في عداد الأعمار

السادس

السلام عليكم
كلش اسفة عالتاخير
بسبب ظرف
رواية في عداد الأعمار
البارت 6
نورا ناصر

وجاي أقنع رُوحِي
و أفكاري و صفِنتي
هوَ حَبني
و آنه أحِبه
وآنه گلبت الرَسايل
چذبة چذبة .
(منقول)

كركم

مابين انفصل عن الواقع واحلل وافكر بالمصيبة الي سمعتها ومابين اريد بس اركز حتى اعرف تكملة كلامهم....

ياربي امي شجاي تكول!!  

وسعود شنوو جاي يكللها...

لزمت بالحايط ووكفت على حيلي كضيت بحدايد الشباج الي بصفي وحشدت كل حواسي حتى اسمع

ولو بيدي اوكف هذا الهوا الي يحرك الاشجار ويسوي صوت عالي يمنعني من سماعهم
اوكفه بس ثواني حتى بس اسمع حجيهم

امي ردت عليه بحقد ونبرة حادة
والظاهر هو يريد ينهي النقاش ويطلع
لذلك هي كلتله اوكف خل احجي وياك تعال
ولك اول امس ردت تكهربه بالماطور مال ماي
اليوم تطكه راشدي تعاند وتاخذه للشط

رد سعود بعصبية بووووويه انت شكد تبالغين لخاطر الله ولج يمتى ردت اكهربه شدعوة عليييج
كووة كووة تردين تطلعيني مجرم

تريد تحجي هي سكتها شووفي خل اكلج انه مافارغلج عووفيني بحالي وهاي الحجايتين الي حجيتيهن هسه بعد لاتعيديهن

ظلت تدردم انه امك وتحجي وياي هيج وتكول ولج والله يااسعود الك يووم وهذا اليوم على ايدي انه اعلمك

سمعته يضحك باستهزاء امييش انت اميششش انت متي بعيني من ذاك اليوم وماعندي ام انه بعد ماتتت مااعندي ام وانت هم ماعندج ولد غير ياسر وفكي ياخة مني

اصلا انت من البداية تفرقين بيناتنا من جنا صغار وحتى كريمة بتج هاي وحيدتج هم  ظالمتها وعبالج احنه مامنتبهين على تفرقتج بس لا وهذا اليوم الي تحجين عنه هم الج نصيب منه

جاوبته ولك انت شتقصد جاي تهدد تسوي بياسر شي لوو شنووو ولك والله اخلي خوالك يهدرون دمك اذا صار بياسر شي حتى لو طاحت عليه طابوكة من السما احملك المسؤولية انتَ

رد عليها وجان صوته يبتعد الظاهر جاي يطلع من المطبخ:-درووووحي خايف من اخوانج انه ع الاساس كلش

خليت ايدي على حلگي مصدومة وخايفة
ياربي صار بيها دم هاي امي شبلاها
ليش هيج تسوي وبعد وبعد شمسويه

طبيت للمطبخ شفتها كاعدة عالكرسي وتنفخ ومبين معصبة
انداريت عليه باوعتلي متفاجأة
كالت بعصبية هاي انت من يمته هنا ولج

جاوبتها وانه احاول مااخلي عيني بعينها
ماجنت هنا جنت افتر بالبستان

ظلت تفر بيدها شسوين تفرين بالبستان ولج دنيا ليل وهوا ماتخافين انت كلش لو تفرين بالدرابين لو بالكاع بهالليل

صحت بعصبية عليها اهووووو شعليج بيه انت سكتيييي

نزعت نعالها وشمرته عليه اجه بظهري باوعتلها بحقد وطلعت من المطبخ

وبراسي تعصف الأفكار وهاي أمي مصرة تذكرني بالي صار والحادث موتتتني كلما اريد انسى تذكرني

اريد اعرف هي ليش هيج ويانه انه وسعوود لييش تحاول بكل قسوة تأذينه

سبب بتعاستي امي ابد ماريد اصير هيج ام لبناتي وابنائي اذا صار عندي جهال راح اعوضهم وماراح افرق بينهم أبد...

