بعد ما كالتلي جاية شكوى عليج وذكرت اسم وسيم ...
مااعرف شصار بية
كل احوالي تخربطت ...
احس شي جواية يسحبني للكاع ..
__ هذا زوجي ...
__ ليش خفتي .... اطمئني ماكو داعي للخوف
__ ياخذ ريان مو ..الشكوى يريد ابني مو ..
__ هههههههههه (( رجعت الكرسي ليورة ... كامت وكفت على حيلها ... افترت من المكتب واجتي وكفت يمي ...اكو مي كدامها فتحت البطل ))
اشربي .. لا تخافين الموضوع عادي مايستحق هذا الخوف
__ يعني ماياخذ ابني ... الله عليج جاوبيني (( ابجي بشهكة .. وهي واكفة يمي ...كعدتني على الكرسي ... قدمت لريان قطعة شوكولاتة .. كعدت على الكرسي المقابيلي ))
__ مستحيل حبيبتي ... بأي حق ياخذة ... هنا القانون كلة وياج ويحقلج تشتكين علية لو حاول ياخذ ابنج منج .. والشكوى ماتمشي هسه ... لانك لاجئة وقت طويل يلة تمشي شكواكم
__ الحمدلله ..(( ابتسمت ووجهي كلة دموع ...شرحتلي على بعض القوانين ...اطمئنيت بعد ماعرفت اني بمكان آمان ... وابني ماياخذوا من عندي ..)
__ لل18 سنة ابنج الج .... اصلاً لو ياخذة انتي يحقلج ترفعين دعوى ضدة وتكسبيها ...طمني بالج لا تخافين .. هذا النونو الحلو راح يبقى الج ...
__ من كلتي عليج شكوى من زوجج مااعرف شصار بية ... احس نص حيلي راح ... كلشي يروح من عندي قابلة بس ابني مااريدة ياخذة ...
__ افهم .... حقج كل ام بمكانج هيج يصير بيها
(( ... بعد ساعة ودعتها ورجعت للبيت ...حاضنة ريان طول الطريق ....
مرت الايام .. تعرفت على بنت ايضاً لاجئة مقابل بيتنا ..
..
نلتقي مع بعض .. واوقات من البلكون نسولف اني وياها ..
الى ان مرت الايام والبنت اجتي تركض علية وتضحك ..
__ خير شكو
__ هههههه انتِ مرت وسيم مو
__ شنو ... شلون عرفتي ؟؟
__ هههههههه صدفة .. تكدرين تكولين الدنيا صغيرة
__ لااا دقيقة شنو الدنيا صغيرة من وين تعرفين وسيم ؟ جاوبيني عفية (( خايفة لا يكون وصل اليونان واندل مكاني ))
__ زوجج طلع صديق زوجي على الفيس ههههههههه والبارحة ديسولفون وسألة عليكم .. هاا شلون صدفة
__ وخري .وخري ... لا اعرفة ولا يعرفني .. شوصلة لزوجج .؟
__ شبيج والله صديقة بالفيس وسأل عليكم
( ماصدكت كلامها .. او ممكن تكون صادقة لكن وسيم متعمد يتقرب لزوجها ...بس شلون ...! اكيد دخل كروبات واستفسر علينا .... زين معقولة زوجها فعلاً صديق وسيم والصدفة يكون جواري باليونان !
عقلي افتر ...
اعتزلت عن كلشي
كاعدة وافكر
اكيد وسيم اندل البيت
اكيييد بأي لحظة راح يجي علية لليونان يسرق ابني ويطلعة تهريب ..
ياالله شعور الخوف وعدم الامان شكد مزعج ...
سرقني من كلشي محيط بية ...
وركز تفكيري على فكرة وحدة ! وصول وسيم لليونان .....
بعد أسبوع من التفكير والقلق ..
اتصلت المرشدة الاجتماعية ...
اتصالها شي طبيعي بالنسبة لكل لاجئ
او هذا واجبها ...
لكن اني الوحيدة .. من اقرأ اسمها على شاشة الموبايل ..
كلبي يدك سريع ...الخوف يسيطر علية ..
__ الووو شلونك حبيبتي رحمة
__ اني الحمدللة ... صاير شي
__ تعالي للمنظمة ..
__ اكو شي الله عليج
__ لاا ماكو شي بس تعالي فوراً
((( اخذت ريان ورحت بسرعة ..وصلت دخلت لغرفتها ..))
__ تفضلي ..شلونج
__ الحمدلله ...صاير شي ..
__ زوجج يريد يشوف ابنة .. ومن حقة يشوفة مالج حق تمنعي من شوفتة ..
__ شلون ...ليش يشوفة ... اني مو كتلكم هو ضربني وطلكني ...ليش يجي يشوف ريان
__ اشتكيتي لو لا ؟
__ لاا مااشتكيت
__ معناه ماعندج تقرير طبي مو صح
__ ايي جنت بالبوسنة بوقتها راحت بالي اشتكي
__ ايي القصد حقج ضاع .. وهو جاي يريد يشوف ابنة
__ شنو ..وسيم باليونان هسه
__ اكعدي بمكانج . لا تخافين ..(( اتصلت على وسيم .. حاولت اطلع منعتني .. بعد دقائق دخل وسيم للغرفة ..يختلف عن وسيم السابق .. نظراتة ..سلامه ... كلامة وياية... حتى نبرة صوتة تختلف ... استغربت ..))
__ اني جاي اريد اكعدكم بشقة وحدكم ... اجرت بيت ومتأكد من المنظمة اذا يزورا راح يوافقون تنتقلون بي ..
__ شنو اني مااطلع وياك ... مااكعد وياك مستحيل
__ بس اسمعيني ... دقيقة اترجاج . انتي ام طفلي وبيناتنا سنين طويلة ميحتاج تنفعلين بهاي الطريقة وترفضين كل خط رجعة بينا .
__ غيرت نفسك مو ! لك انت شنو حية تتلون حسب الوضع ... لا تسوي نفسك أدمي
__ اني مااقبل تكعدون بيت منظمة ... اجرت شقة ومؤثثة من كلشي ..
( المرشدة رحاب ضحكت .))
__ هههههه بعد شتريدين ... مأجرلكم شقة وموقعها مميز هم ... افضل من البيت المشترك ..
(( استمر يقنع بية ... بقيت رافضة ...حاول بكل الطرق يقنعني ... المرشدة اقتنعت تماماً .. المشكلة ماشافت وسيم خلف الكواليس .. حالياً تشاهد وسيم الرقيق واللطيف ))
__ تمام حتى نضمن حق وسلامة رحمة ... تتعهد وبخط ايدك ماتعتدي عليها ..واي وقت ترفع ايدك عليها راح تتصل رحمة ويمسكوك الشرطة فوراً وعقابك عسير لانك متعهد ...
__ ايي اتعهد ... سهلة وين اوقع وشلون ...اني اريد اجمع عائلي بيت واحد .. اريد اشوف ابني كدام عيني طول ...صدكيني يااختي محروم من هاي اللحظات ..
( باوعت علية ..وابتسمت ..))
__ رحمة واضح الولد متندم وحس بذنبة ... حتى لو كان موزين واضح هسه فعلاً متندم ويريد يجمعكم من جديد .. اعطي فرصة ...وراح يتعهد مايلمسج ..
