#طوبى "جنة طوبى"
#جمان_فريد
#الجزء_الحادي_والتسعين"نهوض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#القرآن_المجيد
ثمُ إن القرآن أعظمُ مارُتّبت به بعْـثرة الأرواح وأجل ما هُذّب به شَعث السرائر وأنقى ما جُمع به شتات القُلوب فالزموه في الشدة و الرخاء…🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 في هذه الحياة ستتعلم كل شيء وحدك، إلا القسوة، سيقوم شخص آخر بتعليمها لك.
- آل باتشينو🍃
_________________________________________
في الكوجينه..
سميره واريج وهاديه ومعاهم طوبى..
هي تجهز في الشاهي الأخضر..وهما حداها يغسلوا في الماعين ويهدرزوا..
هاديه؛اني ناخد فيهم بالجمله نوصي في خوي عليهم..
سميره؛من هني؟
هاديه؛ايه كان تبي تو نوصيه ع ستيكه تانيه..
سميره؛ياريت والله..
طوبى وهي تصب في الشاهي كانت تسرق في النظر لسميره وهي تفكر...
سميرة؛ايه تعالي جاي قالت مطيره عندكم معصرة زيتون وانتم عاد مشهورين بيه مانحصلش شويشه ولازوز؟
ابتسمت اريج وهي تلم في الماعين..
هاديه بضحكه؛بيدون لعيونك ياحنه..
سميره بضحكه؛ياوخيتي سلمها وسلم راجلها اللي جابها..
ضحكت هاديه..
طوبى التفت وهي تشوف لسميره بإبتسامه وقالت..
/سمسم
سميرة؛عيونها..
طوبى ضيقت عيونها وقالت..
/بعدين نبيك في موضوع..
ابتسمت سميره بتضيقه عيون..
وطوبى رقصت حواجبها وقالت..
/خل نرن الجرس بش يجوا يرفعوا السفره..
ومشت ضربت ع زر الجرس..
وخلت سميره تغسل في الماعين وهي مبتسمه بحماس..
وخطيبة خوها تسرقلها في النظر..
ع خشة غرفه وفي يدها مرضعه..
/اللي تجيب توامه عمرها ماترتاح..
طوبى:معاش تتشفعي منهم..
غرفه؛تعبت والله تعبت شيبوني..توامه وولاد فوقها ياربي..
طوبى:استغفر الله..اسكتي..
دق باب الكوجينه الخارجي..
اريج لبست وشاحها وخدت سفرة الشاهي وطلعت بيها برا..
عطتها لحسين وخشت..
وطوبى بدت دير في النسكافيه..
والباقي لاهيين بالحوسه..
غرفه وهي تخض في الرضاعه..
/غريبه التارقيه ماعرضتش خداماتها..
سميره:الناس جايين من سفر وتعب طريق..
غرفه؛قبل عادي تهد طول..
هاديه؛نحس فيهم ناس كويسه وطيبين..
سميره:هلبه..
غرفه؛لكن هديكا سليمه رافعه خشمها شويه..
هاديه؛لاحظت..
سميره:هي عاقله ورزينه..
اريج:صح..
غرفه بضحكه؛فرحانين بالسوريه اللي يبيها ولدهم بيطيروا ماصدقوا..
طوبى حطت الحليب عالنار وقعدت تتفرج عليه وهي معصبه من اختها
سميره؛اني استغربت كيف عادي عندهم توقعتهم لاياخدوا ولايعطوا الا منهم فيهم..
غرفه؛لا ياحنه ولدهم عبد القيوم كان يبي بنت من هني خطبها لزوه ع خاطر تارقي..
هاديه بصدمه؛الله!..
التفتت طوبى وقالت..
/ناس متخلفه وجاهله ومالهمش في الطيب النصيب كانهدا واحد زيه يردوه!ينشرى بالذهب عبد القيوم..
اريج شافت لطوبى وهي متفاجئه..
سميره:الحق راجل كويس اسكندر ديما يشكر فيه..
غرفه بمكابره..
/okماقلنا شي راجل كويس وتمام وماشاء الله عليه لكن كل شي وشيه..وع فكره سدره كان هدا رايها زمان..
ومشت طلعت من حداهم وطوبى تبع فيها بعيونها وهي معصبه..
"طوبى الحليب"
التفتت طول لقاته بيفوج طفت عليه..وزادت عصبيتها اللي كتمتها قدام سميرة وهاديه..
🍃🍃🍃🍃🍃
وفي الحوش اللي مقابلهم..تحديدا الدور التاني..
طلع محمد من داره ومشي لبوه..وهو ماشي فات من قدام دار خوه اللي كان فيها معاه ولد عمتهوالزوزيلعبوالبلاستيشن..
كمل طريقه لدار سدره اللي كانت مفتوحه..
لقاها ترسم في دفتر الرسم متاعها..ابتسم..
بعدين مشي يدور ع بوه لقاها مقعمز في الصالون بروحه شارد الذهن..
واقف حداه وقال..
