طوبى ☕شارع القهوة☕

الجزء_الثاني_والتسعين

#طوبى  "جنة طوبى"
#جمان_فريد
#الجزء_الثاني_والتسعين"العضيد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء
‏مَنْ عوَّد لسانه وقلبه سُؤالَ الله في كل أموره ،
والالتجاء إليه في كل ما يقوم به ، والافتقار إليه في كل أحواله ؛ أورَثَه القوة في قلبه ، والبصيرة في شؤونه ،
والثبات في مبادئه ، والانشراح في صدره ،
والتوفيق في حياته ..

🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 الجسم ُفي بلدٍ والروحُ في بلدٍ
يا وحشةَ الروحْ، بل ياغربةَ الجسدْ.🍃
__________________________________________
16مارس..سنة2019..
يوم السبت..
الساعه 5:13عصرا..
واقفه قريبه ع الباب..شاده بنتها تقرا عليها..
كملت وقالت..سلم بنياتي ياربي..خوديها عمتي...
خدت مطيرة جنه وطلعت بيها وهي تغني..
/سلم هالبنات..القمرات الحلوات...اهي جاتك الغزيله ياحسونه..
حسين بإبتسامه:مرحبا مرحبا..مدتهاله مطيره وهو خداها وقال..الله يبارك..
طوبى:بالله حسين رد بالك عليها.
حسين:تي باهي ياخوافه باهي..
ومشي للباب فتحه وطلع..
طوبى:اللهم اني استودعك اياها..
🍃وكانت هادي المرة الاولى اللي تطلع فيها جنه من غير كروسه..
كانت لابسه فستان لونه سماوي كله "تول"من تحت الخصر ومن فوق قماش عادي عليه جاكيت قصر كم لونه ابيض..
ومزين شعر الكستنائي توكه" بكله" من اللي جابهم بلال من لون الجاكيت..وفي يدها اليمين خاتم صغيرون ع هيئه زهرة الاقحوان..
اللي يشوفها تزهى في عينه..عيونها الزرق الواسعات اللي زي البحر..ورموشهم طويله اللي مغطيتهم مخليينها مبهرة في نظره كل من يشوفها..
وصل بيها حسين لمصور سامي اللي كان فيه عبد القيوم وهالمرة جي قصدا..يراجي فيها..
وتخش عليهم.
اول ماشافوها الزوز ابتسموا من قلوبهم..
سامي:الله يبارك..
عبد القيوم؛الله يبارك..لاقوة الا بالله..
حسين:اهي جاتك نجمة النجوم..
ضحك سامي وقدملهم وهو يقول..
/سموحه شن جو..
ردت عليه جنة بلغتها الخاصه..
ضحكوا..
حسين بضحكه: هدرازة راهو كان فتحت معاها موضوع معاش تسكت..
وجنة مازال ترغي..
عبد القيوم بضحكه:الله يبارك عليها ويحفظها..
سامي بإبتسامه؛تعالى معاي..
ومشي حسين بجنة مع سامي لمكان التصوير..
وعبد القيوم يتفرج عليهم وعيونه ع جنة..
ضحك لما شافها وين حطها حسين كيف قعدت تقربج في الديكور..
لهاها سامي بالكاميرا بش قعدت عاقله..وبدي ياخدلها في لقطات..
تعبتهم لأنها ولت حركيه وماتهداش..واضطر عبد القيوم يساعدهم وجنناته حتى هو معاهم بس كان مستحلي كل شي دير فيه..
حسين:هي اخر لقطه ليا اني وياها..
رفعها في حضنه وسامي قاله..
/زيد يمين شويه..
هي كانت تشوف لحسين وحسين يشوف لسامي بإبتسامه وهو يقول..
/كويس هكي!؟
سامي:مليح بكل..ولما جي بياخد اللقطه جنه تشد خشم حسين..وسامي صور..
والصورة جت عفويه ومضحكه..
🌼🌼🌼🌼🌼
حسين وعيونه مدمعه..
/اني مازال نعاودها ونجيبك يافتروشه!.
وجنه حاطه صبعها في فمها وتشوفله بإبتسامه..
قدم عبد القيوم وقال بضحكه..
/ترا عطيها ليا شويه..
حسين:خودها وان شاء الله تقلع خشمك بش نردلك الضحك اللي ضحكته..
خدي عبد القيوم جنه وهو يقول بضحكه..
/بسم الله..
لين استقرت في حضنه وهو يقول..
/الله يبارك..الله يبارك..شني ياسمحه..شني ياوجه القمر...شني يااحلى عيون يبحتن فيا..قولي عبدو..
حسين:ريح روحك..
ضحك سامي..
عبد القيوم قعد ينادي بصوت عادي:عبدو..ياعبدو..عبدو...عبدو...
