ماء مغلي 💥 ٤٥____
..♣️🩸 ماء مغلي ٤٥ 🩸♣️..
*
مشيت للسياره وشفتهه كاعده بالسياره ..
كلت هاي طالعه وياهن وانه ماميزتهه
رحت كبل صعدت بالسياره وكلتلهه..
- حبيبي صار ساعه انتظر غير تخابرين
تكليلي طلعت
ماردت عليه وانه دك تلفوني ابويه خابر
جاي احاجيه واكوله راجعين وحركت السياره
مشيت لراس الشارع واجتني مكالمه
باوعت
المتصل ( راحتي & عافيتي )
درت وجهي بساع عليهه وهي هنا كاعده
وهذا رقمهه يتصل !
جاوبت واجاني صوتهه ..
- لك حيدااار نعلى على غيرتك وينك
كمت اطكطك وحدي بالشارع لك تعال ارجع وين وليت وعفتني
هناااا عيني كبل راحت على رجلين المره الكاعده بسدي ... وشفتهه ماكو بس سواد
انتبهت هاي مو عبايتهه ولا جسمهه
ولا كعدتهه ... كلبي من الرجفه مانطاني اباوع لوجهه ...
اسوق وانه كامش تلفون بايدي وكاطع الخط
والعرك يزخ من راسي والدرب نعميت بعد
ماشوف شكدامي ولا بيه احجي واسالهه
انتي منو !!!!!
رفعت رجلي من البانزين علكيف وانه بايدي التلفون .. وكفت سياره وانه ساكت بس كلبي يدك براسي ...
عيني على الشارع كدامي والدنيا ظلمه
فتحت الباب بهدوء ونزلت وعفته مفتوح
ورجعت امشي بساع بساع امشي واختنك صدري بعد ماكدر اجر نفس اندار ماشوف شي وراي كلشي اظلم وعيني بعد ماتفرزن شي
وصلت راس الفرع الي جنت طابك بي
وهناك تلكتني مره كمشت ايدي وانه
كبل رفعت بوشيتها شفتها ريري
بعد ما كدرت اوكف على رجلي كعدت بالكاع
واريد اجر نفس وكلشي صرت ماسمع بس
اشوفهه فوك راسي وتهز بجسمي
حسيت على بروده برجلي فتحت عيني
وشفت امي يم راسي .. وريري يم رجلي
مخليه خاولي مبلل عليهه وامي تخلي كمادات على كصتي ...
كعدت اون و جسمي يرجف بروده بعظامي
تصل ... كل شويه يدثروني بغطى ثاني
وانه رجفه بيه ..
ريري فتحت عيوني بايدهه وضليت اباوعلهه وارجف وهي تكلي ..
- لا تحجي شي زين اي شي صار لا تحجي
ضل ساكت وبعدين تصير زين وفهمني شبييك
غمضت وغطيت راسي وهي يمي ضلت وياي كاعده تغسلي وتغطيني ومخليه هيتر يمي وكامشه ايدي تدفيهه عليه ..
انام واكعد وما حس بس عليهم من اجفل وكت يغسلون ايدي لو رجلي ...
مادري لشوكت ضليت نايم وكعدتني ريري
حتى اكل ..
كعدت واشوف ماكو احد هنا غيرها
شفت الدنيا نهار وجايبتلي غدا ..
صارت توكلني وانه امسح بكصتي
شويه وكلتلهه..
- عوفي الاكل كافي شبعت
- اووكي براحتك
وخرت الصينيه واجتي حضنتني وتمسح على شعري ..
- شبي حبيبي ابو الحيادر
شنو الخوفك هيج ومرضك
- ريرررري كارثه صارت وياي والحسيين
- بس فهمني شلون تعوفني وتروح ولك لو ما مريض جان طلعت حيفي بيك
- لج بويه انه ماعفتج ماااعفتج
وخرت منها وضليت احجيلهه..
- انه واكفلج شواي من البيت ذاك
وانتظر بيج انتظر وماطلعتلي كلت خلي امشي للسياره انتظرهه هناك
ورحت شفتج هناك كاعده بالصدر
كبل صعدت وحركت سياره
- عزااا ولك اني طلعت ادور عليك وشفت سيارتك راح توصل راس شارع وخابرتك
- هو انه هنا كاعد ويه مره مسوده من فوك لجوه وساكته انه حجيت اول ما صعدت
كلت حبيبي ليش مخابرتي وعايفتني انتظر
وماردت وحجيت بالتلفون وهي هم ساكته
وطبكت السياره ونزلت وهي ساكته
- لك لتخبلني يااامره هااااي
انته نزلت وحدك والسياره اني اباوعلهه ماكو احد نزل منها
- لاتفتين من كيفج ااااانه كاعد وياهاااا
جا انه شلون احرك سيارتي واعوفج !
