بارت _4
الكاتبة:- ميم آل حمدان.
#العنود
ـــــــــــــــــــــــــــــــــــــــــــــــــــــــــــــــ
ثامر:- بعصبيه، شتحجين انتي من وين جبتي هلحجي.
عنود:- كتلك اضل ساكته احسن.
ثامر:- جذب جذب ماكو هيج شي صدكي جذب.
عنود:- مو غبيه حتى مااعرف الصدك من الجذب.
ثامر:- شوفي هي تريدج ترفضين لهذا كالتلج هيج.
عنود:- منو هي؟
ثامر:- ندى اخت سلمى.
عنود:- بس مو هي الي كالتلي.
ثامر:- لعد منووو، لاتصدكين كلها جذب.
عنود:- سندت نفسي على الكاونتر وابتسمت، هو اتخبل ميعرف شيسوي، شمر صينية الاستكانات عالحايط وصارت طحين على هلصوت اجو كلهم انصدمو،
احسان:- شكو ثامر شبيك؟
سلمى:- عنووود شنو حجيتي وخبلتي الولد هيج.
عنود:- شعليه هو اتخبل.
ام ثامر:- لك يمه شبيك ليش هيج سويت.
باوعلي وعيونه نار واني اعرف ميكدر يكول شنو السبب الي خلاه يصير هيج عصبي كال،
ثامر:- ماكو شي حالة عصبيه.
ام ثامر:- شون ماكو شي اول مرة اشوفك هيج.
ثامر:- بعصبيه، كلت ماكو شي كاافي.
عافهم وطلع والكل صارت عيونهم عليه راحو اهل ثامر وطلع ابويه وسلمى وراهم ركضت على ادم حضنت وجه بيدي وحجيت
-_ادم باوعلي لا تحجي شي كدام احد وخصوصا كدام امك.
ادم:- صدك يعني هذا الحجي؟
عنود:- بعدين احجيلك بس هسه لاتحجي شي فدوه.
بعدني احجي دخلت سلمى وصايرة اعصاب كالت،
-_شسويتي للولد خليتي يتخبل هيج انت ماتوبين ايمته تبطلين هاي سوالفج.
عنود:- شبيج على كيفج ترى ماسويتله شي.
سلمى:- اذا ماسويتي شي ليش هيج اتخبل.
عنود:- رفعت اكتافي وايدي بمعنى مااعرف.
احسان:- ادم انت احجي شصار ليش هيج سوه ثامر.
عنود:- شنو ماتصدكوني؟
احسان:- اسكتي مااريد اسمع صوتج، ادم احجي.
حسيت خنجر اتوسط بنص كلبي من كال هيج صح ابين مااهتم بس جذب، باوعلي ادم وكال
-_ماصار شي هو فجأة مدري شصار بي.
سلمى:- ادم احجي الصدك لاتخاف من عنود.
ادم:- وليش حتى اخاف هي اختي ماتأذيني.
حجه هيج وابتسملي رديتله الابتسامه وهما عافونا وراحو لغرفتهم، حضنت ادم احس هو صدك سند الي رغم اصغر مني بس جان السبب الوحيد الي يخليني اتحمل هلعيشه، عفته ورحت اتمددت بغرفتي واني افكر شنو الشي الي سويته حتى استحق هاي المعامله من ابوي هسه سلمى ماكو عتب عليها مرت اب بس ابويه ليش، من بعد موت امي ابدا مااهتم بيه ماشفت منه حنان ولا اتعلمت منه شغله وهسه يحاسبني على تصرفاتي وهو ماعلمني شون اتصرف كلشي اتعلمته بوحدي، وحتى الحجاب والصلاة ماعرف اي شي عن الدين محد كلي لازم تتحجبين او تصلين، شفت بنات عمي يلبسون حجاب لبست بس مو التزام، وكت اليعجبني البس او ماالبس ومااصلي كلشي مخربط بحياتي، من كثر التفكير دخت ونمت.
سلمى:- عنود عنود كومي عنود شبيج كومي عبالج ميته.
عنود:- فتحت تك عين اباوعلها، اسم عليه شبيج من الصبح حتى نوم ماننام شون يعني.
