#تحت_مسمى_القسمه_والنصيب
لـ الكاتبه حَـوراء آل طائـي
مَحد يحتَرك گلبه عَليه ؟
و يِمد إيدّه و يطفي النّار بيه ؟
إذا إلي ببِيتي ضِدي شحال جَارِي ؟
يِلّم فوگي حَطب و يَزيد نارّي .
-----------------------------------------
لَــمار"
-راحت مرام وبقيت اني والبنات اني منعزله منهم استحي واساساً مامتعوده عليهم ومااحب اثگل عليهم حرفياً 24 ساعه اني بالغرفه هواييي يجن يحچن عليه حتى اگعد يمهم بس مااقبل بليل گاعده بالغرفه وتوني فتحت موبايلي چان مابي شحن شحنته صار هواي مافاتحته ولا شايفته اول ماانفتح صارت بوجهي خلفيه شاشه القفل صورتي اني واهلي بابا حاضني وحاضن ماما واسر من صفحتي الثانيه حاضني چنه مصورينها بعيد ميلادي قبل سنتين كُلش احبهااا وحاطتها خلفيه كلما افتح موبايلي اشوفها شبعت بچي انتهيتتتتت
بقيت اشهك لحد ماسكتت وحدي فتحت الباسوورد واجاني نت صارت الاشعارات ترگع واخر شي تسجيل صوتي من اديان واصلني فتحته وبديت اسمع حچي يشيب الراسس من عمتي تهدد بيها كأنما مو بنتها ويحچون حچي مشفر مافهمت شي منه انسطرتت سطرر بس ردت افهم ماكو عدته مره وثنين بالثالثه رحت اتصلت على اديان مغلق جهازها ضل بالي يمها وضليت افكر بهواي شغلات بس مابيدي شي اسوي دزيتلها رساله من تفتح الجهاز تراسلني باوعت للساعه بالوحده ونص
حسيتت اريد اشتم هوى الجو بي بروده والدنيا ليل نزلت اتمشى ع الدرج بدون صوت مااريد ازعجهم
طلعت من باب المطبخ للطرمه گعدت بالحديقه
حديقتهم چبيره ومرتبه كُلش حلوه واكو بيها مرجوحه صغيره ومسوين گعده ميز صغير ومحاوطاته كراسي اربعه ولونهم ابيض عاكس على خضار الحديقه حيل حلوه وشكلها مُريح للنظر اول مارفعت عيني للنجوم بدت الذكريات تتماطر عليه وشريط حياتي كله مر گدامي كلشي عشته طول الـ 17 سنه الفاتت دااشوفه گدام عيني لحد مارجعتلي ذاكرتي ليوم وفاة اهلي انهاريتت ايديه على راسي احاولل اوگف تفكيرر ودموعيي حسيت حرارتهم توصل لگلبي رفعت راسي بهدوء من صار گدامي منديل شفته مُـرتضى
كرهت نفسي بهذيچ اللحظه هذاا اكثر واحد مااريد يشوف انكساريي بس صارت بعد بعدت نظري عنه واني امسح عيوني همس بصوت هادء عكس كُل مره: {عَـسى أن تَكرهوا شَيئاً وَهُو خيراً لكُم} مااعرف شنو بداخلچ وبشنو دتحسين ومااگدر اخفف عنچ بس بهل كلمات الله يبرد گلبچ
ابتسمت بوجها وسألته بضحكه: شجابك وراي ادري جني وين مااروح تطلعلي
-نزلت احاچي الحُب وشفتچ گعدتي هنا عبالي بيچ شي فـ بقيت
-ضحكت وگلتله:لعد اگوم اني وانت حاچي الحُب
-يمعوده لا بعدچ مضوجتنا
-وخر وخر خلروح انام شگد تحچي انتَ اكيد طالع على عمتك سناء
-لچ اكتل روحي اذا طالع عليها
ضحكت وصعدت فوك لفيت راسي ونمت لثاني يوم گعدت لگيتهم مخبوصين ويطبخون ويعدلون استحيت ماانزل وياهم عيب صارلي فتره بس اكل وانامم هم مامسمعيني كلمه ولا مثقلين وجههم عليه بس مهما يكُن عيب غسلت وجهي ونزلت وياهم البنات مخبوصات ومُراضى يجيب المي واللبن والعصاير ويروح ويجي يگللهم مااريد شي ناقص لحد ماحچيت:سما شكو منو جاي؟
