قيود العوف

Part 38

#قيود_ العوف
بقلمـَي: ريتـَا

هل يمكن ان يهرب الانسان من شعور في صدره؟

طبگت بارتين سوىٰ تعويض فلفولاتي 💋.

لتنسون التصويت + التعليقات بين الفقرات + متابعة حسابي قلبي ❤️‍🔥

شبابات صوتوا دوسوا علىٰ النجمَة لتنسون مُهم🤏🏻
________________________________

-قاسم: مهمتك چبيرة عوف يمكن تخسر بسببها ش...

-عوف: لا تكمل مفتهمك

-قاسم: شنو راح تسوي

-عوف: ماراح اسوي شيء راح أبقىٰ بمُكاني مثل الشمس وأي شخص يوگف گبالي راح يحترگ 

-قاسم: السالفة مو بس لهنا مو حرگوا بيتهم وعافولك تهديد يعني بس يمكم وخلصت عوف عائلتنا كلها  صارت بخطر

بهلحظة صدگ الدنيا ظلمت بعيني ، هزيت راسي هزتين بسُرعة داحاول أستوعب الي سمعتة ! بيت خالة أمل محترگ وحياة جُمان وحياتنا بخطر وتهديدات شنو ديصير من ورانة ومدنعرف !!

دگت طبول الخوف بجسمي ، صرت اخذ النفس بسرعة حسيت بشعور بشع بشع داخلي اتقربت أكثر فتحت أذاناتي أكثر أريد افتهم أريد أستوعب الصدمة الي اني بيها

جاي يرد عليه وسمعت صوت باب ينفتح ، من التوتر ماعرفت شسوي بسرعة دنگت أخذت ملابسي ورحت للمطبخ ركض ركض شغلت اضويتة وسويت روحي جاي أخذ مي

ألتفت شفتهة الحجية گاعدة أول ماشافتني ابتسَمت بوجهي وگالت ..

-جميلة: ها يمة بعدج گاعدة لهلوكت ؟

-منار: لا بس نمت بملابسي وهسة فزيت گلت اسبح

-جميلة: زين ناوشيني أميه من يمچ بعد عيني

انطيتها كاسة المي بأيدهة باوعت الي بأستغراب اتنهدت وطلعت فتت للحمام فتحت الدوش وصرت جواه تشوش عقلي وضاق صدري حسبة تجيبني وحسبة تاخذني

تململت ألتفت سديت المي وطلعت نشفت واتوضيت ومشيت بأتجاه الغرفة صار بوجهي قاسم شلت عيوني عنة وعبرتة خطوتين بس وگفني من لزم أيدي ورجعني عليه

-قاسم: منار ؟

بقت عيوني متركزة ليگدام ما ميلتهن ولا درتهم عليه ولا رديت ..

-قاسم: شبيج ؟

غمضت عيوني وفتحتهم جاوبتة ..

-منار: أترك أيدي قاسم

-قاسم: نمنمة شمالج ؟

سكتت عنة وماجاوبتة ..

-قاسم: بعد گلبي النكد يمشي بدمج أنتِ

نترت بوجهة بغضب ..

-منار: شتريد قاسم ؟

اتغيرت ملامح وجه بأستغراب وگال بطريقة جدية ..

-قاسم: شنو صاير شبيج

-منار: أترك أيدي اول شيء

تركها ورفع أيديه ليفوگ وعيونة تتنقل بين عيوني بحيرة ..

-قاسم: شمالج ماتگليلي

-منار: مستغبيني قاسم ؟

-قاسم: نعمم !؟

-منار: سؤالي واضح

دار وجَهة يلتفت بالجوانب .. لزم أيدي يمشي بيه للغرفة نترتها من أيده بقوة وگلت بصوت مسموع ..

-منار: اتررك ايدي وين مااخذنيي !!

ألتفت عليه وهو فاتح عيونة وهمس بحدة ..

-قاسم: صوووتج

أخذني دخلني للغرفة وسد الباب بقيت واگفة واباوع اله بغضب أتقدم گعد علىٰ الچرباية وگال ..

-قاسم: شنو سالفتج انتِ اليوم ؟

ضحكت بسخرية و وگفت گبال وجهة هزيت راسي وحچيت ..

-منار: سالفتي ؟

-قاسم: اي ؟

-منار: سالفتي لو سالفتكم !!  شنو ديصير من ورانة ومنعرف ؟

-قاسم: شيصير ؟

-منار: تسوي نفسك مد تفتهم !

-قاسم: لا هو صدگ ما مفتهم وحالياً جاي اسايس بيج حتىٰ أعرف شبيج شنو الي موصلج لهاي المرحلة ؟ تمشين گدامي وتخوزرين وتحگرين ؟

-منار: لأن سمعتكم وانتوا دتحچون بأسراركم العميقة المحد يعرفها ويدري بيها غيركم سمعتكمم !!

زم شفتة وميل راسة بأستغراب ..

-قاسم: اي وبشنو سمعتينة نحچي بال***  ؟

-منار: سمعتكممم وانتوا دتحچون بحرگ بيت خالة أمل وجُمان والتهديدات الدتوصل عوف وحياة الكل بخطررر

بلل شفتة وهو يباوع ألي بجمود وأني اسولف ..

-منار: لتحاول تنكر لأن سمعت بأذني لهلدرجة مستغبينة ؟ كل هذا ديصير من ورانة واحنة منعرف بشيء

-قاسم: خليني أفهمج

-منار: واني أگول المستشفىٰ سووها علينا سجن محد تتحرك عن مُكانهة الحراس فوگنا صديقكم وامة فوگنا توصيات وتنبيهات وحدة ورة الثانيية

-قاسم: شمالج انتِ

-منار: بسسس اني غبية شلووون ماا افتهمت أكو مصيبة دتصيرر شلووون

-قاسم: ماكو مصيبة

صفنت بوجهة راح يخبلني ملامحة جامدة وهادئ ولا كأنُ قبل شوية يحچي وي أخوه بموضوع حياة وموت ! ضحكت بأستهزاء رفعت أيدية مسحت وجهي وحچيت

-منار: صحيح حياتنا وحياة صديقتي مو مهمة عندكم لدرجة بيتهم صاير رماد وبنصة تهديد يخص حياتهة وانتوا ممهتمين

-قاسم: مناااار شنو هلحچييي !!

-منار: يعنيي كذبببب هذا الصح موووو

-قاسم: لا طبعاً لا

-منار: لعد ألي اريدة تفهمنيي لا تستغبيني قاااااسم لا تستغبينييي جاي أسألك جاوبني فهمني ريييح گلببيي

زفر نفسة مسح وجهة ونهض أتقدم الي لزم أيدي وگعدني اتنفس سريع صدري يصعد وينزل من سرعة النفس وجهي أحس بوخ من العصبية گعد گبالي حضن أيدي وهمس ..

-قاسم: نمنمة شمالج ليش ماتخليني أفهمج ليش تاخذينا بالصياح

گوة علىٰ أعصابي نصيت صوتي وحچيت بهدوء ..

-منار: يله فهمني

-قاسم: بس هذا الي سمعتي انتِ ؟

-منار: اي

شبك أيديه ببعضها وگال ..

