رجعنا للبيت اني وبراء ..
اني كلش خايفة كلام الطبيبة خوفني ..
اكيد حالتي خطرة اني والطفل لان اني كملت شهري من فترة ...
وطول فترة الحمل مامرتاحة ابد ...
من سمعت بالعملية مااعرف شصار بية ..
فكرت ولو لحظة ممكن اموت ومااطلع منها ..
منو يربي الطفل من بعدي .! اكيد راح يعذبو ... اكيد راح يضربوا ويكرهوا مثل ماسووا بية ...
ضليت الافكار تاخذني وترجعني ...
هذا الشي طبيعي كل حامل تفكر بهاي الطريقة من يقترب موعد ولادتها
اول ما دخلنا للبيت
براء كالت لامها حتى تاخذني للمستشفى بسرعة ...
__ يبووو شيوديني للمستشفى
__ ماما الدكتورة تكول وضعها خطر والطفل باي لحظة يموت
__ يمعودة بيه حيل مستشفى وعمليات نوب ... روحي انتي وياها
__ اني مااكدر داتشوفين بس اليوم استراحة باجر عندي دوام
__ ساعة السودة على رحمة وطفلها .. شسوت بينا ....(( راحت تغير ملابسها وهي تحجي ماسكتت.. مجبورة تروح وياية ... طلعت برة بدون ماتكول امشي نروح ... اني انتبهت وطلعت وراها ...اخذتني للمستشفى ... طول الطريق تتأفأف وتحجي ابد ماسكتت ...وصلنا للمستشفى .. نطيتهم تحويل الدكتورة بسرعة دخلوني لغرفة الدكتورة ... فحصتني فحص يدوي وبالسونار ...
الدكتورة تحجي كوردي مافهمت عليها ..
بس من فحصتني بالسونار تقربت على الشاشة واستغربت ... طلعت من الغرفة بسرعة ...
نزلت من السدية ... طلعت برة شفتها تحجي ويا ام وسيم ...
اخذوني لغرفة ثانية ...
اجروا فحوصات .. تخطيط قلب ... فحص دم ...
اجتي ممرضة نطتني طقم العمليات ...
كالتلي لبسي بسرعة لازم تدخلين للعملية ..
بهاي اللحظة الخوف مسيطر علية ..
لبست الثوب .صعدت على السدية ودفعوني لغرفة العمليات ...
باوعت على الاجهزة واني ميتة خوف
شفت المقص والشاش ...
كلشي بيها مرعب ..
اكو بنات بالغرفة ماعرف شنو يرتبون ويحضرون ...
دخل طبيب التخدير يضحك ... حتى يخفف ويزيل من قلقي ...
___ يا مرحبا شلونج ..
___ دكتور اني حيل خايفة
___ ليش تخافين تعرفين كم وحدة قبلج ولدت اليوم ..
___ حالتي خطرة
__ وصلتني الاصعب منج ... يلة شنو اسمج ماعرفتة
__ اسمي رحمة
__ عاشت الاسامي رحمة ماكلة شاربة شي
__ اني ما جنت اعرف عندي عملية اكلت شوية وشاربة مي ..
__ تمام مو مشكلة .... يلة رحومه هسه راح اضربج أبرة بظهرج ممنوع تتحركين الى ان اكملها ماشي ...
___ ليش هاي خطرة مو
__ههههههه لا تخافين ماكو شي بس اذا تتحركين تنكسر بظهرج وتصير خطرة يلة ...(( ضربني الابرة بظهري ...حسيت شلون دفعها ودخلت المادة لجسمي ..رجع نومني على ظهري ... كل شوية يضرب رجلي ويسألني ..
__ تحسين بيها لو لا
__ اي أحس بيها ...
(( كرر السؤال كل شوية اني اخاف حتى لو مااحس بشي بس مااريد يولدوني الا اخدر ويمشي مفعول المخدر اكثر
.... بعدها دخلت الدكتورة ووياها ممرضات اثنين .... بلشوا يولدوني ...حسيت بيهم شلون يضغطون على معدتي ...حسيت شلون يحاولون يسحبون الطفل ..
ميتة من الخوف ... اباوع لوجوهم شنو ديصير ؟؟ يمكن راح اموت ... او يمكن يكولون الطفل مات ....
عدت على خير ...
واخيراً اجتي اللحظة شفتهم رفعوا ابني كله دم ويبجي ...
من التعب غمضت عيني مااكدر افتحها بعد ...
حسيت عليهم ينقلوني لغرفة ثانية ...
ردهة نسائية كل وحدة تولد ينقلوها بيها ...
اول ما دخلوني شفت ام وسيم كاعدة والطفل بحضنها ...