غير انه مأمن انتي وياي وطلعنه
- حيداااار حبيبي اتذكر زين
بس اهدأ وركز زين واتذكر شلون شكلهه
خاف متخيل احد كاعد هناك
لان انته من وكعت وضليت على ايدي
اني صحت رجال ساعدني واخذتك للسياره
ومابيها احد ىاني عيني عليها لان انته عايف الباب مفتوح ونازل وماكو احد نزل من السياره وراك
- جااااااي اكلج كاااعده يمييي يمييي
انه شفتهه من اول ماوصلت السياره
وكلت هاي انتي صعدتي واجيت صعدت وحركت
لاتجذبيني انه جاي اكلج شفتهه وكاعد يمهه
- داكولك ماكوو احد نزل من السياره
اني عيني عليهه من ساعه ما وكعت بايدي
ومحد نزل منها وبقت بابهه مفتوح بس مال سايق
- ااااانه ماجاي اهذي بكيفي
جاي اكلج شفتهه كاااعده بالصدر واجيت حركت سيارتي عبالي انتي
وانتي خابرتي وانه من خوفي هاي ساكته ماتحجي شي عفت سياره ونزلت
ماعرفت اتصرف كبل نزلت وعفتهه
ماجذب علييييج انه شيطلعني بدونج !!!
- يلا عيني يلا ميخالف ماصار شي
هدي اعصابك ماصار شي عادي
- عااادي !! لج هاااي الكعدت وياي منوووو!!!
منووو راااح اتسودن ياربي انه ليش نزلت
ليش ماسألتهه ليش ماكشفت وجهه
- يعني هي ماباوعتلك ماتحركت ماحجت ولا شي وياك !
-لاا لااااا مالهه نفس بس كاعده بسوادهه
- خاف جانت شايله سلاح !
- مادري مانتبهت كلشي مانتبهت
بس اتذكر هي لابسه اسود بس هيج بعد كلشي مابالي عليهه
- لازم تتذكر حيداار دنعرف شي
خاف وحده من النسوان اجتي وعرفت هاي سيارتك يعني نكشفنا- مااادريييي
لا تسأليني شي كلشي مادري
انه شفتهه واجيت صعدت ومشيت لراس شارع وانتي خابرتي هاي كل شي صار
- يبووو يبوووو
اووووف هسه منين طلعتلنه هاي صفح
بس حيدار صدكني محد نزل من السياره
واني والرجال اخذناك للسياره وبايدي فتحت باب الصدر ومحد كاعد هناك
- وين كعدتيني بالصدر !!! بمكانهه !!
- اي لعد وين اكعدك غير هناك
- ويييييييين كعدتينننييي خرب بييييج
لج هاي شدراني شني ومكعدتني مكانهه
-اييييي واني شدراني شصاير وياك اشم ايدي !
- ريري عرفيلي منو هاي وعلي ما ضل دم بيه
لج كاعده هي مصخمه وساكته وانه احاجيهه وماتردلي وانتي تخابريني منا تكليلي تعالي
جا هاي منين طلعت ! شكعدهه يمي !!!
- اكولك هي مال دروب
سياره مقفله وع البصمه تنفتح والبصمه عندك
منو وصل وفتحها وصعد وانته مو يمها !!!
- لاااا ياربي
يعني هاي شني ! جنيه !
- حيداار تره الدنيا جانت مغرب واحنه بمنطقه كلها مشعوذين وسحوره كلشي نشوف ويطلعلنه وهاي صارت نصيبك
- لج شلووووون تصير شكل مره مبوشه وتكعد يميييي
شجابها للسيااااره وانه مو بيهه
انه بعيد بعيدددد يم البيت وابعد من البيت
شجاب صخامه بسيارتي تنتظرني !!!!
لاتوكفين عقلييي لا تسودنيني
جرت راسي حضنتني وانه حيل عصرتها بحضني ...