-قاسم: الي حرگوا بيت جُمان جماعة ألهم معلومات فساد وأفعال مو قانونية ارهابية والمُهمة عوف مسؤول عنها

-منار: و جُماااان شنو علاقتهة ؟

بلل شفتة وگال ..

-قاسم: لأن مراقبينة وبس هو الوحيد الي يتردد عليهم وجامعين معلومات عنهم ويعرفون تهمة وتخصة بشيء و وحيدين ماكو أحد وراهم

-منار: شلون عرفوا شلوون

-قاسم: مو صعبة يسألون ويعرفون وهم السائق الي وصلكم من الكاظم مامقصرين وياه ناقصكم حب وچايات تخلصون بيهن الطريق

ميلت راسي بأستغراب رمشت بوجهة سريع وحچيت ..

-منار: شنوو ؟ يا سائق وصلنا وممقصر ؟

-قاسم: مو رايحات للكاظم تزورن انتن ويامن اجيتن ركض غيرر قندوررر موصلكم

حطيت أيدي علىٰ حلگي ربطت شيء بشيء رجع عقلي لكل كلامة أستفساراتة طريقتة بالكلام شلون ذب ميانة وصار يسولف وي خالة ويضحك رجع عقلي من جاب المسواگ وعيونة تتنقل بالبيت يمين يسار كأنُ ديحفظ أماكن البيت

ضربت رجلي بأيدي بحررررگة فززز بوجهي من سويت هلحركة وگال بعدم رضا

-قاسم: شبيييج

-منار: وجُمان شدخلهة بمُهمة عوف حتىٰ يراقبونها ويردون يأذونها ميتردد بس عليها معرفوا ناس غيرها ميعرفون أصدقاءة ميعرفون معارفة لتخبلنيييي قاااااسم

-قاسم: منار عوف يحبها لجُمان

غمضت عيوني ونزلت راسي گلبي محترگ يفور يفوور

-قاسم: وصديقتج هم تحبة

-منار: راح تتأذىٰ بسببة !

-قاسم: تتاذىٰ بسبب منو ؟ بسبب عوف كل هلوقت تتوقعين ما حاولوا يأذونها ؟ أكثر من مرة حاولوا يأذونها وصد الهم

-منار: شوكت هلحچي ؟

-قاسم: نفس العصابة الي چانت مخطوفة يمهم مسؤولينهم أكثر من مرة حاولوا يأذونها أكثر من مرة الحماية الي چانوا مسؤولين عن بيتهم يلگفون أشخاص يترصدون الها من تطلع منار عوف عندة علم بكل خطوة چانت تخطيهة جُمان وأي طريق تمشي بيه يأمنة الها من الطول للطول

-منار: وين عايشين وين راح يوووگف گلبييي شيردون منهاا بعددد

-قاسم: و لحد ما انتِ عندهم علىٰ مرتين بنص الليل سياراتهم تطبگ بفرعهم وينزلون منها ملثمين وأسلحتهم تارسة صدورهم ويصدونهم

فتحت عيوني وشهگت بصدمة رديت واني مصدومة..

-منار: دتتشاقة وياية !!

-قاسم: لا وداعة عزيزة گلبي أمي

-منار: مسؤولين العصابة شيردون منهاا شعليها بيهم

حچيت الكلمة وأحس گلبي انقبض ..

-قاسم: جُمان تعرف عنهم هواي وهي الي وصلت عوف لمُكانهم

-منار: تعرف بشنوو ؟

-قاسم: مطي من مطايتهم مسولف إلها علىٰ أساس حتىٰ يقنعهة تخلص الهم اليردونة منها وترجع

دمعت عيوني وحچيت بغصة وعبرة ...

-منار: هيچ حياتها بخطر واحنة منعرف بشيء ولا علىٰ بالنا ومحاسين !

-قاسم: لأن عوف وراها ماعايفهة ولا ثانية وحدة ومن اجت للبصرة لهذا اليوم يفترون عليها ليش عبالج راد ياخذ الهم بيت هنا ليش ؟ لأن يريد يحميهة بوجودة محد يگدر يمس منها هلگد عوف يفديها بروحَة ومايخلي شعرة منها تتأذىٰ

صرخت بفززع وخووف واني احچي ..

-منار: وشلون قاسم شلووون هاي بسبب شغلكم والي تسوونة تصير ناسكم بالخطر يعني هم يطلعهة من الخطر وهم راح ترجع توگع بيه

لزم وجهي بأيديه وهمس بصوت هادئ..

-قاسم: انا ماا اچذب عليج واگلج حياتنا وردية و نروح ونرجع بدربنا لا منار بس هاي مو معناتها حياتنة خطرة وماتنعاش أكثر المهمات احنة نفوتهة بهويات مختلفة وشخصيات مامعروفة محد يعرف عنة هلگد

-منار: لعد شلون عرفوا عوووف ؟؟

-قاسم: لأن همة هذول الأشخاص يعرفونه

مسحت أيد بأيد وحچيت بألم ..

-منار: يعني مررراح يصير حل نفس الشيء الخطر موجود علىٰ حياتهة

-قاسم: بس تخلص المُهمة ويتسلمون للقانون مايبقىٰ شي بعد وكل عثرة موجودة بطريقهة تنزاح عنهة

تقربت منه حچيت بخوف وگلبي يدگ ..

-منار: لالا خلي تولي المُهمة خلي يتركهة حياتهة أهم قاسم أخاف اني يسوون بيهه بعد أسوء حتى يوكفون عوف

-قاسم: مايحني رگبتة لأي واحد بيهم يعرفهم شنو صارلة أشهر يشتغل علمود يشلع روسهم وينهي أمرهم

-منار: ميخااالف اقنعة انتَ خلي تولي

-قاسم: مايصير منار مايصير ينسحب ! ماتعرفين هذول الأشخاص شجاي يسوون وبسببهم شجاي يصير أبسط مثال حطوا جُمان بدائرة الخطر لأن وصل لمعلومات تطيحهم جاي يأذون بالناس جاي يقتلون وينهبون ويكثر الارهاب بسببهم

-منار: أخاف عليها قاسم روحي جاي ترجف گلبي يدگ بخوف من الي سمعتة ماجاي اگدررر افتهمني

-قاسم: مايگدرون يسوون شيء كل الي يگدرون يسوونة يهددون لو يتوعدون بس مايگدرون يتحركون خطوة يخافون روسهم وحياتهم كلها جوة أيدين عوف محد يگدر يلوي ذراعة بشغلة شغلة فوگ كل شيء عندة ومن يبدي يشتغل علىٰ مُهمة يأمن علىٰ كل شيء يخصة

-منار: لعد واذا صار بعوف شيء ؟

-قاسم: مسستحيل مايگدرون يوصلون اله

رفعت راسي زفرت نفسي بالعالي لزم وجهي وحط أيده علىٰ خدي يمسح بيه باوعت بعيونة أحس يباوع بحيرة و وملامحة كُلها مشدودة  ..

-قاسم: لا انتِ ولا جُمان ولا اي بشر غيركم محد يتأذىٰ ومحد يلوحة شيء نمنمة بعد ماا اگدر احچيلج أكثر خصوصيات مامسموح ينحچي بيها بس حطي رجليج بماي بارد وبعدي الخوف عنج كل خطوة محسوب حسابهة

-منار: ما اعرف خايفة

-قاسم: تثقين بيه منار ؟

بلعت ريگ وهزيت اله راسي أبتسم وهو يمسح بخدي وگال ..

