https://t.me/Jouja_channel16
قناتي التلي روايات جوجه
ــــــــــــــــــــــــــــــــــــــــــــــــــــــــ
#ماء_مغلي_بارت_٤٢
كمشته من النص وكلت ..
' بسم الله الرحمن الرحيم
توكلنا على الله '
فتحته بالنص وتلاثتنه رجعنا من مكانه
ساعه الشفنه الي بنصه بعد محد تقرب يمه
ضلينه سكووت وصفنه
-عمي هذا عربيد !
- اي بس هاذ ميت لاتخاف
ريري دنكت عليه وانه جريتهه ..
-لا تكمشين شي عوفي لاتبليني
- لعد نضل صافنين عليه !
جريتهه وراي وضليت اركز بتفاصيله ..
الجذع محفور بالنص باقي بس يم الاطراف ممحفور ..
عربيد اسود متين .. راسه مرفوع على وتد بالنص وحلكه مفتوح .. جسمه ملفوف بشكل دائره وبالنص قطعه جلد جوزيه دائريه مزروف من النص مكان الوتد الي مثبت عليه راس العربيد ...
ضليت اتعوذ من الشيطان واذكر الله
واخذت صوره للجذع كله ودزيته لابو سعد ..
اباوع لسيف يفتر داير مدايره ويريد يطخه
اصيح بي ماخليته يطخ شي ..
وريري تتأفف تريد تشوف شكو جوه الجلده ؟.
وانه انتظر رد من ابو سعد ...
ضليت اخابره وحركت تلفون عليه
يلا جاوب .. جان صوته مبين هسه كاعد من نوم ..
رحت جوه يم باب السطح وحجيت وياه ..
- خويه بروح العزاز شوف الصور الدزيتهن وخابرني بساع
سديته وضليت اصيحلهم لحد يطخ شي منه ويغافلني .. وهذا رجع خابر ..
- هاا خويه شفتهمت منه !
- خويه تدري هذا العربيد شبي !
- شبي !! انه ماطخيته بس جان الجذع مخيط خياط بالبسامير شلعتهن وشفته كبل صورت ودزيت
- زين سويت
ديربالك تكمشه هذا شلون قنبله بس اطخهه تنفجر بيك هيج هذا يبهذل حالك اذا طخيته
هذا انه اكلك شسالفته ..
جواه تلكى بيوض على عددكم كل بيضه بعد بيهه حيه صغيره مافكست
- عليك عليييي
هذا كله حيايه !
- اي بس ميتات
البيضه هيج ياخذوهه مال يومين
يبيتوهه ٣ ايام ختم يسوون عليهه
هذا الختم يصير بأسم كل واحد مطلوب اله العمل
يعني مثلا هسه انتو شجم واحد بالبيت تعبان ؟
- احنه خمسه .. اخوتي اثنين وانه وامي وابويه .. عدا نسوانا والجهال ماعليهم شي
- اي يعني خمس بيضات
كل بيضه يتسلط عليهه خادم جن حسب نوع العمل المطلوب لهذا الشخص
مثل ابوك يختم عليه بالمرض والشلل واكو جماعه خاصين يوكلوهم بهذا وطبعا هذا الختم كلش يتعب ومو ياهو الجان يكعد يسويه
الا واحد متمكن من الخدام ومدعوم بقوه شياطين واحد واصل مرحله مو هذوله اليطكطكون بالورق والطلاسم
- لا اله الا الله
- هسه شعندك انته خمس بيضات يعني خمس اشخاص يعني خمسه من الجان
منو يحفظ ويدوم شغلهم هذا العربيد المحنط
هذا شوف الجماعه تابعين لياشيطان وفاهمين منه شلون يضل عدهم حمايه سحر من التحصين الي تسووه بيتكم
هذا انه حاجيلك عليه اكو شي جبير يضل مسيطر وحافظ كل سحر صغير يطلع منه تابع
لان مرات اكو واحد يسلط عمل يخلي فلان
متعوب بعيشته .. وره فتره يريد مثلا يسكته على فلان شغله او ياخذ منه فلان شغله
يروح يسوي عمل ثاني صغير على كد الي يريده منه وهذاك تلكاه يااما مرشوش او مأكول او هذني الي طلعن بايدكم شجم مره
يعني يضل هذاك شغال للبعيد دائمآ وهذا لحاجه ضروريه صارت بالجديد
يروح يزود عليه
بس هذا كله ما بيه موت
- عيشه المر هاي شضل للموت !!!
