والله وکت ؟
هَذه الضياع يصَير
بأكثر درَب چانت
روحي تندله .
قراءة ممتعة 🤍
..........................................................
دموع:فتحت عيوني راسي يأذيني زفرت نفس بأنزعاج شفت الكسار متكتف ونايم على الكرسي خليت ايدي على بطني من تذكرت شنو صار
عطت خايفة
:ابني الطفل الطفللللل كسااااار وينةةة
فز خايف وتقرب علية لزم ايدي
الكسار:مابي شي بس اهدئي تتأذين هيچ
مادري ليش مصدكتة اباوع لبطني بعدها منفوخة
:الله عليك كول الحقيقة شبي
حاوطت وجهي يمسح بدموعي
الكسار:والله مابي شي شوفي بطنچ
صرت اباوع لبطني وبصعوبة اسحب النفس اخذ ايديه بهدوء وصار يحركهم على بطني والطفل تحرك
غمضت عيوني ابچي واحمد ربي لأن بعدة عايش وهو حط اصبعة على بطني وكال
الكسار:تأخر الوقت شعندك بعدك كاعد ولك
برطمت شفايفي اشهگ
:لتحچي على ابني لتخليني اكرهك اكثر
ابتسم وابعد عني وكال
الكسار:يلا نروح للبيت
نزلت عيوني وكلت
:اخذني لخوالي يمكن زواجنة باطل
الكسار:لا مو باطل سألت من طلگتچ چانت لحظة عصبية يعني الطلاق باطل وهم لأن حامل لازم تولدين يلا ينحسب طلاق
باوعتلة ولزمت رگبتي بخنگة
:بيتك يخنگ يخنگني هواية ماريد ارجع
حط ايدة على لحيتة وكال
الكسار:اخذچ لبيتي؟ هناك روان هم تهتم بيچ
:لا ماريد مالي خلگ سلوى
الكسار:زين نروح للبيت ومنصعد فوك بعد ارتب الغرفة الجوة وننام بيها؟
بقيت اباوعلة بحيرة وهو ساكت شوي وكال بهدوء
الكسار:ميصيرتصعدين وتنزلين بعد الطفل نازل لازمچ راحة شغل بالبيت بعد ماكو تروحين للجامعة تبقين كاعدة
:اريد مكان انتَ مموجود بي
رفع حاجبة وهمس
الكسار:افااا اني كسارچ حبيبچ وابو الي بطنچ ومتريديني؟
ابتعد عني يهز براسة يضحك بس اعرف ورة هالضحكة براكين
سكتت عنة مالي خلگ اهم شي ابني بخير
كومني بحذر وكعدني على كرسي متحرك ردت ارفض بس كالعادة مسمع مني اخذني للسيارة كعدني وحرك يمشي بهدوء ومن يوصل لطسة يخفف السرعة اكثر خليت راسي على الجامة استهزء بنفسي واضح خوفة مو علية خوفة على الطفل
وكفنة بصف مطعم رغم چان الوقت متأخر نزل دقيقة ورجع بيدة اكياس عرفت چان موصيهم
وصلنة للبيت نزل من السيارة شالني ودخلني للصالة كعدني على القنفة فتح حجابي وراح للجنط طلعلي دشداشة سودة تصير قصيرة واجة راح لظهري فتح سحاب الفستان الي لابستة بسرعة لزمتة وكلت
:روح اني البس
دفع ايدي ونزعني غصباً عني كورت ايدي بتوتر
يريد يلبسني الدشداشة بس وكعت عيونة على بطني ابتسم وكعد يمشي ايدة عليها
كال بشرود وعيونة تلمع
الكسار:عجينتي صايرة صلبة
همست بتوتر
:باردة
حس على نفسة تحمحم وكام لبسني الدشداشة وصعد لفوك جاب بطانية لفني بيها وكال
الكسار:الدشداشة باردة ميصير تبقين بيها هيچ تغطي نتعشة ونخلص واخذچ للغرفة غرفتنة دافية
:ماريد اصعد فوك اختنگ
كعد كدامي يحچي وياية بهدوء
الكسار:يكولون الحامل تصير تكره بيتها لحد متنتهي فترة الحمل يعني شي طبيعي
حطيت ايدي على بلعومي مبرطمة
:هنا هنا مادري شنو يوگف هنا وبصدري من چنت هنا بصعوبة انام بغرفتنة
الكسار:افرش بالصالة؟
بسرعة هزيت راسي بأيجاب سكت كام طلع شوي ورجع حط الطاولة كدامي وصار يفتح بالاكياس چنت جوعانة على ريوگ الصبح بعد مخليت شي بحلگي
اكلت هواية لحد مشبعت انوب بس شبعت نعست لملم المكان وراح جاب فراش فرش فراشين بصف بعض وحط بطانية وحدة نزلت راسي وحچيت بأصرار
