ماهر:نهار رحتي نتي حطيت بنتي اولى من كلشي ويما عمرها معطات لينار الشي اللي تستحقو لهذا تعامل لينار معاها ميهمنيش ومش مقلقني بيسك هي علمتها تكون شريرة معاها
ايلين:مي انا منرضاش يقولو على بنتي لسانها متبري منها وقليلة تربية
ماهر:كي يترباو هوما وساهلة
ايلين:ماهر بليز متعاملنيش هكا خوفي على بنتي ولا عقليتها تفسد
ماهر:ايلين انا ماشي اب خايب لهاد الدرجة انا صح عطيت بنتي كلشي واللي تطلبو يحضر مي منو علمتها الاكتفاء علمتها تكتفي باللي عندها ومتطمعش كثر ومتتكبرش ثاني على اللي قل عليها علمتها باللي كما تعامل لازم تتعامل المليح عاملو بالمليح والسيء اعطيه حقو بيسك انا علابالي وش كاين فالدنيا وموحال نخلي بنتي لقمة صايغة غدوة اللي يجي يفوتها عليها ويخليها تطيح وتتكعبر فالأرض وتتألم باه تتعلم الشي هدا انا وحدي علمتها الشي هدا بيسك كي تكبر مراحش تبقى علاقتنا هكا مهما كان رايح يبقى كاين حدود بين الاب وبنتو تخلي علاقتهم سطحية شوي وعليها هي رغم عندها كلشي كانت ديما تطالب بيك نتي وبوجودك فحياتها بيسك مقدرتش نكون الأم..صدقيني الأم الحنينة رفيقة بنتها هي الأم المحبوبة مش المتسلطة..صحا نستعرف باللي بلاك خليتها مدللة اما صدقيني الدنيا غدوة مراحش ترحمها كامل كنا صغار وتدللنا وكي كبرنا تمرمدنا..انا منيش ضامن بنتي غدوة وش رايح يصيبها عليها وهي مزالت فحجري وبين يديا وتحت جناحي وبحاجتي رايح نخليها تدلل وتزيد ونعطيها كلشي تحبو حب حنان احتواء تفهم وراح نسكت على اغلاطها اما مش الكبيرة راح نمشيلها برك فالخط ونعلمها تغلط وتصحح غلطها..انا ثاني كنت نعاتبها ونعيط عليها مي في موضوع واحد وهو نتي..كانت ديما تحبك تكوني معاها وكانت ديما تتمنى كي تجي من المدرسة تلقاك تستناي فيها تحيكلك حكايات وايامها فالمدرسة هادي هدرتها ايلين..من وقتاه يهمك احترام يما..على اساس متعرفيهاش؟؟انا بروحي نشهد باللي يما انا ذوقت بنتي المر بهبالها وتستاهل كلشي من بنتي ..انا ماشي عاصي والدين وانما واثق بتربية يدي...العتاب مش ديما الحل
خلص كلامو وشاف فيها تبكي ااه ياربي كل وحدة تندب من جيهة حابين يحبسولو قلبو بدموعهم اللي ميحملش يشوفهم ينزلو جبد ايلين لعندو تسامي بنتها متوسدين قلبو ويندبو ويشخنو وهو يمسح على شعرهم حتى مدة من الزمان باه هداو شاف فيهم كي لقا صوت شهقاتهم راح وبعد وجوهم قابلوه بحالة عينيهم وخشومهم حومر قريب ولاولو زوج حبات طماطم مش مرا وبنت
ماهر:خلاص يا ندابات وشبيكم تموتو على البكا؟؟
لينار:انا نشتي نبكي كي نقلق
ايلين:وانا نشتي نندب على تبيغيلي
ماهر:وانا منشتيش ندابكم لأي سبة بلعوه عليا
شاف فايلين:هزي بنتك
ايلين شافت فلينار اللي هبطت راسها ثانية ذرعيها مغشة:ارواحي صغرونتي
حركتلها الصغيرة راسها باللا وهي شافت فماهر رايحة تزيد تبدا تندب مي هو هز بنتو وحطها فحجر ايلين ووقف ماشي جيهة باب البيت اللي كانو فيها
