نبدأ بذكر الله ﷽🤎✨
اسكوبار
بارت 13
قراءة ممتعة
🚫لا تنسون التصويت والتعليق بين الفقرات حبايبي..
.
.
:باردة عُيونَك علية
حـارك روحي ليش؟
.
.
دائمآ هارون سابقني بخطوة اعترف انا غلطت
جان لازم اطلعها من الشقة لأن
مراقب وممكن بأي وقت يعرف
اصلآ هو شاك بيه بس ما عندي وقت حتى احك
راسي ما لحكت افكر وشوفلي مكان اخلي
بيها لحد ما تهدأ الأمور
بنهاية هو فعلآ اذكى وتفكيره تفكير شيطاني
طلعنا من الشقة لبيته كعدنا بالصالة عامر رافع
السلاح بينما هارون نظراته مصلطة علينا
تنهدت بصوت
اسكو :- تعرف استاذ خلي اكون وياك صريح
انت الشيطان يتعلم منك ما شاء الله
على ذكائك
ابتسم نافخ دخان جكارته بالهوه رادف
بتعالي
هارون - 40 سنة بهل مجال تريد تلعب عليه
وانتَ ما صارلك كم شهر يا ولد اتعلم شلون
تصير ذكي وتحسبها صح اللعب ويه استاذك
يوديك للتهلكة
اسكو -: شكرآ علىٰ النصيحة استاذ
خلي تبارك تروح بحال سبيلها
رفعت راسها تباوع بينما دموعها تنزل علىٰ خدها
اخذ نضرة سريعة عليها رادف بحقد
هارون - خليها تتحاسب حتىٰ بعد ما تعيدها
درس الها هذا
تبارك - جدو فدوة لا تسوي شئ
هارون - حبيبج على جية ليش تبچين
بدال ما تفرحين ؟
تبارك - لأن اعرف شراح تسوي والله اذا اذيته
أذي نفسي وراه
هارون - طالعلج لسان يا بنت صرتي تطاولين
علىٰ جدج الرباج وتعب عليج حتى توصلين
لهل مرحلة بس كليلي شنو حصلتي من سويتي كل هذا ؟؟
جامعتج انفصلتي منها سمعتج صارت بالأرض
كرامتج انهانت بت الگلب دومج منزلة راسي
مثل امج
تبارك - لا تغلططط علىٰ ماما اشرف منك وبابا لو جاين عايش هسه مستحيل ابقى عندك
دقيقة وعيش تحت رحمتك
اسكو :- عوفها تروح استاذ ونتواجة بيناتنا
هارون - تؤ الراح يصير بعد شوي اول واحد
لازم تحضر وتشوف أنت بعدها نستمتع من
فرط العاطفة الراح تصير
تعرف أنا اكره العاطفة المبالغ بيها
والحُب هذا مجرد نقطة ضعف للرجل
لازم ما يتأثر بكلشي يشوفه كدامه
سكت نزل نضرة لساعته
هارون - باقي نص ساعة تقريبآ جاهزين
للمفاجأة؟؟
عكدت حاجبي مو فاهم شي وكفت انكت
بملابسي مسحت على ارنبة انفي
اسكو :- اعتقد أنا ماكو داعي لوجودي كون
الراح يصير شئ خاص بينكم عندي شغل
مهم استأذن
بقى يباوع بنظرات نارية غمزتله مريت من
يم عامر ضربني بوكس على خشمي
مفاجأ
وكعت علىٰ ضهَري مستقْبل الأرض لزمت
خشمي الدم ينزل بغزارة
تنفست بصوت عالي سندت جسمي بديه
وكفت امسح بخشمي وبحركة سريعة شلت ايدي
مرجع البوكس بنفس المُكان
هارون - يا ولــد
درت علي موجه السلاح عليه ارتفعت زاوية
فمي بسخرية
اسكو :- تعرف حجي هــذا سلاحك ما يخوف
مني شعرة
هارون - ارجـع لمُكـانك
اسكو :- اريد اجرب شعور الشخص من يتلقى
طلقة اضـرب عادي ما راح امنعك
اشر بسلاحة علىٰ مكاني تنهدت
كلبت عيوني تمشيت بهدوء وصلت يمة
رفعت راسي لـ عامر
ابتسمت بطرف شفتي غامزلة بعيني اليسار
خزرني ضحكت وكعدت بمكاني
هارون - بعد لا تعيدها يا ولــد
رفعت كتفي زام شفتي
اسكو :- حبيت اضيع وقــت لبين ما
يشرف حبيب الأنسة
هارون - بس لازم تكون بكامل قواك
حتىٰ تستوعــب
اسكو :- أنت تحب تلعب وياي ؟؟
هارون - لـدرجة ما تتخيلها
اسكو :- بس ليش.؟؟
هارون - اللعب وياك ممتع
اسكو :- حبيبي والله استاذ
هارون - كافي خفة دم يا....
