نبدأ بذكر الله ﷽🤎✨
عـرش الروليت
بارت 23
قراءة ممتعة
🚫لا تنسون التصويت والتعليق بين الفقرات حبايبي..
❢ ═──── · · • • • ❂ • • • · · ────═༻❢
ماعرف ليش كل الـ يجي بالي احجي
من دون تفكـير بشنو راح يصير بعدها !
هل هيه وقاحـة مني ام جرائة ؟؟
فتح عيونه على وسعهن حرفياً من صدمته
حتى ثغرة مفتوح يحجي من دون
وعي
طاهـر :- انسه مُرجـان شهل حجي هذا؟؟
مُرجـان -: سيد طاهر ماعرف والله
شنو احجي حتى تفهمني انه...
طاهر :- اسمعي انسه مُرجـان اعتقد انتِ
بعدج متأثرة بمرحلة المراهقة تصرفاتج مو مال.
بنت عاقلـة محترمة
اكلج والدي بسببج زعل عليه تكليلي
أحبك؟؟
شهل صلافة هاي وين اهلج عنج عندج
خفة دم مو طبيعية ضروري تتعليمن
الثكل ترة البنت حلاتهه بأخلاقـها
مُرجـان :- سيد...
قاطعني بعصبية
طاهر -: ناديني استاذ طاهر افضل وياريت
مرة ثانية ما اشوفج بمكتبي
تفضلــي على دروسـج
بقيت صافنه بوجهه حرفياً حسيت بكمية
ذل وأهانه بلعت ريكِ بصعوبة احس بدموعي
ينزلن على خدي
مُرجـان :- اا.استاذ
ماكــدرت اكمل كلمتي بقى صافن عليه
لأن بچيت يمكن ما جان متوقع
ردت فعلي بهل طريقة
وكفت وصلت للباب منطيته
ضهري واحجي
مُرجـان :- ما جنت متوقعة منك
هل كلام انتَ السبب بكلشي راح يصير
الي حتى اذا متت انتَ السبب ما راح اسامحك
على اهانتك الي
ما سويت شي غلط كتلك احب... انسه
اصلاً ما تستاهل هل كلمة
طلعت بدون ما اسمع صوته دخلت
الحمامات أردد كلمة غبية ضربت وجهي
امسح دموعي غسلت وجهي امسح عيوني
صارن حمر
الله ياخذج مُرجان بشنو ورطتي نفسج
بشنو طاح حضي امداني
باوعت لوجهي بالمرايا
شلون وليش حبيته ؟؟
شفت بي حنية بابا
برودة وكلامه قوة عقلة خلتني كل الوقت
افكر بكلامه
حبيته والله بس جنت اجذب روحـي
من بعد هذا اليوم حاولت امنع نفسي من
الكلام وياه
من اسمع صوته اعتبرة صوت عادي
ما احجي وياه بأي شي وفعلاً
صرت ابتعد عن أي مكان هوه يتواجد
بي
اسبوعين مرن ماكو شي جديد اخر اسبوع
ما اجه بي استاذ طاهر صح ما احجي وياه
بس افتقده بالجامعه
ما سألت عنه بيوم سمعت من شله
شباب بأنُ الأستاذ طاهـر مسوي حادث
وهسه هوه بالمستشفى
تخبلت اخذت منهم عنوان وأسم المستشفى
تركت المحاضرة والجامعة كلها ركبت سيارتي
وانطلقت بأسرع وقت ممكن
كلبي يدك اديه ترجف عيوني كل شوية
امسحهن ماريد أبچي بس غصب عني
وصلت للمستشفى
نزلت اقدم رجل وأخر رجل افوت ؟؟
او لا ابقى هنا واكفه !؟
بقيت حايرة مستحية بصفتي منو
اجي اشوفه بعدين فكرت اذا من أحد من
عائلته سألنـي اكوله استاذي اجيت اطمن
علي
هزيت راسي ودخلت المستشفى
مُرجـان :- العـفو اكو مريض عدكم اسمه طاهر
مسوي حادث ممكن اعرف رقم الغرفة ؟؟
- طاهر شنو ؟
مُرجان -: ماعرف اسم الأب هوه استاذي
واجيت اطمن علي فدوة شوفيلي بأي
غرفة موجود
- قصدج السيد طاهـر عباس ؟؟؟
عكدت حاجبي رديت بنزعاج
مُرجان :- هوه ما يحب أحد يناديله
سيد كولي استاذ احسن
- عفواً منج منو أنتِ حتى تعلميني شلون
احجـي
مُرجان -: ما كتلج شئ بس نبهتج
هوه يصير عصبي ويكره شكو واحد
يكوله سيد أنه بس نصحتج
هسه كوليلي بأي غرفة موجود ؟؟
- غرفة 12 على أيدج اليمين
مُرجان :- تسـلمين
عفتها منزعجة منهه شكو تكله سيد
بس أنه لازم اكوله سيد طاهر الباقي لازم
استاذ يصيحوله هيج احس
المهم اخذت نفس طويللل هـدئت نفسي
وكفت مقابيل غرفته فتحت الباب
عيوني تنتقل بكل ركن موجود بالغرفة
إلى أن شفته نايـم على السدية اكو كانونه
بيده اليمين وأجهزة علىٰ صدرة
شفت أيده مجبرة وهذا اكثر شي أذاني
مبين الحــادث قــوي كلـش تقدمت بخطوات
هادئة ماريدة يكعـد كعدت يمه فقط
اباوع علي
حسيت بي من حرك أيده وفتح عيونه
فتحت ثغري أكلمه بعدم تصديق
مُرجان :- سيد طاهـر أنتَ زين ؟.
