أكبـر مـن أحـلامـي
أشـوفـك!
حيـرتنـي المـايمهـا حيـرة
منيـن ماتنـدار أحبـك
بحـر و يحـاوط جـزيـرة
♡♡♡⚖️
خيـالـي الأسود 11:11
فاطمـة عبـد
التصـويـت، متابعـة الحـساب، التعليـق بيـن الفقـرات فكـتوريـاتـي ♡
♡♡♡
سـِـدره
:- بعد ماصحت سيلفـا ضليت كاعده يمها لحد ما أجه خالي ومرته وامجاد.
دخل أمجاد وهو مفرفحه روحه عليه عبالك بنته
دخل يرعد رعيد بصوته الجهوري.
وانه اباوعله شلون محتقن وجه وعيونه حمر من كد ما حابس لدمو؏ بيهن راح يمشي بسرعه بتجاهه سيلفا وحضنها قوي حسيته يريد يدخلها بضلوعه من كثر ما حاضنها!
ابتسمت عليهم وانه اشوفه شكد حنين عليها ويعامله عبالك طفلة ويقنع بيه تاخذ العلاج مالتها وهي تبجي
وكل هسه وبايس راسها ويطمنها يكوللها مابيج شيء حبيبي بس هو يادوب كاعد ؏ حيله مايتخربط
كام امجاد طلع وطلع ورا سجاد انه طلعت وراهم لان اختنكت من الغرفه طلعت جان اشوف امجاد ساند روحه ؏ الحايط وخشمه ينزف دم!
رحت اركض عليه:
:- شبيك خويه امجاد ليش خشمك ينزف دم؟
أمجاد:- مابيه بابة بس شويه صعد الضغط عندي لا تخافين باباتي.
:- شلون ما خاف خويه وانت خشمك ينزف هيج لا يصير عندك جلطه اسم الله تعال اخذك للدكتور يشوفك ويقيس ضغطك او يخليلك مُغذي
أمجاد:- مابيه شيء باباتي لاتخافين روحي يم سيلي شوفيهة لاتخلينها وحدها
:- بس.
اريد احجي وقاطعني صوت سجاد وهو يكول:
سجاد:- لاتخافين ام السوس روحي شوفي سيلفا واني يمه هسه ادحگله واشوف شبي وانتي روحي غادي بالغرفه
:- ماجاوبت بس هزيت راسي بإيجاب ورحت دخلت للغرفة
عاد شويه ودخلو اثنينهم باوعت ؏ امجاد هو فهمني وغمض عيونه وهز راسة يطمني..
اشويه وطلبوا منه نطلع بس أمجاد ماقبل يطلع سيلفا إلا تطلع التحاليل مالتها
طلب أمجاد من سجاد يوصلني بسيارته وخالي ومرته يرجعون بسيارته.
استأذنت من سيلفا وبوستها وطمنت عليه وطلعت انه وسجاد بس انه متوتره لان وحدنه انه وياه
صعدت وياه لكدام وضليت ساكته واعصر بأيدي بتوتر قطع الصمت هو ويسأل.
سجاد:- اي ام السوس شلونج شخبار دراستج
:- الحمدلله ماشية أموري
سجاد:- دومج بنيتي
:- ضليت ساكته ودكات كلبي احس واصله ليمه
احس الطريق صار شطوله بس اريد اوصل للبيت حتى دكات كلبي تهدأ ماكو.!
وصلت للبيت واحس الفرج جاني نزلت بسرعة
وكتله مع السلامه قبل مايرد سديت الباب مالت السياره ودخلت اركض فتحت باب البيت وسديته ورايه.
حطيت ايدي ؏ كلبي بس اريده يهدأ ماكو اخخ ولك بس اهدأ ليش هيج تستخف من تصير قريب منه وهو حتى مامعبرني ومعتبرني اخته!
هدأت اشويه دخلت للمطبخ لكيت امي كاعده تطبخ ورنا تعاونه بالطبخ سلمت عليهن سألتني مامه
ميسون:- ليش تأخرتي مامه؟
:- ماردت اقلقه وماكلتله عن حالت سيلفا لان اعرفهة شكد تحب سيلفا وتخاف عليه ماشفت عمه تحب بنت اخوها بكثر امي!
جاوبته مامه اخذنا دروس اضافيه اليوم وتاخرنا
ميسون:- عجل منو وصلج؟
:- سجاد وصلني انه وسيلفا
ميسون:- سيلفا صايره بذات ماتسلم عليه زعلت عليها صارلي اهواي ماشايفها!
