الاطلس "دمليج أسود"

Part 15

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

عبالكم ردت اغلس على البرتوت؟ 🥹🫣♥️

• ━━━━━━❪♣❫━━━━━━ •

"رقية"
طردونه من الغرفة بقت بس سارة وياهم واني واسيل كاعدات بصالة الفندق انگ براسهه اريد افهد سالفتهه وليش راحت لنهاية النهر تسبح..

-اسيل: مادري شصار بيه

-رقية: يعني چنتي حاسة على روحج؟

-اسيل: اي

-لعد ليش هيج سويتي

-مادري والله اني غبية اصلاً ليش خليتيني اسبح غير تلزميني وتطيحين حظي

-هو اني لحكت رحتي زبگتي كدامي شايفة روحج فقمة

-غبرة اني

-توچ دريتي

-موبايلج يدك جاوبي صرعنه

باوعت للشاشة "غدير" الله يستر شتريد متصلة مو البارحة دكت على سارة، كمت ابتعد خفت ترزلني كدام اسيل واتفشل، فتحت الخط..

-الو

-غدير: هلو صرصور شلونكم

-زينين انتو شلونكم

-غدير: الكل بخير، ها بشري

-على شنو ابشر؟

-شصار ويه سارة؟

-رقية: بعدهه بصالة الولادة

-غدير: رقية!!!

-اي شبيچ شنو بشري وشنو شصار ويه سارة شكو شصار وياهه يعني

-غدير: اقصد شصار بينهه وبين حمزة!

-هاي بعدج على هالسالفة

-غدير: رقية والله اجي اندمچ على فهاوتچ

-غدير عوفيني حبابه اني معليه ماتدخل شبيچ وياي

-خوش يله ولي اخابر مسلم احجيله على حبچ

-لا لا لااا شبيچ غدير شبيجج

-لعد تسوين الاكوله الج رقية أي تهاون او تقصير افضحج واخزيج وتعرفيني زين

-شسوي يعني ماعرف غدير حبابة شسوي

-تصرفي

طبكت الخط بوجهي ووكفت حايرة شلون ويه هاي الاخت راح تدمرنه بتصرفاتهه، رجعت لأسيل الشاردة وكلتلهه راح اروح اشوف سارة وين كامت تريد تجي ويايه كلت مستعجلة..

-رقية: لا راح ارجع بس اروح اشوفهه واجي

كملت طريقي لغرفتنه الي بالطابق الثالث، امشي واكول "يارب سترك" فتحت باب الغرفة فارغة بس سارة وصوت الشهكات تشك الكلب..

-سارة شبيچ

-سارة: ماكو شي رقية عوفيني وحدي حبابة

همستهه بصوت مسموع ومغطية راسهه باللحاف، ردت اوخر الغطا عن وجهها ماقبلت تركتهه وكلت هاي فرصتي وشكد كرهت نفسي وره تصرفي..

نزلت بسرعة لغرفة حمزة دكيت الباب عليه فتحلي حازم الي يشتغل وياهم..

-رقية: حمزة بالغرفة؟

-حازم: نعم، حمزة يردوك

طلع من الحمام ينشف بشعره يقطر مي، تقدم عليه وتسائل من وجودي..

-حمزة: ها رقاوي صاير شي؟

-اي سارة منهارة تبجي ومتقبل احد يتقرب منهه

زفر نفس عالي وفرك وجهه حسيته يعرف سبب بكائهه، شمر المنشفة من ايده على الفراش وطلع يايه وشعره مهووس..

-حمزة: لا تحجين لاحد رقية امنتچ امانة

-وقية: قصدك ماحجي ان سارة تبجي؟

-اي اذا تردين بس لاطلس غير احد ممنوع

استغربت بس هزيت راسي وتركته انزل جوه شفت مسلم كاعد ويه اسيل يحجي وياهه وهي بس ساكتة ومنزلة راسهه....

**
"سارة"
شلون اشرح حالي؟ بيا وجه احط عيني بعين اخوية ماكدر انسى شي احس نظراتهم مليانة شفقة وتعاطف، ربي اني ليش عايشة لسه اخذ روحي خليني ارتاح من هذا الغم..

باقية وحدي منهارة بعدما طلعو من غرفتي، الغرفة فارغة بس اني نايمة بالفراش حطيت المخدة على وجهي وصرخت من عمق روحي اتذكر كلشي ابجي وافرفح..

اجولي اشعارات متتالية على موبايلي ماهتميت دگ وراهه هم ماهتميت دگ مرة ثانية قلقت كمت اشوف منو وشفت المتصل "غدير".. لزمت گلبي خايفة اجاوب تركته لحدما خلصت الدگة وشفتهه دازتلي رسائل كاتبة..

"الچ يومين سارة"

"جربي تلعبين وياي والله ما ارحمج"

"يومين واريد حمزة وياچ فهمتي لو لا"

"اذا غلستي لو تهربتي اسوي الكتلج عليه وخلي نشوف المن يصدكون اني لو انتِ"

ذبيت الموبايل وادك برجلي على الچرباية راح اموت من القهر ربيي بس خلصني ماتحمل بعد تعبت اتلكاهه من وضعي لو من غدير الي تريدني اتزوج واحبب زوجهه بيه!!

هدأت من حسيت بالباب تنفتح غطيت راسي وتمددت مطلعه بس قرص وجهي واشاهك، كفخني هوا حار انفاس حمزة تضرب خدودي..

كاعد على ركباته مقابيلي وشايل الغطا عن وجهي ويهمس..

-حمزة: حاچيني

-سارة: ماريد

-حمزة: سارة اني وياچ لا تخافين من شي

اسمع صوته والحنية التارسته وانفجرت صرت ابجي بصوت عالي كلش اتذكر الصار واتذكر غدير واهز براسي "لا"..

-ماريد احد ماااريدد

-حمزة: دخيلج كافي لا تحرگيني بدموعج سارة ماكدر

لازم ايدي المغلفة بالشرشف حيل وعاصرهه بين ايده، قربهه لشفايف باسهه وكال..

-كومي وياي خلينه نسولف ويه بعض نفس قبل

-تعبانة ماكدر

-اني اسولف انتِ بس سمعيلي

-اخاف

-مو كتلج اني وياچ خلي ابن امه وابوه يتدنالج

-متعوفني وحدي؟

-اعوف روحي وماعوفج سارة

نهضت نفسي مسحت عيوني وجريت ركباتي لصدري، كعد بجانبي على السرير مبتسم ويباوعلي..

-حمزة: تصخم وجهج

-سارة: شنو

ضحك وطلع موبايله فتح الكامرا الامامية وحطهه كدامي، اباوع لوجهي صاير خريطة المسكارة سايحة وقلم حاجبي رايح مبينات حواجبي الحمر فوراً غطيت وجهي بأيدي وانطيته ظهري..