توه فتحت عيونك وحركت ايدك تكدر
تعيدهن مرة ثانية؟؟
ماكو أي حـركة كعدت مادة بوزي
مبرطمة همست
مُرجان :- هل كد تكرهنـي لدرجة من سمعت
صوتـي رجعت نمت
سكتت ثواني
سيد طاهــر مستعدة اترك جامعتي
بس لا تزعــل مني و خليك بخـير بنهاية
أنه مو ناكـرة للمعروف
:- منو أنتِ ؟؟؟
سمعت صوت وراي اللتفتت
وإذا اشوف رجال چبير لابس دهداشة وفوكها
بشت خفيف لابس عمامه سوده
بلعت ريكِ وكفت بسرعة عدلت
ملابسي واحجي برتباك
مُرجان :- ولا أحد ااقصد طالبة عند
السيد طاهر
-: سيد طاهر ؟؟
:- اا.اقصد استاذ طاهر
وكف مقابيلي اخذ نضرة سريعة عليه
بعدها دار عيونه على طاهر وكال
:- شنو اسمج يا بنـتي ؟؟
-: أسمـي مُرجـان
:- أنتِ نفسج الـ خلت ابني عاشق ولهان
درت علي فاتحة عيوني وكل جسمي
رجف همست بخجل وخوف وتوتر
مُرجان :- اااكيد مو انه استاذ طاهر مستحيل
يحبني
:- بس المستحيل أصبح حقيقه ابني
وكع بحبج من بعدها صار يتمرض ابتعد عن
عملة في سبيل ينساج
بس كل الصار وضعه من سيىٰ ألى أسوأ
حبج دمره هوه بعضمة لسانه نطق
:- حبـها دمـرني خلاني ضايع
ما اندل دربـي
دموعي تنزل بصمت
مُرجان :- بس هوه أذاني بكلامه
بچيت بسببه
:- اعرف اعرف هوه خبرني بكلشي
يا بنتـي طاهر انسان خجول
ما يعرف يعبر عن مشاعره
أنتِ بيوم وليلة دخلتي حياته كلبتيها
اله كلاب أمه تبچي علي ليل ونهار
هذا مو حب
شوفي نفسج وعائلتج البيئه الأنتِ
عايشة بيها وشوفي طاهر وعائلته والبيئه
الـ هوه عايش بيها
صعب يا بنتي تعيشين عدنه احنا ناس
على حب الله نعـيش ما اكلج فقراء
الله غانينه من رزقة والحمدلله
ولكن اكو فرق شاسع بينج وبين ابني
طاهر متأكد ميه بالميه ما راح تكدرين
تعيشين اسبوع واحد بالبيت
مُرجان :- سيد عباس اذا قصدك حياتي
تختلف عن حياتكم اكدر اتخلى عن حياتي
واعيش وياكم
اللبس عبائة اللبس حجاب التزم بالصلاة
كُلشي اسوي وحتى اذا تريد اكعد بالبيت
من دون كُلية أو حتى شغل
ابتسم
:- منو كلج احنا نقبل بالبنت الـ ما تشتغل
والـ تترك دراستها ؟؟
بالعكس غلط كلامج يا بنتي اذا تردين
تلبسين حجاب لازم يكون السبب أيمانج
ودينج
وإذا تردين تلتزمين بالصلاة فـ لازم يكون
السبب اقترابج من الله سبحانه وتعالى
ومنو كلج تتركين دراستج وحياتج
حتى تعيشين عدنه ؟؟
يا بنتي البنت سلاحه شهادتها عقلها
قوة صـبرها دائماً المرأة العراقية هيه الصبورة
ام الشهداء الأرملة صاحبة الأيتام
بالعكس نفتخر بنساء العراق
زوجتي
تشتغل بستشفى السرطان للأطفال وبنفس
الوقت تخيط ملابس وتوزع على الفقراء
شوفي يا بنتي الله سبحانه وتعالى
عندما خلقنا وجعل منه الفقير والغني حتى
يميز بين العبد الصالح والعبد المتكبر
وصلتج الفكرة مو ؟؟
هزيت راســي بأي اللتفت عليه
-: ابنـي مو ألج صدكيني على مودج أنه
يا بنتـي انسي طاهر وكلشي يخصه
اذا تحبينه فعلاً أنسي حتى ما يتأذى أكثر
همست بينما امسح دموعي
مُرجان :- بس أنه راح اتأذى أكثر
-: ميخالـف منو بينا ما تأذى بهاي
الدنيا تنسين أن شاءالله
مُرجان :- ما اعتــقد
باوعت علي وكملت
-: بس راح احــاول شكراً على كلامك
وتفهمك اوعدك ما راح أزعج سيد طاهر مرة ثانية
واتمنىٰ يكوم بالسلامة بأقرب وقت
:- أن شاءالله بجاه امنا الزهراء البتول
يرزقج يا بنتي سعادة تُنسيج سعادة
الأخرين
ابتسمت
مُرجان :- ألك بالمـثل سيد عباس
:- من وين عرفتي أسمي ؟
مُرجان -: قبل شوي من الأستعلامات
على العموم صار لازم اروح مع السلامة
-: الله وياج بنتي
طلعت صارت بوجهـي مرة وياها بنيه شايله
طفل انتبهت على الطفل نفس الطفل
الـ بالفيديو
بيوم طاهر شايله على ضهرة اتذكرت الفيديو
وضحكت وحدي
بعـدين عرفـت ذولـه أهلــه ركبت سيارتي
ماعرف وين رايحـة
يمكن هل عائلة الله سبحانه وتعالى خلاهم
بطريقـي حتى افتح عيوني على
شغلات جنت هاملتها
على تصرفـات وكـلام جنـت اعتبرة
جـزء من طبيعتـي بـعدين اكتشـفت
الخطأ ولازم اعالــج هذا الخطأ !
