نبدأ بذكر الله ﷽🤎✨
عــرش الروليت
بارت 20
قراءة ممتعة 🚫
لا تنسون التصويت والتعليق بين الفقرات حبايبي...
❢ ═──── · · • • • ❂ • • • · · ────═༻❢
كاعــدة بالكرسي اليمة وجهي دايرته على الجامه ابــاوع للشوارع يا ترة هم يجي يوم والتقي بأهلي الحقيقيين؟؟
سؤال يتردد براسي صار فترة يستقبلوني؟
يحضنوني يحبوني؟؟
شي اكيد ما راح اكعد عدهم ولا حتى احبهم
امنيتي فقط اعــاتبهم
الأعرفة الـ يتيم اهله ميتين
انه يتيمه وأهلــي عايشين !.
جــريت حسرة على حياتي
عقاب -: ليش تتحسرين هل كــد ؟؟
-: احس اكو صخرة كاتمه انفاسي
وروح امنيتها تطــلع من هذا الجسد
عقاب :- الأنســان مرات من كثر المصايب
الـ تصيرله يتمنى لو ما مخلوق اصلاً يتمنى الموت
انه وياج بهل نقطة احس بجروحج
ابتسمت بقهر صح هوه دائماً يفهمني
لأن الـ عشنا شي قريب من بعض
درت علي سألته سؤال بتردد ولكن
خاطري اسمع جوابه
روليت -: انتَ تحبــني ؟؟؟
ضهرت على طرف ثغرة شبه ابتسامة
سرعان ما انمحت عيونه يرمشن بسرعة
دار عليه ورجع باوع للطريق
-: اذا كــتلج أي شنو ردت فعلج؟؟
جاوبته بدون تفكير
:- ما أحبـك
ضحك بس بطريقة حسيت بيها غصباً
علي يعني مثل الـ يضحك على جروحة
همس بكلمات خلت كلبي لأول مرة يدك
اله !
:- حبيـــني
حبيــني ولج تعبــان الـ يباوع بيه يتعجب
أنه أول ابن عشرين بي حتىٰ الجـلد شيب
-: تحبـني ؟؟
اني وهوستـي وشعري الطويل ؟؟
-: أحبـج أنتِ كلج
شعرج الطويل
هوست ايامج
صوتج البي شبه من صوت
الصـبح
-: شبيه وتحبنــي ؟
-: بيج كلـشي
:- تحبنـي من طرف خوفــي ؟؟
:- حبيني قشمريني بالهلا ومشتاقتلك
بالعباس أنه استاهل انــحب
همست
:- عــقاب
-: كولــيني
خلـي اسمي يتغنىٰ وعلي أنه مشتاك
للجنة
:- كافــي
-: تحــبيني ؟
-: لا
-: مشــكورة
سكتنه خيم الصمت على ارواحنه إلى أن
وصلنا كدام بيت خاله رينـاد
دك هورن انفتح الباب ركزت شفته معن
الفتح الباب دخلنا جوه البيت بس توقفت
السيارة نزلــت بسرعة
وهوه كذالك بقيت واكفه اريد اشوفهم
معن اجه يركض مبـتسم حضن عقاب
ضام راسه بصدرة
وهذا الثاني نفس الشي يضحكون بصوت
عالي كله عقاب بضحك
-: منووور ابوو يزن
:- حبيبــي واللّه ابو عياااش
درت وجهي شفت تبارك طلعت من الباب
رولـيت -: هلا بالعـروس الـ نست صديقتها
تبارك :- هههه ما عـاش الـ ينساج بعد روحي
انتِ مشتاقين
حضنتها
-: اوففف وانه اكثر والله شلون ان شاءالله
معن زين وياج انتِ بس كوليلي وشوفي
شنو اسويله
معن :- لا تحرضينها عليه من هسه
روليت -: اوو ابو يزن انتَ معليك
معن -: ذكرتيني بـ ست محاسن من تكول
اوو زميل جاسم لا تدخل وتكتر على صفحة
ضحكنا يقلدها بالضبط نفس صوتها
ريناد -: تفضلو جوه اهلاً وسهلاً نورتو
عقاب :- النور نورج
روليت -: منور بـ هله خاله
كعدنه على الكرويتات كل شخص فتح سالفه
وي الأخ سوالف وأكل لحد ما
تعبنه هذا كله وبعد الغدة
احنه رحنا للمطبخ نحضر الغدة
وهمه بقو بالصالة
صفت تبارك جنبي هامسه بصوت خافت
-: اكولج
:- همم كولــي
:- ضايعة انه ماعرف شلون اتصرف
انصحيني
درت عليها
-: خير ان شاءالله كولي شكو
:- امم باعي معن يريد جهال وانه
ماريد هسه اشرب حبوب بدون ما يدري
لو لا؟؟؟
:- ليش ما تردين جهال؟
-: احس بعد وقت
-: صح بس اذا معن يريد ما يصير
تشربين حبوب خاصتاً انتِ ما صارلج
شهر من تزوجتي
الحبوب ممكن تأثر على الرحم او على
الجسم بشكل عـام
وحتى اذا تركتيها تردين اطفال ياخذ
سنة اقل او اكثر حسب الجسم ومفعوله
ياله تحبلين
-: يعني برأيج انسى فكرة الحبوب
:- طبعاً الحبوب يضرج بعدين حبيبي انتِ
الحبلت وجابت احسن منج يا خبله
-: طبعاً لا