-هههههه خلي يطلعن شحلاتهن

-لا لا وخر

-وروح امي احلى من الصبغ

-حمزة روح وتعال بعد شوية

-هاي شنو

-بس اعدل نفسي وارجع حباب لا تفشلني

-ما افشلچ راح اطلع ومارجع بعد اخذي راحتج

-لا ليش بس اغسل وجهي شبيك مو كلت نسولف

-اي بس جاي تطرديني هسة

-خلص ما اسوي شي راح ابقى بهاي الچهرة التخزي

-حلوة

-جذاب تجذب عليه دائماً

-حلوة بكل حالاتج كناري

ضحكت ومسحت خشمي باوعتله شعره مبلل وملابسه مال بيت مو نفس اناقته الدائمة وترتيبه..

-شعجب ما مبدل؟

-رحت لغرفتي سبحت واريد انام بس قبلهه كلت اجي اشوفج

-صرصور صاحتك مو

-لا

-اي هواي صدكتك

-خطية خايفة عليج

هزيت راسي ولزمت ايديه اسيطر على رجفتهن ابلع بريگي والافكار تعصف عقلي شلون اتقرب منه ماعرف هو اكيد راح يتهرب مني ويشرد اني اخت مرته! انتبه على وضعي وذب حسرة..

-حمزة: اي شكو ماكو

-ماكو تعبت من هالسفرة شوكت نرجع

-ما بقى شي

-مليت اني ماحب السفرات وكل مرة تسحسلوني كله من وره غدير

عقچ وجهه من ذكرتهه ودار وجهه داركة علاقتهم كلش توترت بالفترة الاخيرة واعرف هو ما راد يطلك وهي صاحت كدام الكل ماريد حمزة وما اريد ابقى وياه.. فشلته كدامنه وكدام ابوه واضطر يطلكهه..

-حمزة انسى خلص ماجيب طاريهه بس احسك بعدك تحبهه

-خلينه نغير الموضوع

-اي

سكتت وسرحت بالفضاء شنو اكول ما اجو لغيري اني الفاهية كلشي ماعرف اسوي واستحي من خيالي..

-سارة: احم شلونك

-زين

-زين زين لو زين زين؟

ضحك وتچه روحه على عكسه ثبته على المخدة مد رجليه وكال مداهرني..

-زين

-حمزاوي صدك اكو شي دائماً ببالي واستحي اسألك

-اي؟

-انتَ هم حبيت بحياتك؟

عكد حاجبه مستفهم بلعت ريك متوترة وخايفة وعدلت على سؤالي..

-اقصد قبل لا تتزوج انتَ تزوجت عمرك 27 سنة معقولة السنين الفاتت ما حبيت

ما جاوب بقى ساكت ويباوعلي كرهت نفسي على هالسؤال شنو جاي اسوي بروحي اني..

-سارة: احنه كلنه نعرف تزوجت غدير تقليدي خالة خطبتهه الك ونعرف غدير الي جانت تحبك بس انتَ بالجامعة او وراهه ما حبيت؟

-لا

-هاا شعجب

ميل زاوية فمه وسكت وخر عيونه عني وصار يلعب بالمفتاح البيده، صار هدوء راسي كام يوجعني من التفكير كمت اروح اغسل وجهي ونظفته من التصخم ورجعت هو على گعدته ماتحرك..

-حمزة: ما دخلت بعلاقة قبل لان جنت ملتهي بدراستي

حچاهه بهدوء ولسه منزل راسه ميحط عينه بعيني..

-سارة: وبعد دراستك؟

-كملت ماجستير واللتهيت بالشغل

-انتَ درست بفرنسا معقولة ماعجبتك فرنسية مناك هههه

رفع راسه يباوعلي وابتسم مجاملة هز راسه "لا" وكمل وعينه بعيني..

-حمزة: حبيت بس.. ما كملت وياي

-منو حبيت؟

-وحدة ماكدرت اتزوجهه

-يا ليش

-حمزة: حظي نحس

-بعدك تحبهه؟

-حمزة: بعد تزوجت وراهه

-اي بس الحب الاولي يكولون مينسي

عينه بعيني ويحجي جبينه بده يتعرق ويبلع بريگه لاحظت توتره انقهرت يمكن ذكرته بيهه..

-حمزة: مو قسمتي

-حلوة جانت؟

-تخبل

-صدك؟ شلون اشرحلي

-ماكو لزوم

-وين تعرفت عليهه بفرنسا لو بالمغرب؟

-بالمغرب

-وهي تحبك؟

هز راسه "لا" وذب نفس دار عيونه عني ويمسح بجبينه..

-سارة: اتوقع تحبك انتَ هم تخبل

-هههه صدك

-والله ماحجي لان انت صديقي المقرب بس انت وسيم وانيق ومرتب كلش وشاطر وحنون ومحترم وهيبتك تسطر

-اني هيبتي تسطر

رفع راسه يباوعلي مبتسم، هزيت اي وكملت..

-اتوقع تحبك هي او اذا اعترفتلهه راح تحبك

-تتوقعين؟

-اي اتوقع

-اني ماتوقع

-ليش ختولي شنو متحبك اكيد تحبك معليك

-عوفيهه هسة

-شنو اسمهه؟

سكت وصوت انفاسه عالية جنت بس اريد اخلق وياه حديث ماعرفت شلون بس كل عقلي لازم هاليومين اقنعه بيه شلون ماعرف.. تقربت عليه اكثر وابتسمت بوجهه..

-شنو اسمهه؟

-نسيت

-نسيت اسمهه؟

-احم.. اي

دار وجهه عني وابتعد شوية انقهرت من تصرفي وكرهت نفسي وغدير وياي..

-سارة: اكيد مليت مني اسفة

-شنو هذا الحجي سارة ما امل منج اني

-ادري اني مملة وغبية

-اششش لا تحجين على روحج

-غدير دائماً تكول اني غثيثة ههههه ومحد يحبني

-كااافي عاد!!

نترهه نتر نزلت راسي عيوني مدمعة خجلانة، زفر نفس عالي وعدل گعدته غطاني باللحاف مبتسم ويكول..

-تغطي باردة لا تمرضين

-اني اسفة لان ضوجتك

-لا تتأسفين بس ماقبل تحجين على روحج انتِ ماكو مثلج ومثل گلبج الطيب سراوي

-صدك

-اي، من قبل چنتي صغيرة تجيني تركضين خايفة من غدير تكليلي حمذاوي حمذاوي اللحكني غدير الغولة راح تاتتلني (تاكلني)

-ههههههههههه صدك والله ماتذكر

-چنتي متعلقة بيه واول من طلعلي اسم حمزاوي انتِ، تكعدين بحضني واظفر شعرج واقصلچ قصص

-اني اتذكر چنت كلما ابجي اروحلك احضنك وانتَ تنيمني بفراشي وتلعب بشعري

-اوقات ابقى للصبح كاعد وياچ تخافين من الظلام جنتي وخالتي حصة ما ترضى تنامين ويه خواتج بالغرفة لازم كل وحدة الهه غرفة واني اتعمد ابات يمكم حتى ابقى وياچ خاطر ما تخافين

-لليوم اخاف من الظلام بس تعودت

-وين الضوة الجبته الج

ابتسمت واني اباوع بعيونه، جابلي ضوه صغيروني على شكل قمر حتى افتحه من انام..