سلمى:- دكومي كومي هسه ثامر يجي يأخذج.
عنود:- وين يأخذني؟
سلمى:- ماادري كال خلي تتجهز هسه اجي.
عنود:-معرفتي شنو الموضوع.
سلمى:-؛ لا هسه دكومي راح يجي الولد.
عنود:- اي كمت .
كمت تجهزت اجه ثامر طلعت وكفت بالباب اشرلي اصعد صعدت ومشى حجيت،
-_وين رايحين؟
ماكو رد.
-_شنو بلعت لسانك ليش ماتحجي.
ثامر:- هسه من نوصل تعرفين.
-_سكتت عنه بكلبي اغلط عليه وصلنا لحديقه نزل نزلت وراه يمشي بدون مايندار عليه انتبهت اخت سلمى كاعده بنهايه الحديقه استغفرت وحجيت بهمس
عنود:- ناقصني شكول خايسه بحياتي انه.
من شافتنه كمزت وكفت راح ثامر سلم عليها يبين ثنينهم متوترين بس يحاولون يخفوها وصلت سلمت وكلت لـ ثامر،
-_ليش جبتني لهنا؟
ثامر:- علمود تسمعين بأذنج منها ماكو شي بيناتنه.
عنود:-مكدرت الزم نفسي ضحكت وكلت:- من كل عقلك تحجي انت اصدكها واصلا مااحتاج احد يكلي هلكلام صح لو غلط انه متأكدة.
ندى:- مااسمحلج تطلعين سمعه عليه.
عنود:- تؤ تؤ شريفه اخت شريفه.
ندى:- شوفي عنود مااجيت اتعارك وياج اجيت اكلج هذا الكلام مو صحيح اني وثامر ماكو شي بيناتنه.
عنود:- باستهزاء، صدك والله.
ندى:- كرهج لاختي ساد عيونج ماتشوفين الصح، واختي هلكد تحبج دائما تحجي عنج بالزين بس مدري ليش ماتحبيها.
عنود:- حاولت اسيطر على نفسي ومااجفص وافضحها مو علمودها، علمود بابا. كتلها،
-_هاي امور عائليه لاتتدخلين احسلج، وثامر رجعني للبيت مالي خلك اكعد اسمع شي.
ثامر:- صدكتي هسه؟
عنود:- لاا طبعاً، انه من حجيت هذا الشي الك جنت متأكدة منها.
ثامر:- بس فهميني منو كلج منو هذا؟
عنود:- مايخصك هذا الطرف انت وتعرف بشغلي اكو فد شي كلش مهم انو مانحجي شي مامتأكدين منها او اذا معدنا دليل.
ثامر:- شراح تسوين هسه راح تروحين تكولين للكل؟
عنود:- لا لا ثامر انه هيج وحده طلعت ماتعرفني انت.
ثامر:- شتريدين بس فهميني.
عنود:- بسيطه، ماريد اتزوجك.
ثامر:- تمام هاي هيه بس اذا سمعت هلكلام من احد وكتها لاتلوميني شنو اسوي.
عنود:- لاتخاف مااكول.
-عفتهم مشيت واني ادردم، شون حب هذا اذا تخافون تعلنوها بس شتترجه من عالم نفسيتهم خ... ، رجعت للبيت فرحانه راح اخلص من هاي السالفه، لليل اجه ثامر كعد ويه بابا وكال،
ثامر:-عمي اجيت اكلك اني مااريد عنود بعد ولاتفهمني غلط بنتك مؤدبه واخلاق وعاقله ونعم التربيه بس اني مااشوفها تناسبني.
-اباوع شون مصدومين من كلامه واني كاعده مبتسمه اشوف سلمى شون تريد تنفجر حجه بابا
احسان:- شنو السبب انت الصبح جنت تكول اني اقنعها واخذها.
ثامر:- صحيح بس اتراجعت.
سلمى:- هي لعبة حتى تتراجع.
ثامر:- عمي تريدون الصراحه اني بعدني اريدها بس هي ماتريدني شون اعيش ويه وحده ماتتقبلني.