هسه انه شسوي ؟ احركهن !
- لاااا لا حرك ولا شي تسوي
ولا تمد ايدك عليه
اسمع خويه انه اعرفك سيد ودخيل اجدادك
احنه بس انته ماتكدر لهيج شغلات
هاي بيهه سحب جن ومحاوره لازم تصير
بينهم لان هذا العربيد مااكدر اكلك بالضبط شنو محشى بس هذا تابع للساحر الجبير
هذاااك وينه من ترتيبه وكعدته يكلك انه حماي ... يعني لاتصل تتأذى
شغل صعب هذا دمج من كل شي
مشتغليه على ارواح لان هاي البيضه بداخلهه روح حتى لو حيوان صغير هالكده بس هو روح .. وهاي بعدهن لحمات صغار كبل تجنسن نظير الكم .. انحبس فلان خادم على هاي الروح
تجي انته تكمش شي منهن تحركه كبل يعكس على صاحبه .. وين يرضى الجن تجي انته تحركه وتأذيه ! اول مايتاذى انته والي مسجل على اسمه العمل بوحده منهن وكلهه تهيج عليك
لا تسويلك كارثه هاي مو شغلتك
روح اخذه لواحد يفتهم من صدك
ويكدر يحاجيلك الجماعه الي بي وهو يتكفل يسحب هذا العمل من هذا الشخص
- دخيلك ربي
وين الكاه هاذ !!!
انه عندي اهلي يعرفون هيج شغلات بس همه المنضرين منها
يكدرون يعني ؟ لو اشوف غيرهم لازم !
- شوف غيره هذا مايطيعه لان هو مسلط عليه يجي نفسه يأمره ! ماترهم
- چا شلون !
وين اروح ! المن اخذه !
- انه جان ساعدتك بس انته ماترضى اخلي ايدي بشي وياك
- خويه هو انه مطيوح حظي ماريد اضرب سحر بسحر واروح بيهه رحمه لاهلك افهمني لا تاخذ بخاطرك مني
- خويه هي مو شغله سحر
بس شغله فهم
واحد يفتهم ويامن جاي يتعامل
انه افهم هذا وين مكضبه ولهالسبب اكلك اساعدك لان انه اشوف غير الي تشوفه
افهم هذا شلون صار وياهو اسلط عليه ويكدرله
- يعني مابيهه حرام عليك بروح الحسين
- والله عاد انه مادري حرام لو لا
انه عندي خادم مسخره وياي من زمان
هذا بكل شي يفيد
تريد اشتغلك بي تعال هسه ماتريد روح دورلك واحد فهيم ومو بس حجي لسان
ها وخلي بالك شغله
اكو جماعه صح يكلك مسخر خادم وعندي امكانيه بس هو ضعيف
لان التسخير بي درجات فلان اقوى من فلان يكدر يسيطر عليه
وبعد انته وحظك شوف الي تلكاه شعنده ماعنده
انه عليه احجيلك واوضحلك الطريق وانته كيفك بعد.
- مشكور بعد اخوك
اشور اهلي وارجعلك خبر
سديت الخط وصعدت للسطح ..
واشوف ريري وسيف اثنينهم واكعين بالكاع على وجههم ممطولين
ركضت على ريري اكعدهه واهز بيهه
ضربتهه بوجهه ماتكعد ...
رحت على سيف اضرب وجهه اريد منه يكعد ماكو مالهم حس ولا نفس ..
باوعت للجذع الراس من الوتد نازل
وملفوف على باقي الجسم وضال بس الحلك مفتوح ..
رجف جسمي وحرت شلون بيه !!
شسوي !!!
خابرت الحجي وكلتله يجي علينه بساع
وحجيتله الصار ..
كالي عوف كلشي على حطته واخذهم نزلهم جوه ...
وكفت بينهم ياهو الي اشيله بالاول !!
لكيت نفسي اركض لريري ..
شلتهه على جتفي ونزلت بيهه الدرج وانه اصيح ... ياعلي .. ياااعلي ...
خليتهه بالغرفه وركضت صعدت لسيف
هم نزلته وخليته يمهه بالغرفه ..
وقفلت باب السطح ونزلت ركض جوه لابويه ..
كعدت يم رجله ريكي يابس واريد احجي مابيه ..