:اصعد فوك نام ما اخاف
جاوبني ببرود
الكسار:تخافين ونص اعرفچ ترة اني ربيتچ
شفتة منزل راسة يعدل بالفراش طلعت لساني اعيب عليه وكلت بهمس
:ساعة السودة الي ربيتني بيها
فززني من اجة صوتة
الكسار:شفتچ وسمعتچ تعالي نامي
حكيت راسي بتوتر
:زين ابعد فراشي عن فراشك
باوعلي رافع حاجبة اجة شالني وحطني على الفراش
كال وهو يأشر على گلبة وعقلة
الكسار:لتخافين ما اسويلچ شي طلعتي منا ومنا
احترگ گلبي بكلامة رديت بنتر
:وانتَ اصلاً مدخلت لا هنا ولا هنا
صفن بوجهي كاز على اسنانة درت وجهي عنة وتغطيت زين حسيتة نام وراية وسحب الغطة وكال
الكسار:اذا حسيتي بوجع لو بنزيف كولي مو تبقين فاهية وكل شوي اطمئني على حركة الطفل
بقيت ساكتة محچيت شي راسي موتني ألم حتى مسأل عني اهم شي عندة الطفل حسيت بشعور محلو حاسة وجودي هنا غلط
مكدرت انام هو ساكت وانفاسة هدئت يعني نام
كمت للحديقة مخنوگة احس اكو شي واكف على صدري كعدت على المرجوحة بهالبرد چانت بداية 2015 ونهاية الشتاء بهاي البردات الأخيرة والجو كلش بارد
لزمت بطني احچي وياه وابچي
:راح احبك اكثر من كُلشي انتَ عوض ربي بعد كلشي مريت بي انتَ الي حتواسيني على فراق خوالك وهيب وفرح وحسن مراح اتركك ابد لو اعرف اشرد بيك اموت وما اعوفك
هو عبالك حس بية صار يتحرك ابتسمت من بين دموعي
:3 اشهر وتنور حياتي حصير أم بعمر العشرين حتروح وياية لجامعتي حتشوف تخرجي من ازعل تطبطب علية
سكتت اباوع لبطني وملامحي جامدة بس دموعي الحارة تنزع على خدي
:حاسة اني حمل چبير على ابوك حاسة بشعور محلو اعرفة انجبر يرجعني بس اني هم انجبرت ارجع هنا ماعرف اني كارها هالشعور اول مرة احس اني ممرغوب بية بفد مكان واول مرة احس نفسي ثگيلة على گلب الكسار
نعست كمت لازمة ظهري ودخل للصالة عگدت حواجبي من شفتة متوسط الفراش باقيلي مكان قليل واذا انام اصير بحضنة معجبني هالشي حطيت ايدي على زندة بسرعة فز مزعوج
الكسار:هااا شبيچ الطفل بي شي؟
نزلت عيوني عنة وحچيت ببرود
:ابتعد اريد انام ماكو مكان
تأفأف بأنزعاج وابتعد تمددت بالفراش ناطيتة ظهري وهو نام واني بعد شوي وانام وفتحت عيوني من حضني من ورة وحط راسة برگبتي صرت ارجف برد وتوتر دفعتة بخفة بس ما ابتعد
:وخر اريد انام
ما رد ولا تحرك استسلمت للأمر الواقع ونمت
ماعرف شكد مر وقت وفتحت عيوني وفزيت من شفتة كاعد يم بطني يباوعلها بسرعة غطيت بطني وكلت بخوفة
:شبيك شدتسوي؟
الكسار:اباوع لأبني او بنتي
كعدت اباوعلة مستغربة كمت للحمام غسلت ومن رجعت لگيت شايل الفراش وكاعد على القنفة
الكسار:كعدت من الصبح نظفت الغرفة الجوة وفرشتها ودفيتها وعطرتها بس ملابسنة بقت فوك من تردين شي اني اصعدچ تجيبي
تجاهلت كلامة وكلت
:تلفوني وين؟
مد ايدة لجيبة طلعة وحطة بأيدي
الكسار:روحي اكلي ولتسوين شي مو زين على الطفل يتعب
اخذت التلفون اتصلت على خالي بسرعة جاوبني
فهد:هاا دموع شلونچ خو ما سوالچ شي؟
:زينة اني حبيبي محد يكدر يسويلي شي اطمئن انتو شلونكم
فهد:الحمدلله احنة بس بالنة مشغول ليش وافقتي تبقين هناك هددچ بشي كولي والله اموتة
:لا مهددني بس نفس مكلتلكم بابا اولد والطفل يتسجل بأسمة اخذ ابني وارجعلكم