-قاسم: چا لا تشوفيني وضعج هيچ لا تخليني أتحسس إيدج الترجف ثقي بيه مايصير شيء من الأفكار الي تدور براسج انا يمج بظهرج مايمسج كل شر

-منار: الخوف يدگ بگلبي على الكل .

-قاسم: نمنمة الكل بخير ليش ماجاي تفهميني اروحلج فدوه

-منار: زين وجُمان ؟

-قاسم: اااخ يا مناار ااخ ..

-منار: هاا !

-قاسم: مو انتِ ماتعرفين عوف يدرس شغلتة من كل النواحي بكل تفصيلة بيها يشوف سلبياتها ويشوف إيجابيتها ، انا مرتاح وما أفكر لأن ادري بيه يقدم روحه  لروحها ومايرف اله جفن ماشايفتة من يسولف بأسمها گدامي شلون عيونة تلمع وحچية يختلف يخاف عليها من الهوىٰ الهاب أنوب يجازف بيها !!

-منار: لهلدرجة ؟

-قاسم: وأكثر نمنمة عوف واگف وراهة مثل الجبل غير متشعوط بحبهة أنسي الي سمعتي ولا تتأثرين بيه هلگد

مسحت وجهي بأيدي وابتسَمت گلت اله ..

-منار: حتىٰ هية تحبة

فتح عيونة وضحك ..

-قاسم: علييج الله ؟

-منار: والله بس هي متبين بس من يغيب عنهة تتخبل علىٰ ماتعرف أخبارة وتعبس وتزمخ بوجه البزون حتىٰ ومن يجي تحس روحهة تنتعش والضحكة تبقىٰ معلگة بوجهة

-قاسم: ااخ يصرع راسي من ينزل واجب ويطول بيه وإذا خابرتة وعندي موضوع نتفاهم بيه واحنة جاي نسولف بنص الشغلة يگلي ولك قاسم والله أفكر بيها اگله لا تهتم سهلة يگلي لا ياخوي مو بموضوعنا بجُمان

-منار: ههههههههههه يااا

-قاسم: وعلي چا هو الي يحب غير هيچ يصير مخبل ؟

-منار: اممم يله لعد الله يشافيك اني رايحة أصلي

-قاسم: وين مو جاي نسولف و شوية بعد ونوصل لسالفة حلوة أكثر ؟

-منار: لا ما أريد

-قاسم: عندي سالفة تفيدج تعالي

-منار: خليهة الك

جر أيدي وطفرت بسرعة وهو يباوعلي بتوعد والضحكة بوجهة وگفت بالباب قلصت عيوني عليه درت وجهي وطلعت

ما أنكر واكذب وأگول أرتاح گلبي أبد بعدني علىٰ نفس خوفي بس ألي أتأكدت منه أنُ عوف ميخلي أحد يتقرب الها ..

صليت ونمت ومر نص اليوم لحد العصر طلعنا اني وقاسم نختار الغرفة بهذا اليوم ماعندي واهس ولا شغف اي شيء يطلع گبالي أهز راسي عليه بدون ما انتبه وأدقق بيه

بيومهة شگد حاول وياي يضحكني ويشاقيني ويفتر بيه من مُكان لمُكان ويشتريلي شعر بنات ويضحك بيه ويسولف وياية وبس اني چان بالي بعيد ومالي خلگ من شافني قافلة حسيت حتىٰ هو ضاج

أختارينا الغرفة لونها رصاصي لأن الأثاث كُله صار ابيض و اوف وايت وچان تصميمهة يخبببل مو هوسة أنيق ومرتب

رجعنا للبيت ورانا بنص ساعة وصلت الغرفة دخلوا شدوها وبيومهة البيت انخبصصص خبص بالأغاني حتىٰ الحجية تهوس وترگص وكُلهم فرحانين

وگفت علىٰ جهة اباوع لفرحتهم والابتسامة مرسومة علىٰ شفتي طفت رغد الديجي وطبت للمطبخ طلعت جدرية وگعدت يم جُمان هي تطببل عليها وجُمان تصفگ والحجية تهوووس

باوعت الي وگالت ..

-جميلة: ولك خدهااا طماطة ولا تگول محمررة

ورغد مستمررة تطبل على الجدرية وجُمان تقووي بصفگتهة شعلووو البيت شعلل

دخل قااسم ومن الباب يطگ أصبع ويدبچ لحد ماوصل يم الحجية گامت تدبچ وياه وتهوس بحماااس وفررح

-ياا أهل القووط ذبو القوط قويسم لبس قاااطة

وهو يررد عليهااا ويصيييح

-يابووووييية

وگفت رغد ولزمت الجدرية بأيدها وگالت ..

-واحنة الطگينة أصبعنا وحتىٰ الحاكم وگفناااا

بقو هووواية يهوسوون ويرگصون وقاااسم مگابل الحجية ويدبچ وياها وهيية تضحكك وتهوس بشالها لحد ماتعبت كُلشش گعدت باوعت اله بطرف عينها وگالت اله ..

-يلة ولك لم چويلاتك وشوفلك مچان

گال الها بأستغراب ..

-ها حجية شني اختلفتي عليه ؟

-جميلة: ولك وين صايرة دايرة هاي معاريس واحد مگابل الثاني بعد ماتشوفها منا لحد العرس يله يله

وجهت نظري اله چان يباوع الي رافع حاجبة ومقلص عيونة بوجهي ضحكت ورفعت أيدي بمعنى ( اني معليه)

رجع باوع للحجية وگال

-قاسم: هسة گولي يا الله وصلي علىٰ محمد وعوفي هاي سوالفج

-جميلة: يا الله اللهم صلِ على محمد وال محمد يله يمة لم هديماتك واشلع

-قاسم: اكلج هاي السوالف صارت قديمة چا هسة من تفارگيني عنها يومين شيصير عود ؟

-رغد: تشتاقلهه بيهن ههههههههههههه

-قاسم: انتِ انچبي

-جُمان: صح يول ميصير تشوفهة ليوم العرس

-منار: صحيح

-قاسم: ولجج منااارر

نهضت الحجية وهي تضرب بيه بشالها وگالت اله

-جميلة: يله ولك عريس مستخف سرسري معاريس هلوكت ولكم گبل لا نشوفهم ولا يشوفونة يله ماتشوفهة لحد يوم العرس بعد

-قاسم: اخخ جميلة خاافي ربچ تحرميني من شوفة مرتي

طلعت رغد من الغرفة وهي بأيدها جنطة خلتها گباله وهي تضحك وگالت ..

-رغد: يله وهاي ملابس واحتياجات مال يومين

-قاسم: ولكم عود صدكك

-جميلة: وعلي چا مچذبين عليك يله يله

شالت الجنطة حطتها بأيدة وتدفع بيه حتىٰ يطلع برة وهو يتوسل بيها ماكو قافلة طلعتة وسدت الباب وگالت .

-جميلة: المستهتر ولك انطي الفرخة مجال لازگ بوجهة يله حبوبة گومي نزعي

فتحت عيوني علىٰ وسعهن بصدمة وگلت الها ..

-منار: هااا شنووو !!

نهضت رغد أتقربت يمي وگالت

-رغد: جلفففف العرس حياتشششي

وگفت جُمان يم راسي وأني اباوع الهن وبعدني ممستوعبة شيردن يسون بيه ..

