမှာတော့ ဘယ်သူ့လက်ထဲ ရောက်လာမှာ မိုလို့လဲ ...
ထို့ကြောင့် ရွှယ်မြောင်သည် သားဖြစ်သူကို ကုမ္ပဏီ ထောင်ပေးရန် တစ်ခါမှပင် စိတ်မကူးတော့ချေ။ သို့သော် သူ့အတွက် တစ်ခုတစ်လေမျှပင် ကြိုးစားအားထုတ်ပေးခြင်းမရှိဟု အပြစ်တင်ခြင်း ခံရမည်ကို စိုးရိမ်မိ၍သာ ဤကဲ့သို့ မေးရခြင်းဖြစ်သည်။
ရှောင်ကျားရှုက အနည်းငယ် တွေးပြီးနောက် လက်ကိုယမ်းကာ ငြင်းပယ်လိုက်သည်။
"မဟုတ်တာ ကျွန်တော်သာ အပြင်မှာ ကုမ္ပဏီထောင်လိုက်ရင် အဘိုးတစ်ယောက် ပိုပြီးတောင် မသက်မသာ ဖြစ်လာမှာပေါ့ ..."
ထို့နောက် ရွှယ်မြောင်၏ ပုခုံးကြား ခေါင်းတိုးဝှေ့ကာ ပြောလိုက်သည်။
"အမေ ကျေးဇူးတင်ပါတယ် ကျွန်တော်က တကယ်ကို စိတ်ပါလို့ အလုပ်လုပ်တာပါ ပြောရရင် အနုပညာရှင်တစ်ယောက်ရဲ့ လက်ထောက်ဆိုတာကလည်း စိတ်ဝင်စားစရာ ကောင်းတာပဲလေ ညက အဲဒါနဲ့ပတ်သက်ပြီး အများကြီး ရှာကြည့်ထားတာ ဒီအလုပ်က တကယ်ကို စိန်ခေါ်မှုတွေ အပြည့်ပဲ ..."
သူ့တွင် အမှန်တကယ်လည်း ရည်မှန်းချက် ကြီးကြီးမားမား မရှိချေ။ ရာထူးကြီး အလုပ်အမှုဆောင် ဖြစ်လာရန်ကသာလျှင် အမြင့်ဆုံး ရည်မှန်းချက် ဖြစ်သည့်အပြင် သူ့အဘိုးနှင့် အစ်ကိုက ကုမ္ပဏီ၏ ဘော့စ်များ ဖြစ်သည့်အတွက် သူ့အနေဖြင့် ထိုရာထူးအထိသာ ရောက်နိုင်မည်ဖြစ်သည်။
ရွှယ်မြောင်က သူ၏ ဂျယ်လ်လိမ်းထား၍ တောင့်ခဲနေသော ဆံပင်များကို ပွတ်သပ်ပေးလိုက်သည်။ သူမအနေဖြင့်လည်း သူ၏ ရိုးစင်းသော အတွေးတို့ကို ဝမ်းသာရမည်လား ဝမ်းနည်းရမည်လားပင် မသိတော့ချေ။
ဒီလို လိမ္မာပြီး နာခံတတ်တဲ့ ကလေးလေးကို ဘာလို့များ ရှောင်မိသားစုက မမြင်နိုင်ကြတာလဲ ဒါပေမယ့် ဒါက အဆိုးကြီးလည်း မဟုတ်ပါဘူး တကယ်လို့သာ အဆင်ပြေနေခဲ့ရင် လူအိုကြီးရှောင်ရဲ့ အရင်းရှင်ဆန်ပုံမျိုးနဲ့ဆို သူမရဲ့သား အနုပညာလောကကနေ ရှာထားသမျှ တစ်ပဲတစ်ပြားတောင် မကျန်အောင် ညှစ်ထုတ်ခံရမှာပဲ ... အခု သူ အနုပညာလောကထဲ ဝင်မှသာ အပြည့်အဝ လွတ်လပ်ပြီးတော့ သူရသင့်ရထိုက်တာတွေ အားလုံးကိုလည်း ပိုင်ဆိုင်ပြီး ဟိုနှစ်ယောက် နည်းနည်းလေးတောင် မယုတ်လျော့တဲ့ အောင်မြင်တဲ့သူ ဖြစ်လာနိုင်မှာပဲ ...
ငါ ရွှယ်မြောင်ရဲ့သားက မိသားစုရဲ့ တန်ဖိုးထားတာကို မခံရရင်တောင် အရှုံးသမားတော့ ဖြစ်မလာစေရဘူး ...
"အရမ်းကြီး မြန်မြန် မမောင်းနဲ့ အလုပ်ကိုလည်း ကြိုးကြိုးစားစားလုပ် အမေ အိမ်မှာ ညစာစားဖို့ စောင့်နေမယ် ..."