طول كلامي حاط ايدة على ذقنة ويباوعلي مستهزء بية واني اقابلة ببرود سديت التلفون من خالي ورحت للمطبخ شفتة مسوي ريوگ لفيتلي لفة ورجعت للصالة اكلها واباوع لليوتيوب
قبل لا اخلص اللفة شفتة حط كدامي لفتين وعصير باوعتلة مستغربة
الكسار:اكليهم ترة دتاكلين عن شخصين
:بس ماريد شبعانة؟
كعد يمي اخذ العصير وشربني
الكسار:كملي هاي واكلي بعد وكل لگمتين شربي وراهم عصبر
:ماريد شبيك اكلهم انتَ
الكسار:شبيچ؟ترة خايف عليچ مو زين تجوعين
اخذت الگلاص بنتر وحطيتة على الطاولة
:قصدك خايف على الطفل مو علية
سكت اني اخذت تلفوني وجنطة من ملابسي ورحت للغرفة لكيتة مرتبها ومعطرها چانت بيها غرفة اخشاب قديمة بس قوية يعني كلشي مبيها
حطيت راسي على الچرباية اشوف بصورة وهيب من صورونة اني ويا احس گلبي طاگ علية ممسموح نزورة لأن يكولون وضعة حالياً بمرحلة المعالجة
انفتح الباب التفتت شفتة دخل يلبس بساعتة
الكسار:لتكومين ابد حدچ الحمام فقط غدة اني اجيب وياية مشتهية شي؟
رجعت اباوع للصورة وهزيت راسي بلا فتح دگمتين من قميصة ورجع حچة
الكسار:انتبهي زين الدكتورة كالت البرد مو زين عليچ يسوي ألم بظهرچ لبسي جواريب حتى تدفين
:ماشي
طلع وسد الباب بقوة هزيت ايدي ضايجة من عندة بشكل
مليت ماعرف وين اروح حتى للدراسة مالي خلگ وانوب اليوم مداومت چان يوم خميس وباچر جمعة يعني هم مراح اداوم
مر الوقت بسرعة واني لو احچي ويا الصور لو ويا الطفل ما ضل شي واتخبل رسمي
دخل جايب غدة حطة على الميز ونزع ساعتة وحذائة وبدون اي كلام طلع الاكل وصرنة ناكُل ومن كملنة اخذني للحمام غسلي واني صافنة رجعني للغرفة وعطرها
اخر شي كال وهو ينزع ملابسة
الكسار:تعبان راح انام وانتِ ارتاحي هم
راد يرفع الغطة واني حچيت
:ليش متصعد فوك تنام؟ شنو انتَ هم حامل والجنين نازل؟
تخوصر وقلص عيونة يباوعلي بحيرة ولسانة يتحرك بجوف فمة حصرت نفسي بالچرباية من تقرب علية عيونة على شفايفي
الكسار:دموع
مجاوبتة بس عيوني تتنقل على ملامحة بتوتر مشة ايدة من بطني لحد منزل لفخذي عصرة
الكسار:خليني متناسي عمايلچ
عصبت دفعتة من صدرة بقوة ابتعد عني مصدوم
:وخررررر عني ولتتقربلي اني مسويت شي ليششش تحسسني اني وحدة خاينة اني التقيت ويا اخوية وبسسسس اخوية الي حرمتوني من عندة انتَ الي خدعتني وخنتني مو انيييييي انتَ استغليت حب اخوية الية واستدرجتة لهنا
ضل واكف يباوعلي بعصبية كمت لازمة ظهري واتمايل بمشيتي لأن حملي ثگيل وكفت كدامة ورفعت اصبعي بوجهة
:كافي مو عبالك تذلني وتهيني واسكُت دموع القديمة ماتت وتدري اتمنى اموت واخلص منكم بس هالطفل خلاني اتمسك بالحياة
راد يلزم ايدي بس دفعت ايدة معصبة
:وخررر عنيييي لتلزمني
طلع من الغرفة ينافخ واني طفيت الضوة ورحت تمددت على الچرباية اعصابي ترجف كلشي موترني وكلشي يعصبني
مكدرت انام ساعتين وانفتح الباب اتماثلت النوم لأن مالي خلگ عركات بعد شوي وحسيتة نام بصفي وحط ايدة على خصري گلبت عيوني معاجبني الوضع
چان عبالة حتوسل بي يسامحني بس خيبت امالة
شوي شوي احسة يتقرب علية لحد ما انلزگ جسمة بظهري
ما انكر مشتاقة لحضنة بس كل ما اتذكر من تخلى عني بسهولة احقد واكرهة هواية
استسلمت للنوم صايرة احب النوم بشكل
من كعدت ملكيتة رحت كعدت بالصالة وحدي
لليل يلا رجع وهم ساكتين من كملنة عشة كال
الكسار:الأحد نروح نعقد محكمة جهزت كلشي
مجاوبتة هو استغفر وكام للغرفة