فتحت تلفون وشوفته الصور وضليت امتمت حجي واكله ..- سيف وريري تخربطو مادري شجاهم
اجيت لكيتهم لاحس ولا نفس
بويه راح يرحون منا بويه
- ولك بويه امشي نزلهم النه
حاطهم فوك المن ! ياهو البي حيل ويصعدلهم
حفزت كبل ركضت وفضه وياي اخذت سيف نزلته خليته بالهول وكعدت بعد اجر نفس
كل جسمي يرجف ونفسي انكطع من الدرج
شويه وصعدت لريري نزلتهه وضليت كاعد ومخلي راسهه بحضني ... اغسللهه وجهه واصحي بيهه وهي بس فاكه حلكهه وماحست عليه بشي ..
امي انشدهت بسيف وانه طلعت شغلت السيارة اجيت اريد اخذهم للمستشفى وابويه عارضني ..
كال مو شغلة دكتور عوفهم ..
انشدهت هنا بعد كلشي ماعرف اسوي
ضليت بس اصيح على الرايح والجاي كدامي
اهلي ضلو يغسللوهم ويقرون قران عليهم
وانه واكف بالباب انتظر فضه والجهال
يجون للسياره ..
اخذتهم لبيت السيد عفتهم هناك بعد كعدتهم هم خطره بينا ..
رجعتلهم ورحت توضيت وفرشت سجادتي كبل سجدت لرب العالمين
ضليت اقرا سوره الملك ودعيت ربي
هو القادر على كل شيء وهو القوي
والمسيطر على كل خلقه
وكلت امري لله ماعندي غيره التجىء اله
تضرعتله بمحمد وآل بيته وبجيت وانه ادعي
واكله ..
وحيد ومستضعف وانته نصيري
مارفعت راسي الا وانه مهدود حيلي تعبان
وخشمي مسدود ...
كعدت اصلي على محمد وال محمد
وامسح بوجهي
كمت غسلت وكعدت يم ابويه هم لكيته رافع ايده بسبحته ويبجي ..
اندكت الباب وطلعت شفت حسنين جاي
- ها خويه شصاير
ولك المره هبطتني عليكم
شصار !! سيف شبي شجاه !!
- خويه دخيلك جدك تعبان حيل للحجي مابيه
بعدين نكعد واسولفلك
- زين خلي اطب اشوف الاهل اعاونكم بشي
- المره هنا بعد اخوك غير وكت شوفهم
- زين حطلهه عباه حجاب شي
هسه انه بحالهه
- خوووويه تعبان والمره مو مال اجرجر بيهه من رخصتك
دار وجهه وراح .. وانه رجعتلهم
اباوع لامي حاضنه راس سيف وتقرا عليه
وريري بالكاع ضاله وحدهه ..
كعدت يمهه وخليت راسهه بحضني
وضليت امسح على وجهه واصلي على محمد هذا كل الي كدرت احجيه
الهبطه اخذت من حيلي حيل
ضليت مرتاج على التخم وايدي على راسهه
وصار الغروب اندكت الباب ...
كمت بيه مابيه وفتحت للحجي ..
هو طب وحفيده جاي يقفل السياره
شفت عادل جاي يهرول وكبل كمشني من جتفي وضل يصيح ويكلي شبي سيف !!
ماحجيت شي بس كلتله جوه روحله ..
امي جانت مغطيه ريري وابويه مخلي غترته على راسهه ...
الولد من شافهه هيج كبل طلع وضل كاعد بالحديقه ..
كعدت حجيت للحجي كلشي من جديد فهمته
بيني وبينه .. حجيتله على حجي ابو سعد
وكلتله شلون صعدت ولكيتهم هيج وانه عفتهم مابيهم شي ...
كالي خليهه بينا لا تسولف لاخوتك ..
وضلينه مكابليهم وكاعدين اريد اخذهم دكتور مايخلوني .. وساعه نتصايح ساعه نسكت
الحجي حط بحلكهم خاشوكه شكر وضل كاعد
يصلي وراهه كال اطلعو وعوفوهم الي
ولا واحد يضل يمهم ..
اخذت ابويه وطلعت بره على الهوا
وامي وعادل هم طلعو ..
وضل الحجي ويه سيف وريري ..
ساعه وساعتين وهو مقفل البوب ومطفي الاضويه وكاعد وياهم
انه مشدوه بالي بيهم ومادريت شوكت الولد رايح جايب العشه وراجع ..
