#طوبى "جنة طوبى"
#جمان_فريد
#الجزء_الثامن_والثمانين "سجن يوسف/مقاومه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الحمد
قال رسول الله ﷺ:
« إذا قال العبدُ : ( الحمدُ لله كثيراً ) قال الله تعالى :
اكتبوا لعبدي رحمتي كثيراً ».
صحيح الترغيب (1578)📗 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 قويّ التوكل لا يُهزم، والله إذا كلَّف أعان🍃
_________________________________________
في فيلا المحجوب..
اللي كان حابس روحه في مكتبه..
دقت عليه مرته الباب بعدين فتحاته وخشت..
كانت تشوفله بحزن بعدين قالت..
/محجوب..
هو كان يشوف في الفراغ ماغيرش نظره ليها لما كلماته..
نبيله؛طوبى..
شافلها طول بنظرات خوف..
بلعت ريقها وقالت..
/طوبى ولت للجالي..
ثبت نظراته المصدومه عليها..بعدين قال..
/من قالك؟
نبيله بحزن؛توا رؤوف اتصل بيا وقالي..جي خداها من حوشها..
ناض من مكانه وهو مازال يشوفلها بنظرات الصدمه بس هالمرة غرقت بالدموع..غير نظره للطاوله شاف لتليفونه..خداه بعدين طلع من حداها بسرعه..وهي لحقاته..
🍃🍃🍃🍃🍃
"عندي بغض شديد اتجاه الشتي وانتي تعرفي يقيدك يحبسك يخلي نفسك كئيبه"
فاتن بضحكه:هداكا الخريف مش الشتي..الشتي فصل الرومانسيه..
مختار؛للرومانسيين اللي زيك..
ضحكت وحركت راسها يمين ويسار..
خشت عليهم امينه وهي جايبه لكل حد فيهم حاجه طالبها..
مختار قهوة مفلتره..اما فاتن سحلب..
امينه؛تفضلي..
خدت فاتن طاسة السحلب وقالت.
/شن جو منمن..
امينه:تمام الحمد لله..ومدت لمختار القهوة..
خداها وقال:امينه ماخاطركش تروحي تشوفي ماليك..
امينه؛اخويا سافر للخليج ماعنديش حد اروح عشانو..
مختار:اها صارله منها؟
امينه؛البركه في حضرتك..
ضحك وقال:اني زكيته بس وهما لما لقوه يستاهل وافقوا عليه.. امينه بإبتسامه:ربنا يكرمك ويفرح قلبك..
يدوب ابتسم وشرب من القهوة..
فاتن وهي تشوفله بإبتسامه قالت..
/صابرين وين؟
امينه؛في قوظتها بتذاكر..
فاتن؛بعدين نركبلها..
امينه هزت راسها وقالت..
/مش عاوزين مني حاجه تاني؟
مختار شاف لفاتن..
حركت راسها بالنفي..
هو قال:تقدري تمشي..
مشت امينه طلعت من حداهم..وهما قعدوا يشربوا في هدوء..
مختار سرح بتفكيره..وفاتن مركزه معاه..
كيف جايه بتتكلم...
يسبقها صوت غاضب جاي من برا يقول..
"اطلع ياعديم الضمير اطلع "
قعدت تشوفله وعيونها متوسعات بصدمه...
اما هو عقد حواجبه وحط فنجانه وناض طول..
🍃برا..
المحجوب وهو في حاله غضب شديد والحرس يباعدوا فيه..
/يامجرم..ياعدو نفسك اطلع اطلع واجهني يافاجر..
طلعت صابرين للفيرندا وهي مفزوعه وقعدت تتفرج..
ع طلعة مختار وهو يقول..
/ارخوه ارخوا..
تباعدوا عنه الحرس..
والمحجوب طول قدمله بإندفاع وغضب شديد وضربه بقبضة يده ع وجهه..
خلا فاتن تصرخ من الفجعه..
وصابرين حطت يدها ع فمها وهي مصدومه..
المحجوب وهو داهش قال بغضب..
/انت شني قولي شني!؟ مستحيل تكون بني ادم مستحيل تكون ولد ورده ولطفي..تي هادي اختك اختك ياعديم الرجوله..
مختار وهو يشوفله بكبر..
/قاعد محترمك ماتخلنيش نغلط فيك..
المحجوب بسخريه..
/احترام!! تي وين تعرفه انت !؟ اي شي ليه علاقه بالاخلاق مايعرفكش ولاتعرفه...تعرف انت شنو..انت بذرة شر انزرعت في هداكا الحوش وكان عنده الحق بوك لما قطف شتلتك وطلعك منه..
فاتن كانت تسمع وهي تشوف لمختار بنظرات ألم..
المحجوب:هونا اختك ولت لراجلها ولت للكلب اللي حطيت يدك في يده وعاونته بش يخطف بنتها..نقمت عليها من اللي داراته معاك في قصة المطحن يامجرم..
فاتن بصدمه؛شن يقول هدا!؟
مختار بتهكم:لو نزلت السمي ع الارض مختار وراها...قدمله ورفع سبباته في وجهه وقاله..راجل اختك وبنته هما اللي عطوها لهداكا الافاق المريض هما اللي رموها بإيديهم للنار..وواحد زي هدا مفروض تتوقعوا منه كل شي..ضحك بسخريه ونزل يده وقال..لا كيف تتوقعوها منه لازم تتوقعوا مني اني بس الشر كله ولا..!؟
المحجوب قعد يشوفله بإزدراء واسف..
مختار:انت بالذات اخر واحد تجي دير بطولات هني وتتشدق قدامي بالاخوه والرجوله..وانت من بعد موت اختك كنت زيك زي خوتك ناسيين صغار اختكم وهايمين في حياتكم..بعد مااستغنوا عنك جاي بدير روحك مهتم لامرهم وحارقك اللي صاير فيهم..جاي تتهجم عليا وتلوح في الافتراءات يمين ويسار وانت مش خير مني في شي..زاد قدمله وحط عيونه في عيون خاله وهو يشوفله بنظرات مخيفه ماكره وقاله..
/حتى البنت خطفوها قدام حوشك وانت اللي طلبت تخلي الزيارة في حوشك...غمز بعينه وقال..علاش !؟
المحجوب شده من جاكيته وقال بغضب..
/ياخسيس ياقذر..وطاح فيه ضرب..
الحرس جو بيقدموا مختار مد يده ومنعهم..
وفاتن تعيط وتقول..
/خليه..خلاص ياسر..
وصابرين فوق تتفرج بنظرات كلها شماته..
غيرت نظرها عنهم لماشافت بوابه العمارة مفتوحه وسيارة رضا خاشه..رضا اللي وقف السيارة ونزل يجري..
وصل فيهم وباعد المحجوب عن مختار وضربه بقبضه يده بكل قوه لين طيحه ع الارض..