طلـبت من بابا ينقلني لغير جامعه
من بعد كلام ومشادات أيام وافق واهم شي
ماما وافقت
انقلت على جامعه جديدة بديت اشتري حجابات
واللبس فقط اخليهم فوك راسي
بعدها شوي شوي صرت البس الحجاب
كامـل وكُلش حلو يطلع على وجهي
التزمـت بالصلاة
حبيت كمية الراحة النفسية
والطمأنينة
صرت اقرأ دعــاء الـفرج كل ليلة
انقطعت اخباري عن سيد طاهر
بعد ما شفته من هذاك اليوم ولليوم هذا
صح بعدني افكر ومستحيل انسى بيوم
ولكن احاول اصيطر على مشاعري وأقنع
نفـسي
جنه كاعدين نتعشى نادراً ما نتعشى سوه
اغـلب الاحيـان تكـون العائلة كل شخص
بـصوب
:- شنو رأيكم نروح سفرة على اربيل
هناك بيتنه موجود ؟!
سحر -: لا ماكدر عندي شغل بالعيادة
-: مو كله شغل يومج ما يصير هيج
الأنسان يمل
سحر :- شسوي عندي مراجعين هوايه
اترك الناس واسافر
:- بابا شنو رأيج بالفكرة ؟؟
جنت صافنه ما اسمعه دغتني ماما
برجلي فزيت اباوع عليها
سحر :- ابوج يحاجيج
درت على بابا
:- ها بابا
-: اكول شنو رأيج نطلع سفرة؟
مُرجان -: أنه أكول مو هسه خليها
بالعطلة هسه عندي جامعة ماكدر
:- بكيفكم
هــزيت راسي موافقة بقينا ناكل بصمت
إلى أن خلصنا بابا كعد بالصالة
انه وكفـت بالمطبخ اغسل اديه
سحر -: مُرجان
مُرجان :- نعم ماما
سحر -: هل شهور الفاتت ما عاجبني وضعج
ابد تغيرتي تماماً شنو الغيرج ؟؟
ابتسمت وجهت نضري عليها
كايله بنبرة باردة
مُـرجان :- ابـد ما تغيرت بس يمكن
فهمت امــور اكثر وتثقفت اكثر
سحر -: كلامج احسه مو كلامج
هيج تغيـرتي
مُـرجان :- ماما ترة تعبانة واطمني بنتج
كُلش سعيدة
سحر -: ما اشوف ابتسامة حقيقية على
وجهج
مُـرجان :- بالعكس كلش فرحانة وسعيدة
سحر -: ليش تركتي بسام؟؟
مُـرجان :- اخذت بنصيحتج واكتشفت
بسام ما يستاهل حبي اله
سحر -: زيـن لـيش طلبتي من ابوج
يـغير جامعـتج ؟؟
مُـرجان :- ما حبيتها وما ارتاحيت بيها
سحر -: جامعه من افضل الجامعات
على مستوى العالم مو بس العراق وبيها
اساتذة من افضل الأساتذة
ما عجبت حضرة جنابج؟؟؟
نفخت الهوه بضوجه همست
مُـرجان :- ماما هوايه ادققين بشغلات
ما الـها أهميه ترة سالفه من زمان خلصت
وراحـت
سحر :- انه خايفة عليج ماما منو
عندي غيرج بس انتُ بنتي الوحيدة
ضروري ادقق واخـاف ولازم اخذ الحذر
مُـرجان -: لا تخافـين بنتج قوية
واصبحت اقوى بعد من قبل
ابتسمت بينما تخلي شكر بكوب
الچاي
سحر :- بس تبقين بنضري بنتي الصغيرة
المُدللة الـي تتـخذ قرارات من دون ما
تفكر بالعواقب
مُـرجان -: تغيرت وصرت افكر حتى قبل
لا اتكلم أي كلمة ممكن تضر بالأنسان
او تجــرح مشاعرة
سحر :- تـمام شيلي بقايا الأكل شمريهم
بالزبل وخلي المواعين بالمطبخ لبين
ما اخلص وارجع اغسلهن
باوعـت على السفرة شفت تقريباً نص الأكل
باقـي ما انطاني كلبي اشمرة بينما اكو
ناس محتاجته
سألتها بستعجال
مُـرجان :- ماما يصير ننطي الأكـل
بدال ما اشمـرة؟؟؟
باوعت عليه باستغراب ونطتني ذيج
النضرة
سحر -: اكيـد حبيبتي
ابتسمت
مُـرجان :- انه هسه اخذه لـ جيرانه خطيه
حالتهم تعبانه
سحر -: مُـرجان ماما انتِ شنو صاير وياج؟؟
سألتني بحيرة وقلق واضح على معالم
وجهه ما استغربت ردت فعلها جنت متوقعتها
اصلاً
مُـرجان :- ماما اذا ننطي للناس الله ينطينا
من رزقـة بعدين حـرام نشمر النعمة
الله رزقنا من رزقة
حتى يمتحنه لازم ننجح بهذا الأمتحان
ومن وجهة نضري مساعدة الفقراء
هيه اجوبه لأمتحان الله
ما راح نخسر شي بالعكس
سحر :- ماعرف سوي الـ يعجبج ماما
حجت هل كلمتين وطلعت بصينية
الچاي تنهدت امسح بوجهي واكول
- يمكن زودتها بالحجي !؟
رفعت اكتافي زامة شفتي بعدم معرفة
لميت شكو أكل بقى نضيف خليته بصحن
ونزلت للشارع
امشي و اباوع بين الصوبـين تأكدت ماكو
أي سيارة ركضت عبرت الشارع مشيت
مسافـة قصيرة
شفت رجال چبير بالعمر كاعد على
احد ارصفة الشارع كسر خاطري
شلون يباوع كأنما يعاتب الناس و يعاتب
حياته
جان لابس دهداشة بيضة بس من التراب
والشمس صايرة متربة ومتشككه
تقربت منه كعدت جنبه انه جريئة اسوي
الـ يجي بالي من دون تفكير
لهذا تقربت منه اكثر لازمه ماعون
الأكل همست
مُـرجان :- حجـي ليش كاعد بهل وقت
على الرصيف وين أهلك ؟؟؟
ما رد عليه فقط يباوع بنقطة معينه
تنهدت وبقيت اباوع انه كذالك بنقطه
مُعينه واحجي
مُـرجان -: عندك بيت اكدر اساعدك
اوصلك لبيتك؟!