جنة ضمت شفايفها القدام وقالت..
"دو"..
ضحكوا..
حسين:ياعفريته تعرفي من تنادي..
طلع عبد القيوم من جيب جاكيته توكتها اللي نسوها في المزرعه وهو يقول..
/وهذي لكي ياسمحه نسيتوها في المزرعه..
حسين:جديات!
حطها بهدوء في شعرها وهو يقول..
/اها لقيتها في وحده من الديار..ابتسم وهو يشوف لجنه ويقول..انتي سمحة واجد عندك علم!..وكمل يقول بأبيات شعريه...
..إنتى سمحة وكيفك ما اهناك
الله يرعاك
  خديتى عقلى راح امعاك
☘سامي بإبتسامه:الله الله..
وحسين يشوفله بإبتسامه...
.. انتى سمحة وكيفك ما اهناك
    جميل هواك
غزال شارد بنقشك محلاك
وسبحان الخالق سواك
انتى كيفك ما اهناك متيل
قلة وقليل للى يشبه زولك بالحيل
انتى  نجمة ف عز سماك
قمر ضاوى ف ليلة مبهاك
وياسعده اللى اينول ارضاك..
🌼ابتسمت جنه وهي تتكلم بلغتها..
سامي:اشبح شن ترد عليك..
باس عبد القيوم جبينها وقال..
/الله يحفظها..
☘حسين:سلمت ياغالي..هي جيبها هي...
مدها عبدالقيوم لحسين وماكانش يبي يفارقها..
وهي تشوفله بس..
حسين؛هي السلام عليكم..
الزوز ردوا عليه:وعليكم السلام..
وعبد القيوم اشر بيده يحيي في جنه اللي قعدت تشوفله لين ادرق عنها..
عبد القيوم بإبتسامه..
/الله يبارك عليها ويحرسها..
سامي وهو يشوفله بإبتسامه..
/آمين...
🍃🍃🍃🍃🍃🍃
"هاك بنتك وشوفيها بالك ناقصه صبع ولاوذن"
خدتها منه وهي تضحك..
حسين: بنتك هادي يوصوا منها مش عليها..شوفي شن دارت فوجهي.
شافتله طوبى جو عيونها ع خشمه ضحكت وهي تقول..
/حي عليك ياشفشه شن درتي..!
ع جية اميمه وهي مبتسمه..
/روحت شبيهتي!؟
طوبى بضحكه:دارت في وجه خوك خريطه..
شافتله اميمه وضحكت..
حسين:والله ولاد غرفه فيهم الهون..
طوبى عقدت حواجبها و مسحت ع شعر جنه وهي تقول..
/الله يبارك ع بنتي..شافت التوكه اتفاجئت وقالت..حي! وين لقيتها هادي!
حسين:نسيتيها في المزرعه شكلك التارقي جابها..
وجه طوبى سخن واحمر تلقائيا..
اميمه:ع سيرة التارقي شن صار في حكاية سيارتي!؟
طوبى وهي تمسح ع شعر بنتها كانت تشوف لاميمه بشي من الضيق
حسين:لقالك وحده زي ماتبي بالزبط وقال صاحبه بيراعينا في سعرها..
اميمه بفرح:واخيرا..
ابتسمت طوبى غصبا وقالت..
/بتشري سيارة جديده؟
اميمه:ايه خلاص سادها هديكا بادت..
طوبى:تبيديها بالهني..
اميمه؛تسلمي بيبو..
حسين:هي اني ماشي ماتبوا شي ماناقصكم شي!؟
اميمه:لتوا مانبوا كان سلامتك..
حسين مشي وهو يقول..
/اوينا..
تنهدت اميمه وشافت لطوبى وهي تقول..
/نخشوا!؟
طوبى بإبتسامه:هيا..
🍃خشوا مع بعض واميمه سكرت الباب..
طوبى:نبدل لجنونه ونجي..
اميمه:تمام..
مشت طوبى بإتجاه الدار لين وصلت فيها وخشت وسكرت الباب..
قعمزت ع السرير وجنه ع رجليها..
عيونها ع التوكه وهي تقول..
/ياربي اني علاش مضايقه هكي..شن اللي واجعني! كان هو معجب بأميمه ولايحبها...بالعكس مفروض تفرحي..كان خدي من العيله يولي نسيبنا ويقعد ديما قريب علينا..ايه صح..ابتسمت براحه لما خدرت مشاعرها باللي حدثت بيه نفسها..
شافت لجنه وقالت...هي ماما نبدلوا..
جنه كلمتها..
هي ضحكت وباست خدها..وهي قريبه عليها شمت ريحه عطر غريبه عن ريحة عطر حسين..بس كانت حلوة بالمرة ومميزة..بعدت جنه وهي تشوفلها بتفكير..
