"جُمان"
-حسب ما فهمت ح نكون برانا وفي شقتك.
مهند:بالزبط كده، ولا خايفه مني؟
-قلتها وبعديها ليك انا اخترت اثق فيك، بس ح نعمل شنو؟
=خليها مفاجأة.
-اصلا انا مطمنه.
=نفسك في شنو نعملوا مع بعض؟
-اييك حاجات كتيرة.
=مثلا...
-نحضر فلم سوا كوميدي او رومانسي، نمشي تحت المطر ونحن بنلعب، نقضي الليل سهرانين ونحن بنعاين للنجوم ونحاول نعدها مع انو دي اصلا مستحيلة لكن هو حلم وخلاص، نطلع في ديت رومانسي واكون لابسه فيه فستان سهرة احمر مع هيلز عالي، وانت تكون منتظرني تحت اول ما اجي تقدم لي بوكيه بتاع ورد وتفتح لي باب العربية، نمشي على مكان هادي وقريب من البحر عشان نستمتع بريحتو والجو البارد، نتعشى سوا وانت بتتغزل في جمالي بعدها نرقص، ح اكون متمنية الليلة دي ما تنتهي لكن لازم ترجعني البيت وتودعني بهدية مميزة زي اليوم القضيناه.
=طلعت احاسيسك مرهفة.
-اتوقعتك تقول بقرا روايات كتير ومتابعة الاتراك.
=بعيدا عن الروايات والمسلسلات من حقك يكون عندك احلامك الخاصة، والبتكون خارجة عن حدود المعقول والمنطق، انت مميزة بطريقة تفكيرك بنظرتك للأمور حتى بأحلامك، ما تخلي عادية الناس الحوليك تطفي بريقك، وخليك دايما لامعة ومتميزة❤
-هل تدري انو كلامك حلو شديد؟!
=ما احلى من الموجه ليها.
-هنووو.
=روح هنو ونفسو.
-خليك ما تمشي.
=هو انا اقدر افوتك!
-وعد؟
=وحياة عينيك المن اشوفها ما بركز تاني وعد.
-مين اللي عايز يخرب اللحظة دي، دقيقة في رقم غريب Waiting اشوف منو وارجع ليك.
=رقم غريب وفي الوقت ده، دخليو في المكالمة.
-طيب لكن انت ما تجيب صوت عشان احتمال يكون زول من اهلي.
=حاضر.
-الو.
نسيبة:دي انا يا جمان.
-نسنس.
+كيفك تمام؟
-بخير الحمدلله كيفك انت كويسة؟
+ما كويسة يااخ.
-مالك؟
+انفصلت انا واحمد وحصلت بينا مشكلة كبيرة ومليانة تفاصيل لكن خلي بحكي ليك بكرة في المدرسة، كنت عايزة اسألك قبيل كنت عايزة شنو لمن جيتي في الفصل والأستاذ طردك.
-ما تذكريني قضيت اليوم كلو متنشنه بسببو، استاذكم الكر.يه ده.
+اوعك تغلطي انا ما برضى فيو.
-ما ترضي لو عايزة، هو زاتو جه من وين اول مرة اشوفو.
+ده استاذ الاحياء الجديد نزل بداية الاسبوع ده وديك كانت تالت حصة لينا معاو.
-وحاسي بشنو يختي متفر.عن كده.
+حقو والله انت شفتي الوجاهة ولا الهيبة والوقار في مديرنا ماف، لو اتكلم صوتو بتردد في الفصل ولو سكت نظراتو احي منها.
-ده استاذك البتتكلمي عنو كده يا عو.اليق.
+استاذي المعجبة بيو ونفسي اعرسو.
-يعني انت واحمد جد انفصلتو ما شكلة زي كل مرة؟
+احمد ده سكتو عطش.
-يخسي عليك بعتي بالرخيص.
+بفهمك بكرة، خليك مني انت يختي بتتكلمي مع منو للوقت ده؟ خطيبك ولا شنو؟
-اي ياهو.
+وما كان تدخليني معاكم في المكالمة اسلم عليو.