ماهر:راني خارج كي تتفاهمو وتتصالحو طبطبو نخرجكم
خرج وغلق الباب وبقا عندو هبط بالشوي مستند ظهرو للباب يستمع ليهم
ايلين فوتت يديها برفق على وجه لينار اللي كانت فحجرها:مغشة مني بنتي؟؟
لينار:....لاا
ايلين:مي..مع ذلك انا آسفة..تقبلي اعتذاري ياماما؟؟
لينار تلاحت عندها مكملة الجزء الثاني لندابها:هيييه مسامحتك اهئ اهئ مامي تخلينيش بليييز انا شاطرة وعاقلة والله..متزيديش تروحي اهئ اهئ نوعدك نولي عاقلة ومنتحركش خليك معايا
ايلين زيرتها عندها:مستحيل نخلي اميرتي وعصفورتي الصغيرة وحيدة فهاد لحياة الظالمة اوك؟؟ديري كلامي حلقة فوذنك ياعمري اوك؟
لينار باستها لخدها:حاااضر
شافت فأرجاء الغرفة كانت كلها مديكورية باللون الزهري البيرو الصغير جنب السرير والسرير كلشي شباب وكيوت عندو حق كي قال امنتلها كلشي هي مدللة واللي تطلبها تحضر وعقليتها سيبون تبنات كيفاه هي فيومين تجي تحب تبدلها لالا لازم برك تسيي تتفهمها وتمشي معاها بالشوي باه متفسدش برك هي عندها ثقة فتربية ماهر وعلى كل الدم عمرو يولي ماء ومدام جيناتها فيها فهي مطمنة نسبيا
ايلين:غرفتك تهبل لينوشتي الزينة
لينار:هههه هيه عميمو مازن وبابا داروهالي
ايلين:هههه مليح بصحتك حبيبتي
لينار:يسملك مامي الصغرونة
ايلين:اييه مراحش تنعتيلي شغلاتك ولا تحكيلي كاش حكايات حابة تهديهملي؟
لينار:عندي بزااف شي نهدرو مي مش ضك حتى نرجعو لدارنا هنا وتكوني نتي وبابا مع بعضاكم كيما الماماوات والباباوات وقتها نقولك
ايلين :هههه حاضر ياروحي مبقاش بزاف ونرجعو كيما كنا نتي محظوظة بزاف بيسك رايحة تحضري عرس والديك
لينار:ههههههه علابالي
ماهر من ورا الباب مسح دمعتو على حوارهم المأثر ووقف داخل عندهم:خلصت المحاكمة على خير؟؟
لينار/ايلين:هههه ايه
ماهر:ايا مالا نوضو ننزلو
وقفو معاه ونزلو ريحو مع الجماعة شايخين وضاحكين في حوارات بين سليمة وماهر وايلين ولينار اللي كل مرة تحطلهم كلمة ونسيمة غير تشوف بنص عين قربت الخادمة فاطمة تحط الماء اللي طلبت سليمة منها تجيبو بيسك الأول اللي كان سخن وبدلتو بالبارد مي غير شافت ايلين قاعدة ولينار قدامها وكيفاه كانو يشبهو بعضاهم عرفتها هادي ايلين مرت ماهر زربت حطت الماء وجات هاربة مي رجعت على صوت سليمة
سليمة:فاطمة معرفتيهاش؟؟..كنت البيت ايليين ام لينار ومرت ماهر
غمضت عينيها بارتباك ورجعت فتحتهم تشوف ليهم
فاطمة:صح...الله يبارك تبدلت
ايلين تبسمتلها:يعيشك خالتي
سليمة:بنتي قربي سلمي على خالتك هي بمثابة خالة ماهر ونتي علابالك
ايلين قبلت الفكرة بكل راحة ووقفت ناحية فاطمة اللي كانت باينة متوترة ووجها صفر وصلت ليها حظنتها وهمست فوذنها كي حست برعشتها:انساي الماضي خالتي كلشي فات
فاطمة بدورها همست فوذن ايلين بصوت نادم لوكان ماشي الجماعة تبدا تبكي:سامحيني يابنتي هو..هو..