التفت لمختار وقاله:كيف خليته يضربك هكي!..
مختار وهو شاد انفه قال..
/لوحوه برا..
ومشي خش داخل وفاتن معاه..
التفت رضا للحرس وقال..
/سمعتوا شن قال!؟
طول نفدوا وخدوا المحجوب اللي كان دايخ من الضربه ورموه جنب سيارته قدام العماره بعدين خشوا وسكروا البوابه...
🍃داخل ..
ركب مختار للدور التاني وهو يقول..
/مايلحقني حد..
وقعدت فاتن في حالة خوف وقلق عليه ومنه في نفس الوقت..
شدت رضا اول ماخش وهي تقول..
/شن قصة خطف بنت طوبى!؟
رضا بصدمه:شني!؟
فاتن بإستغراب؛انت ماتعرفش ولاتستغبا!؟
رضا:لا والله منك نسمع ماعنديش علم بحاجه زي هادي بكل..
فاتن:هدا شكله خاله ولا؟
رضا؛ايه خاله..
فاتن؛جاه وقاله اختك ولت لراجلها..وانت ساعدته يخطف بنتها..ونقمت عليها ع اللي داراته فيك شن صاير بالزبط!؟
رضا قعد يفكر جي في باله حكاية المطحن اللي معاش تكلم فيه معاه مختار نهائي..وفعلا حكايه الخطف من اولها لأخرها ماعنداش عنها أي معلومه...
رضا فوق صدمته من اللي داره مختار..اللي صدمه اكثر انه دار هدا كله بدون مايعطيه ادنى علم وهادي اول مرة تصير...علاش!!!؟..
🍃🍃🍃🍃🍃🍃🍃
خشوا بالسيارة لشارعهم وهما يهدرزوا..
جميله:والله مانحبهم مناسبات الشتي لكن شن بدير زيه زي خوته..
:هو هدا وبعدين كله في الصاله..
جميله:حتى كان ياحاج كله تعب ومرض..
وصلوا لباب الفيلا متاعهم...
شافوا سيارة كيف درست قدام فيلا الجالي..
وينزل مرش السياره من الجيهتين..
الجالي رفع يده وقال..
/جار..كيف الحال..
رد عليه راجل جميله وهو يجامل فيه مجامله..
اما جميله قعدت مركزة في المراة اللي معاه..توسعوا عيونها بدهشه لما عرفتها..
وطوبى قعدت تشوفلها بإبتسامة ألم وهي تتفكر في اخر لقاؤ بيناتهم وفتها وصتها جميله ونبهت عليها ماترجعش للجالي مهما صار..
جميله تفكرت نفس الذكرى وهي تتسائل بصدمه..
شن اللي خلاها ترجعله!؟
درقت عنها لما خش الجالي بالسيارة والباب تسكر وراهم تلقائيا...
راجل جميله:هاه ريتي صار ماصار بيناتهم وفي النهايه ولت..
جميله رفعت حاجبها وقالت:مش قلت معاش دخلنا بحد..
شافلها بطرف عينه بعدين خش بسيارته للفيلا متاعه..
🍃داخل فيلا الجالي..
درس السياره تحت مظله كبيره وقال..
الجالي:انزلي..
فتحت الباب ماباش ينفتح...
ابتسم نص ابتسامه وفتح التأمينه..
هي غمضت عيونها وفتحتهم محاوله لضبط اعصابها...
بعدين فتحت الباب ونزلت..
وهو نزل بعدها..وفتح الباب الخلفي وطلع شنطتها..
هي قعدت دور بعيونها في الجنان لاحظت انه متغير هلبه..
بس تفاجئت وين شافت كاميرات راكبات في كل تركينه..
شويه جي جنبها وهو يتكلم بالتليفون وكان مكبر الصوت مفتوح..
/خلوا عيونكم مفتوحات عشرة ع عشرة...
"كون هاني باش مهندس الجماعه منتشرين في كل تركينه"
الجالي:كويس..ونهي المكالمه..وشافلها..
لقاها مركزة بنظرها لباب الفيلا الدخلاني وهي تقول..
/هيا..
هو شد يدها بقوة وخداها معاه..
هي كانت حاسه بكتمه..صدرها ضايق..وقلبها مغموم..
وصلوا في الباب فتحه ودخلها وخش وراها..
هي لما خشت زادت انغمت..كارهة الفيلا ومشمئزة منها حتى هي
بس وهي تمرر في نظرها عليها استغربت في ديكورها كله تغير..ثبتت نظرها ع مكان اللوحه متاع الآية القرآنيه اللي كاتبها التارقي...جو بين عيونها نظرات عيونه الاخيره ليها..
كانت غريبه اول مرة تشوفها..
"طوبى"
استاقظت وشافتله..
الجالي:جنه في دارها..
طول طوبى مشت تجري للدروج وركبت بسرعه..
وهو وراها يضحك..
🍃وصلت فوق وماركزت ع شي مشت للدار طول..
فتحت الباب وخشت..
لقت مراة خمسينيه مش متحجبه انيقه ونظيفة المظهر كانت مقعمزة قريبه ع سرير جنه..مشت تجري لسرير بنتها لقتها راقده فيه..
طوبى بفرحه ولهفه وشوف الدنيا قالت..
/روحي..مامتي..وطبست عليها وخدتها ودموعها تنزل..
وضمتها ليها..وقعدت تشم في ريحتها وهي تقول بشوق وحب..
/مامتي..قلبي..عمري..ااه يابنيتي..ااه..انتي روحي اللي رجعتلي..روحي رجعتلي..ااه يابنيتي..لو تعرفي شن صار فيا الايام اللي فاتوا ياروحي..
والمراة تشوفلها بحزن..
خش الجالي..شافاته..اشرلها بعيونه تطلع..
طول طلعت وهو سكر الباب وقعد يتفرج ع حالة طوبى وهي ضم في جنة بشوق..
طوبى وهي مغمضة عيونها..
/روحي..روحي..بنوتي..قلب ماما..
وهو يشوفلها بإبتسامه بعدين قال..
/مرات تنوض من نومها تبكي وماترقدش الا في حضني..
دارت روحها ماتسمعش فيه..
هو قربلها بهدوء وضمهم الزوز لحضنه وهو يقول..
/انتم احلى حاجه في حياتي..
طوبى شمت ريحته حست بالغثيان..حطت يدها ع صدره وقعدت تبعد فيه..
وهو تباعد عنهم بالشويه وعيونه ع طوبى..
شافها ردت جنة لسريرها بهدوء..بعدين التفتت عليه بدون ماتشوفله وقالت..
/نبي نصلي..
هو ابتسم وقال:تعالي شوفي..
وخداها معاه وهو شاد يده بقوة لأنها كانت تبي تجبدها..