-سَــما: زُملاء وزميلات مُرتضى الي بالجامعه
-اهاا خوش، اساعدكم بشي
-غفران: لمار تعالي حبيبي اذا ماعندچ شي حطي هذا المي واللبن والعصاير بالثلاجه حتى يبردون
-اجيتچ، بديت اشتغل وياهم من الصبح لحو عليه اتريك مااشتهي فـ بقيت اشتغل وياهم صار فتره عمي يمشي بمعامله نقلي ونقلني بس گلت اداوم ببدايه الاسبوع احسن فـ گاعده هلفتره لـ 11 ونص اجو مجموعه شباب گعدو بالاستقبال ووراهم مباشرتاً اجو البنات واحنا دنسلم دخلت وحده استغفرالله يربي
احنا مامحجبات ونلبس براحتنا بس لبسنا مُحتشم ههاييي فدنوبب لابسه فُستان قصيرر يوصل للرُكبه وضيق وهي ماشاء الله ممقصره بالجمال ولون الفُستان الازرق عاكس على بياض بشرتها ماانكر هي حلوه بس لبسها فاضح الى درجه يعني ملابسها بالحفلات منلبسهاا
سلمت على عمتي والبنات وواضح عليهم بالگوه متحملينها بس الصدمني دخل مُرتضى ومن شافها احس عيونه گامت تطلع قلوب تقرب عليها وباوسها وهي هم وعبالكك زوجتهه لهل درجه قربهم من بعض من وصلت يمي سلمت بتعالي ورافعه خشمها باوعتلها بطرف عيني غثتني گاللها مُرتضى
-بنات هاي بنت عميي اليي صارت وحده من البيت وحالها حال سما وغفران اسمها لمار هذا تعريف سريع عود بعدين گعدو وتعرفو عليها اكثر
-كلهم ابتسمو بوجهي وكررو "تشرفنا" ،اله هي باوعت ودخلت جوه عبالك بيت الخلفها هزيت ايدي وصعدت فوك بدلت ملابسي لبست تراك بيت اسود وبي مثل الخرز ابيض وشعري ضفرته ونزلت بعدني ع الدرج وهي چانت تسولف وتضحك بس شافتني عقچت وجهها بقرف
مُرتضى حيل تفشل منها باوعلي مبتسم بخجل وگال بصوت واضح: هلا بسورها ونورها
-التفتت اباوعلهم كلهم مبتسمين اله هي تخزر بيه وبمُرتضى وهو بده يعرفني عليهم
-ههاي لُجين صديقتي وياي بالقسم
وهاي موده السچاچه ام دميعه هاي اذا اخذت درجه كامله تگعد تبچي
وهاي ايلاف الفاهيه هم وياي بالقسم الله باليني بشكو وحده طايح حظها
-من وصل لهاي البنيه ابتسم وحچه بكُل حُب: هاي نبأ چنة امي المستقبليه
صدمني باوعتله وگلتله بصدمهه ورده فعلي مُبالغ بيها گلتله: عود صدك هاي التحبها؟
باوعلي متفشل وهي گبل گمزت: وشبيها هاي عيني
خجلت حيل من كلامي گدامهم وكلهم مستغربين: لا حُبي مابيها بس صدمني لأن عبالي مو من زميلاته بالجامعه
بالگوه رگعت السالفه ودموعي بطرف عيني من الفشله طلعت اركض للحديقه الخلفيه ودموعي صارت تتسابق صايره على كلشي ابچي حتى لو سبب تافه بس لأن هيچ چفصت شوي واجت وراي سَــما: شكو هلدموع يمعوده؟اصلاً محد طايقها واذا حچيتي هيچ وياها يطبها مرض
-حرجت مرتضى مچان هذا قصديي والله مدري شلون طلعت مني وهي البنيه ضاجت
-خايبه ويطبها مرضضضض لاتضلينن تتبكبكين مرتضى گال صيحيها يلا تعالي نصب غده