كالبة وجهة مثل كل مرة ...
من شافتني ماكالت الحمدلله على سلامتج ...
اني جنت اريد تجيب الطفل الي . اريد اشوفة ..
اباوع عليها ... تباوع لوجهة وتحجي ويا الممرضة
(( يمة والله الطفل راح يموت ...شوفي وجهة شلون ازرك ...اكيد شارب مي الراس ... ضروري اخذة لمستشفى ثانية يهتمون بي ماابقي هنا ...
اني مابيه حيل احجي ... ولا اكدر اكوم واشوف ابني .. جنت بحالة يرثى لها فعلاً ...اصرخ من وجع عمليتي ...
تركتني وحدي بالمستشفى وطلعت ..
ورا شوية اجتي الممرضة وكالت لازم تمشين
المشكلة ماكو وحدة وياية تساعدني ..
اكو نسوان بالردهة شافني شلون اريد اكوم وحدي ومااكدر ... اجتي مره منهن علية ..
___خيرج يمة منو جاي وياج
__محد وياية
__ ليش اهلج عيالج وين ! ابنج وين !
__ عمتي ام زوجي جانت هنا اخذت الطفل وراحت ... واهل ماعندي ...
__ اكو احد ماعندة اهل ...امج وين ؟
__امي وابوية ميتين ماعندي اهل وحدي هنا .. (( ضليت ابجي ...والنسوان بالردهة تعاطفن وياية ....ساعدني اكوم حتى اتحرك شوية ... اني جنت ابجي مااعرف على منو بالضبط ! على وجعي ! لو على حالي وحدي غريبة ومحد بحالي واشوف الكل اهلهم وياهم ...
مشيت شوية ...
والمرة لازمتني .. سالتني ...
__ فستانج من ورا بي دم .. امشي اغيره الج بالحمام ...
__ ماجايبة ملابس وياية
__ شلون ملابس حفاظات ؟ ماجايبتهن وياج
__ محد جابهن الي ... عمتي جابت بس جنطة ملابس لأبني واخذتها وياها وراحت ..
__ الله اكبر احنة وين عايشين شنو هالبشرية هايه ..اكول ليش ضعيفة وخلصانة الله يساعدج يمة ... امشي هسه ارجعج للغرفة هسه اخابر ابني يدبرلج ملابس ويجي...
__ خالة لا تكلفين نفسج
__ لعد تبقين هيج شوفي الدماية تارسة ملابسج ترس ... (( رجعتني للغرفة اتصلت على ابنها وبالفعل ورا ربع ساعة وصلتها جنطة كبيرة ملابس داخلية وحفاظات نسائية وبجامة ثخينه ... الجو كان بداية موسم الشتاء وكالت انتي نفسة لازم ادفين نفسج ..
الحمدلله ماانقطع سبيل المعروف وياية
كل مرة ابقى وحدي
ربي يسخر الي ناس يساعدوني ويوكفون وياية
بهاي ايامي الصعبة 3 ايام اني بالمستشفى ...كل وجبة تطلع وتجي غيرها يقيمون بية النسوان ويتعاطفون وياية ...
المفروض يوم واحد واطلع بس محد اجة علية ..
وماعندي فلوس ارجع بيها ...
بقيت بالمستشفى ..
باليوم الرابع .... اجه نبيل اخو وسيم وزوجته حتى ياخذوني ...
دخلت زوجتة شيماء وهي عصبية بدون ما تتحمد على سلامتي ؟!
__ يلة كومي ترجعين للبيت
__ايي بس شعجب اجيتوا تاخذوني
__ موزين اخذناج تره ناسيج والله ...
__ وأبني ماذكركم بية !
__ اليوم تذكرناج وبعدين شكو عليج مو هياتج ماشاءالله ولا كأن مسوية عملية !
((طلعت تمشي للسيارة واني امشي وراها ... مايعجبها تمشي وياية ...
وصلت للسيارة متأخرة لان عمليتي مااكدر امشي سريع ...!
نبيل ..... تره مو وكت تدللين يلة اصعدي بسرعة
رحمة .... ماجنت ادلل بس العملية تأذيني ...
(( صعدت للسيارة .... كلش ضايجين من عندي .. محد يحجي وياية ولا يباوع علية ...وصلت للبيت ..اول ما دخلت محد تقربلي ... اني جنت متلهفة لشوفة ابني ...
دخلت للغرفة ... اجتي نسرين شايلة أبني ...حطتة بحضني ....شميتة وضميتة لكلبي .. بهاي اللحظة نسيت كل وجعي وهمومي بهاي الدنيا . .. حسيت نفسي أسعد أنسانة وشيصير مو مهم.... تلمست وجهة مامصدكة ...