(( بعد محاولات .. ماوافقت ومارفضت ..بقيت ساكتة .. المرشدة اجاها اتصال وطلعت ..وسيم باوع عليه وكال
::-والله لا اعيشكم احسن عيشة وهسه تشوفين .اخخ الله بس اقبلي وارجعي الا اعيشج حياة حتى بالاحلام ماتحلمين بيها .. بس وافقي .. والله متندم ... رايد ابني .. اريده وياية ... مثل ماانتي تحبي ومتمسكة بي اني هم مثلج . لا تصيرين انانية ..
(( رحاب دخلت للغرفة . تباوع علينا وتضحك ... اقتنع تماماً بوسيم الطيب ...))
__ اوك ... نكدر نكول ست رحمة وافقت تروح وياك مو ..
__ يي تجي وياية .. وراح تشوف الدلال بعينها
__ تمام تكدرين من باجر تنقلين اغراضج لشقة زوجج..وكل فترة ازوركم .. راح اتأكد من كلشي .
__ ممكن طلب ..
__ اي تفضلي
__ محتاجة طبيبة نفسية
__اكو شي كولي الي . استمعلج
__لاااا اريد طبيبة ..
__ تمام ... احصلج موعد من الطبيبة واتصل عليج ..
( ودعناها ... وسيم تشكر منها ...طلعنا من المنظمة ..)
__ باعي اسمعي اكلج
__ هاااا شبسرعة تحولت ! انت شكد مكار وعندك وجهين
__ اسمعي اني طلكتج ومااريدج .... جاي هنا وراح اشتغل شغلتين ... تهريب ومخدرات ... ورايد اكعدكم وياية حتى لو لزموني راح اكول اني عندي عائلة ويتخفف حكمي .... الشقة تبقى الكم اني مااكعد وياكم ولا اجي نهائياً رايدكم بس شكل وعائلة ..
( رجعت للبيت ... باليوم التالي انتقلت للشقة مع وسيم .. حضرت المرشدة ووياها 4 بنات .. كشفوا عن الشقة ... الشقة بمكان راقي ... اثاثها كامل ماكو اي نقص .. فحصوا كلشي ...
__تمام .. هسه تعال وقع هنا ..
(( ورقه تعهد مايعتدي علية ))
__ شنو اوقع ...صدك جذب هاي مرتي وام ابني شلون امد ايدي عليها والله حتى عيب
__ لا وقع احسن ..بعدين انت طليقي مو زوجي ..
رحاب .... ايي صح . وقع ان ماتعتدي على رحمة وماتدخل بخصوصياتها .. ممكن البنية ترتبط او تريد تتزوج
وسيم ... شنووو .. هاي ماعدها هيج سوالف
رحاب ... كلشي وراد.. البنت شابة ومن حقها ترتبط .. وقع هنا . (( عيونة بكصتة ... اخذ القلم هو يستغفرالله بعصبية .. وقع مجبور ... ودعونا وطلعوا من الشقة ..))
وسيم .... باعي اني طالع .. من يريدون يجون خابريني .. حتى اجي ويشوفوني هنا ..
رحمة .. تمام ..
(( وبالفعل .. وسيم ترك الشقة .. مايدخلها فقط من اتصل بي قبل زيارة المرشدة ... يكون موجود كدامهم ... واستمرت حياتنا ....
بهاي الفترة كل العالم ضاج بجائحة كورونا ...
كل القنوات التلفزيونية . والصحف وشبكات مواقع التواصل الاجتماعي ... موضوعهم واحد (( كورونا ))
كنت اتصفح بالفيسبوك واشوف الكل خايفة
منشورات حول طرق الوقاية ...وعدد الموتى .. وعدد الاصابات ..
اليونان نوعاً ما افضل من بقية الدول ..
تكاد ان تكون معدومة الاصابات فيها
اتواصل مع اخواتي بالعراق .. الحياة توقفت ..حظر شامل .. غلق المدارس والجامعات ...غلق المطارات ..تعقيم الاشخاص والخضروات والفواكه والمواد الغذائية بالكامل قبل لا يدخلوها للبيت الكل مرعوبين ..
عائلة لمى السورية ... انتقلوا لليونان هاربين من الوباء في المانيا ...
وسيم استأجرلهم شقة مقابل شقتنا ..
ورجعت التقي بلمى يومية ..
لمى صديقتي المقربة تعرفت عليها بالبوسنة
بمساعدتها كدرت اهرب بريان ...
بقينا على تواصل ...
بعد أيام من الهدوء .
وروتين متكرر ...
اثناء ما كنت جالسة ..
اقرأ باحصائيات كورونا ...
يارب سترك شديصير بالعالم ..
رن الجرس .. تركت الموبايل على الطاولة ورحت اشوف منو بالباب ..
باوعت من العين السحرية .هذا .(( وسيم ))
اووو شيريد هذا ... مو اتفق مايجي للشقة ..
فتحت الباب ..
رحمة ::::- شعندك جاي للشقة شتريد
وسيم ::::- وشنو تحاسبيني ..مأجرها بفلوسي
رحمة ::::- اي احاسبك ..انت اتفقت وياية ماتجي . اطلع برة بسرعة .. وجودك يغث ..
وسيم :::- شنو تطرديني من بيتي !!
رحمة ::::- اي اطردك ..يلة اطلع برة ..انت مطلكني حرام تعيش وياية بنفس المكان
وسيم :::- دولي لج ... كح.بة وانتي تعرفين الحرام .. ساقطة ... تره اطيح حظج لا عبالج هذا التعهد يمنعني مااكوم هسه واشمرج من البلكونة
رحمة ::- ههههههههه صدك يلة اضربني ! يلة كوم اضربني
وسيم ::- لتخليني اكوم اضربج لج لا تستفزيني
رحمة ::::- لا والله اتحداك هم اذا انت رجال كوم اضربني
وسيم ::::- هاي انتي قندرة ماتسوين جاية تحجين وياية بهاي الطريقة .. تستفزيني مو
رحمة :::- شتريظ تفسر تصرفي فسرة المهم كوم يلة ..كوم اضربني ليش ضال بس تهدد
((كام علية ودفعني للكاع ..اخذت الموبايل ودخلت ركض للغرفة ..اتصلت على الشرطة ....بلغتهم زوجي يعتدي علية ... وصفتلهم عنواني ... وسيم ضل يصرخ ويكسر .. كسر الباب ... يكفر ...يغلط .. مايعرف شنو يسوي ..جن جنونة .. مامتوقع رحمة تتصرف ويا بهاي الطريقة ..
او مامتوقع رحمة صارت قوية
كان متوقع بعدني مثل مااني
جبانة ... ولو يضربني كف انتظرة يضربني الثاني
بس خلص .. وكأن هاي السنة الاخيرة وعيت على هواي اشياء ...
وسيم بعد ما كان سابقاً شخص واو ولازم اطيعة وانفذ ليكولة ..
بالاونة الاخيرة اي تهديداتة ماتخوفني ..
طالما القانون وياية وحضانة ريان الي خلص ! من شنو اخاف بعد ...
بعد دقائق قليلة وصلت الشرطة ..
كلبجو ايدة واخذوا للمركز ...
اني اباوع علية وشمتانة ..
يالله شلون شعور حلو ...
الشرطي سألني هل فعلاً هذا الشخص زوجي ؟وشنو صلتي بي ....