صعدت كلبي يرجف ورجليه ثگال كوة اصعد رغم المواعين قليلة بس انه تعبت اغسل شويه واكعد ارتاح شويه وياسر يادوب غسل جدريه وصينية وجم خاشوكة

صار بوجهي باب غرفة سعود دكيته عليه وخليت ذاني سمعته يحجي بالتليفون

فتحت الباب وطبيت شفته كاعد على جربايته والتليفون على ذانه يحجي

شطلعت هاي ماتكلي انت تكلي اسمه فرج ورياض يكلي اسمه محمود وايهاب يكول مو منا من غير محافظة

ولك شعليك انه اريده عندي طلابه وياه واريدها تفض

تسللت للغرفة بهدوء وسديت الباب بهدوء أكثر كعدت يمه تعبت من الوكفة وهو بعده يستفسر خليت ايديه بحضني اعصر بيهم

انفصلت عن الواقع وراح مني صوت سعود ورجعت افكر بحواره هو وامي مساع

واحد يهدد الثاني شوون وياهم ذوول ياربي ابوي ليش ساكت لازم يخليلهم حد ويسيطر على هاي العايلة المشتتة

وعيت من صفنتي من سعود خله ايده على چتفي وسألني هاا كارينا شعندج

التفتت عليه وحجيت بصراحة
سمعت حجيك ويه أمي

باوعلي ثواني بنظرة ماتتفسر
وبعدهه صعد رجله وخلاهه على ركبته وايده جوه حنچه تنهد وظل ساكت

التافيت عليه وسألته سعوود امي شتقصد بحجيهه اريد اعرف

باوعلي بنظرة جانبية ودار وجهه
وحجه بهدوء لاتعرفين يمعودة أحسن

حجيت بصووت شويه عالي عكس نبرته الهادئة
لاااريد اعرف شنوو معناتهه من كلتلك
ياسر مو ابن توفيق

عدل كعدته وكال بعصبية وعينه عالباب
اشششش سكتي

كام على حيله وباوعلي بنظرة تحذير
الي سمعتي تنسينه خووش
اصلا امج تمسلت وماتعرف شتحجي
قابل ماتعرفينها أنتِ.... 

كمت كتله  سعووود

كال بترجي كريمة انت ماعايزة هم فوك همج عوفي هالموضوع لاتشغلين بالج بي والله تتعبين وثاني شي هالسالفة مر عليها وكت كلش طويل وانتهت بوكتها وانه تأذيت و دفعت ثمنها غالي ماريدج تتأذين انت همين

هزيت براسي وطلعت من غرفته ورحت لغرفتي دخلت بيها وتمددت عالجرباية لزمت راسي
ياربي ظل كلامهم وحوارهم يحفر براسي حفررر

انه شسووي هسه شوون انسى الي سمعته شوون مافكر ببشار شوون اكضي ايامي وليالي الشتا الطويل بدون مااكو شي يشغلني حتى بالمدرسة مالي نصيب ادرس واكمل والله ضووجة وملل

انوب امي وياسر حاجزين التلفزيون
الصبح امي تدوره على قناة فتافيت تشوف طبخ والعصر مسلسل وذاك التلفزيون حاجزة ياسر مدري شلون رام يطلع دكتور مثل ماامي تريده شوو مو هلكد يدرس

مر اسبوع ملل كلش وهذا الي حاول يغتصبني فص ملح وذاب مااكو شكد دورو عليه مالكاه سعود