هذا عوضي بعد صبري ..
هذا الكائن صمد وحارب حتى يعيش رغم فترة حملي كانت اصعب فترة بحياتي ....
الى الان استغرب كيف بعد كل هذا الضرب والشغل ماصار شي على الطفل ! وعلى العكس كان ثابت ومتمسك بية اتممت شهري وايام اضافية وما انفصل عني الا بعملية قيصرية !
تلمست أصابعة ناعمة صغيرة رقيقة ...قبلت أيدة واني مبتسمة ...
مسحت على كصتة وراسة وباوعت بوجهة وكلتلة
(( حبيبي أبني أودعدك اني وياك راح نسند بعض ونعيش لحظات حلوة ... اكبر ياروح الماما منتظرة ايام حلوة اعيشها وياك ....))
بهاي اللحظات الهادئة ...
فعلاً فصلت على العالم كلة ..
انسجمت ويا طفلي
حسيت الباب اندفعت حيل ...
رفعت راسي شفت ام وسيم أشبة بعزرائيل واكفة كدامي ...
___ رضعي للطفل ترة جوعان ...
__ اي راح ارضعة ..
(( نقلوني لمكان ثاني ... غرفة فارغة او ما تسمى مخزن البيت ....يوضعون بيها الزيت والتمن والتايت والصابون والطحين والشكر .. اي مواد غذائية واي شي يحتاجو بالاستعمال اليومي ...
دخلت للغرفة حاطين الي جرباية ويمها كاروك أبني وسلة بيها ملابس أبني ....
مااهتميت للمكان وبشاعتة ما ممكن شخص منهم ينام ليلة هنا .... كانت الفرحة بأبني (( ريان )) وطبعاً هذا الاسم من اختيار ام وسيم .....
10 أيام بعد عمليتي عدت واني بهاي الغرفة
مرتاحة لان الكل بعيدة عني ومااشوف اي شخص منهم ..
اني اروح للمطبخ بوقت الطعام اخذ صحن احط بي اكل وارجع للغرفة ...
من احتاح اروح التواليت اروح وحدي صح معاناة وصعبة لان عمليتي ما زالت توجعني بس كدرت اعدي هاي الايام وكل دقيقة بيها كنت سعيدة جداً مع ريان ....
بعد ما كملت 10 لعمليتي ...
اجتي نسرين علية للغرفة
___ رحمة اليوم ياخذوج تشلين الخيط مال العملية
__ صدك شلون ... والله اخاف
__ لتخافين ميأذي سهل ... حضري روحج حتى تروحين انتي وأمي ...
(( غيرت ملابسي ... وطلعت للأستقبال ..شفت ام وسيم على اعصابها ماخذتني للطبيبة ....
اخذتني للمستشفى
دخلت للطبيبة رفعت خيط العملية ...
شافت عمليتي استغربت ليش بعدها تطلع منها دم وجراحة ....كتبتلي مرهم وأبر تنشف هذا الالتهاب ... الدكتورة انصدمت من عرفت مااخذت علاج بعد عمليتي ...
__مايصير حبيبتي لازم تلتزمين بعلاجج ... اهتمي بنفسج هاي الفترة تره اهمالج بحق نفسج يسببلج مشاكل خطيرة بعدين
__اي ماشي
(( كتبتلي علاج كلش هواية .. طلعت من الغرفة ... نطيت الوصفة لعمتي ....باوعت على الوصفة وكلبت وجهه وشكتها ...
__ وكل عقلج اجيبلج هذا الدوة كلة .... امشي يلة للبيت هستوني دافعه ٢٥ الف كشفية لحضرتج
__ بس الدكتورة شافت عمليتي موزينة وكالت لازم تاخذين هاي العلاجات ...
___ امشي للبيت ...ماعليج شي مو حملج كلج مااخذتي علاج وولدتي وكمتي مثل الصل كلشي ماعليج ...
(( رجعنا للبيت ... اخذت ريان ودخلت للمخزن بمعنى لغرفتنا ...
ما كانت عندي خبرة او معرفة شلون اهتم بطفل حديث الولادة
وحدي بغرفة معزولة عنهم ....طول الليل ريان يبجي .. كل مرة يبجي بيها ارضعة بأعتقادي هاي الطريقة الوحيدة ممكن تسكتة ... بس جان يصير العكس ورا كل رضعة يتقيأ اكثر ويبجي اكثر ...
اجتي فكرة ابالي احط راسة على كتفي واطبطب على ظهرة حتى يرتاح شوية ...
بقيت شايلتة وافتر بي بالغرفة وادندن الة وأهمس بأذنة بكل هدوء ...