:- لا مامه هو سجاد وصل سيلفا بعدين وصلني لان عنده شغل قريب من عدنا وصلني وطلع مستعجل للشغلة
ميسون:- ربي يسرله اموره روحي حبيبتي بدلي وتعالي حتى انصب غده وتتغدين
:- هزيت راسي بإيجاب وصعدت لغرفتي بدلت وكملت ونزلت جوه يم البنات وامي وصل بابه من الشغل وبعده مروان وصبينه الغده وتجمعنه حول
السفره كلنا وتغدينه واحنا ساكتين كملنه الغده شلت المواعين غسلتهم وعاونتني بيهم بنت اختي رنا حور بيهم كملت وصبيتلهم جاي وصعدت لغرفتي نمت
لحد اذان العشه إلا كعدت راسي مصد؏ باوعت للساعه بـ 7 بليل يبوو هاي شكد نايمه النهار قصير لان الدنيا شتاء
وانه نايمة من الظهر كمت غسلت وصليت العصر والمغرب غضى حتى مايبقن عليه وصليت العشا ونزلت جوه حتى اشوف العشا لان ميته جو؏
نزلت جوه لكيت مامه صابه العشه تريد تصعد تكعدني
تلاكيت انه وياها ؏ الدرج ونزلنا كاعدين نتعشا وجان ينط مروان
مروان:- يمه رحتي ؏ سيلفا شفتيها؟
أمي تركت الاكل ورفعت راسها حجت بقلق
ميسون:- لا يمه مارحت شبيها شصاير.؟
وانه اغمز المروان واعض بشفتي اريد اشر ماكو مامنتبه عليه اصلا
مروان:- يمه والله خطيه اليوم تخربطت بنص الشارع كدام المدرسه واخذوها للمستشفى
شهكت امي بعلو صوتها وكامت تبجي:
ميسون:- يمه كولي شبيها ليش تخربطت بنيتي سوده عليه
مروان:- كالو بيها خفقان وفقر دم حاد ومامتحمله وفقدت الوعي
ميسون:- سوده بوجهي عليج يايمه مارتاحيتي ابد
باوعت ؏ امي ما اعرف شنو قصدها؟
:- مامه صدكي مابيها شيء والله وهسه طلعوها للبيت حتى ترتاح
ميسون:- انتِ اسكتي اخير وحده تحجين شلون ماتكليلي هاا ولج هاي بنيتي ربيتها ؏ ايدي سوده عليه سيلينتي
:- مامه والله ماردت اقلقج وهي الحمدلله صارت زينه هسه لاتخافين عليها
ميسون:-كوموا ودوني عليها هسه كوموا
كامت تعيط وتبجي إلا تودوني عليها
كوه قنعها مروان وبابه انو باجر ياخذونها حتى تشوفها بألف ياعلي يلا هدأت واقتنعت
صعدت لغرفتي راسلتها وطمنت عليها ونمت
كعدت الصبح غسلت وجهي وهستوني اريد اجهز نفسي حتى اروح للمدرسه موبايل دك رفعته وجان اشوف المتصل سجاد توترت ماعرف شصار بيه صارت رجفه بأيدي
هدأت من نفسي اشويه ورفعت الموبايل وجاوبت عليه
:- ألو
سجاد:- السلام عليكم سدره
:- وعليكم السلام هلا بيك سجاد خير خوما صاير شي؟
سجاد:- لا ماصاير شيء بس دكيت حتى اكلج اخذتلج اجازه انتِ وهيلينا ويه سيلفا ماداومن اليوم
اخذنها استراحه لان عدكم امتحان فنيه واصلا مو مهم اهواي واليوم اطلعجن ويه سيلفا حتى تغيرن جو وتغيرن من نفسيتها اشويه
اني استمعله ومتوتره شلون يريدني اطلع وياه.؟
اخذت نفس وجاوبته
:- اذا ؏ الاجازه مشكور لان جنت محتاجتها بس ؏ الطلعه اعذرني ما اكدر اطلع لان تعبانه وإن شاءلله نجي بليل عليكم انه وامي ومروان وبابه لان امي تريد اتشوف سيلفا
سجاد:- ليش شبيج تعبانه سلامات
:- لا والله بس من الامتحانات تعبت نفسيتي
سجاد:- يلا تهون ان شاءلله يلا اني اترخص اخذي راحتج مع السلامه
:- الله وياك
سديته منه وزفرت نفس براحه انتبهت ؏ نفسي طول وانه احجي وياه كاتمه نفسي تنهدت ورحت للفراش مالتي لفيت راسي ونمت لان ماعندي دراسه أخر امتحان اليوم الحمدلله لان خلصنا اكثر من نصف سنة متعبة الي
نمت وكعدت بـ 12 الظهر لكيت امي كاعده تطبخ صبحت عليها
:- صباح الخير مامه
ميسون:- صباح الظهر
:- هاي شمالج مامه غير طلع تعب الامتحانات كله عليه هسه
ميسون:- يلا ان شاءلله خير روحي طلعيلج بيض وجبن من الثلاجه واكلي لان الغده يطول عليج لاضلين جوعانه!.