-بهت وجهي انصدمت وشفته غمزلي عرفت جاي يسوي هيج حتى اطلع اني المذنبه ويعرفني مااراح احجي شي بس معرفت هلكد نذل وهيج يسوي حجه بابا بعصبيه
احسان:- ومن ايمته نمشي ورا رائيي الصغار احنا روح حدد موعد العقد وهاي هي موافقين.
عنود:- شنو موافقين مااريد انه كوه هي.
ثامر:- يلا عمي اترخص اني.
احسان:- براحتك سلم على ابوك.
-طلع ثامر وهو يبتسم ابتسامه خبيثه جنت اريد اكتله رجع بابا عليه وكال،
احسان:- جهزي لخطوبتج ومااريد اسمع كلمه زايدة الظاهر انطيتج وجه زايد.
-اجيت احجي زمخ بوجهي
احسان:- مااريد اسمع صوتج.
عفته ورحت لغرفتي واني نار اريد فد شي اطلع حركتي بي كعدت بالكاعد وسندت نفسي للحايط وكمت اضرب براسي للحايط، راسي كامت توجعني لزمتها بيدي واضغط عليها احاول افكر بشي شون اطلع نفسي من هذا الموضوع فجأة اجت ببالي فد شي ابتسمت وكمت اخذت موبايل وحطيت السماعات وشغلت التسجيلات، مسجله كلشي من رحنه للحديقه كلام ثامر كلها بس مو هذا الاريده هسه دورت بالتسجيلات لكيتها ضحكت هي هاي الاريده. تمددت ونمت.
سلمى:- عنود كعدي عنود شون يعني ماتحسين انتي.
عنود:- خير ياطير من صباحيه الله شكو عوفو الواحد ينام.
سلمى:- كومي خلي نروح لبيت عمج علمود نحدد موعد للعقد.
عنود:- باوعتلها ببرائه وكتلها:- خاله سلمى.
سلمى:- منج من الشيطان، شكو؟
عنود:- مااريد اتزوج ثامر انتي احجي ويه بابا هو يسمع منج.
سلمى:- دكومي كومي مو بكيفج تتزوجي غصبا عنج.
عنود:- وكفت كبالها وكلت:-ليش هلكد تردين اتزوج ثامر؟
سلمى:- علمود مصلحتج هو يخليج مرتاحه فلوس عنده وبيت شتريدين بعد.
عنود:- شلج بهل الدروب التعبانه هسه تريدين اصدك انتي تحبيني وتريدين مصلحتي.
سلمى:- لاتصدكين.
عنود:- الواحد يتمنى الخير لاقرب شخص اله بعدين البقيه مثلا ليش ماتزوجين ندى لـ ثامر وتخلين اختج تعيش ملكه.
سلمى:- شجاب ندى بالسالفه انتي بنت عمه اولى من ندى.
عنود:- تريدين تقنعيني بهاي اكو ببالج شي بس شنو هوو.
سلمى:- شترجه منج امج شنو جانت انتي شراح تصيرين.
عنود:- كزيت على اسناني وحجيت بعصبيه:- طاري امي لاتجيبي على لسانج الوصخ مرة ثانيه.
سلمى:- نجبي أدب سزز شون تحجين وياي هيج.
عنود:- شوفي سليمه خلي اجيج من الاخير انتي راح تقنعين بابا حتى يرفض مثل الحبابه.
سلمى:- اني اعلمج شون تحجين وياي بس خلي يجي ابوج اذا مااخلي يموتج.
عنود:- على بختج ست اسمعي هاي التسجيل.
طلعت التسجيل شغلته واني ابتسم وهي انصدمت من سمعت تسجيل صوتها وهي تكول الي
(:-اني جنت بعلاقه ويه ابوج وكت ماجانت امج عايشه وانتي تعرفين وشفتي بعينج من اجه ابوج عليه بس هسه اذا حجيتي منو يصدكج محد لان ابوج بظهري وانتي محد لهذا لاتلعبين وياي افتهمتي.)
-_طفيت التسجيل وحجيت،
عنود:- اعتقد تعرفين الباقي مايحتاج اكمل.
سلمى:- بتلعثم، عنود شنو هاي وشراح تسوين.