وصل بيها للجناح متاع دار النوم...
خش بيها داخل ووقف..وقفت وهي تمرر في نظرها ع دار النوم..غيرها كلها بفرشها بديكوراتها..
لكن مهما يدير فيها ويغير مش حيغير اللي صار في هالمكان..
اللي فيقها ع كابوس بشع وخلا حقيقته تتجلى قدامها..
الجالي:وضيت عليها توصيه من برا..ايطاليه اصليه..
خداها معاه لدار الملابس وهو يقول..مش هكي بس..
خشوا لدار الملابس..
قعدت تمرر في نظرها عليها كانت متغيره هلبه..افخم من الاولى..وفوق هكي مامخلي ماواخدلها..
فساتين وملابس سهره..ملابس طلعه..ملابس استقبال..مكان خاص فيه شناطي من كل الانواع واغلى الماركات..
الاحذيه..منها اللي كعب واللي حاطي..وفي حتى السبيدروات..
بس اللي لفت نظرها هو الركن اللي معلقات فيه العبايات والجلابيب والشاربات..وجنبهم تلاته ملايات صلاه..
وحده لونها اخضر..والتانيه ازرق غامق..والثالثه رمادي..
هو كان يراقب في ردة فعلها ولاحظ انها مااهتمتش الا بركن الحجاب بس..ابتسم بعدين قال..
/لو في شي ناقص قوليلي...
مابتش ترد عليه..
الجالي؛ايه حقه..الجهة هديكا اللي في ادراج تفتحيهم تلقي انواع المكياج اللي تحبيه وفي سيت كامل من العطر متاعك..
ولو في شي ناقص انتي قولي بس واني نجيبه..
جبدت يدها منه ومشت طلعت من حداه..
هو غمض عيونه في محاوله منه لضبط اعصابه بعدين فتحهم ولحقها..
شافها خشت دار جنه..سرع خطواته لين لحقها وخش وراها..
لقاها تفتح في الشنطه متاعها..طلعت ملاايتها والمصحف متاعها وعطر العود اللي تعطر بيه فالملايه..
هو قعد يشوفلها بصمت..يتأمل فيها وبس..
فيها شي متغير متغير هلبه زايدها جاذبيه..فيها قوة ماكانتش فيها قبل..عناد باين في ملامحها..حس بشي يجي منها ويخش في قلبه..يخترق فيه اختراق ومخليه متولع بيها..
عقدت حواجبه لما شافها مطلعه التليفون متاعها..
قدم وجبده منه..
قعدت تشوفله بصدمه..
الجالي:خليه عندي توا لين تصلي..
وقفت ع جيلها وقدمتله وهي تقول..
/هات التليفون جاي..
الجالي حرك راسه بالرفض..
تأففت بعدين قالت بحده..
/جالي جيب التليفون جاي..
هو قال:اسف ياقلبي تليفونك هدا انسيه..
ولف وطلع من حداها..
وهي لحقاته وكانت تقول بانفعال:جالي جيب التليفون جالي..
هو قعد يمشي لين وصل لسياج الدروج وحدف التليفون من فوق..
قعدت تشوفله بصدمه..
هو التفت عليها وقال..
/جبتلك غيره بشفره جديده..حاليا مش حيكون فيها رقم حد غيري..رقمي اني بس حبي تمام..
تبدلت نظرات عيونها لنظرات حقد..
بعدين لفت ومشت وخلاته..هو تنهد بإبتسامه ومشي نزل من الدروج وقعد يغني..
زيديني عشقا زيديني..يااحلى نوبات جنوني...
لين وصل تحت..وخدي التليفون ومشي بيه للكوجينه فكه وطلع الشفره كسرها ولوحها في القمامه...
بعدين طلع بالتليفون للجنان لوحه ع الارض وخدي باله وقعد يخبط فيه بيها لين خلاه اجزاء مجزئه...حط الباله ع جنب..
وخبط كفوفه ع بعض وكأنه ينفض فيهم....تنهد بتهكم..وولى خش داخل وسكر الباب بالمفتاح..
🍃وطوبى فوق..خدت بيجامه من شنطتها ومشت خشت للحمام وسكرت عليها الباب بالمفتاح..
خدت نفس وحطت راسها ع الباب..وغمضت عيونها وبدت تبكي بصمت...
🍃🍃🍃🍃🍃
"رقمها مقفل"
فردوس بقلق بالغ؛ياربي شن بيرقدني ياربي..
مطيره بخوف؛مافيش غير ان فايزة تكلم اخته تشوفه..
اميمه بقلق:ايه صح فايزة كلمني نسرين..
فايزه ودموعها في عيونها قالت..
/باهي..
🍃ونسرين في هالوقت في حوشها مقعمزه تبكي من لما سمعت باللي صار مانشفوش دموعها..
جاها ولدها وهو يقول..
/ماما..
هي ضماته وقالت...
/شن تبي حبيب ميه..
طلب منها بلغة طفوليه ميه..
رفعاته ومشت بيه الكوجينه..
دق باب الحوش..
تنهدت ومشت بيه للباب بش تفتحه..
/منو؟
"اني"..
فتحت الباب طول..
خش المهدي شاف ليحيى قرصه من خده وقال..
/شن جو..
سكرت الباب وقال..
/شن بيكون بعد عملة خوك السودا...
المهدي خش داخل بدون مايتكلم..
نسرين؛خل نعطي ليحيى ميه ونجيك..
☘خش المهدي للصاله وقعمز فيها..وطول سرح بتفكيره في الكلام اللي صار بينه وبين طوبى..
شويه خشت عليه نسرين..حطت يحيى في الحباس..
ومشت قعمزت جنب خوها..
المهدي:قالتلي مش محتاجاتك غيري اولى بيك..
نسرين:هي هكي قالت!
المهدي:فاجئتني هلبه..
نسرين قعدت ساكته وهي مضايقه..
المهدي:في عز الهم اللي هي فيه فكرت في اختها..
نسرين:مادارتش ع خاطرها شويه سدرة..
المهدي بحزن؛تفكرت مرة جتنا للحوش وهي صغيره طلبت منها تعطيني رقم سدره بش نكلمها..لما خطبها الفاندي الله يرحمه..نتفكر في روحي قلتلها كلام مش عارف كيف قلته لطفله حملتها ذنب اللي صار فينا اني واختها رغم ان الذنب كله في الاصل ذنبي اني..مافي حد جبرني ندير اللي درته لو كنت صبرت عليها وقعدت معاها لين ربي دار حل ماكانش هادي حالي وحالها وحالي طوبى معانا..
نسرين؛نقولوا ونعاودوا في كلمة ياريت وعمرها مانفعت في حاجه..خلاص توا اللي صار صار..ورد الفايت محال..