بعد ما شلتة بهاي الطريقة ..ضل يتريع وارتاح ....نام ويا الاذان .....
نومتة بفراشة ونمت بسرعة .....
كنت محتاجة الراحة والنوم اكثر من كلشي
بس شعور الامومة يخليني اقاوم كلشي واتحمل لخاطره.... حتى لو بقمة نومي مجرد ما يصحى ريان افز من نومي بسرعة واروح علية .....
حسيت الصبح الباب انفتحت .
فزيت من النوم ..
شفت عمي واكف يم الباب ويصيح
___ يلة كومي لج شعندج نايمة لهسه شنو حضرتج اميرة لو شنو ....
___ عمو مانايمة والله لل5 الفجر كاعدة ويا ريان
__ كومي لج ...يلة ويا البنات اشتغلي شنو عاجبج نايمة ويخدمنج مو
__ ايي جاية هسه ...
(( اخذت ريان خليتة يمي بالمطبخ ..طبعاً كلش صعبة علية الحركة ... مااكدر ادنك واحني ظهري ....بقيت واكفة يم الطباخ وكلهم كاعدين ... اسوي ريوك وانطيهم ياكلون .... كوة واكفة دايخة وفقر دم حاد ... علاجات مااخذ ...
كملوا ريوك جناينهم اخذن اطفالهن وراحن حتى يجهزوهم للمدرسة
__ بس فدوة ليكوم يجيب ماعونة هنا عالمغسلة حتى اغسلة والله مابيه ادنك واشيل الماعون ..
(( ام وسيم يم باب المطبخ سمعتني ...دخلت بسرعة وفاتحه عينها كأنما اعتديت عليها بالكلام !!!
___ ولج ..قندرة شو صايرة تتأمرين علينا ..! هاا شفتي نفسج مو !
___ لا والله مو هيج بس يسهلون علية امر والله عمليتي توجعني
__ انجب ولج تشتغلين غصباً عنج كافي دلال 10 ايام مو كافي شبقى بالعملية !
__ بس اسمعيني والله مااقصد هيج ...(( ضلت تصرخ ماتنطي مجال ..وراحت على ريان شالتة ...))
__ جيبوا ... هذا يبقى يمي من اليوم ... مو عمليتج تأذيج وموزينة اكيد ماتكدرين تهتمين بي ..
__ عمة الله يخليج وين تاخذين والله مهتمة بي
__ اششش ولي نزلي ايدج لا تجرين الطفل .... شفتي نفسج مو ! كلتي هاهي صار عندي ولد وضمنتي نفسج تبقين بهذا البيت اطيح حظج واللة ... وهذا اخذة يمي وبأقل تصرف منج مو حلو مرة ثانيه اطردج بالشارع واشوف منو يطلع وراج ...
__ خلي يمي والله مااحجي بعد .. هاهي راح اشتغل واسوي كلشي واني ساكتة
__ انجبي يلة واشتغلي وممنوع تجين لغرفتي ريان يبقى يمي ....
(( اخذتة وطلعت من المطبخ ... بنفس اللحظة علميتي صارت تنغز بية وتوجعني لان تحركت اثناء مااجنت احاول اخذ ابني منها ... دفعتني وأذتني .... كملت المواعين ورجعت للمخزن .... مددت على الجرباية وابجي ... حق باطل ضايع هنا... ولازم مااحجي ... زين لشوكت هيج ... طلعت موبايلي اتصلت على وسيم ... مايرد علية ...
حطيت موبايلي جوة المخدة ونمت .....
كعدت على صوت موبايلي يرن ... وسيم يتصل عليه ... جاوبته ..
__ تره اخذو ريان من عندي
__ منو اخذة شكو
__ امك اخذتة من عندي
__وشكو وين اخذتة بنفس البيت ترة ماسافرت بي
__ بس اني اريدة يمي
__ارتاحي هاي الفترة صعبة بيج حيل تسهرين ويا
__ اني أم وهذا واجبي اي بية حيل !
__ يمعودة النسوان هسه تحسدج ارتاحي شكو علية موج بنفس البيت
__ وسيم تفهم لو لا ..اني مامصدكة بي ومااتمنى ابعد عنة لحظة فرحانه بي ومتلهفة شلون ارضعة واغير ملابسة كلشي بريان احبة ... بأي حق تاخذة من عندي جاوبني
__ شكد عندج دراما زايدة ...يلة ولي اني باجر راجع لسليمانية (( سد الخط ... متصور الموضوع بي مبالغة مايفهم احساس الام شنو !
باوعت باب المخزن مسدودة بس ما مسدودة كلها ...