بس انه خايفة وما مستعدة اربي طفل
بضل هاي الضروف على الأقل نستقر
ونشوف وين نعـيش
-: الله كريم ينحل كلشـي ان شاءالله
كوليلي شلونه معن وياج؟
-: شكولج يعنــي
حنــون
مُتـفهم
هيج احسه على نياته يخبللل يخبلل
-: هههههه الله يخليكم لبعض ونشوف
احفاد احـفادكم
-:أمين يارب وان شاءالله انتُ همات
عكدت حاجبي
-: احنــا منو ؟؟
:- انتِ وعقــاب
ضربتها على أيدها
-: يله عااد لا تحجين حجي
ماصخ
-: اوي فديت الخجولة اني
-: اششش فضحتينا يا ادب سزز
منوو كلج احبه اصلاً ؟؟؟
-: محـد اني عرفـت وحـدي
رفعت حاجبي اثناء ما اسوي سلطة
ضاحكة خفيف
-: احلف علي معن هو المـخلي براسج
هل حجي
-: اوو هسه بشنو يهمج منو كلي
اهم شي الكلام من مصدر موثوق
-: الشرقية نيوز انتِ؟؟
-: لا مو لهل درجــة
ريناد -: كافي حجي بناتي اشتغلن
بدون صوت
ضحكت تبارك
-: خاله حبيبتي وين شايفين
بعض احنا خلينا نسولف
ريناد -: سوالفجن ما تخلص عدجن
وقت للعصر سولفن لحد ما تغيب الشمس
بس هسه عدنه شغل
-: ادري جايبتنه هنا حتى تشغلينا؟
ريناد -: انتِ اصلاً ما تشتغلين بس واكفه
فوك روسنه
تبارك -: خااالة غيير عروووس اني
من حقي ما اشتغل ولا الزم شي
ضحكت اهز براسي على كلامها دارت عليها
خاله ريناد
-: كلنا تزوجنا عيني ورة الزواج بـ يومين
احنا نروح نشتغل بدون ما احد يكلنا
حتى
تبارك -: لا مو اني زوجــي ما يقبل يخاف
عليه
-: اوف منج ومن لسانج الله يساعد
معن عليج
-: ليس عيني الله يساعدة قصدج
الله يحبه لأن دزله وحده مثلي
ريناد -: باع الثقة يربي الله يرحم امج
هيج جانت تحجي من خذت
ابوج
-: هههه طالعة على امي فديتني
- اممم كلش
خلصت سلطة غسلت اديه طلعت برة
شفت عقاب وحدة رحت يمه سألته
-: لـعد معن وين ؟؟
:- يراقب زوجته
حجاها رافع حاجبه
درت واذا اشوف معن من شباك المطبخ
يسولف
ضحكت سألته مرة ثانية بينما
عيوني على معن
-: خايفة انه
-: من شنو؟
:- من هارون
خايفة لا يعرف بينا احنا هنا متجمعين
-: ومنو كلج ما يعرف؟؟
درت علي مقلصة نضري
:- يعني هارون يُعرف احنا ابيت
خاله ريناد؟؟
-: اي هارون يعرف كل صغيرة وجبيرة
بالبلد تردينه ما يعرف احنا ابيت
اخته؟؟؟
-: بس ما تخاف لا يجي؟؟
:- هههه لا تخافين هوه ما يقتلنا
هوه فقط يهدد
-: ليش واثق ما يقتلنا؟؟
:- يا بنت هوه لو يريد يتخلص من عدنه
جان بذيج الليلة تخلص جانت فرصة
ما تتضيع بنسبه اله
-: لعد هو ليش ما تخلص منه؟
اقصد يعني شنو يريد ؟
-: هارون شخص غريب ويفكر بمصالحة
اذا قتلني ما راح يستفاد شي هوه يفكر
بمصلحتة ومو من مصلحتة يقتلني
يفضل يخليني عايش يجاهد حتى اصير
تحت خدمته مثل قبل عبد عنده
-: انه احس يحترمك او عنده
نوع من المشاعر تجاهك لهذا دائماً
يهددك بدون ما ينفذ تهديده
احسه يريد يوصل الك رسالة انك
مُختلف عنده تهمه بس ماعرف ليش
وشنو السبب
-: صح انه مثلـج افكر ولكن ممكن
يطلع مجرد تفكير زائد هارون ما لازم
نثق بي
:- صح بنهاية هوه واحد حقير
ممكن اسألك سؤال؟؟
-: تفضلي
:- ما تعرف شي عن أهلــي ؟؟
توقف عن المشي توقفت وياه
التفت عليه
-: شجابهم بالنص هسه
:- تجذبني اذا اكلك بس مشتاقتلهم
مشتاقة لـ حياتي القديمة
-: افضل الج تنسين ذوله مو عائلتج
ما يستاهلون وحــدة مثلج الله انطاهم
هدية وهمه رفضــوها
سكتت
-: لا تضوجين بس هذا كلامي على مودج
و اصلاً هاي الحقيقة احنا ما نحتاج
أهل حتى نعيش
:- بس نحــتاج سند
نحتاج حياة حتى نعيش
شنو فائدة الحياة اذا ما بيها
اب اُم اخـوات احلام أهداف
:- كل شخص مكتوب علي قـدرة
وغـصباً علـي يعــيش هـذا القــدر
مجبورين نعيش عسى ولعل تتغير الأمور
ابتسمت
-: ماعرف ليش من افتح موضوع وياك
