قيود العوف

part 40

#قيود_العوف
بقلمـَي: ريتـَا

گطع وحدة من أيديه بالسليمه
احضنة بمتن والچف بس اللمه
الطعني تحمدت أله بالسلامة
أله ولخنجرة المطروح بيه .

شبابات تفاعلوا شوفوني تفاعلكم الي يرد الروح ويسوي واهس 😔💚.

لتنسون التصويت + التعليقات بين الفقرات + متابعة حسابي قلبي ❤️‍🔥

شبابات صوتوا دوسوا علىٰ النجمَة لتنسون مُهم🤏🏻
________________________________

اجة عوف يمشي بسرعة باوع لمنظر الأرض من الامواعين المكسورة والنعمة الواگعة بالگاع انذهل رفع نظرة لجُمان الي دموعها مستمرة توگع گال بخوف ..

-عوف: شنو شصايرر هنا شبيج جُمان ؟

تجاهلت كلامة بلعت ريگ بصعوبة واني اشوف نظراتهة الحادة اتجاهنة اخذت نفس مسحت دموعهة بطرف أصابعهة وگالت ..

-من فتت لهذا البيت فتت وگلبي مرتاح مطمئن من ناحية الناس الموجودة بيه

غمضت عيوني وفتحتهن بقهررر وكملت كلامهة بصوت يرجف ..

-حسيتهم ناسي الفاقدتهم ما استغربتهم گعدت وضحكت وأكلت وشربت وياهم وجبت امي العليلة واجيت من بغداد لخاطر كلمة منهم ماگدرت أردها لأن ألهم فضل چبير عليه

وجهت نظري لقاسم الي مكتف أيديه ويباوع إلها بنظرات كلها حيرة وساكت رجعت گالت ..

-وأول مرة اگعد بُمكان وأحس الأمان كُله محتويني بيه ما أخاف من شيء ولا أفكر مُمكن يصير النة شيء أكو من يحميني بروحة .

-عوف: جُمان..

كملت بدموع وهي تشهگ ..

- لأن اني مشئومة حياتي تعيسسسة الخطوة أخاف اخطيها واني بمُكاني أخاف يرجع ينعاد الصار بيه أموت ألف موتة من أفكر ولو للحظات أنُ ترجع هذيج أيامي الما رحمتني دقيقة ..

كل كلمة تگولهة تدگ بعظمي تمرد گلبي باوعت لعوف لثواني نزلت دمعة من عينهة وگالت بعبرة ..

-جُمان: ليش عوف ؟

جر نفس بقوة وزفرة اعتلت ملامحة الحيرة والحزن ..

-جُمان: ليش تصير أنتَ السبب بأذيتي وأذية أمي ؟

-قاسم: جُمان مو هيج الموضو..

قاطعة عوف من رفع أيده وگال بهدوء ..

-عوف: لحد يتدخل

هزت راسهة وعقدت حواجبهة وگالت بحدة ..

-جُمان: اشش اشش أبد ماكو داعي تحچي كلمة قاسم لأن سمعت كلشي كل كلامكم بعده ترىٰ بعده يرن بأذني كلمة كلمة ..

ضحكت وگالت بغصة ..

-ها ولتگولون دتتسمع موثوبي .. چنت جاية وجايبة  وياية أكل من الي سواه عوف لمنار ماگدرت أكل وهي لا لأن حسيتها تعبت بسببي

أعتصرت روحي وصرت أخذ النفس بس بصعوبة هلگد ما ضاق صدري ...

-بـس أثاري حنيتة الزايدة وتعاملة وياية وعطفة لأن ديحس بتأنيب الضمير

-عوف: لا جُمان لا تحچين هيچ

-أبد شنو عوف ؟

چانت تحچي بهدوء ماچنت أعرف هذا الهدوء هو ماقبل العاصفة ..

بحركة جنونية وغيرر متوقعة أتقدمت اله بسرعة رفعت أيديها تضرب بصدرة وتحچي بجنووون وصوت عاالي والشهگة تارستة ..

-أبد شنووو مدتحسس بتأنيب الضمير لأن أكو أنسانة بريئة مظلومة ماعرف وينننن مشموووورة بسبببك ؟؟
ميأذيك ضميرك ميأنبك ؟ من تفكر ولو للحظات شنو مُمكن يكون صاير بيهاااا

تضرب بصدرة بكل قوتهة وتعيط بوجهة وهو علىٰ هدوئه مانطق كلمة ولا حاول يبعدهة عنه ...

-شلووون گدرت تضحي بيهاا فهمنييي شلووون أنطاك گلبببك تقدم امي ضحية لخاطرررر ششغلك

علىٰ صوت عياطها أجت رغد تركض خفت خطواتهة وشدت علىٰ ملامحهة من شافت الوضعية باوعت الي واني العبرة تارستني وخانگتني ..

لزم أيديها نزلهم وگال إلها بحنية وهدوء و وجهة معتصر و واضح عليه القلق علىٰ وضعهة ...