المهدي ودموعه في عيونه..
/تعرفي يانسرين..اني توا همي الوحيد سدرة تولي صحيحه وتعوض اللي فاتها من عمرها مع حد يقدر يسعدها..
نسرين وهي تشوفله لاحظت ملامح الحسرة ع وجهه وهو يتكلم..
المهدي:اما اختها..مش حنخليها بروحها والله ماني مخليها..
نسرين مسحت بإيديها ع وجهها وقالت..
/ربي يفرج علينا ويخلصنا من هالايام السود اللي طولوا..
المهدي هز راسه وهو ساكت...
فجأه رن تليفون نسرين..
ناضت وجاباته من فوق الطاوله اللي كانت وسط الصاله...
شافت فايزة المتصله ردت عليها طول..
نسرين: ايوه فايزة.
"ايوه نسرين..نسرين كلمتوا الجالي"
نسرين بقلق:لالا علاش!؟
"من بكري نتصلوا بطوبى نبوا نطمنوا عليها تليفونها مسكر..شوفوه ياوخيتي تربحي"
نسرين:باهي سكري سكري تونشوفه..
سكرت فايزة...
المهدي:خيرها!؟
نسرين وهي دور في رقم الجالي..
/قالت من بكري يتصلوا بطوبى يلقوا في رقمها مسكر..
حطت التليفون ع وذنها..
والمهدي يشوفلها وهو عاقد حواجبه بغضب..
اتصلت نسرين بالجالي وقعدت تراجي فيه يرد عليها..
نادى تلاته مرات بعدين انفتح الخط..
"ايوه"
نسرين:وينكم؟
"في الفيلا"
نسرين؛طوبى وين..
"طوبى دوش"
نسرين انحرجت وارتبكت بعدين قالت..
/تو نعاودلك بعدين ونكلمها..وسكرت عليه..
المهدي:شني؟!
نسرين وهي محرجه..
/شي عادي روحوا للفيلا..
المهدي:كيف! هو قال بيمشوا للفندق! بليبز من اولها..
وطلع تليفونه من بالطوه وقعد يدور في رقمه..
لين لقاه..واتصل بيه طول..
نادى مرة وطول الجالي فتح الخط..
"نعم"
المهدي:وينكم؟.
"نسرين قالتلك وين"
المهدي:مش قلت رافعها لفندق..
"مابتش تقعد فيه"
المهدي؛جالي ..
قاطعه وقال..
"والله العظيم في الفيلا وهي معاي وتوا كيف طلعت من الحمام وخاشه دار بش تصلي تبي نصورهالك بش تتأكد!"
رفع المهدي عيونه في نسرين..
"كان ماعندك شي تاني خليني نسكر نبي ندوش حتى اني"
سكر المهدي في وجهه وهو يقول بهمس..
/وسخ..
نسرين في نفسها .
"اشبح شن قاله هالتافه..مش مصدقه الجالي يولي هكي هبل مرة وحده"
المهدي ناض وهو يقول..
/كان كلمتيها قوليلي..
نسرين:اقعد تعشى..
المهدي:ماعندي نيه شي..كلمي فايزة طمنيها..
نسرين هزت راسها بإيجاب..
هو مشي بيطلع وهي طلعت معاه تسقد فيه...
🍃🍃🍃🍃🍃
ومختار مقعمز بروحه في المكتب متاعه وهو يشرب ويتفكر في الكلام اللي صار بينه وبين المحجوب...
شرب الكاس في مرة وقال..
/مدام اختارت توليله تتحمل مايجيها مافيش فرق بينها وبين هديكا..هي مازال اشر وشن مايصير فيها تستاهله..
حط الكاس وخدي الشيشه وصب منها مره تانيه وخدي الكاس وقعد يشرب...
🍃فاتن روحت وقعد عقلها معاه..وقعدت تتصل كل شويه بأمينه بش تطمن عليه..
ورضا قعد حابس روحه في شقته وهو يفكر في اللي داره مختار..يبي يعرف شن قصده منه..!؟ لشني يبي يوصل معاه..!؟
..اما صابرين بعد طول تفكير قررت تتصل بأختها نجاه وتعرف شن صاير فيها...
طلعت برا العمارة نهائيا ولفت وراها وقعمزت ع كرسي خشبي طويل..واتصلت بيها وهي متكمشه في بعضها من الصقع..
نادى مرتين ردت نجاه..
"الو"
صابرين؛نجاة اني صابرين..
"شن تبي متصله تتشمتي!؟"
صابرين؛لو نبي نتشمت كنت تشمتت فيك من لما ردك الجالي لان واضح من البدايه غرضه من اللي داره..
"شن تبي"
صابرين؛نبي مصلحتك..نبيك تلحقي تحفظي باقي كرامتك اطلبي الطلاق يانجاه وخودي صغارك وعيشي في حوشك معززة مكرمه..
"شن تقولي انتي!؟ تبيني نخليهولها!!؟ تبيها تقول غلبتها وخديته منها!؟ تبيها تقول ان يحبها هي واني اللي خشيت بيناتهم!!؟ لا والله ماصايره..حنقعد ع قلوبهم ومش مخليتهم يتهنوا"
صابرين:وكان طلقك!؟
"مستحيل بوه مايخليشي"
صابرين:اها معناها مخليك ع خاطر بوه مش ع خاطرك وطوبى دار ع خاطرها العبيتر اللي مرات يخسره بوه بكل..
عيطت عليها وهي تقول..
"سكري فمك ياحقيره..وخليك في وساختك انتي وخو الكلبه هديكا اللي ماخلا مادار في عيلته تو تشوفي نهايتك كيف تكون"
صابرين ابتسمت بتهكم وهي تقول..
/مش اسوأ من نهايتك...وسكرت عليها..
تبدلت ملامح وجهها للبكي..وقعدت تبكي..
علاقتها بنجاه كانت علاقة بنت وامها ماتوقعتش يجي يوم وتبيعها ع خاطر راجل..مش غير هي بس..حتى اختها الكبيره دارت نفس شي..وغالبا ماينلاموش...صابرين هي اللي اختارت تخسر ماحد جبرها ع شي..
"شن ديري هني يامهبوله"
صابرين قعدت منزله راسها وهي تمسح فدموعها..
قعمز جنبها وقال..
/كنتي تكلمي في أختك!؟
صابرين بنبرة باكيه..
/خايفه عليها من نهاية الوهم اللي معيشه روحها فيه..الجالي عمره ماحبها كانت بالنسبه ليه مش اكثر من مغامره..اني من البدايه من لما تزوج طوبى واني حسيت ان اللي حبها حق طوبى ونجاة بالنسبه ليه جاريه مش اكثر...هادي قيمة كل وحده ترخص روحها وتبيع كرامتها..شافتله وقالت..