_ هذا مو زوجي اول شي ..هذا طليقي .. جنت كاعدة بيت تابع للمنظمة وهو اجة قشمرني وطلعني منة وكتب تعهد ان مايعتدي علية ... وهاي كدامكم كسر اغراض البيت كلها ويضربني ...(( ملاحظة نتكلم اللغة اليونانية ))
بعد ايام
وسيم بالسجن ..
يومية يدز شخص يحاول يقنعني اتنازل عن الشكوى ..
كل اهله يتصلون بية حصلوا رقمي من وسيم ...
كلها تغلط .. عمي عمتي اخواتة ... الكل ضدي ..
بقيت صامدة ... ماغيرت قراري ..
كلهم طلبوا من عندي ازورة ... وسيم عندة طلب ضروري اروح اشوفة شيريد ...
رحت للمركز ... من خلف الحديد شفتة ..
قسملي من اتنازل عن الدعوى يطلع من اليونان ..
رفضت اتنازل ..اصر عليه وودعدني خلص ماعندة شي يبقى هنا ... راح يرجع على المانيا ..
اقتنعت بكلامة .. تنازلت ..ثاني يوم طلع من السجن ..
كتبلي رسالة ..
( اني طالع من اليونان ... راح تخسرين ..انتي بدوني لا شيء ...ماتهموني بعد لا انتي ولا ريان طبكم مرض انتي ويا ..وراح اطلكج رسمي بس ارفعي طلب يم السفارة العراقية ..مايشرفني تكونين زوجتي بالقانون ..))
جاوبتة 👍 ......
بعد ما سافر وسيم من اليونان ..
حياتنا استقرت تماماً ..
ماكو وسيم معناها ماكو مشاكل ...
تركت الشقة وانتقلت لبيت تابع للمنظمة
اسكن بي مجاناً .. اما الشقة ايجارها عالي وبعد سفى وسيم مااكدر ادفع هذا المبلغ ..
البيت قريب على الشقة ..
بأحد الايام ...زارتني لمى ...
اجيت من المطبخ وبيدي صينية .. بيها كوبين قهوة ..
كعدت ..اخذت كوب حطيتة كدام لمى ماانتبهت ..باوعت عليها شفتها مندمجة بالموبايل
رحمة :::-خير منو حبيبج هسه هههههه
لمى :::- هواية والله ..بس ابرزهم مالك
رحمة :::- يعني تحبي
لمى :::- ههههههههه شنو ولج ..شنو هالسؤال
رحمة :::- هههههه اعرفج يلة جاوبي منو هذا وين عرفتي وتحبي لو لا
لمى :::- حجيتلج عنه .. تعرفت علية باللعبة .. صراحة مااحبة بس حابة انام ويا بالموبايل وخلص
رحمة ::::- عزززة بعينج ..عاد شنو نهاية هاي العلاقة .
امى ::- نهايتها قريبة .لج خبلني والله ملتزم غير تجي رجلة عاد ويقبل
رحمة :::- يمة شكد عيب تروحين تطلبين منه ينام وياج
لمى :::- مو مباشر المح ... وبس ينام وياية اطفر منه واحظرة ..
رحمة :::-خطية حرام عليج تضحكين علية
لمى :::- تريدين الصدك
رحمة ::- احجي
لمى :::- مالك مااحبة .. هيج ويا عندي غاية ..عندي واحد ثاني وداجيب رجلة ..
رحمة :::- منو هذا احجي ..
لمى :::- اسمة كريس .. امريكي ..مسيحي تعرفت علية بالكنيسة بالبوسنة .
رحمة ::::- وليش رافضة تتزوجين مالك
لمى :::- لج كلتلج مااحبة .. شسوي بي ..مالك فلسطيني واني مااتزوج فلسطيني وعايش بالاردن مستحيل يسافر هنا وحتى لو سافر يحتاج وقت يكون نفسة من جديد شجابرني علية واكعد انتظرة ... لا حبيبتي عاجبني كريس
عندة الجنسية الامريكية حتى احصل عليها هههههههه
رحمة :::-- ممممم يعني حتى كريس ما تحبي بس مصلحة لو طمع مو
لمى :::-ايي عفية ..بعدين والله مالك مايعجبني كبير علية
رحمة:::-ليش شكد مواليدة
لمى:::-88
رحمة:::::- هههههههههه شنو قصتج تعاملين الرياجيل مثل الاحذية اذا مو قياسج ما تلبسي ؟
لمى:::- ههههههه ايي اني مخيرة مو مسيرة ..يعني احط مواصفات ابالي وعلى اساسها اختار الاريدة
كل جلسة ويا لمى تتكلم عن علاقاتها المتعددة ..
اني استمع الها .. انصحها مايفيد وياها . عنودية بشكل لا يصدق ..
يوم عن يوم تزيد رغبتها اكثر ان تمارس الجنس اللفظي عن طريق الموبايل مع مالك ...
مالك ولد خجول وملتزم ... بعيد كل البعد عن تنفيذ متطلباتها ..
هي ما تحبة .. ولا تفكر تتزوجه بيوم ..
لكن زد اصرارها بمقياس رفضه ..
حسب ما تكول ..(( الا اشوف شنو علتة ليش ما يحس وينفذ طلبي )) ..
طول اليوم مع لمى..
تترك والدتها وتجي يمي
وبأحد الايام ..
طرحت علية فكرة ..
..
فكرة عظيمة ... قادتني لعوض الله العظيم ...
لمى ::-رحمة ليش ما تكتبين قصتج
رحمة:::- وين اكتبها .. لااا عوفيني هيج
لمى:::- والله قصتج حلوة اذا تنكتب ..يعني احداث حيااتج خيالية بحت ..منو يصدك لو تحجين المريتي بي هههههه الله ويكتبوني بقصتج البنت السورية تعرفتي عليها بالبوسنة ..
رحمة::- ههههههه لج هذا يا كاتب يكتب هيج قصة ... قصتي عادية ماتستحق ... وبيها اكشن محد يصدكة
لمى:::- ايي لج لهالسبب اكلج اكتبيها ..شنو رأيج اكول لمالك
رحمة::- ليش هو كاتب
لمى:::- يكتب اقتباسات .. خواطر هيج شي ..
رحمة ::::- ممكن ليش لا ... اطرحي علية الموضوع وشوفي
لمى:::-تمام بعد شوية من يراسلني اكله بس يلة عفية كومي نطلع ضايجة
رحمة:::- وين نروح
لمى ::- نروح على البحر نغير جو اني ما جاية هنا حتى ننحبس يلة كومي ....
(( غيرت ملابسنا اني وريان ... اخذت الجنطة .. طلعنا على البحر ... المسافة قريبة .. رحنا مشي ... كعدنا هناك ولمى التقطتي صور وحدي وصور ويا ابني ... موبايلها ايفون وكاميرتة اوضح طلبت منها تاخذلنا صور وترسلهن الي ...ساعة ورجعنا للشقة ....رحت احضر العشاء .. لمى تكتب بالموبايل .. صاحت علية ..