ايلين:الله يرحمو..معليش كامل نغلطو السماح خالتي
بعدو على بعضاهم وكل وحدة عبرت الثانية بشوفة ليها معنة وتفرقو كل وحدة لطريقها
سليمة:اييه مالا يا ايلين وقتاه نديرو الخطبة باه ترجعو لبعضاكم؟
ايلين:صراحة خالتي حاليا حنا فدار خالتي عمي سمير رانا نوجدو لخطوبة جان وش رايك نديرو وراها
سليمة:وعلاه منديروش كيف كيف من الفرحة تولي دوبل ومنطولوش كثر لازم ترجعو تبنيو داركم
ايلين:الصراحة الراي مش ليا وحدي اذا نتوما قابلين نزيد نتشاور معاهم ونعطيكم خبر يما سليمة
سليمة:ان شاء الله حبيبتي توحشنا ريحتك بيناتنا منيش مصدقة وقتاه ترجعي هنا
ماهر وهو هايم فيها:وانا كثرر
سليمة:اخخخ يخي يخي ذراري زمان لا حشمة لاهم يحزنون
ايلين حمارت من تعليق سليمة ولينار بقات تضحك برك ووقفت جارتها من يدها
لينار:ماما ارواحي نوريك المرجوحة تاعنا اجريي
ايلين وقفت معاها:هههه بعقلك برك ابنتي راحو مع بعضاهم وسليمة تشوف ليهم والدمعة فعينها
سليمة:الله يغفرلك يا مختار على عملتك اللي فرقت بيها هد الزوج المساكن(من عندي اللهم not amine)
ماهر تقبض قلبو ياريت كان السبب فالميت ولا فالأحياء اللي متعرفهمش قرب سلم على راسها:ربي يرحمو ويغفرلو يما
صباح جديد بعد ايام ليوم الحالة قايمة فدار عصماء ونور كل دار توجد فروحها بيسك ليوم خطبة نور وجان المنتظرة والمفاجأة انو مام دار عمراني كانت قايمة قاعدة توجد بيسك ليوم نفس نهار خطبة ايلين وماهر اللي قررو يديروها موحدة في نفس لاصال ويفرحو مع بعضاهم
فدار عصماء مربعة فاللرض فشومبرتها وقدامها رسائل في شحال من ظرف كل وحدة مكتوب عليها اسم تنهدت ومسحت دمعتها اللي طاحت ووقفت خباتهم فدرج خزانتها على ظهر ومشات للغرفة اللي جنب غرفتها لقاتها حاطة لينار على السرير وتمشطلها فشعرها ولخرا هازة تلفونها وتلعب بيه الطفلة هادي هات غير تلقى تلفون تحصل فيه المشكل متلقايهاش تلعب نوو تلقاها تفتف طالعة هابطة كل مرة تجرب حاجة من اللي علمهالها مازن وزاد كمل عليها جان وسيليا ولات متفوت عليها والو عيطت كي توجعت من شعرها
لينار:ايي مامي شعرييي
ايلين بعدت البروس وهبطت باستها من خدها:سامحيني ماما نتي اللي مهبطة راسك مع التلفون ومش عاطيتني وضعية مليحة عليها وجعتك
هزتلها براسها ايه وخلاتو طالع وكملو خدمتهم قربت ليهم تتبسم
سيليا:صبااح الخيير طائراتي الشهباات
لينار::اهلا خالتوو
قربت قعدت قدامها وتشوف فيهم
ايلين:واش الحب علاه موجدتيش روحك؟
سيليا غاست في يديها اللي يتساراو على راس لينار تحط فاللمسات الأخير:امشطيلي شعري بلييز
شافت فيها ايلين بغرابة لقاتها من نيتها عينيها كانو مغرغرين او وشبيها قعدت بيناتهم وجابت راس كل وحدة على كتف من كتافها
ايلين:وشبيك صغرونتي الكبيرة؟؟
سيليا:حابة نتدلل
ايلين:هههههه دخيلو اللي يتدلل من عيوني حبي نكمل للينار ونبدا فيك
سيليا:ههه اوك
لينار:سيليا فورماطيت تلفون ماما
جابتهالهم على غفلة دارو يشوفو فيها لقاوها من صحها التلفون طفا وحلف يعاود يشعل لوكان جا يهدر راه ياهواه من اللي قالها ارحميني يا عبد ربي ايلين شافت فيها ببرود والفت خرايبها كل مرة تخرجلو جنبو من جيهة يسما تهناو للزوج وقفت وكملت تمشطلها
ايلين:معليش تهنينا للزوج
سيليا:مي..لي فوطوتاعنا؟؟
ايلين:متخميش حبي منخليش اسرار كيما هكاك فيدين هاد المافيا خبيتهم فالبيسي ونسخة على فلاشة باه نضمن باللي موحال يروحو
سيليا ضحكت في قلبها بزاف ههه ياريت كانت المافيا كيما لينار برك مي..للأسف هي أبشع ببزاف
سيليا:ايا بيان مالا نروح نبدل ونجي تمشطيلي
ايلين::اوك ولتحت كملو كلشي؟
سيليا::ايه ياك كملنا كلشي لبارح بقات خالتي عصماء راهي تمشطلها الكوافير اللي رايحة تبدا فيك نتي ياعرووس
ايلين حشمت شوي:ههههه مرسي الزين لعقوبة ليك
موس وتغرس فقلبها حلم ومحال يتحقق شحال حلمت من نهار سمعت بخطبة ماهر وايلين وجان ونور باللي هي وعشيقها مازن يجي يوم ويوصلو لثم ثاني ويذوقو بنة الحلال مي ساعات الأحلام والتأملات ممنوعة على شي ناس فالدنيا..مي شكون يدري بلاك فيها خير !!