သားဖြစ်သူ၏ကား အဝေးသို့ ရောက်သွားမှသာ သူမလည်း သက်မ ချနိုင်တော့သည်။
ရှောင်တင်းပန်နှင့် ရှောင်ချီကျဲတို့သည် မိုးလင်းမှမိုးချုပ်အထိ အလုပ်သွားနေရသူများ ဖြစ်သည့်အတွက် ရှောင်သခင်လေးမှာ တရားဝင် ဝန်ထမ်း ဖြစ်နေပြီဖြစ်ကြောင်း သတိမပြုမိကြသေး။ အိမ်ထဲတွင် တစ်နေကုန် ဂိမ်းဆော့နေသည်ဟုသာ ထင်နေကြပေသည်။
ရှောင်ကျားရှုက အဆုံးမရှိလောက်အောင် ပြင်းပျသည့် ဆန္ဒတို့နှင့်အတူ ကတ်ကိုဖြတ်ကာ ရည်မွန်သည့် လုပ်ဖော်ကိုင်ဖက်တစ်ဦး၏ အကူအညီဖြင့် ရုံးခန်းထဲသို့ ရောက်လာခဲ့တော့သည်။ "သရဖူခေတ်" ၏ စီနီယာအကျဆုံး အနုပညာရှင်တစ်ဦးနေဖြင့် ကျိမြန်တွင် ကုမ္ပဏီလက်အောက်ခံ စတူဒီယိုတစ်ခု ပိုင်ဆိုင်ထားကာ "သရဖူခေတ်" ၏ တစ်ထပ်လုံးကို အပိုင်ယူထားသည်။ ရှို့ချန်ယုက ရှောင်ကျားရှုကို လုပ်ဖော်ကိုင်ဖက်များဖြင့် ကိုယ်တိုင်ကိုယ်ကျ မိတ်ဆက်ပေးလိုသော်ငြား ထိုအကြံကို ငြင်းပယ်ခံလိုက်ရသည့်အတွက် အကောင်းဆုံး ဂရုစိုက်ပေးရန် ဖန်ခွင်းကို မှာကြားရုံသာ ရှိပေတော့သည်။ သို့သော် ဥက္ကဌ၏ ဆိုလိုရင်းကို အဓိပ္ပါယ်ကောက် လွဲသွားရှာသည့် ဖန်ခွင်းကမူ ရှောင်ကျားရှုကို အလုပ်ကို အပျော်သဘောမျှသာ လာလုပ်သည့် "ဖူးဖူးမှူတ်ခံထားရသော သခင်လေး" အဖြစ်သာ မှတ်ယူကာ အစစ်အမှန် အလုပ်သင်ဝန်ထမ်းအဖြစ် မဆက်ဆံတော့ချေ။
ထို့သို့ဖြင့် ရှောင်ကျားရှုတွင် တစ်မနက်လုံး လုပ်စရာအလုပ် မရှိတော့။ စားပွဲတွင်သာ မအီမသာဟန်ဖြင့် ထိုင်နေရတော့သည်။ သူ့ကို စာရွက်စာတမ်းများ ကူးပေးရန် တောင်းဆိုလာ၍ မတ်တပ်ပင် မရပ်ရသေး အမျိုးသမီး လုပ်ဖော်ကိုင်ဖက်တစ်ဦးက ထိုစာရွက်ကို ဆွဲယူသွားကာ မျက်နှာလိုမျက်နှာရလုပ်ဟန်ဖြင့် ပြုံးပြလာသည်။ ကြေငြာချက် အရေးခိုင်း၍ ရေးတော့မည် ပြင်လိုက်ချိန်တွင်လည်း ထိုကြေငြာချက်မှာ ရေးထားပြီးဖြစ်ကြောင်း ကျန်တစ်ယောက် ဝင်ပြောလာပြန်၏။ ထိုကဲ့သို့ဖြစ်ရပ်မျိုး ထပ်ကာထပ်ကာ ကြုံလာရသည့်အတွက် ရှောင်ကျားရှုလည်း အခြေအနေကို သဘောပေါက်သွားတော့သည်။
ဒီလူတွေက သူ့ကို အလှပန်းအိုးလို သဘောထားနေကြတာပဲ ...
ဒေါသတို့ လျှံထွက်လာသဖြင့် မူလက ချောမောခန့်ညားနေသော ရုပ်သွင်မှာ အေးစက်လာရာ မည်သူမှ သူ့အနား မကပ်ရဲကြတော့ချေ။
ဖန်ခွင်းက သူ့ရုံးခန်းထဲတွင် ပုန်းနေကာ ပြတင်းပေါက်ကို အနည်းငယ်ဟ၍ ချောင်းကြည့်လိုက်သည်။
"ဒီသခင်လေးရှောင်က တကယ်ကို ဒေါသကြီးတာပဲ သူ့ကို တစ်မနက်လုံး ဘာမှ မလုပ်ခိုင်းတာတောင် တစ်လောကလုံး သူ့လုပ်စာ ထိုင်စားနေရတဲ့ ပုံစံကြီး လုပ်နေသေးတယ် ဘာလို့များ အိမ်မှာပဲ အေးအေးဆေးဆေး မနေဘဲ အလုပ်လာလုပ်နေတာလဲ ဒါက သူတို့ကို ဒုက္ခလာပေးနေတာနဲ့ အတူတူပဲနော် ..."
"ကြည့်ရတာ သူ့လူကြီးတွေက ဇွတ်အတင်း လာခိုင်းတာ ထင်တယ် ..."
ဇာတ်ညွှန်းထဲတွင်သာ စိတ်နှစ်ထားသည့် ကျိမြန်ကမူ လက်ထောက်အသစ်လေးကို အာရုံပင် မရှိချေ။
"သူ ဒီမှာ ကြာကြာ မနေနိုင်လောက်ဘူး ကြည့်ပါလား ပထမတစ်ရက်ပဲ ရှိသေးတယ် ပေါက်ကွဲထွက်တော့မလို့ ဖြစ်နေပြီ ..."