مشت لسامي اكثر من مرة ولامرة شمت عليها هالريحه..
ركزت في التوكه وتسائلت..
زعمه هو اللي لبسهالها!؟خداها ولبسها التوكه بروحه!..
وبدت دقات قلبها تتسارع..
غمضت عيونها..وخدت نفس وطلعاته بعدين فتحتهم وحمحمت ..حطت جنه ع السرير وناضت ومشت للدولاب بش طلعلها  وفي داخلها صراع كان يدور بين عقلها ومشاعرها..
وكالعاده انتصر العقل وكبت المشاعر...
🍃🍃🍃🍃🍃
يوم الاثنين..
18مارس..سنة 2018..
في هاليوم كان موعد عقد قران أريج وآلاء اللي حيتم في مسجد المنطقه اللي فيها شارع قهوة...
وفي نفس هاليوم حيديروا الرشده"الرشته..المقطع" ويلبسوا العرايس البودري..
☘"استغفر الله مابتش تعطيني موعد تاني قالت بتسافر وكان أجلت بنتشحط"..
اريج:مش مشكله حبيبتي بري ..
طوبى بإستعجال:ساعتين ونكون هني إن شاء الله..سلام..
ومشت طول فاتت من جنب الخيمه..ووصلت في الباب...
🍃اللي كان واقف جنبه التارقي من برا...
لاهي بتليفونه وهو يراجي في حسين..
انفتح الباب شافله طول..
وتطلع هي وتشوفه..
والزوز عيونهم تلاقت بنظرات كلها مفاجأه ليه هو وفجعه لطوبى..
اللي من ارتباكها طاح الدوسيه اللي كانت شاداته..
وصلت لأقصى مراحل الارتباك والتوتر..خلت الدوسيه طايح والتفتت تسكر في الباب وهي ترجف..
هو نزل للدوسيه خداه..وهي بعد ماسكرت الباب التفتت شافت للدوسيه...ولون وجهها ولى من لون حبات الرمان..
عبد القيوم مدلها الدوسيه بدون مايتكلم..
هي مدت يدها المغطيه وخداته وعيونها ع الدوسيه وفي لحظه غيرت نظرها ليده اللي شاد بيها التليفون شافت الخاتم كان منقوش عليه كلمة..
"نقاب" بشد القاف...
حولت نظرها عنه ومشت بالدوسيه للسياره وهي حاسه بقلبها يرجف..
طلعت المفتاح من جيب الجلابيه وفتحتها..
وهو يسرقلها في النظر...لين ركبت..
حطت الدوسيه جنبها بعدين شغلت السياره وتحركت..
ويلحقوا عيونه المغرمه سيارتها لين تطلع من الشارع..
"تارقي"..
رسم ع وجهه ابتسامه والتفت وهو يقول..
/افندينا...
🍃🍃🍃🍃🍃
وتعدي الساعات...
ويجي وقت عقد القران..ومسجد المنطقه كان مزحوم بالاحباب والصحاب والجيران..
واهم الحضور كانوا العرسان اللي تألقوا بالزي الليبي والفرحه كانت تتناثر من عيونهم..
🌼زي الفرحه اللي عايشتها آلاء كانت زي الفراشه طايره بسعادتها..
لكن اريج كانت تتصنع وتمثل..اللي يتمعن في نظرات عيونها يعرف قداش هي حزينه...
مافي حد حس بيها وقتها ولالاحظ حالتها غير نبيله اللي شافتها وهي تضحك لمعة الدموع باينه في عيونها...
🍃🍃🍃🍃
حيعقد حاليا قران اريج هي الأولى..
قبل ليبدوا بدقايق خش مختار وهو لابس الزي الليبي كامل
منظره كان بهي في عيون اللي يشوفوه.. وكأنه بي طرابلسي قديم...
العيله ملامح وجوههم تغيرت مع خشته..والوحيد اللي ناضله سلم عليه منهم حسين..
عبد الرؤوف تجاهل حتى النظر ليه بينما عبد القيوم كان مركز بنظره عليه..
بعد سلام حسين ع مختار..ناضوله اهل العرايس سلموا عليه كلهم وبشير خداه بالأحضان..
بعدين جاه محي الدين سلم عليه...بعد سلام محي..
شاف للشيخ وقال..
/اني وكيل العروسه التانيه..
الشيخ؛انت مختار لطفي الواعر..
ابتسم وقال:اني هو..
ومشي قعمز قريب ع الشيخ وربع رجليه..
جو عيونه في عيونه جده..
نظرات علي كانت حاده..هرب منهم مختار..
وهدا كله كان ع عيون عزيز اللي حس ان وضع مختار مع عيلته سيء..
🍃🍃🍃
وعقد الشيخ قران اريج اسكندر اللي كان وكيله خوه الكبير وهي وكيلها عمها بشير...