- دخيل الله لاتخليني هيج
وعلي تعبت ماجاي اكدر استوعب هذيج الساعه والصار بيهه
دخيل الله ريري خلصيني سوي شي
- ادري هسه شصير متكولي شصير
هسه دطول بالك وكلشي راح بعد ساعه مغربيه وراحت
- مااااتروووووح من بااااااليييي
ريرررري اريد اعرفها هاي انسيه لو جنيه !!
انه مارتاح اذا ماعرفها
- بلكت جنيه تطلع
- عااايزنييي ضيم
- ايي لعد تطلع انسيه يعني صخيمه من هذنيج وكشفونا وشوف شناوين عليك
خليهه جنيه شارده من اهلها وتعبت كعدت تستراح بسيارتك
عبالهه توصلهه وانته ضربتها بوري والمكروده ماعدها لسان يحجي خطيه
- انجببييي انجبييي
ااااااه ربييييي دخيلك
ولج لا تعوفيني هسه هاي اذا جنيه بعد تجلبلي
كل مغربيه تكعد يمي
- شجاك حيداار شبيك خايف هيج
شد حيلك هسه شصار
- اكلهه كاعد ويه صخااااام تكلي شد حيلك
لج ما ضل بيه حيل وعلييي
راااسي راااسي حيطك من الوجع دخيلك ربييي
- اووف اووف شلون بيه
يايمه شلوون بيه
ضلت تفرك براسي وانه ارجع واتذكر كعدتي وياهه وتكش روحي مادري شيصير بيه اضل الوب ..
ضليت اليوم كله انه بس اتخيلها يمي
شوكت ماغمض عيني تجي بالي وحسها يم راسي احسها يم ايدي وافز واضل اصيح لريري تجي تكعد يمي ..
وصار الليل ما طفينا الاضويه وكاعد اتلفت
هاي جنيه يعني ترجعلي .. مادامهه كعدت يمي وخصتني انه يعني ترجعلي بعد ...
ثاني يوم هم نفس الشي تعبان جسمي مهدود حيله مابيه امشي خطوتين ونوم مانام اضل افكر وكاطع الاكل كله بس رهبه ضلت بروحي اريد اشيلهه من بالي ماكدر ..
انه ماخلي ريري تطلع من الغرفه
كله ضاله يمي ..
امي موصيتهه تقرا قران وهي ماتعرف تقراه
تخلي سماعات باذني وتضل يمي ايدهه بايدي
غفيت شويه وكعدتني ريري...
- حيداار اكعد جماعتك بالدوام يخابروك
دوامك عايفه وديسألون عليك
- مابيه حيل احد عوفيني
- دوام هذا دواام شنو مابيك حيل
لشوكت تضل هيج نايم كوم عاد صحصح
شنو وكفت الدنيا عندك !!
غطيت راسي وعفتهه .. وهي جاوبت تلفوني
وضلت تحجي بهدوء وسدته ...
وره شويه هم رجع دك تلفون وهي جاوبت
وضلت تكللهم ..
- مريض يعني شيسوي للمكتب
مريض مو متعاجز من الدوام
اي ادزلك تقارير مرضه ماجذب عليك
ديلا اووكيي باي
كامت من يمي و تالي رجعتلي جرت الغطى من وجهي وتريد تكعدني ..
كعدت وضليت مرتجي على المخاد
وهي تكلي ...
- تره طولتهه اووكييي
ماعضتك صخامه حتى تموت روحك
كووم صحصح عاد شنو تعوف الدنيا كلهه عليه وتضل نايم !
- ما بيه وعلي
- حيداار اني احتاجك كومه حجي عدنا
شوكت نحجيه ! ليش وكت الي توصل للحلك توكع !
اريدك وياي خلي نشد همتنه ونخلص مو طكت روحي
- ريري واذا طلعت هاي جنيه صدك وكاعده وياي بشكلها هاذ
- يبووو فدووه عوفهه انساهه هسه انته اول مره تشوف جن وصخام
مو رايح مكابر وبيتكم بي العجايب شو ماخفت !
جانو فوك راسك يدبجون للصبح وانته تحط راسك وتنام معليك بيهم هسه هاي تخوفك !!!
- جفلت وعلي انه حاسبهه انتي
وكاعد احاجيهه وماشي وياهه بامان
وتطلعين انتي مو وياي وهاي مادري منين اجتي وانه مقفل سياره ! شتردين مني
اصير !!