نتناقش بي اطلع منه بأستفادة ودائماً
انتَ الـ تفوز
ابتسم
-: مو دائــماً
تبارك :- يااا عشاااق تعالو خلينا غدة
يلةةة بسرعة
-: يااااا
فتحت ثغري من الفشلة سمعت صوت
ضحكته مشى كدامي واسمعه يهمس
:- فديــتج تـبارك
سديت ثغري
بوزت ومشيت وراه دخلنا للمطبخ
خزرت تبارك
غمزتلـي تضحك هزيت راسي بأسى
مـنها
معن :- حبيبتـي سلطانة من يمج السلطة
انطاته السلطة واحد يباوع بوجه
الثاني حسيت بيهم شي غريب
وفعلاً ثواني
طكوها بضـحكة ثنينهم صوتهم عالي وياهم
خاله ريناد تضحك بخفاء ما تطلع صوت
باوعت على عقاب
مثلي يباوع مستغرب
عقاب :- يا جماعة ضحكوني وياكم صارلي
سنين ما ضـحك هيج ضحكة
مستمرين يضحكون
:- ياااا شبييكم شكووو
معن :- هههههههه ماكو شي تذكرنه
موقف صار ويانه هههههههه يضحك
عكدت حاجبي دغيت تبارك الـ تمسح بعيونها
من الضحك
-: بسيطة انه الج تضحكين عليه چلبة
:- هههههههه موو عليج هههه
:- سدي بـــوزج حقيرة تضحكون علينا
والله
معن :- اسفين عــمـي صارت فجاءة
سامحونه
عــقاب :- صار عندي فضول اعرف الموقف
معن -: بيناتنا انه وسلطانه انتَ ما لازم
تُعرف
عقاب -: اكص ايــدي اذا مو علينا
:- عليكم؟؟
لا طبعاً ليش نضحك عليكم قابل انتم
نكتة ونضحك عليكم اعوذ بالله من تفكيركم
بقى عقاب يباوع علي مخنزر تحمحم
رادف بتوتر
-: يلةةة يا جماعة مدو اديكم سمو بالله
جــواعنين ترة ما شاء الله الأكل ما يتفوت
هرب من الـكلام سكتو ياكلون
بنص الأكل سأل عقاب خاله ريناد
-: زوجج شنو يشتغــل ؟؟
:- يشتغل بـ شركة
-: شركة شنو يعني ؟
:- ما عــرف كل الأعرفة يشتغل بشركة
-: زين هوه ليمته يرجع ؟
:- شــهرين او أكثر حسب عملة
-: تكدرين تبقــين عندج روليت بالبيت ؟؟
باوعـت عـلي عاكـدة حاجبي ما توقعته
يحجي هيج حجي
-: اكــيد ما عندي شي تونسني
ابتسم ورد
:- شكراً
:- العفو مثل بنتـي هيه اخليها بعيني
باوعت عليه مبتسمه ابتسمت بوجهه
فضلت ابقى ساكته وما احجي شي
بنهاية مو من حقي اعترض
من خلصنا الغدة كعدنه بالصالة نشرب جاي
بس احنا البنات نسولف وهمه ساكتين
تمدد معن على الكرويتة خله راسه
بحضن عقــاب
معن :- بشرفـــك افليني اشو راسي يحكنــي
ضربته على راسه
عــقاب :- بس لا بيــك گمل
معن -: شمدرينــي بله شوف أنتَ بيه لا
عــقاب :- ما اتفقنا هيج يصير ابو يزن
معن -: ابو عــياش الــوضع فيطـي
عــقاب :- ليش الضـاهر تبارك مقصرة وياك ؟
معن :- لا مو هــذا قــصدي
هل حجــي كله أنه افلــي براسه
چعصت فروة راسه صاح
-: اخخخ
ضحكت
:- گمــلة هاي
-: مردت فروة راسي !
-: غير مــتروس أنتَ ما شاء الله
حتى مبيض
:- هوه الگمل يبيض ؟
:- لا يفــرخ
:- اه
-: وداعتــك
ضحك غمض عيونه مرتــاح
دنكت هامس بأذنه
عــقاب :- شد حــيلك اريد اشوف يزن
معن -: اول شئ شد حــيلك أنتَ وقنع
روليــت بيك حتىٰ تجيبنه عياش
عــقاب :- اول شئ اوعدنــي تطلع من العـراق
سكت ثواني
معن :- من دونــك ما اطلع
:- أنتَ تقريباً امــورك جاهزة أنه
بعدني ما مسوي شي لا جواز ولا جنسية
جديدة
:- وليمته تسوي ؟
-: من اعــرف اسم الأب والأم الحقيقي
وحتى العمــر
-: وإذا ما لكيتهم ؟
:- ابقى بالعراق
-: معناتها أنه وياك
:- أنتَ تــحب تبارك ؟؟
-: طبعاً
:- لازم تبني حياتـكم بعيدً عن هارون
للمرة الألف أكلك هارون مستحيل يخليكم
تتهنون أو تفــرحون
-: هــارون ساكت اعتقد اتقبل الموضوع
ماريد اسافر وانتَ تبقى بخطر افهمني
ماريد اخسرك مرة ثانية
كافي الـ عشر سنــوات المرت شلون تريدني
اعــوفك بنص المــوت وسافر حتى اعيش
حياتي اذا هارون هوه السبب مستعد هسه
اروح اخلص علي
:- لمصلحتك أفهم........
