نبدأ بذكر الله ﷽🤎✨
عــرش الـروليت
بارت 19
بقـلمي ميان ألـ مالكي
⛔لا تنسون التصويت والتعليق بين الفقرات حبايبي.
.
.
.
❢ ═──── · · • • • ❂ • • • · · ────═༻❢
اصـرخ بخــوف كل خلايا جسمي
تتحرك ادافـع عن نفسي من جسم غريب !
صـرخت بأعلى صوتي من حسيت بأيد
حقيقية علىٰ وجهي ضربة تلقيتها كفيلة تخليني
افتح عيوني علىٰ وسعهن
شهكــت بصوت عالي وإذا اشوفه كاعد
يمي يباوع بعيون خايفة محتارة عاكد حاجبة
باستغراب
لمـيت نفسي متوترة مسحت وجهي قطرات
العرق تنزل من جبهتي حسيت بـ جسمي
مليـان عرق
عقـاب :- شنو صار شبيج ؟؟
هزيت راسي ماعرف
:- شفتــي كابوس ؟
- اي بس جان حقيقي لدرجة ما فرقت
بين الحقيقة والخـيال
جان جان اكو شخص بغرفتي أنا متأكدة !
:- عـادي تصير هل أمور من كثرة التفكــير
تصيرين ما تفرقين بين الحقيقة و الخـيال
شنو شفتي ؟؟
رديت علي بسؤال
- أنتَ منو ضــاربك بالسجين؟
:- مو مُهــم نامي الوقت متأخر
كــام
وصل للباب كمزت احجي بسرعة
- أحمــد هو الضربك مو ؟؟
دار عليه مقلص نضرة
:- يا أحمـد قصدج ؟
-: أخوية
ضحك
:- هو مو اخـوج
ما اعتقد جريئ لهل درجــة
-: يعني تريد تقنعني أنتَ ما تعرف
منو ضربك ؟
:- تــصدكيني أو لا بس ماعرف منو
جنت امشي بالشارع وفجأة انضربت
شلون ومنو الله و أعلــم
سكتت
:- شفتي احمد بالحلم ؟؟
لهذا أنتِ خايفة
-: اي
:- ما يكـدر يوصلج خصوصاً هذا الشخص
-: أحــمد مستحيل ينسىٰ
:- ما يسوي شي
-: أنتَ ما تعـرفة
:- تحــرش بالمفروض تكون أخته مكبسل
ويشرب مدلل أمه طالب جامعي اخر سنة
والمفروض هو متخرج من سنتين بس غبـي
-: هم بعدك ما تعرفة احمد اذا خلا
براسه شي لازم يسوي هو يحب التحدي
أنتَ ضربته وانا شردت من البيت وتحديته
خربت عليهم كل مخططاتهم شي اكيد همه
كرهونـــي
رجع بكم خطوه قريب مني
سألني مستغرب
-: مخططات شنو ؟؟
رفعت راسي
:- بــوقتها بابا تعرض لأزمه ماليه جان مُهدد
بالأفلاس علىٰ ساس يسوق أدوية منتهية
الصلاحية
عارض علي أحد الأشخاص بالمساعدة ومن
عزمة بابا طلع باهــر هذا اول يوم شفته
بيها وريتني لا شفته
جنت احاول اشرد من نضراتة بس هو لحكني
برة وكلي أبوج باعج الي والأسبوع الجاي
زواجنه !
-: كملي كــملي اشوف
:- طبعاً استهزئت بكلامه وما صدكته
بس بعدين عرفت الحقيقة وانا أصلاً مو بتهم
الحقيقية عرفت ليش أحمد تحرش بيه
وعرفت السبب الـ خله انتصار تكرهني كل
الوقـت وعرفت ليش بابا جان ساكت رغم هو
يعرف أنا مضلومة
حبيتهــم كـ عائلة بس همه ما حبـوني
ولا مرة
فتح ثغرة يريد يحجي شي بس سكت
بلع ريك ماسح وجهه
-: هُمه الخسرانين الله ياخذ حقج منهم
نامي تصبحين علىٰ خيـر
-: تلاكـي الخير
طلع
كمت قفلت الباب غيرت ملابسي
جبرت نفسـي أنام
اكعد متأخرة الصبح ما اشتهي شي
مجرد خمـول اقضي وقتي فقط بالنوم
والصفنات حتىٰ الأكل نسيته
هو ما يكعد بالبيت طول النهـار فقط بليل
يرجع ينام مر يوم كامل ثاني يوم بليل
جنت كاعدة بالمطبخ اكل
ماخــذة غيبت تبارك بعد ما سألت عليه
ابد هاي هيج الزواج يسوي !
سمعت الباب انفتح صوت خطوات تتقرب
دخل المطبخ شافني كاعدة كعد مقابيلي
متنهد
:- شلونـج سلبوحــة ؟!
-: زينة أچلــح
ضحك خفيف مد أيده ياكل ويحجي
-: ادري بيج ضايجة ومكتئبة بس الضروف
تحكمنه للأسف ما بيدنه شي
:- تـبارك ومعن شلونهم ؟
-: بنص الخــير !