-سارة: موجود اساساً ما انام بدونه

-جبتلج ضوة احلى بعد

-صدك شلون

-من نرجع اراويج

-حمزة هم تنقطع عنه بعد ما تطلگتو انتَ وغدير؟

ذب حسرة واللتزم الهدوء، حجيت على لاهيتي مثل قبل شلون چنت اشكيله ماتوقعته راح يضوج من كلامي..

-سارة: اتمنى متنسانه كلنه متعلقين بيك ونحبك موت

-واني احبكم

-بس احنه نحبك اكثر هاي صرصور محد يكدرلهه غيرك بخزرة تسكتهه ههههه

-وانتِ؟

-اني ميحتاج احجي انتَ صديقي واقرب من روحي بير اسراري والي يخاف عليه من الهوا الطاير

-ماعوفكم سراوي ليش تبجين

ماحسيت على روحي الا واني ابجي واشهك، عدلت گعدتي وامسح بعيوني واشاهك..

-انتَ.. انتَ.. انتَ احسن رجال بالدنيا

-يا گلبي

-ابد لا تعوفنه.. تـ.. ترا ترا نظل نبجي

-اروح فدوة لدموعج كناري لا تبجين وين رايح اني

-مو تطلگتو بعد متجي حتو متشوفهه اكيد

-بس اجي لخاطركم

-نفس قبل؟

-واكثر حتى ابات يمكم

-ههههه اي وتقرالنه قصص

هز براسه واني مسحت عيوني، تذكرت غدير من چانت ترزلني من احجي ويه حمزة هيج وتكول لا تصيرين طفلة وتتنعوصين عليه ضجت من نفسي رغم اني ما امثل اعني كل كلمة هاي شخصيتي ما اكدر اغيرهه..

-سارة: حمزة تشوفني طفلة؟

-روحج طفولية انتِ مو طفلة

-شكراً لوجودك بحياتي محد مصبرني غيرك وغير اطلس وحنيتكم عليه

ابتسم ومسح على اللحاف المتغطية بي شده عليه وكام يريد يطلع وصحتله..

-وين رايح

-نامي قبل لا يجن رقية واسيل ويخبصنچ

-لا تعال اكعد بعد وياي

-نامي ابوية ارتاحي

-اقرالي قصة وانام

حجيتهه گوة لعبت نفسي من ملحتي عليه بس شبيدي..

-حمزة: بس قصة واروح ماريد احد يحس اني هنا لا يسوولنه سالفة

-شنو السالفة يعني

ضحك واجه كعد يمي كفختي على راسي والغطه فوكايه وهمس..

-اشش سكتي

-شنو شنو كول حباب

-ولج سكتي يله نامي

-الا اعرف اريد اعرف

-سارة

حجاهه وخزرني غصت بالفراش خايفة شكله كله يتغير من يعصب يرعب، غطيت روحي بس عيوني طالعة ضحك وبده يقره القصة..

-سارة: حمزة انتَ حلو

-حمزة: شنو؟!

غطيت وجهي اوف شحجي شكول جاي اتحارش برجل اختي الله ياخذني واخلص..

-سارة: هيج كمل

غمضت عيوني وكمل القصة على النص وبعد ماسمعت شي رحت بسابع حلم...

**

"مريم"
الليل كله ما نمت اتكلب وافكر، عيوني تحرگني نعسانة بس النذل مالك سلب نوم عيني بكلامه.. حضرت نفسي باجر راح انكشف وراح تصيرلي مصيبة بس شلون اتدارك الوضعية؟

اعترف؟ اكول اني زوجتك واللعب عليك؟ لو اگله اني اكرهك واريد انتقم منك؟ شسوي يا الهي هم وغم ترس گلبي ماعرف وين انطي وجهي روحي كئيبة وتعبانة..

گمت للحمام توضيت وفرشت سجادتي صليت صلاة الفجر ولزمت سبحتي كلشي تبخر من عقلي شلون اخفف من الاكتأب والقلق الي صابني.. وفجأة خطرت ببالي ابتسمت وصرت اردد..

"لا حول ولا قوة الا بالله العلي العظيم"

مية مرة هاي من المجربات الحتمية، أي ضيق احس بي او هم او غم او حتى ضوجة او حسرة بگلبي وحزن مجرد ما اسويهه كل وضعي يتغير راحة وطمأنينة عجيبة تترس قلبي..

كملتهه وبقيت كاعدة على السجادة قريت حديث الكساء حافظته بموبايلي هذا الحديث ايضاً رهيب في فك الازمات وقضاء الحوائج وينفس عن المكروبين والمهمومين.. كملته وطلبت من ربي يهديني ويبرد گلبي وميلوحني شي يضرني..

(تم الحفظ 🫣✅)

نمن بفراشي غفيت وكعدت الصبح مشحونة طاقتي، ابتسمت اعرف منين اجت سبحان الله من يكولون مجربات ميچذبون ولا يبالغون..

غسلت وبدلت ملابسي ونزلت ويه البنات نتريگ، عندي يقين شنو الي راح يصير فـ هو بي صالح سواء انفضحت او اجه اطلس يحجي ويايه بهدوء ويفتهم مني كله خيرة..

كعدنه نتريك وعيوني على الباب تنتظر قدومه، ماكو ما اجه لسه بس حمزة كاعد ويه البنات رقية وسارة واسيل يتريكون ورقية تنطط على حمزة وكل شوية تلاشي..

-دعاء: علاقتهم تخبل من اول ما اجينه لسه اني منتبهه كلش قريبات عليه البنات

-مريم: اساساً هو كلش حباب ومحبوب حتى الموظفين الكل يحبه ويحترمه

-دعاء: اجه طوطي اجه

دخل كالعادة بهيبته والكل وكف يسلم عليه ويصبحون والابتسامات صايرة بفلس، شفته وكف بمكانه ويدور بعيونه على شي الى ان ثبت انظاره عليه ابتسم وتقدم يكعد ويه خواته..

-دعاء: يمة الحب يمة يدور على الحب

-تينا: منو الحب

مدت راسهه ويانه نزينه ثنينه وباوعنالهه مبتسمة ومضيگة عيونهه، دعاء لافت السالفة بسرعة..

-دعاء: احس مديركم معجب بذيج البنية

اشرت على موظفة لبنانية كاعدة ورانه بالضبط، عكدت حاجبهه تينا وكالت مستغربة..