ဖန်ခွင်းက သခင်လေးရှောင်၏ စိတ်တိုနေသော မျက်နှာကို စေ့စေ့စပ်စပ် အကဲခတ်ရင်း အနည်းငယ် စိတ်ဓာတ်ကျလာတော့သည်။
"ဥက္ကဌရှို့ကလည်း ဘာတွေများ တွေးနေလဲ မသိပါဘူး ရှောင်ကျားရှုရဲ့ မျက်နှာနဲ့ဆို လက်ထောက်လာလုပ်နေတာက ဖြုန်းတီးမှုတစ်ခုပဲ သူက အနုပညာရှင် ဖြစ်သင့်တာ အဲဒါဆို သေချာပေါက် နာမည်ကြီးမှာပဲ သူ့မိသားစုနောက်ခံကသာ နည်းနည်းလေး သာမန်ဖြစ်မယ်ဆိုရင် ငါ သေချာပေါက် သူနဲ့ စာချုပ်ချုပ်လိုက်ပြီ ..."
သခင်လေးရှောင်ရဲ့ မိသားစုက သာမန်မဟုတ်ဘူးလို့ ဘာလို့ ပြောတာလဲ ဟုတ်လား ဒါက မေးနေစရာတောင် မလိုဘူးလေ ဘယ်လက်ထောက်ကများ အော်ဒါမှာပြီး ချုပ်ထားတဲ့ အဆင့်မြင့်အနောက်တိုင်းဝတ်စုံကို ဝတ်တာ တွေ့ဖူးလို့လဲ ဒီတစ်စုံတည်းကတောင် ယွမ်ထောင်ပေါင်းများစွာ တန်တာလေ ...
"မပူနဲ့ မင်းမှာ အခွင့်အရေး ရလာမှာပါ ဥက္ကဌရှို့က ဇာတ်ညွှန်းကောင်းတစ်ပုဒ် ရှာနေတယ် ..."
ကျိမြန်က ပြောလိုက်သည်။
ရှို့ချန်ယုကို ဇာတ်ညွှန်းကောင်းတစ်ပုဒ် ရှာစေနိုင်လောက်သူမှာ သာမန်တော့ မဟုတ်နိုင်ချေ။ သူ့အနေဖြင့် ရှောင်ကျားရှုမှတစ်ပါး ဖြစ်နိုင်ချေရှိသူကို မစဉ်းစားမိတော့ပေ။
"ကောင်းတယ် သူသာ မင်းလက်ထောက် မဟုတ်ရင် ပြီးရော သူက မင်းထက်ကို ပိုပြီး အထက်စီးဆန်နေသေးတယ် ဝတ်တာစားတာကလည်း မင်းထက် သာတဲ့အပြင် ရုပ်ရည်ကလည်း မင်းနဲ့ ရင်ဘောင်တန်းနိုင်တယ်လေ ဒီလိုလူမျိုးကို လက်ထောက်ခန့်ထားရတာ တကယ်ကို ခေါင်းကိုက်စရာပဲ ..."
Xxxxx
Chapter 6
သူ့လက်အောက်ရှိ စူပါစတားမှာ သရုပ်ဆောင်လောကမှ အနားယူချင်နေသည့်အတွက် ဖန်ခွင်းတစ်ယောက် အတော်ကို ခေါင်းခဲနေလေသည်။ ထို့ကြောင့် သခင်လေးရှောင်နှင့် စာချုပ်ချုပ်နိုင်လိမ့်မည်ဟု ကြားလိုက်ရသည့်အခါ မုချမသွေ စိတ်ဝင်စားလာတော့သည်။
"သူ့ကို နေ့လည်စာ ဖိတ်ကျွေးပြီးတော့ ဘာလုပ်ချင်လဲ နည်းနည်းလောက် တီးခေါက်ကြည့်ရင်ရော မင်း အနားယူပြီး ရိုက်ကွင်းနောက်ကွယ်ကနေပဲ လှုပ်ရှားရင်တောင် ဒီစတူဒီယိုက ပုံမှန်အတိုင်း လည်ပတ်နေရမှာပဲလေ သူ့ကို ဆက်ခံသူအဖြစ် ရွေးဖို့ အခွင့်အရေးကောင်းပဲ ..."
ကျိမြန်က သူ့ကို မော့ကြည့်ကာ ပြောလိုက်သည်။
"ငါ့ရဲ့ ဆက်ခံသူ ဟုတ်လား ဒီလောက် လွယ်မနေဘူး..."
အရည်အချင်း အစစ်အမှန် မရှိဘဲနဲ့ အနုပညာလောကထဲက ဘယ်သူမှ ဒီလိုစကားမျိုး မပြောရဲဘူး သူဒီနေရာကို ရောက်လာတယ်ဆိုတာ မျက်နှာလေးကိုပဲ အားကိုးပြီး ရောက်လာတာ မဟုတ်ဘူး ...
ဖန်ခွင်းက ကမန်းကတမ်း လက်ကို ယမ်းပြလိုက်သည်။
"အရမ်းကြီး အတည်မမှတ်ပါနဲ့ ဒါက ဒီတိုင်း ပြောလိုက်တာလေးပဲ ဘယ်သူမှ မင်းနေရာကို အစားမထိုးနိုင်ပါဘူး ..."