زين عندك اولاد ادك عليهم يمكن هسه
بالهم عليك
لحد ما نطقت بهل كلمات ابتسم بعدها
دار وجهه عليه همست بصوت يرجف
:- الزمــن وولــدي عليه دارو
بعد ما جنت اعيش ابيتي الـ كضيت
عمري كله بي اتزوجت وخلفتهم كبرو
زوجتهم اخر شي طردوني
حجيت بينما الغصة خانكتني
مُـرجان :- حجـي اصير بنتك والله تعال
وياية للبيت عندي مكان تنام بي عندي أكل
احلى والذ من اكل الشارع
عندي كلشي يليق بمقامك ولـ كبر سنك
تعال وياية فدوة
- يا بنتـي لا عبالج حاقد عليهم لا بالله
من كلبي اتمنى الهم حياة سعيدة يعيشون
بسعادة من دون مشاكل
بس انه يا بنتي دموعي تنزل عليهم لأن
اعرف الله بالمرصاد وراح يسوي بيهم مثل
ما سوو بيه خايف لا بيوم يكبرون ويشمروهم
ولدهم بالشارع مثل حالتي
مُـرجان :- هايه عدالة الله سبحانه وتعالى
خلي يسوي بيهم مثل ما سوو بيك وأزيد
حتى يشعرون بنفس الشعور المريت بي انتَ من
شمروك بالشارع وما سألو عليك
- يا بنتي ذوله قطعة من روحـي كضيت
عمري اسهرلهم انطيتهم شبابي كله وقوتي
بس حتى اعيشهم
اثاري انطيتهم خبزة ونسيت اربيهم
مُـرجان :- حجي تعال وياية للبيت يلة
الله يخليك
- يا بنتي روحي الله يوفقج تأخر
الوقت وأولاد الحرام كثار الدنيا ليل مو أمان
مُـرجان :- شلون تريدني اخليك وارجع
لبيتي وانام عادي انا ما راح اكدر انام ولو
دقيقة اذا انت تبقى هنا
- يا بنتـي انه استسلمت لأمري ولـ حياتي
خلاص اقتنعت بمصيري روحي انتِ
الله وياج
جان رافض رفض قاطع مليت من الكلام
تعبت إلى أن استسلمت نطيته صحن
الأكـل وكمت من يمه
تمشيت بالشارع اللتفتت علي اشوفه
ياكل ويباوع عليه رجعت للبيت دخلت
لغرفتي انفتح الباب ودخلت ماما
باوعت عليها عاكـدة حاچبي هزيتلها
راسي بمعنى شكو تقدمت مني بعصبية
لزمت معصم ايدي بقوة كايله من بين اسنانها
سحر :- وييين جنتي ليش تأخرتي
مُـرجان -: ماما ايدي اذيتينيييي
احجي بينما احاول اوخر ايدها شدت
ايدي اكثر قربتني الها اكثر هامسه بوجهي
سحر -: كولللي وييين جنتي
مُـرجان :- شبيج ماما تخبلتي مو كتلج
راح انطي الأكل لناس يستحقونه بدال ما
اشمرة
سحر :- تمام قبل جنتي من تشوفين مكدي
بالشارع لو تشوفين شخص فقير تنفر روحج
منهم حتى ما تحجين وياهم
شنو التغير هسه مُـرجان تصرفاتج دا
تتغير لازم اكو سبب ومن حقي اعرف
مُـرجان :- صح انتِ امي بس مو من حقج
تعامليني هل معامله تشوفين تغييري
مضر الج او ألي؟؟
لا صح بالعكس دا اتغير لأن اريد اتصالح
وي نفسي وي رب العالمين بينما تصرفاتي
ما تضر أحد وانه مرتاحة بتغييري مو من حق
أي أحد يدخل بيه
تباوع بوجهي وتهز براسها همست
سحر :- هذا الأستاذ السبب مو؟؟؟
بلعت ريــك ارمش حتى اتفادى نظراتها
مُـرجان -: أي أستاذ ماما شبيج
ضحكت بسخرية جريت ايدي منها
منزعجة
سحر :- تحبينه مُـرجان؟؟؟
صفنت عليها بدون جواب
رجعت كملت
:- أي تحبينه لهذا السبب تركتي بسام
متأثرة بي لأن سيد عبالج اذا تحجبتي
و صليتي و سويتي زين راح يحبج يعني؟؟
مُـرجان :- لا ما سويت كل هذا حتى أخلي يحبني
سويت كل هذا حتى أخلي الله يحبني
سحر :- ما جنتي تهتمين اصلاً
اسمعيني مُـرجان طلعي هذا الأستاذ من
راسج على جثتي يصير الج افتهمتي؟؟؟
تحجي وتضرب راسي
عيوني انترسن دموع كابرت حتى
ما أبچي همست بأصرار
مُـرجان :- أحبه ماما
أحبه رغم ما اشوف وجهه احبه رغم
بعده عني
احبه رغــم كرهه ألـي
أحبه رغـم فرق العمر وفرق العادات والتقاليد
أحــبه
خلصت كلامـي بدمـوع رفعت راسي
واذا أتلقى راشدي على وجهـي شهكت
لازمه خدي فاتحه عيوني
رفعـت اصبعها بوجهي تحجي
بصوت خافت حتى لا يسمع بابا
سحر :- لازم اربيج من جديد حتى تعرفين
شلون تخـتارين وتحترمين كلام أمج هل كلام
ممنوع اسمعه مرة ثانية
ديـري بالج والأ تشوفين مني اشياء عمرج
ما شفتيها ....