اجة يوم الأحد رحنة للمحكمة اخذنة صور هناك وعقدنة بكل سهولة چان عبالي نتأخر بس رحنة الساعة 7 رجعنة الساعة 9
بالطريق شفت هذا مو طريق البيت باوعتلة وكلت
:وين رايحين؟
كال بحماس
الكسار:حجزت عند الدكتورة اول شي تفحص وضعچ وانوب تكشف عن جنس الجنين
عگدت حواجبي وحچيت بحدة
:وليش مگلتلي من حجزت؟ كلشي انتَ تاخذ قرارة تعبت منك ترة الله يخلصني منك بس لو بموتي لو بطلاقي منك
كز على اسنانة وكال بغضب
الكسار:لا بموتي حتى تخلصين مني كلش بعد
نزلت راسي ضايجة مادري شبية من كال هيچ انخمش گلبي
وصلنة للدكتورة چان اكو مراجعة وحدة قبلنة بقينة ننتظر ومن طلعت دخلنة فحصتني وكالت كلشي تمام بس الطفل نازل شوي
من كملت فحص اخذتني للسونار والكسار طفر وكف على راسي متحمس حطت جل على بطني وصارت تمرر الجهاز عليها شوي وكالت بهدوء
الدكتورة:شنو تردون بنية لو ولد؟
جاوبها بحماس
الكسار:يارب تؤام بنية وولد
الدكتورة:وانتِ يا امة
ابتسمت وحچيت بنبرة هادئة
:اريد تجيني ملاك
باوعتلي وهزت راسها ورجعت تباوع للشاشة والكسار احسة يرجف اكثر مني اخر شي مل
الكسار:يلا دكتورة شنو ملاك لو حسن؟
ابتسمت الدكتورة ونزعت الكفوف
الدكتورة:مبروك حيجيكم حسن
بسرعة باوعتلة اضحك هو حط ايدة على گلبة ورفع راسة يحمد ربة واني مكدرت الزم دموعي رجع باوعلي ودنگ باس راسي
الكسار:حسن الثالث راح ينور دنيتي مبروك علينة
بيومها من الفرحة نسينة حتى الزعل الي بيناتنة
كمت بعد ممسحت بطني وكعدنة بمكتب الدكتورة
الدكتورة:ابنكم وضعة مستقر بس نازل المهم بعد 3 اسابيع وتدخل الشهر السابع لازم تجوني هالشهر شوي حساس بس تعالولي العصر لأن ابتداءً من الأحد القادم الصبح يكون دوامي بالمستشفى
سمعت كلامها كلة بأنصات وبعدها طلعنة من يمها صعدنة بالسيارة وحركها وهو يحچي بحماس ويضحك
الكسار:لازم نبدي نشتريلة ملابس ولازم تشتريلة هواية اشياء مثلاً چرباية العاب وهم لازم نجهزلة غرفة ببيتنة
سكتت صرت اجاملة مردت اكسر فرحتة واذكرة بالطلاق التزمت الصمت وصلني للبيت واني اتصلت بخوالي بشرتهم وفرحو هواية الية عرفت بعدهم زعلانين من الكسار
مرت الايام والبرود مستمر بيناتنة صاير حتى كدامي يشرب وهالشي مداطيقة ابد ولا اكدر احچي
بيوم من الأيام چنت كاعدة العصر برة على المرجوحة چنت مسوية گصايب بشعري القصر وعادي فرحانة بيهم
اندگ الباب عگدت حواجبي الحرس برة رحت للباب وحچيت
:منو؟
كال واحد منهم
:ست اجت وحدة تريد صدقة
بس كال هيچ فتحت الباب وكلت من ورة الباب
:خليها تدخل
رادو يفتشوها رفضت خطية يلمسوها حرام
دخلت مرة يجي عمرها بالخمسينات قصيرة وجهة من التعب مسومر حواجبها بيهم شيبات
:السلام عليكم فد مساعدة الله يخليچ عندي احفادي اثنين ابوهم وامهم ماتو وخلوني اني اعينهم
ابتسمت ماعرف ليش ارتاحيتلها
:تفضلي خالة لجوة كعدي وخلي اجيبلچ مي
شفتها كعدت بالأرض وكالت
:لا خالة هنا اكعد وخلي الباب مفتوح الدنيا مو أمان انتِ بنية حليوة حقهم اهلچ يخافون عليچ
هزيت راسي احترمت رغبتها ركضت للغرفة طلعت مصروف الجامعة چان الكسار ينطيني بس اني ما اصرف ارجعهم وياية ومن انطيهم اله ميقبل ياخذهم حسبتهم طلعو 140
اخذتهم كلهم ورحت للمطبخ حطيت صينية كرزات وكيك وعصير واخذتة الها چانت منزلة راسها وتسبح حطيت الصينية كدامها وكعدت كدامها بالأرض وكلت