ထိုအခါမှ ကျိမြန်လည်း ဇာတ်ညွှန်းဖတ်ရန် ခေါင်းကို ပြန်ငုံ့လိုက်တော့သည်။
အခက်အခဲမျိုးစုံကို နေ့လည်စာစားချိန်အထိ ကြံ့ကြံ့ခံ ရင်ဆိုင်ခဲ့ပြီးနောက် ရှောင်ကျားရှုသည် ကဖေးတစ်ခုတွင် အချိန်ဖြုန်းရန် ထွက်လာစဉ် ဖန်ခွင်း၏ တားဆီးခြင်းကို ခံရကာ ကျိမြန်က ထမင်းစားဖိတ်လိုက်ကြောင်း ကြားလိုက်ရတော့သည်။
ဒါက တကယ့်ကို ဖိတ်ကြားချက်အကြီးစားကြီးလေ ဘယ်လိုလုပ် ငြင်းလို့ရမှာလဲ ...
သို့သော် စားသောက်ဆိုင်သို့ ရောက်လာချိန်တွင်မူ သူ့အမူအယာတို့မှာ ရုတ်ချည်း ပြောင်းလဲသွားတော့သည်။
ရုပ်ရှင်ဧကရာဇ်တစ်ဦးအနေဖြင့် ကျိမြန် မကြာခဏ သွားရောက်လေ့ရှိသည့် နေရာတိုင်းမှာ အဆင့်အတန်း မြင့်မားရုံသာမက လုံခြုံရေးမှာလည်း ကောင်းမွန်လှပေသည်။ ထိုအနောက်တိုင်း စားသောက်ဆိုင်မှာလည်း နိုင်ငံတကာအထိပင် ကျော်ကြားကာ Michelin စားဖိုမှူးတစ်ဦးက ကွပ်ကဲသည့်အတွက် အစားအစာတို့၏ အရသာမှာလည်း ထူးကဲကောင်းမွန်လှပေသည်။ သို့သော် ၎င်းက အဓိကအချက်မဟုတ်။ သူ့ရှေ့တွင် ရှိနေသည့် အနေတော် လှီးဖြတ်ထားသော အမဲသား steak ကသာ အဓိကဖြစ်သည်။ ... ရှောင်ကျားရှုသည်ကျန်းမာရေးနှင့် မညီညွတ်သော အစပ်ချောင်း၊ အာလူးကြော်၊ ခေါက်ဆွဲခြောက်တို့ကိုသာ လပေါင်းများစွာ စားသောက်ထားခဲ့သည့်အတွက် ပါးစပ်ထဲတွင် အပူနာ ခုနစ်ခု၊ရှစ်ခုနီးပါးခန့် ပေါက်နေရာ အသားကို ဝါးရန် မဆိုထားနှင့်၊ ရေသောက်နိုင်ရန်ပင် များစွာ ခဲယဉ်းလှပေသည်။
ဒီ ဝါးရခက်ပြီးတော့ အကြာကြီး ဝါးရမယ့် အမဲသားသာ သူ့ပါးစပ်ထဲ ရောက်လာရင်တော့ ... အနာတွေဘေးကနေပြီး တချပ်ချပ်နဲ့ ဝါးနေရမှာ ... ဘယ်လောက် နာလိုက်မလဲ တွေးတောင် မတွေးရဲတော့ဘူး ...
သူသည် လုပ်ငန်းခွင်ထဲရှိ သစ်ပင်ပေါက်သေးသေးလေးသာ ဖြစ်သည့်အပြင် ဘော့စ်ဖြစ်သူ၏ ရှေ့သို့ ရောက်နေသည့်အတွက် ပါးစပ်ထဲ အပြည့်ဖြစ်နေသော အပူဖုတို့ကို ဆွမိသလို ဖြစ်မည်အား စိုးရိမ်နေစိတ်ကို ချိုးနှိမ်ရင်း အတင်း ကြိတ်မှိတ်ကာ စားလိုက်ရတော့သည်။ သူ့ကိုယ်သူ ကောင်းကောင်းမွန်မွန် ဖုံးကွယ်ထားနိုင်သည်ဟု အထင်ရောက်ခဲ့သော်ငြား ကျိမြန်နှင့် ဖန်ခွင်းတို့၏ အကြည့်ထဲတွင်မူ သူ့အမူအယာမှာ သေဆေးစားနေရသည့်နှယ်ပင် ဖြစ်သည်။
"ဒီစတိခ်က မင်းအရသာနဲ့ မကိုက်ဘူးလား ..."
ကျိမြန်က နွေးနွေးထွေးထွေး မေးလိုက်သည်။
"မဟုတ်ပါဘူး ဒါက အရမ်းကို အရသာရှိပါတယ် ..."
ရှောင်ကျားရှုက လက်တို့ကို အသည်းအသန်ခါယမ်းကာ ငြင်းဆန်ရင်း အသားတို့ကို ဝါးပင် မဝါးတော့ဘဲ အတင်း မျိုချလိုက်တော့သည်။ မျက်လုံးနှင့် မျက်ခုံးတို့မှာလည်း တစ်ထပ်တည်း ကျလုနီးပါးအထိ တွန့်ကျုံ့သွားတော့သည်။
ကျိမြန် : "..."
ဖန်ခွင်းက အခြေအနေများကို အဖက်ဆယ်နိုင်ရန် ခပ်ပြုံးပြုံးဖြင့် ဝင်ပြောလိုက်သည်။
"ဝိုင်ရော သောက်တတ်လား ဒီဆိုင်ရဲ့ စပျစ်ဝိုင်က အရမ်းကို ကောင်းတာနော် စမ်းကြည့်ချင်လား ..."