قاطعني بحزم
:- مصلحتي هيه مصلحتك وحياتي هيه حياتك
كضيت عمرك ادافعلي وتشتغل عني صدكني
اذا صارت الي فرصة ارمي بنفسي للموت
بس حتى أنتَ تبقى عايش
أنتَ تستحق الحياة أكثر مني تستحق تعيش
تتـزوج تسافــر ولك افديك بحياتي شعدي
غيـرك صاحــب
ابتسمت بألم
عــدل كعدته حضنته بدون كلام
معن -: اوف حضنك دافي
وخرت منه ضاربه على وجهه
ضحك ورد
:- يلة يلة تأخر الوقت كلمن على بيته
يلة سلطانة تعبتي اليوم امشي نرتاح
ريناد -: بعد وقت ابقو للعصر شعدكم
رايحين هسه
أردف بينما يسحب تبارك من أيدها
:- لا خـالي شكوو باقين ببيوت العالم
ما يصير وها نسيت اشكرج على الغدة
كلش طيب
دار على عقاب
:- يله صـاحبي استودعتك الله
دير بالك على نفسك
يحجي ع سريع ويسلم وصل إلي
نزل أيده رادف بأبتسامة عريضة
:- اشوفــج عـلى خــير
-: شكراً وانتَ هــمين
تبارك :- يا جمــاعـة اعذرونه
معن :- عاذرينه شي اكـيد
عقاب -: اخذت العالم حاصل فاصل اوكف
هوه أنتَ عندك سيارة تروح بيها ؟
صفن كأنما صارت عنده لحضة إدراك
:- أنتَ توصلنا وتــرجع
-: لا أنه مستعجل اريد اروح
شوفلك واحــد غيري
معن -: علينا ابو عيـاش
عقاب :- أنتَ خبصتنه خبص يله تعالو
اوصلكـم
معن :- تسـلم تسلم
طلع برة هوه وتبارك بعد ما سلمنا
عليها التفت على خاله ريناد بعدها عليه
-: صح ما كتلـج بالموضوع بس صار
بسرعة بقائج هنا افضل ألج مو حلوة تبقين
بذاكه البيت وحـدج
أنه كل ما تصـيرلي فرصة اجي اطمن
عليج متفقين ؟
هزيت راســي بأبتسامة خفيفه
:- اتفهمك وافهم كلامـك ما عندي أي
اشكـال بالعكس متفقين
ابتسم بـرضا وطلع
طلعت وراهم خاله ريناد بقيت واكفه بمكانـي
ابـاوع من الشباك إلى أن اختفو
دخلت خاله ريناد
-: غـرفتج على ايـدج اليمين جاهزة
ونضيفة
-: شكراً كلش هواية أن شاءالله ما اصير
ضيفة ثقيلة أو ازعجج
-: شـهل حجي هذا لج أنه جنـت اتمنى
وياي بالبيت أحد غير زوجـي
-: شكراً
:- عفواً
وهسه روحـي لغرفتج ارتــاحـي
حبيبتي أنتِ
:- بعد روحـي خالة تسلميلي
:- هههه روحي يله
-: ماشي
دخلـت للغـرفـة
جانت جميـلة ذات طابـع كلاسيكي
شباك چبير يطل على الحديقة الخلفية
سرير لـ نفرين بس الي وحدي
الغرفة لونها ابيض كولها بس تجنن
ما شاءالله همه بيتهم جـميل وأنيق
وترتيـــب
شمرت روحــي على السرير تنهدت بصوت
عالـي مبتسمة وأخيراً راح ارتاح فترة
من التخيُلات والأفـكار السلبية !!
أو هيج جنت مخليه أبالي ما جنت
اعرف شنو راح يصير وياي بالأيام المُقبلة
مرن يومين كلشي طبيعي بهذا البيت
اكل وأنــام اخذ راحتي أكثر كون بس احنا
بالبـيت من دون رجال
بيـوم الـثالث
الساعة 11 و 7 دقائق
طلعت من غرفتي للـحمام غسلت اديه
ورجعت لغرفتي طبيعي هستوني اريد
ادخل جوه الفراش
واذا اسمع صوت رمــي حجارة على شباكي
فــزيت مخــترعة خايفة كمزت من
فراشي اباوع للشباك
البردة صـارت تتحرك خفيف وياها جسمي
كله رجف جمدت بمكاني من الخوف عيوني
دمعن
رمشت بصورة سريعة بالعة ماي ريكي من
سمعت مرة ثانية صوت دك على الشباك خفييف
ومُخيف بنفس الوقت
دموعي نزلن
اقــدم رجل وأخر رجل خايفةةة كلمة ما تعبر
عن مدى خوفي بهل لحضات من دون إصدار
أي صوت مني
شجعت نفسي وتقدمت خطوات لحد
ما صرت مُـقابيل الشباك شجعت نفسي
ما راح يصير شئ بنهاية الشباك مقفول
او يمكن يطلع عقــاب ليش كل هذا الخوف ؟؟
بحركة سريعة مني وخرت البردة !
صار مقابيلي تماماً شخص لابس اسود
وجهه مغـطي بقــناع !!
صـرخت من هول الصــدمة انفتح الباب دخلت
خاله ريناد اشتغلت الأضوية رفعت راسي
وإذا اشوف الشباك فارغ !!