اسفه..
قعد يشوفلها بنظرات فيهم حزن..
صابرين:الكلام اللي قلته ماكنتش قاصداته...انت تستاهل كل خير..تستاهل احسن من البنت اللي قلت عليها..ومن قلبي يارضا نتمنى ربي يكملك ع خير..
غير نظره عنها القدام وهو مضايق وموجوع ع الآخر..
صابرين؛صدقني والله هكي خيرلك..واضح ان مختار قاعد يبعد فيك عن هالعالم الاسود ويبيك تعيش حياة طبيعيه..فهمت الشي هدا من كل تصرفاته الاخيره معاك..عندك حق انت عند مختار ليك قيمه كبيره وانت تستاهلها..اني معاش تفكر فيا طلعني من عقلك وانساني..خليني عندك زي الاخت بالله عليك يارضا ع خاطرك وخاطري.....رضا..
غمض عيونه وقال..
/نوضي بسرعه..
قعدت تشوفله بإستغراب..
هو بشي من الانفعال..
/بري قتلك..
ناضت وهي تشوفله بحزن بعدين مشت بسرعه من حداه..
هو حط يده ع صدره وقعد يمسح عليه..بعدين فتح عيونه ودموعه نزلوا..مسحهم طول...وخدي نفس عميق وطلعه..
طلع تليفونه من جيب كبوطه..
وقعد يدور فيه اغنيه لفنانه المفضل وشغلها وقعد يسمع فيها..
"لو حبنا غلطه"....
🍃🍃🍃🍃🍃
ركب الدور التاني وفي يده سفره العشي..
خش لدار بنته..لقي طوبى قاعده تصلي استغرب.. حط السفره ع الطاوله..بعدين مشي لسرير جنه لقاها فايقه وتلعب..
ابتسم ورفعها هو يقول..
/جنونتي..
ومشي بيها للكرسي قعمز عليه وقعد يلعب فيها ويهدرز عليها وهي متجاوبه معاها وتضحك..
طوبى كانت واصله لصلاة العشاء صلت الحاضره والفايته..
ولما كملت قعدت تردد في اذكار بعد الصلاه وهي تشوف للجالي وجنه..
ركزت ع بنتها كيف منسجمه مع بوها وكأنها ليها معاه من اول ماولدت..
غيرت نظرها عنهم وهي تسبح وتفكر..
الجالي حط جنه ع صدره وشاف لأمها..ابتسم وهو يتأمل فيها بأكثر منظر كان يحب يشوفها عليه..
حطت جنه يدها ع فمه هو ضحك وقال..
/تبيني ناكلك يادبه..اصلا قريب نديرها ماماتك جابتلي كيكه ..
طوبى بدت ع وجهها ملامح الامتعاض..
وهو قعد يلعب مع بنته لين ناضت طوبى من ع الصلايه..جت بتحول المصليه شافتله بريبه وتراجعت..
رفعت الصلايه وطبقها وحطتها فوق السرير اللي داره جنب سرير جنه..
بعدين شافت للسفره وقالت..
/اطلع تعشى نبي نرقد..
الجالي وهو شاد جنه:هدا ليك انتي..
طوبى:مانبي شي..
الجالي:ع خاطر جنه..انتي ترضعي..
طوبى شافتله بإبتسامه ساخره وقالت..
/من بركات عمايلك حليبي جف..
هو بدت ع وجهه ملامح الضيق..
طوبى:جيب البنت وارفع عشاك..
هو ناض بجنة وجاها وقال..
/جنه تبي ام شاده صحتها بش ترعاها..
الجالي:حتقعد عندي لين تتعشي..
شافتله بحده وقالت..
/جيب البنت..
هو عقد حواجبه وقال..
/قلت مش حتاخديها لين تتعشي..
هي خافت بس مابينتش.. غيرت عيونها عنه ومشت للطاوله..
هو خدي الكرسي وقدملها بيه حطه عند الطاوله..
طوبى؛شد البنت زين..
الجالي بضحكه:حاضر غير قعمزي تعشي..
قعمزت بالغصب..وبدت تاكل وهي مضايقه ومتوترة..
وهو واقف يشوفلها..
طوبى بحده:ماتقعدش واقف ع راسي.
ابتسم وقال..حاضر..ومشي قعمز ع السرير..
حط جنه عليه..وقربلها العابها وقعد يلعب فيها بيهم..
وطوبى تاكل وتسرقلهم في النظر...
☘وبعد ماكلت كفايتها ناضت ومشت للحمام..
وهو قعد يراجي فيها لين ولت..ناض وخدي السفره وطلع من الدار..
وهي جت لجنه..حولت ملايتها وحطتها ع سرير جنه واتكت حدا بنتها وضمتها وغمضت عيونها وتشم في ريحتها..
وجنه تحرك في ايديها ورجليها وتناغي..
طوبى:حتى استاحشتك هلبه قلبوشتي..
وجنه تناغي وطلع في اصوات..
طوبى:كل ليله كنت نحلم بيك..
دارت جنه صوت عيطه حلو..
ضحكت طوبى وفتحت عيونها وهي تقول..
/ياسلم الزرياكه..قداش استاحشت هالعيطه الحلوة..وباستها من خدها وهي تشم في ريحتها بعدين قالت..اااه ياعمري اني..
☘والجالي واقف في الباب وهو يتأمل فيهم..
ناضت طوبى بنص جسمها وقالت..
/باهي استاحشتي هادي..وبدت تغني في اغنيه الصيصان..وجنه تشوفلها وع وجهها ضحكه حلوة..
وقفت طوبى غني وقالت..
/وفي حاجه تانيه استاحشتيها متأكده..
وناضت من السرير ومشت للشنطه فتحتها وطلعت "الشكشاكه"..وولت لبنتها وهي مش منتبهه لوجوده وناسياته بكل..
قعدت تلعب باللعبه مع جنه بعدين عطتهالها..
وطوبى تشوفلها وتضحك...
الجالي:طوبى..
انفجعت..وقعمزت كويس..
تنهد بعدين مشي قعمز ع الكرسي وقال..
/رقدي جنه وخلينا نمشوا لدارنا ونتفاهموا..
طوبى رفعت جنه لحضنها وقعدت تلعب فيها ومتجاهلة وجوده..
رفضها ليه معصبه منها هلبه..بس كان يحاول ع قد مايقدر يضبط اعصابه يبي يسايسها مسايسه في البدايه ع امل انها تلين معاه..
قعد يتفرج عليها لين رقدت جنه..حطتها في سريرها وقالت..
/جيبلي ميه معدنيه دافيه..
ناض وقال:تبي ديريلها حليب..انتي ارتاحي اني ندير كل شي
طوبى وهي تشوف لجنه:انت اللي برا ارقد في دارك غير جيبلي الميه قبلها..
