أمرأة بلا قيود

الـبـــــــــــــارت 9

كلبي يرجف
احس رجلي ماتساعدني اتحرك خطوة .
بقيت واكفة بمكاني وفاتحة عيني .. رعب مو طبيعي عشتة ...
كلمات عمو حازم اسمعها بأذني ! اكيد وصل للسليمانية وعرف بية هنا ...
راح يقتلني خلص

فتحت سما الباب بسرعة ...
دخلوا ولد اثنين علية .
صرخوا بوجهي ..

___ لج منو انتي حتى تشتكين علينا وتبلغين المدير

___ شكو اني شمسوية! شصار

___ تخابرين المدير وتكليلة ذولة يشربون مو ! ...

حوراء .... اي اكيد ماكو غيرها لعد منو ينافق ويودي ويجيب كلام

رحمة .... بس والله اني مااعرفكم ! والله ماحجيت شي للمدير ..

___ انجبي لج كلة من ورا ترزلنة وانقطعت يوميتنا ! هااا جاوبيني منو انتي كح.بة ادبسزز عديمة التربية بس احلف عنج انتي كح.بة صايرة جاسوسة مو ! تلعبين وعبالج محد يشوفج ويكشفج..

رحمة .... والله ماعرفكم وماحجيت شي .. بس اسمعوني ..

(( تقربوا علية... اني رجعت ليورة ... انطخيت بالحايط حيل ووكعت للكاع ..ماتركوني رغم هذا بعدهم يضربوني ويبصقون بوجهي ... واحد منهم لزمني من شعري ويجر بية بقوة ... والثاني يضرب برجلة على ظهري ... الثالث ضربني بوكس بقوة على كتف ايدي ...

منظرهم مرعب ..
كأنما اني عدو لذوذ الهم ! منتظرين هاي اللحظة حتى يضربوني ويأذوني ...

سما ..... ولكم كافي كاافي راح تموتون البنية ..

____ وخري لج لا تبعديني عنها هاي الكح.به الحقيرة الفتانة ... منو انتي لج حتى تبلغين علينا ... شعبالج نعديها بسهولة ...

(( سحبتهم سما وحوراء حيل وطلعنهم من الغرفة .. سدت الباب بسرعة .. اتصلت على المدير وسيم ...))

سما ...ألوو .. الله يخليك الحك علينا والله موتوها لرحمة هسه ... وبعدهم يضربون بالباب ويغلطون ... تعالنا بسرعة والله خايفين والبنية تبجي .. ضربوها حيل وأذوها .

ماجاوبها بسرعة سد الخط ..
اني جنت لازمة كتف ايدي و ابجي بقوة كلش متآلمة وبنفس الوقت مهضومة اني بريئة شنو السبب اصبحت بنظرهم فتانة وناقلة كلام ! ...

بعد دقائق ... اجه وسيم بسرعه كان بمكان قريب من المطعم ...
دك الباب ..
راحت حوراء تفتح الباب بعد ما تأكدت هذا المدير وسيم مانفتح الباب للولد لان بذاك الوقت لو يدخلون يقتلوني بدون تردد من كد ما كانوا حاقدين علية ...

وسيم .... هاي شنو ! خرب شمسوين بيج..

رحمة ...ضربوني حيل ...تهموني اني مبلغة عنهم ... والله مااعرفهم ولا اعرف شي عنهم

وسيم ..... دقيقة دقيقة ...(( اتصل بموبايلة عليهم واستدعاهم لغرفتنا ... بعد دقائق دخلوا ...))

وسيم .... شنو هذا التصرف ! بأي حق تضربون بنية بهاي الطريقة ! جاوبووووني يلة !

__ هي نقلت كلام وأذتنا ..

وسيم .... تعرفون هسه لو توصل هاي مشكلتكم للأسايش كلكم تنشالون وتنذبون بالسجن وبعد ابن امة وابو ليطلعكم ؟؟؟ تره احنه هنا بمطعم !! شنووو بمطعم !!! احفظوها زين مو بحلبة مصارعة ! .

___احنا مويمها ولا حواليها وحتى عملنا بشفت يختلف عنها ع اي اساس تفكر تضرنا !

وسيم .... واساساً مو رحمة لبلغت عنكم ! حوراء هي الكالت عليكم تشربون !

رحمة ..... وبكل عين صلفة تكول اني بلغت عليهم ! لج انتي شنو من بضر بشنو أذيتج أني ! ليش تدفعين بالولد علية ! ليش تخليني اتحمل ذنبج وانضرب بهاي الطريقة البشعة

حوراء .... لا مو هيج السالف...(( قاطعها وسيم ... باوع علينا ..وكال اشششش ))

وسيم .... اششش كافي مااريد اي صوت ولا مشكلة اني رايح احجي ويا الشباب وافهمهم ! مااريد صوت زايد ومشاكل بعد

رحمة ....بس هي نافق......(( قاطعني مرة ثانية ..))

وسيم .... كلت كااااااااافي ! اي مشكلة مااريد ...

(( طلع من الغرفة .. اني ضليت بصوت عالي ... قلبي محترق شنو ذنبي وين مااروح انضرب ! واسمع كلام مو حلو بحقي ! شنو لسويتة جوة ربي حتى اتأذة بهاي الطريقة بكل مكان اروحلة ! ليش هيج صار بية ...سما والبنات من بقية الغرف يمنا ... سما تسكت بية وتحاول تهدئني ...

سما .... كافي رحمة حبيبتي ... الله ينتقم منهم ... لا تبجين كافي ... المدير راح يعاقبهم بلكي يفصلهم مو بس يقطع يومياتهم ...

رحمة ....شوفي شسووا بية ...شوفي اثار ضربهم ...(( رفعت بلوزي وشوفتها اثار ضربهم على زنودي ... الكدمات بلون ازرق مغطية كل جسمي ...سما كلش انقهرت .. ماكو طريقة تهدئني بيها .. كنت بين نارين ..نار الوجع واني بريئة . ونار اشوف حوراء كدامي اريد اكوم املخها من الضرب .))
اني اعلمها والله اليوم اموتها من الكتل

سما ..... اششش وين ...ولج المدير مو كال مااريد اي صوت لا يروح يطردج ..رحمة فكري زين لج وين تروحين

رحمة ... مستحيل لج هاي ما ينسكت عليها ...عوفيني (( ادفع بيها حتى تعوفني ماتقبل ...اخذتني على جربايتي وهي محاوطتني حتى تمنعني من ضرب حوراء ...المدير والولد يم الغرفة نسمع صوتهم .... حطيت راسي على المخدة وكملت بجي ...بهاي اللحظات غفيت...