-لا مستحيل هو مرتبط

-مريم: بنورسين قصدج؟

-تينا: اي الكل يعرف هالشي

-دعاء: لا ماعتقد ما مبين اكو حب بيناتهم

ركزنه ثلاثتنه وضحى دخلت ويانه على الواهس نباوع لنورسين الي كاعدة وياهم على الطاولة تضحك وعيونهه تاكل اطلس اكل بس الغبي ما راح يلاحظ نظرات الحب الي تنبع منهه..

كمت للبوفيه المفتوح اشتهيت حلويات اخذت كيكة بماعوني وحسيت بي وراية واكف..

-الاطلس: صباح الخير آنستي

-مريم: شعجب مو بونجور

-الاطلس: اعرف ماتحبين تعوجين بحلگچ

ضحكت وباوعتله بسرعة رجعت انطي ظهري، اخذت الاريده ورحت اريد ارجع وهمس..

-مريم اوكفي

-نعم؟

-شعرج طالع

-شعري؟؟

هز راسه وحك مكان حاجبه يأشر على ظهري تلمست ظهري فعلاً ظفيرتي طالع ذيلهه بسرعة ضميتهه جوه الجاكيت واسب واغلط على دعاء وصديقاتي العوبات ولا وحدة نبهتني..

-الاطلس: ليل دامس

-احترم نفسك اني محجبة!!

-هسة شكلت خو مو جاي اشوف حواجبج سود اكيد شعرج نفس اللون

-ماله علاقة، استاذ جان لازم تكول لوحدة من البنات ميصير انتَ تنبهني

-صدك؟

-اي

-اعتذر ما جنت اعرف المرة الجاية اتبع هذا الاسلوب

يحجي بجدية بدون استهزاء، هزيت راسي وتركته ومشيت افكر معناهه ما اللتقى ويه مالك لان ديحاجيني طبيعي، رجعت للطاولة مالتنه تينا فوراً سألت عن حديثي وياه عبالهه تعاقبت او ترزلت شرحتلهن الصار ودعاء كالت بضحكة..

-ولا انتبهت شعرج جان طالع

-مريم: اي حبي حايرة تكهكهين

كملنه ريوك وطلعنه اليوم رايحين للمغارات والكهوف اكثر رحلة متحمسين الهه الكل عدايه طبعاً لان اموت من الخوف خصوصاً من علي كال وهو متحمس اكو جن هناك والناس تروح خصيصاً حتى يشوفون الاجواء..

-مريم: بنات اني ماريد اروح ماريددد

-دعاء بهمس: حبي روحي ويه اطلوسي هو يحاميچ

-مريم: انچبي دعاء رجلج على رجليه اذا تركتيني اموتج

-دعاء بغمزة: ما اوصيچ من تخافين سوي هاي الافلام الهندية مال توكعين بحضنة لو تحضني وترجفين وتختلين بصدره

-مريم: هسة غير تسكت

-دعاء: والله صدره خوش عريض يفيد تحتمين بي يكفيج ويكفي ثنين وياچ

-ياربيييي اسكتي كافي كافي

الطريق كله افكر اني شجابني وشوازاني ردت ابقى بالفندق وامثل المرض بس خفت يرجعلي مالك اليخزي ويسويلي سالفة..

عيني على اطلس كاعد وبصفه نورسين كالعادة لاحظت هي تختار تكعد يمه وتوصي قبل لا نطلع أي طلعة ميكعد احد بجانبه لا تزعل عليه.. اباوعلهم ثنائي مثالي نورسين كل شوية لازمة ايده او تتعمد تنام على صدره..

اللاحظ وانتبه عليه ممرتاح ويتحجج حتى يتحرك منهه وهي تقابله بزعل وعيون تتحسر، بينما اني صافنة عليه دار وجهه ناحيتي صرنه عين بعين ابتسم بوجهي متت من الفشلة والخزي هسة شيكول كاعدة تراقبني..

عكست عيني فوراً ودرتهه على الشباك اتابع الطريق بقيت لاوية رقبتي الى ان وصلنه وكالو نزلو..

نزلت اتراعد رجليه ترجف ودعاء وتينا يسحلون بيه اسمع اصوات الناس وتهويلهم شنو شافو جوه واني اللطم خايفة واقره بصوت عالي..

-مريم: بسم الله الرحمن الرحيم.. بسم الله الرحمن الرحيم.. ياربي.. يا فاطمة الزهراء.. يا ام البنين دخيلج.. يابو فاضل يا حسيننن

-دعاء: امشيي فضحتينه امشيي

-مريم: ولجن تدخلونه على جنانوه يبووو عليج يمريم شجابج يمريم

-ضحى: هههههه اليوم راح نتونس هواي بنات

-مريم: الله ياخذجن الله ياخذنييي

سحلني ودخلنه سوه لمكان كلش غريب شلون الجبال بس بي كهف مفتوح وكف رجال يشرحلنه شنو بي واني منهارة اسمع واقره ايات قرانية..

-حمزة: ها شباب ندخل؟

-تينا: مسيو خلينه ندخل يله مرايم

دخلو على شكل افواج والبنات يجرون بيه يردوني وياهم وكفت على فوهه الكهف وخايلي شفت شي يخطف عطت مثل المسودنه..

-مريم: لاااااااااااا مادخللللل ماااادخلللللل شفتتتت شييييي ماااادخللل

-دعاء: كولي والله شفتي ولج شنو شفتييي

-مريم: اسوود اسووود شفت اسوووود يخطف

-ضحى: يمة لا لا اخاف مادخل اني ماريد

صاحو بينه نروح وراهم واني راكبة راسي ماروح مستحيل شنو تخبلت يردون يخبلوني ذولة، دعاء تموت على الرعب ماقبلت تريد تدخل وتينا وياهه وقنعو ضحى هم وكالو ابقي وحدج هنا..

طلعت من الكهف واقره ايات قرانية وافتر بعيوني اتخيل يطلعلي شي منا واني وحدي الكل جوه شلون اظل اللطم منو يسمعني..

شفت سواح حواليه واكفين ويحجون بحماس بالمغربي يسولفون شنو شافو خوفوني بالزايد وما أمن ابقى وحدي هنا هم..

دكيت على دعاء ماكو تغطية حاولت اكثر من مرة وماكو اشارة هسة شلون.. تمشيت لبداية الفوهة شفت رجال ومرة ديردون يدخلون چلبت بيهم..

-مريم: مرحبا ممكن ادخل وياكم وتبقون وياي لحدما الگه جماعتي

هزو روسهم ورحبو بيه تمشيت وياهم ومكمشة بالمرة دخلنه شوية ووگفو يشوفون الموجود ماشفت شي جذبني مادري اني خايفة وما منتبهه لشي..