دك التليفون رحت رفعت السماعة وگلت
الوو

اجاني صووته الووو كركم

وميزت صوته ذاك هو عرفته
بس سويت نفسي مااعرفه وكلت منوو؟؟؟

كال شعجب ما عرفتيني من  صوتي

وخرت السماعة من حلكي
وتحسرت

وبعدها جاوبته متغير صوتك مبين مامرتاح

ضحك ضحكة طوويلة وكال غير جذابة انت

جاوبته اي انت وين شو انت كلت رايح لكركوك يم عماتك وامي تكول ببغداد يم ابوك خاف بعدك بالبصرة وتجذب علينه

كال انه طير حررر ماكو حدود لسماي

جاوبته والطير حر صحيح بس لابد يجي يوم ويرجع لعشه وانت عشك هنا موطنك هنا واكيد الك رجعة مو؟

جاوب اي بهاي صدگتي موطني بالبصرة بيها اهلي اخوتي واختي والحبيبة

من گال اختي عرفت يقصدني ومن كال الحبيبة عرفت يقصد غفران... 

هنا انه مادري شصار بيه بس احس گلبي توذر وروحي تتكطع ألم ما حاسه بي من گبل ياربي يمتى يخلص هالالم يمتى اتأقلم يمتى اتعود....

اجه ياسر كال ويامن تحجين
مديت له السماعة كتله بصوت باهت
بشار

خذه السماعة مني وظل يحجي وياه سمعته
يگله بضحكة هااا ولك چلب ترى مشتاقين

خذتني رجليه بره كعدت عالصبة دموع كوومة تجمعت بعيوني وغصة خنگتني احس كوة جاي اتنفس

اريد اتعالج واريد اطيب من هالحب تعبت من هالمشاعر وتعبت من هالايام البطيئة الي كوة جاي تمر احسها تدوس عليه وتعدي.... 

الا يخابر بشار والا اجاوبه انه يعني هم حظي هذا
فركت ايدي بوجهي واستسلمت ورحت اكضي ايامي البائسة بحزن

دخلت للهول جان ياسر بيده نقاله ويسمع بي نغمات
شون حظوظ هذا الزعطوط الياهل عنده نقال وانه ماعندي عودك هو اصغر مني

كعدت يمه ظلت اتحرمص اريد اعرف شنو حجى ويه بشار بس هو هذا لا احساس ولا ضمير

والله لو سعود جان حس بيه بس هذا ابن ايمان مايحس

كتله اي شكال بشار وين ماوين

ماحجى ماانتبه أصلا لاهي بتليفونه
كمت ندسته بعكسي نززز وكال شنوو شبيج

بعصبية موو احاجيييك

رد بعصبية شحجيتي مااسمعت

درت وجهي وببرود سألته مرة ثانية
بس غيرة صيغة سؤالي
شحجيتوا أنت وبشار

ظل يرفع حواجبه وينزلهن ومبتسم
تردين تعرفين اخباره ها كوكو

جاوبت باصرار اي اريد اعرف اخباره شكو بيها يعني

رجع غلس وطلع صور بنات صاكات بالتليفون وظل يكلب بيهن طبعا بهالفترة التليفون عجبه بي هاي الصور

ظليت اكرص بي واكتله
ماتحجي شبيك تحگر شبيييك
الله ياخذك ولا تهتم احجي احجي

بطبة امي علينا وهي سمعت شحجيت عليه
ظلت تصيح عليه
فال الله ولا فالج البومة الفكر ليش تدعين عليه

كمت على حيلي
شنوو شبيج يمه شبيييج ترى اخوي اخوي جاي اتشاقة ويااه شنوو هو  بس الج

غمتني ودردمت تتشاقين وياه تشاقي تدعين عليه ليش ولج ظالمة النفس

فريت ايدي مدري منو الظالم هنا

طب سعود كال شبيكم

كتله ماتدري بامي بعد جي جاي اشاقي ياسر واطكه تدعي عليه

كال خليها تطكه حتى يصير رجال ويطلعله شوارب

جاوبه ياسر بعصبية
وشمالني مو رجال انه هاي انت لا مرة ولا مرتين تكولها سعود

رد عليه سعود حبيبي انت رجال وستين رجال بعد مو لان ايمان امك لا بس لان انه اخوك

امي تفر بيدهه وتغم بسعود
وهو خله وراح وياسر معصب

خليت وكعدت بصفه هي كعدت كبالنا
كالت اي واذا ما حجالج على اخبار بشير
شو انت ضيعتي من ايدج بعد منو يگلبج