-: نستني هيه
:- حتىٰ أنا معن بعد ما سأل عليه
خليهم شنريد منهم اهم شي عايشين
سوه مرتاحين
هزيت راسي
:- اكيد هو هــذا اهم شي شنو صار
بموضوع الأسمه دعلج ؟
-: قــيد البحث
:- يعني وقــت هواي ؟
-: ماعــرف مو بيدي هل شي
صفنت علي هو مدنك ما يباوع عليه
ابيض بس مسومر قليل خشمه وسطاني
شعرة خفيف من الــجوانب
مو هذاكه الطـول يمكن انا وياه نفس الطول
حلو بس غــريب أطوار
سألته بدون تفكير هيج سؤال اجه
بالي
:- أنتَ صدك مــجرم ؟؟
رفع راسه يباوع عاقد حاجبة ارتفعت
زاوية فمه بسخرية مد أيده وره ضهرة طلع
سلاحه
سحب اقـسام بلعت ريكِ بخوف عين علىٰ
السلاح وعين علي رفعه بوجهي تحديداً
جبهتي
تصنمت بمكاني جسمي أنشل من الخـوف
حجه بينما عيونه مضلمة ومتركزة بعيوني
:- مجرم لدرجة اكدر هسه اخلي طلقة
براسج اقطع جثتج لقطع صغيرة ودفنها
كل قطعة بمنطقة
:- ما ..ما سويتلك شي حرام عليك
عيوني انترسن دمــوع ثواني مرت صمت
مُخيف فجاءة ضحك ضحك لدرجة عيونه دمعن
يضرب الطاولة بيده ويضحك بصوت عالي
عرفته لعــب عليه تنرفزت من ضحكته
دنكت اباوع لأيده شفت السلاح مخلي على
الطاولة ابتسمت بشر
كمزت اخــذت السلاح وجهته علي بينما
رجليه تبتعد عنه
توقف عن الضحـك اختفـت ابتسامته
حل محلها الصمت والتوتر رفعت حاجبي
غمزتله مبتسمة
بس شني أنا بالكوه لازمته ثگيييل بشكل
مسح عيونه رادف بجديـة
:- رجعـي السلاح مو لعبة هذا
-: اعرف مو لعبة واعرف همات إذا ضغطت
علىٰ الزنــاد راح تودع حياتـك وخلص منك
:- تــردين تتخلصين مني ؟
-: أي
-: تمام ضغطــي يله تخلصي مني
ثبتت ايـدي ماخذه نفس بصوت عاالي
قلص نضرة يباوع بترقب ما سويت
شي فقط واكفه مقنصه علي
:- يلةةة شمتانيه ضربي جبانه
يحجي مغمض عيونه تنهدت تقربت منه
مخليه السلاح بـ جبهته
:- مو روليــت الـ تقتل روح الله خلقها
ما تكــدر تستفزني !
شخر بسخرية لاذعة فاتح عيونه
اخــذ مني السلاح وجها بين عيوني ضاغط
علىٰ الزنـاد !!
شهكت فازة راجعه عدت خطوات ورة
استقام من مُكانه يـحجي
-: ما جان بي طلق أصلاً اثبتيلي شكد
أنتِ تحبيني
ضحكت بسخرية
:- أچلح شحب منك ما تكلي
-: هذا تنمر
:- لا مو تنـمر بعدين منو الـ يكلي
سلبوحـة ؟؟
-: عــوفينا من هــذا الحچي هسه
عندج جنسيتج ؟
-: لا
اخذها باهـر مني
:- تعرفين وين خــلاها ؟؟
-: أعتقـد بالبيت الـ اخذني بي يعني بيته
الخاص
:- تعرفين وين بيته ؟؟
صفنت
:- اعتقــد اي
-: نروح هسه نجيبها ؟
-: كل عقلك؟؟
-: لا نصه
-: جد جد دا احجــي وياك
:- ترة حتىٰ أنه احجي وياج جد
هسه احسن وقت نروح ضروري جنسيتج
تصير بيدي
-: بس انا يمكن ناسية المُكان
-: أنتِ حاولي تتذكرين وانا امشي علىٰ
حسب كلامج مو مشكلة إذا ناسيته
رديت محتارة
:- تــمام
يله حضري نفسج خلينا انجرب بلكي
تتذكرين
هزيت راســي فقط خليت حجاب علىٰ
شعري وطلعت صاعدة كدام وياه
هو يباوع مستغرب
حرك السيارة وحجه
:- حلو عليــج الحجاب
-: صدك أنا أفكــر اتحچب شنو رأيك ؟؟
ابتسم
-: وشنو رأيي كــدام رأيج هذا اهنيج
علىٰ عقلــج وتفكيرج
ابتسمت بخفـوت
-: من زمان احب الحچـاب وخاطري اجربه
بس انتصار جانت تضربني ما تقبل عدها الحجاب
يلبسونه فقط الهمج
الي من طبقة ريفية أو فقيرة تفكيرها
غبي جنت اقضي معضم وقتي باليوتيوب
ابحث علىٰ لفــات حجاب
وشنو أهمية الحچاب للمرأة وليش لازم نلبس
الحچاب
-: حلوو بله سولفيلي شنو تعلمتي عن الحچاب ؟؟
رديت بحماس بينما وجهي علىٰ الشارع
:- القوة
الثبات
الستر العفاف الغنى الصبر القرأن
هواااي احاديث وأمثلة خلتني اتحمس
للحچاب بس الضروف جانت معاكستني
:- هسه انتِ حـــرة تكدرين تسوين
الـ تردينه بدون ما أحد يفرض رأيه عليج
بالعكس أنتِ افرضي رأيج وتفكيرج
اذا تشوفينه صح سوي بدون تفكير
للمقابــل
:- صح هو هذا الأريد اوصل اله
أن شاءالله إذا الله كتب إلي عمر
هز راسه مبتسم
خليت شعري جوه ملابسي وعدلت
الحچاب دقائق طويلة مرت بصمت
بعدها تذكرت شغله
-: أتذكر الطريق من المكان الأخذني اله
لـ بيته ساعة ونص ساعتين
-: ما فهمتج ؟!