- اي ادري موقف صعب بس ميخالف شد حيلك انته مو صغير
وراك التزامات .. دوامك بي ناس تتغالب مو مال تعوفه وتكضيهه نوم
اني احتاجك وياي شلون تعوفني وحدي
اني احتاجك تفهم شنو يعني احتاجك
لازم تشد حيلك وتضل وياي
اني عندي رجال مو طفل وكت يخاف يضل بظهر امه
كوم اوكف على حيلك واني وياك مساندتك
ماريدك تحتمي بيه .. اريدك تكوم بزودك تمشي وتواجه واني بظهرك اسندك فهمتني تره تعبت وحدي ماكلني الخوف عليك ومنا البيت والامه فوك راسي كلهه
عاد بس كوم على حيلك خلي يرتاح كلبي عليك
اخذت نفس وضليت افرك بوجهي وهي ادنت يمي وحضنتني ..
- مو تعبت من هالعيشه
شد حيلك وخلي نخلص ونطلع منا
نروح نعيش بيت وحدنه بغداد ونرتاح من التفكير واضل وياك ماعوفك
نضل هناك مرتاحين وحدنا بدون هم
يلا حبيبي انته قوي كلبك وارجع لصلاتك
شلون تعوفهه صار كم يوم شوف شصار بيك من عفتهه !!
ارجع صلي وهسه تصير زين واحجيلك فد سوالف الا تشحنك طاقه
- ضلي وياي رجعيني لحيلي
- وياك عومري
كوم هسه اسبح واجيبلك الغدا الطيب
وانطيك بوسات تسويك سوبر مان
رحت وياهه سبحت وهي يمي بالحمام
تحاول تغير مزاجي وانه احس واكف بعدني هناك بذاك الشارع ماعندي شعور. ..
طلعت واكلت وصعدت وياهه لغرفتنا
كعدت تفركلي ظهري وتسولف وياي
وانه بس ساكت ...
لنص الليل انه صاحي بس مغمض
واحس عليهه كل شويه كايمه تسوي شغله وترجع تتمدد ..
غفيت شويه وحسيت بايد على وجهي
كبل فزيت وكمت من مكاني ..
- شبيك حيداار شجاك
- هاي ايدج ! ايدج لووو لاا
كاعده انتي جنتي لو فزيتي وياي !
- ايدي حبيبي جنت داشوفك حرارتك
شبيك هيج فزيت دكافي ياعيني شيلهه من بالك
- استغفر الله استغفر الله
ريري مادري شجاني ماااجنت هيج وعلي ماجنت اهتم
هسه مادري ليش ضلت الخنكه والرجفه بيه
- دتوهس هواي
هو كلشي ماكو .. بيتنا امان ما بي شي
وعايشين براحه وصار كم يوم على روحتنا ولحد هسه ما شفت شي رجعلك
بعد الخوف شنو !!
نمت بحضنها وضلت تبوس بيه ..
كلتلهه..
- احجيلي الصدك كله
شصار هناك وانه ناسيه ؟
- حبيبي جان وكت غروب والمنطقه تخوف
كلشي يطلع وكت المغربيه لتضل توهس عاد راحت
- واذا رجعت ! هم ارجع اسوق فد يوم وتطلعلي
- لاا لاا ماترحع بعد هذيج المنطقه مانوصلهه
زين بس ارتاح ارتااح عاد كافي تفكر ذبحتني بتفكيرك هذا
- انتي عرفتي شي ؟ ششفتي بالبيت ! شحجيتي ويه هذولاك !
- اول بيت كلتلهم
هذا البيت الي بصفكم جان بي رجال اشتغلي
مره وضل يطلبني فلوس وهسه ادك بابهم ما يطلعون شنو شالو منا ! موجودين ؟
كلولي لا موجودين
كلتلهم شو ميفتحون الباب شكد دكيت وميطلعون
كلولي شلون دكيتي الباب ؟
كلتلهم عادي دك دكيته
كلولي لا دكي مرتين بايدج والثالثه بالزنجيل
هسه يعرفون انتي وحده من معاميلهم ويفتحولج
- هااي شلووون !!
حتى بدكه الباب شياطين !