/نقعمز..
المهدي هز راسه بالموافقه..
قعمز محمد وقال..
/وين كنت!؟
المهدي:في المطحن..
محمد بضحكه؛قصدي وين سارح..
تنهد وقال:في هالدنيا..
محمد؛تو مش يقولوا الولد سر بوه..علاش ماتحكليش وطلع اللي في قلبك!
ابتسم المهدي وقال..
/مافيش في قلبي كان كهربا زايده وشريان مضروب..
محمد؛بوي اني مش عيل صغير..عاملني ع هالأساس..
حاوط كتافه وقال..
/عارفك راجل نعبى عليه..
محمد؛باهي احكيلي شن تحس توا..
المهدي؛مضايق شويه..عادي تفوت..
محمد شافله شويه بعدين قال..
/نصارحك بشي! اني فرحان بيك هلبه..نشوف فيك كيف متحمل مسؤوليه رزق العيله وخوتك وتحاول ع ماتقدر تحافظ عليهم...بجديات بوي فرحان بيك..
المهدي مسح ع شعر ولده وقال..
/حتى اني فرحان بيك..ونحمد ربي كل يوم اللي عطاني ذريه صالحه زيكم..
محمد عقد حواجبه ودموعه عبوا عيونه وهو يقول..
/بوي..علاش ماتمشيلهاش!؟
السؤال كانت صدمه للمهدي..
محمد بلع ريقه وقال..
/الصراحه استغربت كيف روحت من غادي بسرعه ومعاش مشيت مرة تانيه..
حول ذراعه عن كتاف ولده وحط ايديه ع بعض وهو يشوف القدام وقال..
/قبل مشيت مع خالتك هي تبي تشوفها وراجلها كان مش فاضي..بعدين ولدي الموضوع هدا مايجيش تدوي معاي فيه..
محمد:باهي اني اسف..لكن نبي نقولك حاجه..اني ولاخوتي همنا تكون مرتاح راحتك عندنا فوق كل شي..
وناض من حداه وخلاه بعد ماخفف عنه شويه من اوجاعه
اللي عنده ولد زي محمد تهون عليه هموم الدنيا ومصايبها..
🍃لكن اللي عنده ولد زي محمد محي حاز مصايب الدنيا مجتمعه..
وامه لاهيه عنه بلمه في حوش صديقه ليها..وبوه لاهي يجري ورا رزق الدنيا..
هو كان في مزرعه لواحد من اصحاب الندامه اللي دارهم جديد..
ولد عمره 15 سنه قاعد ينزل في حفرة المحرمات المظلمه درجه..درجه لين وصل لارتكاب كبيره من الكبائر..
🍃🍃🍃🍃🍃🍃
"شن عندك ياحنه احكي"
طوبى بإبتسامه شقاوة...
/انتي اللي احكي وقولي شن درتي في الراجل..خلتيه يتنازل ويوقف في صفي واني عاطياته راسه قبل وين جاني هني!
سميره بضحكه:شن قالك!.
طوبى:ياحنه دخلني واسطه بينك وبينه..قال فتحت معاهاالموضوع وردتني..
سميره؛يبي ياخدني في السر قتله يفتحلك ربي..
طوبى يضحكه؛صحه ليك..راهو قالي شن ماتشرط اني راضي غير هي توافق..
ضحكت سميره وهي تصفق بحماس..
طوبى؛لكن لازم تزيدي طيبيه..بش يرضب بشروطك شن ماكانوا...خليه يجي يخبطك ويتفاهم معاك في حوش بوك بش يعرف قدرك زين..
سميره؛هدا اللي نبيه من الاول..
طوبى عقدت حواجبها وقالت..
/بس اني خوفي من خوك مايرضاش..
سميره؛اني مافي حد يقدر يدخل في حياتي كلمتي ع حياتي هي اللي ماشيه..خليه خوي ع تركينه مادوريشي..
طوبى:معناها نقوله يراجي لين تفتحي الموضوع مع خوك ويخليه يجيكم للحوش!؟
سميره؛ايه..
طوبى:تمام..
سميره قرصتها من خدودها وهي تضحك بعدين قالت..
/عطك الهني واني تقول مسكينه زعمه كيف عايشه وشن صاير فيها..طلعتي مش ساهله بكل يامراة انتي .
طوبى برغم الضيق اللي حست بيه لما انجابت سيرة هديكا الايام لكن خفت هالضيق بضحكه وهي تقول..
/ان شاء الله اللي يصير اللي في بالنا ونهيجوا في عرسك..
سميره؛بعون الواحد الاحد صاير...
ابتسمت طوبى وهي تشوف بين عيونها في الموقف اللي كانت فيه مغليه واصله لأعلى درجات الظلم الكبر معاها وتراجي في اليوم اللي تشفي فيه غليلها منها...
🍃🍃🍃🍃🍃
وفي الصاله..
كانت الاحاديث شغاله عن سياسه والوضع المعيشي..والاجتماعي..