وكعد يصبرنا واكل هو وعادل وابويه وانه امي كلاص ماي ماخلينه بحلكنه ..
ضليت اتاني لحد ما فتح الحجي الباب
ورحتله ركض ..
كمشت ايده حاره نار ..
- بشرني حجي ما صحو !
- يصحون يصحون بأذن الله
دفعني وراح وهو يتوجى بعوجيته
راح غسل وضل كاعد ويه ابويه
طبيت وشغلت الاضويه وضليت اهز بسيف
واحاجيه نفس الحال ماتغير بي شي
وريري هم ..
طلعت على اهلي واصيحلهم ..
-شلووون هسه نضل نتصفن عليهم
بويه خلي اخذهم دكتور اخاف صابهم مرض شي وعلي ماضل بيه صبر
صاح بيه الحجي ..
- ليش بويه دكتورك يفهم اكثر منا !
روح جوه روح
كابلهم و الصبح ينور كل ظلمتهم بأذن الله
اجتي امي ضلت تصبر بيه وطبينه كابلناهم
وكعدنا ...
شويه والبقيه طبو كعدو وانه شلت ريري
اخذتهه بغرفه ابويه نومتهه ونمت بسدهه
من التعب غفيت يمهه وماحسيت بعد الا
على امي تغطينا فزيت من حسيت عليهه
وضلت تسمي علينه وراحت ..
باوعت لريري وادعي ..
يارب يا مجيب يارب ..
خليت ايدهه بايدي وجبتهه على ركبتي ضليت حاضنهه ورجعت غفيت ...
سمعت صوتهه تكلي ..
- حيداار يابو الحيادر متكعد ولك
مفتح بس ممركز زين بس اسمعهه
رفعت راسي وضليت اباوعلهه شفتهه كاعده
كبل حفزت وكعدت كمشت وجهه ..
-حبيبيي زينه ! مابيج شي !!
- اي زينه شبيه ! شو هنا نايمين خير !
اكو اكشن مادري بي ؟؟
- يااارب رحمتك
الف حمدلله الف حمدلله
ربي لطف بحالنه الف حمدلله
بوستهه وهي كمشت وجهي وتكلي..
- شبيك !!
- شبيج انتي !! من ظهر البارحه انه
مشدوه بيج
شلون صرتي هسه زينه كلشي مايوجعج
شفتي شي بمنامج !! حسيتي بشي. !
- شبيك بابه لتخبلني
كلشي مابيه تمرضني كوه يعني !
- اي حمدلله مابيج شي بس كليلي شصار من عفتكم شوكعكم هيج !! حتسودن وعلي شجاكم !
- تره مادري شدتحجي اوووكيي- شني ماتدرين ! من الظهر بالسطح انه وياج وسيف ونزلت اخابر ماتذكرين
- لاا اذكر ادري بس يا وكعه هاي مادري شدتحجي
- اخر شي بالج شني !
- جنت اباوعلك وانته جوه يم الدرج دتخابر
وسيف ديكولي هذا محنط العربيد يمكن
ورجعت عليه داباوع وياه
وبس هيج بعد ماذكر شي
- يلا بويه ميخالف شيلي السالفه من بالج
حمدلله على كل حال
- خفت عليه ولك حويدر
- ياابويه انشدهت وعلي طولي رجف من الخوف عليج وعلى سيف
احير بيمن اشيل واداري
بس ضليت وياج .. انتي اذا مو بايدي مداراتج مارتاح
-ههههه فديييتك اااانييي
لك مخنوكه من العرك مدري جنت بساونا ومادري !
كوم خلي اروح اسبح لعبت نفسي مني
- يلا امشي اروح وياج نسبح سوه ونصلي
الفجر يمكن فاتتنا الصلاه
انه كمت وهي نزلت رجليهه من الفراش
كمشت ايدهه وكفت خطوه وحده ووكعت
من طولهه ..
ضليت مشنج ايدي الهه وهي كامشتني
تريد توكف متكدر ..
اوكفهه وتكلي ..
- رجلي حيداار رجلي ماتعيني
عوفني خلي اكعد
كعدتهه وضليت حاضن راسهه ..