-قفل والله جاو تلفون شغل.
+وناوية تعرفينا متين ولا خايفة اشلبك؟
-تتعرفو طوالي، وعموما ما انا البخاف يشلبو مني لاني بعرف راجل والبتشلبو اشباه الرجال، وماف زول بخلي الكيكة عشان يمشي للويكة.
+ههههههاي كلام لكن، مع السلامه انا نعسانه وعايزة انوم.
-تصبحي على خير، بعد قفلت منها اتوقعت هنو يكون نام او قفل الخط لكن اول ما ناديتو رد،
-انت صاحي يعني؟
=البت دي كلامها كتير زي الرادي ما سكتت.
-اصلا نسيبة بتحب الكلام.
=لي ما وريتها انك خليتي خطيبك ونحن مرتبطين؟
-اسألتها كتير وانا ما بقدر اجاوب عليها، واحسن لينا في الوقت الحالي ما تعرف بعلاقتنا لانو لسانها خفيف بكرة توري المدرسة كلها اني خليت خطيبي عشان واحد تاني.
=وما يقولو ما تشتغلي بالناس كتير ط.ز فيهم كلهم.
-ما بشتغل بيهم ولا بركز معاهم لكن ما بحب الجوطة عموما كده هادين لا في زول داري بعلاقتنا ولا شغال بينا ونحمي نفسنا من عين العزايل والحسد.
=طالما كده مرتاحه اوكي.
-بقيت تسرق كلامي!
=هكرتيني زي ما هكرتي قلبي❤
"مُزن"
من نزلت تالت اتعود بعد اصلي الصبح حاضر اقعد اقرا مواد الحفظ الدراسات والعربي عشان تتركز وما انساها، اما الباقي بقعد ليهم بليل اراجع واحل من المريح والاسئلة البدونا ليها الاساتذة، الساعة تمنية لمن جات لبست عبايتي عشان امشي المدرسة خالي قالي اقعد،
-لكن يا خالو عندنا قراية وحاجات مهمه.
الفاضل:مدرسة شنو دي كمان البمشو ليها يوم السبت انت قايلانا ما قرينا ولا شنو؟
-لو وصلت تالت كان فهمت قصدي وعرفت لي بنمشي سته ايام في الاسبوع ما زي البقية لانو تلت مختلفة وسنة حصاد.
=قصدك شنو انت؟ المدرسة دي طلعت منها غصبا عني ما عشان ابيت القراية، بعد ابوي وامي ماتو امك دي الكان بأكلها منو ويتحمل مسؤوليتها.
-وانت عشان ترتاح من مسؤوليتها اول عريس جاك اديتها ليو من غير ما تعرف اصلو وفصلو وفي النهاية اتطلقت منو بسبب ضربو ليها الكانت بتجي تشتكي ليك منو وبتقول ليها تقعد وفي النهاية ده راجلها.
=اعمل ليها شنو يعني عشان كفين عايزة تطلق.
-كيف ترضى لي اختك الذل والإهانة وتخلي واحد قايل نفسو راجل يرفع يدو عليها وانت قاعد من غير ما تعمل شيء.
=امك تستاهل هي الغلطت وخلتو يفقد احترامو ليها.
-غلطت في شنو امي غير خدمتو بي يدينها وكرعينها.
=اسأليها ولو بتقدر خليها توريك.
-توريني بشنو؟ مشى من غير ما يرد علي وخلى مئة سؤال يجي في بالي، بقيت اربط بين الكلام البقولو خالي لي امي كل مرة وكلام ابوي لمن اتكلمت معاه والصداع ح.يشق راسي...