-عوف: والله ماضحيت بيها ولا مُجرد تفكير حتىٰ ولچ والله حاولت أبعدهم واشغلهم عنكم بكل طريقة بس مافاد ماگدروا يلووني غير بيچ أمنت كل مُكان رحتوا اله وچنتوا بيه وأمنت العرس كله لخاطركم و تواجدت جهة أمنية كاملة بس انغدرت من شخص گ*** چان موجود بنصنة

نترت أيدها منه وحچت بصوت مبحوح ..

-بسسس لتكذب عليه وعينك بعيني عوف لتكذذذب

زفر بتعب وگال بهدوء ونظراتة تتنقل بوجهة التعبان ..

-عوف: ما جاي اچذب عليج جُمان وحق داحي الباب

-دتكذبببب انتَ تگدر تسوووي كُل شيء وچنت تگدر تمنعهم بكل طررريقة وتسكتهم وتبعدهم بس انت قبلتت تضحي بيهاااا لأن متگدر تضحي بأحد من عائلتكك قااابل أمي تهمكك

-عوف: خ** بيه انعل يومي شلون أضحي بيها ولچ حاچيني انا اضمكم بعيني احميكم بروحي من الخطر ولچ إنتوا من عائلتي أصلًا وتگليلي تضحي بيها شلون أضحي بيهااا ولچ انا الغرررريب ماا اضحي بيه مو أمج

دفعتة وصارت تغلط عليه وتعيط وأجهشت بالدموع وهو ثابت متحرك ولا اهتز ..

-بسسسسك ولكككك الله يااخذك بسس كذبببب ليش تحررگ گلبيي علىٰ أمي ليش تعذبنييي هيَچ انعل ابووو شغلك وأبو مهمتك رجعلييي أميييييي

-عوف: باچر

-كذاااب حقيييير دتسايسني وتكذب عليه حتىٰ تسكتني

أخذ نفس وگال بتعب..

-عوف: ولچ والله ماجاي اچذب والله باچر أمچ يمج بس صدگيني دخيل ربببچ

-ليش مو هسة ؟ شنو الي يختلف باچر منا لباچر هواية ماعرف شيسوون بيها ميسوون ولكم أمي متشوف متتتحرك منوووو يلبيي احتياجاتهة شصار بيچ ولچ يمةة ولكم حسوو بيييه

صرخت بأخر كلمة وانكتم صوتهة ولزمت گلبها تحركت ردت أروح إلها لزمني قاسم رافض باوعت لعوف الي لزمهة وگعدهة بالأرض وگعدت مقابيلها ...

-عوف: ليش تعذبيني هيج ليش بس فهميني

-أكررهك عوف

اتغيرت ملامحة باوع إلها بنظرات كلها أنكسار حسيتة أنهضم من الكلمة أبد ماچان متوقعهة ..

بلعت ريگ وكملت بغصة وشهگة..

-أكرهك وبعمري ماراح أسامحك لأن خليتني أعيش هذا الشعور وأذيتني بـ أمي

صفن بيهة لثواني بضياع وحيرة وگال بنبرة ترجي ..

-عوف: عاقبيني سوي كلشي يريحج بس لا تكرهيني

-أكرهك وأكره كل شخص يأذيني بأمي

-عوف: بـس لا تگليلي أكرهك جُمان لا تأذين روحي وتعذبينها هيچ

دفعتة عنها حيل وگالت ..

-بس أنتَ أذيتني ومافكرت بيه

-عوف: أأذي روحي ولا أأذيج

-والصاررررررر لك والصارررر

-عوف: مو مني ولچ شلون تفكرين انا مُمكن أخاطر بيكم لو أأذيكم بيوم

ضحكت وهزت راسها ودموعهة مثل الشلال گالت وشفايفهة ترجف  ..

-شگد چنت موهومة بأمانك ..

غمض عيونة وأخذ نفس من قوتة أحس شگ صدري مو صدرة باوعت لقاسم الي حسيت بقت عندة أخر ذرة صبر للسكوت وفعلاً نطق بعدها ..

-قاسم: إذا تقبلين ويرضىٰ ضميرج تضحين بأرواح أطفال بريئة ونساء جاي يتعرضن للتعنيف المستمر وعوائل بكل دقيقة تتهدد وينهدر دم منها وشوارع الخطر تارسهة بكل خطوة تنخطي بيها هسة وبهلحظة مستعد انا اجيب أمج هسة

-ياربييي محددد يفتهمنيييي ولكمم محدد يحسس بالجاي أحس بي ولكم امييي هاي اميي من أفكر شحالهة اموت انتهي اضرررب براسيييي ولكمم حسسو بيه شنووو ذنبنا احنة بالديصييير

هزت راسها وشهگت بصوت لطمت علىٰ وجهة وغطتة بأيديها وجسمهة يهتز من البچي ..

-عوف: والله مامضحي بأحد وماگدر أضحي ولچ توگف بعيني الأطفال والناس البريئة الجاي يتاجرون بيهم ومسوينهم سلعة ولچ ماگدر اخطي خطوة بدون ما أحسب حسابها ماگدر أستعجل وتاخذني عاطفتي لأن ماراح أفكر بأرواح الناس الي تصير بذمتي ..

حطت عينهة بعينة وگالت ..