بعده ما مكمل دك مُبايلة سكت يستمع
للطرف الثاني بعدها أردف
هارون - مـاشي انتظرك يا ولــد جيبة
للبيت ع سريع
قفل الخط رمقني بنضرة انتصار مستمتع
بالي راح يصير
هارون - حبيبج وصل
تبارك - بس اريد اعرف شلون هيج بسرعة
تواصلت وياه وأنا صارلي سنة ادك علي ما
يجاوب حتىٰ رسايل ادزله ما رد ولا مره
عليه شلون رد عليك أنت بتحديد ؟؟
هـارون - اضاهر ما تعرفين جدج عدل يا بنت
صح سفرته برا البلد بس جنت متأكد بيوم من الايام راح احتاج وجوده بالعراق أما شلون عندي رقمة
فـ هذا شئ خاص بيه
اسكو :- هواي تبالغ حجي
هارون - حجي ؟؟
اسكو :- مادري حبيت الأسم هذا أكثر
ابتسم
هارون - صدكني أنا أكثر
رفعت حاجبي تحمحم ستقام من مكانة
بعث رسالة ماعرف المن دقائق ندار.علينا
ابتسم وبنفس اللحظة انفتح الباب
قلصت نضري من شفت جسم شاب يتحرك
بهستيرية عيونه عليهن وصلة قماش بينما
اديه مربطة
لازمه شخص من اتباع هارون تبارك ركضت
علي بس لزمها هارون من شعرها
تحركت اريد اوخرة بس سلاحة صار بوجهي
هارون - ارجع يا ولــد لا تستعجل
تبارك - فدوةةةةة جدووو لاااا تسوييي شئ
بس سمع صوتها تحرك بقوة أكبر وكدر
ينقذ روحة من الشخص الازمه بس بسبب
عيونه وادي ما كدر يسوي شئ
صوته عالي وهو يصرخ ويحجي
:- تباااارك حبيبتيييي روحييي وينججج
قبل لا يكمل كلامة ضربة بالسلاح على
راسة وكع مغمي علي صرخت بهستيرية
تبچي وتحجي بصوت مختنك
تبارك - معننننن فدوة لا تعوفنيي
مراااا ثانيةةة فدوةةة
بلعت ريكِ رفعت راسي لهارون ابتسم
هزيت راسي بلا عدت مرات
جسمي تصلب شرايين كلبي أحسها تريد
تنشلع من مُكانها
هارون - هل اسم يذكرك بمنوو ؟
اسكو :- اقسم بالي رفع سابع سمة
اذا طلع الـ بالي افجر روسكم واحد واحد
دنكت علي شلت الوصلة من عيونه شاب ابيضاني
الدم لطخ وجها ما عرفت منو
هارون - هذا هو معن صديق عمرك.....
قبل لا يكمل صرخت بصوت عالي سحبت
سلاحي وضربت اول واحد الشخص الضربة
براسة
اول طلقة بصدرة والثانية براسة والثالثة
برقبتة اجيت ادور حتى اضرب هارون بس هو
اسرع مني
ضربني طلقة بكتفي وكع سلاحي مني
غمضت عيوني وكعت بصفة رمشت عدت
مرات ابتسمت اباوع بوجها
مديت ايدي بكل هدوء لامست أيده
- معــن
اردفــت بصوت خافت دمعة أحسها مثل البركان
حركت خدي بعدها غمضت عيوني لفترة
طويلة ...
ما جنت اريد هيج نتقابل مو بهل طريقة
ولا بهذا الوضع ولا حتى بهيج ضروف
بس القدر مكتوب علينا
ما نكـدر نغيرة !
فـتحت عيوني
رجعت غمضت راسي أحسه طابوكة جوا
ثكيييل لدرجة ماكدر اشيلة أو اتحرك
حرارة بكل جسمي ايدي كلها وكتفي
نار وتسعر بي
بعد مرور دقائق طويلة كدرت افتح عيوني
ولكن حسيت بشي على راسي
وصوت هادء متوتر طرئ علىٰ مسامعي قريب
من اذني
معـن - عقـــاب
ابتسمت رغـم ألمي هامس بصوت
خافت
اسكو :- صوتك بأذني وينك
يا بعد الأهل كلهم أحسك قريب مني
معــن - هذا أنا فعلآ قريب منك
جسمي وروحي يمك عيوني تراقب عيونك
تفتحهن حتى تتأكد
اسكو :- ادري هذا حلــم خليني بحلمـي
ماريد افتح عيوني وما اشوفك يمي
معــن - افتح عيونك راح تشوف معـن واكف
فوك راسك بيده يمسح على صدرك
حسيت بأيد باردة على صدري بللت طرف
شفتي بوقتها فعلآ جنت أضن هذا حلم
مجرد خـيال !