بچيت أشهك
لزمت گلبي يدك بطريقة
بسرعةةةة مفرطة لدرجة كلت راح تصير
وياي چلطة
او حتى يوكف گلبي من كد الخوف
لزمتني خاله ريـناد بس تريد تهديني
وتسيطر علىٰ رجفة جسمي ماكو
-: اسم الله الرحمـٰن يمة شبيج اسم الله
قل اعوذ برب الفلق
تقرأ ايات قرآنية فوك راسي عيني علىٰ
الشباك لساني نربط وماكدرت احجي شي
أصلاً محد يصدكني
شلون يصدكوني اذا أنه مو واثقة اذا
الشي الصار حقيقة أو مجرد تخيولات
تمسح بدموعـي ساكته
وأنه كذالك إلى أن تعبت ونعست
همست بصوت خافت
ريناد :- ساعديني حتى اكومج على فراشج
يلة بنتي علي وياج
وكفت بينما هيه ساندتني خلتني بفراشي
وغطتنـي غمضت عيوني بس فتحتهن
بخوف من وخرت أيدها عن راسي
:- ابقــي وياي بالغرفة فدوة خالة
اخـاف وحدي
حجيتها بغصة
الخوف يخلي الشخص ما يوثق
حتى بنفسه
لـدرجة حتى من صوت أنفاسي اخاف
وافــز
:- اسم الله عـليج هياتني يمج ما اعوفج
نامي غمضي عيونج
ما حسيـت غير أنه نــايمة من الخوف والتعب
والأرق نمت مادري بعد بالدنيا إلى
أن كعدت على صوت هادئ قريب مني
-: شمعـتي
حركت جفني بخمول ورجعت نايمة
-: حريتــي
عكشت وجـهي ماسحته بخفوت
فتحت عيوني وإذا اشوف عــقاب
بوجــهي
شهكت مغطيه جسمي
ابتعد كم خطوة جاب كرسي خلا جنب
السرير كعد يباوع عليه باستغراب
-: شلون دخلت للبيت ؟؟
-: مدام ريـناد اتصلت عليه تكول
البارحة ماعرف شنو صار وياها كامت تصرخ
بصوت عــالي
تبچي وحتى تفز من تسمع أقل صوت
شنو كاعد يصير وياج بالضبط احجيلي؟
عيوني انترسن دمــوع من تذكرت شنو
صار البارحة لميت جسمي عيوني بنقطة
مُعينه صافنة
روليت -: ماعرف شنو كاعد يصير وياي
صدكني ما عادت افـرق بين الحقيقة
والوهم
ما اعرف اذا أتخيل أو فعلاً الكاعد اشوفه
-: شنو تشوفين بالتحديد ؟
بچيت
همس
:- اشش بدون بچـي خليج قوية
كوليلي شنو شفتـي بالتحديد ؟
مسحت دموعي
شهكت بعدها اخذت نفس واحجي
-: بليل قبل لا انام رحت للحمام
ومن رجـعت لغرفتي سمعت صوت حجارة
انضرب بيها الشباك
خفت وتصنمت بمكاني بعدها سمعت
صوت دك على الشباك خفييف لدرجة
كمـت ابچي ولكن بدون صوت
شجعت نفسي ووخرت البردة
ش..شفت شخص واكف ورة الشباك
لابس ااسود وقناع كذالك أسود
-: شنو صار بعدها ؟؟
باوعت علي
:- اختفىٰ
بلـمح البصـر بس دخلت خاله ريناد
وشغلت الأضوية باوعت على الشباك
ماكو أحد !!
أنه
أنه ماعرف ليش دا يصير وياي هيج
اشياء معقولة تخبلت عقلي بي شئ ؟؟
:- لا تحجين حجي من دون معرفة بي
تمام بل أول لازم نتأكد اذا فعلاً شفتي
هذا الشخص الغـريب
-: وشلون نتأكـد ؟؟
:- الكاميرات
فتحت عيوني على وسعهن
-: ايي صح البيت بي كاميرات مراقبه
يمكن صورت الشخص
-: اهـدئي
تعاي نسأل ريــناد
هزيت راســي بجنون كام وأنه نزلت
من الفراش بسرعة تعثرت عدت مرات قبل
لا اوصل للباب
شفنه خاله واكفه بالصالة راحلها
عقاب وسألها فوراً
-: ممكن اعـرف من وين الكاميرات تحفض
تصويرها ؟؟
ردت علي بخفوت
:- أنه طفيت الكـامرات من اول يوم راح
بي زوجـي للشغل حتى ما يسجلن
جيـتكم للبيت ....
نزلنا روسنا حايرين ماكو طريقة اعرف
بيها اذا الأشوفه حقيقة او وهم
رجعت لغرفتي ابچـي مسحت دموعي
من دخل للغرفة مرة ثانية
همس
:- عندي خبر يمكن يخليج سعيدة
-: شنو.؟
:- دعلــج
...
...
...
...
...
رحنه بجوله سوية نفتر بشوارع بغداد
مخلين أغُنية هوه يسوق وأنه اتمايل بجسمي
على لحن الأغنية
طلعت راسي من الجامه أصيح واضحك
بصوت عــالي صرنه بشـارع منعزل
ما بي سيارات دخلت للسيارة
مُرجـان :- وين رايحين ؟؟
بسام -: عازمـج علىٰ مطعم بمناسبة
عيد ميلادج
مُرجان -: حبيبييي جنت مفكرة ناسي اليوم
بسام -: شلون انسى يوم عيد ميلادج
تركت كل شغلي واجيتج بس حتى اكون
حاضر وياج بهذا اليوم المميز
-: فديتك اني بس لحضة انطي خبر
لـ بابا حتى ما ينتضروني ع الغدة
-: سلميلي وياج على عمي
-: يوصل
خابرت بابا انطيته خبر بسام عازمني
على الغدة وافق وكلي سلميلي علي
لا تستغربون أنه الـبنت الوحيدة المدللة
لعائلتي
متحررة
رغم بسام شخص غريب مو من داخل