اسكندر كان فرحان وكله شوق وحماس لزيارة عروسه اللي حياخد راحته معاها لاول مرة..
وفرحة رؤوف ليه كانت كبيره وكأنه زوج خوه..واسكندر فعلا كانله ديما أخ...
🍃🍃🍃
جي وقت عقد قران آلاء وعزيز..
والوكيل للعريس عمه..والعروسه وكيلها خالها الوحيد..
والشهود عبد الرؤوف وقريب لعزيز..
كان عبد الرؤوف طول الوقت يتجنب النظر لمختار.
ومختار متجاهل وجوده تماما..
جي دوره وقعد يردد ورا الشيخ..وهو يعطي في الاء وكأنه يعطي في بنته..حس بشعور حلو هلبه..خصوصا والاء بالنسبه ليه كانت فعلا وكأنها بنته..
الشيخ...
/بارك الله لهما وبارك عليهما وجمع بينهما في خير..
ابتسم عزيز من قلبه اللي كان بيفر من الفرح واخيرا اجتمع بحب حياته وولت حلاله المبارك..
جاته التهاني من اهله..ومن اهل العروس..واخرهم مختار اللي شده وقال..
/آلاء في عيونك لو زعلتها حتزعلني هلبه..
عزيز بإبتسامه:ماتوصيش حريص...
طبطب مختار ع كتف عزيزوغير نظره عنه جو عيونه ع التارقي..ضيقهم وابتسم..
وعبد القيوم تجاهله تماما والتفت ع الجد علي..
رفع مختار حاجبه وقال...
/بتمشي تشوف إلاء..
ابتسم وقال؛ايه..
شافله مختار بإبتسامه وقال..
/تمام تعالى معاي..
وخدي عزيز من يده وطلعوا من الجامع..
وعيون علي الواعر معاهم...
🍃🍃🍃🍃🍃
برا..
جنب المرسيدس اللي يملكها مختار...
طلع كيس لماركة مجوهرات مشهوره مدها لعزيز وقال..
/قوللها من خالك..غير اني مسافر بعد ساعه من توا..
خداها عزيز وقال..
/توصل إن شاء الله..
مختار بإبتسامه؛نتمنالكم حياة سعيده..
عزيز بإبتسامه:ان شاء الله..وسلم عليه بالخد..بعدين مشي لسيارته...
مختار بعد ماكان يتبع فيه غير نظره عنه لما سمع..
"معليش حول سيارتك"
مختار شاف لسيارته رفع حواجبه وقال..
/اووه!..اسف ماركزتش جيت مستعجل..
عبد القيوم قعد واقف ع باب سيارته وهو يشوفله بجديه..
مختار شافله وقال..
/عبد القيوم التارقي..
عقد عبد القيوم حواجبه..
ركب  مختار سيارته..سكر الباب ونزل المرش وشاف لعبد القيوم بإبتسامه واسعه وقال...
/تمزويت اها الخير "معرفة خير"...
ولبس نظاراته بعدين شغل سيارته وتحرك...
لحقه عبد القيوم بعيونه..بعدين غير عنه لطرف التاني من الطريق 
شاف عبد الرؤوف وهو واقف حدا سيارته..
وحسين اللي كان مقعمز في سيارته وجنبه الجد علي كلهم كانوا يشوفوله بنظرات غضب وقلق في نفس الوقت..
هو غمض عيونه وفتحتهم بإبتسامه..بعدين اشرلهم بيده القدام بمعنى..."هيا"..
وركب سيارته..
ركب عبد الرؤوف وشغل سيارته بعصبيه..
تحرك حسين..بعدين هو وراه..وعبد القيوم وراهم..
وبدوا يكلكسوا..ولحقوهم عبد العزيز واسكندر...
🍃🍃🍃🍃🍃
"خي نطلعله من غير مكياج بكل..حتى شويه كحل"
طوبى:لاانتي جمالك غلاب مش لازمك مكياج..
اريج ضحكت..
قلب الاء عيونها بملل..لكن فيسع ماضحكوا هالعيون لما جاها اتصال من عزيز..
بعدين سمعوا اصوات منبهات السيارات..
والزغاريد المتلاحقه..
طوبى خدتهم من ايديهم وقالت بضحكه حماس..
/هيا تعالي..
ومشوا طلعوا من دار المعيشه وهما يضحكوا..
🍃واكيد لازم من حضور النوبه في يوم زي هدا واللي جابها معاه اسكندر..
المهدي في المطحن متاعه كان يسمع فيهم وهو حاس بضيق شديد..وعقله عند خوه الصغير...
زي ولده محمد اللي كان واقف في المقهى وهو يتفرج وخاطره ضايق...
لكن مغليه وهي تسمع..كانت تبكي..ايه تبكي..تفكرت اليوم اللي جاها نضال وهو منهار يوم تلبيسة اريج..