"جُمان"
خمسة صباحا لقتني صاحية واقفة قدام المراية ومطلعة ملابسي كلها في السرير وبحاول اختار منها، المشكلة انو ما عاجبني شيء وكلو بحسو عادي ما زي مشواري الليلة، في النهاية اخترت اسكيرت زيتي غامق فيه اشكال ورق صفق ملونة مع فنيلة نص بيضاء وشبط بالابيض، وانا بكوي شعري المكوة سلكها شاط مشيت شلت حقت فاتن وعملتو مرول، طلعت عدة الميكب واشتغلت في وشي عربي وافرنجي لكن النتيجة كانت حلوة، لبست الاكسسرز ورشيت شوية عطر علي وقفت قدام المراية وعاينت لي نفسي وكنت راضية جدن بمظهري، طلعت وانا بتسحب ما عايزة فاتن تصحى لانو هي احيانا بكون نومها خفيف اول ما فتحت باب غرفتي نادت علي،
-طالعة مستعجلة بنتكلم بعدين لمن اجي.
+اقيفي يابت عايزة اقول ليك حاجه بس.
-ما بقدر لي بعدين، نزلت وانا بجري في السلم لمن قربت اقع وفي نفس اللحظة تلفوني كان برن "محور الكون🌍"
-ياريت بس تكون جيت.
=منتظرك قدام البوابة.
-انت عايز تخر.ب بيتي صاح؟
=ما عايز افوت ولا لحظة معاك.
-فصلت فصلت.
=شايفك انا تعالي.
-حاضر، قفلت الخط ودخلت التلفون في شنطتي فتح لي الباب من جوا، ركبت وما خليت عيوني تصادف عيونو، لفت وشي عليو وقال: ما حاسه انك مزودة عيار حلاوتك؟ بالشكل ده ما بنزلك للناس بسحروك لي، كنت بضحك بخجل قال: دي ما ضحكة مفترض يختوك في الصيدلية ويكتبو عليك مخفف اوجاع شافي خيبات حبه كل ما الدنيا تقسى عليك، قلت ليه: هنو يااخ بالجد انا بخجل،
=هنو ده ما قلبو مات.
-بررري تبرى.
=عليك الله عيديها تاني.
-ابيييت.
=احلى ابييت في الدنيا، ياداب انتبهت ليو وانا بعاين في عيونو العسلية حواجبو وانفو الطويل، ملامح وشو وشوية الدقنة الفيو مع لونو الحمصي، كنت بتأمل فيو وسرحانه لمن نبهني وهو بخت يدو على خدي،
=وين انت يا جميل.
-غرقانه فيك♡
=يرضيك تفصليني؟
-ما انت بتعملها كتير خليني اجرب مرة، مسك يدي باسها ودور العربية فضل سايق وهو لسة ماسكها،
=عايز اسمعك غنية او الاصح اهديها ليك.
-يا حلاوة اشوف اخترت تهديني شنو، شغل غنية حماقي "لا ملامة"
لا ملامة على اللي حبو لا ملامة
دا الساب في قلبي يجي 100 علامة
مش طبيعي لو ظهر بتقوم قيامة
من اول مقابلة سحر عينو ناداني
بالطريقة شد ألبي بالطريقة
دبت فيه سلمت من اول دقيقة
واعمل ايه كان لازام اضعف بالحقيقة
ذي عيون سبتوني نص ساعة في مكاني
على كيفه يعمل اللي على كيفه
في الجمال ده مطلع القمر وصيفه
من اول مقابله سحر عينو ندانى
بالطريقه شد قلبي بالطريقه
مت فيه سلمت من اول دقيقه
كان بردد كلمات الاغنية وهو بعاين في عيوني ونظرتو شدة ما حلوة خلتني حاسه اني طايرة في السماء من الفرح، بعد خلصت قلت ليه: حلوة شديد على فكرة باس خدي وقال: ما احلى منك يلا عشان ننزل عاينت حولي لقيتو واقف في مكان غريب ما بعرفه،
-على اساس ماشين شقتك؟!
=غيرت راي وعايز اوريك مكان ح يعجبك.
-مالي حاسة انك كنت بتختبرني.
=يعني اسمها جسة نبض.
-امممم طيب، نزلنا وطبعا ماسك يدي خشيما مكان في بدايتو بوابة كأنك خاشي بيت قديم، على اطرافه في حشائش خضراء واصايص مزروع عليها ورد، دخلنا جوا المكان شرح ومرح وكمان مطلع على البحر، جات بت لطيفة دلتنا على طربيزتنا وكانت في مكان مميز وحلو، هنو جرا لي الكرسي قعدني ومشى قعد،
-على فكرة المحل حلو شديد.