بس اني سديتها كلش من دخلت للغرفة شلون هيج انفتحت ..
ممكن دخلوا للغرفة بغيابي واخذوا شي من المواد الموجودة ...تجاهلت الموضوع ورحت اطبخ الغداء ...
بنفس اليوم بالليل تكررت الحالة ..
غلقت الباب وراية زين ..
كعدت الفجر وهم نفس الشي الباب مفتوحة شوية ...
بس الاعرفة بالليل كلهم نايمين ؟؟ مامعقولة يحتاجون شي واخذوا ؟؟
رحت فتشت ملابسي ؟ كلها موجودة !
موبايلي موجود ! معناها ماكو سرقة لاغراضي .
استغفرت الله وتعوذت من الشيطان لان ظنيت بيهم سوء ...
سديت الباب ورجعت مددت على الجرباية .
صدري يدر حليب ! بجيت ... كان ممكن هذا الحليب ابني ياخذة ماينزل بهاي الطريقة ... زين ليش ينزل حليب اكيد ريان هسه جوعان ومحتاج ارضعة ...
بس بيبتة موفرتلة حليب من افضل نوع ..
هدئت نفسي ... غمضت عيني . فكرت بشريط حياتي كالمعتاد وين كنت ووين وصلت ... فتحت عيني وابتسمت ... مثل ما تجاوزت ايامي الصعبة السابقة كلها وكدرت انقذ نفسي اكيد راح يجي واتخلص من هذا البيت وراح اكون اني وريان بمكان افضل ....
غمضت عيني ونمت ..
نمت واني غارقة بالخيال ...
أسست حياة كاملة لنفسي بخيالي ...
رسمت حياة وردية بس اني وريان بيها .
الواقع مر .. كان ملجأي ومتنفسي الوحيد بأحلام اليقضة .....
__
4 اشهر مرت واني على هذا الحال ..
انام بالمخزن وابني مو عندي .
وكل الشغل الصعب بالبيت علية
محد يراعي عمليتي
معتبريني خادمة يمهم لا اكثر ولا أقل ....
عمليتي صارت تأذيني اكثر وتذب جراحة بأستمرار ..
من احجي محد يصدكني ويكولون (( تدللين علينة بطرانه !
مين نجيبلج فلوس موزين مكعديج يمنا تاكلين وتشربين بلاش ....))
بهذا اليوم وبعد مااصلح عمر ريان 4 اشهر قرر وسيم يرجع للعراق ...
ومن الصبح وعلى صوت ام وسيم فتحت عيني ..
بما ان دوام لازم الكل تكعد من وقت ..
ضروري اكعد قبلهم حتى ابلش احضر ريوك للكل ..
اعدادهم كثيرة .... يحتاجون وقت اطول بتحضير الطعام ...
__ كومي سوي ريوك يلة ليش ياكلون بسرعة من وراج وميلحكون على الدوام ..
__ ايي هسه اجيت
__ بسرعة لج شنو هسه ! يلة كومي ..
__ تمام والله اجيت بس البس نعالي ..
(( دنكت اخذ النعال من جوة الجرباية .... عمليتي كلش أذتني .... نغزة كلش قوية وكأن سكين تغلغلت بأسفل بطني ....
رفعت راسي ورحت بسرعة للمطبخ كوه امشي من العملية ...
اول ما دخلت للمطبخ شفت ام وسيم كاعدة يم الصوبة وريان بحضنها ...
رحت ابوسة .. سحبته وضمت وجهه ..
__ روحي سوي ريوك يلة ! مو وكت مشاعرج الجايفة ..
__ بس ابوسة واسوي والله ..
__ سوي اكل بسرعة بدون ما اعيدها ...وغسلي ايدج بل بداية وغسلي وجهي مو بهاي قذارتج تسوين اكل لولدي واحفادي ...
__ ماشي ...
(( رحت اغسل ... باوعت بالمرايا عيني مغوركة بالدمع .... غسلت وجهي بسرعة ... اخذت نفس ... نطقت بصورة لا ارادية وبدون تخطيط ...(( كلشي راح يمر )) ..
رجعت للمطبخ ....
نزلن الجناين كل وحدة كالتلي شنو تريد ريوك لعائلتها ...
قسم طماطة وبيض يحبون وقسم بيض مقلي .. وقسم اجبان ..وقسم بيض سلق ...
صرت اركض منا ومنا حتى الحك اسويلهم كل طلباتهم بوقت واحد ...
جانو يتريكون واني واكفة يم الطباخ ..
يااما اسوي بيض اضافي لان ماشبعوا ..
يااما احمي الجاي صار بارد شوية ...