خليت ايديه على ذاناتي وصرخت اهووو يمااا اهوووو كاافي لاتكملين لااتكملين والله طكت روحي

كالت بالطكاك وهي كاضة ريموت التلفزيون
ظلت تدوس تدوس مايطلعلها الي تريده

صاحت سوسو يمه تعال ديرلي القناة

رفع ايده ونزلها وتجاهلها ومشى عنها

وهي ظلت تصيحله بدلع
ولج سووسو تعاي طلعيلي هاي القناة مال مسلسلي المسكيكي

صاح بيها كولي اسمي عدل يالله

طكتها ضحكة وكالت من زود حبي الك اكلك هيج بعد شسووي ادلعنك واهشهشك فوكاها
وكملت ضحكتهه بصخب

باوعتلها ودرت وجهي
تدلع بياسر مرة تسوي بنية مرة طفل مرة جبير
وانه ولا يمها ولا مرة دلعتني حتى مااتذكر مرة دلعتني مادري ليش هيج تفرق بيننا

بالليل ورى العشه كاعدين بالحديقة انه وسعود وياسر

فارشين بمكان الكراج وكبالنه جاي وكيك وترمز مال ماي

سعود انطاني نقاله العب بي لعبة مال طيارات اسمها سكاي فورس ادماني كلش احبها

وانه مندمجة اقاتل بالعالم الافتراضي ومتحمسة وايدي تضغط عالتليفون

سمعت ياسر يكول لسعود
يشتغل بكراج مال سيارات ببغداد وحتى ينام بالكراج

رد سعود والله بلوى هذا بعده صغير خاف يلعبون بعقله ويجرونه لغير طريق

انه من سمعت هيج تشتت تركيزي باللعبة وقل حماسي وصرت اخسر ارواح...

ياسر جاوبه يمعود قابل جاهل حتى ينصبون عليه

قاطعه سعود وكال: بعده كل عمره 23 سنة
انوب بغداد خطرة كله كتل على الهوية وانفجارات

عفت طيارتي تخسر ويكتلونها الاعداء
وكتلهم خلي يرجع هنانه

ظلوا واحد يباوع للثاني ومبتسمين

طفيت التليفون وخليته بالكاع
كتلهم شمالكم؟ 

جاوب سعود هو مايريد يرجع يخاف منج لاتجبرينه عالزواج

كتله انه شعليه غير  هي امي الي نذرتني اله وانه قصدي خل يرجع هنا لأن منطقتنه أمنه مابيها نزاعات مثل هناك

سعود باوع لياسر كال هو شبي صاير مايتحصل كلش ماخذيت رقمه؟ 

ياسر كال والله هو راد يرجعلي الرقم مال نقاله بس ماجانت يمي ورقة وهاي الثولة (واشر عليه) وكمل:- انطتني السماعة وطلعت جان ناوشتني ورقة

باوعلي سعود ثواني بنظرة بيها مغزى ودار وجهه
وخذه تليفونه من يمي

وظل يحط شكر بالاستكانة حتى يصبله جاي...