غفيت ودموعي بعيني ...
وجسدي عبارة عن كدمات بكل مكان ..
قلبي مكسور ... وكأن هذا الضرب والصراخ بوجهي ذكرني بعمو حازم .....
نمت واني مكسورة خاطر وذاكرتي استعادة كل حياتي البائسة السابقة .....

كعدت الفجر من النوم ...
فتحت عيني ..راسي ثقيل ويوجعني بسبب الصار
شفت حوراء تسولف صاحية ويا سما ..
بهاي اللحظة كلت خلص ليش ساكته ومتحملة كلشي ! ليش ماادافع عن نفسي واخذ حقي ...يلة اكوم ابرد كلبي بيها واخذ حقي وأذيها مثل مااذتني ! ... دفعت الشرشف من علية ورحت عليها ...

هي بسرعة كامت من مكانها وفتحت عينها ..
لزمتها من شعرها ... جريتها حيل ... شعرها صار يتقطع بأيدي من كد القوة سحبتة بيها ....

رحمة .... ولج انتي تذبين سوالفج الخايسة براسي ..اطيح حظج والله بعد مااسكت ومااتحمل اكثر ..هسه الله جابج الا اطلع قهر السنين كلة بيج ...بسببج رجعتيلي كل ماضي حياتي الصعب والمؤلم ..

(( كل هذا كلامي واني بعدني لازمة شعرها بقوة واضرب بيها راشديات ... حوراء ماادافع عن نفسها .. اساساً مااعدها سبب مقتنع حتى تبرر سبب فعلها هذا !!!

سحبوني البنات بالقوة من عليها ... بعدوني عنها ..كل هذا واني بعدني اصرخ واحاول اضربها ... اريد الزمها بعد قلبي متحمل عليها ...

هدئت ورا شوية والبنات يمي ..
يحاولون يهدئون الوضع !
كل هاي المشكلة مانريد توصل للمدير ! لو يعلم بيها اكيد راح يفصلنا من العمل ....

تركت البنات ...
رحت سبحت وتحضرت للعمل ....
نزلت باشرت بعملي
هذا اليوم صعب مايشبه كل يوم
بعد المشكلة الاخيرة وسيم طرد العاملين ومباشرتاً عُين عاملين جدد بمكانهم ...
اصدقائهم القديمين بالمطعم حقدوا عليه باعتقادهم اني السبب بطردهم ...

وسيم بعدة مستمر ينظرلي ويحاول يتقرب من عندي بشتى الطرق ..
او يحاول يلفت نظري. !
اني متجاهلة مشاعرة تماماً !
بسبب الفوارق الطبقية بينا من المستحيل اصدق وسيم يحبني ! اقنع روحي دائماً لااا هاي يقشمر عليج ! وسيم مستحيل يحبج لا تصدكين ....

وسيم ..... احسبيها علية الصار البارحة

رحمة .... مو مشكلة المهم عرفوا الحق

وسيم .... شنو تحبين بعد اسوي حتى لا تنقهرين

رحمة .... سلامتك كلشي مااريد ...

وسيم ... الواضح كلامي مااخذتي على محمل الجد

رحمة ... اترجاك اني جاية اشتغل هنا ...

وسيم ... تمام بس صدكي اي بنية ماترفضني مثلج

رحمة .... اني مو اي بنية !!! اني انسانة عاشت وشافت كلة الضيم بحياتها ومامتفرغة تحب او ترتبط ! اريد اخلص حياتي حتى اعيش بكل هدوء وسلام وحرة نفسي ...حتى هاي الراحة والطمأنينة اني بيها هم مؤقتة ويمكن بأي لحظة تنتهي وخلص اضيع ارجع لنقطة البداية او ارجع للاصعب منها . حابة اواجه مشاكلي وحدي

وسيم ... اهدئي بس اني احبج ومتأكد من مشاعري ...

رحمة ... من رخصتك ...(( تركتة ورجعت لشغلي ...اشوف هواية علية شخص يحبني وينعجب بية . ...والشي الثاني الاصعب شخصيتة مملة ماحسيت بنفسي انجذبت الة وحبيتة ... رغم جمالة وامكانيتة بس بقى قلبي رافضة ..))

استمر وسيم بملاحقتة الي ..
وكل مرة يلاقي نفس الجواب بالرفض او عدم القبول بعرضة خوض علاقة حب ...
كنت مواضبة على عملي ... اعمل اكثر ما مطلوب حتى اثبت نفسي .. او لحتى اضمن وجودي ضمن كادر هذا المطعم واضمن سكني ...

فكرة مرعبة !!! جداً مرعبة ان اكون بنت بهذا عمري وحدي بمحافظة بعيدة ومااعرف شخص بيها ..
كنت قدر الامكان اعمل جاهدتاً واضغط على نفسي حتى اثبت نفسي واعيش بهذا المستوى ..
حتى المشكلة توصل يمي صرت ابتعد عنها ..
افكر ممكن الشخص مقابيلي عندة بيت يلجأ الة لو ينطرد من هذا المطعم ..
عدهم اهل يحتضنونهم ويطمنونهم ( خلص اتركوا الشغل مو مشكلة ))
بس اني اعرف ماعندي لا بيت ولا اهل راح يحتضنوني ..
كنت اتغاضى عن كلشي ضدي ...
اشوف وسيم صعب جداً داخل المطعم ...
يطرد بسهولة .. يخصم يوميات... يحاسب ويعاقب بشدة ... كل العمال يخافون منة وينفذون كلامة بالحرف الواحد ... واني منهم رغم ملاحقتا واعترافة الي ...
اتوقع ممكن بأي لحظة يخلقلي مشكلة حتى يطردني لان ارفضة واردة بأستمرار ....
بس وسيم ما كان مثل مااني اتصورة ...
ابد ما خلط الاوراق بيوم ..
استمر يعاملني داخل المطعم مجرد عاملة فقط ...

بأحد الايام وبعد مدة قصيرة لوجودي بهذا المطعم
كملت كلشي الصبح حتى انزل وابلش شغل .. سما اجاها اتصال وطلعت خارج الغرفة . بقيت امشط شعري وارتبة حتى انزل .. دخلت سما للغرفة واجت يمي تركض

سما ....اكلج اليوم جاي مسؤول للمطعم ما يحتاجونا هسه من يروح ننزل

رحمة .... صدك والله ؟

سما ... اييي نبقى هنا ماننزل نرتاح شوية

رحمة .... ايي بعد احسن ..نرتاح ..احس روحي محتاجة هواية ساعات استراحة ...الليل وحدة ما يكفي جسمي هلكان من الشغل

سما ..... ايي صح ..يلة راح يجي يوم ونجمع مبلغ حلو ونفتح مشروع خاص بينا

رحمة .... ههههه اي بالحلم ...