يااما اغسل كوب الشاي حتى يشربون ثاني ...
كملوا افطارهم ....اخذت نفس وكلت الحمدلله لان كلش تعبت ..وفعلاً اصعب فقرة عندي هي الفقرة الصباحية ( الافطار ..))
عمتي اخذت ريان ورجعت لغرفتها بعد ما ودعت احفادها وبناتها واولادها ...
جنت اغسل الصحون ...
دخل عمي يتلفت يسرى ويمنى ويفرك بأيدية ..
__كول عمو شرايد
__ تره البارحة شفتج
__ وين شفتني ..(( تصورت شايفني بالمنام..))
__ شفتج نايمة بالمخزن ودشداشتج شوية مرفوعة شوية .... (( انصدمت وفتحت عيني حتى الاسفنجة بأيدي وكعت بالسنك... عقلي وكف حتى جواب اردة ماعندي ...))
جسمج كلش حلو عكس ما متوقع .... شايفة اذا اشوفج مره ثانية مطلعة رجلج شسوي .! ..ههههه اكرصج حتى لو تصيحين ...
__ شتحجي عمو ! تشاقة لو شنو ....
__اجيت اكرصج بس كلت خطية نايمة ليش اكعدها
__عمو كافي الله يخليك تره راح اتقيأ ! شنو هذا الكلام تره اني باعتبار مثل بناتك..
((ماجاوبني تركني وطلع خارج المطبخ ... من الصدمة مااعرف شسوي ابجي ! اكول للكل عليه ! اروح اتعارك ويا ! كلهن لااا اكيد راح يفرون السالفة علية ... شلت الاسفنجة وكملت شغلي ...بس بالي يم القرف ... مااكدر اركز بأي شي .... دخلت مرت ماجد اخو وسيم للمطبخ تناديني وماادري بيها الا بأصبعها لزمتني على كتفي ...
__رحمة...رحمة شنو ماستمعين
___ها وفاء اسفة والله ماانتبهت
__ دشداشتج كلها مي ماتخافين على عمليتج ؟
__ لا اني اغيرها بس اكمل مواعين
__ لفيها تعلمي لا تخلين مي يوصلها تره تكوم تذب جراحة وتنفتح من جديد وموزين
__ اي هسه اروح الفها ..
(( رجعت للمخزن ...لفيت شال على عمليتي ...صح لكيتها كلها مي ... وتحركني كلش ...رجعت بسرعة للمطبخ اذل اتأخر تصير مشكلة .... من دخلت شفت عمي بالمطبخ ..
___ شعندج رحتي للغرفة ورجعتي ؟منو خابرج ؟
__ ماعندي شي بس رحت سويت شغلة واجيت
__ شغلتيش هاي ! ويامن حجيتي!
__ ماحجيت ويا اي احد والله بعدين هذا موبايلي على الاوفن يشحن ..
__ يجوز عندج موبايل ثاني ... تره هاي حركاتجن ماتمشيها عليه ..
(( ما جاوبتة .... شلت الصينيه من الكاع ... وحطيتها على السنك حتى اعزلها وهو مستمر يرزل بية وبصوت عالي .. وهذا طبعة جداً شكاك ومزعج يراقب ويدخل بكلشي ...رن موبايلي اتصال على الفايبر .. باوع قبلي على الشاشة ... اني ما كاتبة اسم وسيم كاتبة رموز ....
__منو هذا يخابرج اكيد صاحبج السري مو
__اي سري !!!! عمو تره هذا وسيم
__ جاوبي كدامي
__ اي تمام ...( فتحت خط وجاوبته ..))
الووو ها وسيم ...شلونك
*الحمدلله
*ها شو مااجيت
* اني جاي بس هسه ابغداد ...شوية ونطلع لسليمانية
*ليش مااجيت على مطار اربيل مو احسن
*مارهمت .. اجيت على مطار بغداد يلة 4 ساعات واني يمكم
__هااا منووو جيبي الموبايل ...(( لحد هسه مامصدك هذا وسيم ! اخذ الموبايل بسرعة من ايدي ويحجي ))
ألوووو هاي وسيم يابة شو احجي اسمع صوتك
* الووو ها يابة .. اني وسيم شبيك ...شلونك والله مشتاقلك ..
(( عمي باوع علية ....))
__هذا مو صوت وسيم ! منو هذا ...
__ شبيك عمو تره والله هذا وسيم مو غيرة
__مو صوته شنو تعلميني بصوت ابني
__ والله هذا وسيم هذا صوته ورقمة شبيك عمو (( وسيم جان يحجي ... ها يابة شبيك اني وسيم .. الووو يابة جاوبني ..عمي سد الخط بوجهه وبعدة مامصدك هذا وسيم ... جان بكل الطرق يحاول يطلع خاينه وانسانة موزينة ...))