:- اقصد من جابني للسجن القديم تتذكرة
مو ؟
-: اي تذكرته
:- اي هو طلعني من بيته للسجن
تقــريباً مشينه ساعة ونص أو ساعتين
:- حلـو خلـينا نچرب لعد
وفعـلاً رحنا للسجن القـديم مرينا من يمه
بعدها صار يسوق ويباوع للساعة
عبرت الساعــة و 41 دقيقة
فقط خضـار خفيف وبيوت قليلة شبه
كامله أتذكر واجهة البيت بيضة وبيها ورد
أسود
علىٰ هــذا الأساس ابــاوع
:- ماكــو بيت بهيج مــواصفات
تنهدت بتعب
:- ما عرف بس أنا متأكــدة مرينه بهذا
الشارع اتذكرة زين
-: تمام خلي نوصل لنهاية الشــارع
اذا شفنه البيت حلو وإذا ما شفنه شي
نرجع لأن الوقت تأخــر
:- اوك
هو استسلم بس انا جنت واثقة من نفـسي
ركزت زين وي كل بيت رغم جانت ليل
والأضوية خفيفه
بنهاية الشارع قبل لا نغير مجرئ الطريــق
جان اكو بيت منعزل عن كل البيوت
بعـيد
التفتت علي
:- هذا هوه البـيت
-: متأكــدة ؟!
-: اي والله متأكدة زيين من طلعنا
أتذكر
ابتسم
:- تمـام
خلا السيارة شوية بعيدة نزلنا نمشي بهدوء
ويانا فــلاش المُبايل مثل الحرامية نتختل
وصلنا للباب يحجي بينما طفه المُبايل
-: راح انكــز من السياج وافتح الباب
ابقي واكــفه هنا
-: ماشــي
تسلق السياج وطفر اسمع بس صوت خطواته
فتحلي الباب دخلت يأشرلي بدون صوت
صفيت يمه هامسه بخفوت
:- ترة ماكو أحد بالبيت ليش كل هل
درامــا تحسسني دا نمثل فلم اكشن
:- ممكن يكون البيت مو خالــي أو ممكن يسمعنا
أحد المارة من الشارع لازم ناخذ احتياطاتنه
يحجي ويفتح بالباب الرئيسي دنك علىٰ
القفل طلع من جيبه الفلاش بس خلا أيده
علىٰ الباب انفتح !
باوع عليه قلص نضرة بشك
:- الباب مفتوح
-: معقول اكو أحــد ؟
:- أو يمكن ناسي مفتوح
تـعالي
دخلنا نباوع بالبيت بخوف حرفياً انا
دكات كلـبي مو طبيعية من الخوف
دغيته بكتفه
:- شغل الفلاش
بدون رد منه شغل فلاش المُبايل وجها
علىٰ كامل الصالة فجاءة اشتغل الضوة !
شهكت شهكة طالعة من أعماق قلبي
باوعنا لي كدام وإذا نشوف هـــارون جالس
علىٰ أحد الكرويتات كدامه سلاحه
مخلي رجل فوك الثانية نضراتة رصاص
تخترق أرواحنا !!
هــارون :- جنت منتضر أحد يزورني
بصراحة الجو گئيب وحــدي
اسكو :- شلون عرفــت احنا جايين ؟؟
هــارون -: الشيطان الرچيــم
بلعت ريكِ بتشتت من توتري وخوفي
تمسكت بملابسه مشى خطوات متقرب من
هارون
اسكو -: متعقبنــي مو ؟؟
-: اسألتك كلش بايخة تعال اكعد محضرلك
سهرة خاصـة اجيت بالوقت المُناسب
-: ما جـــاي حتىٰ اســهر
:- مع الأسف الشــديد خيبت ضني بيك
سبق وأن كتلك الحُب للأنقيـاء ما يلوكلك
أسكـوبار
يحجي وعيونه عليه جان اكو فد خمس
أشخاص كل واحد بمكان معين بحيث
مشكلين دائرة حوالينا
جسمي رجــف همس بخفوت
:- لا تخــافين بحمايتي أنتِ
ما جنت اسمع كلامه جنت أكول هاي النهاية
هسه يكتلنا ويــدفن جثثنا بس هوه تصرف
تصرف غريب !
:- تعالو كعدو لا تخافون انطيكم الأمـان
نزلو سلاحكـم ولــدي
نزلو سلاحهم تنهد عقاب ما عنده حل ثاني
جــراني من ايدي نترت أيده ومشيت وحدي
كعد يباوع مستغرب
جان اكو علىٰ الطاولة زجاجة خمر واكو كاسين
دنك هارون فتحها وملئ الكاسات لهذا
فضلت ابقىٰ بعيدة عنهم ..
شمر هارون چكـارة من ذني الكبار لـ عقاب
اخذها منه وأمر واحد من ولده علىٰ كولته
يشغله الجكارة
سوه مثل ما كله خلا رجل فــوك الاخ
مثل هــارون
شال وحده من الكاسات
اخذ منها قليل وحجه
:- عندك هيج بضاعة وضامها علىٰ الحجي ؟؟
ابتسم أنا بس ارجـف من منضرهم
المُخيف اخذ نفس ورد
-: حالها حال الموجودات اخذ منها المقسوم
و بعدين نتفاهم عليها
عكدت حاجبي باستغراب من كلامه
ضحك هارون راد علي بصوت قوي
:- لا يكون حسبالك الـ كدامك طفل
بعمر الـ سنه المشاعر مبينه بعيونك
يا ولــد
سكت عقاب ما رد وهو كمل كلامه
ضروري هاي المشاعر تنمحي ما لازم تضعف
شفت شكد صرت ضعيف
مجرد ما دخلت لـ قلبك هل أحاسيس
الحُــب
مــرض خطير
مشاعر تائهة
ضعــف
مستحيل اخليك تضعف كدامي وما اسوي
شي
-: كتلك مجرد استمتع بيها لا اكثر
الحُب ما اعترف بي انا حجي !