بس من فتحت عيونـي كلشي بدى واضح
معـن وعيونه الخضر تلاكن بعيوني السود
غمضت عيوني ورجعت فتحتهن
اسكو :- أنت صدك معــن ؟
ضحك بصوت عالي
معــن - معقولة ما عرفتني ؟
اسكو :- صاير اجنبي وين اعرفك لك كواد
شهل جـمال
معــن - وأنت بعدك مثل ما عفتك
متكبر
مغرور
عصبي بس شئ بيك باقي ما متغير
اسكو - الي هو ؟
معـن - بعدك مستعد تموت بس حتى اعيش أنا
بعدك مستعد تضحي بحياتك حتىٰ تنقذ حياتي وتأخذ حگي مربع
اسكو :- تعال اريد احضنك
ضحك بصوت عالي شامر جسمة فوكي
كتمت صوتي اتنفس من خشمي بوتيرة سريعة
حضنته بكل قوتي
رغم جنت ما بيه اشيل راسي بچة بصوت
عالي ضربته على ضهرة كاتم دموعي وحجي
اسكو :- بعدك تبچي بسرعة مثل النسوان
معــن - ما ابالغ بس وحك ربي مشتاكلك أكثر
من ما مشتاك لـ تبارك
اسكو :- خرب هل شغلة لا عل بال ولا عل خاطر
طلعت أنت حبيب تبارك.!
وخر مني يمسح بدموعة صوته يرجف
من يحجي
معـن - مادري شنو سوتلي هل بنية خمس سنوات
بس نضرات بيناتنا بعدها هارون عرف
طردني من شغلي جنت اشتغل حارس احرس بيتهم
حسيتها مثلي طفولتها وحياتها صح عايشة
ابيت وعدها فلوس بس مو سعيدة
هارون جان متشدد عليها بحيث مرات المحها
تبچي من الشباك بعدها صارت هيه هم تباوع
عليه
مادري والله بدون ما احس فجاءة عرفت
نفسي حبيتها اعترف غلط ما جان لازم
احبها
بس صارت بعد وعرف هارون طردني من
الشغل رغم هل شئ بقينا على تواصل جنت
احبها فعلآ
وبيوم راجع من شغلي الجديد اعترضتلي
سيارة هارون خطفوني تعرضت للضرب
والتعذيب اسبوع كامل
بعدها طلب مني اسافر وهو يتكفل بكلشي
بس بشرط اعوفها
سكت
اسكو :- كمل شنو صار بعدها
:- رفضت طبعآ بس هددني إذا ما وافقت
راح يسوي نفس السوا بيه بـ تبارك
هارون عشت عنده خمس سنين عرفته
هو منو مستعد يقتل اقرب الناس اله
على مود مصالحة الشخصية
وافقت خوفآ من تنفيذ تهديده ما جان
بوقتها عندي فلوس جنت طالب واعيش
اجار واشتغل بنفس الوقت
نطاني فلوس وطلعلي جواز سفر طلب مني
اغير رقم مُبايلي وكتبلي عنوان شخص يعرفه
من راح اسافر هو يتلكاني هناك
خطط لكلشي بس حتى يبعدني عن تبارك
سافرت استقبلـني بالمطار شاب عراقي
صرنا اصدقاء بيوم واحد
قدمت على الدراسة وقبلوني سنة كدرت
احجي لغتهم طول هل سنة جانت تتواصل وياي
اسكو :- منين جابت رقمك ؟
معن - سألتها
منين جبتي رقمي ؟
ردت عليه تضحك
تبارك - بكته من مُبايل جدو
معن - اخاف لا يعرف ويأذيج
تبارك - لا منين يعرف عوفنا منه
ما ناوي ترجع
سكتت محتار شرد عليها ؟
معن - ارجع وداعت حبنا ما عوفج والقرأن
الكريم بس لازم نصبر
تبـارك - أحبك وراح ابقىٰ انتظرك للأبد
بس حباب لا تكطع بيه والله اموت من دونك
ماكدر اله اسمع صوتك على الأقل بالأسبوع
مرتين
معن - اخاف هارون يعرف ساعتها ما راح
اكدر انقذنج منه
قنعتها تنتبه وما ادك اله أنا ادك عليها
بقينا يمكن سنتين او اقل نتواصل
بس بيوم رجـعت من الجامعة للشقة مالتنا
لكيت شخص غريب داخل الشقة
سألته منو جوابة جان
- هارون يسلم عليك ودز بيدي رسالة الك
بلعت ريكِ بصعوبة هزيت راسي بمعنى
شنو الرسالة ؟
تقدم مني ضربني بوكس بعدها صار يضربني
بكل جسمي ما لحكت حتى ادافع عن
نفسي اخر شئ وقبل لا أفقد همس بصوت
خافت قريب مني
- ويكـول هذا تحذير اخير إذا ما يعوف
الأنسة تبارك يدزلك صورها مذبوحة
اسكو :- گـبر عقابك يا هارون
معن - اضطريت اتركها فترة بس ما كدرت
بعدها لأن اختفت ما دزت شئ خفت عليها
حاولت بكل الطرق اوصل الها
ماكـو بعدين عرفت هارون مغير الها رقم
المُبايل و مهددها
اسكـو :- شنـو درسـت ؟
معـن - دكـتور جامعي