- ميخالف حبيبي بعدج تعبانه ومماكله شي من البارحه مابيج حيل تمشين
عوفي السبح هسه خلي اجيبلج شي تاكليه
ويرجعلج حيلج واخذج اسبحج
- اووكي اووكي
عفتهه تمددت ورحت ادور امي
كلتلهه ريري كعدت بس تعبانة
اكعدي يمهه .. وشفت سيف بعده نايم
رحت للمطبخ سويت ريوك وجبتلهه
تاكل .. وكاعد يمهه الم بشعرهه لوره اذنهه
وهي سوت لفه وخلتها بحلكي ..
اكلنه سوه وشربنا الجاي من نفس الكلاص
وكلتلي اريد اكوم اغسل ..
جنت خايف لا ترجع نفس الشي وردت منهه ماتكوم ردتهه تضل ترتاح بس هي ماترد عليه وكامت وايدهه بايدي
بس ماعدها حيل توكف كبل تخر رجلهه وتوكع واضل ساندهه ..
ضلت تصيح ..
- ليششش هيج ليشش
حيداااار مابيه شي متعبانه زيننه واكلت ومدايخه وشبعانه نوم كلش مابيه ليش هيج مداكدر امششي
احجييي فهمنننني احجييي شي
ماكدرت احجي شي بس حضنتهه واباوع لامي مخليه ايدهه على حلكهه وتبجي
ضلت ريري تصيح عليه وتضرب بصدري
وانه ساكت كلشي مااردلهه ..
رجعت كعدتهه ع الجربايه وهي دفعتني
- لتسويني هيج عاااجزه داكولك مابيه شي مااابيه شي
مو مريضه مدتفهم !!! ماااابيه شييي
متعبانه
رجلي خيوط احسهه خيوووط ليش هيج
لتخبلني بسكوووتك احجي فهمننني احجي شي
- مادري الله يخليج بس انطيني صبر
حبيبي كلشي يصير زين بس ارتاحي
- مااارتاااح اني مرتاحه مرتاااحه
داكولك مرتاحه مابيه شي
رحت ركض للحجي كاعد بره ..
حجيتله حال ريري وضل يهز براسه
وكالي اكعد ..
كعدت يمه وصار يكلي ..
- ابتلاء ربنا انواع والصبر حل لكل بلاء
- يعني شني ! ماتمشي بعد !
مرتي اسكطت خلاص !
- بأذن الله يرجعلهه حيلهه بس
اصبرو انه مابيدي شي هو كله بيد ربك
هذا لا سحر وينفك ولا مرض ويتعالج
ضربه جن هاي مو سهله على رمشه عين تختفي
- حجي كول غيرهه
حجي هاي تتسودن وعلي مرتي واعرفهه يكتلهه قهرهه كبل مرضهه
- لاا بأذن الله تكون من الصابرين
واحنه مانخليهه وحيدهه كلنه وياهه عوون وسند
- استغفر الله استغفر الله
حجي هاي مرتي بعد تضل هالحطه حطتها !!!
انه وين اكدر اصبر على حالها !
اذا هي صبرت انه ماصبر
انه جبتلهه الاذيه بنفسي انه ماحميتهه
- لا تلوم نفسك بويه هذا قدر وصار
انه متعجب بشي
واكول هو لطف وحكمه ربك
انته الي فكيت هذا العمل بايدك وانته اول واحد فتحه و وصله وماصابك شي وهمه البعاد انصابو
- انه ماكمشته نزلت اخابر
ماردت سيف يسمع حجينا
بس جنت اصيحلهم لا يطخون شي ولا يوصلون يمه
هي تكلي احنه بس وكفنا نباوعله من قريب
وبعد ماتدري بشي
- الله يرحم بالحال
بس جنها يابويه حجايه صاحبك صحيحة
هاذ مو شغله خادم صغيرون وينصاع لبني ادم
جنها يابويه سالفه اكبر من علمنا
- حجي رحمه لاهلك لا تحجيهه
انه متأمل بيك
ضال أنتظر همتك عليه
جا انه منيلي احد يفهم بيهن غيرك !!