___ رحمةةةة تعالي تعالي
___ شكو شبيج
___ راسلي مالك من حسابج ..
__ولي شنو اراسلة شسوي بي واني مااراسل ولا اضيف ولد بحسابي
__لج والله يريد يحجي وياج حتى يكتب قصتج
__اي مااراسلة ..احجي ويا من موبايلج
__ ولي لج هذا (( فتحت حسابة ..قربت الموبايل على وجهي )) شوفي هذا شكلة مال مشاكل
__ وشنو تريدين احكم عالانسان من شكلة ..
__ هههههههه لج يا شكل والله ولد محترم حييييل مو واحجيلج علية شكد فقير ومؤدب
__ واذا ؟! يبقى اسمة رجل مااضيفة بحسابي ...
__ ولي شكد غبية ...جيبي موبايلج ..(( لحت علية ..حاولت تقنعني .. بالاخير اقتنعت ..لمى فتحت موبايلي ودخلت على الفيسبوك وارسلت طلب صداقة لمالك ... واتصلت علية وبلغتة ان هي دزتلة طلب صداقة مو اني ..نتواصل حتى يكتب قصتي))
كملنا عشاء .
رجعت لمى لشقتهم ..
ب 11 راسلتني ...
(( دزي لمالك هسه ماعندة شي ))
(( لج عيب وقت تأخر ))
(( لااااوالله دينتظرج كلتلة راح تراسلك رحمة ))
** فتحت موبايلي ودزيتلة رسالة
(( السلام عليكم اخوية ))
(( وعليكم السلام ))
(( اني أسفة دخلتلك خاص بس لمى كالت تنتظرني ))
(( ماكو مشكلة ...تفضلي ))
كتبتلة عن حياتي بطريقة مختصرة ... ماحجيت كلشي .. وهو كان يسألني واجاوب كلمة او كلمتين ...خجلانة اتكلم مع ولد غريب وبوقت متأخر لاول مره بحياتي ..
من بعدها وصل بينا الحديث وسولفلي عن الاقتباسات لكتبها بوقت ما كان بالسعودية .. اني استغربت هو فلسطيني ؟ شدخل السعودية
__ انت فلسطيني مو
__ ايي فلسطيني بس راح احجيلج ..(( ملاحظة مالك فلسطيني ولهجتة فلسطينية فقط ...تمت كتابتها باللهجة العراقية لتكون اوضح للقارئ ))
(( انطلق مالك بالسوالف .. وصار العكس بدل ما يسألني عن حياتي حتى يكتبها ....صار يحجيلي عن حياتي بصورة مفصلة ...
عرفت ان مالك ولادتة بالسعودية
وانتقل لليمن حتى يدرس الطب ..
بعد3 سنوات ترك الطب وانتقل من اليمن ..
وانتقل للاردن ورجع يدرس هندسة ..
ذكر ان اخوانة بعدهم بالسعودية ....
باوعت على الساعة ب 4 ونص الفجر ...
ومالك بعدة يسولف ..
اني نعست لدرجة كوة لازمة الموبايل واقرأ ..
__ ايي وفسخت خطوبتي هم ..((تذكرت ..بالبوسنة لمى ذكرت مالك عاجبها بس هو خاطب وما يهتم لاي بنت ..))
__ ياا ليش ..
__ قصة طويلة ..بس البنت مادية ومتطلبة حيل مااريد احجي عليها وهي بيوم من الايام كانت على ذمتي بس من اول خطوبتنا بدت المشاكل ... جهزتها ذهب وماقبلت تكول عاداتنا تجيب لامي ولاخواتي هم ...
وحلينا هاي السالفة ..صارت ما تحترمني وتقلل ادبها وياية حيل ..تغلق الموبايل بوجهي...ترد وقت مايعجبها .. امها مساندتها بكلشي
__ خطية ..ميخالف مفروض تتحملها احتمال بعدها صغيرة ومو واعية
__ اسمعي ...هي تحب يوتيوبر ومتابعتة ..اني لخاطرها رحت تابعتة .. تخيلي وصلت بية احب الناس لتحبهم .. وصدفة على الانستكرام أباوع ستورياته منزل صورتها حاضنته
__ صعبة .. الله يساعدك
__ الله راد يفضحها .. والله على نيتي مشيت وياها .. وشتريد اكول اي وميخالف .. المهم من شفت صورتها كلت والله هاي ما تبقى على ذمتي لو تبقى اخر بنية ..خسرتني دفتر .. مو مشكلة المهم خلصت منها ..
__ ان شاءالله لمى تعوضك .. انت تستاهل
__ لمى دخلت لحياتي بوقت صعب .. بعد فسخ خطوبتي مباشرتاً دخلت لحياتي وارتبطت بيها حتى انسى شوية
والصراحة حبيتها... واطلب منها اجي لليونان اخطبها ..اتزوجها وتجي يمي للاردن بس هي ماتقبل رافضة الزواج هسه ))
(( متت قهر بداخلي ... لمى تضحك علية . وهو يحبها صدك ..))
__ يا عيني .. ان شاءالله تقبل لمى وتسهل اموروكم ..هي هم تحبك طول اليوم تحجي بيك ....(( قفلت من النعاس .. باوعت الساعة ب 5 الفجر ..)
يلة اني اروح انام .... أسفة لان اخذت من وقتك .. وشكراً لان سمعتني
__لاااا بالعكس اني اعتذر بدل ما تحجيلي ..ضليت احجيلج عن حياتي
(( ترخصت منة ...كتبت رسالة لمى ..(( راسلت حبيبج وحجيتلة قصتي ..))
تركت موبايلي ونمت ...
باليوم الثاني زارتني لمى..
سولفتلها كلشي ..
__هههههههههههههههه لج خلي يطير ..ديري بالج تشجعي وتكليلة اي لمى تريد تتزوجك ...
__ههههههه تريدين الصدك ..حبيبج هواية يحجي ...يمة سطرني سطر لل5 ...الرؤيا صارت مشوشة عندي وهو بعدة يكتب (( فتحت الموبايل ...دخلت على دردشتنا ونطيت الموبايل ل لمى ))
__ ههههههههه عزززززة هذا شكد حاجي ...ولج شكد كاتب ..هاي اول مره هيج تره هو ميحب يكتب يتخبل من الكتابة اي واحد يحجي ويا يدز فويس لو يتصل
مرت الايام
ولمى ضاجت اكثر من مالك
كل يوم تجي تتذمر من عندة ..
تنتظر اليوم لينفذ طلبها حتى تتركة ..
__ لعب نفسي ...لج مايحس ..سويتلة اغرائات وكلشي مايفيد ويا ...
__ ههههههههههه ...غبية روحي كليلة طلبج وفضيها شكو تلمحين
__ لج شلون احجي مباشر مايصير ... اني اريدة يحس .. اريد انام ويا حتى اتركه ..اول مرة اطول بعلاقة هلكد ...انطيني حل شسوي عفية ساعديني شلون اغري اكثر
__ ههههههههههه جاية علية ؟؟ تريدين نصيحتي ..لج اني بعيدة حيل عن الزلم وسوالفهم
(( نفس الروتين كل يوم تجي ضايجة من مالك .... تتأفأف وتحط ايدها على خدها وتصفن .. تريد طريقة تقنع مالك ينام وياها ...اني اضحك واوسيها
__ههههههه كافي شبيج لزكتي ..قحط زلم مو عندج هوايه علاقات شلزكتي بمالك
__ والله بعد اموت موت اذا مايسويلي الاريدة ...لج ليعاندني اتخبل علية اكثر ...
__ تمام بس على كيفج ... ميحتاح تعصبين وتغثين نفسج ..
(( وصلتني رسالة على الماسنجر ..فتحتها من مالك كاتب بيها ..