-جُمان: لتخافين بأيادي أمينة

دخلوني بالغرفة وماقصرن رغم اني شعري أملح وخفيف ومهاملة نفسي ابداً بس مع ذلك جلفتهن كانت غير شكل صدُگ تختلففف ....

********

هاي الأيام أريدها متخلص بنص الهوسة والخبصة والفرحة الي البيت بيها داحس بأجواء العائلة بالأعراس اجواء مفتقدتها طول حياتي ماعايشتهة داحس بلذة مد اريدها تخلص هلگد ما أجواء تجنن ..

اخذت تلفوني فتحتة شفتة متصل علي وداز الي رسائل اليوم مفتحتة التهينا نرگُص ونسوي عناية وشغلات هوااية متخلص

دزيت اله رسالة أول مدزيتهة فتحهة ودز

-لذة عيني وين انتِ ؟

ابتسمت من قريتهة جاوبتة

-بالغرفة

رجع دز ..

-تعالي طلعي أريد اشوفج

باوعت للـساعة بـ١١ ونص سديت تلفوني لبست حجابي تعطررت وطلعت بخطوات خفيفة لگيتة گاعد بالصالة ونفس العادة ديشتغل والهوسة كُلها يمه ..

رفع راسة من سمع حركة يمه ذب نفس براحة أبتسم وگال..

-يـ وكتَي الباهَت بدونج ..

گابلتة وگعدت يمة بالگاع بنص الهوسة الي هو بيها وحچيت .. 

-جُمان: مد اشوفك هاي الايام ؟

-عوف: شغل ياعيني

-جُمان: امم عرس قاسم ومنار بعد يومين

-عوف: لو ماگايلتلي ماا أدري

-جُمان: دأحاول افتح موضوع

-عوف: الدوام قرب ماناوية ترجعين تكملين ؟

رديت بأبتسامة وبسرُعة ..

-جُمان: اكييد أريد لعد شلون

-عوف: صار لذة عيني

-جُمان: بس شلون بالنقل ؟ يشعلون گلبي راح يموتوني

-عوف: سهلة يمي

صفنت بيه لثواني وحچيت الكلام بتردد ..

-جُمان: عوف يمتىٰ ننقل أغراضنا من بيتنا ببغداد ونستقر بالبيت ؟

بلل شفتة وحسيتة يباوع بحيرة كملت كلامي وگلت ..

-جُمان: أحم .. بس لأن طولنا ببيتكم بالأخير أريد أرتاح واستقر ببيتي عوف

-عوف: فاهمج

-جُمان: وطولنا ترىٰ ماكو خطار هيچي لزززگة

أبتسم بخفة وگال ..

-عوف: لو هيچ اللزگة لو ماكو

-جُمان: دتجاملني

-عوف: لا وداحي الباب لو بيدي اعيشج بنص عيني وما اخلي عيني تشوف غيرج بهلدنيا بشر .

فهيت بوجهة والابتسامة بنص بوجهي مافارگتني وهو كذلك أنتبهت لنفسي وگلت بتلبك ..

-جُمان: اءء .. اي مگتلي يمتىٰ ننقل الأغراض ؟

جمد بوجهي لثواني وگال بتنهيدة ..

-عوف: سهلة خلي يخلص عرس قاسم وراها نشوف

تحركت بگعدتي وگتلة بحماس ..

-جُمان: عوف

-عوف: ها يبعد رويحتة

ابتسَمت علىٰ الكلمة وگلت اله ..

-جُمان: دافكر باچر أخذ ماما لدكتور حتى أعرض عليه تقدمهة بحالتهة

-عوف: صار نروح جاي احس حالتهة كلش متحسنة

-جُمان: هوواية الحمدلله صح متمشي بس دتگدر توگف رجليها لثواني أبد مچانت هيچ أبد ومن شفت حالتهة دتتحسن بعد لازم أعرضها علىٰ دكتور حتىٰ نباشر بالعلاج الطبيعي لرجليهة

هـز راسة بأبتسامة وگال ..

-عوف: جُمان أريد گلاص چاي

-جُمان: دقائق بسسس

نهضت للمطبخ چان القوري بيه چاي بس شغلت الطباخة وخليتة يحمي وأحس بداخلي حماس وفرحة من وضع ماما منتعشة يارب يارب تكمل فرحتي علىٰ خير ..

صبيت الة گلاص وأخذتة واني دامشي شفتة وهو يحچي بالتلفون بنتر بس متكتم يهز براسة بتوعد ويگول ..

-لو تطفر بأخر الدنيا أنتَ تدري راح تطيح بأيدي و أعلمك أعلمك شلون تحچي والله لأكسر سنونك بحلگك يا *** يا ابن ال***

رجع نتر بس هلمرة بصوت قوي

"أطلع *** إذا ماوكلتك **** أنتَ و**** يا زندييييقق

سد التلفون وشمرة واني كملت طريقي مستغربة وما مفتهمة شيء وصلت خليت گلاص الجاي يمة باوعت للنفاضة الي متروسة وبعدة ديدخن ...

-جُمان: بهلدقائق بس هلگد دخنت ؟

طفىٰ الي بأيدة وبعد النفاضة أرتفع صدرة بضيق واضح علىٰ ملامحة شال الگلاص باوعلي وگال ..

-عوف: عاشت ايدج تعبتج

بقيت ساكتة وعيوني تتنقل بملامحة وبالهوسة الي يمة وحچيت ...

-جُمان: عوف بيك شيء ؟

رفع نظرة وهز راسة بالرفض ...

-جُمان: بس اني داحس بيك شيء

-عوف: مابيه عيناي بس تعبان شوية

-جُمان: شوية ؟

-عوف: هواي

-جُمان: لعد نام ليش گاعد دتشتغل وأنت تعبان و وجهك شاحب من التعب وعيونك ذبلانة

-عوف: ما اگدر عندي شغل ضروري أنهي

-جُمان: عوف ليش دتشتغل هنا ؟ مو بيتك فوگ

ثبت عيونة بوجهي قلصهن وگال ..

-عوف: أنزل أشتغل هنا حتىٰ أشوفج ويخف تعبي

رديت بفهاوة ..

-جُمان: ها

أبتسم وشح نظرة عني رجع يشتغل ويدخن ويشرب بالچاي وعين هنا وعين هنا چنت مركزة علىٰ كل حركاتة ، يشد وجهة ويرخي ، يغمض عيونة بتعب ويفتحهم ، يتنهد .. يزفر ..

اكلت شفتي واني بهلوضع أتوترت وشديت علىٰ أعصابي وماحاسة علىٰ نفسي بمُجرد گابلتة لنص ساعة صارت وضعيتي هيچ

فززني صوتة من گال...

-عيناي ليش ماترحين تنامين ؟

أنعصر گلبي علىٰ تعبة أحس نفسي تعبت وياه ..

-وأنت مترتاح وتريح عيونك عوف تعبت شوف نفسك

-شوية ويجي قاسم نكمل وأرتاح

ضحكت وگلت أله ..

-قاسم مطرود

-منين ؟

-طردتة الحجية هههههه علمود ميشوف منار

-ديله بله اگول ماله أثر المسربت

-هههههههه ايييي

واحنة دنحچي أتصل تلفونة رفعة وگال ..