(( بقينا نسولف اني وسما ... بعد ساعة سما طلعت من الغرفة والموبايل بأيدها ....اني ما سألتها رغم استغربت عينها على الساعة وتنتظر اتصال او مكالمة ! مااهتميت ومافكرت بشي بالنهاية هي انسانة واعية واكيد عدها اسرار وخصوصيات مالي حق اكون متطفلة وادخل ...

مددت على الجرباية وصفنت على الحايط وافكر ..
دخلت سما بهاي اللحظة للغرفة ... مستعجلة وتركض ومن الباب تصرخ رحمةةةةة ...رحمةةةةة

رحمة .. لج شكوو شبيج ! شصاير منو اجة ( اكيد اول شي خطر على بالي عمو حازم وصل لعنواني ...))

سما ... امشيي المدير يريدنا ... يكول هسه انزلن جوة ليش معتكفات فوك ما يصير ..

رحمة ... اوووكفي اييي دقيقة بس انزع الشبشب اصبري البس الحذاء لا تجريني من ايدي ولج انطيني مجال

سما .... يلةةة بسرعة صاير عصبي ويصرخ

رحمة ..... عزةةة اكيد راح يرزلنا ويقطع من يومياتنا..(( كنت مدنكة على الحذاء والبس بي .. سما فوك راسي مستمرة تحجي ترهب بية حتى استعجل وننزل ))

سما .... لج يلة بسرعة بسرعة

رحمة .... عزززة خبصتيني انزلي قبلي اني جاية ثواني ارش عطر شوية واعدل حمرتي

سما ..... لج رحمة يا صخام امشي هيج حلوة والله (( وكفت على حيلي . نزلت التيشيرت اكثر على البنطرون وسما يمي ترتب بشعري وتقنع بية مااسوي شي لازم ننزل بسرعة ))
يلة امشششي ...(( لزمتني من ايدي ونزلنا الدرج بسرعة .. اني كلش خايفة اعرف وسيم ماممكن يسامح ويعفي بسهولة عن تقصير اي عامل ...كملت الدرج وكفت ارتاح شوية احس قلبي يريد يوكف من كد ما نزلت سريع ... رحت لطاولة شفت كل العاملين واكفين يمها ... وسيم وياهم ...توقعت راح اترزل كدام الكل ... فتحت عيني وكلش خفت ... كوة تقربت يمهم ... باوعت وسيم ضحك بوجهي ...

شفت على الميز كيكة .. ونفاخ ( بالونات ) وشموع ...
من وصلت فتحوا اغنية تامر حسني (( كل سنة وانت طيب ))
الكل تباوع علية وتضحك ...
وسيم يضحك من كل كلبة ..

وسيم .... عيد ميلاد سعيد رحمة ... كل عام وانتي بمليون خير ..

(( عزززة شصار بيه .. مااعرف شلون اوصف شعوري بوقتها !! لاول مرة بحياتي احد يحتفل بعيد ميلادي !

طيب اني حتى امي وابوية بحياتهم مااهتموا لهذا اليوم وذكروني ولو بأغنية او تهنئة ...

وهسه اشوف الكل تصفق الي !
الكل تهنئني !
صرت احس عندي ناس تحبني اول أخذتني بعين الاعتبار ..

البنات يصورون بالكيك والنشرات ..
كلشي حلو وانيق !
كلشي مختارة وسيم بعناية وذوق
حتى اطلالتة بهذا اليوم أنيقة وتچذب انظار المقابل الة ...
يباوع علية ويشوفني شلون اضحك وماممصدكة ابد
احجي ويا سما كل شوية معقولة هاي الي ..

الشي الحلو حتى اني كنت ناسية اليوم عيد ميلادي ..
بهاس الاحتفالية الجميلة تذكرت هذا اليوم المفترض يكون مميز عندي وسط احتفالية بسيطة ويا اهلي .

اني على العكس ! هذا اليوم بكل مرة يمر خلال اعوامي السابقة يترك خلفة ذكرى حزينة وكلمة قاسية مازالت ترن على مسامعي

(( بهذا اليوم اجتي الزركة ...لو الله ما خالقج احسن شنسوي بيج ... يمة تخوفين بالمستشفى كلها كالت ذبوها تخزي مو حلوة .... بهيج يوم جنتي سودة ومعبالك بنتنا ...))

اعوام طويلة وهاي الكلمة تتردد بأستمرار على ألسنهم ..
كانوا بخلاء معي حتى بالكلمة اللطيفة والمجاملة لتطيب كل خاطر مكسور ....

قطعت الكيكة ...
طفيت الشمعة ..
بصراحة ما تمنيت اي أمنية عدا ..(( اللة ينتقم من عمو حازم وزوجتة ))
كانت وما زالت هاي امنيتي الله ياخذ حقي منهم !
اتمنى كل ضربة منهم على جسدي النحيل يتذوقون اضعاف وجعها ..!
كل دمعة نزلت من عيني واني بريئة ولا حول ولا قوة تحت رحمتهم وسطلتهم ! اتمنى يذرفون دموع اضعافها ..
اتمنى تكون دموعهم !! ( دموع ذل ! وجع ! تمني ! فقدان ! مرض ! مصيبة !
....

طفيت الشمعة
الكل تصفق الي ويضحكون ..
قطعت الكيكة ..
اول قطعة قدمتها لوسيم

وسيم .... جيبيها لغرفتي ..( راح لغرفتة .. اخذت قوطية بيبسي ورحت ورا حتى ارجع اكمل توزيع الكيك والتقاط الصور ويا البنات ..دكيت الباب اي استأذنت حتى ادخل .. سمعت صوتة كال تفضلي ادخلي ...))

رحمة ... تفضل (( حطيتهم على مكتبة ...رفعت عيني ووكفت بااوعت صافن بوجهي ... اني ارتبكت سحبت خصلة من شعري رجعتها ورا أذني ... اريد انطق مااكدر نظراتة كانت كافية تخليني اصمت واخجل وارتبك ... نزلت عيني واحجي ...ايدية متشابكات واباوع عليهم ...))