عرايسنا مشاو للصالة قبل العرسان معاهم كل حوايجهم والكوافير و في الغرفة الخاصة بالعروس كاين نور وايلين كل وحدة مقابلة مراية وكوافير عند راسها تمشطلها بعدما حطو المكياج تاعهم
كملولهم وجاو لبنات يتفرجو من وحدة لوحدة
سيليا/بشرى:خارجين تهبلو ياناس رايحين نغيرو بيسك شعورنا مش صوفر
نور:هههههه لالا نتوما بلون شعركم وكلكم على بعضكم سكر و عسل
ايلين:ايه نتوما بوحدكم تتاكلو
سيليا:احي على لسان ختي ومرت مرت خويا الزينات...
بشرى:هههههه متفرحيش بيه بزاف لسان مرت خوك كي يتبرا منها غير اهربي
ايلين:ههههههه فردة ولقات اختها جان يستاهل مرا تهبلو خليه يعرف يتشيكر علينا منا وجاي راه ليك يانور وريه العين الحمراا
نور:ههههه عليا ويفضال
سيليا:اوو بالشوي برك داخلينها تخطيط على خويا خييير
كامل:هههه والو والو
بعدو الكوافيرات عليهم وناضو كل وحدة دخلت لشومبرة تلبس بيسك الشومبر اللي هوما فيها كبيرة وفيها زوج غرف صغار منفردين
سيليا وبشرى خرجو وخلاوهم يوجدو رواحهم نزلت للصالة وين كانو الضيوف ملمومين مشات ناحية الكوزينة مي غير فاتت خبطت فشي واحد بعدت شوي وهزت راسها قابلوها العيون اللي تعشقهم
مازن كان دخل حوايج للكوزينة وخارج مزروب كاره انو دخلوه هكا وسط النساوين مي الصح هو مهموش النساوين اللي هنا هموو مرا وحدة مزالو متزاعف معاها وخايف لا يتلقاها ويحطو قلبو الكلب فكاش موقف لا يحسد عليه مي دعوتو موصلتش للبلافوو وولات كي لقاها خبطت فيه بعد حاكم راسو ويشوف فيها وش قصتها الطفلة هادي مع اللون الأسود بلاك هدا هو ضرتو قشها ديما بالنوار خاصة تاع المناسبات شغل تبرز فزينها للناس شاف فيها من فوق للوط هاديك الروب النوار اللي فوق ما هي قصيرة حد فخاذها وزايدة طالعة معاها شقة على الجنب ومكبوسة عند صدرها وخصرها محكومة عند رقبتها اللي نازلة معاها سنسلة مرصة بالماس وفيها دمعة الماس كحلة كما فلايكها قلتلكم ضرتو هو اللون الأسود
تحمحم وخرجها من فطنتها
مازن::شوفي قدمك ونتي تمشي
سيليا::نتا اللي ديما تدخل فالناس داوي روحك ومبعد اهدر عليا
خنزرو فبعضاهم زمان
مازن:انا اللي مهبول بيسك راني قاعد نحكي مع مهبولة كيفك
سيليا تبسمت تداري فدمعتها اصلا هي ليوم متأثرة فوق الحق مي هو زاد فكرها فليامات اللولة تاعهم هنا فدزاير كي كانت مزال متعقلت بوالوو مكانش يخوفها الفقدان خاصة فقدانو هو كانو ديما زي القط والفار عديان وديما متناقرين ههه عندو حق اللي قال أقوى حب هو اللي يجي بعد الكره
Flash bac
"مازن:امم(ملاحظ التوتر في عينيها )اوك هههه ماو مهبولة كيفك تصاحب غير المهابل
سيليا:هههه ايه كيفك بعد علابالك
مازن:ايه علابالي بروحي مهبول بيسك راني قاعد معا مهبولة كيفك (شاف فساعتو)اا ديجا وقت شوفي ايلين وهيا نخرجو نتغداو"
Flash end
فطنت كي تجاوزها هو خارج مي هي دارت وهدرت
سيليا:مازن اتهلى فروحك
دار ليها بجنب:من بكري متهلي فروحي..نتي اللي تهلايلي فروحك واعصابك(دار وغمزها)مبعد كي تشوفي لبنات كامل يتغيمزو على الرزق اللي عطاهولك ربي ونتي تتكبري عليه
عطاتو بظهرها:الرزق من ربي كي يجي يجي وكي يروح يروح
خلاتو ودخلت للكوزينة مي هو بقا يشوف في البلاصة اللي كانت واقفة فيها ويتبسم
مازن:مش مازن عمراني اللي يتخلى على رزقو...مع الأيام نشوفو