وماكانش في حد ملتزم الصمت غير زوز..
صفيه..وصفاء..
ناضت صفاء بعد ماكانت غايصه في التفكير ومشت طلعت من الصاله واختها مروة تبع فيها بعيونها..
🍃طلعت صفاء من الصاله..ع خشة سميره..
وهي ماشيه لقت طوبى..طالعه من دار المعيشه للدار التانيه..
قدمتلها بسرعه وقالت.
/طوبى..
وقفت في الباب وشافتلها بإبتسامه وقالت..
/صفو..
وصلت فيها وقالت..
/نبي ندوي معاك شويه..
لاحظت ملامح الضيق ع وجهها قالت..
/باهي تعالي..
خشت..وصفاء خشت وراها..وطوبى سكرت الباب..
🌿🌿🌿🌿
صفاء بضيق؛اشرف ياريت الرجاله كلهم زيه حاطني في عيونه ولامرة وجعني ولاريت منه غلطه..وعمتي وعمي الله يخلف عليهم يعاملوا فيا زي بنتهم..مشكلتي الوحيده والكبيره عواطف..
عقدت طوبى حواجبها وقالت..
/خيرها!؟.
صفاء ودموعها في عيونها..
/مكرهتني في عيشتي..مستغله ان عمتي قاعده مش شاده حيلها وديما راقده ونازله عليا..ديري حطي جيبي وتهزب فيا وتسمع فيا كلام زي السم..وصلت بيها تصنعني في المشاكل تبي طلعني ماننفعش قدام عمتي بالذات..واخر شي داراته معاي امس لما جيت لعمتي ناخد اذنها بش نجي هني..خشيت عليها الصالون بعد ماحطيت العشي كانت هي حداها ومعاهم هديكا الافعى..
طوبى:خديجه!
صفاء بكره؛ايه هي وبنتها المقرفه..
🔺️🔺️🔺️في وقت سابق🔺️🔺️🔺️
كانت خديجه شاده ولدها تتفرج ع التلفزيون مع عزوزتها وحماتها..وحداهم راما حاطه رجل ع رجل ولاهيه بتليفونها..
خشت عليهم صفاء ومشت طول لنجمه..قعمزت جنبه وقالت
/عمتي بناخد اذنك غدوة بنتعشى في حوش عمي لطفي عزموني بكري شويه..
عواطف؛مش غدوة لمة سلفاتك وين ماشيه ومخليه الهم عليا!
نجمه؛هم شني! نساوين خوتك مايخلوا في شي...
عواطف؛يام مايجيش هكي مش ساد خديجه غدوة ماشيه للمه..
خديجه؛لولا انها لمة اعز صاحباتي مامشيت..وبعدين من امتى غبت عن لمة كل شهر من لما تزوجت ياعواطف!!.
نجمه؛فكوني من دوشتكم..وانتي بنتي بري بري سلفاتك يهنوا..
عواطف؛قولي يماروا.. وبعدين مش سادنا قريب كل يومين وانتي في حوش امك..بديري طريق حتى ع حوش الواعر..
خديجه؛هادم بالذات خلطتهم وراها خراب بيوت..
صفاء بعصبيه: معليشي يعني انتي ماتدخليش!..
راما شافتلها بحده..
وخديجه بصدمه مبالغ فيها..
/هكي علموك تكلمي مراة في عمر امك!
صفاء:لاكلمتك لاجيت جنبك ارجوك خليك في حالك..
نجمه؛صفاء بنتي..عيب..
صفاء سكتت وهي متنرفزة..
خديجه؛اني بنسكت ع خاطرك ياعمتي..
نجمه؛من الاساس مفروض مايكلمها حد واني موجوده..
عواطف:صح ياريت ماتدخليش..
راما:تو امي طلعت غالطه وهي اللي طولت لسانها جيتوا معاها..
رفعت صفاء حواجبها..
نجمه بعصبيه..
/هيه هيه..الجو هدا مايمشيش عندي المفرخ مايخشوش في دوة الكبار سكري فمك واسكتي..
خديجه؛امشي اركبي للشقه تحركي..
ناضت راما وهي معصبه ومشت طلعت من حداهم...
عواطف؛شوفي وين وصلتينا بموضوعك..اقعدي غدوة مع سلفاتك..
بدت ع وجه صفاء ملامح الضيق..
وخديجه تشوفلها برفعة حاجب..
نجمه؛اني اللي نقول تقعد ولاتمشي وغدوة بتمشي يعني بتمشي..
عواطف لوحت المخده اللي كانت حاطتها ع رجليها وناضت طلعت من حداهم وهي معصبه..
صفاء بضيق؛خلاص مش لازم عمتي..
نجمه؛اني قلت بتمشي هي كلمه..
هزت صفاء راسها وقالت..
/حاضر..بعدين ناضت وهي تقول..خل نمشي نشوف العشي..
ومشت طلعت من حداهم..