اسكو :- شكد عمرك لعد ؟
مـعن - هارون طلعلي جنسية ماعرف اذا مواليدي الحقيقية او مجرد رقم بس الأعرفة حاليآ
عمري 25
اسكو :- شلون هيج كدر يلعب عليهم ؟
معن - عده اتباع بكـل مكـان
اسكو :- مصيبة چبيرة لازم نطلع منا بأسرع
وقـت شوف شنوو هذا المُكان
معـن - كعـدت قبلك مالكيت شئ مجرد
غرفة بيها حمام وزنزانة مقفولة اعتقد
شئ يشبة السجن
اسكو :- شلون عرفتني عقاب؟
ضحك
معن - كل عقلك ؟
ما عندي أحد يرمي نفسة بحلك الموت
غير شخص واحد الي هو
عقـــاب
اسكو :- تغير اسمي أفضل تلقبني
اسكو
معـن - اسكو ؟
اسم غريب
اسكو :- احسة لايك لشخصيتي تعودت علي
معـن - بس يبقى اسم عقــاب أحلىٰ
سولفلي انتَ شسويت وشنو صار بعد ما
تفرقنا كل هاي السنين وين عايش ؟
اسكو :- ما تعلمت شئ غير القتــل
اما وين جنت عايش فـ صدكني أنا ماعرف وين
جـنت عايش اصلآ
معــن - معـقولة ما تعرف ؟
اسكو :- وداعتـك ابو يزن
معـن - امرك غريب ابو عياش
كلبت عيوني بملل ضحك ضربني على كتفي
صحت بصوت عالي
اسكو :- اخخخخ
شال أيده بسرعة يتعذر ضرب رأسه
نسىٰ هو هم مصاب
معـن - اخخخخ راسـي خـرب
اسكو :- أثول طـول عمـرك تعال كرب
ساعدني اوكف
معـن - جرحك بعده ما طايب
اسكو :- يمعود تعودت علىٰ الجروح
قابل اول مره
معـن - بعدك مثل ما انتٓ سبحان الله
اسكو :- كافي لغوة زايدة مد ايدك
ساعدني
تنهد دنك سندني من ضهري اتنفست
بصوت عالي لزمت الحديد بدية باوعت
مقابيلي زنزانة نفس مالتنه
ممر طـويل ولكن قديم البناء عش العنكبوت
بكل مُكان
اسكو :- هذا سجن بس متروك محد موجود
ماخذينا الهم الكواويد
معن :- لـسانك
باوعتله بطرف عيني ضاحك بسخرية
هـزيت راسي
اسكو :- منو مداوي جروحنا ؟
معـن - مادري شئ اكيد همه منو غيرهم
سكتت ورجعت نضري للممر أثناء ما اباوع
لچحت رجل متمددة بالزنزانة المقابيلنا
تمامآ
ما جانت موجـودة قبل شوية !
عيوني عليها هامس بصوت محد يسمعه
بس القريب مني كلش
اسكو :- معـــن
درت وجهي اله اشرتله بيدي يجي
هز رأسه بمعنىٰ شكو هزيتله راسي بـ تعال
عاض شفتي
اجه مستغرب لزمت رأسه وجهته
للزنزانة هامس بأذنه
اسكو :- شوف ذيج مو رجل انسان لو أنا
متوهم ؟؟
قلص نضرة فتح عيونه على وسعهن
ضرب الزنزانة برجلة
معــن - تباااارك لك هاااي تبااارك ياا چلاااب
مجرمييين طلعونييي اشوفهاااا
لزمته خازره
اسكو :- أهدأ على كيف مو هيج تنحل
الأمور
يحجي بصوت مختنك خايف
معـن - تبارك عقاب تبارك
اسكو :- اششش على كيف كتلك
همه متقصدين يخلونك بهيج موقف
معـن - ليش ما تتحرك شوفها بس رجل
طالعه منها ليش ما تتحركك
اسكو :- خرب بليسك اسكت بس خلي
افكر دقائق لا تصرخخ
سكت
صدرة يصعد وينزل دموعه تلالي بوجها
تركته ورجعت اباوع فعلآ هاي رجلها
ماكو شئ ثاني غير رجلها دنكت للكاع
طلعت ايدي من الحديد سحبت حصوة
صغيرة
شمرتها يمها ماكو حركة
معـن - تبااارك تسمعينييي فدوةة تحركييي
تنهدت
اسكو :- هسه تكعد حالها من حالنا
معن - شنسوي شلون نطلع كلبي خايف عليها
اسكو :- لا تخاف هارون ما يأذيها من صدك
هو بس حب يلعب بعصابنه
سكت ضهرة على الحديد مدد رجلي
مثلي رافع رأسه للسماء
معـن - جنت خايف لا ارجع اعيش شعور
العجز والخوف والقتل حاولت بس ما كدرت
رجعت لنقطة الصفر كلشي يصير كاعد يذكرني بالطفولة
لـ دعلج
ولـ ضربة وحبسة
ساكت بس داخلي بركان يغلي الله ياخذك
هارون الله ياخـذك
معـن - تمنيت ارجع اشوفك مرا ثانية
بس مو بهل طريقة
ابتسمت
اسكو :- مثلك
بس مو مهم اهم شي احنا سوه
راح نطلع خليك متأكد واثق بيه
معن - ما ضنتي هـارون يخلينا
اسكو - ما يستـفاد شئ بحبسنا اكيد هو
هسه...