طلع من المطبخ وهو يدردم ...
اتصلت على وسيم مايرد ...
كتبتلة رسالة ...(( تره هذا ابوك سد الخط روح خابرة وكلة انت جنت تحجي وياية ))
(( تمام هسه اخابرة ..))
طلعت من المطبخ ...
شفت عمي بالكراج واكف ..
رن موبايلة وفتح خط
سمعتة يكول ..(( يا هذا انت عبالي غير واحد ))
من كال هيج شهكت وكلت حسبي الله عليك !
لاي مرحلة واصل من النذالة والسفالة !
يتهمني بصورة علنية !
وكدام منو !!! كدام زوجي !
** بوقت ماوصل وسيم لسليمانية ...
تحممت وغيرت دشداشتي ...
طلعت للمطبخ حتى اطبخ الغداء ...
قبل لا ادخل المطبخ عمي جان واكف فتت من يمة !
والصدمة !!!!! ضربني من ورا بأيدة ...باوعت علية بنظرة تعجب !
__ شدسوي ! عموووو يصير
__ شوفي شوفي شكبراتها الخلفية صايرة
__ عززززة والقرأن العرش يهتز على هذا كلامك
(( سمع صوت عمتي اقترب ... راح بسرعة .. دخلت المطبخ مصدومه ومامستوعبة اليصير !!! ياربي لااا ... كلشي ولا هاي الاشياء ...! حرام والله حرام .! اني زوجة ابنة وهو باعتبارة مثل ابوية ! لا تخلي يتجرأ اكثر ويتمادى وياية ! المن احجي محد راح يصدكني...
شفت نسرين اخت وسيم الارملة كاعدة بالمطبخ ..شافتني مرعوبة ولوني مخطوف وسألتني ..
__ خيرج رحمة شكو ..
___ نسرين اريد احجيلج شغلة ..(( لازم احجي ولازم احد واعي واكبر من عندي يوجهني .. الي دايصير مو شوية ...مصيبة ..))
__ اي كولي
__امشي لغرفتي
__ تمام امشي ليش لا ههههههه ..
(( دخلت للغرفة .. سديت الباب زين ...تقربت يمها كلش وحجيت بصوت خافت حتى محد يسمعنة ))
___ نسرين فدوة راح احجيلج وصدكيني انتي احسن من الكل موجودة هنا ... ماشفت منج اذية من اجيت لليوم اتمنى تصدكيني هسه من احجي وافتح كلبي الج
__ كولي يمعودة مو نشفتي دمي
__ اكو موقفين صارت اليوم وحيل خايفة ..(( حجيتلها كلشي صار ..ما شفتها انصدمت ابد ...))
__ رحمة اكلج شي
__ اي
__ ديري بالج ..
__ شلون يعني صايرة قبل هيج حالة
__ اي تره ابوية هذا طبعة وعنده هيج سوالف ..
__ شنو ويامن عفية .. احجيلي ..
__خليني ساكتة بس اكلج ابوية فاسق ويحب المحرمات مايهتم ابد كبيرة صغيرة بنته اختة زوجة ابنة كلشي عادي عندة ... ديري بالج انتي ماعندج احد وراج ليستغل هذا الشي
__ شلون اتحذر عفية حتى المخزن مابي قفل
__ راح يجي وسيم وابقي ويا ويا ! ابد لا تختلين وحدج
__ زين بمنو تحارش قبل
__ بوفاء تحارش وكالتلي الي ..
__ عزززززة بعيني ...ولج والله راح اموت من الخوف وكلبي يرجف عفية شديصير يمة راح تقيم الساعة عزززة
__ اي صح هاي من كبائر الذنوب
__والبقية ليش ما كالن لاهلهن
__ ماحجت لاحد خطية تخاف ..اذا تحجي تعرف ماجد ميصدكها وراح يكلها ابوية يشاقة تعرفين هو طبعة يحب يشاقة هواية
__ اي شقة هذا عززا
__ايي يصدكون بأبوية تره اخواني مستحيل يشكون بي
__ والحل
__ سكتت البنية وضلت ويانه ويانه تخاف تتحرك خطوة وحدها بوجود ابوية
__ واني شسوي عفية ماعندي احد وراية وهو يعرف كلش زين
__كولي لوسيم من يجي تعزلون وحدكم ابيت اضغطي علية ولحي تره والله يسويلج شي .... وشي جبير هم خاف وفاء بس لزمها مره مرتين انتي ممكن يسوي الاكبر وينام وياج بحجة ماعندج اهل ...