🔺️🔺️🔺️الوقت الحاضر🔺️🔺️🔺️
صفاء بقلق وضيق؛عارفتها توا بتزيد تحمق عليا وتفددني وهديكا بتزيد تشحنها..
طوبى: اكيد صنعة خديجه هادي وانتي ماتعطيهاش فرصه..راهو حدير كل شي بش تخلي اللي في صفك يجي ضدك..
صفاء عيونها غرقوا بالدموع وهي تقول..
/نادمه اللي تزوجت تصدقي!..
طوبى:لاحبيبتي ماتفكريش هكي..راجلك راجل كويس ويحبك وعيلته ناس طيبه ماعندهمش في الخبث..عواطف ونجاح صح واعرات شويه وعصبيات لكن قلوبهم طيبه وفيسع يلينوا..لازم تفهمي اللي مرت بيه عواطف راهو مش ساهل بكل زمان انضحك عليها والله لايوريك اللي تحسه المراة اللي تخش ع ناس بنية طيبه وينضحك عليها..وتاني مرة كان تبي تلحق عمرها لكن نصيب مافيش واطلقت بسرعه..
في ناس قويه تتجاوز الشي هدا وفي اللي لا..وهي توا راهو حاسه روحها بلاقيمه كأنها مش موجوده..اللي حواليها كل حد عنده عيلته وحياته وهي قاعده هكي ماعندها شي عايشه ع خاطره...هو صح مش مبرر للي دير فيه لكن ليها عذرها
صفاء بضيق؛باهي اني لأمتى بنقعد نتحمل!
طوبى:انتي لازم تغيري معاملتك ليها..ماتكونيش خاضعه وساكته وتضغطي ع روحك لين تنفجري وتقربعي الدنيا ع بعضها...لازم ديري مايخليك تكسبيها حتى هي
صفاء:كيف!؟
طوبى:تو انتي مش خايفه منها تحط راسها من راسك بعد اللي صار..!..خلاص..انتي غدوة نوضي الصبح ضمي الحوش ووتي الفطور والقهوة..وديري كل شي من قلبك وانتي مرتاحه..ووين تحصلي عليها بروحها..قعمزي حداها وقوليلها سامحيني مش قصدي اللي صار امس..واني مانبيكش تزعلي مني لكن الناس عزموني..وحاضر مرة تانيه معاش نغيب في يوم زي هدا..وصارحيها قوليلها اني مانبيش يصير بينا سوء فهم واني نبي نكسبك وشويه من كلامك الحلو اللي يدوخ..
صفاء بضحكه قلق..
/زعمه تلين!؟
طوبى:تلين ونص في ناس يحبوا اللي يعطيهم قيمتهم ويكبرقدرهم وطبعا من غير مبالغه بش ماتبانيش لقاقه درهي الكبد..
صفاء بضحكه؛باهي..هوهدا!..
طوبى:ايه..يعني خليك ديما مكبرة بيها..شاوريها في كل شي يخص الحوش..نهار تبدي مش فاهمه حاجه في قرايتك ديري قهوة وحاجه حلوه وبريلها بش تقريك..امدحي واشكري حاجتها كان استدعت الضرورة مش هكي وخلاص..
ولما اشرف يروح ويجي يوم ويطلعك ارفعيها معاكم وخليه ياخدلها حاجه يفرحها بيها..وخليه وين يروح للحوش يجيبلك حاجه يحسبها حتى طرف شكلاطه...في اللي هدا مايبوا ياصفاء وشوفي كيف يتغيروا..
صفاء برجاء:يارب..
طوبى:وبنعطيك نصيحه ردي بالك تسيبيها ..صلي ع النبي هلبه وفي كل وقت وكثري..اللي انتي فيه هدا هم وكثرة الصلاة ع النبي تكفي الهم..وتمسكي بدعاء ادعي بيه السجود..
"ياربي سخرلي قلب عواطف..واكفني شر خديجه بما شئت وكيفما شئت"
والله مانافعك شي اكثر من الدعاء والصلاة ع النبي بالذات..تشوفي فيا ع اللي عشته ومريت بيه والله ماعديت اوله وحنعدي اخره بإذن الله الا بيهم...
تنفست صفاء براحه وقالت:ان شاء الله..
طوبى؛هيا نوضي نطلعوا..
ناضت صفاء وهي تقول..
/صحيتي بيبو..
طوبى:بري اطلعي بري..
ضحكت صفاء ومشت طلعت من الدار..
اما طوبى ناضت لسرير بنتها وقفت عليها وشافتلها وقالت..
/مافيها حد مرتاح ياماميتي..ماميتي هيا نوضي شن تبي تقيمهالي الليله..طبست عليها وقعدت تبوس فيها وتناشب لين فاقت جنه لما شافت امها ابتسمت ابتسامه حلوة بالمره..
طوبى بحب:عسل ياناس بناكلها..ورفعتها وقعدت تلعب معاها وكأنها تاكل فيها وجنه تضحك..
🍃🍃
وطلعت بيها وقعمزت معاهم في الصاله..