:تفضلي خالة
غطت وجهة خجلانة
:يا عزا فشلة خالة ماريد شي اني اريد بس الف اجيب بيضات لهالأيتام وعندي الف اجيب بي خبزات
ابتسمت وحچيت وياها بلطف
:شوفي خالة اني محد يجيني بس بالسنة حسنة وهنا وحدي بس اني وزوجي حابة وجودچ ف لتفشليني واكلي تفرحيني والله
رفعت عيونها وباوعتلي بتمعن هزت راسها وصارت تاكل خجلانة واني اسولف وياها حتى لتنحرج شوي تركت كلشي وباوعتلي تهز براسها
:انتِ شگد محسودة ومنفوسة
اختفت ابتسامتي وكلت مستغربة
:ها؟
رجعت كالت
:اكو ناس حاسدينچ داشوفچ ممرتاحة لهالبيت ولا بحياتچ ولا حتى زوجچ مرتاح داحس بهالشي
ضحكت اهز براسي
:خالة على جمالي يحسدوني اشو خلصت حياتي ضيم بضيم
:چنچ تفاحة فدوة لهالوجه انصحچ تفتحين قرأن بالبيت الفجر والمغرب ترة صدگيني الحسد ياكلچ اكل اذا سكتي عنة
هزيت راسي مادري ليش اخذت بنصيحتها هي كامت تلبس بعبايتها كمت وياها لازمة بطني اخذت ايدها وحطيت بيهم الفلوس
:هاي خالة فرحي الاطفال
باوعت لأيديها وفتحت عيونها على وسعهم
:لا خالة هاي هواي اريد بس الف
دنگت بست ايدها وكلت
:مو هواية والله الف عافية عليكم بس انتظري خالة لترحين حرجع
تركتها وركضت للثلاجة اخذت كلشي بيها وانطيتة الها صارت تدعيلي وتبچي وصيت الحرس يوصلوها لبيتها ماعرف ليش ارتاحيتلها يمكن لأن مرة طيبة
اخذت بنصيحتها رحت للتلفزيون طلعت على قناة كربلاء حاطين قرأن
شوي ودخل الكسار بيدة تلفونة كعد يمي وكال
الكسار:سلام؟ منو هاي المرة؟
رديت السلام وجاوبتة
:وحدة حبابة عندها أيتام
ابتسم وكال
الكسار:ليش ما اخذتيلها فلوس من الكنتور
:لا عندي مصرف الجامعة انطيتة الها واحس مرتاحة وفرحانة
كعد يهز براسة نزع حذائة وكال
الكسار:بعد 3 ايام وتدخلين بشهر السابع
:اي من ادخل يشهري نشتري اشياء للطفل يكولون مو زين هسة نشتري
حك لحيتة وكال
الكسار:زين من تدخلين بشهرچ اخذچ ونشتري لطفلنة
سكتت العب ببطني كبرت اكثر وهو يباوعلها احسة يريد ياكلها
وكف صوت القرأن انطفت الكهرباء تأفأفت بأنزعاج
تركت الكسار بالصالة وكمت بالحديقة الهث كعدت على المرجوحة چان اكو ضوة خفيف شوي وطلع يدخن وبيدة بطل كعد يمي واني عصبت كلش ستوة يريد يشرب من عندة سحبتة من ايدة وركعتة بالحايط صار فتات هو باوعلي مصدوم
:لتتتتشررررب هالسمممم يميييييي
ضل ساكت مجاوبني لزمتة من ياخة ملابسة
:مليييتتت من هالوضععع تشرب يمي اني شنو مزهرية كدامك؟ معندي مشاعر متحس كل متشرب كدامي تلعببببب نفسيييي منك
فتح فلاش تلفونة وراح جاب الباقي من البطل وحطة بوجهي
الكسار:عصير شوفي زين
كعدت على المرجوحة ابچي اعصابي تلفانة من كلشي على اقل شي اعصب وما افكر بالعواقب
الكسار:شبيچ هسة مداشرب
كعد يمي يدخن ويتنهد حط ايدة على ظهري وكال
الكسار:من رحتي لبيت خالچ لهسة انتِ كارهتني حتى نظراتچ حاقدة علية
كمت معصبة وابچي
:لأن انتَ خليتني اكرهك هالكره انتَ اخذت دور الضحية وتخليت عني كل ما استلطفك اتذكر من تخليت عني وطلگتني بأصعب وقت مر علية چان المفروض توكف وياية بس مثل مكال وهيب انتَ متستاهلني لأن بأول فرصة راح تتخلى عني
بس حچيت هيچ تهرب كالعادة وطلع من البيت مسحت دموعي ودخلت للصالة حتى لو ضلمة كعدت بيها
نص ساعة ورجعت الكهرباء بقيت بمكاني لعبانة نفسي من كلشي