مشي طلع من غير مايتكلم..
وهي جهزت علبة الحليب وحطت المرضعه جنبها ع الكامدينو..وخشت السرير وقعدت مقعمزه..
شويه وجي بطرمس ميه وحطه ع الكامدينو بعدين ولى وقعمز ع الكرسي..
شافتله من فوق لتحت بعدين قلبت عيونها بملل وربعت ايديها وقعدت تشوف في الفراغ بملامح امتعاض..
الجالي:ممكن تسمعيني شويه..
تنهدت طوبى بملل..بعدين تمدد ع الفراش بالجنب وغمت روحها بالغطا..
هو بلع ريقه بعدين قال..
/عرفت نجاة عن قرب بعد وفاة خوي طاهر..كنت مش قابلها ولا مرة شفت انها تناسب عيلتنا..لكن بعد وفاه طاهر خدمتها في الشركه ع خاطره ع وخاطر صغاره...حطيتها في مكان قريب عليا..وبدت خدمتنا مع بعض اكثر شي..الكره اللي في نفسي ليها تحول لإنجذاب..شدتني قوتها وجرأتها وثقتها بنفسها..حسيتها تشبهني اني وياها مشتركين في هلبه حاجات..هي الوحيده اللي كنت نرتاح معاها نقعد ع سجيتي مش مضطر نتصنع ولاندرق شي مانبيشي يطلع..لقيت روحي نعرض عليها في الزواج شرط يكون في السر لأني عارف بوي مستحيل يخليني نردها...كنت نبي نحطه في الامر الواقع ونخليه يقبل غصب عنه..هي لما سألتها تتزوجيني وافقت طول وماهمهاش شرطي نهائي..تزوجنا..وقعد زواجنا في السر لفترة طالت كنت نفكر فيها كيف بنواجه ماليا بالذات بوي..نعرفه يفوت كل شي الا الاستغفال...وخوفي منه خلاني نندم في بعض الاحيان..ضم كفوفه لبعض وقال..مش عارف منين عرفت خديجه وهددتني يانطلقها ياتقول لبوي..
واني كنت متمسك بيها رغم خوفي..وهي لما شافتني هكي عرضت عليا نتزوج وحده صغيره بنت بنوت زي مايقولوا..مقابل سكوتها...واني قلت باهي وسايرتها وفي نفسي كنت ناوي اللي بنتزوجها هادي نطلقها ونولي مطلق ووقت نصارحهم بزواجي من نجاه ماتكونش ردة فعلهم قويه
تنهد وقال...امي ماكانت تعرف شي وخديجه اقنعتها تكلمني فموضوع الزواج..وكلمتني بس صدمتني لما قالت بتخطبك انتي..رفضت في الاول..كنت نشوفلك زي اختي نقول هادي في عيني قاعده صغيره قاعد ناشب فيها ونبصر معاها زي بنات خواتي..بس هما اقنعوني بيك..واني قلت باهي..طوبى صغيره وطيبه تو نعرف كيف نتعامل معاها ونخليها ترضى
تعرفي لعند يوم المقابله واني مش طايق نشوفك..بس لما خشيتي عليا وهدرزنا..مش عارف شن صارلي..وبعد خطبتك وبديت نكلم فيك قعدت كل مرة نكتشف فيك شي حلو يعجبني...مانقولش اني نسيت نجاه وقتها بالعكس لكن انتي عجبتيني...وبعد الزواج..زدت عرفتك اكثر وانصدمت فيك اكثر وماصدقتش ان مازال في بشر في الدنيا فيهم طيبه وصفاء قلب زي اللي عندك..كنتي في عيوني زي الملايكه..كنت نخاف نبين جوانبي المش حلوة قدامك..في الاول فهمت نفسي اني مقيد معاك ومش مرتاح..بس اللي فهمته بعدين..اني كنت خايف نخسرك ولانشوف في عيونك نظره مش حلوة ليا..شافلها وقال..طوبى اني لتوا مش عارف كيف درت فيك هكي..كيف كنت حنفرط فيك..طوبى توا صدقيني اني معاش نشوف معاك في حد..انتي ملكتيني كلي..سيطرتي عليا..خلتيني مجنون بيك..الطلاق عندي ضرب من المستحيل..مستحيل مازال نخليك تريحي مني..اني وليت مجرم ع خاطرك..مستوعبه وين وصلتيني...معاش ولى في شي فالدنيا يهمني غيرك..
🍃طوبى وهي تسمع في كلامه في البدايه كانت منقرفه ومشمئزة بس بعدين بدت تخاف..كلامه الاخير مخيف هلبه وهي تعرف كويس وضعه النفسي...
الجالي ودموعه في عيونه:اني نحبك..نحبك من كل قلبي..
هي حولت الغطا وناضت قعمزت وقالتله..
/تبي تهدرز اطلع برا اني نبي نرقد..
الجالي:باهي خلاص ارقدي اني بنسكت خلاص..
طوبى معاش قدرت تولي ترقد..كانت خايفه منه..
قعدت مقعمزه..وهو يتأمل فيها...
حصار نظراته خنقها خنق..معاش عرفت شن دير..شاف للمصحف متاعها..ناضت من السرير وخداته من فوق الشنطه وولت قعمزت ع السرير..وفتحاته وين ماواصله وبدت تقرا سرا..
هو قال:ارجوك علي صوتك..
ماقدرتش ترده في حاجه زي هادي..
وعلت صوتها وهي تقرا..
وهو يسمع ويشوفلها..ويتفكر كيف كانت تقرا عليه وترقي فيه وهي تحتوي فيه بحنانها..الحنان اللي انقلب لقسوة شديده هو مش متحملها بس مجبور يساير..
من غير مايحس ع نفسه راح في النوم..
هي قامت عيونها لقاته راقد..
سكرت المصحف وناضت رداته في مكانه..
وولت بترقد..قعدت تشوفله كيف راقد بلا غطا...حست قلبها رقله غصب عنها..مهما حاولت تكون قاسيه لين قلبها احيانا يغلبها..بس هي هالمرة غلباته وين فكرت نفسها من يكون الجالي..
رقدت وتغطت وقعدت تشوف لسرير بنتها وقعدت تقرا في الاذكار لين رقدت...
🍃🍃🍃🍃🍃
تاني يوم الصبح..
فتح عيونه شويه شويه..
فز فجأة وشاف قدامه..لقي سريرها فاضي..
ناض مفجوع شاف سرير جنه لقاه فاضي..
طلع يجري من الدار ونزل من الدروج وهو يدور زي المجنون..
سمع صوت حركه جاي من الكوجينه.
مشالها طول وخش..
لقي جنه في قعمازها المحطوط فوق الطاوله..وهي واقفه ع الحوض ديريلها في مرضعه وتمرر في نظرها ع الكوجينه..