سكتت رفعت حواجبي
معن - ها شبيك ؟
لزمت الحديد وكفت اباوع بكل ركن
بالزنزانة
معن - شنو صار
اسكو - اكيد هسه هارون كاعد يتفرج علينا
وأحنا عاجزين ونفقد نفسنا !
معن - شلون عرفت ؟
اسكو :- مستحيل يفوت هل فرصة
معن - بس منين يباوع ؟
اسكو :- گامرة دور وياي شئ اكيد
اكو گامـرة
معن :- أنا ادور أنت ما تكدر جرحـك ينفتح
اسكو :- لا تـخاف عليه خاف على نفسك
معن - صـدكني ما خايف على نفسي
كد ما خايف على تبارك
كعدت تعبان جسمي بدى يعرك وألم براسي
وكتفي مكان الطلقة
معـن - ارتاح لا تتحـرك كوم ارجعك لمكانك
اتنفس سريع كاتم صوتي بشفايفي ساعدني
حتى اوكف سندني وصلني لمكاني تمددت
ضرب راسي خفيف ويحجي
معـن - اذا ارتفعت حرارتك اسويلك كمادات
ابتسمت رغـم ألمي
اسكو :- يطبني مرض عوفني بلكي أموت
معـن - ها هيج صار الحجي وانا عد منو ابقى ؟
اسكو :- عادي موت وراي
معـن - بس انا أريد اعيش
اسكو :- شحاليلك بهل حياة حتى تريد تعيش ؟
معـن :- أنت وتبارك اغلى شئ عندي بالحياة
وياكم اريد اعيش باقي حياتي كافي غربة
وخوف من الواقع خلينا نواجه هارون
همست قبل لا يغمى عليه
اسكو :- وروليـت نسيتها ؟؟
معـن - قصدك ديـار.!؟
هزيت راسي بأي
اسكو :- هيه هم بخط..بخطر .....
قبل لا أكـمل كلامي فقدت السيطرة على
نفسي بعد ما عرفت شنو صار ..
فزيـت على ماي بارد بلل ملابسي وجهي
شهكت اكح بصوت عالي باوعت بعيون خاوية
شفت هارون كاعد على كـرسي
بينما معـن لازمي ثنين من اكتافة مقـيدين
حــركتة
غمـضت عيوني اخذت نفس عدلت كعدتي
لازم كتفي بيدي اليسار
رفعت راسي لـ هارون
اسكو :- معــن خطـ أحمر بنسبة الي
احركك بناري وقطعك قطعة قطعة اشمرهن
للچلاب اذا سويت اله شئ
هارون - حاليا أنت وضعك ما يسمح تهدد
بس أسألك سؤال شلونه احساسك من تصاوبت ؟
اسكو -: عال العال بس تحرك هواي
هارون - بالخدمة يابة حبيت احققلك أمنية
من أمنياتك
اسكو :- خلي معن يروح بحال سبيلة
هارون - يروح يروح لا تشيل هم بس اكو
مُقابل
اسكو :- دومــك تطمع بيه هارون
هارون - أفضل تلقبني حجي
اسكو :- ما يلوكلك
هارون - خليـنا ندخل بصلب الموضوع
اذا تريد صديقك يعيش..
قاطعته
اسكو :- وتبارك وياه
هارون - وتبارك هم ثثنينهم أطلق سبيلهم
وخليهم عايشين بس هذا الشي واكف عليك
أنت
عيونه بعيـوني ويحجي رمشت عدت مرات ضاغط
على اسناني شئ اكيد الـ يريدة مو سهل
هزيتله راسي بمعنى شنو
طلع من جيبه مجموعة صور شمرهن عليه
دنكت اباوع شاب بمقتبل العمــر اسمر طويل
لابس ملابس شرطة
هــارون :- اريد منــك تنهي حياتة
رفعت راسي
اسكو :- مجــرم. ؟؟
هارون - لا
اسكو :- مغتصب ؟
معن - دير بالك توافق عقــاااب دير بالك
هارون - لا مغتصب ولا مجــرم
اسكو :- لعد ؟
هارون : ضابـط !