كلامه اللي قاله بقهرة قعد يرن في وذانها..
بألم قعدت تدعي..
/الله لايربحك ياطوبى..كان سكتي وتحملتي شن بيترالك! قهرة ولادي كلهم في جرتك انتي...ياريتك ماكنتي...
🍃🍃🍃🍃
وطوبى في هالوقت كانت شاده في حضنها جنه اللي لابسه بودري حتى هي وترقص فيها ع شوط النوبه في الخيمه والعيون عليهم...
🍃🍃🍃🍃
خشت للمربوعه وهي متحسمه..
لما شافاته بالعربي ابتسمت وقالت..
/عزو..
ابتسم من قلبه وناض فتح ايديه..
ضحكت ومشتله طول..
~~~~~
مقعمزين مقابلين بعض وايديهم حاضنه بعض تسمع في كلامه حلو وقلبه يدق بقوة..
عزيز:حبيبة عمري وروحي ملهوف ليوم الاربعاء بشكل ماتتخيلشي..
آلاء بإبتسامه خجل..
/بنسافروا الخميس طول؟
عزيز؛ايه ياروحي من الصبح..
آلاء تنهدت وهي تهز في راسها..
شد ع ايديها بقوة وقال..
/مش حتحسي بالغربه صدقيني...
شافتله بإبتسامه حلوة..
هو طلع ايديها وقال..
/كان نلقى نروح بيك توا..
ضحكت بخجل..
وهو ابتسم وطلع من جيب فرمتله انسيال ألماس خفيف..
ولبسهولها..بعدين خدي يدها وطبع عليها قبله..
قام عيونه وشافلها وهو يقول..
/نحبك..
الاء من قلبها وبنظرات عيون كلهم حب..
/حتى اني...نحبك...
🌼🌼🌼🌼
وطلعت الاء من عند عزيز بعد ماخلت قلبها عنده..
وخشت للحوش..تلقتها طوبى وهي تشوف لملامح وجهها اللي كلها هويام..
آلاء بهويام:ع بالي حبيبي..
غمتلها طوبى فمها بيدها وهي تقول بضحكه..
/اسكتي يامعفنه..
بعدين ضمتها..والاء تحضن فيها وهي تضحك بفرح..
🍃🍃🍃🍃🍃
وتطلع بعدها اريج..
خشت للمربوعه وهي مبتسمه لما شافاته قالت..
/اسكندرون!
ضحك وقال:بنيتي.
ابتسمت بإستغراب..
ضحك وقال:اقربي..
مشتله..وصلت فيه..هو خداها من يدها وقربها لقلبه وقال..
/مرتي وحبيبتي وبنيتي..
ابتسمت بإمتنان ودموعها في عيونها وشدت فيه بقوة...
🍃🍃🍃🍃🍃
وعدت هالليله كلها فرح وحب...
بس ماخلاش الامر من دموع فردوس اللي كانت تنزل فيهم في الخفاء...عزائها الوحيد انها عطتهم لرجاله ينشد فيهم الظهر وحيعرفوا يحافظوا عليهم كويس..
🍃🍃🍃🍃
"احسن حاجه درتيها انك حتطلعي من هالبلاد"
اريج؛شكلك يانص نصيص تبي تطلع حتى انت..
معتز؛لو جتني فرصه حنديرها.
اريج بألم:وامي!؟
معتز بإنزعاج:خيرها امي عايشه عادي ماصايرلها شي فوتيها الدراما هادي اريج..
الاء:خيرك تدوي هكي كأنك بتسافر حق!
سكت شويه بعدين..
/ياريت..
حركت اريج راسها يمين ويسار يأسا..اما آلاء فكانت تشوف لخوها بنظرات شك...
🍀🍀🍀🍀🍀
وتعدي هالليله..ويلحقها اليوم اللي بعده..
كان يوم الكسوة اللي بيديروه في صاله...
من بعد الظهر كانوا كلهم غادي...
بنات الواعر وهاديه..وفايزة وبناويتها...ا
🍃العرس هدا غابوا عنه اهل عبد القيوم وسالمين وراجلها بسبب الوضع الامني والسياسي المحتدم...🍃
🍃🍃🍃🍃
اهل الشارع كلهم كانوا يستعدوا لحضور الكسوة..
ماعدا عيلة شنيبه طبعا...
🍃🍃🍃
خديجه؛حتى من سميره عزموها..
مغليه بحقد؛ودره ليهم وليها..
خديجه:ان شاء الله مايعمرلهم دار كيف ماكانوا سبب في خراب ديار خوتي..
مغليه ببغض:طوبى هادي وجه الشوم والشر..من لما خشت الشارع وحني كل يوم لتالي..من اللي نكد ع المهدي كان هي..