اني كلش اشكرك ... ماراح انسى بيوم كلشي سويتة ... صدكني فرحتني وعيشتني شعور اول مرة يمر علية .. جداً اشكرك ...

وسيم .... ميحتاج تشكريني .. تعرفين اني احبج ورايدج من الاول كلتلج ومامكذب عليج مااعرف ليش مستمرة ترفضيني ..

رحمة ... اني ماجاية هنا حتى ادخل بعلاقات وارتبط .. جاية اشتغل واعيش وأمن على روحي ... وانت وفرتلي كل الذكرتة ...اتمنى ماتطلب شي ثاني من عندي (( درت وجهي حتى اطلع ... ضرب براحة ايدة على الميز وكام وكف على حيلة ... اجة وراية بسرعة وسد الباب بأيدة .. صار قريب كلش من عندي ... رفعت عيني علية وشفت وجهة او جمالة من قريب اكثر ...خجلت ونزلت عيني ... واردد بداخلي ماممكن رجل بهذا الجمال يحبني اكيد يكذب علية ))

وسيم .... زين اوكفي ..(( يحجي وياية ويتقرب اكثر ... كلما ارجع خطوة ليورة يتقدم خطوة ... صار الحايط بظهري ... اجة تقربلي كلش ...عطرة حاوطني من كل مكان ... ))

رحمة ... الله يخليك اتركني اريد اطلع

وسيم .... اريد اتزوجج ...(( من كال هيج انصدمت ... كل تفكيري يضحك علية مستحيل يتزوجني ... شهكت وباوعت علية وفتحت عيوني من الصدمة وفعلاَ كلش مصدومة ))

رحمة .... شنوو شتحجي !

وسيم ... ايي مثل ماسمعتي اريد اتزوجج

رحمة ..... مستحيل

وسيم ... اريد اتزوجج تقبلين لو لا !

رحمة ..... تتزوج وحدة مثلي ! شتعرف عني ! شلون تتزوج وحدة مااتعرف منو اهلها ..

وسيم ....مو مهم ...اهلج ماضييج كلشي مو مهم .. المهم هسه اني فعلاً رايدج ..

رحمة ..... تشاقة

وسيم ..... لا مااشاقة مثل ما كلتلح ! كلشي مو مهم .. اني رايدج انتي تعرفين شنو ! شلون متكونين ومن وين ما تكونين اريدج وعاجبتني ..

رحمة .... لااا مااوافق ..(( صح شكلة يعجبني ! بس مايوم عجبني ! شخصيتة! وغرورة !وتكبرة! .. انسان متعجرف لابعد حد متباهي بكلشي يملكة وشايف نفسة الكل بالكل .. مصلحتة فوق الجميع ... كل العمال يعرفون وسيم ...انسان صعب جداً .. متقلب المزاج ... كلمتة تتنفذ حتى لو كانت عكس مصلحتنا ..

رفضتة وطلعت من الغرفة ...
مااعرف اني شنو اريد ..
هي فرصة ماتتعوض ! ايي ماتتعوض ! اشبه بل
القصص
شخص غني وجميل جداً يعرض الزواج على البنت الفقيرة والبشعة ! ..
صعدت لغرفتي ..
اجتي سما تركض وراية ...

سما .... شكووو الكل انتبهت عليج طلعتي صافنة ومصدومة

رحمة .... سما حلي عني ! عقلي مشوش واللة .

سما .... شكو ولج ! شكوو احجي شبي وسيم ! بعدج رافضتة يا غبية

رحمة ....سمااا (( صافنة واحجي وياها ..))

سما .... كولي

رحمة ..... ولج سما وسيم يريد يتزوجني ..

سما .... شنوووووو (( انصدمت اكثر من عندي .. هي هم كانت متوقعة وسيم يلاحقني علاقة لا اكثر ! )

رحمة .... ايي ايييي ايييي ولج يريد يتزوجني واللة تخيلي هذا الغني يتزوجني

سما ..... كال اتزوجج لو شنو ! رحمة شتحجين صدك يعرض عليج الزواج

رحمة ...لج والله كال اريد اتزوجج واريدج ... هو مايعرف حتى منو اهلي ! شيسوي بية ...

سما .... رحمة لا ترفضي

رحمة ... سمااا مااحبة والله ..تعرفين شخصيتة شكد صعبة ومكروهة ... بس ليش اختارني اني بالذات

سما .... شنو رفضتي ...! لج نعالات كل عقلج ترفضين المدير وسيم .. انجبي تزوجي والله .. ازوجي رحمة ...اخلصي من هاي الحياة .. استقلي .. صيري غنية وتنامين وتكعدين تلكين الفلوس جوة ايدج .. اشبعي نوم وراحة ... بطلي تفكرين بضنك العيشة ! شنو انتي هاوية هذا التعب والذل ونركض ورا خبزتنا حتى نحصلها ونعيش ومانعرف شنو مصيرنا باجر ...

رحمة .... صح كل الذكرتي ..كلة صح اني شايلة هم اكعد باجر واكون مريضة وحيلي مايساعدني اشتغل وانشمر بالشوراع ! خايفة يجي يوم ويطردوني منا ومااعرف ةين انطي وجهي ... خايفة من هواية اشياء متوقعتها تصير بية ... بس وسيم مااحبة ... مااكدر اتقبلة ك زوج ! مو بس الشكل مطلوب ! تعرفين زين وسيم شنو اطباعة ! تخيلي اعيش ويا بنفس البيت

سما .... انجبي يصير حباب ! اكيد هنا يختلف عن البيت ...بالبيت تكونين زوجتة وام اطفالة مستقبلاً كلشي يختلف يعني شتحبين يعامل كل العمال مثل زوجتة او حبيبتة !

رحمة .... سما تعرفين وسيم شكد عندة علاقات وهو بلسانة يعترف ويحجي بيهن ..

سما .... اووو شكد قديمة ! ترة كل الشباب والبنات هسه مرتبطين وعدهم علاقات وطبة وطلعة ! ورا الزواج يتغير ..

....

نزلنا اني وسما للمطعم نشتغل
اني كعدت على الكرسي وكدامي الابتوب ..
وسما تاخذ طلبيات وتدخل للمطبخ .
طلع وسيم فات من يمي وصل يم الباب ...
رجع ووكف يمي ..

وسيم .... انطيج وقت تفكرين وتردين خبر ..

رحمة ....بس . (( رفعت عيني وصارت بعينة .. صمتت وهو تكلم بسرعة حتى يقطع حديثي ))

وسيم .... ماكو بس ! فكري زين ....

