و انا قاعدة نخمم حتى جات عندي ليندة
ليندة : نهال ارواحي معايا باه تبدلي
رحت معاها كانو حاطين شغل خيمة باه نبدلو فيها و كانت تماك ماكيوز ماكياتلنا سامبل و دارتلي شعري اوندولي كي كملت سيرين و مرام كانو كملو قبلي و خرجنا كامل كيف كيف مع لي خرجت طاحت عيني ف عين ايهاب
كنت هكا 👇
نسرعو شويا احداث
كملنا التصوير و ايهاب قعد يتبع فيا فكل بوزيسيون نديرها و زيد عينين جان لي ما نحاهمش عليا الصح الصح ملول كنت خايفة و نرعش مي كي شفت ايهاب تبسملي ديك التبسيمة لي تقتل درت كونفيونس في روحي ( وريتلكم لبسة وحدة اللبسة الدوزيام ما عرفتش واش ندير اتخايلوها نتوم و صايي ) ااي و تان تعرفت على مرام و سيرين مرام بزاف جونتي و جات تخدم هنا بيسك محتمة عليها و حالتها تشبه لحالتي اما سيرين جاية هنا على جال ايهاب ملي بدينا التصوير و هي تحكيلنا عليه قلقتني الصراحة
&&&&&&&&&&&&&&
عند ايهاب #
نضت صباح درت الروتين ديالي و رحت ديراكسيو للشركة مع اكرم وصلنا لقيت ليكيب واجد و كامل هنا من غير نهال ستنيناها حتى جات و رحنا للبلاصة مورانا بشوية وصل جان و حط عينو على نهال انا تقلقت بزاف و ما عجنيش الحال ماحملتش انو راجل من غيري يغزر فيها سورتو كي لبست ديك لاروب جاتها تقتل و جان قعد غير يشكر فيا
جان : الصراحة ميسيو ايهاب اما العارضة الثالثة عجبتني بزاف و زيد عندها كونفيونس فروحها و زينها ما نهدروش عليه كي نكملو نسقسيها ايدا تحب تخرج معايا
انا : ميسيو جان رانا فالخدمة و راك شريكي مذابيك ما حطش عينيك على الخدامين دياولي
جان : مي نهال داتلي عقلي
انا : خلاص خليني نكملو التصوير و نرحو
راسي كان يقولي روح طيح عليه بالضرب مي حكمت روحي على جال الشراكة لي راني دايرها معاه لي راح تجيبلي ارباح بزاف و قلت مع روحي كي نكملو نوصي نهال عليه
&&&&&&&&&&
عند ريان #
خرجت صباح جوايه 11 مالدار قلت نروح نفطر برا رحت لواحد الريستو قدام البحر جا السارفور دومونديت واش حبيت كي كملت رفدت ساكي باه نخرج مع النوض من الكرسي و ندور نخبط في حيط 😂 اا قصدي واحد البنادم طويل طلعت راسي نشوف شكون و تماك كانت الصدمة
انا : رامي 🙄
رامي : ريان 😐
انا : سمحلي خويا رامي مي ما شفتكش
رامي ما عجبوش الحال كي قالتلو خويا مي ما بينش : لا عادي ما فيها والو و زيد صافي بليزير كي تلاقيتك هنا عندنا شحال ماتلاقيناش
انا : وي راني مع القراية
رامي : ارواحي نقعدو
انا : لالا والله هداوين فطرت ميرسي
رامي : تروحي للدار
انا : وي
رامي : نوصلك
انا : نو هداوين عيطت للشيفور يجي يوصلني
رامي : معليه همال تهلاي في روحك و خطرة اخرى نشاله
انا : ان شاء الله خويا رامي😁
ورحت ما زادش بزاف وجا الشيفور وصلني للدار طلعت للبيت و انا نخمم في رامي و كي تلاقيتو شحال زاد زيان من بعد فقت مع روحي طردت كامل الافكار و نضت توضيت صليت الضهر و رقدت
&&&&&&&&&&&
عند رامي #
خدمت حتى ل 12 رفدت مفتاحي و رحت لريستو لي موالف نفطر فيه كملت مع جيت خارج تخبط فيا وحد القزمة غير طلعت راسها جات عيني فعينها بقيت نشوف فيها حتى نطقت
ريان : رامي
( والباقي راكو تعرفوه )
كي قالتلي خويا نرفزتني هاذ الكلمة كنت راح نقوللها انا ماشي خوك مي خليتها في هواها بفف الفرخة واش دارت فيا غير شفتها قلبي خبط 100 فالثانية و مافهمتش واش صرالي
&&&&&&&&&&&
عند نهال #
كملنا التصوير ركبنا فالطرونسبور وصلتنا حتى للشركة رحت للبيرو ديالي حتى يدخل عليا ايهاب
انا : ما عندكمش باب في داركم
ايهاب : عندي هدرة معاك
انا : واش تانيك
ايهاب : مكلاه دوري جيهة جان
انا : علاه شكون نتا باه تقولي باه ندور و باه ما ندورش
ايهاب : جان حط عينو عليك و هو بنادم ماشي سيريو يدي واش يحب منك و يخليك
انا : و علاه راك تشوف فيا رخيسة باه نخليه يدنا ليا
ايهاب : على هاذي راني نوصي فيك