عنود:- لاتخافين شبيج وجهج صار اصفر يمعودة لايصير بيج شي وابويه شيسوي من دونج.
سلمى:- تهدديني عنود؟
عنود:- تؤ تؤ انه اهددج معقوله مو انتي عزيزتي شون اهددج.
سلمى:- تستهزين بيه هسه اخابر على ابوج واخلي يجي يكسر الموبايل براسج.
عنود:- ضحكت بصوت عالي.
سلمى:- مخبله انتي مو صاحيه.
عنود:- كاافي عاد هوواي لحيتي بالسالفه اسمعي هاي التسجيل اكو احتياط منها يعني من هسه لباجر يكسر مايفيد وانتي راح تسوين الي اريده.
سلمى:- شتريدين ياغضب الله.
عنود:- مثل ماخليتي بابا يوافق على ثامر هسه مثل الحبابه تروحين تقنعي يرفض والا هاي التسجيل الكل يسمعها اهلج واهل بابا بكيفج بعد.
سلمى:- ابوج يمنعج، وحتى اذا نشرتي وين تروحين من ايد ابوج.
عنود:- لاتخافين عليه اكو هواي عالم تحميني منكم.
سلمى:- باستهزاء، منو هما خوالج الي بالانبار الي حتى ماتعرفيهم.
عنود:- لا بس سهله اضحك على واحد واخلي يحميني. بالاخير غمزلتها.
سلمى:- همزين امج ميته وماشايفتج لان جانت تموت من قهرها على هيج بنت.
عنود:- سلممى طاااري امي لاتجيبي على لسانج وألا وحق محمد ادفنج هنا.
-من شافتني تعصبت عافتني وطلعت، كعدت افكر اعرف اذا حجت لابويه محد يكدر يخلصني من ايده بس هي هم تخاف لان بالتسجيل مطلعه وجها الحقيقي الي ماشايفو بابا ارتاحيت، رجع بابا من الدوام والوضع طبيعي يومين بس بابا خابر لبيت عمي وكال احنا ماننطي بنتنه وصارت مشاكل بس المهم خلصت من ثامر،
كاعده بغرفتي اجه ادم وكال
ادم:- عنود بابا يصيحج.
عنود:- ليش؟
ادم:- مااعرف تعاي شوفي.
-_رحت كاعد بالصاله وسلمى يمه وتخزر بيه كلت بهدوء
_صحتني؟
احسان:- اي تعاي كعدي.
عنود:- نعم.
احسان:- باجر راح نروح للنجف ومناك اخذج لكبر امج.
عنود:- تمام.
عفتهم ورحت لغرفتي كمت ابجي معرف ليش ابجي احس نار بكلبي ماتطفى، نمت ودموعي بخدي كعدت بنشاط وجهزت غراضي وصعدنه السيارة واني كبل نمت ماحسيت غير ادم يكعدني وصلنه نزلت مشينه مسافه طويله، رفت راسي وشفت قبة الامام نزلت راسي بحزن لان اني مكدر افوت ازور ماتذكر اخر مرة ايمته زرت بس اكو صوره قديمه الي بحضن امي بالزيارة، مكدر افوتلها اكول لنفسي شون تفوتين لهيج مكان وانتي مليانه ذنوب واخطاء وصلنا للصحن كعدت اني وهما فاتوا حتى صلاة مااعرف بقيت اباوع للقبة اتأخروا واني مليت كلت اروح للسوك اشوف شكو اتمشيت هواي ضجت ورجعت لنفس المكان انتظر ماكو ماطلعوا عرفت طالعين رحت دورت مالكتيهم وموبايلي يم بابا بقيت ادور شكد ماكو اختفوا سئلت واحد كتله
عنود:- خويه مركز المفقودين وين؟
-_ليش ضايعه؟
عنود:- لا بنتي ضاعت ادور عليها.
-_شنو اسمها شنو لابسه؟
عنود:- مااعرف.
-_شون متعرفين بنتج شنو لابسه.
عنود:- شكد تلح هسه كلي وين صايرة وفضني.
_يبين عليه ضاج واشرلي رحت هناك عبالي يجون بس ماكو، كلت خلي اروح للكراج واضل يم السيارة احسن تمشيت طلعت من السوك ورحت للكراج انصدمت السيارة ماكو كعدت علرصيف ابجي.