ولااللي خلا عمر يخرب حوشه ماهو في جرتها هي..وكملت ع الجالي اللي مادار معاها كان كل خير وهي دمراته الله يدمرها..
خديجه:صدقتي يام...طوبى اساس البلي كله...
سكتوا شويه بعد ماسرحوا بتفكيرهم في حالهم..
بعدين قالت خديجه..
/ايه حقه يام بوي وين مغطس اليومين اللي فاتوا؟
مغليه؛بوك بيمشي للعمرة..
خديجه بتعجب؛وعلاش مامشتيش معاه
مغليه بضيق:والله ماعندي ليها جهد وان شاء الله ربي يسامحني..
خديجه؛يفرج ربي ان شاء الله وتعدي هالايام ع خير نمشوا اني وياك..
مغليه:ان شاء الله يابنيتي ان شاء الله..
خديجه تنهدت وقالت..
/معاش صار جديد في موضوع ولد خالتي!
مغليه رفعت حواجبها وقالت..
/قصدك ماقتلكش!؟؟خطب وحده تانيه وبيعقد عليها الاسبوع الجاي..
خديجه بضحكه؛صحه ليها خالتي..
🍃🍃🍃🍃🍃
ومع المغرب..
جو احلى كساوي للعرايس..كل شي من احسن مايكون..وزي مانقولوا يحل العين المغمضه..
غرفه كانت فرحانه لآلاء هلبه..ورافعه راسها باللي جابوه اهل اسكندر لأنهم معرفة راجلها..
لكن فردوس وطوبى مااهتموا لشي من هدا كله..
كل همهم ان آلاء وأريج يتهنوا ويعيشوا حياة هاديه ومستقرة...
🌼🌼🌼🌼🌼
وع انغام اغنيه "مدي ايدك نحينها"
حنوا العرايس..وطوبى تصور في الاجواء بكاميرا الفيديو..
كانت تنكت وتبصر وتضحك..
وجميله ومنيه اللي كانوا من ضمن الحضور..يتأملوا في حالتها وهما حاسين براحه ورضا ع انفسهم..لولاهم من بعد الله سبحانه وتعالى كان ممكن ماتكونش طوبى هني ولاكان هالفرح صار اصلا...
☘احيانا حياة بعض الناس توقف ع موقف يديروه ناس تانيه...موقف صعب بس لازم يصير بش ينقذوا حياة انسان ويغيروا حياته للأحسن..او يتخاذلوا ويكملوا باقي عمرهم مع عذاب الضمير...☘
🍃🍃🍃🍃🍃
20مارس...سنة 2019...
يوم الإربعاء...
الساعه 11:00ليلا...
《بالسلامة ياحوش الهل . . يادلالي وعزي الاول

حوش الوداده .. خساره يامحلا ميعاده
ديما الشاهي في براده .. واتي للضيف اللي يهل
بالسلامة ياحوش الهل . . يادلالي وعزي الاول

حوش امالينا .. ياما اصبحنا وياما امسينا
مانحسابه ضيوف بقينا .. ساعه باش الباب يحل
بالسلامة ياحوش الهل . . يادلالي وعزي الاول
|~🌸
حوش اللمه .. واللي مضايق يشكي من همه
يلقى فيه خواته وامه ...يفرح وهمومه ترحل
بالسلامه يا حوش الهل...يادلالي وعزي لاول》
🍃وع كلمات هالاغنيه الوداعيه..
طلعوا العرايس مع عرسانهم...
وخلوا امهم وراهم تبكي من قلبها...مهما كان طلعة البنت من حوش العيله واعرة..وهي طلعت بناتها الزوز اللي ماعندهاش غيرهم في ليله وحده...
قعدوا معاها نبيله وهاديه يهدوا فيها...
☘☘☘
ومطيره وطوبى ومعاهم وحده من حموات فردوس لحقوا اريج...
اما اميمه ونبيله وثريا مرت بشير وحمي تانيه لفردوس...لحقوا آلاء...
🍃غرض ثريا معروف كان تبي تعرف اكثر المستوى اللي بتعيش فيه آلاء..وطبعا شافت ماقهرها...
زي قهرة أكابر وهي تشوف الحفله الفخمه اللي دايرها عزيز للرجاله ومصورة بث مباشر...
اكابر حاولت مع عزيز...لكن كلت منه اللي خلاها تكره نفسها وهددها حتى التهديد..
ومن بعد هكي مش حتقدر اكابر دير أي شي لآلاء مهما كان صغير..ولاحتى تعليق سخيف ع الفيس بوك  او رساله مستفزة ع الماسنجر...
☘أما مهند اللي عاش اصعب ايامه طول الاسبوع هدا قرر يقبل فرصة العمل اللي جاته للعمل في قناة ليبيه برا البلاد ويطوي صفحات الماضي لاخر العمر...