......
......
......
......
......
رولـيت
رجلي اليمين مربطة بسنسله مقفولة بالسرير
كاعدة بالكاع لامه رجليه لصدري
اباوع بنقطة معينه
صافنه دنكت اباوع على رجلي شفتها
صايرة حمرة دم واكو زراك حوالينها يمكن
بعد ما امشي عليها
تنهدت
رفعت راسـي من انفتح الباب دخل
عليه مبتسم كلبت عيوني بملل مثل كل
مرة
أحمد :- افرديها ديورة شهل وجه العابس
كمان بيبي سمايل
روليت -: ولي من وجـهي أحمد
ضحك بصوت عالي كعد بعيد عني
ولكن عيونه عليه
أحمد :- رجعتج لـ عائلتج بعد شتردين
مو احسن من ما ضاله ببيوت الناس
روليت :- على الأقل احسن منكم
أحمد -: الضاهر عجبتج الكعدة ابيت
وحدج انتِ وهذاكه الكو***
ابتسمت
روليت :- يبقى احسن منك ما تحرش
ولا حتى استغلني احتواني انطاني الأمان
احسن من غيرة
أحمد -: كلشي صار من تحت أيدج
تعرفين هسه امي ناوية تقتلج
مثل ما قتلتي ابويه
روليت :- ابوك
سكتت عاضة شفايفي مسحت وجهي
ورجعت كملت
:- ابوك هوه سبب كلشي جان يخطط
يزوجني شخص مريض نفسي بس حتى يرجع
هيبته بين الناس
اكو أب يضحي ابنته في سبيل
الفلوس؟؟؟
احمد :- بس انتِ مو بنته نقطة
غمزلي بطرف عينه يضحك
روليت :- شفت هواية ناس حقراء
بس مثلك ما شفت
شتردون مني انتَ وامك المخبلة؟؟
أحمد -: حسب كلام أمي نسويج
مخبلة وندزج لحبيبج
درت وجهي عنه مشمأزة تقدم
وصار يمي ثنى كدامي لزم فكي خلا
وجهه بوجهي هامس بخفوت
أحمد :- الله جابج ألي راح اخليج
تتخبلين بليلة وحده
تفلت بوجهه غمض عيونه ترك فكي
شايل ايدي حاولت املصها ما كدرت مسح
وجهه غمضت عيوني صاكه على اسناني بقوة
أحمد :- شنو شعورج و انتِ سبب موت
شخص عشتي سنين وياه وربيتي على ايده
؟؟
روليت -: شنو شعورك وانتَ تتحرش
بأنسانه اعتبرتك أخ بيوم من الأيام؟؟؟
أحمد :- يجنن ولو تجي الفرصة اكررها
مرة ثانية
روليت -: نـذل مو بيـدك
ضربني على شفتي شهكت بعدني ما
اخذت نفس رجع ضربني أنيت بألم
رجع يريد يضربني بس توقف من
سمع صوت أنتصار وراه تحجي بحزم
:- أحمد كافي ماما
نزل ايده وكام عني اتنفست بصعوبة
بسقت الدم من ثغري
احمد :- خليني اربيها هل سا***
خلت روسنه بالكاع بسببها مات ابوي
انتصار -: شوي شوي نربيها من يومي اكرهه
وما اطيقها بس جان ابوك الـ مصبرني بس هسه
راح وهيه السبب راح يكون عذابها عذاب
روليت :- من يوم يومج حقيرة وحقودة
تعرفين كُلش زين زوجج مات لأن هذا يومه
الله كاتبله يموت
أنتصار -: يا حيف الخبز والملح ما غزر
بيج شكد وحدة صلفة ادب سزز سنين تاكلين
و عايشة احسن عيشة
تالي تشردين من البيت وترحين
تعيشين وي شخص حتى ما نعرفه بدون
لا زواج ولا قرابة شهل جرائة هايه؟؟
روليت -: شعليج بابا اذا تكرهيني
خليني اروح ترة عقاب مستحيل يخليكم
تعيشون براحة اذا عرف انه عدكم
خلوني اطلع مناااا
انتصار :- ههههه
ضحكت بسخرية غمضت عيوني بينما
انفاسي تتصاعد
روليت :- ما جنتو عائلة حقيقية الي
طول عمري حسيت بنقص من ناحيتكم
اكرهكم تسمعوني لو لا
اكرهج انتِ وهذا الخنثة الواكف
يمج
رجع عليه دفرني على بطني فتحت عيوني
على وسعهن كمش شعري صارخ بوجهي
أحمد :- هسه اشوفج منو الخنثة
طايـحة الحض
صار يضربني من كل جهه بوجهي وجسمي
وانه بس اصـرخ إلى أن تعب ووخر عني
شهكت لازمه بطني من الوجع
أنتصار :- طول عمرج تحبين الضرب
والأهانه
بسق عليه أحمد غمضت عيوني نازله دمعتي
طلع وطلعت وراه انتصار لميت جسمي
بألم ابچي
وينك عقاب تعال بسرعة حباب
بعد ماكدر اصبر
مر يوم كامل محد رجع عليه لثاني يوم
دخلت انتصار بيدها صينية الأكل خلتها كدامي
لابسه أسود عيونها تنكط شرار
انتصار :- اكلي ماريدج تموتين