:- اكو هواي بنات بأماكن مُعينه
تكدر تستمتع بيهن احلىٰ وأجمل شمعنه
هل بنت بالتحديد ؟؟
رفع اكتافة ورد
:- يمكن لأن مُميزة ما بيها صفات
الكح***بريئة ما عدها خبرة أما عن الجمال
فـ أنا أعشق الشوكلاته السمرا
ضحك هارون بصوت عالي
أثناء ما يضحك سأله عقاب
-: شتسوي هنا حجي البيت مو الك ترة ؟؟!
-: ولا بيتك يا ولـــد
:- قاسم مشترك بيناتنه
:- باهر جان ذراعــي الأستند عليها خسرتني
خسارة چبيرة
-: مع الأســـف تريد ابچي عليكم يعني ؟
-: راجع نفسك يا ولــد وشوف منو
السبب يا تُرئ ؟؟
:- السبب الرئيسي باهر وعقليته
تدخل بشي ما يعني وحصل الـ يستحقه
:- لا لا مو باهر السبب الرئيسي
السبب الرئيسي هيه هاي الواكفه حالياً
تباوع هاي السبب
خسرت نفسك بسببها مستحيل اخليك
تخسر مرة ثانية
-: لا تدخلها بكلشي حجي هيه حجارة
والها عيون اصلآ ما تحجي هواي
:- الحُب يا ولــد اعمئ
اعتبرك ابني ومن واجبي
حــمايتك
:- تكدر تحميني من نفســك ؟؟
-: لا بس اكــدر احميك من مشاعرك
واخلصك منها
- حجي الضيف وصل
حجه واحد من التابعين اله دار
عليه واردف ابرود
-: لا تدخلونه علينا دقائق نخلص كلامنه
طلعو ثنين برة انا مثل الأطــرش بالزفه
ما اعرف شي ساكته استمع لـ كلامهم
وأفعالهم
عقاب :- ما بيناتنه كلام ثاني حياتي الخاصة
تخصني انا حر اسوي الـ اريـدة بدون تدخل
منك حجي
-: حياتك هيه حياتــي يا ولــد اريدك
تصير مثــلي لا تخليني حتىٰ أنتَ أعاقبك
نسيت روحــك بيدي لو شنو ؟؟
-: الروح ما يأخــذها غير الخلقها
:- دا تشوف هذا السلاح مجرد ما اضغط
علىٰ المكان المطلوب تنتهي حياتــك
أذن حياتك وروحــك بيدي أنا
:- لازم تخاف مني أنتَ هم ممكن
بأي لحظة اضغط وتنتهي حياتك بيدي
أنا !!
-: ضعفك واضح علىٰ معالم وجهك
عيونك بيهن خــوف كل شوي يرحن عليها
جسـمك يرجف بس الوكفتها هاي كلها
نقـاط عليك !
-: خــلي أرجعها بعدين نحجي
:- شي اكـيد راح ترجع ولكن للشخص الصح
والبيت الأفضــل
:- ماتكدر تبعدها عنــي مو بكيفك
مو بعد الصار مستحــيل
:- لازم ارجع اشرف علىٰ تدريبك من جديد
أصبحت شخص غــريب مُختلف جــذرياً
عن الصنعته أنا ؟!
-: مرات الأنسان من يصنع ممكن
تتعرض السلعة للتغيير يعني مثلاً هو جان
يريدها بـ شكل مُعين وطلعت غير شكل
أنتَ صنعت ولكن للأسف مو مثل
ما تريد نفسك والـ بالك
-: بس قــادر على تصحيحها !
:- اذا حالفك الحـض
-: الحض دائماً ويــاي
حــرك اكتافة بدون رد أشر هارون
بيده لشخص واكف برة هز راسه كأنما اخذ
إشارة منه
باوعلي عقــاب هستوه يريد يكوم وإذا
اشوفه يتجمــد بمكانه فاتح عيونه متفاجاء
يناضــر وراي ماعرف شنو
درت وجهـي وانا خايفــة فتحت ثغــري
من الصدمة فعلآ توقعي طلع صح وضني
ما خــاب !!
توتري زاد وخوفــي أزيـد بلعت ريكِ
باوعت علي من دخــل لحد ما وكف
مـقابيلي
يباوع بعيون الأنتصار والقـوة رمشت
عــــدت مرات بــدون استيعاب رجف
كلبي ورجليه وكل جسمي من أردف
بابتسامة
أحمـد -: أختـــي الحلوة
-: اا.احممد ؟؟؟!
هـارون -: مثل ما اتفقنا أختك وصارت بيدك
ماكو داعي اعلمك شلون تضب اختك
وتربيها الصح من الغلط
عقاب انتفض من مُكانه يحجي بانفعال
-: أنتَ تعــرف كلشش زين هيه مو أخته
تريد تتخلص منها بكل الطرق بس لأن
حميتها ودخلتها بيتي ؟!
هارون -: احمد اخــوها الچبير سنين ربت
وياه منو أنتَ حتىٰ تبقى وياك يا ولــد؟؟
اسكو -: هيه ما تريد تبقىٰ وياه
هارون :- مــو بكيفها
:- تحــرششش بيهاااا
خزره هــارون حسيت جسمي انشل
حتىٰ من الكـلام ماكدرت ادافع عن نفسي
حرب بين عقلي وقلبي
ابقىٰ عند شخص قاتل بس يدافعلي
لو اروح ويه الأسمه اخوي ولكن مو معروف
شنو راح يسويلي !؟
أثناء حرب تفكــيري رجعت لواقعي من
انخــلت ايد علىٰ كتفي فزيت وإذا اشوفه
احمد خازرني بطريقة تقشعر لها الأبدان
هتف عقاب بصوت طالع من بين أسنانه
-: تعرف اخر شخص لـزمها شنو سويت بي ؟؟؟
ضحك احمد راد يستفزه أكثر ضغط
علىٰ كتفي شهكت بألم
طلع سلاحه اتباع هارون كلهم طلعو سلاحهم
مرة وحده وجهو علي هو ما يهمه
فقط نضرة علىٰ أيد احمد
اسكو :- ضربته ثلاث طلـقات كل وحدة
كفيله تخــلي ينشل وأخر طلقة خـليتها بيده
لأن ضرب بيها روليــت تريد تجرب ؟؟
احمد -: أتــذكرك زين منو أنتَ وشنو ممكن
تسوي بس هسه الأمـور مو لـ صالحـك
هارون -: نزل سلاحـك يا ولــد
اسكو :- ما اخذ بأوامـرك حجي
هارون -: تريد تسويها دم ؟
همم باوع ونتبه زين اي خطأ منك لعبتك
المفضلة تمـوت !!