عائلتي بس صار سنة من تعرفت علي
صرنه نحب بعض شوية شوي
منتضرة الوقت المناسب حتى يخطبني
وكف السيارة كبال مطعم أول مرة
ادخل اله
بسام -: حجزت المطعم بس النه احنا
الثنين
ابتمست بذهول
-: عزااا كل المطعم ؟؟
هز راسه بأبتسامة ضحكت بحماس
دخلنا جوه حرفياً متت بطريقة تزيين
المطعم
كعدنه على أحد الطاولات الموضوعة بالنص
مخصصة النا اباوع بذهول
:- واوو المطعم يجنن متت بي
-: اعرف ذوقج وشنو تحبين انتضري
بعد ما شفتي الأكل
عضيت شفايفي
:- عزا تحمست بسااام
-: ههههه انتضري دقائق يخلون الأكل
كدامــج
هــزيت راسي بحماس چبير لا تلوموني
على تصرفاتي نشأت بين عائلة كل شخص
بيها اهم شي عنده عملة
بابا مهندس بالنفط
ماما دكتورة اسنان
أنه سنة ثانية كُلية العلوم تخصص
الفيزياء
مو بالسهل دخلت الكُلية هاي واجهت
صعوبات خلتني استسلم بس بابا دفع
لأشخاص في سبيل ينجحوني
اعرف هذا الشي حرام وغلط ولكن
هل تصرف من بابا شنو اسوي يعني ؟؟
بسام -: يلة حبيبتي تغدي لا يبرد الأكل
هزيت راســي بأي
دنكت أكل وطبعاً اكلتي المفضله باستا
بالدجاج
جانت الأجواء جداّ جميلة والأكل يخبل
خصلنا وطلعنا متوجهين لبيت أهلي
-: ماعرف شلون اشكرك جد احلى يوم
بحياتي واحلى عيد ميلاد هوه اليوم
اخذ ايدي طبع قبلة خفيفه عليها
نزلت راسي بخجل
وشي اكو شي بداخلي يكلي كل الكاعد
تسوي حــرام بس انفي الأفكار من راسي
بسرعة
-: كل عام وأحنا سوه ويكبر حبنا
ابتسمت
-: ونتـزوج
:- ونتزوج
بقيت مبتسمة طول الطريق
لحد ما وصلنا لبيتي عندي المفتاح بس
فـضلت ادُك الباب
سمعت صوت بابا يصيح
-: جاي جاي
باوعت على بسام صافن بس بعدها
باوع عليه وابتسم
انفتح الباب شمرت روحــي بحضن بابا
بسته بخده رادفه بأبتسامة
-: هلاووو يا احلى واجمل وأنقى
اب بالدنيا كولهااا
ضحك مبادلني الحضن
-: هلا يا اجمل واروع وارتب بنت
بالدنيا كلها
ابتعدت عن حضنه
مد بسام أيده رادف بأحترام
-: صار فترة ما شايفين بعض
شلونك عمي
جاوبه بابا بينما مد أيده كذالك
-: الحمدلله ابني بخير والحمدلله على سلامتك
شوكت أجيت شعجب ما انطيتنه خبر ؟؟
-: الله يسلمك واللهي صارت بسرعة
وحتى افاجأ مُرجان
:- نــورت بيتك بكل وقت اهلا وسهلا بيك
تفضل تفضل
-: تسلم النور نورك عمي
كعدو بالصالة
-: لعد ماما وينـها ؟
:- امـج بــعدهي بالشغل
-: تأخرت مو من عوايدها؟
:- تكول عدها مراجعين هواي
لا تخافين عليها متغدية هيه هم خليتوني
اتغدى وحدي اليوم
كعدت يمة
-: حبيبي لا تزعل بالعشة كولنا نلتم
ونــكعد مثل العادة
ربت على أيدي
-: أن شاءالله روحـي حضري غرفة
بسام حتى يرتاح
بسام -: لا عمي ما ريد اصير عليكم
حمل أنه أجر شقة واكعد بيها
-: عيب عليك ابني أنتَ منه وبينه
صهري المستقبلي تريدني اخليك تأجر
شقة وبيتي فارغ ؟؟
-: مو قصدي أنقص من كرمك بس
والله اخاف اسوي زحمة عليكم
-: لا زحـمة ولا شـي بالعـكس
-: أنه رايحـة أرتــب الغرفة
تركتـهم وحـدهم ورحـت نضـفت الغـرفة
ع ســريع هستوني اريد اطلع صار بوجهي
بسام فزيت
ابتسم دفعني وسد الباب
بلعت ريكِ تقدم بتجاهي
-: مشتاكلج
:- وأنه بعد
-: اشوف تصرفاتج عكس كلامج !
:- ش.شنوة ؟.
:- ههه شبيج ترجفين مو من عوايدج ؟؟
-: لا يجي أحــد للغرفة عيب
قلص نضرة بشك
-: طول عمرج أنتِ الـ تجين ركض للغرفة
حتىٰ تشوفيني شنو التغير هل مرة ؟؟
:- احس عيـب ووكلش تأخرنا بالخطبة
علىٰ الأقل ناخذ راحتنه أكثر
:- كتلج عن قريب بس أرتب شغلي
وتقدملج
-: سنة أنتَ تكول نفس الكلام
:- بس هل مرة تختلف
رفعت راسي ابتسمت بخفوت
:- خلي اروح عـندي شغل كلشش هواي
-: شغل شنو ؟
:- مو اليوم حفلة عيد ميلادي قررت أسويها
بالـطابق الثانـي مو بقـاعة اريد اتحضر
ما عندي وقت
وخر مني كعد على السرير
-: تمام روحــي
اخذت نفس
طلعت بسرعة لغرفتي كبل دخلت للحمام
غيرت ملابسي وهنا تذكرت مُبايل الأستاذ
شهكت ورحت ركض طلعته من جيب
بنطلوني
فتحته ما بي رمز ابتسمت
شمرت روحــي على السرير براحة نمت
على بطني رافعة رجليه
اقلب بالصور
اغلبها صور لأمه ولأبو مبينين يكول