راح منين العرسان اللي كانو قاعدين ويستناو فخطيباتهم يوجدو باه يطلعو يجيبوهم ويركبو لخواتم تبسم متخيل روحو معاها مي حلم كبير هدا وصعيب يوصلو مع الشيطانة اللي بلاه بيها ربي
المعازيم كثرو وحفلة الخطوبة كانت ميكس يعني مخلطة رجال ونسا كلهم معارف ماهر وجان من الخدمة وناس الشركة بيسك كل واحد منهم معندوش لافامي من غير عايلة نور اللي كانو خوالاتها ونسا خوالها وولادهم لثم
الحالة مقلبة بالغنا تقول عرس حتى قربت بشرى للعرسان
بشرى:يا جماعة عرايسكم واجدين هيا تنزلوهم
ماهر وجان وقفو كل واحد منهملابس كوستيم شباب كثرمن خوه جان بكوستيم رمادي وشيميز بيضا مكبوسة على الكور تاعو مفتوحة قفايلها عند صدرومطلع شعراتو على جنب وطراسي اللحية الخفيفة تاعو
وماهر كان لابس كوستيم بلونوي وشوميز بيضا ثاني مكبوسة على الكور تاعو ومخلي لحيتو شوي مي كانت مطراسية ومعدولة
مشاو مع بعضاهم وبشرى من وراهم جات تفوت تعكلت فشي قريب جات على وجهها لو ماشي يد شدتها دارت تنهج من الخوف تاع هاد الطيحة بيسك تبهديلتها كثرمنها شافت جان لابس ومستيكي روحو تقول عريس ثاني سروال جين بيض مع شميز نوار ومعدل شعرو يشوف ليها وجهو ثابت
جبدت يدها منو كي فاقت على روحها وعدلت الروب تاعها ونطقت:مرسي
دانييل:ماشي بروبلام تولهي برك..مفهمتش نتوما لبنات علاه تموتو على الاقمشة التافهة ومبعد توليو تمشيو وتميلو
بشرى شافت فيه ببرود هي ديما هكا هبالها غير مع القراب ليها:اول شي..صحة قوادة اذا كنت تدير مزية وتولي تعاير بيها..ثاني شي هادي اسمها اناقة الأنثى ومش اقمشة هادي لبسات نخيريوها بعناية على حساب وش يتناسب مع وقتها..ثالث شي نعطيك نصيحة احسبها من دلالة خير "قبل متهدر خمم مليح بيسك مش كامل ناقصين تافهين فحياتنا"اووك؟؟
دانييل حك وذنو ورجع خنزر فيها:علاابلك باللي راني كثرمنك ب10سنين يا الدابة ولوكان انا ماشي شديتك راكي تفرزعتي هنا وتفرعتي وعزرين ملمكش..مي اصلا لبنات ديما هكا تلقاي لسانها سابق طولها..طيري من قدامي لا نديفورميلك وجهك بقالي غير فرخة تجي تلعبها فايقة معايا
بشرى هزت صبعها فوجهو تهدد:رايح تندم على كل حرف نطقتو..عس روحك
تجاوزتو وراحت طالعة تسب فيه تحت خشمها اصلا الخرا عطلها خرجة صحبتها مع عريسها يخي يخي شكون عرض سماه؟؟
فالوقت اللي كانت حريبة صغيرة قايمة لتحت لفوق كان كاين بيزنس كبير قايم سيليا وقفت فالباب الخارجي تاع شومبرة لعرايس مش مخلية العرسان يفوتو حتى كل واحد يفرغ جيبو فيدها
جان يمسح على وجهو:ختي يرحم باباك بعدي على جد الباب حالفة تهبليني دراهمي اللي كانو فجيبي كامل عطيتهملك
سيليا متكية على الباب برجل وتحسب فالدراهم بطريقة احترافية:اخخ خصارة عليك جان كامل بعزو هاز غير 5ملاين فجيبو قليل بزاااف هات برك الدفع بالشاك مقبول
جان هز يديه فالسما:ااه ياربي بلوة حياااتي
ماهر جا يفوت ردتو سيليا بيدها اللي دارتها على صدرو مرجعتو للور
سيليا:محزرتش نسيبي فرغ جيبك وفوت
ماهر:انا ثاني فلحساب؟؟
سيليا:والله انا ليوم مقررة نخدم على روحي الفرصة متجيش زوج مرات
لاح يدو لجيبو وجبد البورت موني بيه باللي فيه بلا حساب وعطاهولها تبسمتلو برحب
سيليا:شااطر نسيبي(شافت فشريكتها مقابلتها)شوفي شغلك الزين احسبيلي دراهم باباك قربت لينار ساماتها على الباب بنفس الوضعية وحكمت بورتموني تاع ماهر تحسب وتعاود حتى كملو شغلهم وصيدو ما قالهم رايهم من العرسان باه بعدو على الباب