لاحظت ان صفيه مهبيه..لكن امها عاديه تهدرز مع مطيره وسميره وهاديه وجوها حلو..
ركزت بالنظر ع سالمين لقتها تهدرز مع فردوس ونبيله ويبان حديثهم مهم...
هي حاسه ان نبيله مدرقه عليها شي لكن تجنبت تسألها خوف من الاجابه هي معاش تبي تسمع اي شي يخليها تتشائم تبي تقعد متفائله ومسلمتها لرب العالمين...
🌼🌼
روحوا سميره وهاديه ونبيله وبعدهم فايزة وبناتها..
واخر من بيروح عيلة التارقي..
☘طوبى بإبتسامه:بش تتفضلوا غدوة للغدي.
سليمه؛لاساد عشا الليله كفيتوا ووفيتوا..
طوبى:اقل من واجبكم وبالله عليكم تعالوا غدوة
مطيره:مولاة الحوش ساولاتك بالله ياسليمه
طوبى ابتسمت بعتب وهي تشوف لعمتها
ابتسمت صفيه وقالت..
/خلاص حبيبتي بكرا غدانا عندكم
هي وعمتها قالوا..
/مرحبتين بيكم...
🍃وبعد السلام طلعوا لسيارة عبد القيوم اللي كان يراجي فيهم مع عبد الله ومعمر
عبد الله؛ معاد بيتوا تطلعواتوقعت تباتوا!؟
صفيه:ماينملش منهم
ابتسم عبد القيوم..
صفيه:عزمونا بكرا ع الغدا
عبد الله:ايه الحاج علي عزمنا..
معمر؛ناس كويسه وصحاب واجب ديما طايح ع الناس المسقمه انت..
عبد القيوم:اعوذ بالله...
ضحكوا سليمه وصفيه..
معمر بضحكه:والله جد..
سليمه؛خلاص خليه في حاله..
عبد الله؛شقتك بعيده من هنا!؟
عبد القيوم:نوعا ما..
🍃وكملوا طريقهم وهما يهدرزوا لين وصلوا للعمارة اللي ساكن فيها عبد القيوم..
🍃عمه وراجل بنت عمته ولى عليهم تعب السفر وراحوا في النوم..
اما عمته وبنتها في الدار اللي بيباتوا فيها..
🍃صفيه بصدمه:تو انتن ليش تسبقن في الاحداث وين نعلموا شن يصير بعدين!
سليمه بضيق؛مافي شي حيتغير..
صفيه:ياودي اصلا المراة تبي واجد ع ماتفكر في الزواج مرة تانيه..هو توا بس يبي يتقرب منها لين تقبله وبعدين يجي الكلام ع الزواج...انتي ليش تستعجلي وتقولي اللي قلتيه..تعرفي ياامي كان يوصله كلامك حيزعل منك واجد وانتي تعرفي زعله كويس..
سليمه بمكابرة؛عادي يزعل ولاينزعل عليه...
🍃وهو في داره..
كان شاد تليفونه يكمل في باقي ابيات شعر الفها توصف حاله...وبعد كمل نزلها طول...
ﻛﻴﻒ أﻧﻬﻮﻧﻚ
ﻭﻧﺎ ﺍﻟﺤﻠﻢ ﻣﺎﻫﻮ ﺣﻠﻢ ﺣﻠﻤﻲ ﺩﻭﻧﻚ
ﻣﺎ ﺷﻔـﺖ .... في ﻫﺎﻟﻜﻮﻥ ﻛﻴﻒ أﻋﻴﻮﻧﻚ
ﻟﻠﻪ ﻓﻴﻬﻦ ﻳﺎ ﻋﺰﻳﺰ ﻋـﺠﺐ
ﻗﻠﺒﻲ ﺣﻠﻔﻠﻲ ﻣﺎ ﻧﻬـﺎﺭ أﻳـ ـﺨــﻮﻧـﻚ
ﻣﺮﻳﺾ ﺑﻐﻼﻙ ﻭ ﻣﺎ أﻳﻔﻴﺪﻩ ﻃـﺐ
ﻫﻮﻳﺘﻚ ﻋﺸﻘﺘﻚ ﻣﺎ أﺗﺤﻴﺮ أﻇﻨﻮﻧﻚ
ﻏﻴﺮﻙ أﻧﻐﺎﻟﻲ ﻣﺎﺍﺍﺍﺍﺍ أﻟﻘﻴـﺖ ﺳﺒﺐ
ﻣﻜﺘﻮﺑﻠﻲ ﻧﻬﻮﺍﻙ
ﻭﻣﻜﺘﻮﺑﻠﻲ ﻧﺴﻌﺪ أﻧﻜﻮﻥ أﺣﺬﺍﻙ
ﻟــﻜـﻦ ﻓــ ﻋﻠﻢ ﺍﻟﻐـﻴﺐ ﻧﺎ ﻭﺍﻳـﺎﻙ
ﻣﺎ ﻧﻨﺪﺭﻭﺍ ﻭﻳﺶ ﺍﻟﻜﺮﻳـﻢ ﻛـﺘــﺐ
ﻃﺎﻟﺐ ﺍﻟﻌﺎﻟﻲ ﺍﻟﻘﺴﻢ ﻣﺎ أﻳﺨﻄﺎﻙ
ﻭﻣﺶ ﻛﻞ ﺣﺪ ﺍﻳﻨـﻮﻝ ﻛﺎﻥ ﻃﻠﺐ
ﻟﻜﻦ ﺭﺟﺎﻳﺎ ﻣﻦ ﻛﺘﺐ ﻣــﻠـ ـــﻘــﺎﻙ
أﻳﺘﻢ ﺍﻟـﻐـﻼ ما دام ﻓﻴﻚ ﺭﻏـ ـﺐ
ﻭﺗﺒﻘـﻰ أﻣﻌﺎﻳﺎ ﻭﻧﺎ أﻧﻜﻮﻥ أﻣـﻌﺎﻙ
🍃🍃🍃🍃
"الله شو بيجنن صح في كلام مو مفهوم بس بالمجمل وصلني الاحساس"
سلافه بضيق:بتقولي انو عم يوصف مشاعروا ولامجرد ابيات شعر عاديه!