اجه ياسر خله راسه على رجلي وتمدد
دقيقة وحدة ودفعت راسه
كتله اووي ياسر وخر منو كلك انه امك
راسك شثگله وشعرك بززز برجلي

كال شبيج والله عجزت وانه كاعد اريد اتمدد

جاوبته بعصبية اي تمدد منو كاضك بس مو على رجلي

كال حبوبة حبووبة

كتله ماااني توة تكول عني ثولة

سعود كال تعاي بنيتي يسرية تمددي وحطي راسج على رجلي
وضحك

هو جاوبه انجب سعووود انجب

شفنه ضوه سيارة ابوي يم الباب
كتلهم اي اجه ابوي شوو اليوم تأخر

راح سعود يفتح الباب وانه وياسر شلنه الصينية و
المدة الي كاعدين عليها

سمعت سعود اجه باتجاهي وكال كريمة طبي جووه بسرررعة

جان صوته متوتر ويلهث

تبعه ياسر وانه طبيت طفيت ضوه المطبخ وظليت اباوع من فتحة صغيرة بين الفجتين مال الباب

شبي سعود ليش كال اطب جوه هي هاي سيارة ابوي بس منو وياه جاي حتى ادخل
تفاجئت وگلبي ظل يلعب... 

باوعت وشفت واحد كاض ابوي علىى يسرته وسعود على اليمنه ويمشونه

يممه ابوي تعبان سووودة عليه شبيي ابووي!

سعود صاح بياسر

ياسر افتح باب الديوانية بسرعة

طب ياسر يركض فتح الباب مال الديوانية ورجع سد بابها الي على الموزع مال البيت ... 

وانه ركضت لامي الي جانت تباوع مسلسل
كتلها يمه كومي كووومي مدري شبي ابووي كوومي

وهيه صافنة على المسلسل كالت يوو شبي تووفيق

كتلها كوومي شوفي كوومي طببوو بالديوانية كوومي

كامت متعاجزة وكضتني من زندي ووكفتني كبال التلفزيون شووفي الأحداث شراح يصير وكليلي رايحة اشوفه

ركضت كضيتها من جتفها يمه يمه وين رايحة انت وكوشتج الحمرة ترى اكو رجال غريب يمه

صفطتني صواب على جتفي كالت بعصبية ووخري وسم خل اكمل المسلسلة ومن يطلع الرجال اروح اشوفه

يامسلسل ياامسلسل ابووي مدري شماله شنووو من مرة أنت

صميي حلگج وسم انت منو حتى تحاسبيني ولي من يمي ولي خايفة على ابوج ذاك هو روحي يمه شعليج مني

غمتني وكالت امدااج اي والله فاتتني الأحداث

صفنت عليها فريت ايدي واباوعلها وهي تباوع على التلفزيون وانه احووم اريد اعرف ابوي شماله وشبي جايبينه يحوگلون بي

رحت وكفت يم باب الديوانية واتسمع
واسمع صوت ابوي يتنهد وانفاسه تلهث

كلبي انعصر من القهر الا ابوي ياربي هو أساس البيت وعموده

من دونه احنه نتشتت ونضيييع ، امي تفرقنا ما تجمعنا مستحيل تلمنه امي مستحييل

من غير شي احنه عائلة اركانها متصدعة وبيها شرخ كلش جبير

انفتحت الباب وابتعدت انه خاف الرجال بعده ويشوفني

بس الي طلع هو سعود والتليفون على ذانه يحجي والظاهر جاي يختم المكالمة لأن كال يالله عمي بسرعة اتانيك

كتله هاا سعوود راح الرجال اطب اشووف ابوي؟ 

كال اي طبي انه رايح ابدل بسرعة ابوي تعبان لازم نودي للمستشفى

خليت ايدي على گلبي ورجليه كضني فجأة ثگلن عليه

دخلت اجر بروحي جررر شفت ياسر كاعد يم ابوي ويبوس براسه وكاض ايده

رحت كعدت يمه ممددينه عالقنفة

حاجيته بقلق:- يبا حبيبي شبيك كلي يبا ليش تعبان

خله ايده على گلبه كال بتعب كريمة كلاص ماي

بوسته كتله اجيبلك ماي عيوني
وكمت رحت باتجاه  المطبخ  مريت عالهول امي بعدهه صافنة بالمسلسل