- اي دسمع واسمممع بعد شكو
اني تشكرتهم وطلعت للبيت الثاني كلت داشوف شسامعين شيعرفون عليهم
كلتلهم اكو وحده بالمنطقه هنا عندي وياهه شغل وكلتلي ارجعيلي بس اني اجيت وشو البيت الي قصدته يكلولي مو احنه الرايدتهم
وبلكت تدلوني عليهه
هذولخ طبعا نغوله ما نطو حجايه بسرعه
فضليت وياهم اجيب والوف حجي
ووصفتلهم شكلهن وكلتلهم على المحروكه
كبل تغيرت نظراتهم وضلو وتحد يباوع للثاني
كلولي منين عرفتيهن ؟
كلتلهم على حنفيش حجيتلهم عليها
اشو هذوله كبل انطوني كارت الامان
وضلو يحجولي ..
البيت هذا وهنا يمكن ما جايات بعدهن
هنه بالليل يجن هنا والصبح مرات يمرن
وانتي وحظج شوكت تلحكين بيهن
كلتلهم انطوني رقمهم كلولي مانكدر روحي لابووو البيييت ينطيج اذا قبل
- وابو البيت منين هذا ؟
- هو سألتهم شسمه ؟ كلولي اسمه
' النجار '
روحي دكي الباب والي يطلعلج كليله اجيت طالبه النجار وماامشي الا احاجيه
- هااا وشفتيه ؟
- اي رحت دكيت الباب مثل ماعلموني
واشو شويه وفتحلي رجال مدحدح ولابس اسود وجهه ازررررك وريحته ايييععع
عبالك واحد مطمسيهه بالتواليت ومطلعيه
بالكوووه تحملت اوكف احاجيه
كلتله اجيت طالبه النجار واريد احاجيه
وضل يسألني منو وشعندي وياه
كلتله
تيهت بيت نسوان عندي وياهم شغل بعده ماكمل والبيت الي بصفكم دزوني عليكم
عاد كالي ضلي بمكانج انتظري
وراح جوه ..
طبعا البيت من جوه خييسسسه
كله وصخ وكراتين مشمره وطين الكاع كلهه اثار طين والحايط رايح منخور نخر بالارضه
جان يطلع هذا الثاني .. طويل وازيرك مثل هذا وشايل بيده سبحه بيضه ومربي لحيه
بيضه منفوشه تلعب النفس
وريحته تكتل .. عيونه حمممر واجه وكف كدامي كالي ..
قبل ما نحجي كشفي وجهج اشوفج
- بس لا كشفتي !
- لاا طبعا كلتله جايه اريد رقم فلانه منك
ماريد غير شي
كالي مانطي رقم احد لغريب وجهه ماعرفه
اشوفج يلا تاخذين طلبج
عاد اني لفتهه عليه ..
كلتله مو انته عندك ناس وياك هنا واني
اخاف اليشوفني يعرفني ويلزمهه عليه لزمه
كالي ماكو احد يشوفج كلهم جوه وبس اني وياج هنا ..
كلتله وهذا صاحبك هم يخوف وكفتهه
كالي هسه انتي الي تريدنه منه شنو !
كلتله اريد بس رقمهه ضيعتهه وشغلي ناقص
غير اريد اكمل شغلتي يمهه ودلوني عليكم
جان يكلي هي جوه تفوتين تحاجيهه !!
- عليييج علييي !!!
رحتي عليهن ! شافنج !!!
- اسكت غير يبس ريكي
بعد ضليت اخيط واخربط
- شسويتي ولج شحجيتي؟!- شسوي غير تورطت وكلتله اي فوتني خلي اشوفهه بس كلتله اريدهه وحدهه تجيني
ماريد احد يعرفني وانتو لازم تضلون حافظين خصوصيه الي يدك بابكم
كالي اي صار
وكعدني بغرفه وحدي .. بس ماحجيلك شلون غرفه بس حياطين وكراتين بالكاع
وضوا اصفر واحد
- اوويليي ياربيي انه وييين وديتج ؟!!!
استغفر الله
والله اكلت روحي بالندم شلون رضيتلج تمشين عليهم
- لا عومري هاي الخطوه لازم تصير هسه لو بعدين لازم تكعد وياهم ونشوفهم شنو ماشنو
المهم عيني وجان تجيني الامااايه
ام طنطول اجتي ويه النجار
- شافت وجهج !!
- اي شافتني بس هي
لان كلتلهه تقربي يمي ورفعتلهه البوشيه
بس شافتني ونزلتهه ..