_معقوله عاوفوني وراحو، لا لا مايعوفني بابا.
جيت اتخبل وماحافظه رقم احد اجه واحد عسكري وكال
-_شبيج ليش تبجين.
عنود:- رفعت راسي باوعتله وحجيت، ضيعت اهلي.
-_وين ضيعتهم؟
عنود:-بالامام.
-_شعندج هنا بابا غير هناك تبقين.
عنود:- دورت مالكيتهم واجيت للسيارة هم ماكو.
-_حافظه رقم احد من اهلج؟
عنود:- لا.
-_كومي وياي.
عنود:- وين؟
-_للمركز تنطين معلوماتج حتى اذا احد سئل عليج يعرفون.
عنود:- مااريد، بس اخذني للمقبرة.
-_شعندج بالمقبرة وانتي بنيه وحيدة.
عنود:- اخذني ومعليك فدوه
-_استغفرالله شون سالفه هاي كومي تعاي وياي.
عنود:- تأخذني للمقبرة؟
-_مو اني صديقي يأخذج عندي واجب اني.
عنود:- ميخالف المهم اروح هناك.
رحت ويه صاح على واحد من الولد هم عسكري وصعدت ويه يبين مو راحه الطريق كله ماشال عينه وبس يحجي واني ساكته وصلنه للمقبرة نزلت كتله
عنود:- شكرا.
-_تتدللين عيني، مكلتي شنو اسمج؟
عنود:- باوعتله بطرف عيني ردت امشي كال.
-_اي شنو ببلاش وصلتج غير اخذ اجر.
عنود:-؛ معندي فلوس والله جنطتي بقت يم اهلي.
-_مو الا فلوس اي شي عادي اقبل. وغمز.
عنود:- انت ماتستحي معندك اخلاق عود انت تحمي الشعب اذا امثالك هما الي يحمون الوطن لا داح الوطن.
-_شبيج شبيج مكلنه شي اكلتينه مو صووججج صوجي جبتج.
عنود:- محد جبرك ويلا شوفني عرض اكتافك.
هز ايده وراح وهو يدردم، رحت لكبر امي بقيت ابجي واحجي
-يمه ابوي عافني وراح شراح اسوي انه وحدي اخااف يمه ردي عليه فدوه.
كمت من الكبر اباوع راح تصير الليل لازم اطلع من المقبرة بس وين اروح شراح اسوي واني خايفه، مشيت بتعب وحيل مابيه طلعت من المقبرة شفت عائله واكفه يم الشارع رحت الهم وحجيت
عنود:- فدوه بس وصلوني للكراج.
-_منو انتي وليش وحدج.
عنود:- عمو اريد اروح للكراج معرف شون ومعندي فلوس.
-_بس الكراج مو بطريقنه.
عنود:- ميخالف بس اخذني لاي منطقه عادي.
-_اي تمام امشي ويانه.
مشيت بس خايفه كلش وياهم ولد ماشال عينه يباوعلي وصافن اتوترت من نظراته وصلنه لمنطقه ونزلوا كلهم نزلت حجه نفس الشخص.
-_هاي هي احنه وصلنالج لهنا الباقي معلينه بي.
اجيت احجي كمز نفس ذاك الولد الي جان صافن بيه كال
-_اني اخذها للكراج.
عنود:- شكرا مايحتاج.
-_ترى هو بطريقي صاير.
مامرتاحتله ابد بس معندي غير حل رحت وياه عنده سيارة قديمه صعدت وهو مشى لفترة طويله سئلت بخوف
عنود:- ايمته نوصل؟
-_مسافه طريق.
فجأة وكف السيارة بمكان ماكو احد بي واندار عليه وطلع قماش من جيبه ولزم راسي وحط القماش بحلكي اريد اصيح مكدر شويه شويه كامت تتشوش الصورة وبالاخير محسيت بشي.
يتبع......
ـــــــــــــــــــــــــــــــــــــــــــــــــــــــــــــــ
نهاية البارت
انتظروا البارت الجديد.
الكاتبة:- ميم آل حمدان.