-بس فهمني من كل الصار شنو ذنبنا احنَة بيه شنو علاقتنة  بالناس الدتحچي عنهم ليش امي صارت الضحية ليش امي بالذات شنو الي يردونة منهاا

نفخ بحيرة باوع إلها بتردد وگال ..

-عوف: أمج ورقة مفاوضة بالنسبة الهم

-مفاوضة ؟؟

هز راسة بثقل وگال ..

-عوف: يفاوضوني بيها حتىٰ أنسحب وتنسد قضيتهم

-وليش أمي ليش مو شخص ثااني

-عوف: لأن مراقبين ويعرفون شگد مهمين بالنسبة اليي

مسحت وجهة بجنون ونزلت راسهة وصوت الشهگة ينسمع ..

-رغد: جُمان اروحلج فدوه لا تسوين هيچ والله يرجعهة وان شاء الله ماعليها اي خطر

-منار: عفية كاافي رحمي نفسج راح تخلصينهة مستشفيات وتتضاعف حالتج والخطر ميعوفج

مارفعت راسها ولا ردت علىٰ أحد بينة بقت علىٰ نفس وضعيتهة نزلت دموعي بخوف ..

-عوف: بس عاونيني وحطي ايدج بأيدي صبري واتحملي والله ارجعهة الج سالمة غانمة محد دايس الها علىٰ طرف وتخلص مهمتنا وننقذ النَاس.. همة خافوا وارتعبوا لأن أنتهىٰ كل شيء وراح ينسحگون بالرجلين

نفخ بغضب واشتدت ملامحة من شافهة ما استجابت لأي بشر بينة بس سرعان ما أختفت براكين الغضب الي چانت واضحة عليها اتنهد وگال بنبرة هادئة وحنينة ..

-عوف: ولچ بوية ميخالف عاقبيني انا لوميني شتردين تسوين بيه سوي بس تركي روحج لا تأذينها وأتعبينهة بهلطريقة

رفعت راسها اله عيونهة مورمة وحمر وشفايفهة ترجف نهضت وگفت گبالة وحچت بأنتفاضة ..

-كل الصار بسببك ماررريدك بعد لتوووصل ألي ولا لأمي ولا لبيتنا ولا لأي مُكان اتووواجد بييييه انسانييي رجعلييي امي وابتعدد وأبعد خطرك وعصاباتك وششغلك عننيي

احتقن وجهة باوع إلها بحيرة وحزن عيونة تباوع إلها بأنكسار هز راسَة وگال الكلمة بغصة ...

-عوف: صار يابه ..

حچت بجسارة وحقد وعيونهة تجدح بوجهة ..

-أتمنىٰ لو اگدر أكسر گلبك مثل ماكسرت گـلبي وأحطك بنفس الشعور وتحس بالنار الي مشتعلة بيه ..

-عوف: النار نفسها جاي توج بداخلي وتحرگني مـن اشوف دموعچ هاي ..

-ياريت وعساااك تحترگ بنار گـلبي

غمض عيونة وگال بـ شبه إبتسامة حزينة علىٰ وجهة ..

-عوف: بويه حچيج عالگلب دوسة حوافر خيل .

بللت شفتها وصارت تتنفس سريع سلهمت عيونها المورمة من البچي وهي تباوع بنظرات ماعرفت افسرهن شحت نظرها عنة بسُرعة ..

ودارت عيونها علينا باوعت لثواني حطت عينها بعيني نزلت دموعي واني أشوف نظراتهة وأحس تريد تفترسني مارايدتني مدت أيدها وگالت بعتب ...

-كلكم كسرتوا گلبي واذيتوني وكذبتوا علية كُلكم تعرفون بكُل شيء يصير وماحچيتولي شيء عفتوني أموت بقهري وتفكيري واني ماعرف ليش وشنو السبب الي أمي تختفي مني بيه وأفكر واكول محد غيرهم ألي أذوني هم السبب

حچيت بدموع ..

-منار: لأن خفنة عليچ والله ماعرفنة شنگول وانتِ بهيچ وضع مو علمود شيء جُمان

-چنتوا خايفين أكره عوف بس هسة وگعتوا من عيني كلكم داشوفكم نفس مداشوفة كذابين تعرفون بكُل شيء چان ديصير وكل التهديدات الدتوصل علينا وسكتوا

غمضت عيني بقهررر اعتصر گلبي رجعت أردفت ..

-ولكم بيتنا محرگ والوضع خطر لهلدرجة ومحد حچالي كلمة ومن حقي چان ولكم من حقي أحد يگلييي وينبهني علىٰ الأقل بس استغفلتوني استغليتوا وجودنة بحجة الزواج وگلتوا تدبررر بعددينن مووو

-منار: لااا والله محد فكر بيچ بهلطريقة

-شلووون أثق بيكم بعد شلووون اصدگ بالي تحچونة

عضت شفتهة بدموع وگالت ..

-كُلكم وگعتوا من عيني وماراح أنسىٰ الكم هذا الموقف الحطيتوني بيه أبد

گالت أخر كلمة وشهگت بيهة ومشت بسُرعة دخلت للغرفة وسدت الباب حيييل اتجمدت بمُكاني ..

وجهت نظري لعوف الي مسح وجهة ودفر الكرسي برجلة حيييل وطلع وقاسم واگف مكتف أيديه ويباوع بحيرة ورغد موقفهة ميقل عني..