لبانه؛شوفي هلأ بيقولوا ان الشعراء كذابين وكل اللي بيحكوه بالشعر مو حقيقي ..
سلافه وهي تلعب بشعرها..
/لسا ببالي اسم طوبى..مو قدرانه اقتنع انو مجرد اسم خطر ع بالو وكتبوا..
لبانه؛اذا في حدا بحياتو رح يبين بالأخر..
شافت سلافه لأختها وقالت..
/قولتك بحكي معو بخصوص الجمعيه!؟
لبانه؛قلتلك من قبل احكي هي فرصتك..
تنهدت وغيرت نظرها عنها وسرحت بتفكيرها...
🍃🍃🍃🍃🍃
تاني يوم..
الجمعه...
1فبراير..سنة 2019..
🍃طبقت صفاء نصايح طوبى..وناضت بكري دارت دورة ع الحوش اللي ماكانش حايس هلبه سلفاتها داروا واجبهم قبل ليروحوا..
وبعد ضمت بخرت..وخشت دارت القهوة والفطور..
حطت الفطور للصيد ونجمه..
وولت للكوجينه لقت عواطف كيف خشتلها..
خدت نفس وقالت..
/صباح الخير..
عواطف يدوب ردت وقعمزت ورا الطاوله.
مشت صفاء صبتلها قهوة ودارت جنبها حلو وحطت السفره قدامها وقعمزت جنبها وقالت..
/اسفه ع اللي صار امس..
شافتلها بإستغراب..
صفاء:مش قصدي نكسر كلامك لكن طوبى عزمتني وماقدرتش نردها تعرفي اللي مرت بيه مسكينه..ان شاء الله هادي اخر مرة مرة تانيه مانغيبش عن اللمه بكل.
خدت عواطف فنجان القهوة وقعدت تشرب صفاء:عواطف اني نشوف فيك اختي الكبيره..
حطت الفنجان بدون ماتشوفلها..
صفاء:مانبيش العلاقه تقعد متوتره بينا نبيك تساعديني وتعلميني كيف نتصرف..صح اني تزوجت صغيره لكن مش بإرادتي الظروف جبرتني وانتي تعرفي اللي مرينا بيه..نحمد ربي اللي طحت في راجل زي اشرف وعيله زي عيلتكم..بالك ربي عوضني بيكم عن بوي وماليا..نزلوا دموعها ومسحتهم..اني مانبي شي غير نعيش مرتاحه ونطمن امي عليا..
عواطف تأثرث هلبه وحست بالذنب لكن قعدت ملتزمه بالصمت..
صفاء:سامحيني مرة تانيه..
وناضت ومشت دير في فطور ليهم الزوز..
وصفاء تقاوم في دموعها بقوة..
"خلي اللي في يدك تو نديره اني"
التفتت صفاء وشافتلها بمفاجأه.
عواطف وهي عاقده حواجبها بضيق..
/بري قعمزي في الدار نبي نفطر غادي..
صفاء ابتسمت وقالت.
/ع راحتك..
حولت المريول وعلقاته ومشت طلعت..
تنهدت عواطف بضيق بعدين ناضت بسفرة القهوة...
🍃🍃🍃🍃🍃
الساعه 2:30بعد الظهر..
في حوش لطفي الواعر..
كانوا التوارق يتغدوا من ايدين طوبى اللي اصرت دير الغدي بروحها..رشدة كسكاس..
🍃صفيه:مزرعه سمحه وفيها حوش نظامه وديكوره وكل شي فيه حديث..وهي مزرعة فواكه بس اكثر شي فيها الفرواله وفيها حتى مشتل ورد...
طوبى بضحكه؛شوقتيني نشوفها..
مطيره:الصراحه الخمس تهبل وكل شي فيها غير..