كانت متغيره كلها وفي هلبه حاجات جديده...
ابتسم براحه وقال..
/صباح الخير..
مابتش ترد عليه..التفتت لبنتها ومشتلها بش تعطيها حليبها..
هو خش وقال..
/شفتي شن درت فيها....جيهة للحلويات..وجهة للحار..وجهة لجنه فيها كل شي يخص الصغار لعمر السنه..
سكت لما شافها خدت قعماز جنه وطلعت من حداه..
هو قعد ياكل في شفايفه بعصبيه بعدين ضمهم داخل وغمض عيونها وفتحهم..رخي ملامح وجهه وطلع وراها..
شافها قعمزت في الصاله ع جلسة عربيه..طلعت جنه من قعمازها وحطتها في حضنها وقعدت ترضع فيها..
مشي قعمز قريب عليها وقال..
/بعد ماشفتي كل شي درته ع خاطرك هني..لازم تعرفي شن نظام الحياة اللي حتمشي عليه حاليا..
رفعت عيونها القدام وهي تسمع..
الجالي:بنخليك تقري عادي..بس حتمشي لما نكون فاضي ولو في عندك شي ضروري نفضي نفسك ع خاطرك..طبعا وانت في الجامعه اني نولي نقعد مع جنه..وابتسم..
هي فهمت قصده من كلامه الاخير..
الجالي:سيارة ليك بروحك..ماتحلميش بيها اي مشوار تبي تمشيله اني نرفعك بشرط جنه تقعد معاي..او تكوني موجوده في مكان اني نكون فيه وجنه تقعد معانا حني الزوز..
هي تسمع بصمت..
الجالي:تاني شي انسي حاجه اسمها شارع القهوة..
غيرت نظرها ليه بصدمه..
الجالي:لاماليا لاماليك..اللي يبينا يجينا..تمام قلبي..
ردت نظرها اللي كله غضب القدام..
الجالي:تليفونك حيكون فيه رقمي اني بس..ولانقولك مافيش باس تسجلي رقم اي حد تاني مايكونش من عيلتك ومن عيلتي..ردي بالك..راني رابط شفرتك بشفرتي..
نزلت عيونها لجنه وكانت خايفه هلبه لكن قاومت بش ماتبينش..
الجالي:مانبوش لعب حبيبتي..الحوش زي ماشفتي معبي من برا كاميرات وغير هكي اجرت جماعه عيونهم في كل تركينه في الشارع..اي حركه مريبه يشوفوها برا مش حيتفاهموا طول يسيحوا الدم..
طوبى شافتله وقالت..
/عمرك ماحتكسب قلبي وانت هكي..كل مالك تزيد تكرهني فيك اكثر واكثر..
هوقال:مش مهم..المهم اني نحبك..
وناض ومشي للدروج وهو يقول..
/نركب ندوش ونصلي وننزل نديرلك فطور..
هي بعد مامشي ضمت بنتها وقعدت تبكي بصمت..بعدين رفعت عيونها وغمضتهم وقالت بتوسل..
"يارب"
🍃🍃🍃🍃🍃🍃
"اول مرة نشوفه هكي منهار ومدمر ع الاخر"
عبد الرؤوف بضيق:حاس بالذنب..
غرفه بأسف؛هي هكي البريئ اللي مايدير شي يحس بالذنب..وشيطان الرجيم يدير الحق معاه..
نبيله ودموعها ينزلوا..
/اني خايفه منه مختار هدا خايفه يديرله شي تاني..
عبد الرؤوف؛ماعنده مايدير اكثر مادار ساد الحاله اللي وصله ليها..لكن يجيه يوم ويطيح حتى هو واللي داره في غيره يندار فيه...
🍃ومختار في هالوقت كان يكلم في الجالي هاتفيا..
مختار:خلاص اللي عليا درته الدور عليك تعرف كيف تحافظ ع عيلتك..
"ماتخممش فينا"
نهي مختار المكالمه وهو يقول بحقد..
/تو يخليك تعرفي ياطوبى عنادك وتسكير راسك معاي شن نتيجته...
🍀🍀🍀🍀🍀
ويعدوا من هداكا اليوم يومين..
والحال كما هو عليه بين الجالي وطوبى..
هو قاعد يوسع في باله معاها..وهي تعامل فيه بقسوة وجفاف واحيانا تجاهل مستفز ليه هو...
🍃ومن جهة تانيه..اختفي عبد القيوم ومعاش بان وماكان في حد يعرف مكانه غير ربيع. والمهدي اللي كان مشغول بهمومه ومشاكل عيلته كان ناسيه..
🍃وعيلة طوبى اللي مانسوهاش للحظه بعد مااطمنوا شويه ع حالها من نسرين..رجعوا فتحوا محل الحلويات اللي وصتهم عليه قبل لتمشي...وهما ع خاطرها يحاولوا يقاوموا زي ماهي قاعده تقاوم....
🍃ونجاة مازالت تقاوم بإستماته بش تحافظ ع صلتها بالجالي..دارت روحها تقبلت اللي صار وقعدت تمشي لحوش العيله زي قبل ومحسسه الكل انها المراة المحبه الصابره..قاعده تحاول تكبر في عيون اهله وتكسبهم وبهكي تكسب دعم وقوة كبيره تكون في صفها...
🍃اما اختها اللي كانت جاهده تحاول مقاومة حبها ان اللي نولد في الوقت الغلط اليوم حتتلقى من الصبح مفاجأه كبيره بس ماكانتش غير متوقعه بالنسبه ليها..
🍃يوم الاثنين
11ديسمبر..سنة 2018..
مقعمزه في الكوجينه تشرب في القهوة مع امينه قبل لتمشي الجامعه..
واذ به مختار يخش عليهم ومعاه رضا اللي كانت ملامح وجهه جاده..
مختار:صباح الخير..
ردوا عليه الزوز..
/صباح النور..
مختار ابتسم وقال..
/اليوم جيتكم بروحي بش نبلغكم بشي يفرح ويزعل في نفس الوقت..
قلب صابرين دق بقوة والدموع تجمعوا في عيونها..
ورضا يشوفلها بطرف عينه..
امينه وهي مبتسمه بعدم فهم..
/ربنا مايجيب الزعل..
مختار تنهد وقال..
/رضا حيستقر ان شاء الله في النمسا ويدير شغلي غادي..
امينه قعدت تشوف لرضا وهي تحاول تحافظ ع ابتسامتها بالقوة..
اما صابرين كانت تشوف لمختار عادي ظاهريا..وقاعده تبلع في ريقها اللي قاعد ينزل عليها زي السم..
مختار:ليا فتره نجهز فيه للمرحله هادي وتوا ولى جاهز ليها ولحاجه تانيه..