(( ضحك وطلع ... سما اجتي بسرعة يمي ..))

سما ... شبي شيكول

رحمة .... يكول انطيج وقت تفكرين وترجعيلي خبر

سما ... ايي كليلة اي ...حطي فترة تعرفي علية بيها وشوفي زين ..

(( ( كلام سما بمرور الوقت أثر علية ... ماعندي شخص غيرها اشاركة كلشي ... كنت مجبورة اسمع كلامها ونصائحها ...شكد مااريد اخالف كلامها واسوي العكس بس ارجع انفذ كلشي تكولة .. حتى بأوقات عملي كلامها يمر على بالي واكول اي صحيح ... مشيت ورا كلامها ... نطيت فرصة لنفسي اخوض هاي التجربة ..بس تجربة سطحية مااتعمق بيها مثل ما كالت سما بنفس اليوم بالليل قبل لا انام ...

سما ... رحمة باعي انطي فرصة .. لج شيكدر يسويلج انتي بالشقة وكلها بنات مستحيل يجي يضايقج وبالنهار كل وقتج بالشغل وامام انظار الكل

رحمة.. يعني شنو

سما .... انتي ما حابة شخصيتة اعرف ...جربي فترة واحجي ويا اكيد راح تحبي وتشوفي مختلف

رحمة ... . تقصدين مااوافق على الزواج بسرعة .. انطي وقت واشوفة بي

سما ... اييي تعتبر شلون فترة الخطوبة ...ولا تطلعين ويا ... خليج دائماً بعيدة ... صيري امنيتة فعلاً ...ولو هو صدك يحبج يسويلج كلشي حتى يثبتلج حبة وصدقة وياج يعني كون حتى يتغير لخاطرج هذا غرورة يموت ههههههه

رحمة ..... خوش فكرة

سما .... ايي والله احجي علمودج ...لج حتى تتزوجي وتحلصين منة بيت او سيارة ... او طفل
تضمنين نفسج ...تنامين بأمان ...
عندج سند بظهرج يحبج ويخاف عليج ويحميج من كلشي خايفة منه

رحمة .... تمام راح اسوي الخطة مالتج عسى ولعل يطلع خوش انسان واحبة ههههههه

سما .... اووووو رحمة تخيلي تصيرين صاحبة ابو المطعم وتجين تشرفين علينا وتروحين هههههه

رحمة .... هههههههه انتي راح تقنعيني بي وتخليني احبة هم

سما ..... هههههه لج اي اييي عفية ماينرفض والله هاي فرصتج استغليها ...

((مرت الايام ..وسيم صار يتقربلي بحجة الشغل
اني نوعاً ما صارت عندي ليونة بأسلوبي ويا ماارفضة مثل السابق انطيتة صورة اني موافقة بيك
...
يعني صرت اتكلم ويا طبيعي ... أحاول اسأل عنة مثل ما كالت سما .. اهتمي بي حتى لو بالكذب ...حتى يفكر انتي تحبي وماناسيتة ..
وسيم صار يطلب نطلع سوا ويتعرف علية اكثر
وكل مرة عرضة هذا يلاقي الرفض بصورة مباشرة .
من يحاول يلزم ايدي اسحبها ..
من يتمادى بالكلام اتركة لو كان يمي واكف او اغير الموضوع بسرعة ....
ولو اتصال هاتفي اسد الخط بوجهه ...
بهذا اسلوبي صار يشتاقلي اكثر واكثر ..
كلشي يريدة ماسويتة اله ..
يمكن اول مرة بنت مثلي ترفض محاولات وسيم ...
كان مستغرب ويكول انتي فعلاً غريبة ! بهاي تصرفاتح مااعرف ليش خليتيني احبج اكثر واثبتي الي مميزة ومختلفة عن كل بنت عرفتها

طبيعة وسيم او هي طبيعة اغلب الرجال يعشقون المرأة البعيدة عنهم ...
قريبة بالمكان .. لكنها بعيدة عن تلبية رغباتهم ...
كل محاولات وسيم حتى يأخذ من عندي ليريدة او يتقربلي رفضتها تماماً حتى لمس ايدي ممنوع
اخر شي صار هو مايطلب من عندي
عرف شخصيتي تماماً ...يعرف من يتمادى اتعارك ويا وتصير مشكلة ...

صار وقت لقائنا فقط بالمطعم ..
يوكف يمي اثناء عملي واوقات يجلس بمكاني ويدير الشغل ..

وسيم ... روحي ارتاحي تعبتي خطية

رحمة ... لاا بس احد يشوفك ماترهم

وسيم ... واذا شافوني ! ترة طبيعي والله هذا مطعمي شنو نسيتي بكيفي اشتغل وبكيفي اكعد حبيبتي واخليها ترتاح شوية ..

رحمة .... هههههه ...

وسيم .... اي ضلي بس اضحكي ليش لا... حضري روحج بعد ساعة اخذج لمطعم عازمج عالعشاء

رحمة .... لاا مااكدر ..عندي شغل

وسيم .... اي شغل ! شبيج رحمة مبتعدة عني ولا كأن حبيبج !

رحمة ... انت مو حبيبي وماكو شي يربطني بيك .مااكدر اطلع وياك ..

وسيم ....رحمةة لا تعاندين بس نتعشة برة وارجعج مااسويلج شي والله

رحمة ... بس توعدني نتعشة ونرجع

وسيم ... ههههههه يابة وداعت عيونج ناكل ونرجع يلة اصعدي حضري روحج

رحمة ....بس عندي شغل

وسيم ...شنو دخلج مديرج يكلج اتركي كلشي . لتخافين ماكو خصم من يوميتج (( غمزلي وضحك ... اني هم ضحكت .. ضليت اتلفت لا يكون احد شافنه عززة ... صعدت فوك للغرفة ...

لبست فستان اسود ..
فتحت شعري ورجعتة ليورة ..
اخذت خصلتين من الجوانب ورفعتها عن بقية شعري وثبتتها بالماشة ..
لبست حذاء فلات احمر ...جزدان احمر .. حطيت مكياج شي خفيف ...
اخر لمسة رشيت عطر ..لفيت كدام المرايا اشوف اطلالتي تمام لو اغير بيها شي ..

لااا تمام كلشي حلو ..
يلة انزل ..
لااا انتظر اتصالة يلة انزل حتى لا يفكرني ماشايفة ومستقتلة علية
اعرف تفكيرة ... باعتقادة كل البنات بحاجتة ومعجبين بي ! .....