كتلها يمه ابوي راح يودونه للمستشفى والرجال راح روحي شوفي ابوي

كامت على حيلها وتباوع بالتلفزيون تكول يااا شووفي طلع مو ابنهم ابن الخدامة خطية

كتلها لو تنقهرين علينا بكد ماتنقهرين على المسلسلات مو أحسن

كالت هو شبي ابوج لو ضغط لو سكر بس هو الله يسلمه يسوي روحه كلش

ظلت تمشي باتجاه الديوانية وتتلفت للتلفزيون
ياربي شكد متصابية هالمرة

كالت همزين طلعت دعاية هاي الحلقة الاخيرة لاتفوتني علما يودون ابوج للمستشفى

كتلها غطي راسج يمه راح يجي عمي محمد هسه سعود خابره

كالت جيبيلي فوطتي وراي
وطبت بالديوانية

تجلط امي تجلط مو من زين منه ابوي عايش لهسه وهو اصلا عنده مشاكل بالقلب

رحت جبتله ماي وهي خذته مني شربته

وتحاجي لاتخاف توفيق يمكن سكرك لو ضغطك صاعد مثل كل مرة يخلولك مغذي وتصير زين

جاوبها بتعب وعينه عليها ايمان گلبي وايده على گلبه ويجر بدشداشته حييل

ظلت تفرك بصدره بيدها وتغسل وجهه بالماي الي شرب منه شوويه

كالتله وتغيرت نبرتها ياااشبيك تووفيق

حاجاها ايمان ديري بالج عالولد لميهم لاتفرقينهم

ردت يبووو توفيق شبيك مابيك شي ترى لاتكوم تفاول على روحك شدعوة كلما تعبت شويه وظليت توصي
اجه سعود واندكت الباب بنفس الوقت

سعود بيده شال أمي انطاه الها كاللها هاج اجه عمي

هي خذته ولفت روحها بي ودخل عمي يسووي احم احم

واجه يم ابوي يباوعله بقلق وخوف
وتساؤول شبيك تووفيق بس لا العركة ويه صويلح الحرامي اثرت بيك

تفاجئت هذا صالح رجل عمتي ويشتغل ويه ابوي عدهم شراكة بالشغل

سعود حاجه عمي
يله عمي مو وكتها ابوي تعبان هسه
بعدين بعدين هذا الحجي

وخذوا ابوي للمستشفى
واتضح عنده ذبحة
خلوه بالعناية
وممنوعة عنه الزيارة
وبعد فترة سووله قسطرة

ابوي من قبل عنده مشاكل بالقلب وهم عدنا وراثة احنه جدي هم مات بمرض بالقلب

وهو أصلا انقهر اخر فترة وسكره صار كلش يصعد بسبب رجل عمتي الي عنده شراكة وياه بمحل مفروشات وصار بينهم خلاف ومنها انتكست صحته

بعد ما طلع ايوي من المستشفى كاعدين كلنا حوله
وجانوا عمي محمد ومرته وهمين عماتي حليمة وهاشمية كبل شوي طالعين من عدنا

تنفس ابوي وكال والله عنت عليه هاللمة الله لايحرمني منها

كتله ولا يحرمنا منك يبا حبيبي الله يطول بعمرك ان شاءلله

امي كالت الله لا ينطي ولا يوفقه رجل نجاة ان شاءلله الله يفجعه باولاده

ابوي كاللها ايمان شنو هالححي ثلثين الدعوة على الداعي تردين الدعوة ترجع علينا

سعود كاللها يمه شلج بهالحجي هذا

صرخت بوجهه اسكت انت ولا من احجي تسكتني ترى مليت منك

ابوي ابتسم وكال يالله مابقى شي ويتخرج سعود واخطب اله

امي كالت اي اخطب انت اله بس انه مالي غرض بي مدام هذا لسانه وياي

ابوي باوعله وابتسم كال هسه مابقى شي ويتخرج واخطب له الي تعوضه وتشيله على راسه والي يداريها ويخليهه بعينه مو صح سعود