عم الهدوء علىٰ المُكان نفخ قاسم ودخل باوعت الي رغد وگالت ..

-رغد: ماگدرت أنطق بكلمة حتىٰ لأن منين ما اجيبهة حقهة بكل كلمة گالتهة شلون تضمون عنها حتىٰ حرگ بيتهم شچنتوا متوقعين بعد ماتعرف تتلگاگكم بالأحضان والابتسامة ؟

رجعت راسي علىٰ الحايط مفرفحة من القهر ..

-منار: أعرف حقهة بس والله اني ما استوعبت حتىٰ اگُلهة بالموضوع ! ماصارلي كم يوم من عرفت وماگدرت اگُلهة وهي بهلوضع

هزت رأسها بعدم رضا وگالت ..

-رغد: أتحملوا غلطكم ولحد يضغط عليها بعد خلوها ترتاح

گالت الكلام وراحت بقيت وحدي مسحت وجهي ودموعي أخذت نفس أريد أرتاح بس ماگدر كلامهة عيونها نظراتهة موقفهة انطبعن بگلبي .

دنگت انظف الأرض وشلت الگزاز والأكل صارت غصة ببلعومي من شفتة واتذكرت كلامها غمضت عيوني ونهضت كنستة ومسحت المُكان

دخلت أغسل وجهي عيوني حتىٰ المي البارد احسة صار ماجاي يبردني سديت بوري المي ومشيت للغرفة ..

انصدمت من فتحت الباب وماشفت قاسم ولا الهوسة الي چانت موجودة ولا اي ورقة ولا اي أثر طلعت للصالة فارغة ماعرفت وين راح وليش

فريت رگبتي بوجع وهزيت راسي ورجعت للغرفة تمددت لفترة طويلة علىٰ الچرباية وردت أنام بس ماگدرت أكلني التفكير بالي صار وقاسم كل هلوقت ماكو مارجع لعد ويه منو أتداهر وابرد گلبي

نفخت بتعب وملل وين راح بهلوقت بدون ميحچي ؟ هلرجال راح يموتني .. ردت انهض أروح لجُمان بس ترددت وخفت ترجع تنفعل بسببي وبعد أخر شيء گالتة متطيق تشوفني وهية بهلوضع أصلاً ..

حطيت رأسي بين رجلية بألم ... شسوي ياربي شلون موقف انحطيت بيه واني اعرف جُمان شگد تكره الكذب وماتتقبل الي يضم ويكذب عليها ..

بعدني أفكر بيني وبين نفسي وانفتح ألباب نهضت بسُرعة عدلت ملابسي چانت دشداشتي طافرة واني متمددة قلص عيونة وسد ألباب ..

-منار: وين چنت ؟؟

-قاسم: چنت ادخن برة

باوعت اله بشك وحچيت ..

-منار: تدخن برة ؟ أول تالي

-قاسم: اي ردت أخذ نفس شوية

-منار: ليش شقصدك اني خانگتك ؟

گعد يمي وگال ..

-قاسم: إذا تردين تتعاركين گليلي حتىٰ أحضر روحي

-منار: لا منو گال مالي خلگ أصلاً

-قاسم: يله زين

-منار: بـس إذا طلعت تدخن وتجر نفس ؟ الأوراق والخبصة الچانت هنا اخذتها وياك تاخذ نفس ؟

ضحك ضحكة طويلة بتعب وگال ..

-قاسم: لخاطر مكة بـس فهميني الفضول الي عندچ منين وارثتة لأن هاي فلك أسود مو وراثة طرگاعة سودة وطاحت علىٰ راسي

-منار: شقصدك أسأل هواية ؟

-قاسم: حشاج لا لاا أبد

-منار: اي عبالي

گلت الكلمة ورجع ضحك ..

-منار: شبيك هسة تضحك شحچيت

-قاسم: ماكو جاي أضحك علىٰ شيء براسي

-منار: لا تضحك قاسم المفروض متضحك وتضوج وياية شوفني اني التفكير وتأنيب الضمير حيموتني

-قاسم: ليش يابه

-منار: لعد والصار قبل ساعات بسرعة نسيييتة ؟؟!

-قاسم: مانسيتة بس شسوي ؟ ادگ واللطم ؟ شو البنية رگعتنة علىٰ وجوهنة وعلي انا حسيت نفسي لـ لحظة مسيلمة الكذاب

-منار: وهو هيچ انتَ واني هيچ

اتنهد وحچة بجدية ..

-قاسم: ان شاء الله محلولة ومنتهية

-منار: تدري من جابت طاري خالة امل ومرضها انعصرت عصر ماگدرت حتىٰ أفكر حتىٰ تفكيري رفضتة بوضعهة

-قاسم: اخ لو تشوفين وضعة لـ عوف منتهي يشوف روحة هو السبب بكل الصار محمل نفسة كل المسؤولية مساع صافن ويهمس بدون أدراك منه "أسف أذيتج "

-منار: ماعرف علىٰ منو ينكسر گلبي وانقهر اثنينهم مالهم ذنب واثنينهم عندهم حق

-قاسم: موقفة صعب گدام الي يحبها

-منار: چنت اللومة بس للحظة فكرت بيني وبين نفسي لو فعلاً بقينة نفكر بعاطفتنة راح نخسر هواي ماراح نربح ولا راح نعرف نتصرف لأن العاطفة تجرفنا لأماكن وتصرفات غلط

رفع حاجبة وگال ..