اسكو :- ضابط ؟؟؟
هارون - اي ضابط
صار فترة طويلة يسبب النا مشاكل
المنافـذ أمنها والطرق المشبوهة أغلقها
ألقى القبض على مسؤولين مهمين بالحزب
لازم بأقرب وقت نتخلص منه
اسكو :- أنت تعرف كلش زين أنا ما اقتل بس المجــرمين
هارون - هههه يبقى القاتل قاتل مهما تكون
شخصية المقـتول
اسكو :- ماكدر
هارون - تخسر صديقـك للأبد بعد بكيفك
معن - لا تسويها لا توافققق عقاااب
اسكو :- مــوافق بس عندي شرط
ابتسم هاز رأسه
اسكو :- روليـــت
هارون - شبيها ؟
اسكو :- أنا أعرف أنت السبب الرئيسي بمعرفة
باهر مكانها بشكد اشتراها منك ؟؟
هارون - هسه هذا كلامك مو بوقته ابد
تخلص المُهمة ونتفاهم على كلشي
اسكو :- شرطي هو تجيبها من باهر تخليها هنا
يم معن وتبارك كذالك
هارون - تبارك سهل بس روليت صعب
اسكو :- هذا الكــلام ما يصرفلي اشوفها
هنا أوافق ما اشوفها تحلم أوافق وبكيفك
بعد
بقى ثواني يباوع صافن عليه ضرب طرف جكارته
شمرها استقام من مكانة داعس الجكارة
برجلة رادف بصوت عالي
هارون : يااا ولــد عوفو
تركو معن ركض عليه يحجي بعصبية
معن - شبيك تخبلت شنو تكتل ونوب ضابط
مو أي شيء
اسكو :- لا تدخل أنت أنا اتصرف
معن - شلووون ما ادخل وأنت رايح للموت
بسببي يطبني مرض خلي اموت بس لا تروحح
عقاب
خزرته
اسكو :- اششش كافي
هارون - نص ساعة توشفهن كدامك
اسكو :- حلــو بس تأكد اذا تلعب عليه
يا هارون ساعتها محد يكدر يخلصك مني
هارون - الـغدر مو من شيمنة
ابتسمت هزيت راسي معن ما قابل بس
يحجي وينتر كاعد على اعصابي اهز رجلية
الثنين بتوتر
مر وكت سمعنا صوت اقدام رفعت راسي
وإذا بـ روليت لازمها باهر من أيدها انتفضت
عيونه بعيوني اجت خزرته ابتسم
بلعت ريكِ احاول اصيطر على اعصابي
دخلو جوه هيه تحاول تفرغ نفسها وهو لازمها
بقوة
باهر - وصلت البضاعة هارون
هارون : جيد خليها هنا شكو لازك بيها
دفعها بقوة متقصد لدرجة وكعت على وجها
صرخت بصوت عالي ركضت عليها كومتها
دفعتني خايفة
روليت :- وخررر عني لا تلزمني ايدك
عنييي
اسكو :- ما سويلج شئ اريد اساعدج بس اهدي
روليت :- جذاب شنو فرقك عنهم كلكم مجرمين
بس اريد اعرف انتم منو وشتردون مني
باهر :- بصراحة مزعجة بشكل الله يعينكم
هارون - احنا نكمل أنت توكل
باهر - بالخـدمة
دار على معن تقدم بخطوات صار قريب منه
طبطب على وجها
باهر - صديقنا العزيز ابو يزن
مشتاقين
قلص نضرة مستغرب
معن :- ما فهمت منو أنت.؟
باهر - له له بعدك غبي ومفهي مثل ما عرفتك
من قبل تذكر بيوم دعلج ضربك بس لأن
جذبت علي ؟؟
فتح عيونه
معن - منو أنت باهر لو بسام ؟؟؟
باهر :- باهر
معن - باهر !
بس ليش هيج شكلك وليش خاطف ديار ؟؟
هارون :- كافي اسألة عدنا شغل مهم
باهر - تأمر حجي
طلع باهر يمشي بثقة مبتسم رقمته بنضرة
جهنمية وعدت بيها نفسي راح ادفعه الثمن
غالي
هارون - وهاي صارت يمك جهز نفسك للمهمة
من باجر تبدي بيها الك 3 أيام وإذا خلصتها بوقت اقرب بعد احسن
تنهدت وجهت نضري عليها خايفة تباوع
وعيونها متروسة دموع وجها صاير أصفر
وجسمها تعبان مو مثل قبل
معن يهز براسة والدموع بعيونه تقدمت منه
طبطبت على راسة حاضنه بيد وحده
همست بصوت خافت بس هو يسمعه
اسكو :- خليت يمك أمانة دير بالك عليهن
صارن بشاربك بعد خليك قوي ما اتاخر
عليكم
معـن :- بعد عندك وقت تراجع لا تروح
للموت برجليك
ابتسمت بخفوت دفعته عني
اسكو :- ترا روليت وهيه صغيرة فاقدة الذاكرة
يعني ما تتذكر من طفولتها شئ لا أنا ولا أنت
خليك مطول خلك وياها
معن - بعيوني بس .....