(( عقلي صديقتج .. علميها وخليها تكون مثلج محترمة وثكيلة ..تره تصرفاتها مو حلوة ..طفولية وطايشة حيل ..مطبعة بأطباع الغرب ... تلمح على اشياء مو حلوة .... اتقربي منها واحجي وياها ..اني مااحب هيج بنية اريد بنية مثل البنات العربيات ثكيلة مو مثل تفكيرها ..))
عزززززةةةة شكد عيب... هذا عرفها شتريد ..جاوبتة
(( خطية شمسويلة...تره هي تحبك ))
(( اي تحبني صح بس تصرفاتها زفت ماتعجبني ..))
تركت الموبايل باوعت عليها ...
رفعت عينها عليه ..حركت ايدها يعني شكو ؟!
__ ماكو شي بس ليش هيج تسوين ويا خطية راسلني يكول عقليها
__ خيولي وهذا شنو حتى يتحكم بيه
__ لج كافي يجوز الولد مايحب يسوي هيج شغلات ويا البنت ليحبها ... معناها يحبج ويريدج زوجتة ...من تكونين حلالة يسوي كلشي وياج
__ خيولي ..وهذا شنو حتى اتزوجة ...والله مااتزوجة لو يبقى بس هالرجال بالدنيا
__ لمى حرام تلعبين عالولد لو ماتحبي كليلة .. المفروض من البداية تحددين شنو تريدين وتكليلة علاقة وقتية اريد كذا وكذا ..
__ كليلة انتي ..
__ شنو
__ كليلة لمى تريدك تنام وياها .. استعجلي حتى اعوفة ..
(( رفضت تماماً .... صارت تتوسل بية وتحاول تقنعني ..))
__ ايي ماشي ماشي ..(( كذبت عليها حتى اتخلص منها *)
__ لك فديت الحلوة ...يلة اني رايحة موتنسين كولي لمالك على طلبي ...
(( طلعت وسدت الباب ...ضحكت عليها .. مااعرف شنو براسها !؟ الولد رايدها زواج وشكلة تمام ..ليش ترفضة وتلعب علية ...اخخخ منج لمى ...شكد زعطوطة ..نظفت البيت ونمت ..الفجر صحيت على صوت رسالة على الماسنجر ... من مالك ..كاتب بيها
(( صباح الخير ..))
وهاي اول مره بحياتي شخص يكول صباح الخير ...
! قرأتها بأستغراب...
ههههه صباح الخير ..
اي خير هذا ؟
معقولة اكو انسان يتمنالي الخير بهاي الدنيا...
جاوبتة (( صباح النور اخوية تفضل ))
( يااختي ما حجيتي ويا لمى ماعلمتيها شلون تتصرف خليها تبتعد عن الاشياء لتشوفها وتأثر بيها تره شخصيتها كلش مو حلوة وماتعجب ))
(( ميخالف تحملها هي صغيرة بعدها))
(( صدكييني خايف عليها لان صغيرة ..لازم نوعيها ونعلمها ...رحمة تره صديقتج حيل طايشة ..لو ولد غيري تروح بيها صدكي ..))
(( تمام هسه اراسلها واحجي وياها .))
كتبتلها رسالة على الواتساب ..(( تعالي بسرعة ))
بعد دقائق اجتي لمى ..
لزمتها من عكس ايدها
__ لج تعالي شمسوية اليوم ..شبيج ويا الولد
__ شلون عرفتي
__ الولد راسلني ومقهور منج
__ خيولي ..مقهور شنو ؟ لج هذا مو رجال.. شكد حاولت ويا وردت منه يلين وينهار شوية ماكووو لج ماعندة احساس ..بس ثبتلي هو مو رجال .. صدكي مو رجال
__ خطية لا تحجين علية ...
___ لج البارحة فتحت مواضيع الجبل ينهد لو يسمعها..وفتحت مواضيع وسويتله اغراءات لج كل هذا مااهتم ابد
__ وافقي تتزوجي وشوفي ..اذا اجوي لليونان صدك معناها مابي شي ويكدر يتزوج مثل اي رجل
__ لااااا مستحيل ... شبية تخبلت يصير كلشي رسمي وبعد مااكدر اتخلص منة ..بعدين اني مااريدة مو تعرفين اني مااحبة
__ لعد عوفي اذا هيج
__ والله مااعوفة اذا مااخذ الاريدة منه ...وبعدين عندي خبر حلو .. كريس راح يتقدملي
__ صدك .. ومالك
__ لج شسوي بمالك ..كريس شخص ملموس ياما كعدت بحضنة ياما قبلتة ياما سويت هواية اشياء ويا بس العلاقة كاملة مايكدر يسويها يكول حرام الا اتزوجج ...هههههه مالك بعيد كلشي مااستفاد منه ..
__ واهلج
__ اهلي ماموافقين لان مسيحي
_ لعد شلون يتزوجج
__ اطلع اي حجة واسافر اتزوجة واحط اهلي امام الامر الواقع ...
(( لمى عنودية ... ماستمع اي نصيحة .. اوقات انصحها وهي مامهتمة تتصفح بالموبايل وترفع الشاشة تشوفني صورة معينة ...اي كلام مايعجبها تتجاهلها تماماً ..لو عدها فكرة براسها تنفذها وبدون تراجع ... عدها حرية تامة تسافر وقت ماتريد وتلبس اي شي يعجبها .. هاي الحرية استغلتها بطريقة خاطئة ....
بعد ايام قررت لمى تسافر للبوسنة حتى تتزوج كريس ... وكل هذا الزواج مبني على مصلحة الحصول على الجنسية الامريكية ...
وطلبت من عندي ابلغ مالك هي ماتريدة وماتحبة وتركتة ...
تركتني بموقف صعب ...
شلون اكول للولد هذا الكلام !؟
اكيد راح ينقهر .!
اوقات افكر والوم نفسي .!؟ معقولة اني الي يد بهذا اللعب كلة ؟!
مالك اكيد راح يفهم اني شريكتها ومساعدتها ...
مستحيل احجيلة الحقيقه خطية الولد يحبها شلون تكدر تكسر قلبة ...
راسلني مالك بعد ايام من انقطاع لمى عنة ...
__ السلام عليكم
__وعليكم السلام اخوية
__اسألج وجاوبيني بصراحة
__ تفضل
__ لمى ماتحبني وتضحك عليه مو
__ لاا هي تحبك .. بس اكيد صار عدها ظرف معين
__ لااا تركتني ... وماتريدني واضح صار ايام ما مهتملتي وماترد عليه
__لااا بس هي زعلانة اكيد صار خلاف بينكم ان شاءالله ينحل
__ طايشة وتصرفاتها سخيفة ... مااعرف عدها عقل تفكر بي لو لا !؟ لو اريد مثل ما هي تريد مااجي على حبيبتي والبنت نيتي اتزوجها .. اكدر ادخل بأسم مستعار بالمواقع واسوي ويا اي بنت لان هي رايدة هذا الشي وماهامها اني لو غيري ..بس لمى رايدها زواج وتكون ام اطفالي شلون اسمح لنفسي اسوي هيج وياها
__ والله مااعرف .. عالعموم ربي يهدي سركم
__ تمنيت لو لمى مثلج ... ثكيلة ومحترمة وواعية ..
__اشكرك ..
(( فتح مواضيع ثانية غير لمى ..كل شوية ويتذكر لمى يحجي شوية عنها ويغير الموضوع ..سألني على ريان وطبيعة حياتنا .. اني اجاوبة علكد السؤال .. منزعجة اتكلم مع شخص غريب ؟! ))
__ فرق بينج وبين لمى مثل الثرى والثريا
__ ههههه ما فهمت
__ انتي ثريا ولمى الثرى ..طايشة وغريبة حيل تمنيت لو هي مثلج ..
(( اول مرة شخص يوجهلي هيج كلام ... ماجاوبتة خجلت وابتسمت واني بعيده عنة هي مجرد رسالة على شاشة الهاتف .... اول مره اعرف الكلمة الطيبة تستطيع جبر الخاطر حتى لو كانت المسافة بلدان او قارة .....))