- اسمع بويه
انه البارحه عزمت عليهم اثنينهم جانو
مربطين بخادم .. منين وصلهم وشلون هاي ماعرفها
بس انه كعد يمي هاذ وهاذ
لا اذيتهم ولا اذوني
طلبتهم يخلون وليداتنا لا يكربوهم
وتأملت خير
كلت الله قادر على كل شيء واحنه الي بيدنا سويناه
تأملت وانه نفسي ثكلت اعرف من نفسي تثكل
هنا وجع هاذ انشال بجتوفي
كلت خير الهم ان شاء الله
بس هاي تضل بيهم اثار مس اثار ضربه
جا هذا مو هين بويه
انته زين مرتك تكعد وتحجي وتاكل وحالهه زين
خاف على هالوليد لساعه ماكاعد وان كعد الله العالم بحاله
كول يالله.. رب الصحاهم يعافيهم
- والنعم بالله
غير هالكلمتين ماكدرت احجي بعد صدري انقبض ..
رحت اريد اطب عليهه اشوفهه ماكدرت
مواجهته صعبت عليه ..
ضليت كاعد يم حايط الباب واعض باصبعي
ودموعي غصب عليه تنزل ..
كسرت حالهه .. من وكعه لوكعه خليتهه
لا تهنت وياي ولا تعافت ...طلعت امي وشافتني هيج ضلت عيني بعينهه
فهمت عليه ..
كلتلي بس ..
- يايمه المره حرام الجرالهه من طيشك
چا تاخذهه بنص كل عمل نجس ومسكون تخليهه تناطر عليه !
الله الاكببببر عليك
دنكت راسي بين رجليه وضليت اناجي
- ربي دخيلك لا تكسر ظهري بيهه
لا ترجعني ضعيف حال وانه تقويت بيهه
سمعت امي علت صوتهه بالصلاة على محمد
بالهول .. حفزت بساع رحت واشوف سيف كاعد ويفرك بوجهه ..
كبل رحت جريت ايده كومته كلتله امشي
ومشى مابيه شي .. شويه وراد ياخذ كلاص الماي من ايد امي وكمشه بيمنته كبل وكع من ايده ..
ركضت عليه وكمشت ايده..
-شبيهه تحسهه شبيهه !
- ثكيله من اشيلهه
خاف نايم عليهه !!
عفته ورحت جوه اضرب براسي وامشي مادري وين اروح !!! مادري شسوي !!
المن اشكي !! وين اعالجهم !!!
اختنكت ومالكيت راحه الي غير اروح يمهه ..
طبيت عليهه وهي دايره ظهرهه ومتغطيه كلهه ..
كعدت يم رجلهه وخليت راسي عليهه ..
- ضاكت بيه الدنيا
ولج تعبج كسر ظهري
خلت ايدهه على وجهي وضلت تمسح بدموعي .. جرت ايدي وكعدت اباوعلهه
وهي عدلت نومتهه وفتحت الغطى
نمت يمهه على ايدهه وهي غطت روسنه
وضلت تبوس وجهي ..
حضنتهه بكل قوتي وشهكت وهي تكلي ..
- حبيبي عنده غتره خضره عالجني بيهه
مره هسه هم يكدر يعالجني بعد بيهه
- ماعندي حيل ريرري وعلي تعبت
وعلي انه انهاريت بعد ماكدر اضل واكف وحدي الكم
- اني شوكت عفتك حتى صرت وحدك !
ولك مو ويه روحك بعدني مامتت حتى اعوفك
- اسف حبيبي انتي اسف والله كِله مني
كله من اهمالي انه شجاني وعفتكم
وعلي ماضل فكر بيه بعد الشافته عيني
- ديلا هسه صارت بعد
عادي هي الدنيا كلهه ضربتني ضلت على عمو الجني !
عادي عومري انته .. لتخاف اني مايكسرني شي راح اعتبرهه اجازه الي وادلل عليك
وبعدين يجي يوم وارجعلك توب التووب
وهم ادلل عليك
لعد هاا اني احب الدلال لاعبالك تخلص مني
- كل الي تريدي يصيرلج بس رجعيلي زينه
رور انه بلياج اضعف خلق الله
- ماعوفك ولك وياك وياك
اريد اشوف رجال اليضعف ويكول تعبت
حبيبي هاي حرب ومادام بينه روح ودم
نضل نحارب
ما يوكفنا بس الموت وبعدنا ما متنا
دربنا طويل
- كلشي خلي يجرى فوك راسي الا انتي لا يصيبج شي ولج انه احارب بيج
انتي كل قوتي وسلاحي وعلي بلياج خطوه ماعرف اخطيها
- هسه داكولك وياك عومري وياك
- احضنيني لتعوفيني
محتاجج بس انتي احتاجج زينه واحتاجج وياي
- حيداار راح يتغير كل شي
والحرب النه مكسبها
اني مايغلبني شي
بس من اشوفك مهدود حيلك هيج انقهر
وتنمرد روحي
لا تحسسني ضعيفه صرت وتكعد تبجي عليه
صير اقوى مني علمودي اني هم احتاجك
من اشوفك يمي كلبي يرتاح واطمئن راح يجيني يوم وارجع زينه لان انته وياي
اضل اصبر واحاول بس علمودك
خلت ايدهه على لحيتي ورفعت وجهي بوجهه
باستني بشفتي وضلت حاضنتني
بقيت بحضنها أرتاح وره وين اجتي امي صاحتني ..