اسكو :- راجــعلك وأخذ حكنا واحد واحد
تركت اغلى ثنين جنت عايش حتى اشوفهم
وسمع صوتهم ولو مره وحده
شكد جانت الدنيا قاسية وياي بوقتها
وشكد جنت حابس بروحي صرخات ودموع
وما اعرف دموع فرح لو حزن ثنينهن اختلطن سوية
مدري شبيها الدنيا وياي حتى الحض ما كاعد
حزن عُمــرين بعيوني وبــــعدني أضحك..
بعد ما تأكدت تبارك
وياهم حتى روليت ما تتقيد وحدها بغرفة
وياها معن مهما يكون تعتبرة شخص غريب وتخاف منه شي اكيد
شلون اخلي عيوني بعيونها استحي منها
خجلان هواي
بسببي عرفو مكانها أنا العميت عليها
جنت ادري مراقب بس اعتني لباب بيتهم
ومرات بس أمر من يمهم جنت أكول هنا عايش
ولفي مو بعيد وضحك وي روحي
واكول شبيك عقاب تسودنت ؟
هو أنت مال حُب حياتك بخطر كل يوم
مراقب من كل الأماكن والأوقات بيت ما عندك
سيارة ما عندك
قنعت نفسي بس اخلص من المهمة ادزهــا
لمكان أمن الها مني اريد احميها من نفسي
والبيئة الأني بيها
طلعت من المكان شفت باهر واكف يخابر
منطيني ضهرة ابتسمت بشر
طكيت رقبتي قابض على كف ايدي تقدمت
بخطوات هادئة حذرة وصلت وراه دفعته
وكع بالكاع على وجها
تمامآ مثل ما سوه بروليت بس كلبي ما
ارتاح بعده يريد يستوعب الصار خليت حذائي
فوك رأسه
صرخ يضرب بيه بينما رجلي ترتفع وتنزل
دنكت علي احجي من بين اسناني
اسكو :- لا عبالك اخليك تعيش حياتك
القذرة عادي غلطــان أنا اسكوبار شخص واحد
بوجوه هواي راح تحتار من حتى تعرف شخصيتي
اخليك تفقد عقلك وما تفهمني جايكم السرة
واحد واحد ورب الــعرش العظيم اكطع ايدك
المديتها على روليت وباجر تشوف
شلته من شعرة ضارب راسة بالكاع أغمىٰ عليه
بسقت علىٰ راسة وكفت متنهد خرب نفسي
بالكوه اجرة
سحبـت سلاحــة رميته بعيد عنا اخذت سويج
سيارته ضربته على بطنه بكعب حذائي
اريد اخلص علي بس مو بهل طريقة ولا بهيج مُكان اريدله مُكان خاص
شغلت السيارة بوجهي للصيدله جرحـَي نزف
والدَم ينزل بغزارة من كتفي رغم شايلين
الطلقة ومخيطين الجرح بس انفتح
دخلت الهث عاض شفايفي بالكوه حجيت
اخذت شاش معقم وأبــرة مهدىٰ
رجعــت للسيارة لحد ما وصلت للزقاق الضيق
بعد ماكــدر أتقدم أكثر نزلت شايل علاكتي بيدي
اتلولح
عيوني غوشن ما شوف بيهن واضــح
امشي واتعــثر وصلت للباب فتحته دخلت
للغرفة كاتم أنفاسي بصعوبة
نزعــت تيشيرتي الـ نملىٰ دم شامرة على الأرض
بعشوائية وكفت مقابيل مرايا مكسور نص
منها بس واضحه
جبت الديتول اخذت أنفاسي بهدوء حاولت
اسيطر على رجفت جسمــي فتحته بحلكي
شمرته بسرعة على الجرح
أنين طــويل طلع من ثغري يعبر عن مدىٰ ألمي
هيج مثل الجمرة وخليتها على الجرح
نضفتة خليتله قطن ولفيته بالشاش لحد ما
خلصت أنا ميت عشرين موته
كعدت على الكــرسي فاتح رجليه رجعت
راسي ورا مغمض عيوني رايح بسبات عمييق
كل عادة لازم اكعد على كابوس او ماي بارد
حلمت بكابوس ماريد احجي عنه خليته بيني
وبين رب العالمين بقيت مرتاح يوم كامل تقريبآ
الألم خف
صار لازم اشتغل على المُـهمة فتحت أحدىٰ
الخانات الموجودة طلعت مُبــايل صرصور قديم
دزيت رسالة طويلة بيها كلشي من تحت تخطيطي
رجعــت للحاسبة سويت شير كامل على
اسم الشخص المطلوب
ماكدر اذكر اسمه طبعآ متزوج صارله 4 أشهر
مرته حامــل يسكن في منزل 12 شـارع فلسطين قرب محل ****
جمعت كل المعلـومات عنه بيوم واحـد حتى موعد
نهاية دوامة وخروجة من مقر عملة
لبست جاكيت أسود ضميت شعري الخفيف بشفقة سوده بنطرون اسود وجفوف سود
بس وجهي ما خليت علي شئ هيج راح يشك
اذا شافني واكف بسيارتي قرابة متر عن مقر
عملة
اضرب بأصبع ايدي على السكان رفعت ايدي
اشوف الساعة العاشرة والنصف ليلا
تنـهدت بضيق تأخر فزيت على ضرب باب السيارة
درت وجهي وأذا بطفل لازم بيده بطل ماي
غمضت عيوني طارد الأفكار من راسي
نزلت الجامه ابتسم وحجه بصوت طفولي
متعــوب
عمو تشتري ماي
شكد اشوف روحي بيهم يا ترا شنو مصيرة
هذا الطفل هم راح يصير مجرم ؟
هم ينخطف وياخذون كليته و
يتاجرون بأعضائه ؟!