سيليا:ضك تقدرو تفوتو كل عروس فشومبرة ايلين اللولة ونور الثانية اجريو قبل منبدل رايي ومتنساوش الورد
ماهر هز الورد من الطاولة و دخل ديراكت وجان هز الورد تاعو و قرب للباب وخنزر فسيليا قبل ميدخل:اصبري برك نردهالك ثالثة ومثلثة يابايرررة
سيليا:ههههه في كاش منام تخطاها وفات للشومبر الثانة كيما قاتلو قابلتو ملاكو ونورو اللي كان النور يشع منها بروب غوز فاتحة ذرعيها كول باطون مخليين كتافها مكشوفين مكبوسة عند الصدر وبومبي من تحت وبشقة من تحت لحد فخذها شعرها كان محكوم لمة خفيفة وهابطين شعرات من قدام على وجهها مكياج هادئ فالغوز وغوج ثاني كان غوز خلاها تبان كيوت بزااف فنظرو للحظة حاجة وجعتو فقلبو هادي البراءة كامل تستاهل وش رايح يدير منا وجاي؟؟..مي..ثم ثم تفكر علاه ختو اولى من كلش وكيما هي مدارت والو وخلصت هادي رايحة تخلص مع اللي دار كلشي يستااهلو هو برك اخ يحمي فختو الصغيرة نورمال عندو كل الحق
قرب ليها وعلى وجهو تبسيمة يشوف ليها حاشمة ومهبطة راسها هزهولها بيدو وعطاها الورد
جان:جيتي تهبلي..قنبلة فتنة
نور غاست فعينيه ونطقت بلاما تحس:ونتا أحلى
هبط نظرو لشفافها ورجعهم لعينيها بدا يقرب بالشوي لوجها وشواربها بالتحديد وهي كانت برك مغمضة عينيها وتستناه وش رايح يدير مي التحراميت سنة لحياة بعد على بشرى اللي زدمت روس للشومبر تعيط
بشرى:لصقتو انسيبي هيا انزلو اجريييو طولتووو
جان بعد على نور مغمض عينيه بغش وهي شافت فيه وفصاحبتها اللي غمزتها عرفتها دارتها بذما ضحكت وهو فتح عينيه مخنزر فيها
جان:عجبك لحال كي منعتك صاحبتك؟؟
حركتلو راسها بايه تفقص فيه تعوض وش دار فيها هاد ليام فالشركة يهبلها وفاللخر مطلبش منها مومبا رقم تلفونها
جان:ههه اوك ازين مبقاش بزاف وتشوفي وش ندير فيك(غمزها وعض شواربو)
نور بعدت عليه:وش تديير؟؟
جان:هههه اعمال خاصة عمري
نور شافت فبيشو اللي تضحك عليها وخدودها توردو بسيف نطقت:هيا ننزلو راهم يستناو
جان:اوك هيا عطاها يدو باه تكروشي معاه وهي مكانتش من العاكسين وكروشات فيه وطبعا بشرى دارت دور الفوطوغراف وحكمت اللحظة الرومانسية هادي اللي دغدغت قلبها مي معليش كل واحد يعيش مكتوبو وهي مزالت صغيرة ووقتها جاي
فالغرفة المجاورة كانو عرسانا لاصقين فبعضاهم ماهر غير شاف ايلين بروب غوج ساتان طويلة سيري على الصدر ولارج من تحت وكول باطون كتافها كامل عريانين مع شقة من فخذها حتى لتحت وهي ماشطة شعرها على جنب مبوكلي مفرود بذما دارتو هكا باه يغطي شوي من كتافها والمكياج اللي عند عينيها غوج فاتح وففمها بوردو مع شوافرها اللي طالعين وبحر عينيها اللي يلمعو ديراكت تلاح عليها اصلا هي رزقو من زمان ومتحوشها فوق الحق راه غير يستنا فالوقت اللي راح يرجع ينفرد بيها ويدي راحتو وقتها ويعوض وحش السنين اللي فاتو
جبدو على بعضاهم كي تقطع عليهم النفس من بوستهم الطويلة حاط جبهتو على جبهتها للزوج ينهجو
ماهر:متتخيليش شحال ستنيت هاد النهار اللي راح نرجع فيه ونكون قريب ليك ياحب حياتي
ايلين:ولا انا ياعمري زيرت عليه محظنتو وراسها على قلبو:راني خايفة يجي نهار ونخسرو بعضانا ولا نبعدو على لينار
ماهر باسها من جبهتها:مراح نخلي والو يقيسك ماهر هنا معاك وجامي يخليكم ياممو عينيا نتوما شمس حياتي وانا جامي نقبل نخسر وحدة فيكم نشالله ربي يعوضنا على كل وش فات تكون هادي بداية جديدة لينا
ايلين:امييين ياربي
حب يرجع يغرق فيها مي..