-قاسم: هاي انتِ لو غيرج ؟

-منار: لا تستهزأ .. بس اني أخذتني عاطفتي وحزني ولحد هسة بعدني بنفس التفكير أتمنىٰ بهلحظة ترحون تنهون كل شيء وترجعونهة النة وينتهي كابوسنا بس والناس ؟

أخذ نفسس عمييييق وزفرررة وگال ..

-قاسم: بشغلنا نتجرد من العاطفة لأن ماراح تخلينة نتصرف بواقعية وبعقلانية وماراح نفكر تفكير صحي وصحيح راح نركز علىٰ الشخص المتعاطفين وياه بس راح نهمل حقيقتة ونهمل أساسنا شنو واحنة بهلمُكان ؟ ليش موجودين هنا وعاطفتنة تتحكم بينا ؟

-منار: كلشش كلشش متتعاطفون وي أحد!!

-قاسم: لا لأن أساس شغلنا مو أنُ نتعاطف الي يصيرون گدامنا مو أشخاص يستحقون نتعاطف وياهم خصمنا حقير ونذل مايستحق الرحمة لأن لو يستحق الرحمة ماصار خصمي ..

أخذت نفس وركزت بالكلام وياه گلت اجرجرة شوية مادام الله هادي وديحچي گلت اله ..

-منار: وشلون تعرفون خصمكم وتلگونة ؟؟

عض شفتة باوع بوجهي وطگهة بضحكة صفنت عليه وگلت شجاه شحچيت اني گلت شيء يضحك ؟؟

-منار: شبيك شنو ؟؟

-قاسم: هههههههه صيري ذكية منا ورايح غيري طريقتج

-منار: يا طريقة شنوو ؟؟

-قاسم: تقنعيني ماجاية تردين تجرجريني بالحجي ؟

بلعت ريگ وگلت اله بنفي ..

-منار: لا شكو المن ؟ تحچي من يمك قاسم هذا تفكيرك أنتَ

-قاسم: اي صحيح

-منار: شگد حرام إن بعض الظن أثم

رفع حواجبة بوجهي بدهشة وگال ..

-قاسم: ولچ انتِ فدد وحدددة وجاية تستلوين وتردين تعبرينهن عليه

مد أيده علىٰ كتفي ربت بخفة وگال

-قاسم: طگطگيهن علىٰ غيري حبيبتي

-منار: لعددد اذا متريد تسولف ليش تحچيلي

-قاسم: الحچيتهن الچ أشياء عادي ينحچي بيهن انتِ تردين الغميج

-منار: اي عادي شكو بيها مرتك اني ؟؟

-قاسم: غير چيس شعييييير بوية وعلي نندهر ونتطشر غير

-منار: شنو قصدك مافهمت ؟؟

حك أنفة بطرف أيدة وگال ..

-قاسم: يعني نامي بعد روحي باعي للساعة وبعد ساعتين وراي گعدة

تمدد وحط أيده علىٰ وجهة وعافني لزمت المُخدة شمرتهة عليه ونهضت حطيت فراش ونمت جوة اجاني صوتة المستغرب وهو يسأل ..

-قاسم: هاي ليش ؟

حطيت أيدي علىٰ وجهي مثلة بالضبط ورديت ..

-منار: مو زوج صالح لحد متصير زوج صالح أنام يمك

-قاسم: تعاي وهسة أصير زوج صالح

رفعت راسي وگلت اله ..

-منار: و تحچيلي ؟؟

-قاسم: لا طبعاً

-منار: نااام

-قاسم: كلاواتج هاي بطليها مال تدورين حجج علمود تنامين جوة أدري بيچ تستحين تنامين يمي

فتحت عيوني علىٰ وسعهن عززا شلون عرف صار ساعة أريد اتعارك وياه بس حتىٰ تصيرلي حجة حتىٰ أنام بعيدة عنة ماعرف وأخجل انام وراسي بصف راسة ..

سكتت ماجاوبتة انبلع لساني غطيت راسي واندحست بالمُخدة أكثر ماسمعت بس صوت ضحكتة الخفيفة بعد ..

غمضت عيوني وصارت صورة خالة أمل گبالي حطيت أيدي علىٰ راسي نزلت دمووعي ياربي ماجاي اگدرر مُجرد ماا أغمض عيوني و أتخيل شصاير بيهاا أنهضم

شگد دعيت بداخلي علىٰ كل من كان السبب وفكرت شگد ناس مثل حالتنا و وضعنة ؟ شگد ناس فقدت أهلها و احبائها بدون سبب

شگد ناس أتأذت وشگد أرواح راحت غدر وهدر بسبب العصابات و الماڤيات الي انترس منها البلد ..

زين هي شحالهة شدتسوي بالغرفة هسة ؟ فاتت مقهورة ومكسورة من عندنا كلنا أروح يمها ؟ ردت أنهض بس ماگدرت اباوع بوجهة حتىٰ شگلهة أقل كلمة مني راح تنرفزها ..