ဝိုင် ဟုတ်လား အဲဒါကိုသာ သောက်လိုက်မိရင် ပါးစပ်ထဲက အနာတွေ အကုန်လုံးကို ဆာလဖျူရစ်အက်စစ်နဲ့ ပက်လိုက်သလို ဖြစ်ပြီး သေချင်စိတ်တောင် ပေါက်သွားတော့မှာပေါ့ ...
ရှောင်ကျားရှုက စိတ်ထဲတွင် မျက်ရည်တို့ကို ခိုးသုတ်လိုက်သော်ငြား သူ့မျက်နှာကမူ အပြုံးတစ်ခုကို အလိုအလျောက် ချိတ်ဆွဲထားပြီးဖြစ်သည်။
"ဟုတ်ကဲ့ ကျေးဇူးတင်ပါတယ် ခွင်းကော ..."
ဖန်ခွင်းက ကျိမြန်နှင့် သခင်လေးရှောင်အတွက် ဝိုင်တစ်ခွက်စီ ငှဲ့ပေးလိုက်သည်။ သူက ထိုဝိုင်ကို အကြောင်းပြုကာ ရှောင်ကျားရှုနှင့် လက်မှတ်ထိုးနိုင်ရေးအတွက် စကားဦးသမ်းရန် ကြံနေစဉ်မှာပင် သခင်လေးရှောင်က ရှုံ့မဲ့နေသော အမူအယာနှင့်အတူ ခေါင်းကို ငုံ့ချလိုက်တော့သည်။
"ဘာဖြစ်လို့လဲ ဒီဝိုင်က မင်းအကြိုက်နဲ့ မကိုက်လို့လား ..."
ကျိမြန်က ပြုံးကာ ပြောလိုက်သည်။
"မဟုတ်တာ မဟုတ်တာ ဒါက အရမ်းကို ... အ...ရ ... သာ ... ရှိပါတယ် ..."
သခင်လေးရှောင်မှာလည်း နာကျင်လွန်း၍ စကားကိုပင် ဖြောင့်ဖြောင့်တန်းတန်း မပြောနိုင်တော့ချေ။ သူ့မျက်နှာမှာလည်း ဒယ်ပြားထက်ပင် မည်းမှောင်နေတော့၏။
ကျိမြန် "..."
ဖန်ခွင်းက အသာရယ်လိုက်သည်။
"ကြိုက်တယ်ဆိုရင်လည်း သောက်လေ ..."
ထို့နောက် သူက သခင်လေးရှောင်အတွက် နောက်တစ်ခွက် ထပ်ငှဲ့ပေးလိုက်ပြန်သည်။
မျက်နှာပျက်ရမည်ကို အင်မတန် စိုးရွံ့လှသည့် သခင်လေးရှောင်အတွက်မူ ဤတစ်ရက်တာကပင် တစ်နှစ်မက ရှည်ကြာလွန်းလှပေသည်။ ဝိုင်ခွက်ကို ကိုင်ထားသော လက်များကပင် တဆတ်ဆတ် တုန်ရီလာကာ တိတ်တဆိတ် ဆုံးဖြတ်ချက်ချလိုက်တော့သည်။
ဒီစားသောက်ဆိုင်ကနေသာ အသက်ရှင်လျက် ပြန်ထွက်လာနိုင်မယ်ဆိုရင် အဲဒီ့ အမှိုက်သရိုက်လို သရေစာတွေကို တစ်သက်လုံး မစားတော့ဘူး ...
သူ့နှလုံးသားတစ်ခုလုံး တုန်ရီနေစဉ်မှာပင် အသက်လေးဆယ်ဝန်းကျင်အရွယ် သက်လတ်ပိုင်းအမျိုးသမီးတစ်ဦးက အနားသို့ ရောက်လာ၏။ သူမက ကျိမြန်နှင့် ဖန်ခွင်းတို့ကို နှုတ်ဆက်ပြီးနောက် သူ့ပါးကို လိမ်ဆွဲလိုက်သည်။
"သစ်ပင်ပေါက်လေး ဒီကို ပြန်ရောက်နေတာတောင် အန်တီစုစီ အလည်လာဖို့ စိတ်ကူးမရှိဘူးပေါ့ ဟုတ်လား ..."
"အန်တီစု အန်တီလည်း ဒီမှာ လာစားတာလား ..."
ရှောင်ကျားရှုမှာ ဝမ်းသာလွန်း၍ မျက်ရည်များပင် ကျလုမတတ် ခံစားလိုက်ရတော့သည်။ သူက မတ်တပ်ထရပ်ကာ သူမကို တင်းတင်းကြပ်ကြပ် ပွေ့ဖက်ပြီးနောက် ကျန်သူများနှင့် မိတ်ဆက်ပေးမည် ပြုစဉ်မှာပင် သူမ၏ ငြင်းပယ်ခြင်းငှာ မစွမ်းသာနိုင်လောက်သည့် တောင်းဆိုချက်ကို ကြားလိုက်ရတော့သည်။
"ရှောင်ခွင်း အန်တီ သူ့ကို ခဏ ငှားသွားမယ်နော် မင်းတို့တွေ စားနှင့်လိုက်ကြတော့ ကျသင့်ငွေက အန်တီရှင်းပြီးသား ..."
"အိုက်ယား ... စုကျဲရေ ... ကျဲရဲ့ ကြင်နာမှုကို ဒီလိုကြီး လက်ခံလိုက်လို့ ဖြစ်ပါပမလား ..."