اسكو -: وين بيتكم ؟
اشر على الشارع
-ورا هذا الشارع
اسكو :- عايش وحــدك ؟
- لا أهلي عايشين
هزيت راسي انطيته فلوس بدون ذكر الرقم
فتح عيونه متفاجاء
- ذني هواااي عموو ماريدهن
اسكو :- أخذهن الك لا تطلع بعد بهيج وقت
ابقى بالبيت مو امان الدنيا
- شكرآ شكرآ الله يرزقك أن شاءالله أنت
انسان صــالح
اسكو :- يله طير لهلك
- والماي؟
اسكو :- أخــذه الك
- بس انا مو عطشان
اسكو :- مو مشكلة أخذه لأهلك
هز رأسه مبتسم راح وكل شوي يلتفت
يباوع عليه مو مصدك
مسحــت عيوني رفعت الجامة من شفته طلع
شغل سيارته تحرك وانا وراه بكل هدوء امشي
مبتعد عنه حتى لا اجيب الشبهات حولي همه بسرعة يشكون
لحد ما وصل لباب بيته انفتحله الباب ودخل هو
وسيارته رجـــعت لمكاني بعد ما اتأكدت من كلشي
ثالث يوم اليوم الأنفذ بي المُهمة
طلبت من هارون دراجة نارية وتكون حديثة
بسرعة أمنها الي بنفس اليوم بليل انتضرت بنفس المكان بس هل مرا على دراجة
غطيــت وجهي سلاحــي بضهري شغلت الدراجة
وتحـركت وراه بعد ما تحرك هو وصل لباب بيته
وكف وكفت أنا هم
مديت ايدي ورا ضهري سحبت أقسام لأن
اعرف راح ينزل بسبب عبارة على باب بيته
مكتوبه سبق وأن كتبتها
وكف يقرأ مصدوم حركت دراجتي خليتها
تصدر صوت لدرجة التفت عليه تحركت وصلت
مقابيله وجهت سلاحي علي
ضربته طلقتين ابطنه بقى يتحرك ما كدرت
ارمــي بعد بسرعة حركت
دك مبايلي أكثر من مرا ما رديت لحد ما اتخطيت
الصدمة رحت برجليه اله
اسكو :- المُهمة خلــصت
هارون - نجــاح أو فشل ؟
اسكو :- ينتضرني بجهــنم !
ابتسم بكل سعادة ربت على كتفي
رادف بأبتسامة عريضة
هارون - هذا هو اسكو براڤو يا ولـــد
نترت أيده راجع خطوه
اسكو :- باقي تنفذ وعــدك الي
هارون - تبارك ومعن أوافق على زواجهم
بس رولــيت تبقى عندي
اسكو :- شكد السعر ؟؟
هارون - ما فهمت ؟
اسكو :- بلا فهـمتني زين
هارون - بصراحة أي واحب كونك تفهم بسرعة
وما تكثر كلام
اسكو :- روليــت أنا اشتريها منك
هارون - غالية
اسكو :- ماكـــو أغلى من الروح
راح اشتـريها
هارون - ليش هل كد تريدها ؟
اسكو :- تكدر تكول مجرد نزوه مؤقتة
ضحك مستهزء
هارون - اعــتبرها هدية بمناسبة اتمامك
للمُهمة
اسكو :- تؤ اريدها بثمن مو هدية لأن الهدية راح
ترجعها مني بغير شغلة أنت اعرفك زيـن هارون
ما تنطي شئ أله اكو مقابل
هارون :- بكيفك
اسكو :- اشكــد السعر ؟
هارون - نتفاهم بس مو وحــدنا لازم كدامها
حتى يحلىٰ الوضع أكثــر !!
.
.
.
.
يتبــــــــــــع 🍃
للقصة بقية🔥
من بعد انقطاع فترة من الوقت عدنا لكم من جديد إلى الأثارة والتشويق في اسكوباااااار
حبيت 🤣🤣
بعدنا بالبداية 😉
شدو روسكم يا كرعان على المصايب الراح تصير والصدمات الغير متوقعة 🔥😔
راح تحسون نفسكم داخلين متاهة 🤣
المهم حبايبي
🚫اهم شي تصوتون للبارت وتعلقون خوشششش
ترا ازعل 😔
غناتي التلي
https://t.me/imartil
مع ألف سلامة
ميان أل مالكي