-بيب بيب مايتلحگ بعدنة بطاريه

ضحكت وهو فتح الإتصال نهضت من يمة أشرت بأيدي هز آلي رأسة ومشيت حضرت ملابس لماما وحضرت ملابسي گعدت يم راسهة

اجت عيني علىٰ صدرها ألي يرتفع أثر نفسها ابتسَمت وغرغرت عيوني دموع ، من واني صغيرة بيه هاي الطبيعة كُل متنام ماما اباوعَ علىٰ نفسهة وأحياناً يكون ثقيل چنت افززها بخوف وعياط ومن أشوفها تگعد ابچي أخذت نفس براحة ورجعت لفراشي

وصار ثاني يوم وفعلاً رحنة عرضنا حالة ماما علىٰ الدكتور وشاف التحسن و وضعهة وگال أنُ ضروري تباشر بالعلاج الطبيعي والي فرحني أكثر أكد ألي أنُ راح ترجع تمشي وبصورة طبيعية صح يحتاج وقت حتىٰ تكون مشيتهة أكثر ثبات بس المُهم شفاءها

وگال عوف أنُ راح نباشر بعلاجهة من داخل البيت .. رجعنة نزلنا ماما وعوف مانزل باوعت اله وگلت ..

-جُمان: مراح تنزل ؟

حرك حاجبة مرتين بمعنىٰ (لا) وگال ..

-عوف: رايح

-جُمان: وين ؟

انرسمت علىٰ وجهة شبَه ابتسامة وگال ..

-عوف: شمالها مرتي تحقق وياي اليوم ؟

-جُمان: ءءءءاا .. لا شسمة بس داسأل يله يله روح

سديت الباب ونزلت حطيت أيدي علىٰ گلبي شبيج جُمان شهلفضول شعليج أول تالي ...

شخطط السيارة شخط ومشىٰ بيهة بسُرعة فائقة ...

كملت طريقي ومشيت أول ماوصلت للحديقة صوت الأغاني طااالع يررعد دخلنة جوة ولگيناهم مخبوصين خبص وخالة أم مُصطفىٰ ونسوان وبنات شابات ماعرفهم موجودات كُلهم ديرگصون وفرحانين ويهوسون

سلمنة ودخلت ماما بالغرفة لأن الصوت العالي مو زين عليها متگدر تتحملة تبقىٰ تعصر بعيونهة وراسهة منه وطلعت يمهم لفتني شكل منار

أستغربت شكلهة بنص الخبصة والجو المخبوص والي يونس حييل ماعندهة ردة فعل أبد جامدة ملامحهة رحت وگفت يمهة بس منتبهت الي أبد

طگيت أصبعي بوجهة مرتين يلة حولت نظرهة عليه...

-جُمان: منار شبيج ؟

-منار: شنو

-جُمان: ما أعرف ؟ ضايجة بيج شيء شو مو علىٰ بعضج أبد ولا داخلة بالأجواء

-منار: لا بس دايخة مابيه شيء

-جُمان: أكيد ؟

هزت راسهة وبادلتني إبتسامة مصطنعة .. مالحيت عليها أعرف بيها شيء بس هذا مو الوقت المُناسب حتىٰ استجوبها وأعرف شبيها گلت بعدين اختلي بيها بالغرفة

باوعت علىٰ الاجواء واني فرحانة اليوم وجهت نظري الها ضحكت وجريت أيدها وهي ترفض وتنتر بأيدي ماسمعت حچيها وجريتهة بالنص دخلتهة

أجت الحجية لزمت أيدها وصارت تهز وياهة وكُلهن ألتمن يهوسن ويرگصن شوي حسيتهة أرتاحت وبينت ضحكة علىٰ ملامحهة

*****

"رغد"

كُل الناس راحت من عندنا كُلهن ناسنا ومعارفنا وصديقات بيبي أول ماعرفوا عرس قاسم بيتنا ماا فرغ والفزعة الزينة بلمتهم والأجواء

بقت خالة ام مصطفىٰ وشمس قدمت الهم كيك وعصير وگعدنة يمهم گالت وهي تباوع للحجية ...

-أم مصطفىٰ: وانا هذا الشالع گلبي مصيطف الاغم

-جميلة: يااع شماله

-أم مصطفىٰ: چا غير أريدة يعرس وأفرح بي اگلة ولك أريد أفرح بيك گبل لا اموت والله ياخذ امانتة يگلي يمة انا مرتاح انتِ تقرنين هاي وراثة عندكم

گالت الكلام واحنة ضحكنة بصووت من كل گلبناا ..

-منار: خالة يعني ميريد يتزوج هسة لأن عمرج طويل ؟

-أم مصطفىٰ: اي يخالة بله شفتي المدهور يگلي يمه انتِ تموتين الوادم كلهة علىٰ ايدج

-جميلة: ماچذب بله اختج شگد عمرهة هسة

-أم مصطفىٰ: عمرهة 102

-منار: خالة اختج حتىٰ القرن عبرتة

-أم مصطفىٰ: ولچن صلن علىٰ محمد يمدهورات

-شمس: بس ماما لازم تقنعينة يتزوج

وجهت نظرها الي وگالت بأبتسامة ...

-أم مصطفىٰ: اي بعد مابيهة مجال غصباً ماعليه اذا مارضىٰ اهفة بنعال

-شمس: يااا

-أم مصطفىٰ: وعلا بس هذا مايعجبة العجب حبوبةةة

-جميلة: چا شيريد

-أم مصطفىٰ: خايبة يخية ماخليت وحدة ماراويتة صورتهة أفتر بالأعراس واحط عيني على هاي وذيج واگلة ولك يمة دباع الجمال يمفلوك وهو يعقچ بوجهة هم أملح ومصخم وملطم ومايعجبك العجب اخ يمصيييطف

گالت إلها منار ..

-منار: خالة يجوز بالة وحدة

قلصت عيونهة ورفعت حاجبهة وفتحت حلگهة بوجه منار وگالت ...

-أم مصطفىٰ: يااع اندري يخالة چا انه طابة بگلبة وعلي لو بيدي أفوت وانبشة واحوسة اشوف شبي مابي شمالة هلفرخ مايرضى يعرس

-شمس: يمه هية هاي العايزة بعد تفوتين بگلبة

-أم مصطفىٰ: چا غير أبني وحيدي

خلصنة الگعدة بس ضحك من ورة سوالف خالة أم مصطفىٰ راحت وخابرت قاسم طلعنا اني وياه دنكمل التجهيزات والأشياء الي ناقصة ..

وراها طلعنا للقاعة أتفقنا علىٰ الترتيب والفقرات واهم شيء دخولية العرسان گال قاسم ..

-قاسم: يعني شني هذا الدرب كله أنا أمشي گدام النسوان !!

-رغد: اي هاي الدخولية

-قاسم: ولجج لا تخسبگين وعلي فشلة شمالنيي كاض وردتهة وامشَي الدرب هذا شاروخان انه !!

-رغد: دخولييييية ميصيييير هَـو لازم تصير هيچي دتعال أتعلم شلون تفووت وتمشيي

دگ تلفونة وطلع برة يجاوب علىٰ الإتصال گالت المنظمة ..

-يستحي ههههههه

فهيت بوجهة تقصد قاسم ؟ قاسم يستحي ؟؟ ضحكت بأصطناع ورديت ..