صار صوت قوي عبالك واحد يعيط انبلع لساني ووجهي من الخوف ردت اغيب عن الوعي من طلع ولد شاب يركض ويصيح مثل المخبل يفتر حوالينه..

رجليه متحملني بعد راح اموت الله لا ينطيكم وين جبتونه خرب حظج يمصخمة يا مريم..

-مرريم انتِ هنا!!

درت بس عيوني وگلبي يطگطگ شفت دعاء ووياهه اطلس جايبته تحرك بحواجبهه بخبث وتمثل..

-دعاء: اوي يا روحي اخيتي تخافين سودة عليه جبت استاذ اطلس هو راح يساعدج

-مريم: الله ياخذج دعاء

-دعاء: وياخذج وياي يروحي منكدر نفترق عن بعض احنه

مدتلي ايدهه تجرني وراحو الرجال والمرة چلبت بيهه حيل حضنتهه ونتمشى واطلس ورانه كلمة ما نطق، امشي واتحسب عليهم وادعي ربي ينجينه وميصير بينه شي..

-مريم: يا مقرررف اقترح هالمكان علينه!!!

-الاطلس: اني هذا المقرف

-مريم: استاااذ!!

-الاطلس: راح نبات هنا الليلة

جمدت بمكاني ودعاء ويايه اندارينه عليه هو واكف جبل ميهزك ريح گمنه نتلاطم بصمت اني واختي..

-مريم: نبات هناا بهذا المكان اليخوف ليش ربييي ليشش اجيت هنا ليششش شلوون ما بلغتونه من البداية

-الاطلس: هسة قررنه

-مريم: شلون مكاان معفنننن

-الاطلس: هاي منطقة سياحية معروفة مريم وبعيدة عن الفندق

-مريم: استاذ عليك ام البنين خلينه نرجع ليش نبات هنا ليش يعني شنو نفرش بالكهف وننام

-الاطلس: اي چا شنسوي

-دعاء: معقولة؟؟

-الاطلس: اي ما تشوفون اكو فراشات ليكدام

-مريم: عزززه ونام هيج زلم ونسوان سوووه

فطس ضحك وره حچايتي يباوعلي ويضحك ودعاء تكرص بيه تكول چفصتي عدلت حچايتي فوراً..

-مريم: استاذ اقصد هيج ننام ناس فوك ناس

زاد بالضحك ودعاء مردتني مرد بالتكرص وتعض على شفايفهه وتهمس "خزيتينه"..

-مريم: اقصد ميصير حرام هاي شنو استاذ شو انتو فد مرة عيب شسالفة

-الاطلس: ااخخ يا مريم اخخ منج

-مريم: شكلت اني تره صدك مو دعاء فزعيلي ولج

-دعاء: اتفق ويه اختي استاذ ميصلح هيج نسوي

-الاطلس: بعد شنسوي هذا الموجود

-مريم: لا خلينه نرجع للفندق دعاوي نأجر تكسي ونرجع خوما هيج نبقى فشلة خية

-دعاء: والله صح

-الاطلس: ماكو تكاسي منطقة مقطوعة حتى اشارة ما بيهه

-دعاء: لعد شلون منطقة سياحية واشارة مابيهه؟

-الاطلس: جربي بنفسج وشوفي

-مريم: اني جربت فعلاً ماكو اشارة شنو هالضيم ياربي

-دعاء بهمس: خية شنسوي ننام ونتغطى زين هذا هم حظنه الجابنه

جاوبتهه بنفس الصوت الهامس..

-عزه العزاني نتخزه ولج

-الاطلس: بنات بعدين تناقشو امشو نتقدم

تقدمنه اني ودعاء نتناقش كالت ننام بصف بعض ونتغطى زين بالبطانية نتلفلف بيهه بس شلون اني نومي مرعبل كلش يعني حي على الصلاة متفشلة ومفضوحة اليوم..

وصلنه لجماعتنه اشوف ناس حاضنه ناس شكد فشلة تينا مچلبة بضحى وضحى مكمشة بردن واحد من الموظفين ويرجفن ماعرف شنو حچولهم او شنو شافو بس الوجوه صفرة ومخبوصين..

-رقية: اطلسسس اخيراً اجيت تعال تعال راح نموت خوف

-‏نورسين: اي اطلس تعال متت خوف

ركضن عليه ثنينهن وكمشن بأيده، نورسين حاضنه زنده حيل وعيونهه مدمعة ورقية نفس الوضع..

-دعاء: هاي الخنفسانة غير توخر عنه

-مريم: خيولون معلينه بيهم

-دعاء: احتركت حرك اني شنو من برود عندج مرايم

-مريم: شدخلني بيهم طبهم الف مرض خوووش!!

عطتهه بصوت خفت يسمعوني ومشيت اكمل طريقي، الرجال الويانة يشرح على كل اثر موجود بالكهف وكل شوية يخايلي سمعت شي واذكر الله امشي واتراعش..

بعدنه ممكملين الطريق وكالو راح نطلع الكل استغرب بس اني كيفت، طلعنه من الكهف والضحكة شاگة وجهي كالت ضحى من طلعنه متحسرة..

-راح نروح للفندق هسة ونرجع على الغدة

-مريم: يا فندق مو كالو نبات هنا؟

-ضحى: اي صح اكو فنادق هنا

-دعاء: بالكهف؟

-ضحى: لا هنا

اشرت بالفضاء وكالت اكو فنادق تبعد عن الكهف شوية راح نأجر بيهن، باوعنه اني ودعاء وحدة على الثانية وغمينه بعض اطلس ضحك علينه واخذنه على گد عقلنه!!

وصلنه لفندق هو مو فتدق يشبه الكوخ كل كم نفر سوه، مسطرات وحدة بصف الثانية كعدنه البنات خمستنه بواحد واجت ويانه ريتاج السادسة..

-ريتاج: خطية مسيو اطلس كلش تعب

-مريم: شبي؟

-تينا: هو رجعنه علموده تخربطت اوضاعه هناك وجهه صار اصفر ويتعرق شلون الي دتطلع روحه

-دعاء: يا عيني شجاه هاي ليش

سكتت بدون لا احجي يمكن اجته نوبة هناك او راح تزوره وتلافو الموضوع ورجعونه، بقيت كاعدة اكل روحي بروحي قلقت كلش استغربت قلقي اني ما طايقته بس ليش قلقانة عليه؟

بقيت اروح واجي بالغرفة وافكر كعدت دعاء على السرير ويايه بالغرفة والبنات ثنين بالصالة وثنين بغرفة ثانية..

-دعاء: مريم شو من حاچانه كلشي مابي جان

-مريم: اي

بقت تحجي وتحجي وتحجي واني بالي بعيد، اخذنه الوقت صار الغده وطلبو الكل يحضر دورته بعيوني شفته واكف وساند روحه على عمر وجهه تعبان كلش ووضعه صعب ليش طلع ليش ما بقى مرتاح..