كعدت على الجرباية ..
كنت البس سواري ..
رن موبايلي ..باوعت وسيم يتصل ..

رحمة .... الو .. هاا

وسيم .... انتظرج برة للمطعم بالسيارة كاعد يلة انزلي

رحمة... تمام هسه انزل ...

(( رحت بسرعة يم المرايا....سويت لمساتي الاخيرة بترتيب شعري ومكياجي ... نزلت جوة .. شافوني البنات والولد يشتغلون بالمطعم ...
اجاني احساس اسوي شي غلط والكل عرفت بية وراح اتحاسب ... ماباوعت عليهم طلعت خارج المطعم ..فتخت باب السيارة وصعدت ...

وسيم ..... واوووو ..(( ضل يصوفر ويباوع علية ))

رحمة .... هههههه اسفة عالتأخير

وسيم ......شطالعة خبلتيني واخذتي كلبي وعقلي ولج 😉
.. يلة نروح للمطعم اليوم نحجي بهواية مواضيع لان بعد مااتحمل

رحمة .... اي مواضيع

وسيم .... من نوصل تعرفين

رحمة .... وسيم ترة مااروح مكان ثاني وياك لا تكذب وروح للمطعم

وسيم ... تمام ...سدي حلكج لا تلحين ...( بالفعل رحنا للمطعم ...كنت كلش خجلانة ... وسيم طلب الطعام ... باوع علية شافني كلش مرتبكة... حاسة كعدتي يمة خطأ ! او هذا الانسان خطأ مو اختيار صحيح ...ما مرت لحظة الي ويا وسيم وحسيتة مناسب الي ! طول ما اني ويا مااحبة ماعندي اي مشاعر اتجاهه .بس كنت افكر ممكن ينفعني ويأمن مستقبلي .. او ممكن مثل ما ذكرت سما اعيش برفاهية ومستقلة مادياً .... ))

ماكدرت اكل شي ...اعرف وسيم عندي موضوع مهم وياية ...طول الوقت افكر شنو يريد ! خاف يفكر يوصل لعمي ! او يعتدي علية ! اشكال افكار براسي ..الى ان نطق ! وسيم بطبيعتة

وسيم ...... اريد اخصم الموضوع وياج من الاخير ... لازم نتزوج انتي موافقة !

رحمة ....بشرط

وسيم .... شنو الشرط تفضلي !

رحمة ..... نتزوج بعقد شيخ ومحكمة !

وسيم .... مايحتاج عقد محكمة ... راح نعقد شيخ وخلص شنو ما تثقين بية

رحمة ...مستحيل ... لو نعقد محكمة لو ماكو زواج

وسيم .. .. احجي عدل ع اساس تتشرطين علية !

رحمة ..... ليش تعتبرني اتشرط عليك ! هذا شي روتيني و طبيعي حتى اضمن حقوقي ! ليش تريد نعقد بس شيخ معناها تعرف ماراح تكمل وياية وتريد كلشي سري

وسيم .... مو هيج ابد ... بس اني الرجال هنا ..احط شروط واكول شنو نسوي

رحمة ....زواج شي مشترك بينا اثنينا مداحجي على بناء بيت لو شراء سيارتك الخاصة ! فرق بينهم

وسيم ..... ماشي نعقد محكمة هم ....

رحمة ....اوك اريد احجيلك شغلة

وسيم .... اشش كل شغلة ما تهمني

رحمة .....بس انت لازم تعرف منو اني ! لازم تعرف قصتي كلها

وسيم .... كلشي لا تحجين مااريد اعرف شي ... اني حبيتج وانچذبت الج مايهمني اي شي .. لا اهلج ولا حياتج السابقة ... احجيلي عن نفسج وشنو صار بعد مادخلتي لمطعمنا ...هذا المهم

رحمة .... اكو اشياء لازم تعرفها

وسيم.... ماكو شي لازم ... عرفت الاريد اعرفة عنج .. حبيتج وهمت بيج .. بحياتي ماشفت بنت مثلج ...

رحمة ... معقولة ! وانت غاط بالعلاقات شنو الخلاك تختارني عن الكل

وسيم .... باعي رحمة ... كلهن شي وغايتي وياهن لعب وخلص ..بس انتي شي ثاني بصراحة ليعرفج مستحيل يفكر يسوي شي وياج بالحرام ... عقلج وقوة شخصيتج وهدوئج ولطفاتج تصلحين اي شخص يختارج شريكة حياتة وام لاولادة ...

رحمة .... وشلون عرفت ! ممكن اكون اني انسانة ثانية عكس لتشوفها

وسيم .... مستحيل .. انتي واضحة ومفهومة..اضافة لهذا وجودج بالمطعم ويانا وقت كلش كافي حتى اعرفج زين ...

رحمة .... تمام ...(( خجلت ونزلت عيني .. احرك بالشوكة الكدامي ... مااعرف شنو اسوي ..بصراحة اول مرة شخص يشوف جانب رحمة الحلو .. اول مره بحياتي انسان ينظرلي من داخلي عكس بقية الاناس لعاشرتهم دائماً نظرولي وجرحوني وتنمروا علية من مظهري الخارجي ... او لون بشرتي...
قلبي مامرتاح لوسيم رغم كل هذا الكلام !
ورغم يقدملي كلشي احس بعدني قلبي رافضة ..
بس كنت اقنع روحي اوك بعد الزواج تتغير نظرتي اتجاهة وراح احبة ويبقى يحبني ...))

وسيم .... لا تخجلين ..رحمة بيج اشياء حلوة ليعاشرج يعرفها ويكدر يميزها ..

رحمة ..... بس ليش محد اكتشف هاي الاشياء .. تصدك انت تسمعني كلام بحياتي ما سمعتة .. وسيم معقولة تكذب علية والك غاية ...بس شنو غايتك صدكني مصدومة .. كل كلمة تكولها الي افسرها مليون تفسير كل وقت اكون بي وحدي ..

وسيم .... شنو غايتي ! وشنو تملكين انتي حتى تكون الي غاية وياج !

رحمة ....هذا لمصبرني ويدفعني مصدكة بحبك الي

وسيم .... يجوز ابيعج تفصيخ ههههههههههه .يلة كومي نرجع

رحمة ..... اي ماعندي شي يلة نرجع

وسيم .... باجر حضري روحج الصبح اجي اخذج

رحمة ... وين

وسيم ... نعقد حتى نتزوج !

رحمة ....وبهالسرعة

وسيم ..... اي بهاي السرعة لعد شعبالج! ..