-رغد: اي كلشش فوگ ما تتخيلين

شوية وفات علينا هو وصديقة مصطفىٰ أستغربت شجابة بس بعدين استوعبت أخواني مايخطون خطوة هو مايعرفهة ...

چان واگف الولد المسؤول عن القاعة والبنية المنظمة سلم عليهم باوعت لقاسم الي گعد علىٰ الكرسي وگال..

-قاسم: دبطلوا هاي السالفة وكفوني شركم شمالكم اتخبلتوا خلونة نفوت طبيعي انا وياها سوىٰ واحد كاض ايدين الثاني

-مصطفىٰ: ليش هية مو هيچ ؟

-قاسم: لا ولك تفوت هية أنوب انا وعلي فاوول فاوووول

مسحت وجهي بقلة صبر ..

-رغد: غير فقرة شبييك

-قاسم: الله ينطيهم ويغنيهم

-مصطفىٰ: صير رجال مجاهد وجاهد لخاطر مرتك وفوت هية شينرادلهة جواك سجادة حمرة وأنتَ تمشي عليها ولك بالأحلام ماصاحة الك

-قاسم: ابن ال*** تاليتنا نصير مضحكة لأمة محمد

-رغد: لا بالعكس والعباس أجواء تخبببل

-قاسم: اتكتري علىٰ صفحة انتِ

أجت عيني علىٰ المُنظمة وعيونهة المتمركزة علىٰ مصطفىٰ أكلت الولد أكل ولا نزززلت عينهة وهو ولا يمهة ولا باوع الهة ومستمرررة فصلتة تفصصصل گالت ...

-عادي نسوي بروفة

أشرت علىٰ مصطفىٰ وگالت بتغنج...

-اني وهلولد وتشوفون الدخولية شلون حتصير

عقچ وجهة عليها وگال...

-مصطفىٰ: شبييچ خالي ساالمين عليمن خو نسوي انا وصاحبي

-قاسم: بدت الم*** وحق الحسين

-مصطفىٰ: فوگاهاا المبلحس خااايب دتعاااااال

گلة هيج وجرة من أيدة فطسست ضحك جرة و وگفة ببداية الباب من الدخولية أجت الُمنظمة هاي ما ارتاحيت إلها أبد وگفت يمة وگالت...

-مو متصير حلوة هيچ لازم بنية و ولد

-مصطفىٰ: تصير خوية تصيرر

-قاسم: ليش حاسب روحك مرتي الجايف ؟

أشر اله مصطفىٰ علىٰ حلگة وگال..

-مصطفىٰ: سدة حبيبي

ألتفت وگال ..

-مصطفىٰ: هسة انه وين اوگف ؟

ضحكت وأشرت اله علىٰ نهاية السجادة راح وگف وهو متكتف ويباوع لقاسم والضحكة حاصرهة بالگوة گال قاسم...

-قاسم: الله اكبببررر هلگد بعيدة عني راح تخلونهة شنوو بيه جررب

-رغد: مو راح تمشي وتوصل يمهة مو سطرتنا قاسم شجااك

-مصطفىٰ: سدة وتعال أمشي الي حبيبي يلة هسة انه مرتك و جاي أنتظرك

-قاسم: غددي لو انتَ مرتي اشرد بليلة ظلمة

فتح أيديه مصطفىٰ وصااح بصوووت ..

-مصطفىٰ: تعااااال ليييييه ولكك

گعدت علىٰ الكرسي وعيوني مدمعة من الضحك وگفت المنظمة يم قاسم انطتة وردة من القاعة لزمهة راحت شغلت اغنية وأشرت اله يمشي ...

أتقدم خطوتين مشىٰ باوع وگف وگال ..

-قاسم: هسة هذا وجه أمشي اله دجيبولي مرتي

-رغد: كمل طريقك ورررردة منين نطلع الك مرتك من السحبة

-مصطفىٰ: الله ينتقم منك غمض عيونك واتخيلني هية وكمل مو بزعتناااا ولعبت نفسنااا

ضحكت من صدگ غمض عيونة ولزم الوردة ومشىٰ وهو يضحك وصل يم مصطفىٰ فتح عيونة رگعة بدفرة وگال ..

-قاسم: خ*** بوووجهك

-مصطفىٰ: انعل ابوووك يا سررررسرري ياقندرررة فوگاااهاااا

-قاسم: ولك عود هيج أمشي بنص النسوان عبالك جاي أقدم ازياء بيوم عرسييييي

-رغد: وين المشكلة وردة ؟؟

ألتفت عليه رفع الوردة الي بأيدة وگال ..

-قاسم: راح اهفج بالوردة ياوردة

-مصطفىٰ: هسة انتَ شمالك خبصتنا مو تصوير ودنياا وعرسك فوت وانطمم شخبصتنا مسوي روحك تستحي وانتَ **** المستحىٰ ماتعرفة

-قاسم: ولك ابن النعال ليش تغلططط گدام أختيي

درت وجهي ونهضت سويت نفسي اباوع علىٰ القاعة وترتيبهة أسمعة گال ..

-مصطفىٰ: مو يمنة اختتتك بعيدةة ماتسمعع

أبتعدت مسافة أكثر عنهم فعلاً صرت اباوع علىٰ تفاصيلهة وگفت يم المُنظمة واتفقت وياها شلون ترتبهة بـس خبلتني نظرة يمي وعشر نظرات علىٰ مصطفىٰ اسَولف وياها واحس مو يمي ولا تسمعني

زفرت بضيييق و ابتعدت من يمهة شهلبناااات اايع !! شفتهم أخذوا ركن وأشكالهم اتغيرت گعدت أنتظر شفت مصطفىٰ طلع شيء من جيبة انطاه لقاسم بسرعة أخذة منه ويهز براسة ...

ميلت راسي عرفت عندهم شيء بس الغريب هلفترة حتىٰ انا اخواني مايحچولي شيء عكس قبل صح مايسولفولي خصوصيات شغلهم ولا اي شيء يخصة بس أعرف شنو جاي يصير هسة أحس نفسي مثل الأطرش بالزفة ...

ومن أسأل علىٰ شيء يختصرولي جواب بكلمتين لو يغيرون الموضوع وانا هذا الوضع والتصرفات السكتاوية والسرية تخوفني ترجعني للوقت الي انخطف بيه عوف وبقىٰ فترة طويلة محد يعرف عنة شيء نفس الشيء شغلهم كتم بكتم وسكتاوي ....

هزيت راسي ونفضت أفكاري السوداوية شوية واتقدموا اثنينهم حچة قاسم وي أصحاب القاعة وطلعنة راح مصطفىٰ بسيارتة ورجعنة للبيت طول الطريق عاقد حاجبة وشاد وجهة ...

-رغد: قاسم اكو شيء شصار ليش بسرعة أتغير شكلك ؟

جاوبني وهو يسوق وعينة ليگدام ..

-قاسم: ماكو

شفت شكلة ومن ذب الكلمة أبد مو تمام گلت بس احجي حچاية زايدة هسة يدفرني برة السيارة خلي أسكت لأن أعرفهم بكل الحالات وبكل الطرق مايحچون شيء إلا من ذاتهم وبرغبتهم همة ...