سيليا:ياااااااااااا العييييييييييب بععععد
دار يشوف فيها تقول قتلتلو امو مبيهش شوي قدر يسبها
مي هي ولا على بالها تبسمتلو وقربت لايلين
سيليا:ييي حبي طالعة تهبليييي(قربت ليها تبوس وتعمل فصوت مخليتو قريب يرفس لرض برجلو اللي كانت تضرب)ربي يحفظك من العين بب امممحح
ايلين:مرسي ياروحي
ماهر:هيا خلينا ننزلو
سيليا:ههه هانا نازلين شاورتلو بيدها ينزلو وهي هزت تلفونها وقعدت تصور فيهم خرجو ورا العرسان جان ونور كي وصلو للدروج خلاو لينار اللي لابسة روب حمراء قصيرة
تنزل قبلهم تنثر فريشات ورد من سلة صغيرة على موسيقة هادئة جان ونور يهبطو وعلى تزغريتات العائلة كامل عصماء قربت لنور تعاون فيها تنزل خايفة تتعكل بالروب والحاضرين يصفقو وبشرى تصور فيهم وتضحك وحدها جاتها متعرفش تزغرت سينو راهي حرقت الحالة غير وصلو لتحت قرب جانير ليها يتبسملها وهي غير شافتو تبسمت حتى ضروسها كامل بانو هادا فرحتها فهادي لحياة عاودت شافت فجان وفيديه اللي حاكمينها وخايفها تطيح خلاو قلبها يرفرف محلاه شعور تكون تحت اجنحة موثوقة خوك معاك ونتي تحت جناح راجلك فالحلال احساس مميز متعوضو حتى علاقة حرام(ربي يلبس كل وحدة برنوس الستر مع سيد الرجال يااااربي...انا ثاني معاكم قولو امين اجمعين)
كملو على تزغريتات العايلة جيهة البلاصة اللي راح يركبو عليها لخواتم كانو زوج طاولات كل طاولة عليها طارت وقفو جيهة طاولتهم وبقاو يستناو العرسان الثانيين ينزلو هوما عطاوهم الأولوية فالنزول بيسك هادا اول زواج ليهم عسكهم هوما اللي راهم يعاودو
نزلو ثاني مع لينار اللي توزع فالورد وسيليا تصور وعصماء وسليمة زغرتو ونسيمة واقفة تشنف مش عاجبها الحال مي تزمممر شكون لاتي بيها ولا برايها؟؟ زادو قربو عرسانا الثانيين لطاولتهم وين كاين لاطارت تاعهم بشكل غير مشابه لطارت جان ونور ولخواتم وكيسان الجي طبعا كلشي حسب العادات
تلمو المعاريض لقراب قدام الطاولات نور وقفت قدامها امها وجان قدامو عصماء سمير ومجيد مقربوش عاملين شوي حياء بقاو قاعدين مع الرجال البرانية اللي مقربوش جانير قرب لنور ولصق فيها ابتسامتو فيها مترين
بداو المراسم والغنا تبدل ركبو نور وجان لخواتهم لبعضاهم كل واحد يتأمل فالثاني
جان هز الخاتم اللي كان على شكل قلب حواشيه مرصعين بالماس وفالنفص الماسة على شكل قلب كان يهببل خلا نور تهبل عليه
رجعت هي هزت خاتمو وركبتهولو كان خاتم اسود مرصع فالنص بزجاجات يبانو الماسات كوحل نور مهيش مليونيرة كيما جان باه تشريلو الألماس مزالت مبداتش طريقها ومشروعها الخاص
رجعو هزو
الموس كيف كيف وقطعو لاطارت اللي كان مكتوب فيها اسمائهم مع خطوبة سعيدة و دارو منها فصحن صغير ووكلو بعضاهم ودارو نفس الشي مع الجي كل واحد شرب الثاني من كاسو تعالاو التزغريتات عصماء تبوس فولدها وملاك زعما ثاني تلاحت تبوس بنتها وجانير فرحان قرب لجان هدرلو هدرة وبعد يصفق على اختو باين وصاه عليها يتهلى فيها... خوالاتها يباركو ويزغرتو ويصفقو مي فالجهة الثانية كان الهدوء مش لأنو لاتيين مع نور مي مكانش اصلا اللي يلتى منا