ဖန်ခွင်းက ယဉ်ကျေးပျူငှာသည့် လောကဝတ်စကားတို့ ဆက်ပြောရန် ပြင်နေစဉ်မှာပင် ထိုအမျိုးသမီးက ရှည်လျားသန်မာလှသည့် သခင်လေးရှောင်ကို ဆွဲခေါ်သွားကာ ခုံနေရာလွတ်တစ်ခုနှင့် ဝိုင်ခွက်တစ်ခွက်သာ ကျန်ခဲ့တော့သည်။
"ရှောင်ကျားရှုက စုလွေ့နဲ့တောင် ရင်းနှီးတယ်? သူ့အဆက်အသွယ်တွေက တကယ်ကို ကျယ်ပြန့်တာပဲ ..."
ဖန်ခွင်းက ဝိုင်တစ်ငုံသောက်ရင်း ခပ်ဖြည်းဖြည်း ပြောလိုက်သည်။
"ဒီပုံစံအတိုင်းဆို ငါတော့ သူနဲ့ လက်မှတ်မထိုးနိုင်လောက်တော့ဘူး ဒါကလည်း အဆိုးထဲက အကောင်းလို့ ပြောရမှာပါပဲ စိတ်နေစိတ်ထားကလည်း ညံ့ဖျင်း၊ သရုပ်ဆောင်တာကလည်း ဆိုးဝါးတဲ့အပြင် မျက်နှာအမူအယာကို ထိန်းချုပ်တဲ့နေရာမှာတောင် ဖြစ်ဖြစ်မြောက်မြောက် မရှိဘူး ဒီတစ်နပ်ထဲနဲ့တင် ငါ့ရဲ့ ထင်မြင်ချက်ကောင်းတွေအားလုံး ပျောက်ကွယ်ကုန်ပြီ သူ့လိုလူမျိုးက အောင်မြင်ဖို့ လွယ်ပေမယ့် ဒီအောင်မြင်မှုကို ရေရှည်ထိန်းထားနိုင်ဖို့ မလွယ်လောက်ဘူး reality show တစ်ခုလောက် သွားလိုက်ရုံနဲ့တင် သူ့ရဲ့ သရုပ်မှန်အစစ်က ဗူးပေါ်သလို ပေါ်လာပြီးတော့ ဂုဏ်သတင်း ပျက်စီးသွားမှာပဲ ..."
ကျိမြန်ကတော့ စကားတစ်ခွန်းမှ မဆို။ ဝိုင်ခွက်ကိုသာ ရှေ့နောက် လှုပ်ယမ်းနေပေသည်။ အနှစ်သက်ဆုံး စားသောက်ဆိုင်တွင် အကြိုက်ဆုံး စတိခ်နှင့် သဘောအကျဆုံး ဝိုင်တို့ကို အနှောင့်အယှက်ပေးမည့်သူ တစ်စုံတစ်ရာ မရှိဘဲ တွဲဖက်စားသုံးခွင့် ရနေခြင်းကပင်လျှင် သူ့အတွက် အကောင်းဆုံး ဖြစ်နေပေသည်။
"ထားလိုက်ပါတော့ ပွင့်ပွင့်လင်းလင်း ပြောရရင် ငါလည်း ဘိုးဘေးလေးနဲ့ လက်မှတ်ထိုးရမှာကို တကယ် မကြိုက်ဘူး မင်းကို ဂရုစိုက်ပေးဖို့က အရမ်း လွယ်ကူခဲ့တော့ တစ်ခြားတစ်ယောက်ကို ထပ်ပြီး ပျိုးထောင်ပေးရမှာနဲ့ အသားမကျတော့ဘူး ..."
ဖန်ခွင်းက စတိခ်တစ်တုံးကို လှီးဖြတ်ကာ ပါးစပ်ထဲ ထည့်လိုက်ပြီး မျက်ခုံးတို့ကို ကျေနပ်မှုအပြည့်ဖြင့် ကျုံ့လိုက်သည်။
"အရသာရှိလိုက်တာ ရှောင်ကျားရှုရဲ့ လျာက ပျက်စီးနေတာပဲ ဖြစ်ရမယ် ..."
တစ်ဖက်တွင်မူ စုလွေ့နှင့် လိုက်လာသော ရှောင်ကျားရှုက သီးသန့်ခန်းထဲ ရောက်သည်နှင့်တစ်ပြိုင်နက် အလွန်အမင်း နာကျင်နေသော အမူအယာကို ဖော်ထုတ်လိုက်တော့သည်။
"အန်တီစု ကျွန်တော့်ကို ရေလေးတစ်ခွက်လောက် ကမ်းပေးပါဦး သွက်သွက်လေး ပလုတ်ကျင်းလိုက်ချင်လို့ ..."
"ဘာဖြစ်လို့လဲ ..."
စုလွေ့က စားပွဲပေါ်ရှိ ရေသန့်ကို ကမ်းပေးရင်း မေးလိုက်သည်။
"ကျွန်တော့်ပါးစပ်ထဲမှာ အပူဖုတွေ ထွက်နေတာကို ဝိုင်သောက်လိုက်မိတယ်လေ ..."