روليت -: ليش دا تسوين بيه هيج
ليش تعذبيني؟؟
انتصار :- كــرهتج من أول ما هارون
خلاج عدنه غصب
تنهدت
روليت :- مو عذر هذا
انتصار -: سبحان من زرع بذرة الكره
بداخلي تجاهج هذا جوابي
ضحكت بسخرية
روليت :- ليش انتِ تعرفين الله؟؟
انتصار -: أكلي وراج تعب هوايه
روليت :- مشترين بيت جديد؟؟
انتصار :- من بعد ما طلعتي من البيت
صارت هواي شغلات
تكدست حالتنا من سيئ إلى اسوأ
نهارت سمعت ابو أحمد خسرنه كل فلوسنه
من وره موته بعنه بيتنه وشترينا
هذا البيت
روليت :- عجيب كل هذا صار وياكم
وبعدكم حقودين ما حسيتو هاي اشارة من
رب العالمين حتى شويه تلين قلوبكم؟؟
أنتصار :- خلي اسولفلج قصة من زمن
انتِ بعدج ما جايه بي
اردفت بينما شالت الكرسي خلته كدامي
كعدت تباوع عليه وتحجـي
:- بسنة 1999 جنت بنيه شابه جميلة
من أهـالي بغـداد لأب مـعروف بـكل بغداد
عنده خير من الله
ما جنت أهتم من وين تجي هاي الفلوس
عندي اهم شي فلوس اكل واشتري الـ يعجبني
بينما جانت عوائل تتعارك على كشرة البرتقالة
اتـذكر جنت اكل البرتقالة واشمرها بالشارع
يجي الطفل ياخذها وياكل الكشر
هذا حال العراق بزمن صدام والحروب بهذاك
الوقت
المهم جان اكو جيران قريبين منه بيتهم
يصير مقابيل بيتنه بس واضح عليهم
الفقر
جـان بيتهم مساحته واسعه يسكن بي
ثنين أخوان مجمعين عائلاتهم تحت سقف
واحد جنت احب اروح عدهم
لأن جوهم حلو بي حياة رغم الحرب
احنا بيتنا بس انه بي ما عندي خوات بس واحد
ومات بالحرب الأيرانية العراقية
الأخ الأول جان عده بنات تلاثة وولد
ثنين
الأخ الثاني جان عنده ولد واحد
وزوجته بس ذوله
الولد جان چبير يدرس هندسه يعني
مهندس
حبيته
تعلقت بي صرت اروح يومية الصبح
و العصر لهذا البيت بس حتى أشوف
الشاب صاحب الملامح الوسيمة
والعيون السود اسمر الوجه
جنت هايمة بكل تفاصيلة حفضته حفض
ولأن جان عنده ثلاث بنات عم جنت اغار
علي الچبيرة اسمها مروة حلوة
تشبهج تماماً
صارت صديقتي وطبعاً هل شي ضمن
مخططي ما جنت احبها بس ردت اصير
قريبه منها حتى اشوف
عماد الدين
ابن عم مروة صرت اشوفه كل يوم
اسلم علي واحجي وياه اسلوبه كلشش
حلو ما جنت اشوف نظراته تجاه أي وحده
من بنات عمه
وهذا الشي خلاني سعيدة واتخيل أحلام
وردية يوم عن يوم بدى الوضع
يتأزم جانو يعلنون بيها عن قدوم الأميركان
وشن هجوم على العراق
الجو جان كئيب ومخيف بنفس الوقت
بيوم وبعد مرور سنه كامله على
الأحداث وتعلقي بهذا الشخص قررت اعترفله
بحبي
ما يهمني الوضع الأحنه بي أهم شي
يصير من نصـيبي ونتزوج
ولأن مروة هيه الوحيـدة الحبتني
وصارت صديقتي قررت عن طريقها
انفذ خطتي
بيوم طلبت منها تجي للبيت النا اعزمها
على عشة طلبت منها تجيب وياها
عماد الدين حتى لا تتوتر او تخاف عادي
اول شي رفضت بس بعد الحاح وافقت
تحضرت ولبست احلى لبس صار وقت
العشة أهلي جانو منتظرين على العشة وياي
رغم واضح على وجوهم ما موافقين
بس انه عندي اخر همي أهلي
اجو ودخل أول مرة عماد الدين
لبيتي جانت الفرحة ما سايعتني تعشو
هوه ومروة حرفياً بوقتها كلو كلشي محطوط
على السفرة
خلصو وصار وقت يرجعون لبيتهم طلعت وياهم
بحديقة بيتنا وكفت
:- مروة ممكن احجي وي عماد الدين
على انفراد شوية؟؟
عكدت حاجبها باستغراب تباوع عليه
وترجع تباوع على عماد الدين بس
اخر شي هزت راسها وراحت وكفت بالباب
أنتصار :- عماد الدين انتَ تعرفني من سنه
مو؟؟
:- يي نعم
أنتصار -: ولا فد يوم سويت شي مو زين
بس اليوم ممكن تزعل او تستغرب ماعرف
واكف رافع حاجبه منتظرني اكمل
:- عماد انه أحبك من سنة من اول
لحظة شفتك بيها لا تستغرب اسمعني والله
انه أحب...