ايلين تشوف فنور كيفاه محظنة امها وخوها معاها وباباها من بعيد يتفرج دورت عينيها على كل الصالة اللي كانت تقريبا مليانة مي هي..والو متعرف هنا غير ماهر وعايلتو هو وعايلتها الوحيدة سيليا وعصماء وجان وسمير يتحسبو على الأصابع صح يمكن تقولو بزاف مي تبقى بنت ومحتاجة والديها معاها والديها من دمها اللي خسرتهم ومعاشتش معاهم وش يكفي..فالمواقف هادو يبان اليتيم صح كي تركب الخاتم مكانش امها اللي راح تقرب تسلم عليها ومكانش خوها اللي راح يقرب يوصي ماهر عليها ومكانش باباها اللي رايح يعاود يوصي عليها ومكانش خالتها اللي راح تزغرتلها....فاقت على يديه يتساراو على خدها ويمسحو فدمعاتها اللي طاحو
ماهر:انا ومعاك ومراحش نسمح فيك اوك؟؟انا نحبك ونعشقك ونوعدك نعوضك كلشي يا حبي والله...علابالي مهما كان مراحش نوفي فراغهم مي انا معاك ديما وندير مجهودي كامل باه برك نوصل لنص بلاصتهم عندك
ايلين حظنتو:نتا كلشي فحياتي ماهر متخلينيش
ماهر:انا جامي نديرها يا عمري وعشقي(باسها على راسها)امسحي دموعك يا احلى عروسة خلينا نفرحو بيومنا ياحبي صح هوما مكانش جسديا مي ارواحهم هنا..في قلوبنا
هزتلو راسها بايه وبقاو يتبسمو ويصفقو لنور وجان مي ثم ثم الجماعة كامل تلمت عليهم مام نور وجان قربو يتفرجو
وقفت عصماء وجان قدامو نور جنب ايلين عامل فيها اخ كبير وسيليا ثاني معاهم وماهر وقفت قدامو نسيمة وسليمة ومازن عايلتهم كامل هنا فرحانين معاهم
دارو نفس الشي تاع جان ونور من لخواتم
خاتم ايلين كان خاتم راقي وسامبل يبان الماس رقيق على الحواف وفالنص الماسة صغيرة
وخاتم ماهر كان بالفضة الصفراء وفالنص بحلقة سوداء فاصلة بين اللون الذهبي
فاتو للا طارت والجي وكملوها بالتزغريت من كامل الحاضرين مام خوال نور اللي كانو يزغرتو عليها زغرتو لايلين كأنو بنتهم هوما هنا باه يفرحو صح؟؟..مالا خليهم يعملو مزيا ويفرحو على اكمل وجه
ايلين تاثرت خلاص من الموقف وقربت لعند عصماء محظنتها وتبكي ولخرا تمسح وتكوراجي فيها
عصماء:ليليان فخورة بيك ابنتي بركاي مرديتي يوم فرحك حزين يولي فال مش مليح خلاص يا حبيبتي
ايلين بسيف بعدت كي شافت سيليا قربت ليها وتبكي مام هي علابالها باللي لوكان انت بلاصتها كانت قلبت الحالة بالبكا بيسك هي صح وحيدة حظنتها تبكي معاها
سيليا:خلاص احبي ليوم فرحك ملازمش تبكي شوفي اللي هنا ك امل عايلتك راجلك حبيبك وبنتك معاك وانا وعمو سمير وجان كلنا هنا علاجالك وباه نفرحو معاك يا روحي الغالية تاعي
ايلين::هه صح شكون كيفي تزوجت زوج مرات وبنتها حضرت عرسها
سيليا:هههه عندك الزهر ياروحي من ليوم رايحة تكوني مولات دار ومسؤولية وام ولازم تكوني قوية باه تقدري تقوميهم على اكمل وجه
ايلين::مهما كان وصرت رايحة نبقى ديما ختك ويماك الثانية وكتفك اللي يسندك ديما مفهوم؟
سيليا اكتفات بأنو تحظنها وتبكي برك وشمن كلام تقدر تقولو ضك وغير هي علابالها وش جاي بعد ساعات
بقاو يبكيو و جان قرب ليهم محظنهم ويسكت فيهم وماهر معاه مي هوما حتى بردو قلوبهم باه سكتو
......
هاااي بارت بعد غياب مي بسيف رتبت افكاري
ضك درنا اكبر خطوة فالكرو وهي اللي رايحة تبني النهاية مبقاش بزاف ونكملو هاد الكرونيك طلعولنا التفاعل ضك وخليوني نشوف آراءكم ويطلع مورالي نزيدكم غدوة
بالمناسبة هدا اطول بارت فالكرو