مر هواية وقت والكسار ما اجة واني مچنت اشتهي اكل شي رحت للغرفة لفيت راسي ونمت
ماعرف شكد مر وقت وفزيت على صوت عياط كمت اريد اطلع من الغرفة بس سمعت صوت زياد لبست دشداشة طويلة وحجاب يلا طلعت لكيتهم بالصالة الكسار وزياد
زياد معصب وعياطة هرج البيت هرج بقيت بمكاني مفاهمة شي
زياد:وخررر غوث خلي اروحلها اموتهااااا وخررررر
الكسار:فكر زين ولك العصبية متفيد بشي وهاي اني كدامك فادتني؟
زياد:لتقارني بيك انتَ وضعك يختلف عنيييي انتَ تحبها وهي تحبك مو هاي تزوجتها مجبور ودتكذب عليةةةة هيييييچ كذباااات
الكسار:اكعد وخلي نتفاهم مو كسرتها تكسر وبعد تريد تروح تضرب بيهاا
كعد يهز برجلة يريد ينفجر من العصبية
زياد:لك كسار اخذت بنصيحتك وصرت اعاملها زين حتى ضرب ما اضربها وهي وين متكعد تكول زياد يضربني كل يوم
عرفت كلامهم چان عن سارة بقيت واكفة استمعلهم هو باوعلي وكال
زياد:تعالي تعالي هم كالتلچ ضربتها مو؟
هزيت راسي وكلت
:شفت أثار الضرب بأيديها وكالت زياد يضربني
عض اصبعة معصب وكال
زياد:بنتتتت الكلبب مو اخذتها لأبوها حتى يسامحها وابوها خلاني اطلع ولازمها ضاربها بنت النعال بس خلي تصبرلي
باوعت للكسار وكلت بخوف
:شصاير؟
الكسار:بعدين نحچي اليوم زياد ينام عدنة وغصباً على راسة هم
زياد:دولي انتَ خليني اروح للبيت اكمل عليها خليني ابرد گلبي
الكسار:انچب هو شبقيت بيها انتَ
زياد:من هسة اكلكم بعد ماريدها چنها طاوة
لزمتني الضحكة بس خفت يجيني نعال طاير منهم فضلت السكوت
بيومها تعشة عدنة ياكل ويدردم عليها متحلف بيها صدمتني خوش تمثل عبالي صدگ يضربها طلع تأليف منها واني الغبية كسرت خاطري
فرشلة الكسار بالصالة واني دخلت بالغرفة لبست شي خفيف لأن ماكدر انام بشي حار اختنگ
نام زياد يلا اجة ينافخ محچيت شي نزع ملابسة واجة كعد يمي
الكسار:هاي سارة طلعت داهية
:ممثلة بارعة حتى اني ضحكت علية وعبالي صدك يضربها
حط ايدة ورة راسة وكال
الكسار:اييي گحـ** هواية چان يريد يحط طلقة براسها وامها اجت تلعلع لا احترمتني ولا احترمتة
:هسة شنو حيسوي؟
الكسار:باچر يريد يطلگها يكول متفيدني بعد هو صدك چان مدللها رغم كلشي سوتة قبل ليروح من البيت يتصل عليها يشوفها شنو محتاجة وكل يومين يطلعها يونسها بس طلعت متستاهل
:الله يصلح حالة خطية زياد فوك متزوجها مجبور وتطلع علية صيت محلو الله يرزقة بغيرها
حط ايدة على بطني وهمس
الكسار:امين
صار يحرك ايدة يريدة يتحرك بس ولا تحرك بس شال ايدة تحرك ضحكت واخذت ايدة رجعتها على بطني
:تحرك تحرك
من رجعها هم ميقبل يتحرك متت ضحك من هسة عنيد
رفع ملابسي عن بطني وصار ينقر عليها ومن يتحرك يبوس بطني
الكسار:لو تعرفين شگد منتظرة اريد اشوفة احضنة وابوسة
:واني هم هواية متحمسة حيصير عندي طفل يسندني
صفن بوجهي وايدة على بطني يريد يحچي ودفر ايدة متت ضحك وهو ضحك ونزل يحچي ويا
الكسار:ولك تضرب ابوك من هسة عندك اعراض عقوق الوالدين
:هسة هو حينولد بنص سنة 2015 واني مواليد 1994 وانتَ مواليد 1981 اوف طلعت شايب واحنة صغار
رفع حاجبة معاجبة
الكسار:بعدني شباب ترة وبحيلي ترة هسة اني بعمر الشباب
:وخر شايب هي گوة
حط ايدة على رگبتي وقرب وجهة لوجهي مبتسم برهاوة
الكسار:هذا الشايب ابو ابنچ الي بطنچ تردين اشوفچ شلون صار الطفل؟
دفعتة من صدرة منزلة راسي من فهمت قصدة ضحك ونام على صدري واني هماتين نمت