سليمه:صح..
صفيه:دهورنا فيها عبادي حتى من هواها يرد الروح..
طوبى بإبتسامه:كان نحصلوا كيف نمشولها حتى حني..
مطيره:ع الربيع ان شاء الله..
فردوس:ايه نبوها تغييرة الجو..
سالمين؛حتى الشرق يراجي فيكم عندنا غادي مكانات كان تعديلهن تتمني ماتخليهن..
طوبى بإبتسامه:ربي يسخر ان شاء الله..
سالمين:كان نلقى تمي عندنا وماتردي لطرابلس بكل..
كلهم اتفاجئوا بكلامها واكثرهم طوبى..
سالمين بضحكه:غادي خيرلك من هنا..طرابلس سمحه صح بس الحياة فيها مش حلوة..
صفيه:حتى انتي كيف امي ماتحبش طرابلس وتبي عبادي يخليها ويرد بنغازي..
طوبى غيرت نظرها لسليمه..
وسالمين كانت تشوف لسليمه بنظره عدم الرضا وهي تتفكر في الحديث اللي صار بينهم قبل جيتهم لطرابلس..
🔺️🔺️🔺️قبل يومين🔺️🔺️🔺️
سالمين بحمق:وكنك ياحنه تحقي فيها عازقه روحها عليه!؟
سليمه بضيق:قتلك تفهميني ياسالمين..من حقي نخاف ع ولد خويا هدا ماقعدلنا من خويا الله يرحمه..
سالمين ودموعها في عيونها..
/تريحي طوبى لاحتفكر فيه هو ولاغيره توا همها بنتها بس..
سليمه:وانا نقول هك احسنلها ترتاح وتريح..
سالمين بعصبيه؛الاحسن ليها اكيد مش حيكون ولدكم
سليمه بإستغراب..
/تو انا شت قلت ياسالمين بش تحمقي هك!؟
سالمين؛سلامتك ماقلتي شي..هي خلينا نطلعوا انغميت..
وناضت ومشت طلعت من الدار وسليمه وراها تحاول تهديها..
🔺️🔺️🔺️الوقت الحاضر🔺️🔺️🔺️
مطيره:لاعاد الا طرابلس..هادي الكبيده مافي مكان يعلى عليها..
طوبى:كل حد يحب المكان اللي نولد فيه اكثر من غيره..
صفيه:الا عبادي يحب طرابلس اكثر من غيرها رغم ان لانولد فيها كيف الكفرة ولاعاش فيها سنين كيف بنغازي..
سليمه كان تلقى تقرص بنتها بش تسكتها..
اما طوبى وين سمعت شن قالت حست بشعور غريب..النبرة اللي تكلمت بيها صفيه كانت مختلفه هلبه هي اللي وصلت هالاحساس..بس هالاحساس فيسع اختفي لما سمعت عمتها قالت...
مطيره؛واهو بيتزوج فيها..
سليمه بضحكه:ربي يسخرله ان شاء الله..
سالمين برفعة حاجب:امين وتريحوا عليه..
☘وفي المربوعه..
حسين:الحالة هادي لتوا ماعرفوش سببها..
جبريل بضيق:مرات فاقده هلها..باتها الله يرحمه وحاسه بشي..
بدت ع وجه الحاج علي ملامح الحزن..
عبد الله؛الله يرحمه..الحق كان الله في عونها..
سكتوا بعد الكلام اللي قاله عبد الله وقعدوا يتغدوا بصمت..
بس عبد القيوم تعمق تفكيره في وضع سدره...
وقعد متسائل علاش وين يقروا عليها القرآن تجيها حالة بكاء وتتعب..!؟
جي بين عيونه اليوم اللي قعدت تصرخ فيه فالشارع وهي تجري..وكأنها هاربه من شي..
واستمر تفكيره فيها لعند ماحصل فرصه يستفرد فيها بالحاج علي ويسأله..
☘علي بضيق:الحاله بدت معاها من فترة طويله تقريبا كاني مش غالط..بعد عرس اختها وبنت عمها مشت عاينت وطلعت عندها مشكله صحيه وخدت عليها علاج لكن الحاله هادي ماسيبتهاش.
عبد القيوم:باهي هي شن تحس بالزبط؟
علي:اللي فهمته من عمتها تجيها زي حاله الخوف اول مايمغرب المغرب..ومرات تنوض في نص الليل تلقاها فايقه تتفرج ع التلفزيون...تقول تحس في روحها بتموت ..
عبد القيوم قعد ساكت وهو سرحان بتفكيره..
علي:خير ياولدي في شن فكرت!؟
تنهد وقال:شاك في شي مانقدرش نجزم لين نتأكد..
علي:تبي تقول سحر ولامس!؟
عبد القيوم:غالبا..نتأكد ونقولك..
علي بضيق:تقول من داعي ع لطفي في ذريته..كان مش ولدي ونعرفه زين راني شكيت انه داير ذنب في حياته قاعد يخلص فيه..