(( بعد هذا كلامها زاد الخوف بقلبي.... طلعت نسرين من الغرفة ... رجعت للمطبخ كملت االغداء وبعدها تنظيف المطبخ ...كل هذا واني خايفة لا يدخل ..ومنا اسمع صوت أبني يبجي واموت قهر اتمنى اشيلة وابوسة واحضنة ....
اثناء ماانظف سمعت صوتهم ارتفع .. طلعت للاستقبال شفت وسيم يضحك اهله يسلمون علية وفرحانين بي لان رجع .....
شال ريان بأيدة وضل يبوس بي ...
__ هااا هاي رحمة ماتسلمين شبيج
__ ها شلونك ..
[[ لا واضح من اولها هذا نفس طبعة ومامتغير .... ما جاوبني ضل يبوس بريان ويحجي ويا امة ...
__ غرفتك جاهزة حبيبي
__ تسلمين يمة تعبتج اني حايرة بأبني وبرحمة بغيابي
__ شنسوي حبيبي لخاطرك كلشي اسوي..
(( مقتنع تماماً اني كنت عايشة برفاهية بغيابة ! مهما احجي مايصدكني ...ضليت ساكتة واباوع عليهم ...))
__ روحي صبي غدة لرجلج شكو واكفة وصافنة فوك روسنا
__ ايي هسه
(( صبيتلة الاكل ....وديتة الهم ... وسيم لابسني كأن مايشوفني .... يحجي ويا اهله فقط .... بعد الغداء ام وسيم اخذتة للغرفة ...اني هم رحت ويا ...))
__ هاي غرفتك حبيبي
__ والله يمة ما يوم خيبتي ظني عاشت ايدج ..
__ يلة ارتاح ومدد خطية اكيد تعبان ...يلة انتي تعالي اطلعي كملي شغلج خلي يرتاح ...
__هاي عندج شغل عايفته وجاية هنا روحي كملي شغلج يلة ..
__ ماعندي شي
__ شلون ماعندج شي والصينية لصبيتي بيها اكل لرجلج منو يغسلها تره هنا ماعدنا خدم جوه ايدج كافي دلال تحركي شوية
__ يا دلال مو اني انظف وممقصرة وياكم ..
__ شوف يمة شوف لسانها شطولة شحدة ليحجي وياها كلمة ..من اجاها ريان انجلبت علينه
__ اني مخولكم تكصون لسانها لو تكصون راسها بكيفكم ! ادبسززز شنو هذا لسانج الطويل .
__ اسمعن.....(( ضربني راشدي ولزمني من ايدي وطلعني من الغرفة ... دفعني حيل للكاع وسد الباب .. ))
بقيت اشتغل وياهم لحد الليل ..
ب12 كلهم ناموا ...رحت للغرفة ..
وسيم قافل الباب ... دكيت الباب ..
فتح الباب وكلش ضايج مجبور
__ وسيم اريد ابني
__دنجبي انتي البطرانة
__ ليش بطرانة والله مشتاقتلة اريدة يمي جيبليا فدوه طلع حجة انت تريد تشوفة وجيبة
__ انتي صدك دافرة نعمتج برجلج !
__ ليش ....؟
__ تره النسوان تحسدج على هاي النعمة. خلصانة من الواق ويق ونايمة ومرتاحة شسوين بي خلي يمهم موزين يحبو وحايرين بي
__اي راحة هاي لتحجي عنها ! اني رايدة ابني ..بالعكس تره وجودة يمي واسهر ويا هاي الراحة بحد ذاتهة
__ عوفي يمهم لا ادوخيني
__ زين اريد نطلع وحدنا ابيت
__ انجبي
__ ليش تغلط ضروري نطلع وحدنا ابيت والله ممرتاحة هنا
__ لو مرة وحدة من تلغين تفكرين بكلامج مو شنو يجي ابالج تكولي
__لو مره وحدة تسمع كلامي وتكول اي صار حبيبتي
__وليش حتى ماترتاحين هنا !! اهلي على كلبج ويحبوج ويحبون ابنج شرايدة بعد ..
__ اهلك مايحبوني ومعذبيني ومشوفيني الويل هم ولو مو هذا موضوعي!
__ لعد شنو موضوع ست رحمة
__ اني من الصبح لهسه خايفة وارجف
__ ليش شكو
__ خلينا نطلع من هذا البيت
__ غير اعرف شكو! شنو بي جن ! بي اشباح !
__ ابوك يتحارش بيةةة ..
يتبع البارت القادم يوم الثلاثاء ....
قراءة ممتعة ..+ لا تنسون التصويت على هذا البارت والبارتات السابقة 😘