ابتسم سعود وباس ابوي على راسه
ماتقصر يبه وبوجودك ان شاءالله

ياسر كال يبا سعود راح تخطبله   لعد وانه

ضحك بوجهه وكاله انت راح اخذك وياي للعمرة انت وامك وكريمة بس خلي اطييب

سعود جاوب يبا انه هم اريد اروح وياكم انه والمدام

ضحك ابوي كله يبا انتوا روحوا شهر عسل

امي كالت توفيق انه ماريد اروح للعمرة لان مايصير انه اسمع اغاني هاني شاكر وعبد الحليم وصباح خلي اتوب فد نوب واخذني حجة
روح انت ويسورة بس عينك عليه

خله ايده على صدره وتنهد كال براحتج ايمان
خلي يخفون الخطار شويه وراها اطلع خلفة وعمال حتى نبني بيت لسعود يعرس بي اهم شي
هذا

باوعت لسعود وابتسمت وهو باوعلي رافع حواجبه

خليت ايديه على حلگي اضحك

طلعنا بره انه ويا
كتله خوش والله غفران راح تصير مدام

تخصر ووكف كال وشمدريج هيه نفسها غفران
وابتسم ورافع حواجبه

كتله احساس
وعفته ومشيت بالليل كعدت يم ابوي اوكله الشوربة
كتله يبا حبوبي اخطب غفران لسعود

جاوب هو بكيفه بويه اذا يريدهه بكيفه.

كتله يبا والله خوش بنية وانت تعرف اهلها
هو مايريد من بنات عمي وبنات عمتي نجاة مستحيل يصيرن لان انت وابوهم على خلاف
ومايصير ناخذله غريبة مانعرف عنها شنو ماشننو

وانت تعرف أمي شنو يعني صح بيته ابحده بس تبقى امي هي امه ونفس الكاع كاعدين احنه يعني لابد تصير احتكاكات

كال الله كريم بويه كافي ماريد انتخمت
وضحك
وكمل كال كل حجاية تحجينه تدخلين عشر خواشيك شوربة بحلكي شبيج بويه

ضحكت ورجعت الخاشوكة للطاسة

يوم ثاني خابرتني غفران
بسرعة بلا سلام وبلا كلام
كالت ابشرج طايحة بخمسة

ضحكت كتلها شنوو مبين هالمرة مافادت لا باكات خضرة لا مكانس

كالت ابد والله كلشي مافاد

سألتها وشيخة وانيسة

رد ناجحات فد فرحتلهن

جاوبتها فرحتيلهن وماضجتي على روحج عفية غفران انت شنو هالمبالغة ترى جاي تلعب نفسي منج

كالت اكلج سمعت الحجي مسوي عملية خطية نريد نجيله نتحمد عليه بالسلامة

ضحكت ماتعرف تحجيلها حجاية عدلة
كتلها تعالوا هلا بيكم

للعصر واجو
دخلوا سلموا على ابوي وطلعوا
امها طلعت يم أمي وانه خذيتها وطلعنا بره كعدنه عالصبة

كتلها شنو راح تعيدين السنة؟؟
ردت وهي تكطع بالوركة
اي اعيد وامري لالله

امج شسوت من درت راسبة

كلتلي راسبة وله ناجحة انه أحبج

غميتها اجت الغمة بوجهه مباشرة
كالت شكرا نعم الله خيرج وكثر الله عليج

ضحكت كتلها بحزن هنيالج على هيج ام والله لو انه طالعة نتيجتي هسه جان الأولى عالصف والمدرسة

لزمتني من خدي كرصتني عالخفيف
وابتسمت وعيونها لمعت بالدمع
كالت ميخالف لاتضوجين كريمة
ماتعلمين شيصير منا للسنة الجاية
امي تكول كل شي تنحرم منه بي صالح