اسكو -: خليـنا نطلع منا بأمان تعرف انتَ.
كلش زين اكــدر هسه أسويها بحر من الدم
هـارون :- علىٰ مود وحــدة رخيصة علىٰ كولتك ؟
تقتل وتضحي بس علىٰ مود امرأة ؟؟؟
اسكو :- تعرفنــي زين اسكو ما يتراجع الا
من يحصل الـ يريدة اعتقد فهمت عليه
مو ؟؟
أحمد -: حتىٰ لو هارون سمح الك تأخذها
فـ أنا مستحيل اخليك تأخذها مرة
ثانية
ضحك مستهزاء هارون عصب ما قبل
تحركت اريد افلت روحـي منه
-: اششش
ضربته بعكس ايدي صاح متوجع
دفعني للكاع
-: واحدد حقييير مثلك ما يشرفني
تكون أخوية والحمدلله أنتَ مو أخوية
أصلاً
هارون -: عيب عليك بنت صغيرة ما كدرتلها
دنك عليه خازرني يريد يلـزمني
بس توقف من سمع هارون يحجي بحزم
هارون -: ضيعــت فرصتك ممنوع تلزمها
ترجع منين ما اجيت
احمد -: ارجع بدون اختي ؟
هارون :- بــدونها !
احمد -: بسسس شلوون اعوفها احنا اتفقنا
هارون :- اشوف أنتَ مو أهل للأتفـاق
ارجع ولا تخليني اعيد كلامي للمرة
الثالثة
نتر بعصبية
-: بس هيج أنتَ الخاين مو انه
هو حجه هيج سمعنا صوت سحب أقسام
باوع علىٰ اتباع هارون بالع ريك
هارون -: اذا تريــد تودع حياتـك الليلة
يسعدني ويشرفني تحقيق امنيتك !!
زفر انفاسة بصوت عالي القىٰ نضرة عليه
بعدها علىٰ عــقاب تركنا وطلع من البيت كله !
وكفت اعدل بـ حجابي
اديه ترجــف دموعــي يلالن بعيوني
دنك هـارون ماخذ سلاحة وجه كلامه
لـ عقاب
-: الحض هل مرة كعد ويــاك
بعدها أشر عليه وكمل كلامه
حاول تتخلص منها بأقــرب وقت والأ
الكــل يدفع الثمن !
عقاب ساكت هارون اجه يريد يطلع ولكن
توكف يمي هو بتجاه الباب وجها وانا
اباوع علىٰ عقاب همس بأذني
-: سلميلي علىٰ تبــارك
عضيت شفايفي بالكوه لزمت نفسي ما
ابچي أو اوكع طلع وراه أتباعه تمشيت
بهدوء كاعـدة علىٰ اقرب كرويته
-: كتلك اني وما صدكتني كتلك أحم...
:- اششش خلينا ناخذ الأجينه علي
ونطلع بسرعة
:- هددك بيه !!
لازم تتخلص مني والأ الكل يدفع الثمن
شنوو قصدة يعني يقتلكم.؟؟
-: تذكري وين ممكن باهر يخلي جنسيتج؟
رفعت راسي كدامي صارت الغرفة
الأخذت منها الفلاشة
-: هنا
-: تمام ابقي بمكانج
عــافني وراح !
اكثر من نص ساعة رجع يلهث
لزم أيــدي يمشي مستعجل
-: شنوو صار لكيتها لا ؟
- اي
:- اي شنوو.؟
-: لكيتـها !
بعد ما سألته اهم شي لــكاها على حسب
كلامه صعدنا السيارة راجعين منين
ما جينه..
تعبت بشـكل مو طبيعي بحيث بس
وصلنا كبل دخلت لـ غرفتي وقفلتها حتى
ما شفت جنسيتي
دك الباب سائلني مستغرب
-: بيج شي؟
:- لا لا مجرد تعب وارق اريد انام
نعسانة
-: براحتـج باجر الصبح كعدي من وكت
حتى نروح نزور معن وتبارك
:- ماشــي
-: تصبحين على خير
:- تلاكي الخيــر
منين يجي النوم وكل المصايب تجي
مرة وحدة علىٰ الأنسان ؟!
غمضت عيوني جبرت نفسـي اغفئ بس
ماكو افكر وافكر وافكر اتكلب بفــراشي
زفرت أنفاســي كامزة من مكاني
رايحـة جايه اريد اتعب حتىٰ انعس
وكفت مقابيل المرايا الشباك عاكس بيها
مسحت وجهـي أتحسس خدودي بهدوء
جنت اكره لون بشرتي ما صور اله اخلي
فلتر حتى اصير بيضة وفعلاً جنت اصير
بيضةةة بالفلتر ترجع ثقتي بنفسي واكول أنا
حلوة
بس سرعــان ما تختفـي هاي الثقة من
اشوف وجهي الحقيقي علىٰ المرايا
حنطاوية بس احنا بالعراق نعرف السمرة
والبيضة
وحتىٰ اكو بيها ناس يكولون عليها زركة !