=انت لسه ما شفتي حاجه.
كان المنيو قدامي شلت عشان اختار وطلع المطعم متخصص في الفطور، وفي ليه انواع كتيرة منها السوداني المصري التركي السوري واييييك،
=ها عايزة تاكلي شنو؟
-ممكن نطلب ميكس؟
=اكيد.
-عايزة تركي وسوري.
=زي ما تحبي، لكن نضيف عليه السوداني لانو عندهم احلى فول ممكن تاكلي في حياتك.
-طيب اجرب واحكم، خدمتهم كانت سريعة وخلال ربع ساعة اتملت طوالتنا باصناف مختلفة من الاكل، كانت سفرة لامه ثقافات مختلفة زيتون اسود واخضر مرتديلا جبنه طعمية فول طماطم وخيار عصير برتقال،
-السفرة فتحت نفسي على الاكل.
=ولسه لمن تضوقي الطعم.
كنت مبسوطة بي قعدتنا دي والجو الحلو الرايق ضحكة هنو، وحركتو وهو كل شوية بأكلني حاجة بالجد هو حنين شديد،
-والله شبعت ما بقدر اكتر من كده.
=خلاص اخر لقمة، الطيارة جات ح تهبط وين؟ في مطار جمان يلا افتحي ليها السكة، بتهابل وبتعاور وبحس معاو اني طفلة لسة عمرها خمسة سنين، بعد حلينا بكريب وسينابون مشينا مول عفراء عشان نتزلج، انا كنت بعرف لكن هو اول مرة يجرب يمكن وقعنا اكتر من عشرة الف مرة، بعد ساعتين من المحاولات الفاشلة اقتنع انو ما عايز يتعمل وكسر الحنك، منها طلعنا على السينما ولي حظنا كان فلم رومانسي "The Perfect Date"
ما حصل حضرتو قبل كده لكن سمعت بتين بقولو انو حلو، على بال ما جبنا الفشار ودخلت الحمام اظبط شكلي كان هو اشترى التذاكر، كراسينا كانت ورا اخر شيء وبالنسبة لي ده اسوء مكان ممكن القاه،
-حظنا ب.شع قعدنا اخر ناس كده ما بنقدر نستمتع.
=قبل نهاية الفلم ح اغير ليك رأيك.
-كيف؟
=بتشوفي براك.
الفلم بدأ بعد طفو الانوار وعلو التكيف الجو بقى بارد ولطيف لكني بردت بجد ولبسي زاتو ما كان مساعد، هنو انتبه لي وقلع الجكت حقو لبسني ليو رجع مسك يدي وخلاني اتكل في كتفو، طول الوقت كان بلعب بشعري ومرات يلمس خدودي ويحرك اصابعه حولين رقبتي، ضماني بيدو وخلاني وسط حضنو وعلى فترات متباعدة كان ببوس جبيني، وانا كنت خاته الفشار في رجليني مرة اكل ومرة ءأكل هنو، لغايه ما خلص فلم الما كنت مركزة فيو اصلا لاني عايشة فلمي الخاص❤
"مُزن"
بصعوبة طلعت الاسئلة ديك كلها من راسي ومشيت المدرسة لقيت الحصة نقلوها في مدرسة الاولاد عشان عاملين تصليحات في السطوح حقنا وعايزين يوسعوا حجموا ومنها يشيل اكبر عدد من الطلاب، وعشان عرفت متأخر ما لقيت الا مكان ورا لا شايفه ولا سامعه كويس وغير الجوطة الحاصلة جمبي، غايتو الحصة الأولى انتهت بالبركة نص سمعتو والباقي طار في الهوا، ادونا استراحة نص ساعة واغلب البنات