طلعتلهه وكلتلي الحجي يريدك ...
رحتله وهو راد يشوف الجذع
رحت صعدت للسطح وانه بكل خطوه احصن نفسي بذكر الله ...
فتحت باب السطح وصعدت شفته نفس مكانه
بس راجع الجذع مطبوك ...
كلت ..' جدي ياعلي المدد '
ورحت شلته ونزلت بي وانه انتخي بجدي علي ...
خليته بالكاع كدام الحجي وهو فتحه
ضل يتعوذ من الشيطان ورجع سده
وكالي..
- اخذه بويه لصاحبك اخذه
- حجي ماكدر اخذه اله
مادريت بمنام الشافه ابويه
حذرني ماستعين بغيركم
- بويه اااانه رجال جبير حيلي على كدي
هذا رادله حيل
انه اي شي اسحبه يضل على متوني يثكل عليه حتى النفس
هذا كله شر وثكله لو شالته متوني ماتحمله
توكعني بالفراش وانه شايب يابويه
ماحمل تعب والناس تحير بيه
اخذه اله واستحلفه بالله لا يضرنا بعمل حرام
ويكسر ظهورنا
كِله يخلصنه من شره وعساها بميزان حسناته تصير
هو يابويه هم صاحب معرفه
هذول اهل خبره يعرفون يفكون ومايتأذون
احنه عافيتنا وحيلنا على كدنا
وربك يعلم بالحال ماعلينه من حرج بأذن الله
ضليت صافن عليه وتالي رحت لريري
حجيتلهه شكال الحجي وهي كلتلي ..
- روح حيداار خلي نخلص
هي بعد صارت شغله ضروريه وادفع عليها كفاره عود وريح ضميرك
رحت شاورت ابويه بالموضوع وهو اعترض ... كال عوفه ربك اعلم بي
الحجي ادخل وضلو يتناقشون عليه
وتالي صفت اخذه وخلي الشر يضرب الشر
خليته بالسياره وطلعت .. خابرت ابو سعد
وكلتله جايك ...
وصلت منطقتهم عبرت اول تقاطع بالثاني انضربت السياره..
نزلت وساعه مصايح ومعارك انه والولد
السياره الدعاميه كلهه انطعجيت واللايتات تكسرت ...
ردت بس امشي مو بحال سياره انه روحي طالعه ... عفته كلشي ماخذت منه بس ردته يفك عني ساعه يذب صوج بيه ساعه يتعذر
رجعت حركت السياره ومشيت لشارعهم
نزلت وادك بالباب حيل ..
فتحلي ابوه وضل هم يسال هاي شلون وشصار وانه اريد بس اطب واعوف الحجي
شلت الجذع وطببته وياي ..
كبل سلمت على ابو سعد وخليته يمه بالكاع
فتحه وشافه ضحك ..
- روح خويه رووح والهوا بظهرك
- هاا خويه تكدرله ! خلصنا ان شاء الله !!
- خلصت خلصت
بس نصيحه مني
وهاي انه عايفك ورايح عمري مو طويل
اسمع مني هالنصحيه خويه وبعد ماتعتاز لبشر
- كول خويه !
- صاحب الجذع طلع جنازته من بيته
لو ياهو الجان صاحبه لو جان ابوك عمك خالك اخوك ياااهو الجان عرفته هو المسويه
اكتله والك الاجر
ولا تكول ليش وشلون وماكدر وحرام
هااااي نصيحه .. اذا ماتسمعهه مني وتمشي بيها بعد تضل كل عمرك معثر
صاحب الجذع كتله حلال
اللهم اني بلغت اللهم فاشهد
.
.
يتبع