-جايه جايه، طلعت غسلت وجهي ورحت وراهم احاول اتأقلم بس صعبه حيل صعبه صبينا الغده للولد وحدهم والبنات وحد من كملنا كلها گعدت تاكل اله اني اجيت اصعد فوك استوقفني صوت عمتي: وين يمه تعالي تغدي
-عمه مااشتهي
-بس انتِ بلا ريوك تعالي
-مااريد والله صاعده اقرا تراكمت دروسي عليه هلفتره
-----------------------------------------
"سَـــما"
ورا ماصعدت لمار بدينا ناكل ونبأ تحچي وتشارك بأحاديثنا گوه تريد تسوي نفسها من عدنا حيللل غثتني لحد ما اجه مرتضى ابتسم واخذ نظره على الگاعدين وباوع لأمي متسائل: وين لمار؟
-غفران: تگول مااشتهي صعدت تقرا
-مُـرتضى: بس هي ماتريگت؟
-نبأ: وانت شكو مهتم لهل درجه
-سَــما: وانتِ شعليچ؟ عائله بيت حُبي لتدخلين
-نـبأ: اني هم محسوبه من العائله مو صحيح يروحي؟
وجهت نضرها لمرتضى الي واگف على اعصابه گالي بدون ميعيرها اهتمام: سمسم سويلي صينيه اصعدها الها اذا تبقى هيچ تموت
-نـبأ: روح ارتاح اني اصعدها الها وندردش شويه اريد اتعرف عليها
-غفران: ارتاحي انتِ معليچ بي اعتقد انتِ الخطار مو هو
-نبأ: هههه شگد احب دمچ الخفيف
عتهم يتناقشون وسويت صينيه اكل وانطيتها لمرتضى راح يصعدها الها وهاي ام دوده ماگدرت تصبر اله تصعد وراهم واستحينه نحچي وياها لأن البنات گاعدات زحمه منهم
-----------------------------------------
"لَــمار"
صعدت فوك وصدك طلعت كُتبي وبديت اقرا هواي سختت واني سادس لازم اشد حيلي شوي ودخل مرتضى بيده صينيه اكل حيل خجلت منهم هسه شيگولون هي گاعده واحنه نخدمها اخذتها منه وتشكرته وهو ضل يگلب بالملازم وينطيني كم نصيحه علمود ابدي اقرا ومااضيع وقتي ودخلت حبيبته حسل ضوجتني دخلت بلا ماتدك الباب هيچ گبل اجت ولزمت ايد مرتضى هو ابتسم بوجهها وهي گال الي
-لشوكت تبقين هنا؟
-مرتضى: طول العمر البيت بيتها واذا رادت تطلع من البيت بس وهي عروسه ويبقى بيتها شوكت ميعجبها تنوره
-شبيك اكلتني هسه اني شحچيت؟
-سألتي وجاوبتچ
- ايي وهوايي بيناتكم ميانه وبعدين انت ماتحسين لبسچ مو اوك وانت ببيت بي ولد ويحلون عليچ؟
استفزتني هواي گبيت بيها: انت لتحچين على لبسي شوفيي لبسچ ست اني ولد عمامي حاسبتهم اخواني ولبسيي مستور مو انت جايه تعلميني البس صدك لو گالو يعلم الصلاه وهو ميصلي والله ياالله
استحيت من مرتضى صافن يباوع علينه ومن شافني رديتها ابتسملي والتفت عليها: هلشغلات لتتدخلين بيها هاي كم مره احذرچ واگلچ؟ اهلي لاتدخلين بيهم
-هسه هاي اهلك؟
-امشي انزلي گدامي
نزلت وضليت صافنه على وقاحتها مستحيل مستحيل اني اگدر اعيش ويا هلمخلوقه شلون يتزوجها بعدين
بقيت اقره ودك موبايلي اديان گمزت من مكاني بس فتحت الاتصال اجاني صوتها يبچي: لمار بعد مابيه حيل اكمل والله
-بس فهميني شكو؟
-اذا صارلي شي التسجيلات الي عندچ توصلينها للشرطه الكُل راح يتحاسب املي بيچ لاتخيبين ظني
يتبع.....
-----------------------------------------
شَلونكُم سُكراتي
سولفولي توقعاتكُم؟
لاتنسون التصويت والتعليق بين الفقرات
احبكُم 🤎🦋