:- لا مامشتهيه اريد اساعدج بالطبخ
ساعدتها بالغده وكملنا انتظرنا بابه ومروان يرجعون من الشغل حتى انصب الغده اشويه ودخلوا كل واحد
راح الغرفته بدل ونزل صبينه الغده تغدينه اخذت المواعين غسلتهم وسويت جاي وانطيتهم وصعدت الغرفتي ارهم بالملابس حتى نروح انشوف سيلفا
رهمت ملابس ورجعت تمددت بفراشي صارت الساعه بالخمسة صليت المغرب وكمت بدلت ولفيت الشال مالتي ونزلت عليهم لكيتهم مكملين وطلعنه متوجهين لبيت خالي
وصلنه فتحوا الحراس الباب نزلنه من السياره طلع سجاد ابتسم بوجهنه ورحب بينه
سجاد:- ياهلا بيكم تفضلو تفضلو
سلم ؏ بابه وامي باسها براسه وصافح مروان وانه سلم عليه من بعيد سلمت عليه ودخلنه للبيت اول مادخلنا
لكيت خاله حنان واكفه سلمت عليه ودخلت للصاله شفت امجاد كاعد وعينه ؏ الدرج
:- شلونك أمجاد انتبه عليه وكام بوجهي ببتسامه
أمجاد:- هلا ام السوس الحمدلله وانتِ شلونج؟
:- الحمدلله بخير
أمجاد:- دومج بنيتنا
ابتسمت ؏ كلمته وحنيته النه مايفرقنه انه وهيلينا عن سيلفا ابدا يعاملنه عبالك بناته بس هيلينا يعزها اهواي
كعدنه بالصاله كلنا ماعدا سيلفا ضليت اباوعلهم وهم يسولفون بأمور عامه بس أمجاد كل هسه يلتفت ؏ الدرج باتجاه غرفه سيلفا اهنا انتابني القلق وسألت
:- چا سيلفا وين ماشفتها؟
سجاد:- بغرفتها من الصبح
هو حجه هيج وأمجاد وكف ؏ حيله وباو؏ سجاد وأردف بصوت مليان قلق
أمجاد:- ـ شنو سجاد شنو من الصبح يعني من طلعت اني من البيت هي بغرفتها؟
سجاد هز راسه بإيجاب
أمجاد:- لك شلون تعوفوها لوحدها لحد الأن خاف صار بيهة شيء
سجاد:- لاتخاف مابيها شيء صعدت عليها كالتلي عوفوني اريد ابقى وحدي ماريد اشوف احد واني مالحيت عليها عفتها تاخذ راحته
اردف أمجاد بصوت ماليته الغصه:
أمجاد:- الله ياخذني حتى اخلص كله من ورايه اني وصلتها لهاي الحاله كله من ورا عنادي وحقدي
:- مافهمت شنو يحجي اشرتلي امي اكوم اصعد عفتهم وطلعت امي وبابه اخذو للاستقبال يحجون وياه
صعدت لغرفه سيلفا دفرت الباب وحجيت بصوت
:- سلاموون عليكم يا اختاه
سيلفـا:- شبيج ولج عندج مداهمه؟
:- كومي ننزل لو ادفرج هسه بألف ياعلي كومتها حتى تصالح أمجاد نزلنا انه وياه دخلنا للصاله مالكينا احد رحنا للأستقبال تونه وصلنا الأستقبال وكفتني سيلفا وهي تأشر ؏ حلكها بمعنى اسكتي خلي نسمع
سمعت حجيهم وهم شلون يحجون انو خاله حنان مو امها تصير مرت ابوها وهي مربيتها وامها متوفية وسمعت صوت امجاد وهو يصيح وامي تحاول تهدي
تحول نظري ؏ سيلفـا يللي حاطه ايدها ؏ حلكها ومصدومه واديها يرجفن رجيف مو طبيعي
ما حسيت غير ؏ سيلفا تدفع الباب ودخلت تعيط انتبهوا عليها وبقوا مصدومين وهي فقدت اعصابها احاول أهدأ بيها وهي فاصله مو ويايه بس تعيط وتبجي وتكرر كلمتها حرمتوني منهة ماخليتوني اقره قرءان الها ولا زرت قبرها