رحمة .. طيب ليش انطينا وقت

وسيم .... مااريد اي وقت بعد .. اريد اقتل كل المسافة تفصلنا عن بعض كافي لازم تكونين بحضني ... (( قرب ايدة حتى يلزم ايدي ...جريت ايدي حيل ... وكع الكلاص بالكاع وانكسر ... ))

رحمة .... اني اسفة مااقصد والله

وسيم ..... هههههههههههههههه معقولة ! شنو بية فايروس وهيج مبتعدة عني هههههه
هاي تصرفاتج تخليني احبج اكثر .. (( كام من مكانة ... مد ايدة حاى الزمها ونطلع للسيارة ماقبلت ... ابتعدت عنة وطلعت امشي قبلة للسيارة .. دفع الحساب واجة وراية ... ورجعني للمطعم ... ))
باجر ب 9 الصبح اجي عليج حضري روحج زين ماشي حبيبتي ...( شمرلي بوسة هوائية ... اني ضحكت ودعتة لوحت بأيدي وراح ....صعدت للغرفة وانتظر ثاني يوم بفارغ الصبر . خلص راح اتحرر واخلص من هاي الحياة .. انام براحتي . اصرف براحتي ...كلشي راح يتغير ...))

ثاني يوم كعدت الصبح
بين الفرحانة وبين اكو غصة بقلبي ...
مشاعري ملخبطة ...
سبحت ولبست بنطرون وسترة ..
شسورت شعري وفتحتة على طولة ..
سما وياية تساعدني بكلشي ..
حطتلي مكياج ولبست اكسسوارات وكلادة..
اجاني اتصال من وسيم ..
رشيت عطر بسرعة ورتبت شعري كددام المرايا .
ونزلت بسرعة ..
طلعت برة شفتة كاعد بسيارة غير سيارتة !
ويا ولد شاب بعمرة ورجل متوسط العمر ...

نزل علية من شافني طلعت من المطعم ..

وسيم ....صباح الخير يااحلى عروس بالدنيا

رحمة .... هههههه صباح النور

وسيم .....يلة امشي وياية للسيارة (( مد ايدة وضحك ..اني لزمت ايدة ))
اي الامور تمام هسه صارت عادي مو رحمة طلعتي مو هينة

رحمة .... هههههه بس دقيقة منو ذوله بالسيارة

وسيم ..... عمي ذاك الرجال بالصدر ... واخوية ليسوق ..

رحمة .... زين ليش ماكو امك او ابوك !

وسيم ... بعدين احجيلج يلة امشي للسيارة .....

(( صعدت للسيارة ...سلمت عليهم وكلت صباح الخير ...))

خالد__ يا هلا ومرحبا بچنتنا ....شلونج رحمة اني عم وسيم

رحمة .... اتشرف بيك شكراً ..

سليم .... اهلاً وسهلاً بيج رحمة ... اني اخو وسيم شايفين كل الخير

رحمة ..... وبيك اكثر تسلم ..

( بهذا اليوم عقدنا شيخ .... عمة واخو شهود لزواجنا ...بعد ما تم العقد باركولنا وبقينا وحدنا اني وسيم ...
توجهنا للمستوصف الصحي حتى نجري الفحص الطبي من اجل الزواج ... وسيم طول هذا الوقت يضحك وياية وكلش فرحان ...كل شوية يكول ماممصدك واخيراً اجا هذا اليوم ... كلشي بي يثبتلي حبة ! وصدقة وياية ! ..

كملنا تحليل الدم
نطونا موعد ونجي ناخذ نتيجة الفحص ونعقد محكمة مباشرتاً ....

طول هاي المدة طريقة معاملتي اله نفس قبل العقد
انتظر كلشي يصير رسمي ..
صار مكان لقائنة فقط بالمطعم ... صرت حذرة اكثر ...بنت مثلي ماعدها ظهر وسند وراها ولا اهل يدافعون عنها او يحتضنوها لازم مااخطأ ابداً اضمن حقي مااسلم نفسي بسهوله .... كنت اكول ممكن خلال هاي المدة قبل عقد المحكمه كلشي يتغير ليش اسلمة نفسي ! ! لااا من الافضل ابقى بعيدة عنة ...

وسيم .... ايي تحضري باجر نعقد محكمة وبعد ماكو شغل هنا ! هههههه ماممصدك شوكت يجي باجر

رحمة ..... الله كريم لباجر ... بس روح هسه اريد اكمل شغلي ..

(( اجتي سما من بعيد ..وكفت يمنا وتضحك .. دائماً تحب تتلاطف ويانة ))

سما ..... هاي شنو! واكفين سوا مايصير عيني رحمة بعدها بنتنا ماصارت زوجتك ..

وسيم .... لااااا صارت مرتي بكيفي هسه ... مو رحمة

رحمة ..... هههههه لااا

سما .... هههههههه ها حتى رحمة مثل رأيي !

وسيم ..... باقي هنا على كلبجن الكاع كاعي ورحمة مرتي هههههه

(( سما كل شوية ترجع لشغلها ووسيم واكف يمي ...صار يشتغل بمكاني ..كل شوية يكول ارتاحي مااريد مرتي تتعب ... اني اشوف هذا الاهتمام هواية علية ...اوقات مااصدك اتوقع هاي اوهام او حلم ! حب وسيم ! واهتمامة بية ! خوفة علية ! كل شروطي وافق عليها ! ماكو هيج انسان يتقبلني بهاي الطريقة ! لدرجة كل مرة احاول احجيلة عن حياتي السابقة ويرفض بقوة ...مايريد يسمع شي ويكرر كل مرة تهمني رحمة من تاريخ دخلت للمطعم مايهمني قبلها منو كانت وشلون عاشت ....))

باليوم الثاني ..
يوم عقد المحكمة ..
نفس الشي تأنقت على الاخر ...
اتصل وسيم علية ينتظرني
كملت كلشي ونزلت جوة ..
نفس الشي شفت وسيم ويا اخو وعمة
رحنا للمحكمة
عم وسيم موظف بالمحكمة اجا سلم علية وبارك لوسيم ورجع لشغلة ....

(( كعدنا ننتظر دورنا سحبت وسيم على جهة حتى احجي ويا ...))