رغم هيه شايله جمال احلى من الف بنية بيضة
انتصار جانت تتنمر علىٰ لون بشرتي
أتذكر جنت احب البس حجاب بس هيه
ما تقبل اشتريت ربطة سودة بدون ما تعرف
قفلت الباب عليه لبستها
أتذكر جنت بوقتها عندي أخدود وجسمي
مليان مو مثل هسه ضعفت صارت عليه كلش
حلوةةة صرت اخذ صور بالفلتر اطلع بيضةةة
شحم على كولتهم
اضحك علىٰ نفسي هسه اوف شكد جنت
ضعيفة وما عندي ثقة بنفـسي وأكره
اشوف وجهـي بالمريا
بعدين اكتشفت حتىٰ اذا جنت بيضة الناس
تحجي وتكول بيضة زيادة مو حلوة البشر
حتىٰ على الله حجت منو أنه وما تحجي عليه ؟؟
من بعدها صرت احب نفسي كل يوم اباوع
على المرايا واكول أنه حلوة مُميزة
واكيد بيوم من الايام راح يجي الشخص الـ
يحبني بكامل عيوبي
حبو نفسكـم ترة بعض الناس انولدو وهمه
مو كاملين احمدو الله علىٰ نعمة العقـل نعمة
الصحة نعمة انو أنه انولدت بدون تشوه
بعض الناس جميلة المضهر ولكن متشوهه
داخــلياً وفكــرياً خليكم بسيطين الله يحب
البساطة أقبلوا بكـلشي يصير وياكم
لا تتعارضون هذا قـدركم !..
من باب ذنــي الكلمـات استمـد قوتــي
أثناء ما ابــاوع لمحت شخص واكف ورة الشباك
صورته معكوسة بالمرايا !
تجــمدت بمكاني تقدم أكثر ضهرت
الي صورته همست بصوت يرجف
أحمــد
ركضت فتحت الباب طلعت برة الغرفة
مرعــوبة شفت عقاب كاعد بالصالة مدنك
راسه بين ادي !
رفع راسه شافني اركض وبحالة خوف وذعر
كمز يريد يفهم مني شي ماكو
-: شبيجج غيرر أفهم
جاوبته بينما دموعي تنزل وشهكاتي عالية
-: احمد احمد يباوع عليه من شباك غرفتي
شفته والله شفته احمد
تركني وراح يركض لـغرفتي كعدت
مهدود حيـلي لأزمة کلبي رفعت راسي من
طلع يباوع عليه مقلص نضرة
-: ماكو أحد متأكدة شفتي انتَ؟
بچيت بصوت أشهك كعد يمي
يحجي بجدية
-: لا لا ليش البچــي هسه اهدئي
-: والله ما اتوهم لو اجذب عليك
شفته بعيوني من الشباك واكف شفته
ضله والله
:- ماكو أحــد منين يجي هذه بهل وقت
تخيلات منج لأن تفكرين هواي ما معقولة
كدر يضم نفسه بهل سرعة اذا جان فعلاً
موجود !
-: يعنــي أنتَ ما تصدكني !
مفكرني اهلوس أنه موو مخبلةةةة
-: تمام اهدي مصدكج منو كلج
مخبلة بس اهــدي ولا تبچين
مسحت دمــوعي عاضه شفايفي وكفت
اجر الشهكات واحجي
-: يمكن كلامك صح من كد ما تعبانه
وافكر يتهيألي شفته اسفه لأن تعبتك
وخــوفتك
-: لا عـــادي ما صار شي تعبج
راحـــة
ابتسمت بـذبول عفته ورجعت للغرفة
قفلت الباب ورحت قفلت الشباك
وغلقت البردة طفيت الضوء
تمددت مغطيه كل جسمــي ونمت ....
ثاني يوم الصبح كعدت من وقت بدلت
ملابسي لشي عادي غسلت وكعدت بالمطبخ
مخليه ايدي علىٰ خــدي
سمعت الباب ينفتح ما انطيت
اهميه اعرف منو
عقـاب -: صباح الخير
رفـعت راسي دخل بيده علاكه خلاها كدامي
تنهدت رادة بخمول
-: صباح النور
:- تريــكي رايح مشوار من ارجع
نروح
:- وين نــروح ؟؟
-: لبيت رينــاد
-: شنسوي ؟؟
-: هيه عازمه تبارك ومعن وعازمتنه
احنا الثنين
-: ياااا لعـد وزوجــها شلون ؟؟
-: زوجــها طالع سفرة بالشغــل .....
...
...
...