:- احس كلبي وجعني عليها وهي بهاي الحاله وامجاد تخبل يريد يسكتها حتى ماتوكع علينه بس هي فقدت ماتعرف شنو تحجي تعيط وتضرب ؏ صدرها وتشهگ بالبجي اشويه هدأت وهي حاطه ايدها ؏ كلبها اهنا سجاد وامجاد تخبلوا
راحوو يركضون عليها بس هي رجعت خطوات ليوره وحطت ايدهة كدامه واردفت
سيلفا:- ليش جذبتوا عليهة مو تعرفون اكره الجذب وما اسامح يللي يجذبون عليه ليشششش بس كولولي ليشششش ول أمجاد ليششش كسرتني هيج هاااا؟
ليشش جنت اعتبرك اصدق زلمه بحياتي ابد ماتضم سالفه عليه هسه طلعت أكبر جذاب
عاط بيها أمجاد
أمجاد:- لج اسكتي كافي لاتحجين شيء تتندمين عليه بعدين سيلفانه
سيلفا:- ههه! بعد لاتحجي وياي امجاد ماريد اشوف احد بيكم ألف مره كلت إلا الجذب كلشي إلا الجذب ياخواني واهلي
حجت هيج وطلعت تركض من الأستقبال طلع يركض وراها أمجاد ووراه سجاد انه طلعت وراهم اريد اصعد اهديها
أمجاد يعيط وراها
امجاد:- اوكفي سيلفا موزين عليج خلي افهمج
وصلت الصاله وهي تركض وصلت لنص الدرج وما حسينا غير سيلفا فقدت توازنها وحطت ايدها ؏ كلبها واغمى عليها وكعدت من الدرج برمشه عين شفتها واكعه وناكعه بدمها اهنا حسيت رجليه بعد مايشيلني وكعت ؏ ركبي وحاطه ايدي ؏ حلكي بصدمه سمعت صيحه أمجاد يصيح
أمجاد:- لج لاااا بنياتي
راح يركض وهو ايديه يرجفن حط راسها بحضنه ويضرب بوجهه بخفه وهو يحجي بصوت يرجف
أمجاد:- بنياتي سيلفانه كومي افتحي عيونج شوفي بابه أمجاد مو انتِ تصيحيلي بابه كومي دحكي عليه ابوج يمج كومي بنيتي كوووميي
صار يعيط احسه فقد ميعرف شنو يحجي وهو حاضن راسها لصدره ويحجي بدون وعي
أمجاد:- كله مني كله مني بنياتي خسرتها ماتتت اي ماتتتت كومي يريحه امي دحكي ؏ بابه يلا
:- انتبهت ؏ سجاد واكف مصدوم حتى مايرمش بس يباو؏ بصدمه كوه كمت ؏ حيلي صحت عليه سجاد
مارد عليه هزيته من كتفه قوي اله طلع من صفنته راح يركض عليها وخرها من حضن أمجاد شالها وطلع يركض بيها ..
رحت أركض وراه فتحتله باب السياره الوره خلاه وانه صعدت يمه وحطيت راسه ؏ رجلي وابجي واشهك
اسمع سجاد يردد:-
سجاد:- دخيلك يربي لاتفجعني بسيلفا دخيلك يامحمد احفظها النا يارب يارب
وانه ابجي واشهك صحت عليه
:- سجااااد بسرعه عفيهةة خلص دمهااا
صاح بعلوا صوته وهو يردد
سجاد:- يالله يالله احفظهه يااااارب
:- احس طلعت روحي إلا وصلنا للمستشفى
تلكونه ممرضين يعرفون سجاد اخذوها وزملاء
سجاد وياه دكاتره اخذوهه منه سجاد راد يدخل
هو يشرف ؏ حالته بس رفضوا لان من اقاربها
وسجاد جانت حالته ماتسمح انو هو يللي يعالجها
لان جانت ايديه يرجفن وحيله كله راح
شفته سند روحه ؏ الحايط رحت اركض عليه
:- عفية سجاد تعال اكعد لاتوكع انت والله ماضل بيه حيل انهد حيلي.