للمرة الثانية لگفني اباوعله بس هالمرة هو عكس عينه عني ومسح وجهه، رحنه للمطعم وكعدنه ناكل دعاء حطت دوبهه من دوبه كل شوية وهامستلي..

-باعي ايده شلون ترجف سودة عليه

-مريم: عوفي دعاء مريض مبين

-دعاء: خطية كلش قهرني

حتى اني انقهرت بس ماردت ابين اعرف مرضه دعاء ما راح تعوفني بحالي، كملنه غده وطلعنه لمكان اثري ثاني وهم كالو چانت اكو قبائل جن تتواجد هنا ورجعت ارجف خايفة..

ماقبلت ادخل بقيت بالباب واكفة واذكر الله واجوني عمر واطلس مستند عليه..

-عمر: راح يكعد يمج رفيق درب خاف تضوجين

كعد اطلس على كرسي موجود موجوع وتعبان باوعتله وهمست لعمر..

-شبي؟

ابتسم وحرك راسه بطريقة مافهمتهه، راح وخلاني وياه وحدي بعد ما كال انتبهي عليه تفاجئت من طلبه بس صدك اهتميت بي..

-مريم: استاذ انتَ زين

-اممم

-تحتاج شي اجيبلك شي؟

-لا، شكراً

-وجهك اصفر استاذ اكلت لو لا؟

ابتسم وهز براسه، تقربت عليه اكثر وهمست بصوت خافت..

-اكيد اكلت؟

-اي

-اجيبلك مي شوية؟

رفع عيونه عليه يباوعلي، كمش بردن الجاكيت مالتي وكال..

-الاطلس: ابقي يمي وبس

-اي ابقى لازم انتَ امانة

-يعني لو ما مأمنج عمر ما تبقين؟

-لا شسويلك شعندي قابل ابني انتَ واني مادري

ضحك وضحكت وياه ردت اللطف الجو انقهرت على وضعه..

-مريم: مدلل استاذ كلش انتَ

-اي هواي

-اي والله شبيك اصدقائك خوش اصدقاء

-اممم

-مريم: احم شسمه اگلك

-ها

-شبيك انتَ؟

-تعبان

-من شنو

-منج

-اهوووو بدينه بالتمسلت

فتح عيونه حيل واني وياه فتحتهن ماعرف شلون طلعت من حلگي حتى ما اعنيهه بس شلون كلتهه..

-اسفة ماقصد هيج بس.. شوف اني.. ماعرف شلون كلت هالشي.. استاذ..

-تشوفين الي ديصير بيناتنه تمسلت؟

-لا لا لا ابد والله ولا قصدت هالشي بس هيج طلعت من حلكي

-لطيف

-لا لا ماكو لطيف شبيك ما اعنيهه صدكني

-بس جنتي تفكرين بيهه چا شلون حجيتي

-لا والله حتى مافكر بيهه

-يعني انتِ ما تشوفين البيناتنه تمسلت؟

-لا ابد

ابتسم وجرني من ردن الجاكيت اكثر قربني عليه، اختل توازني ردت اوكع عليه وبصعوبة ثبتت نفسي..

-الاطلس: تحبيني مرمر

-لااا

-جذابة

-وعيون امي احبك شنو شهالتمسلت

-اخخ من لسانج شطوله

-ماقصد الحب تمسلت بس يعني..

-شنو البيه ما يعجبج؟

-هسة انتَ تعبان ارتاح بعدين نسولف

-اريد اعرف هسة

-انتَ مغرور وشايف روحك احسن الكل

-مو مغرور هاي اسمهه ثقة بالنفس وهذا طبع ما اكدر اغيره

-يلعب النفس تره

-اللسان بوية شبيچ اني مديرج

-هاا شووف

فرك وجهه ساكت شد على ردن الجاكيت مالتي اكثر وكال..

-وبعد شنو ما يعجبج؟

-ماكول لان هم راح تحجي عليه وتكول اني مديرج

-ماكول بس سولفي لا تسكتين

-ما

-احجي مريم

-هواي تصرف كلمة لطيف

-صدك؟

-اي

-لطيف

ضحكت وحطيت ايدي على حلگي ابتسم يراقبني وكال..

-كلمة لطيف تعبر عن هواي حالات عندي، حسب الموقف وحسب الناس الي امامي تخليني اختصر هواي كلام

-بس دائماً تكولهه من يكون ما عاجبك الشي

-صحيح

-وهسة كلتهه الي يعني ما عاجبك؟

-اي

-صدك ليش؟

-ما عاجبني بعدنه

-شنو شلون

-اريدج اقرب وانتِ تهربين مني

-ماهرب اني بس ماعرف اتقرب من رجال غريب اخجل

-اعرف وهالشي الي مصبرني وميت بي

وردت خدودي اشتعلت خجلانة من نظراته نزلت عيوني وبقينه بحالة صمت، شفت ديبيعون حليب دافي كلت اروح اشتريلي واشتريله..

-استاذ هسة راجعة

-وين؟

-اروح اشتري حليب تحبه؟

هز راسه وگام من مكانه بصعوبة، رحنه سوه اشترالي واشتراله قهوة ورجعنه لمكاننه، حط ايده على الكرسي الي بجانبه وطلب مني اكعد..

كعدت وعيني تعلكت بي وضعه كلش مو تمام كلما يمر وقت ديصير اسوء واسوء النفس كوة ينجر عنده، خفت ماتحملت ابقى كاعدة كمت كتله ادور على حمامات عسى ولعل اللكه واحد من اصدقائه بس ما لكيتهم..

رجعتله كاعد وديفتح بطل مي يبلع الدوه مالته، ايده ترجف ميكدر يسيطر حتى يفتح قبق المي متت قهر اخذته منه بسرعة وطلعتله الدوا وطلب مني بخجل..

-تكدرين تشربيني الماي يرجف بأيدي

هزيت راسي وشربته مي وطلعت كلينكس من جنطتي نشفت حلگه وحنچه، عيونه تراقبني واني معصور گلبي عصر تخيلت امر بهيج موقف شكد مؤذي اباوعله كلش خجلان وكل شوية يكول مابيه شي بس وجهه يفسر غير كلام، همس بصوت ممتن ممزوج بالخجل خلاني غصب ابتسم..

-شكراً آنستي

-ماسويت شي

-تعبتج

-لا ابد، بس ليش اجيت استاذ لو باقي مرتاح بالكوخ احسن

-اصير اسوء من ابقى وحدي

-جان بقى احد وياك

-نفس الشي وماريد احرم احد من الونسة بسببي

-بس همه اصدقائك واشوفهم شكد يحبوك ويخافون عليك..