والاولاد مشو انا كنت مشترية فطوري شلتو وقعدت قدام في محل فاضي لقيتو، لمن الحصة التانية بدت جاتني بت وقفت قدامي وربعت يدينها وقالت لي: قومي ده مكاني قلت ليها: انا لمن جيت لقيتو فاضي وما مكتوب عليو اسم زول، قالت لي: عايني ما عايزة معاك كلام كتير قومي لي من محلي، ما اشتغلت بيها ولا كأنها بتتكلم معاي واصلت في كتابتي حاولت تقومني بالغصب، ولمن الاستاذ انتبه لي تصرفها معاي طردها وحرمها تحضر ليو حصة تاني حمرت لي ومشت، في نهاية الدرس الاستاذ كتب لينا مسألة في السبورة وقال البحلها اول عندو جائزة، ما كانت الجائزة بتهمني قدر اني اعرف الحل الصح ليها، حليت ومشيت عشان يشوفها جه معاي ولد مع انو كان سابقني بخطوات لكن خلاني اتقدم عليه، مديت ليو الكراس شاف المسألة وما اتكلم وشال كراس الود عشان يشوف حلو، تاني قام على حيلو وقال عندنا اتنين حلوها صاح لكن الجائزة وحده وح تكون بالتصويت، اول العايز البت تاخد الجائزة يرفع يدو رفعو لي عدد لا بأس به من البنات وكم ولد كده، وحتى الود لمن جه دورو ما اظن الرفعوه ليه كانو اكتر مني، فالاستاذ قال تعادل ويفترض نتقاسها وكانت عبارة عن مطبوعة فيها شرح مفصل لمسائل الفيزياء من اول فصل للاخير، وكانت جديدة لسه ما نزلت السوق لكن قال ان شاء الله بتنزل والسنه الجاية بتكون متوفرة، اتفقنا انو اربعة ايام تكون مع واحد والتلاته البقية مع التاني والاسبوع البعدو يحصل العكس، شالها اتصفحها شويه وقال لي شيليها معاك انت اول ولو غلبك شيء اشري عليو وانا بشوفو قلت ليو حاضر، على كده انتهت الحصص ورجعت بيتنا وكنت مركزة مع المطبوعة دي اكتر شيء.
"بعد فترة من الزمن"
"جُمان"
Happy Birthday to you...Happy Birthday to my lovely...Happy Birthday to "محور الكون🌍"
-سنه سعيدة عليك مليانه فرح وحاجات حلوة بتشهبك.
=سنه ابتدت بصوتك وشوفت وشك ما اظن تكون احلى من كده.
-هاا جاهز لمخطط اليوم السعيد.
-ومتحمس اعرف ناوية نعمل شنو؟
-نو نو نو ما بتعرف اي شيء حاليا خليني احافظ على السبرايز.
=طيب وانا منتظرك بحماس.
-يلا بما انو احتفالنا امشي نوم عشان تصحى بدري تمشي جامعتك وتلقاني منتظراك.
=نتكلم شويه اول.
-اخر مرة قلت لي فيها نتكلم شويه ساهرنا للصباح متذكر؟!
=الكلام معاك ما بيتشبع منو.
-اي اقعد حنكني وانا بصدقك بالعادة.
=ما حنك لكن انت لطيفة.
-لطيفة دي منو؟
=بت خالتي العايز اعرسها.
-اعملها عشان اغتا.لكم.
=يا غيورة.
-من حقي على فكرة وانا انانية ما اتعودت اشارك اي شيء بخصني مع اي زول مهما كان.
=يا شر.سة.