بقيت نايمة علىٰ ظهري وعيوني بالسگف وجهة تفكر بخالة أمل وجهة بجُمان وگلبي يسعر بين الاثنين ..

******

"رغد"

فتت للغرفة شفت الحجية نايمة والسبلت بارد ومامتغطية كلش رفعت البطانية غطيتها بيها .. شگد تكره تتغطىٰ كلش تگول يخنگني دائماً تخلي الغطىٰ للنص خفت عليها تتمرض و قللت درجة السبلت ..

فتحت الجرار طلعت الملفات اتنهدت بضيق من باوعت الهن هذي القضية تعبتني كل ما أفكر بالطرف المقابل أنزعج ما أخاف بس شعور الضيق يحتويني ...

بذلت كل طاقتي وجُهدي بيها جمعت كل الأدلة ألي تثبت أنُ هذي العائلة من ولدت الطفلة أنطتها لأقربائهم برضاتهم وكل كلامهم وكل شيء قدموا وادعوا بيه هو كذب  ..

والسبب كان أنُ هم عائلة يحبون السفر والونسة والراحة وهاي الأنسانة من ولدت الطفل وبقىٰ عندها أسبوع وشافت شلون لازم تهتم بيه وتتعب أله وتسهر الليل علمودة رفضت وما اتحملت الوضع وهي من النوع الي تريد تسافر وتتونس وبس ماتريد المسؤولية ...

وكانت رافضة الأطفال لكن حصل فـ قررت تنطي الطفلة لقريبتها ألي هي أيضًا تكون صديقتها المُقربة وبما أنُ لمياء ما يصير عندها أطفال قررت تاخذها وتربيها هية ..

شهگت وحچت بدموع ..

-لمياء: وهسة عمرها ٦ سنوات متعلقة بيها وأحبها أكثر من روحي ما اگدر علىٰ فراقهة دقائق مو ياخذونها مني أموت والله

لمتها لحضنها وهي تشدد بحضنتها بقوة ..

-رغد: مو بكيفهم ؟ مو بعد كُل هلسنوات والتعب الي تعبتي انتِ يطالبون بيها وين چانوا ٦ سنوات ؟

-لمياء: لأن بعد ماولدتها لحد هذي اللحظة ماصار عندها أطفال

-رغد: وهسة يلة حست بالنعمة الي چانت عندها وفقدتها ؟

-لمياء: خايفة لأن عندها تقارير طبية علىٰ أساس بسببها سلمتني الطفلة علىٰ أساس أنُ هي بهذاك الوقت چانت مريضة وحالتهة ماتسمح إلها تربيها

-رغد: لا تخافين تحريت وعندي أثبات تقاريرها مُزورة وغير حقيقية

أخذت نفس وگالت بقلق وتوتر ..

-لمياء: مالي غيرج بس بنفس الوقت ما أريدج تتورطين هذول عائلة مو منهم لله شياطين فلوسهم تكرف الدنيا ويجيبون بيهن أكبر راس استشاريت أكثر من مُحامية ومن عرفتهم ماقبلت

-رغد: هذا شغلي ودوري انا محد يفرض نفسة عليه بالقانون القانون قااانون فوگ الكُل ويمشي علىٰ أكبر شخص وفلوسهم وسلطتهم علىٰ نفسهم هذن مايشتغلن يمي

باوعت للطفلة وحچيت بأبتسامة ..

-رغد: تحبين ماما أنتِ ؟

-اي

-رغد: ماتردين تعوفينها ؟

-لا لا

هزت راسها وحچت الكلمة بسُرعة وكأنُ فهمتني ..

-رغد: وهيه هم ماراح تعوفج

ضحكت وهي تلف أيديها عليها حيل هزت رأسها بأبتسامة واسعة تشرح شگد متعلقة بيها وتحبهة ..

-رغد: محد ياخذج منها كل شخص يتحمل نتيجة غلطة

-لمياء: نموت والله نموت اني وابوها اني عايشة علمودها علمود أشوفها گدامي تكبر أخاف عليها أكثر من كل شيء لو تمرضت اتمرض وياها كبرتها وأتحملت لخاطرها هواي لخاطر تكبر وكل شيء يتوفر إلهًا وماتحتاج شيء وماتلگاه وهسة يردون يحرموني منهااا ليشش

-رغد: أطمئني محد يحرمج منها كل الي عليه أسويه علمود تبقىٰ وياچ وراح أجيب كل دليل ومُعلومة تثبت أنُ هم برضاتهم انطوها وبدون اي ضغط وبدون اي تدخل بس لأن همة عائلة مُهملة ومو گد مسؤولية الطفلة ..

هزت راسها وگالت بأبتسامة حزينة ..

-لمياء: بس انا خايفة عليچ ديري بالج منهم .