كاعدة بين أربع حيطان خلف قضبان السجن
ضحكت بسخرية علىٰ حياتي وشلون
انقلبت الموازين
صرت وحيدة ما اميز بين الناس الشينه
والزينة كله بسببي أنا شلووون اخلي يروح
بنص الليل
ليش راح يا ليته ما راح ياريت رحت وياه
ومتت وياه ياريتني ما بقيت انتضرة
ياريت اموت
رفعت راسي للسما دموعي تجري
بصمت احجي بداخــلي
-: وينــك تعال نور عيونك شامرينها
بالسجن بُتهمة قتلك وانه الجنت أكلك
نموت سوه ونعيش سوه
صفنت بحياتي وشلون بدت المشاكل
راح بالي لأيام الكُلية
كُلية بغــداد الساعة الـ 9 والنصف مساءً
دعونا نتجول قليلاً
ندخل الى احـد الصفوف نرى الأستاذ يشرح
المادة بينما هُناك حيث المقعد الخلفي
جالسة فتاة جميلة المضهر
جنبها صديقتها المقربة يتهامسون بصوت
خافت غير مُبالين للمحاضرة أو الأستاذ
بدون خجلً أو حياء
مُرجان -: هاي اللبسة احلى يمكن راح اطلبها
شهد :- هاي مفتـوحة هواي تطلع سيقانج
كلها
مُرجان -: هههه هو أنه احب هيج لبس
الله انطاني كل هذا الجمال ترديني أضمه
غير اضهرة وهاي الملابس تخليني اطلع كل
جمالي بصورة تجنن
شهد -: بكيفج بعد هو عيد ميلادج أنه
مجرد انطي نصايح لا تنسين ترة كرار
ويانا
مُرجان -: ما يهمني اهم شي اللبس واطلع
جميلة كل عــادة ومُميزة غير عيد ميلادي
الأستاذ :- أنسه مُرجــان
رفعت راسهي رادة بعدم اهتمام
-: نعم أســتاذ
:- ياريت تعوفين الحجي علىٰ صفحة
وتنتبهين للمحاضرة
-: ستاذ أنه وياك خطوة بخطوة
استمر
صوت الضحكات تعالت بين الطلاب
خزرهم الأستاذ راد بعصبية
:- جيد بما انو أنتِ كلتي وياي خطوة بخطوة
تعالي حلي المعادلة الكاتبها أنه
باوعت للطلاب نضرهم عليها منتضريني
اكوم ماعدي حل ثاني وكفت مخليه كفوف
اديه بمعطفي الخفيف الأحمر
داخــلي يسب ويغلط بالأستاذ وكفت
يمه انطاني القلـم أخذته كالبه وجهـي
الأستاذ -: تفضـلي ورينه شطـارتج
دباوعت علىٰ السبورة صفنت بلعت ريكِ
درت علىٰ الأستاذ هامسه بــدون خجل
مُرجان :- استاذ تريد الصراحة ما فاهمه شئ
من محاضرتك أسواء استاذ أنتَ من بين
كل الأساتذة عدنه بالجامعه ما تفهم الطالب
بالمادة
الأستاذ :- قلة تركيزج ولعبج أثناء المحاضرة
لسانج الطويل وأخلاقج الهاوية هيه الي مخربه
سمُعتج بالكُلية كلها
أنسه مُــرجان كونج ابنة شخص معروف
ما يحقلج أبداً تتصرفين بهل حماقة وقلة
الأدب
طول ما هوه يحـجي بُـدلي اكمز
اخــرب معانيه ماعـرف شلون مسكت
نفســي
أزاح بنضراته النارية عنــي
وجه كلامه للطلاب
:- بنهاية الفصل تجوني استاذ احنا ما فهمنه
شئ استاذ عيدنه الشرح استاذ أنتَ ما تفهم
انتبهو لـ نفسكـم أولاً ........
مستمر يحجي كل عادة مثل كل مرة يفتح علينا حلكه مثل الرشاش امثله ونصائح ومحاضرة دينية احس نفسي داخله جامع مو كُلية
صفنت بمعالم وجهه ولحيته
الخفيفه بيها بعض من الشيب بالأضافة ألى
اللون الأسود
تخيــلت نفسي يبوسني لحيته شئ اكيد
تبززني مثل لحية بابا عكشت وجهي بقـرف
تلاحكت نفسي من رجع وجه نضراته عليه
-: تفضلــي لـ مُكانج وياريت المرة الجاية
تنتبهين لـ محاضرتج
رجـعت بدون ما احجــي شئ واعدت نفسي
ادفعه الثمـن غالي علىٰ اهانتي بهل طريقة
كدام الطلاب !
منو هوه أصلاً حتىٰ يحجي وياي بهل طريقة
أنه حرة اسوي الـ أريدة بدون ما يملي
عليه أحد كلامه
الأستاذ -: السوالف خلنهــا بعد ما تخلص
المحاضرة عدجن وقت ساعة ونص ساعة
صح مو كافيه الجن عود تكملن مراسلة
ما يهمني أنه بهل مواضيع الـ يهمني بـ
محاضرتي ممنوع الكـلام ممنوع المُبايل
بدون أذني ممنوع مفهوم ؟؟
مفهوم أستاذ
ردو علي بصوت واحد كمزت من مكاني
احجي بنرفزة
مُرجان :- شنو رأيـك تمنع علينا حتىٰ النفس
استـاذ
ابتسم ورد ابرود
-: ليش لا اذا اطاولتي حتىٰ الدرجــات
اقطعهن الج مو بس نفسـج
كعــدت متنرفزة داخــلي نار ومشتعلة
ما عولــت يخلص شرح طلعت للكافتريا
اهز برجلي هذا طبعي من اتوتر وتعصب
شهد -: وترتيني ويــاج كافي تهزين رجلج
مُرجان -: شفتي شلون الطلاب تضحك
عليه حقراء استغلو الفرصـة حتى يتشمتون
كله من وره هذا الأستاذ الحقير
النذل الچلب
مريم -: هوب هوب لا يسمعج أحــد
اشش اذا تردين تاخـذين حقـج فكري
زين العصبية ما تفيدج
مُرجــان -: مستحيل اعـديها على خير
ادفعه الثمن غــالي والله شايف نفسه عليـنا
نافـخ عضلاته احـلف علي واحد همجـي مُتخلف
من ذوله الي يفكرون المرة مُـكانها المطبخ
وتجيب الهم جهال
كرار -: ترة هو من السـادة هيج سمعت
لا يشور بيج
مُرجان -: ايي هم سمعت أنه من ذوله
الـ تكلهم هلو يرد عليج وعليكـم السلام
شهد -: هههههه خـرب شكد تحبين
تقـلدين يمةة بطني
مريم -: صدوك والله حجيها مساع شفته
يمشي وراسه بالكـاع يسلم وهوه مدنك
ماعرف شلون يعرف الناس ؟؟
مُرجـان -: من أحذيــتهم ههههههه
ضحكنه بصوت عالي غير مُبالين بالناس
او الـمُكان دقائق سكتنه وبديت احجيلهم
عن الخطه
مُرجــان :- بعد شكـد علىٰ الأمتحان ؟؟
-: باچــر
رفعت حاجبي بمكر تحمحمت ماده ضهري
قريب منهم لعبت حواجبي بخبث
مُرجـان -: لكيتها يا أخــوان خطة تخلي
استاذ طاهـر بموقف لا يُحسد عليه
ويمكن يقدم استقالته ونخلص منه !!..