ပလုတ်ကျင်းပြီးသည်နှင့်တစ်ပြိုင်နက် ရှောင်ကျားရှုမှာ မျက်ရည်စက်တို့ စီးကျလာတော့သည်။ သူ့ပုံစံမှာ အနိုင်ကျင့်ခံထားရသည့် ဟက်စကီးနှင့်ပင် တူနေသည့်အတွက် စုလွေ့တစ်ယောက် မရယ်ဘဲ မနေနိုင်တော့ချေ။
သူမက ရွှယ်မြောင်၏ မန်နေဂျာ ဖြစ်ခဲ့ဖူးကာ နောက်ပိုင်းတွင် နှစ်ဦး ပူးပေါင်းပြီး ကုမ္ပဏီတစ်ခုကို တည်ထောင်ခဲ့သည်။ ပြီးခဲ့သည့်နှစ်များစွာက နိုင်ငံအနှံ့ အတော်မသတ်နိုင်လောက်သည့် အရည်အချင်းစစ်ပွဲတို့ကို ကျင်းပကာ အမျိုးသမီး အဆိုပြိုင်ပွဲတစ်ခုကို ဖန်တီးရင်း အနုပညာအသိုင်းအဝိုင်းထဲ ဝင်ဆန့်နိုင်မည့် ကုမ္ပဏီတစ်ခုကို တည်ထောင်ခဲ့သည်။ သူမတို့နှစ်ဦး၏ ဆက်ဆံရေးမှာ ညီအစ်မ အရင်းအချာများထက်ပင် စစ်မှန်လှကာ စုလွေ့က အိမ်ထောင်ပြုသားမွေးခြင်းအမှု မရှိသည့် လူလွတ်တစ်ဦး ဖြစ်သည့်အတွက် ရွှယ်မြောင်၏ သားမှာ သူမ၏ သားအရင်းကဲ့သို့ပင်ဖြစ်သည်။
သူမက ရှောင်ကျားရှု ကြီးပြင်းလာသည်ကို စောင့်ကြည့်နေခဲ့သူတစ်ဦး ဖြစ်သည့်အတွက် သူ့ကို များစွာ ဂရုစိုက်ပေရာ လက်ထောက်ကို အပူလျော့ချပေးနိုင်သည့်ဆေး သွားဝယ်ရန် ချက်ခြင်း ညွှန်ကြားလိုက်ပြီး သူ့ကိုလည်း ကိုယ့်ခန္ဓာကိုယ်ကို ဂရုစိုက်သင့်ကြောင်း ဩဝါဒ ချွေပြီးမှသာ အလုပ်အကြောင်း မေးမြန်းလိုက်တော့သည်။
"အစောကတည်းက သူတို့မှာ ကျွန်တော့်ကို အလုပ်လုပ်ခိုင်းမယ့်အကြံ မရှိကြဘူး အလှပန်းအိုးတစ်လုံးလောက်ပဲ သဘောထားနေကြတာလေ ..."
အထင်လွဲခံခဲ့ရသည့် ရှောင်ကျားရှုက နာကျင်မှုကို အံကြိတ်ရင်း ခပ်ပျစ်ပျစ်မှိုဟင်းရည်တစ်ဇွန်းကို ခပ်သောက်လိုက်သည်။ သူက အစောပိုင်းကတည်းက ဟင်းရည်တစ်မျိုးမျိုး မှာယူချင်ခဲ့သော်ငြား နိုင်လိုမင်းထက် ပြုမူတတ်သော ကျိမြန်က သူ့ကို တစ်ခုတစ်လေမှပင် မှာခွင့် မပေးခဲ့ချေ။
"ရှို့ချန်ယုနဲ့ စကားပြောမှ ရတော့မယ် ..."
စုလွေ့က ချက်ခြင်း ဖုန်းကိုထုတ်ကာ ပြောလိုက်သည်။
"မလုပ်နဲ့ မလုပ်နဲ့ ..."
ရှောင်ကျားရှုက သူမကို ဟန့်တားလိုက်သည်။
"ကျွန်တော်က လူသစ်လေ သူတို့တွေက ကျွန်တော့်ရဲ့ အရည်အချင်းကို မယုံကြလို့သာ ဒီလို လုပ်ကြတာပါ အန်တီစု တကယ်လို့ အန်တီသာ ဦးလေးရှို့ကို ကူညီခိုင်းလိုက်ရင် သူတို့တွေက ပိုပြီးတောင် အထင်သေးကုန်ကြမှာလေ ကျွန်တော်သာ ကြိုးကြိုးစားစား သင်ယူပြီးတော့ ဘယ်အလုပ်ကိုမဆို တာဝန်ကျေကျေနဲ့ လုပ်မယ်ဆိုရင် သူတို့တွေလည်း ကျွန်တော့်အကြောင်းကို သိလာပြီး တစ်ဖြည်းဖြည်းနဲ့ လက်ခံလာကြမှာပါ ဒါက အလုပ်ထဲကို ရောက်လာတဲ့ လူသစ်တိုင်း ကြုံရမှာပဲလေ ကျွန်တော် သေချာပေါက်ကို ကိုင်တွယ်နိုင်မှာပါ ..."
သူ၏ ဆုံးဖြတ်ချက် ပြတ်သားသော မျက်နှာထားကို တွေ့လိုက်ရသည့်အခါ စုလွေ့က နဖူးကို ဖိထားရင်း ခပ်ပြုံးပြုံး ပြုံးလိုက်တော့သည်။
"အပင်ပေါက်ကလေး ဘာလို့များ ဒီလောက်တောင် စကားပြော ချိုနေရတာလဲ "သရဖူခေတ်" မှာ အလုပ်မလုပ်တော့ဘဲ အန်တီ့ရဲ့ ကုမ္ပဏီကို လာခဲ့ပါလား ..."