كلتلي ماشايفتج اني شوكت مشتغله الج؟
كلتلهه اني ماكاعده وياج وجه بوجه
بس وحده وصلتني شغل منج وهذيج البيتهه رحت ويكلولي ماكو وادك عليهه رقمهه ماحصله واجيت هنا دزوني كالو انتو تجون الصبح ومرات بالليل واني وحظي اذا احصلكم
وردت اخذ رقمكم ماعبالي انتو موجودين
وهمزين هالرجال الطيب وكفلي خوش وكفه
وكالي انتي هنا
اكلتهه اكل بالحجي وكعدت اتمسكن الهه
واجيب واحجي على مرت حمايه ماذيتني وتسويلي هالاعمال وماخلص من شرهه
وعينهه على بيتي ونافستني ويبوو سويتهه ماكو هيج
عاد كلتلي هسه اني مستعجله لازم اطلع
بس انتي احجي ويه النجار فهمي الي تريديه بالمضبوط وهو يساعدج شغله اضبط مني
كلتلي اني هاي الفتره كلش ماعندي مجال
جان اخذتج وياي لبيتي وسويتلج الي تريدي
- هااي ام طنطل ! ماعدهه مجال !
جا السحوره الرايحه جايه تسويهه شني!
- دسسمع عيني هي مو شغله مالها مجال
بس تريد تربطني ويه صخيم
-عليج علي!!!
-اي غير من طلعت ضليت ويه هذا
لزكلي الا اشوف وجهج يلا نحجي بالشغل
واني تحججت سياره تنتظرني واريد اطلع
كالي لازم ترجعيلي
كلتله نطيني رقمك ونحجي بالتلفون جيتي صعبه
ماقبل كالي لا تضلين وياي واشتغل كلشي كدامج
كلتله شلون هيج ؟
كالي حضري نفسج وارجعيلي فد يومين
واني تلكيني كلشي محضرلج واعيشج ساعات بالخيااال واخلي كلشي بايدج
حتى فلوس اخليج من التراب تطلعيهن
والي تريدين تخلصين منه بنفس اليوم اكتله الج وضلي حره بحياتج
- هذا كوادهن يطمع بالنسوان ويشبع روحه
غضب الله عليهم عساهم بضربه ماكامو منهه
وانتي ضاله تسمعين حجيه مالطمتي بحلكه ومشيتي
- الطمه بحلكه غير اني جايه بمصلحه
بس اسوي شي يجلب بيه بعد لازم اطلع روحي منهم بذكاء
هذوله الي بفوتلهم كبل يجلبون بي
- وعاد شكلتيله !
- كلتله اسوي مجال واجي وحدي
هسه سياره تنتظرني لازم ارجع لا يحسون عليه هواي تاخرت
وطلعت طكيتهه وكضه لراس الفرع
واباوع يمعود ياحيدر ولك وين عفتني ورحت
وانته جاي تمشي وصلت راس الشارع
كلت خلي اخابر اني عبالي راح ترجعلي لو شو شعندك بس شو انته منيتك كبل طالع بزودك
- تصخمت عيشتي بهذيج الساعه
الله لا يراويها لبشر
وعلي نزلت نفس مابيه اجر بعد
- هو انته مصفر ضغطك اخذتك كبل للبيت
طبعا رجال غريب هو صعد ساق ووصلنه للبيت
ردت اني اسوق بس كلت هسه غير يخترعون يشوفوني بعباتي وبوشيتي وصاعده سياره شكبرها وفايته للمنظقه
كلهه تصفن بوجهي ويسووهه عيبه شكبرها شكدها
چنه بيت الساده تسوق سياره رجلهه
يبوو شيخلصنه بعد
- ايييي زين سويتي
سوقي بغداد هنا مااخلص من اهلي
- اي ادري ادري
تره كلت لاهلك انته هناك بالدكتور دخت ووكعت وهيج مشيتهه عليهم
- اي بويه هسه اي شي احجي
- حيداار باجر ترجع نفسك زين وعكبه تروح لدوامك تره بس يومين راح يحسبولك اجازه
وهذا اليوم من ضمنهن فتلاحك لنفسك
- اي ايييي
ثاني يوم نزلت ووكفت باب المطبخ اباوع للسياره ..
رحت فتحت بابهه وكلت انه هنا كاعد وهي
هنا !
قفلتهه ورحت صحت واحد من الجهال كلتله
افتح باب الصدر ..
مانفتحت وياه ..