وبين اليوم المتعب الي صار ركض ركض ومانلحگ علىٰ شيء بيه والي بيبي جميلة حطت منار وقفلت الباب ولحد الفجر هية مدري شتسولف وياهة

بحيث طلعت منار وجهة مطعون وأحمر ومبلحقة عيونهة بوجهنة اني وجُمان وطفرت للغرفة وبعد مشفنا شكلهة أبد

بقينة اني وجُمان گاعدات نسوي بالتوزيعات ونحضر ونرتب أتصل عليه عوف فتحت الخط وفتحت مايك خليت التلفون علىٰ رجلي وحچيت بصوت وحدة نعسانة وتعبانة ...

-هاا عوف

-شفت ظهورج قبل دقائق ليش بعدچ گاعدة لهلوقت رغود باچر وراج تعب رغود ؟

ابتسَمت وجاوبتة وانا عيوني بوجه جُمان مثببتهة...

-گاعدة انا وجُمان جاي نحضر بتوزيعات القاعة

گح بصوت ضحكت ونزلت راسها قلصت عيوني بوجهة رجع گال ..

-اي زين

-تريد شيء ؟

-لا سلامتج حبيبتي

سديت الخط ورجعت أكمل انه وجُمان شوية واندگ باب الغرفة رفعت راسي باوعت لجُمان عقدت حاجبهة صحت بصوت تفضل ...

انرسمت ابتسامة علىٰ وجهي من شفت عوف دخل وبأيدة علاگة وگال ...

-عوف: هـا بوية الله يساعدهم

-رغد: هلا عيني

-جُمان: هلاو

گعد يمنة باوعت لجُمان تبتسم بوجهة وعيونهة تلمع وهو كذلك نفس النظرات نفس الابتسامة والعيون تلمع لمعع بوجه اللخ ...

من شفت شكلهم ونظراتهم وخجل جُمان گدامة صارت جواميس ترگص بمعدتي من الشعور الحلو الي حسيتة بهلحظة وانه أشوفهم لايگيييين لايگيين ودي اكلهم ...

خربت نظراتهم وابتساماتهم لبعض من حمحمت بصوت عالي لدرجة عوف حمحم وياي بنفس اللحظة وهو مفاهم شيء ضحكت وأشرت اله علىٰ العلاگة ..

-رغد: شنو بيها هاي

حطها بحضني وگال ..

-عوف: حلويات الچن

فتحت العلاگة وطلعت منها نستلة نمبر وان شافتهة جُمان أخذتها وگالت ..

-جُمان: الله شگددد احبببببهااااا

-عوف: شسمها هاي ؟

-جُمان: نمبر وان

-عوف: تحبينهة ؟

-جُمان: اموووت عليييها

گالتهة وشكلها عبالك طفلة وفرحانة بيها ضحك علىٰ شكلهة وهو صافن بوجهة والضحكة تارسة وجهة طلعت عصير ورجعت أكمل التوزيعات باوع وگال ...

-عوف: أسوي وياچن ؟؟

-رغد: شتسوي ؟؟

رفع الجبسوفيل والإطارات باوع للأشكال الي سويناها وگال ..

-عوف: هاي تلزگونهن هنا ؟

-جُمان: تسوي ويانة التوزيعات ؟

-عوف: اي شو هواي مسويات ؟

-رغد: مو هواي معازيم

-عوف: يله سهلة انطيني الصمغ

ضحكت وانطيتة الصمغ وصار يرتب بالجبسوفيل علىٰ الإطار ويحط بالككواية ويرتب وجُمان تباوع بوقت قصير خلص هواية وانا وجُمان صار ساعات گاعدات مامخلصات نصهن ...

حطهن گبالي وگال ...

-عوف: يله شعندچن بعد حتى تخلصن وتنامن وراچن تعب

گزگزت عليه بدون ماا أحس علىٰ نفسي طفرت عليه أبوس بيه واحضن واجعص بوجهة وهو يضحك ..

-عوف: هههههه ولچ شجااج

-رغد: يماااي بعد گلبييي گلببببببك الحنييين اروحلك ستييين فدوه للي يفكر بينة

-عوف: بعد روح أخوج

ماعافنا ولا شوية لحد ما كملنا التجهيزات والتوزيعات كلهن تعبان وشكلة شاحب من التعب وعيونة حمررر شالهم خلاهم علىٰ الميز كلهم راد يطلع وقبلهة وكف يم الباب وگال ...

-عوف: يله ارتاحن

طلع ونهضنة انه وجُمان نظفنا الغرفة وعطرناها راحت جُمان لغرفتهم وانا حطيت راسي وغمضت عيوني بيهن حرگة من التعبب غفيت وبعد ماا أدري بشيء ...

*******

-جُمان: بردانة انتِ ؟

-منار: لا ليش

رفعته أيديها بوجهة ينكثن من الرجيف و وجَهة اصفر ..

-منار: دارجف من الخوف

-جُمان: باعي شكلج يااا اجيبلج مي ؟؟

-منار: اگلج دارجف تگليلي انطيج مي !!

-جُمان: لعد شسويلج أهمس بأذنج أرق الكلمات حتىٰ تهدأين وتوتريني وياچ والعباس

-منار: سكتي بعد حچايتين زيادة ابچي

أجت رغد وصلت يم الكوشة أتقربت يمنة وگالت ..

-رغد: منار تعالي اوگفي راح يفوت قاسم

-منار: وين اوگف المن ماگدر رجلية ترجف

-رغد: راح تصير الدخولية والتصوير انتِ بس نزلي اوگفي إله هنا وانطيني المسكة

أخذت المسكة رغد ونزلت منار اني وگفتهة بنهاية السجادة وشغلوا أغنية علىٰ بالي حبيبي لـ اليسا ...

تغير ضوة القاعة للون الاحمر ودخل قاسم يمشي بخفة وثقل والأغنية مشتغلة يمشي مبتسم والفرحة مبينة علىٰ وجهة وصل يم منَار انطاها المسكة بأيدها وباسها

والكل صفگ إلهم وكُلها تصييييح بصوت والأجواء اشتعلت شعللل ...

وكُل شوية تتغير الفقرات وتتغير الأغاني ورگصوا علىٰ اغاني عسكرية ورگصوا علىٰ أغاني رومانسية ثلث ساعات بس انخبصصت القاعة خبص والكُل دخلوا يرگصون وياهم ويهوسون بأختصاررر صارت الحفلة من أحلىٰ مايكون

وكُلنا صرنا نهوس ونرگص بالنص حتىٰ الي بالقاعة البنات هوسوا ويانة ودخلوا يرگصون ..

طلع قاسم وشوية وگالوا يلة راح تصير زفتهم للفندق اباوع لمنار صارت تبلعم وصوفرت بالزايد ..

لبست البرنص فوگ الفستان ودخل قاسم لزمهة ومدري شيهمس بأذنها وهي ترجع تهمس اله وتخزر بيه ..

أخذت شالي ولبست البشت فوگ فستاني لزمت كُرسي ماما وطلعنا سوىٰ والي بالقاعة كُلهم طلعوا صارت خبصة وهوسة نسوان يبوووو تسططرر بررة

صعدوا منار وقاسم بالسيارة واجة عوف لزم كُرسي ماما أخذة وگال ..

-وياي ..

ابتسَمت بوجهة ورحنة صعدنة وياه چانت بس رغد الحجية ماعرف ويامن صاعدة ...