🍃🍃🍃🍃
في صالة اهل اسكندر...
طوبى بإبتسامه..
/طالعه ملكة جمال الله يبارك..
ابتسمت سميره اللي كانت مقعمزة ع الكوشه جنب اريج بفستانها الابيض المناسب لعمرها وتسريحة شعر حلوة ومكياج طلعوها فاتنه..وقالت..
/سلمهالي ياربي..الجمال كله عندك ياورد اسود..
ضحكت طوبى وقالت..
/ربي يهنيك..
سميرة بإبتسامه:آمين...
ع جية المصورة وهي تقول..
/هي بناخدلكم الصورة توا..
وقفت مطيره جنب اريج ع اليسار...
وطوبى جنب سميرة ع اليمين وهي مبتسمه ابتسامه واسعه..
وخدتلهم المصورة اللقطه...🌼
🍀🍀🍀🍀🍀
🍀🍀بعد مرور اربعة ايام🍀🍀
25مارس...سنة 2019...
الساعه 5:00عصرا..
في احد اكبر الفنادق في العاصمه..
اقيم المعرض الخيري للرسامين والخطاطين..
شاركوا فيه الى جانب اعضاء الجمعيه...هواة تطوعوا بفنهم للمساهمه في هذا العمل الخيري الراقي..
كان الحضور جيد..ومن ضمنهم شخصيات ثقافيه معروفه من كل اطياف البلاد...
وسط زخم المشاركات..كانت في مشاركه لفتت انتباه اغلب الحضور...
لوحة تحكي عن ثقافه مميزة وعريقه تنتمي لبلادنا صاحبة التاريخ الكبير..
لوحه سمتها صاحبتها...
"فرسان الصحراء"..
🍃سلافه بحيره:انا شفتا هالصورة عند المصور سامي ..
ميار:لكن حلوة هلبه ومتقنه ولقطة الصحرا كيف جايه ورا طرف عمامته اللي طاير وكأنها طالعه منها..والسمي السودا ورا راسه..ورا عمامته السودا وكأنها امتداد للسمي المعبيه النجوم...محلاها محلاها..محلا ابتسامته هو ونظره لوطا..
بجديات اللي راسمها معجب بيه هلبه..
سلافه كانت تسمع في وصف صاحبتها للوحه وقلبها يدق بقوة..وفي نفس الوقت كانت حاسه بضيق..
🍃من بعيد شويه سامي وربيع كانوا واقفين يتفرجوا ع اللوحه وهما يحكوا عنها..
سامي:وينه لتوا..
ربيع:قال قريب يوصل..
🍃ووصل التارقي للفندق...
كان يمشي بسرعه بش يوصل في القاعه اللي فيها المعرض..
وصل وخش..شاف ربيع وسامي قدامه..
مشالهم وهو يقول..
/السلام عليكم..
ربيع شافله وقال..
/تي وينك ياراجل!
عبد القيوم:اليوم بالذات كنت مشغول واجد يدوب سرقت  ساعه من وقتي وجيت جري..
سامي بضحكه؛باهي فوت الدوة هادي توا وشوف غادي..
واشر بيده يمين عبد القيوم..
وهو التفت وين مأشرله..ويجو ع عيونه ع اللوحه..
فتح عيونه ع وسعهم بدهشه...
وفجأه..قلبه بدي يدق بعنف..حسه بيطلع من مكانه...
يمرر في نظراته المندهشه ع اللوحه..وبدوا رجليه يتحركوا ناحيتها خطوة ورا التانيه..وصحابه معاها...
وصل في مكان معين كان ورا بعض الحضور اللي واقفين يتفرجوا..
تمعن فيها..في كل تفاصيلها..الرسم متقن وفي لمسة خاصه يعرفها كويس..
لليوم بين عيونه رسمتها للقلب..ترسم بدقة فالتفاصيل..
واللوحه معبيه تفاصيل دقيقه..
🍃ميار:سلافه..واشرت بعيونها عليه..
شافت سلافه وين تشوف صاحبتها..جو عيونها عليه وقلبه ماباش يهدا..
نظراته للوحه مش بس نظرات حد مندهش..كان فيهم شي تاني..
عبد القيوم؛معليش لو سمحتوا..
تباعدوا الموجودين عن طريقه..
وهو قرب للوحه...شاف اسفل منها...
لقي توقيع واسم..نزل راسه بش يشوفهم كويس..
الاسم كان اسم مستعار كرره في نفسه مرتين..
"قاصرة الطرف..قاصرة الطرف"..
وقف ع حيله ورجع يشوفلها بنظرات عدم استيعاب..
التفت وشاف سلافه وميار قال..
/الاستاذة نفيسه المسؤوله عن القسم هذى وين؟
ميار:شويه وجايه..