حچيتهه وصفنت لحظة؟ ليش ولا واحد من جماعته هنا وياه؟ ليش عمر عافه وراح باوعتله وابتسمت ماكدرت اخفي ابتسامتي معقولة هو كايللهم حتى بس يجي يشوفني ويكعد وياي..

-مريم: تروح للطبيب؟

-لا ماكو داعي

درت وجهي عنه وافكر خاف يوكع عليه هنا شلون بيه، كأن قره افكاري بسرعة كال..

-ما راح يصير شي اتطمني

-احاف عليك والله خاف ماكدر اسيطر و..

-تخافين عليه مريم

سأل وعيونه تاكلني اكل مانتبهت على نفسي من حجيتهه بس صدك خايفة عليه، سويت الموضوع عادي وجاوبت..

-طبعاً اخاف انتَ امانة يمي

-خرب حظ الامانة محسستني طفل

-هههههههه

دار وجهه ضايج حسيته يشوف روحه عاجز وهالشي مخلي يخجل مني، ماحجينه بعد لحدما طلعو الموظفين من المكان واللتقينه مرة الثانية.. تفرقت عنه وجماعته كل شوية واحد يسولف وياه وحمزة يداهر بي يغيرله جو وعمر يهمس وياهم..

**

"دعاء"
اخذونه لمطعم نتعشى يخبل كلش تونست وفرحت من مريم واطلس چانو كاعدين سوه صح مريم كالت ما صار شي بس المهم بدو يتعرفون على بعض..

-دعاء: مرايم موبايلي بالسيارة عفته خاف امي تتصل

-مريم: روحي جيبي بسرعة

هزيت راسي وطلعت المطعم صاير على شارع عام والسيارات متنطي مجال كوة عبرت الطريق سياراتنه موكفيهه بالشارع الثالث لازم اعبر شارعين..

اخيراً وصلت للسيارة فحطانة شفت احد بيهه ديبحوش بشي ماهتميت ورحت اخذ تلفوني واطلع ثواني وطلع وراية..

وكفت اريد اعبر الشارع والدنيا ليل والمكان جبلي يخوف، بقيت واكفة بمكاني والرجال هم يبعد عني مترة تقريباً.. باوعتله ابتسملي ورجعتله الابتسامة هذا واحد من التوأم بس ماعرف منو منهم ما اميز بيناتهم..

-يله عبري

-دعاء: اخاف شوف الطريق

-عبري ويااي يله

يحجي بصوت عالي ماسمعه من هوسة السيارات، توترت منه ومن الطريق كله بقيت واكفة بمكاني تقرب مني وصاح بصوت اعلى حتى اسمعه..

-انطينييي ايدج اعبرررچ

-دعاء: لاا لاااا ميصيررر

-شنوووو

-ميصييير

اشرت على حجابي هو هز براسه وبقى واكف، شجعني نعبر هستوني دا اخطي خطوة وفاتت سيارة طاايرة شهكت مرعوبة جان طيرتني وياهه..

-انطططيني ايدج يا آنسة

-ميصير حررررام

-حاااالات خاااصة حااالات خاصة

-شنوووو انتَ منيلك هالفتاوووي

ظلينه واكفين حايرين استحيت منه خطية ميعبر اله يعبرني واني اخاف من السيارات وذولة مينطون مجال، تقرب مني وحجى بصوت عالي وهو يأشرلي على طرف الجاكيت مالته..

-كمشيييي بيه خليني اعبررج

-هااا

-كمشينيييي

يأشر على الجاكيت ويمده ناحيتي، تقربت بأيدين ترجف لزمت طرف الجاكيت مالته ووگفت قريب منه.. شوية ومشى تقدم يريد يعبر والسيارات طايرة طيور شوية وابجي من الخوف غمضت عيوني بكل غباء تشاهدت وعبرت وياه..

وصلنه للشارع الثاني وعاد نفس الشي يعبر بدون ليخاف ولا يهتم يكول غصباً عليهم يوكفون، لحدما وصلنه لبوابة المطعم مية مرة كلت الشهادة..

-الحمد لله على السلامة

ذبيت نفس وحطيت ايدي على گلبي، عدلت حجابي ورديت عليه بأدب..

-الله يسلمك تسلم استاذ عمر

-اني علي علي يالكائنااات علييي

-هاا اسفة استاذ

-علي: لا عادي بس احب اكبر المواضيع شوي

ابتسمت ودخلنه المطعم سوه ورحت لمريم والبنات سولفتلهن وهنه ماتن ضحك وضحى تذب روحهه على مريم وتكول..

-اوو سوو رومانتك

-دعاء: ماكو رومانسية خية جنت خايفة

-تينا: الله يساعدج الموقف صعب

-ضحى: بس مسيو علي كلش جنتلمان

-تينا: حلو احترم حجابج وما استهزأ هاي لو غير واحد يسويج ميز

-دعاء: معقولة؟!

-مريم: هه كلشي مشايفة منهم انتِ بعدج

كملنه اكل وصارت بلبلة واضحة بالمطعم تينا ضربت گصتهه وكالت اكيد جايين الضيم، مافهمت منو الضيم وماعلقت ورجعنه لكواختنه كلمن لفت راسهه ونامت، فزيت نص الليل على كابوس مرعب وصوت طگطگة بأذني انداريت على صفحة مريم شفتهه كاعدة وتقره قران وترجف..

-دعاء: شكوو شصاير

-مريم: والقران المكان مسكوون

-دعاء: هاي الطگطگة منين؟؟

-مريم: يا طگطگة؟

-دعاء: صوت صار بالغرفة

-مريم: جذابة كولي جذاابة حبابه

-دعاء: اي اي جذابة اني نامي حبي دا اتخيل

-مريم: والله؟؟؟

-دعاء: اي نامي

ماكدرت تنام اشوفهه تلوب تروح وتجي وتقره بالغرفة قران بصوت عالي، اجذب اذا اكول ماخفت اني متأكدة من الصوت بس ماردت اخوف مرايم اكثر..

طلعت بره اشوف البنات رايحات بسابع حلم، دخلت لغرفة تينا وضحى واشوفهن كاعدات يتراجفن..

-تينا: سمعتوو

-دعاء: انتو هم سمعتوا؟؟

-ضحى: اي هسة صار صوت

-دعاء: لا قبل شويه صار الصوت مو هسة

-تينا: ارواح شريرة اكو هنا والررب

-ضحى: خية اسمهم جن واي حتى اني متأكدة من هالشي

-دعاء: لحد يحجي كدام مريم بنات تخاف

نزينه الثلاثة على صوت كُلش قوي صار على الشباك عبالك واحد ديضرب الشباك علينه، تخبلنه وكعدت ريتاج وبنت اخو ضحى صريخنه صار شعلوه ومريم ترجف ميته خوف وتقره بصوت عالي..