-: وشنو هاي الخطة الجهنمية ؟؟
-: تـعالو تقربو احجيلكـم شنسوي .......
كاعـدين كلنا بالغرفة التابعه اله أنه كاعدة
علىٰ الكرسي والشله واكفه فوك راسي هو مقابيلي مدنك يكتب ولا كأنو
كاعدين يمه
شكد واحــد مغرور وخبيث وشايف نفسه !
عيني راحت على مُبايله عضيت شفتي
حاجيه بخفوت
-: عفواً است...
رفع إيده بمعنىٰ لحضة تمنيت اكسرها لأيدة
لزمت ايـدي بالكوه بالنص ساعة احنا
كاعدين لحد ما خلص شغلة
نزع نضارته فارك عيونه تمنيت أنه الأفركهن
والله لـ فكسهن اله فكس رفع راسه
علينا طك ضهرة رادف بصوت بارد
-: تفضلو شنو تردون ؟؟
ما يباوع عليه هذا الخـلاني اتنرفز
ليش ما يباوع عليه ؟!
مُرجان -: استاذ أنا جايتك حتىٰ اعتذر منك
قاطعني
-: على تعتذرين بالضبط ؟؟
-: علىٰ الصار قبل ساعة بالمحاضرة
رجع ضهره للكرسي بينت أكتافه بينما تمردت
خصلات من شعرة علىٰ جبهته بلعت ريكِ
صافنه بمعالم وجهه
:- على شنو تعتذرين أنه نسيت شنو
سويتي قبل ساعة بالصف ؟؟
فززني كلامه البي نوع من السخرية
مسحت وجهـي مدري شبيه هيج اباوعله
هدئت نفسي
-: طـولت لساني
:- وبعـد ؟
-: وو وما ركـزت بالمحاضرة التهيت اسولف
:- امممم
طلع صوت من ثغرة صفن عليه شبك
ادي وي بعض رادف
بهدوء
:- بمــا انو أنتِ اعترفتــي بأغلاطج
من الممكن اسامحج ولكن
رفع إصبعه يحجي بتحذيــر واضح
-: اذا صار وعدتي هل تصرفــات وسأتي لأستاذج
وطولتـي لسانج كوني متأكدة ما راح تنجحين
من المادة طول ما أنه موجود بهل كُلية وأستاذج
مفهـوم ؟؟!
-: مفهوم أستاذ من اليوم ورايح ادرس
واجتهد واتعب على نفسي واحاول اغير
من تصرفاتي وان شاءالله باجر اثبتلك صحة
كلامــي
-: نشوف باچــر بالأمتحــان
:- زين أستاذ ممكن اطلب منك طلب ؟
:- اكيد تفضلي
-: بما انو باجر امتحان واليوم أنه
ما انتبهت للمحاضرة بس اريد توضحلي
النـقاط المُهمة حتىٰ عقلي يستوعب ممكن ؟؟
-: ممكن ليش لا هذا واجبــي
وشنو بنسبة لأصدقائج هم يردون
اعيد الهم الشرح ؟؟
شهد :- ياريت استاذ تسوي فضل والله
مريم -: اي استاذ ياريـت والله
هز راسه بقـبول متنهد انطيته الكتاب
دنك يفتح بالأوراق رفـعت راسي لـ شهد
غمــزتلها بطرف عيني
هـزت راسها دنكت احجي حتى باله
يصير يمي
-: استاذ يعني جايه بالأمتحان باچر ؟
:- اي اي طبعاً جايه ذني كلهن مُهمات
ضروري تقرين كل الصفحات
دغتني شهد بكتفي تحمحمت رادفه بأبتسامة
وهدوء
مُرجان -: استاذ شكراً الك كُلش هوايه
واسفه مرة ثانية لأن طولت لساني عليك
وان شاءالله باچر ارفع راسك بالأمتحان
هز راسه مبتسم انطاني الكتاب
مسح طــرف ثغرة رادف بكل هدوء
-: العفو واتمنى تلتزمين بكـلامج
يسعدني تصيرين طالبة مجتـهدة مثقفة
واعية
رمشت عــدت مرات بذهول صفنت بعيونه
هوه مبتسم بأستفزاز
يعني هوه يشوفني مو مثقفة ومو واعية ؟؟؟
طلعت من غرفته عيوني بكصتي حرفياً
تمنيت اكمز عليه وشوه وجهه الحلو
بس اديه كل مرة الزمهم اهم شي سويت
الـ بالي
مُرجان :- وين المـُـبايل ؟
شهد -: هـياته بجيبي
مديت ايدي خلته بيدي طلعنا من الجامعة
بعد يوم ملـيان أعصاب وتوتر
وكفت مقابيل سيارتي شفت مخلين
ورده حمرة عليها عكدت حاجبي تقدمت اخذت
الوردة اباوع مستغربة
هستوني التفت وإذا اشوف بوجهــي
اخر شخص خطر على بالي هل فترة شهكت
بصوت عــالي
ضاحكة من كل کلبي اردفت بابتسامة
عريضة
مُرجان -: بساااام
واكـف مبتسم بينما عيونه يلمعن
تقـدم يمي بكم خطوة رادف بحب
:- يا روح بســام
وقلب بسـام
مشتاقلج وردتــي
..
..
..
..
..
❢ ═──── · · • • • ❂ • • • · · ────═༻❢
يتبـــــــــــــع
للقصة أسرار🔥
ها ولكم شلونها القفلة.؟ 😉
تتوقعون هذا بسااااام الـ نعرفه لو غيرة؟
ومنو مُرجان؟؟
شاركوني تفاعلكم الحلو للقصة 😔❤
مع ألف سلامة
الكاتبة ميـان أل مالكي