هز راسه ورجع شاف للوحه..ونظراته عيونه العاشقه متأمله ان اللي توقعه صاحبهم يطلع صح...
🍃🍃🍃
وصاحبة اللوحه كانت مع بنتها مع كوجينة حوشها..
طوبى وهي تشوف لجنه المقعمزه في المقعد الخاص بيها..
/وتوا بنزينوا اني وياك الدونات بالشكلاطه وصوصات حلوات زي خدود بنتي..
اول شي نمشوا نجيبوا حافظات الدونات بعد مابردوا..
طبعا اني قبل ماكنتش نحب الدونات بارده هكي بس توا حبيتها هكي بنوتي..
مشت خدت الحافظه وهي تقول..
/في من حاجات ياماما حلاوتها تتاكل وهي بارده..
وشافت لبنتها بإبتسامه وغمزة عين..
🍃🍃🍃🍃🍃
"ياريتك جيتي وريتي بعيونك..خلتها تعول زي الكلبه وفمها ساكت"
خديجه:صحة ليك ياخالتي درتي اللي حني ماقدرناش نديروه..
مغليه:غلبتنا طيبتنا الزايده والمعامله بالأصل..
خديجه؛طياح سعد مش معامله بالأصل..خلت اللي يسوى واللي مايسواش يتمادى علينا..
نجاة؛باهي لما شافت ضرتها شن صار فيها..
مغليه؛تبخرت معاد ريناها..
خديجه:دارها فيا تيمو..كان هدا مشيت معاك ودورتها وين ماهي لين نلقاها ونتفرج ع قهرتها بعيوني هالعقرب..
🍃🍃🍃
طوبى:وتوا نزينوها بالشكلاطه هيا الاولى ..
وبدت تزين في الدونات وهي تغني..
/هالدونات..شو الحلوين..وضحكت..
وجنة منسجمه معاها...
☘☘☘☘
ويوصل محمد شنيبه بسيارته للحوش.
وولده المهدي اللي كان مقعمز قدام المطحن تنهد..وكانت باديه ع وجهه ملامح البرود..
خش بوه بالسيارة للقراج والباب تسكر وراه...
🍃🍃
نجاة:باهي هي توا وين قاعده؟
مغليه؛في دار مع حوش العيله..
نجاه:عليك كاينه دارتها في روحها..
خديجه؛جاباته لروحها ماهي كانت عايشه في شقتها معززة مكرمه..
مغليه؛صح اختي واعره شويه وبناتها واعرات لكنهم واعرات في الحق..وهي تبي العوج وهدا ماجابلها العوج..
🍃🍃🍃
انفتح باب الحوش..
خش محمد شنيبه وقال بإبتسامه..
/هيا سمي بالله وخشي برجلك اليمين..
🍃🍃🍃🍃
طوبى:بعد ماكملنا تزيين ناخدوا الحلوى الصغيرونه هادي ونرشوها فوقهم..يممي..منظرهم يسهف جننوتي..
🍃🍃
خديجه بضحكه؛قالت معاش يفارق فيها بكل من خوفه عليها معاش مشي لسميره ولاعاد يندري عليها..
نجاة؛ابتسام مش ساهله بكل..
مغليه؛زيدها منه الشومه هديكا..
"السلام عليكم"..
وجهوا انظارهم ناحيه الباب وردوا السلام وهما مستغربات..
مغليه:امتى روحت!؟
شاف محمد شنيبه للباب وقال..
/خشي خشي..
عقدت خديجه حواجبها بإستغراب..
وامها ونجاه كانوا يشوفوا للباب بترقب..
وتخش منه وحده لابسه بدله رسميه لونها بنفسجي غامق..
ووشاح من نفس اللون بس بدرجة اخف..مكياجها عرايسي..
وع وجهها ابتسامه لطيفه...
هما لما شافوها...
انصدمت نجاه...بس خديجه وامها وكأن في صاعقه نزلت عليهم..
سميرة بإبتسامه عريضه..
/كيف حالكم ياعويله..
مغليه قعدت تشوفلها بصدمه ومش قادرة تنطق..
اما خديجه ناضت وقفت وهي تقول بعدم استيعاب...
/هادي شن دير هني!!؟ وعلاش جايه معاك انت!!!؟
شافت سميرة لراجلها..
اللي شاف لبنته بإبتسامه ببرود وقال..
/هادي..مرتي...
🍃🍃🍃🍃
طوبى وهي تاكل في الدونات..
/اممم...ياماما تهبل..بالذات وهي بارده..توا لما تكبري وتاكليها ان شاء الله تعرفي علاش تولي احلا لما تتاكل وهي بارده...
اممم..تجنن...تنهدت بغرور وقالت...
"يسلموا ايدياتي"

#العضيد
#طوبى

....يتبع.....