__ حاولي وياها خليها تصير مثلج علميها الله عليج ...
__ مو تعرف هي صغيرة
__ يا صغيرة ! هذا عذر نكولة ...لمى مو صغيرة لو صغيرة ماتريد شغلات اكبر منها ....
قبل يوم من السفر ..
اجتي علية طايرة من الفرح
__ باجر اسافر
__ صدك ؟ رايحة للبوسنة
__ايي راح اتزوج كريس
__ ومالك
__ خيولي هذا شنو ..اني مو كلتلج تحجيلة كلشي . كليلة لمى ماتريدك ولا تحبك ...كليلة راح تتزوج
__ خطيه ... شلون تسوين هيج
__ اسوي الاكثر .. دامة مابي خير شسوي بي ..تخيلي احصل الجنسية الامريكية ههههههههه الله .. تسوة مالك ومليون واحد مثلة
__ ماتخافين ..صورج اكيد عنده
__ بطرانة اني ماادز صوري لولد لج غير عندي كومة علاقات ههههههه .
ومالك مؤدب اقوى شي يسوي يجوز يحضرني هههههه..
(( كل شوية تتركني وتتصل بكريس ... ترجع تضحك وتسولف طبيعي ... اني مقهورة على مالك اكثر منها ...باليوم الثاني سافرت لمى ..واكدت علية اكول لمالك ان هي سافرت وراح تتزوج ..))
قررت احضر مالك
ليش ابقى احجي ويا
حلقة الوصل بينة وسافرت .
اجيت احضرة بس شفت هواية رسائل منه واصلتني ..
يسالني وين لمى .وليش مختفية هلكد عنة ..
وصل مرحلة يتصل علية ..وهاي اول مره مالك يتصل علية .
جاوبتة رسالة .
فتحها ورجع اتصل
فتحت خط
__ السلام عليكم ..
__ وعليكم السلام ..
__ احجيلي الصدك لمى وين ؟
__ مااعرف
__ بداعت ابنج لمى وين ؟! جاوبيني كليلي حتى لو ماتريديني هم عادي غير اعرف ..
__ اخوية تريد الصدك
__ اييي احجي حتى لو الصدك يأذيني
__ لمى سافرت للبوسنة وراح تتزوج ..
(( تألم بعد ما تلقى هاي الصدمة ..صرت اني اواسي بي .. .
كل شوية يسكت ويرجع يسولف عليها .... اني قررت انهر الموضوع ويا حتى يطلع من حياتي مو حابة اتواصل ويا شخص غريب وحتى لمى كانت حلقة وصل بينا سافرت وتركتة ))
__اخوية حتى قصتي اتركها مايحتاج تكتبها ..واعذرني احتمال اغير حساباتي ..اخذ راحتك
__ انتي هم راح تتركيني مو ... ليش اني قليل ادب مثلاً ..ليش تتركيني شسويت ازعجتك ؟
__ لاا مو هيج بالعكس انت انسان محترم وماشفت منك شي موزين
__ طيب ليش تغيرين حساباتج ؟ قصدج تحضريني وخلص
__ ههههه ماشي اخوية لا تنغث بس اهدء واخذ وقت ويا نفسك اكيد انت هسه مصدوم ..مع السلامه
(( سديت الخط .. انقهرت على مالك ...من وقتها وادركت تماماً الرجل المخلص بالحب مثل الامرأة يتكافئ بالخذلان ...
فهمت ان كل علاقة يكون بيها طرف عاشق بجنون
وطرف غايته التسلية واللعب فقط .
.....
اول يوم لمالك بعد هاي الصدمة ماتركني ..
اتمسك بية ...
كل شوية يراسلني ..
اني حاسة بشعورة ..شعور الخذلان ويكون بحاجة انسان يشاركة همومة ... كل مره ايدي توصل على خيار الحظر واتراجع ...افكر اني بيوم كنت منهارة وتمنيت شخص يسندني ويخفف عني ...
ومالك انسان طيب ..خلال هاي الفترة تواصلنا مع بعض ما شفت منه تصرف سيء يستحق احظرة ..
بالليل راسلني ... (( لمى راسلتني ))
جاوبتة (( صدك شكالتلك ))
التقط صورة للشاشة ..
دزها الي ..
لمى كاتبتلة ..(( بصراحة اني مااحبك ولا اريدك .. ردت من عندك شي واحد وانت ماسويتة الي وقررت اتركك مامجبورة اكمل وياك ..))
جاوبتة (( تمام اخوية اتركها براحتها اتمنى تتراجع عن قرارها وترجعون من جديد ..ماتستاهلون هيج يصير بيكم ))
__
استمر تواصل مالك وياية ..
كل يوم يراسلني او يتصل عليه
اوقات يذكر لمى واوقات ينساها
واوقات يلوموني لان اعرف لمى ماتحبة وتركت علاقتهم تستمر ..
الى ان بأحد الايام كال ...
__ تصدكين من الصبح لهسه اباوع على صورها ومقهور
__ شنو ...صورها ؟
__ اي والله صورها كدامي ليش كذبت علية .. ليش خدعتني
__ مستحيل
__ شنو مستحيل ...(( سكت ... وبنفس اللحظة وصلتني مجموعة رسائل منه على الماسنجر ...دخلت على الصور بنت جميلة جداً .. اطلالتها انيقة ..انبهرت ))
__ الله شكد حلوه هاي البنيه منو ؟
__ شنوو ؟؟؟ شبيج رحمة هاي لمى ..
__ شنوووووو يا لمى
__ والله لمى لمى شبيج .! ليش استغربتي
__ ههههههه والله مو لمى غير صديقتي واعرفها انت فاتح وياها كاميرا
__ لا ماتقبل ..
__ هههههههههه والله مو لمى بعدين هاي البنية شعرها طويل
__ ليش لمى شعرها مو طويل ؟
__ لا شعرها قصير
__ راح اتخبل...صار اشهر تضحك عليه ..واني عبالي هاي صورها ...بس تريدين الصدك
__ اي
__ احس القهر راح ... هههههههه والله ارتاحيت ع الاقل عرفت اني جنت احب بنية وهمية وكذابة
(( وفعلاً ... بعد ماعرف هاي مو لمى ... مالك نساها ..وصار مايذكرها...
مرت الايام ومالك على تواصل وياية .. طول اليوم يراسلني ...
اسلوبة محترم ...عقله ناضج ... واعي وفاهم ... صادق ..عقلاني ..حكيم ....
اسلوبة ... كلامة ..