بعد مكالمة طالت مدتها قفلت الخط وفتحت Gallery بتفرج على كل الصور البتجمعني مع هنو، في فترة بسيطة شديد قدر يحتل قلبي ويخليني احبو بكل ذرة فيو، حب شنو نحن وصلنا مرحلة بعيدة من العشق الوله الغرام، جمان ومهند زي ما اسمينا ارتبطوا كذلك اقدارنا، حرفيا بقى ما عندي حاجه غيرو بصحى وانا بتكلم معاه وبنوم في الخط ونحن بنتكلم، يومي لا يخلى عنو وبكون عارف بأدق التفاصيل عني صحيت متين فطرت بشنو واخدنا كم درس، قريت روايات وشفت افلام وكنت بقول انو البصوروه لينا على انو حب مجرد تمثيل وماف زيو في الواقع يعني سايقننا ليبيا بالخلاا، لكن بالجد مع مهند اكتشفت انو في حب زي ده ويمكن احلى بكتير، اهتمامو بي وخوفو علي والسبرايز البعملها عشاني غيرتو ونظرو لما نكون مع بعض ويشوف ولد بعاين لي، حاجات كتيرة شديد عملها وخلتو يكون "شخصي المفضل♡"
"مُزن"
امتحانات الفترة الاولى قربت وبقت القراية كتير وماف اي وقت للتضييع، كنت مع أمال وكم بت من فصلنا عاملين جدول للقراية كل يوم بعد تنتهي الحصص بنقع مع بعض عشان نشرح، واي واحده فاهمة المادة كويس تشرح للبقية ونحل مسائل رياضيات فيزياء كيمياء واحياء، وحسب الجدول ده لمن تجي الامتحانات بإذن الله بنكون انجزنا، زي الليلة وبعد بكرة الامتحان امي تعبت لمن مشينا بيها المستشفى وقالو عندها ملاريا، رجعنا البيت متأخر وكانت محمومة لكن شايله هم الشغل، اتصلت كلمتهم انها عيانه وما بتقدر تجي ما راعو ولا قدور وقالو اذا ما لقت زول يسد مكانها بجيبو وحده غيرا، ما عارفه ناس الدنيا ديل الحصل ليهم شنو لمن قلبهم بقى قاسي للدرجة دي، عشان اخليها تهدى وتبطل تفكر في الموضوع قلت ليها انا بمشي بدلها، حاولت كتير تمنعني لكن نحن بالجد محتاجين للشغل ده خصوصي انو راتبو كويس ونحن مصارفينا كتيرة وبكده اقتنعت، صادف انو يوم سبت مشيت حسب الوصف لقيت الكافي، كنت شايلة لي فستان اسود واسع ومعاو طرحة ما زي لبسهم لكن بمشي الحال، من زمان مفتكرة شغل الجرسون حاجه سهلة تشيل الطلبات وتجيبها لكن الليله اقتنعت بالعكس، لانو كمية الناس المختلفة الانت مضطر تتعامل معاها كل يوم بخليك تحتار، ناس لطيفة وعندها ذوق وبتتكلم وتطلب بأدب وغيرهم البعاينو ليك وكأنك خد.ام عندهم ويستحقر.وك، والنوع الس.غيل عايزك تفهم هو عايز شنو براك، ولا المتفلهمين والعو.رة لغاية العصر كده روحي مرقت من كترت المشية والجية وعرفت قدر كيف يمه بتتعب عشان كده بتجي هلكانه، وانا داخلة المطبخ وقفني واحد بسألني عنها مهندم و واضحة عليو الروقة،
-اتفضل كيف ممكن اساعدك؟
=كنت بسأل عن موظفة هنا اسمها انتصار شكلها اليوم ما جات!
-ايوا انا بتها وهي عيانه.
=الف سلامه عليها ما على قلبها شر ان شاء الله.
-الله يسلمك.
=وكيف وضعها الان؟
-بخير الحمدلله كويسة وبتاخد في العلاج.
=ممكن اخد من وقت عايزة اتكلم معاك في موضوع مهم.
-اتفضل، اشرت ليو على طربيزة في الزواية وقعدنا فيها كنت منتظراو يتكلم وهو شكلو متوتر.
=والله يابتي ما عارف اقول ليك شنو، لكن عايز اكون واضح وصريح امك انا شفتها من فترة وابديت اعجابي بيها، اتكلمت معاها وطلبت منها تفكر وهي كانت مشترطة انها لو وافقت ارضى بيك وانا كلمتها انو ما عندي مشكلة انت وهي حبابكم الف، ما اتوقع فتحت معاك الموضوع قالت بعد تخلصي تالته لكن بما اني لقيتك قلت اتكلم معاك واعرف اذا في فرصة توافقي برضو، واعرفي اني ما عايز اخد مكان ابوك ولا يمكن لانو الاب ما بتعوض لكن ما بتلقي مني الا المعاملة البترضي ربنا وبإذن الله انت وامك تعيشو معاي مبسوطين، وما اطول عليك واشغلك قومي تمي شغلك وفكري براحتك في النهاية انا منتظر ردكم.