"မရပါဘူး အမေက ဦးလေးရှို့နဲ့အတူ အားလုံးကို စီစဉ်ပေးပြီးပြီလေ ကျွန်တော်က ပြောပြီးသားစကားကို ပြန်ဖျက်တတ်တဲ့သူမျိုး ဖြစ်လို့မှ မရတာ အလုပ်လုပ်တယ်ဆိုတာ အလေးအနက် ထားရမယ့် ကိစ္စလေ ခပ်ပေါ့ပေါ့ သဘောထားလို့ မရဘူး ..."
သူက စွတ်ပြုတ်ကို သောက်နေရင်း ခေါင်းယမ်းကာ ပြောလိုက်သည်။
"ဟုတ်ပါပြီ တို့တွေရဲ့ အပင်ပေါက်ကလေးက မိုးထိအောင် မြင့်တဲ့ အပင်ကြီး ဖြစ်နေပြီပဲ ..."
စုလွေ့က သူ့ခေါင်းကို အားရပါးရ ပွတ်သပ်ပေးရင်း ပြောလိုက်သည်။
"မနက်ဖြန်ကျ အန်တီ့ကုမ္ပဏီကို အလည်လာခဲ့ "Super New Voice Generation" ရဲ့ နောက်ဆုံးအပိုင်းကို ရိုက်ကူးမှာ တကယ် စိတ်လှုပ်ရှားဖို့ကောင်းတယ် သိလား ..."
"super new voice generation "သည် ရွှယ်မြောင်နှင့် စုလွေ့တို့ အတူတူ စတင်တည်ထောင်ခဲ့သည့် "ကံကောင်းခြင်းရေစင်" အမည်ရ အေဂျင်စီ၏ အဓိက ပရိုဂရမ်ဖြစ်သည်။ ၎င်းသည် နိုင်ငံအတွင်း ကျင်းပခဲ့သည့် ပထမဆုံး အရည်အချင်းစစ် ပြိုင်ပွဲဖြစ်ကာ နှစ်နှစ်လျှင် တစ်ကြိမ် ကျင်းပလေ့ရှိပြီး ဤတစ်ကြိမ်တွင်မူ "သရဖူခေတ်" နှင့်ပါ ပူးပေါင်းထားသည့်အတွက် ယခင်နှစ်များထက် များစွာ ကြီးကျယ်ခမ်းနားလှပေသည်။ စတင်ထုတ်လွှင့်စဉ်ကတည်းက ကြည့်ရှုသူစံချိန်ကို အကြိမ်ကြိမ် ချိုးဖျက်ခဲ့ကာ ရှောင်ကျားရှုကဲ့သို့ ခေတ်ကို မျက်ခြည်ပျက်နေသူပင် သတိထားမိသည်အထိ အလွန်အမင်း နာမည်ရလာခဲ့သည်။
"ဖိုင်နယ်တောင် ရောက်သွားပြီလား ကျွန်တော် မကြည့်လိုက်ရတဲ့ အပိုင်းတွေ အများကြီး ကျန်နေသေးတယ် ..."
သူ၏ စကားပြောဆိုပုံမှာ အခြားသူများ၏ နှလုံးသားကို ဓားဖြင့် ထိုးလိုက်သည့်နှယ် အဓိပ္ပါယ်သက်ရောက်နေကြောင်းကိုတော့ ရှောင်ကျားရှုမှာ လုံးဝ သတိမထားမိသေးချေ။
သို့သော် စုလွေ့က သူ့စရိုက်ကို သိရှိထားသူဖြစ်၍ ဗွေမယူခဲ့။
"ဖိုင်နယ်ပွဲက စိတ်လှုပ်ရှားစရာ အကောင်းဆုံးပဲ သေချာပေါက် လာကြည့်လှဲ့ အန်တီ အထူးတန်းအတွက် လက်မှတ် ချန်ထားပေးမယ် ဒီတစ်ခေါက်ပွဲကို လာပြိုင်တဲ့သူတွေက တကယ်ကို အရည်အချင်းရှိကြတယ် ..."
"မဟုတ်တာ ကျွန်တော်က အလုပ်လုပ်ရဦးမယ်လေ ကျိမြန်ရဲ့ လက်ထောက်ဆိုတော့ ကျွန်တော့်ရဲ့ တာဝန်တွေကို လျစ်လျူရှုထားလို့ မရဘူး ..."
သူက ချက်ခြင်း ငြင်းပယ်လိုက်သည်။ အလုပ်လုပ်နေသည့် သစ်ပင်ပေါက်အနေဖြင့် ဇွဲမရှိဘဲ အလွယ်တကူ အရှုံးပေးလိုက်၍ မရချေ။
စုလွေ့က နဖူးကိုအုပ်ကာ ပြောလိုက်သည်။
"ကျိမြန်လည်း လာမှာ သူက ဖိုင်နယ်ပွဲအတွက် ဒိုင်လူကြီးလေ ..."
"အိုး ဒီလိုကိုး ဒါဆိုလည်း အထူးတန်းလက်မှတ် ပေးဖို့ မလိုပါဘူး ဒိုင်လူကြီးတွေရဲ့ ထိုင်ခုံနားမှာပဲ ရပ်နေလိုက်မယ်လေ အဲဒါမှ ကျိမြန် လိုအပ်တာရှိရင် တန်းသိနိုင်မှာ ..."
ရှောင်ကျားရှုက လက်မခံမီ အလေးအနက် တွေးတောလိုက်သေးသည်။
စုလွေ့ "..."
Xxxxxxx