ومن الصبح رايح زياد مطلگها عند الشيخ وعازم الكسار وباهر وغيث وخوالي بمناسبة طلاقة منها ومن اجة الكسار جايب علبة بقلاوة يكول زياد موزع بقلاوة وهاي دزها الچ ثواب ضحكت ضحك مو صاحي ابد
بعد يومين رحنة العصر للدكتورة مراجعة والحمدلله كلشي تمام
التهيت بدراستي فترة امتحانات الكورس الاول
چانت فترة متعبة خلصتها توتر وتعب مرات ادرس وابچي والكسار رغم برود علاقتنة بس ما قصر وياية چان ينطين دوافع معنوية ويشجعني يكول لأن حامل نفسيتچ تتعب صار يطلعني اشتم هوى بوقت ضوجتي
والحمدلله انتهت الامتحانات على اكمل وجه ودخلت بشهر الثامن باقيلي شهر واولد الحماس الي عندي مو طبيعي
الشي الي محلو جسمي ورم هواية وصار يأذي وثگلت اكثر واكثر
الكسار استمر بالشرب وكل ميجيني اصدة عني واذكرة بالطلاق مجروحة من عندة هواية ودوم اذكرة اني انجبرت ارجعلك وانتَ انجبرت ترجعلي بسبب الطفل
بيوم چنت كاعدة العصر اباوع للتلفزيون چانت مسلسل عراقية اسمها وكر الذيب اعشق اغنيتها لازم كل متبدي اني موجودة واسمعها والكسار مادري ليش يضوج من عندها
داتابع وسمعت صوت سيارة عرفتة اجة دقايق ودخل هو وخوالي كمت سلمت عليهم وابوس بيهم وهو ينافخ همزين تصالحو مطولو شوي وراحو
من راحو هو كعد يمي اني اباوع للتلفزيون وهو عينة على تلفونة ويضحك رفعت حاجبي وگلبي صار يلعب
سالتة بهدوء
:وهيب شلونة اريد ازورة قبل لا اولد
باوعلي وأشرلي اجيلة كمت لازمة ظهري كعدت بصفة وهو طلع تسجيلات الكاميرات توسعت ابتسامتي واخذت التلفون من ايدة
چان نايم حبيبي وسمنان
اخذ التلفون من ايدي وطلع فيديو چان وهيب يحچي بي والدكتور النفسي كاعد كدامة خليت ايدي على گلبي وعيوني مدمعة صاير هادئ هواية وبين كلمة وكلمة كال اسمي
توقف الفيديو وبچيت
:سمنان ومبين مرتاح ميأذو مو؟
الكسار:محد يكدر يأذي بابا وهيب حالة خاصة الكاميرات تحت ادارتنة الي يأذي اگص راسة واخوچ قوي لتخافين علية
:زين اريد اشوفة؟
ابتسم ومد ايدة لخدي
الكسار:باچر اخذچ
دفعت ايدة عن خدي وكمت فرحانة مشتاقتلة هواية هو دگ تلفونة كام وطلع بسرعة صدمني كل مرة يجاوب عادي صارلة اسبوع هي يسوي
كعدت اهز برجلي وعيني على الباب وادعي الي بالي ميطلع صح
شوي ودخل مبتسم
الكسار:تعالي اكو مرة تريدچ
عگدت حواجبي مستغربة اجة سندني واخذني لبرة
ابتسمت من شفتها حتى كاعدة بنفس المكان
كامت سلمت علية ورجعت كعدت بمكانها واني كعدت بمها
:شلونچ خالة احفادچ شلونهم
ام جميل:فدوة اغديلچ خالة بخير احنة الله يريح گلبچ انتِ وزوجچ مثل ما ريحتوني وفرحتو هالاطفال اجيت اتشكركم
:شسوينة احنة خالة الأمام علي عليه السلام چان ياخذ اكل عيالة وينطي للأيتام واني داسوي نفسة
ام جميل:بعد گلبي خالاتي
سكتت شوي واجة الكسار حط كدامها كيك وعصير راد يروح بس كالت
ام جميل:تعال شوية فدوة الك خالة اريد احچي وياك
اجة الكسار مستغرب كعد يمي وهي باوعتلة وكالت
ام جميل:عجيب الحسد الي صايبكم هذا التعب مو من الشغل من الحسد اكو مرة چبيرة تكرهك وحاسدتك على عيشتك وحتى على مرتك حاسدتك
باوعلي ورجع باوعلها
الكسار:مفهمت؟
ام جميل:اول مدخلت لهالبيت حسيت بشعور محلو ابد خلو القرأن دوم مفتوح علاقتكم محسودة وخصوصاً زوجتك هواية محسودة حتى تحافظون على علاقتكم صدكو بكلامي وفتحو قرأن بالبيت