"جُمان"
عصريات كده كنت جاهزة فستان احمر وهيلز اسود مع اكسسرز والميكب وقفت قدام المراية اخدت صورة قبل ارهب Date ممكن يحصل، كنت متفقين نتلاقى في شارع عبدالله الطيب ومنها نمشي على الكافي، اول شيء كنت شايلة ليه بوكي ورد طبيعي من شفتو اديتو ليه وكان رد فعلو Cute جدن، منها اتحركنا على الكافي كنت حاجزة لينا طربيزة هناك وكانت الوحيدة في الطابق التالت، وحسب ما اتفقت معاهم لقيت المكان كلو انوار صغيرة على شكل قلوب وفي طاولة في النص وقصادها كرسيين، وعليها كاستين فيهم عصير وكمان ورد احمر بالاطراف،
=مكان خاص بينا.
-لانو اللحظة خاصة عايزاها تكون مميزة وماف عيون متابعة كل حركة بنعملها.
=لفتة جميلة منك.
-لسة ما شفت حاجه، خليك هنا دقيقة وراجعة ليك، نزلت تحت اكدت عليهم يجيبو الكيك بعد خمسة دقايق بالزبط وشلت معاي اول هدية، كانت عبارة عن خاتم فضة ومعاه سلسال وقطعة كاب كيك عليها شمعة صغيرة دخلت عليه وانا بغني،
سنة حلوة يا جميل
سنة حلوة يا جميل
-قبل ما تطفي الشمعة اتمنى اول.
=ما محتاج شيء وانت معاي وجودك كفاية علي.
-بطل يااخ ما تفصلني.
=انت اصلا فاصلة لي.
-حصل يا سيدي غمض عيونو لكم ثانية وبعدها نفخ على الشمعة، اديتو الهدية وكانت على مزاجه لاني عرفت هو بحب شنو وممكن يعجبه، ساعدته يلبس السلسال ولبستو الخاتم وانا بقول ليه: كده خطيبتك رسمي فضل اشتري الشيلة واحدد موعد العرس كلم لي اهلك عليك الله عشان اجي اتقدم ليهم، كان بضحك مبسوط في اللحظة الجو فيها ولدين وهو شايلين قالب الكيك وعليها صورة بتجمعنا واتنين وعشرين شمعة قدر عمره، فتحت غنية من تلفوني وطفى الشموع للمرة للتانية،
-ممكن تسمح لي بالرقصة دي؟
=حنسيني.
-هنو يااخ.
=عشان هنو دي نرقص.
كانت اغنية اجنبية بتمثل مراحل الحب من اللقاء الاول الكان غير متوقع لحد ما حبو بعض،
-ممكن ما ننفصل عن بعض، مهما حصل ما تغيب عني ولا تبعد؟!
=انا وعدتك لا يمكن يبعدني شيء عنك.
بعد قضينا وقت حلو مع بعض اديتو الهدية التانية كنت جايبة ليه قميص بدل الكشحت فيو العصير اول مرة شفنا بعض فيها ومعاه عطر ومق فيه صورتنا لونو بتغير من الأسود للابيض حسب السائل البكون فيها اذا بارد بكون اللون ابيض ولو ساخن اسود، وعشان عندو أرق وما بقدر ينوم بالليل جبت ليها زي لمبة كده بتعرض شكل نجوم وبتطلع صوت هادي، ان شاء الله تخليه يقدر ينوم ويتخلص من الأرق ده.
"بعد عدة ساعات"
-الو أمير.
=ايوا يا جمان.
-انت وين؟
=في البيت رجعت قبل شويه.
-عليك الله تعال لي لكن من غير ما زول من ناس البيت يحس عليك.
=خير الحصل شنو قلقتيني عليك.
-واقعة في مصيبة، تعال في قسم شرطة الخرطوم2...
💜ابقوا عافية💜