من جبت النتيجة راسبة كالت ميخالف
ليش اضوج يمكن ردتي تندعمين لو احد يسوي بيج شي لو هذا السكران الي طلعلنا والله دفع عنه لو ناجحة وصاير كل هذا النجاح مايفيد

وراحت اشترتلي قوطية ببسي تكول حتى لاتضوجين

بس انه ياكريمة استحيت كلش من أمي والله انه وامي مثل روح وحدة بس هالمرة صدك استحيت من شفتها تتوسل بالمدرسات ينجحني بس بجم درس واالباقي دور ثاني بس ماقبلن

هنا انه كلش انقهرت على أمي ماتستاهل انه هيج اسوي بيها وانزل راسها

جاوبت امج هم غلطانة لان هي عودتج على النجاح بهيج طريقة وبدون تعب

دنكت راسها وكالت اي صدك بس بالوزاري جانت تنصحني ادرس لان تدري محد يكدر ينجحني غير دراستي

احنه جاي نحجي وطلع سعود من باب الديوانية جان يم ابوي من شافنه ظل يباوع ويعدل بشعره ومبتسم

وصل يمنه كال شلونج غفران شون صحتج

غفران جانت مامنتبهة عليه جانت تكرك وتكطع بورق الاشجار الي محوطتنا

بس سمعت صوته كامت بعفوية ورجعت كعدت
من االصدمة
واحتارت شنو ترد عليه من سلم
هلو شلونك حمدالله على السلامة

ضحك جاوبها وهو ياشر على الديوانية
ههه ترة ابوي مسوي عملية مو انه

جاوبت وهي تجر بقميصها  اي اي الحمدلله على سلامته

كاللها بس من رخصتج جيبيلي ذيج البزونة وراج هاي بزونتي

باوعت  صدك اكو بزونة

وهي طفرت طفرة كبل لاحتى تشوفها بس سمعت باسمها

كامت افترت من وراي واندحست بيه

كلتله وهي كاعدة وراي بصوت هادئ وبي توسل
هي صح احلى مني بس انه والله أخاف منها

باوعلي وضحك وراح خذه البزونة

وهي مدت راسها وطلت عليه شافته اختفى كامت
تركض باتجاه بيتنا وتحجي بصوت ناصي ولللج يماااا عدهم بزونة

طكيت ضحك رحت يمها كتلها انت تخافين من البزون وهو يخاف من البريعصي هاي خوش سالفة كل واحد عنده سلاح والله راح نتونس وياكم

صفنت بوجهي كالت شنوو يعني؟ 

جريتها من ايدهه ووديتها للبستان
نكطع رمان وطرح شكد حلو مال البستان ترف نغسله ونكروط
وحشيت راسها  على سعود كلش خششته بدماغها خليتها تصفن ذايبة بي

ورجعنا جريب المغرب للبيت خذتها امها وراحت

ورا ماطلعوا بدقايق اندكت الباب طلع ياسر فتحها
ورجع كال زلمة يم ابوي مو تدخلون بس سوولي ضيفة

امي سألته ياسر منو يم ابوك

جاوبها هذا سلطان هنا

كالت يووو سلطان خل اروح أسلم عليه

لفت روحها وراحت وانه سويت الضيفة وانطيتها لياسر ووراها اجت امي مبتسمة

اجه سعود وطب للمطبخ فاييير من العصبية
ركع الكرسي
كاللها هذا سلطان صخمااان شيسووي هنااا هاا شجااابه؟؟!

تفاجئت هو منو سلطان هذا؟  اول مره اسمع بي

طليت من الشباك وامي وسعود يتعاركون

شفت واحد يم الباب جاي يمشي باتجاه ااباب الرئيسي ويمه عمي محمد

جان لابس لبس ضباط ونجمات على چتافه والمسدس كلش بارز بخصره....

يتبع.... 

كلش احبكم 🥺♥