اتسأل نفسي معقولة هذا من جنس ادم حاله حال عمي حازم ووسيم وووووو !؟
مهتم بية وبأبني ...لدرجه يطلب من عندي اشاركة كل تفاصيل يومنا
يختلف تماماً عنهم ... مايشبه اي رجل شفتة بحياتي .!..
احلى ما بمالك واعي جداً .. استشيرة بكلشي ..ودائماً يوجهني للتصرف الصح ..
يم مالك لكيت الحنية والاهتمام بحياتي ماسمعت عنة اصلاً مو فقط ماشفتة ..
استمر تواصلنا . وصار جزء من يومي ..
اول مااصحى على رسالة منة (( صباح الخير ))
وقبل لا انام اسمع اخر كلمة بصوتة (( تصبحين على خير نوم العافية ))
ياالله هذا الرجل حسسني اني فعلاً أنسان
شعور عظيم من اكون لا شيء بنظر الكل..لدرجه حتى كلمة طيبة ماسمعت شخص نطقها الي !
بس هسه ..وويا مالك ...صرت اشوف الاهتمام طنت بحاجتة ...مفتقدتة ...
صرت اسمع كلمات طيبة مو فقط كلمة وحدة
اهتمامة هذا اجبرتي اتمسك بي ..
اجاوبة او مايرن
ارد على رساله اول مايراسلني ..
وكأني اعرف من اتكلم ويا راح يرفع من معنوياتي بكلماتة اللطيفة ...
بعد مدة تواصلنا مع بعض ...
صادف عيد ميلاد ريان ..
مالك حب يشاركنة العيد الميلاد
ويقصد بالمشاركة ابعثلة صور ريان واجواء عيد الميلاد ..
الى الان ما فتحت كاميرا ويا .. ومابعثت صورتي ..
علاقتنا بعيد عن علاقات الحب ..
كانت تحت مسمى اكبر واعظم واطهر من العلاقات الزائفة والشائكة .
ممكن باعتبارة صديقي المقرب ...
واي صديق ؟؟ ♡♡ صديق يغني عن جميع البشر ..
__ يلة راح تعزموني بعيد ميلاد النونو لو لا
___ شي اكيد انت اول الناس
__ تمام دزيلي صورتة ..
___ اوك ..ههههه
__ ودزيلي صورتج انتي هم .
(( انصدمت ... حتى ضحكتي تلاشت شيئاَ فشيأ ...صورتي ..مالك يريد يشوفني.. اني مو حلوة شلون ادز صورتي ...
بسبب التنمر المستمر تعرضت اله ... وصلت مرحله اخجل احد يشوفني ....
اكيد من يشوفني راح يقلد علية ..اي هوو حلو شعره اشقر وعيونة ملونة .. اني وين يمه .. مو حلوة ...ويجوز مايريد صديقة بشرتها سمراء مثل بشرتي ...))
__ مستحيل اني ماادز صورتي لا تطلب من عندي هذا الطلب بعد
__ ديلة على اساس اني ماشايفج
__ وين شايفني
__ ههههه شايفج من زمان
__ مستحيل ..اني مادازة صورتي ..وريان ماياخذ موبايلي . تكذب علية
__ايي رحمة انتي ام شعر الطويل الرشيقة وعندج شامة وخدود ...الله احلى شي انتي ام خدود
(( صفنت وافكر معقولة بيوم وصفت نفسي اله !؟ زين معقولة احد الايام كنت نعسانة وهلوست وذكرت مواصفاتي ...لا مستحيل اساساً علاقتنا ما اتكلم ويا اتصال بوقت متأخر ...ممكن من لمى عرف مواصفاتي ..اكيد هي كالتله ماكو غيرها ..))
__ هههههه عرفت لمى حاجيتلك ...(( حطيت الكيكة ... ريان يصفق ويتفاعل ويا الاغنية ..اني ماسكة الموبايل واكتب وكلش خايفة ..))
__..انتظري ...(( دزلي 5 صور ..بيوم رحنا البحر اني ولمى ...كل الصور الاخذتهم الي دازتهم لمالك ...))
(( هسه صار وقت الجد بالخوف ... كعدت على الكرسي ... صافنة واباوع بالصور .. عزززة صوري يم مالك هاي مصيبة جبيرة ..))
__ ها شبيج صفنتي ههههههه
__ انصدمت والله
__ تصدكين عبالي تعرفين لمى ادز صورج .. توقعت عندج عادي
__ مستحيل عفية والله خوفتني هسه
__ ليش تخافين اطمئني لو اريد اسوي شي جان سويت من زمان مو صح
__ اي صح
__ بس تعرفين عجبتني الشامة لبوجهج
__عفية شتحجي انت مو عيب ..
__ ههههههه يلة مااعيدها بس والله هي حلوة ..
....
مرت الايام ...وصارت علاقتنا اقوى ..
كل يوم اصحى على رسالة ( صباح الخير ام خدود))
(( صباح الخير ياحلوة ))
يتصل علية ...يسألني بكل شي يخص حياتة ..
يسألني ب اختيار لبسة مثلاً ؟!
واني كذالك ...قبل كل خطوة احجيلة ... اروح للمنظمة وهو على تواصل وياية طول الطريق ...
مالك ماصار جزء من يومي
مالك صار يومي كلة ..
اصحى لحد ماانام لو احجي ويا لو افكر بي ..
شجعني ...فتح عيني على هواية اشياء اني غافلة عنها ..
صار يهمة يعرف كلشي يخصه
مثلاً...ريان اخذ علاجة ..
قستي حرارتة شكد طلعت .
شنو تابعتوا فلم
دفي نفسج الجو بارد ..
اكلتي زين .؟!
وفر لي الشيء لكنت مفتقدتة وهو الاهتمام ...
مرات افكر هذا الشخص حقيقي. !؟ لكيت بي كلشي مضيعتة ....
اخذني من الدنيا كلها .بهمومها ومشاكلها .
نساني مأساة وسيم واهلة ..
استطاع يصنع من عندي رحمة مولودة حديثاً لهاي الدنيا ..
استطاع يدخل لعقلي وقلبي ويحفر أسمة وصوتة وسوالفة بسرعة عجيبة ..
اوقات افكر ممكن اتسرعت وحكمت علية بهاي الطريقة ان هو انسان مثالي ..
او يمكن تسرعت وشفته بهاي النظرة .
ايي اييي يمكن لان اني محرومة من الاهتمام ابسط اهتمام اشوفه يطير عقلي ..
كلمة من مالك (( صباح الخير ام خدود) )
من اقرأها وكل يوم صباحاً ابتسم مثل اول مرة قرأتها ..
حتى الصباح صار يختلف ...
بي نكهة ...لي لون ....لون وردي يعم بكل مكان حولي ...
مستحيل شخص بكلمات بسيطة واهتمام عن بعد كدر يغيرني تماماً ...
حسسني اني انسان ...
حسسني الحياة حلوة وتستحق نكافح من اجل نعيشها
حسسني اكو شخص يخاف عليه ويهمه اكون بخير ..
ومجموعة احاسيس وفرها الها بطريقه مبالغ بيها .. اشوفها هوايه علية ....هوايه على رحمة الغير جميلة حسب وصفهم ....
خلال هاي الفترة تواصلي مستمر مع اخواتي
لكن اقل من السابق ... كل وقتي لمالك .. اخذني من كل الكون ... لو فكرت اراسل غيرة استأذن من عندة حتى يعطيني بعض الدقائق ...