عبد القيوم؛كلام زي هذى مايطلعش منك..انت تعرف ربي كويس..اذا احب عبدا ابتلاه..
علي:استغفر الله العظيم..ان شاء الله يكون رفعة منزلة مش عقاب..
عبد القيوم طبطب ع كتف الحاج علي وهو يقول..
/إن شاء الله..
ع خشة حسين بسفرة الشاهي وهو يقول..
/حاج عبدو اقربوا للشاهي..
ناض عبد القيوم وساعد الحاج علي بش ينوض وقدموا لباقي الموجودين في المربوعه..
🍃🍃🍃🍃
وفي حوش تاني كانت العيله فيه ملتمه..
كان العم والخال في نفس الوقت يلعب مع صغار خوته وخواته..
وقراب عليه خواته وخوته ونساوينهم ومرت بوه اللي دير في شاهي العاله يهدرزوا..
🍃فوزيه:ربي خلصها منه مسكينه..
جيداء ببغض:سحيقة تسحق جرته..
مالك نزل بنت اخته من فوق كتافه وقال..
/لكن مفروض تقعد راده بالها واحد زي هدا مااظنش يخليها في حالها..
وترجع تنقز ع ظهره بنت اخته قال بوجع..
/ظهري ياعنشكلك..!
فوزيه بقلق:زعمه ياكبدي!
خو مالك الكبير:زي اللي قتل طليقته لما سمع بيها تزوجت..
فوزيه:وواك ياربي اعوذ بالله منهم ان شاء الله يموت وترتاح منه..
مناسك بخوف:ان شاء الله..
مالك بوجع؛رقبتي يامصايب رقبتي..
ويجي طيح ع وجهه والصغار كلهم فوقه..
وهما يضحكوا عليه..
مالك بصوت مكتوم..
/هدا اللي يوريكم سنونه ياشيا..طين...
🍃🍃🍃🍃🍃
وبعد العصر..سقدوا عيلة الواعر عبد القيوم واهله وطوبى ماخلتهمش يطلعوا فاضيين زي ماهما ولا مرة خشوا فاضيين..هدتهم اصناف من الحلو اللي يديروا فيه وزوز كياس من قهوة جنه..
🍃🍃🍃
بعد ماطلعوا بشويه طلع جبريل بسالمين ووجهتهم كانت حوش قريب جبريل..
لكن في الطريق دار بينهم حديث يخص..
جبريل بغضب:تو هما من قاللهم مازال تفكر في الموضوع هذى!؟
سالمين:هما خايفين من عبد القيوم يفتحه..
جبريل:هبل بش يفتح كيف هذى توا!!؟
سالمين بضيق وحيره؛والله مانعرف ياجبريل..ياريت لو نقدر ناخدها هي وبنتها من هنا..ونزلوا دموعها..وحطت قفا يدها ع فمها..
وراجلها طبطب ع يدها التانيه وهو مضايق...
🍃🍃🍃🍃🍃
"العزومه نهار الاحد بش تجي"
هادي هاديه تكلم في اختها هاتفيا..
"قداش ليا نراجي فيها اكيد جايه"
هاديه:اسمعي نبيك تعاونيني نقنعوا شكري بيها..
"فتحتي معاه الموضوع!؟"
هاديه؛ايه وقالي مش راد عزومتك لكن الموضوع هدا انسيه..
"هو راهو كان لقي وحدة زي خيريه الله يرحمها يقول باهي طول"
هاديه؛وبنت سلفى الله يرحمه زيها بالزبط..غير جمالها ساد..
"لكن حكاية راجلها المفقود.."
قاطعتها وقالت..
/قتلك ليه فوق 8سنين مفقود خلاص شرعا وقانونا معاش ع ذمته وراهو في حكم الميت ع قد مادوروا عليه مالقولاش اثر..
"والله شن بنقولك! الموضوع كله واقف ع خوك توا"
هاديه:اني بناديهم يعاونوني هي وعمتها نخليه يشوفها قبل وبعدين يقرر..
"ان شاء الله خير ياوخيتي"
🍃🍃🍃🍃🍃
ومن فردوس اللي كان حظها في الدنيا قليل..لبنتها آلاء اللي يقولوا انها صاحبة حظ قوي...
خطيبها كان في غرفة الاجتماعات لوحده من الشركات اللي بينه وبينها شغل ف دولة عربيه...
اثناء عرض دراسة الجدوى للمشروع جاته رساله ع هاتفه..
غير نظره لتليفونه..بعدين رفعه وفتح الرساله..
اللي كانت صورة للمحادثه..
(انتي قاعده ف نفس الغلط اللي درتيه معاي)
(انت اللي جبرتني نعاوده)
(مشاعر الناس عندك لعبه حتى هدا ماسلمش من انانيتك)
(ايه اني انانيه واللي يقهرني نقهره)
(بنطلق مرتي)
(بعد طلقها نتفاهموا..)
....ولهني انتهت المحادثه....
#نهوض
#طوبى
....يتبع....