-ضحى: دگووو على احددد ولچن وحدددة خليهه تتصللل

-مريم: ماكو تغطيةةة يبوووو

-دعاء: شنو هالمكان الغبيي شلون ماكو تغطيةةة

-ضحى: خلي وحدة تتنازل وتروح تصيحلنه احد راح ننوكل من الجنن

-تينا: انجبييي ضححححى

-ريتاج: راح نموت هنا راح نندفن هنااا

-دعاء: لا اشش لحد يحجي هسة يرحون

-مريم: ويييين يعني صدك اكووو شييييي

-تينا: ايي انضرب شباك غرفتناااا

مريم صارت شحالهه تخربطت وتريد توكع علينه، تخبلنه ضحى كالت راح تروح هي وريتاج يصيحون لاحد او يعيطون بالباب عسى ولعل احد يسمعنه..

-ريتاج: اخااف ماروحح والله ماروح

-دعاء: كعدي امشي ضحى نروح اني وياچ

لبست حجابي بسرعة وطلعنه من الباب كفخنه هوا عالي كلش يبس عظامنه، المكان مظلم بس كم كلوب مطشر محاوطنه.. تمشينه مكمشات ببعض ونقره ايات قرانية ودگينه باب الكوخ الي بصفنه..

-ضحى: منو هنا يا ترى؟؟

-دعاء: خوات اطلس

دكيت الباب بعد مرة وطلعت اسيل تفرك بعيونهه، استغربت وجودنه بس شرحنالهه كلشي وكالت كوخهم كلشي مابي..

-اسيل: هسة نصيح لواحد من الولد نشوف شكو

رحنه ويه بعض وصار بوجهنه رجال غريب ولبسه هم غريب توقعناه يشتغل هنا.. سولفناله عن الصار ضحك وكال هذا الهوا ديطلع هيج اصوات الكوخ كلشي مابي..

-دعاء: وصوت دگ على الشباك منين؟؟

-الهوا آنستي

ما اقتنعت بكلامه رجع ويانه للكوخ واشرلنه على اعواد شجر صغيرة واكعات بالكاع ويدورن وحدهن كال الهوا هيج ديسوي غلست وكلت لضحى نقنع البنات الهوا ديسوي كل هالاصوات رغم متأكدة مو هو السبب..

بشلاع الروح اقتنعن ونامن بس اني عيني مفتوحة اراقب الى ان صار الصبح...

ثاني يوم طلعو يفترون بس اني ومرايم بقينه، باجر العصر راح نرجع لمدينتنه كعدنه اني ومريم قريب الكوخ بحديقة عامة نشرب چاي وانتبهت لرجال كاعد على بعد عيونه على مريم..

-دعاء: مرايم شبي هذا تعرفي؟

رفعت عيونهه تشوف منو وبلعت ريگ ساكته، اشرت راسهه "لا" وحجت..

-مريم: اعرفه

-دعاء: لعد ليش تهزين راسج لا

-حتى ميشك دا احجي عنه

-شبي هذا؟

سولفتلي كلشي بس تتصنع الحركات بيدهه عود دتحجي بغير موضوع متريده يشك دتحجي عنه، استغربت شجابه هنا مچنت اعرف شركة شمسون هم جايين لهذا المكان..

-دعاء: مريم

-ها

-ما مرتاحة

-ليش

-انتِ تكولين عنه مجرم وسفاح وسادي، عنده عداوة واضحة ويه اطلس وگلتي مرة اطلس رجع للبيت مطعون بكتفه معناهه الموضوع كلش مليوص عدهم

-يمكن مو مالك الطعنه؟

-منو يعني؟ ماكو غيرهم حالياً كدامنه وتسببو بمشاكل ويه سارة اخته والله اعلم شمسويلهه مريم خايفة عليج كلش

-اسكتي دعاء لتخوفيني خيولون

-والله شبيچ ذولة يخرعون عدهم كلشي مباح

-شسوي مادري حايرة

-ارتبطي بأطلس

-شنو؟؟

-وافقي على تكوين علاقة وياه كوني وياه ولتعوفي ابد طورو علاقتكم احتمي بي اكيد راح يحميج بروحه هو يحبج

-دعاء اجه ببالي ان مالك يستغلني ويخليني اصير وياهم حتى يدمرون اطلس

-دعاء: او يخطفوچ!

سكتت مبين هي هم دتفكر بهذا الشي واستنتجته، فركت وجهي حيل وكلت حاسمة الموضوع..

-لازم ترتبطون حتى يقوى ساعدچ

-فكرت بيهه بس اخاف مالك يفضحني يكوله اني زوجته

-خلي يكول اطلس راح يزعل منج يوم يومين ويرجعلج هو يحبج

-وخطتي!

-مريم مو وكتهه ذولة خطرين لتصيرين غبية شبيچ!!

-اهدي دعاء لتبينين روحج معصبة

-گلبي يلعب ذولة ميتأمنون يمكن بلحظة يلعب عليج وانتِ ما حاسة

همستهه ورفعت عيني من شفت مالك يتقدم علينه رفعنه عيونه عليه اشر على المكان الي بجانبنه وكال بأبتسامة..

-ممكن؟.....

**

-وين ويننن

-اتركني الله يخليك فدوة فدوة ماريدد

-لا تروحين لا تعوفيني اريدج انيييي ميت بيج ميييت

يشمني حيييل يكزبر جسمي منهارة راح اموت ضاغط على جسمي ودافعني على الحايط ويريد يتقرب مني..

رجليه خانتني لا البيه ابقى واكفة ولا البيه استسلم.. صرخت بصوت وغطى حلگي بأيده يشم بشعري..

-امووتج والله اذبحج هنا بدون لا يرفلي جفننن

-عوفني الله يوفقك ماحجي ماكول اجيتني بس عوفني

-ليلة وحده كتلج بس ليلة تعاليلي على هذا العنوان

-ما اجي حباب عوفني مااكدر

-اكتل اخووج؟؟ حمزة؟؟ عمر؟؟ اذبحهم والله وكولي ما كلت

-لا لاا لاااا

اصيح بخبال وهو يسد بحلگي ويتلمس جسمي گلبي راح يوكف من الرعب الجاي اعيشه كلشي تكرر نفس الاسلوب ونفس التهديد ونفس الكلام، خوفي لا يتكرر الشي الاصعب..

-اتررركنييييي

انطاني راشدي وكعت على وجهي بالكاع اريد اكوم وكعد على رجليه وقيد ايدي و.......

بتبع ♠️💸.....

• ━━━━━━❪♣❫━━━━━━ •

انهيااار 😤 راح تبدي تتوضح سالفة شركة شمسون العكرة 👀

+كل الاحداث الي تنذكر حتى وان كانت مملة بنظر البعض (اني ماشوفهه مملة بس خاف 😂) ماكدر اعبرهه شي مرتبط بشي نكتب كلشي ان شاء الله حتى تفهمون القصة وتبدون تستنتجون.. 🤫