مااعرف ليش كلشي بية يدفعني لاتصال مالك ولرسالة مالك ..
وكأني اعرف كل دقيقة ويا راح اسمع كلمة تفرحني ...
زاد افراحي .. تراكمت كلماته الجميلة ...
خلاني استكشف الحية ..اشوفها من وجه ثاني
سابقاً الحياة بنظري امرأة ميتة ..
او الحياة عبارة عن ايام متكررة نمشيها حتى نوصل للنهاية فقط
حياتي سابقاً بدون هدف ..بدون رغبة ..
لكن ويا مالك كلشي اختلف ...
صار كل يوم يطلب افتح كاميرا واصور الشارع واطلع ..
مايقبل ابقى حبيسة المنزل ...
بعد محاولات للرفض ماكدرت ..
استسلمت . طلعنا اني وريان ..الكاميرا مفتوحه مع مالك اصورلة كلشي ...ينبهر يحسسني اني بمكان واو لازم اضحك لازم افرح واطير بالهوى ليش دافنه نفسي ليش مضيعة حياتي ..
اوقات يفتح موقع الخرائط ويبحث عن مكانات جميلة بالقرب من بيتي ...
وكل يوم يختار مكان ..
او مطعم ...
ويوم على البحر
بحجة ..(يلة اليوم شوفيني البرج الابيض بسالونيك يكولون يخبل ))
(( يلة ام خدود اليوم اخذيني للمتحف ))
واجاوبة ...صار .
وبالفعل اخذ ريان واطلع ....
بأحد الليالي شهر ال 12 الباردة
وتحضيرات عامة في سالونيك للاحتفال برأس السنة الميلادية بعد ايام قليلة ..
قررت مااطلع .. الجو بارد
مالك طلب من عندي اطلع واصور كل الاجواء ...
رفضت اطلع .. الجو بارد ومافكرة اطلع ...ممكن برأس السنة اطلع مو هسه ..
لح علية ساعات طويلة ..
يقنع بية ..لازم اطلع .. ممنوع ابقى بالبيت
اخر شي اقتنعت اروح يم البحر
وايضاً فتحت كاميرا .
صار مطر ...
__ لفي الكاميرا
__ داصورلك شوف شكد حلو
__رحمة لفي الكاميرا
__ ليش تره ريان هياتة
__ مو ريان لفي الكاميرا بسرعة بداعتي
(( غيرت اتجاه الكاميرا علية ...ضحك وصفق بأيدية ))
__ لج هم الوجه الحلو وهم البحر وهم المطر هههههه اني صدك محظوظ جاي اشوف ثلاث اشياء حلوة بشاشة الموبايل
__ههههههه شكراً ...( كلش خجلت ..معقولة اني حلوة ))
__ باعي الشامة لتجنن .. والخدود فدووة ... والعيون السود ...اني صدك محظوظ والله
__ ههههه لا تبالغ
__ ابالغ ... لا والله اتمنى انطيج عيني وتشوفين رحمة بيها ... بعدين مو حرامات هاي الخدود تبقى بالبيت وتذبل ها هههههههههه
(( هذا اليوم كان اجمل يوم بحياتي ..حلو شعور الاهتمام ... والاحلى من تكون محروم تماماً من عندة وفجأة يوصلك بكمية وفيرة
...امشي وطايرة من الفرح ...ومالك طول الطريق يكول اني محظوظ ... اني محظوظ ...
رحت للكافتريا . طلبت طعام الي ولريان ...كل هذا مالك على الخط ..
صعدت الباص ...والخط مفتوح ..
وصلت البيت ..سدينا الخط حتى اغير ملابسي وارتاح شوية ....
بعد دقائق اتصل علية ...
__خير صاير شي
__ ايي صاير شي
__ شنو ..
__ اني فرحان حيل
__ صدك الحمدلله
__ رحمة اني محظوظ
__ ليش
__ محظوظ هوايه هم .
__ احجيلي ممكن
__ لا مااكدر ...
( رفض يكول شنو يقصد ... ودعنا بعض وراح ينام ... اني فاهمة شنو يقصد .. بس معقولة ..هذا الانسان المحترم يحبني .. زين معقولة اني اساساً دخلتله وتواصلت ويا حتر يكتب قصتي وذكرتله اني بشعة ومتعرضة للتنمر حابة بقلمة يكتب كل هذا .. معقولة بعد يفكر يحبني....
ياربي اني فرحانة صح ومتأكدة مالك يحبني
بس رافضة اصدق ..
مااعرف ليش ؟! صوت بداخلي يكول لااا لا مالك ميحبج .. انتي منو حبج ورادج حتى وسيم خدعج بالبداية واخذج ومن اول زواجكم ذكرج انتي سودة ومو حلوة ...
بس مالك عكس وسيم ..
مايشبه بأي صفة ...
شتان بين هذا وذاك. ...
كالفرق بين الليل والنهار...
لا يصعب التمييز بينهما إلا على كفيف البصر..
فلعلّ عذْره يكفيه !
وبرأس السنة الميلادية ...
وصار حدث بحياتي ومازال محفور بذاكرتي بكل تفاصيلة ..
طلعنا اني وريان خارج البيت
والاتصال مفتوح مع مالك ..
وبهاي الاجواء غلق الكاميرا ..
باوعت الساعة ب 10
__ يلة اني رايح انام ..(( استغربت ...مالك ينام ...مستحيل ينام هيج وقت ..وبهذا اليوم المميز وغلق الكاميرا فجأة .))
__ شعجب من وقت تنام
__ نعست مااكدر ابقى اكثر ..
__ تمام على راحتك
(( بس بداخلي اتمنى اكلة مو على راحتك ...ليش عايفني ونايم من وقت ...هوايه كلام اتمنى أكولة بس استحي ... اكولة بكلبي ...سدينا الخط ...ضاعت اللهفة للاحتفال ..
المشكلة تصرفة جداً غريب ....رجعنا للبيت .واني افكر ليش مالك هيج تصرف )).
ريان نام ..
بقيت اتصفح بالموبايل
الساعة ب11:45 تصل علية
__ مو نايم
__ لا مانايم ..بصراحه اريد اكلج شي..
__ كول شكو
__ بس مو تحظريني لو تضوجين من عندي ..
__ لااا كول شكو .
__ توعديني ما تنطيني بلوك
__لا والله انت محترم ليش احظرك ..
__ باعي رحمة اني ضميري مايسمحلي احجي ويا بنية بدون مااكول الحقيقة
__ كول تره وكعت كلبي (( طريقة كلامة اختلفت تماماً ..مو مالك احسة واحد ثاني ... مالك من اول مايتصل لاخر لحظة وهو يضحك ويخلق مواضيع وياية ما يحجي بهذا البرود والتعالي )).
__ها ... رجعتي للبيت لو بعدج
__ اي رجعت .
__ رحمة اني خايف
__ من شنو خايف
__ خايف عليج ومنج
__ ليش خايف
__ اني لازم احط حد .. اني مو غبي تعرفين زين .. ومو طفل ..
__ مالك تره خوفتني احجي
__ لازم احجي الحقيقة كلها ...
( تغير فجأة ... كلامة ما مترابط ...حتى نبرة صوتة اختلفت ...))
يتبع البارت القادم باجر ...
قراءة ممتعة
تقديراً لتعبي لان تنسوا التصويت ..