:دافتح الفجر والمغرب مثل مكلتيلي
ام حميل:الله هم العن كل حاسد وميحب الخير لغيرة يلا يمة اني اجيت اتشكركم واروح الاطفال وحدهم
ودعتها وطلعت والكسار طلع وياها
كعدت على المرجوحة افكر منو حاسدنة؟ وعلى شنو يحسدنة احنة بشر حالنة حالهم
دخل الكسار عاگد حواجبة
الكسار:عود صدك اكو حسد مادري شنو
رفعت كتفي بمعنى ماعرف كعد يمي
الكسار:شوفي اني ماصدك بهيچ اشياء بس احتمال اكو هيچ شي
:ليش متصدگ؟ ترة الحسد مذكور بالقران الكريم
الكسار:ماعرف وهسة شنو الحل؟
تكتفت وباوعت للتلفزيون
:ماكو داعي نسوي شي القرأن موجود وهم احنة حنتطلگ ويخلص هالحسد
سحبني من زندي معصب
الكسار:منتظرررر هاليووووم بفارغ الصبر
دفع ايدي وكام عصرت ملابسي اريد ابچي بس ميستاهل ابچي علمودة اريد احسسة بشعوري
بعد هاليوم الكسار تغير تغيير جذري حتى مصار ينام يمي بنفس الغرفة ومن يجي بالليل يشرف بالصالة وبعدها ياخذ تلفونة ويصعد للغرفة الي فوك ويتركني وحدي
چنت احترگ حرگ بتصرفاتة بس هم احرگة بتصرفاتي كل يوم لبسة شكل وكل يوم شعري اسوي تسريحة وعطري من امشي يهب وراية احس عيونة وراية بس من اباوعلة يسوي نفسة مشغول
اليوم اخذني ازور وهيب اخيراً ميتة على شوفتة كعدوني بغرفة بطلب من الكسار شوي ودخلو وهيب وهو عبالك طفل ركض علية حضني بقوة
وهيب:يا بعد حيلي مشتاقلچ هوااااية
:يعيوني انتَ اني ميتة على شوفتك والله
ابتعد عني يباوعلي ويضحك
وهيب:صايرة بطة ولچ تخبلين
بستة بخدة وكلت
:اخوية وهيب اكيد اطلع حلوة
باسني براسي وايدية اثنينهم
وهيب:عرفت رجعتي لرجلچ زين وياچ لو لا؟
:زين الحمدلله لتشيل همي حبيبي
وهيب:انتبهي على نفسچ زين اريد من اطلع اشوفچ انتِ وابنچ بخير
:انتَ اطلع وحتشوفنك هواية بخير بس طمني عنك انتَ بخير هنا
حك رگبتة وكال مبتسم
وهيب:زين ويوم عن يوم دارتاح چان اكو صوت براسي شوي شوي ديختفي
ريحني بكلامة نص ساعة ودخل الكسار كعدو هو وهيب وشفتهم هواية منسجمين وبعدها ودعت وهيب وطلعنة من المكان
مرت الايام وصرت بنهاية شهر الثامن والوضع مستمر كما هو بس الي يقهرني صار ميسأل عني حتى بس على الطفل اهم شي عندة الطفل حسيت برخص مو طبيعي وحسيت وجودي غلط هنا
اليوم تأخر ما اجة للبيت انتظرت وانتظرت وماكو لحد منعست دخلت للغرفة نمت
واني نايمة حسيت بشخص يبوس برگبتي واسمع صوت همسات فتحت عيوني گلبي بدگ بقوة خايفة
:كسار؟
رفع راسة يباوعلي بذبول وريحتة شرب حط ايدة على خدي والتهم شفايفي صرت ادفعة عني لأن تأذيت بس مكدرتلة دفعتة اقوة رفع راسة وعصر فكي بقوة
الكسار:و وخري مو اانتِ تمنعيني
لزمت ايدة الي بفكي وكلت بخوف
:كووم عني لتسوي شي تندم علية وخر
ضحك بسكر ورجع يبوس بية دفعتة وصرت اضرب على ظهرة وخر عني وعصر شفايفي
الكسار:ليش م متقبلين ها
قرب وجهة لوجهي واني انتفس بقوة
الكسار:هي حلوة هي ا احلى منچ
تجمدت بمكاني واني اسمع كلامة ترك شفايفي عيونة مدمعة شهك وحط راسة برگبتي يبچي صدمني وگلبي وجعني
دموعة توكع على رگبتي واني ارجف من كلامة احس گلبي يريد يطلع من مكانة صار يشهگ وانتهت كل ذرة بية من كال كلمات هدمتني هدم
الكسار:احبها ماكدر بدونها كرهت الكل وحبيتها ...
..يتبعع..
توقعاتكم ؟
.
.
.
.
.
.
.
.
.
.
ضيفو حساب الانستا
وقناة التلي
اللهم صلِ على محمد والِ محمد 🦋
مها ال عبدالله