جوز جواريب يتشابهون
طلعتلي صورة اله صفنت عنده شيب بلحيته
وبشعرة وهوه عمرة كله 30 يمكن
عنده كاريزما قوية
نضراتة تخليني احس برجفة تجتاح
جسمي هزيت راسي طلعت من الصور
دخلـت على الملفات والتليكرام
بالحافضة لكيت الأسئلة الراح تجي باجر
ابتسمت بشر دزيتهن الي بعدها مستحهن
دخلت من مُبايلي على الكروب
دزيت الأسئلة يرافقها كلام
-: مــاكو داعـي للشــكر شباب
بعدها دخلت على الصور مرة ثانية
شفت فيديو اله دخلت علي
جان شايل طفل فوك ضهرة ويمشي
بي مستخدم ايدي ورجلي
ويطلع صوت مثل الأسد ضحكت بصوت
عالـي نشرت الفيديو على صفحته
كتبت جواه
-: من استاذ إلى حيــوان
تنفع تصير مربي اطفال
خليت وياها سمايل يـضحك انطيتها
نشـر وغلقت المُبايل شمرته بعـشوائية
طلـبت فستان من الأنستا ونمت
كعدت على صوت ماما شفتها واكفه
فـوك راســي فركت عيوني
-: ماما اريد انام بعد تعبانة
-: كومــي فستانج وصل
نطيت من مكاني
:- وينه وينه
-: بعدة بالطريق
:- ماماااا
-: كعدي اشوف نحجي شوية
تأفأفت بملل مادة بوزي كعدت
يمي تحجـي وتمسح علىٰ خـدي
-: بسام ليمته رجع من السفر؟؟
:- الــيوم
-: ليمته التقيتي بي
:- اليوم
-: فتحي عيونج وركزي وياي
مُــرجان
:- هــا ماما
:- طالعة ويا ع الغدة ؟؟
-: اي بس اول شئ اخذت الأذن من بابا
-: وحــدكم ؟
:- لا بيبيتي ويانه
-: عن التحشيش مُرجان كم مرة حذرتج
ممنوع تطلعين مرة ثانية بدون أذني
خصوصاً وي هذا بسام
:- ماما اخذت الأذن من بابا بعدين بسام
مو غــريب علينا
:- مرة ثانية تاخذين الأذن مني
أنه مو من ابوج
بسام خطيبج ؟
-: لا بس عن قريب ر.....
:- زوجج
:- ماما لا بس هوه حبيبي وانسان مؤدب
:- كلامج هذا ما يعجبني صارلكم سنة
من تعرفتو ليمته يخطبج يعني ؟؟
برطـمت
-: هوه كال هل مرة ما ارجع اله اخطبج
من اهلج بس شوية يرتب شغلة
-: من سنة يحجي نفس الكلام يا خوفـي
يكون راسم اباله شئ خطه خبيثة
:- خطة خبيثة ؟!
يعني شنو قصدج
-: سمعيني ماما حبيبتي أنتِ لو فعلاً هوه يحبج
ومتلهف الج جان من أول ما شافج
خطبج مو يبني علاقة ما تربطكم بيها أي شئ
مجرد شوية مشاعر ما نعرف اذا جانت
حقيقية أو مزيفة أنه لمصلحتج احجي أنتِ
بنتي الوحيدة ابتعدي عن بسام حاولي لا
تختلطين وياه هواي لا تنطينه أهميه وشوفي
شنو يسوي اذا جان يحبج فعلاً فـ مستحيل
يقبل بتصرفاتج
وإذا ما جان عنده مانع وما يحس أنتِ
تغيرتي علي فـ تأكــدي هذا يلعب بمشاعرج
لا اكثر
:- هـيج أنتِ تـشوفيــن ؟
-: طبعاً أنه سبق وأن عشت هيج مشاعر
خليته بين اختيارين وطبعاً لأن ابوج
يحبني اختارني بدون تردد
:- فديته بابا من يوم يومه رومانسي
-: اي اي يله كومي فستانج تلكينه
بالصالة
-: ماماااا تلعبين عليه
ضحكت وما ردت عليه كمزت مثل الخبلة
طلعت من الغرفة اباوع بالصالة ماكو
شئ سمعت صوت صفير
درت وجهي شفته بسام منتجي على الباب
غمزلي
بيدة البوكس تبع الفستان
فتحت عيوني بصدمة
ركضت مديت ايدي اريد اخذه جر
أيده جوه ودخل الغرفة
-: اوو بسام مو وقتك اريد
البوكس
-: سدي الباب وتعاي عندي موضوع
وياج
-: مو هسه حاليا كلش مشغولة
-: ماشي روحي بس الفستان يبقى
بغرفتي
وكفت محتارة كلام ماما يرن بعقلي
بتردد كبير سديت الباب ما راح يصير
شئ أنه أثق بسام
كعد على السرير وكفت مقابيله
دنك يفتح بالبوكس
-: ما عندج اعتراض مو ؟؟
عضيت شفايفي هازه
راسي ابتسم يفتح بالبوكس ويحجي
:- كونج حبيبتي حبيت اشوف شنو
راح تلبسين بالحفلة
شمر البوكس فتح الفستان طويل
من فوك يوصل لحد الصدر مطرز بريش
من رداناته وصدرة
يعني اكتافي تبقى ضاهرة هوه ما شاف
الفتحة اله من وكف وفتحه
رفع حاجبة الفتحة تجي من جوه لحد
الفخذ
-: حفلتج بملهــىٰ تسوينها ؟؟
:- لا هنا بالبيت بالطابق الثاني
-: هذا الفستان يلبسنه الكح***
بالملهـى ويركصن بي أنتِ وحده منهن تردين
تصيرين ؟
رفعت راسي عاكدة حاجبي
:- كلامك مو حلو بحقـي حفلة بنات
بس صديقاتي عادي اللبس هيج
-: بس بنات ؟
:- اي
-: حتى لو شوفي الفتحة بس تكعدين
****يطلع
حسيت بكمية ذل وقرف من كلامه