-رغد: البي يزود يوگف گدامي ويمنعني

رجعت لواقعي وأخذت الملفات وطلعت بالصالة موعد الجلسة بعد 3 أيام والمُحامين الي موكلينهم من أقوىٰ و أفضل المُحامين بحيث كل ألي أجيب طاريهم يمة يفز ويگول

-محد يگدر ألهم اقوىٰ القضايا كاسبينها

أتوتر وأقلق.. وما أخفي علىٰ نفسي وأكذب هلشعور أخاف أحيانًا بس الإرادة الي عندي أقوىٰ ومن تصير صورة الطفلة براسي أشتغل بدون ما أفكر بالمقابيل شنو

فتحت الملف الي يتضح بيه أنُ هذي العائلة صاحبة مشاكل وهواي قضايا عليهم سابقاً بس طافرين منها وطبعاً وأكيد السبب فلوسهم تطمطم وتنسد بيهن ..

وبما أنُ المُحاميين ألي موكلينهم شطار وماينغلبون هنا يعني حتىٰ لو ماعندي شيء مُهم احچي فـ ميصير أسكت لو لثواني لازم أبقىٰ أدافع علمود القضية لأن إذا أسكت لدقيقة گدامهم هذول ياكلون حقي ..

بقيت لساعات أشتغل وأدقق بيهن عيوني نملت فتحت تلفوني باوعت للساعة بـ ٤ إلا ربع الفجر أنصدمت كل هلوقت انا چنت أشتغل بيه واگول ليش تعبت !!

دخلت علىٰ الرسائل لگيت خالة ام مصطفىٰ وشمس مراسلتني فتت علىٰ رسالة شمس چانت .

"هلو حبي "
"شلونج"

رديت عليها وطلعت رجعت فتت علىٰ خالة ام مصطفىٰ چانت بصمة ومحتواها ..

"حبيبة رغود شلون صارت جُمان والله بقىٰ بالي يمها خالة سودة عليه هلبنت تعلعلت الله يشافيها ويعافيها "

بعدهة دازة بصمة ..

"انتِ شلونچ خالة هم تعبتي وياهة إذا تحتاجوني بس خابريني أمانة الله عليچ وعلي يمة أجيكم ركض ما أتعايز وهنا مصيطف بعد روح أمة لو لزاخو يوديني مايگول شيء "

وبنهاية البصمة سمعت صوت مثل الي ضربت أحد .. ضحكت شگد حلوة هلمرية ونفسها تخبل وسوالفها بعد أحلىٰ خطية كل يوم تسأل وتدزلي رسائل إذا ماتجي

جاوبتها وطفيت تلفوني وبقت نص الرسائل معلگة يسألوني عن سبب عدم تواجدي هاي الأيام.. شجاوبهم مايدرون انا بنص الضيم والبلاوي طامسة ..

تعاجزت أنهض للغرفة تعبانة ومابية اگوم مددت نفسي ونمت علىٰ القنفة حتىٰ بدون غطىٰ مُجرد لگفت مُخدة من الموجودات وحطيت راسي عليها

ماگدرت أنام بشكل صحيح أحس نفسي نايمة بس بنفس الوقت أسمع واحس بالي حوالي بين الغافية وبين الصاحية جاي أسمع أصواتهم يمي ..

-عوف: بس لگمة علىٰ الأقل

-جُمان: گتلك ما أريد

-عوف: هايهية براحتج التردينة يصير

-جُمان: هههههههه عفية لتصير حنين حتىٰ تغطي الصار بحنيتك

-عوف: حاس بيج افتهمج وماگدر اللومج علىٰ أدري بيج متأذية حيل

-جُمان: همزين تدري

-عوف: انا أسف ... يمكن مايفرق عندج أعتذاري بس جُمان لو تاخذين روحي أهون الي من شوفتج هيچ

-جُمان: ليش تخاف عليه ؟

-عوف: أكثر من روحي

-جُمان: لو فعلاً هلشكل چان رجعت الي امي بنفس اليوم وماتركتها وعيشتني بهذا الموقف و الشعور

-عوف: ليش ماجاي تفهميني ؟ اروحلج فدوه لا تعذبيني أكثر لا تحسسيني أخر شيء مهتم بيه هذا الموضوع

-جُمان: هههههه هو هيچ

-عوف: ميخالف جُماني أثبت الج عن قريب

-جُمان: بعد ميحتاج

-عوف: شلون ؟

عم الهدوء لثواني بعدها نطقت وگالت بصوت هادئ ونبرة مختلفة عكس الچنت أسمعها قبل شوية ..

-جُمان: أريد نمبر وان

-عوف: شنو ؟

-جُمان: النستلة ألي أحبها أحس مشتهيتهة

-عوف: هسة بهلوقت ؟

-جُمان: تمام أنسىٰ ماكو داعي

-عوف: لا لا لا

-جُمان: يعني راح تجيبهة ؟

حسيت صارت حركة يمي وگال ..

-عوف: ولو ماكو أحد مفتح بهلوقت بس راح افرلج السناتر والمحلات كلهاا واجيبهة جُماني

-جُمان: تمام

بعدهة فعلاً عم الهدوء وبعد دقائق مرت رفعت راسي بثقل وگعدت شفت محد موجود رفعت المُخدة وأخذت الملفات ورجعت للغرفة ولفراشي

نمت وماعرف شگد مر من الوقت فزيت علىٰ صوت ألباب يندگ اتململت واتعاجزت انهض نعسانة ماگدر أفتح عيوني ياربي كل ما أحاول أنام محد يخليني ..