وسيم ... شكو شبيج

رحمة .... تره جنسيتي ماكو ماعندي

وسيم .... مو مشكلة اعرف ماعندج الجنسية لتخافين مرتب كلشي

رحمة ....بس شلون ! وشلون عرفت جنسيتي ماكو

وسيم .... تره انتي غبية صايرة من طلع التحليل واخذت مستمسكاتج ما لكيت وياهم الجنسية عرفت ماعندج ورتبت كلشي من يمي

رحمة ...بس شلون يصير

وسيم .... دفعت فلوس ! الفلوس تحل كلشي لتخافين بعدين عمي يشتغل هنا انتي ليش شايلة هم كلشي اريدة يصير ...

رحمة ...... وليش ما سألتني على الجنسية

وسيم .... ليش أسالج ! اني اعرف ماعندح دائماً اطلع حجج واخذ جناسي العمال بس انتي تنطين شهادة الجنسية كل مرة ! واضحة الشغلة

رحمة .....طلعت ذكي .هههههه

وسيم .... لعد شعبالج

رحمة ....بس سؤال ...

وسيم .... كولي حبيبتي

رحمة ... ليش امك وابوك ماكو وياك بس عمامك واخوك سليم يعني معقولة رافضين زواجنا

وسيم .... لا مو هيج بس اني علاقتي بعمامي قوية واحتاجيتهم وياية بهذا اليوم .. اهلي ما متفرغين عدهم اشغال

رحمة .... بس هذا يوم مهم ليش وحدك

وسيم .... مو مهم تعرفين كلشي ..بس اعرفي اهلي يدخلون بكل قراراتي واكيد يرفضون ...اما عمامي على العكس سبورتية شفتيهم ههههههه كلشي وياية ومسانديتي واساساً مايحجون ويا ابوية يعني عدهم العيد عيدين هههههههه

رحمة .... ههههه قصدك شغلة عناد

وسيم ..... ابوية يختلف عنهم شخص جدي وكلمتة وحدة وعنودي .... عمامي سبورتية وياية بكلشي علاقاتي سهراتي سابقاً وحتى نشرب سوا هههههههه

رحمة .... وهسه شنو راح اتوب مثلاً ؟؟

وسيم .... ايي اتوب بعد عندي زوجة (( غمزلي اني ضربتة على كتفة ..ضحك وياية ... ورا شوية اجا دورنا ودخلنا للقاضي ...عقدنا ... ماحسيت بفرحة ابد ..عكس وسيم كانت الدنيا ما تلمة ... طلعنا واخو وسيم يطش علينا جكليت ويهلهل ويصفق كلش فرحان ...

سليم ..... ههههههههع الف مبروك شايفين كل الخير ..

رحمة .... تسلم

خالد ...... الف الف الف مبروك تستاهل حبيبتي ..(( بوس وسيم وحضنة ...اخو بعدة يهوس النا ويضحك .. ))

وسيم ..... حبيبي عمو اشكرك ماقصرت .. هاي وكفتك وياية تسوة الدنيا ..

خالد .... يلة هسه وين ناخذكم للمطعم لو للبيت !

وسيم ..... للبيت نروح ..اليوم عرسنا شنسوي بالمطعم بعد هههههههه

خالد ...... يلة نتوكل ...

(( لزمني وسيم من ايدي .. اخذني للسيارة ..
دخلني لبيت مساحتة كلش واسعة واثاثة فخم وكلش حلو
متكامل مابي نقص ...
كعدت بالاستقبال كلش مستحية .
وسيم كعد يمي ..
عمة خالد دخل للمطبخ جاب مي وقدملنا اني ووسيم ..

وسيم ..... هاي شنو عمو ههههههه رحمة كاعدة وانت تقدم الها تره هذا بيتها المفروض هي تضيفك بشي من ايديها الحلوات ..

خالد ..... هههههه يلة بعدها عروس جديدة ... هذا اول يوم انطي مجال للبنية ...

سليم ....يله عمو امشي نروح ..ها وسيم محتاجين شي

وسيم .... جيب اكل تره ماكو شي بالثلاجة فارغة بعدها ..

سليم .... ماشي هسه اجيب واجي ...

(( راح سليم جاب الغدة واجة .. اكلنا سوا اني مامرتاحة ... مااكلت شي كعدت مجاملة وياهم ...ومتوترة لان ملابسي كلها بغرفتي ... اريد اتحمم وارتاح اغير ملابسي .. خلقت كومة اسباب لنفسي حتى اتوتر واعقد الجو ... بعد الغداء راحوا بقينا بس اني ووسيم ... اجة علية للمطبخ شافني ضايجة ...

وسيم .... ليش ضايجة حبيبتي

رحمة ...ما جايبة ملابس وياية وتعبانة اريد اتحمم وارتاح

وسيم .... مو مشكلة ليش شايلة هم الملابس .. امشي وياية

رحمة .... وين

وسيم .... امشي ولا تسألين يلة

( اخذني لمول ...اشترالي كلشي .. تجهيز كامل
ملابس و مكياج و عطور . اكسسوارات . حلويات كرزات .. كلشي يشوفة كدامة ياخذة... طول الوقت يضحك ويشاقة وياية .. رجعنا للبيت ...تركني ارتب كل الاغراض بمكانها ... من بعدها تحممت وحطيت مكياج ... دخل وسيم للغرفة ...

بهاي اللحظة كنت خايفة ومرتبكة !
كنت واكفة كدام المرايا
فتح اغاني رومانسية !
اجة وكف ورايةوحضني ...
غمض عيني وشم شعري ..
لزمني من خصري ..

رحمة ....اريد احجيلك شي لازم تعرفة (( لازم احجيلة على اغتصاب عمي من طفولتي ! ))

وسيم .... اشش كلشي مااريد اسمع .. خليني اعيش اللحظة وياج ...

رحمة .. شي مهم بس اسمعني و انطيني وقت (( كان يتلمس بجسمي ويبوس برقبتي .. ما نطاني مجال احجيلة كل مرة يسكتني بنفس الطريقة ))

وسيم .... كلشي مااريد اعرف .... قابل بيج شلون متكونين

رحمة ...بس اسمعني

وسيم ...اششش حبيبتي ...خلينا ننسى كلشي راح ... اني احبج وميت عليج منتظر هاي اللحظة من اشهر طويلة ليش تخربيها علية ! (( دفعني على الجرباية .. صار مايسمعني ...استمر يقبل بية .. تقربلي وبعد ماخلص كام من الجرباية وضايج ...! ومصدوم بنفس الوقت

وسيم .....شو انتي مفتوحة !! ومو بنية !!! شنو ليش !

يتبع البارت القادم يوم الاحد
قراءة ممتعة
لا تنسون التصويت بنجمة 😍