حسيت نفسي بدون كرامة
:- ما اسمحلك عاد كافي
اخذت الفستان من أيده خازرته
:- محد مسموح اله يتحكم بيه
أنه حرة البس الـ يعجبني
تركته ورحت لغرفتي وكفت مقابيل المرايا
فتحت الفستان كدرته على جسمي
يجنن والله لونه تحفة بنفسجي
سادة قماشة مثل الحرير
كلش حبيته
ما هتميت لكلامه ابد وضجت أكثر منه
رتبت الطابق الثاني وراها تحممت ولبست
الفستان خليت قليل مكياج
ما يحتاج أكثر لأن وجهي حلو وصافي
بدون مكياج أساساً سرحت شعري
على كولت ماما ذيل حصان هيج ماما تسمي
لبست عقد بنفسجي ومحبس
شذرته بنفسجية كعب ابيض بلون
الريش طلعت أميرة
-: مُرجان بلشو صديقاتج يوصلون وين رحتي
:- جايه ماما
طلـعت صاعدة للطابق الثاني فتحت الباب
صارن بوجهي شهد ومريم
صوفرن بأعجاب
شهد -: واوووو تجنننيين
مريم :- عن جد واووو الفستان يجنن
مُرجان :- طبعآ اجنن هذا من ذوقجن
حلواتي
ضحكن ورحنا كعدنه على الكرويتات
كلشي موجود العصير والكيكة والترتيب
يجنن
:- نسيت اكولجن ادخلن على صفحة
الأستاذ شوفن شنو ناشر
-: شنو ناشر ؟
:- دخلي وشوفي
فتحن مبايلاتهن
شهد :- عزا ليكون البالي هههههههه
:- شنو رايجن حبيت بعيد ميلادي
ارجع كرامتي ومسح بي الأرض
:- والله انج كفو هههه
ابتسمت
صارو يجون صديقاتي إلى أن لتمينا
كُلنا نسيت بعد اكو شخص
كرار :- شكلكم نسيتوني ؟!
درت على الصوت
بلعت ريكِ عزا نسيت كرار وأنه كتله
بس بنات الحفلة
شسوي اذا شافه ويأنه ؟
ابتسمت بوجهه
:- اهلا وسهلا منو ينساك أنتَ
-: اوفففف شهل لبس هذا لج مُرجااان
طالعة أحلى من أنجلينا جولي
-: هههه شكراً استمتع بالجو
:- وين اخلي هديتج
:- خليها بالمكان ذاكه دا تشوف الهدايا
-: تمام
راح
وبقيت وحدي اباوع فجاءة شفت بسام
واكف بالباب مكتف ادي عيونه
خازراتني
بلعت العافية
تقدم يمي همس من بين أسنانه
:- بس بنات مووو ؟!
-: خلي افهمك و
:- فهمت كلشي ماكو داعي تفهميني
وحدة مغرورة عنيدة جذابة
-: ما اسمحلك كل شوي تهيني افتهمت
لو لا كرار صديقي واصلاً نسيت أنه
عزمته على الحفلة
-: لازم يروح منا بسرعة اريد
اطلب ايدج
صفنت
:- اعتقد اليوم مو مناسب
ضحك بسخرية نزل نضرة لفستاني
-: مقتنعة بلبسج هذا ؟
:- اي
-: ولج هذا لو تخلينه كدام الكح***تعترض
وتكول مفتوح هواي أنتِ شنو من صلافة
شايله
:- بسام اطلع من منا
-: تردين تأخـذين راحتج ؟
:- اطلعع منا بسام
اطلع
رمقني بنضرات سخرية وطلع
اخذت نفس طويللل مسحت وجهي
وابتسمت
رجعت حتى اكمل الحفلة أخذنا صور
وقطعت الكيكه كل شخص راح
على بيته
نزعت الفستان ونمت بثواني من التعب .
ثاني يوم كعدت روحي بخشمي
صايرة بدلت ملابسي وبوجهي للجامعة
صار كدامي استاذ طاهر رمقني بنضرات
سهام سامة مو نضرات
:- انسه مُرجان تفضلي وياي
-: وين؟
:- نتناقش بموضوع
حجاها ومشى كدامي مشيت وراه
بتردد الطلاب يباوعون عليه ويضحكون
بالخفاء
فتحلي الباب دخلت وهوه كذلك سد
الباب بقى واكف ندار عليه تقدم
خطوتين مني مد أيده رادف بهدوء
:- المُـبايل
-: موبايل ش.شنو ؟؟
:-شايفة ذني الكامرات صورن كلشي
بيوم اخذتن موبايلي اعرف كل هذا من تخطيطج
والأساتذة يعرفون موبايلي انسرق مني
:- استاذ أنه ..أنه مو..
-: الموبايل قبل لا تحجين اي شئ
عضيت شفايفي طلعت الموبايل
من جيبي انطيته اله اخذه متنهد
-: تعرفين اكدر هسه وبكل سهولة
انشر التصوير وفضحج بالجامعة كلها
وبين زملائج وممكن تنفصلين اذا وصل الفيديو
للمدير
رفعت راسي لأول مرة احس بالخطر
الحقيقي عيوني انملن دموع همست
:- فدوة استاذ والله إنه اسفة الشيطان
لعب بعقلي جنت غبية فدوة لا...
:- ما راح انشر التصوير
صفنت بوجهه كلبي يدك قوي
بلعت ريكِ
:- ليش استاذ أنه استاهل تفضحني
مثل ما فضحتك
رد عليه بكلام خلاني بحالة صدمة وماعرفت
ارد علي بشي
:- من ستـر مُسلماً سترةُ الله يوم
القيامة
.
.
.
يتبــــــــــــع
❢
═──── · · • • • ❂ • • • · · ────═༻❢
للقصة اسرار 🔥
اسفة على التأخير حبايبي بس شوية انشغال
بالحياة
🚫لاتبخلون بالتصويت والتعليقات حبايبي
مع الف سلامة
ميان أل مالكي