قاطعني بعصبية
:- اششش شكاعد تحجين انتِ معتبرج
مثل أخـتي شنو هذا كلامج
بعدين مروة تصير صديقتج
:- مروة شعليها بالموضوع بشنو راح
تتأذى اذا عرفت؟؟؟
:- لأن انه احب بـت عمي مروة و مستحيل
احب غيرها اصلاً عمي يعرف وكتله
بالموضوع قبل اشهر بس منتضرين تهدأ
الأمور ونتزوج
اسف ما حبيت ازعلج او اكسر كلبج
بس الحقيقة لازم تنكال انتِ تقربتي من مروة
حتى تستغلينها مو صح؟؟؟
بقيت مصدومة بمكاني حرفياً حسيت
نار وتطلع من وجهي تمنيت لو يموتون
ثنينهم بلحضتها
بس بعدين تمنيت لو بس مروة تموت
وبهاي اللحظة اثناء ما كل شخص
غارك بتفكيرة
سقط صاروخ على بيت عماد ومروة
انفجر البيت وحترك كلشي بي
الأخوان ثنينهم
كل عائلتهم احـتركت بهل لحضة
ماعرف شنو شعوري اضحك؟
وانه اشوف مروة تصرخ وتبچي بنص
الشارع وبنفس الوقت زعلت على عماد وأهله
بالحقيقة اهله مو مهمين عندي
اهم شي جان عندي هوه تمنيت بهيج
الليلة مروة ما قابله بالعزيمة جان عزمت
فقط عماد الدين واخر شي يموتون كلهم ويبقى
عماد
بس للأسف بقت مروة عايشة من ورة
الأربعينية سمعت عماد الدين متزوج
مروة لأن بوقتها الناس كامت تحجي شلون
ابن عمها وتنام بنفس البيت سويه وهوه محرم
عليها؟؟
المهم تزوجو وكبر حقدي عليهم بقيت علاقتي
وي مروة بس حتى انتقم ولو شوية انتضرت
وانتضرت سنين
إلى أن اجتي السنة هاي السنة محد ينساها
من العراقيين سقوط صدام حسين
بالسقوط سمعت مروة حامل
طبعاً همه رممو البيت ما قبلو يتركونه
ما كـدرت ابقى ساكته كبر حـقدي وطمعي
الها
وبيوم رحت للبيت جانت بشهرها بطنها چبيرة
صرت أتخيل لو ما مروة هسه انه حامل
بدالها وزوجي عماد الدين واسعد انسانه بالدنيا
بـ سنه 2003/9/2
جانت ليلة هادئه جوهه جميل راقبت عماد
الدين حتى طلع من البيت لأن جان يكرهني
مبين من عيونه ما يقبل اجي لـ مروة
راقبته حتى ابتعد لبست وطلعت دكيت
الباب طلعتلي مروة استغربت وجودي
بس دخلتني واتذكر توه جاييني خطابه
الي هوه ابو أحمد بديت احجيلها
عنه وعن أمواله وهيه مجاوبه وياي سوتنه
چاي نشرب ونسولف
كلبي انعمى بالحقد ما جنت افكر بشي
غير اشوف مـروة تتألم مثل ما تألمت
خلصت سوالفنا سألتها
:- اكلج مروة اريد اغسل وينه حمامكم؟؟
-: برة تعاي اوصلج
كمنا دلتني الحمام دخلت اباوع شفت
دبة الزاهي والتايت متروكات على جنب
كضيت شمرت الزاهي بالكاع والتايت فوكه
طلعت بعد دقائق اغسل اديه واحجي
:- مروة حمامكم كُلش وصخ نضفي
وياج ترة عماد الدين يحب النضافة
باوعت عليه عاكدة حاجبها ردت
بانزعاج
مروة :- الصبح غسلة عماد الدين
انتصار -: يا دادا اكولج وصخ حتى ريحته
مو حلوة المهم انه كتلج يله الله وياج
مروة :- هسه اغسله
الله وياج تصبحين على خير
وصلتني للباب باوعت عليها مبتسمه
:- فوتي جوه لا تطلعين ما بيج
تمشين
مشيت كم خطوه سمعت صوت سدت الباب
باوعت ورجعت امشي قليللل خليت اذاني
على الباب دقائق بقيت واكفه
إلى أن سمعت صوت صرخة مروة ابتسمت
ورجعت على بيتي بكل برود
روليت :- شلون كدرتي تسوين هيج
شنو من قلب شايلة
:- بعدج ما سامعه شي المهم نكمل
ثاني يوم سمعنا مروة جابت بنية
رحت على المستشفى وراها قبل لا تحجي
شي لـ عماد الدين او أي أحد لازم اسكتها
شفت بتها جانت سمرة تشبها عدها عيون
صفر سموها
بلعت ريكِ بينما دموعي تنساب على خدي
قلبي انقبض بقيت جامدة بمكاني
من سمعت الأسم
:- سماها ابوها ديـار
ماعرف ليش هذا الأسم بالتحديد بس