حاولت أغلس وأكمل نومتي بس صار يندگ مرة ومرتين باوعت للحجية نايمة ما فزت نهضت امشي ودايخة من النعاس مابية اخطي خطوة سريعة خطواتي ثقيلة

فتحت ألباب اباوع بتك عين وأجاني صوت عوف وهو يحچي بلهفة وخوف ..

-عوف: رغد جُمان يمج ؟؟

بعدني ما مصحصحة وما مستوعبة بقيت اباوع اله وساكتة رجع گال ..

-عوف: رغددد انتِ ويااااي؟؟

-رغد: وياك وياك

-عوف: جُمان يمج ؟

فتحت الباب باوعت للغرفة فارغة محد موجود يمي بس الحجية باوع وياي حسيتة صار يرمش بصدمة ..

-رغد: لا ماكو و شتسوي يمي ؟

-عوف: ماكو ماموجودة !!

حسيت كلمتة وعتني وخلتني أستوعب بسرعة جاوبتة

-رغد: شجاي تگول عوف تلگاها موجودة بفد مُكان چا وين تروح

-عوف: بكل مُكان وزاوية دورتها رغدد

-رغد: ماشفتهة يم منار ؟

-عوف: بابا منار وزوجهة نايمين شتسوي يمهم فهميني

-رغد: شوفهة !!

ابتعد عن الباب بحركة سريعة وقبل مايوصل لباب الغرفة طلع قاسم منها انصدمت ورحت أتقربت يمهم باوع لعوف وگف بأستغراب وگال ..

-قاسم: شكو شبيكم ؟

-رغد: جُمان يمكم ؟

-قاسم: شتسوي يمنة من اخر مرة ماشفتهة انا بعد

-عوف: الكاميرات

گال الكلمة ومسح وجهة بحركة سريعة وراح مشيت وراه أمشي ومصدومة ماجاي أعرف شصاير وماجاي أستوعب شيء

وگف يرجع بيهن وگفت يمة ماطلع أي شيء ماكو مالها أثر تخوصر وبلع ريگ باوعت لوجهة الي اعتلتة ملامح ماعرفت افسرها صدمة ؟ علىٰ خوف علىٰ قلق وتوتر كلهن حسيتهن بيه بلهحظة

عافني وطلع صعد فوگ سريع .. هرولت سريع بالبيت أدور عليها بكُل مكان صرت أصيح بأسمها بس ماكو رد وماكو إلها أثر مثل فص ملح وذاب !

وگفت بمُكاني بللت شفتي وهمست بداخلي .. معقولة انهزمت !

بس لاا ماجاي اگدر أستوعب الفكرة حتىٰ مستحيل متسويهة وليش تسويهة حرت واحتاريت فكرة تاخذني وفكرة تجيبني عوف بعد مانزل من صعد لسىٰ

وين راحت طلعت أمشي بس أحس رجلية لزمتهم الرجفة من الخوف أهمس بداخلي ياربي مو گد حمل مصايب بعد أكثر لا تختبرنا بيها أرجوك دخيلك يارب ..

رفعت نظري من حسيت صارت حركة نزل بثقل وجهة مطعون ومخطوف لونة مشحوب ينزل البارت ويوگف بيها ثواني يله يرجع يحط رجلة علىٰ الباية الثانية

أستغربت وخفق گلبي من شفتة أبد مو طبيعي ملامحة مو طبيعية گعد علىٰ الباية وشبك أيديه ببعضها ورفع راسة اجت عيني بعينة يباوع الي بصدمة ..

رجفت شفايفي بخوف أول مرة اشوف شكلة و وضعيتة هيج همست بقلق وخوف ..

-رغد: عوف شبيك ؟

ماجاوبني بقىٰ يباوع الي بنفس النظرات وساكت وهو شابك أيديه ويزفر نفس ورة الثاني

بهلثواني اندگ ألباب انصدمت واستغربت رفع راسة شد علىٰ فكة اتنهد وهمس بصوت مبحوح ..

-عوف: فتحي الباب رغد

ميلت راسي بأستغراب اجة قاسم راد يفتحة وگفة وگال

-عوف: روحي انتِ فتحي

رجف گلبي من صدگ ثقلت خطواتي حسيت أكو شيء غلط أكو شيء جاي يخوفني ويوترني أفتح الباب

وصلت للباب رجفت أيديه وثقلت صارن ثقال لدرجة ماگدر ارفعهن مادررري ليش بس من شفت شكلة شلون مشحوب وملامحة مطعونة ومخذولة  الرجفة ماعافتني

كورت أيديه وضغطت بقوة عليهن وفتحتهن وگفت أخذت نفس وفتحت ألباب

فتحت عيوني علىٰ وسعهن وجمدت بمُكاني الصدمة ألي احتلتني وگفت كل حركة بجسمي خفق گلبي بلعت ريگ بخوف وتوتر دگت طبول الخوف بحسمي والف علامة أستفهام صارت براسي من شفت جُمان الي واگفة بالباب و وياها خالة أمل...

يتبع ...

للحكايا خفايا

توقعاتكم 🥺💔 ؟

حسابي بالانستا
rita.almukhtar