سجاد:- سدره شلون تريديني اكعد واختي جوه بين الحياه والموت بس كوليلي؟؟
:- لا إن شاءلله مابيها شيء سيلفا قويه وراح تتخطى هذا الشيء مثل كل مره
سجاد:- ول حتى لو تخطت شلون راح اعالج كلبها يللي كسرنااا هااا؟
شلون راح اعالج نفسيته يللي تدمرت من ورانه؟
شلوووون بس كوليلي شلون راح اكف كدامه واخلي عيني بعينها؟
:- لاتسوي هيج بنفسك سجاد إن شاءلله بمساعدتك انت وامجاد تكدرون تنسوها وتعالجونها بس كول يالله وادعيلها تطلع بالسلامة.
سجاد:- ربي احفظها الي مابقت بس هي من ريحه أمي
كاعد نحجي انتبهت ؏ أمجاد يركض بالممر هو وخالي ومرت خالي ومامه وبابه ومروان باتجاهنه
صاح أمجاد
أمجاد:- وين سيلفا وينها؟
محد جاوبه ضلينه ساكتين!
رجع عاط بينه بعلوو صوته احس كل يللي بالمستشفى
سمعوا عيطته!
أمجاد:- شبيكككم شصايرللها احجووو بسرعه وين سيلفا!!؟
وكف سجاد وصاح
سجاد:- شتريد بعد منهااا هاااا؟
شتريد دمررت حياتها بعنادك ألف مره كتلك أمجاد
انسى الماضي علمود سيلفا بس لاااا وين ويامن نحجي
ويه حضرت الضابط أمجاد؟
لزم أمجاد ياخه قميص سجاد وصاح بيه!
أمجاد:- كااااافي لاتحجي اسكتت انت تعرفف شنو عانيت اني تعرف حضره جناب ابوك يتمعشك بمرت ابوك واني يللي تعبت عليكم وصرتوا مثل جهالي هااا؟
كلشي ماتعرف وتجي هسه تحكم عليه مو؟
سجاد دفع أمجاد ونتر بيه
سجاد:- كافي يخي كاااافي لك شوف سيلفا اللي حافظنه عليه كل هاي السنين برمشه عين نلكاه ناكعه بدمها شنو ذنبهاااا هااا؟
كتلك خلي انكوللها من البدايه حتى ماتسمع من غيرنا وتكرهنه وهسهه شصار كولي شصار؟
كاعده جوه بين الحياه والموت واذا تخطت هاي حالته مراح تسامحنه ابد والفضل يرجع ألك بس مراح اكلك غير شي واحد والله وثم والله يا أمجاد اذا صار شيء بسيلفا بعمري وحياتي مراح اسامحك
:- طلع سجاد وعافنه امجاد راح كعد ؏ الكرسي وحط راسه بين اديه وعيونه حمر وخاله حنان تبجي وتدعي وامي تخربطت واخذها بابه ومروان نومها بغرفه ضغطها صعد وخالي كاعد يدعي وعينه ؏ باب الغرفه
وانه حالي مو احسن منهم كاعده ابجي وعيوني مغوشات بالدمو؏ بس انتظر احد يطلع ينطينه خبر لأن كلبي طكك عليها ربي كومها بالسلامه يارب احفظهه النااااا ياعلي دخيلك ياعلي رجعلي سيلفا
:- كل ماناديت" ياعلي" تبدأ روحي بالهدوء وينخفض وجعها.
فتره وطلع الممرض يركض من الغرفه وهو يصيح
الممرض:- محتاجين دكتور **(اسم الدكتور) اختصاص قلبيه ودم زمرهO-
أمجاد كام ركض عليه وصاح بيه
أمجاد:- اوكف شبيها سيلفا وشلون حالتها.؟
- استاذ حالتها حرجه ونبضها ضعيف وفقدت اهواي دم لازم توفرون هاي الزمره من الدم مامتوفره بالمستشفى ونادره هم وهسه عن اذنك لازم انادي الدكتور
:- راح يركض ينادي الطبيب وامجاد وكع من طوله بالكا؏ لايحرك ايد ولا رجل صرخت بعلووا صوتي
خويه امجاااااد
دخل سجاد يركض وشاله وصاح للمرضين حتى يشيلوا وياه شالوا واخذوا للغرفه انه انهد حيلي وكعدت ادعي
واردد:
"نادِ علياً مظهر العجائب تجده عوناً لك في النوائب كل
هم وغم سينجلي بنوبتك يامحمدو بولايتك ياعلي ياعلي ياعلي"
مرت نص ساعه ورجع الممرض وهو شايل الدم ودخل بسرعة للغرفة واجه وراه سجاد يمشي سريع واردف:
سجاد:- ها سدره شكالوا ؏ وضعها؟
:- بعدها ؏ حطه ايدك محد طلع وبرد گلبنـة!