رحت صحت ريري وكلتلهه افتحيها
وهم مانفتحت وياهه ..
وانه جربت افتحهه واعت بيهه وبكل طريقه حاولت ومانفتحت ..
وكل هذا وضليت بشكوك ..
هاي جنيه لو انسيه !! وشعدها صعدت هنا؟
رجعت لبغداد بالليل نفرات ..
السياره بعد ماكدر اصعدها عفتها بالبيت
ورجعت نفرات ...
كل هذا شهر وريري تقنعني نكتلهم بعد عرفناهم بالمضبوط
الاثنين الرياجيل
وحنفيش وام طنطل وبنت اخوهه وجنتهه
بس انه مامستعد .. شلون اكتل ست نفوس مره وحده !
ضلت كل يوميه ترجع تفتح موضوع وتكلي خلي اتصرف وانه اجل الموضوع
لحد ما صار وكت رجعتي الهم ...
وهناك حصرتني بالحجي ..
- يعني لوين تريد توصل !
داكولك هذوله همه اخلص منهم واذا طلع وراهم احد هم نشمره لنفس الدرب بعد شكو المعمعه هاااي
- ريري وين نكتلهم ! هي بس اكتل واسكت
وين ! وشلون؟
منو يساعدنه ! هذوله سته شلون ناخذهم مره وحده كل يوم واحد !
- معليك انته اني ادبرهه
بس كول اييي والعصابات مكومه
بس يردولهم شغله
جيبهم حتى لو بمليونين هم يشتغلون هذوله
كاتلهم الفكر بس شغلهم
- ومنين نلكاهم هذوله ! تعرفيهم !- اي اعرفهم
غير مكومين بمنطقتي !!
لك بابه هو اني حارس البيت مالتي حرامي
تريد ماعرفلي واحد يصك بالناس !
- عليج علي !
ياحارس هذا !
- حارس لعد شعبالك اني عايفه البيت تايه هيج ع الثقه !
لاا عيوننيييي لاا
اني اعرف امن بيتي بايدي
- شلون امنتي ! والحرامي !
- هو اني خليت الحرامي حارس بيتي
شوف هذا اكو رئيس مال حراميه بالمنطقه
كلشي يعرف كل ابره تنباك يعرفها منين ومنو اخذها
فأني اتفقت وياه كلتله راح اسافر وبيتي اريد ارجع الكاه مثل ماعفته
وادفعلك شهريه ٢٠٠ ماقبل راد اكثر
كلتله ٢٥٠ والبيت بابه ماينطخ
كالي هاهيه روحي واعتبري بيتج ماينشاف بالمنطقه بعد
و شوفه عينك البيت على حطته لليوم
- وعلي كااارثه انتييي
يعني تعرفينه حرامي وتعرفين راح يبوكج
- اي اني اعرف اوادمي
ماخليته يبوكني انطيته كم فلس شبع بيهن
شرب وجكاير ووصى جماعته مايندكون بالبيت بعد شكو احسن من هيج !!
اشبع الحرامي ومايبوكني هذا قانوني
فهسه خليني اتصرف اكو ناس كاعده عطاله بطاله خلي نشغلهم شويه
- زين بس اكلج
همه ياخذوهم يكتلوهم واحنه ماندخل بشي ؟
- اي اوصيهم خطف وكتل واحنه نكعد هنا نسمع الاخبار بس
- وشلون اهلهم !
- يشمروهن بمكان ويخابرون تعالو اخذوهن
بابه شبيك سوالف المسلبجيه ماتعرفهه !
- انه سيد مو مسلبجي زييين
- ديلااا درينا
رجعلي خطي هذاك خلي اخابر يلا
فتحت المحفظه وانطيتهه الخط وانه متردد
كل شويه اكللهه لاا وهي ماتسمع مني بعد
كالت نفذ ونخلص ...
خابرت وكالت ..
- صخر طالبتك بفزعه
عندي جماعه اريد اشرب من دمهم
واريدك تساعدني
ايييي دمهم سم اريدك تسيحه وتشفي كلبي
ادزلك كل التفاصيل وانته رتبهه عندك بعد
بسسس اريد دمممم اووووكييي
يلا چاووو
شمرت تلفونهه ع الفراش وضحكت كلتلي ..
- نلحكهم بطنطول ونسويلهم
كششش ملك حياااتشييي
يتبع 💕
#