حلو
دخلت على غرفتها نايمة مثل الملاك
فتحت عيونها شافتني اجتي تصرخ
بس ما كدرت
مروة :- راح تندمين على فعلتج
شلون هيج سويتي بيه نسيتي انه صديقتج
انتصار -: بعمري ما اعتبرتج صديقتي
استغليتج بس حتى اشوف عماد الدين حبيته
بنيت احلامـي وياه
بس انتِ خربتي كلشي اذا تحجين شي
حياة بنتج بخطر افتهمتي؟؟
مـروة -: مريضة نفسية انتِ مخبلة
اذا ما حجيت لـ عماد عليج اخليج بالسجن
انتِ قاتله
ابتسـمت بشر بذيج اللحظة يمكن تسرعت
شوية بس الشيطان لعب بعقلي
هزيت راسي بجنون ابچييي أشهك
تحركت اريد اوصل يمها ماكدرت السنسله
قصيرة اهز براسي واحجي بسرعة
روليت :- لااااا تحجييين لاااا
أنتصار -: خليت المخدة فوك وجهه
ضغطت عليها ضغطت كل قوتي دفرتني برجليها
دافعت عن نفسها بس ما كدرت
بنـهاية استسلمت وكعت اديها وسكن
جسمها صعدت روحهـا للسما وخرت المخدة
رتبت كلشي مثل ما جان
قطعت عنها الأوكسجين حتى محد يشك
طلعت من المستشفى مبتسمه
روليت :- شيطااانة شيطاااانةةةة
انتصار -: بعدهي القصة ما خلصت
بعد ما دفنها عماد الدين رجع للبيت خالي
الوفاض بيده طفله عمرها يومين بس
صرت اتردد على بيته حتى اساعدة
بتغسيل وتنضيف هاي الطفلة جان عندي أمل
يباوعلي او حتى يفكر يتزوجني حتى اهتم
ابنته
بس هوه سوه العكس قـرر يكرس حياته
حتى يربي الطفلة اشترالها حليب
وصار يعلمها عليه
بس تبقى الأم محد يعوض مُـكانها
كبرت البنيه ومرت السنين صار عمرها
4 سنوات
وهيه بعدهي تشرب الممه وتلبس الحفاضة
جان لازم يتزوج تعرف عماد الدين على
وحـده وياه بالشغل دمـرت حياته
صح تركته ونخطبت بس بعدني اسمع
اخبارة اخر شي تزوج وترك البيت راح
عاش عد بيت زوجته
ناس تكول ترك بنته بالشارع وراح
ناس تكول سوتله سحر خلته يكره بنته
المشكلة هيه طبيبة أسنان
دنكت جسمي يرجف رجف دموعي خلصن
بعد ماكو دموع
:- نهاية القصة
روليت :- مروة أمي الحقيقية
وعماد الدين أبوي الحقيقي
-: كل ما اشوفج اتذكرها ربيتج
ابيتي حتى اتذكر امج وعماد وشنو سويت
ما ندمانه ابد بس ندمت على شي واحد
ما قتلتج وي أمج
روليت :- مريضه والله مريضة
اصلاً راح اخليج تندمين لأن تركتيني
عايشةةةة
-: هوه منو راح يخليج صاحية ؟
راح اخبلج لـدرجة تنسين حتى أسمج !
روليت :- مستحيل تكونين أنسانه طبيعية
كل هذا الحقد شلون عايشة انتِ؟؟؟
النسوان الـ بعمرج خاتمه القرأن مية
مرة بس ما ألومج الشيطان يكرة القرأن
:- كوليلي هسه ليش احمد تخبل
من عرف بسالفة زواجج من هذا باهر؟؟
ابتسمت بخفوت بينما عيوني تنكط شرار
:- هـذا هـم شيطان مثل أمه دنت نفسه
على المفروض أخته وتحرش بيها
-: ها مـو مشكلة شي عادي هذا انتِ بنيه
غريبه علي وهوه ولد عايشين بنفس البيت
عادي حتى لو كررها مرة ثانية
❢ ═──── · · • • • ❂ • • • · · ────═༻❢
يتبــــــــــــع
للقصة أسرار ✨
حبايبي طبعاً بيبيتي ام ابويه عمرها 102
كولو ما شاء الله توفت قبل اسبوع
هيه بعيدة عنه يعني احنا عايشين بمنطقه
وهيه عايشة بمنطقة هل فترة المرت ما كتبت
لأن رحت للفاتحه وصراحة انه ما احب الفواتح
رجعت بعد يومين من خلصت الفاتحة
شوية صعب اللزم المبايل واكتب هيه صح
جبيرة بالعمر وما جانت قريبه مني بس تبقى
جدتي
المهم
شنو رأيكم بالبارت ؟
اليوم البارت كشف النا بعض من الأسرار
الحزينة صراحة
تتوقعون ليش هيج سوت انتصار هل فعلاً
الحب هيج يسوي ويدمر عوائل؟؟
مع ألف سلامة
ميان أل مالكي