سجاد:- بسسس أفهم شكاعد يسوون لحد هاي الحظه؟
ماتحمل ودخل للغرفة بسرعة!
سمعت الطبيب يصيح عليه
حتى يطلع بس هو رفض
انو يطلع وصار يعيط
سجاد:- ولكم هاي اختي واني دكتور عوفوني اني اعالجه وخرووو عن وجهيي
الدكتور:- دكتور سجاد أفهم عليه ما اكدر اخليك تعالجه
تعرف بسياسه المستشفى ماكدر اخالف قانونها اتمنى تطلع من الغرفة حتى نكدر انشوف شغلنه!
طلع سجاد وعيونه بگصته من العصبية
اذا بس احد طخه يحسب نفسه ميت
خليته اشويه يهدا حتى أسأله ؏ أمجاد
شلون صار بعدني اريد اروح اسأله
جان اشوف من بعيد هيلينا سانده أمجاد
وجوي باتجاهنة!
انتبه! عليهم سجاد وراح اخذ أمجاد منها وهو يكله:
سجاد:- اني مو كتلك ارتاح ليش طلعت من الغرفه هاا؟
بس ماتكدر اذا ما تعاند مو!
التفت ؏ هيلينا وكاللها.
سجاد:- خويه مشكورة تعبناج روحي اوكفي يم سدره
هيلينا:- العفو مابيه اي تعب.
شلون صارت سيلفا؟
تنهد سجاد وجاوب
سجاد:- نبض گلبها ضعيف حيل ونازفه دم اهوايه وزمره دمها نادره بالف ياعلي إلا لكيت متبر؏
وهسه دخلوله ادعيلها هيلينه ادعيلها.
ردت عليه وهيج تشهك بالبجي:
هيلينا:- والله كاعده ادعيلهة هي مثل اختي واعز ربي يكومها بسلامه وتعدي هاي السالفه بخير وسلامه
الكل: آمين يارب
صاح أمجاد ؏ سجاد وهو عيونه حمر واول مره اشوف دمو؏ امجاد هو عمره كله جان صلب بس من صارت السالفه يم سيلفا صار لين وهش بسرعه انكسر عرفت انو سيلفا هيه نقطة ضعف وقوة الأمجاد وسجاد
اذا هاي النقطة ضعفت او نكسرت همَ ينكسرون ويضعفون اضعاف كسرها وضعفها
أمجاد:- ليش تجذب عليه وتكول حالتها مستقره هااا؟
ليششش
رد عليه سجاد بهدووء
سجاد:- لان انت مريض ماتتحمل فوك حملك وإن شاءلله مابيها شيء
خزره أمجاد وعم الصمت المكان الى إن طلع الدكتور
وراحووا سجاد وأمجاد يركضون عليه
أمجاد:- هاا دكتور شنو حالتها؟
هز الدكتور راسة بأسف وضل ساكت.
صاح سجاد بيه!
سجاد:- دكتور احجي شنو حالتهاا؟ ليش ساكتت!
جاوب الدكتور بكلام كسرنه كلنا بيه!
وهز راسه بأسف واردف بكلمات مثل الصاعقة نزلوا ؏ اذني
الدكتور:- الحمدلله كدرنه نوكف النزيف يللي صار بالدماغ بس مع الأسف المريضه دخلت غيبوبة.
. شنووو....
.
.
. للحكاية بقيـة
. بقلمـي: فاطمـه عبد
ــــــــــــــــــــــــــــــــــــــــــ
﴿ وَرَبَطْنَا عَلَىٰ قُلُوبِهِمْ ﴾
ـــــــــــــــــــــــــــــــــــــــــــ
▲التصويـت ياااقوم وعلقووا بين الفقرات💔
▲حسابي الأنستا[ fofo_i156 ]
▲قناه التلـي[fatmahAybdmoter]