طلعت السيارات وعززززا خليت گلبييي بشيشة فحطوووو تفحيططططط سدو الشارع سددد بيه كُل شوية توگف السيارات وتسد الشارع كُله وينزلون جماعتهم نصهم ضباط وأسلحتهم بأيديهم ويهوسون ويرمون ويدبچون

وقاسم بنصهم رافع أيديه ويهوس ويدبچ ..

دخل واحد بنصهم وگال وهو يدبچ برجليه ..

-تشل يا طگة يمناكم
اتندم كلمن عاداكم
المتلاگي بطگ وياكم
غم گصتة ورد باع سلاحة

وفاتوا كلهم بالنص يدبچون ويهوسون وراه بصوت واحد
-غم گصتة ورد باع سلااحة ...
يدبچون ويصيحون
-هااا ... هاااااا غم گصتة ورد باع سلاحة ...

سكتوا ورجع فات واحد بالنص وگال ...

-ذووولة ذووولة مااايبرد ماااو الهم

ورجعوا هوسوا كلهم وكملوها بصوووت واحد

واستمرت الهوسات بنص الشارع وحتىٰ العالم الغريبة وگفت تباوع وتصور ومتونسة عليهم لأن چان شكلهم والأجواء ماا تتفوت ويتمنىٰ الواحد متخلص

رجع صعد العوف وساق والطريق كله يفحطوونن وسووها سبااااق مو عرررس وعوف يوصل يمهم يطلع راسة من الجامة ويصيح بصوووت ..

-ولكممممم سررسرررررية شهرررتونة وخززززيتونة

ويرد عليه واحد ..

-وعلييييي اليوم أخلي الشارررع يرگصصص ويايي

وصلوا للفندق وجابوا الطريق كله هيچ قبل متوگف السيارات دخلت قاسم بسيارتة وفرها فررررر بنصهم ضحكت رغد وگالت ..

-رغد: والعباس منار هسة طايحة بهدومهة من الخوف

-عوف: شوف سوالفة الس***

وگفوا ونزلوا كلهم يزفونة لداخل الفندق نزل قاسم ومنار ونزلنا وياهم أخذوا قاسم خلوه بنصهم وهمة بباب الفندق گلبووووو الجووو گلاب حتىٰ اهل الفندق طلعوا علىٰ هوساتهم ورگصهم

مينكضون ولا يملون من الرگص والدبچ واحد بيهم رافع سلاحة ويرمي بالسما ويهوووس وهمة يدبچون باوعت لأثنين منهم صاعدين فوگ السيارات ويرگصون فوگهن

ضحكت عليهم وعلىٰ أشكالهم والله مسودنين مو عالم مخااابيييل و ونيسييين بشكل أخذت ماما و وصلنة بباب الفندق كُلش وگفنة اني وياها ورغد وشفنة الحجية اجت تهوس همات ...

واحنة دنباع ومندمجين منحس الا صار مراكض وهوسة و ركض قاسم وركضوا انخرعنا واختلسنا منعرف شصار وراه الشباب هواية والتموا كلهم علىٰ مُكان واحد ومحد تگدر تروح لأن بس زلم بس الحجية راحت تررركض

صار صوووت عيااااط عالي گلوبنا وگعت وخفنة اجة طفل منعرف منين وگف يمنة وقبل ميحچي هوة حچت راغد بفزززع وهي تصييييح بوجهةة

-شصصصصارر شنو هاي الهووسة والعياط عليمننن

حچة وهو يلهث عبالك چان ديررركض وگال بسرعة وركض ...

-عمووو عوووف سووة حااادث انددعم

صرررخت رغد بصوووت ..

-يمةةةةة اخوووووي

گالت الكلمة وركضت واني من الخوف ماشفت طريقي الرجفة سرت بكل جسمي صار لساني يلهج بأسمة بتكرار من شفت الهوسة والعياط والناس راحت روحي گلت مااات مااات .. ماحسيت اله رجلية ماخذتني ركض علىٰ مُكانهم

وصلت يمهم وعفت كل شيء وراي بس ماجاي اگدر أدخل لو اصير قريبة منه واشوفة هوووسة هووسة وكُلهم مسلحين واگفين شفت رغد ورحت يمهة أركض لزمت أيدها وحچيت بخوووف

-جُمان: شبيييي عوف رغد شبييي

جاوبتني وعيونهة مغرغرة دموع وأيدها علىٰ گلبها ...

-رغد: ما أعرف ماجاي اگدر أعرف شيء ولا اگدر أفوت من الزحمةة بيبي هناااك بسسس محد جاي يجيني منهم

گعدت بالگاع علىٰ البايات ماگدرت اگوم بعد شفت منار گاعدة يمي تباوع بصدمة وخوف وساكتة ...

فتحت عيوني بخررعة وصدمة من باوعت يمين يسار ماشفت ماما ولا كُرسيهة نهضت روحي بخوف مبحلقة عيوني بالمُكان...

ركضت دورت عليها بكُل مكان ومشيت لباب الفندق بنفس المُكان الي چنة واگفين بيه ماكو ركضت اهرول بالاتجاهات وعيوني تتخطف المُكان رجعت اهرول هلگد مافصلت والخوف سرىٰ بكل جسمي دخلت بنص الزلم والهوسة وعيوني تتفلت يمين يسار ادورها أدور كُرسيهة ماكووو

احس نفسي فصلت روحي ذاهت عيوني تفتر تدورها تدور كُرسيهااا نزلت دموعي بخوف وجزززت وصرررخت ماماااااا بصوت مثل المجنونةة بس ماكو ماكو رددددد مداسمع صوووتهاا

اجت رغد تركض ومنار تركض وراها ببدلتهة وصلت يمي
صرخت بصوت بوجهن

-اميييي وين امييي ماكووو ماكووو

-رغد: شنووووو

اخترعن وانصدمن ركضت رغد بسُرعة ابتعدت مسافة ومنار وراهة

دورت هواية صرت الهث من الركض والخوف گلبي صار يأذيني ويخفق بسُرعة اباوعلهم والهوسة بعدهي بباب الفندق عشر دقائق تقريباً ورجعت وگفت كبالي

وگالت رغددد بفزززع وخوووف وشفايفهة زرگ من الصدمة گالت بصوووت متقطع ويرجففف ...

-ماكووو جُمااان ماكووو دورتها بكل مُكان مالگيت اي أثر إلها
گالت الكلام وما أحس اله وگعت من طوولييي ....

يتبع.........

للحكاية خفايا ....

شنو توقعاتكم للقفلة الي وراها مصايب !! 😞

خلونة نتفق علىٰ شغلة حبايبي 💚.
التأخير يكون من طرفي وطرف الإبطال وحبايبي فلفولاتي يعرفون شگد اتعب بشغلي لدرجة ايام مَـا أتواجد بسببة لذلك حتىٰ تكونون انتوا راضين وآنا أرتاح راح يكون التنزيل مرتين بالأسبوع وهو يوم الثلاثاء ويوم السبت مامعقول كل ثلث ايام بارت وتنسون الأحداث ؟
راضين ؟ لو نرجع كل أسبوع بارت تره إنا أفرح هههه اتشااقة روحي انتوا 🙈😂.

حسابي بالانستا
rita.almuktar