قعد رضا يشوف لصابرين ولمعة الدموع في عيونه..
مختار بإبتسامه:واخيرا رضا قرر يخش القفص الذهبي.
قلب صابرين انشق شق بس كانت تقاوم بكل قوتها..
مختار:اخر شهر ديسمبر ان شاء الله حنديرله حفلة خطوبة غادي..ومن توا حنبدالكم في الاجراءات بش تكونوا معانا في يوم زي هدا..حني عيله وحده ومفروض مانفارقوش بعض في الحزن والفرح..
ابتسمت صابرين وخدت شنطتها وناضت وهي تقول..
/اكيد..جت لرضا مد يدها وهي تقول بضحكه..مبروك رضروض..
وامينه تشوفلهم بحزن..
مد يده وصافحها وهو يقول..
/الله يبارك فيك..وجبد يده بسرعه من يدها..
مختار:طبعا حنسافروا اليوم بعدين ساعتين بالزبط..
صابرين؛توصلوا بالسلامه..وانت رضا ..ابتسمت وهي تقول..موفق في حياتك..وقبل لتطلع حطت يدها ع ذراعه وطبطبت عليه ومشت..وخلاته قاعد يموت بالعرق..
امينه ودموعها ينزلوا..
/ربنا يوفقك ياحبيبي ويتمم بخير..
هو ابتسم بألم وقال..
/بارك الله فيك ..
تنهد مختار وقال..
/هدا حال الدنيا..وقعد يهز في راسه..
🍃وبرا صابرين طلعت تجري لسيارتها.
ركبتها بسرعه..وشغلتها وطول طلعت بيه هاربه..
دموعها اللي قاومتهم نزلوا..نزلوا زي السيل وقعدت تبكي بألم..لين معاش قدرت تسوق..وقفت السيارة ع تركينه..وغمت وجهها يإيديها وقعدت تبكي بألم من وسط قلب مجروح وجرحه يوجع عليه..
🍃زي جرح قلب التارقي..
اللي قاعد واقف قدام المكان اللي كان يوم من الايام مدينة ملاهي..
كان المكان اللي جمعه بيها لتاني مره..كلمها وكلماته..مشوا مع بعض..تشاركوا هم واحد..وماارتاحوش لين داروا اللي عليهم..
كانت وقتها صغيره..ودارت في قلبه هوايل..
وكبرت هالصغيره ووصلاته معاها الجوى..مرحلة يكون فيها العشق شديد..عشق مترافق مع الحزن..
وهو يمرر في نظره ع المكان بحزن قال..
🍃إلى الله اشكو من جوى لم اجد له
مساغا ولاطول البكاء يميط🍃
فجأة رن تليفونه..
طلعه من جيب بالطوه ولما شاف المتصل رد طول..
/هاه عيسي؟
"خديتلك اجازة ياغالي..وحاجه تانيه خوي فضا الشقه ويراجي فيك تجي تشوفها اليوم"
عبد القيوم هز راسه وقال..
/إن شاء الله..بارك الله فيك ياغالي..
"نخدمك بعيوني ياخالي..ماتبي شي تاني"
عبد القيوم..
/سلامتك بس..
"تمام نشوفك بعدين"
عبد القيوم:ان شاء الله..السلام عليكم..
"وعليكم السلام"
نهي المكالمه معاه..بعدين خش ع سجل المكالمات وقعد يدور ع رقم محدد..
🍃🍃🍃🍃🍃🍃
"يعني ياامي مالقيتي غير اليوم تعزلي فيه ايدي ورجلي تجمدوا"
ام سلافه:اشتغلي وانتي ساكته..
دفت سلافه الكنبه وهي معصبه
ولبانه وهي تلمع في التحف كانت تضحك عليها..
شويه سمعوا صوت رنة تليفونها..
سلافه؛موبايلي مو!؟
لبانه:ايه..
سيبت اللي في يدها ومشت تجري للدار
امها؛بدا تهرب لكن لوين! رح خلي كل شي متل ماهو لحتى تخلص حكي ع التليفون..وقعمزت ع الكرسي وقالت..وهي قعده..
ولبانه تضحك بس..
🍃في الدار..
خدت سلافه تليفونها من ع الزيانه..
وين شافت المتصل توسعوا عيونها ع الاخر من المفاجأه..
كانت مسجلاته "الأسمر"
ابتسمت من وسط قلبها..بعدين خدت نفس وفتحت الخط وردت..
/الو مرحبا..
"السلام عليكم"
قعدت تمروح ع روحها وهي تقول..
/وعليكم السلام عفوا مين عن يحكي معي..
"سلافه"
غمضت عيونها وقالت بهمس..اولي!!...ايه سلافه من حضرتك..
"معاك عبد القيوم عمران التارقي.."
شدت ضحكتها وقالت..
/عبد القيوم الخطاط..
"نقولوا خطاط.."
بعدت التليفون وتنهدت بعدين رداته وقالت..
/اهلا وسهلا فيك وبعتذر منك الرقم مو مسيف عندي..
"مش مشكله..المهم مذكره موضوع ورشة العمل اللي حكتيلي عنها وطلبتي نكون موجود فيها"
هي فتحت عيونها ع وسعهم بترقب وقالت..
/ايه..شو غيرت رايك؟
"اها..ان شاء الله نويت نكون معاهم.."
كانت حتزغرد من فرحتها..تماسكت وقالت..
/كتير منيح انك غيرت رايك..ع فكره هي رح تبلش بعد بكرا...وانا بكرا مسافره..
"خلاص تو نتم اموري ونعاود نكلمك ونزيدوا نتفقوا.."
هي قالت:ok..
"تمام السلام عليكم"
هي قالت:وعليكم السلام..
سكر عليها وهي نزلت التليفون وقعدت تضحك بفرحه..بعدين طلعت تجري لامها واختها وهي تغني وترقص..
شوجاني شوجاني من حبك يااسمراني..
اه منك اه ياني كان قلبك طيب..
لبانه من ورا امها قعدت تشوفلها بدهشه..
وامها قالت؛شو بك شو صارلك فجأه..مين كان عم يحكي معك؟
سلافه؛ميار رفيقتي عم تحكي معي عن سفرة بكرا..ايه قليلي حبيبتي شو بدك اعمل شو مابدك..شافت للكنبه وقالت..ايه غير محل هي..ومشت للكنبه وقعدت تحرك فيها..
وامها تشوفلها بعدم استيعاب..
اما اختها فكانت تضحك وهي مندهشه..
🍃طول الايام اللي فاتوا مابطلتش عنه سلافه كلام انشغلت بيه لدرجه فاجئت اختها اول مرة يصير فيها هكي..وحست ان قصة اختها مع الاسمر الحبيب مش حتكون قصة عابره🍃
#سجن_يوسف
#طوبى
...يتبع....