انا : ما نسحقكش توصيني نعرف صلاحي ماشي نتا توريهولي
ايهاب : مام انا ماجيتش نوريلك صلاحك مي مانك وصاتني عليك و قالتلي احميها على هاذيك جيت نقولك سينو ديري واش تحبي انا معلاباليش بيك
كي قالي بلي ماني قالتلو تقلقت الغاز طلعلي للراس علاه راهي تشوف فيا دراري باه توصي الناس عليا وليت رفدت صاكي و خرجت مخلياتو فالبيرو حكمت طاكسي و ديراكسيو للدار غير وصلت طلعت للبيت لقيت هيبة و يسرى يتفرجو بدلت حوايجي و حبطت للكوزينة لقيت شهرة توجد لفطور عاونتها و جدنا الطابلة و تعشينا كامل كيف كيف و كل وحد شد بيتو و رقد
&&&&&&&&&&&
عند ايهاب #
وصيتها باه ما دورش ب جان و كي قالتلي بلي ما راحش تخليه يدنى ليها فرحت و عرفتها واش تسوى مي كي قاتلي شكون نتا باه توصيني جبدتلها حكاية مانها يعني كسبة برك لأنو انا ما حملتش نشوف واحد حاط عينو عليها رانا حابها تكون ليا برك خرجت و خلاتني وليت رحت للبيرو رفدت مفتاح الطونوبيل و ديراكسيو للدار لحق وقت الفطور عيطتلي الخدامة فطرت و طلعت رقدت
&&&&&&&&&&
عند شهرة #
مور ما فطرنا طلعت لبيتي حكيت شويا مع اكرم بالتيليفون يعني ما نكدبش بيسك تعلقت بيه و هو انسان بزاف جونتي نقدر نقول حبيتو 😁 ( اعتراف غير مباشر 😂)
&&&&&&&&&&&&
بعد مرور اسبوع #
بون يعني ما صرا والو فهاد السمانة لي فاتت بالنسبة ل ايهاب كان يروح للشركة و يضل يعس نهال لوكان يصيب يبقا يتفرج فيها و ما يكره و زيد عجبوه تصرفاتها و شافها طفلة عاقلة ماشي كيما لي عرفهم
بالنسبة لنهال #
كانت تروح للشركة و كانت تدير البوسيبل باه ما تتلاقاش مع ايهاب من ديك الضربة و هي زعفانة منو هو كان قصدو ينبهها و هي حست بلي راه يمعنيلها بلي هي رخسية على هاديك جبدت روحها عليه و خلات المسافة بينها و بينو مقربتهم برك الخدمة سيتوو
بالنسبة لشهرة #
حبها كل يوم يزيد ل اكرم و ولات تخرج معاه و تحكي معاه كل يوم فالتيليفون
بالنسبة لأكرم #
حتى هو يحب شهرة مي مزال ما عترفلهاش راه يستنى الوقت و يروح يخطبها بيسك نواها حلالو
بالنسبة لرامي و ريان #
من الضربة تاع الريستو ما زادوش تلاقاو و ريان راهي مع القراية و رامي مع الخدمة
بالنسبة ليسرى و هيبة &
هيبة نسات فارس و راحت تقرا عادي و نحات حكايتو كامل من بالها و عاودت ولات لحياتها نورمال و سمعت هدرة نهال و يسرى المغبونة من ليسي لدار 😂
________
ليوم نهار الحنة تاع امير ( ياك قلتلكم المرة لي فاتت بلي قرب عرسو )
عند نهال #
صباح ربي و حنا راقدين تدخل علينا خالتي تعيط
خالتي : نوضو ايا نوضو
حنا ولا وحدة سامعة بيها ( كنا راقدين كامل فالبيت انا و خياتي فرشنا فاللرض و شهرة فوق البونك )
خالتي : يا تنوضو يا نجي ليكم بالوحدة
انا فطنت و درت روحي مزالني راقدة حتى نشوف خالتي خرجت و ولات جابت قرعة ماء فيدها
انا : خالتي انا خاطيني هاني نضت شوفي معاهم
راحت خالتي جيهة شهرة و فتحت القرعة و سيحتها فوقها و ناضت شهرة تعيط
شهرة : بقبقبق يا ماما فياضانات راني نغرق سلكوني راني نغرق و بقات تفرفط فالفراش حتى تجيبها فاللرض فوق هيبة 😂
هيبة : اااااا ظهري تقسم طاح فوقي جمل 😂 يا الكلبة يالحمارة يالزايلة نوضي من فوقي
من هاذاك العياط ناضت يسرى مخلوعة مسكينة
يسرى : اه واش كاين واش هاذ العياط
انا و خالتي ميتين بالضحك على حالتهم كيفاه كانو 😂
مور بوحد 10 دقايق نضنا كامل من بلايصنا رفدنا الفراش و هيبة قعدت تمشي بالعصى من ظهرها 😂 هه توخضت دوك تجوز العرس و هي تمشي بعصى ماني متنا عليها بالضحك
__________________________
بون هنا خلاص البارت و البارح حطيتلكم زوج ديراكت مي التفاعل راه ضعيف بزاف كاينة
OliviaJons0 و NinaOumsajid و Y26198 و BeldjoudiYasmine و Soro46
كين هاذو نشكرهم بزاف بيسك عجبتهم روايتي و راهم يدعمو فيا و علاجالهم راني نكمل فيها 🥰😘 و اذا كاش وحدة نسيتها نقوللها ديزولي